ಕಾಲೆ,ಕಾಲೆ ಕೋಲ,ಎರು ಕೋಲ

         ಕಾಲೆ,ಕಾಲೆ ಕೋಲ,ಎರುಕೋಲ ಕಲಾಯಗುತ್ತು ಕಕ್ಕೆಪದವು 

  

ಕಾಲೆ ಪಂಡ ಯಮೆಂದ್ ಹಿರಿಯ ಪೆರಿಯಾಕ್ಲ್ ನಂಬುದಿತ್ತೆರ್.ನರಮಾನಿ ಜೂವ ಬುಡ್ ನಗ ಆಯನ ಜೂವೊನು ಕಾಲೆ ಕೊನೊಯೆರೆ ಬರ್ಪೆ.ಬನ್ನಗ ಆಯನ ದಂಡೊನು ಮೂಲು ದೀದ್ ಪೋಪೆಗೆ.ದಂಡೊನು ಕೊನೊಯೆರೆ ಪಿರ ಬನ್ನಗ ಕುಡೊಂಜಿ ಜೂವೊನು ಕೊನೊದು ಪೋಪೆಗೆ.ಅಂಚ ಕಾಲೆ ದೆತ್ತೊಂತೆರ್ತೀರ್ದ್ ಪೋಯಿನ ಇಲ್ಲಲ್ ಪುಣ ಜೆಪುಡಾಯಿ ಜಾಗೆಡ್ ಒಂಜಿ ಚೆಂಬು ನೀರ್ ಸಾವುದಾನಿಮುಟ್ಟ ಮಗ್ತೆ ಮಗ್ ತೆ ದೀವೊಂತೆರ್.ನರಮಾನ್ಯನ ಒರುನು ಬೈಟ್ ಮಲ್ತೊಂತೆರ್.ಕಾಲೆ ಇಲ್ಲದುಲಯಿ ಉಪ್ಪುನಗ ಇಲ್ಲದಕುಲು ಇಲ್ಲದ ಪಿದಯಿ ಕುಲ್ಲೊಂತೆರ್.ಕೆಲವೆರ್ ಕಾಲೆ ಕರಿನೇಟ ಕುಟುಮದ ಬೇತೆ ಇಲ್ಲಲ್ ಪೋದು ಕುಲ್ಲೊಂತೆರ್.ಅಂಚನೆ ಕಾಲೆ ಪಿದಾಯಿ ಪೋನಗ ಇಲ್ಲದ ಪಿರವುದ ಮರತ ಪಜ್ಜಿ ಗೆಲ್ಲ್ ಪೊಳಿದ್ ಬೂರುಂಡುಗೆ.ಕೆಲವೊರ ಮರ ರಡ್ಡ್ ತುಂಡಾದ್ ಲ ಬೂರುಂಡುಗೆ.ಅವೆಟ್ ನೆಲ ಕಾಲೆ ಬಾರೀ ಅಪಾಯ.ಏರಾಂಡಲಾ ಪಕ್ಷಪಾತೊಡಾ,ಸಿರ್ಕ್ ಡಾ ಬಾರ್ಯಾತ್ ಸಮಯ ಜೆತ್ತ್ ನೌಲಿತ್ತ್ ದ್ ನರೆಲ್ ಬರೆಲ್ ದ್ ಕರಿದ್ ಪೋಯೆರ್ ಡ ಅಕ್ಲೆನ ಕಾಲೆನ್ ನೆಲ ಕಾಲೆ ಪನ್ಪೆರ್.ಅವು ದುಮಾರ್ ಸಾವು ಕರಿನ‌ಬೊಕ್ಕಲ ಸುಮಾರ್ 48 ದಿನ ಮುಟ್ಟಲ ಉಪ್ಪುಂಡುಗೆ.ಅಂಚನೆ ಕಾಲೆ/ನೆಲಕಾಲೆ ಏರೆಗಾಂಡಲಾ ಹಾಕ್ಂಡ ಅಕುಲ್ಲ ಜೆತ್ತ್ ನೌಲಾಪೆರ್ ಗೆ.ಅಂಚಾದ್ ಕಾಲೆ ದೆಪ್ಪುನ ಬಾರೀ ಎಡ್ಡೆ. 

  

ಕಾಲೆ ಹಾಕುನಿ ಪಂಡ ಮಾಯಾ ದೃಷ್ಠಿದ ದೋಷೊಲು.ದಾದಾಂಡಲ ವಾಕ್ ದೋಷ,ಶಾಪ ದಾದಾಂಡಲ ಇತ್ತ್ಂಡ ಅಂಚಿನಕ್ಲೆನ ಕಾಲೆ ದಿಂಜ ದಿನ ಒರಿಯುಂಡು.ಆ ಕಾಲೆ ಬೇತೆಕ್ಲೆಗ್ ಹಾಕುಂಡು.ದುಂಬು ತೆರಿನಕುಲು ಈತ್ ದಿನತಾನಿ ಕಾಲೆ ಪೋವು,ನಿಕುಲು ಇಲ್ಲದ ಮಾಡ್ ದ ಮಡಲ್,ಮುಳಿ ತೆಲಪಾಲೆ,ಓಡು ದೆತ್ತ್ ದ್ ನಿಕುಲು ಅವೆಕ್ ಪೋಯೆರೆ ಸಾದಿ ಕೊರ್ಲೆ,ಅವು ಪೋಪುನ ದಿಕ್ಕ್ ಡ್ ನಿಕುಲು ಉಂತೊರ್ಚಿ,ಕುಲ್ಲೊರ್ಚಿ,ಜೆಪ್ಪೊರ್ಚಿ,ವ್ಯವಹಾರ ಮಲ್ಪೊಡ್ಚಿ ಈತ್ ದಿನಮುಟ್ಟಂದ್ ಪನೊಂತೆರ್

ವೀಡಿಯೊ-https://youtu.be/trKrrzUmA08

https://youtu.be/IumP-0l0quk

ಪೊಸ ಕುರಲ್ ಕಟ್ಟುನಿ,ಇಲ್ಲ್ ದಿಂಜಾವುನಿ, ಪೊಸರಿತ ಪುದ್ದರುನ್ಪುನಿ

     ಪೊಸ ಕುರಲ್ ಕಟ್ಟುನಿ,ಇಲ್ಲ್ ದಿಂಜಾವುನಿ, ಪೊಸರಿತ ಪುದ್ದರುನ್ಪುನಿ

ಚೌತಿ ಪರ್ಬ

                              ಚೌತಿ ಪರ್ಬ

          

ಕಂರ್ಬುದ ಅಟ್ಟೊಳಿಗೆಡ್ ಬಾಮ ಕುಮಾರನ ಆರಾದನೆ

  

ಸುಳ್ಳಮಲೆ  ಚೌತಿದ ಕೂವೆ(ಗುಹಾ) ಸೀರ್ತ ಮೀಪುಗು ಕೇರ್ಪು ದೀಪುನ ಕೆರಮ.ಚಿತ್ರಕೃಪೆ -ಸಚಿನ್ ರೈ ಮಾಣಿ.

        ಬೆನ್ನಿ ಸಾಗೊಳಿದ ತುಳುವಪ್ಪೆಗ್ ವರ್ಸ ಇಡೀ ಪರ್ಬ ಪರ್ವೊಲೆನ ಉಚ್ಚಯೊ. ತುಳುನಾಡ್ ಡ್ ಆದಿಡ್  ದೈವದ  ಬಲಬಾಗೊಡು ಉಂತುದು ದೈವೊಲೆಗ್ ಬಲ ಕೊರೊಂತಿನ ತುಳುವ ಬೆಮ್ಮೆರೆಗ್  ಸುರುತ ಸುತ್ತೆ ಇಪ್ಪೆದ್ಂಡ್,  ಸುರುತ ತಂಬಿಲ ಇತ್ತ್‌ಂಡ್. ಅಂಚೆನೆ  ಒವ್ವೆ ಕಜ್ಜೊಲೆದ ದುಂಬತ್ತ  ಬೆಮ್ಮೆರೆಗ್ ಉರ್ಪೆಲರಿತ ಸುತ್ತೆ ದಿವೊಂತೆರ್.  ತುಳುವೆರೆಡ ತುಳುನಾಡ್ಗ್ ದೇವೆರೆ ಆರಾಧನೆ ಬರ್ಪುನ ದುಂಬು  ದೈವೊಲೆ ಆರಾಧನೆ ಇತ್ತ್‌ಂಡ್  ರಡ್ಡ್ ತುಂಡು ಕೊಡಿ  ಬಂಗ ಬಾರೆದಿರೆ, ಉರ್ಪೆಲರಿ ಪಾಡ್ಡ್  ಪಂಚೋಲಿ ಬಚ್ಚಿರೆ ದೀದ್, ಒಕ್ಕಣ್ಣ ಬಜ್ಜೆಯಿ, ಮುಕ್ಕಣ್ಣ ತಾರಾಯಿದ ಸುತ್ತೆ ದೀವೊಂತೆರ್. ವೈದಿಕ ಆರಾಧನೆ ತುಳುನಾಡ್ಗ್ ಬತ್ತಿ ಬೊಕ್ಕ  ಉರ್ಪೆಲರಿತ ಬದಲ್ ಬೊಳಂತೆ ದೀಪೆರ್‌. ಇನಕನ ಸುತ್ತೆ ದೀವೆರೆ ಸುರು ಮಲ್ತಿ ಬೊಕ್ಕ ಚೌತಿಗ್ ಇನಕೆ ದೀದ್ ಒರಿನಂಚ ಪೂರ ಕಜ್ಜೊಲೆದ ಸುರುಕು ಇನಕಗ್ ಸುತ್ತೆ ದೀಯರೆ ಸುರು ಮಲ್ತೆರ್. ಅಡ್ಡ ವಿಡ್ಡೂರೊಲೆನ್ ತಟ್ಟ್  ಪಾರಾವೆ ಪನ್ಪಿ ನಂಬೊಳಿಗೆ. ಉಂದೇ ರೀತಿ ತುಳುನಾಡ್ ಡ್  ಮಾರಿ  ಮಗ್ಗಿನ್ ಕಳೆಯೆರೆ ಅಡ್ಡ ವಿಡ್ಡೂರೊಲೆನ್ ಕಡಪ ರಾಜ್ಯೊಗು ಪಾಡ್ಯೆರೆ ಆಟಿ ಕಳೆಂಜನ,ಮಾಂಕಾಳಿನ, ಮಾರಿನ ಗೊಂಬೆ ದೇರುನ ಆರಾಧನೆ ನಡತೊಂತ್ಂಡ್ . ತಾರಾಯಿ  ಜುಟ್ಟುದವಾಂಡ ಬಾರ್ಯತ್ ಕಾಲ ಹಾಳಾಪುಜಿ ದೈವರಾಧನೆದ ಕಟ್ಲೆದ ಗೇನೆದ ಕೆಲವೆರ್ ದೇವೆರ್ ಬೊಕ್ಕ  ದೈವೊನು ತಕ್ಕಡಿಯರಿವಾಣೊಡು ತೂಕುದು ಕಟ್ಟ್  ಕಟ್ಲೆ  ಬೊಕ್ಕ ಷೋಡಷೋಪಚಾರೊಲೆನ್ ಒಂಜೆ ಕೊಂಜಿ ಓಲ್ಪಡಿ ಮಲ್ಪರೆ  ಬ್ರಹ್ಮ ಜ್ಞಾನಿಲಾಪೊಂದುಲ್ಲೆರ್.  ಆಂಡ ದೈವ  ದೈವನೆ ,ದೇವೆರ್ ದೇವೆರೆ. ಇನಕಗ್  ಸುತ್ತೆ  ದೀನಗ ಕೈ ಮುಗಿನಗಲಾ  ದೈವ ದೇವೆರ್ ದೀಲೆಕಾಪುಂಡುಂದೆನ್ನ್ ದ್  ಕೈ ಮುಗಿಪ.  ತುಳುವೆರೆಗ್ ಪಾತೆರಂದಿ ದೇವೆರೆರ್ದ್  ನರಮಾನ್ಯನ  ಮಿತ್ತ್ ಬತ್ತ್ ದ್ ಪಾತೆರುನ  ದೈವನೇ ಪ್ರದಾನ  ಆದುಂಡು. ಕಂರ್ಬುದ ಮುದೆಲ್ಡ್ ಕಂಜಿಕೈಕಂಜಿದೊತ್ತುಡು, ಕಂಡೊಡು ಬೆನ್ನಿಸಾಗೊಳಿದೊರುಟು  ಗಣಪತಿನ ಮೂಲ ಉಂಡು.  ಕದಿಕೆ, ಅಂಬಿ ಸೇಡಿ ಉಂದೆಕ್ ಸಾಗ್ಸಿ.

                ತಾರಾಯಿ,ಕಂರ್ಬು ಗಳಸ್ದ್ ಗಣಪತಿ ಪೂಜೆ              

                         ತುಳುನಾಡ್ ಡ್ ಬಾರಿ ಪಿರಾಕಡೇ ಕಂರ್ಬುದ  ಅಟ್ಟೊಳಿಗೆಡ್ ,ಮೂರ್ತಿ ಪೂಜೆ  ಬರ್ಪುನ  ದುಂಬು ಇನಕನ ಆರಾಧನೆ ಮಲ್ತೊಂತೆರ್. ನಮಕ್  ಬರ್ಪುನ  ಅಡ್ಡ ವಿಡ್ಡೂರೊಲೆನ್ ದೂರ  ಮಲ್ಪುನ  ಗಣಪತಿಗ್  ಆನೆದ ತರೆ ನರಮಾನ್ಯನ ಸರ್ರ.  ಸುರುತ ಪೂಜೆ ಯಾಂಡ ,  ಸಾಯದ  ಗಾಳಿ ಬೀಜಿದ್  ಮಾಯದ ನೆಲೆತ  ಗಂಧ ಕೊರ್ಪುನ  ಮೂಲ ಮೈಸಂದಾಯಗ್ ಬೆನ್ನಿ ಸಾಗೋಳಿಗ್  ಮೆಯ್ ಸಂದಾಯ್ತ ಮಲ್ತಿನ  ಒರವಾದ್ ನೆನವರಿಕೆ  ಮಲ್ತೊನೆರೆ ಸುರುತ  ಕೋಲ ನೇಮ , ಎರುತ ತರೆ ನರಮಾನಿ ಸರ್ರೊಡು ಆರಾಧನೆ  ಮಲ್ಪುವೆರ್ .ಇನಕಗ್ ಕದಿಕೆ ಪಂತಿ ಎಣ್ಮೆ ಆವಾರಾಂಡ ಮೈಸಂದಾಯಗ್(ಬೈ,ಪಜಿರ್,ಪಂತಿ) ತುಳುನಾಡ ಸುರುತ ಬಿದೆ ಕುಡುತ ಆವಾರ.ಇನಕಗ್  ಬೊಳಂತರಿ ಸುತ್ತೆ ಯಾಂಡ  ಮೈಸಂದಾಯಗ್ ಪೇರ್,ಬೊಂಡದ ಆಸರ್.  ದೇವೆರೆಗ್  ಎಣ್ಮೆದೆಣ್ಣೆ ತುಡರಾಂಡ ದೈವೊಲೆಗ್ ತಾರಾಯಿದ  ಎಣ್ಣೆದ   ತುಡರೇ ಆವೊಡು. ದುಂಬು ಸೇಡಿದ ಬಾವೆ ಮಣ್ಣ್ ಡ್  ಇನಕನ ಮೂರ್ತಿ ಮಲ್ತೊಂತೆರ್. ಸಂಸ್ಕೃತೊಡು  ದೂರ್ವಾ ಗಣಪತಿನ ಆರಾಧನೆ  ತೆರಿದ್ ಬಪುಂಡು . ದೂರ್ವಾ ಪಂಡ  ಕನ್ನಡೊದ ಗರಿಕೆ  ತುಳುಟಾನಗ ಕದಿಕೆಂದರ್ಥ.  ಅಂಬಿಡ್ ಕದಿಕೆ ಪಂತಿ ನಡ್ದ್  ಬುಳೆ  ಬಾಗ್ಯೊನು ನೇರ್ಪು  ಮಲ್ತೊಂತೆರ್ . ಪಾರೊತಿ ಬೆಗಗರ್ ಡ್  ಬಾಲೆನ್ ಉಂಡು ಮಲ್ತಲ್  ಪಂಡ ಬೆನ್ನಿ ಬೆನೊಡಾಂಡ ಬೆಗರ್  ಜಪ್ಪೊಡು. ಬೆಗರ್ ಜತ್ತ್ಂಡ  ಬುಳೆ ಸೆಲೆ ಎಚ್ಚಿದ್ ಬರ್ರೆ ಸಾದ್ಯ, ಇನಕಗ್ ಮಾಸದಟಿಲ್ದ ಪನಿವಾರ ಆದಿಡ್ ತುಳುನಾಡ್ ಡ್ ಇತ್ತ್ಂಡ್ಂದ್ "ಮಾನವ ಗೃಹ್ಯ ಸೂತ್ರೊ"ಡು ಪನ್ಪುಂಡು .  ದೈವಾರಾಧನೆಡ್  ಇನಿಲಾ  ತುಳುನಾಡ್ ಡ್  ಕಲಿ , ಗಂಗರ , ಕೋರಿಮಾಸದಗೆಲ್ ಪಾಡುನ  ಕಿರಮೊ ಉಂಡು . ವೈದಿಕತೆ ಬತ್ತ್ ದ್ ಅಮ್ಲ ಪೊರಿ ಬೊಂಡ  ತಂಬಿಲ ಕಟ್ಟುವೆರ್ . ನಾಗಾರಾಧನೆಡ್ಲಾ ಡಕ್ಕೆಗ್ ಬಲಿ ಪೋದು ದುಂಬುಗು  ಡಕ್ಕೆಬಲಿಂದಾಂಡ್ .  ಈ ಡಕ್ಕೆಗ್ ಕೋರಿದ,ಪ್ರಾಣಿಲೆನ  ಬಲಿ ಕೊರೊಂತೆರ್ .ಜಕ್ಕ – ಜಕಣಿ , ಯಕ್ಷ- ಯಕ್ಷಿಣಿ,  ಜಕ್ಕ – ಡಕ್ಕೆ  ಅಂಚ  ಡಕ್ಕೆದ ಇಚಾರ ಪದ್ ರೊಂದು ಪೋಪುಂಡು  ಆಂಡ ಡಕ್ಕೆ ಬಲಿ ಪೋದು ಇನಿ  ಬ್ರಹ್ಮ ಮಂಡಲ  ಆದ್  ಪೋಂಡು ದೈವೊಲೆನ ಪಾಡ್ದನೊಲೆಡ್ಲಾ ಬೂಮಿ ಉಂಡಾನಗ ಕದಿಕೆ  ಪನ್ಪಿನ  ಪುಲ್ಲು  ಉದಿತ್‌ಂಡ್ ಪನ್ಪಿ ಇಚಾರ  ಬರ್ಪುಂಡು  ದೈವ ದೇವೆರೆಗ್  ಮೀನ್ ಮಾಸ ತಿನ್ಪುನಾಯೆ, ಕಾಯಿಕಜಿಪು ತಿನ್ಪುನಾಯೆ ಪನ್ಪಿನ  ಏದಬೇದ ಇಜ್ಜಿ.  ಅವು ಪೂರ  ಇಂಚಿಪ್ಪದವು. ಜೈನೆರ್ ಸಸ್ಯಹಾರಿಲಾದಿತ್ತ್ ದ್  ಅಕ್ಲೆಲೆಕನೆ ಅಕ್ಲೆಡ್ದ್ ಒಂಜಿ ಮೊಟ್ಟು  ಮಿತ್ತ್ ಉಂತೊಡು ಪನ್ಪಿ  ಚಿಂತನೆದ  ಒಂಜಿ ವರ್ಗ  ಮೀನ್ ಲೆನ್ ಬುಡ್ದು  ಸಸ್ಯಾಹಾರಿ ಆಯಿನ  ಇಚಾರೊ  ಚರಿತ್ರೆನ್ ತೂನಗ  ತೆರಿಯುಂಡು .  ದುಂಬು ಯಜ್ಞ ಯಾಗಾದಿಲೆಗ್ ನರಬಲಿ  , ಪ್ರಾಣಿ ಬಲಿ  ಕೊರೊಂತೆರ್ ‌ ಕಾಳಿಗ್,  ಚಂಡಿಗ್ ನೆತ್ತೆರಾವಾರ  ಬೋಡು. ಆಂಡ ಇನಿ  ಕುಂಬುಡ ಕಡ್ತ್ ದ್  ಸುದಾರಿಯೊಂದುಲ್ಲೆರ್  ಕಲೊಕು ವೈದಿಕ  ಆರಾದನೆ ಬತ್ತ್ ದ್ ಅಡೆಗ್   ಸುದ್ದಾಚಾರ ಸೇರೊಂಡು.

            ಕಂರ್ಬುದ ಅಟ್ಟೊಳಿಗೆಡ್ ಗಣಪತಿನ ಆರಾದನೆ

                     ಬೆನ್ನಿ ಸಾಗೊಳಿನ್  ನಾಡ್ ಪತ್ತಿನಿ  ಮೂಲ ಜನಾಂಗದ  ಒರ್ತಿ ಪೊಂಜೊವುಂದು ತುಳುನಾಡ  ಬುಳೆಸೆಲೆತ  ಬಗೆಟ್  ತೆರಿನಗ  ಗೊತ್ತಾಪುಂಡು ಇನಿಲಾ ಪೊಂಜನಕ್ಲೆಗ್  ಬೆನ್ನಿಸಾಗೊಳಿಡ್  ಅಕ್ಲೆನವೇ ಆಯಿನ ಮಾನಾದಿಗೆ  ಉಂಡು. ಮೂಲು  ಪೊಣ್ಣನ ಬೆಗರ್ಡ್  ಗಣಪತಿ ಉದಿತೆ  ಪನ್ಪುನವ್ಲ  ಪೊಸತಾಯಿನ ಒಂಜಿ ಬುಳೆ ಉದಿತ್ಂಡ್ಂದ್  ತೆರಿಯೊನೊಲಿ.  ಬೋಂಟೆರ್ದ್ ಬೆನ್ನಿ ಸಾಗೊಳಿ ,ಬೆನ್ನಿ ಸಾಗೊಳಿಗಾದ್ ಕಂಜಿ ಕೈಕಂಜಿ ,  ಕೈಕಂಜಿಲೆಗಾದ್  ಪಜಿರ್ ಪಂತಿ,  ಅಂಬಿದ  ಮಿತ್ತ್ ನಡ್ನ  ಕದಿಕೆಗ್ ಪೂಜೆ, ಉಂದೆನ್ ಪೂರ ತೂನಗ  ಪಾರೊತಿ- ಗಣಪತಿ- ಬೆನ್ನಿ ಸಾಗೊಳಿದ ನಡುತ ಸಂಬಂದ  ತೆರಿದ್  ಬರ್ಪುಂಡು .  ನಮ್ಮ ಶರೀರೊಡ್ಲಾ ಮೀವಂದೆ  ರಡ್ಡ್ ದಿನ  ಆದ್  ಸರ್ರದ ಒವ್ವಾ ಒಂಜಿ ಜಾಗೆನ್ ಬಿರೆಲ್ಡ್ ಜೊರು  ಉರ್ದುನಗ  ಮಣ್ಣ್ ದಲೆಕ ಬರ್ಪುಂಡು . ಉಂದೆನ್  ಆದ್ಯಾತ್ಮೊಡು  ಪೃಥ್ವೀ ತತ್ವ ಪನ್ಪೆರ್. ಉಂದೆನ್ ತೂನಗ "ಸೆಗಣಿಯ  ಬೆನಕಂಗೆ  ಸಂಪಿಗೆಯರಳಲ್ಲಿ" ಪನ್ಪಿ ಜಾನಪದ ಸಾಲುಲು  ನೆಂಪಾಪುಂಡು.  ಬೊಂಟೆನ್ ಬುಡ್ದು ಬೆನ್ನಿಸಾಗೊಳಿ ಮಲ್ಪುನಗ ಅಪ್ಪೆ ಗೌರಿನ್ ಬೂಮ್ಯಪ್ಪೆನ ಬೆನ್ನಿ ಸಾಗೊಳಿದೊರುಟು ಒರ್ತೊಂದು ಇನಕನ್ ವರ್ಷೊಗೊರ ಲೆತ್ತ್ ದ್ ಬಂಜಾರ ತಿನ್ಪಾದ್ ಪೊರ್ಲುಡ್ ಕಡಪುನ ಕಿರಮಲಾ ತುಳುನಾಡ್ ಡುಂಡು. ಬೆನ್ಪುನ ಬುಲೆಪುನ ಬುಳೆ ಗಣಪತಿಯಾಯಿನೆರ್ದಾತ್ರ ಆಯನ್ ಒಂತೆ ಪೊರ್ತು, ಕಾಲೊಗು ಕುಲ್ಲವೆರೆ ಬೋಡಾದ್ ಮಣ್ಣ್ ದ ಗಣಪತಿನ ಮೂರ್ತಿ ಮಲ್ಪುವೆರ್. ದೈವದ ಕಲೊಟು ಆಯುಧ ಕಲೆ, ಮಣ್ಣ್ ದ ಕಲೆಂದಿಪ್ಪುನಗ ದೇವೆರೆ ಆರಾಧನೆಡ್ ಮಣ್ಣ್ ದ ಮೂರ್ತಿಗ್ ಬಿಲೆ ಜಾಸ್ತಿ. ಒಂಜೇ ಕಲ್ಲ್ ದ ಮೂರ್ತಿಯಾಂಡ ಮೂರ್ತಿ ಬುಳೆವುಂಡು. ಉದಾರ್ಮೆ-ಗೊಕರ್ಣ, ಇಡಗುಂಜಿ,ಮಧೂರು ಗಣಪತಿ.ಮಣ್ಣ್ ದ ಮೂರ್ತಿಲೆಡ್ ಪುರಲ್ದಪ್ಪೆನ ಮಣ್ಣ್ ದ ಮೂರ್ತಿಲ ಒಂಜಿ. ಮಣ್ಣ್ ದ ಗಣಪತಿನ್ ಬಾರ್ಯಾತ್ ದಿನ ದೀಂಡ ಗಣಪತಿ ಜಾಸ್ತಿ ಬುಲೆಂಡ ಆವಾರಲಾ ಜಾಸ್ತಿ ಬೋಡು. ದೊಂಬುಗು ಮಣ್ಣ್ ದ ಮೂರ್ತಿ ಎಚ್ಚ ದಿನ ದೀಂಡ ಪುಡದ್ ಒಡಕ್ ಬರ್ಪುಂಡು. ಇನಕಗ್ ಕರ್ಂಬು ಇಷ್ಟ .ಆಂಡ ಎರ್ಲೆಗ್ ಕುಡು ಇಷ್ಟ. ಕುಡುರ್ದು ಬೊಕ್ಕ ಅರಿ ಉದಿತ್ ನವು. ಕುಡು- ಅರಿ ಪೊತುದ್ ಕುಡ್ವರಿಯಾದ್ ಕುಡ್ವರಿ ಪೋದು ಕುಡರಿಯಾಂಡ್. ಕುಡು ಅರಿನ್ ಬೂಮ್ಯಪ್ಪೆನ ನೆಂಪುಗಾದ್ ಕೆಡ್ಡಸದಪಗ ನನ್ನೆರಿ ಮಲ್ತೊಂದು ಬೂಮ್ಯಪ್ಪೆಗ್ ಆವಾರ ಕೊರ್ಪೆರ್.

 ತೊಲಚಿ ಕಟ್ಟೆದೆದುರು ಚೌತಿ ಬಲಸ್ ದಿನಿ

            ಚೌತಿಗ್ಲಾ ತುಳುನಾಡ ಕುರಲ ಪರ್ಬೊಗ್ಲಾ ಸಮ್ಮಂದ ಉಂಡು . ಕೆಲವೆರ್ ಮಾರ್ನೆಮಿಗ್ ಕುರಲ್ ಕಟ್ಯೆರ್ಡ, ಬೇಸ್ಯೊಡು ಎಡೇನ ಬರ್ಸ ಬತ್ತ್ ದ್ ಎಣೆಲ್ದ ಬೆನ್ನಿ ಮಲ್ತೊಂದು ಚೌತಿಗಾನಗ ಕೊಯ್ಯೆರಾಪುಂಡು. ಬರ್ಸ ಮಿನಿ ಕಡೆಸ್ಂಡ ಚೌತಿಗ್ ಕುರಲ್ ಕಟ್ರೆ ತಿಕ್ಕುಜಿ. ಅಪಗ ಮಾರ್ನೆಮಿಗ್ ಕಟ್ಟುವೆರ್.ಚೌತಿದಾನಿ ಬೊಲ್ಪುಗು ಲಕ್ಕ್ ದ್ ಜಾಲ್ ಗ್ ಅಂಬಿನೀರ್ ತಲ್ತ್ ದಾ ,ಅಂಬಿ ಪೂಜಿದಾ ಅತ್ತ್ಂಡ ,ಅಂಬಿ ಅಡ್ತ್ ದಾ ಜಾಲ್ ಸುಧ್ದ ಮಲ್ತೊಂದಿತ್ತೆರ್.ದೈವೊಲೆಗ್ ಪರ್ವ ಕರಿತ್ ದ್, ಕಂಡೊಗು ಪೋದು ,ಕುರಲ್ ಕೊಯ್ದ್ ಇಲ್ಲದೆದುರ್ ತುಳಸಿ ಕಟ್ಟೆದೆದುರು ದೀಪೆರ್. ತನ್ಕ್ ತೆರಿದಿ ರೀತಿಡ್ ಪೂಜೆ ಮಲ್ತುದ್ ಗೆಂಡತುಡರಾರತಿ ತೋಜಾದ್ ಕುರಲ್ನ್ ಕಾಂಟ್ಯೊಡು ದೀದ್, ಅವೆತೊಟ್ಟುಗು ಮೂಜಿಬಗೆತ ತಪ್ಪುದೀದ್ ಇಲ್ಲದ ಯಜಮಾನೆ ತರೆಟ್ ತುಂಬೊಂದು ಪೊಲಿ ಲೆತ್ತೊಂದು (ಪೊಲಿ.. ಪೊಲಿ.. ಪೊಲಿಯೇ... ಪನೊಂದು)ಇಲ್ಲಗ್ ಮೂಜಿ ಸುತ್ತು ಬತ್ತುದ್, ಕರಲ್ ನ್ ಇಲ್ಲದುಲಯಿ ದೇವೆರೆ ಅದೆಟ್ ದೀಪೆರ್.ದೇವೆರೆ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬು ದೈವದ ಮಣೆ ಮಂಚವುದೆದುರು ದೀವೊಂತೆರ್. ಇಲ್ಲದುಲಾಯಿ ದೇವೆರೆದುರು ಜನ ಕುರಲ್ ಗ್ ತೆರಿ ನಮೂನೆಡ್ ಪೂಜೆ ಸಂದಾದ್ ಇಲ್ಲದಕುಲು ಮಾತ ಪೊಲಿ ಪೊಲಿಯೇ ಪನೊಂದು ಕುರಲ್ ಗ್ ಪೇರ್ ಮೈಪುವೆರ್.ತುಳುವೆರೆಗ್ ಕುರಲ್, ಅರಿಬಾರೆ ಲಚಿಮಿ. ಅವ್ವೇ ಪೊಲಿ ಪೊಲ್ಸು ತುಳುವೆರೆಗ್.ಅರಿ ಪಂಡ ಬಂಜಿ ದಿಂಜಾವುನ ನುಪ್ಪು ಮಾತ್ರ ಅತ್ತ್ ,ಅವ್ವೊಂಜಿ ಬದ್ ಕ್. ಅಂಚಾದ್ ಆಣುಲೆ ಜೂವದರಿಕ್ ಅರಿತ ಬೆಲೆ ಕೊರ್ತೆರ್.ಕೆಲವಿಲ್ಲಲ್ ”ಚೌತಿದ ಪುದ್ದರ್/ಪುದ್ವಾರ್" ಉನ್ಪುನ ಕಿರಮೊಲ ಉಂಡು. ಪೊಸ ಕುರಲ್ ಡ್ದ್ ಬಾರ್ನ್ ದೆತ್ ದ್ ಬಾರ್ ತೊಲ್ಲುದ್ ನಾಲರಿಯಾಂಡಲ ನುಪ್ಪುಗ್ ಪಾಡುವೆರ್. ಕೆಲವುತಿಕ್ ಡ್ ತಾರಾಯಿದ ಗಂಜಿ ಮಲ್ಪುನಲಾ ಉಂಡು. ಚೇವು, ಪದ್ಪೆ, ತೌತೆ,ತೆಕ್ಕರೆ,ತಿಮರೆ ಚಟ್ನಿ ಮಲ್ತ್ ದ್ ಮಾತೆರ್ಲಾ ಒಟ್ಟುಗ್ ಕುಲ್ಲುದ್ ಪುದ್ದರ್ ಉನ್ಪೆ,ಪುದ್ದರ್ ಉನ್ಪೆ ಪನೊಂದು ಪುದ್ದರ್ ಉನ್ಪೆರ್.ಕೆಲವೆರ್ ಪುದ್ದಾರ್ನ್ ಮಲ್ತ್ ಲೆಕ ಮಲ್ತ್ ದ್ ಎಣೆಲ್ದ ಅರಿಬಾರ್ ಇಲ್ಲದುಲಾಯಿ ಬತ್ತಿಬೊಕ್ಕನೆ ಅವ್ವೇ ಪೊಸರಿನುಪ್ಪು ಮಲ್ಪುವೆರ್. ಅವೇನೆ ಪೊಸರಿತ ಪುದ್ದರುಂದ್ ಪನ್ಪೆರ್. ಅಂಚಾದ್ ತುಳುನಾಡ ಮಾತ ಎಚ್ಚಿನ ಪರ್ಬೊಲೆಗ್ಲಾ ತುಳುನಾಡ ಬೆನ್ನಿ ಸಾಗೊಳಿಗ್ಲಾ ಇತ್ತಿ ಸಂಬಂಧ ತೆರಿಯುಂಡ್.ನಮ ಇಲ್ಲಗ್ ಕುರಲ್ ನ್ ಕನತ್ಂಡ ಕಿರ್ ಸ್ತಾನ್ದಕ್ಲು ಆ ಕುರಲ್ ನ್ ಇಂಗ್ರೇಜಿಗ್ ಕೊನೊದು ಆ ಕುರಲ್ ಗ್ ದೇವೆರೆ ಬಿಲೆ ಕೊರ್ದು ಕುರಲ್ ನ್ ಅಲ್ತ ಗುರುಕುಲೆಡ ದೆತೊಂದು ಇಲ್ಲಿಲ್ಲಗ್ ಕನತ್ ದ್ ಕಟ್ಟುವೆರ್.ಕೆಲವೆರ್ ಕಂರ್ಬುನು ಕೊನೊದು ಕಟ್ಟುವೆರ್.ಎಚ್ಚಾದ್ ಚೌತಿರ್ದ್ ಬೊಕ್ಕದ ಐತಾರ ಅಕ್ಲೆ ಈ ಪರ್ಬ ಬತ್ತ್ ದ್ ಬಲಿಪೂಜೆ ಉಪ್ಪುಂಡು.ಉಂದೆನ್ ಮೋಂತಿಪರ್ಬ ಪನ್ಪೆರ್.ಮೂಲು ಒಲ್ಲಲ್ ರ್ದ್ ಕೊನೊಯಿನ ಪೊಸ ಕುರಲ್ ನ್ ಮೇರಿ ಅಪ್ಪೆಗ್ ಇಂಗ್ ರೇಜಿಡ್ ಅರ್ಪಣೆ ಮಲ್ತ್ ದ್ ಇಲ್ಲಗ್  ಕುರಲ್ ಕನತ್ ದ್ ಕಟ್ಟ್ ದ್ ಪೊಸರಿತ  ಪುದ್ವಾರ್ ಮಲ್ಪುವೆರ್.ಬಾಲೆ ಮೇರಿಗ್ ಕೈ ಮುಗಿಯುನೊಟ್ಟುಗು ಪೊಸ ಕುರಲ ಪರ್ಬ ಆಚರಣೆ ಮಲ್ಪುವೆರ್. ಪೊಸ ತುತ್ತೈತೊಡು ಪೊಸ ಕುರಲ್ ಗ್ ದೇವೆರೆಡ ಪ್ರಾರ್ಥನೆ ಮಲ್ತ್ ದ್ ಕೈಟ್ ಬಣ್ಣ ಬಣ್ಣದ ಪೂ ಪತೊಂದು  ಕನ್ಯಾ ಮೆರಿಯಮ್ಮನ ಮೆರವಣಿಗೆ ಮಲ್ಪುವೆರ್‌.ಪೇರ್ ಇಜ್ಜಾ ಪಾಯಸ ಗಮ್ಮತ್ ಇಲ್ಲಲ್ ಮಲ್ಪುವೆರ್. ಪೊಸ ಕುರಲ್ ನ್ ಮೆರವಣಿಗೆಡ್ ಕೊನೊಪೆರ್ ಪಂಡ ಅಕುಲು ಅರಿಬಾರ್ ಗ್ ಕೊರ್ನ ಬಿಲೆ ತೆರಿಯುಂಡು. ನಮಕಿನಿ ಕಂಡ ಬೊಡ್ಚಿ ,ನುಪ್ಪುಗು ಅರಿಬೊಡು ,ಬೆನ್ನಿ ಸಾಗೊಳಿಲಾ ಬೊಡ್ಚಿ,ಕಾಸ್ ಕೊರ್ದು ಕುರಲ್ ಕಟ್ಟೊಡು. ಕಂಡೊಡು ಕಾಸ್ ಬರಂದ್ ಬಡವು ಕಳೆಯೆರೆ ಬದ್ ಕೆರೆ ಅರಿಬಾರ್, ನುಪ್ಪು ತಿಕ್ಕು. ಕಂಗ್ ರಬ್ಬರ್ಲೆಡ್ ಕಾಸ್ ಬರು, ಕಾಸ್ ಕೊರ್ಂಡ ಅರಿ ತಿಕ್ಕುಂಡುಂದು ಬೆನ್ನಿ ಸಾಗೊಳಿನ್  ಮಾತೆರ್ಲಾ ಮಲ್ಪಂದೆ ಕುಲ್ಲಿಯೆರ್ಡ ರಬ್ಬರುದ ಪೇರ್ ಪರೊಡಾವ್,ಬಜ್ಜೆಯಿನ್ ನಿಂಗೊಡಾವ್.

                ಬುಳೆಸೆಲೆ ದೀದ್ ಬೆನಕನ ಆರಾದನೆ

       ಇನಿ ನಮ ಗಣಪತಿ ಕುಲ್ಲನಗ ಎಡ್ಡೆ ಕಜ್ಜೊಲೆಗ್ ಕುಕ್ಕು ತಪ್ಪು ಕಟ್ಟುನೆತ್ತ ಬದಲ್ ಪ್ಲಾಸ್ಟಿಕ್ ಇರೆ ಪೂನು ಗಲಸೊಂದುಲ್ಲ. ದಾಯೆ ಕುಕ್ಕು ತಪ್ಪುದ ಚೊರ್ನ ಕಟ್ಟೊಡುಂದು ತೆರಿಯೊಂದಿಜ್ಜಿ. ದುಂಬು ಕಜ್ಜ ಲೇಸ್ ಲೆಡ್ ಸಾರಕಟ್ಲೆ ಜನಸೇರ್ ನಗ ಅವ್ಲು ಉಸುಲುದ ಬೆಚ್ಚ ಗಾಳಿಡ್ ವಾತಾವರಣ ಹಾಳಾವಂದಿಲೆಕ ಕುಕ್ಕು ತಪ್ಪು ಕಟ್ಟೊಂತೆರ್ ಇನಿ ಅವೆತ ಬದಲು ಶೀತಲ ಗಾಲಿ ಬೀಜುನ, ಗಾಳಿದ ರೆಂಕೆಲು ಬೈದ. ನಮ್ಮ ಬಾಯಿಡ್ ಬರ್ಪುನ ಇಸ ಗಾಳಿನ್ ಎಡ್ಡೆ ಗಾಳಿಯಾದ್ ಮಲ್ಪುನ ತಾಕತ್ತ್ ಕುಕ್ಕು ತಪ್ಪುಗಿತ್ತ್ಂಡ್.ಆ ಉದ್ದೇಸೊಗಾದೇ  ಪುಣ ಪೊತ್ತಾನಗ ಪುಗೆಟ್ ಇಸ ಸೇರೊನೆರೆ ಬಲ್ಲಿಂದ್ ನುಂಗಂದಿನ ಪಜ್ಜಿ ಕುಕ್ಕುದ ಕನಕ್ ನೇ ಕಾಟ ಒಯ್ಪುವೆರ್.ಬೋಂಟೆ ಸಂಸ್ಕೃತಿ ತಿರ್ದ್ ತುಳುನಾಡ್ ಉದಿತ್ಂಡ್.ತಾನ್ ಬಡವು ದಾಂತೆ ಬದ್ ಕೆರೆ ದೂಂಚಿದ ಬೊಲ್ಲು ಕಲ್ಲುನ್ ಪ್ರಾಣಿಲೆನ್ /ಮುರ್ಗೊಲೆನ್ ಕೆರಿಯರೆ ಗಲಸಿಯೆರ್. ಬೊಲ್ಲುಕಲ್ಲ್/ಬೆಣಚು ಕಲ್ಲ್ ಡ್ಲ  ಗಣಪತಿಗ್ ಇನಿಲಾ ಆರಾದನೆ ಉಂಡು. ಅಂಚಾದ್ ಬೆನ್ನಿಸಾಗೊಳಿದ ಆದಿಡೇ ಬೋಂಟೆ ಸಂಸ್ಕೃತಿದೊಟ್ಟಿಗೆ ಇನಕೆ ನಮ್ಮ ತುಳುವ ನೆಲತ ಬಾಲೆಯಾದಿತ್ತೆ. ಸುಲ್ಲಮಲೆ ಸೀರ್ತೊ ಮೀಪು ತುಳುನಾಡ ಚೌತಿದ ಒಂಜಿ ಇಸೇಸ ಆದುಂಡು. ಬಂಟಾಲ ತಾಲೂಕು ಕಲ್ಲಡ್ಕ – ಮಾಣಿ ನಡುಟು ಸೂರಿಕುಮೇರ್ ಪನ್ಪಿ ಜಾಗೆಡ್ ಒಂತೆ ಪಿರಾವು ಬಲಬಾಗೊಡು ಅನಂತಾಡಿ ಗಿರಮೊದ ಬಲ್ಲಮಲೆ ಕಾಡನಡುಟು ನೆಲತ ಅಡಿತ ಕೂವೆದುಲಾಯಿ ಪರಪುನ, ಪಾಂಡವೆರ್ ಒಂಜಿ ವರ್ಷ ಅಜ್ಞಾತವಾಸ ಕಳೆಯಿನ ಚಾರ್ತುಪದ ಜಾಗೆನೇ ಸುಲ್ಲಮಲೆತ ಸೀರ್ತ ಮೀಪುನ ಕೂವೆ.ಕೂವೆ ಪಂಡ ಗುಹೆ.ಈ ಕೂವೆದುಲಾಯಿ ಚೌತಿ ಪರ್ಬದಾನಿ ಮಾತ್ರ ಜಪ್ಪರೆ ಸಾದ್ಯ . ಅಲ್ತ ದೈವೊಲೆಗ್ ತಂಬಿಲ ಕರಿತ್ ದ್  ೧೬ ಗಂಟ್ ದ ಬೆದ್ ರ್ ದ ಕೇರ್ಪು ದೀದ್  ತಿರ್ತ್ ಜತ್ತ್ ದ್  ೧೦ ಪಜ್ಜೆ ದುಂಬು  ಪೋಂಡ  ಗರ್ಗಂಡ ಕತ್ತಲೆಡ್ ೨ ಬಂಡೆ ಕಲ್ಲ ಇಡೆನಡುಟು ಏತ್ ತೋರಾದಾಯೆ ಅವಡ್,ಏತ್ ಸಪುರದಯೆ ಅವಡ್ ಉಲಯಿ  ಪೋನಗ ೨೦ ಜನ ಉಂತುನಾತ್ ಜಾಗೆಡ್ ಮಿತ್ತ್ ರ್ದ್  ನೀರ್ ಬೂರೊಂದಿಪ್ಪುಂಡು . ಸಂಕ ಪಾಲೆ  ಈ ಕೂವೆದ ಉಲಯಿಪ್ಪುಂಡುಗೆ. ಈ ನೀರ್ದ ಮೂಲ ಏರೆಗ್ಲಾ ತೆರಿಯಂದ್. ಈ ನೀರ್ ಡ್ ಸೀರ್ತೊ ಮೀದ್  ಬಚ್ಚಿರೆ ಬಜ್ಜೆಯಿನ್ ಮೂಲು ದಾನ ಬುಡ್ಂಡ ಸುಲ್ಲ ಮಲೆಡ್ದ್  ಮೂಜಿ ಕಿಲೋ ಮೀಟರ್  ದೂರೊಡು ಈ ನೀರ್ ಪಿರದ್ ಬರ್ಪುಂಡು.. ಈ ಸೀರ್ತೋ ನೀರ್  ಅವೆತ ನಡುಟು ಓಲ್ಲಾ ತೂವೆರೆ ತಿಕ್ಕುಜಿ . ಚರ್ಮ ಸಿರ್ಕ್ ದೂರ  ಮಲ್ತ್ ದ್  ಸಿರ್ಕ್ ಎದುರ್ಪಾಟಿಕೆದ ಸಗ್ತಿನ್  ಕೊರ್ಪುನ  ಗುಣ ಈ ಸೀರ್ತೂಗುಂಡು. ಸುಲ್ಲ ಮಲೆ  ಬಲ್ಲ ಮಲೆ ಒಂಜಾನಗ ಕೋಟಿ ಚೆನ್ನಯೆರ್  ಉದಿತ್ ದ್  ಬರ್ಪೆರ್ಂದ್  ಪನ್ಪೆರ್. ಬಲಿಯೇಂದ್ರನ ಪಾಡ್ದನೊಡ್ಲಾ  ಸುಲ್ಲ ಮಲೆ  ಬಲ್ಲಮಲೆ  ಒಂಜಾನಗ  ಬಲೀಯೆಂದ್ರ ಬರ್ಪೆ ಪನ್ಪಿ ಇಚಾರ ಬರ್ಪುಂಡು.ಅಂಚಾದ್ ಚೌತಿದ  ಗಣಪತಿಗ್ಲಾ ಸೀರ್ತಮೀಪುದ  ಈ ತುಳುನಾಡ ಮಣ್ಣ್ ಗ್ ಲ  ಅನಾದಿಡ್ದ್ ಸಂಬಂದ  ಉಂಡುಂದು ತೆರಿಯುಂಡು. ಸಾರ ಕಟ್ಲೆ ದೇವೆರಿತ್ತೆರ್ಡಲಾ

            ಕಂರ್ಬುದ ಅಟ್ಟೊಳಿಗೆಡ್ ಗಣಪತಿ ಆರಾದನೆ

      ವಾ ವಾ ದೇವೆರ್ ವಾ ವಾ ಕಾಲೊಡು  ಬರ್ಪೆರಾ  ಅಪಗಪಗ  ನಮ ಅಕ್ಲೆನ್  ಮೋಕೆಡ್  ಎದ್ಕೊಂದು ಆರಾಧನೆ ಮಲ್ತ್ ದ್  ಕಡಪುಡ್ದು ಕೊರ್ಪುನ  ಆಚರಣೆ  ತುಳುನಾಡ್ ಡುಂಡು.  ಗೌರಿ ಗಣಪೆ  ನವರಾತ್ರೆದ ನವದುರ್ಗೆನ ಕ್ಲ್ ,ಸಿವ ರಾತ್ರೆದ ಈಸರೆ , ಅಟ್ಟೆಮಿದ ಕಿಟ್ಟೆ , ಬಲಯೇಂದ್ರೆ ಮೊಕ್ಲು ಪೂರ  ಈ ಆಚರಣೆಗ್ ಸಾಕ್ಷಿಯಾದ್ ಉಲ್ಲೆರ್.  ಆಟಿದ ಆಟಿಕಳೆಂಜೆ, ಮಾಂಕಾಳಿನ್ ,ಸೋಣೊಡು ಸೋಣದ ಜೋಗಿನ್ಲಾ  ಇಂಚೆನೆ  ಎದ್ಕೊಂದು ಕಡಪುಡ್ದು ಕೊರ್ಪೆರ್.ದುಂಬುದಕ್ಲು  ಚೆಂಬು ಚರಿಗೆಡ್ ನೀರ್  ಪರ್ದ್  ಸರ್ರೋನು  ಕಾತೊಂತೆರ್ಡ ಇನಿ ನೀರ ಬೊಲ್ಪುದ  ನೀರ ಪೆಟ್ಯೆಗ್  ಚೆಂಬುದ ಕಾಲಾಯಿದ  ಓಂಟೆ ಕುಲ್ಲದ್ ನೀರ್ ಸುದ್ದ  ಮಲ್ತ್ ಪರೊಂದುಲ್ಲೆರ್.  ದುಂಬುದಕ್ಲು  ಸೇಡಿ ಬಾವೆ  ಮಣ್ಣ್ ಡ್  ಇನಕನ ಮೂರ್ತಿ ಮಲ್ತೊಂತೆರ್. ಪೂಜೆ ಮಲ್ಪುನಗ  ಕಾಡ ಕಮ್ಮೆನದಿರೆ ಪುರ್ಪ  (ವನಸ್ಪತಿ)  ಗಂಧ  ಚಂದನ   ಮೂರ್ತಿಗ್  ಪಾಡೊಂತೆರ್ ವಿನಾ ಇನಿತಲೆಕ  ಇಸತ  ರಂಗ್ ,  ಬೊಳ್ಳಿ ಬಂಗಾರ್ದ ಸಿರಿ ಸಿಂಗಾರ, ತುತ್ತೈತ ಮಲ್ತೊಂದಿಜ್ಜಾಂಡ್. ದುಂಬುದ ಕಾಲೊಡು  ಕಂಡ ತೋಟದ ಬರಿಟ್  ಕೆದುಕುಲಿತ್ತ್ ದ್   ವರ್ಸ ಪೋಯಿನಲೆಕ ತುದೆ  ತೋಡುಲೆಡ್  ಪೊಯ್ಯೆ  ನಿಗಿದ್ ಕಜವು,  ಮಡ್ಡಿ ನೀರ್  ಪೂರ ಕಂಡೊಲೆಗ್  ಮಗ್ ರ್ದ್ ಕೆದು ಗುವೆಲ್ದ ನೀರ್ ಕೆಸರ್ ಕುರ್ತೆಲಾವೊಂತ್ಂಡ್.ಆ ಕುರೆ ನೀರ್ ರ್ದ್ ಜನ ಮಂದೆಗ್ ಸಿರ್ಕ್ ಸಂಕಡ ಬರಂದಿಲೆಕ ಕೆದು ಗುವೆಲ್ದ ನೀರ್ ಸುದ್ದ  ಮಲ್ಪರೆ  ಗಂಧ , ಚಂದನ  ಕಾಡ ಕಮ್ಮೆನದಿರೆ ಪುರ್ಪ ಲೇಪೊದ ಸೇಡಿ ಬಾವೆ ಮಣ್ಣ್ ದ ಇನಕನ  ಮೂರ್ತಿನ್   ಆರಾಧನೆ ಮಲ್ತ್ ದ್  ಆ ಕೆದು  ಗುವೆಲ್ಗ್  ಪಾಡೊಂತೆರ್.  ಅಂಚಾದ್ ನೀರ್ ಡಿತ್ತಿ  ಕಿರ್ಮಿಲು , ಬ್ಯಾಕ್ಟಿರಿಯೊಲು  ಸೇಡಿ ಮಣ್ಣ್ ದ  ಕರಪುದೊಟ್ಟುಗು  ನಾಶ  ಆವೊಂದಿತ್ತ. ಪರಿಯರೆ ಸುದ್ದ ನೀರ್  ತಿಕ್ಕೊಂತ್ಂಡ್ .  ಇನಿತಲೆಕ  ಅಪಗ  ಗುವೆಲ್ಗ್ ಪಾಡುನ   ಸರ್ಕಾರದ ಮಾತ್ರೆಲು  ಇಜ್ಜಾಂಡ್   ಸೇಡಿದುರುಂಟು  ಕಡ್ಡಿಡ್ ನೆಲಕೊಂಜಿ ಸುತ್ರು ಬರೆಂಡ  ಅವೆತ ಉಲಯಿ  ಪಿಜಿನ್  ಬರ್ಪುಜಿ .  18 ಪುರಾಣೊಲು ಮೂರ್ತಿ  ಪೂಜೆದ  ಬಗೆಟ್ ಪನ್ಪುಜ. ಗಣೊಕುಲು,  ಗೌತಮ ಬುದ್ದನ ಕಾಲೊಡು ೧೧೬ ಗಣರಾಜ್ಯೊಲು ಉತ್ತರೊಡು ಇತ್ತ.ಅವೆನ್ ಗಣ ಸಂಘೊಲುಂದು ಪನೊಂದು ಉಂದೆತ ಅಧಿಪತಿನ್ ಗಣಪತಿ ಪನೊಂತೆರ್ ಗೆ.ಆನೆ ಪಂಡ ಬೌದ್ದೆರೆ ನಾಗ ವಂಶದ ಸಂಕೇತಗೆ.ಪಾಲಿ ಬಾಸೆಡ್ ನಾಗೆ ಪಂಡ ಆನೆ.ಕಾಶ್ಮೀರಿ ಬಾಸೆಡ್ ನಾಗೆ ಪಂಡ ವಸರ್,ನೀರ್.ದುಃಖ ನಿವಾರಣೆಗ್ ಬೌದ್ದೆರ್ ಪರಿಹಾರೊಲೆನ್ ಕೊರೊಂತ್ ನೆರ್ದಾತ್ರ ದುಃಖ,ಅಡ್ಡ ವಿಡ್ಡೂರ ದೂರಮಲ್ಪುನಕುಲುಂದು ಅಕ್ಲೆನ್ ಪನೊಂತೆರ್.ಬೌದ್ದೆರ್ ಅಷ್ಟಾಂಗ ಮಾರ್ಗೊಲೆನ್ ಬೋದನೆ ಮಲ್ತೊಂತೆರ್.ಅವೆನ್ ವಿನಯೊಲು ಪನೊಂತೆರ್.ಬುದ್ದೆರೆನ್ ಅಷ್ಟ ವಿನಾಯಕೆರ್ಂದ್ ಲ ಪನೊಂತೆರ್ ಗೆ .ಇನಿ ನಮ ಗಣಪತಿನ್ ವಿನಾಯಕಂದ್ ಲ ಪನ್ಪ. ಮಹಾಜನಪದ  ಪನ್ಪಿ  ಪಂಗಡೊಲು ಸುಮಾರ್ ರಡ್ಡ್  ಸಾರ  ವರ್ಸ ದಾತ್  ಕಾಲಾದಿಗ್  ನಮ್ಮ ದೇಸದ ಪಟ್ಟದ ಧರ್ಮ ಆದ್ ಆಳಿನ ಬೌದ್ದ ಧರ್ಮದ  ಗೌತಮ ಬುದ್ದನ ಕಾಲೊಡಿತ್ತ್ಂಡ್ಂಡ್ ದ್  ಚರಿತ್ರೆ ಪನ್ಪುಂಡು ವೈದಿಕತೆಟ್ ಗಣಪತಿನ ಆರಾದನೆ ಬರ್ಪುನ ದುಂಬು ಗಣಪತಿ ಏರ್ಂದ್ ಲ ಭಾರತೀಯೆರೆಗ್ ತೆರಿದಿಜ್ಜಾಂಡ್ ಗೆ. ಬಾಲ ಗಂಗಾದರ ತಿಲಕೆರ್ ಸ್ವಾತಂತ್ರ್ಯ ಸಂಗ್ರಾಮೊಗು ಜನೊಕ್ಲೆನ್ ಒಟ್ಟು ಮಲ್ಪೆರೆ ಗಣೇಶ ಚೌತಿದ ಕಲ್ಪನೆನ್ ಕನದೆರ್. ಗಣೇಶ ಪನ್ಪಿ ಪುದರ್  ಚರಿತ್ರೆಡ್ದ್ ಜಾಸ್ತಿ  ಪುರಾಣ ಕತೆಕ್ಲೆಡ್  ತೂವರೆ ತಿಕ್ಕುಂಡು.

      ಕೊಡಿತ್ ನ ಪೂಬಿತ್ತ್ ದ ಅಜಕೋಲು ಮಾಲೆ ಮಲ್ಪುವೆರ್

  ತುಳುನಾಡ್ ಡ್  ಪರ್ಬ ಬಲಸುನ  ಕಿರಮೊ ಇತ್ತ್ ದ್ ಚೌತಿ  ಬಲಸುನ ಕಿರಮೊ  ಪೊಸತಾದ್  ಅಡೆಗ್  ಸೇರೊಂಡು .ಕೆಲವೆರ್ ದೇವೆರೆ ಕೋಣೆಡ್,  ನನ ಕೆಲವೆರ್  ದೈವದ ಮಣೆ  ಮಂಚವುದೆದುರು, ಬೊಕ್ಕ  ಕೆಲವೆರ್  ತೊಲಚಿ ಕಟ್ಟೆದ ಎದುರು ಚೌತಿ ಬಲಸುವೆರ್.  ಬೆನ್ನಿ ಸಾಗೊ:ಳಿ ಇಪ್ಪಿ ಇಲ್ಲಡ್  ಚೌತಿದ ಪೊದ್ದೊಲು ಇಸೇಸ ಆದಿಪ್ಪುಂಡು .ಒಂಜಿ ತಿಕ್ ಡ್ ಕಂರ್ಬು ಕೊಯ್ಯೆರಾದಿಪ್ಪುಂಡು. ಕೆಯ್ ಕೊಯ್ನಗ  ಚೌತಿದ ಪೊದ್ದೊಲುಗುಂದು  ಬಾರ್ ನ್ ಬೇತೆನೆ ದೆತ್ತ್ ದ್ ದೀವೊಂತೆರ್. ಮಣ್ಣ ಓಡುಡು ಬಾರ್ ಬೆಚ್ಚ ಮಲ್ತ್ ದ್  ಪೊದ್ದೊಲು ತಯಾರ್ ಮಲ್ಪುವೆರ್ .ಚೌತಿದಾನಿ  ಇಲ್ಲದ ದೈವೊಲು,  ಗ್ರಾಮದ ದೈವೊಲೆಗ್  ಗರೊಡಿಲೆಡ್ ಗ್ರಾಮಸ್ಥೆರ್ ಸೇರ್ದ್ ಚೌತಿ ಪೂಜೆನ್  ಮಲ್ತೊಂತೆರ್ . ಪೊರಿ, ಎಣ್ಮೆ, ಪದೆಂಗಿ ಬೇಳೆ,  ತಾರಾಯಿ, ಬೆಲ್ಲ ಪಾಡ್ದ್  ಗಜ್ಜೇಯಿ ಮಲ್ಪುವೆರ್. ದೇವೆರೆ ಕೋಣೆಡ್  ಗಣಪತಿ  ದೇವೆರೆಗ್  ಚೌತಿ  ಬಲಸುನ ದುಂಬು  ಇನಕೆ ದೀಯರೆ  ಬೊಲ್ದುದ ಕರ್ಂಬುನು ನಾಲ್  ಬಾಗ ತಿಗ್ ತ್ ದ್ ರಡ್ಡ್ ರಡ್ಡರೆ ಗೇನ್ ದಾತ್ ತುಂಡು ಮಲ್ತ್ ದ್ ಚಟ್ಟೆ ದ ಮಣೆತ  ಮಿತ್ತ್  ಚೌಕಾಕಾರೊಡು ತಿರ್ತ್ ರ್ದ್ ಅಗೆಲ  ಮಿತ್ತ್ ರ್ದ್   ಸಪುರ ಆಪುಲೆಕ  ಕಂರ್ಬುದ  ಅಟ್ಟೊಳಿಗೆ  ಕಟ್ಟ್ ದ್  ಉಲಯಿ ನಡುಟೊಂಜಿ  ತುಡರ್ ಅರ್ಲಾದ್ ಇನಕ ಅಟ್ಟೊಳಿಗೆದ  ಮಿತ್ತ್  ಕೊಡಿ ಇರೆ  ಪಾಡ್ದ್  ಅವೆಟ್  ಚಪ್ಪೆ ದೋಸೆ, ಪೊದ್ದೊಲು, ಬೆಲ್ಲ ಬಲಸುವೆರ್. ಉಂದೆನ್  “ಗಣ  ಪತಿ ಗೂರ್ನು"(ಗಣಪತಿ  ಕುಲ್ಲುನು) ಪನ್ಪೆರ್.  ಕೆಲವೆರ್  ಅಟ್ಟೊಳಿಗೆದ ಮಿತ್ತ್ ದ ಕೊಡಿರೆಟ್ ಪೊರಿ, ಪಂರ್ದ್ , ಚಪ್ಪೆ ದೋಸೆ , ಬೆಲ್ಲ, ಬನ್ನಂಗಾಯಿ , ಕಜ್ಜಾಯ ಬಲಸುವೆರ್. ಕೆಲವು ತಿಕ್ ಡ್ ಕಂರ್ಬುದ  ಅಟ್ಟೊಳಿಗೆದ  ಕಂರ್ಬುನು  ಪದ್ರಾಡ್ ಅಂಗಿಲದಾತ್  ಮಲ್ಲ ತುಂಡು ಮಲ್ಪುವೆರ್.  ತೊಲಚಿ ಕಟ್ಟೆನ್  ಕುಕ್ಕು ತಪ್ಪುಡು ಸಿರಿ ಸಿಂಗಾರ   ಮಲ್ತ್ ದ್  ಇಡೆ ಇಡೆಕ್ ಮಾಲೆಗ್ ತೇರ್ ಪೂ ಕಟ್ಟ್ ದ್ ಸಿಂಗರಿತ್ ದುಪ್ಪುವೆರ್. ಕೆಲವು  ತಿಕ್ ಡ್ ಕಂರ್ಬುದ  ಅಟ್ಟೊಳಿಗೆದ  ಉಲಯಿಡ್  ಗಜ್ಜಿಯಿ  ಬಲಸಿಯೆರ್ಡ  ನನ ಕೆಲವು ಕಡೆಟ್  ಗಣಪತಿ ಗೂರ್ನೆತ ಎದುರು  ಕೊಡಿರೆಟ್ ಸುತ್ಯೆ ದೀಪುನಲಾ  ಉಂಡು. ಚೌತಿದ ಒಂಜಿ ವಾರೊಡ್ದು ದುಂಬು ಕುಡು ,ಇಡಿ ಉರ್ದು, ಪದೆಂಗಿ  ಬೇತೆ ಬೇತೆನೆ ಚರಿಗೆಡ್ ಒಂಜಿ ದಿನ  ನೆನೆತ್ ದ್  ಜಾಲ್ ಡ್  ಇಜ್ಜಿಂಡ  ತುಪ್ಪೆದ  ಕಟೊಟು  ಕೆಂಪು ಮಣ್ಣ್ ಪಾಡ್ದ್  ಬಿದೆ ಬಿತ್ತ್ ದ್  ಬಿಸಲೆ ಕಂಕನೆ ಪಾಡೊಂತೆರ್ . ಉಂದೆನ್  "ಪೂ ಬಿತ್ತ್  ಪಾಡುನು " ಪನ್ಪೆರ್.  ಚೌತಿದಾನಿ  ಕಾಂಡೆನೆ  ಬಿಸಲೆ ದೆಪ್ಪುನಿ . ಇನಕೆ ದೀಪುನ ಈ ದಾನ್ಯ ಪುರ್ಪೊಲೆನ್  ಬಾರೆದ ಬಲ್ಲೆಡೇ  ಕಟ್ಟುನಿ. ಇನಕನ  ಅಟ್ಟೊಳಿಗೆದ ಎದುರು  ದಾನ್ಯೊಲೆಡ್  ನೆಯ್ನ ಪುರ್ಪ   ಮಾಲೆದೊಟ್ಟುಗು ಸುಂಟಿ ದೈ ಮುಡ್ಯೆಲ, ಪಚ್ಚೆ ಕುರಲ್ ಸೇರಾದ್  ಅಂಚಿಂಚಿ ದೀನ ರಡ್ಡ್  ಕಂರ್ಬುಗು  ಮಾಲೆದಲೆಕ  ಕಟ್ಟುವೆರ್. ಉಂದೆನ್  "ಅಜ್ಜೆ ಕೋಲ್/ ಅಜಕೋಲ್" ಪನ್ಪೆರ್.  ತೂನಗ ಕುಂಟಾಜುಡುನ  ಅಜಕೋಲ್ದಲೆಕನೆ ತೋಜುಂಡು. ಸಾನಾದಿಗೆಡ್  ತುಡರ್ ಅರ್ಲಾದ್ ಸುತ್ತೆ  ದೀನ  ಅರಿತ ಸುತ್ತ ತಿಬಿಲೆ  ಪೊತ್ತಾದ್ ಗಣಪತಿಗ್ ಇಷ್ಟ ಆಯಿನ ಎಣ್ಮೆ, ಕಜ್ಜಾಯ, ಪಲವಸ್ತು,  ಸೀಪೆ ಬಲಸ್ ದ್  ಅಣ್ಣ್  ಕಾಯಿ  ಮಲ್ತ್ ಕೈ ಮುಗಿವೆರ್. ದೈವೊದ  ಮಣೆ ಮಂಚವುದೆದುರು ಚೌತಿ ಕರಿಪುನ  ಕಿರಮೊಲ ಉಂಡು.  ಕಂಜಿ ಕೈ ಕಂಜಿಲೆಗ್ , ಬುಳೆ ಸೆಲೆಕ್ ಒಡಕ್  ಬರಂದಿಲೆಕ ಬಾಮ ಕುಮಾರಡ  ಪ್ರಾರ್ಥನೆ ಮಲ್ಪುವೆರ್. ಪಾರೊತಿನ ಸಾಂಕನದ ಮಗನ್  ಬಾಮ ಕುಮಾರೆಂದ್  ಪನ್ಪೆರ್ . ಈಸರೆ  ಬೊಕ್ಕ  ಮೈಸಗೆನ   ಮಗೆ ಗಣಪತಿ /ಬಾಮ ಕುಮಾರೆಂದ್  ತುಳುವೆರ್  ನಂಬಿನಕುಲು. ಅಂಚೆನೆ  ಕೇರಳದ  ಬಡಕಾಯಿಕ್  ಭಗವತಿ  ದೇವಾಲ್ಯಡು  ಗಣಪತಿ ಪೂಜೆದ  ಬದಲ್  ಗಣಪತಿ ಗ್  ಕೋಲ ನಡಪುಂಡು . ಆಂಡ ಮೂಲು  ದೈವಲೆಕ   ಒವ್ವೇ ತುತ್ತೈತೊಲು ಗಣಪತಿ ಕೋಲೊಡುಪ್ಪುಜಿ. ಚೌತಿದಾನಿ  ಕೊರಲ್ ಕಟ್ಟುನ  ಪೊಸರಿತ ಪುದ್ದರುನ್ಪುನ ಕಿರಿಮೊ  ತುಳುನಾಡ್ ಡ್  ಉಂಡು   ದೈವದ ಮಣೆ ಮಂಚಾವುದೆದುರು  ಇನಕೆ ದೀದ್ ಜಲ ಮುಂದಿಲ್ಡ್   ಓಮ ದೀದ್  ಗಜ್ಜಾಯಿ ಬಲಸ್ ದ್  ಬಾಮ ಕುಮಾರನ್ ಸುಗಿಪುವೆರ್   ಮೊಗೇರ ಜನಾಂಗದಕ್ಲೆ ಜೋಕ್ಲು  ಕೋಲಾಟ ಗೊಬ್ಬೊಂದು ಚೌತಿದಾನಿ  ಇಲ್ಲಿಲ್ಲಗ್  ಪೋಪಿನ  ಕಿರಮೊ  ಇತ್ತ್‌ಂಡ್ . ಇಲ್ಲದಕುಲು  ಆ ಜೋಕ್ಲೆಗ್ ದೋಸೆ, ಗಜ್ಜೆಯಿ  ಕೊರೊಂತೆರ್ ಬಾಮ ಕುಮಾರ ಸಂದಿಡ್  ಮೈಸಗೆನ್ ಮೋಕೆ ಮಂತಿ ಸಿವರ್ದಾದ್ ಅಲೆಗ್  ಬಾಮ ಕುಮಾರೆ  ಪಂಡ ಗಣಪತಿ  ಪುಟ್ಟುವೆ ಈ ಕಾರಣೊರ್ದಾದ್  ಈಸರೆ ವರ್ಸೊಗೊರ  ಚವುತಿದಾನಿ  ಕಟಿ ಇಲ್ಲ್  ಬುಡಂದೆ ಸಾರ್ಪತ್ಯ ಆವೊಡು  ಆವೊಂದುಪ್ಪೊಡುಂದು  ವರ ಕೊರ್ಪೆ .  ಅಂಚಾದ್ ಸೀಪೆದ  ಕಂರ್ಬುದ  ಆಸೆದ  ಆನೆದ  ಮೋನೆದ  ಇನಕಗ್ ಕಂರ್ಬುದ  ಅಟ್ಟೊಳಿಗೆ ಕಟ್ಟುವೆರ್.  ಬೂಮಿಡ್  ನರಮಾನಿ ಬುಳೆಪುನ ಮಾತಾ ಧಾನ್ಯೊಲೆನ್ , ಅರಿಬಾರ್  ಬುಳೆನ್, ಕಾಯಿ ಕಜಿಪು  ,ಫಲವಸ್ತು ಲೆನ್  ನಾಶ ಮಲ್ಪುನ  ಎಲಿನ್ ಪುಂಡಿದುಲಯಿ ಪತ್ಯೆರೆ ಇನಕಗ್  ಮಾತ್ರ ಸಾತ್ಯ. ಅಂಚೆನೆ ಕಂರ್ಬುದ  ಬುಳೆ ,ಬಾರೆಲೆನ್ ಪೂರ  ಒಂಜೇ ಸೆನೊಟು ನಾಶ ಮಲ್ಪುನ  ಆನೆಗ್  ತಾಂಗೋನರೆ  ಗಣಪತಿಗ್ ಮಾತ್ರ ಸಾದ್ಯ.

 ತುಪ್ಪೆಡ್,ಮಣ್ಣ್ ಡ್ ಪೂ ಬಿತ್ತ್ ಪಾಡ್ಯೆರ್ಡ ಕರ ಮುಚ್ಚಿದಿಪ್ವೆರ್.ಚೌತಿದಾನಿ ದೆಪ್ಪುವೆರ್         

                   ದುಂಬು ಪುಂಚದ ಮಣ್ಣ್ ಡ್ ಇನಕನ ಮೂರ್ತಿ ಮಲ್ತೊಂತೆರ್‌.ಮಣ್ಣ್ ಡೇ ದಾಯೆ ಗಣಪತಿನ್ ಮಲ್ಪೊಡು ಪಂಡ ಮಣ್ಣ್ ಡ್ ಜೀವ ಉಂಡು . ಅಂಚಾದ್  ಬೇತೆ ಮಾತೆಕ್ಲ  ಜೂವ ಕೊರ್ಯರೆ  ಮಣ್ಣ್ ರ್ದ್  ಮಾತ್ರ ಸಾದ್ಯ.  ಪಂಚ ಭೂತದ  ವೃಥ್ವೀ  ತತ್ವದ ಮಣ್ಣಗ್ ಮಾನಾದಿಗೆ  ಜಾಸ್ತಿ  ಬೇತೆ ಬೇತೆ  ಲೋಹೊಡು ಮೂರ್ತಿ,  ವಿಗ್ರಹ ಮಲ್ತ್ಂಡ ದೇವತಾ ಸಗ್ತಿಲೆನ್  ಅಡೆಗ್ ಲೆತ್ತ್ ದ್ ಪ್ರಾಣ ಪ್ರತಿಷ್ಟೆ  ಮಲ್ಪರೆ ಬಂಙ.  ಆಂಡ ಮಣ್ಣ್ ದ ಮೂರ್ತಿಡ್ ದೇವೆರೆ ಪ್ರಾಣ ಪ್ರತಿಷ್ಟೆ  ಬೇಗ ಸಾದ್ಯ. ದಾಯೆ ಪಂಡ  ಜೀವ ಇತ್ತಿನೆಕ್ ಮಾತ್ರ ಕುಡೊಂಜೆಕ್ ಜೂವ  ಕೊರ್ರೆ ಸಾದ್ಯ ಅತ್ತೇ . “ ಓಂ ಓಂ ಶ್ರೀಂ ಹ್ರೀಂ ಕ್ಲೀಂ ಗ್ಲೌಂ ಗಂಗಣಪತಯೇ  ವರ ವರದ ಸರ್ವ ಜನಂ ಮೇವ ಸಮಾನ ಯತ್ವಾ: ಓಂ". ಉಂದು ಗಣಪತಿನ ೨೮ ಬೀಜಾಕ್ಷರದ  ಮೂಲ ಮಂತ್ರ .  ಈ ಸರಳ  ಮಂತ್ರೊರ್ದಾದ್ ಲಕ್ಷ್ಮೀ ನಾರಾಯಣ, ಉಮಾ ಮಹೇಶ್ವರೆ, ರತಿ ಮನ್ಮಥ,  ಭೂವರಾಹ, ಗಣಪತಿ  ಇಂಚಿ ಸರ್ವ ದೇವತೆಲೆನ್ಲಾ ಮಾನಿತೊನ್ಲೆಕನೆ.ಈ ಮಂತ್ರ ,ಒಂಜೇ  ದೈತ  ಪುಲ ಮರ್ದ್   ಬಾರ್ಯಾತ್  ಸಿರ್ಕಲೆನ್  ಗುಣ ಮಲ್ತ್ ಲೆಕ. ಪದ್ಮ ಪುರಾಣೊಡು ಪಾರೊತಿ  ದೇವಿ  ಸಂತಾನೊಗಾದ್ “ಪುಣ್ಯಕ” ಮನ್ಪಿ  ವ್ರತೊಟು ವಿಷ್ಣುನು  ಪ್ರಾರ್ಥನೆ  ಮಲ್ತ್ ನೆನ್ ವೇದ ವ್ಯಾಸೆರ್  ತೆರಿಪಾದೆರ್.  ಅಲೆನ ಆಸೆದಲೆಕನೆ  ಭಗವಂತೆ ತಾನೇ  ಗಣ ಪತಿನ ಒರುಟು  ಉದಿತೆ ಪನ್ಪಿ ಕಥೆಲಾ ಉಂಡು  .  ಸ್ಕಾಂದ ಪುರಾಣಲಾ ಗಣಪತಿನ  ಶೋಕ ನಿವಾರಣೆ ಮಲ್ಪುನ ಗುಣೊನು  ತೆರಿಪಾದುಂಡು. ಕುಮಾರವ್ಯಾಸೆ  "ತ್ರಿಜಗವಂದಿತ  ಗಣಪ  ಮಾಳ್ಪುದು  ಮತಿಗೆ ಮಂಗಲವ" ಪಂಡ್ದ್ ಉಲ್ಲೆಖ  ಮಲ್ತ್‌ಂಡ  ಲಕ್ಷ್ಮೀಶ ಕವಿ ಗಣಪತಿನ್ “ ಕೆಂಪು ಚೆಲ್ಲಿದ  ಆನೆಯ ಮುಖ , ಚಿಕ್ಕದಾದ ಕಣ್ನುಗಳು, ಉಬ್ಬಿದ ಹಣೆ,  ಸೀಳು ಬಾಯಿ  ವಕ್ರತುಂಡ,  ಉದ್ದನೆಯ ಸೊಂಡಿಲು, ಎಡ ಹಲ್ಲು ಮುರಿದು  ಮೊಂಡಾಗಿದೆ, ಬಲ ಕೋರೆ ಮಾತ್ರ  ಇಂದ್ರನ ವಜ್ರಾಯುಧದಂತೆ  ಹೊಳೆಯುತ್ತಿದೆ. ಏಕದಂತ  ಮೊರದಂತೆ  ಅಗಲವಾದ  ಕಿವಿಗಳು ,ಕಣಜದಂತೆ  ಎಲ್ಲವನ್ನೂ ತುಂಬಿಟ್ಡುಕೊಳ್ಳುವ  ದೊಡ್ಡದಾದ ಹೊಟ್ಟೆ,  ಗಿಡ್ಡದಾದ  ಕಂಬದಂತ ಕಾಲುಗಳು " ಇಂಚ ವರ್ಣನೆ ಮಲ್ತ್ ದೆರ್.  ಮೋದಕ ಪ್ರಿಯ ಗಣಪತಿ ನೆತ್ತೆರ್ ಚಂದನ  ಮೇಲ್ ಗ್ ಪತ್ತವೊನ್ನಾಯೆ, ಕೆಂಪು ಕುಂಟು ತುತ್ತುನಾಯೆ .  "ಕೆಂಪು ಪೂ"  ಬಾರೀ ಇಷ್ಟ. ಅಂಚ  ಕೆಂಪುದ  ತೇರ್ ಪೂನು ಹೆಚ್ಚಿನಕುಲು ಗಲಸುವೆರ್  ಅಂಚೆನೇ ಮಾತಾಲಾ ಉಂಡಾಪುನ , ಜೀವ ಆಪುನ  ಮಣ್ಣ್ ನ್  ದಂಟ್ಂಡ  ಅಕ್ಲೆಗ್ ಮಣ್ಣ್  ಮೂರಿ  ಬತ್ತ್ಂಡ್ , ಮಣ್ಣೇ  ಮರಿಯಾದ್ ಕೊಡಪುಂಡು.ಇಂಚಿ ಪಾತೆರ ಪೂರ ರೂಢಿಡುಂಡು. ಅಂಚಾದ್  ನನಲಾತ್  ಮಣ್ಣ್ ನ್ ಮೋಕೆ  ಮಲ್ಪೆರೆ ಗಣಪತಿನ್ಲಾ  ಮಣ್ನ ಮೂರ್ತಿಯಾದೇ ಆರಾಧನೆ ಮಲ್ಪುವ. ಗಣಪತಿನ ಪಿರಾಕ್ನ್  ರಡ್ಡ್ ಸಾರ ವರ್ಸದಾತ್ ಪಿರವುಗು ಕೊನೊಪೆರ್. ಆಂಡ  ಅವೆತ  ನಿಜವಾಯಿನ  ಪೊಲಬು ನನಲಾ ತಿಕ್ಕ್ ದಿಜಿ.

ಪೂಬಿತ್ತ್ ಪಾಡ್ ನವು ಕೊಡಿತ್ ದ್ ನಿ 

ಉರ್ದು,ಪದೆಂಗಿ,ಕುಡು ಪೂಮಾಲೆನ್ ರಡ್ಡ್ ಕಂರ್ಬುಗು ಅಜಕೋಲು ಪಾಡುವೆರ್ 

ತುಳುನಾಡ ರಾಜದಾನಿ  ಬಾರ್ಕೂರುದ  ಶಿರಿಯಾರೊದ ಪಡು   ದಿಕ್ಕ್ ಡ್  ಪ್ರಕೃತಿಡೇ ಸಹಜವಾದ್  ಉಂಡಾಯಿನ  ಕಲ್ಲ ಮಾಟೆದ ಗುಂಡದುಲಯಿ  ಬಾಮ ಕುಮಾರೆ ಅಪ್ಪೆನೊಟ್ಟುಗು  ಪೂಜೆ  ಗೆತೊನುನ  ಜಾಗೆ ಉಂಡು . ಈ ಪಡು ಮುಂಡುದ  ಗಣಪತಿ  ಉಮಾಮಹೇಶ್ವರಿನ ದೇವಲ್ಯೊನು ತುಳುನಾಡ್ ನ್  ಅರಸೊಲಿಗೆ ಮಲ್ದ್ ನ ಬೂತಾಳ ಪಾಂಡ್ಯೆ ಶಿಲೆತ ಗುಂಡೊನು ಮಲ್ತೆಂದ್  ಪನ್ಪೆರ್. ಎಲಿ ಕಿನ್ಯ ಒಂಜಿ ಉಪದ್ರ ಕೊರ್ಪುನ ಜೀವಿ.  ಆನೆ ಬಾರ್ಯಾತ್ ಮಲ್ಲ  ಉಪದ್ರ  ಕೊರ್ಪುನ ಪ್ರಾಣಿ. ಉಚ್ಚುನು  ಬಂಜಿಗ್  ಕಟ್ಟ್ ದ್ ಎಲಿನ್ ಮನಿಪಂದೆ ಕುಲ್ಲುಲೆಕ ಮಲ್ತ್ ದ್. ಅವೆತ  ಮಿತ್ತ್  ಕುಲ್ದಿನ  ಗಣಪತಿ  ತನಕ್ ಇಷ್ವ ಆಯಿನ ಬಾರೆ, ಕಂರ್ಬುನು ಒರಿಪೆರೆ ಆನೆದ  ತರೆ ದೀವೊಂದು  ಎಲ್ಯ  ಬೊಕ್ಕ  ಮಲ್ಲ  ಉಂದೆತ್ತ ಬೇದೊನು  ಮಯಕ ಮಲ್ತಿನಾಯೆ  ನರಮಾನಿ  ಎಲಿ , ಉಚ್ಚು , ಆನೆ , ಬಿರು ಅಂಕುಶ ಉಂದೆನ್ ಪೂರ ತೂನಗ ಆನೆದ ತರೆ ಆವಡ್ , ಬಂಜಿಗ್ ಸುತ್ತ್ ದ್ ನ ಉಚ್ಚಾವಡ್ ,ಕುಲ್ದಿನ ಎಲಿಯಾವಡ್  ಅವೆನ್  ಸಿಮಿತೊಡು ದೀಪುನಿ  ನರಮಾನಿಯೆ. ವೇದಕಾಲೊಡ್ದುಲಾ ಉಪನಿಷತ್ತುಲೆನ ಕಾಲೊಡು ಗಣಪತಿನ ಹೆಚ್ಚಿನ ವರ್ಣನೆಲು ತಿಕ್ಕುವ. ಮಹಾಭಾರತ ನಡತಿ ಕಾಲ ಕ್ರಿ.ಪೂ 400ರ್ಡ್ ಕ್ರಿ ಶ 400 ಮುಟ್ಟಂದು ಹಿರಿಯ ಇತಿಹಾಸ ತಜ್ಞೆ ವಿಂಟರ್ ನಿಡ್ಜ್ ಪಂತೆರ್ . ಮಹಾಭಾರತೊಡು ವೇದವ್ಯಾಸರೆಗ್ ಗಣಪತಿ ಲಿಪಿಕಾರೆ ಆದಿತ್ತ್ ನಿಗೆ.ಬ್ರಹ್ಮವೈತರ್ವ ಪುರಾಣ,ಮತ್ಸ್ಯ ಪುರಾಣ,ಶಿವ ಪುರಾಣ,ವರಾಹಪುರಾಣ ಪದ್ಮಪುರಾಣ ಸ್ಕಂದ ಪುರಾಣ,ಶ್ರೀ ಗಣೇಶ ಪುರಾಣೊಡು ಗಣಪತಿನ್ ಪಾರ್ವತಿನ ಮಗೆ,ಗಂಗೆ ಪಾರೊತಿ ಇರ್ವೆರ್ ಅಪ್ಪೆಡಿಕುಲು,ಬೂಮಿದ ಮಗೆಂದ್ ಪನ್ಪುಂಡು.ಪಾರೊತಿ ಬೂಮಿದೊರು ಆಂಡ ಗಂಗೆ ಪರಪಿ ತುದೆ,ಇನಕೆ ಬುಲೆಯಾದ್ ತೊಜಿದ್ ಬರ್ಪೆ.ಕಡಲ್ ದಾಂಟ್ ದ್ ಪೋಯಿನ ಸುರುತ ದೇವೆರೆ ಗಣಪತಿ. ಕರ್ನಾಟಕದ ಗೋಕರ್ಣ ಬೊಕ್ಕ ಇಡಗುಂಜಿ ಗಣಪತಿ ಕ್ರಿ.ಶ 1-2ನೆ ಶತಮಾನದವು. ಮೂಲು ಯಕ್ಷ ಮುಖಿ,ರಡ್ಡ್ ರಡ್ಡ್ (ದ್ವಿ ಬಾಹು) ಕೈತಾಯೆ ಆದ್ ತೋಜಿವೆ. ಕ್ರಿ ಶ 2ನೇ ಶತಮಾನೊರ್ದು ಬೊಕ್ಕ ಚೌತಿದ ಆಚರಣೆ ತೆರಿಯುಂಡು. ಕ್ರಿ.ಶಾ 4-5 ಶತಮಾನೊಡು ಗುಪ್ತೆರೆ ಕಾಲೋಡು ಗಣಪತಿನ ಪೂಜೆ ಸುರಾಂಡ್.ಕ್ರಿ.ಶ 5ನೇ ಶತಮಾನೊದ ಬೊಕ್ಕದ ಸ್ಪಷ್ಟವಾಯಿನ ಗಣಪತಿನ ಮೂರ್ತಿಲು ತೂವರೆ ತಿಕ್ಕುವ. ಹೋಯ್ಸೆಲೆರೆ ದುಂಬುದ ಗಣಪತಿನೊಟ್ಟುಗು ಎಲಿ ಎಚ್ಚಾದ್ ತೊಜಿದ್ ಬರ್ಪುಜಿ. ಸಾಂಚಿ ಸ್ತೂಪದ ಪಡ್ಡೇಯಿ ಚೋರ್ನೊಡು ಗಣಪತಿನ ಆಕಾರ ಇತ್ತ್ ದ್ ಉಂದು ಸುರುತ ಗಣಪತಿನ ಶಿಲ್ಪಂದ್ ವಿದ್ವಾಂಸೆರೆನ ಅಭಿಪ್ರಾಯ. ಬಾರತದ ಪ್ರತಿ ಗ್ರಾಮೊಡುಲಾ ಗಣಪತಿ ಗ್ರಾಮ ದೇವೆರ್. ಔರಂಗಜೇಬೆ ಪನ್ಪಿ ರಾಜೆಲಾ ಪೂನಾದ ಚಿಂಚ್ ವಾಡೊಡು ಗಣಪತಿ ದೇವಾಲ್ಯೋಗು ಜಾಗೆನ್ ದತ್ತಿ ಕೊರ್ತೆ. ಮಹಾರಾಷ್ಟ್ರದ ಪೇಶ್ವೆನಕುಲ್ ಹಿಂದೂಲೆನ ಉಚ್ಛಯ ಆದ್ ಆಚರಣೆ ಮಲ್ತೊಂತೆರ್. ಬಾಲಗಂಗಾದರ ತಿಲಕೆರ್ ರಾಷ್ಟ್ರೀಯ ಸಂಘಟನೆಗ್ ಗಣಪತಿ ಉಚ್ಛಯ ಮಲ್ದೆರ್.ಸ್ವಾಮಿ ವಿವೇಕಾನಂದೆರ್ ಬಂಗಾಲೊಡು ಹಿಂದೂ ಸಮಾಜ ಸಂಘಟನೆಗ್ ಗಣಪತಿ ಉಚ್ಛಯ ಮಲ್ದೆರ್..ಟಿಬೇಟಿಯನ್ನೆರ್ ರಕ್ಕಸೆರೆನ್ ನಾಶ ಮಲ್ಪುನ ದೇವೆರ್ಂದೇ ಗಣಪತಿನ್ ಆರಾದನೆ ಮಲ್ಪುವೆರ್. ಕ್ರಿಶ 8-10 ಶತಮಾನದ ಗಣಪತಿ ವಿಗ್ರಹೊಲು ನೇಪಾಲಡುಂಡು. ಅಶೋಕ ಚಕ್ರವರ್ತಿನ ಮಗಲ್ ಚಾರುಮತಿ ನೇಪಾಳೊಡು ಸುರುತ ಗಣಪತಿ ದೇವಲ್ಯ ಕಟ್ಟಾಯಲ್ ಪಂದ್ ಚರಿತ್ರೆ ಪನ್ಪುಂಡು. ಬೌದ್ದೆರ್ ,ಜೈನೆರ್ಲಾ ಗಣಪತಿನ ಆರಾದನೆ ಮಲ್ಪುವೆರ್. “ಗಣೇಶ ಹೃದಯ “ಪನ್ಪಿ  ಮಂತ್ರ ಸ್ತೋತ್ರ ನೇಪಾಳ,ಚೀನಾ,ಟೀಬೆಟ್,ಜಪಾನ್ ಡ್ ಮಲ್ಪುವೆರ್. ಗುಜರಾತ್ ದ ಜೈನ ಬಸ್ತಿಡ್ ಗಣಪತಿ ವಿಗ್ರಹ ಉಂಡು. ಅಪಘಾನಿಸ್ತಾನೊಡ್ 6ನೇ ಶತಮಾನೊದ ಆರೂಢ ಭಂಗಿದ ಗಣಪತಿ ವಿಗ್ರಹ ಉಂಡು. ಕಾಬೂಲ್ದ ಕೈತಲ್ದ ಶಕರ್ ದಾರ್ ಡ್ ತಿಕ್ಕಿನ ಅಮೃತಶಿಲೆ ಗಣಪತಿ ಕ್ರಿ.ಶ 4ನೆ ಶತಮಾನದವು. ಕ್ರಿ.ಶ 531 ತ ನೃತ್ಯ ಗಣಪತಿ ವಿಗ್ರಹ ಮಂಗೋಲಿಯಡುಂಡು. ಗಜಾನನ ಗಣಪತಿ ಮೂರ್ತಿ ಚೀನಾದ ಕುಂಗ್ ಶಿಯಾಂಗ್ ಡ್ ತಿಕ್ಕ್ ದ್ಂಡ್. ಇಂಡೋನೇಶಿಯಾದ ಬಾಲಿ ದ್ವೀಪೊಡು ಗಣೇಶನ ಅರಾದನೆಯುಂಡು. ಬಾಲಿದ್ವೀಪಡ್ ಲೆಕ್ಕೆಸಿರಿನ್ ಬೆನ್ನಿಸಾಗೊಲಿ ಕಂಡದ ನಡುಟು ಮಾಡಕಟ್ಟ್ ದ್ ಸಿರಿದೇವಿಯಾದ್ ಆರಾದನೆ ಮಲ್ಪುವೆರ್. ಲಾವೋಸ್ ಸರಕಾರ ಕೆಲವು ವರ್ಷೊಡ್ದು ದುಂಬು ಗಣಪತಿ ಚಿತ್ರದ ಅಂಚೆ ಚೀಟಿ ಬುಡುಗಡೆ ಮಲ್ತುದ್ಂಡ್. ಇಂಡೋ ಚೈನಾ ,ಸಯಾಂ, ಕಾಂಬೋಡಿಯಾ, ಮಲಯಾ,ಬೋರ್ನಿಯಾ,ಜಾವಾ,ಸುಮಾತ್ರೊಡು ಗಣಪತಿ ವಿಗ್ರಹೊಲು ತಿಕ್ಕ್ ದ.  ಪರ್ಷಿಯಾ ,ಪೆರು, ಮ್ಯಾಕ್ಸಿಕೊ, ನ್ಯೂಯಾರ್ಕ್ ಬೊಕ್ಕ ಚೊರಾಂಟೊಡು ಪಿರಾಕುದ ಗಣಪತಿ ದೇವಲ್ಯಲುಲ್ಲ. ಅಂಚಾದ್ ಕಡಲ್ ದಾಂಟ್ ದ್ ಸುರುಕು ಪೋಯಿನ ದೇವೆರೇ ಗಣಪತಿಂದ್ ಪನೋಲಿ. ಅಂಚೆನೆ ಚೌತಿದ ಗಣಪತಿನ ಆರಾದನೆನ್ ದೇಶೊದ ಸೊಸೊಂತ್ರೊಗಾದ್ ಜನಕ್ಲೆನ್ ಒಟ್ಟು ಸೇರಾದ್ ಬಾಲಗಂಗಾದರ ತಿಲಕೆರ್ ಸುರು ಮಲ್ತೆರ್ಂಡಲಾ ನಮ ಅರೆನ್ ನೆಂಪು ಮಲ್ತೊಂದಿಜ್ಜ.

ಇಲ್ಲಲ್ಡ್ ನಡತೊಂತಿ ಚೌತಿ ಪರ್ಬೊನು ಸಾರ್ವಜನಿಕವಾದ್ ಮಲ್ತ್ ದ್ ರಾಷ್ಟೀಯತೆನ್ ದೆರ್ತ್ ಪತ್ತ್ ನ ಬಾಲ ಗಂಗಾದರ ತಿಲಕೆರ್

       ಆದ್ಯಾತ್ಮದ ನೆಲೆಟ್ ನಮ ಗಣಪತಿನ್ ತೆರಿಯೊನೊಡು ಪಂಡ ಆಯನ ಸರ್ರೊದ ಒರುವೇ ಅಂಚೆನೆ. ವಕ್ರತುಂಡ ಪನ್ಪುನವ್ಲು ಒವೆನ್ಲಾ ಇಡಿಯಾಡಿಪ್ಪಂದೆ ಸಾದಿಸಾವರೆ ಸಾದ್ಯ ಇಜ್ಜಿ ಪನ್ಪಿ ತತ್ವ ತೆರಿಪಾವುಂಡು ಪಂಡ ಬಡಪತ್ತ್, ಬಡಪತ್ತುಡೇ ಪೊಲಿ ಪೊಲ್ಸುದ ಸಿರಿವಂತಿಕೆನ್ ತೊಜಪಾದ್ ಕೊರ್ನಾಯೆ ಗಣಪತಿ .ಆಯನ ವಾಹನ ಕಿನ್ಯ ಎಲಿ. ನಮ ಒಂಜಿ ಎಲ್ಯ ವಾಹನ ದೆತೊಂಡಲಾ ಮಲ್ಲಸಾಧನೆ ಮಲ್ತಿಲೆಕ ಕೊಚ್ಚೊನುವ. ಎಲಿ ಉಪದ್ರದ ಜೀವಿಯಾದ್ ಇತ್ತ್ಂಡಲಾ ಉಚ್ಚು,ಗಿಡಿ,ನಮನ್ ತೂಂಡ ಎಲಿ ದೆಂಗ್ ದ್ ಕುಲ್ಲುಂಡು. ಎಲಿತ ಬುದ್ದಿನ್ ತೂನಗ ನಮ್ಮ ಉಡಲ್ ಡ್ ಆಪುನ ತರೆತಮೆಲಾಟಿಗೆನ್ ತೆರಿಯೊನೊಲಿ. ಈ ಉಡಲ್ ಪನ್ಪಿ ಎಲಿನ್ ಪಂದಂದಿಲೆಕ ಕುಲ್ಲಯರೆ ಬಂಜಿಗ್ ಸರ್ಪ ಸತ್ತೊಂಡೆ. ಮೂಲು ಉಚ್ಚು ಪನ್ಪುನವ್ ಕಾಮದ, ಬಂಜಿ ಸರಿ ದೀವೊನುವೆನ್ ತೆರಿಪಾಂಡ ಉಡಲ್ದ ಗೇನೊಂಜಾಯೆರೆ (ಏಕಾಗ್ರತೆ) ಎಲಿ ಬೊಕ್ಕ ಉಚ್ಚುದ ಕಲ್ಪನೆ ಬೈದ್ಂಡ್. ಕುಡೋಂಜಿ ರೀತಿಡ್ ಅರ್ಥ ಮಲ್ತೊಂಡ ಎಲಿ ಪನ್ಪುನವು ಕಾಮ,ಕ್ರೋದ,ಲೋಭ,ಮೋಹ,ಮದ,ಮಚ್ಚರದ ಸಂಕೇತ. ಉಂದೆನ್ ಗೆಲ್ತಿನ ಗಣಪತಿ ಕುಲ್ದಿನಿ. ಎಲಿತ ಮಿತ್ತ್. ಆಯನ ಕಣ್ಣ್ ಕಿನ್ಯ ಆಂಡಲಾ ಸೂಕ್ಷ್ಮವಾದ್ ತೆರಿಯೊನ್ನ ಸಂಕೇತವಾದ್ ಈ ಕಣ್ಣುಲು ಉಲ್ಲ. ಸಮಾಜೊಡು ಬದ್ ಕ್ ನಗ ಸೂಕ್ಷ್ಮವಾದ್ ತೂದು ಬದ್ ಕೊಡು ಪನ್ಪಿ ಇಚಾರ ತೆರಿಯುಂಡು.ಗಣಪತಿನವು ಶೂರ್ಪ ಕರ್ಣ ಪಂಡ ಮಲ್ಲ ತಡ್ಪೆ ಕೆಬಿ.ಏತೆತೋ ಇಚಾರೊಲೆನ್ ಕೇಂಡಲಾ ಬೊಡಾಯ್ನೆನ್  ಮಾತ್ರ ಒರ್ತೊನೊಡು ಪನ್ಪುನವು ಈ ಕೆಬಿತ ಸಂಕೇತ. ಮಲ್ಲ ಬಂಜಿ ಬ್ರಹ್ಮಾಂಡ ಆಂಡ ಆಯೆ ಬಂಜಿಗ್ ಸುತ್ತ್ ನ ಉಚ್ಚುನು ಆದಿಶೇಷೆ ಪನ್ಪೆರ್.ಪಾಶ, ಅಂಕುಶೊಡು ನಮ್ಮ ಉಲಾಯಿದ ರಾಗ ದ್ವೇಷನ್ ಸಾದಿ ತಪ್ಪಾಂದಿಲೆಕ.ಒರ್ತೊನುನ ಆಯುಧೊಲು.  ಇಡಿಯಾಯಿನ ಏಕದಂತ ಪಂಡ  ಒಂಜಿ ಇಡಿ ಕೋರೆ  ಉಡಲ್‌ ದ  ಏಕಾಗ್ರತೆದ ಸಂಕೇತ.  ಮಲ್ಲ ತರೆತಾಯೆ  ಪಂಡ  ಬುದ್ಯಂತೆಂದರ್ಥ ಏಕದಂತ  ಅದ್ವೈತ ತತ್ವೊದ  ಸಂಕೇತ  ಆಂಡ ಆನೆದ  ತರೆ ಜ್ಞಾನೇಂದ್ರಿಯದ ಸಂಕೇತ. ಅಂಚೆನೇ ಸೊಂಡಿಲ್‌ ಕರ್ಮೇಂದ್ರಿಯದ ಸಂಕೇತ . ಒರ್ದ ಸುತ್ರ್ ಪಾಡ್ನ ಸೊಂಡಿಲ್‌  ಓಂಕಾರದ  ಸಂಕೇತ . ಓಂಕಾರಲಾ ತುಳು  ಬಾಸೆದ ತುಳು ಲಿಪಿತ ಕೊಡುಗೆ.  ಗಣಪತಿಗ್‌  ಮೋದಕ ಇಷ್ಟಾಂಡ ಆಯೆ ನಮಕ್‌  ಓದ ಪಂಡ ಸಂತೋಷೊನು  ಕೊರ್ಪೆಂದರ್ಥ.  ಸಿದ್ದಿ ಬುದ್ದಿಲು  ಬುಡೆದ್ಯಲ್ಲಾಂಡ  ಬುದ್ದಿ ಇತ್ತ್‌ಂಡ  ವಾ ಕ್ಷೇತ್ರೊಡುಲಾ  ಸಿದ್ದಿ ತಿಕ್ಕು.  ಲಾಭ  ಕ್ಷೇಮ  ಇರ್ವೆರ್‌ ಜೋಕುಲಾಂಡ ಬುದ್ದಿ ಗಳಿಸಾದ್‌ ಸಿದ್ದಿ  ಮಲ್ತ್‌ ನಡೆ ಲಾಭದೊಟ್ಟುಗು  ಕ್ಷೇಮ ಪಂಡ ನೆಮ್ಮದಿ ತಿಕ್ಕೆರೆ ಸಾದ್ಯ.

                        ಕಂರ್ಬುದ ಅಟ್ಟೊಳಿಗೆ

          ಪ್ರತಿಯೊಂಜಿ ಪೂಜೆದ ದುಂಬು  ಗಣಪತಿನ್‌ ನೆನವರಿಕೆ ಮಲ್ತೊನುವ . ಸತ್ಯಲೋಕೊಡಿತ್ತಿ  ಕಡಮೆ ಸಂಕೆದ  ಸತ್ಯಾತ್ಮೆರ್‌  ನುಪ್ಪುದಾಂತೆ  ಅಕ್ಲ್‌  ಅವ್ಲೆ  ಕರಿದ್‌  ಪೋದು  ಅಕ್ಲೆಗ್‌  ಕೊರ್ಪುನ ಸಪಾದ ಭಕ್ಷ ದೊರುತ, ಪಿತೃ ತರ್ಪಣ  ದೊರುತ  ಸತ್ಯ ನಾರಾಯಣ  ಪೂಜೆದ ದುಂಬುಲಾ ಗಣಪತಿನ್ ಮಾನಿತೊನ್ವೆರ್‌  ಗಣಪತಿನ್‌, ಅನುಮಂತನ್‌ ನಂಬಿನಕ್ಲೆಗ್‌ ಸನಿದೋಸ ಇಪ್ಪುಜಿ . ತನ್ನ  ಸಾಪೊರ್ದಾ ತನ್ನ ಓರೆ ದಿಟ್ಟಿಡ್ಡಾ  ಗಣಪತಿನ  ತರೆ ಪೋಂಡುಂದು ಸನಿಕ್‌  ಬೇಜಾರುಂಡು . ಅನುಮಂತನ  ಪುಗೆಲೇರ್ನ ಸನಿಕ್‌  ಜಪ್ಪೆರೆ ತೀರಂದೆ  ಮಾಪು ನಟ್ಟೊನುವೆ. ಅಂಚಾದ್‌  ಅನುಮಂತನ   ಗಣಪತಿನ ಆರಾದಕೆರೆಗ್‌  ಸನಿದೋಷ ಬರ್ಪುಜಿ.  ಪ್ರತಿಯೊಂಜಿ  ಅಬುಲಾಸೆಲು  ಪುಟ್ಟುನಿ  ಬಂಜಿರ್ದ್‌ .ಕಾಮ,ಬಡವು,ಯೋಗ,ಅದ್ಯಾತ್ಮ ಉಂದು ಪೂರ ಪೂವೊಲುರ್ದುದಿತ್ ದ್ ಉಸುಲುಡು ಜೀವಾಪುನಿ.ಅಂಚಾದ್ ಅಪ್ಪೆನ ಬಂಜಿರ್ದ್ ಬಾಲೆ  ಪುಟ್ಟುನಗನೇ  ಪುವೊಲುದ  ಬೂರು  ಕಡಿತ್‌ಂಡಲಾ ಬಾಲೆ  ಕೈತಲಿತ್ತ್‌ಂಡ  ಬಾಲೆದ  ಉಪದ್ರೊಡು ಕಣ ನೀರ್‌  ಪಾಡೊಂತಲ್ಡ ಬಾಲೆ  ದೂರೊಡಿತ್ತ್ಂಡ ಎಂಚ ಉಲ್ಲೆನಾ  ಪನ್ಪಿ  ಅಂಗಾಲ್ಪು ಅಪ್ಪೆಗುಪ್ಪುಂಡು  ಸಿದ್ದಿ ಯಾವೊಡಾಂಡ ಬುದ್ದಿ ಚುರುಕಾದಿಪ್ಪೊಡು. ಈ ಬುದ್ದಿನ್‌ ಮನಸ್  ಪತೊಂದಿದಿಪ್ಪುಂಡು  ಪನ್ಪುನೆಕ್‌ ಗನಪತಿನ ಕೈತ  ಪಾಶ – ಅಂಕುಶ  ಸಂಕೇತ  ಆಪುಂಡು  ಗಣಪತಿ ಬಯಕುನ  ಕಂರ್ಬು, ಎಣ್ಮೆ , ಪುಂಡಿ, ಉಂಡೆ, ಗಜ್ಕೇಯಿ  ಉಂದು ಪೂರ  ಬೂಮಿಡೇ ಉಂಡಾಪುನ ಸರಳವಾಯಿನ ಆವಾರೊಲು.  ಮಣ್ಣ್‌ ದ ಮೂರ್ತಿಡೇ ಗಣಪತಿನ್‌  ಉಂಡು  ಮಲ್ಪುವೆರ್‌ ಪಂಡ  ಮಣ್ಣ್‌ ಗ್‌  ಗಣಪತಿ ಕೊರ್ನ ಬಿಲೆ ತೆರಿಪಯುಂಡು. ನರಮಾನ್ಯಡ  ನರಮಾನ್ಯನ್ ಮೀರ್‌ ನ  ಪ್ರಾಣಿಲೆನ  ಗುಣ ಇಪ್ಪುಂಡು.  ಆತ್‌  ಮಲ್ಲ  ಆನೆನ್ಲಾ  ನರಮಾನಿ  ತನ್ನ ಪುಂಡಿದುಲಯಿ  ದೀವೊನ್ವೆ . ಆನೆ ಬಜೀ  ಸಜ್ಜನ ಪ್ರಾಣಿ  .ಎವ್ರ ಬತ್ತ್‌ಂಡ  ಸರ್ವ ನಾಶ.  ಅಂಚೆನೆ  ಉಡಲ್‌ ದ  ತಾಳ ತತ್ತ್‌ ದ್‌  ತತ್ತ್‌ ಸಾದಿಡ್‌ ಪೋಯೆಂಡ ಆಯಗ್‌ ಸಿಗ್ಸೆ ಖಂಡಿತ .  ಮಲ್ಲ ಕೆಬಿಟ್‌  ಬುಡು  ಉಡಲ್‌ ತೆರಿಯುಂಡು. ಮಲ್ಲ ಮೋನೆಗ್‌  ಎಲ್ಯ ಕಣ್ಣ್‌  ಪನ್ಪುನವ್ಲು ಕಿನ್ಯ ಕಣ್ಣ್‌ ಡ್‌ ಮಲ್ಲ ಲೋಕೊನು ತೂದು  ಉಳ ಕಣ್ಣ್ ಗ್‌  ಗೇನೊನು ಎತ್ತಪೊಲಿ ಪನ್ಪಿ  ಇಚಾರ ಮೂಲು ತೆರಿಯುಂಡು. ಅಣು  ಪಂಡ  ಎಲ್ಯೆಡ್ದ್‌ ಮಲ್ಲೊನು ನಾಶ ಮಲ್ಪೊಲಿ ,  ಎಲ್ಯ ಒಂಜಿ ಅತ್ಯಾರ್‌  ಏತ್‌ ಮಲ್ಲೆನಾಂಡಾಲಾ ಒಯ್ತ್ ಪಾಡುಜಾ? . ಅಂಚಾದ್‌  ಉಳ ಕಣ್ಣ್‌  ಬುಡುದು  ಪಿದಯಿದ ಕಣ್ಣ್‌ ಡ್‌ ಜಗತ್ತ್‌ ನ್‌  ತೂವೊಡುಂದು  ಅರ್ಥ. ಇನಿ ನಮ  ಜೀವ ಇತ್ತಿ ನರಮಾನ್ಯಗ್ಲ ದೇವೆರ್‌ಂದ್‌  ಪೂಜೆ ಮಲ್ಪುವ .  ಉಂದು  ನಮ್ಮ  ಸಂಸ್ಕೃತಿಗ್‌  ನಮ ಮಲ್ಪುನ ಅನ್ಯಾಯ. ಆನೆದ ಸೊಂಡಿಲ್‌ಡ್‌  ಅವೆತ ಜೀವ  ಉಪ್ಪುನಿ . ಒಂಜಿ ಕಿನ್ಯ ಪಿಜಿನ್‌  ಆನೆನ್‌  ಮಗುಪು. ತುಂಡಾಯಿ ಒಂಜಿ ದಂತೊಡು ಕಷ್ಟ ತೋಜಿದ್‌  ಬತ್ತ್‌ಂಡ , ಇಡೀ ದಂತೊಡು  ಸುಖತ  ಕಲ್ಪನೆಯುಂಡು . ಕೈತ  ಪರಶು  ಪಾಪ  ಸಂಹಾರ  ಮಲ್ತ್ ದ್ ಪುಣ್ಯೊನು  ಕನತ್‌  ಕೊರ್ಪುಂಡು.  ನರಮಾನ್ಯನ ಕಿನ್ಯ ನಾಲಿಗ್‌  ಆತ್‌ ಮಲ್ಲ  ಆನೆದ ತರೆ ಗೊಡ್ಯಯೆರೆ ಸಾದ್ಯಾನಾ?.  ಪುರಾಣ ಕತೆಟ್‌  ಮಾತ್ರ ಸಾದ್ಯ . ತ್ರಿಲೋಕ ಜ್ಞಾನಿ ಶಿವಗ್‌  ಮಗನ  ಗುರ್ತ ತಿಕ್ಕಂದೆ  ಉಪ್ಪರೆ ಸಾದ್ಯನೇ . ಕಡ್ತಿನ ತರೆನೇ ಶಿವಗ್‌ ದೀಯೆರೆ ಅಸಾದ್ಯನೇ? .  ಕಡ್ತಿ ತರೆನ್‌  ರಕ್ಕಸೆ ಕೊನೆಯೆ ಪನ್ಪೆರ್.ದೇವೆರೆಗ್ ಆಯನ್ ತಡೆಪೆರೆ ಅಸಾದ್ಯನೇ?. 

ಮಲಾರ ಬೂಡುಡು ಮಲರಾಯ ದೈವೊಗು ಚೌತಿ ಬಲಸ್ ದ್ ನಿ

          ಅಪ್ಪೆ ಪಾರತಿ ಬೆಗರ್ ರ್ದ್‌  ಬಾಲೆನ್‌  ಪಂಡ  ಗಣಪತಿನ್‌  ಉಂಡು ಮಲ್ತ ಲ್.‌  ಒಂಜಿ  ದಿನ ಮಿಯರೆ ಪೂನಗ  ಮಗನ್‌  ಬಾಕಿಲ್‌ ಕಾಪರೆ ಉಂತಾಯಲ್‌ , ಗಣಪತಿ ತಪ್ಪು ಮಲ್ತ್ಂಡ   ಅಮ್ಮನ್ಲ ಬುಡಯೇ  ಪನ್ಪುನೆಕ್‌   ಈ ಕತೆ ಸಾಕ್ಷಿ ಯಾಪುಂಡು. ಈಸರೆ ಮಗನ  ಕೈತಡೆ  ಬತ್ತ್ ದ್ ವಾ ವಾ  ನಮುನೆಡ್‌  ಉಲಯಿ ಪೊಯೆರೆ ಕೇಂಡಲಾ  ಗಣಪತಿ ಬುಡ್ಪುಜೆ . ಅಂಚಾನಗ  ಈಸರ ದೇವೆರ್‌   ಚಂದ್ರತ್ಯರ್‌ಡ್‌  ಆಯನ  ತರೆ ಕಡ್ಪುವೆರ್.‌ ಅಪ್ಪೆ  ಪಾರೊತಿ ಉಂದೆನ್‌ ತೂದು  ಬೇಜಾರ್ಡ್ ಉಪ್ಪುನಗ ತೆನ್ಕಾಯಿಗ್‌  ತರೆ ಪಾಡ್ದ್‌ ಜೆತ್ತಿನೆತ ಒಂಜಿ  ತರೆನ್‌ ಕಡ್ತೊಂದು ಬಲೆಂದು  ಈಸರ ದೇವೆರ್‌ ಗಣೊಕುಲೆನ್‌ ಕಡಪುಡುವೆರ್.‌   ಬೂಲೊಕೊಡು ತೆನ್ಕಾಯಿಗ್‌ ತರೆ ಪಾಡ್ದ್‌  ಜೆತ್ತಿತ್ತ್‌ ನ  ಆನೆದ ತರೆ ಕಡ್ತ್ ದ್ ಈಸರ ದೇವೆರ್‌ಡ ಕೊರ್ನಗ  ಅವೆನ್‌  ಬಾಲೆದ ಸರ್ರೊಗು ದೀದ್‌ ಜೂವ ಕೊರ್ಪೆರ್.‌  ಆನಿಡ್ದ್‌ ಬೊಕ್ಕ  ಇನಕೆ  ಗಜಾನನ  ಆಯೆ. ಮೂಲೊಂಜಿ  ವೈಜ್ಞಾನಿಕ  ಸತ್ಯಲ ಉಂಡು . ಆ ಕಾಲೊಡು  ಒಂಜಿ ಸರ್ರೊಗು  ಬೊಕ್ಕೊಂಜಿ ಸರ್ರದ ಅಂಗೊಲೆನ್‌  ಗೊಡ್ಯಾದ್‌  ಜೀವ ಕೊರ್ಪುನ ಇದ್ಯೆ ದುಂಬುದ ಕ್ಲೆಗ್‌ ತೆರಿದಿತ್ತ್ಂಡ್ಂದ್ ತೋಜುಂಡು. ಅಂಚೆನೆ ತೆನ್ಕಾಯಿ  ಬಡಕಾಯಿಗ್‌  ತರೆ ಕಾರ್‌  ಪಾಡ್ದ್‌  ಜೆತ್ತ್ಂಡ ನಮ್ಮ ನೆತ್ತೆರ್‌  ತರೆಕೇರ್‌ ದ್‌  ಮನದಾನಿ ಲಕ್ಕ್‌ ನಗ  ಮೈ ಕೈ  ಬೇನೆಯಾಪುಂಡು .  ಮೂಡಾಯಿ  ಪಡ್ಡಾಯಿಗ್‌ ತರೆಕಾರ್‌  ಪಾಡ್ದ್‌  ಜೆತ್ತ್‌ಂಡ  ನೆತ್ತೆರ್‌ ಸರಿಯಾದ್‌ ಕಾರ್‌ ಗ್‌   ಪರತ್‌ ದ್‌  ಬೊಲ್ಪುಗು ಲಕ್ಕ್ ನಗ  ಸರ್ರೊಡು  ಎಡ್ಡೆ ಉರ್ಕುಲ್ಲಾಸ ಉಪ್ಪುಂಡು . ಅಂಚೆನೆ  ದುಂಬುದಕ್ಲು  ಪನ್ನ ಕೇನ್ಜಿಂಡ  ದೈವ  ದೇವೆರೆ ಪುದರ್‌ ಪಂಡ್ ದ್‌  ಪೋಡ್ಯಾದ್‌  ಸಮಾಜೊನು ಒರ್ತು ಕಾತೊಂತೆರ್‌ ಗಣಪತಿಡ ದೇವಾನು ದೇವತೆಲ್ನ  ಸಗ್ತಿ ಉಂಡು “ ವಿಘ್ನ” ಪನ್ಪಿ  ರಕ್ಕಸನ್  ಗಣಪತಿ  ಕೆರ್ರೆ ಪೊನಗ ಶಿವೆ  ಅರ್ದ ಚಂದ್ರಾಯುದೊನು ,ಬ್ರಹ್ಮೆ ಸೊಂಟದ ಡಾಬುನು, ಸೂರ್ಯೆ ಮಣಿನ್‌ ,ವರುಣೆ  ಪಾಶೊನು ,ವಿಷ್ಣು ಶಂಖ ,ಗದೆನ್‌ , ಯಮೆ ದಂಡೊನು,  ಇಂದ್ರೆ ವಜ್ರಾಯುದೊನು ಕೊರ್ಪೆರ್‌ಂದ್ ಒಂಜಿ  ಕಥೆ  ಪನ್ಪುಂಡು .  ಏಣಾಂಕಗ್‌ ಪಂಡ ಚಂದ್ರಗ್‌  ತನ್ನ ಒಂಜಿ  ದಾಡೆನ್‌  ಅರ್ದ ತುಂಡು  ಮಲ್ತ್‌ ದ್‌ ದಕ್ಕುನಾಯೆ ಗಣಪತಿ. ಬಂಜಿ ಬಂಜಾರ ಉಂಡುತಿಂದ್ ದ್ ಪೊನಗ  ಒಂಜಿ ದೆರ್ಪೆರೆ ತೀರಂದೆ ನಡತೊಂದಿಪ್ಪುನಗ ಅವೆನ್ ತುದು ಬಾನೊಡು ಚಂದಿರೆ ತೆಲ್ತೆಗೆ. ಆಯಗ್‌  ಗಣಪತಿ ಶಾಪ ಕೊರ್ಯೆ.  ಚೌತಿದಾನಿ  ಏರ್‌  ಚಂದ್ರನ್‌  ತೂಪೆರಾ ಅಕ್ಲೆಗ್‌  ದೋಸ  ಬರಡ್ಂದ್ ಗಣಪತಿ ಶಾಪ  ಕೊರ್ಪೆ.  ಏರ್‌ ವಾ ಬಂಙೊಡುಪ್ಪುವೆರಾ ಅಕ್ಲೆನ್  ತೂನಗ  ಏರ್‌ ತಮಾಷೆ ಮಲ್ಪುವೆರಾ  ಅಕ್ಲೆಗ್‌  ಈ ಕಷ್ಟ ದಾದ  ತೆರಿಯಡ್‌ಂದ್‌  ಈ ಶಾಪದ ಅರ್ಥ.  ತಪ್ಪು ಮಲ್ತನಕ್ಲೆನ್‌ ತೂಂಡ  ತೂಪಿನಕ್ಲೆಗ್‌ಲ ದೋಷ  ಪನ್ಪುನವ್ಲು ಚಂದ್ರನ್‌  ತೂದು  ಶ್ರೀ ಕೃಷ್ಣಗ್‌ ಶಮಂತಕ  ಮಣಿ  ಕಳುವೆಂದ್‌ ಅಪವಾದ  ಬತ್ತ್‌ ನ ಕಥೆನೇ ಸಾಕ್ಷಿ. ಆ ಶಾಪ ನಿವಾರಣೆ ಮಲ್ತೊನೆರೆ ತನ್ನ  ರಾಮಾವತಾರೊನು ಪಂಡ ಒಂಜಿ ಯುಗ  ದುಂಬುದ ತನ್ನ ಅವತಾರೊನು  ಜಾಂಬವಗ್‌ ತೊಜಪಾವುನ  ಪರಿಸ್ಥಿತಿ  ಬತ್ತ್ಂಡ್‌  “ ಶ್ಯಮಂತಕೋಪಖ್ಯಾನೊ”ಡು  ಈ ಇಚಾರ  ತೆರಿಯುಂಡು‌  ಆ ದೋಸೊರ್ದು ಪಿದಯಿ ಬರಿಯರೆ”ಸಿಂಹ ಪ್ರಸೇನಮಹದೀತ್‌ ಸಿಂಹೋ ಜಾಂವವತಾಹತಃ ಸುಕುಮಾರ ಕಮಾರೋದಿಹಿ ತವಹ್ಯೇಷ ಶ್ಯಮಂತಕಃ.”  ಅಂಚಾದ್‌ ಓಲಾಂಡಲಾ   ಬಾದ್ರಪದ ಶುಕ್ಲ ಪಕ್ಷದ  ಬಿದಿಗೆದಾನಿ  ಚಂದ್ರನ್‌ ತತ್ತ್‌ ದ್‌ ತೂಯರ್ಡ ಈ ಮಂತ್ರ ಪಠಣೆ  ಮಲ್ತ್ಂಡ ದೋಷ ಪರಿಹಾರ  ಆಪುಂಡು .  ಗಣಪತಿ ವ್ರತ ಮಲ್ಪುನಕುಲು ಕಡೆಕ್‌ ಶ್ಯಮಂತ ಕೋಪಖ್ಯಾನೊನು ಶ್ರದ್ದೆಡ್‌ ಕೇನುವೆರ್.‌  ಅಮಾಸೆ ಕರಿದ್‌ ಬಿದಿಗೆ  ಪಂಡ ಸರ್ವೇ ಸಾಮಾನ್ಯ ಅಮಾಸೆದ ರಡ್ಡನೇ ದಿನ ಚಂದ್ರೆ  ಮುಗಲ್ದಿಡೆಟ್‌ ತೂವರೆ ತಿಕ್ಕುನಿ ಕಮ್ಮಿ . ಜೋಕ್ಲೆಗ್‌ ಇದ್ಯೆ ಸುರು ಕಲ್ಪನಗ ಸುರುಕು ಇನಕನ್‌ ನೆಂತೊನುವೆರ್‌ . ಎಲಿ ,ಪೆರ್ಗುಡೆ   ಇಲ್ಲಗ್‌  ಬುಳೆ ಸೆಲೆಕ್‌ ಉಪದ್ರ ಕೊರ್‌ಂಡ  ಗಣಪತಿ ದೇವಾಲ್ಯೊಗು ಪರಕೆ  ಪಂಡ  ಅವು ಬರ್ಪುಜ . ಗಣಪತಿನ ದೇವಾಲ್ಯೊಗು  ಅಪ್ಪದ ಪೂಜೆ  ಮಲ್ಲ ಪರಕೆ . ಗಣಪತಿ ಪೂಜೆದ  ಮಹತ್ವೊನು ಸೂತ  ಪುರಾಣಿಕೆರ್‌ ಧರ್ಮರಾಯಗ್‌ ಪಂಡಿ  ಪ್ರಕಾರ  ಆ ವ್ರತಾಚರಣೆಡ್‌ ದಮಯಂತಿಗ್‌  ನಳೆ ತಿಕ್ಯೆ, ಶ್ರೀ ರಾಮೆ  ರಾವಣನ್‌ ಕೆರ್ದ್‌ ಸೀತೆನ್‌ ಪಡೆಯೆ, ಭಗೀರಥೆ ಗಂಗೆನ್‌ ಬೂಮಿಗ್‌  ಜಪುಡಾಯೆ ಪಂಡ  ಗಣಪತಿನ  ಮೈಮೆ  ನಂಕ್‌  ತೆರಿಯುಂಡು  ಬೂಲೋಕ ಸುತ್ತರೆ ಈಸರೆ  ಗಣಪತಿ, ಸುಬ್ರಮಣ್ಯಗ್‌ ಪನ್ನಗ  ಸುಬ್ರಮಣ್ಯೆ ಮೈರೆದ(ನವಿಲು) ಮಿತ್ತ್ ಕುಲೊಂದು ಲೋಕ  ಸುತ್ತರೆ ಪಿದಡ್‌ಂಡ  ಗಣಪತಿ ಎಲಿತ ಮಿತ್ತ್‌ ಕುಲ್ಲ್‌ ದ್‌ ಕೈತಲಿತ್ತ್ ನ  ಅಪ್ಪೆ  ಅಮ್ಮಗ್‌  ಮೂಜಿ  ಸುತ್ತು  ಬತ್ತ್ ದ್ ಲೋಕ ತಿರ್ಗ್‌ ದ್‌  ಬತ್ತೆ ಪನ್ಪೆ. ಮೂಲು  ಆಯೆ  ಅಪ್ಪೆ ಅಮ್ಮಗ್‌  ಕೊರ್ನ ಸಾನಮಾನ  ಲೋಕೊರ್ದು  ಮಲ್ಲಂದ್‌ ತೆರಿಯುಂಡು  ಅಂಚಾದ್‌  ಸುರುತ  ಪೂಜೆ ನಿಕ್ಕ್‌  ತಿಕ್ಕ ಡ್ಂದ್‌  ಈಸರ ದೇವೆರ್‌  ಗಣಪತಿಗ್‌  ವರ ಕೊರ್ಪೆರ್.

      ಇಲ್ಲಲ್ ಕಂರ್ಬು ಚೋರ್ನ ಕಟ್ಟ್ ದ್ ಚೌತಿ ಆಚರಣೆ   .     

  ಕೆಲವಿಲ್ಲಡ್‌  ದೇವೆರೆ ಕೋಣೆಡ್‌ ಗಣಪತಿ ದೀಪುನ ಕಿರಮೊ ಬೇತೆ ರೀತಿಡುಪ್ಪುಂಡು ಒಂಜಿ ಚಟ್ಟೆ ಮಣೆ  ದೀದ್‌  ಅವೆತ ಮಿತ್ತ್‌  ಅರಿಪಾಡ್ದ್‌ ಅವೆತ  ಮಿತ್ತ್‌  ಮೂರ್ತಿ  ಕುಲ್ಲದ್‌  ಆರಾಧನೆ ಮಲ್ಪುವೆರ್‌ . ಪೂ ಪಿಂಗಾರ , ಕದಿಕೆ ಎಲ್ಯ ಬಾಲೆಯಾಯಿನೆಡ್ದಾತ್ರ ಒಂಜಿ ಜನಿಯಾರ, ಪೂವರಿ (ಮಂತ್ರಾಕ್ಷರತೆ) ತಾರಾಯಿ,  ಫಲವಸ್ತು ಬಚ್ಚಿರೆ, ಬಜ್ದೆಯಿ , ಎಕ್ಕ, ಪಂಚಾಮೃತ ಮಲ್ಪೆರೆ ಬೋಡಾಯಿನ  ಪೇರ್‌  , ನೆಯಿ,  ಕೊಜಪು, ಚೀಯನೆಯ್‌, ಸಕ್ಕರೆ,  ಬೋಡಾಯಿನೆನ್‌  ದೀದ್‌  ಅಂಚಿಂಚಿ  ಕಂರ್ಬು ನಡ್ಡ್‌  ಪೂಜೆ  ಮಲ್ಪುವೆರ್‌ . ಕೆಲವಿಲ್ಲಲ್‌ ಚಂದನದ,  ಕೆಲವಿಲ್ಲಲ್‌  ಬೊಳ್ಳಿ ದ ಮೂರ್ತಿ ಉಪ್ಪುಂಡು  .ಮಣ್ಣ್ ದ ಮೂರ್ತಿ  ದೀಯೆರ್ಡ ಕೆದು , ಗುವೆಲ್‌, ಪರಪಿ ನೀರ್ಡ್‌ ಬುಡ್ಪೆರ್.‌  "ಓಂ ಗಣಾನಾಂ ತ್ವಾ ಗಣಪತಿಗುಂಹ  ವಾಮಹೇ ಕವಿಂಕ ವೀನಾ ಮು ಪಮಶ್ರವಸ್ತಮಂ , ಜೇಷ್ಠ ರಾಜಂ ಬ್ರಹ್ಮಣಾಂ ಬ್ರಹ್ಮಣ ಸ್ವತಹಾನ  ಶ್ವಣ್ವನ್ನೋತ್ತಿ ಬಿಸ್ಸೀದ ಸಾಧನಂ”  ಪನ್ಪಿನ  ಗಣಪತಿನ  ಬಗೆತ  ಋಗ್ವೇದ (2-23.1)ದ ಸಾಲ್‌ ಡ್‌ ಬಾರೀ  ಪೊರ್ಲುದ ಇಚಾರ ದೆಂಗ್ ದುಂಡು. ಗಣಪತಿನ ಈ ವರ್ಣನೆಡ್‌ ಬ್ರಹ್ಮ ಪಂಡ  ಪರಮಾತ್ಮೆಬ್ರಹ್ಮ ಪಂಡ ವೇದ ಜ್ಷಾನ,  ಬ್ರಹ್ಮಣಸ್ಪತಿ ಪಂಡ  ವೇದೊಲ್ನ ಸ್ವಾಮಿ.ಅಜ್ಞಾನಿಲೆಗ್‌ ಜ್ಞಾನಾಮೃತೊನು  ಕೊರ್ಪುನಿ  ಪರಮಾತ್ಮೆ. ಆಚಮನ,ಘಂಟಾನಾದ, ಪ್ರಾಣಾ ಯಾಮ, ಸಂಕಲ್ಪ, ಪೀಠ ಪೂಜೆ, ಸುರುತ ಗಣಪತಿ ಪೂಜೆ , ಧ್ಯಾನ , ಪ್ರಾಣ ಪ್ರತಿಷ್ಠೆ, ಪ್ರಾಣವಾಹನ, ಆಸನ, ಅರ್ಘ್ಯ, ಪಾದ್ಯ , ಮಧು ಪರ್ಕ, ಪಂಚಾಮೃತ ಸ್ನಾನ , ಶುದ್ಧೋದಕ ಸ್ನಾನ ,  ವಸ್ತ್ರದ್ವಯ,  ಯಜ್ಙೋಪವೀತ , ಗಂಧ, ಅಕ್ಷತೆ ಪೂಜೆ, ಅಂಗ ಪೂಜೆ, ಪತ್ರ ಪೂಜೆ, ಪುಷ್ಪ ಪೂಜೆ, ಧೂಪ, ದೀಪ,ನೈವೇದ್ಯ,ಮಂಗಳಾರತಿ, ದೂರ್ವಾಯುಗ್ಮ ಪೂಜೆ, ಮಂತ್ರ ಪುಷ್ಪ, ಪ್ರದಕ್ಷಿಣೆ , ಪ್ರಾರ್ಥನೆ, ಪ್ರಸನ್ನಾರ್ಘ್ಯ,  ಫಲ ಸಮರ್ಪಣೆ , ಮೋದಕ ದಾನ, ಉಪಾಯನ ದಾನ, ಪುನಃ ಪೂಜೆ, ಸಮಾಪ್ತಿ ಮಂತ್ರ ಬೊಕ್ಕ ವಿಸರ್ಜನ  ಮಂತ್ರ ಈ ಮಾತ ರೀತಿಲೆಡ್‌ ‌ಗಣಪತಿ ಪೂಜೆದ ವಧಿ ವಿಧಾನೊಲುಲ್ಲ. ಅಂಚಾದ್‌ ಐತರೇಯ ಬ್ರಾಹ್ಮಣಾ ಪಂಚಿಕಾ |ಕಂಡಿಕಾ 21ಟ್‌ “ ಗಣಾ ನಾಂತ್ವಾ ಗಣಪತಿ  ಗುಂಹ  ವಾಮಹೇ  ಇತಿ ಬ್ರಾಹ್ಮಣ ಸ್ವತ್ವಂ ಬ್ರಹವೈ ಬೃಹಸ್ಪತಿರ್ಬಹ್ಮಣ್ಯೈ ವೈನಂತದ್ ಭಾಷಹ್ಯತಿಂ"ದ್‌ ಪ್ರಾರ್ಥನೆ  ಮಲ್ತೊನುವೆರ್.‌

     

       ಗಣಪತಿನ ಅವತಾರೊಡು  ಸುಮಾರ್‌ 32 ಅವತಾರೊಲೆನ್ ಪೆರಿಯಾಕ್ಲು ತೆರಿಪಾದೆರ್‌ .ಬಾಲೆ ರೂಪದ  “ ಬಾಲೆ ಗಣಪತಿ”,  ಎಣ್ಮ ಕೈ ಇತ್ತ್ ನ ತುಂಡಾಯಿನ  ದಾಡೆದ  “ ಜವನೆ ಗಣಪತಿ” , ಬೆನ್ನಿ ಸಾಗೊಳಿದಕ್ಲೆ ಆರಾಧನೆದ  ಕೈಟ್‌ ತಾರಾಯಿ  ಪಂರ್ದ್‌ ಪತೊಂದಿನ “ ಭಕ್ತೆ  ಗಣಪತಿ”  ,ಅತ್ಯಾರ್‌ ಪತೊಂದು  ಪೊಂರ್ಬಾಟೊಗು  ಪಿದಡಿನ ಪದಿನಾಜಿ ಕೈತ “ ವೀರ  ಗಣಪತಿ” , ತುಡೆತ ಮಿತ್ತ್‌ ಬುಡೆದಿನ್‌ ಕುಲ್ಲವೊಂದಿನ ಸಂಸಾರ  ಕಾಪುನ “ ಶಕ್ತಿ ಗಣಪತಿ” ,ಒರ ನರಮಾನಿ ಯಾದ್‌  ಪುಟ್ಟ್‌ ದ್‌ ಕರಿದ್‌ ಪೋದು  ಕುಡ ನಾಲ್‌  ತರೆ ಪಾರಾದ್‌ ಒಟ್ಟು ರಡ್ಡ್‌ ಸರ್ತಿ ಪುಟ್ಟಿನ “ ದ್ವಿಜ ಗಣಪತಿ”,  ಜೀವನೊನು ಎಡ್ಡೆ ಮಲ್ಪುನ  , ಸಂಪೊತ್ತು ಕೊರ್ದು  ಕಾಪುನ   , ಮಂಜಲ್‌  ಬಣ್ಣದ  ಮೂರ್ತಿ ರೂಪದ “ ಸಿದ್ದಿ ಗಣಪತಿ” , ಆಜಿ ಕೈ ಇತ್ತ್ ದ್, ಒಂಜಿ ಕೈಟ್‌  ವೀಣೆ  ಪತೊಂದಿನ  ತೆಲಿನೀಲಿ ಬಣ್ಣದ “ ಉಚ್ಚಿಷ್ಟ ಗಣಪತಿ” ,ಅಡ್ಡ ವಿಡ್ಡೂರೊಲೆನ್‌ ದೂರ ಮಲ್ಪುನ ವಿಘ್ನೇಶ್ವರೆ, ವಿಘ್ನ ನಾಶಕೆ “ ವಿಘ್ನ ಗಣಪತಿ”, ಬೇಗ ಕಜ್ಜೊನು ಸಿದ್ದಿ ಮಲ್ಪುನ ಕೆಂಪು ಬಣ್ಣದ “ಕ್ಷಿಪ್ರ ಗಣಪತಿ” ಸಿಮ್ಮದ ಮಿತ್ತ್ ಕುಲ್ದು ಲಾಗ್ಯೆರೆ ತಯಾರಾತ್ ನ ಐನ್ ತರೆತ ಬಡವೆರೆ ಉದ್ದಾರಕೆ "ಹೇರಂಬ ಗಣಪತಿ”,ಪಣವು,ಸಿರಿ ಸಂಪೊತ್ತುದ,ಮೆಗ್ದಿ ಪಲಯನ ಸಮ್ಮಂದೊನು ಗಟ್ಟಿ ಮಲ್ಪುನ ಬಂಗಾರ್ ಬಣ್ಣದ "ಲಕ್ಷ್ಮೀ ಗಣಪತಿ", ಶಕ್ತಿದ ಒರುವಾದ್ ಉಪ್ಪುನ ,ಶಕ್ತಿದ ಒಟ್ಟುಗು ಉಪ್ಪುನ ಕೆಂಪು ಬಣ್ಣದ “ಮಹಾಗಣಪತಿ”, ದಂಡ್ ದ ಗೆಲ್ಪುದ ಒರುವಾಯಿನ ,ಎಲಿತ ಮಿತ್ತ್ ಕುಲ್ದಿನ ನಾಲ್ ಕೈತ “ವಿಜಯ ಗಣಪತಿ”, ನಲಿಪುನ ಒರುತ “ನೃತ್ಯ ಗಣಪತಿ”, ಉದ್ದ ಸರ್ರದ ,ಕೈಟ್ ತಾಮರೆಪೂ, ಬಾರ್,ಕರ್ಂಬು ಕಟ್ಟ ಪತ್ತ್ ನ “ಊರ್ದ್ವ ಗಣಪತಿ” , ಎಲಿತ ಮಿತ್ತ್ ಕುಲ್ನ ಒಂಜಚ್ಚರದ ಕೆಂಪು ಬಣ್ಣದ “ಏಕಾಕ್ಷರ ಗಣಪತಿ”, ಜ್ಞಾನ ಸಂಕೇತದ ,ವರ ಕೊರ್ಪುನ ಮೂಜಿ ಕಣ್ಣ್ ದ “ ವರ ಗಣಪತಿ”, ಮೋದಕ ತಿಂದೊಂದಿಪ್ಪುನ ಮೂಜಚ್ಚರದ “ತ್ರ್ಯಕ್ಷರ ಗಣಪತಿ”, ನಮ್ಮ ಅಬುಲಾಸೆನ್ ಈಡೇರಿಪುನ “ ಕ್ಷಿಪ್ರ ಪ್ರಸಾದ ಗಣಪತಿ” ,ಬಂಗಾರ್ ಮಂಜಲ್ ಬಣ್ಣ, ಅರಸೊತ್ತಿಗೆದ ತುತ್ತೈತೊದ “ಹರಿದ್ರಾ ಗಣಪತಿ”, ಒಂಜೇ ದಾಡೆದ, ನೀಲಿ ಬಣ್ಣದ “ಏಕದಂತ ಗಣಪತಿ” ,ಕಿನ್ಯ ರೂಪದ, ಎಲಿತ ಮಿತ್ತ್ ಕುಲ್ಲಿನ “ ಸೃಷ್ಟಿ ಗಣಪತಿ” ,ಧರ್ಮ ರಕ್ಷಣೆದ, ಪತ್ತ್ ಗುಣತೊರುತ,  ಪತ್ತ್ ಕೈತ “ಉದ್ದಂಡ ಗಣಪತಿ” ,ಸಾಲೊರ್ದು ಮುಕ್ತಿ ಕೊರ್ಪುನ, ಬೊನ್ಯ ಬಣ್ಣದ “ಋಣ ವಿಮೋಚನಾ ಗಣಪತಿ”, ಕೈಟ್ ರುದ್ರಾಕ್ಷಿ ಮಾಲೆ ಪತೊಂದಿನ, ಕೆಂಪುಬಣ್ಣದ “ದುಂಡಿ ಗಣಪತಿ, ಅಂಚಿಗೊಂಜಿ ಇಂಚಿಗೊಂಜಿ ರಡ್ಡ್ ಮೋನೆದ ನೀಲಿ ಬಣ್ಣದ “ದ್ವಿಮುಖ ಗಣಪತಿ” ,ತಾಮರೆ ಮಿತ್ತ್ ಕುಲ್ದಿನ, ಬಂಗಾರ್ ಬಣ್ಣದ ಮೂಜಿ ಮೋನೆದ “ತ್ರಿಮುಖ ಗಣಪತಿ", ಸಿಮ್ಮದ ಮಿತ್ತ್ ಕುಲ್ದಿನ “ಸಿಂಹ ಗಣಪತಿ” ,ಧ್ಯಾನ ಯೋಗೊಡು ಪದ್ಮಾಸನ ಪಾಡ್ದ್ ಕುಲ್ದಿನ “ಯೋಗ ಗಣಪತಿ” , ಅಪ್ಪೆ ದುರ್ಗೆನ ಶಕ್ತಿ ಪಡೆಯಿನ “ದುರ್ಗಾ ಗಣಪತಿ” ,ನರಮಾನ್ಯನ ಕಷ್ಟ ಕೋಟಲೆನ್ ದೂರ ಮಲ್ಪುನ “ಸಂಕಷ್ಟಹರ ಗಣಪತಿ” ಅಂಚೆನೆ ಇದ್ಯೆದ ಅದಿಪತಿಯಾಯಿನ “ವಿದ್ಯಾ ಗಣಪತಿ”,”ಯಕ್ಷ ಗಣಪತಿ","ಪಂಚಮುಖಿ ಗಣಪತಿಂ"ದ್ ಬೇತೆ ಬೇತೆ ರೂಪೊಡು ಸಿದ್ದಿವಿನಾಯಕ ಗಣಪತಿನ ಆರಾಧನೆ ಮಲ್ಪುವೆರ್.

      ಚೌತಿದಪಗ ಪೂರಲ ಪಚ್ಚೆ ಪಜಿರುಡ್ ದಿಂಜಿದಿಪ್ಪುಂಡು. ಕೆರೆಂಗ್,ಮರಕೆರೆಂಗ್,ಬೋಡಯ್ನಾತ್ ನಟ್ಟಿಕಾಯಿಲು ಸೋಣ ತಿಂಗೊಲುಡು ತಿಕ್ಕುನೆರ್ದಾತ್ರ ಚೌತಿನ್ ಬಾರಿ ಗೌಜಿಡ್ ಆಚರಣೆ ಮಲ್ತೊಂತೆರ್. ಚೌತಿನ್ ತುಳುವೆರ್ "ತೌತೆ ತೆಕ್ಕರೆ ಪರ್ಬಂ"ದ್ ಲಾ ಆಚರಣೆ ಮಲ್ಪುವೆರ್. ದೇವೆರೆ ಆರಾದನೆ ಬರ್ಪುನ ದುಂಬುದ ತುಳುನಾಎ ದೈವಾರಾದನೆಡ್ ಚೌತಿ ಪರ್ವಂದ್ ಬಲಸೊಂತೆರ್.ಉಂದೆನ್ ಚೌತಿ ಕರಿಪುನಿ ಪನ್ಪೆರ್.ಗಣೇಶ ಚತುರ್ಥಿಗ್ಲ ದೈವೊಲೆದ ಚೌತಿ ಕರಿಪುನೆಕ್ಲ ಸಮ್ಮಂದ ಇಜ್ಜಿ. ದೈವದ ಕರಿಪುನ ಕಿರಮೊಗು ಚೌತಿದ ಪಾಡ್ಯಂದ್ ಲ ಪನ್ಪೆರ್.ಚೌತಿದ ದುಂಬುನಾನಿ ಜಾಲ್ದ ಕಜವು ಪಂತಿಲೆನ್  ಕೊಟ್ಟುಪಾರ್ದ್ ಕೆರೆತ್ ದ್  ಅಂಬಿ ಅಡ್ತುದಾ ಅಂಬಿ ತಲ್ತುದಾ ಸುದ್ದ ಮಲ್ಪುವೆರ್. ಮನದಾನಿ ಚೌತಿಗ್ ಕೊಟ್ಟು ಮುಟ್ಟವುನ ಶಾಸ್ತ್ರ ಮಲ್ತ್ ದ್ ಅಂಬಿ ತಲ್ತ್ ಬುಡ್ಪೆರ್.ಕೊಯ್ಯೆರಾಪುನ ಪೊರ್ತಾಯಿನೆರ್ದಾತ್ರ ಇಂಚ ಇಲ್ಲಗ್ ಕನತಿ ಕೆಯ್ನ್ ಆನೆ ಪಡಿಕ್ ಹಾಕ್ ದ್ ಜಾಲ್ ಡ್ ಕೈಪೂಳುಡು ಬಾರ್ ನ್ ರಾಶಿ ಮಲ್ಪುವೆರ್. ಅಟ್ಟೆಮಿದ ,ಚೌತಿದ ಮರ್ಯಾದಿಂದ್ ದುಂಬು ಕೊಂಬುದಕುಲ್ ಇಲ್ಲಿಲ್ಲಗ್ ಬರೊಂತೆರ್. ಅರಿ ತಾರಾಯಿ ಪಡಿ ತಿಕ್ಕೊಂದಿತ್ತ್ಂಡ್.ಅಟ್ಟೆಮಿಗ್ ಅಕ್ ಲೆಗ್ ಅಟ್ಟೆಮಿ ಮರ್ಯಾದಿಂದ್, ಚೌತಿಗ್ ಚೌತಿ ನಟ್ಟುನಿಂದ್ ಪನ್ಪೆರ್. ಗಣಪತಿನ ಆರಾದನೆಗ್ ಏಪ ಶುದ್ದಾಚಾರ ಬತ್ತ್ಂಡ ಆನಿರ್ದ್ ಬೊಕ್ಕ ತುಳುನಾಡ್ ಡ್ ಸಾರ್ವಜನಿಕ ಗಣೇಶೊತ್ಸವ ಸುರಾಂಡ್. ಮಂತ್ರ ಪಂಡಿಸಾತ್ ಗ್ ,ಗುಡಿ ಕಟ್ಟಿಸಾತ್ ಗ್, ಪೂಜೆ ಮಲ್ತಿ ಸಾತ್ ಗ್ ಸುದ್ದಾಚಾರ ಆಪುಜಿ. ಸ್ವಾರ್ಥದಾಂತಿ ಸತ್ಯದರ್ಮದ ಬದ್ ಕ್ ಬೋಡು. ತುಳುನಾಡ್ ಡ್ ಕೊಂಕಣೆರ್ ಬಾರಿಗೌಜಿಡ್ ಗಣಪತಿನ್ ಆರಾದನೆ ಮಲ್ಪುವೆರ್. ಮಲ್ಲಮಲ್ಲ ತರವಾಡುದ ಇಲ್ಲಡ್ ಗಣಪತಿ ಕುಲ್ಲಾದ್ ಮೆರವಣಿಗೆ ಮಲ್ತುದ್ ಪರಪಿ ನೀರುಡ್ ಬುಡೊಂತೆರ್. ಅವ್ವೇ ದುಂಬುಗ್ ಸಾರ್ವಜನಿಕ ಗಣೇಶೊತ್ಸವ ಆದ್ ಸ್ವತಂತ್ರದ ಪೊರ್ತುಡ್ ಜನಕ್ಲೆನ್ ಒಟ್ಟು ಮಲ್ಪೆರೆ ಇಲ್ಲಿಲ್ಲಡ್ ಆಚರಣೆ ಮಲ್ತೊಂತಿನ ಗಣಪತಿನ್ ಸಾರ್ವಜನಿಕವಾದ್ ಕನತ್ ದ್ ಮಹಾರಾಷ್ಠ್ರದ ಬೊಂಬಾಯಿ ಬೊಕ್ಕ ಪುಣೆಟ್ ಸಾರ್ವಜನಿಕ ಗಣೇಶ ಉಚ್ಚಯ ಆದ್ ಸುರುಮಲ್ತೆರ್. ಅಲ್ತ್ ಬೊಕ್ಕ ಈ ಸಾರ್ವಜನಿಕ ಗಣೇಶೊತ್ಸವ ಸುರಾಂಡ್. ಚೌತಿದಾನಿ ಇನಕೆ ಬರ್ಪೆಂದ್ ಚೌತಿ ಬಲಸ್ ದ್ ಕುಟುಮೊದ ಜೋಕ್ಲೆನ್ ಪೂರ ಪಿದಾಯಿ ಲೆತೊಂದು ಬತ್ತ್ ದ್ ಬಾನ ತೋಜಾವುನ ಕಿರಮ ಉಂಡು. ದಾಯೆ ಪಂಡ ಇನಕೆ ಬಾನದ ಉಡಲ್ದಾಯೆ, ಜೋಕ್ಲೆ ಬುದ್ದಿದಾಯೆ ,ಜೊಕ್ಲೆಲೆಕ ಬಂಜಾರ ತಿನ್ಪುನಾಯೆ .ಅಂಚಾದ್ ಆಯೆ ತಿನ್ನಗ ತೂಯರೆ ಬಲ್ಲಿಂದ್ ಇಂಚ ಮಲ್ತೊಂತೆರ್. ಪುರಾಣದ ಪ್ರಕಾರ ಮದೂರುಡು ಜೊಕ್ಲು ಗಣಪತಿ ಚಿತ್ರ ಬುಡ್ಪಾದ್ ಅರೆಪಜಿ ಅಪ್ಪ ಕೊರ್ನೆರ್ದಾತ್ರ ಇನಿಲಾ ಅಂಚೆನೇ ನಡಪುಂಡು. ಆಯನ್ ಚಪ್ಪೆ ತಿನ್ಪುನ ಬೊಡ್ಡಜ್ಜಂದ್ ಪನ್ಪೆರ್. ಗೋಪಾಲ ಕೆರೆಗ್ ತಿಕ್ಕಿನ ಸೌತಡ್ಕ ಗಣಪತಿಗ್ ಬೈಲೇ ಸಾನ ಆದುಂಡು. ಕ್ರಿಶ 7ನೆ ಶತಮಾನೊಡು ಕುಂಭಾಷಿ ಗಣಪತಿ 2.5 ಅಡಿ ಎತ್ತರ ಇತ್ತ್ ದ್ ಸಾಲಿಗ್ರಾಮ ಶಿಲೆಟ್ ಮಲ್ದೆರ್. ಪೆಲತಿರೆತ ಕೊಟ್ಟಿಗೆ ದೇವೆರೆಗಿಷ್ಟ. ಗಣಪತಿ ದೇವೆರೆ ಉಚ್ಚಯ ಕಲ್ಪನೆ ಬತ್ತಿನಿ ಮರಾಠ ದೊರೆ ಛತ್ರಪತಿ ಶಿವಾಜಿ ಮಹಾರಾಜೆರೆರ್ದ್.ಪೇಶ್ವೆನಕುಲ್ಲಾ ಗಣಪತಿನ್ ಆರಾದನೆ ಮಲ್ತೊಂತೆರ್.  12 ಜ್ಯೋತಿರ್ಲಿಂಗೊಲು ದೇಶದ ಬೇತೆ ಬೇತೆ ಕಡೆಟ್ ಪದ್ ರ್ದ್ ಪೋಂಡ  ಅಷ್ಟ ವಿನಾಯಕೆರೆನ್ ತೂಯೆರೆ ಮಹಾರಾಷ್ಟ್ರೊಗೇ ಫೋವೊಡ್. ಅಪ್ಪೆ ಪಾರ್ವತಿ ತಾಂಕನದಪ್ಪೆ,ಮೈಸಗೆ ಪೆದ್ದಿಯಪ್ಪೆ ತನ್ನ ಮಟ್ಟೆಲ್ ಗ್ ಸೇರವೊನ್ನಾಲ್ ಗಂಗೆಲ ಗಣಪತಿನ ಅಪ್ಪೆನೆ. ಗಣಪತಿನ ಪೂಜೆ ಸುರುಕು ಮಲ್ತಿಜಿಂಡ ಪೂಜೆ ವಾ ದೇವೆರೆಗ್ ಲಾ ಎತ್ತುಜಿ.ಗಣಪತಿನ್ ಬೆನ್ನಿ ಸಾಗೊಳಿದ ಒರುವಾದ್  ತೂಪುಂಡ ಗಣಪತಿನ ಬಂಜಿ ಪಂಡ ಬಾರ್ ದ ತುಪ್ಪೆ, ಬಂಜಿಗ್ ಸುತ್ತೊನ್ನ ಉಚ್ಚು ಪಂಡ ತುಪ್ಪೆಗ್ ಸುತ್ತುನ ಪೆರ್ಮರಿ ಕಟ್ಟ .ಬಾರ್ ನ್ ಎಲಿರ್ದ್ ಕಾಪೆರೆ ಬಂಜಿಗ್ ಸರ್ಪನ ಕಲ್ಪನೆ. ಅಂಚನೆ ನಮ್ಮ ಇಲ್ಲಲ್ಲಾ ಗಣಪತಿಗ್ ಬಲಸುನಿ ಪಂಡ ವರ್ಷಲಾ ಒವೆನಾಂಡಲಾ ಒಂಜಿ ಅಡ್ಯೆನ್  ಬದಲ್ಪಾವೊಡು. ಕದಿಕೆ ಪಂತಿದ ಕೊಡಿಟ್ ಗಣಪತಿನ್ ಮಾನಾದಿಗೆಡ್ ಎದ್ಕೊನೊಲಿ. ಮೈರೆದ ಮಿತ್ತ್ ಕುಲ್ದಿನ ಮಯೂರೆಸ್ವರೆ, ಸಿದ್ದಿವಿನಾಯಕ ,ಬಲ್ಲಾಳೇಶ್ವರೆ, ವರದ ವಿನಾಯಕೆ, ಗಿರಿಜಾತ್ಮಜೆ, ಚಿಂತಾಮಣಿ ಗಣಪತಿ ವಿಘ್ನೇಶ್ವರೆ, ಇಷ್ಟಾರ್ಥ ಸಿದ್ದಿಗಣಪತಿ, ಮಹಾರಾಷ್ಠ್ರದ ಅಷ್ಟ ವಿನಾಯಕೆ ಕೆರಾಂಡಲಾ ಜಗತ್ತ್ ಗ್ ಅಕುಲು ಸನ್ಮಂಗಲೊನು ಕೊರ್ದು ಕಾಪಾದಿಪ್ಪಡ್ಂದ್ ನಮ ಮಾತೆರ್ಲಾ ಆ ಇನಕ ದೇವೆರೆನ್ ಬಯ ಬಗ್ ತಿಡ್ ಮೊಕೆಡ್ ಸುಗಿತೊನ್ಗ.

                                 ಚೌತಿ ಪೂ

ಚಿತ್ರ ಕೃಪೆ-ಹರ್ಷ ತುಳುನಾಡ್,ಅನೂಪ್ ಸೂರಿಂಜೆ,ಡಾ ಇಂದಿರಾ ಹೆಗ್ಡೆ,ವೀಣಾ ಶೆಟ್ಟಿ,ಬೋಳೂರು ಗರಡಿ,ರೂಪಕಲಾ ಆಳ್ವ

ಸೋಣದ ಜೋಗಿ

                               ಸೋಣದಜೋಗಿ

                         ಚಿತ್ರ ಕೃಪೆ-ಅನೂಪ್ ಸೂರಿಂಜೆ

ಲೇಖನ-ಬಿ.ಎ.ಲೋಕಯ್ಯ ಶಿಶಿಲ

ವೀಡಿಯೋ ಕೊಂಡಿ-

 https://youtu.be/sy-ik4lgr98

ಮಹೇಂದ್ರ ನಾಥ್ ಸಾಲೆತ್ತೂರು ಎಂ ಎ

            ಮಹೇಂದ್ರ ನಾಥ್ ಸಾಲೆತ್ತೂರು.ಎಂ.ಎ 

ಜೋಗಿವಾಣಿ ಮಾಸ ಪತ್ರಿಕೆಡ್ ನಮಕ್ ಗೌರವ ಸಂಪಾದಕೆರಾದ್ ಮಾನಾದಿಗೆ ತಿಕ್ಕ್ ನಗ

ನಮ್ಮ ಪೊಲಬು-

ದೈವಾರಾದನೆ

                ‌           ದೈವಾರಾದನೆ

"ಬಡಕಾಯಿ ರಾಜ್ಯದ ಪುಟ್ಟು,ತೆನ್ಕಾಯಿ ರಾಜ್ಯದ ಕಟ್ಟ್"

ಉದಾರ್ಮೆಗ್ ಲೆಕ್ಕೆ ಸಿರಿ ಉದಿತ್ ನ ಇಚಾರ ಬನ್ನಗ ಬಡಕಾಯಿ ಗಂಗೆಂದೆ ಬರ್ಪುನಿ.ಎಚ್ಚಿನ ದೈವೊಲೆ ಪುಟ್ಟು ಬಡಕಾಯಿ ರಾಜ್ಯೊಡ್ದೆ ಆತ್ ನಿ.

ದೈವೊಲೆ ಆರಾದನೆ  ಪ್ರತಿಯೊಂಜಿಲ ಉಂತುದೇ ನಡಪುನ ಆರಾದನೆ.ಆಂಡ ದೇವೆರೆ ಆರಾದನೆ ಪ್ರತಿಯೊಂಜಿಲ ಕುಲ್ಲುದೇ ನಡಪುನ ಆರಾದನೆ.

ದೈವೊಲೆಗ್ ಭಂಡಾರ,ಭಂಡಾರದಿಲ್ಲ್ಂದ್ ಉಪ್ಪುನತ್ತಂದೆ ಭಂಡಾರ/ಕಿರ್ವಾಲ್ ನೇಮ ನೆರಿ ನಡಪುನ ಜಾಗೆಗ್ ಪೋಪುಂಡು.ಆಂಡ ದೇವೆರೆಗ್ ಭಂಡಾರದಿಲ್ಲ್,ಭಂಡಾರಂದಿಜ್ಜಿ,ಗರ್ಭ ಗುಂಡ ಉಪ್ಪುನಿ.

ದೈವ ದೈವೊಲೆನ ಬೇಟಿನ್,ದೈವ ದೇವೆರೆ ಬೇಟಿನ್ ಮೂಲ ತುಳುವ ಸವ್ದೊಡು ಕೂಡು ಕಟ್ಟ್ ಪನ್ಪೆರ್.ದೈವ ದೈವೊಲು ಕೂಡುನ ಜಾಗೆದ ಬಗೆಟ್ ಹಿರಿಯಾಕ್ಲ್ ಮಲ್ತಿ ಕಟ್ಟ್ಂದ್ ಅರ್ಥ ಮಲ್ತೊನೊಡು.

   "ಮೂಡಾಯಿ ಗಟ್ಟೊರ್ದು ಪಡ್ಡೇಯಿ ಕಡಲಕರೆಮುಟ್ಟ,ಬಡಕಾಯಿ ಬಾರ್ಕೂರ ಗಡಿರ್ದ್ ತೆನ್ಕಾಯಿನೀಲೇಶ್ವರ ಗಡಿಮುಟ್ಟ,ಅಜ್ಜೊಗೊಂಜಿ ಬಲಿ,ಮುಟ್ಟುಗೊಂಜಿ ಪುರಪು,ಕಟ್ಟಿಲ್ಲ್,ಜತ್ತಿಬಾಕಿಲ್ ಎಂಕುಲು ನೆಲೆ ಊರ್ನ ದೈವೊಲು" ಪಂಡ್ ದ್ ಪೆರ್ಮೆಡ್ ಪನ್ಪುನ ದೈವೊಲು ನಮ್ಮ ತುಳುನಾಡ ದೈವೊಲು.ಅಡ್ಕದ ಪೂ,ತೋಟದ ಪಾಳೆ,ಕಂಠೆ ತೆಂಬರೆಡ್ ದುಂಬು ವೈಭವದ ಕೋಲೊಡು ಸತ್ಯದ ನುಡಿ,ಸಾಯದ ಗಂಧ ಆ ಕಾಲೊಡು ದೈವೊಲು ಕೊರೊಂತ.ದೈವದ ಎವ್ರ ಮಲ್ಲ ಆನಗ ಹಿರಿಯಾರ್,'ಉಂತು,ಮಿತ್ತ್ ಸ್ವಾಮಿ ಮಲ್ಲೆ,ತಿರ್ತ್ ಬೂಮಿ ಮಲ್ಲೆ,ನಿನನ್ ನಂಬಿನ ಎಂಕುಲು ಮಲ್ಲೆ,ಉಂತು'ಪಂಡ್ದ್ ತಲ್ತಿ  ನೀರ್ ಗ್ ಪಂಡಿ ಪಾತೆರೊಗು ಉಂತುನ ದೈವ ಖಂಡಿತ ಉಂಡು. 

                   ಮರ್ಲ್ ಜುಮಾದಿ ಕದ್ರಿ ಜೋಗಿ ಮಠ

" ದೈವ ಪುಟ್ಟೀನ ಬಲಕೇದ ನಾಡ್  ಓಲುಂದು ಪನ್ನಗ......

ಬಡಕಾಯಿ ಬಲ್ಲಾಲೇ ರಾಜ್ಯೊವ್ವಾ,,,,,,,,

ತೆನ್ಕಾಯಿ ರಾಜೆರ್ಲೆ ರಾಜ್ಯವೊವ್ವಾ,,,,,ಉಂಡುಗೆ,,,,

" ಗಟ್ಟದ ಪುಡೆಡ್ದ್ ಕಡಲ ಬರಿಮುಟ್ಟ ತುಳುನಾಡೊರ್ಮೆಲಾ ಪಟ್ಟ ಆಳುನ ಮಲ್ಲಾಯರ್ದ್ ಪತ್ತ್ ದ್ ಮುಟ್ಟಾಲೆ ದೀದ್ ಬೆನ್ಪುನ ಬಲ್ಲಿ ಬಡವರೆ ಮುಟ್ಟ ಕುಟುಮೊಗು ಗೂಂಟ,ಪೊಣ್ಣಗ್ ತಮೆರಿ,ಆಣಗ್ ತಮ್ಮಲೆ ಪನ್ಪಾವೊಂದು, ಪಕ್ಕಿ ಕುಲ್ಲಂದಿ ಮರ ಇಜ್ಜಿ,ತುಲುನಾಡ ಪಂಜುರ್ಲಿ ಇಜ್ಜಂದಿ ಕುಟುಮ ಇಜ್ಜಿ ಪನ್ಪಾವೊಂದು ಮೆರೆಪುನ ಮಾಮಲ್ಲ ಸತ್ಯ ಪಂಡ್ಂದಾಂಡ  ಅವ್ವೆ ಮಾಯಗಾರೆ ಪಂಜುರ್ಲಿ."ಪಂಜುರ್ಲಿ ಪೂರ ಬೂಮಿ‌ ಉಂಡಾನಗ ಉಂಡಾಯಿ ಪಾರಂಪರಿಕ ದೈವೊಲು.ಅವೆಟ್ ಬಾರೀ ಪಿರಾಕ್ ದ ಪಂಜುರ್ಲಿ ಕುಪ್ಪೆ ಪಂಜುರ್ಲಿ.ಪಂಜುರ್ಲಿಗ್ ಅಡ್ಡ ಅಣಿಯೇ ಆವೊಡು.ಇನಿ ವೃತ್ತಾಕಾರದ ಅಣಿ  ಬೈದ್ಂಡ್.ಕೋಟ್ಯಣ್ಣ ಕುಪ್ಪೆರ್ಲೆಡ ದಯವ ಪನ್ಪುನಿ ಅಂಚನೆ-"ಕುಪ್ಪೆರ್ಲೆ ದೊಳ ಬಾರಿಕೆಗ್ ಪೋಲ,ಅಲ್ಪ ಬೊಳ್ಳಿದ ಅಡ್ಡ ಅಣಿ ಉಂಡು,ಬೊಳ್ಳಿದ ಗುಬ್ಬೆ ಉಂಡು,ಐನ್ ತೂದು ಈ ತೋಟದ ಪಾಳೆ,ತಾರೆದ ತಿರಿ ಕನತ್ ದ್ ಅವೆಟ್ ಅಣಿ  ತಿರಿ ಮಲ್ಪುಲ" ಪಂಡ್ ದ್ ಸ್ಪಷ್ಟವಾದ್ ಪಂತ್ಂಡ್.ಕುಪ್ಪೆ ಪಂಜುರ್ಲಿನ ಪಾಡ್ದನೊಡು ಈ ಇಚಾರ ಸ್ಪಷ್ಟವಾದ್ ಉಂಡು.ಪುಡೆ ಕಲಿ ಪಜಿ ಕೋರಿ ತಿನ್ಪುನ ದೈವ ಪಂಜುರ್ಲಿ.ಈ ಇಚಾರ ಸಂದಿಡೇ ಬರ್ಪುಂಡು.ಕೆಲವು ದೈವ ಕಟ್ಟ್ ನಕ್ಲೆಗ್ ಎಂಕ್ಲೇ ದೈವ ಪನ್ಪುನವು ತರೆಕ್ ಅಡರ್ದುಪ್ಪುಂಡು.ಅಕ್ಲ್ ಪನ್ನವೇ ಸರಿ ಪನ್ಪುನ ಬಾವನೆಲ ಅಕ್ಲೆಗುಪ್ಪುಂಡು.ದೈವೊಡ್ದು ಕಟ್ಟುನಕುಲು ವಿನಃ ಕಟ್ಟುನಕ್ಲೆರ್ದ್ ದೈವ ಅತ್ತ್.ಅಂಚನೆ ಕೆಲವೊರ ದೈವದ ಕೋಲೊಡು ಪುರಾಣ ಸೇರಾದ್ ಪಂಡ ಎಂಕುಲು ಮಲ್ಲ ಜನಾಪ ಪನ್ಪಿ ಬಾವನೆಲ ಕೆಲವು ಕಟ್ಟುನಕುಲೆಗುಂಡು.ಅವೆತ ಬದಲ್ ದೈವದ ಸಂದಿ ಕಲ್ತ್ ದ್ ಕೋಲ ನೇಮ ಮಲ್ತ್ಂಡ ದೈವ ಕಲ ಬೆಳಗು.ನಿಜವಾದ್ ದೈವೊಲೆಗ್ ಬ್ರಾಂಡಿ ದೀಯೆರ್ಲ ಇಜ್ಜಿ,ಕಲಿ ಮಾತ್ರ.ಆಂಡ ಇನಿ ಕಟ್ಟುನಕುಲು ಬ್ರಾಂಡಿ ಕೇನೊಂದುಲ್ಲೆರ್.ವಿದೇಶಿ ಇಸ  ದಿಂಜಿ ಮದ್ಯ ದೈವೊಲೆಗ್ ಕೊರ್ರೆ ಇಜ್ಜಿ.

  

ದೈವೊಗು ಮನ ಬಗ್ ತಿರ್ದ್ ಮಲ್ಲ ಒವುಲ ಅತ್ತ್

ದುಂಬುದ ಕಾಲೊಡು ಪಜ್ಜಿ ಮಡಲ್ ದ ಮಿತ್ತ್ ದೈವ ಭಂಡಾರ ಕೇರ್ತೊಂತೆರ್.ಅಪಗದ ದೈವೊಲ್ನ ಕಾರ್ನಿಕ ಅವೆರ್ದ್ ಬೊಕ್ಕ ಬತ್ತಿನ ಕುಕ್ಕು,ಪೆಲತ ಮಣೆ ಮಂಚೊಡಾವಡ್,ಮುಗಮೂರ್ತಿಲೆಡಾವಡ್ ತೂಯೆರೆ ತಿಕ್ಕೊಂದಿಜ್ಜಿ.

ನಮ ಬಡುಟು ಬೇರ್ದ್ ಹಾಕುವ ಗಾಯ ಆವು,ಆಂಡ ಮಾಜಿದ್ ಪೋವು.ಆಂಡ ದೈವ ಹಾಕುನಿ‌ ಮಾಯೆದ ಬಡುಟು.ಹಾಕ್ ನ ತೋಜಂದ್.ಗಾಯಲ ಮಾಜಂದ್.

    

                 ದೈವ ಪಾತ್ರಿ ಮೋನೆಗ್ ಅರ್ದಾಲ ಪಾಡುನಿ

  

    ದೈವದ ಕಲೊಕು ಪೊಸತಾದ್ ಬತ್ತಿ ನೂಲು ಪಾಡಿ ಸಂಸಾರ  ಮುಂಡೊಗು ದೈವದ ಗಂದ ಒರೆಂಕುಜೆರ್,ದೈವದ ಕೈಟ್ ಬೂಲ್ಯ ಪತ್ತುಜೆರ್,ದೈವದ ಆವಾರೊಗುಂದು ಪರ್ಂದ್ ದ ಚೋಲಿ ದೆಪ್ಪುಜೆರ್,ದೈವದ ಅಸರ್ ಗ್ಂದ್ ಬೊಂಡ ಕೆತ್ತುಜೆರ್.ದೈವದ ದಾಲಾ ಚಾಕಿರಿ ಮಲ್ಪಂದಿ ಮೊಕ್ಲು ದೈವದ ಕಲೊಟು ಮಾತೆರೆರ್ದ್ ಮಲ್ಲ ಜನ ಆದ್ ಪೋತೆರ್.ಇನಿ ಓಡೆಮುಟ್ಟ ಪಂಡ ದೈವದ ಕಂಟೆಲ್ ಗ್ ಪೂತ ಮಾಲೆ ಪಾಡುಜೆರ್.ದೂರೊಡೆ ಕುಲೊಂದು ಪೂತ ಮಾಲೆ ದೈವದ ಮಿತ್ತ್ ದಕ್ಕುವೆರ್.ಆತ್ ಗತಿಯೆಟ್ ಡ್ ದಾಯೆ ದೈವದ ಕಲೊಕು ಮೊಕ್ಲು ಬರೊಡು.ಅಂಚ ಪೂ ದಕ್ಕೆರೆ ಮೊಕ್ಲು ದಾನೆ ದೇವೆರ್ಂದ್ ಎನ್ನಿದೆರಾ,ಮೊಕ್ಲು ದೇವೆರೆನ ಚಾಕಿರಿ ಮಲ್ಪುನಕುಲು ಆತೆ.ಅಂಚಾಂದ್ ದೈವೊನು ಮೊಕ್ಲು ಸಸಾರ ಮಲ್ಪುನವು ಸರಿಯತ್ತ್

ದೈವದ ಕಲೊಟು ದೈವೊಲೆಗ್ ಕಡೆ ಕೆತ್ತ್ ನ ಬೊಂಡೊನೇ ಪರ್ಯೆರೆ ಕೊರೊಡು.ಕೊಡಿ ಕಡ್ತ್ ನ ಬೊಂಡ ಪಂಡ ಕಣ್ಣ್ ಕಡ್ತ್ ನ ಬೊಂಡೊನು ದೈವೊಗು ಕೊರ್ರೆ ಬಲ್ಲಿ."ಕಡೆ ಕಡ್ತಿ ಬೊಂಡೊನೆ ನಮಕ್ ಕೊರೊಡು" ಪಂಡ್ ದ್ ದೈವದ ಕಟ್ಟ್ ಡೇ ಉಂಡು.ದೈವ ಸ್ಟ್ರಾಟ್ ಬೊಂಡ ಪರ್ಪುನ ಕಟ್ಟಿಜ್ಜಿ.ಕಡೆ ಕಡ್ತ್ ನ ಮಲ್ಲ ಒಟ್ಟೆಡ್  ದೈವ ಗಟ ಗಟ ನೀರ್ ಪರ್ಪುಂಡು. ಬೊಂಡ ಕಡೆ ಕೆತ್ತ್ ದೇ ದೈವೊಗು ಕೊರೊಡು.ದೇವೆರೆಗ್ ಬೊಂಡ ಕೊಡಿ ಕಡ್ತ್ ದ್ ಒಟ್ಟೆ ಮಲ್ತ್ ದ್ ದೀಯೊಡು.

ಅಂಚನೆ ದೈವೊಲೆಗ್ ಬೆಮ್ಮೆರೆ ಸುತ್ತೆ ದೀನಗ ಮುಗಟೆ ದಾಂತಿ ತಾರಾಯೇ ದೀಯೊಡು.ಅವೆಟೇ ಸಕನ ತೂಯೆರೆ ಸಾದ್ಯ.ದೇವೆರೆಗ್ ಜುಟ್ಟುದ ತಾರಾಯಿ ದೀಪುನಿ.ಬೆಮ್ಮೆರ್ ಬೂಮಿ ಸಮಾಬದ ದೈವ ಆಯಿನೆರ್ದಾತ್ರ ಉರ್ಪೆಲರಿ ಸುತ್ತೆ ದೀಪ.

 ಬಂಜಿಗ್ ಉನೆರೆ ತಿನೆರೆ ಗತಿ ದಾಂತಿ,ತುತ್ತೆರೆ ತುಂಡು ಕುಂಟು ದಾಂತಿ,ಇದ್ಯೆದ ಗಂದಗಾಳಿ ತೆರಿಯಂದಿ  ಪೂರ್ವಹಿರಿಯಾಕ್ಲ್ ನಂಬೊಂದು ಬತ್ತಿ ದೈವೊಲೆನ ಮಾಯೆ ಮಲ್ಲೆ ಆದಿತ್ತ್ಂಡ್.ಅಡೆಗ್ ಮಂತ್ರ ಬತ್ತ್ ದ್ ಮಾಯೆದ ನಿಲೆ ತತ್ತ್ ದ್ ದೈವೊಲು ದೇವೆರಾಯೆರೆ ಸುರಾಯೆರ್.           

ಕುಪ್ಪೆ ಪಂಜುರ್ಲಿ ದೈವದ ಬಾರೀ ಪಿರಾಕ್ ದ ಮೂರ್ತಿ ಕೋರ್ಜೆ-ಕಬಕ.

ಪಂಚ ವರ್ಣದ ಮಣ್ಣ್:-

೧.ಕೆಂಪು ಮಣ್ಣ್

೨.ಕಪ್ಪು‌ಮಣ್ಣ್

೩.ಸೇಡಿ ಮಣ್ಣ್

೪.ಪೊಯ್ಯೆ ಮಣ್ಣ್

೫.ಪುಂಚದ ಮಣ್ಣ್..

ದೈವದ ಕಲೊಟು ಚರ್ವ ಮಲ್ಪೆರೆ ಈ ಬಗೆತ ಮಣ್ಣ್ ದ ಕರೊಕ್ಲೆನ್ ದೈವದ ಕಲತ ಮೂಲ್ಯಾದಿಗೆದ ಮೂಲ್ಯೆರ್ ಮಲ್ತೊಂತೆರ್.ಅಂಚನೆ ದೈವೊಲೆಗ್ ಪೊರಿ ಪೊದ್ಪೆರೆಲ ಮಣ್ಣ್ ದ ಮಲ್ಲ ಕರೊನೆ ಗಲಸೊಂತೆರ್.ಬಾಲೆಗ್ ಕೊಜಪುದ ಮಣ್ಣ್ ದ ಕುದುಪೆಯಾಂಡ ನಮ ಕರಿದ್ ಪೋನಗಲ ಕಡೆಕ್ ಒಟ್ಟೆ ಮಲ್ತ್ ದ್ ಪಿರವುಗು ದಕ್ಕುನಿ ಮಣ್ಣ್ ದ ಕುದುಪೆನೆ.ದೈವದ ಬದಿಕರ ಬೂಲ್ಯೊಗ್ಲ ಮಣ್ಣ್ ದ ಕರೊನೆ ಗಲಸೊಂತ್ ನಿ.ದೈವೊಗು ಬಲಿತ ತಿರ್ತ್ ಅಮುರ್ತ ದೀಯೆರ್ಲ ಮಣ್ಣ್ ದ ಕುದುಪೆನೆ ಗಲ ಸೊಂತ್ ನಿ.ದೈವದ ಅಗೆಲ್ ದ ನುಪ್ಪು ಕಜಿಪುಗಾವಡ್ ಗಲಸೊಂತ್ ನಿ ಮಣ್ಣ್ ದ ಕರ ಬಿಸಲೆನೆ.ಪಂಚ ಬೂತದ ಒಂಜಿ ಅಂಶ ಅಯಿನ ಮಣ್ಣ್ ಡ್ ಉದಿತಿ ಮಣ್ಣ್ ದ ಕರೊಕ್ಲ,ಪಂಚ ಬೂತೊಲೆಡ್ ಉದಿತಿ  ಪಂಚೇಂದ್ರಿಯದ ನರಪುರಿಕ್ಲ ಪುಟ್ಟುರ್ದು ಸಾವು‌ ಮುಟ್ಟ ಸಮ್ಮಂದ ಉಂಡು.ಅಂಚನೆ ಮಣ್ಣ್ ಮರಿಯಾದ್ ಕೊಡಪು ಪನ್ಪುನವ್ಲು ನಾಗೆ ಬೊಕ್ಕ‌ ಮಣ್ಣ್ ಗ್,ನಾಗ ಮೂಲದ ನರಮಾನಿಗ್ ಸಮ್ಮಂದ ಗೋಡಿದ್ ಬರ್ಪುಂಡು.ಮಣ್ಣ ಮಡತ್ತಾನ ದೈವದ ಕಲೊಟು ಮಲ್ಪುನ‌ ನರಮಾನ್ಯಗ್,ಮಣ್ಣ್ ದಪ್ಪಣೆ ದೆತೊಂದು‌ ಸುರಾಪುನ‌ ದೈವಾರಾದನೆಗ್ ಸಮ್ಮಂದ ಉಂಡು.ಮಣ್ಣ್ ಮುನಿಂಡ ಬದ್ ಕೆರೆ ಸಾದ್ಯ ಇಜ್ಜಿ.ಮಣ್ಣ್ ಮೂರಿ ಬತ್ತ್ಂಡ್ ಪಂಡ ಆಯನ ಅವುಸ ಮುಗಿಂಡ್ಂದ್ ಲೆಕ್ಕ.ಪಂಚ ವರ್ಣದ ಪುಂಚದ ಮಣ್ಣ್ ಪನ್ಪುನವ್ಲು ಉದಲ್ ಪುಂಚ ಕಟ್ಟ್ ದ್ ನಾಗೆ ಪುಂಚದ ಸಂಪುದುಲಯಿ ಬದುಕುಂಡು.ಪುಂಚದ ಮಣ್ಣ ಪುರ್ಸಾದ ಬಂಜಿ ಗ್ ದೆತೊಂಡ ಸಿರ್ಕ್ ಮಾಜುಂಡು,ಪುಂಚದ ಮಣ್ಣ್ ಮೇಲ್ ಗ್ ಪೂಜಿಂಡ ಚರ್ಮ ಸಿರ್ಕುಲು ದೂರಾಪುಂಡು.ಅಪಗ ಮಣ್ಣ್ ಗ್ ನಾಗಗ್,ಮಣ್ಣ್ ನಿಲೆಯಾಯಿ ದೈವೊಗು,ನರಮಾನ್ಯಗ್ ಉಪ್ಪುನ ಸಮ್ಮಂದ ತೆರಿಯುಂಡು.ಕೊರಗತನಿಯನ ಪುರ್ಸಾದ ಮಣ್ಣ್ ದ ಪುರ್ಸಾದ ಆದಿತ್ತ್ ದ್ ಪಲಿತ ಕಮ್ಮಿಯಾನಗ ಕೊರಗ ತನಿಯೆ ಪುಂಚದ ಮಣ್ಣ್ ನ್ ಪುರ್ಸಾದ ಆದ್ ಕೊರೊಂತ್ ನಿ.ಇನಿ ಅಡೆ ಕಪ್ಪುದ ಗಂದ ಬೈದ್ಂಡ್.

              

 ದೇವೆರೆ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುನಾಡ ಆರಾದನೆಡ್ ಇತ್ತ್ ನ ತುಳುನಾಡ ಮಣ್ಣ ದೈವೊಲೆನ್ ದೇವೆರೆಡ್ದ್ ಪುಟ್ಟ್ ನ ದೈವೊಲುಂದು ಪಂಡ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ಪೆರೆ ಪೋವಡೆ.ದೈವೊಲೆನ್ ಈ ಮಣ್ಣ್ ಡ್ ಉದಿತಿ ದೈವೊಲಾದೇ ತೂಕ.ದೇವೆರೆನ್ ದೇವೆರಾದೇ ತೂಕ.ದೇವೆರೆನ್ ಸಂಸ್ಕೃತದ ಮಂತ್ರೊಲೆಡ್ ಮಾನಿತೊಂಡ ದೈವೊಲೆನ್ ಸಂದಿ ಪಾಡ್ದನದ ನಿಲೆಟೇ ಅರ್ಥ ಮಲ್ತೊನುಗ.ದೈವೊಲೆನ್ ಆರಾದನೆದ ಒರುತ ಕೊಡಿಯಡಿಟೇ ಮಾನಿತೊನ್ಗ.ಅವೆನ್ ಬುಡ್ದು ಬೇತೆ ಬೇತೆ ರಂಗೊಲೆಡ್ ಪ್ರದರ್ಶನ ಕಲೆಯಾದ್ ತೂಪರಿಕೆ ಮಲ್ಪಡೆ.

    

       ದೈವಾರಾದನೆಗ್ ಬೋಡಾಯಿ ತಿರಿತ ಸೊತ್ತುಲೆನ ತಯಾರಿ

  ಇನಿತ ದಿನಮಾನೊಡು ತುಳುವೆರೆ ಆರಾದನೆದ ತುಳುನಾಡ ದೈವೊಲು ಸಿನೆಮಾ ನಾಟಕ,ಆಟದ ತೂಪರಿಕೆದ ವೇಷೊಲಾಯಿನವು ತುಳುವೆರೆ ದೈವಾರಾದನೆದ ದುರಂತಂದೇ ಪನೊಲಿ.ಅಕ್ಲೆಡ ಕೇಂಡ ಎಂಕುಲು ದೈವದ ಕಲೆ ಕಾರ್ನಿಕೊನು ಲೋಕೊಗು ತೆರಿಪಾವೊಂದುಲ್ಲಂದ್ ಪನ್ಪೆರ್.ದೈವದ ಕಲೆ ಕಾರ್ನಿಕೊನು ತೋಜಾಯೆರೆ ನಮ ಏರ್?.ದುಂಬು ತುಳುನಾಡ ವ್ಯಾಪ್ತಿಡ್ ನಡತೊಂತಿ ದೈವಾರಾದನೆನ್ ಮೊಕ್ಲೆನ ಕಾಸ್ ದ ಅಂಬೆರ್ಪುಡು ಸಾರ್ವತ್ರಿಕ ಮಲ್ತೊಂದು ಪೋಯೆರ್.ಕಟ್ಟುನಕುಲು ಮೂಲ ತುಳುನಾಡ ಚಾಕಿರಿನ್ ಬುಡ್ದು ಕಾಸ್ ದ ಆಸೆಡ್ ಈ ಮಾದ್ಯಮದಕ್ಲೆಗ್ ತಾನ್ ನಂಬೊಂತಿ ದೈವದ ಭಂಡಾರ ಕೊರ್ಪುನವು ದೈವೊನು ಮಾರ್ದ್ ಬುಡ್ಲೆಕಾಂಡ್.ದೈವದ ಇಚಾರ ತೆರಿಯಂದಿ ಗಟ್ಟದ ಮಿತ್ತ್ ದೈವೊಲೆಗ್ ಕಟ್ಟೆರೆ ಪೋದು ಅಲ್ತಕ್ಲೆಗ್ ತುಳುವ ನಾಡ್ ದ ಕೊಡಿಯಡಿತ ದೈವೊಲು ಆಟ ನಾಟಕದ ವೇಷೊಲಾದ್ ಪೋಯ.ತುಳುನಾಡ ಕೊಡಿಯಡಿತ ಆರಾದನೆದ ದೈವೊಲು ಯಕ್ಷಗಾನೊಡು ವೇಷೊಲಾದ್ ಪೋಯ.ಆರಾದನೆದ ನಂಬೊಳಿಗೆದ ಕಲೆ ಕಾರ್ನಿಕದ ಕೊಡಿಯಡಿತ ದೈವೊಲೆನ್ ಕಲಾಪ್ರಕಾರದ ಬೊಂಬೆಲಾದ್ ಮಲ್ತೆರ್.ಪದಿನಾಜಿ ವರ್ಗೊನು ಒತ್ತಟ್ಟ್ ಡ್ ಉಂತಾದ್ ಪದಿನಾಜಿ ಕಟ್ಲೆಡ್ ಪದಿನಾಜಿ ಕಲೆ ದಿಂಜಿದ್ ಕೊಡಿಯಡಿಟ್ ಉಂತೊಡಾಯಿನ ದೈವೊಲಿನಿ ಅಟ,ನಾಟಕ,ಸಿನೆಮಾದ ಪಾತ್ರೊಲಾದ್ ಪೋಯ.ನಮ್ಮ ದೈವಾರಾದನೆದ ಮೂಲ ಕಟ್ಲೆ ತತ್ತೊಂದು ಪೋನಗ ಅಡೆಗ್ ಪೊಸತಾದ್ ಬತ್ತ್ ನ ಒಂಜಿ ವರ್ಗ ತುಳುವೆರೆ ದೈವೊಲೆಗಿಜ್ಜಂದಿ ಅಷ್ಟಮಂಗಲ ಪ್ರಶ್ನೆ ದೀದ್,ತುಳುನಾಡ ದೈವೊಲೆಗಿಜ್ಜಾಂದಿ ಬ್ರಹ್ಮ ಕಲಶ ಮಲ್ಪಾದ್ ದೈವದ ಪುದರ್ ನ್ ಪೂರ ಬದಲ್ತ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ತೊಂದು ಪೋಯೆರ್.ದೈವದ ಕೊಡಿಯಡಿತ ಮೂಲ ಚಾಕಿರಿದಕ್ಲೆನ್ ಸುದ್ದಾಚಾರ,ಮಡಿಮೈಲೆಂದ್ ದೂರ ಉಂತಯೆರ್.ನೆತ್ತೆರಾವಾರದ ದೈವೊಲೆಗ್ ಪೊರಿಪೊದ್ದೊಲುದ ತಂಬಿಲ ಕಟ್ಟಾಯೆರ್.ಇತ್ತಿತ್ತೆ ದೈವೊಲೆಗ್ ನೇಮ ದಾಯೆ,ತಂಬಿಲೊಡು ಸುದಾರ್ಪುಗಂದ್ ಪನ್ಪುನಡೆಮುಟ್ಟ ಅಕುಲು ಎತ್ತ್ ದ್ ಬುಡ್ಯೆರ್.ತುಳುನಾಡ ಬೆಮ್ಮೆರೆನ ಪುದರ್ ನ್ ಮುದೆಲ್ ದಾಂತಿನಾತ್ ಅಡಿಕ್ ತರ್ತೆರ್,ವೈದಿಕ ಚತುರ್ಮುಖ ಬ್ರಹ್ಮನ್ ಅಡೆ ಕನತೆರ್.ಅವ್ಲ ಯಾರುಜಿಂದ್ ನಾಗನೊಟ್ಟುಗು ಬೆಮ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗಬ್ರಹ್ಮ ಮಲ್ತೆರ್.ಅವೈದಿಕ ದ್ರಾವಿಡ ತುಳುವ ಕಟ್ಟ್ ದ ಮೂಲ ದೈವಾರಾದನೆ ಸಂಪೂರ್ಣ ಅಡಿ ತತ್ತ್ ದ್ ವೈದಿಕದ ಅನುಕರಣೆಗೆತ್ತ್ ದ್ಂಡ್‌.ಅವೆನ್ ಸರಿ ಮಲ್ಪೆರೆ ಆವಂದಿನಾತ್ ದೂರ ಪೋತ್ಂಡ್.ಕರಿನೆಕ್ ಕಟ್ಟೆ ಕಟ್ಟಂದೆ ಒರಿನೆಕಾಂಡಲ ಕಟ್ಟೆ ಕಟ್ಟುನ ಅನಿವಾರ್ಯತೆ ತುಳುವೆರಾಯಿನ ನಮಕುಂಡು.ಏರ್ ದೈವಾರಾದನೆಡ್ ತಪ್ಪು ಮಲ್ತೆರ್ಡಲ ಅಕ್ಲೆನ್ ಪ್ರಶ್ಬೆ ಮಲ್ಪುನ ಅನಿವಾರ್ಯ ಪರಿಸ್ಥಿತಿ ಬೈದ್ಂಡ್.ಓಡೆಮುಟ್ಟ ಇನಿ ದೈವಾರಾದನೆ ಎತ್ತ್ ದ್ಂಡ್ ಪಂಡ ಬ್ರಹ್ಮ ಸಭೆ,ತಂತಿರ್ದಾರ್,ವೈದಿಕೆರಿಜ್ಜಂದೆ ಕೊಡಿಯಡಿತ ದೈವೊಲೆ ಇಜ್ಜಿ ಪನ್ಪುನಡೆಗ್ ದೈವಾರಾದನೆ ಎತ್ತ್ ದ್ಂಡತ್ತಂದೆ ತುಳುವ ಆಚರಣೆಲಾಯಿನ ಮದಿಮೆ,ಸಾವು ಪೂರ ವೈದಿಕದಡಿಟ್ ನಡತೊಂದುಂಡು ಪಂಡ ಇಡೀ ದೈವಾರಾದನೆದ ವ್ಯವಸ್ಥೆನ್,ತುಳುವ ಆಚರಣೆಲೆನ್,ವೈದಿಕತೆ ಇನಿ ಆಳ್ಯೊಂದುಂಡು.

                         ರಾಜ ದಂಡ

ಚಿತ್ರೊಡುಪ್ಪುನಾರ್ ಹೆಬ್ರಿ ಕೈತಲ್ದ ತಿಂಗಳೆ ವಿಕ್ರಮಾರ್ಜುನ ಹೆಗ್ಗಡೆರ್.

       ತುಳು ನಾಡ್ ಡ್   ಅರಸೊಳಿಗೆದ ಕಾಲೊಡು ಅರಂತಡೆದ ದೇವೆರೆ ಕೋಣೆದುಲಯಿ,ರಾಜಂದೈವದ ಕೋಣೆದುಲಯಿ ದೀವೊಂತ್ ನ ಮಾನಾದಿಗೆದ ನ್ಯಾಯ ದಂಡೊನು ರಾಜ ದಂಡ ಪನೊಂತೆರ್.ಚೋಳ ಅರಸೆರೆ ಕಾಲೊಡು ಒರಿ ಅರಸೆ ಕುಡೊರಿ ಅರಸಗ್ ರಾಜ್ಯದ ಅಧಿಕಾರ ಬುಡು ಕೊರ್ನಗ, ರಾಜೆರೆಗ್ ರಾಜ್ಯಾಭಿಷೆಕ/ಪಟ್ಟಾಭಿಷೇಕ ಆನಗ ವೈದಿಕೆರ್ ರಾಜ ದಂಡೊಗು ಕಲಸ ನೀರ್ ಮೈತ್ ದ್ ಅರಸುಲ್ನ ಕೈಟ್ ರಾಜದಂಡ ಕೊರೊಂತೆರ್.ಮೂಜಿ ಮೂಜರೆ ಅಡಿ ಎತ್ತರ ಉಪ್ಪುನ ಈ ರಾಜದಂಡದ ತರೆಟ್ ನಂದಿದ ಕೆತ್ತನೆ ಉಪ್ಪುಂಡು.ಉಂದೆನ್ ನ್ಯಾಯ ದಂಡಂದ್ ಲ ಪನ್ಪೆರ್.ದೈವ ದೇವೆರೆ ಸಾಕ್ಷಿಯಾದ್ ಅರಸುಲು ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡೊನು ಪತೊಂದಿಪ್ಪುವೆರ್.ದೈವ ನ್ಯಾಯ ತೀರ್ಮಾನ ಮಲ್ಪುನಗ , ನುಡಿ ಕೊರ್ನಗ ಜೀಟಿಗೆದ ಅಗ್ಗಿ ಅವೆಕ್ ಸಾಕ್ಷಿಯಾಯಿಲೆಕ ಒರಿ ಅರಸು ಕುಡೊಂಜಿ ಅರಸುಗು ಅಧಿಕಾರ ಬುಡು ಕೊರ್ನಗ , ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡ ಅವೆಕ್  ಸಾಕ್ಷಿಯಾದಿಪ್ಪುಂಡು. ಒರಿ ಅರಸು ಬೊಕ್ಕೊಂಜಿ ಅರಸುಗು ಅಧಿಕಾರೊನು ಬುಡು ಕೊರ್ನಗ ರಾಜ ದಂಡದೊಟ್ಟುಗು ಅಧಿಕಾರ ಬುಡು ಕೊರೊಂತೆರ್.

    

             ಜಾರಂದಾಯ ದೈವದ ಬಂಗಾರ್ದ ಮುಗ,ಕರ್ನಿರೆ

    ಜನ  ಸಾಮಾನ್ಯೆರ್,ಪೊಂಜನಕುಲು‌ ರಾಜ ದಂಡೊನು ಮುಟ್ಟುಲೆಕಿಜ್ಜಾಂಡ್. ಒರಿ ಅರಸು ಅಧಿಕಾರ ಬದಲ್ಪುನಗ, ನ್ಯಾಯ ತೀರ್ಮಾನ ಮಲ್ಪುನಗ,ವಿಶೇಷ ಧಾರ್ಮಿಕ ಉಚ್ಚಯದಪಗ ಅರಸುಲು ರಾಜ ದಂಡೊನು ಪತೊಂತೆರ್.ಕಾಲಾನು ಭಾಗೊಡು ಅರಸೊಳಿಗೆ ಉಂತಿ ಬೊಕ್ಕಲ ಅರಸುಲೆ ಒರುವಾದ್ ಕೆಲವು ತಿಕ್ ಡ್ ಇನಿಕ್ಲ ರಾಜದಂಡೊಗು ಅರಸುಲೆ ಮಾನಾದಿಗೆ ತಿಕ್ಕೊಂದುಂಡು.ರಾಜದಂಡೊನು ತಮಿಳ್ಡ್ ಸೆಂಗೋಲ್ ಪನ್ಪೆರ್.ತುಳು,ಕನ್ನಡೊಡು ರಾಜ/ನ್ಯಾಯ ದಂಡ ಪನ್ಪೆರ್.ಧರ್ಮದ ಸಂಕೇತ ಆಯಿನ ,ನ್ಯಾಯದ ಸಂಕೇತ ಆಯಿನ ನ್ಯಾಯ,ಧರ್ಮ ದಂಡೊನು ರಾಜ ದಂಡಂದ್ ಪನ್ಪೆರ್.ರಾಜ ದಂಡೊನು ತೂನಗ,ಅವೆನ್ ಗಲಸೊಂತ್ ನ ಅರಸುಲೆನ್ ತೂನಗ ಮೂಲ ದ್ರಾವಿಡ ಜನಾಂಗ ಮುಲ್ತ ಮೂಲ ಜನಾಂಗಂದ್ ಲ ಅರ್ಥ ಮಲ್ತೊನೊಲಿ.

ಚಿತ್ರ ಬೊಕ್ಕ ಪೊಲಬು-ವಿ.ಕೆ.ವಾಲ್ಪಾಡಿ.ಹಿರಿಯ ಪತ್ರಕರ್ತೆರ್.

         ‌   ಕೊಡಿ ಮರಟ್ ಕುಂಟುದ ಗರುಡ ದೇವೆರ್

ದೈವಾರಾದನೆಡ್ ಅಯಾ ಪ್ರದೇಶಾಚಾರಂದಿಪ್ಪುಂಡು.ಒಂಜಿ ತಿಕ್ ಡ್ ಸರಿ ಇತ್ತ್ ನವು ನನೊಂಜಿ ತಿಕ್ ಡ್ ತಪ್ಪಾದಿಪ್ಪು.ಅಂಚಾಂದ್ ಅವು ಸರಿ ಉಂದು ತಪ್ಪುಂದು ದೈವಾರಾದನೆದ ಆಚರಣೆಡ್ ಪನೆರೆ ಬಂಙ.ಅಕ್ಲೆ ಪೂರ್ವ ಹಿರಿಯಾಕ್ಲ್ ಮಲ್ತಿ ಕಟ್ಟ್ ನ್ ಅಕ್ಲ್ ಪಾಲಿತೊಂದು ಪೋವೊಡು.ನಮ ಪೊಸತಾದ್ ಒಂಜಿ ಕಟ್ಟ್ ಮಲ್ತ್ ದ್ ಅವೆನ್ ಪೂರೆರ್ಲ ಪಾಲಿಪೊಡು ಪಂಡ ಸರಿಯತ್ತ್.

      ದೈವ ಕುದುರೆ ಬಂಡಿದ ಮಿತ್ತ್. ಚಿತ್ರ-ಮಧುಸೂದನ್ ಶೆಟ್ಟಿ

ದೈವಸಾನೊಡು ದೈವೊನೇ ಉಪ್ಪೊಡು ವಿನಃ ದೇವೆರತ್ತ್.ದೇವಸಾನೊಡು ದೇವೆರೇ ಉಪ್ಪೊಡು ವಿನಃ ದೈವೊಲತ್ತ್. ದಾಯೆ ಪಂಡ ತುಳುನಾಡ್ ಡ್ ಮೂಲೊಡು ದೈವಸಾನೊಲೆ ಇತ್ತ್ ನಿ.ನಿಜವಾದ್ ದೈವದ ಬಂಡಿ ಕಲ ಮೀರಂದಿಲೆಕ ಪೋನಗ ದೈವ ಬಂಡಿದ ಮಿತ್ತ್ ಕುಲ್ಲ್ ದಿತ್ತ್ಂಡ, ದೈವದ ಕಾರ ಗಗ್ಗರದ ಪರೆಲ ಸೊರೊ ಬೊಕ್ಕ ಸತ್ತಿಗೆದ ಅರ್ಲೋಲುದ ಸೊರೊ ಬೊಕ್ಕ ಬಂಡಿದ ಮರತ ಚಕ್ರದ ಸೊರೊ ಮಾತ್ರ ಕೇನೊಡು.ಅವು ಬುಡ್ದು ನರಮಾನಿ ಗೋವಿಂದ ಪಾಡುನ ಕಟ್ಟ್ ದುಂಬಿಜ್ಜಾಂಡ್.ಅ ಗೋವಿಂದ ದೇವೆರೆಗ್ ಸರಿ,ದೈವೊಲೆಗತ್ತ್.ನನಾಂಡಲ ನಮ ತಿದ್ದೊಂಡ ಎಡ್ಡೆ

        

              ಉಲ್ಲಾಲ್ದಿ ದೈವ ಚಿತ್ತಾರಿ ಚಾವಡಿ ಪೈವಳಿಕೆ

   ಇನಿ ತುಳುವೆರೆಗ್ ದೈವಾರಾದನೆದ ಮಿತ್ತ್ ವಿಶ್ವಾಸ ಪೋವೊಂದುಂಡು.ಇಂಚಾಯೆರೆ ಕಾರಣ ನಮನೆ.ದುಂಬು ದೈವಾರಾದನೆಡ್ ಒಂಜಿ ಶಿಸ್ತು ಇತ್ತ್ಂಡ್,ದೈವದ ಕಲೆಕಾರ್ನಿಕ ಇತ್ತ್ಂಡ್.ದೈವದ ಮಿತ್ತ್ ಭಕ್ತಿ ಇತ್ತ್ಂಡ್. ಇನಿತ ಕಟ್ಟುನಕುಲ್ನ ಅಬತಾರ ತೂದು ಜನೊಕ್ಲೆಗ್ ದೈವಾರಾದನೆದ ಮಿತ್ತ್ ವಿಶ್ವಾಸ ಕಮ್ಮಿಯಾವೊಂದುಂಡು.ಇಂಚಿನ ಅಬತಾರೊಲು ದುಂಬಿಜ್ಜಾಂಡ್,ವಾ ಸಂದಿ ಪಾಡ್ದನೊಲೆಡ್ಲಾ ಈ ಇಚಾರ ಇಜ್ಜಿ.ತುಳು ನೆಲತ ಗಡಿ ಪುಡೆ ಬುಡ್ದು ಬೇತೆ ಓಲ್ಲಾ ದೈವಾರಾದನೆ ಮಲ್ಪೆರಿಜ್ಜಿ.ದೈವಾರಾದನೆ ಭಕ್ತಿನ್ ಬುಡ್ದು ಕಾಸ್ ದ ಪಿರವು ಪೋವೊಂದುಂಡು.ಇನಿ ನಮ್ಮ ತುಳು ನೆಲತ ಕಲಾವಿದೆರ್ ಆಟ,ನಾಟಕ,ಸಿನೆಮೊಲೆಡ್ ದೈವದ ವೇಸ ಪಾಡ್ದ್ ತೋಜಾಯೆರೆ ಸುರು ಮಲ್ತ್ ದ್ ದೈವೊಲ್ನ ಮಿತ್ತ ವಿಶ್ವಾಸ ಜನೊಕ್ಲೆಗ್ ಕಮ್ಮಿಯಾವೊಂದುಂಡು.ಉಂದೆರ್ದಾದ್ ದೈವೊಲೆನ ಬಗೆಟ್ ತೆರಿಯಂದಿನಕುಲು ದೈವದ ಛದ್ಮ ವೇಷ ಪಾಡೊಂದುಲ್ಲೆರ್.ಅಕ್ಲೆಗ್ ತುಳುವೆರೆ ಆರಾದನೆದ ದೈವ ಛದ್ಮವೇಷದ  ವೇಷಾದ್ ಪೋಂಡ್.ಅಕ್ಲೆಗ್ ಮುಲ್ತ ದೈವದ ಬಗೆಟ್ ತೆರಿಯಂದಿನೆರ್ದಾದ್ ದೈವೊನ್ಲಾ ಆಟದ ವೇಷಂದೆನ್ನಿದ್ ಕಟ್ಟುವೆರ್.

ಪಂಜಿದ ಮೇಲ್ಡ್ ಕುಲ್ದಿನ ನರಮಾನಿ ಮೋನೆದ ದೈವ ಉದ್ರಾಂಡಿ

   ಕಲಾವಿದೆರ್ಡ ಕೇಂಡ ಎಂಕುಲು ದೈವದ ಕಾರ್ನಿಕೊನು ಪ್ರಚಾರ ಮಲ್ತೊಂದುಲ್ಲಂದ್ ಪನೊಂದುಲ್ಲೆರ್.ದೈವದ ಕಲೆ ಕಾರ್ನಿಕೊನು ಸಿನೆಮ,ನಾಟಕ,ಆಟೊಡು ತೋಜಾದ್ ಪ್ರಚಾರ ಮಲ್ಪೊಡುಂದಿಜ್ಜಿ.ದೈವದ ಕಾರ್ನಿಕ ತೆರಿಯೊಡಂಡ ದೈವೊಲೆಗ್ಂದ್ ಉಪ್ಪುನ ಕೊಡಿಯಡಿಕ್ ಬತ್ತ್ ದ್ ಪಿಂದೊನಡ್.ದುಂಬು ನಮನ್ ನಮ್ಮ ಹಿರಿಯಾಕ್ಲು ದೈವದ ಕಲೊಕು ಲೆತೊಂದು ಪೋದು ದೈವದ ಇಚಾರ ತೆರಿಪಾವೊಂತೆರ್.ಅವೆನ್ ಅಡೆಗೇ ಪೋದು ಪಿಂದೊನೊಡು ವಿನಃ ಆಟ,ನಾಟಕ,ಸಿನೆಮಾ,ದಾರಾವಾಹಿಲೆಡ್ ತೆರಿಯೊನುನ ಅಗತ್ಯ ಇಜ್ಜಿ.ಅಂಚನೆ ದೈವದ ದಾದ ಇಚಾರ ಇತ್ತ್ಂಡಲ ದೈವದ ಕೊಡಿಯಡಿಟೇ ತೂವೊಡು ವಿನಃ ಅವೆನ್ ಆಟ ಸಿನೆಮಾ ನಾಟಕೊಡು ತೂಪಿನತ್ತ್.ದೈವಾರಾದನೆ ದೈವಸಾನದ ಗಡಿಪುಡೆ ಬುಡ್ದು ಬೇರೊಗುಂದು ಪಿದಯಿ ಪೋಪುನ ಬೊಡ್ಚಿ.

   

                            ಉಲ್ಲಾಕ್ಲೆನ ಸಿರಿಮುಡಿ

   ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾನಗ  ದೈವೊಲೆನ್ ಬುಡ್ದು ಅಡೆ ದೇವೆರೆನ್ ಕುಲ್ಲಾಯೆರ್.ದೈವೊಲೆನ್ ಬುಡೆರೆ ಆವಂದಿ ಜಾಗೆಡ್ ದೇವೆರೆ ಗುಂಡದುಲಯಿ ದೇವೆರೆ ಬಲತ ಬಾಗೊಡಾ,ಅಗ್ನಿಮೂಲೆಡಾ ದೈವೊಲೆನ್ ಕುಲ್ಲಾಯೆರ್.

              ದೈವೊಲೆಗ್ ಪನಿವಾರ  ಪಾಡ್ದ್ ನಿ

ನಮ್ಮ ಮೂಲ ದೈವಾರಾದನೆ.ಅಂಚಾದ್ ನಮ ಸುರುಕು ದೈವಂದ್ ದೈವ ದೇವೆರ್ ದೀಲೆಕಂದ್ ಪನ್ಪ.ದೈವೊಲೆನ ಮಾತ ಕಟ್ಟ್ ಕಟ್ಲೆ ನ್ ಬದಲ್ತ್ ನಕ್ಲೆಗ್,ದೈವದ ಪುದರ್ ಬದಲ್ತ್ ನಕ್ಲೆಗ್, ಆಣ್ ದೈವೊನು ಪೊಣ್ಣು ಮಲ್ತ್ ನಕ್ಲೆಗ್ ದೈವ ದೇವೆರೆನ್ ದೇವೆರ್ ದೈವ ಮಲ್ಪೆರೆ ನನಲಾ ಆತ್ ಜಿ.ಅವು ದೈವಾರಾದನೆದ ತಾಕತ್ತ್.

ಒಂಜಿ ಕಾಲೊಡು ಉರ್ಪೆಲರಿಟ್ ದೀವೊಂತಿ ಸುತ್ತೆ ಇನಿ ಮಯಕಾದ್ ಬೊಳಂತೆಡ್ ಗಣಪತಿ ದೀಯ.ಗಿಂಡೆ ನೀರ್ ದ ತಲಿಪು ಮಯಕಾದ್ ಬೊಳ್ಳಿದ ಕಲಶ ಬತ್ತ್ಂಡ್.ಚಿತ್ರ-ಬ್ಯೂಟಿ ಆಫ್ ತುಳುನಾಡ್

  

         ಬೋರಿದ ಮೋನೆಗ್ ಅರ್ದಾಲ ಪೂಜಿಯೆರ್

ಇನಿ ಕೆಲವು ಪ್ರಶ್ನೆಚಿಂತನೆದಕ್ಲ್ ಜುಮಾದಿನ್ ಧೂಮಾವತಿ ಪನ್ಪುನ ಮಾತ್ರ ಅತ್ತಂದೆ ನಿಕುಲು ಧೂಮಾವತಿಗ್ ಪಂಜಿದ ಬಂಡಿದ ಬದಲ್ ಕಕ್ಕೆದ ಬಂಡಿ ಮಲ್ಪುಲೆ ಪನೊಂದುಲ್ಲೆರ್.ಓಡೆಗೆತ್ತ್ಂಡ್ ದೈವಾರಾದನೆದ ಸ್ಥಿತಿ?.ಅಂಚನೆ ದೈವದ ಕಲೊಟು ಕೆಲವೆರ್ ಕಟ್ಟುನಕುಲು ಜನೊಕ್ಲೆನ್ ಪೋಡಿ ಕಟ್ಟಾವೊಂದುಲ್ಲೆರ್.ಪೆಟ್ಟ್ ಒಂಜಿ ರಡ್ಡ್ ತುಂಡುಂದಾ,ನೆತ್ತೆರ್ ಕಕ್ಕಾವೆಂದಾ ಪನೊಂದುಲ್ಲೆರ್.ದೈವ ಏಪಲ ಅಂಚ ಮಲ್ಪಂದ್.

  

         ಪ್ಯಾಂಟ್ ಪಾಡೊಂದು ದೈವದ ಪಲ್ಲೆಂಕಿ ತುಂಬುನಿ

ದೇವೆರೆ ಆರಾದನೆಡ್ ಕಂಡನಿ ಬುಡೆದಿನ ಆರಾದನೆ ಉಂಡು.ದೈವೊಲೆಡಿಜ್ಜಿ.ಅಂಚಾದ್ ಉಲ್ಲಾಯ ಉಲ್ಲಾಲ್ದಿನ್ ಈಸರ ಪಾರೊತಿ ಪನ್ಪುನವು ಸುದ್ದ ತಪ್ಪು.ದೈವಾರಾದನೆಡ್ ತನ್ನಿಮಾನಿಗಗ್ ಮದಿಮೆ ಆಪುನ ಕೆರಮ ತೋಜಾವೆರ್.

            ಗಿರಾವು ದೈವದ ಮುಗ.ಇತ್ತೆ ಕಿರಾತೇಶ್ವರ ಆತ್ಂಡ್

 ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾದ್ ದೈವೊಲು ದೇವೆರಾಯಿಲೆಕ,ಕೇತ್ರುಲ್ಲಾಯೆ/ಕ್ಷೇತ್ರದ ಉಲ್ಲಾಯೆ ಆದಿತ್ತಿ ಒಡೆಯೆ ಆದಿತ್ತಿ ದೈವೊಲು ಕ್ಷೇತ್ರಪಾಲೆ ಪನ್ಪಿ ಚಾಕಿರಿದಾಯೆ,ಬೇಲೆದಾಯೆ ಆಯಿಲೆಕ,ತುಳುವ ಮಣ್ಣ್ ದ,ತುಳು ಧರ್ಮದ ಸ್ವತಂತ್ರ ಸಗ್ತಿಲಾಯಿನ ದೈವೊಲು ಪರಿವಾರ ಸಗ್ತಿಲಾಯಿಲೆಕ, 

  

ಮಣೇಲ್ ಮಟ್ಟಿ ಬಾರೆ ಬಿತ್ತಿಲ್ ಪಂಜಿದ ಮಿತ್ತ್ ಕುಲ್ದಿನ ಅಣ್ಣಪ್ಪ ಸ್ವಾಮಿ

ಇನಿ ಕುಡ ದೈವದ ಪುದರ್ ಬದಲ್ತ್ ದ್ ದೇವೆರ್ ಮಲ್ಪುನ,ಕಟ್ಟ್ ಕಟ್ಲೆಲೆನ್,ಚಾಕಿರಿ ಭಾಗೊಲೆನ್ ಪೊಳಿಪುನ ವ್ಯವಸ್ಥಿತ ಉನ್ನಾರ ನಡತೊಂದುಂಡು.ತುಳುವೆರೆಗ್ ನನಲ ಜಡ ಬುಡ್ಜಿಂಡ,ಬುದ್ಧಿ ಬತ್ತ್ ಜಿಂಡ ದೈವಾರಾದನೆ ಇತ್ತ್ಂಡ್ ಪನ್ಪುನವೇ ಒಂಜಾತ್ ವರ್ಸೊಡು ಮಾಜಿದ್ ಪೋವು.

   

ದೈವೊಲೆಗ್ ಪಿಲಿತ ಏಸೊಗು ನೋಟುದ ಮಾಲೆ ಪಾಡುಲೆಕ ಪಾಡೆರೆ ಸುರು ಮಲ್ತೆರ್.

ದಾಯೆ ಪಂಡ ದೈವದ ಗಂದಗಾಳಿ ತೆರಿಯಂದಿ,ಒಲ್ತನಾ ಪ್ರಶ್ನೆ ಚಿಂತನೆದಕುಲು ಪಂಡೆರ್ಂದ್  ದಾಖಲೆಗಿತ್ತ್ ನ ಮಣೆ ಮಂಚಾವುನು ಇತ್ತೆನೇ ಪೊತ್ತದಾತ್ಂಡ್.ಮುಗ ಮೂರ್ತಿಲೆನ್ ನೀರ್ ಗ್ ಪಾಡ್ ದಾತ್ಂಡ್, ಮಣೆ ಮಂಚ,ಮುಗ ಮೂರ್ತಿ ಪೊಸತ್ ಮಲ್ತಾತ್ಂಡ್. 

    

ಅರಸು ದೈವೊಲ್ನ ಸಿರಿಮುಡಿಟ್ ಸೂರ್ಯ ಚಂದ್ರೆ ಮಯಕ

ಅವ್ವೆ ಪ್ರಶ್ನೆ ಚಿಂತನೆನಕುಲು ಎದುರುಂತುದು ದೈವಾರಾದನೆದ ಪಿರಾಕ್ ಗ್ ಸಾಕ್ಷಿ ಓಂಡು ಕೇಂಡ ತರೆ  ತಗ್ಗಾದ್ ನೆಲ ತೂಪಿನ ಕಾಲ ಬರು.ಇಂಚಿಪ್ಪ ಒಂಜಿ ತಿಕ್ ಡ್ ಪ್ರಶ್ನೆ ದೀನಕುಲು ಜುಮಾದಿನ್ ಧೂಮಾವತಿ ಮಲ್ತ್ ದ್ ವಾಹನ ಕಕ್ಕೆ ಮಲ್ಪೆರೆ ಪಂಡೆರ್.ಆಂಡ ತೆರಿನಕುಲು ಕಕ್ಕೆ ಬೊಡ್ಚಿ ದುಂಬುದ ಪಂಜಿ ವಾನ ಯಾವುಂದೇ ಪನ್ನಗ ಮನಿಪಂದೆ ಕುಲ್ಯೆರ್.

   

ಉಲ್ಲಾಲ್ದಿನ ಸಿರಿ ಮುಡಿತ ಪಿರವುದ ಪೂತ ಅಲಂಕಾರ ಬೊಕ್ಕ ಜಡೆ

ದೈವೊಲೆಗ್ ಪನೆರೆ ವಾ ವೇದ ಶಾಸ್ತ್ರೊಡ್ಲಾ ವಾ ಮಂತ್ರ ಶ್ಲೋಕಲ ಇಜ್ಜಿ.ಸಂಧಿ ಪಾಡ್ದನೊಲು ಮಾತ್ರ ಉಪ್ಪುನಿ.

  

                        ಜುಮಾದಿ ದೈವ ತಾರೆಬರಿ

ದೈವೊಲೆಗ್ ಪಾರಿ/ಮದಿಪು ಪನ್ಪುನವು ಇಜ್ಜಿ.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಸ್ಪರ್ದೆ  ಮಲ್ತೊಂದುಲ್ಲೆರ್,ಮೈಕ್ ಬೇತೆ,ಪಾರಿದ ಪ್ರಚಾರೊಗು.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್  ಗಂಟೆಕಟ್ಲೆ  ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್  ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಪ್ಪುನವು ನಿಜವಾದ್ ಲ ತಪ್ಪು.

 

 ದೈವದ ಕಲೊಟು ದೈವದ ಕಟ್ಟ್  ಬುಡ್ದು ಪೊಸತೊಂಜಿ ಸರಿಯತ್ತ್

                            

ಕಾಲದ ಪರಪುಡು ಕರದ್ ಪೋವೊಂದಿಪ್ಪುನ,ಆರಾದನೆದ ಎತ್ಯಯೊಡು ಅಳಿಯಂತ್ರ ಸಾದಿಡುಪ್ಪುನ ತುಳುವ ಧರ್ಮದ ದೈವಾರಾದನೆದ ಮೂಲ ನಂಬೊಳಿಗೆ,ಆರಾದನೆದ ಪದಿನಾಜಿ ಕಟ್ಲೆಲು,ಆಚರಣೆಲೆನ್ ಪೆರಿಯಾಕ್ಲ್ ಪಾಡ್ದ್ ಕೊರ್ನ ಸಾದಿಡೆ ಕುಡೊರ ತುಳುವ ಮಣ್ಣ್ ಡ್ ದೆರ್ತ್ ಪತ್ತುನ ಕಾಲ ಬೈದ್ಂಡ್.ಪೊಸತ್ ನ್ ತೋಡುದು,ಪರತ್ ನ್ ನಿಗಿತ್ ದ್ ಮಣ್ಣೇ ಮರಿಯಾದ್ ಕೊಡಪುನ ದುಂಬು ಮೂಲ ನಂಬೊಳಿಗೆ ದಾದ ಪನ್ಪುನೆನ್ ಪೆರಿಯಾಕ್ಲೆಡ ಕೇಂದ್ ಪಿಂದೊನುಗ.

  

ಮಾಕಾಲ್ದಿನ ನೀಲಿ ಬಣ್ಣದ ಮೋನೆದ ರಂಗ್.ನೀಲಿ ರಂಗ್ ಯಕ್ಷಗಾನದ ರಾಮ,ಕೃಷ್ಣ,ವಿಷ್ಣುಗು ಪಾಡ್ವೆರ್.ದೈವೊಲೆಗ್ ಮಂಜಲ್ದ ಅರದಲ  ಮಾತ್ರ.

       

    ತುಳುನಾಡ ದೈವನಾ ಆಟದ ದೇವಿಯಾ ಗೊತ್ತಾಪುಜಿ.

ದೇವೆರೆನ್ ಚಿತ್ರ,ಮೂರ್ತಿಲೆಡ್ ಆರಾದನೆ ಮಲ್ತ್ಂಡ ದೈವೊಲೆನ್ ನೇಮ ಕೋಲದ ಕೊಡಿಯಡಿಟೇ ಆರಾದನೆ ಮಲ್ಪುನಿ.ಜಗತ್ತ್ ಡ್ ದೇವೆರೆ ಪುದರ್ ಹೆಚ್ಚಾದ್ ಮಾತೆರೆಗ್ಲ ಗೊತ್ತಿಪ್ಪುಂಡು.ಆಂಡ ದೈವೊಲೆ ಪುದರ್ ತುಲುನಾಡ್ ದಕ್ಲೆಗ್ ಬುಡ್ದು ಬೇತೆಕ್ಲೆಗ್ ನಂಬೊಳಿಗೆದೊರುಟು ತೆರಿದಿಪ್ಪುಜಿ

     ದೈವೊಲೆಗ್ ಸಂಸ್ಕೃತದ ದೇವತಾಭ್ಯಾಂ,ನಮಃ ಬೈದ್ಂಡ್

  

    ಅಷ್ಟ ಮಂಗಲ ಇಂಚಿಪ್ಪಿ ಪೊಸ ದೇಕಿದ ಪ್ರಶ್ನೆದ ಬದಲ್ ಪೆರಿಯಾಕ್ಲ್ ನಂಬೊಂದು ಬತ್ತಿ ದೈವದ ನುಡಿಕ್ ಬಿಲೆ ಕೊರ್ಕ.ಅಂಚನೆ ಮೂಲ ನಂಬೊಲಿಗೆದ ಬಲ್ಯಾಯನ ನಿಮಿತ್ತ ನೋಟೊನು ಕುಡೊರ ಮಾನಿತೊನ್ಗ. ಬ್ರಹ್ಮಕಲಸ ದಾಂತೆ ತುಳುವೆರ್ ಮೂಲೊಡು ದೈವದ ಮಣೆಮಂಚದೆದುರು ಹಿರಿಯಾಕ್ಲೆ ಮದಿಪುದ ಪಾತೆರೊಗು ಬಿಲೆ ಕೊರ್ದು  ಸಾನ ಗಿರಿತ್ ದ್ ಸಾನ ಕಟ್ಟಾದ್ ದೈವೊಲೆನ್  ಅಂದ್ ಮಲ್ಪುನ ಸಾನದೊಕ್ಕೆಲ್ ನ್ ಮೂಲ  ಕಟ್ಲೆಡೆ ಮಲ್ಪುನ ಕಾಲ ಒದಗ್ ದ್ ಬರೊಂದುಂಡು.

  

ಪಿಲ್ಚಂಡಿ ದೈವದ ಮೋನೆದ ಅರ್ದಾಲ ಪೋದು ಪಿಲಿತ ಏಸದ ಮೋನೆದ ಬಣ್ಣ ಬೈದ್ಂಡ್

  ದೈವಾರಾದನೆಡ್ ರಾಜಂದೈವೊಲೆಗ್ ಬಳೆಯಾಯಿನಕುಲು ಜಾತಿ,ಸಮ್ಮಂದಕುಲುಂದು ಒತ್ತು ಚಾಕಿರಿಗ್ ತುಳುನಾಡ್ ಡ್ ಉಂತುನ ಕೆರಮ‌ ಇಜ್ಜಾಂಡ್.ಅಂಚನೆ ಒಂಜಿ‌ ದೈವೊಗು ಒಂಜಿ ದೈವ್ ಕಲೊಟು ಬಳೆಯಾಯಿನಕುಲು ಬೇತೆ ದೈವೊಗ್ಲ ಕಟ್ಟುನ ಕೆರಮ ಇಜ್ಜಾಂಡ್.ಇನಿ ಈ ರಡ್ಡ್ ಬೆಲೆನ್ಲಾ ಬಂಜಿದ ಗುಜ್ಜಾರ್ಮೆಗ್ಂದ್ ಮಲ್ತೊಂದುಲ್ಲೆರ್.ಮೂಲು ಪೂರ ಹಿರಿಯಾಕ್ಲ್  ಮಲ್ತಿ ಕಟ್ಟ್ ಪೊಳಿತ್ ಲೆಕಾಂಡ್.

   

                              ಪಿಲ್ಚಂಡಿ ದೈವ

ತುಳುನಾಡ್ದ ಕಾಸರಗೋಡು,ಕುಡ್ಲ(ದ.ಕ),ಒಡಿಪು ಈ ಮೂಜಿ ಬಾಗೊಲೆಡ್ ಅಷ್ಟಮಂಗಲ,ಬ್ರಹ್ಮ ಕಲಶ ನಡತೊಂದಿತ್ತ್ ದ್ ದೇವೆರೆನ್ ತರೆಟ್ ತುಂಬುನ ಕೆರಮ ಮುಲ್ತ ಸಾನೊಲೆಡ್ ಮಾತ್ರ ತೂಯೆರೆ ತಿಕ್ಕುನಿ.ಇನಿ ತುಳುನಾಡ ದೈವಸಾನ,ಮಠೊಕು ಪೂರ ಅಗತ್ಯ ಇಜ್ಜಾಂದಿ ಅಷ್ಟಮಂಗಲ ಪ್ರಶ್ನೆ ,ಬ್ರಹ್ಮಕಲಶ ಬತ್ತ್ ದ್ ಅವ್ಲಿಪ್ಪಿ ಬೆಮ್ಮೆರೆನ್ ಮೂಲೆಗ್ ಪಾಡ್ದ್ ಅರೆನ ಬದಲ್ ಗ್ ಗಣಪತಿನ್ ತಾಪನೆ ಮಲ್ಪುವೆರ್.ಬ್ರಹ್ಮ ಕಲಶ ಮಲ್ತ್ ದ್ ಅವೆರ್ದ್ ಬೊಕ್ಕ ದೈವದ ಅಣಿತಲೆಕ ದಂಡಮಾಲೆಲ ಪಾಡ್ದ್ ದೇವೆರೆ ಬಲಿ ಮಲ್ತ್ ದ್ ದೈವದ ಬಲಿತ ಅನುಕರಣೆ ಮಲ್ತೊಂದುಲ್ಲೆರ್.

      

     ಈಸರ ಕುಮಾರ ದೈವ(.ಬಡಕಾಯಿ ಗಂಗೆರ್ದ್ ಕಾರ್ಲದ ಬಾನುಸೇನವೆರ್ನ ಒಟ್ಟುಗು ಬೈದ್ ನ ದೈವ.)

      ದೈವಾರಾದನೆದ ಬಗೆಟ್ ಪಾತೆರುನಕ್ಲೆನ್ ಲೆಪ್ಪಂದೆ ಧಾರ್ಮಿಕ ಉಪನ್ಯಾಸಂದ್ ದೇವೆರೆ ಬಗೆಟ್ ಪಾತೆರುನಕ್ಲೆನ್ ಲೆತ್ತ್ ದ್ ದೈವೊನು ದೇವೆರ್ ಮಲ್ತೊಂದುಲ್ಲೆರ್.ಇತ್ತೆ ಬಲಿ ತುಂಬುನ ನೂಲು ಪಾಡಿ ಸಂಸಾರೊಗ್ಲ ವಸಾಯ ಬರ್ರೆ ಸುರಾತ್ಂಡ್.ಇಂಚ ದೇವೆರೆ ಬಲಿ ಪೊಸತಾದ್ ಬತ್ತ್ ದ್ ಬೆಮ್ಮೆರೆನ್ ಮೂಲೆಗ್ ಪಾಡ್ಲೆಕ ದೈವೊಲೆನ್ ಮೂಲೆಗ್ ಪಾಡುನ ಕಾಲ ದೂರ ಇಜ್ಜಿಂದ್ ತೋಜುಂಡು.ಅವೆಕ್ ಉದಾರ್ಮೆ ಪಂಡ ಬೆಮ್ಮೆರೆ ಸುತ್ತೆ ದೀಪುನೌಲು ಗಣಪತಿ ದೀಪೆರ್.ಸುದ್ದ ಓಮ ದೀವೊಂತುನೌಲು ಗಣ ಓಮ ದೀಪೆರ್.

ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ.

  

ಜಠಾಧಾರಿ ದೈವ.ಜಠಾಧಾರಿಗ್ ಮೈಮೆ ನಡಪುಂಡು

ಮೂವೆರ್ ಉಳ್ಳಾಕುಲು ಬಲರಾಮ ಕೃಷ್ಣ ಸುಭದ್ರೆ ಆನಗ

 

ದೈವೊಗು ಊರು ಗ್ರಾಮದ ಪತ್ತೆರ್ ಸೇರ್ದಿ ಕಲೊಟು ಪೂವರಿ ಪತ್ತದ್ ಒರಿ ಮದಿಪುನಿ

ಒಂಜಿ ನುಡಿ ಉಂಡು.ತರೆಟ್ ತುಂಬುಂಡ ದೇವೆರ್.ಪುಗೆಲ್ಡ್ ತುಂಬುಂಡ ದೈವಂದ್.ಪಟ್ಟದ ಮುಗ ಸಾನೊಡಿಪ್ಪುಂಡು.ಉಚ್ಚಯ   ಮುಗ ಏರ್ದ್ ದೈವ ಬಂಡಿದ ಮಿತ್ತ್ ಕುಲ್ಲುದು ದೈವದ ಬಂಡಿ ಒಯ್ಪುವೆರ್.ಸ್ವಾಮೀ ಸತ್ಯೊಲೆಂದ್ ಲೆಪ್ಪೊಡಾಯಿನೌಲು ಗೋವಿಂದ ಪಾಡೊಂದುಲ್ಲೆರ್.ದೈವೊನು ದೇವೆರ್ ಮಲ್ತಿಲೆಕಾಂಡ್..ಅಂಚನೆ ಪಟ್ಟದ ಮೂರ್ತಿ ಗರ್ಭ ಗುಂಡೊಡಿಪ್ಪುಂಡು.ಉಚ್ಚಯ ಮೂರ್ತಿ ತರೆಟ್ ತುಂಬೊಂದು ಬಲಿ ಬರ್ಪೆರ್.ತೇರಿತ್ತ್ ನೌಲು ಉಚ್ಚಯ ಮೂರ್ತಿನ್ ತೇರ್ದ ಮಿತ್ತ್ ದೀದ್ ತೇರ್ ಒಯ್ಪುವೆರ್.ದೈವದ ಬಲಿ ಪೋನಗ ದೈವದೊಟ್ಟುಗು ಇಲಾಲ್,ಜೀಟಿಗೆ ಇತ್ತ್ಂಡ ದೇವೆರೆ ಬಲಿ ಪೊನಗ ನೇಲ್ ತುಡರ್,ಕೆಲ ಸಾನೊಲೆಡ್ ಇಲಾಲ್ ಉಪ್ಪುಂಡು.ಇತ್ತೆ ದೇವೆರೆ ಬಲಿಟ್ ಜೀಟಿಗೆಲ ಉಪ್ಪುಂಡು.ಈ ಅರಾದನಾ ಪದ್ದತಿಲು ದೈವಾರಾದನೆಡ್ದ್ ದೇವತಾರಾದನೆಗ್ ಬತ್ತ್ ದೀಪೆರ.

    

ಪೊಸಪ್ಪೆನ/ಸತ್ಯ ಜಾವದೆನ ಗದ್ದಿಗೆದ ಬೊಂಬೆ.ಈ ಗದ್ದಿಗೆದ ಬೊಂಬೆ  ಏರ್ ಪಂಡ ಮಮ್ಮಾಯಿ.ಬೊಂಡೊನು ಪೊರ್ಲುಡು ಇಡೀ ಕೆತ್ತ್ ದ್ ಬೊಂಬೆ ಮಲ್ಪುವೆರ್.ದೈವೊಗು ತೊಲಸಿ ಮಾಲೆ ಪಾಡೆರೆ ಇಜ್ಜಿ.ಗುಡಿ ಪತ್ತ್ಂಡ ಸತ್ಯ ಜಾವದೆ,ಇಲ್ಲ್ ಪತ್ತ್ಂಡ ಆಲ್ ಅಮ್ನೋರು,ಪೊಸಪ್ಪೆ.ಪುರಲ್ಡ್ ಭದ್ರಕಾಳಿಯಾದ್ ಆರಾದನೆ ಪಡೆಪುನಾಲ್ ಈ ಪೊಸಪ್ಪೆ.ಮಮ್ಮಾಯಿನ ಗದ್ದಿಗೆ ಏರ್ದೇ ಪೊಸಪ್ಪೆಗ್ ನೇಮ ನಡಪುನಿ.ಬೊಂಡೊನು ಕೆತ್ತ್ ದ್ ಪೆರೆಸ್ ದ್ ನರಮಾನಿಯನ ಮೋನೆದ ಒರು ಮಲ್ತ್ ದ್ ಕಲಸ/ಚೆಂಬುದ ಮಿತ್ತ್ ದೀದ್ ಪಿಂಗಾರೊಡು ಐತ ಮಲ್ತ್ ದ್ ಮಮ್ಮಾಯಿನ ಗದ್ದಿಗೆ ಏರಿ ಬೊಕ್ಕನೆ ಪೊಸಪ್ಪೆಗ್ ನೇಮ ನಡಪುನಿ.ಕುಟುಮದ ಪಂಜುರ್ಲಿ ತುಳುವೆರೆನ ಕುಟುಮದ ಕಾಪುದ ದೈವ ಆಂಡ ಅಪ್ಪೆನ ತಾನೊಡುಂತುದು ಕುಟುಮಪನು ಪಾಲಿಪುನಾಲ್ ಪೊಸಪ್ಪೆ/ಸತ್ಯ ಜಾವದೆ.

   

                        ಬಾದಾಮಿದ ಬನಶಂಕರಿ ದೇವಿ

  

      ಬನಶಂಕರಿ ದೇವಿಗ್ ಪುಣ್ಣಮೆದ ಲೆಕ್ಕೊಡು ದೈವದ ಅಣಿತ ಅಲಂಕಾರ ಮಲ್ದೆರ್

 ದೈವೊಲೆಗಿಜ್ಜಂದಿ ಗಣ ಓಮ,ಮೃತ್ಯುಂಜಯ ಓಮ, ದುರ್ಗಾ ನಮಸ್ಕಾರ,ಪೂಜೆ,ಮಂತ್ರ,ಆರತಿ ಉಂದೆನ್ ಬುಡ್ಡು ಮೂಲ ಕಟ್ಲೆಡ್ ಹಿರಿಯಾಕ್ಲ್ ಎಂಚ ನಡಪಾವೊಂದು ಬತ್ತೆರ್ಂದ್ ಕೇಂದ್ ತೆರಿದ್ ಅಂಚನೆ ನಡಪುಗ.ದೈವೊಗು ಹಿರಿಯಾಕ್ಲೆ ಮದಿಪುರ್ದು ಮಲ್ಲ ಮದಿಪಿಜ್ಜಿ,ಕುಟುಮದಕ್ಲ್ ಬಲಸುನೆರ್ದ್ ಮಲ್ಲ ಅಗೆಲಿಜ್ಜಿ.

  

        ಹೊಸಮ್ಮ ದೈವ ಪೊಸ ರೀತಿದ ಮೋನೆದ ಬಣ್ಣಗಾರಿಕೆ

ದೈವದ ಕೊಡಿಯಡಿಟ್ ನುಪ್ಪು ದಾನ ಇಜ್ಜಿ.ಅವ್ಲು ಪೊರಿ ಬಜಿಲ್ ಪಾನಕ ಉಪ್ಪುನಿ.ದಾಯೆ ಪಂಡ ಜಾತ್ರೆದಪಗ ದೈವದ ಲೆಕ್ಕೊಡು ಆ ಗಿರಮ,ಊರುದ ಪ್ರತಿ ಇಲ್ಲಲ್ಲ ಒನಸ್ ಇಪ್ಪುಂಡು.ನಮ ನಂಬೊಂದು ಬತ್ತಿನ ದೈವೊಲೆಗ್ ಪಿದಯಿದಕ್ಲೆನ್ ಲೆತ್ತ್ ದ್ ಅಕ್ಲೆ ಕೊಸ್ವಾಸಿ ಬಲಸಂಡ ದೈವ ಖಂಡಿತಾ ಒಪ್ಪಂದ್.ನಮ್ಮ ಅಪ್ಪೆ ಅಮ್ಮಗ್ ನಮ ಬಲಸ್ ದ್ ಕೊರ್ನಗ ಆಪುನ ಕೊಸಿ ಪಿದಯಿರ್ದ್ ಬತ್ತ್ ನಕುಲು ಬಲಸ್ಂಡ ಆವಂದ್.

   

    ದರಿ-ತಾರೆ,ತಾರಿದ ನೀಟ ಕುಂದ,ಕಂಗ್ ದ ತಲಕೆದ ಅಡ್ಡ ರೀಪು

ಕಿರುವಾಲ್ ಬನ್ನಗ ತಿಬಿಲೆ ಪೊತ್ತವೆರ್

         

     ದೈವ ದರಿ ತುಡರ್ ಕೈಕೊನುನ ಬಾರೆದ ಬಂಬೆದ ಕುಂದ

ನಮಕ್ ಬೇನೆ ಬೆಸರ್ ಗ್ ದೈವ ಕೊರ್ಪುನಿ ಅಭಯದ ನುಡಿ,ಕೈ ನೀರ್ನಡೆ ಸಾಯದ ಗಂಧ.ಇನಿ ದೈವಡ ಕೇಂಡ ಶನಿ ಪೂಜೆ ಮಲ್ಪುಲೆ,ಅತ್ತೋಸು ಕಟ್ಟೆಗ್ ಸುತ್ತು ಬಲೆ,ದುರ್ಗಾ ನಮಸ್ಕಾರ ಪೂಜೆ ಮಲ್ಪುಲೆಂದ್ ಪನ್ಪುಂಡು.ಆತ್ ಬಂಙೊಡು ದಾಯೆ ಮೊಕ್ಲು ದೈವೊಗು ಕಟ್ಟೊಡು,ದೇಲ್ಯದ ಚಾಕಿರಿ ಮಲ್ಪೊಲಿಯತ್ತೆ.
 

           ದೈವದ ಬಂಡಾರ ಬನ್ನಗ ಸಾದಿಡ್ ದರಿ ಪಾಡುವೆರ್.

                ದರಿತ ಉಲಯಿಡೆ ಭಂಡಾರ ಪೋಪುನಿ

        ನಮಕ್ ತೆರಿ ಮಟ್ಟ್ ಗ್ ನಮ ಹಿರಿಯಾಕ್ಲೆಡ ಕೇಂದ್ ಮಲ್ತೊಂದು ಪೋಯಿ.ದೈವ ತಪ್ಪು ಮಲ್ಪಾಯೆರೆಂದ್ ಉಪ್ಪುನಿ.ಆಂಡ ಪೆದ್ದ್ಂಡ ಅಪ್ಪೆ ತಾಂಕ್ಂಡ ತಮ್ಮಲೆಯಾದ್ ನಮ್ಮ ತರೆ ಬೆರಿ ಮಾನೊನು ಕಾಪುನ್ಲ ನಮ ನಂಬಿಂಚಿ ದೈವೊಲೆ.ಮೂಲ ಕಟ್ಟ್ ನ್ ಪೊಲಿಪೆರೆ ಸುರು ಮಲ್ತ್ ದ್ ಕುಟುಮದ ಸಮ್ಮಂದಲ ಅವ್ವೇ ಲೆಕ ಇನಿಕಾನಗ ಪೊಲಿದಾತ್ಂಡ್. ನಿಚ್ಚ ಪೂ ನೀರ್ ದೀವೊಂತಿ ಇಲ್ಲ ಚಾವಡಿದ ದೈವೊಲೆನ್ ನಮಟೊರಿಂದ್ ನಮ ಎನ್ನಿದಿತ್ತ್ ದ್, 

  

                 ‌          ಶ್ರೀಮಂತ ರಾಜ ಗುಳಿಗೆ

   ಏತೊಂಜಿ ತೊಟಿಲುಲು ತೂಂಕೊಂತಿ ಕೂಡು ಕುಟುಮದ ಇಲ್ಲುಲು,ಚಾವಡಿಡ್ ಉಜ್ಜಾಲ್ ಡ್ ದೈವೊಲು ,ಇಲ್ಲದ ಹಿರಿಯಾಕುಲ್ಲೆಕ ಇತ್ತ್ ನ ದೈವೊಲೆನ್  ಏಪ ಪಿದಯಿರ್ದ್ ಬತ್ತ್ ನಕುಲು ಪಂಡೆರ್ಂದ್ ಪಿದಯಿ ಸಾನ ಕಟ್ಟಾದ್ ಇಲ್ಲದುಲಯಿರ್ದ್ ಪಿದಯಿ ಸಾನದುಲಯಿ ಪಾಡ್ದ್ ಸಂಕ್ರಾಂತಿಗೊರ ಪೂ ನೀರ್ ದೀದ್ ತಂಬಿಲ ಕರಿತ್ ದ್ ತಿಂಗೊಲಿಡೀ ಬಾಕಿಲ್ ಮುಚ್ಚಿದ್ ಕುಲ್ಲಿಯನ ಅಡೆಗ್ ತುಳುವೆರೆ ಕೂಡು ಕುಟುಮದ ಸಮ್ಮಂದದ ಗೋಡೆಲು ಜರಿಯೆರೆ ಸುರಾಯ. 

  

                       ದೈವದ ಕೈಟ್ ಪೆಲಸ್ಟಿಕ್ ಬಟ್ಟಿ

                ‌‌       ಹಿರಿಯೆರ್ ಪನ್ಪುನ ಪಾತೆರೊರ್ದು ಮಲ್ಲ ಮದ್ಯಸ್ಥಿಕೆಯತ್ತ್.ಅವ್ಲು ಕಾಸ್ ಗ್ ಪಾತೆರ,ಮೂಲು ಮನ ಬಗ್ತಿದ ಮದಿಪು.ಇನಿ ಕೆಲವು ಸಾನೊಲೆಡ್ ಒಂಜಾತ್ ವರ್ಸೊರ್ದಿಂಚಿ ನೇಮದಪಗ ಒಂಜಿ ಸುತ್ತು ಬಜನೆ ಪನೆರೆ ಸುರಾತ್ಂಡ್.ದೈವದ ಮುಗೊನು ಕಟಿ ಮಾನಿ ದೀದ್ ನೇಮ ಅನಗ ದೈವ ಆಯಿನವು ಸಾನದ ಉಲಯಿ ಪೋಯಿ ಸಾತ್ ಗ್ ದೇವಿಯಾದ್ ಅವ್ಲು ಕುಂಕುಮಾರ್ಚನೆ,ಕರ್ಪೂರಾರತಿ,ನವರಾತ್ರೆ ಪೂಜೆ ಸುರಾಂಡ್ ಪಂಡ ದೈವಸಾನ ದೂರಾದ್ ದೇವಸಾನ ಆಪುನ ಕಾಲ ದೂರ ಇಜ್ಜಿ.

    

        ಬೈಲ ಬಾಕುಡೆರೆ ಕುಕ್ಕಂಬಿಲ ಪ್ರಕೃತಿ ಆರಾದನೆ- ಇಚ್ಚಿಲಾಡಿ

ಇನಿ ದೈವೊನು ದೇವೆರೆ ಪುದರ್ಡ್ ಲೆತ್ತ್ ದ್ ಒಂಜಾತ್ ವರ್ಸ ಕರಿನಗ ಜನೊಕ್ಲೆ ಬಾಯಿಡ್ ಮೂಲ ದೈವದ ಪುದರ್ ಮಯಕಾದ್ ದೇವೆರೆ ಪುದರ್ ಮಾತ್ರ ಒರಿಯು.ಪ್ರಸ್ನೆ ಚಿಂತನೆದಕ್ಲ್ ಪಂಡೆರ್ಂದ್ ದೈವದ ಪರ ಮುಗ ಮೂರ್ತಿಲೆನ್ ತೋಡು ಸುದೆಕ್ ಬುಡ್ದು,ಮಣೆ ಮಂಚಾವುನು ಪೊತ್ತಾದ್ ದುಂಬುಗು ನಮ್ಮ ಪಿರಾಕ್ ದ ದೈವಂದ್ ಪನ್ನಗ ಅಕ್ಲ್ ಸಾಗ್ಸಿ ಕೇಂಡ ನಮಡ ಕೊರ್ಯೆರೆ ಪರ ಮುಗ ಮೂರ್ತಿಲಾ ಇಜ್ಜಿ,ಪರ ಮಣೆ ಮಂಚಲಾ ಇಜ್ಜಿ.ಇತ್ತೆನೇ ಸುಮಾರ್ ಕಳೆವೊಂದಾತ್ಂಡ್. ಮುಗ ಮೂರ್ತಿ,ಮಣೆ ಮಂಚವುದ ಸಗ್ತಿ ದೆತ್ತಿ ಬೊಕ್ಕ ಅವೆನ್ ನೀರ್ ಗ್ ದಕ್ಕುನ ಬದಲ್,ತೂಟು ಪೊತ್ತಾವುನ ಬದಲ್ ಸೊತ್ತು ಜಾಗ್ ರ್ತೆ ದೆತ್ತ್ ದೀಪುನ ವಸ್ತು ಸಂಗ್ರಹಾಲಯೊಗು ಕೊರ್ಂಡ ನೆನೆಪಾನಗ ತೂದು ಬರೊಲಿ.

  

ದೈವ ಪನ್ಪುನೆಕ್ ಸಾಗ್ಸಿಯಾದ್ ಬಂಟ್ವಾಳ ತಾಲೂಕುದ ಮುಲ್ಕಾಜೆ ಮಾಡ(ಮಾಡ ಪನ್ಪುನವು ಉಲ್ಲಾಲ್ದಿ,ಲೆಕ್ಕೆಸಿರಿಕ್ ಉಪ್ಪುಂಡು) ,ಮಣಿ ನಾಲ್ಕೂರು(ಭಂಡಾರದೊಟ್ಟುಗು ಮಣಿ ಬರೊಂತಿ ನಾಲೂರ ಮನೆತನೊಲು ಇತ್ತಿಪ್ಪು)ಕೈತಲ್ದ ದೈವಸ್ಥಳ 

 

                 ದೈವದ ಭಂಡಾರ ಕೇರ್ಪುನ ಕೊಡಿಯಡಿ.

ದೈವೊಲೆಗ್ ವಾ ಕಾರಣೊಗ್ಲಾ ಬಜನೆ ಪನ್ಪುನ ಕಟ್ಟಿಜ್ಜಿ.ಬಜನೆ ಪನ್ಪುಂಡ ದೈವ ಬೊಕ್ಕ ದೇವೆರೆಗ್ ದಾದ ಎತ್ತೇಸ?.ದೇವೆರೆಗ್ ಕಲಶ,

    

                     ಲೆಕ್ಕೆ ಸಿರಿ ದೈವದ ಗಗ್ಗರದೆಚ್ಚಿ.

ತುಳುನಾಡ ದೈವ ನಂಬಿನ ನಮನ್ ಮೋವದ ಜಕ್ಕೆಲ್ ಡ್ ಕುಲ್ಲಾದ್ ಅಮುರ್ತದ ಸಿರಿ ಮಿರೆ ಕೊರ್ದು ಕಾಪು ದೀದ್ ಕಾತೊಂದು ಬರ್ಪೆ ಪಂಡ್ ದ್ ದೈವ ಪನ್ಪುಂಡು.

    

                             ಕೊಡಿಮರಟ್ ಗರುಡೆ

ನಾಲ್ ಕಾರ ಧರ್ಮ ಧೇನುದ ತನು(ಪೇರ್)ನು  ದೈವದ ಬಲತ ಮರ್ಗಿಲ್ ಡೇ ಬಟ್ಟಲ್ ಡ್ ಕೊರೊಡು.ಆ ಪೇರ್ ಗ್ ಚೂರು ತಿಗ ಪಾಡೊಡು.ದಾಯೆ ಪಂಡ ತೊಡ್ವೆ ಕೆಲೆಂಜಿ ತನ್ಕಾದ್ ದಾಲಾ ದೀವೊನುಜಿ.ಪೂಟು ತಿಕ್ಕಿ ಪುಳ್ಪೆನೊನು ಪಟ್ಟ್ ಡ್ ದೀದ್ ಲೋಕೊಗು ಕೊರ್ಪುಂಡು.ಅಚಾದ್ ಪೆರ್ ದೊಟ್ಟುಗು ಪಂರ್ದ್,ತಿಗ ಕೊರೊಡು,ಸಕ್ಕರೆಯತ್ತ್.ಪುಳಿ  ಪುಂಟ್ಂಡ ಕೊಜಪಾಪುಂಡು.ಕೊಜಪುನು ತುಲಿತ್ಂಡ ಬೊಲ್ನೆಯ್ಯಾದ್ ತುಡರ್ ಅರ್ಲ್ ದ್ ಸಂಸಾರ ಬೆಳಗುಂಡು..ಸಂಸಾರದ ನಡುಟು ಒಂಜಿ  ಪಾತೆರ ಬರ್ಪುನಿ ಪೋಪುನಿ.ಅವೆನ್ ಗೇನೊಡು ತುಲಿತ್ಂಡ ನ್ಯಾಯದ ಬೊಲ್ನೆಯ್ ಬರು.ಅವ್ಲು ಧರ್ಮದ ತುಡರ್ ಅರ್ಲುಂಡು.ಅಪಗ ಕೊಂಬು ಕೊಂಬು ತಾಂಟೊನಂದೆ ಸಂಸಾರ ಬೆಳಗು.

       

ಲೆಕ್ಕೆ ಸಿರಿ ದೈವದ ಧರ್ಮನೇಮ ಸಂದೈತ ಆಂಡ್ಂದ್ ತೂಯೆರೆ ಸಾಸ್ರ ಬೊಳ್ಳೆ ಕೋರಿಗ್ ದೈವದ ಕಲೊಟು ದೈವದ ಎದುರು ಅರಿ‌ ಪಾಡುವೆರ್.ಅವೆನವು ತಿಂದ್ಂಡ ಧರ್ಮ ಸಂದೈತ ಆಂಡ್ಂದ್ ಲೆಕ್ಕ.

         

                        ಹನುಮಂತ ದೈವ
        ಬಜನೆ,ಮಂತ್ರ,ಶ್ಲೊಕ,ಹೋಮ,ಪೂಜೆ,ಪಂಚಕಜ್ಜಾಯ.ದೈವೊಲೆಗ್ ಸಂದಿ ಪಾಡ್ದನ,ದೂಪ,ಗಿಂಡೆ ನೀರ್,ಮದಿಪು,ಅಗೆಲ್. ಇನಿ  ದೈವದ ಕಲೊಕು ಬಜನೆದಂಚ ಓಮ,ಕಲಸ,ಪೂಜೆ,ಆರತಿ,ಪಂಚಜ್ಜಾಯ ಬತ್ತ್ ದ್ ದೈವಸಾನನಾ,ದೇವಸಾನನ ಗೊತ್ತಾವೊಂದಿಜ್ಜಿ.

               ದೈವದ ಸಿರಿ ಸಿಂಗಾರದ ನೇಮದ ಅಣಿ

   ತುಳುನಾಡ ಸ್ವತಂತ್ರ ಸಗ್ತಿಲಾಯಿನ ದೈವೊಲೆನ್ ದೇವೆರೆ ಅಂಸ ಮಲ್ತ್ ದ್,ದೈವೊಲು ದೇವೆರೆನ್ ಕಾಪುಲೆಕ ಆಂಡ್.ಸ್ವಂತ ಅಸ್ಥಿತ್ವ ಇತ್ತ್ ನ ದೈವೊಲೆಗ್ ಪುರಾಣ ಸೇರಾದ್ ಆಸುರೀ ಕಿರಿಯೆದ ಬದಲ್ ದೇವ ಕಿರಿಯೆಡ್ ಕರಿತೊಂದುಲ್ಲೆರ್.ದೇವ ಕಿರಿಯೆಡ್ ಕರಿಪುನಕ್ಲ್ ಅಂಚನೇ ಕರಿಪಡ್.ಆಂಡ ಆಸುರೀ ಕಿರಿಯೆಡ್ ಕರಿಪುನಕ್ಲೆನ್ಲಾ ನಿಕುಲು ದೇವ ಕಿರಿಯೆಡ್ ಮಲ್ಪುಲೆ ಪನ್ಪುನ ಅಗತ್ಯ ಇಜ್ಜಿ.ನಮ ದುಂಬೆಂಚ ನಂಬೊಂದು ಬತ್ತ್ ನ ಅಂಚನೆ ನಂಬುಗ. ದೈವೊಲು ನಮನ್ ಮಾತ ಒರ್ತು ಕಾಪುವ ಪನ್ಪುನೆನ್ ಮದಪೆರೆ ಬಲ್ಲಿ.ನಮಕ್ ಬದ್ ಕ್ ಡ್ ದಾಲ ನಿಮುರ್ತಿ ಇಜ್ಜಿ ಪಂದಾನಗ ನಮ ಕೈ ಕಟ್ಟ್ ದ್ ತರೆ ತಗ್ಗಾದ್,ಬೆರಿ ಬಗ್ಗಾದ್ ಉಂತುನಿ ನಮ ನಂಬಿ ದೈವೊಲೆನ ಎದುರು ಪನ್ಪುನೆನ್ ಮದಪೆರೆ ಬಲ್ಲಿ.

     ಮಾಂಕಾಳಿ ದೈವದ ಕೈಕ್ ಪೆಲಷ್ಟಿಕ್ ದ 3-3 ಕೈ ಕಟ್ಟ್ ದ್ ನಿ

       

 ನಮ್ಮ ತುಳುನಾಡ ದೈವೊಲು ನಮನ್ ಮಾತ ಕಾಪುನ ಪಂಡ ರಕ್ಷಣೆ ಮಲ್ಪುನ ಸ್ವತಂತ್ರ ಸಗ್ತಿಲು.ಅವು ವಾ ದೇವೆರೆ ಚಾಕಿರಿದವತ್ತ್ .ತುಳು ದರ್ಮದ ನ್ಯಾಯೊನು ರಾಜ್ಯದ ಕಲೊಟು ಇತ್ಯರ್ಥ ಮಲ್ತೊಂತಿ ಸಗ್ತಿಲು.ಇನಿ ನಮ್ಮ ದೈವಾರಾದನೆನ್ ಮದತ್ ದ್ ನಮನೇ ನಮ ಕಳೆವೊಂದುಲ್ಲ.ನಮಕ್ ಮನಿಪುನ ದೈವೊಲು ದುಂಬು,ಮನಿಪಂದಿ ದೇಬೆರ್ ಬೊಕ್ಕ  .ಆಸತ್ರೆಡ್ ದಮ್ಮು ಕಟ್ಟ್ ನಾಯನ್ ಒರಿಪೆರೆ ಆಪುಜಿ ಪಂಡ್ ದ್ ವೈದ್ಯೆರ್ ಪಿರ ಬುಡಿಯೆರ್ಡ ಕುಟುಮದ ಪಂಜುರ್ಲಿಗ್ ಅರಿಕೆ ಮಲ್ತ್ ದ್ ತರೆ ತೊರತ್ ದ್ ಕೋರಿ ಬುಡ್ದು ಅಕ್ಲೆಡ 48ದಿನ ಪ್ರತಿ ದಿನಲ ತರೆ ತೊರಪಾದ್ ಬಂಜಾರ ಕೋರಿಗ್ ತಿನ್ಪಾದ್ ಅಕ್ಲೆ ಜೂವ ಒರಿತಿ ಪಂಜುರ್ಲಿರ್ದ್ ಮಲ್ಲ ನಮನ್ ಒರ್ತ್ ಕಾಪುನೆಕ್ ಸಾಗ್ಸಿ ಬೋಡೆ?.

 

    ಅಂಬ್ಡೇಲು ಗುತ್ತು ಪಟ್ಟದ ಪಂಜುರ್ಲಿ ಉಚ್ಚಯ ಮುಗ      ಪಾಂಡವರ ಕಲ್ಲು

ದೈವೊಲೆಗ್ ಸಂದಿ ಪಾಡ್ದನೊಲೆಡ್ದ್ ಮಲ್ಲ ಒವುಲಾ ಇಜ್ಜಿ.ಮೂಲೊಡು ಇದ್ಯೆ ದಾಂತಿ ತುಳುವೆರೆಗ್ ಬಜನೆ,ಶ್ಲೊಕ,ಮಂತ್ರ ಪೂರ ಓಲು ತೆರಿದಿತ್ತ್ಂಡ್?.ಅಕ್ಲೆಡ ಇತ್ತಿನಿ ನಿರ್ಮಲವಾಯಿನ ಮನಬಗ್ತಿ,ದೈವೊನು ಲೆತ್ತ್ ಕೊಂಡಾಡುನ ಸಂದಿ ಪಾಡ್ದನೊಲು.ತಾಸೆ,ದೋಲು,ಸುತಿ/ಬಾಂಕೆ,ನಾಗಸರೊಟು ಲಕ್ಕೊಂತಿ ದೈವೊಲೆಗ್ ವಾವಾ ನಮುನೆದ ವಾದ್ಯೊಲು ಇನಿ ಬೈದ.ಇನಿ ದೈವದ ಕಲನ,ಆಟದ ರಂಗತಲೊನ,ಪದ ರಂಗಿತೊದ ರಂಗ ಚಾವಡಿಯ ಒಂಜಿಲಾ ಅರ್ತ ಆವೊಂದಿಜ್ಜಿ.

    

ಪೊಣ್ಣು ಮಗಲೊರ್ತಿ ಚದ್ಮವೇಸೊಡು ದೈವೊಗು ಕಟ್ಟ್ ದ್ ನಿ

 

  ಮಾತ  ಗಾಂಡ್ ಗೌಜಿದ ನಡುಟು ಮನ ಬಗ್ ತಿ ದಾಂತೆ ಕಲೊಟು ದೈವೊಲು ಖಂಡಿತಾ ಉಪ್ಪೆರೆ ಸಾದ್ಯ ಇಜ್ಜಿ‌.ಪೆರಿಯಾಕ್ಲ್ ದೀನ ತುಳುವ ಮಣ್ಣ್ ದ ದೈವದ ಪುದರ್ ನ್ ಬದಲ್ತ್ ದ್ ಲೆತ್ತ್ ದ್ ಉಂದೆನನ್ ಲೆಪ್ಪುನತ್ತ್ಂದ್ ದೈವ ಕಲೊಕು ಬರ್ರೆ ಸಾದ್ಯಲ ಇಜ್ಜಿ.ನಮಕ್ ಪೆರಿಯಾಕ್ಲ್ ದೀನ ಪುದರ್ ವಾ ಬಾಸೆಡ್ ಪಂಡಲ,ವಾ ದೇಸೊಡು ಪಂಡಲ ಒಂಜೇ ಪುದರ್.

   

ಹಿರಿಯಾಕ್ಲು ಕಟ್ಟೊಡಾಯಿನ ಒತ್ತೆ ಕೋಲೊನು ಜೋಕ್ಲೆಡ ಕಟ್ಟಾವುನ ತಪ್ಪು

ನಮ ನಂಬಿಂಚಿ ದೈವೊಲೆಗ್ಲ ಅಂಚನೆ.ಪೆರಿಯಾಕ್ಲ್ ದೀನ ಪುದರ್ ಡೇ ಲೆಪ್ಪೊಡು.ಕನ್ನಡ,ಸಂಸ್ಕೃತೊಡು ಲೆತ್ತಿ ಸಾತ್ ಗ್ ಮೂಲ ಪುದರ್ ದಾಲ ಬದಲಾಪುಜಿ.ಮೂಲ ಪುದರ್ ಅವ್ವೇ ಆದಿಪ್ಪುಂಡು.

  

              ಲೆಕ್ಕೆಸಿರಿನ ಪೊಸ ತುತ್ತೈತೊಡು ರಕ್ತೇಶ್ವರಿ ಮಲ್ತೆರ್

 ದೈವಾರಾದನೆ ತುಳುನಾಡ್ ಬುಡ್ದು ಇನಿ ಪಿದಯಿ ಪೋವೊಂದುಂಡು.ನರಮಾನಿ ಕುಂಬರೊಲಿ,ನುಡಿ ಕೊರ್ಪಿ ದೈವ ಮಾಯೆರ್ದ್ ಅವ್ಲು ಜೋಗೊಡು ಬರೆರೆ ಸಾದ್ಯ ಇಜ್ಜಿ.ಅಂಚಾದ್ ದೈವದ ಮೂಲ ಪದಿನಾಜಿ ಕಟ್ಲೆನ್ ಮೂಲದೊರುಟು ಒರಿತ್ ದ್ ದುಂಬುದ ಜೋಕ್ಲೆಗ್ ದೈವಾರಾದನೆನ್ ತೆರಿಪಾವುನ ಬೇಲೆ ನಮ ಮಾತೆರೆಡ ಆವೊಡು.ಮಾತೆರೆ ಪಾತೆರೊಗು ಬಿಲೆ ಕೊರ್ಕ.ಅಂಚಾಂದ್ ಮೂಲ ದೈವಾರಾದನೆಗ್ ಒಡಕ್ ಬರಂದಿಲೆಕ ತೂಕ.

ಅಂಬ್ಡೇಲು ಗುತ್ತು ಪಟ್ಟದ ಪಂಜುರ್ಲಿ

        ಗ್ರಾಮ ದೈವೊಲ್ನ ಕಾಲಾದಿ 16 ಕಟ್ಲೆದ ಪೊರ್ಲೇ ಬೇತೆ.ವರ್ಸೊಗು 12ಸಂಕ್ರಾಂತಿಲು,1ಚೌತಿದ ಪಾಡ್ಯ,1ಪರ್ಬೊದ ಬಿನ್ನದೊನ್ಯ,1ದೊಂಪದ ಬಲಿ,1 ಸಾನದ ನೇಮ ಇಂಚ ಒಟ್ಟು 16 ಕಟ್ಲೆಲು ದೈವಾರಾದನೆದ ಕಾಲಾದಿಡ್ ನಡಪುವ.ಅಂಚನೆ ದೈವ ಕಟ್ಟುನಾರೆನ ಮೇಲ್ ಗ್ ಬಲ್ಲ್ ದ 16 ಕಟ್ಟ ಪಾಡ್ದಿಪ್ಪುವೆರ್.

    

                    1935 ತ ದೈವದ ತುತ್ತೈತ

" ದೈವ ಕೊರ್ನ ನುಡಿನ್ ಪೊಯ್ಯೆಡ್ ಬರೆಯಡೆ,ಗಾಳಿಡ್ ಕಟ್ಟಡೆ,ಮೇಲ್ಸೆರಂಗ್ ಡ್ ಕಟ್ಟೊನ್ಲೆ" ಪಂಡ್ ದ್ ದೈವ ಪಂಡಲ ದೈವದ ನುಡಿಕ್ ನಮ ಬಿಲೆ ಕೊರಂದೆ ಕಟ್ಟ್ ನಾಯೆ ಕೊರಿ ನುಡಿಂದ್ ಎನ್ನಿನೆಡ್ದಾದ್ ಇನಿ ದೈವ ಮುನಿತ್ಂಡ್.ನಮ್ಮ ತರೆಟ್ ಇತ್ತಿ ಪೊಯ್ಯೆದ ಪುದೆನ್ ಜಾರಾದ್ ಪೂತ ಪುದೆನ್ ಕೊರ್ನ ದೈವ ನಮಕ್ ತೋಜಂದೆ ಪೋಂಡು.

  

    

            ಗಣಪತಿ ದೇವೆರೆಗ್ ದೈವದ ಅಣಿತ ಸಿಂಗಾರ

            ಪಂಜುರ್ಲಿ ದೈವ ಕುಟುಮೊಗು ಕೊರ್ಪುನ ನುಡಿ

ಮಂಡಲ ಬರೆನಗ ದೈವದ ಚಿತ್ರೊನು ರಂಗೋಲಿ ಪೊಡಿಟ್ ಬರೆತ್ನಿ

ಅಂಚ ಬರೆಪುನ ತಪ್ಪು.

  

ದೈವದ ಮಂಡಲ

ದೈವದ ಕೊಡಿಯಡಿತ ಚಾಕಿರಿಗ್ ಮದುಮಾಸ ತಿನಂದಿನಕುಲು ಬತ್ತ್ ದ್ ದೈವೊನ್ಲಾ ಶಾಖಾಹಾರಿಲಾದ್ ಮಲ್ತೊಂದುಲ್ಲೆರ್.

ಮಂಡಲ ಬರೆನಗ ದೈವ ಜುಮಾದಿನ ಚಿತ್ರ ಬುಡ್ಪಾದ್ ನಿ.

ಉಂದು ಖಂಡಿತವಾದ್ಲ ತಪ್ಪು

  

  

 

              ಪೊಸ ನಮುನೆದ ದೈವ ಮುಗ

    

  ದುಂಬು ನಾಗ ಮಂಡಲ ಸುರಾನಗ ಅವ್ಲು ಪಂತೊಲು ನಡತೊಂತ್ ಲೆಕ ತೋಜೊಂತ.ಪಂಡ ಅಲ್ತ್ ರ್ದ್ ನಮ್ಮ ಜಾಸ್ತಿ ಉಪ್ಪೊಡುಂದು ಪಂತೊಡು ಮಲ್ತೊಂತೆರ್.ಇನಿ ಅಷ್ಟಮಂಗಲ ಪ್ರಸ್ನೆ ಚಿಂತನೆಲು ಅವ್ವೇ ಸಾದಿಡ್ ಪೋವೊಂದುಲ್ಲ.ಅವ್ಲು ಆತ್ ದಿನತ ಪ್ರಶ್ನೆಗೆ,ಮೂಲು ಅಲ್ತ್ ಜಾಸ್ತಿ ಆವೊಡು,ಅವ್ಲು ಆತ್ ದಿನತ ಬ್ರಹ್ಮ ಕಲಶಗೆ,ಮೂಲು ಅಲ್ತ್ ಜಾಸ್ತಿ ದಿನ ಆವೊಡುಂದು ಪಂತ ನಡತೊಂದುಂಡು.ದೈವದ ಕಲೊಕು ಅಗತ್ಯ ಇಜ್ಜಿಂಡಲ ಬಿರ್ಸಾದಿಗೆ ತೋಜಾಯೆರೆ ಪೋದು ಇನಿ ದೈವದ ಮೂಲ ಪುದರುಲು ಮಯಕಾದ್ ಕೇರಳದ ಪ್ರಶ್ನೆ ಚಿಂತನೆದಕುಲು ಪಂಡಿ ಪುರಾಣದ ಪುದರ್ ಲೆನ್ ದೈವೊಗು‌ ದೀದ್ ಹಿರಿಯಾಕ್ಲ್ ದೀನ ಪುದರ್ ಮದತ್ ದ್ ಪೊಸತ್ ನ್ ತೋಡುನ ಮರ್ಲ್ ಡ್ ಪರತ್ ನ್ ನಿಗಿತ್ ಬುಡ್ಯ.ನಮ್ಮ ಊರ್ದ ಬಲ್ಯಾಯೆರ್,ಜೋಯಿಸೆರ್ ನಂಕ್ ಬೊಡ್ಚಿ,ದೂರದ ಕೇರಳದ ಪ್ರಶ್ನೆ ಚಿಂತನೆದಕ್ಲೆ ನಂಕ್ ಬೋಡು.ಅಕ್ಲೆ ಕ್ರಮೊನು ನಮ್ಮ ದೈವಾರಾದನೆಗ್ ಅಕ್ಲ್ ಕನನಗಲ ಮನಿಪಂದೆ ಕುಲ್ಯ.ನಮ್ಮ ಅರಸುದೈವೊಲ್ನ,ರಾಜಂದೈವೊಲ್ನ ಒರಿನ ದೈವೊಲ್ನ ಕೆರಮ ಬೇತೆ ಬೇತೆ ಇತ್ತ್ಂಡಲ ಅಕುಲು ಅವೆನ್ ಅಕ್ಲೆ ಅಲಚನೆದಲೆಕ ಒಂಜೇ ಮಲ್ಪೆರೆ ಪಿದಡೊಂದುಲ್ಲೆರ್.ತಗೆ ತಂಗಡಿನ ಒರುತ ಕಲ್ಲುರ್ಟಿ ಪಂಜುರ್ಲಿನ್ ಬೇತೆ ಬೇತೆ ಕೋಣೆಡ್ ಕುಲ್ಲಾವೊಂದುಲ್ಲೆರ್. ಪಂಜುರ್ಲಿನ ಬಲತ ಬಾಗೊಡು ಕುಲ್ಲೊಡಾಯಿನ ಕಲ್ಲುರ್ಟಿನ್ ಎಡತ ಬಾಗೊಡು ಕುಲ್ಲಾಯೆರೆ ಪನ್ಪೆರ್.ಎಡತ ಬಾಗೊಡು ಕುಲ್ಲವುನೆತ ಅರ್ಥ ಬೇತೆನೇ ಆಪುಂಡು

 ನೇಮ ಕಟ್ಟುನಾರೆ ಪದ್ದೈ.ದೈವದ ಪಾಪೆನ್ ನರಮಾನ್ಯನ ಶರೀರೊಗು ಪಾಡೆರೆ ಬಲ್ಲಿ

   

ದೈವದ ಕಾರ ಗಗ್ಗರೊನು ಕಟ್ಟುನಾರ್ ತಿಗಲೆಡ್ ಟಾಟೂ ಪಾಡುನವು ಸರಿಯತ್ತ್.

  

              ದೈವದ ಅಣಿತ ಅಂಚಿಂಚಿ ದೇವೆರೆ  ಚಿತ್ರ

  

   ಮಲರಾಯನ ಅಣಿತ ಪಿರವು ಪೊಣ್ಣನ ಜಿಡೆ ಬುಡ್ಪಾಯೆರ್

  

ದೈವದ ಅಣಿತ ಪಿರವು ದೈವೊಲ್ನ ಮುಗತಟ್ಟೆಡ್ ದೀನ ಮುಗತ ಚಿತ್ರ ಬುಡ್ಪಾವುನ ಕಾಲ ಬತ್ತ್ಂಡ್


  

ಇನಿ ಕುರ್ಸಿದ ಮಿತ್ತ್ ಕುಲ್ದ್ ವೈದಿಕೆರ್/ತಂತ್ರಿಲು ಮೈಕ ಪತೊಂದು ಎಕ್ಕ ಕೊರ್ದು ಮದಿಪು ಪನ್ಪುನಡೆಮುಟ್ಟ ದೈವಾರಾದನೆ ಎತ್ತ್ಂಡ್

                ದೈವದ ಅರದಾಲ ಮಯಕಾದ್ ಪೋಂಡ್

  

    ಮಂತ್ರಜಾವದೆಗ್ ಯೋಗ ದಂಡ,ಕಮಂಡಲ ಬೈದ್ಂಡ್

             ‌‌‌‌‌      ಕಾಜು ಕುಜುಂಬ ದೈವ

  ದೈವಾರಾದನೆಡ್ 48 ಚಾಕಿರಿ ಬಾಗದಕ್ಲೆನ ಪಾಲುಂಡು.16ಗುತ್ತುಲು,16ಉಳಗುತ್ತುಲು,16 ಚಾಕಿರಿ ವರ್ಗೊಲು.ಪ್ರತಿಯೊರಿಯಗ್ಲ ಅಕ್ಲೆನವೇ ಚಾಕಿರಿದ ಪಾಲುಂಡು.ಒಂಜಿ ನಿರ್ದಿಷ್ಟ ಚಾಕಿರಿ ವರ್ಗದ  ಸೊತ್ತು‌ ದೈವಾರಾದನೆಯತ್ತ್.ಪ್ರತಿಯೊಂಜಿ ಚಾಕಿರಿ ಬಾಗದಕುಲು ಅಕ್ಲೆನ ಚಾಕಿರಿ ಮಲ್ತೆರ್ಡ ಮಾತ್ರ ಪರಿಪೂರ್ಣ ದೈವಾರಾದನೆ.ಕಟ್ಟುನಕ್ಲೆರ್ದ್ ದೈವ ಅತ್ತ್.ದೈವೊರ್ದು ಕಟ್ಟುನಕುಲು  ಪನ್ಪುನೆನ್ ಮದಪೆರೆ ಬಲ್ಲಿ.ನೂಲು ಪಾಲ್ ಸಂಸಾರೊರ್ದು ದೋಲು ಪಾಲ್ ಸಂಸಾರ ಮುಟ್ಟ ದೈವ ಚಾಕಿರಿದ 16 ವರ್ಗದ ಪಾಲುಂಡು.ಕಟ್ಟುನಕುಲು‌ ಕಟ್ಟುಜಿ ಪನೊಲಿ.ದೈವಾರಾದನೆ ಒರಿಯುಜಿ.ಪೂ ನೀರ್ ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ಪೊಲಿ.ಅಂಚಾಂದ್ ದೈವಾರಾದನೆ ಮಲ್ಪವುನಕುಲು ನೇಮ ಮಲ್ಪಾವುನ ಬುಡ್ದು ಪೂನೀರ್,ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ತೆರ್ಡ ನೇಮ ನೆರಿ ಉಂತುದು ಪೋವು

               ಮಂತ್ರಜಾವದೆನ ಕೈಟ್ ಕಪ್ಪುದ ಚವಳ ಬೈದ್ಂಡ್.

  

ಐನ್ ವರ್ಸೊಗೊರ ನಡಪುನ ನೇಮಪಂಚವಾರ್ಷಿಕ ಕೋಲಂದಾಂಡ್

  ಒಂಜಿ ಕಾಲೊಡು ತನ್ಕ್ ಎದುರುಂತ್ ನ ಬಡವರ್ಗೊನು ಒಂಜಿ ಶ್ರೀಮಂತ ವರ್ಗ ಮೋಸೊಡು ಕೆರ್ದ್ ತನ್ಕುಲೆಗ್ ತೊಂದರೆ ಅಯೆರೆ ಬಲ್ಲಿಂದ್ ದೈವ ಮಾಯ ಮಲ್ತಿನಿ ಪಂಡೆರ್.ಕರಿದ್ ಪೋಯಿನಕ್ಲೆರ್ದ್ ಉಪದ್ರ ತೋಜಿದ್ ಬನ್ನಗ ಅಕ್ಲೆನ್ ದೈವ ಆದ್ ನಂಬ್ಯೆರ್..ಇನಿ ತನ್ನ ಬಂಜಿದ ಗುಜ್ಜರ್ಮೆಗಾದ್ ದೈವೊಲೆನ್ ಸಿನೆಮಾ ನಾಟಕ ಅಟ ದಾರಾವಾಹಿಲೆಡ್ ಕನನಗ ದೈವದ ಅಪ್ಪಣೆ  ದೆತೊಂದು ಅವೆನ್ ಮಲ್ತೊಂದುಲ್ಲ,ಜಗತ್ತ್ ಗ್ ದೈವದ ಕಾರ್ನಿಕೊನು ತೋಜವೊಡುಂದುಲ್ಲಂದ್ ಪನ್ಪೆರ್.ಇಲ್ಲದುಲಯಿ ಪರೊಡಾಯಿನ ಪೇರ್ ನ್ ಜಾಲ್ ಗ್ ಚೇತ್ ಲೆಕಾಂಡ್. ತುಳು ಮಣ್ಣ್ ದ ವಾ ದೈವಲಾ ತುಳುನಾಡ ಮಣ್ಣ ಋಣತಕ್ಲೆನ್ ಬುಡ್ದು ಪಾಡಂದ್. ಇಂಚಿ ಇಚಾರೊಗು ದೈವ ಒಪ್ಪಿಗೆ ಕೊರ್ರೆ ಸಾಧ್ಯನೇ ಇಜ್ಜಿ.ಕೆಲವು ಕಟ್ಟುನಕುಲು ಪಣವುದ ಆಸೆಗ್,ಮಾದ್ಯಮೊಡು ಪುದರ್ ಬರ್ರೆ ಬೋಡಾದ್ ನುಡಿ ಕೊರೊಡಾತೆ.

ಕಲ್ಕುಡ ದೈವ ಕುದುರೆ ಬಂಡಿದ ಮಿತ್ತ್ ಕುಲ್ದು ಸವಾರಿ.ಪಳ್ಳಿ ಅಡಪಾಡಿ ದೈವಸಾನ. ಚಿತ್ರ - ಉಡುಪೀಯ ಕಂಡೀರಾ

  

ಕಲ್ಕುಡ , ವರ್ತೆ ಕುದುರೆ ಬಂಡಿಯೇರ್ದ್ ವಲಸರಿ .ಪಳ್ಳಿ ಅಡಪಾಡಿ

ತೆರಿಯೊನ್ಗ:-

  ಇನಿ ದೈವಾರಾದನೆದ ಅಜ ತಪ್ಪೆರೆ ಒಂಜಿ ಕಾರಣ ಚಾಕಿರಿ ವರ್ಗಂದ್ ಲ ಪನೊಲಿ.ದಾಯೆ ಪಂಡ ನೇಮದ ಕೊಡಿಯಡಿಕ್ ಒರಿ ಸಿನೆಮ ಮಲ್ಪುನಾಯೆ,ರಾಜಕೀಯದಾಯೆ ಬತ್ತೆಡ ಸುರುಕು ದೈವ ಆಯನ ಕೈ ಪತೊಂದು ತನ್ನ ತಿಗಲೆ ಮುಟ್ಟುದು ಯಾನುಲ್ಲೆ ಪಂಡ ಮೂಲು ದೈವ ಅಂಚ ಪನೆರೆ ಸಾಧ್ಯನೇ ಇಜ್ಜಿ‌‌.ದಾಯೆ ಪಂಡ ಅಕುಲೇರ್,ಮೊಕುಲೇರ್ಂದ್ ದೈವೊಗು ಗೊತ್ತಿಪ್ಪೆರೆ ಸಾಧ್ಯನೇ ಇಜ್ಜಿ..ಉಂದು ಚಾಕಿರಿದಾರೆ ಬೇಲೆ‌.ದಾಯೆ ಪಂಡ ಅರೆಗ್ ಗುರ್ತ ಮಲ್ಲಕ್ಲೆನ ಉಪ್ಪುಂಡತ್ತೆ.ಅಂಚ ಆರ್ನ ಕಾರ್ಬಾರ್ ನ್ ದೈವದ ಕಲೊಟು ತೋಜಾವೆರ್.ದುಂಬು ಪೂರ ದೈವ ಏರೆನ ಮೈ ಕೈ ಮುಟ್ಟುನ ಕೆರಮ ಇಜ್ಜಾಂಡ್,ಬೂಲ್ಯೊನು ದೂರೊರ್ದೆ ದೆತೊನ್ನಾರೆನ ಕೈಕ್ ಬೂರುಲೆಕ ಕೊರೊಂತ್ಂಡ್.ದುಂಬು ರಾಜಂದೈವದ ಕಲೊಟು ದೈವ ಭಂಡಾರದ ಮುಗ,ಕಡ್ಸಲೆನ್ ಪತಿ ಮಾನಿ (ಭಂಡಾರೊನು/ಕಿರ್ವಾಲ್ ನ್/ಆಯುಧ/ಕಡ್ಸಲೆನ್ ಪತೊಂದಿನ ಪತಿಮಾನಿ) ವಸಾಯೊಡು ಕಟಿಮಾನಿ ನ ಕೈಕ್ ಒಪ್ಪಿತೊಂತೆರ್.ಇನಿ ತಿಕ್ ನೌಲು ಪೂರ ತಿಕ್ ನ ದೈವೊಗು ಪೂರ ಮಾನೆಚ್ಚಿಲಾವೊಂದುಂಡು.ಓಡೆ ಮುಟ್ಟ ಪಂಡ ದೈವದ ಮುಗೊನ್ಲ ಮೊಕ್ಲೇ ಒಪ್ಪಿಪಾವೊನ್ನಡೆಮುಟ್ಟ ಎತ್ತ್ ದೆರ್.ದೈವದ ಕಲೊಟು ಇಜ್ಜಾಂದಿ ಉಚ್ಚಾಟನೆಲೆನ್ ಮೂಲ ಚಾಕಿರಿದಕುಲು ಮಲ್ತೊಂದುಲ್ಲೆರ್.ಇಂಚನೆ ಆಂಡ ದೈವದ ಮಿತ್ತ ನಂಬೊಳಿಗೆ ಮಯಕಾಯೆರೆ ಮೊಕ್ಲೆ ಕಾರಣೆರಾಪೆರ್.ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತಿ ತುಳುನಾಡ ದೈವೊಲೆನ್ ಮೊಕ್ಲು ಕುಡ ಗಟ್ಟ ಬಡ್ತಾವೊಂದುಲ್ಲೆರ್ ಪಂಡ ದೈವದ ಕಲೊಕು ವೈದಿಕದಕುಲು ಮಲ್ಪುನ ಎತ್ತೇಸೊಗ್ಲ,ಕಟ್ಟುನಕುಲು ಮಲ್ಪಿ ಎತ್ತೇಸೊಗ್ಲ ದಾದ ಪರಕುಂಡು.ವೈದಿಕೆರಾಂಡಲ ದೈವದ ಚಾಕಿರಿನ್ ತುಳುನಾಡ ವ್ಯಾಪ್ತಿಡೇ ಮಲ್ತೊಂದುಲ್ಲೆರ್.ಚಾಕಿರಿದಕುಲು ದೈವೊನು ಗಟ್ಟದ ಮಿತ್ತ್ ಕೊನೊದು ಅಕ್ಲೆ ಬಂಜಿದ ಪಾಡ್ ತೂಯೆರ್ ವಿನಃ ಮೂಲ ಒಲ್ತ ಆರಾದನೆ ಪನ್ಪುನೆನ್ ಮದತ್ ಬುಡ್ಯೆರ್

  

ಒವ್ವೇ ಒಂಜಿ ದೈವ ರಡ್ರಡ್ಡ್ ಪಂಚ ಜೀಟಿಗೆ,ಮೂಜಿ ಮೂಜಿ ಒತ್ತೆ ಜೀಟಿಗೆ ಒಟ್ಟಿಗೆ ಪತೊನುನ ಕೆರಮ ಇಜ್ಜಿ.

   ಇನಿ ಕೆಲವು ಕಟ್ಟುನಕುಲು ಎಂಕುಲು ಕಟ್ಟುನೆನ್ ಉಂತಾಂಡ ನಿಕ್ಲೆಗ್ ದಾಲ ಮಲ್ಪೆರೆ ಸಾದ್ಯ ಇಜ್ಜಿಂದ್ ಕೆಲವೆರೆನ್ ಪೋಡಿ ಕಟ್ಟಾವೊಂದುಲ್ಲೆರ್ ಗೆ.ಮೊಕ್ಲು ಕಟ್ಟ್ ಜಿಂಡ ದಾಲ ದೈವಾರಾದನೆ ಒರಿಯುಜಿ.ಕೊರೊನ ಸೀಕ್ ಬನ್ನಗ ಮೊಕ್ಲು ಓಲಿತ್ತೆರ್?.ದೈವದ ಚಾಕಿರಿ ದಾಲ ಬಾಕಿ ಆತ್ ಜಿ.ಕುಟುಮದಕ್ಲಿತ್ತ್ ದ್ ಪೊರ್ಲುಡೆ ಸಂಕ್ರಾಂತಿಲ ಕರ್ತ್ ದೆರ್.ದೈವೊಲೆಗ್ ತಂಬಿಲಲ ಕಟ್ಟ್ ದೆರ್ ಅಗೆಲ್ಲ.ಪಾಡ್ದೆರ್.ದೈವಾರಾದನೆ ಓಲ್ಲಾ ಉಂತ್ ದ್ ಜಿ.

  

    ಅರಸುಲೆ ಸಿತರಿ ಮುಡಿಟ್ ಸೂರ್ಯ ಚಂದ್ರೆ ಮಯ

   ದೈವದ ನುಡಿಕಟ್ಟ್ ದ ಕಲ್ಪನೆಗ್ಲ ಪ್ರಾಕೃತಿಕ ಗಟ್ಟದ ಕಲ್ಪನೆಗ್ಲ ಒಂತೆ ಎತ್ತೇಸೊ ಉಂಡು.ಮೂಲು‌ ದೈವ ಗಟ್ಟ ಬಡ್ತುನತ್ತ್.ದೈವೊನು ಆರಾದನೆ ಮಲ್ಪುನಕುಲು ದುಂಬುದ ಕಾಲೊಡು ದೈವಾರಾದನೆ ಮುಗಿ ಬೊಕ್ಜ  ಬೆನೆರೆ ಗಟ್ಟೊಗು ಪೋವೊಂತೆರ್.ನನೊಂಜಿ ರೀತಿಡ್ ಪನ್ಪುಂಡ ಕಂಡಸಾಗೊಳಿದ ಬರಿತ ಏರ ಜೇರೊಲೆ ಗಟ್ಟೊಲಾದಿತ್ತ.ದೈವದ ನುಡಿ ಕಟ್ಟ್ ಡ್ ಬರ್ಪಿ ರಾಜ್ಯದ ಕಲ,ರಾಜ್ಯದ ಕಲ್ಪನೆಲ ನಮ್ಮ ಇತ್ತೆದ ರಾಜಕೀಯ ವ್ಯಾಪ್ತಿದ ರಾಜ್ಜೊರ್ದು ಬೇತೆಯಾದುಂಡು. ದೈವದ ನುಡಿಟ್ ಬರ್ಪುನ ಗಡಿ ಮಾಗಣೆ,ಹೋಬಳಿ,ಗ್ರಾಮ

ಗಡುಪಾಡಿ ಜಾಗೆಲು ಆಧುನಿಕ ತಲೆಮಾರ್ ಗ್ ಅರ್ಥ ಆವಂದಿನೆಟೇ ಒಂಜಿ ಗ್ರಾಮ ದೈವದ ವ್ಯಾಪ್ತಿಡ್ ನಿಷೇಧ ಇತ್ತಿನ ಆರಾಧನೆಲು,

ಆಚರಣೆಲು ಉಲ್ಲಂಘನೆ ಆವೊಂದು ಕಟ್ಟ್ ತತ್ತೊಂದು ಉಂಡು .ತುಳುನಾಡ್ ಡ್ದ್ ಗಟ್ಟದ  ಮಿತ್ತ್ ಗ್  ಕಾಫಿ ತೋಟೊಗು ಬೇಲೆಗ್ ಪೋಯಿನಕುಲು ಏತೋ ವರ್ಷಡ್ದ್  ಅಲ್ಪನೆ  ಬದ್ ಕ್ ಕಟ್ಟೊಂಡಲಾ, ನಂಬೊಲಿಗೆ ಇತ್ತ್ಂಡಲ ಕುಟುಂಬದ ಭೂತೊಗು ಕರಿಪುನಗ  ಊರುಗೆ ಬರ್ಪೆರ್.

ಅರಸು ದೈವೊಲೆ ಸಿರಿ(ತಿರಿ ಅಲಂಕಾರ)ಮುಡಿತ ಅರ್ಥ ತೆರಿಯಂದೆ ಸಿರಿ ಮುಡಿಕ್ ತಿರಿತ ಅಲಂಕಾರದ ಬದಲ್ ಪೂತ ಅಲಂಕಾರ ಮಲ್ತೊಂದುಲ್ಲೆರ್.

ದೈವ ಇಂಚ ಬಾಲೆನ್ ತಟೊನುನ ಕೆರಮ ಇಜ್ಜಿ.ಬಾಲೆ ಮಡೆ ಮಲ್ತ್ಂಡ ಏರ್ ಜವಾಬ್ದಾರಿ

   ಇನಿ ಅರಸು ದೈವೊಲು ಪೂರ ನೀಲಿಯಾಡ್ಯಾನೇ ರಂಗಾ...ದಿಡ್ ಕ್ಕ ದಿಡ್ ಕ್ಕ...ಪದೊಕು ವಲಸಾರಿ ಬರ್ಪುಲೆಕಾಂಡ್.ತಾಸೆ ವಾದ್ಯದೊಟ್ಟುಗು ನೇಮ ನಡತೊಂತಿನಡೆ ಕೇರಳ ಚೆಂಡೆಗ್ ದೈವೊಲು ನಲಿಪುಲೆಕಾಂಡ್.ಅಂಚನೆ ಇತ್ತೆ ಒಂಜಿ ಸುರಾತ್ಂಡ್.ಇಲ್ಲಿಲ್ಲಲ್ ನಡಪುನ ಕೋಲದಡೆ ವಾದ್ಯದಕುಲು ಸೊರೊ ಪೆಟ್ಯೆ(ಸೌಂಡ್ ಬಾಕ್ಸ್)ಕನತ್ ದ್ ವಾದ್ಯ ಉರಿಪುನ ಎದುರು ಮೈಕ್ ದೀದ್ ಜೋರು ಸೊರೊ ಲಕ್ಕವೆರ್.ಉಂದು ತಪ್ಪು .ಇಂಚನೇ ಆಂಡ ನನೊಂಜಾತ್ ವರ್ಸೊಡು ನೇಮ ನೆರಿ ಉಂತುದು ಪೋಪುಂಡು.ಕಟ್ಟುನಕುಲು ಒವೆಕ್ಲಾ ಮನಿಪಂದೆ ಬೊಟ್ಟ್ ನೆಕ್,ಉರ್ತ್ ನೆಕ್ ಪೂರಾ ನಲಿತೊಂದು ಅಕ್ಲೆ ಬಂಜಿಗ್ ಅಕ್ಲೇ ಕಲ್ಲ್ ಪಾಡೊಂದುಲ್ಲೆರ್.ದೈವದ ನೇಮ ನೆರಿ ಉಂತುದು ವೈದಿಕ ತನು ತಂಬಿಲೊಡು ದೈವಾರಾದನೆನ್ ಸುದಾರ್ಪುನ ಕಾಲ ಬರ್ಪುಂಡು.ಜವನೆರ್ ಎಂಚಾಂಡಲ ಕೂಲಿ ಬೇಲೆಗ್ ಪೋದು ಬೆಂದ್ ದ್ ಬದ್ ಕೊನುವೆರ್.ಪಾಪ ಪ್ರಾಯದ ಚಾಕಿರಿದಕ್ಲೆಗ್ ಉನೆರೆ ತಿನೆರೆ ಬಂಙಾಪುನ ಕಾಲ ಬರ್ಪುಂಡು.ಇತ್ತ್ ನೆನಾಂಡಲ ಮೂಲ ಸೊರ್ಪೊಡು ಒರಿಪುನ ಬೇಲೆ ಮಲ್ಪುಗ.

  

ಮಂತ್ರಜಾವದೆಗ್ ಕಟ್ಟ್ ನಾರ್ನ ನಾಲಾಯಿಡ್ ಪೊಂಜೊವೊರ್ತಿ ಕರ್ಪೂರ ಪೊತ್ತದ್ ದೀತ್ ನಿ

  ಇನಿ ದೈವದ ಕಲ ಮೀರ್ದ್ ದೈವದ ಚಾಕಿರಿ ಬಾಗದಕುಲು ದೂರದೂರುಗು,ಪಿದಯಿ ರಾಜ್ಯೊಗು ಪೋದು ನೇಮ ನೆರಿ ಕಟ್ಟೊಂದುಲ್ಲೆರ್.ಅಕ್ಲ್ ಪಣವುದಂಚಿ ತೂವಂದೆ ತುಳುನಾಡ ಆರಾದನೆನ್ ಬೇತೆ ಓಲ್ಲಾ ಕನಪುಜ ಪಂತುವೆರ್ಡ ಇಂಚ ಪೂರ ಆತಂದ್.ಮೊಕ್ಲು ಕಟ್ಟುಜಿ ಪಂತುವೆರ್ಡ ಅಕ್ಲೆಗ್ ದಾಲ ಒಯ್ತೊಂದು ಪೋದು ನೇಮ ಮಲ್ಪಾಯೆರೆ ಸಾದ್ಯ ಇಜ್ಜಾಂಡ್.

ಪೊಂಜನಕ್ ಲ್ ಮಂತ್ರಜಾವದೆನ ಬಾಯಿಗ್ ಕರ್ಪೂರ ಪೊತ್ತದ್ ದೀತ್ ನಿ

ದೈವಾರಾದನೆ ಮಾಯೆ(ಅಲೌಕಿಕ) ಬೊಕ್ಕ ಜೋಗ(ಲೌಕಿಕ)ದ ನಡುತ ತೋಜಂದಿ ಬೊಲ್ಪು.ಆಂಡ ಆ ಮಾಯೆ ಇಡೀ ಬದ್ ಕ್ ಗ್ ಸಾಂತ್ವನ,ನೆಮ್ಮದಿ ಕೊರ್ಪುನ ಸಗ್ತಿಯಾದುಂಡು.ದೈವದ ಕಲೊಟು ದೈವದ ಅರ್ಥ ಆವಂದಿ ನುಡಿ ಕಟ್ಟುಲು,ಕಣ್ಣ್ ಕೈ ಬಾಸೆಲು ನಮಕ್ ದಾದನೋ ಒಂಜಿ ಬದ್ ಕ್ ಗ್ ಧೈರ್ಯ ಕೊರ್ಪುಂಡು.ದೈವದ ನುಡಿ,ಅಭಯದ ಮದಿಪುಗು ನಮಕ್ ನಮ್ಮ ಉಡಲ್ದ ಉಲಯಿದ ಬೇನೆ ಬೆಸರ್ ಗ್ ಪೂರ ಸಾಂತ್ವನ ತಿಕ್ಕುಂಡು.

          ಕೇರಳ ಭಾಗದ ದೈವದ ಮೋನೆದ ಅರದಾಲ

ಇನಿ ಪೊಣ್ಣು ದೈವೊಲೆಗ್ ಕಟ್ಟುನಕುಲು ಮೋನೆಗ್ ಆಟದ ಪೊಸ ಪೊಸ ರಂಗ್ ಪಾಡ್ದ್ ಅರ್ದಾಲ ಪಾಡೊಂದಿಜ್ಜೆರ್ಅಂಚನೆ ಆಟದಕುಲು ಗಲಸುನ ತುತ್ತೈತ ಮಲ್ತ್ ದ್ ಮೂಲ ದೈವದ ತುತ್ತೈತ ಬುಡ್ದು ಬುಡ್ತೆರ್.ಅಕ್ಲೆ ತರೆಟ್ ತಾನ್ ದೈವೊಗು ಕಟ್ಟ್ ದ್ ನಿಂದಿಜ್ಜಿ.ತಾನ್ ಆಟೊಡು ಪಾಡುನ ಸಿರಿಯೇಸಂದ್ ಎನ್ನಿದೆರ್.

        

                     ತುಳುನಾಡ ದೈವೊಲೆಗ್ ಬೊಲ್ದು ಬೊಕ್ಕ ಕೇಪುಳ ರಂಗ್ಂದ್ ಇಂಚಿನವೇ ರಂಗ್ ದ ತುತ್ತೈತಂದ್ ನಮ್ಮ ಹಿರಿಯಾಕ್ಲು ಮಲ್ತ್ ದಿತ್ತೆರ್.ಆಂಡ ನಮ ಅವೆನ್ ಕಳೆಯೊಂದುಲ್ಲ.ಉಂದು ನಮ್ಮ ತುಲುವ ಮಣ್ಣ ಸಂಸ್ಕೃತಿಗ್ ನಮ ಮಲ್ಪುನ ಅನ್ಯಾಯ.ನಮ್ಮತುಳು ಮಣ್ಣ್ ದ ದೈವಾರಾದನೆಗಿಜ್ಜಂದಿ ಕೇಸರಿ ರಂಗ್ ದ ತುತ್ತೈತ ನಮಕ್ ತೂವೆರೆ ತಿಕ್ಕೊಂದುಂಡು.ಉಂದು ಸಾಂಸ್ಕೃತಿಕ ಧಾಳಿಯಾ,ಯಜಮಾನಿಕೆನಾ ದಾದಂದ್ ತೆರಿಯೊಂದಿಜ್ಜಿ  ‌

  

   ನಿಜವಾದ್ ತುಳುವೆರೆಗ್ ದೈವಾರಾದನೆದ ಕಟ್ಟ್ ನ್ ತೆರಿಪಾದ್ ಕೊರೊಡಾಯಿನಕುಲು ಕಟ್ಟುನಕುಲು.  ಅಂಚನೆ ಇಂಚಿನ ದೈವೊಗು ಇಂಚಿನ ಬಣ್ಣ,ಇಂಚಿನ ತುತ್ತೈತ,ಇಂಚಿತ್ತ್ ನ ಮಣೆ ಮಂಚ,ಇಂಚಿತ್ತ್ ನ ಉಜ್ಜಾಲ್ಂದ್ ತೆರಿಪಾವೊಡಾಯಿನಕುಲು ಕಟ್ಟುನಕುಲು..ಇನಿ ಅಕುಲೇ ಮಣ್ಣ ಸಂಸ್ಕೃತಿನ್ ಮದತೆರ್ಡ ನನ ಏರೆಡ ಕೇನೊಡು?.ದುಂಬು ದೈವದ ತುತ್ತೈತ,ಅರ್ದಾಲೊಡು ಉಂದು ಗುಳಿಗೆ,ಉಂದು ಪಂಜುರ್ಲಿ,ಉಂದು ಜುಮಾದಿಂದ್ ಗೊತ್ತಾವೊಂತ್ಂಡ್.ಇನಿ ಕಲ್ಲುರ್ಟಿ,ಗುಳಿಗನ್ ಪೂರ ತೂನಗ ದಾದ ಬಣ್ಣಂದೇ ಗೊತ್ತಾವೊಂದಿಜ್ಜಿ.ಪುಟ್ಟುರ್ದು ಸಾವುಮುಟ್ಟದ ಆಚರಣೆಲು ಸಂಪೂರ್ಣ ವೈದಿಕ ಅಯಿಲೆಕ ತುಳುನಾಡ ದೈವಾರಾದನೆದ ಮೂಲ ಪರಂಪರೆ ನಾಶ ಆವೊಂದುಂಡು.

      

 ದೈವೊಲೆಗ್ ಪಾಲೆಡ್/ತಡ್ಪೆಡ್ ಕೊರೊಂತಿ ಆವಾರಾಮೃತ ಪ್ಲಾಷ್ಟಿಕ್ ತಟ್ಟೆಡ್ ಕೊರ್ಪುನ ಪರಿಸ್ಥಿತಿ ಬತ್ತ್ಂಡ್

    

ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ  ಅಪರಾಧ. ಅಂಚನೆ ದೈವೊಲೆನ್  ನಮಕ್  ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.ಅಂಚನೆ ಲೇಸ್ ಸುದಾರಿಕೆದ ಪಾತೆರ್ನಗ(ನಿರೂಪಣೆ),ಚಾವಡಿದ ಮಿತ್ತ್ ಪಾತೆರ್ನಗ ದೈವ ಕೊಡಿಯಡಿಟ್ ಪನ್ಪುನ ನುಡಿಕಟ್ಟ್ ನ್ ಪನ್ಪುನವು ತಪ್ಪು.ದೈವದ ಅಣಿನ್ ವೇದಿಕೆಡ್ ಪಾಡುನವು ತಪ್ಪು.ಕೊಡಿಯಡಿತ ದೈವದ ನುಡಿನ್ ಕೊಡಿಯಡಿಟೇ ಕೇನೊಡು.ದೈವದ ನುಡಿನ್ ಅಂತರ್ಜಾಲೊಡು ದೈವದ ಚಿತ್ರ ಪಾಡ್ದ್ ಬರೆಪುನಲ ಸರಿ ಅತ್ತ್.

                      ಮುಳ್ಳು ಗುಳಿಗೆ 

ದೈವದ ಕೊಡಿಯಡಿತ ಕಿರ್ ವಾಲ್/ಬಾಲ್ ಬಂಡಾರೊನು ಕಟ್ಟುನಕುಲು ಸಿನೆಮಾ,ನಾಟಕದಕುಲೆಗ್ ಕೊರ್ದು ಇನಿ ಈ ಪರಿಸ್ಥಿತಿ ಬೈದ್,ಡ್.ನಮ್ಮ ತುಳುನಾಡ ವ್ಯಾಪ್ತಿದುಲಯಿ ನಡಪುನ ದೈವಾರಾದನೆನ್ ಪಿದಯಿದ ಜಗತ್ತ್ ಗ್ ತೋಜಾದ್ ಮಲ್ಲ ಸಾಧನೆ ಮಲ್ಪೆರೆ ದಾಲ ಇಜ್ಜಿ‌‌

              ಉಲ್ಲಾಲ್ದಿ ದೈವ ಇಡಿಯಡ್ಕ ಪೆರ್ಲ

ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ  ಅಪರಾಧ. ಅಂಚನೆ ದೈವೊಲೆನ್  ನಮಕ್  ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.

   

                         ಪಿಲಿ ಬೂತ ಇರ್ದೆ ಕದಿಕೆ ಚಾವಡಿ

      ದೈವಾರಾದನೆ ಅವು ಮೂಡ ನಂಬಿಕೆಯತ್ತ್.ಮಂತ್ರ ಪೂಜೆಲ ಅತ್ತ್.ಅವು ಬದ್ ಕ್ ಗ್ ಒಂಜಿ ಎಡ್ಡೆ ಸಾದಿ ಮಲ್ತ್ ಕೊರ್ಪುನ ವ್ಯವಸ್ಥೆ,ನ್ಯಾಯಾಂಗ ವ್ಯವಸ್ಥೆ.ನಂಬೊಳಿಗೆನೇ ಮೂಲು ಬದ್ ಕ್ ದ ಬಾಜಿರ ಕಂಬ.

                      ಚೌಂಡಿ ದೈವ ಅಮ್ಮುಂಜೆ

ಕುಟುಮ ಸಂಸಾರ ಓಲೋಲು ಪದ್ ರ್ದ್ ಇತ್ತ್ಂಡಲ ವರ್ಸೊಗೊರ ಒಂಜೆ ಕೊಡಿಯಡಿಟ್ ಸೇರಾವೊಂತ್ ನಿ ದೈವಾರಾದನೆ.ವಾ ಕೋಪ,ಓದುಒರಂಟ್ ಇತ್ತ್ಂಡಲ ಒಂಜಿ ದಿನತ ಮಟ್ಟ್ ಗಾಂಡಲ ಒಟ್ಟು ಸೇರಾವೊಂತ್ ನಿ ದೈವಾರಾದನೆ.

  

      ಅಣ್ಣಪ್ಪ ಸ್ವಾಮಿ ದೈವ ಕಾಂಚೋಡು ಬಾಳಿಲ

ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ಎಡತ ಮರ್ಗಿಲ್ಡೇ ಉಪ್ಪೊಡು. ನಮ ದೈವೊಗು ಎಡತ್ ದ್ ಉಂತುದೇ ಮದಿಪುನ ಕೆರಮ.ದಾಯೆ ಪಂಡ ದೈವದ ನುಡಿಟ್ ಅಪ್ಪೆಯಾಂಡ ಬಲತ ಸಿರಿ ಮಿರೆ ಕೊರ್ದು,ತಮ್ಮಲೆಯಾಂಡ ಬಲತ ತುಡೆ ಮಿತ್ತ್ ಕುಲ್ಲಾದ್ ಪಾಲಿಪುವೆ ಪನ್ಪಿ ನುಡಿ ಉಂಡು .ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.

 

ಸಾರತ್ತೊಂಜಿ ಪಾಲೆದ ಅಣಿ.ನಾಲಾಯಿದಾಯೆ ದೈವ ಸಜಿಪ.ಇಂಚಿನವೇ ಸಾರತ್ತೊಂಜಿ ಪಾಳೆದ ಅಣಿತ ದೈವ ಪೆರ್ರದ ಉಲ್ಲಾಯೆ ಬೊಕ್ಕ ಮಾಣಿ ಅರೆಬೆಟ್ಟುದ ಗುಡ್ಡೆಚಂಡಿ ದೈವ

   ದುಂಬು ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಇಲ್ಲದುಲಯಿ ಮದನಕೈ ಪಲಯಿಡ್,ಮಣೆಟ್ ದೀದ್ ಆರಾದನೆ ಮಲ್ತೊಂತೆರ್ಡ ತುಡರ್ ದೀದ್,ಸುತ್ತೆ ದೀದ್ ಲ ಆರಾದನೆ ಮಲ್ತೊಂತೆರ್.ಹಿರಿಯಾಕ್ಲೆಗ್ ವರ್ಸೊಗೊರ ಅಗೆಲ್  ಪಾಡ್ದ್ ಕುಟುಮೊಗು ಸೆರ್ಸಾವುನ ಕೆರಮಲ ಇತ್ತ್ಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಒಂಜೆ ಕೋಣೆದುಲಯಿ ಪಂಜುರ್ಲಿನ ಬಲತ್ ಗ್ ಕುಲ್ಲಾದ್ ತಗೆ ತಂಗಡಿಯಾದ್ ಆರಾದನೆ ಮಲ್ಪುನೊಟ್ಟುಗು ರಾವು,ನಾಗೆ,ಪದಿನಾಜಿ ಸೇರ್ನ ಹಿರಿಯೆರ್,ಮುಡಿಪು ಇತ್ತ್ ದ್ ಮುಡಿಪುದ ಕುಟುಮೊಗು ಒಂಜಿ ಸೂತಕ ಇತ್ತ್ ದ್ ದೈವಾರಾದನೆ ಕುಟುಮೊನು ಒಂಜಿ ಸೂತ್ರದಡಿಟ್ ಗಟ್ಟಿ ಮಲ್ತ್ ದಿತ್ತ್ಂಡ್.ಇತ್ತಿತ್ತೆ ಕುಟುಮದ ಕಲ್ಲುರ್ಟಿ ಪಂಜುರ್ಲಿಗ್ ಪಿದಯಿ ಕಲ್ಲ್ ಪಾಡ್ದ್ ನಂಬುನ,ಬೇತೆ ಸಾನ ಕಟ್ಟ್ ದ್ ನಂಬುನ,ಸಾನೊಗು ಮುಗುಳಿ ದೀಪುನ ಕರಮ ಸುರಾತ್ಂಡ್. ಕೇರಳದ ಪ್ರಶ್ನೆ ಚಿಂತನೆದಕ್ಲೆನ ಪಾತೆರ ಕೇಂದ್ ಕಲ್ಲುರ್ಟಿ ಪಂಜುರ್ಲಿನ್ ರಡ್ರಡ್ಡ್ ಕೋಣೆಡ್ ಬೇತೆ ಬೇತೆನೆ ಕುಲ್ಲವುನ ಕೆರಮ ಸುರಾತ್ಂಡ್.ಪಿದಯಿ ಕಲ್ಲ್ ಪಾಡ್ದ್ ನಂಬುನಲಾ ಸಾನದ ಸಂಕಲ್ಪನೇ ಆಂಡ್.ಕೆಲವೊಂಜಿ ಕುಟುಮೊಡು ವರ್ಣಾರ ಪಂಜುರ್ಲಿ ಬತ್ತಿ ಬಿನ್ನೆಯಾಂಡ,ಕುಪ್ಪೆ ಪಂಜುರ್ಲಿ ಪ್ರದಾನ ಆದಿತ್ತ್ಂಡ ಅವುಲು ಕುಪ್ಪೆನ ಎಡತ ಮರ್ಗಿಲ್ ಡ್ ವರ್ಣಾರನ್ ಬೇತೆನೆ ಪಲಯಿಡ್ ದೀದ್ ನಂಬುವೆರ್. 

  ಕುಟುಮದ ಮುಡಿಪುನು ಕಲ್ಲುರ್ಟಿ ಪಂಜುರ್ಲಿನ ಅದೆಟೇ  ದೀವೊಂತೆರ್.ಇತ್ತೆ ಅವ್ವೇ ಅದೆಟ್ ಗೋಡೆ ಕೊರೆದ್ ಪಲಯಿಡ್ ಮುಡಿಪು ದೀಯೊಂದಿಪ್ಪುನವು ಆಯೊಗು ಮಲ್ಪುನ ಒಡಕ್.ಇಲ್ಲಗೊಂಜಿ ತಾರಾಯಿ ಕಟ್ಟ್ ನಗ,ಈಡ್ ಕಟ್ಟ್ ನಗ,ಓಮದ ಪುರ್ಸಾದ ಕಟ್ಟ್ ನಗ ಗೋಡೆಗ್ ನೆಲಕ್ ತಾಗಂದಿಲೆಕ ಕುಬಲ್ ಗ,ಅಟ್ಟದ ಅಡ್ಡೊಗ ಕಟ್ಟೊಂತೆರ್.ಅಂಚನೆ ಮುಡಿಪುನ್ಲ ನೆಲ ಬೊಕ್ಕ ಗೋಡೆಗ್ ತಾಗಂದಿಲೆಕ ದೀಯೊಡು.ಮುಡಿಪು ದೈವದ ಕೋಣೆಡ್ ದೀನವ್ಲು ಅಗೆಲ್ ಪಾಡ್ಂಡ ಅಸುದ್ದಾಪುಂಡುಂದು ದೈವದ ಮಣೆ ಮಂಚದೆದುರು ಅಗೆಲ್ ಪಾಡಂದೆ ಕೋಣೆದ ಪಿದಯಿ ಚಾವಡಿಡ್ ಬಲಸೊಂದುಲ್ಲೆರ್ ಉಂದು ತಪ್ಪು.ನಮ ಕಲ್ಲುನವ್ಲು ಒನಸ್ ಬಲಸಂದೆ ಓಲಾ ಪಿದಯಿ ನಂಕ್ ತೋಜುಲೆಕ ಬಲಸ್ಂಡ ನಮಕ್ ಉನೆರಾಪುಂಡೇ.ಅಂಚನೇ ಅತ್ತೆ ನಮ ನಂಬಿ ದೈವೊಲು.ದೈವೊಗು ಬಲಸುನ ಜಾಗೆ ಸುದ್ದಾಚಾರೊಡುಪ್ಪೊಡುಂದು ಅಟ್ಟ ಇಜ್ಜಂದಿ ಜಾಗೆಡ್ ಕುಬಲ್ ರ್ದ್ ಕಜವು ಬೂರಂದಿಲೆಕ ಅಟ್ಟದ ಬಾಗೊಗು ಬೊಲ್ದು ಕುಂಟು ಕಟ್ಟೊಂತೆರ್.ನಿಚ್ಚ ಗೋಡೆಗ್ ಕುತ್ತು ದೀಪ(ಕೋಲ್ತಿರಿ) ದೀಪುನೆನ್ ತಪ್ಪು ಪಂಡಿ ಪ್ರಶ್ನೆ ಚಿಂತನೆದಕುಲು ನಿತ್ಯ ತುಡರ್ ದೀಯೆರೆ ಪಂಡ್ ದ್ ಪೊತ್ತೊಂತಿ ನಿನೆನ್ ಎಲಿ ಮಾಡ್ ಗ್ ಕೊನೊದು ಇಲ್ಲ್,ಸಾನ ಪೊತ್ತ್ ನಲ ಉಂಡು.ನಿಚ್ಚ ಪೂನೀರ್ ದೀಯೊಡಾಯಿನ ದೈವೊಲೆಗ್ ಸಂಕ್ರಾಂತಿಗೊರ ಬಾಕಿಲ್ ದೆಪ್ಪುನ ಪರಿಸ್ತಿತಿಗ್ ತುಳುವೆರೆನ್ ಅಕುಲು ಕನತ್ ಪಾಡ್ಯೆರ್.

-ಪೂರಕ ಮಾಯಿತಿ-ಶಂಕರ ಕುಂಜತ್ತೂರು.ದೈವಾರಾದನೆ ಕ್ಷೇತ್ರ ಕಾರ್ಯದ ಅನುಭವಿಲು.

  

    ಇಂಚಲಾ ತುಳುನಾಡ್ ಡ್ ದೈವಾರಾದನೆ ನಡತೊಂದುಂಡು.

ತೆರಿದುಪ್ಪಡ್:-

ದೈವಾರಾದನೆ ದುಂಬುದ ಹಿರಿಯಾಕ್ಲೆ ಕಾಲೊಡು ಇಂಚನೇ ನಡಪೊಡುಂದು ಕೆರಮ ಇತ್ತ್ಂಡ್.ಅವ್ಲು ಜಾತಿದ ವರ್ಗೀಕರಣೊಡು ಪ್ರತಿಯೊರಿಯಗ್ಲ ಚಾಕಿರಿದ ಆರಾದನೆ ಇತ್ತ್ಂಡ್.ಅವ್ಲು ಪ್ರತಿಯೊಂಜಿ ಜಾತಿಗ್ಲ ಮಾನಾದಿಗೆ ಇತ್ತ್ಂಡ್.ಆಂಡ ಇಂಚಿನ ಚಾಕಿರಿ ಇಂಚಿನಾಯಗ್ಂದೇ ಇತ್ತ್ಂಡ್.ಅವು ಹಿರಿಯಾಕ್ಲ್ ಮಲ್ತಿ ಕಟ್ಟ್.ಇತ್ತೆದ ಪ್ರಜಾಪ್ರಬುತ್ವೊಡು ಮಾತಾ ಜಾತಿದಕ್ಲೆಗ್ ಒಂಜೇ ಮಾನಾದಿಗೆಂದ್ ನಮ ದೈವದ ಪದಿನಾಜಿ ಚಾಕಿರಿದಕ್ಲೆನ ಚಾಕಿರಿನ್ ಪೊಳಿತ್ಂಡ ಅವು ದೈವ ನುಡಿನ ಪರತ್ ನ್ ನಿಗಿಪಡ ಪೊಸತ್ ನ್ ತೋಡಡ ಪನ್ಪಿ ದೈವದ ನುಡಿಕ್ ಅಪಚಾರ ಮಲ್ತ್ ಲೆಕಾಪುಂಡು.ವೈದಿಕೆರ್ ದೈವದ ಕಲೊಕು ಬರ್ಪುನ ದುಂಬು ಶೂದ್ರ ದ್ರಾವಿಡ ತುಳುವೆರೆ ಅಕ್ಲೆಗ್ ತೆರಿಲೆಕ ದೈವದ ಚಾಕಿರಿ ಮಲ್ತೊಂತೆರ್.ಅಂಚನೆ ವೈದಿಕೆರ್ ಅಡೆ ಬತ್ತಿ ಬೊಕ್ಕ ದೈವ ಚಾಕಿರಿಗ್ ತಂತ್ರ ಭಾಗಂದ್ ಅಕುಲು ಚಾಕಿರಿಗ್ ಉಂತ್ಯೆರ್.ಏರೇರ್ ವಾ ವಾ ಚಾಕಿರಿನ್ ಮಲ್ಪೊಡುಂದು ಹಿರಿಯಾಕ್ಲ್ ಕಟ್ಟ್ ಕಟ್ಕೆ ಪಾಡ್ದ್ ಕೊರ್ಲೆಕ ದೈವಾರಾದನೆ ನಡತೊಂದು ಬತ್ತ್ಂಡ್.ವೈದಿಕ ಇಜ್ಜಂದೆಲಾ ಮೂಲ ಆರಾದನೆದೊರುಟು ಕೆಲವು ಕೋಡಿಡ್ ದಯವಾರಾದನೆ ನಡತೊಂದುಂಡು.ದೈವದ ಚಾವಡಿದ ಉಲಯಿ ವಸಾಯೊಗು ಉಂತುನಕುಲು ಪಿದಾಯಿಡ್ ವಸಾಯೊಗು ಉಂತೆರಿಜ್ಜಾಂಡ್.ಚಾವಡಿದ ಪಿದಾಯಿ ವಸಾಯೊಗು ಉಂತುನಕುಲು ಉಲಾಯಿ  ವಸಾಯೊಗು ಉಂತೆರಿಜ್ಜಾಂಡ್.ಇನಿ ಕೆಲವೆರ್ ಪಿದಾಯಿಡ್ ವಸಾಯೊಗು ಉಂತುನಕುಲು ಎಂಕ್ಲೆಗ್  ದಾನೆ ಉಲಾಯಿಗ್ ವಸಾಯೊಗುಂತೆರೆ ಬಲ್ಲಿಂದ್ ಆಡಳ್ತೆದಕ್ಲೆಡ ಲಡಾಯಿ ಮಲ್ಪುನಲ ಉಂಡು.ಹಿರಿಯಾಕ್ಲ್ ದಾಲ ಬುದ್ದಿ ದಾಂತೆ ಕಟ್ಲೆನ್ ಮಂತಿಪ್ಪಯೆರ್.

  

ಮಂತ್ರಜಾವದೆನ ಕೈಟ್ ಪಂಚ ಜೀಟಿಗೆ,ಕೋಲು ಜೀಟಿಗೆ

ಜಾತಿದ ಶ್ರೆಣೀಕೃತ ವ್ಯವಸ್ಥೆ ದೈವಾರಾದನೆಡ್ ತೋಜಿಂಡಲಾ ಮಾತೆರೆಗ್ಲ ದೈವದ ಕಲೊಟು ಮಾನಾದಿಗೆ ಇತ್ತ್ಂಡ್.ಏತ್ ಮಲ್ಲಾಯೆ ಆಂಡಲಾ ದೈವದ ಕೊಡಿಯಡಿಟ್ ಕಟ್ಟ್ ನಾಯನ ಜಾತಿ ತೂಪುಜೆ.ಆಯೆ ದೈವಂದೇ ಕೈಮುಗಿಪೆ ವಿನಃ ಮೂಲು ಕಟ್ಟ್ ನಾಯನ ಜಾತಿ ಪ್ರಾಮುಖ್ಯ ಆಪುಜಿ.ದೈವ ಪ್ರಾಮುಖ್ಯ ಆಪುಂಡು.ತಂತ್ರಬಾಗೊನು ಬೆರಣೆರೆ ಮಲ್ಪೊಡು.ಅರೆಗ್ ಚರ್ವ ಮಲ್ಪೆರಾಪುಜಿ.ಅವೆನ್ ಮೂಲ್ಯೆರೇ ಮಲ್ಪೊಡು.ಅಸ್ರೊಡೆನ್ ಬಂಡಾರಿಲೇ ಪತ್ತೊಡು.ಒಂಜಿ ಕಾಲೊಡು ನಮ ಪಣೊಲಿ ಪಾಡೊಂತ.ದೈವೊಗು ಒಲಿಮಡಲ ಅಸ್ರೊಡೆ ಮಲ್ತೊಂತೆರ್.ಕಾಲ ಕರಿಲೆಕ ನಮ ಕೊಡೆ ಪತ್ಯ,ದೈವೊಲೆಗ್ ಬೊಲ್ಗೊಡೆ ಬತ್ತ್ಂಡ್.ಬೆರಣೆರೆಗ್ ಬತ್ತ್ ದ್ ಅಗೆಲ್ ದ ಚಾಕಿರಿ ಮಲ್ಪೆರಾಪುಜಿ.ಜೀಟಿಗೆ ಪತ್ತುನ ಸಪಲ್ಯೆರ್,ನಾಯ್ಕೆರೆಗ್ ಚರ್ವ ಮಲ್ಪೆರಾಪುಜಿ.ಅಂಚಾದ್ ನಮ್ಮ ಪುರ್ವ ಹಿರಿಯಾಕುಲು ಮಲ್ತಿ ಕಟ್ಟ್ ನೇ ಒರಿತೊಂದು ಪೋಂಡ ಒಂಜಾತ್ ಕಾಲ ದೈವಾರಾದನೆ ಒರಿದ್ ಬರು.

ಮಂತ್ರಜಾವದೆ ಮಾನಿನ ಪಂಚಜೀಟಿಗೆದ ವಸಾಯ

ದೈವೊಲ್ನ ತುತ್ತೈತದ ರಂಗ್ ಬದಲ್ಂಡ್.ಓಡಮರಾಯ ದೈವ ತಿಂಗಳೆ ಗರಡಿ ಹೆಬ್ರಿ

  

  

ಕೇಪುಲ ರಂಗ್ ತುತ್ತೈತ,ಸೂರ್ಯ ಚಂದ್ರೆ ಮಯಕ

    ನಮ ಮಾತ ತರೆನೇ ತೂವೊಂದು ಪೋಯ.ಕಾರ ಮುದೆಲ್ ತೂಯ್ಜ.ನೆಲ ಮೂಲ ಸಂಸ್ಕೃತಿದ ಬೆನ್ನಿ ಮದತ.ಅರಸೊತ್ತಿಗೆಡ್ದೇ ತೂವೊಂದು ಬತ್ತ.ಕಾರ್ ದಂಟ್ ದ್ ಬೂರ್ನಗ ನೆಲತ ಬಿಲೆ ತೆರಿಂಡ್.ಬೂರ್ದು ಲಕ್ಕೊಂದು ಪರತೊಂದು ಉಂತ್ ನಗ ಕಾಲ ಕರಿದ್ ಪೋಂಡ್.ಮುಂಡಾಸ್ ದಾಯೆ ಆಯೆರೆ ಆಯಿಜಿ.ಮುಟ್ಟಲೆ ಪಾಡ್ರೆ ಮನಸ್ ಬತ್ತ್ ಜಿ

   

          ಮಲರಾಯ ದೈವ ಪಿಲಿಗುಂಡ ಕೂಟೇಲು

 ದೈವೊಗು ನೇಮ ಕಟ್ಟುನಕುಲು ಸರ್ರೊಗು ಬಲ್ಲ್ ಡ್ ಪದಿನಾಜಿ ಕಟ್ಟ ಪಾಡ್ದಿಪ್ಪುವೆರ್.ದೈವಾರಾದನೆಡ್ ಪದಿನಾಜೆಕ್ ಬಾರೀ ಮಾನಾದಿಗೆ ಉಂಡು.

 ದೈವದ ಕೊಡಿಯಡಿಟ್ ಏಳ್ಯ ಪ್ರಾಯದ(7ವರ್ಷದ ಬಾಲೆ)ಶಿಶುರ್ದು 70 ವರ್ಸ ಪರೆಬೆರ್ನಡೆಮುಟ್ಟ ಉಪ್ಪೊಡು.ಏಳ್ ವರ್ಸೊರ್ದು ಎಲ್ಲ,ಎಲ್ಪ ವರ್ಸೊರ್ದು ಮಲ್ಲಕುಲೆಗ್ ದೈವದ ಕೊಡಿಯಡಿಕ್ ಬತ್ತ್ ಜಿಂಡಲ ಮಾ ಪುಂಡು .ಕುಟುಮದಡೆಗ್ಲಾ ಈ ಪ್ರಾಯದ ಮಾನಾದಿಗೆ ಉಂಡು.

  

        ‌‌‌‌ತೋಕೂರುದ ಬಂಡಿ ಜೋಕಟ್ಟೆ

ಇನಿತ ದಿನಮಾನೊಲೆಡ್ ತುಳುನಾಡ ಬೆಮ್ಮೆರೆನ್ ಆದ್ಯಾತ್ಮ ಪರಬ್ರಹ್ಮ ಮಲ್ಪೆರೆ ಪೋದು ನಮ್ಮ ಜವನೆರೇ ಅಕ್ಲೆ ಸಂಸ್ಕೃತಿಗ್ ಕುಡರಿ ಪಾಡೊಂದುಲ್ಲೆರ್.ನನ ದೈವ,ನಾಗನ ಕೊಡಿಯಡಿಕ್ ಆದ್ಯಾತ್ಮ ಪೊಗ್ಗ್ಂಡ ದೈವೊಲ್ನ ಅಣಿ ಕಡ್ಸಲೆ,ಮುಗ ಮೂರ್ತಿ ಒವ್ಲಾ ಬೋಡಾವಂದ್.ಆತ್ಮ ಸಂಸ್ಕಾರ ಮಲ್ತ್ ದ್ ಅತ್ಮದುಲಯಿ ದೈವೊಲೆನ್ ನಂಬುನ ಕಾಲ ಬರು.ಬಳೆಯಾಪುನ,ಗಡಿಯಾಪುನ,ಮಾನೆಚ್ಚಿ,ನೇಮ,ಕೋಲ,ತಂಬಿಲ ಒವ್ಲ ಉಪ್ಪಂದ್.ಆದ್ಯಾತ್ಮದ ಆತ್ಮ ಪರಮಾತ್ಮನ ಸಮ್ಮಂದ ಗಟ್ಟಿಯಾದ್ ದೈವಾರಾದನೆ ತೆರಿಯಂದಿಲೆಕ ಮಯಕಾಪುನ ದಿನ ದೂರ ಇಜ್ಜಿ.ಅಂಚಾದ್ ಮೂಲ ದೈವಾರಾದನೆನ್ ಒರಿಪುನ ಜವಾಬ್ದಾರಿ ಪ್ರತಿಯೊರಿ ತುಳುವಗ್ಲಾ ಉಂಡು.

                       ಪಿಲಿ ಬೂತದ ಬಂಡಾರ

ಕಾವೇರಿ ತೀರ್ಥೊಡ್ ಮೀದ್ ಪರಿಶುದ್ಧರಾದ್ ತುಳುನಾಡ ದೈವೊಲು ಗರಡಿ, ಮಾಡ , ಸಾನ ಗುಂಡೊಲೆಡ್ ದೈವೊಲು ನಿಲೆಯಾತೆರ್ಂದ್ ಪಾಡ್ದನೊಲೆಡ್ ಉಲ್ಲೇಖ ಉಂಡು.

ಕೋಟಿ ಚೆನ್ನಯೆರ್ ತನ್ಕುಲು ಕರಿ ಬೊಕ್ಕ ಬಡಕಾಯಿ ಗಂಗೆಗ್ ಬತ್ತ್ ದ್ ಅಲ್ಪ ಪರಿಶುದ್ಧರಾತಿಜೆರ್ ಗೆ. ಕಡೆಕ್ ತಲಕಾವೇರಿಗ್ ಪೋದು ಪರಿಶುದ್ಧ ರಾದ್ ಗರಡಿಲೆಡ್ ನೆಲೆಯಾಯೆರ್ ಗೆ

ಪುತ್ತೂರು ಮಹಾಲಿಂಗೇಸರ ದೇವೆರ್ನ ಮುಖ್ಯ ಪ್ರದಾನಿ ಏಳ್ನಾಡ್ ಪಿಲಿ ಬೂತ

    ದೈವ ಬೊಕ್ಕ ಸಂಸಾರದ ನಡುಟು ದೈವದ ಬಾಷೆದ ಇಚಾರೊನು ಅರ್ಥ ಮಲ್ಪಾಯೆರೆ ಪ್ರಾಮಾಣಿಕವಾಯಿನ ಮದ್ಯಸ್ಥೆರ್ ಬೋಡು.ಮಣೆ ಮಂಚವುದ ದೈವೊಗು ಮದಿಪುನಾರೆಗ್ ಮರತ ಒಂಜಿ ಪೀಠ ಇತ್ತ್ಂಡ ಎಡ್ಡೆ.ದೈವದ ಕಲೊಕು ಮದ್ಯಸ್ಥೆರ್ ಬತ್ತೆರ್ಡ 4 ಕಂಬದ,16ಕೋಲುದ ಆಯದುಲಯಿ ಆರ್ ಉಪ್ಪೊಡು ವಿನಃ ತಿಕ್ ನೌಲು ಪೋಯೆರೆ ಬಲ್ಲಿ.ಅಂಚನೆ ಆರ್ ಪೋಯಿನ ಕುಟುಮದೌಲು ಮದಿಪುನಗ ತನ್ನ ಕುಟುಂಬನೇ ಪಂಡ್ ದೆನ್ನಿದ್ ಮದಿಪೊಡು.ಅಪಗ ಅರೆಗ್ ಸಂಸಾರೊಗು ನ್ಯಾಯ ದೆತ್ತ್ ಕೊರ್ರೆ ಸಾದ್ಯ ಆಪುಂಡು.ಒಂಜಿ ಕುಟುಮೊಡು 5 ದೈವೊಲಿತ್ತಡ ಬಾಲೊಲಿದಡಿಟ್ ಸುರುತ ದೈವದ  ನೇಮ ಆಪುನ ದುಂಬು ಬ್ರಹ್ಮಕುಲ,ಗುತ್ತು ಮಡಸ್ತಾನೊಗು ಪುರ್ಪ ತಾರಾಯಿ ಕೊರಿ ಬೊಕ್ಕ ಅವೆರ್ದ್ ಬೊಕ್ಕ ನಡಪುನ ದೈವೊಲೆ ನೇಮೊಡು ದೈವ ಮಿತ್ತ್ ಪನ್ನಕುಲೆಗ್ ಮಾನಾದಿಗೆ ಸಂದ್ ದ್ಂಡ ಕೇಂಡ ನಿನ್ನ ಕೊಡಿಯಡಿಟೇ ಸಂದ್ ದ್ಂಡ್ ಪನ್ಪುನ ಮದಿಪುದ ಮದ್ಯಸ್ಥೆರ್ ಬೋಡು.ಕುಟುಮದ ನ್ಯಾಯ ತೀರ್ಮಾನ ಮಂತಿ ದೈವ ಕುಟುಮ ಸಂಸಾರೊನು ಒತ್ತಟ್ಟ್ ಡ್ ಉಂತಾದ್ ಪೇರ್ ಪರ್ಪುನ ದುಂಬು ಮದಿಪುದಾರೆಗ್ ಒಂಜಾ,ರಡ್ಡಾ ತಾರಾಯಿದ ಮಾನಾದಿಗೆ ಕೊರ್ಪುಂಡು.

   ಜುಮಾದಿನ  ಮುದಲೆದ ಬಂಡಿ ತೋಕೂರು ಜೋಕಟ್ಟೆ

ಮೂಲು ಮಾತ್ರ ಜುಮಾದಿಗ್ ಈ ಬಂಡಿ ತೂಯೆರೆ ತಿಕ್ಕುನಿ.

ದುಂಬುದಕುಲು ಮಣೆ ಮಂಚದ ದೈವಂದೇ ಪನೊಂತೆರ್ ವಿನಃ ಮುಗ ಮೂರ್ತಿದ ದೈವಂದ್ ಪನೊಂದಿಜ್ಜಾಂಡ್.ಅಂಚನೇ ದೈವೊಲೆಗ್ ಕಲ್ಲ ಮುಂಡಿಗೆಡೇ ಸ್ಥಾನ ಇತ್ತ್ ನಿ.ಕಷ್ಟ ಬನ್ನಗ ಮಣೆ ಮಂಚೊಡಿತ್ತಿ ದೈವೊಲೆಗ್ಲ ತೋಜಂದೆ ಪೋಂಡಾಂದ್ ಕಣನೀರ್ ಪಾಡೊಂತೆರ್.

    

ದುಂಬು ತನ್ಕುಲೆ ಜಾಗೆಡ್ ಏರಾಂಡಲ ಕಂಡುವೆರ್ ಪಂಡ್ ದ್ ದೈವದ ಪುದರ್ಡ್ ಕೊಡಿ ಕಟ್ಟೊಂತೆರ್.ಅಂಚ ಕಟ್ಟ್ಂಡ ಊರ್ದಕ್ಲೆಗ್ ತೆರಿಪಾವೊಡಿತ್ತ್ಂಡ್.ಗಟ್ಟದ ಮಿತ್ತಂಡ ಚಾವುಂಡಿ ಬುಡೊಂತೆರ್.ಆಂಡ ಇತ್ತೆ ಸುಲಬ ಸಾದಿ ನಾಡ್ದ್ ಇಂಚ ಬರೆಯಿ ಪರದೆ(ಬೇನರ್) ಕಟ್ಟೊಂದುಲ್ಲೆರ್.

  

ಆಡಂಬರದಾಂತಿ ಹಿರಿಯಾಕ್ಲೆ ಕಾಲೊರ್ದಿಂಚಿ ದೀವೊಂತ್ ನ ಪಂಜುರ್ಲಿ ದೈವದ ಬಂಡಾರ.ಕುಂಬ್ಳೆ ಸೀಮೆದ ಪೆರ್ಮೆ ಉಂದು.ಮೂಜಿ ಕೋಂಟುದ ಮುಕ್ಕಾಲಿಗೆದ ಬಲಿತ ತಿರ್ತ್ ಕೊಡಿ ಬಾರೆದಿರೆತ ಮಿತ್ತ್ ಮಣಿ ಕಡ್ಸಲೆದ ಭಂಡಾರ ದೀದ್ ಪನಿಯಾರ ಬಲಸುವೆರ್. ಜಾಗೆ-ಪಯ್ಯೊಳಿಗೆ/ಪೈವಳಿಕೆ

  

110 ವರ್ಸ ದುಂಬುದ ಪರ್ಸಿನಡವುದ ಮುತ್ತಪ್ಪನ್-ತಿರುವಪ್ಪನ್ ದೈವದ ತುತ್ತೈತ

ಪೂಮಾನಿ ಕಿನ್ನಿಮಾನಿ ದೈವೊಲು ತಲಕಾವೇರಿಡ್ ಉಂಡಾಯೆರ್ಂದ್ ಒಂಜಿ ಕತೆ ಪನ್ಪುಂಡು. ಅಕುಲು ಸುಬ್ರಹ್ಮಣ್ಯೊಗು ಬತ್ತಿನ ಪ್ರಕಾರ ಘಟ್ಟೊಡು ಪಂಡ ತಲಕಾವೇರಿಡ್ ಪುಟ್ಟು ದು ಬಿಸಲೆ ಘಾಟಿದ ಮಾರ್ಗ ಡ್ ಬತ್ತ್ ದಿಪ್ಪುವೆರ್.

  

ದೈವ ಚಾಕಿರಿದಕ್ಲೆಗ್ ದೈವೊರ್ದು ಮಿತ್ತ್ ಪದ್ದೆಯಿದ ತೂಪರಿಕೆಯಾಂಡ್.

ಬೈಕಾಡ್ದಿ,ಚಿಕ್ಕುನ ಹೊಗಳಿಕೆಡ್  ತಲಕಾವೇರಿದ ಪುದರ್ ಬರ್ಪುಂಡು.ಪರಿಶುದ್ದ ಸೀರ್ತ ಕಾಯೆರಿ ಸೀರ್ತಮಿಪುನ ಕಾವೊರಿ ಸಂಕ್ರಾಂತಿ.

ಉದ್ಯಾವರ ಮಾಡ ಅರಸು ದೈವೊಂಗುಲೆ ಸಾನೊಡು ಕೊಡಿ ಏರ್ದ್ ನಿ.

ಗಡಿ ಪತ್ತ್ ನಾಯೆ ಮಾನೆಚ್ಚಿದ ಚಾಕಿರಿ ಮಲ್ಪುವೆ.ವಸಾಯ ಉಂಡು.

ಮಾನಿ,ಮುಕ್ಕಾಲ್ದಿ ದೈವದ ಚಾಕಿರಿ ಮಲ್ಪುವೆ.ವಸಾಯ ಉಂಡು.

ಗುಂಡಡ್ದ್,ಇಲ್ಲರ್ದ್ ಪಿದಯಿಗ್ ಗಡಿ ಪತ್ತ್ ನಾಯೆ,ಮಾನಿ  ದೈವೊನು ಕನಪುನಿ.

         ಉದ್ಯಾವರ ಮಾಡ ಅರಸು ದೈವೊಂಗುಲು

ಬಡಕಾಯಿ ಗಂಗೆ-ಗಂಗಾವತಿ ತುದೆ,ಗಂಗೊಳ್ಳಿ.

ಗಂಗೆಂದ್ ಪನ್ನಗ ಗಂಗಾ ತುದೆ.

ಪೆರಿಯ ಪಂಡ ಮಲ್ಲ.

ಗಂಗೆ ಪಂಡ ಜಲಮೂಲ,ಗಂಗಾತುದೆಂದ್ ಲ ಪನೊಲಿ.

ಗಂಗೆಲ ಬಾರೀ ಪೆರಿಯ/ಮಲ್ಲ ತುದೆ

ಪೆರಿಯ ಬಡಕಾಯಿ ಗಂಗೆ-ಉಬಾರ್ಂದ್ ಲ ಪನ್ಪೆರ್

ಕೊಡಿಮರತ ಕನ್ನಡಿದೆದುರು ಉದ್ಯಾವರ ಮಾಡದ ಅರಸು ದೈವೊಲು

ಏರೇ ಕಟ್ಟುನಕುಲಾವಡ್,ಮದ್ಯಸ್ಥೆರಾವಡ್,ದರ್ಶನದಕ್ ಲಾವಡ್ ಅಕ್ಲೆ ಕ್ಷೇತ್ರದ ಕ್ರಮೊನು ನನೊಂಜಿ ಕ್ಷೇತ್ರೊಗು ಮಲ್ಪುನವು ತಪ್ಪು.ಅ ಕ್ಷೇತ್ರೊಡು ಅಕ್ಲೆ ಪೂರ್ವ ಹಿರಿಯಾಕ್ಲು ನಡಪಾವೊಂದು ಬತ್ತಿ ಕಟ್ಟ್ ನ್ ನಿಕುಲು ಪೊಲಿಪಡೆ

    

                            ಕಾರ ಪಾಳೆ-ಕಾರ ಗಗ್ಗರ

ದೈವೊಲೆನ ಪದ್ದೆಯಿಲು:-

ಗುಂಡು ಸರ

ಪೂ ಸರ

ಪಾವೊಲಿ ಸರ

ಕೊತ್ತಂಬರಿ ಸರ

ಬಜಿಲ್ ಸರ

ಮೀನ್ ಸರ

ಎಕ್ಕಮಾಲೆ ಸರ

  

ಪೇರ್ ಪರಿ ಚಾವಡಿಗ್ ಅಕ್ರಂದ ಅರಿ‌ ಪಾಡುವ ರುಂದನ ಕಟ್ಟೆಗ್ ಎಂಕ್ಲೆ ಸುರಿಯದ ಕೊಡಿಟ್ ಗೋರುದು ಅತಿಕಾರ ಬಿದೆನ್ ಪಾಡುವ. ಪಾದೆಗ್ ಬೂರಿನ ಬಿತ್ತಾಂಡಲ ಕೊಡಿಪುಗು ಒಂಜಿ ಕೊರತೆ ಬರಂದಿಲೆಕ ಕೈಸಂಗ್ ಪಾಡುವ. ಬುಲೆ ಹೆಚ್ಚಾವ ಪೊಲಿ ನಲಿಪಾವ ಎಂಕ್ಲೆ ಧರ್ಮ ಚಾವಡಿಡ್ ಧರ್ಮಗೊಂಜಿ ಕೊರತೆ ನೀರುಗೊಂಜಿ ಬರಂದಿಲರಕ ಕಾತೊಂದು ಬರ್ಪ. ಉಂದು ಬೆರ್ಮೆರ್ ಬೈದೆರ್ಲು ಪೇರ್ ಪರ್ದ್ ಚಾವಡಿ ಜತ್ತುದು ತುಳಸಿ ಕಟ್ಟೆಗ್ ಸುರಿಯದ ಮೊನೆಟ್ ಬಾರ್ ಪಾಡ್ನಗ ಪನ್ಪಿನ‌ ನುಡಿ.

    ನೇಮ ಕೋಲ ಕಟ್ಟುನಕ್ಲೆ ನಾಲಿಡ್ ದೈವದ ಪದಕ

     " ಗ್ರಾಮ ದೈವ ಗುರ್ತ ಮಲ್ತಿನ ಗುರಿಕಾರನಕ್ ಲ್ ಒಂಜಿ ಊರುಡು ಇತ್ತೆರ್ಡ, ಆ ಊರುಡು ವಾ ಪ್ರಶ್ನೆ ದೀಪುನ ಅಗತ್ಯ ಇಜ್ಜಿ.  ಎಂಚಿನ ಇತ್ತ್ಂಡಲ ಅಕ್ಲೆನ ಮದ್ಯಸ್ತಿಕೆಡ್ ತೀರ್ಮಾನ ಆಪುನಿ.ಅಪಗ ಮದ್ಯಸ್ತೆರ್ ಅಗತ್ಯ ಇಜ್ಜಿ".

ಬಂಟ ದೈವ ಪೇರ್ ಪರ್ದ್ ಬಾಯಿ ಬುಡ್ತಿನ ಜಾಗ್-

ಮಂಜಲ್ ಕಟ್ಟೆ ಕಾವೂರು.

ಕನಪಡಿದ ಪೇರ್ ಕೊರ್ತಿನಿ ಪಂಜಿ ಮುಗೇರ್ ಕಾವೂರು

     

                     ಹೊಸಳಿಗಮ್ಮ,ಕುಕ್ಕೆ ದೇಲ್ಯೊಡು

ಕುಟುಂಬದ ದೈವೊಲೆಗ್ ಸೈಟ್ ದ ಜಾಗೆ, ಟೆರೆಸ್ ದ ಇಲ್ಲ್,ಬೋರ್ ದ ನೀರ್ ,ಕರ್ಬದ ಮಾಡ್, ಕ್ಯಾಟರಿಂಗ್ ಅಡಿಗೆ, ಕೋಲಡ್ ಕುಲೆ ಬುಡ್ಪಾವುನೆ ಕುಡ ಸುದರ್ಶನ ಹೋಮಡ್ ಕುಲೆ ಬುಡ್ಪಾವುನೆ..ಇಂಚ ಪೂರಾ ಆವೊಂದುಂಡು.ಮೂಲು ಜೋಯಿಸೆರ್, ಶಿಲ್ಪಿಲು, ವೈದಿಕೆರ್ ಮನಿಪುಜೆರ್.

ಸರಳ ಸಂಪ್ರದಾಯದ ಸರಿಯಾಯಿನ ಪ್ರಾದೇಶಿಕ ಕ್ರಮ ಪನ್ಪುಜೆರ್.ಇತ್ತಿ ಹಿರಿಯೆರೆನ್ ಗೆನ್ಪುಜೆರ್.

ಮಾತೆರೆಗ್ ಲಾ ಮಣೆ ಮಂಚಡ್ ಮೊಗ ಆಯುಧ ತೋಜೊಡು.ಮಣಿ ಕೂಜಿ ಯಾವುಜಿ.

ಪೂರಾ ಆದ್ ತತ್ತ್ ಂಡ ದೋಷ ತೋಜಿಂಡ ಪಿರ ಪ್ರಶ್ನೆ.. ನವೀಕರಣ..

ಕುಟುಂಬದ ಬಡಪತ್ತ್ ದಾಯಗ್ ವಂತಿಗೆದ ಪುದೆ

 

ದೈವದ ಅಣಿತ ಪಿರವುದ ಕೆಪುಲ ರಂಗ್ ದ ಕುಂಟು ಮಯಕಾದ್ ಗುಲಾಬಿ ರಂಗ್ ಬೈದ್ಂಡ್

ಊರುಗೊಂಜಿ ಬಾಸೆ ದೇಸೊಗೊಂಜಿ ಕಟ್ಟ್ಂದ್ ಉಂಡು.ಆಂಡ ದೈವದ ಕಟ್ಟ್ ಬೇತೆನೇ ಉಂಡು.ಅಂಚಾದ್ ದೈವ ಪರತ್ ನ್ ನಿಗಿಪಡ ಪೊಸತ್ ನ್ ತೋಡಡಂದ್ ಪಂತ್ಂಡ್.ನಮಕ್ ಪೊಸ ಕಟ್ಟ್ ಮಲ್ಪುನ ಅಧಿಕಾರ ಇಜ್ಜಿಂದ್ ದೈವನೇ ತೆರಿಪಾದ್ಂಡ್.ದೈವ ಪಂಡಿನ ಅನಾದಿದ ಸಾಂಪ್ರದಾಯಿಕ ಮೂಲ ಕಟ್ಟ್ ನ್ ಪೊಳಿಪಂದೆ ನಡಪಾವೊಂದು ಪೋವೊಡು .ದೈವ ಓಡೆ ಪೋಂಡಲ ಅವ್ವೇ ದೈವ,ಅವ್ವೇ ಮೂಲದ ಒಂಜೇ ಕಟ್ಟ್ .ನಮ ಮಾತ ನಮ ಕೊಸಿ ಬತ್ತ್ ಲೆಕ ಕಾಲ ಕಾಲೊಗು ಕಟ್ಟ್ ಲೆನ್ ಪಗತೊಂದು ಪೋಯಿನೆಡ್ದಾದ್ ದೈವದ ಕಲೆ ಕಾರ್ನಿಕ ನೆಗತ್ ಬರ್ಪುನಲ ಕಮ್ಮಿಯಾಂಡ್.ಅಯಿಕ್ ಕಾರಣ ನಮನೇ ಆದುಲ್ಲ.ನಮ್ಮ ದೈವೊಲೆಗ್ ನಮನೇ ಅಪಚಾರ ಮಲ್ತ್ ದ್ ಕಲೆ ಕಾರ್ನಿಕೊನು ದೆಂಗಾವುಲೆಕ ಮಲ್ತಿ ದೋಷಲ ನಮ್ಮ ತರೆಕೇ ಬೂರ್ದ್ಂಡ್.ಅಂಚನೆ ಕಟ್ಟ್ ಪೊಲ್ತ್ ನಾಯನ್ ನಮ ಪ್ರಶ್ನೆ ಮಲ್ಪುಲೆಕಲಾ ಇಜ್ಜಿ.

  

ಅಂಚಾಂದ್ ದೈವದ ಮೂಲ ಕಟ್ಲೆಡ್ ಬರ್ಪುನ  ಅರದಲದ ಬದಲ್ ಮೋನೆಗ್ ತಿಕ್ ನ ರಂಗ್ ಪಾಡೆರೆ ಆಪುಂಡೇ?.

ಗಗ್ಗರದ ಬದಲ್ ಕಾರ್ ಗ್ ಗೆಜ್ಜೆ ಪಾಡೆರೆ ಆಪುಂಡೇ?

ತಾರೆದ ಒಲಿತ ಬದಲ್ ಕಂಗ್ ದ ಸೋಗೆ ಸೊಂಟೊಗು ಕಟ್ಟೆರೆ ಆಪುಂಡೆ?

ಪಾಳೆದ ಅಣಿ ಪೋದು ಇನಿ ಫೈಬರ್,ಪ್ಲೈವುಡ್ ದ ಅಣಿ ಬೈದ್ಂಡ್.

ಜೀಟಿಗೆ ಪತ್ತುನ ದೈವೊಗು ಸೂಟೆ ಪತ್ತೆರೆ ಆಪುಂಡೆ?

ಅಮುರ್ತ ದೀಪುನ ದೈವೊಗು ಗಂಗಸರ ದೀಯೆರೆ ಆಪುಂಡೇ?,

ಕೋರಿ ಕುತ್ತಾಬಾರ ಮಲ್ಪುನ ದೈವೊಗು ಕುಂಬುಡ ಕಡ್ಪೆರೆ ಆಪುಂಡೆ?

ಪೊರಿ ಬಜಿಲ್,ಬೆಲ್ಲ ತಾರಾಯಿ,ಪಂರ್ದ್ ಪಂಚಾವಾರದ. ದೈವೊಲೆಗ್ ಬೇತೆ ದಾದಾಂಡಲ ಆವಾರ ಕೊರ್ಂಡ ಆಪುಂಡೇ?

ಕೇಪುಲು ರಂಗ್ ದ ತುತ್ತೈತದ ದೈವೊಗು ಬೇತೆ ರಂಗ್ ದ ತುತ್ತೈತ ತುತ್ತೆರೆ ಆಪುಂಡೇ?.

ಬಂಡಿದ ಮಿತ್ತ್ ಕುಲ್ಲುನ ದೈವೊನು ತೇರ್ ಡ್ ಕುಲ್ಲಯೆರೆ ಆಪುಂಡೇ?

ದೈವದ ಬಲಿ ಚರ್ವೊಗು ಪಾಡುನ ನುಪ್ಪು,,ಅರಿ ಕಡೆದ್ ಮಲ್ತಿ ಚಪ್ಪೆ ಅಡ್ಯೆ,ಪಂರ್ದ್, ಬಚ್ಚಿರೆ ಬಜ್ಜೆಯಿ,ಪಿಂಗಾರದ ಬದಲ್ ಬೇತೆ ದಾದಾಂಡಲ ಬಲಿಕ್ ಬಲಸೆರೆ ಆಪುಂಡೇ?

ಬಲಿಕ್ ಕುತ್ತುನ ಬಲಿಕುತ್ತುದ ತುಡರ್ ದ ಬದಲ್ ಅವೆಕ್ ಬಣ್ಣ ಬಣ್ಣದ ಬಲ್ಬ್ ಪಾಡೆರೆ ಆಪುಂಡೇ?

ದೈವದ ಬಂಡಾರ,ಕಿರ್ವಾಲ್ ಬರ್ಪುನ ಸಾದಿಡ್ ದರಿ ಚೋರ್ನ ಪಾಡುನ ಬದಲ್ ಶಾಮಿಯಾನ ಪಾಡೆರೆ ಆಪುಂಡೇ?

ಇಂಚ ಪನೊಂದು ಪೋಂಡ ಬೋಡಾಯ್ನಾತ್ ಉಂಡು.

ದೇಸಗೊಂಜಿ ಬಾಸೆ,ಊರುಗೊಂಜಿ ಕಟ್ಟಾಂಡಲ ದೈವೊಗೊಂಜಿ ಇತ್ತಿ ಮೂಲ ಸಾಂಪ್ರದಾಯಿಕ ಕಟ್ಲೆನ್ ಪೊಲಿತ್ ದ್ ಒಂಜಾತ್ ವರ್ಸದ ಪಿರವು ಕೆಲವೊಂಜಿ ಕಟ್ಲೆನ್ ಬದಲ್ತ್ಂಡ ದೈವದ ಮೂಲ ಕಟ್ಟ್ ನ್ ಒರಿತೊನುನ ಜಬದಾರಿಕೆ ನಮ ಮಾತ ತುಳುವೆರೆಗುಂಡು

  

   

ಬರವುದ ಕೊಂಡಿಲು-

https://kmahendranath.blogspot.com/2014/05/blog-post_18.html

https://kmahendranath.blogspot.com/2018/07/daivaradhane-nadath-bathi-saadi_12.html

https://kmahendranath.blogspot.com/2016/04/thulunada-daivaradhaneg-vaidiker.html

https://kmahendranath.blogspot.com/2018/12/pudar-badalna-tulunada-daivolu.html

https://kmahendranath.blogspot.com/2020/02/daiva-jumadi-kannada-samskritada.html

https://kmahendranath.blogspot.com/2020/01/daiva-malaraye-devi-varahi-malarayiyath.hhtml

https://kmahendranath.blogspot.com/2019/12/daiva-ullaldi-devi-durgaparameshwariyatt.html