ಊರ್ದ ತೆಕ್ಕರೆ -oorda tekkare
Tuesday 8 November 2011
Monday 7 November 2011
ಕಂಬೆರ್ಲು -kamberlu
ಕಂಬೆರ್ಲು -ಸತ್ಯ ಸಾರಮಾನಿಲು-ಕಾನದ ಕಟದೆರ್
ಬೆಮ್ಮೆರ್ ಕಂಬೆರ್ಲು
ಕಾನದ ಕಟದೆರೆನ್ ಸತ್ಯಸಾರಮಾನಿಲು, ಕಂಬೆರ್ಲುಂದು ಪನ್ಪೆರ್ . ಮನ್ಸ ಜನಾಂಗದಕ್ಲೆಗ್ ಕುಲ ದೇವೆರಾದ್,ಕುಲ ದೈವಲ ಆದ್ ಒಲಿದ್ ಬೈದ್ ನ ಸತ್ಯ. ಪದಿನಾಜಿ ಬರಿತ ಕುಲ ದೈವ ಆದ್ ಮೆರೆಯಿನ ಅಪ್ಪೆ ಬೊಲ್ಲೆನ ಜೋಕುಲು ತುಳುನಾಡ ಸಾರಮಾನಿ ಸತ್ಯೊಲಾಯಿನ ಕಾನದ ಕಟದೆರ್. ಸಮಾಜದ ಶೋಷಣೆದ ವಿರುದ್ಧ ಸುರುಕು ಸೊರ ಲಕ್ಕಯಿನ ವೀರೆರ್ ಕಾನದ ಕಟದೆರ್.
ಮಾಣಿಕ್ಯೊದ ಕಲ್ಲ್ ನ್ ಉಡೆತ್ ದ್ ಉದಿಯ ಬೆಂದಿನ ಮಾಯೆದ ಈ ಸತ್ಯೊಲೆಗ್ ಸುರೂತ ಪೂಜೆ .ಸುರೂತ ಹಕ್ಕ್ ಅವು ಕಂಬೆರ್ಲೆಗ್ . ಕಲ್ಲ್ ದಾಂತಿ ಕಲಟ್ ,ಕಲೆ ನಿಲೆಟ್ ಮೆರೆಯೊಂದು ಸಂತಾನ ಭಾಗ್ಯೊನು ಒದಗಾದ್ ಕೊರ್ಪುನ ಸತ್ಯೋಲು. ಗೊಲಂಬುರ ದಂಟ್ ಡ್ ಪಾದೆನ್ ಪುಡತ್ ದ್ ತೀರ್ಥ ದೆಯ್ದ್ ನ ಮೊಕುಲು ಸಾರಮುಪ್ಪನ್ನೆರ್ .
ಕಂಬೆರ್ಲೆನ ಕಲ ಪಡ್ಡಾಯಿ ಬೊಲ್ಲೆ(ಪಡುಬೆಳ್ಳೆ)ಒಡಿಪು ಜಿಲ್ಲೆ
ಬೆಮ್ಮೆರೆ ಆರಾಧನೆ ಕಂಬೆರ್ಲೆನ ಕಲೊಟ್ಲ ನಡಪುಂಡು .ಅಲೇರ ಪಂಜುರ್ಲಿನ ಆರಾದನೆ ಸತ್ಯಸಾರಮಾನಿಲೆನೊಟ್ಟುಗು ಉಪ್ಪುಂಡು. ಕಂಬೆರ್ಲು ಮೂಲದ ಸತ್ಯೊಲಾಂಡಲ ಬೆಮ್ಮೆರೆ ಆರಾಧನೆ ಒಂತೆ ಎತ್ತೇಸೊ ಉಪ್ಪುಂಡು . ಬೆಮ್ಮೆರ್ ಇಪ್ಪುನಲ್ಪ ಕಂಬೆರ್ಲೆ ಕಲ ಇತ್ತ್ಂಡಲ ಅವ್ಲು ಕಂಬೆರ್ಲೆಗ್ ಬೇತೆನೇ ಆರಾಧನೆ . ಬೆಮ್ಮೆರೆಗ್ ಬೇತೆನೆ ಆರಾದನೆ .
ಮನ್ಸ ಜನಾಂಗೊಡು ಕಂಬೆರ್ಲೆಗ್ ಬೆಮ್ಮೆರೆ ಮಾನಾದಿಗೆ ಉಂಡು . ಕಂಬೆರ್ಲೆಗ್ ಮುಗ, ಮೂರ್ತಿ ,ಪಾಪೆ ಇಜ್ಜಿ. ಕಾಲಿ ಆಯುಧ ಮಾತ್ರ . ಬೆಮ್ಮೆರೆ ಕಂಬೆರ್ಲು ಪಂಡ್ ದ್ ಕೆಲವೆರ್ನ ಅಭಿಪ್ರಾಯ. ಬಬ್ಬುನ ಕಲೊಟು ಹೆಚ್ಚಾದ್ ಕಂಬೆರ್ಲೆಗ್ ಆರಾಧನೆ ಉಪ್ಪುಂಡು. ಬಬ್ಬು ಮುಂಡಾಲ ಜನಾಂಗದಾಯೆ .ಕೆಲವು ಗುತ್ತು ಬರ್ಕೆಲೆಡ್ ಬಬ್ಬುನ ಕೊಟ್ಯ ಇತ್ತ್ ದ್ ಮುಂಂಡಾಲೆರ್ ಬಬ್ಬುನ ಚಾಕಿರಿಗುಂತುವೆರ್.
ಒಡಿಪು ಕುಡ್ಲದ ಕಡಲ ಬರಿಟ್ ಮುಂಡಾಲ ಜನಾಂಗ ಹೆಚ್ಚಾದಿತ್ತ್ ದ್ ಅಕ್ಲೆಗ್ ಗುರು ಇತ್ತ್ ಲೆಕ ಬಬ್ಬು ಉಪ್ಪುವೆ . ಬಬ್ಬುಗು ಉಂತುನಾರೆ ಕಂಬೆರ್ಲೆಗ್ಲ ಮಾನೆಚ್ಚಿಲ್ಗ್ ಉಂತುನಿ . ಕಂಬೆರ್ಲೆಗ್ ಮುಗ ಮೂರ್ತಿ ಇಜ್ಜಂದಿಲೆಕನೆ ಬೆಮ್ಮೆರೆಗ್ಲಾ ಮುುಗ ಮೂರ್ತಿ ಇಜ್ಜಿ .
ಆಂಡ ಒಂಜಿ ಬಾರೆದ ಬಂಬೆದ ಗುಂಡ ಕಟ್ಟ್ ದ್ ಬೆಮ್ಮೆರೆ ಆರಾಧನೆ ನಡತೊಂತ್ಂಡ್ . ಇನಿಕ್ಲಾ ಮುಗೇರ ಸತ್ಯೊಲೆನ ನೇಮೊಡು ಬಾರೆದ ಬಂಬೆದ ಸುತ್ಯೆ ದೀದ್ ಬೆಮ್ಮೆರೆನ್ ನಾಟಾವುನ ಬಾರೀ ಪೊರ್ಲುದ ಆರಾಧನೆ ಉಂಡು.
ಇನಿ ಸರಿಯಾಯಿನ ಬೆಮ್ಮೆರೆ ಆರಾಧನೆ ಒರಿದ್ ನಿ ಮುಗೇರ ಸತ್ಯೊಲೆನ ನೇಮೊಡು,ಸತ್ಯಸಾರಮಾನಿಲ್ನ ಕಲೊಟು ಮಾತ್ರ . ರಡ್ಡ್ ಸತ್ಯೊಲೆನ್ ಒಂಜೇ ಕಲೊಟು ರಡ್ಡ್ ಪುದರ್ಡ್ ಲೆತ್ತ್ ದ್ ಆರಾಧನೆ ಮಲ್ಪುನೆಕ್ ಉಂದೊಂಜಿ ಎಡ್ಡೆ ಉದಾರ್ಮೆ.ಸತ್ಯ ಮುಪ್ಪನ್ನಾರ್,/ಕಂಬೆರ್ಲು.
ಬೆಮ್ಮೆರೆನ್ಲಾ ಬೇತೆ ಬೇತೆ ಪುದರ್ಡ್ ಆರಾಧನೆ ಮಲ್ಪುವೆರ್ . ಕೆಲವು ಗರಡಿಲೆಡ್ ಉರಿ ಬೆಮ್ಮೆರ್ ಇತ್ತ್ಂಡ ಕೆಲವು ತಿಕ್ ಡ್ ಉದಿಪನ ಜಲ ಬೆಮ್ಮೆರ್ಂದ್ ,ಕೆಲವು ಕಡೆಟ್ ಜಯವುಳ್ಳ ಲಕ್ಕಣ್ಣ ಬೆಮ್ಮೆರ್ಂದ್ ,ಕೆಲವು ತಿಕ್ಡ್ ಕೆಮ್ಮಲೆತ ಬೆಮ್ಮೆರ್ಂದ್ ಪನ್ಪೆರ್.
ಕೆಲವೆರೆ ಅಭಿಪ್ರಾಯ ಪ್ರಕಾರ ಆದಿಡ್ ಬತ್ತ್ ನಕುಲು ಆದಿ ಮುಗೆರ್ಲ್ ಪಂಡ ಮುದ್ದ ಕಳಲೆರ್ , ಕೋಟಿ ಚೆನ್ನಯೆರ್ ,ಕಾನದ ,ಕಟದೆರ್.ಆಯುದದ ದೃಷ್ಠಿಡ್ ತೂಪುಂಡ ಅಲ್ಂಬುಡದ ದಂಟೆ ಸತ್ಯ ಸಾರಮಾನಿಲೆನ.ಅಪಗ ಅಕುಲು ಸುರುತಕುಲಾಪೆರ್. ,ಉಳ್ಳಾಕ್ಲು ಪಂಡ ಕಿನ್ನಿಮಾನಿ ,ಪೂಮಾನಿ ,ಕಾಂತಬಾರೆ ,ಬುದಬಾರೆ,ಅಬ್ಬಗ ದಾರಗ . ಮೊಕ್ಲು ಪೂರಾ ಸಮಕಾಲೀನೇರಾದಿತ್ತ್ ನ ಅಮರ್ ರ್ಜೋಕುಲು .
ಆಂಡ ಸೊನ್ನೆ ಗಿಂಡೆ ಅಮರ್ ಜೋಕ್ಲತ್ತ್. ಸೊನ್ನೆ ಸಿರಿನ ಮಗಲಾಂಡ ಗಿಂಡೆ ಒರಿ ಬಿರಣನ ಮಗಳಾದಿತ್ತ್ ದ್ ಕಾನ ಬೊಟ್ಟುದ ಅಜ್ಜೆರ್ ಈ ರಡ್ಡ್ ಜೋಕ್ಲೆನ್ ಸಾಂಕುನಿ .
ಕಾನದ ಕಟದೆರೆನ್ ಸತ್ಯ ಸಾರಮಾನಿ ,ಸತ್ಯ ಪದಿನಾಜಿ ,ಕಲೊಟು ಕಂಬೆರ್ಲು ,ಸಾರ ಮುಪ್ಪಣ್ಯೇರ್,ಕಿನ್ನಿಮಾನಿ ಪೂಮಾನಿ ,ತುಳುನಾಡ್ ದ ಸತ್ಯ ದೈವೊಲುಂದು ಆರಾಧನೆ ಮಲ್ಪುವೆರ್ .
ಕಾನದ ಕಟದೆರೆನ್ ಬೇತೆ ಸಮುದಾಯದಕ್ಲ್ ಒತ್ತಂದಿನೆರ್ದಾತ್ರ ಅಕ್ಲೆ ಚರಿತ್ರೆ ಮಾಯಕಾತ್ಂಡ್ . ತುಳುನಾಡ್ ಗ್ ಅತಿಕಾರೆ ಬಿದೆನ್ ಕನತಿನಕ್ಲ್,ಕಾರಿ ಕಬಿಲನ್ ಕಟ್ಟ್ ದ್ ದತ್ತ್ ನಕುಲು ಕೋಟಿ ಚೆನ್ನಯೆರೆ ಸಮಕಾಲೀನೆರಾಯಿನ ಮನ್ಸ ಜನಾಂಗದ ಕಾನದ ಕಟದ ಸತ್ಯೋಲು/ಸತ್ಯ ಸಾರಮಾನಿಲು .
ಕಂರ್ಗೋಲು ನಲಿಕೆಗ್ಲ ಕಂಬೆರ್ಲೆನ ಆರಾದನೆಗ್ಲ ಸಂಬಂದ ಉಂಡು
ಈ ಬರವುಗು ಆಕರ :-ನವೀನ್ ಸುವರ್ಣ ಪಡ್ರೆ ,ಹರ್ಷಿತ್ ,ಶೈಲು ಬಿರ್ವ ,ಕಿರಣ್ ಬಂಟ್ವಾಳ್
video link:-https://www.youtube.com/watch?v=IL-pQ44DOy4
video link:-https://www.youtube.com/watch?v=IL-pQ44DOy4
ಬೈದೆರ್ಲು-ಕೋಟಿ ಚೆನ್ನಯೆರ್
ಮುಗ್ಗೆರ್ಲು-ಮುದ್ದ ಕಲಲ-ಗಡಿ ಮುಗೆರ್ಲೆನೆಟ್; ಎಣ್ಮೂರ ದೆಯ್ಯು -ಕೆಲತ ಪೆರ್ನು-ಅನಿ/ಹನಿ ಮುಗೇರ್ಲೆನೆಟ್
ಕಂಬೆರ್ಲು-ಕಾನದ ಕಟದ
Subscribe to:
Posts (Atom)