ತುಳುನಾಡ ಆದಿಮೂಲ ಆರಾಧ್ಯ ದೈವ ಕೊರಗತನಿಯೆ

ತುಳುನಾಡ ಆದಿಮೂಲ ಆರಾಧ್ಯ ದೈವ ಕೊರಗತನಯೆ

  

     ಪೂರ ಹಿರಿಯಾಕುಲೆನ ಅಂದಾಜಿ ಪ್ರಕಾರ ಕೊರಗ ತನಿಯನ ಕಾಲ12ನೇ ಶತಮಾನದ ಆಸ್ ಪಾಸ್ಂದ್ ತೆರಿದ್ ಬರ್ಪುಂಡು ಪಂಡ ಸಮಾಜೊಡಿತ್ತಿ ಜಾತಿ ಪದ್ದತಿ,ಅಸಮಾನತೆದ ವಿರುದ್ದ ಪೊರ್ಂಬಾಟ ನಡತೊಂತಿ ಕಾಲ,ಪಂಡ ಇತ್ತೆರ್ದ್ 800 ವರ್ಸದಾತ್ ಪಿರವುದ ಕಥೆ.
               

              ನಮ ತುಳುನಾಡ ಪಿರಾಕ್ ದ ಆರಾದನೆದ ದೈವ ಬೂತೊಲೆನ್ ಈ ಮಣ್ಣ್ ದ ನಿಗ್ರಹಾನುಗ್ರಹ ಮಲ್ಪುನ  ಸ್ವತಂತ್ರ ಸಗ್ತಿಲುಂದು ಆರಾದನೆ ಮಲ್ತೊಂದು ಬತ್ತ.ಅಂಚಿತ್ತಿ ದೈವೊಲು ವಾ ದೇವೆರೆ ಅಂಶಲ ಅತ್ತ್,ವಾ ದೇವೆರೆನ್ ಕಾಪುನ ಕ್ಷೇತ್ರಪಾಲೆಲ ಅತ್ತ್,ವಾ ದೇವೆರೆ ಪರಿವಾರ ಸಗ್ತಿಲ ಅತ್ತ್.ಆಂಡ ದೈವ ದೈವೊಲು ಪರಿವಾರ ಸಗ್ತಿಲಾದ್ ಇತ್ತ್ಂಡ ತಪ್ಪತ್ತ್.ದಾಯೆ ಪಂಡ ದೈವ ದೇವೆರ್ಂದ್  ಆರಾದನೆ ಮಲ್ಪುನ ನಮ ದೇವೆರೆರ್ದ್ ದುಂಬೇ ದೈವೊನು ನಂಬೊಂದು ಬತ್ತಿನಕುಲು.ದಾಲ ತಪ್ಪು ಮಲ್ಪಂದಿ ದೈವೊಲೆನ್ ಆ ದೇವೆರೆ ಪಾದ ಪತ್ತೊನ್ಲ,ಈ ದೇವೆರೆ ಪಾದ ಪತ್ತೊನ್ಲ ಪನ್ಪಿ ಮದಿಪುದಕ್ಲೆನ ಮದಿಪು ಕೇನ್ನಗ ಬೇನೆ ಆಪುಂಡು .ಅಂಚಿತ್ತಿ ಹಿರಿಯಾಕ್ಲೆ ಕಾಲೊರ್ದು ನಂಬೊಂದು ಬತ್ತಿ ದೈವ ಕೊರಗ ತನಿಯೆ..ತುಳುನಾಡೊರ್ಮೆಲ ಕೊರಗತನಿಯ ದೈವದ ಆರಾದನೆ ನಡತೊಂದಿತ್ತ್ ದ್ ಇನಿಕಾನಗ ತುಳುನಾಡ ಗಡಿಪುಡೆ ದಾಂಟ್ ದ್ ಆರಾದನೆ ನಡತೊಂದುಂಡು.ಆಂಡ ಕೊರಗತನಿಯನ್ ಕೊರಗಜ್ಜೆ ಮಲ್ತ್ ದ್ ಆಯನ್ ಬಗ್ಗದುಂತದ್ ಆಯನ ಕೈಟ್ ರಡ್ರಡ್ಡ್ ದಂಟೆ ಕೊರ್ನೆನ್  ತೂನಗ ಚೋದ್ಯ ಆಪುಂಡು.ಜಕ್ಕಡ್ ಜವನೆ ಆದಿತ್ತಿ ಪೊರ್ತುಡು ಕರಿದ್ ಪೋಯಿನ ಆಯನ್ ಕೊರಗ ತನಿಯೆ ಆದ್ ನೇಮ ನೆರಿ ಕೊರ್ಪುನ ಬದಲ್ ಕೊರಗಜ್ಜೆ ಮಲ್ತ್ ದ್ ಬುಡ್ತೆರ್.ಕೊರಗ ತನಿಯೆ ತುಳುನಾಡ್ ಗ್ ಒರಿಯೆ ಉಪ್ಪುನಿ.ಇನಿ ಕೆಲವೆರ್ ಎಂಕ್ಲೆ ಕೊರಗತನಿಯೆ ಬೇತೆ,ನಿಕ್ಲೆನ ಬೇತೆಂದ್ ಪನ್ಪುನ ಬೇಲೆ ಮಲ್ತೊಂದುಲ್ಲೆರ್.ಇಂಚ ಇಜ್ಜಿ.ಮುಲ್ತ ಕಟ್ಟುನಕುಲು ಪನ್ಪಿ ತನಿಯನ ಕಥೆತಲೆಕ ತೂಪುಂಡ ತನಿಯನ ಕಥೆ ಪಣಂಬೂರ ಪಟ್ಟ ಸಾಲೆರ್ದ್ ಸುರಾಪುಂಡು.ಆಂಡ ಅವೆರ್ದ್ ಲ ಅಂಚಿರ್ದ್ ಕೊರಗತನಿಯನ ಮೂಲ ಉಂಡುಂದು ತೆರಿಂಡ ನಿಕ್ಲೆಗ್ ಆಚಿರ ಆವು.

          ಅಂಚಿತ್ತಿ ಕೊರಗತನಿಯನ ಬಗೆಟ್ ಅಕ್ಲೆ ಜನಾಂಗದ ಹಿರಿಯಾಕ್ಲೆಡ ತೆರಿದ್ ಬರೆಯಿ ಬರವುನು ತನಿಯನ ಪಾದೊಗು ಸಮರ್ಪಣೆ ಮಲ್ತೊಂದುಲ್ಲೆ.ಪಣಂಬೂರ ಪಟ್ಟಸಾಲೆಡ್ ತನಿಯನ ಅಮ್ಮೆರೆನ ಕುಟುಮದ ಇಲ್ಲ್ ಇತ್ತ್ ನೆಡ್ದಾತ್ರ ತನಿಯೆ ಇಂಚಿಗ್ ಬನ್ನಗ ಅಡೆಲ ಬತ್ತ್ ದ್ ಪೋಪೆ.ಅವೆಡ್ದ್ ಬೊಕ್ಕದ ಕಥೆ ಮಾತೆರೆಗ್ಲ ತೆರಿದುಂಡು.ಂಚಾಂದ್ ಆಯನ ಬದ್ ಕ್ ಕರಿನ ಜಾಗೆ ಕದಿರೆ ದೇಲ್ಯ ಅತ್ರ್.ಆಯೆ ವಾ ಮಾಪಲಲ,ನಾರಂಗಾಯಿಲ ಕೊಯ್ಯೆರೆ ಅಡೆಗ್ ಬೈದ್ ಜೆ.ಆ ಕಥೆನೇ ಬೇತೆ ಉಂಡು.ನಮಕ್ ಕೊರಗತನಿಯನ ಮೂಲ ಕಥೆ ಕೊರ್ನಾರ್ ಓಲ್ಲಾ ಕೊರಗಜ್ಜೆಂದ್ ಪಂತ್ ಜೆರ್.ಕೊರಗ ತನಿಯನ ಅಜ್ಜೆರೆ ಪುದರ್ ಕುರುವ,ಅಜ್ಜಿನ ಪುದರ್ ಪಾಡಿ.ಅಪ್ಪೆನ ಪುದರ್ ಕೊರೊಪೊಲು,ಅಮ್ಮೆರ್ನ ಪುದರ್ ಓಡಿ.ತಮ್ಮಲೆ ಪುದರ್ ಗುರುವ,ಮಾಮಿನ ಪುದರ್ ಬೈಕಾಡ್ತಿ.ಬೈಕಾಡ್ತಿನ ಆರಾದನೆ ಇನಿ ತುಳುನಾಡ ಕೆಲವೊಂಜಿ ಬಾಗೊಡು ತೂಯೆರೆ ತಿಕ್ಕುಂಡು.ಮೋಲು ಕೊರಗತನಿಯನ ಸಂಸಾರ.ತನಿಯನ ಅಪ್ಪೆ ಕೊರೊಪೊಲುಗು ಬಾರೀ ಕಿನ್ಯ ಪೆರಯೊಡೆ ಮದ್ಮೆ ಆಪುಂಡು.ಅಪಗ ಬಾಲ್ಯವಿವಾಹ ಪದ್ದತಿ ಇತ್ತ್ಂಡ್.ಎಲ್ಯ ಪ್ರಾಯೊಡು ಮದ್ಮೆ ಆಂಡಲ ಕಂಡನಿ ಬುಡೆದಿನ್ ಒಟ್ಟುಗೆ ಉಪ್ಪೆರೆ ಬುಡ್ಪುಜೆರ್.ಅಕ್ಲು ಒಟ್ಟಾವೊಡಾಂಡ ಒಟ್ಟುಗುಪ್ಪೊಡಾಂಡ ಅಕ್ಲೆಗ್ ಸರಿಯಾಯಿನ ಪ್ರಾಯ ಬರೊಡು.ಪೊಣ್ಣು ಪೋದು ಪೊಂಜೊವಾಯಿ ಬೊಕ್ಕ ಅಕ್ಲೆನ್ ಒಟ್ಟು ಸೇರ್ಯೆರೆ ಬುಡೊಂತಡ್.ಮದಿಮೆ ಆಯಿ ಬೊಕ್ಕ ಕೊರೊಪೊಲು ಅಪ್ಪೆ ಇಲ್ಲಡೇ ಉಪ್ಪುವಲ್.ಕೊರೊಪೊಲು ಪೊಣಣು ಪೋದು ಪೊಂಜೊವಾನಗ ಓಡಿಗ್ ಸುದ್ದಿ ಮುಟ್ಟುಂಡು.ಇಸಯ ತೆರಿನ ಓಡಿ ಅಡೆಗ್ ಬರ್ಪೆರ್.ಒಂಜಿ ಇಸೇಸ ಪಂಡ ಕೊರಗ ಜನಾಂಗೊಡು ಪೊಣ್ಣ ಮದಿಮೆಯಾದ್ ಕಂಡನಿ ಇಲ್ಲಲ್ ಉಪ್ಪುನಿಯತ್ತ್.ಅಪ್ಪೆ ಇಲ್ಲಲೇ ಪೊಣ್ಣು ಉಪ್ಪುನಿ.ಅಲೆನ ಕಂಡನಿ ಮಾಮಿ ಇಲ್ಲಡೇ ಬತ್ತ್ ದ್ ಕುಲ್ಲೊಡು.

                ಬಾರ್ಕೂರು ಸೀಮೆದ ಗಡಿಟ್ ಕೊರಗ ತನಿಯನ ಹಿರಿಯಾಕ್ಲೆನ ಏಳ್ ಕೊಪ್ಪೊಲಿತ್ತ್ ನಿ.ಕೊಪ್ಪೊಲು ಒಂಜಿ ರಡ್ಡ್ಂದ್ ಉಪ್ಪುಜಿ.ಏಳ್,ಪತ್ತ್ಂದ್ ಕೈತಲ್ ಕೈತಲ್ ಕೊಪ್ಪೊಲು ಉಪ್ಪುವ.ಒಂಜಿ ಕೊಪ್ಪಂದ್ ಉಪ್ಪುನ್ನೇ ಇಜ್ಜಿ.ಕೊಪ್ಪೊಲು ಐನೆರ್ದ್ ಮಿತ್ತ್ ಉಪ್ಪೊಡೆ.ಮೂಲು ಕೊರಗ ತನಿಯೆ ಪುಟ್ಟ್ ನ ಜಾಗೆ ಕೊರ್ರೆಪಾಡಿ.ಅವು ಉಪ್ಪುನಿ ಬಾರ್ಕೂರುಡು.ಒಡಿಪು ಕಾಪುದ ಮಡಂಬುಡ್ದು ಕಾಂತಾವರೊಗು ತನಿಯನ ಕುಟುಮದ ಮೂಲದಕುಲು ಬತ್ತ್ ದ್ ಬದ್ ಕ್ ಕಟ್ಟೊಂದ್ ನಿ.ಒಂಜಿ ಕಾಲೊಡು ಕೊರಗ ಸಮುದಾಯ ಅಲತ ಮಿತ್ತಮಲೆ,ತಿರ್ತಮಲೆಂದ್ ರಡ್ಡ್ ತಿಕ್ ಡ್ ಬದ್ ಕೊಂತೆರ್.ಕಾಂತಾವರ ಕ್ಷೇತ್ರ ಮಹಾತ್ಮೆ ಬರವುಡ್ಲಾ ಅವ್ಲು ಬಾರ್ಯಾತ್ ಕೊರಗೆರ್ನ ಕೊಪ್ಪೊಲಿತ್ತ್ ನ ಇಚಾರ ತೆರಿಯುಂಡು.ಮಿತ್ತಮಲೆ ತನಿಯನ ಆಂಡ ತಿರ್ತಮಲೆ ತನಿಯನ ಅಪ್ಪೆ ಕೊರೊಪೊಲ್ನ.ಓಡಿ,ತನಿಯೆ ಪೂರ ಕೊರಗ ಜನಂಗೊಡು ನಡುಸಾಲ್ ದ ಕೊರಗೆರ್ಂದ್ ಪುಗರ್ತೆ ಪಡೆಯಿನಕುಲು.ಬಾರ್ಯಾರ್ ಕೊರಗ ಸಮುದಾಯ ಕಾಂತಾವರೊಡು ಇತ್ತ್ ದ್ ಕಾಂತಾವರದ ದೇವೆರ್ ಈಸಮುದಾಯೊಗು ತಿಕ್ಕ್  ದ್ ಅಕುಲು ಬಾಅಡಿ ಬೂಡುದ ಬಲ್ಲಾಲ್ರೆಗ್ ತೆರಿಪಾಯಿ ಬೊಕ್ಕ ಕಾಂತೇಶ್ವರ ಅವ್ಲು ತಾಪನೆಯಾಂಡ್ ಪನ್ಪಿ ಇಚಾರ ಕಾಂತಾವರ ಕ್ಷೇತ್ರ ಮಹಾತ್ಮೆ  ಬೂಕುಡುಂಡು.ಓಡಿ ಬೊಕ್ಕ ಕೊರೊಪೊಲ್ನ ಪುಟ್ಟು ಕಾಂತಾರ-ಕಾರ್ಲ-ಕುಡ್ಲದ ನಡುಟುಂಡು.ತನಿಯನ ಅಮ್ಮೆರೆಗ್ ಮದಿಮೆದ ಸಂದರ್ಭ ಕೊರೊಪೊಲು ಪಂಡ ಪೊಣ್ಣು ನಿಗಂಟ್ ಮಲ್ಪೆರೆ ಜನ ಲೆಪ್ಪೆರೆ ಮುಲ್ಕಿ,ಕಾಂತಾರ,ಕಬತ್ತಾರ್ ಗ್ ಪೋಪುನ ಉಲ್ಲೇಖ ಗಿರಿ ಕಾವ್ಯೊಡು ಉಂಡು.ಕೊರೊಪುಲುಗು ಬಾಲೆ ಆವೊಡಾಂಡ ಕೊರಗತನಿಯನ ಅಜ್ಜಿ ಕಾಂತಾವರ ದೇವೆರೆಗ್ ಪುಂಡಿಪಣವು ಪರಕೆ ಪಂಡಿ ಇಚಾರ ಈ ಕಾವ್ಯೊಡುಂಡು.ಕಾಂತೇಶ್ವರ ದೇವೆರೆ ಪರಕೆಡ್ ಪುಟ್ಟಿ ತನಿಯನ್ ಇನಿ ತುಳುನಾಡ್ ಡ್ ಈಸರ ದೇವೆರೆನಂಶಂದ್ ಆರಾದನೆ ಮಲ್ತೊಂದುಲ್ಲೆರ್.ಗಿರಿ ಕಾವ್ಯೊಡು ಕೊರಗ ಜನಾಂಗದ ಏಳ್ ಬರಿಕುಲು ಬತ್ತ್ ದ್ ಮೂಲು ಕೊರಗ ತನಿಯಗ್ ಸಂಬಂದಪಟ್ಟ್ ನ ಬರಿತ ಬಗೆಟ್ ಮಾತ್ರ ತೆರಿಕ.ಕೊರಗತನಿಯನ,ಅಪ್ಪೆನ ಬರಿ ಸೋಮಣ್ಣಾಯ ಬರಿ,ಒರಗ ತನಿಯನ ಅಮ್ಮೆರ್ ನ ಬರಿ ಇರೋಡಿಯನ್ ಬರಿ.ಕೊರಗ ತನಿಯನ ಅಮ್ಮೆರ್ ಓಡಿ ಆ ಕಾಲದ ನ್ಯಾಯ ತೀರ್ಮಾನ ಮಲ್ಪುನ ವ್ಯಕ್ತಿಯಾದಿತ್ತೆರ್.ಆ ಕಾಲೊಡು ಇರೋಡಿಯನ್ ಬರಿ ಬಾರೀ ಮಲ್ಲ ಬರಿಯಾದಿತ್ತ್ಂಡ್.ಮಡಂಬುರ್ದುಲ ದುಂಬುದ ಮಲ್ಲ ಬರಿ ಉಂದಾದಿತ್ತ್ಂಡ್.ಈ ಇರೋಡಿಯನ್ ಬರಿಕ್ ಸುರುತ ಮಾನಾದಿಗೆ ಇತ್ತ್ಂಡ್.ಅವೆತ್ದ್ ದಂಬು ಪಾಡ್ದನ್ನಾರ್ ಬರಿಕ್ ಸುರುತ ಮಾನಾದಿಗೆ ಇತ್ತ್ಂಡ್.ದಾದನಾ ಬರಿತ ನಡುತ ಉಲತ್ತುಲಯಿದ ಲಡಯಿನ್ ಸರಿ ಮಲ್ಪೆರೆ ಕೂಡುಕೂಟ ಮಲ್ತ್ ನ ತನಿಯನ ಅಮ್ಮೆರ್ ಓಡಿ ಇನಿರ್ದ್ ಬೊಕ್ಕ ನಿಕ್ಲೆ ಬರಿಕ್ ಸುರುತ ಮಾನಾದಿಗೆಇಜ್ಜಿ,ಆ ಮಾನಾದಿಗೆನ್ ಸೆರ್ಗೆನ್ನಾರ್ ಬರಿ,ಮಡಂಬು ಬರಿಕ್ ಕೊರೊಡುಂದು ಮಾತೆರ್ಲ ಒಪ್ಪಿಗೆ ಮಲ್ತೊಂಡೆರ್ ಗೆ.ಅವೆರ್ದ್ ಬೊಕ್ಕ ಸೆರ್ಗೆನ್ನಾರ್ ಬರಿಕ್ ಸುರುತ ತಾನಮಾನ ತಿಕ್ಕ್ಂಡ್.ಕೂಟದ ಕಲೊಟು ಸೆರ್ಗೆನ್ನಾರ್ ಬರಿತಕ್ಲೆನ ಕಡೇತ ತೀರ್ಮಾನ.ಮೊಕ್ಲು ಬಾರೀ ಬುದ್ಯಂತೆರ್,ಪಾತೆರಕತೆಟ್ ಎಡೇನ ತೆರಿನಕುಲು.ಅಂಚ ಮಾತಾ ಮಾನಾದಿಗೆನ್ ಸೆರ್ಗೆನ್ನಾರ್ ಬರಿಕ್ ಕೊರ್ಯೆರ್.ಏರ ಜೇರದ ಸ್ವಾಮಿ ಈಸರ ದೇವೆರೆನ್  ಈ ಜನಾಂಗದಕುಲು ಆರಾದನೆ ಮಲ್ಪುವೆರ್.ಉಂದೆನ್ ತೂನಗ ಈಸರ ದೇವೆರ್ ಮೂಲ ಜನಾಂಗದಕ್ಲೆ ಆರಾದ್ಯ ದೇವೆರ್ಂದ್ ತೆರಿಯುಂಡು.

           ಇಂಚ ಕೊರೊಪೊಲ್ನ ಇಲ್ಲಡೆ ಬತ್ತ್ ದ್ ಓಡಿ ಕುಲ್ಲುದು ಒಂತೆ ಸಮಯೊಡು ಕೊರೊಪೊಲುಗು ಬಂಜಿ ಬರ್ಪುಂಡು.ಮೂಜಿ ತಿಂಗೊಲು ಪೋದು ಆಜಿ ತಿಂಗೊಲು,ಆಜಿ ತಿಂಗೊಲು ಪೋದು ಒರ್ಂಬ ತಿಂಗೊಲು,ಒರ್ಂಬ ತಿಂಗೊಲುಡು ಅಲೆಗ್ ಪೆದ್ದುನ ಬೇನೆ ಬರ್ಪುಂಡು.ಅಲೆಗ್ ಬೇನೆ ಬನ್ನಗ ಪ್ರಕೃತಿಡ್ ,ವಾತಾವರಣೊಡು ಬಾರೀ ಬದಲಾವಣೆ ಆಪುಂಡು.ಸಹಜ ಸ್ಥತಿಟ್ ಪ್ರಕೃತಿ ಉಪ್ಪುಜಿ.ಬೇನೆ ಜಾಸ್ತಿಯಾಪುಂಡು.ಸನಿವಾರದಾನಿ,ಪುಣ್ಣಮೆದಾನಿ ರಾತ್ರೆ ಪದ್ರಾಡ್ ಗಂಟೆ ಕರಿನಗ ತನಿಯನ ಜಙ ಆಪುಂಡು.ಒಂಜಿ ಮೂಲದ ಪ್ರಕಾರ ಕೊರಗತನಿಯನ ಬದ್ ಕ್ ದ ಕಾಲ ಇನಿರ್ದ್ ಸುಮಾರ್ ಎಣ್ಮನೂದು ವರ್ಸ ಪಿರವು ಪಂಡ ಪದ್ರಾಡನೆ ಶತಮಾನಂದ್ ಹಿರಿಯಾಕುಲು ಪನ್ಪೆರ್.ಕೋರ್ದಬ್ಬು ಬೊಕ್ಕ ಕೊರಗತನಿಯೆ ಸಮಕಾಲೀನೆರ್ಂದ್ ಪನ್ಪೆರ್.ತನಿಯೆ ಪುಟ್ಟುನ ಪೊರ್ತುಗು ಕಡಲ ನೀರ್ ಉರ್ಕುಂಡು,ಗಾಳ್ಯಾಬರ್ಸ ಬರ್ಪುಂಡು,ಮೆಂಚಿ ತೆಡಿಲ್ ಬರ್ಪುಂಡು,ಎರ್ಮೆಲು ಅರೆದುಂಡು,ತಾಮರೆ ಅರಲುಂಡು,ಬೂಮಿಯೇ ನಡುಗುನ ಸ್ಥಿತಿ ಅವ್ಲು ಆಪುಂಡು.ಉಂಗೊಂಜಿ ಇಚಿತ್ರ ಜನನಂದ್ ಮಾತೆರ್ಲ ಎನ್ಯುವೆರ್.ಪೆದ್ದಿ ಬಾಲೆದ ಬಲಕೆ ತೂನಗ ಪೆದ್ದ್ ನಪಗನೇ ರಡ್ಡ್ ಮೂಜಿ ದಿನತ ಬಾಲೆದ ಬಲಕೆ ತನಿಯನವಾದಿಪ್ಪುಂಡು.ಮೂಜಿ ದಿನತ ಬಾಲೆದ ಆಜಿ ದಿನತ ಬಲಕೆ,ಆಜಿ ದಿನತ ಬಾಲೆ ಒರುಂಬ ದಿನತ ಬಲಕೆ ಆ ಬಾಲೆಡ ತೋಜಿದ್ ಬರ್ಪುಂಡು.ಕೊರಗ ಜನಾಂಗೊಡು ಏಳೆಟ್ ಅಮೆ ಕರಿಪುವೆರ್.

               ತನಿಯೆ ಆಣ್ ಬಾಲೆ ಆಯಿನರ್ದಾತ್ರ ಬಾಲೆದ ಅಮ್ಮೆ,ಅಜ್ಜೆರ್,ಕುಟುಮದಕ್ಲು,ಗುರಿಕಾರ್ರ್ ಇತ್ತ್ ದ್ ಕುಟುಮದ ಗುರಿಕಾರೆ ತನಿಯನ ಅಮ್ಮೆರ್ ಡ ಆಣ್ ಗಡಿ ತಾರಾಯಿ ಕೊರ್ಪೆರ್.ಅವೆರ್ದ್ ಬೊಕ್ಕ ಅಮ್ಮೆರ್ಡ ಬಾಲೆದ ಪುದರ್ ಲೆಪ್ಪೆರೆ ಪನ್ಪೆರ್.ಅಮ್ಮೆ ಇಜ್ಜಂದಿ ಪೊರ್ತುಡು ಅಜ್ಜೆರ್ ಪುದರ್ ದೀಪುನಿ.ಪುದರ್ ದೀಪುನ ದುಂಬೇ ದಿನೊನು ಗುರ್ತ ಮಲ್ತ್ ದಿಪ್ಪುವೆರ್.ಬಾಲೆದ ರೂಪ,ಬಾಲೆದ ನಡಕೆ,ಬಾಲೆದ ಅಜ್ಜ ಅಜ್ಜಿನ ಪುದರ್ ತೂದು ಪರಂಪರೆರ್ದ್ ಇತ್ತ್ ನ ಪುದರ್ ನೇ ದೀಪೆರ್.ಸನಿವಾರದಾನಿ,ಪುಣ್ಣಮೆದಾನಿ ಬಾಲೆ ಪುಟ್ಟ್ ನೆರ್ದಾತ್ರ ತನಿಯೆಂದ್ ಪುದರ್ ಲೆತ್ತೆರ್.ಏಳ್ ದಿನತ ಅಮೆ ಕರಿ ಬೊಕ್ಕ ತನಿಯನ ಅಪ್ಪೆ ಕರಿದ್ ಪೋಪಲ್.ಕಟ್ಟುನಕುಲು ತನಿಯನ ಅಪ್ಪೆ ಪೆದ್ದ್ ನಾನಿ ತೀರ್ದ್ ಪೋತ್ ನಿಂದ್ ಪನ್ಪುನವು ಸರಿಯತ್ತ್.ಬಾಲೆದ ಅಮೆ ಕರಿಪುನ ಏಳನೆ ದಿನತಾನಿ ತನಿಯನ ಅಪ್ಪೆ ಕೊರೊಪೊಲು ಕರಿದ್ ಪೋಪುನಿ.ಅಂಚನೆ ತನಿಯನ ಅಮ್ಮೆರ್ ತೀರ್ನಗ ತನಿಯೆ ನಲ್ಪ ದಿನತ ಬಾಲೆ.ಬಾಲೆ ತನಿಯೆ ಮೋನೆ ತೂದು ತೆಲಿಪುನ ಪೊರ್ತುಗು ಅಮ್ಮೆರ್ ತೀರ್ವೆರ್.ದುಂಬುಗು ಬಾಲೆ ತನಿಯನ ಜಬದಾರಿಕೆ ತನಿಯನ ಮಾಮಿ ಬೈಕಾಡ್ತಿಗ್ ತಿಕ್ಕುಂಡು.ಅಪ್ಪೆ ತೀರಿ ಬೊಕ್ಕ ತನಿಯಗ್ ಅಪ್ಪೆನ ಸ್ಥಾನ ದಿಂಜಯಿನಾಲ್ ತನಿಯನ ಮಾಮಿ ಬೈಕಾಡ್ತಿ.ತನಿಯೆ ಬುಳೆಯೊಂದಿಪ್ಪುನಗನೆ  ತನಿಯನ ಅಜ್ಜಿ ಅಜ್ಜೆರ್ ಕರಿದ್ ಪೋಪೆರ್.ಬೊಕ್ಕ ತನಿಯೆ,ತನಿಯನ ಮಾಮಿ,ತನಿಯನ ತಮ್ಮಲೆ ಮೊಕ್ಲು ಮೂಜಿ ಜನ ಮಾತ್ರ ಒರಿಪೆರ್.ಮೊಕ್ಲು ತನಿಯನ್ ತನ್ನ ಬಾಲೆ ಪಂಡ್ ದೇ ಸಾಂಕುವೆರ್.ಅರೀ ಜಬದಾರಿಕೆಡ್ ತನಿಯನ್ ತಮ್ಮಲೆ ತಾಂಕೊಂದು ಬರ್ಪೆರ್.ಮಾಮಿಲ ಅಂಚನೆ ತನಿಯನ್ ಮಲ್ಲೆ  ಮಲ್ತೊಂದೆ ಬರ್ಪೆರ್.ಪತ್ತನೆ ವರ್ಸೊಡು ತನಿಯನ ಇರ್ವನೆ ವರ್ಸದ ಬಲಕೆ ತೋಜುಂಡು.ಬಲಕೆ ಈ ರೀತಿ ಇತ್ತ್ಂಡಾಯನ.ಏಪ ತನಿಯೆ ಪಾತೆರ್ರೆ ಸುರು ಮಲ್ಪುವೆನಾ ಅಲ್ಪರ್ದ್ ಮಾಮಿಡ ಪ್ರಶ್ನೆ ಮಲ್ಪೆರೆ ಸುರು ಮಲ್ಪುವೆ.ಯಾನ್ ಏರ್?,ಎನ್ನ ಕುಟುಮ ಸಂಸಾರ ಓಲುಲ್ಲೆರ್ಂದ್ ಕೇನುವೆ.ಅಪಗ ಅಕುಲು ಎಂಕುಲೇ ನಿನ್ನ ಸಂಸಾರಂದ್ ಪನ್ಪೆರ್.ಎನ್ನ ಅಜ್ಜೆ ಅಜ್ಜಿನಕುಲು ಓಲುಲ್ಲೆರ್ಂದ್ ತನಿಯೆ ಪ್ರಶ್ನೆ ಮಲ್ಪುವೆ.ತನಿಯಗ್ ತನ್ನ ಬದ್ ಕ್ ಡ್ ದಾದನಾ ಆವೊಂದುಂಡುಂದು ಗೊತ್ತಾಯೆರೆ ಸುರಾಪುಂಡು.ಇಂಚ ಅಲಚನೆ ಬರ್ಪುನ ಕಾಲೊಡು ತನಿಯನ ತಮ್ಮಲೆಲಾ ಕರಿದ್ ಪೋಪೆರ್.ಬೊಕ್ಕ ತನಿಯನ ಪಾಲ್ ಗ್ ಒರಿಯುನಿ ಆಯನ ಮಾಮಿ ಬೈಕಾಡ್ತಿ ಮಾತ್ರ.

         ಇಂಚ ಕಾಲ ಕರಿಲೆಕ ಒಂಜಿ ದಿನ ಮಾಮಿಡ ಅಪ್ಪೇ ಎಂಕೀರ್ ಕಥೆ ಪನೊಡುಂದು ಪನ್ಪೆ.ಪೂರ ಕಥೆನ್ ಪಂಡಿನ ತನಿಯನ ಮಾಮಿ ಈ ದಾಯೆಗ್ಲಾ,ಏರೆಗ್ಲ ಪೋಡ್ಯೊಡ್ಚಿ ಮಗಾ,ನಮಕ್ ದೇವೆರುಲ್ಲೆರ್,ತೆನ್ಕಾಯಿ ರಾಜ್ಯೊಡು ನಮನ್ ಕಾಪುನ,ನಮಕ್ ಸಕಾಯ ಮಲ್ಪುನ ಧರ್ಮಿಷ್ಠೆರುಲ್ಲೆರ್,ನಮ್ಮ ಸಂಸಾರದಕುಲ್ಲಾ ಉಲ್ಲೆರ್,ನಮ್ಮ ಅಪ್ಪೆ ಸಂತಾನದಕುಲು ತೆನ್ಕಾಯಿ ರಾಜ್ಯೊಡುಲ್ಲೆರ್ ಮಗಾಂದ್ ಮಾಮಿ ಪನ್ನಗ ಪೂರ ಇಚಾರೊನು ತನಿಯೆ ಮನಸ್ ಗ್ ದೆತೊನುವೆ.ಕೊರಗ ತನಿಯಗ್ ತೆನ್ಕಾಯಿ ರಾಜ್ಯ ತೂವೊಡುಂದಾಪುಂಡು.ಇಂಚಿ ಬರೆರ್ಲಾ ಆಸೆ ಆಯಗಾಪುಂಡು.ಮಾಮಿಡ ದಿನೋಲ ಒಂಜತ್ತ್ ಒಂಜಿ ಪ್ರಶ್ನೆನ್ ತನಿಯೆ ಕೇನೊಂದಿಪ್ಪುವೆ.ಮಾಮಿ ಬೊಲ್ಪುಗು ಬೇಲೆಗ್ ಪೋಯೆರ್ಡ ಬಯ್ಯಗೆ ಕೊಪ್ಪೊಗು ಬರೊಂತ್ ನಿ.ಕೊಪ್ಪೊಡು ಮೊಕ್ಲು ರಡ್ಡೇ ಜನ ಇತ್ತ್ ನಿ,ಮಾಮಿ ಬೈಕಾಡ್ತಿ,ಮರ್ಮಾಯೆ ತನಿಯೆ.ತನಿಯೆ ಅಪ್ಪೆ ಪಂಡ ಮಾಮಿ ಪನ್ನೆನ್ ತಪ್ಪುಜೆ.ಅಪ್ಪೆಗ್ ವಿರುದ್ದವಾದ್ ಲ ನಡಪುಜೆ.ಮಾತೆರೆನ್ಲ ಒಂಜೇ ಲೆಕ್ಕ ತೂವೊಡು,ಮಾತೆರೆಡಲ ಎಡ್ಡೆಡೇ ಉಪ್ಪೊಡುಂದು ಅಪ್ಪೆ ತನಿಯಗ್ ಪಂಡ್ ದಿಪ್ಪುವೆರ್.ಅಕುಲು ಬೇತೆ,ನಮ ಬೇತೆಂದ್ ಎನ್ಯೆರೆ ಬಲ್ಲಿ,ನಮ್ಮ ಹಿರಿಯಾಕ್ಲ್ ಎಡ್ಡೆ ಕೆಲಸ ಮಲ್ತೊಂದು ಬೈದೆರ್,ನಮಲ ಎಡ್ಡೆ ಕೆಲಸನೇ ಮಲ್ಪೊಡು,ನಮನ್ ಮಾತೆರ್ಲ ಮೆಚ್ಚುಲೆಕಾವೊಡುಂದು ಮಾಮಿ ಬೈಕಾಡ್ತಿ ಮರ್ಮಯೆ ತನಿಯಗ್ ಪಂಡ್ ದಿಪ್ಪುವೆರ್.ಈ ಇಚಾಒನು ಮಾತ ತನಿಯೆ ತರೆಟ್ ದೀಯೊಂದಿಪ್ಪುವೆ.ತನಿಯನ ಮಾಮಿಗ್ ಪೂರಾ ಬೇಲೆಲ ತೆರಿಯ.ಇಂಚಿರ್ದ್ ಸಾಗೊಳಿದ ಬೇಲೆಲ ಗೊತ್ತಿತ್ತ್ಂಡ್,ಅಂಚಿರ್ದ್ ಕುಲ ಕಸುಬುದ ಬೇಲೆಲಾ ಗೊತ್ತಿತ್ತ್ಂಡ್.ಸಿರ್ಕ್ ಗ್ ಪುಲ ಮರ್ದ್ ಲ ಕೊರೊಂತೆ್,ಸೋಂಕುಗು ತಪ್ಪುಲಾ ಪಾಡೊಂತೆರ್.ಅರೆನ ಆ ಬೇಲೆನ್ ಪೂರಾ ತನಿಯೆಲ ಕಲ್ತ್ ದೆ.ಮಾಮಿ ತಮ್ಮಲೆ ದಾದ ಮಲ್ತೊಂತೆರ ಅಕ್ಲೆನ್ ತೂದು ತನಿಯೆ ಪೂರೆನ್ಲ ಕಲ್ತ್ ದೆ.ದೋಲು ಬೊಟ್ಟುನ,ಪುರಲ್ ಉರಿಪುನ,ಕುರುವೆ,ಪುಡಾಯಿ ಮಲ್ಪುನ,ಸಾಗೊಳದ ಪೂರ ಬೇಲೆನ್ಲಾ ತನಿಯೆ ಕಲ್ತ್ ದೆ.ಆಯಗ್ ಗೊತ್ತಿಜ್ಜಂದಿನ ಬೇಲೆ ದಾಲ ಇಜ್ಜಾಂಡ್.ನಾಲ್ ಜನತ ಬೇಲೆನ್ ಒರಿಯೆ ಮಲ್ತೊಂತೆ.ಎಲ್ಯ ಪ್ರಾಯೊಡೇ ಆಯಡ ಆತ್ ತಾಕತ್ತ್ ಇತ್ತ್ಂಡ್.

   ಇಂಚ ಕಾಲ ಕರಿಯೊಂದಿಪ್ಪುನಗ ಒಂಜಿ ದಿನ ಅಪ್ಪೆ ಬೈಕಾಡ್ತಿ ಇರ್ಲ್ ಅಮರ್ ನಗಲ(ಕತ್ತಲೆ ಬೂರ್ ನಗ)ಬರಂಎ ಉಪ್ಪುನಗ ತನಿಯಗ್ತರೆ ಬೆಚ್ಚ ಆಪುಂಡು.ಏಪಲಾ ಪೊರ್ತುಗು ಬರೊಂತಿ ಮಾಮಿ ದಾನೆ ನನಲಾ ಬೈಜೆರ್? ಅಲಚನೆಡೆ ಕುಲ್ಲೊಂದೆ.ಆನಿ ಅಮಾಸೆ ಬೇತೆ.ಆಯಗ್ ಮಾಮಿ ಬೆನೆರೆ ಪೋಪುನ ಜಾಗೆ ತೆರಿದಿತ್ತ್ಂಡಲ ಪೋಯೆರಾವಂದಿಲೆಕ ಕಣ್ಣ್ ಕುಟ್ಟ್ಂಡಲ ತೋಜಂದಿ ಕತ್ತಲೆ ಇತ್ತ್ಂಡ್.ಓಡೆ ಪೋಪುನಿಂದ್ ಲ  ತನಿಯಗ್ ಗೊತ್ತಾಪುಜಿ.ಏತ್ ಇರ್ಲಾಂಡಲ ಮಾಮಿ ಬರಂದೆ ಉಪ್ಪುನಗ ತಮ್ಮಲೆನ ದೋಲು ದೆತೊಂದು ತನಿಯೆ ದೋಲು ಬೊಟ್ಟುವೆ.ಕೊರಗ ಜನಾಂಗದಕುಲು ಕೊಸಿಯಾನಗಲ ದೋಲು ಬೊಟ್ಟುವೆರ್,ಬೇಜರಾನಗಲ ದೋಲು ಬೊಟ್ಟುವೆರ್.ಮನಸ್ ಗ್ ಬೇನೆ ಆನಗ ದೋಲು ಬೊಟ್ಟುದು ಸಮದಾನ ಮಲ್ತೊನುವೆರ್.ಕೊಸಿ ಕ್ ದೋಲು ಬೊಟ್ಟುದು ನಲಿತೆರ್ಡ ಬೇನೆ ಮದಪರೆ ದೋಲು ಬೊಟ್ಟುವೆರ್.ಆಂಡ ಮೂಲು ತನಿಯೆ ಒರಿಯೆ ದೋಲು ಬೊಟ್ಟು ಬೊಟ್ಟುದು ನಲಿಪುವೆ.ಓಂಟೆ ಉರಿಪುವೆ.ಓಂಟೆ ಪಂಡ ಬೆದ್ ರ್ದ ಪುರಲ್.ಓಂಟೆ ಉರ್ತು ಉರ್ತುದು ಪೊರ್ತು ಪೋಯಿನ ತನಿಯಗ್ ಗೊತ್ತಾಯಿಜಿ.ಬಚ್ಚಿದ್ ಓಂಟೆನ್ ತನಿಯೆ ಬರಿಟ್ ದೀನಗ ಬೊಲ್ಪುದ ಕೋರಿ ಕೆಲೆಪುಂಡು.ಪುಲ್ಯಕಲದ ಕೋರಿ ಕೆಲೆಪುನಗಲ ಅಪ್ಪೆ ಬೈಜೆರ್ ಪಂಡ್ ದ್ ನನ ಯಾನೇ ಪೋಪೆ ಪಂಡ್ ದ್ ತಮ್ಮಲೆನ ಸೊಂಟ ಪಟ್ಟಿನ್ ತನ್ನ ಸೊಂಟೊಗು ಕಟ್ಟೊನುವೆ.ಅಜಕುರುವೆನ್ ತನ್ನ ಪುಗೆಲ್ ಗ್ ಪಾಡೊನ್ವೆ.ಅಜಕುರುವೆ ಪಂಡ ಪುಗೆಲ ಕುರುವೆ.ತಮ್ಮಲೆ,ಅಪ್ಪೆ,ಮಾಮಿ ಒವು ಮಾತ ಮರ್ದ್ ಲೆನ್ ಕೊರೊಂತೆರ ಅವೆನ್ ಮಾತ ಕುರುವೆಗ್ ಪಾಡ್ವೆ.ರಡ್ಡ್ ಕತ್ತಿನ್ ಸೊಂಟೊಡು ದೀಯೊನ್ವೆ.ಅಂಚನೆ ತಮ್ಮಲೆನ ಓಂಟೆನ್ ಕುರ್ವೆದುಲಯಿ ಪಾಡೊನ್ವೆ.ತರೆಕ್ ಒಂಜಿ ಮೂಡೆ ದೀಯೊನ್ವೆ. ಕೊರ್ರ ಬಾಸೆ ಪಂಡ ಕೊರಗ ಬಾಸೆ.ಕೊರಗ ಬಾಸೆಡ್  ಮೂಡೆ ಪಂಡ ಮುಟ್ಟಾಲೆ.ಬೈಕಾಡ್ತಿ ಬೈಕಾಡಿ ಪನ್ಪಿ ಜಾಗೆಗ್  ಬೇಲೆಗ್ ಪೋವೊಂತ್ ನಿ.ಅಡೆಗ್ ತನಿಯೆ ಅಪ್ಪೆನ್ ನಾಡೊಂದು ಬರ್ಪೆ.ಬೈಕಾಡಿ ಬ್ರಹ್ಮಾವರ ಕೈತಲಿತ್ತ್ ನ ಜಾಗೆ.ಸೂರ್ಯ ದೇವೆರ್ ಉದಯಾಪುನ ಪೊರ್ತುಗು ಬೈಕಾಡಿಗ್ ತನಿಯೆ ಎತ್ವೆ.ಆಯೆ ಅಡೆಗ್ ಎತ್ತುನಾತ್ ಪೊರ್ತುಗಾನಗನೆ ಮಾಮಿ ಬೈಕಾಡ್ತಿ ಮಾಯ ಆದ್ ಆತ್ಂಡ್.ಆಯಗ್ ಇಡೀ ಪರ್ವತನೇ ತರೆಕ್ ಬೂರ್ಲೆಕಾಂಡ್.ದಾದ ಮಲ್ಪುನಿಂದೇ ಆಯಗ್ ಗೊತ್ತಾಯಿಜಿ.ಓಡೆಗ್ ನನ ಯಾನ್ ಪೋವೊಡು,ನನ ಯಾನ್ ಎಂಚಿನ ಮಲ್ಪೊಡು,ಒಂಜಿಲಾ ಆಯಗ್ ಗೊತ್ತಾಪುಜಿ.ದಾಲ ದಿಕ್ಕ್ ದೆಸೆ ತೋಜಂದೆ ಅವ್ಲೆ ಬೂರ್ವೆ.ಆಯಗ್ ಪೂರ ಕಾಲಿ ಕಾಲಿಯಾದ್ ತೋಜುಂಡು.ಸುಮಾರ್ ಪೊರ್ತು ಮನಿಮಂಬಿಜ್ಜಂದೆ ಕುಲೊಂದಿಪ್ಪುವೆ.

           ಅಂಚ ತನಿಯೆ ಕುಲೊಂದಿಪ್ಪುನಗ ಆಯನ ಮಾಮಿ ಪಂಡಿ ಪಾತೆರ ಆಯಗ್ ನೆಂಪಾಪುಂಡು,ಅಪ್ಪೆ ಪಂಡಿ ಕಥೆ ನೆಂಪಾಪುಂಡು.ಮೂಲು ಅಪ್ಪೆಂದ್ ಆಯೆ ಲೆತ್ತೊಂತ್ ನಿ ಮಾಮಿನ್.ತೆನ್ಕಾಯಿ ರಾಜ್ಯೊಡು ಎಡ್ಡೆ ಜನೊಕುಲುಲ್ಲೆರ್,ಬೆನ್ಪುನಾತ್ ಬೇಲೆ ಉಂಡು,ಉನ್ಪುನಾತ್ ನುಪ್ಪು ಕೊರುವೆರ್,ಏರ್ಲಾ ನಮನ್ ದಕ್ಕ್ ದ್ ಪಾಡುನಕುಲು ಇಜ್ಜಿ,ನಮ್ಮ ಹಿರಿಯಾಕ್ಲು ಬಾಲೆನ್ ಪತ್ತ್ ಕೊರ್ದು ಆ ಬಾಲೆಲೆಗ್ ಬೇತೆ ಬೇತೆ ಪುದರ್ ದೀತೆರ್.ಅವು ಮೈರೆ ಆದಿಪ್ಪು,ಕೊರೊಪೊಲು ಆದಿಪ್ಪು,ತನಿಯೆ ಆದಿಪ್ಪು,ತುಕ್ರೆ,ಕೊರಗೆ,ಗುರುವೆ ಆದಿಪ್ಪು -ಇಂಚ ಪುದರ್ ಈಯೊನ್ನ ಮಲ್ಲ ಮಲ್ಲ ಜನೊಕುಲು ತೆನ್ಕಾಯಿ ರಾಜ್ಯೊಡುಲ್ಲೆರ್.ಅಕುಲು ನಮನ್ ಸಾಂಕ್ವೆರ್,ನಮನ್ ದಕ್ಕ್ ದ್ ಪಾಡುಜೆರ್,ಅಕುಲು ನಮಕ್ ರಕ್ಷಣೆ ಕೊರ್ಪೆರ್ಂದ್ ಮಾಮಿ ಪಂಡಿ ಕಥೆ ತನಿಯಗ್ ನೆಂಪಾಪುಂಡು.ಅಲ್ತ್ ರ್ದ್ ತಾನ್ ತೆನ್ಕಾಯಿ ರಾಜ್ಯೊಗು ಪೋಪೆಂದ್ ಮನಸ್ ಡ್ ಎನ್ನಿವೆ.ಅಲ್ತ್ ರ್ದ್ ಪಿದಾಡ್ ದ್ ಬತ್ತ್ ದ್ ಪೇರೂರು ಸುದೆ ಕಡತ್ ದ್ ಬರ್ಪೆ.ಪೇರೂರು ಸುದೆ ಕಡತ್ ಬನ್ನಗ ಕೊಡಂಗೆ ಬನ್ನಾರ್ರೆನ ಇಲ್ಲದ ಎದುರೇ ಪೋಪಿ ಬರ್ಪಿ ಸಾದಿ ಇತ್ತ್ ನಿ.ಇನಿತಲೆಕ ಅಪಗ ಸಾದಿ,ಸಂಕ ಪೂರಾ ಇಜ್ಜಾಂಡ್.

      ಒಡಿಪು ಸಂತೆಕಟ್ಟೆರ್ದ್  ಎಡತ್ ಗ್ ಕೆಮ್ಮಾನ್ ಪಂಡ ಒಡಿಪುದ ಹನುಮಂತ ನಗರೊರ್ದು ಉಲಯಿ ಪೋನಗ ಕೆಮ್ಮಾನ್ ತಿಕ್ಕುಂಡು.ಕೆಮ್ಮಾನ್ ಡ್ ಕೊಡಂಗೆ ಬನ್ನಾರ್ರೆನ ಗುತ್ತು ಉಪ್ಪುಂಡು.ಇನಿಲಾ ಆ ಗುತ್ತು ಉಂಡು.ಕೊಡಂಗೆ ಬನ್ನಾರ್ರೆನ ಗುತ್ತುದಡೆಮುಟ್ಟ ಕೊರಗ ತನಿಯೆ ಒರಿಯೆ ಬರ್ಪುನಿ.ಅವ್ಲು ಗುತ್ತುದ ಜಾಲ್ ಡ್ತನಿಯಗ್ ಬಬ್ಬುನ ಭೇಟಿಯಾಪುಂಡು.ಅಕ್ಲೆ ಇರ್ವೆರೆ ಬದ್ ಕ್ ಡ್ಲಾ ಅಪ್ಪೆ ಅಮ್ಮನ್ ಕಳೆಯೊನ್ನಕುಲು.ನನೊಂಜಿ ಮೂಲದ ಪ್ರಕಾರ ಮಾಮಿ ಬೈಕಾಡ್ತಿನ್ ಕಳೆಯೊನ್ನ ತನಿಯೆ ಪೇರೂರ(ಹೇರೂರು) ತುದೆ ಕಡತ್ ದ್ ಕಡಲ ಕರೆತ ತಾದಿಯೆ ತೆನ್ಕಾಯಿದಂಚಿ ಪೋವೊಂದಿಪ್ಪುವೆ.ಅಪಗ ತನಿಯೆ ತನ್ನಲೆಕನೆ ಗಟ್ಟಿದ ಜೂವದ ಒರಿಯನ್ ತೂಪೆ.ಆ ಜವನೆ ತನಿಯಡ  ಈ ಏರ್,ಈ ದೂರ ಪೋಪುನಿಂದ್ ಇಚಾರ ಮಲ್ಪುವೆ.ಅಡೆಮುಟ್ಟ ಕಣದುಃಖೊಡು ಬರೊಂತ್ ನ ತನಿಯೆ ಆಯಡ ತನ್ನ ಬದ್ ಕ್ ಡ್ ನಡತಿನ ಇಚಾರೊನು ತೆರಿಪಾವೆ.ಯಾನ್ ಬಡಕಾಯಿ ಬಾರ್ಕೂರ ಗಡಿಡ್ದ್ ಬೈದ್ ನಾಯೆ,ಮಂಗ್ಳೂರ ಗಡಿಕ್ ಪೋವೊಂದುಲ್ಲೆಂದ್ ಪನ್ಪೆ.ಈ ಏರ್ಂದ್ ಬಬ್ಬು ಕೇನ್ನಗ ಯಾನ್ ಕಾಡಿನಾಯೆ ಕೊರಗತನಿಯೆಂದ್ ಪನ್ಪೆ.ತನಿಯೆ ಬಬ್ಬುಡ ಈ ಏರ್ಂದ್ ಕೇನ್ನಗ ಬಬ್ಬು ಪನ್ಪೆ,ಎನ್ನ ಪುದರ್ ಬಬ್ಬು.ಉಂದೇ ಊರುಡು ಯಾನುಲ್ಲೆ.ಎನ್ನ ಅಪ್ಪೆನ ಇಲ್ಲ್ ಕಚ್ಚೂರುಂದು ಪನ್ಪೆ.ಯಾನ್ಲಾ ತೆನ್ಕಾಯಿ ರಾಜ್ಯೊಗು ಪೋವೊಂದುಲ್ಲೆ,ತೆನ್ಕಾಯಿ ರಾಜ್ಯೊಡು ಭಾರೀ ಧರ್ಮ ಉಂಡುಗೆ,ಅಧರ್ಮೊಗು ಧರ್ಮ ಸಾರೊಡು ಪನ್ಪಿ ಆಸೆ ಎಂಕುಂಡು,ಅಂಚ ಯಾನ್ಲಾ ತೆನ್ಕಾಯಿ ರಾಜ್ಯೊಗು ಪೋವೊಂದುಲ್ಲೆಂದ್ ಬಬ್ಬು ತನಿಯಡ ಪನ್ಪೆ.ಅಂಚ ಒಟ್ಟುಗು ಇರ್ವೆರ್ಲ ಉದ್ಯಾವರ ಸುದೆತಡೆಮುಟ್ಟ ಬರ್ಪೆರ್.ಉದ್ಯಾವರ ತುದೆತೌಲು ಬಬ್ಬು ತನಿಯಡ ಈ ದುಂಬು ಪೋಲ,ಯಾನ್ ಪಿರವುಂತುವೆಂದ್ ಪನ್ಪೆ.ಅವೆಕ್ ತನಿಯೆ ದಾಲಾ ಪ್ರಶ್ನೆ ಮಲ್ಪುಜೆ.ಮಂಗ್ಳೂರ ಗಡಿಟ್ ಮಾಯದ ಭೇಟಿಯಾಕಂದ್ ಬಬ್ಬುಡ ತನಿಯೆ ಪಂಡ್ ದ್ ದುಂಬುಗು ಪಿದಡ್ವೆ.ಕಾಪುಡು ಬಬ್ಬು ಪಿರ ಉಂತ್ವೆ.ತನಿಯೆ ದುಂಬು ಬರ್ಪೆ.ತನಿಯೆ ಕಾಪುದಡೆ ಬನ್ನಗ 7 ಮಲೆತ 7 ಜಿಡೆತ ಸಂಕಮಾಲೆ ಸಾದಿಡ್ ಜೆತ್ತ್ ದುಪ್ಪುವೆ.ಅವು ತನಿಯಗ್ ದೂರೊಡೇ ತೆರಿಯುಂಡು.ಕೈತಡಎ ಬತ್ತ್ ನಾಯೆ,ಯಾನ್ ಬಡಕಾಯಿ ರಾಜ್ಯೊರ್ದು ತೆನ್ಕಾಯಿ ರಾಜ್ಯೊಗು ಪೋಯೆರೆ ಬತ್ತ್ ದೆ,ಎಂಕ್ ಸಾದಿ ಬುಡ್ಲಂದ್ ಕೇನುವೆ.ಮೂಜಿ ಸರ್ತಿ ಸಾರ್ದ್ ಪನ್ನಗಲ ಉಚ್ಚು ಪಂದುಜಿ.ಕೋಪ ಬತ್ತ್ ನ ತನಿಯಗ್ ಅಂಚಿಂಚಿ ತೂನಗ ನೆಡಿಲ್ದ ಬೂರು ತೋಜುಂಡು.ಸಈದ ಪೋದು ಸೊಂಟದ ಅಂಕೋಡಿಡ್ದ್ ಕತ್ತಿ ದೆತ್ತ್ ದ್ ನೆಡಿಲ್ ಬೂರು ಕಡ್ಪುವೆ.ನೆಡಿಲ್ದ ಬೂರು ತೂವೆರೆ ಪದ್ಪೆದ ದಂಟ್ ದಲೆಕ ಉಪ್ಪುಂಡು.ಹಾಕ್ ನಗ ಪಲ್ಕುಂಡು.ನೆಡಿಲ್ದ ಬೂರುದ ಪೆಟ್ಟ್ ಕಾಯುನಿ ಜಾಸ್ತಿ.ಕೊರಗ ಜನಾಂಗದ ಬೇಲೆಗ್ ಒದಗುನ ಬೂರವು.ನೆಡಿಲ್ದ ಬೂರುಡು ಆ ಉಚ್ಚುನು ಮುಗಿತ್ ದ್ ಬುಡ್ಪೆ." ಇನಿರ್ದ್ ಬೊಕ್ಕ ಇಡೀ ಎನ್ನ ಕುಲ ಜಾತಿಗ್ ಒವ್ವೇ ಒಂಜಿ ಇಸ ಜಂತುದ ದೋಸ ಇಜ್ಜಿ " ಪನ್ಪೆ.ಮೂಜಿ ಸರ್ತಿ ಎನ್ನ ಕುಲ ಬರಿತಕುಲು ಸಾರುವೆರ್.ಮೂಜಿ ಸರ್ತಿ ಎನ್ನ ಕುಲಬರಿತಕುಲು ಸಾರ್ನಗ ಸಾದಿ ಬುಡ್ಜಿಂಡ ನಿನ್ನ ಕುಲತ ಇಸ ಜಂತುಲೆನ ಕಥೆ ಮುಗಿತೆರ್ಡ ಅವೆರ್ದ್ ಬೊಕ್ಕ ಬರ್ಪುನ ಒವ್ವೇ ದೋಸ ಇನಿರ್ದ್ ಬೊಕ್ಕ ಇಜ್ಜಿಂದ್ ತನಿಯೆ ಪನ್ಪೆ.

        ಏಳ್ ಮಲೆ,ಏಳ್ ಜಿಡೆತ ಸಂಕಮಾಲೆನ್ ಮುಗಿತ್ ನ ತನಿಯೆ ಸೀದಾ ಕಾಪುದ ತನ್ನ ಸಮುದಾಯದಕ್ಲೆನ ಇಲ್ಲಡೆ ಪೋಪೆ.ಕಾಪುಡು  ತನಿಯನ ಅಮ್ಮೆ ಓಡಿನ ಕುಟುಮ ಇತ್ತ್ ದ್ ಅಡೆಗ್ಲಾ ಬತ್ತ್ ದ್ ಒಂಜಿ ಇರ್ಲ್ ಅವ್ಲು ಇತ್ತ್ ದ್ ಪೋಪೆ.ಮೂಲೆ ಕುಲ್ಲಂದ್ ಕಾಪುದಕುಲು ಪನ್ನಗ,ಇಜ್ಜಿ,ಎನ್ನ ಬೇಲೆ ಮಸ್ತ್ ಉಂಡು,ಎನ್ನ ಬೇಲೆ ಆಯಿ ಸಾತ್ ಗ್ ಯಾನ್ ನಿಕ್ಲೆಗ್ ತಿಕ್ವೆಂದ್ ಪನ್ಪೆ.ದುಂಬುಗು ಅವ್ಲವ್ಲು ಉಂತುದು ಬೇತೆ ಬೇತೆ ತಿಕ್ ಡ್ ಬಾಜೆಲ್ ಕೇನೊಂದು ಬರ್ಪೆ.ಬತ್ತ್ ಬತ್ತ್ ದ್ ಕಡೇಕ್ ಮಂಗ್ಳೂರ ಗಡಿಕ್ ಬರ್ಪೆ.ಅವು ಓಲು ಪನ್ಪುನ ಸ್ಪಷ್ಟತೆ ಈ ಜನಾಂಗದ ಕಥೆಟಿಜ್ಜಿ.ಕೆಲವೊಂಜಿ ಮೂಲದ ಪ್ರಕಾರ ಕೊರಗತನಿಯನ ಕಥೆ ಪಣಂಬೂರ ಪಟ್ಟಸಾಲೆರ್ದ್ ಸುರಾಪುಂಡು.ಆಂಡ ಪಣಂಬೂರುಡು ಕೊರಗ ತನಿಯನ ಅಮ್ಮೆರ್ನ ಕುಟುಮದ ಇಲ್ಲ್ ಇತ್ತ್ಂಡ್.ಆಂಡ ಕೊರಗ ತನಿಯನ ಕಥೆಟ್ ಬರ್ಪುನ  ಆನಿದ ಪಣಂಬೂರು ಕಡಲ್ದಡಿಟ್ ಉಂಡುಗೆ.ಕಡಲ್ ಏತೋ ದೂರ ಬೂಮಿನ್ ನಿಂಗೊಂದು ಬೈದ್ಂಡ್ ಗೆ.ಕೊರಗತನಿಯೆ ಅಮ್ಮೆರ್ ಓಡಿನ ಪಣಂಬೂರು ಪಟ್ಟಸಾಲೆಗ್ ಬೈದ್ ನವು ಸತ್ಯ.ಆನಿದ ಪಣಂಬೂರ್ದ ಕೊರಗೆರಿತ್ತಿ ಜಾಗ್ ಕಡಲ್ದ ಅಡಿಟುಂಡುಗೆ.ಇತ್ತೆದ ಪಣಂಬೂರುಡು ಉಂದು ತಿಕ್ಕುಜಿ.ಒಂಜಿ ಕಾಲೊಡು ಪಣಂಬೂರುದ ಆ ಜಾಗೆಡ್ ಬಾರ್ಯಾತ್ ಕೊರಗ ಜನಾಂಗದ ಕುಟುಮೊಲಿತ್ತ್ ದ್ ಕೊರಗತನಿಯನ ಅಮ್ಮೆರ್ನ ಕುಟುಮದಕುಲು ಅವ್ಲಿತ್ತೆರ್.

                          ಕಥೆ ದುಂಪೋಪುಂಡು.........

ಚಾಮುಂಡಿ ಗುಳಿಗ ದೈವ ದೇವಿ ಚಾಮುಂಡೇಶ್ವರಿಯತ್ತ್

      ಚಾಮುಂಡಿ ಗುಳಿಗ ದೈವ ದೇವಿ ಚಾಮುಂಡೇಶ್ವರಿಯತ್ತ್    

                      ಚೌಂಡಿ-ಚಾವುಂಡಿ-ಚಾಮುಂಡಿ

            " ಬೊಲ್ಕಲ್ಲ ಗುಡ್ಡೆಡ್ ಆಲಿಕಲ್ಲ ಕೆರೆಟ್ ಆಜಿ ಎಸಲ್ ಡ್ ಮೂಜಿ ಕುಸುಮೊಡು ಉದಿಯ ಉದಿಪನ ಆಯೆರ್ ಚಾಮುಂಡಿಯಮ್ಮ"-ಸಂದಿ ಪಾಡ್ದನ.

ನನೊಂಜಿ ಸಂದಿ ಪಾಡ್ದನದ ಪ್ರಕಾರ ಒಂಜಿ ಕೆರೆಟ್ ಏಳೇಳ್ ಎಸಳ್ ದ ಪದಿನಾಲ್ ಎಸಲ್ದ ಒಂಜಿ ತಾಮರೆದ ನಡುಟು ಚಾಮುಂಡ್ಯಮ್ಮ ಉದಿಪನ ಆಯೆರ್ಂದುಂಡು.ಸಂದಿ ಪಾಡ್ದನೊಡ್ಲ ಬಾಯಿಡ್ದ್ ಬಾಯಿಗ್ ಬನ್ನಗ ಎತ್ತೇಸೊಲಾಪ.ಪುರಾಣೊಲೆನ್ ಪ್ರಶ್ನೆ ಮಲ್ತ್ಂಡ ಎಂಚ ಮೂಲ ತಿಕ್ಕುಜಾ ಅಂಚನೆ ಸಂದಿ ಪಾಡ್ದನೊಲೆನ್ ಪ್ರಶ್ನೆ  ಮಲ್ತ್ಂಡ ಮೂಲ ತಿಕ್ಕುಜಿ.

                 ‌‌               ಚಾಮುಂಡಿ ದೈವದ ಮುಗ

ದುಂಬುದ ಕಾಲೊಡು ಚಾವುಂಡಿ ಗುಳಿಗನ್ ಮಣ್ಣ್ ದ ಒರುವಾಯಿ ಕಡ್ಪ ಕಲ್ಲ್ /ಕೆಂಪು ಕಲ್ಲ್ ಡೇ ನಂಬೊಂತ್ ನಿ.

         ಚಾಮುಂಡಿನ ಕಥೆ ಒಂಜಿ ಮೂಲದ ಪ್ರಕಾರ ಇಂಚ ಬರ್ಪುಂಡು.ಸೃಷ್ಠಿಯಾನಗ ಪಂಜುರ್ಲಿನ ಜೊತೆಟಿತ್ತ್ ನಿ ಚಾಮುಂಡಿ ಬೂತ.ಗಟ್ಟದ ಮಿತ್ತ್ ಸಾರಮಾನ್ಯ ಬೂತೊಲೆಗ್ಂದ್ ಕುದುರೆಮುಖತ ಒಂಜಿ ಜಾಗೆಡ್ ನಡಪುಂಡು.ಅವ್ಲು ಆತ್ ಕೊಡಿರೆ ಪಾಡ್ದ್ ಬಲಸುವೆರ್.ಆತ್ ದೈವೊಲುಲ್ಲಂದ್ ಲೆಕ್ಕ.ಈತ್ ದೈವೊಲ್ಲಾ ಪುಟ್ಟಿ ಜಾಗ್ ಗಟ್ಟದ ಮಿತ್ತ ಕುದುರೆಮುಖಗೆ.ಅಲ್ಪ ಪಂಜುರ್ಲಿಲ ಚಾಮುಂಡ್ಯಮ್ಮಲ ಬೇತೆ ಬೇತೆ.ಪಂಜುರ್ಲಿಗ್ ಅವ್ಲು ಸತ್ಯ ದರ್ಮದ ಜಾಗೆ ತಿಕ್ಕಂದೆ ಎಂಕ್ ಲ ಚಾಮುಂಡಿಗ್ಲ ಪರಿಶುದ್ದವಾಯಿನ ಜಾಗೆ ನಿಲೆಯಾಯೆರೆ ಬೋಡುಂದು ಸಾರಮಾನ್ಯ ಬೂತೊಲ್ನಲ್ತ್  ಪಂಜುರ್ಲಿ,ಚಾಮುಂಡಿ,ಗುಳಿಗೆ ಪಿದಾಡ್ವೆರ್.ಅರ್ದ ಸಾದಿ ನಡತ್ ಬನ್ನಗ ಬತ್ತ್ ನ ಎಚ್ಚಾಂಡ,ಪೋಯೆರೆ ಎಚ್ಚ ಉಂಡಾಂದ್ ಚಾಮುಂಡಿ ಪಂಜುರ್ಲಿಡ ಕೇನುವೆರ್.ಬತ್ತ್ ನ ದಿಂಜ ಬತ್ತ,ಪೋಯೆರುಪ್ಪುನಿ ಒಂತೆಂದ್ ಪಂಜುರ್ಲಿ ಚಾಮುಂಡಿಡ ಪನ್ಪೆ.ಗುಳಿಗೆಲ ಚಾಮುಂಡಿಗ್ ಪಂಜುರ್ಲಿ ಪನ್ಲೆಕನೆ ಪನ್ಪೆ.ಅಲ್ತ್ ಗಟ್ಟ ಜತ್ತ್ ನ ಮೂವೆರೆಡ್ ಚಾಮುಂಡಿ ಮೇಲ್/ಮಿತ್ತ ಬಂಗಾಡಿಡ್ ಪಂಜುರ್ಲಿನ್ ಬುಡ್ಪಲ್.ಪಂಜುರ್ಲಿನ್ ಅವ್ಲು ಬುಡ್ದು ಚಾಮುಂಡಿ,ಗುಳಿಗನಕುಲು ಸುದೆ ಪತ್ತ್ ದ್ ಬಂಗಾಡಿಡ್ದ್ ಪೋನಗ ವೇಣೂರು ತಿಕ್ಕುಂಡು.ಸುದೆ ಪತ್ತ್ ದ್ ಪೋನಗ ಕೊಡಮಂದಾಯನ್ ಬೇಟಿಯಾಪೆರ್.ಅಲ್ತ್ ದುಂಬುಗು ಕಟೀಲ್ದ ಉಲ್ಲಾಯ ಉಲ್ಲಾಲ್ದಿನಡೆ ಬರ್ಪೆರ್.ಕುದುರೆಮುಖೊರ್ದು ಬತ್ತ್ ನ ಮೂವೆರೆಡ್ ಪಂಜುರ್ಲಿಮಿತ್ತ ಬಂಗಾಡಿಡ್ ಒರಿಂಡ. ಪೆರಿಂಜೆಗ್ ಬತ್ತ್ ನ ಚಾಮುಂಡಿ ಗುಳಿಗನೆಟ್ ಚಾಮುಂಡಿ ಕೊಡಮಂದಾಯೆ ಆಯೆಂದ್ ಲ ಪನ್ಪೆರ್.ದೈವೊನು ಇಂಚನೆಂದ್ ಏರೆಗ್ಲ ಪನೆರೆ ಸಾದ್ಯ ಇಜ್ಜಿ.ಅಲ್ತ್ ರ್ದ್ ಕಡತ್ ಪೋನಗ ಕಟಿಲ್ಡ್. ಉಲ್ಲಾಯೆ, ಉಲ್ಲಾಲ್ದಿಯಾಪೆರ್.ಚಾಮುಂಡಿ ಸಂದಿ ಕಟ್ಟ್ ಡ್ ಪನ್ನಗ  ಯಾನ್ ಒವ್ವೊವ್ವಾಯೆಂದ್ ಪನೆರೆ ಉಂಡು.ಅವೆನ್ ಇತ್ತೆದಕುಲು ನಂಬುಜೆರ್.

"ಚಾಮುಂಡಿ ದೈವ ಇಂಚನೇ ಲೆತ್ತ್ ದ್ ನಂಬುನಕ್ಲೆನ ಪಿರವು ಬತ್ತ್ ನ ದೈವ ಅತ್ತ್.ಅವು ಗ್ರಾಮ ದೈವಲಾ ಅತ್ತ್,ಕುಟುಮ ದೈವಲಾ ಅತ್ತ್.ದೈವ ಕೋಲೊಡು ದೈವಡ ನಟ್ಟೊಂಡಲಾ ದೈವ ನಟ್ಟೊನ್ನಕ್ಲೆನ ಪಿರವು ಬರ್ಪುನ ದೈವಲಾ ಅತ್ತ್.ಒಂಜಿ ಕಾಲೊಡು ನಮ್ಮ ಪೂರ್ವ ಹಿರಿಯಾಕುಲು ಬಡಪೊತ್ತುಡ್ದಾದ್ ಗಟ್ಟದ ಮಿತ್ತ್ ಬೆನೆರೆ ಪೋದು ಅಲ್ತ್  ದಾದಾಂಡಲಾ ಸೊತ್ತುಲೆನ್(ಕಾಪಿ,ಏಲಕ್ಕಿ),ಕರ್ಬದ ತುಂಡುಲೆನ್ ಕಂಡೊಂದು ಬತ್ತ್ ನಕ್ಲೆನ ಪಿರವುಡು ಬತ್ತಿನ ದೈವ,ಇಂಚನೆ ನಂಬುದು ಬತ್ತಿನವತ್ತ್.ಅಂಚನೆ ಅವು ಅಕ್ಲೆನ ತರೆ ತರವಾಡ್ ಮುಟ್ಟಲ ಬತ್ತ್ ದ್ ಇನಿಲಾ ಪೂರ್ವ ಹಿರಿಯಾಕ್ಲ್ ಮಲ್ತಿ ತಪ್ಪುಗು ಆ ದೈವೊನು ನಂಬೊಂದುಲ್ಲೆರ್.ಅಂಚನೆ ಚಾಮುಂಡಿ ತಪ್ಪು ಮಲ್ತ್ ನಕ್ಲೆ ಪಿರಾವುಡು ದೈವ ಪಿರವು ಬತ್ತ್ ನೆಡ್ದಾದ್ ಅಕ್ಲೆಗ್ ಆಣ ಸಂಸಾರ ಪಲಿತ(ಆಣ್ಜೋಕ್ಲು ಪುಟ್ಟುನ ಬಾಗ್ಯ ) ಇಜ್ಜಿಗೆ,ಪೊಣ್ಣ ಸಂಸಾರಲ ಪಲಿತೊಗು ತಿಕ್ಕುಜಿಗೆ.ಅಂಚಾದ್ ಆ ದೈವೊನು ಆನಿ ಕಾಲೊಡ್ದು ಏನಿ ಕಾಲ ಮುಟ್ಟ ನಂಬಂದೆ ಉಪ್ಪೆರೆ ಸಾದ್ಯನೇ ಇಜ್ಜಿಗೆ ."

           ಮೂಲೊಡು ತುಳುನಾಡ್ ಡ್ ಇಜ್ಜಂದಿ ಚಾಮುಂಡಿ ದೈವೊನು ಗುಳಿಗನೊಟ್ಟುಗು ಚಾಮುಂಡಿ ಗುಳಿಗೆಯಾದ್ ಒಂಜಾತ್ ಕಾಲೊರ್ದಿಂಚಿ ನಂಬುದು ತುಳುನಾಡ್ ಡ್ ಕೋಲ ಕೊರೊಂದುಲ್ಲೆರ್.  ತುಳುನಾಡೊರ್ಮೆ ಇನಿತ ದಿನಮಾನೊಲೆಡ್ ಚಾಮುಂಡಿ ಗುಳಿಗ ದೈವೊದ ಚಾಮುಂಡಿ ದೈವೊನು ಚಂಡ ಮುಂಡ ರಕ್ಕಸೆರೆನ್ ಕೆರ್ನ ದೇವಿ ಚಾಮುಂಡೇಶ್ವರಿ ಮಲ್ತೊಂದುಲ್ಲೆರ್,ರಕ್ತ ಬೀಜಾಸುರನ್ ಕೆರ್ನ ರಕ್ತೇಶ್ವರಿ ಮಲ್ತೊಂದುಲ್ಲೆರ್,ದೈಬಿತ್ತಿಲ್ ದ ಭಗವತಿಂದ್ ಪನೊಂದುಲ್ಲೆರ್.ಅಂಚನೆ ಇನಿ ದೈವ ಮೈಸೂರು ಮಹಾರಾಜೆರೆನ್ ಮೂಜಿ ಸರ್ತಿ ಲೆತ್ತ್ ದ್ ಅವೆರ್ದ್ ಬೊಕ್ಕ ತಂತಿರ್ದಾರೆನ್ ಲೆಪ್ಪುನಿಗೆ.ತುಳುನಾಡ್ ದ ವಾ ದೈವಾರಾದನೆಡ್ಲ ಇಂಚ ಲೆಪ್ಪುನ ಕೆರಮನೇ ಇಜ್ಜಿ,ತುಳುನಾಡ್ ಡ್ ದೇವಿ‌ಮಹಾತ್ಮೆ ಆಟದ ಪ್ರಸಂಗ ಬರ್ಪುನ ದುಂಬೇ  ದೈವಾರಾದನೆ ಇತ್ತ್ಂಡ್ ಪನ್ಪುನೆನ್ ಕೆಲವೆರ್ ಮದತ್ ಲೆಕ ತೋಜುಂಡು.ಅಂಚನೆ ಇನಿ ಕೆಲವೆರ್ ದೈವೊಗು ಕಟ್ಟ್ ದ್ ತುಳುನಾಡ್ ಡ್ಲ ಕನ್ನಡೊಡು ನುಡಿ ಕೊರೊಂದುಲ್ಲೆರ್.ಉಂದು ತಪ್ಪು.ದಾಯೆ ಕನ್ನಡದ ನುಡಿ ಬತ್ತ್ಂಡ್ ಪಂಡ ತುಳುನಾಡ್ ದ ಕಟ್ಟುನಕುಲು ಗಟ್ಟದ ಮಿತ್ತ್ ಪೋದು ಕಟ್ಟ್ ನಗ ಅಲ್ತ ಜನೊಕ್ಲೆಗ್ ತುಳು ಅರ್ಥ ಆಪುಜಿಂದ್ ಕನ್ನಡೊಡು ನುಡಿ ಕೊರೊಂತೆರ್.ಇತ್ತೆ ಅವು ಕಟ್ಟುನಕ್ಲೆಗ್ ಅಬ್ಬೆಸ ಆದ್ ತುಳುನಾಡ್ ಡ್ಲಾ ಚಾಮುಂಡಿ ಗುಳಿಗಗ್ ಕಟ್ಟ್ ದ್ ಕನ್ನಡೊಡು ನುಡಿ ಕೊರೊಂದುಲ್ಲೆರ್.ಉಂದು ತಪ್ಪು.ತುಳುನಾಡ್ ಡ್ ತುಳುಟೇ ನುಡಿ ಕೊರೊಡು.ಅಂಚನೆ ಚಾಮುಂಡಿ ದೈವೊನು  ದುಂಬುದ ಕಾಲೊಡು ಗುಳಿಗಗ್ ಕಟ್ಟುನಕುಲು ಮುಟ್ಟೆರೆ ಇಜ್ಜಾಂಡ್.ಇನಿ ಗುಳಿಗನಕುಲು ಚಾಮುಂಡಿ ದೈವೊನು ಅರಾದ್ ಪತ್ತುನಡೆ ಎತ್ತ್ ದೆರ್.ಗುಳಿಗೆ ನೆತ್ತೆರಾವಾರ ಪೋನಗ ಚಾಮುಂಡಿ ದೈವ ತಿರ್ಗ್ ದ್ ಉಂತುನತ್ತಂದೆ ಚಾಮುಂಡಿ ಬೊಕ್ಕ ಗುಳಿಗನ ನಡುಟು ಕೆಂಪು ಕುಂಟುದ ಪರ್ದೆ ಕಟ್ಟೊಂತೆರ್.ಗೋಂದೋಲು ನಲಿಕೆಡ್  ಗಡುವಾಡಿ ಜಾಗೆಡ್ ಪಂಜಿದ ನೆತ್ತೆರಾವಾರ. ಕೊರ್ನಗ ಪಂಜುರ್ಲಿ ದೈವೊ ದೈವ ಕಲತ ಅಮ್ನೋರ್ನ ಗದ್ದಿಗೆಗ್ ಮೋನೆ ಪಾಡ್ದ್ ಉಂತುದಿಪ್ಪುಂಡು.ಚಾಮುಂಡಿ ಗುಳಿಗೆ ನೇಮದ ಕಲೊಟು ಒಟ್ಟಿಗೆ ಲಕ್ಕುನ ಕೆರಮ.

                                  ಚಾಮುಂಡಿ ಗುಳಿಗೆ

   ಚಾಮುಂಡಿನ ನನೊಂಜಿ ಕಥೆ ಇಂಚ ಉಂಡು. ಬಡಕಾಯಿ ಬಡಗಣ ದೇಶೊಡ್ದು(ರಾಜ್ಯೊರ್ದು)  ಬಿಜ್ಜಳ ರಾಯನ ಎಳ್ ಜನ ಪೊಣ್ಣು ಜೋಕುಲು ಊರು ಜತ್ತ್ ದ್ ಬರ್ಪುನಕುಲು ಏಳ್ ಜನ ಏಳ್ ತಿಕ್ ಡ್ ಉಂತುವೆರ್.ಈ ಏಳ್ ಜನ ಮೆಗ್ ದಿ ಪಲ್ಯಲ್ಲೆಡ್ ಕಡೇತಾಲ್ ಚಾಮುಂಡಿ.ನರಮಾನಿಯಾದ್ ಪುಟ್ಟುದು ದೈವ ಆದ್ ಮಾಯೆಡ್ ಸೇರ್ದ್ ಗಟ್ಟೊರ್ದು ತಿರ್ತ್ ದಿಟ್ಟಿ ದೀದ್ ತುಳುನಾಡೊರ್ಮೆ ಆರಾದನೆ ಪಡೆಯೊಂದಿಪ್ಪುನ ಚಾವುಂಡಿ/ಚಾಮುಂಡಿನೊಟ್ಟುಗು ಉಪ್ಪುನ ಗುಳಿಗ ದೈವ ಏರ್ ಪಂಡ ಕತ್ತಲೆಕಾನ ತೋಟದ ಗುಳಿಗೆಂದ್ ಪನ್ಪೆರ್.ಅವುಲು ಇನಿಲಾ ಕತ್ತಲೆನೇ ದಿಂಜಿದುಪ್ಪುನಿಗೆ.ಕತ್ತಲೆದ ಕಾನನ ಕತ್ತಲೆ ಕಾನ.ಕಾನ ಪಂಡ ಕತ್ತಲೆ ದಿಂಜಿ ಕಾಡ್(ದಟ್ಟಡವಿ)ಅಲ್ತ ಕಾಡ್ಡ್ ವಾ ಜಾಗೆ ತೂಂಡಲಾ ಗುಳಿಗನ ಸುಂಯ್ಪಾಟಿಗೆ ಕೇನುಂಡುಗೆ.ಅಲ್ತ ಪುದೆಲ್,ಮರ,ಗುವೆಲ್ ಪೂರೆಟ್ಲ ಗುಳಿಗೆ ಸುಂಯ್ಪುನ ಕೇನುಂಡುಗೆ.ಅಡೆ ಜನೊಕ್ಲೆಗ್ ಏರೆಗ್ಲ ಪೋಯೆರೆ ಆಪುಜಿಗೆ.

ಕತ್ತಲೆ ಕಾನ ಗುಳಿಗೆ ಉಂಡಾಯಿ ಜಾಗೆ  (ಆದಿ ಸ್ಥಳ),ಕತ್ತಲೆ ಕಾನ ಬೀಮ್ ರಾಯ ತೋಟ (ಚಿತ್ರ ಕೃಪೆ-ದೈವ ದೇವೆರ್ ಇನ್ ಸ್ಟ್ರಾಗ್ರಾಂ).

ಕತ್ತಲೆ ಕಾನ ಪಡ್ಡೇಯಿ ಗಟ್ಟ(ಪಶ್ಚಿಮ ಗಟ್ಟ) ಸಿದ್ದಾಪುರ ತಾಲೂಕು ಮಾವಿನ ಗುಂಡಿ-ಹೊನ್ನಾವರ ರಾಷ್ಟ್ರೀಯ ಹೆದ್ದಾರಿಡ್ ತೂಯೆರೆ ತಿಕ್ಕುಂಡು.

       ಕೆಲವು ತಿಕ್ ಡ್ ಚಾಮುಂಡಿ ಗುಳಿಗನೊಟ್ಟುಗು ರಾವು ಉಪ್ಪುನಲಾ ಉಂಡು.ಅಂಚನೆ ಚಾವುಂಡಿ ಗುಳಿಗನೊಟ್ಟುಗು ಉಪ್ಪುನ ನನೊಂಜಿ ದೈವೀ ಸಗ್ತಿ ಪಂಡ ಜಟ್ಟಿಂಗ ದೈವ.ನಿಜವಾದ್ ಚಾಮುಂಡಿ ಗುಳಿಗನ ಆರಾದನೆಡ್ ದೈವೊಗು ಅಣಿ ಪಾಡೆರೆ ಇಜ್ಜಿ.ಆಂಡ ಇನಿ ಚಾಮುಂಡಿ ದೈವೊಗು ಚಕ್ರಾಕಾರದ ಅಣಿ ಪಾಡುನತ್ತಂದೆ ಮೋನೆಗ್ ಪೊಸಪೊಸ ನಮುನೆದ  ರಂಗ್ ಪಾಡುವೆರ್.ಅಂಚನೆ ಚಾಮುಂಡಿ ಗುಳಿಗನ್ ನಂಬುಂಡ  ಓಲು ನಂಬುಂಡಲ ಮೂಜಿ ಕಲ್ಲ್ ಪಾಡ್ ದೇ ನಂಬುನಿ.ದತ್ತ/ಎಡತ ಮರ್ಗಿಲ್ ಡ್ ಗುಳಿಗೆ,ಬಲತ ಮರ್ಗಿಲ್ ಡ್ ಚಾಮುಂಡಿನ್ ಮಾಯೆಡ್ ಪೂಜೆ ಮಲ್ಪುನ ಜಟ್ಟಿಂಗನ ಕಲ್ಲಿಪ್ಪುಂಡು.

     ಚಾಮುಂಡಿನೊಟ್ಟುಗು ಉಪ್ಪುನ ರಾವು ಬೊಕ್ಕ ಗುಳಿಗೆ.

ಇತ್ತೆ ಅಡೆ ಜೋಡು ಗುಳಿಗನಕುಲು ಬೈದೆರ್.ನಿಜವಾದ್ ಕತ್ತಲೆಕಾನ ಗುಳಿಗೆ ಬೊಕ್ಕ ಜಟ್ಟಿಂಗೆ ಚೌಂಡಿನೊಟ್ಟುಗು ಉಪ್ಪೊಡಾಯಿನಿ.

          ಚಾಮುಂಡಿ ಗುಳಿಗೆ ಕುಟುಮ ದೈವಲ ಅತ್ತ್,ಗ್ರಾಮ ದೈವಲಾ ಅತ್ತ್,ಸಾಮಾನ್ಯವಾದ್ ಎನ್ನಿಲೆಕ ನಂಬುನ ದೈವಲಾ ಅತ್ತ್.ಅವು ಅನ್ಯಾಯ ಮಲ್ತಿನಕ್ಲೆನ,ಕಸುವು(ಕಂಡ್ ನಕ್ಲೆನ) ಮಲ್ತ್ ನಕ್ಲೆನ,ತಪ್ಪು ಮಲ್ತ್ ನಕ್ಲೆನ ಬೆರಿ ಪತ್ತ್ ದ್ ಬೈದ್ ನ ದೈವ.ಅಂಚನೆ ಗಟ್ಟದ ಮಿತ್ತ್ ತುಳುನಾಡ್ ರ್ದ್ ಪೋಯಿನಕುಲೆಡ್ ಆಣ್ ಪೊಣ್ಣುಲೆಗ್ ಅವ್ಲು ತಪ್ಪು ಸಾದಿದ ಸಮ್ಮಂದೊಲು ಕೂಡ್ಂಡ ಚಾಮುಂಡಿ ದೈವೊಗು ಅಕುಲು ಏರಾದ್ ಕೊರ್ಂಡ,ಅಕುಲು ಬೇಜಾರ್ ಡ್ ನೆಲಕೈ ಹಾಕ್ಯೆರ್ಡ ಅಕ್ಲೆ ಪಿರವು ಚಾಮುಂಡಿ ದೈವ ಬರೊಂತ್ಂಡ್ ,ಬತ್ತ್ ದ್ ತನ್ನ ಶಕ್ತಿ ಸಾಮರ್ಥ್ಯೊನು ತೋಜಾಯಿನ ದೈವ, ಏಳ್ ಜೀವ ದೆತ್ತ್ಂಡಲಾ ಜೂವೊಲು ಎಂಚ ಪೋಯಂದ್ ನಿಮಿತ್ತ ನೋಟೊಗು ಇಜ್ಜಿಗೆ.ಚಾಮುಂಡಿ ಬತ್ತ್ ನೌಲು ಪೊಣ್ಣ ಸಂಸಾರ ಅಳಿಯಂತ್ರ ಆಯಿನವೇ ಜಾಸ್ತಿ,ಆಣ ಸಂಸಾರ ಪುಟ್ಟುನ್ಲ ಕಮ್ಮಿಗೆ.ಅಂಚಿ ಕಾರ್ನಿಕದ ದೈವ ಚಾಮುಂಡಿ.ಆಲಿನೊಟ್ಟುಗು ಚಾಮುಂಡಿ ದೈವ ಇತ್ತ್ ದ್ ಆಲಿ ಚಾಮುಂಡಿಂದ್ ಆರಾದನೆ ಉಂಡು.ಆಂಡ ಈ ದೈವದ ಕಥೆ ಬೇತೆನೇ ಉಂಡು.ಅವು ಗಟ್ಟದ ಮಿತ್ತ್ ರ್ದ್ ಜತ್ತ್ ಬತ್ತ್ ನ ಚಾಮುಂಡಿ ಉಗ್ರ ದ.ಮಂತ್ರ ಮೂರ್ತಿ ಚಾಮುಂಡಿ(ಆಲಿ ಚಾಮುಂಡಿ ದೈವ ಮಾಯಿತಿ-ಕಾರ್ತಿಕ್ ಕರ್ಕೇರ).ಕೋಮರನೊಟ್ಟುಗು ಚಾಮುಂಡಿ ದೈವ ಇತ್ತ್ ದ್ ಕೋಮರ ಚಾಮುಂಡಿಂದ್ ಆರಾದನೆ ಉಂಡು .ಕೇರಳ ಕಾಸರಗೋಡು ಬಾಗೊಡು ಪಡಿಂಞಾರ್ ಚಾವುಂಡಿಂದ್ ಪಡ್ಡೇಯಿ ಜುಮಾದಿನ ಆರಾದನೆ ಉಂಡು.ಮಲೆ ಚಾಮುಂಡಿ,ಗುಡ್ಡೆ ಚಾಮುಂಡಿನ ಆರಾದನೆಲ ತುಳುನಾಡ್ ಡ್ ಉಂಡು.ಆಂಡ ತುಳುನಾಡ ಬೇತೆ ಬೇತೆ ಚಾಮುಂಡಿ ದೈವದ ಆರಾದನೆಗ್ಲ ಚಾಮುಂಡಿ ಗುಳಿಗನ ಆರಾದನೆಗ್ಲ ಎತ್ತೇಸ ಉಂಡು.ಚಾಮುಂಡಿನ ಇಸೇಸ ಪಂಡ ಅವು ಏಳ್ ಜೀವ ಕರಿಪುನೇಟ ದಾಲ ಗೊತ್ತು ಮಲ್ಪುಜಿ.ಸಯ್ಯೊಂಗುಲಾನಗ ಎಣ್ಮನೇ ಜೂವದ ಮಿತ್ತ್ ದೈವದ ದಿಟ್ಟಿ ಬೂರ್ದ್ಂಡ್ಂದಾನಗ ,ನಿಮಿತ್ತ ನೋಟೊಡು ತೂನಗ, ಚಾಮುಂಡಿ ದೈವ ಬತ್ತ್ ದ್ ತನ್ನ ಕಾರ್ನಿಕೊನು ತೋಜಾವೊಂದುಂಡುಂದು ತೆರಿಯುಂಡು.

        ‌‌‌‌                ಕೋಮರ ಚಾಮುಂಡಿ

         ಚಾಮುಂಡೇಶ್ವರಿ ದೇವಿ ಮೈಸೂರರಸೆರೆ ಕುಲದೇವಿಯಾದ್ ಮೆರೆಯೊಂದು ಬೈದ್ ನಾರ್.ಅಂಡ ತುಳುನಾಡ ಆರಾದನಾ ದೈವ ಚಾಮುಂಡಿ ನರಮಾನಿಯಾದ್ ಉದಿತ್ ದ್ ಮಾಯಾ ಸಗ್ತಿಯಾದ್ ತುಳುನಾಡ್ ಡ್ ಆರಾದನೆ ದೆತೊನುನಾರ್. ಬಡಕಾಯಿ ಬಡಗಣ ದೇಸೊಡು ಬಿಜ್ಜಳರಾಯನ 7 ಜನ ಪೊಣ್ಣು ಜೋಕುಲು ಊರು ಜತ್ತ್ ದ್ ಪೋಪುನಕುಲು.ಅವೆಟ್ ಅಕೇರಿದಾಲೆನ ಪುದರ್ ಚಾಮುಂಡಿ.ಏಳ್ ಜನ ಏಳ್ ದಿಕ್ಕ್ ಗ್ ಪೋಪೆರ್.ಕಡೇತಾಲ್ ಚಾಮುಂಡಿ ಕನ್ನಂಬಾಡಿ,ಮೈಸೂರು ರಾಜ್ಯೊಗು(ದುಂಬು ತುಲುನಾಡ್ ಸೇರ್ಲೆಕ ಕರ್ನಾಟಕೊನು ಮೈಸೂರು ರಾಜ್ಯಂದ್ ಪನೊಂತೆರ್) ಪೋದು ಅಲ್ತ್ ದುಂಬುಗು ತುಳುನಾಡ್ ಗ್ ದೈವ ಆಯಿ ಬೊಕ್ಕ ಬರ್ಪಲ್.ಪೊನ್ನಾದೇವಿ,ಮೂಗೂರುಡು ತಿಬ್ಬಾದೇವಿ, ಮೂಗ ದೇವಿ,ನಡ್ವಾಲ್ಡ್ ಚೌಡೇಶ್ವರಿ ಇಂಚ ಎಳ್ವೆರೆಡ್ ಕಡೇತಾಲ್ ಚಾಮುಂಡಿ.ಚಾಮುಂಡಿನೊಟ್ಟುಗು ಇತ್ತ್ ನ ಜಟ್ಟಿಗನ್ ಬಡಕಾಯಿದಂಚಿ(ಒಡಿಪು) ಜಟ್ಟಿಂಗೇಶ್ವರ ಪನ್ಪೆರ್.ಅಂಚನೆ ನನೊಂಜಿ ಮೂಲದ ಪ್ರಕಾರ ಮೂಡಾಯಿ ಗಟ್ಟದ (ಚಾರ್ಮಾಡಿ)ಮಿತ್ತ್ ಉಂತುದು ತುಳುನಾಡ ಸೀಮೆ ತೂಯಿನ ಚಾಮುಂಡಿ ದೈವ ವೇಣೂರುದ ಕರ್ಬ ಸೇತ್ ಮೆ ದಾಂಟ್ ದ್ ಬೆದ್ರದ ಸಾರಾಳ ಸೀಮೆಗ್  ಬರ್ಪಲ್.

  

ಚಾಮುಂಡಿ ದೈವ ಚಾಮುಂಡೇಶ್ವರಿಯಾದ್ ಕಿರೀಟ ದೀತ್ ನಿ.

     ಚಾಮುಂಡಿನ ಆರಾದನೆಡ್ ಸಂದಿರ್ದ್ ಪ್ರದಾನ ನಾಲ್ ಊರುದ ಕಟ್ಟ್-

ಕತ್ತಲೆ ಕಾನ,

ಭೀಮರಾಯ ತೋಟ,

(ಭೀಮರಾಯ ತೋಟ ಆಂಡ ಚಾಮುಂಡಿ ಮಯಕ ಮಲ್ದ್ ನಿ ಪೂಜೆದ ಗಣಪತಿ ಭಟ್ರೆನ್) / ಎಣ್ಮೂರಾಯ ತೋಟ(ಎಣ್ಮೂರಾಯ ತೋಟ ಆಂಡ ಚಾಮುಂಡಿ ದೈವ ಮಯಕ ಮಲ್ದ್ ನಿ ಪೂಜೆದ ಭೀಮ್ರಾಯ ಭಟ್ರೆನ್)

ಆಲೆಕಾನ,

ಬೋರಿಕಾನ,

ಉಂದುವೆ ಕಟ್ಟ್ ದ ನಾಲ್ ಊರುಲು.

  

                ಚಾವುಂಡಿ ದೈವದ ಕೊಡಿಯಡಿ

    ನನೊಂಜಿ ಮೂಲದ ಪ್ರಕಾರ ಭಿಮ್ರಾಯ ತೋಟ ಅತ್ತ್,ಎಣ್ಮೂರಾಯ ತೋಟಂದ್ ಸಂದಿ ಪಾಡ್ದನ ಪನ್ಪುಂಡು.ಬಾಯಿಡ್ದ್ ಬಾಯಿಗ್ ಸಂದಿ ಪಾಡ್ದನ ಪನೊಂದು ಪೋನಗ ಎತ್ತೇಸೊಲು ಬರ್ಪ ಪೂಜೆದ ಭೀಮ ಭಟ್ರ್ಂದ್ ಬರ್ಪುಂಡು.ಆರೇ ದುಂಬು ಜಟ್ಟಿಂಗ ದೈವ ಆಪುನಿಂದ್ ಲ ಉಂಡು. ಚಾಮುಂಡಿ ದೈವ ಎಣ್ಮುರಾಯ ತೋಟೊಗು ಬತ್ತ್ ದ್ ಅಲ್ತ ಪೂಜೆದ ಭೀಮ್ರಾಯ ಬಟ್ರೆಡ, ತಾಮರೆ ಪೂತ ನಡುಟು ಎನನ್ ಈರ್  ತೂಯಿನೆನ್ ಏರೆಡಲಾ ತೂಯಿನೆನ್ ತೂಯಿಲೆಕ ಪನೊಡ್ಚಿ,ಕೇನ್ನೆನ್ ಕೇನ್ಲೆಕ ಪನೊಡ್ಚಿ,ದೇವೆರೆ ಬಲ ಬಾಗೊಡು ಈ ಪೂ ದೀದ್ ಎನನ್ ಆರಾದನೆ ಮಲ್ಪುಲೆ ಪನ್ನಗ ಅಯಿನ್ ಆರ್ ಒತ್ತೊಂದು ಪೂನು ದೇವೆರೆ ಬಲಬಾಗೊಡು ದೀಪೆರ್.ಬತ್ತ್ ನ ಭಕ್ತೆರ್ ಉಂದು ಬಾರೀ ಪೊರ್ಲುದ ಪೂ.ಈತ್ನೇಟ ಎಂಕ್ಲು ಈತ್ ಪೊರ್ಲುದ ಇಂಚಿನ ಪುನು ತೂತ್ ಜ ಪನ್ನಗ   ಬಟ್ರ್ ಪನ್ಪೆರ್ ಅವು ಪೂವತ್ತ್.ಅವು ಪೂತ ರೂಪೊಡಿಪ್ಪುನ ದೈವ ಚಾಮುಂಡಿಂದ್.ಪನ್ನ ಪಾತೆರೊನು ತತ್ತ್ ನ ಅರೆನ್ ಮಯಕ ಮಲ್ತ್ ದ್ ಜಟ್ಟಿಂಗೆಂದ್ ಚಾಮುಂಡಿ ದೈವ ಅರೆಗ್ ಪುದರ್ ಕೊರ್ಪುನಿ.

   

    ಚಾಮುಂಡಿ ದೈವ ಶಿವಾನಂದ ನಗರ ಶಂಕರಪುರ ಉಡುಪಿ

         ಎದುರುಡು ಏಳ್ ಜನ,ಪಿರವುಡು ಏಳ್ ಜನೊನು‌ ಪತೊಂದು ಗಟ್ಟದ ಮಿತ್ತ್  ಉಪ್ಪುನ ಎಣ್ಮೂರಾಯ ತೋಟೊಗು ಪಂಜಿ ಮೇಸ್ತ್ರಿ ತುಳುನಾಡ್ ಡ್ದ್ ಪೋಪೆ .ಕೋರ್ದಬ್ಬುನ ಒಟ್ಟುಗುಪ್ಪುನ ರಾವುಲ ಪಂಜಿ ಮೇಸ್ತ್ರಿನೊಟ್ಟುಗು ಗಟ್ಟೊಗು ಪೋಪುಂಡು.ಎಣ್ಮುರಾಯ ತೋಟೊಡಿತ್ತಿ ಚಾಮುಂಡಿ ದೈವ ಪಂಜಿಮೇಸ್ತ್ರಿಡ  ನಿನ್ನ ಒಟ್ಟುಗಿಪ್ಪಿ ಬೇಲೆದ ಪದಿನಾಲ್ ಜನೊಟು ಎನ್ನ ಪೂತ ದಂಡಿಗೆ ತುಂಬೆರೆ ನಾಲ್ ಜನ ಕೊರ್ಪನಾಂದ್ ಕೇನುವಲ್.ಉಂದು ಚಾಮುಂಡಿ ದೈವಂದ್ ತೆರಿನ, ದೈವದ ಮಿತ್ತ್ ನಂಬೊಳಿಗೆ ಇತ್ತ್ ನ ಆಯೆ ಎನ್ನ ಒಟ್ಟುಗು ಇತ್ತ್ ನ ಜನೊಕ್ಲೆಡ್ ಇರೆಗ್ ಬೋಡಾಯಿನ ನಾಲ್ ಜನೊಕ್ಲೆನ್ ದೆತೊನ್ಲೆಂದ್ ಪನ್ಪೆ.ಅಂಚನೆ ದೈವ ನಾಲ್ ಜನೊಕ್ಲೆನ್ ಮಯಕ ಮಲ್ತ್ ದ್ ಕಾಲಿ(ಕಪ್ಪುದಾಯೆ),ಕರ್ವಾಲಿ(ಎದುರು ಕೂಲಿದಾಯೆ),ಜೂತ(ಉದ್ದದಾಯೆ) ಜೂತಿ(ಕುದ್ಯದಾಯೆ) ಪಂಡ್ ದ್ ಪುದರ್ ಕೊರ್ದು ದಂಡಿಗೆಗ್ ಪುಗೆಲ್ ಕೊರ್ಪುನ ನಾಲ್ ಜನೊನು ದೈವ ನೇಮಕ ಮಲ್ಪುನಿ.ದುಂಬುದಕ್ಲೆನ ಪುದರ್ಲ ಸಾಮಾನ್ಯ ಅಂಚನೆ ಇಪ್ಪೆದ್ಂಡ್. .ಅಂಚನೆ ದುಂಬುಗು ಚಾಮುಂಡಿ ಬನ್ನಗ ಕತ್ತಲೆ ಕಾನೊಡು(ಕಾನ ಪಂಡ ಕಾಡ್) ಗುಳಿಗೆ ವಾರೀ ಕಾರ್ನಿಕೊಡು ಮೆರೆವೊಂದಿಪ್ಪುನವು ಚಾಮುಂಡಿಗ್ ತೋಜುಂಡು. ಚಾಮುಂಡಿನೊಟ್ಟುಗು ಗುಳಿಗೆ ಪೊರ್ಂಬುದು ಸೋತಿ ಬೊಕ್ಕ ಚಾಮುಂಡಿ ಪನ್ಲೆಕ ಕತ್ತಲೆ ಕಾನ ಗುಳಿಗೆಯಾದ್ ಮೆರೆಪುನತ್ತಂದೆ ತುಳುನಾಡ್ ಗ್ ಮೊಕ್ಲು  ಚಾಮುಂಡಿ ಗುಳಿಗೆಯಾದ್ ಜೇನುಗಲ್ಲ್,ಕರ್ಬ ಸೇತ್ಮೆ ಕರಿದ್ ಒಟ್ಟುಗು ಜಪ್ಪುವೆರ್.

(ಚಾಮುಂಡಿ-ಗುಳಿಗೆ-ಜಟ್ಟಿಂಗೆ /

ಚಾಮುಂಡಿ,ರಾವು‌-(ಪಂಜಿ ಮೇಸ್ತ್ರಿನೊಟ್ಟುಗು ಪೋಯಿ ರಾವು) ಗುಳಿಗೆ /

 ಚಾಮುಂಡಿ ಬೊಕ್ಕ ಜೋಡು ಗುಳಿಗನಕುಲು)

ಮಂಗ್ಳೂರ್ ಸೀಮೆಡ್ ಚಾಮುಂಡಿ ಗುಳಿಗನೊಟ್ಟುಗು ಜಟ್ಟಿಂಗನ ಕಲ್ಲ್ ಉಂಡು.ಜಟ್ಟಿಂಗನ ಕೋಲ ಇಜ್ಜಿ.ಒಡಿಪುದ ಬಾಗೊಲೆಡ್ ಜಟ್ಟಿಂಗನ ಕಲ್ಲ್ ಲ ಚಾಮುಂಡಿ‌ ಗುಳಿಗನೊಟ್ಟುಗು ಉಂಡು.ಚಾಮುಂಡಿ ಗುಳಿಗನೊಟ್ಟುಗು ಜಟ್ಟಿಂಗಗ್ ಬಟ್ರೆನ ಒರುಟು ಕೋಲ ಉಂಡು. ಉಂದು ಪಾಡ್ದನ ಸಾಲ್ ದ ಪ್ರಾದೇಶಿಕ ಭಿನ್ನತೆ ಆತೆ.

           ಸಾರತ್ತೊಂಜಿ ಪಾಳೆದಣಿತ ಗುಡ್ಡೆ ಚಾಮುಂಡಿ ದೈವ.   

       ಚಾಮುಂಡಿ  ಪಂಡ ಶಿವ ಶಕ್ತಿ.ಶಿವನ್ (ನಂಜುಂಡೇಶ್ವರನ್)  ಈ ಜಲ್ಮೊಡು ಕುಡ ಮದಿಮೆ ಆಯೆರೆ ಬಯಕುವಲ್.ಮೂಲು ಮದಿಮೆ ಕಡಿದ್ ಬೂರುಂಡು(ಭಂಗ ಆಪುಂಡು).ಅಪಗ ಚಾಮುಂಡಿ ದೈವತ್ವ ಪಡೆದ್ ಚಾಮುಂಡಿ ದೈವ ಆಪಲ್ ಪನ್ಪಿ ಒಂಜಿ ಪುರಾಣ ಸಂಬಂದಿ ನಂಬೊಳಿಗೆಲ ಉಂಡು. ಬೊಲ್ಕಲ್ಲ ಗುಡ್ಡೆಡ್ ಆಲಿಕಲ್ಲ ಕೆರೆಟ್ ಆಜಿ ಎಸಲ್ ಡ್ ಮೂಜಿ ಕುಸುಮೊಡು ಉದಿಯ ಉದಿಪನ ಆಪೆರ್ ಚಾಮುಂಡಿಯಮ್ಮಂದ್ ಸಂದಿ ಪನ್ಪುಂಡು.ಆಲಿಕಲ್ಲ ಕೆರೆ ಪಂಡ ಸಿಮ(ಹಿಮ) ಸಿಮ ಚಳಿನೀರ  ಕೆರೆ(ಮಂಜುಗಡ್ಡೆ).ಅಪಗ ದೂರೊಡು ಕತ್ತಲೆ ಕಾನೊಡು ಒಂಟಿಯಾದ್ ಮೆರೆಯೊಂದಿಪ್ಪುನ ಗುಳಿಗನ ರೌದ್ರತೆ ಚಾಮುಂಡಿಗ್ ತೋಜುಂಡು.ಆಲ್ ಗುಳಿಗನ್ ಕಣ್ಣಾಳಿತೊಡು,ಕೈತ ಸನ್ನೆಡ್ ಲೆಪ್ಪುವಲ್.ಗುಳಿಗೆ ಅಲೆಡ ದಾಯೆ ಲೆತ್ತರಮ್ಮಾಂದ್ ಕೇನುವೆ. ಈತ್ ಮಲ್ಲ ಬಲುಗುಲ್ಲ ಬಂಟೆ(ಬಲಶಾಲಿ) ಈ ಎನ್ನ ಕೈತಲುಂತುವನಾಂದ್ ಕೇನ್ವಲ್ . ಎಂಕ್ ಬೋಡು ಬೋಡಾಪುನ ಬಂಜಿದಾವಾರ ಕೊರ್ಪರ್ಡ ಖಂಡಿತಾ ಬರ್ಪೆಂದ್ ಗುಳಿಗೆ ಚಾಮುಂಡಿಡ ಪನ್ಪೆ.ಅಂಚ ಚಾಮುಂಡಿ,ಗುಳಿಗೆ ಧರ್ಮ ಸಾಂಗ್ಯೆರೆ ತುಳುನಾಡ್ ಗ್ ಜಪ್ವೆರ್.ಅಂಚಾಂದ್ ಮೈಸೂರುಡು ನಿಲೆಯಾಯಿ ಚಾಮುಂಡೇಶ್ವರಿ ದೇವಿಗ್ಲ ನರಮಾನಿಯಾದ್ ಪುಟ್ಟುದು ವ್ಯಕ್ತಿ ಶಕ್ತಿಯಾದ್ ದೈವ ಆಯಿನ ಚಾಮುಂಡಿಗ್ಲ ಸಮ್ಮಂದ ಇಜ್ಜಿ.ಚಾಮುಂಡಿ ಪುದರುಂಡು ಪಂಡಿ ಸಾತ್ ಗ್ ನೇಮ ಕಟ್ಟ್ ದ್ ಯಾನ್ ಮೈಸೂರುದ ದೇವಿ ಚಾಮುಂಡೇಶ್ವರಿಂದ್ ಪನ್ಪುನ ಸರಿಯತ್ತ್.ದೇವಿ ದೇವಿಯೆ,ದೈವ ದೈವನೆ.

  ಗುಡೆಚಂಡಿ ದೈವದ ಭಂಡಾರ

     ಆ ಕಾಲೊಡು ಗಟ್ಟದ  ಮಿತ್ತ್ ಪುದರ್ ಪೋಯಿ ಮನೆತನದ ಭೀಮರಾಯೆರ್ ತನ್ನ ತೋಟೊಡು ಬಾರ್ಯಾತ್ ಜನೊಕ್ಲೆನ್ ಬೆನ್ಪಾವೊಂದು ಅಕ್ಲೆಗ್ ಆಸರೆಯಾದಿತ್ತೆರ್‌. ಅಡೆಗ್ ದೃಷ್ಠಿ ದೀನ ಚಾಮುಂಡಿ ಗುಳಿಗೆ  ಸುರುಕಾದ್ ಭೀಮರಾಯೆರೆ ತೋಟೊಗು ಬರ್ಪೆರ್.ಅಡೆ ಬತ್ತ್ ನ ಗುಳಿಗೆ  ಅವ್ಲು ಭೀಮರಾಯೆ ಬೇಲೆದಕ್ಲೆಗ್ ಪೊರ್ತು ಗುರ್ತೊದ ಸಲುವಾದ್ ದೀನ ಸೊರೊ ಲಕ್ಕುನ ಕಂಚಿದ ಗಂಟೆನ್ ಬರ್ಪುನ ಪೊರ್ತುಗು ಪಿರ ಪೋಪುನ  ಗಂಟೆ ಹಾಕುವೆ,ಪಿರ ಪೋಪುನ ಪೊರ್ತುಗು ಬರ್ಪುನ ಪೊರ್ತುದ ಗಂಟೆ ಹಾಕುವೆ.ಕಡೆಕ್ ಎವ್ರೊಡು ಕಂಚಿದ ಗಂಟೆನ್ ಗುಳಿಗೆ ದರ್ಪುವೆ.ಬೀಮರಾಯೆ ಸವಾರಿ ಪೋಪುನ ಕುದುರೆನ್ ಕೆರ್ಪೆ.ಚಾಮುಂಡಿ ಗುಳಿಗೆ ಇಡೆ ಬತ್ತ್ ನೆಕ್ ಗುರ್ತೊಗು(ಕುರುಹಾದ್, ಬತ್ತ್ ನೆಕ್ ಆಧಾರ ತೆರಿಯೆರೆ )ದೈವೊಲು ಇಂಚ ಮಲ್ಪುವೆರ್ .ಉಂದು ದಾದ ಸೋಜಿಗಂದ್ ಬಲ್ಯಾಯನ ನಿಮಿತ್ತ ನೋಟ ತೂನಗ ಚಾಮುಂಡಿ ಗುಳಿಗೆ ಪನ್ಪುನ ಶಕ್ತಿಲು ಅಡೆ ಬತ್ತಿನ ಇಚಾರ ಭೀಮರಾಯಗ್ ಗೊತ್ತಾಪುಂಡು.ಚಾಮುಂಡಿ ಗುಳಿಗನ್ ನಂಬುದು ಆರಾದನೆ ಮಲ್ಪೊಡುಂದು  ಚಿಂತನೆಡ್ ತೆರಿದ್ ಬರ್ಪುಂಡು.ಅಂಚನೆ ದೈವೊನು ನಂಬಿ ಭೀಮರಾಯನ ಪೂಜೆದ ಭಟ್ರ್(ಗಣಪತಿ ಬಟ್ರ್ಂದ್ ಲ ಪನ್ಪೆರ್) ಮಲ್ತಿ ಪೂಜೆ ಸರಿ ಆಯಿಜಿಂದ್ ಚಾಮುಂಡಿಯಮ್ಮ ಅರೆನ್ ಮಾಯ ಮಲ್ಪುವೆರ್ .ಆಂಡಲಾ ಸುರುತ ಮಾಯೆ ಮರ್ಗಿಲ್ದ ಓಮೊಗು ಆ ಭಟ್ರ್  ತನ್ಕುಲೆಗ್ ಬೋಡುಂದು ಚಾಮುಂಡಿ ದೈವ ಬಟ್ರೆನ್ ಮಾಯ ಮಲ್ತ್ಂಡಲ ಮಾಯೆಡ್ ಪೂಜೆ ಮಲ್ಪೆರೆ ಜಟ್ಟಿಂಗೆ ಆದ್ ತನ್ನ ಬಲತ ಮರ್ಗಿಲ್ಡ್ ಒರ್ತೊಂದೆರ್.ತನ್ನ ಎಡತ ಮರ್ಗಿಲ್ಡ್ ದೂತೆ ಗುಳಿಗನ್ ಒರ್ತೊಂದೆರ್.

  

                ಚಾಮುಂಡೇಶ್ವರಿ ದೈವ ಅಮ್ಮುಂಜೆ

     ನನೊಂಜಿ ಮೂಲದ ಪ್ರಕಾರ ತುಳುನಾಡ್ ರ್ದ್ ಪಂಜಿ ಮೇಸ್ತ್ರಿ ಪನ್ಪುನಾರ್ ಗಟ್ಟದ ಮಿತ್ತ್ ಗ್ ಜನ ಕಟ್ಟೊಂದು ಪೋಪೆರ್.

ಈ ಮಾಯೆಡುಪ್ಪುನ ಜಟ್ಟಿಂಗೆ ಚಾಮುಂಡಿ ಗುಳಿಗ ಕೋಲೊಡು ಒಂಜಿ ದೈವವಾದ್ ತುಳುನಾಡ್ ಡ್ ಆರಾದನೆ ಪಡೆಯೊಂದುಂಡು.ಚಾಮುಂಡಿ ಗುಳಿಗನೊಟ್ಟುಗು ಕೆಲವು ಕೋಡಿಡ್  ಜಟ್ಟಿಂಗ ದೈವಲ ಕೋಲೊಡು ತೂಯೆರೆ ತಿಕ್ಕುಂಡು.ಅಂಚಾದ್ ಚಾಮುಂಡಿ ಗುಳಿಗ ಜಟ್ಟಿಂಗನ್ ನಂಬೆರೆ ಮೂಜಿ ಕಲ್ಲ್ ಪಾಡ್ದ್ ನಂಬುವೆರ್.ನಡುಟು‌ ಚಾಮುಂಡಿನ ಕಲ್ಲ್ ಪಾಡ್ದ್ ದತ್ತ್ ಗ್ ಪಂಡ ಎಡತ್ ಗ್ ಚಾಮುಂಡಿನ ದೂತೆ ಆಯಿನ ಗುಳಿಗಗ್, ಬಲತ್ ಗ್ ಜಟ್ಟಿಂಗನ ಕಲ್ಲ್ ಪಾಡುವೆರ್.ಇತ್ತೆ ಪೂರ ಕೆಲವು ಕಟ್ಟುನಕುಲು ಬೀಮರಾಯನೊಟ್ಟುಗು ಎಲ್ಯಪ್ಪು ಗೌಡ್ರು,ನೇಲ್ಯಪ್ಪು ಗೌಡ್ರು,ಪಂಜಿ‌ ಮುಕ್ಕರೆ ಪನ್ಪಿ  ಪೊಸ ಪೊಸ ಪುದರ್ನ್ ಸೇರ್ಸಾವೊಂದೆರ್.ಆಂಡ ಮೂಲ ಕಥೆತ ಪ್ರಕಾರ ಕತ್ತಲೆ ಕಾನದ ಕೈತಲ್ ಭೀಮರಾಯನ ತೋಟ ಇತ್ತ್ ದ್ ತೋಟದ  ಯಜಮಾನಿಯಾದ್ ಉಪ್ಪುವೆ.

                       ಕೋಮರ ಚಾಮುಂಡಿ ದೈವ

ನರಮಾನಿಯಾದ್ ಪುಟ್ಟಿನ ಚಾಮುಂಡಿ ದೈವತ್ವ ಪಡೆದ್ ಚಾಮುಂಡಿಯಾದ್ ಸುರುಕು  ಕತ್ತಲೆಕಾನ ಗುಳಿಗನ್ ಒಟ್ಟು ಸೇರಾವೊಂದು ಚಾಮುಂಡಿ ಗುಳಿಗೆಯಾದ್,ಭೀಮರಾಯೆರೆ ತೋಟೊಡು ಪೂಜೆ ಮಲ್ತಿ ಬಟ್ರೆನ ಪೂಜೆ ಸರಿ ಆಯಿಜಿಂದ್ ಅರೆನ್ ಮಾಯೆ ಮಲ್ತ್ ದ್ ಮಾಯೆ ಮಲ್ತಿ ಬಟ್ರೆಡ ಮಾಯೆಡ್ ಪೂಜೆ ಕೈಕೊನೆರೆ ಅರೆನ್ ಜಟ್ಟಿಂಗ ದೈವ ಆದ್ ಮಲ್ತ್ ದ್ ಆರಾದನೆ ಪಡೆಪೆರ್.ಅಂಚನೆ  ಗಟ್ಟದ ಮಿತ್ತ್ ಬೆನಿಯೆರೆ ಪೋದು ಅವ್ಲು ಅನ್ಯಾಯ ಮಲ್ತಿನಕ್ಲೆ ಬೆರಿಟೆ ಪೋಯಿ ಚಾಮುಂಡಿ ಗುಳಿಗೆ ಅವ್ಲು ಅಕ್ಲೆಡ ನಂಬಾವೆರ್.ತುಳುನಾಡ್ ಡ್ದ್  ಗಟ್ಟೊಗು ಬೆನೆರೆ ಪೋಯಿನ ತುಳುವೆರ್ ಅವ್ಲು ದಾಲ ಕಂಡಿಯೆರ್ಡ ಅಕ್ಲೆನ ಪಿರವು ಚಾಮುಂಡಿ ದೈವ ಬರ್ಪುಂಡು.ಇಂಚ ಚಾಮುಂಡಿ ಗುಳಿಗೆ ತುಳುನಾಡ್ ಗ್ ಬರ್ರೆ ಗಟ್ಟ ಜಪ್ಪುವೆರ್.ಗಟ್ಟದ ಮಿತ್ತ್ ಮಲ್ಲ ಮಲ್ಲ ಕಾಪಿ ತೋಟೊಲಿತ್ತ್ ದ್ ಆತ್ ದೂರೊದೆನ್ ತೂಯೆರೆ ಬಂಙಂದ್ ಅಲ್ತ ದನಿನಕುಲು ಚಾಮುಂಡಿ ದೈವೊನು ನಂಬುದು ಒಂಜಿ ಕಲ್ಲ್ ಪಾಡ್ದಿಪ್ಪುವೆರ್. ಮುಲ್ತು ಪೋಯಿನಕುಲು ಅಲ್ತ್ ದಾದಾಂಡಲ ಕಂಡೊಂದು ಬತ್ತೆರ್ಡ ದೈವ ತೂವೊನಡ್ಂದ್ ಪಾಡಿ ಕಲ್ಲ್ ದ ಮಿತ್ತ್ ಮುಂಚಿ ನೀರ್ ಮೈತ್ ದ್ ಕಂಕನೆ ಪಾಡೊಂತೆರ್.ಅಂಚ ಕಂಡ್ ನಕ್ಲೆ ಪಿರವುಡು ಚಾಮುಂಡಿ ಬತ್ತ್ ದ್ ಮೂಲು ಅಲೆನ್ ಮೊಕ್ಲು ನಂಬುಲೆಕಾಂಡ್.  ಕತ್ತಲೆ ಕಾನ ಭೀಮರಾಯ ತೋಟ,ಆಲೆಕಾನ,ಬೋರಿ ಕಾನ(ಗೋಮಾಳ),ಗಂಡಿ ಬಾಕಿಲ್(ಗಂಡಿಬಾಕಿಲ್ ಬೋಳ್ತೆರ್ದ ಕಕ್ಕಿಂಜೆ ಕೈತಲ್ )ಗ್ ಬತ್ತ್ ದ್,ಕರ್ಬ ಸೇತ್ಮೆಡ್ ಚಾಮುಂಡಿ ಗುಳಿಗೆ ಬನ್ನಗ ಗುಳಿಗೆ ಕರ್ಬ ಸೇತ್ಮೆನ್ ದೊಂಕುಬೆ.ಸಂಕೊಡು ಸವ್ದ ಆಪುಂಡು. ಸಂಕ ಅದುರುಂಡು.ಮೂಲು ಪೂರ ಗುಳಿಗನ ಸವಾರಿ‌ ದುಂಬು ಇತ್ತ್ಂಡ್.ಅಲ್ಪಡ್ದ್ ಬೊಕ್ಕ ಚಾಮುಂಡಿ ಗುಳಿಗೆ ಇಚ್ಚಾ ಪ್ರಕಾರೊಡು ಓಲ್ಲಾ ಬರ್ಪುಜೆರ್.ದನಿಕ್ ತೆರಿಯಂದಿಲೆಕ ಮೋಸೊಡು ಬತ್ತ್ ನಕ್ಲೆ ಪಿರಾವುಡು ದೈವೊಲು ಬರ್ಪೆರ್.ಅವ್ವತ್ತಂದೆ ಉದ್ದೇಶ ಪೂರ್ವಕವಾದ್,ಮನಃಪೂರ್ವಕವಾದ್ ಪ್ರೀತಿಡ್ ವಾ ಕಾರಣೊಗ್ಲಾ ಉಂದೊಂಜಿ ಬೂತ (ಚಾಮುಂಡಿ) ಓಡೆಗ್ಲಾ ಬರ್ಪುಜಿ.

                                ಚಾಮುಂಡಿ ದೈವ

      ದುಂಬುದ ಕಾಲೊಡು ಚಾಮುಂಡಿಗ್, ಚಾಮುಂಡಿ ಗುಳಿಗಗ್ ಎಣ್ಣೆ ವೀಳ್ಯ/ಬೂಲ್ಯ ಪತ್ಯೆರ್ಡ ಗುಳಿಗಗ್ ಕಟ್ಟುನಾಯೆ ಚಾಮುಂಡಿಗ್ ಕಟ್ಟುನಾರೆನ್ ಮುಟ್ರೆ ಬಲ್ಲಿಂದಿತ್ತ್ಂಡ್.ಗಗ್ಗರ ದೀನಗಲ ಸರ್ರದ ಸಂದ್ ಮುಟ್ರೆ ಇಜ್ಜಿ. ಸಂದ್ ಸ್ಪರ್ಷ ಇಜ್ಜಾಂಡ್.ಅಕುಲು ದೂರ ದೂರೊಡೇ ಕುಲ್ಲುದುಪ್ಪೊಡು.ಚಾಮುಂಡಿ ದೈವ ಗುಳಿಗನ್ ಉಂತು ಪಂಡ ಉಂತೊಡೆ.ತಿನ್ ಪಂಡ ತಿನೋಡೆ.ಚಾಮುಂಡಿ ಓರೆ ಕಣ್ಣ್ ಡ್ ತೂಂಡ ಏತ್ ರಾಪಟದ ಗುಳಿಗೆ ಆಂಡಲಾ ಉಂತೊಡು ಪನ್ಪುನ  ಕಟ್ಟಿತ್ತ್ ನ ಒಂಜಿ ಕಾಲ ಇತ್ತ್ಂಡ್.ಅಂಚನೆ ಚಾಮುಂಡಿನ ಒಟ್ಟುಗು ಗುಳಿಗೆ ಬೊಕ್ಕ ಜಟ್ಟಿಂಗೆ ಇತ್ತ್ಂಡ ಕೆಲವು ತಿಕ್ ಡ್ ಚಾಮುಂಡಿನೊಟ್ಟುಗು ರಾವು ಬೊಕ್ಕ  ಗುಳಿಗೆ ಉಪ್ಪುವೆರ್.ಇನಿ ಕೆಲವು ಕಟ್ಟುನಕುಲು ಚಾಮುಂಡಿನೊಟ್ಟುಗು ಜೋಡು ಗುಳಿಗನ್ ಪಂಡ ಇರ್ವೆರ್ ಗುಳಿಗನಕ್ಲೆನ್ ಕನವೊಂದುಲ್ಲೆರ್.ಮದಿಪುದಕುಲು ಒರ್ತ್ಂಡ ಒರ್ತೇಶ್ವರಿ,ಕರ್ತ್ಂಡ ಕರ್ತೇಶ್ವರಿಂದ್ ಪನೊಂದುಲ್ಲೆರ್.ಉಂದೆತ ಅರ್ಥ ದಾದಂದೆ ಗೊತ್ತಾಪುಜಿ.

                                ಚಾಮುಂಡಿ ದೈವ

ಇನಿ ಚಾಮುಂಡಿರ್ದ್ ಎಚ್ಚ ಅಂಚಿಂಚಿ ಪೋಪುನಿ ಗುಳಿಗೆನೆ.ಚಾಮುಂಡಿನ ಒಟ್ಟೊಟ್ಟುಗು ಕೈ ಕೈ ಪತೊಂದು ಗುಳಿಗೆ ಪೋಪುನಡೆಮುಟ್ಟ ದೈವದ ಕಲ ಎತ್ತ್ ದ್ಂಡ್.ಗುಳಿಗೆ ಚಾಮುಂಡಿನ ಸಂದ್ ಮುಟ್ಟುನಿ,ಒಟ್ಟೊಟ್ಟುಗು ಪೋಪುನಿ.ಉಂದು ಪೂರ ದೈವದ ಕಟ್ಟ್ ಪೊಳಿತ್ ಲೆಕಾಂಡ್.ಅಂಚನೆ ರಾಜಂದೈವದ ಕಲೊಟ್ಲಾ ದುಂಬು ರಾಜಂದೈವೊಲೆನ್ ಒಟ್ಟಿಗೆ ಉಪ್ಪುನ ದೈವೊಲು ಮುಟ್ಟುನ ಕೆರಮ ಇಜ್ಜಾಂಡ್.ದೈವ ಗಡಿ ಪತ್ತ್ ನಾರೆನ್ ಮುಟ್ಟುನ ಕಟ್ಟಿಜ್ಜಾಂಡ್.ಇನಿ ರಾಜಂದೈವೊಲ್ನ ಒಟ್ಟುಗುಪ್ಪುನ ದೈವೊಲು ರಾಜಂದೈವೊನು ಅರಾದ್ ಪತ್ತುನ,ರಾಜಂದೈವದ ಕಾರ ಮುದೆಲ್ಡ್ ದೈವೊಗು ಒರಗ್ ದ್ ಕುಲ್ಲುದು ತಿರಿಟ್ ಅಭಯ ಕೊರ್ಪುನಡೆ ಕಲ ಎತ್ತ್ಂಡ್.ಅಂಚನೆ ಗಡಿ ಪತ್ತ್ ನಾರೆನ ಕೈನ್ ದೈವ ಒಯ್ತೊಂದು ತನ್ನ ತಿಗಲೆಗ್  ಮುಟ್ಟವುನ ಕಾಲ ಬತ್ತ್ಂಡ್.ದೈವೊಗು ಕಟ್ಟುನಕುಲು ಮೂಲ ಕಟ್ಲೆ ಬುಡೊಂದಿಪ್ಪುನವು ಬೇಜಾರ್ದ ಸಂಗತಿ.

                             ಚಾಮುಂಡಿ ದೈವ

   ಒವ್ವೇ ದೈವ ಆವಡ್ ಎಂಚನೇ ಉಪ್ಪಡ್ ದೈವೊನು ಸುಸೂತ್ರವಾದ್ ನಂಬೊಂದು ಪೋಪುನ ಬೇಲೆ ನಮ್ಮ.ದೈವಾರಾದನೆಡ್ 7 ಸಂಕೆಗ್ ಅವೆತನವೆ ಆಯಿನ ಮಾನಾದಿಗೆ ಉಂಡು.7 ಜನಾಂದ ಬಲ್ಲಾಕುಲು(ಪಂಜುರ್ಲಿನ ಆರಾದನೆಡ್),7 ಜನ ಸನ್ಯಾಸಿಲು(ಸನ್ಯಾಸಿ ಮಂತ್ರ ಜಾವದೆನ ಕಥೆಟ್),ಎಳ್ವೆರ್ ಸಿರಿಕುಲು,ಅಂಚನೇ ಚಾಮುಂಡಿ ಗುಳಿಗನ ಕಥೆಟ್ ಬರ್ಪುನ 7 ಜನ ಪೊಂಜೋಕುಲು....ಇಂಚ ದೈವದ ಕಲೊಟು ಏಳೆಕ್  ಅವೆತನವೆ ಆಯಿನ ಮಾನಾದಿಗೆ ಉಂಡು.ಮೂಲ ದೈವದ ಸಾಂಪ್ರದಾಯಿಕ ಕಟ್ಲೆಡೇ ದೈವೊನು ಒರ್ತೊನೊಡಾಯಿನ ಅನಿವಾರ್ಯತೆ ತುಳುವೆರೆಗುಂಡು.

ಈ ಬರವುಗು ಮಾಯಿತಿ ಸಕಾಯ:-

ಯನ್ ಕೆ ಸಾಲಿಯಾನ್.ಹಿರಿಯಾರ್ ಬೆದ್ರ - ದೈವೊಲೆಗ್ ಕಟ್ಟುನಾರ್

ಕೊರಗಪ್ಪ ಮೂಡುಕೋಡಿ,ಬೋಲ್ತೇರ್  ಹಿರಿಯಾರ್- ದೈವೊಲೆಗ್ ಕಟ್ಟುನಾರ್

ರಮೇಶ್ ಪೆರಿಂಜೆ -ದೈವೊಲೆಗ್ ಕಟ್ಟುನಾರ್.

ಜನಾರ್ದನ ಬುಡೋಳಿ.ದೈವೊಲೆಗ್ ಕಟ್ಟುನಾರ್

                               ,,,,,,,,,,,,,,,,,,,,,,,,,

ಇತ್ತೆದ ಬದಲಾವಣೆ:-

ಚೌಂಡಿನ್ ದೈವ ಕಟ್ಟುನಕುಲು ಚಾಮುಂಡೇಶ್ವರಿಂದ್ ಮಲ್ತಿ ಪೊಸ ಕಟ್ಟ್ ;

           ದೈವ ಆವಡ್ ದೇವ,ದೇವಿಯಾವಡ್  ಅರಾದನೆಡ್ ಅವೆತನವೇ ಅಯಿನ ಕಟ್ಟ್,ಆರಾದನಾ ಕೆರಮ ಉಂಡು.ದೇವೆರೆನ್ ದೇವೆರಾದೇ ಅರಾದನೆ ಮಲ್ಪೊಡು,ದೈವೊನು ದೈವ ಆದೇ ಆರಾದನೆ ಮಲ್ಪೊಡು.ದೇವೆರೆ ಆರಾದನೆದ ಕ್ರಮ ಬದಲ್ತ್ಂಡಲಾ,ದೈವದ ಕಟ್ಟ್ ಪೊಲ್ತ್ಂಡಲಾ ದೋಷ ಬರು.ದೈವದ ಮಾಯೆದ ಪೆಟ್ಟ್,ಕಣ್ಣ್ ಗ್ ತೋಜುಜಿ,ಗಾಯಲ ಮಾಜುಜಿ.ಕೆಲವೊಂಜಿ ಕೋಡಿಡ್ ಇನಿ ಕಟ್ಟುನಕುಲು ದೈವ ಚೌಂಡಿನ್ ಮೈಸೂರುದ ಚಾಮುಂಡೇಶ್ವರಿ ದೇವಿ ಮಲ್ಪೆರೆ ಪೋದು,ದೇವಿನ ಪ್ರಭಾವಳಿತಲೆಕ ಚೌಂಡಿ ದೈವೊಗು ಚಕ್ರಾಕಾರದ ಅಣಿ ಮಲ್ತೊಂದುಲ್ಲೆರ್.ದೈವೊದ ಚಾಕಿರಿಗ್ಂದ್ ಪಡಿಯರಿ ಪತ್ತಿ ಬೊಕ್ಕ,ಕಾರ್ ಗ್ ಗಗ್ಗರ ದೀ ಬೊಕ್ಕ ದೈವ ಕಟ್ಟ್ ಪ್ರಕಾರ ತರೆಕ್ ತರೆ ಪಟ್ಟ,ತರೆ ಚೆಂಡ್,ತರೆ ಮಣಿ ದೀಯೊಡು ವಿನಃ ಕಿರೀಟ ದೀಪುನತ್ತ್.ಕಿರೀಟ ದೀಪುಂಡಲ ಅವೆತ ಎದುರು ತರೆಪಟ್ಟದ ಒರು ಮಲ್ತ್ ದ್ ದೀಯೊಡು.ಕಿರೀಟ ರಾಜೆರೆಗ್ ದೀಪುನ ಸೊತ್ತು.ದೇವಿನ ಕಿರೀಟ ಪೂರಾ ನರಮಾನಿ ಕಲ್ಪನೆ.ಕಟ್ಟುನಕುಲು ಉದ್ದೊಗು ಕುಜಲ್ ಬುಡ್ದಿಪ್ಪೊಡು.ಅವು ಬುಡ್ದು ಏರಾ ಪಂಡೆರ್ಂದ್ ನಿಕ್ಲೆ ಹಿರಿಯಾಕ್ಲು ಪಂಡಿ ಕಟ್ಲೆನ್ ಬುಡ್ದು ದಾದನಾ ಆಸೆಡ್ ತರೆಕ್ ಅಂಗಡಿಡ್ ತಿಕ್ಕುನ ತರೆ ಕುಜಲಾವಡ್,ಬೊಳ್ಳಿ ಬಂಗಾರ್ ದ ಕಿರೀಟ ಆವಡ್ ದೀಪುನತ್ತ್‌.ಕೊಡಮಂದಾಯಗ್ ಸಿರಿಮುಡಿ/ಕಿರೀಟ ಮಿಜಾರ್ ಡ್ ಉಂಡು.ಕಲ್ಕುಡಗ್ ಸಿರಿಮುಡಿ ಕಡಂಬು,ಪಣೊಲಿ ಬೈಲ್ ಡ್ ಉಂಡು.ಆಂಡ ಸಿರಿಮುಡಿ/ಕಿರೀಟದ ಎದುರು ತರೆಪಟ್ಟ ಉಂಡು. ನಮ ದೈವ ದೇವೆರೆನ್ ಬೊಳ್ಳಿ ಬಂಗಾರ್ ಡ್ ಪಣವುಡು ಲಪ್ಪುನತ್ತ್.ಕೊರ್ನಾರ್ಲ,ದೀನಾರ್ಲ ದೈವದ ಕಟ್ಟ್ ನ್ ಪೊಳಿತ್ ಲೆಕಾಯಿಜಾ?.ಕಟ್ಟುನಾರ್ ಇಂಚಿನ ಕಟ್ಲೆ ದೈವಾರಾದನೆಡ್ ಇಜ್ಜಿ,ತಾನ್ ಇಂಚ ಪೊಸ ಕಟ್ಟ್ ಮಲ್ಪೆರೆ ತಯಾರಿಜ್ಜಿ ಪಂಡ,ಕಟ್ಟುನ ಮಾತೆರ್ಲ ಅಂಚನೇ ಅಭಿಪ್ರಾಯ ಪಂಡ ಮಲ್ಪವುನಕುಲು ಎಂಚ ಮಲ್ಪಯೆರೆ ಸಾದ್ಯ?.ನಮ ನಮ್ಮ ದೈವೊನು ದೈವ ಆದೇ ತೂವೊಡತ್ತೆ.ದೈವೊಲೆಗ್ ಭಂಡಾರದಿಲ್ಲ್,ಭಂಡಾರ ಉಂಡು.ದೇವೆರೆಗ್ ಭಂಡಾರದ ಇಲ್ಲಾವಡ್,ಭಂಡಾರ ಆವಡ್ ಇಜ್ಜಿ.ಗರ್ಭಗುಡಿ ಮಾತ್ರ ಉಪ್ಪುನಿ.ದೈವದ ಭಂಡಾರ/ಕಿರ್ವಾಲ್ ಬರ್ಪುನ ಕೆರಮ ದೇವೆರೆಗಿಜ್ಜಿ.ನನ ದುಂಬುಗು ಅವು ಬರ್ರೆಲಾ ಯಾವು.

           ‌‌‌‌‌‌        """""""""""""''''''””””””””

ದೇವಿ ಚಾಮುಂಡೇಶ್ವರಿಗ್ ಪೊಸ ನಮುನೆದ ದರ್ಶನ ಬೈದ್ಂಡ್: 

         ಇನಿ ನಮ್ಮ ತುಳುನಾಡ್ ಡ್ ದೇವಿ ಚಾಮುಂಡೇಶ್ವರಿಗ್ ಪೊಸ ಆರಾದನಾ ಕೆರಮೊಲೆನ್ ಕನವೊಂದುಲ್ಲೆರ್.ತುಳುನಾಡ ದೈವ ಚಾಮುಂಡಿಗ್ಲ ದೇವಿ ಚಾಮುಂಡೇಶ್ವರಿಗ್ಲ ಸಮ್ಮಂದನೇ ಇಜ್ಜಿ. ಯಾನ್ ತೆರಿ‌ಮಟ್ಟ್ ಗ್ ಎನ್ನ ಅಲ್ಮೋಗೊಡು 40 ವರ್ಸದ ಪಿರಾವುಡೇ ದೇವಿ ಚಾಮುಂಡಿನ,ದೇವಿ ರಕ್ತೇಶ್ವರಿನ ದರ್ಶನ ಉಂಡು.ದೇವಿ ಚಾಮುಂಡೇಶ್ವರಿಗ್ ದರ್ಶನ ಇತ್ತ್ಂಡ ದೈವ ಚಾಮುಂಡಿಗ್ ವಸಾಯ/ಜೋಗ ಉಪ್ಪುನಿ.ದೇವಿ ಚಾಮುಂಡೇಶ್ವರಿನ ದರ್ಶನ ಸಾತ್ವಿಕ ಆದಿಪ್ಪುಂಡು.ಅವ್ಲು ಮದ್ಮಾಲೆ ಪಜ್ಜೆ ಉಪ್ಪುಂಡು.ದೇವಿ ಚಾಮುಂಡೇಶ್ವರಿಯಾಂಡ ಅವೆತೊಟ್ಟುಗು ದೈವ ಗುಳಿಗನಕ್ಲೆಗ್ ಕುಂಬರುನ ಕಟ್ಟಿಜ್ಜಿ.ದೈವದೊಟ್ಟಿಗೆ ಆಂಡ ಮಾತ್ರ ಗುಳಿಗಗ್ ವಸಾಯ.ಅವ್ಲ ಪೂವರಿ ಪತ್ತ್ ದ್ ಮದಿಪಂದೆ ವಾ ದೈವೊಲೆಗ್ಲ ವಸಾಯ ಇಜ್ಜಿ.ದೈವನೇ ಬೇತೆ,ಅವೆತ ಕಟ್ಲೆನೆ ಬೇತೆ.ದೇವಿಯೇ ಬೇತೆ,ಅವೆತ ಆರಾದನಾ ಕೆರಮನೇ ಬೇತೆ.ನಿಜವಾದ್  ದೇವಿ ಚಾಮುಂಡೇಶ್ವರಿಗ್ ದರ್ಶನೊಡು ಅಬತಾರದ ಕೆರಮ ಇಜ್ಜಿ.ನಿಧಾನವಾದ್ ಪಜ್ಜೆ ಪಾಡೊಂದು ದರ್ಶನ ಉಪ್ಪುಂಡು.ದೇವಿನ ದರ್ಶನ ಪಾತ್ರಿ ಕುಜಲ್ ಉದ್ದೊಗು ಬುಡ್ದಿಪ್ಪುವೆರ್.ದೇವಿ ಪಾತ್ರಿ ಪಿದಯಿರ್ದ್ ಕನತಿನ ಉದುರಿ ಸೂಡಿ ಜಡೆತ ಕುಜಲ್ ಪಾಡುನ ಕೆರಮ ಇಜ್ಜಿ.ಅವು ಏರ್ನ ಕುಜಲ್ ಪನ್ಪಿ ಸುದ್ದಾಚಾರಲ ತೆರಿದುಪ್ಪುಜಿ.ಅಂಚನೇ ದೇವಿ ಪಾತ್ರಿ ಕುಜಲ್ ಬುಡ್ದುಪ್ಪೊಡು ವಿನಃ ಅವೆಕ್ ತರೆತ್ರ,ಪುಲ್ಲಣ,ಪೇಟ,ಮುಂಡಾಸ್ ಪೂರ ಕಟ್ಟುನ ಕೆರಮ ಇಜ್ಜಿ.ಗುರುನ ಆಶೀರ್ವಾದ,ಸಿದ್ದಿದ ಅನುಗ್ರಹ ಪಾತ್ರಿಗ್ ಆದಿಪ್ಪೊಡು ಪನ್ಪಿ ಕೆರಮ ಉಂಡು .ದೈವೊಗು ವಸಯಾಯಿಲೆಕ ದೇವಿಗ್ ಉಗ್ರದ ದರ್ಶನ ಪನ್ಪುನವಿಜ್ಜಿ.ಹೆಚ್ಚಾದ್ ದೇವಿ ದರ್ಶನ ಪಾತ್ರಿಲು ತುಳುವೆರಾಂಡಲಾ ಕನ್ನಡ ಪಾತೆರೊಂದಿಪ್ಪುವೆರ್.ನಾಗ ಪಾತ್ರಿನಕುಲ್ಲಾ ತುಳುವೆರಾಂಡಲಾ ಕನ್ನಡ ಪಾತೆರೊಂದಿಪ್ಪುವೆರ್.ನಿಜವಾದ್ ದೇವ ದೇವಿನಕುಲು ದೈವ ಜೋಗದ ಮಾನಿನ ಮಿತ್ತ್ ವಸಯಾಯಿಲೆಕ‌ ಆಕರ್ಷಣೆ ,ಉಗ್ರ ದರ್ಶನೊಡು ಬರ್ಪುಜೆರ್.ಆಂಡ ದೇವಿ ದರ್ಶನ ಪಾತ್ರಿನಕ್ಲೆನ ಸೌಮ್ಯ ದರ್ಶನ ಉಪ್ಪುಂಡು.ಯಾನ್  40 ವರ್ಷ ದುಂಬುಡ್ದೇ ಇಂಚಿ ದೇವಿ ದರ್ಶನ ತೂಯಿನ ಎನ್ನ ಅಲ್ಮೋಗೊಡು ಪಂಡ್ ನಿ.ದೇವಿ  ರಕ್ತೇಶ್ವರಿನ(ದೈವ ಲೆಕ್ಕೆ ಸಿರಿಯತ್ತ್) ದರ್ಶನ ಒಂತೆ ಉಗ್ರ ರೀತಿಡ್ ಇತ್ತ್ಂಡಲಾ ಅವ್ಲು ದೇವಿ ಗೆಂಡದ ರಾಶಿ ಚಿಲ್ಲ್ಂಡಲಾ ಪಾತ್ರಿಡ ತಾಳ್ಮೆ ಉಪ್ಪುಂಡು.ದೇವಿನ ಗುಂಡದುಲಯಿ ದರ್ಶನ ಪಾತ್ರಿ ಅಟ್ಟೆ ಪೊದ್ದಿದ್ ಬೇತೆ ಬೇತೆ ಅರತಿಲೆನ್ ದೇವಿನ ಪಟೊಕಾ,ಮೂರ್ತಿಗಾ ದೆರ್ತಿ ಬೊಕ್ಕ ಮಾಮಂಗಳಾರತಿಯಾನಗ ಪಾತ್ರಿಗ್ ಚಾಮುಂಡಿನ ಆಕರ್ಷಣೆಯಾದ್ ದರ್ಶನ ಬರ್ಪುಂಡು. ಅವ್ವೇ ಅರಿವಾಣಾರತಿನ್ ಒಂಜಿ ಕೈಟ್ ಪತೊಂದು ಕುಡೊಂಜಿ ಕೈಟ್ ತ್ರಿಶೂಲ ಪತೊಂದು ಗುಂಡದ ಎದುರ್ದ ಅಂಚಿಂಚಿದ ದಾರಂದೊಗು ಕಟ್ಟಿ ಕೇಪುಲು ರಂಗ್ ಕುಂಟು  ದೆತ್ತಿ ಬೊಕ್ಕ ದೈವ ಚಾಮುಂಡಿ ಪಿದಾಯಿ ಬತ್ತ್ ದ್ ಸಾನೊಗು ಮೂಜಿ ಸುತ್ತು ಪಾಡುನ,ಭಕ್ತೆರೆನ್ ತೂದು ಸಮಸ್ಯೆಲೆನ್ ಕೇನುನ ಕಟ್ಟ್ ತುಳುನಾಡ್ ಡುಂಡು.ಮೂಲು ಓಲ್ಲಾ ದೇವಿ ಬಲಿಪುನ ಕಟ್ಟಿಜ್ಜಿ.ಒಂಜಿ ಕಾರ್ ದೆರ್ತ್ ದ್ ಉಂತುನ ಕಟ್ಟಿಜ್ಜಿ,ಬಂಡಾರ/ಕಿರ್ವಾಲ್ ಕನಪುನಾರೆನ ಮೇಲ್ ಗ್ ಬೂರುನ ಕಟ್ಟಿಜ್ಜಿ.ದಾಯೆ ಪಂಡ ಪಾತ್ರಿನ ಕಾರ್ ತಾಗ್ ದ್ ಏರಾಂಡಲಾ ನೆಲಕ್ ಬೂರ್ಯೆರ್ಡ,ಅತ್ತ್ ನೆತ್ತೆರ್ ಎರ್ನಾಂಡಲಾ‌ ಮೇಲ್ ರ್ದ್ ನೆಲಕ್ ಬೂರ್ಂಡ,ತ್ರಿಶೂಲೊನು ಮಿತ್ತ್ ಪಾರಾನಗ ಅವೆತ ಮೂಜಿ ಮೋನೆ ನೆಲಕ್ ಕುತ್ತುರ್ದು ಪೋಂಡ ಕಲೊಕು‌ ದೋಷ.ಅಂಚಾವಂದಿಲೆಕ ಪಾತ್ರಿಡ  ತಾಳ್ಮೆ ಬೋಡು.ದಾಯೆ ಪಂಡ ದೇವಿ ಚಾಮುಂಡೇಶ್ವರಿ ಪಂಡ ಅಲೆನ್ ಒಲಿಸಯೆರೆ ಬಾರೀ ಬಂಙ.ತತ್ತ್ಂಡ ಆಲ್ ಮುನಿಯುನ್ಲ ಬೇಗ,ದೇವಿನ ಅರಾದನೆಯಾಂಡ ಒರಿನ ಇಸಮಕ್ಕುಲುನಕುಲು  ದೈವದ ಮಣೆ ಮಂಚ,ಮುಗ ಮೂರ್ತಿ,ಆಯುದೊಲೆನ್ ಪತೊಂದು ಬನ್ನಗ ಅಕ್ಲೆಗ್ ದರ್ಶನ ಬರ್ರೆ ಸಾಧ್ಯನೇ ಇಜ್ಜಿ,ಕುಂಬರೊಲಿ ಆತೆ. ದೇವಿನೊಟ್ಟುಗು ದೈವದ ವಸಾಯನೇ ಉಪ್ಪೆರೆ ಸಾದ್ಯ ಇಜ್ಜಿ.ದಾಯೆ ಪಂಡ ದೇವಿಯೆ ಬೇತೆ,ದೇವಿನ ಆರಾದನಾ ಕೆರಮನೆ ಬೇತೆ,ದೈವನೇ ಬೇತೆ,ದೈವದ ಕಟ್ಟ್ ಕಟ್ಲೆನೇ ಬೇತೆ .ಅಂಚ ಇಜ್ಜಾಂದಿ ದರ್ಶನ ಮಲ್ತೆರ್ಡ ಕಟ್ಟ್ ಮೀರ್ಲೆಕ ಆಪುಂಡು.ಆಂಡ ದೈವದ ಕೋಲ ಅನಗ ದೈವ ಬೊಕ್ಕ ದೇವೆರೆ/ದೇವಿನ ಬೇಟಿ ನಡಪುನ ಸಾಂಪ್ರದಾಯಿಕ ಕಟ್ಟ್ ತುಳುನಾಡ್ ಡ್ ಉಂಡು.ಅಂಚನೇ ದೇವಿ ಚಾಮುಂಡೇಶ್ವರಿಯಾಂಡ ಅವ್ಲು ಅರಿವಾಣಾರತಿದ ತಟ್ಟೆಲ,ತ್ರಿಶೂಲಲ ದೇವಿ ಪಾತ್ರಿನ ಕೈಟುಪಪ್ಪುಂಡು.ಅವು ಬುಡ್ದು ದೇವಿನ ಸುತ್ತಮುತಲಿಗೆಡ್,ಕೋಲು ಜೀಟಿಗೆಯಾವಡ್,ಪಂಚ ಜೀಟಿಗೆಯಾವಡ್,ಸೂಟೆ ಆವಡ್ ಉಪ್ಪುಜಿ.ದೇವಿನ ಒಟ್ಟುಗು ಅವಿತ್ತ್ಂಡ ಅಂಚಿರ್ದ್ ದೇವಿಲಾ ಅತ್ತ್,ಇಂಚಿರ್ದ್ ದೈವಲಾ ಅತ್ತ್ಂದಾಪುಂಡು.ಅಪಗ ದೇವತಾರಾದನೆ ಆಯಿಲೆಕಲಾ ಆಪುಜಿ,ದೈವಾರಾದನೆ ಆಯಿಲೆಕಲಾ ಆಪುಜಿ.ಇಂಚಿ ಸೂಕ್ಷ್ಮ ದೈವ ದೇವೆರೆ ಇಚಾರ ತೆರಿದ್ ಚಾಕಿರಿ ಮಲ್ಪುನಕುಲು ನಡತೊಂಡೆರ್ಡ ತುಳುನಾಡ ದೈವಾರಾದನೆದ ಕಟ್ಟ್,ದೇವತಾರಾದನೆದ ಕ್ರಮ ಒರಿಯು. ಅವೆನ್ ಮೂಲ ಸಾಂಪ್ರದಾಯಿಕ ಸ್ವರೂಪೊಡು ಒರಿತೊನುನ ಅನಿವಾರ್ಯತೆ ಪ್ರತಿಯೊರಿ ತುಳುವಗ್ಲ ಉಂಡು.ದೈವ ತಪ್ಪು ಮಲ್ಪಯೆರೆಂದೇ ಉಪ್ಪುನಿ,ನಮ ದೈವೊಲೆಗ್ ತಗ್ಗ್ ದ್ ಬಗ್ಗ್ ದ್ ನಡಪೊಡು.ಅಪಗ ನಮಕ್ ದೈವ ದೇವೆರೆ ಅನುಗ್ರಹ ತಿಕ್ಕೆರೆ ಸಾದ್ಯ.        

ವೀಡಿಯೋ ಲಿಂಕ್:-

ಚಾಮುಂಡೇಶ್ವರಿ ದೇವಿನ ಸೌಮ್ಯವಾಯಿನ ದರ್ಶನ:-

  https://youtu.be/N6VjXhPHhJo?si=3wzaVDUJuWm55C06

https://youtu.be/GB4zIDJilXw?si=yWtLhj8UAe9SaQmn

  https://youtu.be/x5jXZmoPySQ?si=eZgKHucgOxiwY89D

   https://youtu.be/qF-kUrdiOm0?si=-cf_oqiq-Zhv4gHW

                      *****""""***********

ಸನ್ಯಾಸಿ ಮಂತ್ರಜಾವದೆ

         ‌     ‌‌‌          ಸನ್ಯಾಸಿ ಮಂತ್ರಜಾವದೆ

( ನಾಗರ ಸನ್ಯಾಸಿ ಮಂತ್ರಜಾವದೆ /  ರಾಮಸನ್ಯಾಸಿ ಮಂತ್ರಜಾವದೆಂದ್ ಲ ಅಪ್ಪೆಗ್ ಪುರಪುಂಡು.ಕೆಲವೆರ್ ನಾಗರಾಜ ಸನ್ಯಾಸಿಂದ್ ಲ ಪನ್ಪೆರ್.ನಾಗರ ಪಂಡ ನಾಥ ಪಂಥದ ನಾಗ ಸಾಧು ಆದಿಪ್ಪೊಡು)

         ಸನ್ಯಾಸಿ ಮಂತ್ರ ಜಾವದೆನ ಬಗೆಟ್ ಬೇತೆ ಬೇತೆ ಹಿರಿಯ ಬಾಗದ ಕಟ್ಟುನಕ್ಲೆಡ ಕೇನ್ನಗ ಕತೆಟ್ ಎತ್ತೇಸೊಲು ತೋಜಿದ್ ಬರ್ಪ.ಮೂಲವೆನ್ ಸರಿ ತಪ್ಪು ಪನ್ಪುನ ಬದಲ್ ಅಕ್ಲೆ ಹಿರಿಯಾಕುಲು ಅಕ್ಲೆಗ್ ತೆರಿಪಾಯಿ ಇಚಾರೊನು ಮೂಲು ತೆರಿಪಾವುನ ಪ್ರಯತ್ನ ಆತೆ.ಒಂಜೇ ದೈವ ಬೇತೆ ಬೇತೆ ಊರುಗು ಪೋನಗ ಬೇತೆ ಬೇತೆನೆ ಕಥೆ ಉಪ್ಪುನತ್ತಂದೆ ಒಂಜೇ ದೈವೊಗು ಬೇತೆ ಬೇತೆ ಊರುಡು ಬೇತೆ ಬೇತೆನೇ ಪುದರಿಪ್ಪುಂಡು.ಮೂಲವೆನ್ ಸರಿ ತಪ್ಪು ಪನ್ಪುನ ಬದಲ್ ಪ್ರಾದೇಶಿಕ ಭಿನ್ನತೆನ್ ಅರ್ಥ ಮಲ್ತೊನೊಡು.ಅಕುಲು ಪನ್ನ ಸರಿ ಮೊಕ್ಲು ಪನ್ನ ತಪ್ಪು ಪನ್ಪುನ ಬದಲ್ ಆ ಪ್ರದೇಶೊಗು ಸರಿಯಾಯಿನೆನ್ ನಡಪಾವೊಂದು ಪೋವೊಡು.

        ಸನ್ಯಾಸಿ ಮಂತ್ರಜಾವದೆನ ಉಜ್ಜಾಲ್.ಮೂಡುಕೋಡಿ ವೇಣೂರು

            ಉಜ್ಜಾಲ್ ದ ಮಿತ್ತ್ ಪಂಚಾಂಗ, ಜಪ ಮಾಲೆ, ದಂಡ, ಕಮಂಡಲ, ಮಂತ್ರವಾದಿನಕುಲು ಬರೆಪುನ ಕರ್ಬದ ಕಂಠೆ, ಕವಡೆಲು ಉಪ್ಪುಂಡು.

                  ಸನ್ಯಾಸಿ ಮಂತ್ರಜಾವದೆನ ಉಜ್ಜಾಲ್ ದ ಅಲಂಕಾರ

    ರಾಮ ಸನ್ಯಾಸಿ ಬಂಟಾಲ ಬಡ್ಡಕಟ್ಟೆದ ಮಸಣೊಡು ಕುಲ್ದು ಸಿದ್ದಿ ಮಲ್ತಿ ದೈವ ಸನ್ಯಾಸಿ ಮಂತ್ರಜಾವದೆಂದ್ ಲ ಪನ್ಪೆರ್.ಕೆಲವು ಮೂಲದ ಪ್ರಕಾರ ನಾಗರ ಸನ್ಯಾಸಿ ಬಂಟಾಲ ಬಡ್ಡಕಟ್ಟೆದ ಮಸಣೊಡು ಸಿದ್ದಿ ಮಲ್ತಿ ದೈವ ಸನ್ಯಾಸಿ ಮಂತ್ರಜಾವದೆಂದುಂಡು.

  

ಸನ್ಯಾಸಿ ಮಂತ್ರಜಾವದೆನ ಕೋಲೊಡು ಸನ್ಯಾಸಿನ ಕಾರ ಪಾಳೆದ ಮಿತ್ತ್ ಕಾರ ಗಗ್ಗರ ದೀಪುನಿ .

ಸನ್ಯಾಸಿ ಮಂತ್ರಜಾವದೆಗ್ ಕಟ್ಟುನ ಮಸ್ತ್ ಹಿರಿಯಾಕ್ಲೆಗೇ ಅವೆತ ಮೂಲ ಕಥೆ ತೆರಿಯಂದೆ ಇತ್ತ್ಂಡಲ ಅಕ್ಲೆ ಹಿರಿಯಾಕ್ಲು ಮಲ್ತಿ ನೇಮದ ಕಟ್ಟ್ ನ್  ಮಾತ್ರ ಇನಿಕ್ಲಾ ಒಡಕ್ ಬರಂದಿಲೆಕ ಪಾಲಿತೊಂದುಲ್ಲೆರ್.
   

      ಸನ್ಯಾಸಿ ಮಂತ್ರಜಾವದೆನ ಕೋಲೊಡು ಸನ್ಯಾಸಿರ್ದ್ ಕೇರ್ತಿ ಬಂಡಾರೊಗು ಗಗ್ಗರದಾರತಿ.

ಸನ್ಯಾಸಿ ಮಂತ್ರಜಾವದೆನ ಕಟ್ಟ್ ಡ್ ಬಾಬಾಬುಡಾನ ಗಿರಿತ ಕಥೆ ಬೋಡೆ.ಅಲ್ತ್ ರ್ದೇ ಸನ್ಯಾಸಿ ಮಂತ್ರಜಾದೆನ ಪುಟ್ಟು.

                      ಸನ್ಯಾಸಿ ಮಂತ್ರಜಾವದೆ ಕೋಲ

ಸನ್ಯಾಸಿ ಮಂತ್ರಜಾವದೆನ ಕಥೆಟ್ ಪ್ರದಾನವಾದ್ ಎಳ್ವೆರ್ ಸನ್ಯಾಸಿನಕ್ಲೆನ ಉಲ್ಲೇಖ ಇತ್ತ್ ದ್ ಅವೆಟ್ ನಾಗರ ಸನ್ಯಾಸಿ,ರಾಮ ಸನ್ಯಾಸಿ(ಗಿಣಿ/ಳಿರಾಮ ಸನ್ಯಾಸಿ)ನ ಉಲ್ಲೇಖ ಪ್ರದಾನವಾದ್ ಬರ್ಪುಂಡು.

ಸನ್ಯಾಸಿ ಮಂತ್ರಜಾವದೆ ಕೋಲೊಡು ಸನ್ಯಾಸಿ ಪೀಠದ ಮಿತ್ತ್ ಅಟ್ಟೆ ಪೊದ್ದಿದ್ ಕುಲ್ದ್ ನಿ. ಕೆಲವು ತಿಕ್ ಡ್ ಮಂತ್ರಜಾವದೆ ಉಲಯಿತ್ತ್ಂಡ ಸನ್ಯಾಸಿ ಪಿದಯುಪ್ಪುನಿ.

   ಮಂತ್ರಜಾವದೆನಕ್ಲಡ್  ಬೇತೆ ಬೇತೆ ರೂಪದ ಪುದರಿತ್ತ್ ದ್  ಮಂತ್ರಜಾವದೆ,

ಸನ್ಯಾಸಿ ಮಂತ್ರ ಜಾವದೆ,

ರಾವು ಮಂತ್ರಜಾವದೆ 

ಪನ್ಪಿ ಪುದರ್. ಪ್ರದಾನವಾದ್ ತೋಜಿದ್ ಬರ್ಪುಂಡು. ಕಟ್ಟಿಲ್ಲ್. ಜತ್ತಿ ಬಾಕಿಲ್ ಡ್ ಆರಾದನೆ ಮಲ್ಪುನ ಮಂತ್ರ ಜಾವದೆನ್ ಸೂಂತ್ಲಾಡಿ ಮಂತ್ರಜಾವದೆಂದ್ ಲ ಪನ್ಪೆರ್.

     ಇನಿತ ದಿನಮಾನೊಲೆಡ್ ಸನ್ಯಾಸಿ ಮಂತ್ರಜಾವದೆನೊಟ್ಟುಗು ಮಂತ್ರಜಾವದೆನ ಕೋಲಲಾ ಉಪ್ಪುಂಡು.ಸನ್ಯಾಸಿ ಮಂತ್ರಜಾವದೆನೊಟ್ಟುಗು ಗುಳಿಗನ ಕೋಲಲಾ ಉಪ್ಪುಂಡು.ಸನ್ಯಾಸಿನೊಟ್ಟುಗು ಗುಳಿಗೆ ಇತ್ತ್ ದ್ ಸನ್ಯಾಸಿ ಗುಳಿಗನ ಕೋಲಲಾ ನಡಪುಂಡು.ಮಂತ್ರಜಾವದೆನೊಟ್ಟುಗು ಗುಳಿಗೆ ಇತ್ತ್ ದ್ ಗುಡ್ಡೆ ಡ್  ಅವೆತ ಆರಾದನೆ ಉಂಡು ಪಂಡ ಮಂತ್ರಜಾವದೆ ಚಾಮುಂಡಿನ ಅಂಶನಾ ಪನ್ಪಿ ಪ್ರಶ್ನೆಲಾ ಮೂಡುಂಡು.ಚಾಮುಂಡಿ ಗುಳಿಗನ ಆರಾದನೆ ಇತ್ತ್ ಲೆಕ ಮಂತ್ರಜಾವದೆನೊಟ್ಟುಗು ಗುಳಿಗನ ಆರಾದನೆಲಾ ಉಂಡು.ಕೊರತಿ ಗುಳಿಗೆ,ಚೌಕಾರು ಮಂತ್ರವಾದಿ ಗುಳಿಗನ ಆರಾದನೆಲ ತುಳುನಾಡ್ ಡ್ ಉಂಡು.ಸೂಂತ್ಲಾಡಿ ಮಂತ್ರಜಾವದೆನ ಆರಾದನೆದೊಟ್ಟುಗು ಗುಳಿಗನ,ಮಂತ್ರವಾದಿ ಗುಳಿಗನ ಆರಾದನೆಲ ಉಂಡು.

                  ----------------------------------------

ಸನ್ಯಾಸಿ ಮಂತ್ರಜಾವದೆನ ಮದಿಪು:-

( ಇನಿ ಕೆಲವೆರ್ ಸನ್ಯಾಸಿ ಮಂತ್ರಜಾವದೆಗ್ ಮದಿಪುನಗ ಮಂತ್ರಜಾವದೆನ ಕಥೆರ್ದೇ ಸುರು ಮಲ್ಪುವೆರ್.ಆಂಡ ಸನ್ಯಾಸಿ ಮಂತ್ರಜಾವದೆನ ಕಥೆ ಮಂತ್ರ ಜಾವದೆನ ಕಥೆರ್ದ್ ಬೇತೆ ಆದುಂಡು )

     .......ತುಳುನಾಡ ಮಣ್ಣ್ ಡ್ಅದಿಕಾರೊಡು ಮೆರೆಯೊಂದು ಬರ್ಪುನ ಸರ್ವ ಸಗ್ತಿಲೆಗ್ ತರೆನ್ ತಗ್ಗಾದ್,

ಅಧಿಕಾರೊಡು ಮೆರೆಯೊಂದು ಬತ್ತಿನ ಸನ್ಯಾಸಿ ಮಂತ್ರ ಜಾವದೆನ ರಾಜ್ಯ ಕೂಡಿ ಕಲೊಟು ಕುಟುಮದ ತನು ಮದ್ಯೊಡು ತರೆನ್ ತಗ್ಗಾದ್ ಮನ್ಪಿಂಚಿ ಪ್ರಾರ್ಥನೆ,.....

         ಅಪ್ಪೇ. ಸನ್ಯಾಸಿ ಮಂತ್ರ ಜಾವದೇ......ಬಾಬಾ ಬುಡಾನ ಗಿರಿಟ್. ಎಳುವೆರ್ ಸನ್ಯಾಸಿಲೆಗ್ ಜಪಂದ ಒಂಜಿ ಅಧಿಕಾರ ಸಗ್ತಿ ಬೋಡುಂದು ಉಪಾಸನೆಗ್ ಕುಲ್ದಿಂಚಿ ಪೊರ್ತುಡು ಅಪ್ಪೆನೊರುತ ಸಗ್ತಿದ ಮಾಯೆಯಾದ್ ಸಿದ್ದಿ ಸಗ್ತಿಯಾದ್ ಅಕ್ಲೆನ ಜೋಳಿಗೆಗ್( ಮಟ್ಟೆಲ್ ಗ್ಂದ್ ಲ ಪನೊಲಿ ) ಬೂರ್ನಂಚಿ ಕಾಲ,

ದಾದನಾ ಕಾಲದ ಎರ್ತೆ ತಗ್ಗೆಲ್ ಡ್ ( ಕಾಲಾಂತರೊಡು ) ಸನ್ಯಾಸಿನಕ್ಲೆನ ನಡುಟು ಎತ್ತಯೊ(ಭಿನ್ನಾಭಿಪ್ರಾಯ ) ಬತ್ತ್ ದ್. ನಾಗರ ಸನ್ಯಾಸಿ ಅಲ್ತ್  ಜತ್ತ್ ಬರ್ಪುನ ಪೊರ್ತುಗು ಅರೆನ ಜೋಳಿಗೆಗ್ ರುದ್ರಾಕ್ಷಿದ ವರನ್ ಆದ್ ಬೂರಿಂಚಿ ಪೊರ್ತು ಗಳಿಗೆ,

ಅರೆನ ಬೆರಿ ಪತ್ತ್ ದ್ ಬತ್ತ್ ದ್ ಸಿಮ್ಮ ರಾಜ್ಯೊನು ಬುಡ್ದು( ಸಿಮ್ಮ ರಾಜ್ಯ ಪಂಡ ಮೈಂದ್ ಬೂರುನ ಗಟ್ಟ) ಬೆಪ್ಪುಲ್ಲ ಬೆಮ್ಮೆರೆ ಸೃಷ್ಟಿದ  ತುಳುವ ರಾಜ್ಯೊಗು ಜತ್ ದ್ ಅರೆಗೊಂಜಿ ಸಗ್ತಿದ ಒರುಟು ಸುರುಕಾದ್ ಮಾಯೆದೊರುತ ಗೋಚಾರ ಕೊರ್ದು " ಸನ್ಯಾಸಿ ಮಂತ್ರ ಜಾವದೆ" ಂದ್ ಪುರಾಪುನು ಧಾರಣೆ ಮಲ್ತೊಂದು ಬತ್ತ,

ನಾಗರ ಸನ್ಯಾಸಿ ಮಂತ್ರ ಜಾವದೆ  ಪನ್ಪುನ ಪುರಾಪುನು ಧಾರಣೆ ಮಲ್ತೊಂದು ಬತ್ತ,

ಅಪ್ಪೇ...ಸನ್ಯಾಸಿ ಮಂತ್ರ ಜಾವದೇ..... ಸನ್ನಿಕಾಯಿದ ಮಣ್ಣ್ ಡ್ ಗಿಣಿರಾಮ ಬೈದ್ಯನ(ರಾಮ ಬೈದ್ಯನ) ಮನ ಬಗ್ ತಿಗ್ ಒಲಿದ್ ಬತ್ತ್ ನ ಮಾಯೆ ಮಾತ್ಮೆದ ಕಲೆ,

ಅರೆನ ಕಟ್ಟ್ ನ್ ಪಡೆಯೊಂದು,ಕೆಂಪುಗುಡ್ಡೆ ಮುದರ ಪೂಜಾರಿನ ಕಟ್ಟ್ ನ್ ಮಲ್ತೊಂದು ಬತ್ತ್ ನ ಸತ್ಯ.

ಕೇಳು ಬಲ್ಯಾಯನ ಬಲ್ಯಾದಿಗೆದ ಪ್ರಕಾರ ತಂತ್ರ ಮಂತ್ರ ಸಿದ್ದಿ ಸಗ್ತಿದ ಜಪನಿಕೆದ( ಉಪಾಸನೆದ )ಜಾವದೆಂದ್ ಪನ್ಪಾವೊಂದು ಬತ್ತ,

        ತುಳುವ ನೆಲತ ಬೇತೆ ಬೇತೆ ಜಾಗೆಡ್ ಬೇತೆ ಬೇತೆ ಪುರಾಪುನು ಪಡೆಯೊಂದು ನಿನನ್ ನಂಬಿ ಬಡ ಸಂಸಾರದ ತನು ಮದ್ಯೊಗು ವಾ ರಾಯೆರೆ ಕಾಲೊಡು ದೀತನ ದೃಷ್ಟಿ,ಊರ್ದನ ಉಂಗುಟ,ಅರಲ್ಪಾದನ ಜಿಡೆ,ಅಜ ಊರ್ದು ನಿಜಾತಂದ್ ( ಗಜ ಏರ್ದ್ ನಿಜಾತಂದ್ ಪನ್ಪೆರ್.ರಾಜಂದೈವೊಲೆ ಬಂಡಿಡ್ಲ ಆನೆ/ಗಜತ ಬಂಡಿ ಇಜ್ಜಿ.) ನಿನ್ನ ಕಲೆ ಮಾತ್ಮೆಗ್ ಮಾತ್ರ ಗೋಚಾರೊಗಿತ್ತ್ ನವು.

ಬತ್ತಿ ದೈವದೆದುರು ಇತ್ತಿ ಜಾಗೆಡ್ ಪಾಪದ ಕುಲಕೋಟಿ  ಸಂಸಾರ ದತ್ತ್ ಬಲತ್ ಗ್ ಉಂತೊಂದು ಅಧಿಕಾರದ ಸನ್ಯಾಸಿ ಮಂತ್ರಜಾವದೆಗ್ ಸಿರಿ ಸಿಂಗಾರದ ಸೇವೆ ಕೊರ್ದು,ಸಿರಿಗಿಂಡೆಡ್ ಒಂಜಿ ಕೊಂಡೆ ಪೇರ್ ಕೊರೊಡುಂದು ಸಂಕಲ್ಪ ಮಲ್ತಿ ಪೊರ್ತು ಗಳಿಗೆ,

ಕಡ್ಪಾಯಿ ಕೈಲ್ ,ದೀಪಾಯಿ ಸತ್ತಿಗೆ (ಸುದ್ದ ಮುದ್ರಿಕೆ),ಪೊತ್ತಾಯಿ ನಂದಲ, ಕಟ್ಟಿಂಚಿ ಇಸ ಮಕ್ಕುಲೆಗ್ ಕೊರ್ತಿಂಚಿ ಎಣ್ಣೆ ಪಡಿಯರಿ,ಏರಾಯಿ ಬಲಿ ಮುದ್ರೆ,ಕಟ್ಟಾಯಿ ಬಾಲೊಲಿ ,ಪಂಡಿಂಚಿ ಪಾರಿಡ್ ಸಾಸ್ರ ಬಗೆತ ತಪ್ಪಿಪ್ಪು.

ತಪ್ಪುನು ತಟ್ಟ್ ಪಾರಾದ್ ಇಸೊನು ಗರುಡನ ಬಾಯಿಗ್ ಪಾಡ್ಲ,ಅಮುರ್ತೊನು ನಂಬಿಂಚಿ ಸಂಸಾರೊಗು ಒದಗಾದ್ ಕೊರ್ಲ,

ಸಂಸಾರ ಪಂಡಿ ಪಾರಿ ಕೇನ್ಲ,ಯಾನ್ ಪಂಡಿ ಪಾರಿಯತ್ತ್,ಎನ್ನ ಪೂರ ಹಿರಿಯಾಕ್ಲ್ ಪಂಡಿ ಪಾರಿಂದ್ ಕೇನ್ಲ,

ಅಕ್ಕಸ ಬುಡ್ಲ ಬೂಮಿಡಾಲ,ಬೂಮಿ ಬುಡ್ಲ  ದೀನಂಚಿ ಸತ್ಯ ರೂಫೊಡಾಲ,ದೀನಂಚಿ ಸತ್ಯ ರೂಪ ಬುಡ್ಲ ಎಂಕ್ಲೆಂಚಿ ಅಪ್ಪೆ ಪೆದ್ದಿ. ನರಮಾನ್ಯನ ಮಿತ್ತ್ ಪರಿಪೂರ್ಣಾದ್ ಮಾಯೆರ್ದ್ ವಸಾಯೊಡು ಜತ್ತ್ ಬಲ 

.... ಇಂಚ ದೈವೊಗು ಮದಿಪುವೆರ್.ನನ ಕೆಲವರೆ ಮದಿಪು ಅಕ್ಲೆ ಅಲ್ಮೋಗೊಗು. ತಕ್ಕ ಎತ್ತೇಸ ಉಪ್ಪೆರ್ಲ ಯಾರು.ನಿಜವಾದ್ ಕುಟುಮದ ದೈವೊಗು ಕುಟುಮದ ಹಿರಿಯಾರ್ ಮದಿಪುನ ನಾಲ್ ಪಾತೆರೊನೆ ಮಲ್ಲ ಮದಿಪು.

               ^^^^^^^^^^^^^^^^^^^^^^^^

ಸನ್ಯಾಸಿ ಮಂತ್ರಜಾವದೆನ ಕಟ್ಟ್ :- 

      ಸನ್ಯಾಸಿಗ್ ಬೊಕ್ಕ ಮಂತ್ರಜಾವದೆಗ್ ಒಟ್ಟುಗು ಎಣ್ಣೆ ವೀಳ್ಯ.ಸನ್ಯಾಸಿಗ್ ಸುರುಕು ವಸಾಯ ಆದ್ ಸನ್ಯಾಸಿ ಪೀಠದ ಮಿತ್ತ್ ಜಪೊಕು ಕುಲ್ಲುನಿ.ಅವೆರ್ದ್ ಬೊಕ್ಕ ಮಂತ್ರಜಾವದೆನ ಗಗ್ಗರದೆಚ್ಚಿ ನಡಪುಂಡು.ಬೊಕ್ಕ ಮಂತ್ರಜಾವದೆ ಸನ್ಯಾಸಿನ್ ಲೆಪ್ಪುನ ಕೆರಮ ಉಂಡು.ಕುಟುಮದ ಪಾತೆರಕತೆ,ನ್ಯಾಯ ತೀರ್ಮಾನ ಪೂರ ಮಂತ್ರಜಾವದೆನ.ಸನ್ಯಾಸಿ ಪೀಠೊಡು ಕುಲೊನೆರೆ ಮಾತ್ರ.ಸನ್ಯಾಸಿನ ಕೈಟ್ ದಂಡ,ಕಮಂಡಲ,ಪಂಚಾಂಗ ಉಪ್ಪುಂಡು.ಕುಟುಮ ಪರಿವಾರ ಕೊಡಿ ಬಾರೆದಿರೆ ಬಾಡಾದ್ ಸನ್ಯಾಸಿಗ್ ಪೊಡಿ ಬಜಿಲ್ ಪಾಡ್ದ್ ಕೊರ್ಪೆರ್.ಅಂಚನೆ ಪೇರ್ ಕೊರ್ಪೆರ್.ಸನ್ಯಾಸಿ ಬೊಕ್ಕ ಮಂತ್ರಜಾವದೆ ಒಟ್ಟುಗು ಪೇರ್ ಪರ್ಪುನಿ.ಕೆಲವು ತಿಕ್ ಡ್ ಸನ್ಯಾಸಿಗ್ ಪರವೆರ್ ಕಟ್ಯೆರ್ಡ ನನ ಕೆಲವು ಕೋಡಿಡ್ ನಲಿಕೆದಕುಲು ಸನ್ಯಾಸಿಗ್ಲ,ಮಂತ್ರಜಾವದೆಗ್ಲ ಕಟ್ಟುವೆರ್.ಕೆಲವು ಪೆರಿಯಕ್ಲೆ ಪ್ರಕಾರ ಪೊಸಬೂತ/ಪೊಸಪ್ಪೆ ಪುರಲ್ ರ್ದ್ ಬೊಕ್ಕ ಆಪುನಿಗೆ.ಪುರಲ್ ಮುಟ್ಟ ಮಂತ್ರಜಾವದೆಯಾದಿತ್ತ್ ದ್ ಅಡೆಮುಟ್ಟ ಕಾಂತು ಬೈದ್ಯನ ಕಟ್ಟಿತ್ತ್ ದ್ ಅಲ್ತ್ ಬೊಕ್ಕ ಪೊಸಪ್ಪೆನ ಕುಂಟದೂಮನ ಕಟ್ಟಾಂಡ್ಂದ್ ಪನ್ಪೆರ್.ಅವೆಕ್ ಪೂರಕವಾದ್ ಮಂತ್ರಜಾವದೆನ ಮೋನೆದ ರಂಗ್ ದಲ,ಪೊಸಪ್ಪೆನ ಮೋನೆದ ರಂಗ್ ದಲ ಓಲ್ಪಡಿ ಸಾಗ್ಸಿಯಾಪುಂಡು.

                      ಪೊಸಪ್ಪೆ(ಸತ್ಯಜಾವದೆ) ನ ಮೋನೆದ ರಂಗ್

                           ಮಂತ್ರಜಾವದೆನ ಮೋನೆದ ರಂಗ್

              -<><><><>>><><><><><><>

ಹಿರಿಯ ಪೆರಿಯಾಕ್ಲೆರ್ದ್ ತೆರಿದ್ ಬತ್ತಿ ಕಥೆ :

    

            ಸನ್ಯಾಸಿ  ಮಂತ್ರಜಾವದೆನ ಕಥೆಲಾ ಗಟ್ಟದ ಮಿತ್ತ್ ರ್ದೇ ಸುರಾಪುಂಡು.ಒಂಜಿ ಮೂಲದ ಪ್ರಕಾರ ಬಾಬಾ ಬುಡಾನ ಗಿರಿಟ್ ಎಳುವೆರ್ ಸನ್ಯಾಸಿನಕುಲೆ ನಡುಟು ಲಡಾಯಾದ್ ಅಕುಲು ಏಳ್ ಜನಲ ಗಟ್ಟ ಜತ್ತ್ ದ್ ಬರ್ಪೆರ್.ಅಂಚ ಜತ್ತಿನಕುಲು ಬೇತೆ ಬೇತೆ ಊರುಗು ಪೋಪೆರ್. ಅವೆಟ್ ಮೂಜಿ ಜನೊಕ್ಲಾಯಿನ ನಾಗರ/ಜ ಸನ್ಯಾಸಿ,ರಾಮ ಸನ್ಯಾಸಿ,ಗಿಣಿರಾಮ ಸನ್ಯಾಸಿ ತುಳುನಾಡ್ ಗ್ ಬರ್ಪೆರ್.ಕೆಲವೆರ್ ನಾಗರ ಸನ್ಯಾಸಿನ ಜೋಳಿಗೆಡ್ ರುದ್ರಾಕ್ಷಿದ ಕಾಯಿದೊರುಟು ಸನ್ಯಾಸಿ ಮಂತ್ರ ಜಾವದೆ ತುಳುನಾಡ್ ಗ್ ಅರೆನ ಬೆರಿ ಪತ್ತ್ ದ್ ಬತ್ತಲ್ ಪಂಡ ನನ ಕೆಲವೆರ್ ರಾಮ ಸನ್ಯಾಸಿ ಬಂಟಾಲ ಬಡ್ಡಕಟ್ಟೆದ ಕೈತಲ್ ಸಿದ್ದಿ ಮಲ್ತ್ ದ್ ಸನ್ಯಾಸಿ ಮಂತ್ರ ಜಾವದೆನ್ ಒಲಿಪಾವೊಂಡೆರ್ಂದ್ ಪನ್ಪೆರ್.ಅಂತೂ ಜೋಗಿ ಸನ್ಯಾಸಿಲೆನ ಸಿದ್ದಿದ ಸಗ್ತಿ ಸನ್ಯಾಸಿ ಮಂತ್ರ ಜಾವದೆ ಪನ್ಪಿ ಇಚಾರ ತೆರಿದ್ ಬರ್ಪುಂಡು.ಅಂಚಾದ್ ಸನ್ಯಾಸಿ ಮಂತ್ರ ಜಾವದೆನ ಒಟ್ಟುಗು (ಜೋಗಿ) ಸನ್ಯಾಸಿಗ್ಲಾ ಆರಾದನೆ ನಡಪುಂಡು.ಸನ್ಯಾಸಿ ಮಂತ್ರ ಜಾವದೆನ್ ದೈವ ಬೂತಂದ್ ಪನ್ಪುನೆಡ್ದ್  ಆಲೊಂಜಿ ಸಕ್ತಿ,ಸಿದ್ದಿ ಸಕ್ತಿಂದ್ ಪನೊಲಿ.

                ನನೊಂಜಿ ಮೂಲದ ಪ್ರಕಾರ ಎಳುವೆರ್ ಸನ್ಯಾಸಿಲು ತನ್ಕುಲೆಗ್ ಒಲಿದ್ ಬತ್ತ್ ನ ಸಗ್ತಿನ್ ಪರಾಬಾರೆ ಮಲ್ತೊಂಡೆರ್(ಪರಾಬಾರೆ ಪಂಡ ಕೊರೊಂಡೆರ್).ಅಂಚಾದ್ ಬೇತೆ ಬೇತೆ ಪುದರ್ಡ್ ಮಂತ್ರಜಾವದೆನ ಆರಾದನೆ ಸುರಾಂಡ್.ಅಂಚ ಸನ್ಯಾಸಿಲೆರ್ದ್ ಈದು ಬಟ್ಟೆಣಿ ದಿಂಡುದೇರೆ ಬೈದ್ಯೆರೆಗ್ ತಿಕ್ಕಿನ. ಒಂಜಿ   ಸಗ್ತಿ  ಮಂತ್ರಜಾವದೆ.ಅಂಚನೆ ರಾಮ ಸನ್ಯಾಸಿಲೆರ್ದ್ ರಾಮ ಪೂಜಾರ್ಲೆಗ್ ಜಪತ ಮಾಲೆದೊರುಟು ತಿಕ್ಕ್ ನ  ಸಗ್ತಿ ಸನ್ಯಾಸಿ ಮಂತ್ರ ಜಾವದೆ.ಮಂತ್ರಜಾವದೆಯಾವಡ್,ಸನ್ಯಾಸಿ ಮಂತ್ರಜಾವದೆಯಾವಡ್ ಅವು ಜೋಗಿ ಸನ್ಯಾಸಿಲೆನ ಸಿದ್ದಿದ ಸಗ್ತಿ ಪನ್ಪುನವು ಸತ್ಯ.ಈ ಕಥೆತ ಪ್ರಕಾರ ಒಂಜಿ ದಿನ ರಾಮ ಸನ್ಯಾಸಿ,ಗಿಣಿರಾಮ ಸನ್ಯಾಸಿನಕುಲು ಸುದೆಕ್ಕಾರ್ ಡ್ ಮೀಯೊಂದಿಪ್ಪುನಗ ರಾಮ ಸನ್ಯಾಸಿ ಮುರ್ಕ್ ದ್ ಲಕ್ಕ್ ನಗ ಅರೆನ ಕಂಟೆಲ್ಡಿತ್ತಿ ಜಪತ ಮಾಲೆ ನೀರ್ ಗ್ ಬೂರುಂಡು.ಅವ್ವೇ ತುದೆಟ್ ಮೀಯೊಂದಿತ್ತ್ ನ ರಾಮ ಪೂಜಾರಿ ಪನ್ಪುನಾರ್ ನೀರ್ ಡ್ ಮುರ್ಕ್ ದ್ ಲಕ್ಕ್ ನಗ ರಾಮ ಸನ್ಯಾಸಿಲ್ನ ಜಪತ ಮಾಲೆ ಅರೆನ ನಾಲಿಗ್ ಬತ್ತ್ ದ್ ಬೂರುಂಡು.ರಾಮ ಪೂಜಾರ್ಲೆಗ್ ಆ ಸಗ್ತಿ ಸಿದ್ದಿಯಾದ್ ರಾಮ ಪೂಜಾರ್ಲೆನ ಪುದರ್ದೊಟ್ಟುಗು ರಾಮ ಸನ್ಯಾಸಿ ಮಂತ್ರಜಾವದೆಯಾದ್ ತುಳುನಾಡ್ ಡ್ ಆರಾದನೆ ಪಡೆಯೊಂದುಪ್ಪುನಿ.

       ಇನಿ ದೈವದ ಪುದರ್ಡ್ ಇಜ್ಜಾಂದಿ ದುಡ್ಡು ಮಲ್ತೊಂದುಲ್ಲೆರ್.ಆಂಡ ರಾಮ ಪೂಜಾರ್ಲು ರಾಮ ಸನ್ಯಾಸಿಡ್ದ್ ತಿಕ್ಕಿನ ಸಿದ್ದಿನ್ ದುರುಪಯೋಗ ಮಲ್ತ್ ಜೆರ್.ಆರ್ ದೈವದ ಪುದರ್ಡ್ ಪಾಪದಕ್ಲೆನ ಕಷ್ಟೊನು ಪರಿಹಾರ ಮಲ್ತೊಂದು ಬತ್ತೆರ್.ಆ ಸಗ್ತಿಗೊಂಜಿ ದೈವದ ರೂಪ ಕೊರ್ದು ರಾಮ ಸನ್ಯಾಸಿ ಮಂತ್ರ ಜಾವದೆಂದ್ ಪುದರ್ ಡ್ ಲೆತ್ತೆರ್.

      ಬಂಟಾಲೊಡು ರಾಮ ಪೂಜಾರ್ಲೆನ ಬೇಲೆ ಮುರ್ತೆದ ಬೇಲೆ.ದುಂಬು ಪೂರಾ ತಾರಿ ಮೂರೆರೆ,ಕಲಿ ಮಾರೆರೆ ದೂರದೂರುಗು ನಡತೊಂದೆ ಪೋವೊಂತೆರ್.ಅಂಚನೆ ಬಂಟಾಲೊಗು ಬೊಕ್ಕ ಕುಪ್ಪೆ ಪದವುದ ಸನ್ನಿಕಾಯಿ ಸುದೆಕ್ಲ ದಾಲ ಬಾರೀ ದೂರ ಇಜ್ಜಾಂಡ್.ಕಲಿ ಕೊರ್ಯೆರೆ ಅಂಚಿಗ್ ರಾಮ ಪೂಜಾರ್ಲು ನಡತೊಂದೆ ಪೋವೊಂತೆರ್.ಆರ್ ಅಂಚಿ ಪೋದಿಪ್ಪುನಗ ಬಚ್ಚೆಲರಪಯೆರೆಂದ್ ಸನ್ನಿಕಾಯಿ ತುದೆಕ್ ಬರ್ಪೆರ್.ತುದೆತ ನೀರ ಕಯ ತೂನಗ ಒರ ಮುರ್ಕ್ ದ್ ಲಕ್ಕ್ ಗಂದ್ ಅಲಚನೆ ಮಲ್ತ್ ದ್ ನೀರ್ದ ಗುಂಡಿಡ್ ಮುರ್ಕುವೆರ್.ಅವ್ವೆ ಪೊರ್ತುಡು ನೀರ ಗುಂಡಿಡ್ ಮುರ್ಕುದು ಲಕ್ಕ್ ನ ರಾಮ ಸನ್ಯಾಸಿಲೆನ ಕಂಟೆಲ್ದ ಜಪತ ಮಾಲೆ ನೀರ್ ಗ್ ಬೂರ್ದು ಅವ್ವೇ ಪೊರ್ತುಡು ನೀರ್ ರ್ದ್ ಮುರ್ಕ್ ದ್ ಲಕ್ಕಿನ ರಾಮ ಪೂಜಾರ್ಲೆನ ನಾಲಿಗ್ ರಾಮ ಸನ್ಯಾಸಿಲೆನ ಜಪತ ಮಾಲೆ ಬೂರುಂಡು.ಅವ್ಲು ರಾಮ ಪೂಜಾರ್ಲೆಗ್ ಆ ಸಗ್ತಿದ ಸಿದ್ದಿಯಾಪುಂಡು.ದುಂಬುಗುಆರ್  ಬಂಟಾಲ ಬಡ್ಡಕಟ್ಟೆದ ಮಸಣೊಡು ಕುಲ್ಲುದು ಆ ಸಗ್ತಿದ ಸಿದ್ದಿನ್ ಜಾಗೃತ ಮಲ್ಪುವೆರ್.ಸಿದ್ದಿ ಆಯಿನ ಆ ಸಗ್ತಿನ್ ಜನೊಕ್ಲೆನ ಕಣ್ಣೀರೊರೆಸೆರೆ ಗಲಸುವೆರ್.ಅಂಚಾದ್ ಸನ್ಯಾಸಿ ಮಂತ್ರಜಾವದೆನ ಪುದರ್ದೊಟ್ಟುಗು ರಾಮ ಸನ್ಯಾಸಿನ,ರಾಮ ಪೂಜಾರ್ಲೆನ ಪುದರ್ ಗೋಡಿದಿತ್ತ್ ದ್ ರಾಮ ಸನ್ಯಾಸಿ ಮಂತ್ರಜಾವದೆಂದ್ ತುಳುನಾಡ್ ಡ್ ದೈವದ ಆರಾದನೆ ಸುರಾಂಡ್.

     ದಂಬುದಕುಲು ಊರುರ್ದೂರು ಪೋನಗ ಓಲು ಬಚ್ಚೆಲರಪವೆರ್,ಓಲು ತುದೆಟ್ ಮೀಪೆರ್ಂದ್ ತೂಯಿನಕುಲಿಜ್ಜಿ.ಇನಿ ನಮಲ ತುದೆ ಮೀಯೆರೆಂದ್ ಕೊಲ್ಲೂರು,ಧರ್ಮಸ್ಥಲೊಕು ಪೂರ ಪೋಪ.ರಾಮ ಪೂಜಾರ್ಲು ತನ್ನ ಕಂಟೆಲ್ ಗ್ ಸನ್ನಿಕಾಯಿ ತುದೆಟ್. ಬೂರ್ನ ಸನ್ಯಾಸಿನಕ್ಲೆನ ಜಪತ ಮಾಲೆದ ಬಗೆಟ್ ಪಿಂದೊನೆರೆ ಬಲ್ಯಾಯಡ ನಿಮಿತ್ತ ನೋಟ ಕೇನ್ವೆರ್.ಅಪಗ ನಿಮಿತ್ತ ತೂಯಿನ ಬಲ್ಯಾಯೆರ್, ರಾಮ ಸನ್ಯಾಸಿಲ್ನ ಸಿದ್ದಿದ ದೈವ ಇರೆನ ನಾಲಿಗ್ ಬೂರ್ನ ಜಪತ ಮಾಲೆಡುಂಡು.ಅವೆತ ಆರಾದನೆನ್ ನಿಷ್ಠೆಡ್ ಮಲ್ತೊಂದು ಬಲೆಂದ್ ಪನ್ಪೆರ್.ಸಗ್ತಿ ಪಂಡ ಪೊಣ್ಣ ಒರು ಪಂಡ ಜಾವದೆ.ಸನ್ಯಾಸಿನ ಮಂತ್ರ ಸಿದ್ದಿ ಸಗ್ತಿದ ಜಾವದೆ ಆಯಿನೆರ್ದಾತ್ರ ಸನ್ಯಾಸಿ ಮಂತ್ರಜಾವದೆ ಪನ್ಪಿ ಪುದರ್ ನ್ ಆ ಸಗ್ತಿ ಧಾರಣೆ ಮಲ್ತೊಂದು ಬತ್ತ್ ಲೆಕಾಂಡ್.

    ಕುಪ್ಪೆ ಪದವುದಲ್ಪದ ಸನ್ನಿಕಾಯಿ ಪನ್ಪುನವು ಸನ್ಯಾಸಿ ಮಂತ್ರಜಾವದೆನ ಮೂಲಜಾಗೆಂದ್ ಪನ್ಪೆರ್.ರಾಘವೇಂದ್ರ ಸ್ವಾಮಿಲು ಅವ್ಲು ಪದ್ರಾಡ್ ವರ್ಸ ತಪಸ್ಸ್ ಮಲ್ತಿನ ಜಾಗೆಗೆ(ಮಂತ್ರಾಲಯದ ಯತಿಕುಲಾದಿಪ್ಪಂದ್).ಸಿರಿಕುಲು ( ಮೈಲೆ ಮಾತ್ ದ್ ಮಡಿ ತುತ್ತುನ ) ಮೀಪುನ ಗುಂಡಿಲು ಸನ್ನಿಕಾಯಿ ಸುದೆಟಿತ್ತಗೆ. ಸನ್ನಿಕಾಯಿ ಸುದೆತ ನೀರ ಗುಂಡಿದ ಪುದರ್ ( ಸನ್ನಿ ಕಯ:-ಕಯ ಪಂಡ ನೀರ್ ದ ಗುಂಡಿ ) ದುಂಬುಗು ಅಲ್ತ ಇಲ್ಲಗ್ ಸನ್ನಿಕಾಯಿ ಪುದರಾದ್ ಪೂಜಾರಿ ಮನೆತನದಕುಲು ಅವ್ಲುಲ್ಲೆರ್.ಸನ್ನಿಕಯಕ್ ಬೇತೆ ಬೇತೆ ಅರ್ಥೊಲುಲ್ಲ.ತುದೆತ ನೆಗರ್ ಪಂಡ ಮುದಲೆ ಉಪ್ಪುನ ಗುಂಡಿಲು ,ಉಂದೆನ್ ಕಯದ ಗುಂಡಿ ಸನ್ನಿಕಯಂದ್ ಪನ್ಪೆರ್.ಸನ್ನಿ ಕಯ ಪಂಡ ಮರ್ಲ್ಂದ್ ಲ ಅರ್ತ ಉಂಡು.ಮರ್ಲ್ ಗುಂಡಿ ಪಂಡ ನೆಗರ್ ಗುಂಡಿ.ನೆಗರ್ ಗುಂಡಿ ಪಂಡ ಸುಳಿತ ಗುಂಡಿಂದ್ ಲ ಅರ್ತ ಉಂಡು.ಪಡ್ಯಾರೊಟ್ಟುದ ತುದೆಟ್ ಅಂಗಾರ/ರೆ ಕರಿಯ,ಕೊಡಮಾಯಿ ಗುಂಡಿ,ದೇವೆರೆ ಗುಂಡಿ,ಸುರ್ಲಾಯಿ ಗುಂಡಿ( ನೀರ್ದ ಸುಳಿತ ಗುಂಡಿ ), ಮದ್ಮಾಲೆ ಗುಂಡಿಂದ್ ಮಲ್ಲ ಮಲ್ಲ ಕಯೊಲು ಪಂಡ ಗುಂಡಿಲುಲ್ಲ.

ಬರವುಗು ಮೂಲ ಆಕರ ಪೊಲಬು-

ಯನ್.ಕೆ.ಸಾಲಿಯಾನ್.ಅರಸು ಪಟ್ಟಿದ ನೇಮ ಕಟ್ಟುನ ಹಿರಿಯಾರ್     

                                ,,,,,,,,,,,,,,,,,,,,,,,,,,,,,,,,,,,,,,,,

       ಕೆಲವು ಕಟ್ಟುನ ಹಿರಿಯಾಕ್ಲು ಪನ್ಪಿ ಪ್ರಕಾರ , ಅಕುಲು ಕೆಲವಿಲ್ಲಡೆ ಕಟ್ರೆ ಪೋಂಡ ಎಂಕ್ಲೆ ಬೂತ ಇಂಚಿನ,ಎಂಕ್ಲೆ ಬೂತ ಅಂಚಿನ,ಕಟ್ಲೆ ಇಂಚ ಬೋಡುಂದು ಕಟ್ಟುನಕ್ಲೆಡ ಜಬಡ್ದಸ್ತ್ ಮಲ್ಪುನ ಬುಡುಂಡ ಅಕ್ಲೆನವೇ ದೈವದ ಇಚಾರ ಅಕ್ಲೆಗೇ ತೆರಿದುಪ್ಪುಜಿ.ಅಕ್ಲೆಗ್ ತೆರಿಯಂದೆ ಉಪ್ಪೆರ್ಲ ಕಾರಣ ಉಂಡು.ದಾದ ಪಂಡ ಅಕ್ಲೆ ಹಿರಿಯಾಕ್ಲು ಮೂಲ ಇಚಾರೊನು ತೆರಿಪಾವಂದೆ ಪೋಯಿನವು.ಅಂಚಾದ್ ಸನ್ಯಾಸಿ ಮಂತ್ರ ಜಾವದೆಗ್ ಕಟ್ಟ್ ಗಲ ಕೆಲವೊರ ಕರಿಯ ಕಾಂತು ಬೈದ್ಯೆರ್ನ,ಸೂಂತ್ಲಾಡಿ ಬರ್ಕೆದ ಇಚಾರೊಲು ಕೋಲೊಡು ಸೇರಾವೊಂದು ಪನೊಂದುಲ್ಲೆರ್.ನನ ಕೆಲವೆರ್ ಗಿಣಿರಾಮ ಸನ್ಯಾಸಿನ ಪುದರ್ ನ್ಲ ಉಲ್ಲೇಖ ಮಲ್ಪುವೆರ್.ಹೆಚ್ಚಾದ್ ಕೋಲ ಮಲ್ಪವುನಕ್ಲೆಗ್ಲ ಹಿನ್ನೆಲೆ ರ್ದಂಬರ್ದ ತೆರಿನೆರ್ದಾದ್ ಇಂಚ ಎತ್ತೇಸೊಲಾಪ.ಈ ದೈವದ ಪಾಡ್ದನ ಆಂಜನಕ್ಲೆರ್ದ್ ಹೆಚ್ಚಾದ್ ಪೊಂಜನಕ್ಲೆಗ್ ತೆರಿದುಪ್ಪುನಿಗೆ. ಅಂಚಾದ್ ಕರಿಯಕಾಂತು ಬೈದ್ಯೆರೆ ಆರಾದನೆದ ಮಂತ್ರಜಾವದೆ ಬೊಕ್ಕ ಸನ್ಯಾಸಿ ಮಂತ್ರ ಜಾವದೆ ಬೇತೆ ಬೇತೆನೆಂದ್ ತೆರಿಯುಂಡು

                        ...............................................

   

       ನನೊಂಜಿ ಮೂಲದ ಪ್ರಕಾರ ಸನ್ಯಾಸಿ ಮಂತ್ರ ಜಾವದೆನ ಕಥೆ ಇಂಚ ಬರ್ಪುಂಡು.ಬಾಬಾ ಬುಡಾನ ಗಿರಿರ್ದ್ ಸನ್ಯಾಸಿ ಮಂತ್ರ ಜಾವದೆನ ಕಥೆ ಸುರಾಪುಂಡು.ಅವ್ಲು ನಾಗರ( ನಾಗರಾಜ) ಸನ್ಯಾಸಿಲು ತಪಸ್ಸ್ ಮಲ್ತೊಂತೆರ್.ಮೂಲು ಮೇರ್ ಪನ್ಪುನ ನಾಗರ ಸನ್ಯಾಸಿ ಪಂಡ ನಾಥ ಪಂಥದ ನಾಗ ಸಾದು ಆದಿಪ್ಪೊಡು.ನಾಗ ಸಾದುಲು ಮಾಂಸಾಹಾರಿಲು,ಅಂಚನೆ ಸನ್ಯಾಸಿ ಮಂತ್ರಜಾವದೆನ ಇಚಾರೊಡ್ಲ ಅಗೆಲ್ ದ ಕಲ್ಪನೆ ಬರ್ಪುನೆಡ್ದಾದ್ ಈ ರಡ್ಡ್ ಇಚಾರೊಲೆಗ್ ಸಮ್ಮಂದ ಇತ್ತ್ ಲೆಕ ತೋಜುಂಡು.ನಾಗರ ಸನ್ಯಾಸಿಲು ಪುಲ ಮರ್ದ್ ಕೊರ್ಪುನ ಪಂಡಿತ. ಸನ್ಯಾಸಿಲಾದಿತ್ತೆರ್.ನಾಥ ಪಂಥದ ಜೋಗಿ ಸನ್ಯಾಸಿಲು ಸಿದ್ದಿನ್ ಕೊರ್ಪುನ , ಮರ್ದ್ ನ್ ಕೊರ್ಪುನ,ಪುತ್ರ. ಸಂತಾನ ಕೊರ್ಪುನ (ಬಸ್ಮ ಪುರ್ಸಾದೊಡು) ಸನ್ಯಾಸಿಲಾದಿತ್ತೆರ್.ನಾಗರ ಸನ್ಯಾಸಿಲು ಮರ್ದ್ ದ ಪಲಿತೊಗದ್,ಪಲಿಪುಗಾದ್ ಒಂಜಿ ಪೊಣ್ಣ ಸಗ್ತಿನ್ ನಂಬುದಿತ್ತೆರ್.ಆ ಪೊಣ್ಣ ಸಗ್ತಿನ್ ಜಾವದೆಂದ್ ಪನ್ಪೆರ್.ಇನಿಲಾ ತುಳುನಾಡ್ ಡ್ ಎಚ್ಚಿನ ಪುಲ ಮರ್ದ್ ಪಂಡಿತೆರ್ನಕುಲು ಮರ್ದ್ ದ ಪಲಿಪುಗಾದ್ ಒಂಜಿ ದೈವೊನು ಎನ್ನಿದ್ ಮರ್ದ್ ಕೊರ್ಪೆರ್.ಉಸಾರಾಯಿ ಬೊಕ್ಕ ಕೋರಿಯಾ ನನ ದಾದನಾ ಪರಕೆ ಕೊರ್ರೆ ಪನ್ಪೆರ್. ನಾಗರ ಸನ್ಯಾಸಿಲು ಬಾಬಾ ಬುಡನ್ ಗಿರಿರ್ದ್ ಶೃಂಗೇರಿ ಮಠೊಕು ಪೋದು ಒಂಜಾತ್ ಕಾಲ ಅವ್ಲಿಪ್ಪುವೆರ್.ಶೃಂಗೇರಿ ಮಠೊರ್ದು ಬನ್ನಗ ಚಾರ್ಮಾಡಿ ಗಟ್ಟ ಜತ್ತೊಂದು ಗುರುಪುರ ಜಂಗಮ ಮಠೊಕು ಬರ್ಪೆರ್.ಗುರುಪುರ ಮಠೊರ್ದು ಬಂಟಾಲದ ಪಡೆಂಕಿಮಾರ್ ಜನನದ ಕೊರಗ ಬೈದ್ಯೆರ್ನಡೆ ಬರ್ಪೆರ್.ಅಂಚ ಬತ್ತ್ ನ ನಾಗರ ಸನ್ಯಾಸಿ ಬಡ್ಡಕಟ್ಟೆದ ಮಸಣೊಡು ಆ ಪೊಣ್ಣ ಸಗ್ತಿ ಜಾವದೆನ್ ಸಿದ್ದಿ ಮಲ್ತ್ ದ್ ಮಯಕಾಪೆರ್.ಮಯಕಾಯಿನ ಆರ್ ಮಂತ್ರಜಾವದೆನೊಟ್ಟುಗು ಮಾಯೊಗು ಸೇರ್ದ್ ಸನ್ಯಾಸಿ ಮಂತ್ರಜಾವದೆಯಾದ್ ಆರಾದನೆ  ಪಡೆಪೆರ್  ಬಂಟಾಲ ವಾಮದ ಪದವುದ  ಕೊರಕಟ್ಟೆದ ಸೀನ ಪೂಜಾರ್ಲೆನಡೆ ಬತ್ತಿ ಸನ್ಯಾಸಿಮಂತ್ರಜಾವದೆನ್ ಆರ್ ಮನಬಗ್ ತಿಡ್ ಆರಾದನೆ ಮಲ್ತೊಂದು ಬತ್ತ್ ದ್ ದೈವೊನು ಎನ್ನಿದ್ ಪುಲಮರ್ದ್ ಕೊರೊಂತೆರ್.ಇನಿತ ದಿನಮಾನೊಡು ಪುಲಮರ್ದ್ ಪಂಡಿತೆರಾಯಿನ ನಾರಾಯಣ ಪಂಡಿತೆರ್ನ ಮೆಗ್ಗಿ ರಾಮ ಪಂಡಿತೆರ್ ಸನ್ಯಾಸಿ ಮಂತ್ರಜಾವದೆನ್ ಆರಾದನೆ ಮಲ್ತೊಂದಿತ್ತ್ ದ್ ದೈವೊನು ದುಂಬು ದೀದ್ ಪುಲ ಮರ್ದ್ ಕೊರೊಂದುಲ್ಲೆರ್.ರಾಮ ಪೂಜಾರ್ಲು/ ಪಂಡಿತೆರ್ ಸೀನ ಪೂಜಾರ್ಲೆನ/ಪಂಡಿತೆರ್ನ ಮಗೆ.

ಬರವುಗು ಮೂಲ ಆಕರ ಪೊಲಬು -

 ಹಿರಿಯಾರ್ ,ದೈವೊಲೆಗ್ ಕಟ್ಟುನಾರ್ ಕೊರಗಪ್ಪ ನಲಿಕೆ ಅಂಡಿಂಜೆ ಬೊಕ್ಕ ಸತೀಶ್ ಪೂಜಾರ್ಲು(ವಕೀಲೆರ್)

                     ,,,,,,,,,,,........................,,,,,,,,,,,,,,,,,,   

ಸನ್ಯಾಸಿ ಮಂತ್ರ ಜಾವದೆ ಇಲ್ಲಿಲ್ಲಗ್ ಪೋಪುನ ಕಟ್ಟಿಜ್ಜಿ.ಸನ್ಯಾಸಿ ಮಂತ್ರಜಾವದೆ ಪೋಯಿನ ಇಲ್ಲದಕುಲು ಒರಿ ಪುಲ ಮರ್ದ್ ಪಂಡಿತೆರಾದಿಪ್ಪುವೆರ್.ಮಂತ್ರ ಜಾವದೆಗ್ ಕಟ್ಟುನ ಕೆಲವೆರ್ (ಸನ್ಯಾಸಿ ಮಂತ್ರಜಾವದೆಗ್ ಕಟ್ಟುನಕುಲತ್ತ್) ಬಲಿಮೆ ಪನೆರೆ ಸುರು ಮಲ್ತ್ ದ್ ಪಾಪದಕ್ಲೆನ್ ಪೋಡಿ ಕಟ್ಟಾವೊಂದುಲ್ಲೆರ್.ಆತೇ ಅತ್ತ್ ಅಲೆನ್ ನಂಬುಜರ್ಡ ಅಳಿಯಂತ್ರ ಆಪರ್ಂದ್ ಪೋಡಿ ಕಟ್ಟಾವೊಂದುಲ್ಲೆರ್.ಅಕ್ಲೆನ ಇಲ್ಲದ ಒಡಕ್ ನ್ ಅಕ್ಲೆಗ್ ಸರಿ ಮಲ್ಪೆರೆ ತೀರುಜಿ.ಬೊಕ್ಕಲ ಊರುಗು ಬೇಲಿ ಪಾಡ್ರೆ ಪೋವೊಂದುಲ್ಲೆರ್.ನಿಕ್ಲೆ ಇಲ್ಲಗ್ ಮಂತ್ರ ಜಾವದೆ ಬೈದಲ್,ನಿಕ್ಲೆ ಮುಟ್ಟಿ ಕಲ್ಲ್ ಡ್ ಕುಲ್ದಲ್.ನಿಕ್ಲೆನ ಮಿತ್ತ್ ಅಲೆನ ದೃಷ್ಠಿ ಬೂರ್ದ್ಂಡ್ಂದ್ ಪೋಡಿಪಾವೊಂದುಲ್ಲೆರ್.ಅಕ್ಲೆನಡೆ ಪೋದು ಬತ್ತಿ ಬೊಕ್ಕ ದಾದಾಂಡಲ ಇಂಚನೆ ಅಕಲ್ತಪ್ಪುಡು ಅವಗಡ ಆಂಡಲಾ ದೈವೊಡ್ದಾದ್ ಇಂಚಾಂಡ್ಂದ್ ಪೋಡಿದ್ ಜನ ಅಲೆನ್ ನಂಬೆರೆ ಸುರು ಮಲ್ತೆರ್.ಇಂಚಿ ಬಲಿಮೆದಕ್ಲೆನಡೆ ಎಚ್ಚಾದ್ ಬರ್ಪುನಿ ಪೊಂಜನಕ್ಲ್.ಪೊಂಜನಕ್ಲೆನೇ ಮೊಕ್ಲು ಎಚ್ಚ ಪೋಡಿ ಕಟ್ಟಾವುನಿ.ನನ ಕೆಲವೆ್ ದೈವದ ಬೂಲ್ಯ ಪತ್ತ್ಂಡ ದೈವ ನಮ್ಮ ಪಿರವು ಬರ್ಪುಂಡು ಪನ್ಪೆ್.ಅಂಚ ದೈವ ತಿಕ್ ನಕ್ಲೆ ಪಿರವುಡೆ ಪೂರ ಬರ್ಪುಜಿ.

***************

ಪುರಾಣ ಕಲ್ಪನೆ

     ನನೊಂಜಿ ಮುದೆಲ್ದ ಕಥೆ ( ಮೂಲದ ಕಥೆ) ಪಿಂದೊನೆರೆ ಪೋಂಡ ಕಥೆ ಇಂಚ ಬರ್ಪುಂಡು.ಜೋಗಿ ಸನ್ಯಾಸಿಲು ಈಸರ ದೇವೆರೆ ಜಪತಕುಲು.ಜೋಗಿ ಸನ್ಯಾಸಿಲು ಈಸ್ವರಗೊರಿಯಗತ್ತಂದೆ ಬೇತೇರೆಗ್ಲ ಕೈ ಮುಗಿಯುಜೆರ್.ದಾಯೆ ಎಂಕ್ ಅಕುಲು ಕೈ ಮುಗಿಯುಜೆರ್ಂದ್ ತೂವೊಡುಂದು ಸಗ್ತಿಯಾಯಿನ ಪಾರೊತಿ ದೇವಿ ಅಕ್ಲೆನ ಜಪೊನು ಹಾಲ್ ಮಲ್ಪೆರೆ ತೂಪಲ್,ಅಕ್ಲೆ ತಪಸ್ಸ್ ದ ಬಲೊನು ದಂಗಾಯೆರೆ,ತಪ್ಪಾಯೆರೆತೂಪಲ್ .ಆಲ್ ಎಂಚಿನ ಮಲ್ತ್ಂಡಲ ಅಕುಲು ಮೋಲೆಗ್ ಕೈ ಮುಗಿಯೆರೆ ಕೇನುಜೆರ್.ಮೋಲು ತನ್ಕುಲೆನ ಜಪೊನು ಹಾಲ್ ಮಲ್ಪುವಲ್ಂದ್ ತೆರಿನ ನಾಗರ ಸನ್ಯಾಸಿ(ನಾಗ ಸಾದು).ಶಿವನ ಜಪ ಬೊಡ್ಚಿ,ಪಾರೊತಿನ ಸಗ್ತಿದ ಜಪ ತಿಕ್ಕ್ಂಡತ್ತ ಯಾವುಂದು ಆ ಜಪತ ಸಗ್ತಿನ್ ಜೋಳಿಗೆಡ್ ಪತೊಂದು , ತನ್ಕುಲೆನ ಮಾತ ಸೊತ್ತುಲೆನ್ಲ ಜೋಳಿಗೆಡ್ ಪಾಡೊಂದು ಕೈಲಾಸೊರ್ದು ಪಿದಾಡುವೆರ್.ದಾಯೆ ಪಂಡ ಶಿವನ ಕೈತಲ್ ಇತ್ತ್ಂಡ ಸಗ್ತಿನ್ ನಂಬೆರಾಪುಜಿಂದ್ ಅರೆಗ್ ತೆರಿದಿತ್ತ್ ನೆಡ್ದಾತ್ರ. ಜೋಳಿಗಡ್ ಆ ಸಗ್ತಿನ್ ಪತೊಂದು ಗಟ್ಟ ಜತ್ತ್ ದ್ ತುಳುನಾಡ ದರ್ಮೆತ್ತಿ ಮಣ್ಣ್ ಗ್ ಕಾರ್ ದೀಪೆರ್.

                        ++++++++++++++++++++

ತುಳುನಾಡ್ ಡ್ ನಾಗಸಾದು ನಾಗರ ಸನ್ಯಾಸಿ :-

          ತುಳುನಾಡ್ ಗ್ ಜತ್ತಿ ನಾಗರ ಸನ್ಯಾಸಿ ಸಿರ್ಕ್ ಸಂಕಟೊಡು ಬರೆಲೊಂದು ಕಷ್ಟಾಂಧ್ ಬತ್ತ್ ನಕ್ಲೆಗ್ ತನ್ನ ಜೋಳಿಗೆಡಿತ್ತ್ ನ ಸಗ್ತಿನ್ ಎನ್ನಿದ್  ಮರ್ದ್ ಕೊರ್ದು ಗುಣ ಆವೊಂತಿನೆಡ್ದಾತ್ರ ಆ ಸಗ್ತಿದ ಕಾರ್ನಿಕ,ಅರೆನ ಪುದರ್ ಮಾತೆರೆ ನಾಲಾಯಿಡ್ ನಲಿಪುಲೆಕಾಂಡ್.ಅಲ್ತ್ ಬತ್ತ್ ಬತ್ತ್ ದ್ ಆರ್ ಬಂಟಾಲದ ಪಡೆಂಕಿ ಮಾರ್ ಗ್ ಬರ್ಪೆರ್.ಅಡೆಗೆತ್ತ್ ನಗ ಅರೆಗ್ ಪ್ರಾಯ ದಂಗ್ ದ್ ಪರಬೆ ಆದಿಪ್ಪುವೆರ್.ಅಡೆಗೆತ್ತ್ ನಗ ಪ್ರಾಯ ಸಹಜ ಸಿರ್ಕುಲು ಅರೆಗ್ ಬತ್ತಿತ್ತ್ಂಡ್.ಆ ಪ್ರಾಯದ ನಾಗರ ಸನ್ಯಾಸಿನ್ ಅವುಸಾನ ಮುಟ್ಟ ಪಡೆಂಕಿಮಾರ್ ದ ಕೊರಗ ಬೈದ್ಯೆರ್ ತಾಂಕುವೆರ್.ಕಾಲ ಕರಿಲೆಕ ನಾಗರ ಸನ್ಯಾಸಿ ಉಷಾರಾವೊಂದು ಬತ್ತೆರ್.ಎನನ್ ಪೊರ್ಲುಡೆ ತಾಂಕಿನ ಇರೆಗ್ ದಾದ ಕೊರಡ್?,ಯಾನೊರಿ ಬಡ ಸನ್ಯಾಸಿ, " ಕುಂಟು ಕೊರ್ಂಡ ಪರಿದ್ ಪೋವು,ದುಡ್ಡು ಕೊರ್ಂಡ ಕರ್ಚಾದ್ ಪೋವು,ಜಾಗೆ ದೆತ್ತ್ ಕೊರ್ಂಡ  ಏರೇರೆ ಪಾಲಾದ್ ಪೋವು,ನಿಕ್ಕ್ ಬೂಮಿ ಉಪ್ಪುನಡೆಮುಟ್ಟ ನಿನ್ನ ಪುದರ್ ಸಾಸಿತಾದ್ ಒರಿಯೆರೆ ' ಮರ್ಯಾದಿ ಪಚ್ಚಡೆ'( ಪಚ್ಚಡೆ ಪಂಡ ಮಡಿ ಕುಂಟು)ಕೊರ್ಪೆ " ಪಂಡ್ ದ್ ತನ್ನ ಜೋಳಿಗೆಡ್ದ್ ಜಪತ ರುದ್ರಾಕ್ಷಿ ಮಾಲೆನ್ ದೆತ್ತ್ ಕೊರಗ ಬೈದ್ಯೆರೆಗ್ ನಾಗರ ಸನ್ಯಾಸಿ ಕೊರ್ಪೆರ್.ಸಗ್ತಿಗ್ ಸಮ್ಮಂದಪಟ್ನ ಸೊತ್ತು,ಪಾಪೆ,ಕಂಠೆ ಪೂರ ಬೈದ್ಯೆರೆಗ್ ಕೊರ್ಪೆರ್.ಕೊರಗ ಪೂಜಾರ್ಲು ನಾಗರ ಸನ್ಯಾಸಿ ಕೊರ್ನ ಸಗ್ತಿನ್ ಆರಾದನೆ ಮಲ್ತೊಂದು ಬತ್ತೆರ್.

       ಪಡೆಂಕಿಮಾರ್ದ ಕೊರಗ ಪೂಜಾರ್ಲೆನಲ್ತ್ ದಿಟ್ಟಿ ದೀನ ಸಗ್ತಿ ವಾಮದ ಪದವು ಗಂಟೇರಬೆಟ್ಟುದ ರಾಮಣ್ಣ ಪೂಜಾರ್ಲೆನ ಕುಟುಮೊಗು ಮೂಲೊಡುಬ ಒಲಿದ್ ಬತ್ತ್ ದ್ ಆ ಸಗ್ತಿನ್ ಆರ್ ಮನ ಬಗ್ ತಿಡ್ ಆರಾದನೆ ಮಲ್ತೊಂದು ಬತ್ತೆರ್.ಆ ಸಗ್ತಿ ದೈವದೊರುಟು ಬಂಙೊಡು ಬತ್ತ್ ನಕ್ಲೆನ ಬೇನೆ ಬೆಸರ್ಕೆನ್,ಸಿರ್ಕ್ ಸಂಕಡೊನು ಮರ್ದ್ ದ ಪಲಿಪಾದ್ ಮಾಜಾವೊಂತ್ಂಡ್.ಅಂಚನೆ ಇತ್ತೆಲಾ ಗಂಟೇರಬೆಟ್ಟುಡು ಮೂಲೊಡು ರಾಮಣ್ಣ ಪೂಜಾರ್ಲೆನಡೆ ಬತ್ತಿ  ಸಗ್ತಿದೊರುತ. ದೈವ ಇನಿಕ್ಲಾ ಆ ಮನೆತನದ ಇತ್ತೆದಾರಾಯಿನ ರಾಮಣ್ಣ ಪೂಜಾರ್ಲೆನ ಮರ್ದ್ ದ ಪಲಿಪಾದ್ ಬೇನೆ ಬೇಜಾರ್ಡ್,ಸಿರ್ಕ್ ಸಂಕಡೊಡು ಬರೆಲೊಂದು ಅಡೆ ಬತ್ತ್ ನಕ್ಲೆನ ಸಿರ್ಕ್ ಸಂಕಡೊನು ಮಾಜಾವೊಂದುಂಡು.

        ಪಡೆಂಕಿಮಾರ್ ದ ಕೊರಗ ಪೂಜಾರ್ಲೆನಲ್ತ್ ಗಂಟಾರಬೆಟ್ಟುಗು ಬತ್ತಿ ಸಗ್ತಿ ಅವ್ವೆ,ಪಲಿಪು ಅವ್ವೆ,ದೈವ/ಬೂತ ಅವ್ವೆ.ಕುಟುಮ ಒಂಜೆ,ಬರಿ ಒಂಜೆನಾಂದ್ ಇತ್ತೆದಾರೆಗ್ ತೆರಿಯಂದ್ಂದ್ ಪನ್ಪೆರ್.ಎಂಕುಲು ಕೊರಗ ಬೈದ್ಯೆರೆ ಕುಟುಮನಾಪಂಡ್ ದ್ ನಿರ್ದಾರ ಪನೆರೆ ಇತ್ತೆದಾರೆಗ್ ತೆರಿಯೊಂದಿಜ್ಜಿ.ಆಂಡ ಸಗ್ತಿ ಅವ್ವೆ,ಪಲಿಪು ಅವ್ವೆ ಪನ್ಪುನವು ಸತ್ಯ.

         ದೈವ ಬೆದ್ರ ಶಿರ್ತಾಡಿದ ಕೊಡಿಂಜಗ್ ಬತ್ತ್ ದ್. ಬೈದ್ಯೆರ್ನಕುಲು ದೈವದ ಪುದರ್ಡ್ ಇನಿಲಾ ಮರ್ದ್ ಕೊರೊಂದುಲ್ಲೆರ್.ಅಲ್ಪರ್ದ್ ದೈವ ಇತ್ತೆದ ಗಂಟೇರುಬೆಟ್ಟುದ ರಾಮಣ್ಣ ಪೂಜಾರ್ಲೆನ ಕುಟುಮೊಗು ದೈವ ಬತ್ತ್ಂಡ್ ಪನ್ಪೆರ್.ಮಾರ್ನಾಡ್ ಡ್ದ್ ಕೊಡಿಂಜಗ್ ರಾಮಣ್ಣ ಪೂಜಾರ್ಲೆನ ಕುಟುಮದ ಪೊಣ್ಣಾಂಡ್.ಅಂಚ ಅಕ್ಲೆಗ್ ಪಂಡಿತತನ ಪೋಂಡು.ಅಕುಲು ಬಾಡುಬೆಟ್ಟು ರಾಯಿಡಿತ್ತ್ ನಿ.ಅಕ್ಲೆನ ಕುಟುಮೊಗು ಇತ್ತೆದ ರಾಮಣ್ಣ ಪೂಜಾರ್ಲೆನ ಅಮ್ಮೆರ್ನ ಕುಟುಮದ ಪೊಣ್ಣಾಯಿನಿ.ಅಂಚಾದ್ ರಾಮಣ್ಣ ಪೂಜಾರ್ಲೆನ ಅಮ್ಮೆರೆಗ್ ಆ ಸಗ್ತಿದ ಆರಾದನೆ ಬತ್ತ್ಂಡ್.ರಾಯಿ ಬಾಡುಬೆಟ್ಟುಡು ರಾಮಣ್ಣ ಪೂಜಾರ್ಲೆನ ನೇಲ್ಯಮ್ಮೆರ್ನ ಜೋಕ್ಲಿತ್ತ್ ನಿ.ಅಕುಲು ಬಾಡುಬೆಟ್ಟು ಬುಡ್ದು ಪೋನಗ ಅಕ್ಲೆನ ಬೂತೊನು ಅವ್ಲೆ ಬುಡ್ದು ಪೋಯೆರ್.ಅವೆರ್ದ್ ಬೊಕ್ಕ ಇನಿತ ರಾಮಣ್ಣ ಪೂಜಾರ್ಲೆನ ಅಮ್ಮೆರ್ ಅಲ್ತ ದೈವೊಗು ಸಮ್ಮಂದಪಟ್ಟ್ ನೆನ್ ತನ್ನ ಇಲ್ಲಡೆ ಕನತೆರ್. ಕನತಿ ಸಗ್ತಿನ್ ನಂಬುದು ದೈವೊನು ದುಂಬು ದೀದ್ ಮರ್ದ್ ನ್ ಕೊರ್ಯೆರೆ ಸುರು ಮಲ್ತೆರ್.ರಾಯಿ ಬಾಡುಬೆಟ್ಟುಡು ಇತ್ತೆ ಗೌಡ ಜನಾಂಗದಕುಲು ಉಲ್ಲೆರ್.ದಂಬು ಅವ್ಲು ಗಂಟಾರಬೆಟ್ಟುದ ಇತ್ತೆದ ರಾಮಣ್ಣ ಪೂಜಾರ್ಲೆನ ಅಮ್ಮೆರ್ನಕುಲು ಇತ್ತ್ ನಿ.

        ನಾಗರ ಸನ್ಯಾಸಿನ ಸಗ್ತಿದೊರುತ ದೈವ ಸನ್ಯಾಸಿ ಮಂತ್ರಜಾವದೆ ಪಡೆಂಕಿಮಾರ್ ದ ಕೊರಗ ಪೂಜಾರ್ಲೆನಲ್ತ್ ಮೂಡುಮಾರ್ನಾಡ್ ದ ಕೊಡಂಜೆಕಲ್ಲ್ ಗ್ ಪೋದು ಅಲ್ತ್ ರ್ದ್ ರಾಯಿ ಬಾಡುಬೆಟ್ಟುಗು ಬತ್ತ್ ದ್, ಬಾಡು ಬೆಟ್ಟುರ್ದು ಇತ್ತೆದ ಗಂಟೇರುಬೆಟ್ಟುದ ರಾಮಣ್ಣ ಪೂಜಾರ್ಲೆನಡೆ ಬತ್ತ್ ದ್ ಸುಮಾರ್ 60 ವರ್ಸೊರ್ದಿಂಚಿ ಮೂಲೇ ಆರಾದನೆ ಪಡೆಯೊಂದು,ಮರ್ದ್ ದ ಪಲಿಪಾದ್  ನಂಬುದು ಬತ್ತಿನಕ್ಲೆನ  ಸಿರ್ಕ್ ಸಂಕಡ ಬೇನೆನ್ ಪೂರ ಮಾಜಾವೊಂದುಂಡು.ಈ ದೈವೀ ಸಗ್ತಿ ರಾಮಣ್ಣ ಪೂಜಾರ್ಲೆನಲ್ತ್ ದಂಬು ಪೋಯಿನೆಕ್ ಲೆಕ್ಕೊಗು ತಿಕ್ಕೊಂದಿಜ್ಜಿ.ದಾಯೆ ಪಂಡ ಸನ್ಯಾಸಿ ಮಂತ್ರ ಜಾವದೆ ಮೈ ಮರ್ಲ್ ದ್ ಓಡೆಗ್ಲ ಪೋಪುನ ಕಟ್ಟಿಜ್ಜಿ. ಅಂಚಾದ್ ಸನ್ಯಾಸಿ ಮಂತ್ರ ಜಾವದೆನ ಕಥೆ ತೂಯೆರೆ ಪೋಂಡ ದೈವ ಬಾರೀ ಸುತ್ತು ತಿರ್ಗ್ ದ್ ಬತ್ತ್ ಲೆಕ ,ಬಾರೀ ಬಲಿ ಬತ್ತ್ ಲೆಕ ತೋಜುಂಡು.

                    

  ಬರವಗು ಮೂಲ ಆಕರ :- 

  ರಾಮಣ್ಣ ಪೂಜಾರಿ ಗಂಟೇರಬೆಟ್ಟು ವಾಮದ ಪದವು ಬಂಟಾಲ;ಪುಲಮರ್ದ್ ಪಂಡಿತೆರ್

( ಸನ್ಯಾಸಿ ಮಂತ್ರಜಾವದೆ ನಿಲೆ ಆಯಿ ಜಾಗೆ)

                    ~~~~~~~~~~~~~~~~~~~~

     ಕೆಲವೆರ್ ರಾಮಜೋಗಿ ಪುರುಷ ಸನ್ಯಾಸಿನ ಜೋಳಿಗೆಡ್ ಇತ್ತ್ ನ ಸಿದ್ದಿ ಸಗ್ತಿದೊರುತ ದೈವ ರಾಮ ಪೂಜಾರ್ಲೆಡ ಆರಾದನೆ ಪಡೆಯಿನ ದೈವ  ರಾಮಸನ್ಯಾಸಿ ಮಂತ್ರಜಾವದೆಂದ್ ಪನ್ಪೆರ್..ನನ ಕೆಲವೆರ್ ನಾಗರ ಜೋಗಿ ಪುರುಷ ಸನ್ಯಾಸಿನ ಜೋಳಿಗೆಡಿತ್ತ್ ನ ಸಿದ್ದಿ ಸಗ್ತಿದೊರುತ ದೈವ ಕೊರಗ ಬೈದ್ಯೆರೆಡ ಆರಾದನೆ ಪಡೆಯಿನ ದೈವ ನಾಗರಸನ್ಯಾಸಿ ಮಂತ್ರಜಾವದೆಂದ್ ಪನ್ಪೆರ್.ಸಗ್ತಿ ಪಂಡ ಪಾರೊತಿ.ಉಪ್ಪುನಿ ಜೇರದ ಮಿತ್ತ್(ಕೈಲಾಸ).ಜೋಗಿ ಸನ್ಯಾಸಿಲು ತಪಸ್ಸ್ ಮಲ್ಪುನಿ ಜೇರದ ಮಿತ್ತ್,ಗುಡ್ಡೆದ ಮಿತ್ತ್.ಅಂಚಾದ್ ಸನ್ಯಾಸಿ ಮಂತ್ರಜಾವದೆನ್ ಗುಡ್ಡೆಡ್ ಕಲ್ಲ್ ಪಾಡ್ದ್ ನಂಬುವೆರ್.

                                  ,,,,,,,,,,,,,,,,,,,,,,,,,,,,,,,,,,

ಸನ್ಯಾಸಿ ಮಂತ್ರಜಾವದೆದೈವ ಮೈ ಮರ್ಲ್ ದ್ ಏರೆನಡೆಗ್ಲ ಪೋಫುನ ಕ್ರಮ ಇಜ್ಜಿ.

ದೈವ ಅವೆತ ಕುಸ್ವಾಸಿಡ್ ಮೈ ಮರ್ಲ್ ದ್  ಗಂದ ಬೂಲ್ಯ ಪತ್ತ್ ನಕ್ಲೆ ಪಿರವುಡು ಪೋಪುಜಿ

ಸನ್ಯಾಸಿ ಮಂತ್ರಜಾವದೆನ ಆರಾದನೆದ ಇಲ್ಲಲ್ ಡ್ದ್ ಒಂಜಿ ತುಂಡು ಕನಕ್,ಒಂಜಿ ತಾರಾಯಿ ಪೆಜ್ಜಿದ್ ಕೊನೊಯೆರ್ಡ, ಕಂಡ್ ದ್ ಕೊನೊಯೆರ್ಡ ಅಕ್ಲೆ ಪಿರವೇ ದೈವ ಪೋಫುಂಡು .

ಸನ್ಯಾಸಿ ಮಂತ್ರಜಾವದೆಗ್ ಒಂಜಿ ಪರಕೆ ಎನ್ನ್ ದಿತ್ತ್ ದ್ ಬೂಟಿಜೆರ್ಡ 15 ವರ್ಸ ಕರಿಂಡಲ ದೈವ ಅಕ್ಲೆನ ಬೆರಿ ಬುಡ್ಪುಜಿ.

 ಸನ್ಯಾಸಿ ಮಂತ್ರಜಾವದೆನ್ ನಂಬುದು ಮರ್ದ್ ಕೊರ್ಪುನಾರೆನ ಮನಸ್ ಗ್ ಏರಾಂಡಲಾ ಬೇನೆ ಮಲ್ತೆರ್ಡ ಅಕ್ಲೆನ ಪಿರವು ದೈವ ಪೋಪುಂಡು.

    ಚಾಮುಂಡಿಲೆಕನೆ ಸನ್ಯಾಸಿ ಮಂತ್ರಜಾವದೆಲ ಕಂಡ್ ನಾಯನ ಬೆರಿ ಬುಡ್ಪುಜಿ.ಪೊಣ್ಣು ದೈವೀ ಸಗ್ತಿಲು ಬೇಗ ಒಲಿಯೊಡಂಡ ತುಂಬೆ ಪೂ ಪತ್ತ್ ದ್ ಜಪ ಮಲ್ಪೊಡು.ಆತೊಂಜಿ ಸಗ್ತಿ ಆ ಪುರ್ಪೊಗು. ಅಂಚನೆ ಪಜ್ಜಿ ಮಡಲ್  ಪಾಡ್ದ್ ಬಲಸೊಂತ್ ನ,ಕುಕ್ಕದ ಪಲಯಿಡ್ ದೈವೊಗು ಬಲಸ್ ನಡೆ ದೈವ ಕಾರ್ನಿಕ ಮೆರೆಯೊಂತ,ದೈವೊಲು ಪಾತೆರೊಂತ. ಅಂಚನೆ ಜುಮಾದಿನ,ಲೆಕ್ಕೆಸಿರಿನ,ಚಾಮುಂಡಿನ ಸಗ್ತಿದ ಒರುತಲೆಕ ಸನ್ಯಾಸಿಮಂತ್ರಜಾವದೆಲ ತುಳುನಾಡ್ ಡ್ ಕಾರ್ನಿಕ ತೋಜಾದ್ ಮೆರೆಯೊಂದುಂಡು.

                     ===================

ಸಾದಗ ಸಾದ್ಯೆರ್

                   ‌     ಸಾದಗ ಸಾದ್ಯೆರ್

ಆಯಿನಾತ್ ಬೇಗ ಬರವು ಪ್ರಕಟ ಮಲ್ಪುವ.ಕಡೆಸ್  ನೆಕ್  ಮಾಪಿಪ್ಪಡ್

ಬೋಂಟ್ರ-ದೈವಾರಾದನೆದ ಒಂಜಿ ಚಾಕಿರಿ ವರ್ಗ

      ಬೋಂಟ್ರ-ದೈವಾರಾದನೆದ ಒಂಜಿ ಚಾಕಿರಿ ವರ್ಗ

           

 ಬಂಡಿದ ಬಲ್ಲ್ ಗ್ ಕೈ ಕೊರ್ದು ಬೋಂಟ್ರ ಬೈದ್ಯೆ ಕೋಳಗ ಕೊರ್ಪುನಿ. ಬೊಕ್ಕ ಬಲ್ಲ್ ಪತ್ತಿನ ಮಾತ ಬೈದ್ಯನಕುಲ್ ಕೋಳಗ ಕೊರ್ಪುನಿ. ಉಲ್ಲಾಕ್ಲೆನ ಸವಾರಿದ ಕುದುರೆದ ವಲಸಾರಿ ಬಂಡಿ.

ನಿಜವಾದ್ ದೈವದ ಬಂಡಿ ಕಲ ಮೀರಂದಿಲೆಕ ಪೋನಗ, ದೈವ ಬಂಡಿದ ಮಿತ್ತ್ ಕುಲ್ಲ್ ದಿತ್ತ್ಂಡ, ದೈವದ ಕಾರ ಗಗ್ಗರದ ಪರೆಲ ಸೊರೊ ಬೊಕ್ಕ ಸತ್ತಿಗೆದ ಅರ್ಲೋಲುದ ಸೊರೊ ಬೊಕ್ಕ ಬಂಡಿದ ಮರತ ಚಕ್ರದ ಸೊರೊ ಮಾತ್ರ ಕೇನೊಡು.ಅವು ಬುಡ್ದು ನರಮಾನಿ ಗೋವಿಂದ ಪಾಡುನ ಕಟ್ಟ್ ದುಂಬಿಜ್ಜಾಂಡ್.ಆ ಗೋವಿಂದ ದೇವೆರೆಗ್ ಸರಿ,ದೈವೊಲೆಗತ್ತ್.

                                      ಸತ್ತಿಗೆ

     ಬೋಂಟೆ ಸಂಸ್ಕೃತಿ ತುಳುನಾಡ ದೈವಾರಾದನೆಡ್ ನೆಗತ್ ತೋಜುಂಡು.ಕೆಲವೊಂಜಿ ರಾಜಂದೈವೊಲು,ಕೆಲವೊಂಜಿ ಅರಸು ದೈವೊಲು ಬಿರು ಪಗರಿ ಪತ್ತೊಂದು ವಲಸಾರಿ ಪೋಪುನವೇ ಉಂದೆಕ್ ಸಾಗ್ಸಿ.ಅಂಚನೆ ಸಾದಗ(ಸಾದಗ ಸಾದ್ಯೆರ್ ಪಂಡ ದಂಡ್ ಜಯಿತೆರ್)ವಲಸಾರಿ,ಕಲರಿ,ಗರಡಿ ಸಾಧನೆ,ಬಂಟೆ(ಭಟ,ಯೋಧ)ಒಂಜೆಕೊಂಜಿ ಸಮ್ಮಂದ ಉಂಡು.ವಲಸಾರಿಡ್ ಎಚ್ಚಾದ್ ದರಿ  ಉಪ್ಪುಂಡು.ಅರಸು ದೈವೊಲ್ನ ವಲಸಾರಿಡ್ ಒಂಜಿ ಕೈಟ್ ಕಡ್ಸಲೆ,ಕುಡೊಂಜಿ ಕೈಟ್ ಬಿರು ಪಗರಿ ಉಪ್ಪುಂಡು.ಆಂಡ ಸಾದಗೊಡು ದೈವೊಲು ಕಟ್ಟಿ ನೇಮೊಡು ಇಜ್ಜಾಂದೆ ಮಾನಿನಕ್ಲೆ ವಸಾಯ ಉಪ್ಪುಂಡು.ಕಡ್ಸಲೆ ನಾಲ್ ತಿಕ್ ಗ್ ಬೀಜಾವೊಂದು ಪೊರ್ಂಬಾಟದ ಕಲ್ಪನೆನ್ ತೋಜಾವೆರ್,ದಂಡ್ ಜಯಿತ್ ನೆನ್ ತೋಜಾವೆರ್.ಒಂಜಿ ಕಾಲೊಡು ಬೋಂಟೆ ದೇರ್ರೆ ತಾಕತ್ತ್ ದಕ್ ಲಾದಿತ್ತ್ ನ ಬಿರುವೆರ್ ಗಲಸೊಂತಿನ ಬಿರು ಪಗರಿ ಕಾಲ ಬದಲಾಯಿಲೆಕ ಕಾಪುದ(ರಕ್ಷಣೆದ) ಸೊತ್ತಾದ್ ಬುಳೆದ್ ಬತ್ತ್ಂಡ್.ದುಂಬುಗು ಕಲೊಟು ಪೊರ್ಂಬೆರೆ ಬಿರು ಪಗರಿ ಗಳಸೆರೆ ಸುರು ಮಲ್ತೆರ್.ಕಾಡ ಮುರ್ಗೊಲೆರ್ದ್ ಆವೊಂತಿ ಬಾದಗೊನು ಉಂತಾಯಿನ ಬೋಂಟೆ ದೇರಿ ಬಿರುವೆರೆನ್ ಬೋಂಟ್ರ ಪಂಡ್ ದ್ ಲೆತ್ತೆರ್.ಕಾರ್ಲ ಬೋಲ್ತೇರ್ ಡ್ ಬೋಂಟ್ರ ತರವಾಡ್ ಲಿತ್ತ್ ದ್(ಮನೆತನ) ಅವು ಪಟ್ಟದ ಪುದರಾದ್,ಜಾತಿದ ಪುದರಾದ್ ಒರಿದ್ಂಡ್.ಈ ಬೋಂಟ್ರ  ಸವ್ದ ಪೂಜಾರಿ ಜಾತಿಡ್ ಮಾತ್ರ ತೂಯೆರೆ ತಿಕ್ಕುನಿ.ಕಾಲ ಕರಿಲೆಕ ಬಿರುವೆರ್ ಬೆನ್ನಿ ಸಾಗೊಳಿನ್ ಒರಿಪೆರೆ ಬಿರು ಪಗರಿನ್ ಒರಿತೊಂಡೆರ್.ಬಿರುವೆರ್ ಬೆನ್ನಿ ಸಾಗೊಳಿಡ್ ಬಿರ್ಸೆರಾದಿತ್ತ್ ದ್ ಮಲ್ಲ ಮಲ್ಲ ಬೆನ್ನಿ ಸಾಗೊಳಿ ಮಲ್ತೊಂತಿ ಬಿರುವೆರೆ ಇಲ್ಲಗ್ ನಟ್ಟಿಲ್ಲ್ ಪನ್ಪಿ ಪುದರ್ ಇತ್ತ್ಂಡ್.ಈ ಇಲ್ಲದ ಪುದರ್ ಬಿರುವೆರೆ ಇಲ್ಲಗ್ ಮಾತ್ರ ಉಪ್ಪುನಿ.ತುಳುನಾಡ್ ಡ್ ಅರಸೊಳಿಗೆ ಬತ್ತಿ ಬೊಕ್ಕ ಅರಂತಡೆ,ಬೂಡು,ಮಾಗಂದಡಿ/ಮಾಗಣೆ,ಗುತ್ತು,ಬರ್ಕೆ,ಬಾವ,ಪರಾರಿ ತ್ತಿ ಬೊಕ್ಕ ನಟ್ಟಿಲ್ಲ್ ದ ತೆರಣ ಕಮ್ಮಿಯಾವೊಂದು ಪೋಂಡು.ಆಂಡಲ ಗುತ್ತು ಬರ್ಕೆದ ಮಾನಾದಿಗೆ ಮೊಕ್ಲೆಗ್ಲ ತಿಕ್ಕ್ಂಡ್.ಈ ಆಡಳ್ತೆ ವ್ಯವಸ್ಥೆ ಬತ್ತಿ ಬೊಕ್ಕ ಮೊಕ್ಲೆಗ್ ಗುತ್ತು ಬರ್ಕೆದ ಮಾನಾದಿಗೆದ ನಾಯ್ಗ/ನಾಯಕ ಸ್ಥಾನಲ ತಿಕ್ಕ್ಂಡ್.ಅಂಚನೆ ಗುತ್ತುಲು ಬೇತೆ ಬೇತೆ ಜಾತಿಲೆಗ್ ಪದ್ ರ್ದ್ ಪೋಂಡು.ಬೆನ್ನಿ ಸಾಗೊಳಿದ ನಟ್ಟಿಲ್ಲ ತೆರಣ ಕಮ್ಮಿಯಾವೊಂದು ಬನ್ನಗ ಪುಲ ಮರ್ದ ದ ವೈದ್ಯ ವೃತ್ತಿ ಮಲ್ತೊಂತಿ ಮೊಕ್ಲೆಗ್ ಬೈದ್ಯೆರ್ ಪನ್ಪಿ ಪುದರಾಂಡ್.ಅಮುರ್ತ ಗುಣತ ಕಲಿನ್ ತಾರಿಡ್ದ್ ಮೂರ್ತೆ ಮಲ್ತ್ ದೆತ್ತ್ ದ್ ಅವೆನ್ ಮರ್ದ್ ಗ್ ಗಲಸೊಂತೆರ್. ತುಳುನಾಡ ಜನಮಂದೆ ಗಲಸೊಂತಿ ಕಲಿನ್ ಕಾಲ ಕರಿಲೆಕ ಅಮಲಾದ್ ಪರ್ಪುಲೆಕಾಂಡ್.ಅಪಗ ಮೊಕ್ಲು ಎಚ್ಚ ಎಚ್ಚ ಮೂರ್ತೆ ಮಲ್ಪೆರೆ ಸುರು ಮಲ್ತೆರ್.ಸುರು ಸುರುಕು ಪರ್ಪುನವು ಏಸಿಗೆಂದಾಯಿಜಿ.ದಾಯೆ ಪಂಡ ಕಲಿ ಮರ್ದ್ ದ ಸೊತ್ತಾದಿತ್ತ್ಂಡ್.ಏಪ ಪುಲಮರ್ದ್ ದ  ಅಮುರ್ತಸಮವಾಯಿನ ಕಲಿ ಅಮಲ್ ದ ಸೊತ್ತಾಂಡ ಆನಿರ್ದ್ ಬೊಕ್ಕ ಅಮುರ್ತ ಅಮಲ್ ದ ಸೊತ್ತಾಂಡ್.ಉಂದೆಡ್ದಾದ್ ಈ ಜನಾಂಗೊಗು ಬಾರೀ ಒಡಕಾಂಡ್.ತುಳುನಾಡ್ ಡ್ ಮಾತ ಇದ್ಯೆಡ್ಲ ಬಿರ್ಸೆರಾಯಿ ಬಿರುವೆರೆನ್ ಒವೆಟ್ಲ ಸೋಪಾಯೆರೆ ಆಯಿಜಿಂದಾನಗ ಕಲಿಮಾರುನ ವೃತ್ತಿನ್,ಮೂರ್ತೆನ್ ಮೊಕ್ಲೆ ಕುಲ ಕಸುಬು ಪಂಡ್ ದ್ ಮಾನಸಿಕವಾದ್ ಮೊಕುಲು ನರ್ಗುಲೆಕಾಂಡ್. ಮೂರ್ತೆ ಒಂಜಿ ವೃತ್ತಿಯೇ ವಿನಃ ಅವು ಜಾತಿವಾಚಕ ಸವ್ದ ಅತ್ತ್ . ದೈವದ ಪೂಜಾರ್ಮೆದ ಪೂಜಾರಿ ವೃತ್ತಿಡ್ದಾದ್  ದುಂಬುಗು ಅವು ಜಾತಿವಾಚಕ ಪದ ಆದ್ ಪೂಜಾರಿ ಜಾತಿಂದಾಂಡ್.ಆಂಡ ಅನಾದಿಡೇ ಸ್ವತಂತ್ರವಾದ್ ದೈವಾರಾದನೆ ಮಲ್ತೊಂತಿ ಮೊಕ್ಲೆನ ಇಚಾರ ದೈವೊಲೆ ಸಂದಿಲೆಡ್ಲ ತೂಯೆರೆ ತಿಕ್ಕುವ. ದೈವಾರಾದನೆಗ್ ಮೂಲ ಪೂಜಾರ್ಮೆ ಚಾಕಿರಿದ ಪೂಜಾರಿಲಾದ್,ಬೆನ್ನಿ ಸಾಗೊಳಿದ ನಟ್ಟಿಲ್ಲ ಪೂಜಾರಿಲಾದ್ ಬಿರುವೆರ್ ತುಳುನಾಡ್ ಡ್ ಪುಗಾರ್ತೆನ್ ಪಡೆತೆರ್.ದೈವೊಲೆಡ್ ಪೂಜಾರ್ಲೆಗ್ ಒಲಿಯಂದಿ ತುಳುನಾಡ ದೈವೊಲಿಜ್ಜ.ದಾಯೆ ಪಂಡ ಅಮುರ್ತ ತುಳುನಾಡ ದೈವೊಲೆಗ್ ಬೋಡೇ ಬೋಡು‌.ಅಂಚನೆ ದೈವೊಲೆನ ಜಾಸ್ತಿ ಪಟ್ಟಿಯಾಯಿನಕುಲುಲ ಅಕುಲೆ ಆದುಲ್ಲೆರ್.

ಕೆಲವೆರ್ ಪ್ರಾಣಿ ಮೂಲದ ದೈವೊಲಿಜ್ಜಿ ಪನ್ಪೆರ್.ಆನಿದ ಕಾಲೊಡು ಬೆನ್ನಿ ಸಾಗೊಳಿ ಸುರು ಮಲ್ಪುನಗ ಗಳಸ್ ನ ಎರ್ಲೆನ್ ಇನಿ ನಮ ದೈವದ ಕಲೊಟು ಮೈಸಂದಾಯೆ ದೈವವಾದ್ ಮಾನಿತೊಂದ.ಕುಡುನು ಅವೆಕ್ ಆವಾರಾದ್ ಕೊರ್ಪ ಪನ್ಬಗ ಅವು ಪ್ರಾಣಿ ಸಮ್ಮಂದಿ ದೈವಂದ್ ಪನೊಡಾಪುಂಡು.ಪಂಜುರ್ಲಿನ ಆರಾದನೆಡ್ ತಡ್ಪೆಡ್ ರಡ್ಡ್ ತಾರಾಯಿದ ಗಡಿ ದೀದ್ ದೈವೊಗು ಪೊರಿ ಪಾರಾವುನವು ಪಂಜುರ್ಲಿ ದೈವ ಪ್ರಾಣಿ ಮೂಲದ ದೈವಂದ್ ತೆರಿಪಾವುಂಡು.ಲೆಕ್ಕೆಸಿರಿನ ಆರಾದನೆಡ್ ಮಾಸದೊರುಂದು ಎನ್ನಿದ್ ಐರೋಲು ನೇರೋಲುಂದು,ಬಾರೆದ ಬಂಬೆ ಗಲಸ್ ದ್ ಪಾರಾವುನ ಇಂಡಿ ಲೆಕ್ಕೆಸಿರಿ ಪ್ರಾಣಿ ಮೂಲದ ದೈವಂದ್ ತೆರಿಪಾವುಂಡು.ಪಂಜುರ್ಲಿ,ಮೈಸಂದಾಯೆ,ಪಿಲ್ಚಂಡಿ,ಲೆಕ್ಕೆಸಿರಿ,ಗುಳಿಗೆ ಮೊಕ್ಲು ಪ್ರಾಣಿ ಮೂಲದ ದೈವೊಲು.ಅವೆತ ಮುಗತ ರಚನೆಲ ಪ್ರಾಣಿದ ಒರುಟೇ ಉಪ್ಪುಂಡು.ಪಂಜುರ್ಲಿನ ನೇಮದ ಸುರುತ ಬಾಗ ಪಂಜಿದಲೆಕನೆ ಮುರ್ಲುನ,ಉರ್ಡುನ,ಪುಡೆರುನ ಪೂರ ತೋಜುಂಡು.ಅಣಿ ಕಟ್ಟಿ ಬೊಕ್ಕ ಪ್ರಾಣಿದ ಒರು ಪೋದು ನರಮಾನಿಯೊರುತ ದೈವ ಆದ್ ಅಭಯ ಕೊರ್ಪುಂಡು.ಬೆನ್ನಿ ಸಾಗೊಳಿನ್ ಒರಿಪೆರೆಗಾದ್ ತುಳುವೆರ್ ಬೋಂಟೆ ದೇರ್ಯೆರ್.ಈ ಬೋಂಟೆದ ಬಿರ್ಸೆರೆನ್ ಬೋಂಟ್ರೆಂದ್ ಲೆತ್ತೆರ್.ಅಂಚನೆ ತುಳುನಾಡ ಒವ್ವೇ ದೈವೊಗು ಅಮುರ್ತ ಕೊರೊಡಂಡ ಪೂಜಾರಿಲೆ ಆವೊಡು.ಬೈದ್ಯೆರೆ ಗರೊಡಿಲೆಗ್,ಬೆಮ್ಮೆರೆ ಗುಂಡದುಲಯಿ ಅಕ್ಲೆನ ಚಾಕಿರಿಯೆ ನಡತೊಂತ್ ನಿ.ಪೂಜಾರಿಲ್ನ ಹಿರಿಯಾಕ್ಲೆಡ ನಿಕ್ಲೆನ ಕುಲ ಕಸುಬು ದಾದ ಕೇಂಡ ಮೂರ್ತೆ ಮೂರುನಂದೇ ಪನ್ಪೆರ್.ನಿಜವಾದ್ ಅವೊಂಜಿ ಅಕ್ಲೆನ ಉಪಕಸುಬಾತೆ.ಕರ  ಮೂಲ್ಯೆರೆಗ್ ಕರ ಬಿಸಲೆ ಮಲ್ಪುನ ಒಂಜಿ ವೃತ್ತಿಯಾಂಡ, ಸಪಲ್ಯೆರೆಗ್ ಗಾಣದ ಕೊಟ್ಯದ ಒಂಜಿ ವೃತ್ತಿಯಾಂಡ ಪೂಜಾರಿಲೆಗ್ ಒಂಜಿ ವೃತ್ತಿ ಪನ್ಪುನವಿಜ್ಜಿ.ಆಂಡ ಪೂಜಾರಿನಕ್ಲೆಗ್ ಇಂಚಿತ್ತ ನವೇ ನಿರ್ದಿಷ್ಟ ಕಸುಬುಂದು ಇಜ್ಜಿ.ಅಕ್ಲೆನ್ ಬಾರ್ಯಾತ್ ಕಸುಬುಲೆಡ್ ಸಮಾಜ ಗುರ್ತ ಪತ್ತ್ ದ್ಂಡ್. ಬೆನ್ನಿ ಸಾಗೊಳಿದ ನಟ್ಟಿದ ಕಸುಬು,ಪುಲ ಮರ್ದ್ ದ ಬೈದ್ಯ ಕಸುಬು,ದೈವಾರಾದನೆದ ಪೂಜಾರ್ಮೆ/ಪೂಜಾರಿನ ಕಸುಬು,ಬೋಂಟೆದ ಬೋಂಟ್ರ ಕಸುಬು,ಬಿರು ಪಗರಿ ಪತ್ತ್ ದ್ ಪೊರ್ಂಬಾಟ ಮಲ್ತಿ ವೀರ ಯೋದೆರೆ ಕಸುಬು,ಅಡಳ್ತೆದ ನಾಯ್ಗೆರೆ/ನಾಯಕೆರೆ ಕಸುಬು ಉಂದೆನ್ ಪೂರ ತೂನಗ ಅಕ್ಲೆನ್ ಒಂಜಿ ನಿರ್ದಿಷ್ಟ ಚಾಕಿರಿಡ್ ಗುರ್ತ ಪತ್ತೆರೆ ಸಾದ್ಯ ಇಜ್ಜಿ.

           ಬೋಂಟ್ರ ಪನ್ಪಿ ಪೂಜಾರಿ ಮನೆತನದ ಒಂಜಿ ಚಾಕಿರಿ ವರ್ಗ ತುಳುನಾಡ ಕೆಲವು ಊರುಲೆಡ್ ತೂಯೆರೆ ತಿಕ್ಕುಂಡು.ದೈವ ಲೆಪ್ಪುನಗ ಬೋಂಟ್ರನಕ್ಲೆನ್ಲ ಲೆಪ್ಪುಂಡು.ಬರ್ಕೆದಲೆಕನೆ ದೈವದ ಕಲೊಟು ಮೊಕ್ಲೆಗ್ ಮಾನಾದಿಗೆ ಉಂಡು.ಬಂಟ್ವಾಳ ತಾಲೂಕುದ ಗಡಿಯಾರದ ಕೈತಲ್ದ ಕೆದಿಲದ ರಾಜಂದೈವದ ಸನ್ನಿದಿಡ್ ಬೋಂಟ್ರನಕ್ಲೆನ್ ದೈವ ಲೆಪ್ಪುನತ್ತಂದೆ ಮೊಕ್ಲು ಮೂಲು ದೈವದ ಚಾಕಿರಿಗ್ ಕೈ ಸೇರ್ವೆರ್.ಕಾರ್ಲದ ಕೆಲವು ಕೋಡಿಲೆಡ್ ಬೋಂಟ್ರನಕ್ಲೆ ಚಾಕಿರಿ ದೈವದ ಕೊಡಿಯಡಿಟ್ ತೂಯೆರೆ ತಿಕ್ಕುಂಡು.ಮೂರ್ತೆದ ಅಮುರ್ತೊಗು/ಕಲಿಕ್ ದಯವದ ಕಲೊಟು ಪಲ್ಲೆಂಕಿದ ಮಾನಾದಿಗೆ ಉಂಡು.ಉಜಿರೆದ ಕೈತಲ್ದ ಮುಂಡಾಜೆದ ಮೂರ್ತಿಲ್ಲಾಯ ದೈವ(ಲೆಕ್ಕೆಸಿರಿ)ದ ನೇಮೊಗು ಆ ದೈವೊಗು ಸಮ್ಮಂದಪಟ್ನ ಬೋಂಟ್ರ ಮನೆತನದ ಇಲ್ಲಲ್ ರ್ದ್ ಅಮುರ್ತೊನು/ಕಲಿನ್ ಪಲ್ಲೆಂಕಿಡ್ ಕನಪುನಿ.ಅಪಗ ಅಕ್ಲೆನ ಮಾನಾದಿಗೆ ಏತ್ಂದ್ ತೆರಿಯೊನೊಲಿ.

  ದುಂಬುದ ಕಾಲೊಡು ಬೋಂಟೆಗ್ ಪೋಯಿನಕುಲು ಬಿರ್ಸೆರ್.ಉಂದೆಟ್ ಪೂಜಾರಿ ವರ್ಗದ ಮೊಕ್ಲು ಇತ್ತ್ ನೆಡ್ದಾದ್ ಬೋಂಟೆ ದೇರುನ ಮೊಕ್ಲೆನ್ ಬೋಂಟ್ರೆರ್ಂದ್ ಲೆತ್ತೆರ್.ಮೊಕ್ಲೆಗ್ ದೈವದ ಕಲೊಟು ಸ್ಥಾನ ಮಾನ,ಕೊರ್ಯೆರ್‌ ಅಕ್ಲೆನ ಇಲ್ಲ್ ಗ್ ಮರ್ಯಾದಿದ ಇಲ್ಲ್ ದ ಸ್ಥಾನ ಮಾನ ಕೊರ್ಯೆರ್.

     ಪಂಜುರ್ಲಿನ ಪಾಡ್ದನೊಡು ಇಂಚ ಬರ್ಪುಂಡು,ವರ್ಸೊಗೊರ ಪೋಯೆರ್ ಮಾಲಕರಿಯದ(ಮಾಲಯ ಅಮಾಸೆ,ಮಾಲಯ ಕಾರ್ಯ/ಮಹಾಲಯ ಕಾರ್ಯ.ಮಾಲರಿಯದ ಚಾಕಿರಿ ಕೆಲವೊಂಜಿ ರಾಜಂದೈವದ ಬಂಡಾರದಿಲ್ಲಲ್ ನಡಪುಂಡು)ಬೋಂಟೆ,ಈಸರೆ ದೇರೊಂದು ಪೋಪುನಿ.ಮಾಲ ಕರಿಯ ಕರಿಪುನೆನ್ ಕೆಲವೊಂಜಿ ಜೈನ ಮಡತ್ತಾನೊಲು ಇನಿಕ್ಲಾ ಒರಿತೊಂದು ಬೈದೆರ್. ಮೊಕ್ಲು ಬೋಂಟೆಗ್ ಪೋಯಿ ಪನ್ನಗ ಬೋಂಟೆಗ್ ಏರ್ ಕೂಡೊಡು,ಏರ್ ಮದಿಪೊಡು ಪನ್ನಗ, ಏರಿತ್ತ್ಂಡ ದಾನೆ ನಾಯಿ ದಾಂತಿ ಬೋಂಟೆ ಅತ್ತ್ಂದ್ ಪನ್ಪೆರ್.ನಾಯಿನ್ ಕನಯೆರೆ ನಾಯಿದ ಮಲ್ಲೋಡಿಗ್ ಗಟ್ಟದ ಮಿತ್ತ್ ಓಲೆ ಕಡಪುಡುವೆರ್.ಆಯೆ ಸಾವಿರ ನಾಯಿಲೆನ್ ಕನಪೆಗೆ.ಕಪ್ಪುದ ಕಾಲು ನಾಯಿಲೆಗ್ ಕಜೆರಿತ ನುಪ್ಪು,ಬೊಲ್ಲು ನಾಯಿಲೆಗ್ ಬೊಲಿಯರಿತ ನುಪ್ಪು ಪಾಡುವೆರ್.ಕರಿಯಂದ ಕಾಜೆ,ಬೋಂಟೆಂದ ಬೊಲ್ಲುಂದು ನಾಯಿಲೆಗ್ ಪುದರ್ ದೀಪೆರ್.ಬೆಡಿ ಪತ್ತಿ ಬೆಡಿಕರೆ/ಬೇಡವೆ ಬೋಡು,ಬಿರು ಪತ್ತಿ ಮುಗೇರೆ ಬೋಡು,ಒಂಜಿ ತಿಕ್ ಡ್ ದೈವ ಬಲ್ಲವೆರ್ಂದ್ ತೆರಿನಾಯನ್ ಲೆಪ್ಪುಂಡು.ಜೈನಾಡಳ್ತೆ ಕಾಲೊಡೆ ಬಲ್ಲವೆರೆ ವಂಶ ದುಂಬೊತ್ತೊಂದು ಪೋಂಡು.ಬಿರು ಪತ್ತ್ ನಾಯೆ ಬಿರುವೆಂದಾಂಡ್.ಬಿರು ಪಂಡ ಅಕ್ಲೆನ ಸೊಂಟೊಡಿಪ್ಪುನ ಕತ್ತಿದಂಚಿನ ರಚನೆಂದ್ ಲ ಪನ್ಪೆರ್.ಅವೆನ್ ತೊಡಂಕ್ಂದ್ ಲ ಪನ್ಪೆರ್.ಸಪಲ ಪತ್ತ್ ನಾಯೆ ಸಪಲಿಗೆಂದಾಂಡ್.ಪಗರಿದಲೆಕ ಕೊಡಿ ದೂಂಚಿ ಇತ್ತ್ ನ ಬರ್ಚಿನ್ ಸಪಲ/ಸಬಲ ಪನ್ಪೆರ್.ಕೋಟಿ ಚೆನ್ನಯೆರ್ ಸುರಿಯ ಕುತ್ತೊನುನೆನ್ ಸೇಟ್ಂದ್ ಪನ್ಪೆರ್. ಅವೆತ ಇಚಾರ ದಾದಂದ್ ಗೊತ್ತಾವೊಂದಿಜ್ಜಿ.ಈಶ್ವರನ ಶಾಪ,ಪಾರ್ವತಿನ ಫಲಂದ್ ಪಂಜುರ್ಲಿನ ಸಂದಿಡ್ ಬರ್ಪುಂಡು.ಪಂಜುರ್ಲಿನ ಸಂದಿಡ್ ಬರ್ಪುನ ಬೋಂಟೆದ ಮಾನಿಲೆ ಬಗೆಟ್ ತೆರಿಲೆಕನೆ ಬೋಂಟೆದ ಬಿರ್ಸೆ ಬೋಂಟ್ರನ ಬಗೆಟ್ಲ ತೆರಿಲೆಕಾಂಡ್.

ದೇವೆರೆ ಬ್ರಹ್ಮ ಕಲಶ ತುಳುನಾಡ ದೈವಾರಾದನೆಗಿಜ್ಜಿ

 ದೇವೆರೆ ಬ್ರಹ್ಮಕಲಶ ಚರವಾಯಿನ ದೈವಾರಾದನೆಗಿಜ್ಜಿ 

 ಸುತ್ತಲ ಕಲಶೊಲು,ನಡುಟು ಮಲ್ಲ ಕಲಶ ಬ್ರಹ್ಮ ಕಲಶ

  ದೇವೆರೆ ಆರಾದನಾ ಕೆರಮನೇ ಬೇತೆ.ದೈವೊಲೆ ಆರಾದನಾ ಕೆರಮೊನೇ ಬೇತೆ.ಮಂತ್ರ ಮುಖೆನ ಪೂಜೆ,ಷೋಡಷೋಪಚಾರ ದೇವೆರೆ ಆರಾದನೆಯಾಂಡ,ಪದಿನಾಜಿ ಕಟ್ಲೆ ಸಂದಿ ಪಾಡ್ದನದ ಒರುಟು ನಡಪುನವು ದೈವಾರಾದನೆ.ದೇವೆರೆ ಆರಾದನೆನ್ ದೇವೆರೆ ಆರಾದನೆಯಾದೇ ಮಲ್ಪುಗ,ದೈವದ ಆರಾದನೆನ್ ದೈವದ ಆರಾದನೆದ ಕೆರಮೊಡೆ ಮಲ್ಪುಗ.ದೇವೆರೆ ಆರಾದನಾ ಕೆರಮೊನು,ಅಷ್ಟಮಂಗಲ ಪ್ರಶ್ನೆ ಚಿಂತನೆನ್,ಬ್ರಹ್ಮ ಕಲಶೊನು ದೈವಾರಾದನೆಗ್ ಕನಪುನ ಬೊಡ್ಚಿ.ದೈವದ ಅಣಿತ ಒರು,ಜೀಟಿಗೆ,ದಂಡಮಾಲೆಲೆನ್ ದೇವೆರೆ ಆರಾದನಾ ಕೆರಮೊಲೆಗ್ ಕನಪುನ ಬೊಡ್ಚಿ.

   ದುಂಬು ನಾಗ ಮಂಡಲ ಸುರಾನಗ ಅವ್ಲು ಪಂತೊಲು ನಡತೊಂತ್ ಲೆಕ ತೋಜೊಂತ.ಪಂಡ ಅಲ್ತ್ ರ್ದ್ ನಮ್ಮ ಜಾಸ್ತಿ ಉಪ್ಪೊಡುಂದು ಪಂತೊಡು ಮಲ್ತೊಂತೆರ್.ಇನಿ ಅಷ್ಟಮಂಗಲ ಪ್ರಸ್ನೆ ಚಿಂತನೆಲು ಅವ್ವೇ ಸಾದಿಡ್ ಪೋವೊಂದುಲ್ಲ.ಅವ್ಲು ಆತ್ ದಿನತ ಪ್ರಶ್ನೆಗೆ,ಮೂಲು ಅಲ್ತ್ ಜಾಸ್ತಿ ಆವೊಡು,ಅವ್ಲು ಆತ್ ದಿನತ ಬ್ರಹ್ಮ ಕಲಶಗೆ,ಮೂಲು ಅಲ್ತ್ ಜಾಸ್ತಿ ದಿನ ಆವೊಡುಂದು ಪಂತ ನಡತೊಂದುಂಡು.ದೈವದ ಕಲೊಕು ಅಗತ್ಯ ಇಜ್ಜಿಂಡಲ ಬಿರ್ಸಾದಿಗೆ ತೋಜಾಯೆರೆ ಪೋದು ಇನಿ ದೈವದ ಮೂಲ ಪುದರುಲು ಮಯಕಾದ್ ಕೇರಳದ ಪ್ರಶ್ನೆ ಚಿಂತನೆದಕುಲು ಪಂಡಿ ಪುರಾಣದ ಪುದರ್ ಲೆನ್ ದೈವೊಗು‌ ದೀದ್ ಹಿರಿಯಾಕ್ಲ್ ದೀನ ಪುದರ್ ಮದತ್ ದ್ ಪೊಸತ್ ನ್ ತೋಡುನ ಮರ್ಲ್ ಡ್ ಪರತ್ ನ್ ನಿಗಿತ್ ಬುಡ್ಯ.ನಮ್ಮ ಊರ್ದ ಬಲ್ಯಾಯೆರ್,ಜೋಯಿಸೆರ್ ನಂಕ್ ಬೊಡ್ಚಿ,ದೂರದ ಕೇರಳದ ಪ್ರಶ್ನೆ ಚಿಂತನೆದಕ್ಲೆ ನಂಕ್ ಬೋಡು.ಅಕ್ಲೆ ಕ್ರಮೊನು ನಮ್ಮ ದೈವಾರಾದನೆಗ್ ಅಕ್ಲ್ ಕನನಗಲ ಮನಿಪಂದೆ ಕುಲ್ಯ.ನಮ್ಮ ಅರಸುದೈವೊಲ್ನ,ರಾಜಂದೈವೊಲ್ನ ಒರಿನ ದೈವೊಲ್ನ ಕೆರಮ ಬೇತೆ ಬೇತೆ ಇತ್ತ್ಂಡಲ ಅಕುಲು ಅವೆನ್ ಅಕ್ಲೆ ಅಲಚನೆದಲೆಕ ಒಂಜೇ ಮಲ್ಪೆರೆ ಪಿದಡೊಂದುಲ್ಲೆರ್.ತಗೆ ತಂಗಡಿನ ಒರುತ ಕಲ್ಲುರ್ಟಿ ಪಂಜುರ್ಲಿನ್ ಬೇತೆ ಬೇತೆ ಕೋಣೆಡ್ ಕುಲ್ಲಾವೊಂದುಲ್ಲೆರ್. ಪಂಜುರ್ಲಿನ ಬಲತ ಬಾಗೊಡು ಕುಲ್ಲೊಡಾಯಿನ ಕಲ್ಲುರ್ಟಿನ್ ಎಡತ ಬಾಗೊಡು ಕುಲ್ಲಾಯೆರೆ ಪನ್ಪೆರ್.ಎಡತ ಬಾಗೊಡು ಕುಲ್ಲವುನೆತ ಅರ್ಥ ಬೇತೆನೇ ಆಪುಂಡು.

         ಬ್ರಹ್ಮ ಪಂಡ ಮಲ್ಲ ಪನ್ಪಿನ ಅರ್ಥ ಉಂಡು.ಕಣ್ಣ್ ಗ್ ತೋಜಂದಿನ,ಗೇನೊಗು ಎಕ್ಕಂದಿನ ,ಕೈಕ್ ತಿಕ್ಕಂದಿನ ಒಂಜಿ ಸಗ್ತಿ ಉಂಡು.ಉಂದೆನ್ ಬ್ರಹ್ಮ ಪನ್ಪೆರ್.ಮೂಲು ಬ್ರಹ್ಮಕಲಶದ ಕಲ್ಪನೆಲ ಅಂಚನೆ.ಮಸ್ತ್ ಎಲ್ಯೆಲ್ಯ ಕಲಶೊಲಿತ್ತ್ ದ್ ಒಂಜಿ ಕೊಡಪಾನ ಗಾತ್ರದ ಕಲಶ ಉಪ್ಪುಂಡು.ಮಾತ ಕಲಶದ ನೀರ್ ದೇವೆರೆ ಮೂರ್ತಿಗ್ ಪಾಡಿ ಬೊಕ್ಕ ಕಲಶೊಲೆಡ್ ಮಲ್ಲ ಕಲಶ ಆಯಿನ ಬ್ರಹ್ಮ ಕಲಶದ ನೀರ್ ನ್ ಮೈಪುವೆರ್.ದೇವೆರೆಡ್ ತ್ರಿಮೂರ್ತಿಲೆಡ್ ಒರಿ ಆಯಿನ ಬ್ರಹ್ಮಗ್ ಆರಾಧನೆ ಇಜ್ಜಿ.ಆಂಡ ಮೂಲು ಮಾತ್ರ ಬ್ರಹ್ಮನ ಪುದರ್ ತೂಯೆರೆ ತಿಕ್ಕುಂಡು.ಬೊಕ್ಕ ಒರಿನಂಚ ತುಳುನಾಡ ಅಮರ್ ಬೊಳ್ಳಿಲಾಯಿನ ಕೋಟಿ ಚೆನ್ನಯೆರೆ ನಡುಟಿತ್ತ್ ನ ಬೆಮ್ಮೆರೆನ್ ಇನಿ ಬ್ರಹ್ಮ ಪನೊಂದುಲ್ಲೆರ್.ನಿಜವಾದ್ ಬೆಮ್ಮೆರ್ ಬೈದೆರ್ಲುಂದು ಪನೊಡು ವಿನಃ ಬ್ರಹ್ಮ ಬೈದೆರ್ಂದತ್ತ್.ದೇವೆರೆಗ್ ಮಾತ್ರ ಬ್ರಹ್ಮ ಕಲಶ.ದಾಯೆ ಪಂಡ ದೇವೆರೆ ಗುಂಡದುಲಯಿ ಉಪ್ಪುನಿ ಹೆಚ್ಚಾದ್ ಕಲ್ಲ್ ದ ಮೂರ್ತಿಲು.ದಿನೋಲ ಪಂಚಾಮೃತ ಅಭಿಷೇಕ ಮಲ್ತ್ ದ್ ಮೂರ್ತಿಲು ತರೆದ್ ಪೋನಗಬಿಂಬ,ಪೀಠ ಜೀರ್ಣಾವಸ್ಥೆಗ್ ಪೋನಗ,ಮಂಟಮೆ,ಗರ್ಬಗುಡಿ,ಪಾಣಿ ಪೀಠೊಲೆಡ್ ಒಡಕ್ ತೋಜಿದ್ ಬನ್ನಗ, ಸ್ಥಿರ ಬಿಂಬೊಲೆಡ್ ಅಷ್ಟ ಬಂದ ನಾಶ ಆದ್ ಪೋನಗ,ದೇವೆರೆ ಬಿಂಬ ಪಾಣಿಪೀಠೊನು ಗೋಡ್ಯಾವುನ ನಾಳ(ಬಂಗಾರ್ದ ಒಂಜಿ ಸರಿಗೆ.ಬುಮಿದಡಿಟ್ ಪಾಡಿ ನಿದಿ ಕುಂಬೊರ್ದು ಪಾಣಿ ಪೀಠ,ಬಿಂಬದಡೆಮುಟ್ಟ ಆ ನಾಳ ಉಪ್ಪುಂಡು.)ಡ್  ಒಡಕ್ ಬನ್ನಗ ದೇವತಾ ಸಾನಿದ್ಯೊನು ಸಂಕೋಚ ಮಲ್ತ್ ದ್,ಬಾಲಾಲಯೊಡು ಮೂರ್ತಿನ್ ದೀದ್ ನಾಳ/ಸರಿಗೆದ ಮುದೆಲ್ ನಾಡ್ ಪತ್ತ್ ದ್ ಅವ್ಲಿಪ್ಪಿ ನಿಧಿಕುಂಬೊಡು ಮುತ್ತು ರತ್ನೊಲೆನ್ ದಿಂಜಾದ್ ಜೀರ್ಣಾಷ್ಟ ಬಂದೊನು ದೆತ್ತ್ ದ್ ಪೊಸತಾದ್ ಅಷ್ಟ ಬಂದೊಡು ಆಣ್ ಪೊಣ್ಣನ ಸಂಕಲ್ಪ ಮಲ್ತ್ ದ್ ಪೀಠ ಬಿಂಬೊಲೆಗ್ ಐಕ್ಯ ಮಲ್ತ್ ದ್ ಬ್ರಹ್ಮ ಕಲಶದ ನೀರ್ ಮೈತ್ ದ್ ತೆರಣ ದಿಂಜವೆರ್.       ಪದ್ರಾಡ್ ವರ್ಸೊಗೊರ ದೇವೆರೆ ಮೂರ್ತಿದ ಸಗ್ತಿ ಕಮ್ಮಿಯಾನಗ ಪಿರ ಆ ಮೂರ್ತಿಗ್ ತೆರಣ ದಿಂಜಯೆರೆ ಬ್ರಹ್ಮ ಕಲಶ ಮಲ್ಪುವೆರ್.ಬ್ರಹ್ಮ ಕಲಶೊಡು ಮಂತ್ರ ಬಿಂಬೊನು ಪೀಠದ ಮಿತ್ತ್ ತಾಪನೆ ಮಲ್ಪೆರೆ ಅಷ್ಟಬಂದೊಗು ಪ್ರಾಕೃತಿಕವಾಯಿನ 8 ಸೊತ್ತುಲೆನ್ ಗಲಸುವೆರ್‌. ಶಂಖದ ಪೊಡಿ,ದೂಪದ ಪೊಡಿ,ಅಣಿಲೆ ಕಾಯಿ,ಅರಗು,ಪರ್ತಿ,ಬೊಲ್ಕಲ್ಲ್,ಕಡಲ್ದ ಪೊಯ್ಯೆ ನೆಲ್ಲಿ ಕಾಯಿ-ಉಂದೇ ಅಷ್ಟ ಬಂದದ ಎಣ್ಮ ಸೊತ್ತುಲು.ಉಂದೆನ್ ಪೂರ ತಂತ್ರ ಸಮುಚಛಯ ಗ್ರಂತೊಡು ಪಂಡಿ ಅಳತೆಡ್ ಚೂರ್ಣ ಮಲ್ತ್ ದ್ ,ಎಣ್ಮೆದೆಣ್ಣೆಡ್ ಕಲತ್ ದ್ ಅಂಟ್ ಮಲ್ಪುವೆರ್.ಅಂಟ್ ಬಮದಿಸಯೆರೆ,ಗೋಡ್ಯಾಯೆರೆ ಬೋಡು. ಬೊಕ್ಕ ಶಾಸ್ತ್ರೀಯ ವಿದಾನೊಡು ಓಮ ಮಲ್ತ್ ದ್ ಅವೆಕ್ ಸಂಪಾತ ಸ್ಪರ್ಷದ(ಬಿಂಬ ಬೊಕ್ಕ ಪೀಠೊನು ಗೋಡ್ಯಾವುನ ಅಂಟ್) ಒರುಟು ದೈವಿಕ ಸಗ್ತಿ ಕೊರ್ಪೆರ್.ಉಂದುವೆ ಅಷ್ಟ ಬಂಧ. 

ದೈವೊಲೆಡ್ ಪ್ರದಾನ ಬೆಮ್ಮೆರ್.ಸಿರಿಕುಲ್ನ ಆರಾದನೆಡ್ ಬೆಮ್ಮೆರೆಗ್ ಕಲ್ಸೆ ಕಟ್ಟುನ ಕೆರಮ ಉಂಡು.ಅವ್ಲು ಪೂಟು ಕಲ್ಸೆನ್ ಅಲಂಕಾರ ಮಲ್ತೆರ್ಡ ಬ್ರಹ್ಮ ಕಲಶೊಡು ಕೊಡಪಾನದ ಒರುತ ಮಲ್ಲ ಕಲಶೊಗು ಜರಿ ಪೇಟದ ಅಲಂಕಾರ ಮಲ್ಪುವೆರ್.ದೇವೆರೆ ಮೂರ್ತಿಲು ಕಲ್ಲ್ ದ ಪೀಠದ ಮಿತ್ತ್ ಇತ್ತ್ ನೆರ್ದಾದ್ ಕಲಶದ ನೀರ್ ಏತ್ ಮೈತ್ಂಡಲ ದಾಲ ಆಪುಜಿ.ಆಂಡ ದೈವೊಲೆಗುಪ್ಪುನಿ ಮಣೆ ಮಂಚ,ಉಜ್ಜಾಲ್,ಮುಂಡ್ಯೆಲು.ಪೂರಲ ಮರೊಟು ಕೆತ್ತ್ ನ ಸೊತ್ತುಲು.ಅವೆತ ಮಿತ್ತ್ ಬ್ರಹ್ಮ ಕಲಶಂದ್ ಕೊಡಪಾನಗಟ್ಲೆ ನೀರ್ ಮೈತ್ಂಡ ಮರತ ಉಜ್ಜಾಲ್,ಮುಂಡ್ಯೆ,ಮಣೆಮಂಚ ಪದ್ರಾಡ್ ವರ್ಸ ಬುಡ್ಲೆ ಒಂಜಿ ವರ್ಸದುಲಯಿ ಕುಂಬಾಪುಂಡು.ಅಡೆಗ್ ಬೋಡಾಯಿನಿ ಮರತ ಮಣೆಮಂಚೊಲು ಬಾಲ್ತರ ಬರೆರೆ ದೂಪದ ಪುಗೆ.ಅಂಚನೆ ದೇವೆರೆ ಮೂರ್ತಿಲು ಸ್ಥಿರ.ದೈವದ ಅಂಚತ್ತ್.ದೈವೊಲು ಚರ.ದೇವೆರೆ ಮೂರ್ತಿ ಇತ್ತ್ ನೌಲೇ ಇತ್ತ್ಂಡ ದೈವದ ಭಂಡಾರ ಬತ್ತ್ ದ್, ಭಂಡಾರ ಕೇರ್ತ್ ದ್ ದೈವದ ಕಲೊಟು ಹಿರಿಯಾಕ್ಲೆ ಮದಿಪುಗು ಜೋಗದ ಮಾನಿನ ಮಿತ್ತ್ ಮಾಯೆ ವಸಾಯೊಗು ಬರ್ಪುನಿ.ಅಂಚಿನ ದೈವೊಲೆನ ಮಣೆ ಮಂಚೊಲೆಗ್ ವಾ ಕಾರಣೊಗ್ಲಾ ದೇವೆರೆ ಆರಾದನೆದ ಬ್ರಹ್ಮ ಕಲಶ ಖಂಡಿತಾ ಮಲ್ಪೆರೆ ಇಜ್ಜಿ. ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ.

 ಬ್ರಹ್ಮ ಕಲಶೊಡು ಸುತ್ತಲ ಎಲ್ಯೆಲ್ಯ ಕಲಶೊಲೆನ್ ದೀದ್ ಅವೆಟ್ ನೀರ್ ಪಾಡ್ದ್ ದೀದುಪ್ಪುವೆರ್.ಪ್ರಧಾನ ದೇವೆರೆನ್ ಆವಾಹನೆ ಮಲ್ತ್ ದ್ ಪೂಜೆ ಮಲ್ಪುನ ಕೊಡಪಾನ ಗಾತ್ರದ ಕಲಶನೆ ಬ್ರಹ್ಮ ಕಲಶ.ಉಂದೆಟ್ ಬ್ರಹ್ಮೆನೆ ಸೈಷ್ಠಿಕರ್ತೆ.ಪೂಜೆದ ಅಧಿಪತಿ ಅವ್ಲು ಬ್ರಹ್ಮೆ.ಮಾತ ಪೂಜೆದ ಕಡೆಕ್ಲ ಬ್ರಹ್ಮಾರ್ಪಣೆ ಉಪ್ಪುಂಡು.ಬ್ರಹ್ಮ ತತ್ವನೇ ಮೂಲು ಪ್ರದಾನ.ಕಲಶ ಎಚ್ಚಿನ ಪೂಜೆಲೆಡ್ ಉಪ್ಪುಂಡು.ಕಲಶ ದೀಪುನೆತ ಅರ್ಥ ದಾದ ಪಂಡ ಕಲಶದ ನೀರ್ ಪವಿತ್ರ.ಕಲಶದ ಅಡಿ ಭಾಗ ಬೂಮಿ,ನಡು ಭಾಗ ಉಲಯಿಡ್ ನೀರ್,ಕಲಶದ ಕೆಕ್ಕ್ ಲ್ ಭಾಗ ಸೂ,ಕಲಶದ ಬಾಯಿ ವಾಯು,ಕಲಶದ ಮಿತ್ತ್ ಕುಕ್ಕುದಿರೆ ದೀದ್ ತಾರಾಯಿ ದೀದುಪ್ಪುನ ತರೆತ ಭಾಗ ಆಕಾಶ.ಅಂಚನೆ ದೇವೆರೆ ಆರಾದನೆದ ಪಂಚ ಭೋತೊಲೆಡ್ ಪುಡೆಮಿದ ಒರುವಾದ್ ಗಂಧ,ನೀರ್ ದ ಒರುವಾದ್ ಸೀರ್ತ,ಗಾಳಿದ ಒರುವಾದ್ ಧೂಪ,ಸೂತ ಒರುವಾದ್ ಭಸ್ಮ,ಅಕ್ಕಸದ ಒರುವಾದ್ ಪುರ್ಪೊಲೆನ್ ನಮ ಗಲಸುವ .ಇಂಚ ದೇವೆರೆ ವೈದಿಕ ವಿಧಾನದ ಬ್ರಹ್ಮ ಕಲಶೊಡು ಪಂಚ ಭೂತೊಲ್ನ ಸಗ್ತಿ ಉಂಡು.ಋಗ್ವೇದ ಕಾಲೊಡ್ದೇ ಕಲಶದ ಕಲ್ಪನೆ ಇತ್ತ್ಂಡ್.ಲೋಕೊದ ಎಡ್ಡೆಪ್ಪುಗಾಧ್ ಕಲಶ ದೀವೊಂತೆರ್.ಬ್ರಹ್ಮ ಕಲಶದ ಎಲ್ಯೆಲ್ಯ ಕಲಶೋಡು  ಮಂತ್ರಮುಖೇನ ಪಾಡ್ನ ಪವಿತ್ರ ನೀರ್ ಡ್ ಬೇತೆ ಬೇತೆ ದೇವತೆಲೆನ್ ಆವಾಹನೆ ಮಲ್ತ್ ದ್ ಅಕ್ಲೆಗ್ ಕೈ ದೆಕ್ಕೆರೆ ನೀರ್,ಕಾರ್ ದೆಕ್ಕೆರೆ ನೀರ್,ಪರಿಯೆರೆ ನೀರ್,ಮೀಯೆರೆ ನೀರ್,ಅಭಿಷೇಕೊಗು ನೀರ್ಂದ್ ದೇವೆರೆ ಐನ್ ನಿತ್ಯ ಕರ್ಮೊಗು ನೀರ್ ಪಾಡ್ದಿಪ್ಪುವೆರ್.ಪವಿತ್ರವಾಯಿನ ರತ್ನೊಲು,ದರ್ಬೆ,ಅಕ್ಷತೆ,ತೊಲಸಿ,ಫಲವಸ್ತುಲೆನ್ ದೀದುಪ್ಪುವೆರ್.ಉಂದು ಪೂರ ದೇವೆರೆ ಆರಾದೆನೆಗೇ ವಿನಃ ದೈವೊಲೆ ಆರಾದನೆಗ್ ಅತ್ತ್.ವೇದೊಡು ಪಂಡಿಲೆಕ ಸೂಕು ರಡ್ಡ್ ಮೋನೆಲು,ಒಂಜಿ ವೈದಿಕ ಪಂಡ ಮಂತ್ರ ಕುಡೊಂಜಿ ತಂತ್ರ.ಉಂದು ರಡ್ಡ್ ಲ ದೇವೆರೆ ಆರಾದನೆಡುಪ್ಪುನಿ ವಿನಃ ದೈವದ ಆರಾನೆಡತ್ತ್.ದೇವೆರೆಗ್ ವೈದಿಕೆರ್ ವೈದಿಕ ಮಂತ್ರ,ತಾಂತ್ರಿಕ ಮಂತ್ರೊಲೆಡ್ ಸಮಾನವಾದ್ ದೇವೆರೆನ್ ಆರಾದನೆ ಮಲ್ತೆರ್ಡ ದೈವಾಲ್ಯದ ದೈವೊಲೆಗ್ ಇಂಚಿನ ವಾ ತಂತ್ರ ಮಂತ್ರೊಲು ಇಜ್ಜ.ದೇವೆರ್ ಪುರ್ಸಾದ ರೂಪೊಡು ಅರೆನ್ ಆರಾದನೆ ಮಲ್ಪೆರೆ ಕೊರ್ನ ತಂತ್ರ ಮಂತ್ರೊಲೆನ್ ನನಲಾತ್ ಕಾಸ್ ಮಲ್ಪೊಡುಂದು ದೈವದ ಕಲೊಕು ಕನತ್ ನವು ತಪ್ಪು.ಮೊಕ್ಲು ಉಂದೆರ್ದ್ ದೇವೆರೆಗ್ಲ ಅಪಚಾರ ಮಲ್ತಿಲೆಕಾಂಡ್,ತುಳುನಾಡ ಸಾಂಪ್ರದಾಯಿಕ ದೈವೊದ ಕಟ್ಲೆಲೆಗ್ಲ ಅನ್ಯಾಯ ಮಲ್ತ್ ಲೆಕಾಂಡ್.ಭಗವಂತೆ ಸರ್ವಂತರ್ಯಾಮಿ ಆಂಡಲಾ ಮಾತೆರೆಗ್ ಅಕ್ಲಕ್ಲೆ ರೀತಿ ನೀತಿಡ್ ಪೂಜೆ ಮಲ್ಪೊಲಿಂದ್ ವೇದೊಲು ಪಂಡಲಾ ಮಾತೆರೆಗವೆನ್ ಮಲ್ಪೆರೆ ಸಾಧ್ಯ ಆವಂದಿನೆಡ್ದಾತ್ರ ಅಕುಲು ದೇಲ್ಯೊಲೆಡ್ ದೇವೆರೆಗ್ ಕೈ ಮುಗಿಯೊಂದು ಬತ್ತೆರ್.ಅಣ್ಣ್ ಕಾಯಿ,ಪೂಜೆ ಕೊರೊಂದು ಬತ್ತೆರ್.ಆಂಡ ವೇದೊಲೆನ ಸಾರದ ಭಗವಂತನ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುವೆರ್ ದೈವಾರಾದಕೆರಾದಿತ್ತ್ ದ್ ಪದಿನಾಜಿ ಕಟ್ಲೆಡೇ ದೈವೊಲೆನ್ ಆರಾಧನೆ ಮಲ್ತೊಂದು ಬೈದೆರ್.ಅಂಚಾದೇ ದೇವೆರೆನ್ ದೇವೆರೆ ಆರಾಧನೆದ ಒರುಟೇ ಮಾನಿತೊನ್ಗ,ದೈವೊಲೆನ್ ದೈವಾರಾಧನೆದ ಕಟ್ಲೆಡೇ ಮಾನಿತೊನ್ಗ.ಅಂಚಾದ್  ತುಳುನಾಡ ದೈವಾರಾಧನೆದ ದೈವೊಲೆನ್ ನನಾಂಡಲಾ ಅಷ್ಟಮಂಗಲಾದಿ ಪ್ರಶ್ನೆ ಚಿಂತನೆಲೆಡ್ದ್ ದೂರ ದೀಕ,ಬ್ರಹ್ಮ ಕಲಶೊರ್ದು ದೂರ ದೀದ್ ಹಿರಿಯಾಕ್ಲ್ ಪಾಡ್ದ್ ಕೊರ್ನ ಸಾದಿಡೇ ದೈವಾರಾದನೆ ಮಲ್ತೊಂದು ಬರ್ಕ.

  ಕೆಲವೊಂಜಿ ತಂತ್ರಿನಕುಲು ಮಲ್ಪುನ ತೂನಗ ಬೇಜರಾಪುಂಡು.ಇಂಚಿಪ ಒರಿ ತಂತ್ರಿದಾರ್ ಇಲ್ಲ್ ಕಟ್ಟಾಯೆರ್.ಇಲ್ಲ್ ಕಟ್ಟ್ ನಗ ಮಾತ ಜಾತಿ ಜನಾಂಗದಕ್ಲೆನ್ ಬೇಲೆಗ್ ದೆತೊಂಡೆರ್.ಆಂಡ ಇಲ್ಲೊಕ್ಕೆಲ್ದಾನಿ ಅಕ್ಲೆ ಜಾತಿದಕ್ಲೆಗ್ ಮಾತ್ರ ಇಲ್ಲೊಕ್ಕೆಲಾಯಿ ಇಲ್ಲಲ್ ಒಣಸ್ ಕೊರ್ದು ಒರಿನ ಬೇಲೆದಕ್ಲೆಗ್ ಪೂರ ದೇವಸಾನೊಡು ಒನಸ್ ಕೊರ್ಯೆರ್.ಬೇಜಾರ್ಡ್ ಎಚ್ಚಿನಕುಲು ಪೋಯ್ಜೆರ್.ಇಂಚ ಸಮಾಜೊನು ತಿದ್ದುನಕುಲೆ ತಪ್ಪು ಮಲ್ತೆರ್ಡ ಓಡೆ ನಮ್ಮ ಸಮಾಜ ಉದ್ದಾರ ಆಪುನಿ?.ಈ ವ್ಯವಸ್ಥೆನ್ ಒಪ್ಪುನಕುಲು ಓಡೆಮುಟ್ಟ ಉಪ್ವೆರ ಮಲ್ಪುನಕುಲು ಅಡೆಮುಟ್ಟ ಉಪ್ವೆರ್.

    ನಿಜವಾದ್ ದೇವೆರೆ ತೇರ್ ಡ್ ಒರಿ ಪೂಜೆದಾರ್ ಉಪ್ಪುನ ಕೆರಮ.ಕೆಲವೊರ ದೇವೆರ್ ತುಂಬುನಾರ್ ತೇರ್ ದ ಉಲಯಿ ಪೋದು ಕುಲ್ಲುನಲಾ ಉಂಡು.ನಿಜವಾದ್ ದೇವೆರೆನ್ ತೇರ್ ಡ್ ಕುಲ್ಲಯಿ ಬೊಕ್ಕ ಆರ್ ಲ ತೇರ್ ದ ಬಲ್ಲ್ ಗ್ ಕೈ ಕೊರೊಡು.ಆಂಡ ಕೈ ಕೊರ್ಪುಜೆರ್.ತೇರ್ದ ಮಿತ್ತೆ ಕುಲ್ವೆರ್.ಆತೇ ಅತ್ತ್ ನಾಲೈನ್ ಜನ ತೇರ್ ದ ಮಿತ್ತ್ ಕುಲ್ಲುನಲಾ ಸುರಾತ್ಂಡ್.ನಮ ಏರ್ ಕುಲ್ಲ್ಂಡಲಾ ಒಯ್ಪುನ್ನೆ.ತೇರ್ದ ಮಿತ್ತ್ ರ್ದ್ ಪೂ,ಪಂರ್ದ್,ಫಲವಸ್ತ್ ಲೆನ್ ಪೂರ ದಕ್ಕ್ ನಗ ಉಂದೆನ್ ಪೆಜ್ಜೆರೆಂದೇ ಜನೊಕುಲು ಲಾಯ್ಪುವೆರ್.ಇಂಚಿ ಕೆರಮ ಪೂರಾ ಏರ್ ಮಲ್ತ್ ನ?.ನಿಜವಾದ್ ತೇರೊಯ್ತಿ ಬೊಕ್ಕ ತೇರ್ ರ್ದ್ ಜತ್ತ್ ದ್ ಜನೊಕ್ಲೆನ್ ಸಾಲಾದ್ ಉಂತಾದ್ ಫಲ ಪುರ್ಪ ಕೊರೊಲಿ.ದೈವದ ಕಲೊಟು ಇಂಚ ಇಜ್ಜಿ.ದೈವ ಬತ್ತ್ ನಕ್ ಲೆಗ್ ಸಮದಾರಿಕೆ ಆತ್ಂಡ ಪಂಡ್ ದ್ ಬೊಕ್ಕ ಆವಾರ ದೆತೊನುನಿ. 

ಕೆಲವು ತಿಕ್ ಡ್  ಜಾತ್ರೆದಪಗ ದೇವಿನ ಪೇಟೆ ಸವಾರಿಂದ್ ಉಪ್ಪುಂಡು.ದುಂಬು ದೇವಿನ ಮೂರ್ತಿನ್ ತೃಟ್ ತುಂಬೊಂದೇ ವೈದಿಕೆರ್ ಪೇಟೆ ಸವಾರಿ ಮಲ್ತೊಂತೆರ್.ಇನಿ‌ ಅಡೆಗ್ ಮರತ ಬಂಡಿ ಬೈದ್ಂಡ್.ಅವೆಟ್ ದೇವೆರೆನ್ಲಾ ದೀಪುನಿ,ಬಟ್ರೆನ್ಲಾ ಕುಲ್ಲದ್ ನಮ ಬಂಡಿ ಒಯ್ಪುನಿ.ಆಂಡ ಬಟ್ರ್ ನಕ್ಲ್ ಬಂಡಿದ ಬಲ್ಲ್ ಗ್ ಕೈ ಕೊರ್ಪುಜೆರ್.ಮಾರ್ಗೊಡು ಬಂಡಿ ಒಯ್ತ್ ದ್ ಕಡೆಕ್ ಆ ಬಂಡಿನ್ ದೇವಸಾನದ ಉಲಯಿ ಕೊನತ್ ದೀಪೆರ್.ಅಪಗ ಆ ಮಾರ್ಗ ಏತ್ ಅಸುದ್ದ ಉಪ್ಪುಂಡುಂದು ಮೊಕ್ಲೆಗ್ ದಾಯೆ ಗೋಚರಾಪುಜಿ?.

      

ಮುಕ್ಕಾಲ್ ಮೂಜಿ ಗಳಿಗೆದ ವಸಾಯ

               ಮುಕ್ಕಾಲ್ ಮೂಜಿ ಗಳಿಗೆದ ವಸಾಯ

       ತುಳುನಾಡ ದೈವಾರಾದನೆಡ್ ಅವ್ವೇತೋ ನುಡಿಕಟ್ಟ್ ದ ಸವ್ದೊಲುಲ್ಲ.ನಮ ಅವೆನ್ ಸಂಕೆದ ಆಧಾರೊಡು ಲಪ್ಪುನ ಬದಲ್ ಅಕುಲು ಗಲಸ್ ನ ಬಾಸೆದ ಸವ್ದ ಕಟ್ಟ್ ನ ಪೊರ್ಲುಡು ತೂವೊಡು.ಅಕ್ಲೆಡ ಇದ್ಯೆ ಇಜ್ಜಂದೆ ಉಪ್ಪು.ಆಂಡ ಅಕ್ಲೆಡ ಇತ್ತಿ ಎಡ್ಡೆ ಸಂಪ್ರದಾಯದ ಮೂಲೊನು ದುಂಬುದಕ್ಲೆಗ್ ಕಟ್ಟ್ ದ್ ಕೊರ್ಪುನ ಗುಣ,ಎಡ್ಡೆ ಭಾವನೆಲು,ದೈವದ ಮಿತ್ತ್ ಮನ ಬಗ್ ತಿ ಇತ್ತ್ಂಡ್.ಅಂಚಾದ್ ಅಕುಲು ನಮಕ್ ಒಂಜಿ ನಿರ್ದಿಷ್ಟ ಚೌಕಟ್ಟ್ ಡ್ ದೈವಾರಾದನೆನ್ ಕಟ್ಟ್ ದ್ ಕೊರ್ತೆರ್.ನಮ ಕಾಸ್,ಅಧಿಕಾರದ ಅಮಲ್ಡ್ ನಮ ಇನಿ ಮೂಲ ಕಟ್ಲೆನ್ ಪೊಲಿತೊಂದುಲ್ಲ.ಸಾರತ್ತೊಂಜಿ ಬೂತೊಲು,ನೂತ್ರೊಂಜಿ ಪೊಣ್ಣು ಬೂತೊಲು,ಕೂಡಿ ರಾಜ್ಯ,ಗಟ್ಟ ಇಂಚಿ ಸವ್ದೊಲೆನ್ ಸಂಖ್ಯೆದ ಆಧಾರೊಡು ಪನ್ಪುನೆರ್ದ್ ದೈವದ ಮಿತ್ತ ಮನ ಬಗ್ ತಿಡ್ ತೆರಿಯೊನೊಡು.ಅಂಚಿನ ಒಂಜಿ ಪಾರಿಬಾಷಿಕ ಸವ್ದ ಮುಕ್ಕಾಲ್ ಮೂಜಿ ಗಳಿಗೆ‌.ತುಳುವೆರ್ ಗಳಿಗೆ ಪಂಡ ಸಂಸ್ಕೃತದ ಘಳಿಗೆ/ಗಂಟೆನ್ ಪಂಡ್ ದುಪ್ಪುನ ಅವಕಾಶ ಬಾರೀ ಕಮ್ಮಿ.ವೈದಿಕ ಆರಾದನೆದೊಟ್ಟುಗು ಬತ್ತಿನ ಸಂಸ್ಕೃತೊರ್ದು ದುಂಬೇ ತುಳುನಾಡ್ ಡ್ ದೈವಾರಾದನೆ ಇತ್ತ್ಂಡ್.ಇಂಚನೆ ಒಂಜಿ ಪಾತೆರ ಉಂಡು,ಒಂಜಿ ಗಳಿಗೆ ಬತ್ತ್ ಪೋಲ ಮಾರಾಯಂದ್.ಉಂದೆನ್ ಗಂಟೆ ನಿಮಿಷೊಡು ಲಪ್ಪಂದೆ ಒಂಜಾತ್ ಪೊರ್ತುಂದು ಅರ್ಥ ಮಲ್ತೊಂಡ ಎಡ್ಡೆ.

  

ಮೂಲ ಸಾಂಪ್ರದಾಯಿಕ ಕಟ್ಲೆದ ಕಲ್ಕುಡನ ಮೋನೆದೈತ.ಕಪ್ಪುದ ಬಣ್ಣೊಗು ಸುಣ್ಣದ ಬುಟ್ಟ

                       ಮುಕ್ಕಾಲ್ ಮೂಜಿ ಗಳಿಗೆ ಉಂದೆನ್ ತೂಪುಂಡ ಒಂಜಿ ಗಳಿಗೆ ಪಂಡ 24 ನಿಮಿಷ(ಒಂಜಿ ಗಳಿಗೆಗ್ 60 ವಿಗಳಿಗೆಲುಪ್ಪುವ)ಒಂಜಿ ದಿನ,24 ಗಂಟೆಗ್ 60 ಗಳಿಗೆಲುಪ್ಪುವ.ತುಳುವೆರೆ ದಿನಮಾನದ ಲೆಕ್ಕ-ಈ ಸೂರ್ಯೋದಯೊರ್ದು ಮನದಾನಿದ ಸೂರ್ಯೋದಯಮುಟ್ಟದ.ನಮಕ್ ತುಳುವೆರೆಗ್ ರಾತ್ರೆ ಪದ್ರಾಡ್ ಗಂಟೆರ್ದ್ ಪೊಸದಿನ ಸುರಾಪುನತ್ತ್.ಅವು ಪರೆಂಗಿಲೆ ಕೆರಮ..ಮೂಲು ಮುಕ್ಕಾಲ್ ಬೇತೆ,ಮೂಜಿ ಗಳಿಗೆ ಬೇತೆಂದ್ ತೂಪುನೆಡ್ದ್ ಒಂಜಿ ಗಳಿಗೆ ಪಂಡ 24 ನಿಮಿಷ.ಮೂಜಿ ಗಳಿಗೆ ಪಂಡ 72 ನಿಮಿಷ.ಮೂಜಿ ಗಳಿಗೆನ್ ಮುಕ್ಕಾಲ್ ಮಲ್ತ್ಂಡ18 ನಿಮಿಷ ಬರ್ಪುಂಡು. ಉಂದೆನ್ ನಮ ಸಂಖ್ಯೆದ ಒರುಟು ತೂವಂದೆ ಒಂಜಿ ಸೆನ ದೈವ ಕಟ್ಟಿಮಾನಿನ ಮಿತ್ತ್ ಮೂಜಿ ಸರ್ತಿ ಬತ್ತ್ ಪೋಪುಂಡು ಪನ್ಪುನೆನ್ ಅರ್ಥ ಮಲ್ಪೊಡಾತೆ. ದುಂಬುದ ತುಳುವೆರ್ಡ ಬಾಸೆದ ಮೋಡಿ ಇತ್ತ್ಂಡ್,ಉಲಾರ್ಥ ಇತ್ತ್ಂಡ್,ಬಾಗಿಸವುನ,ವಿಂಗಡಿಸವುನ ಇಜ್ಜಾಂಡ್.ಅಕ್ಲೆಡ ದೈವದ ಮಿತ್ತ್ ಭಕ್ತಿದ ಭಾವನೆ ಇತ್ತ್ಂಡ್.ಅಂಚಾದ್ ಒಂಜಿ ಸೆನೊಟು ಬತ್ತ್ ಪೋವೊಂತ್ ನ,ಒರ ಕಣ್ಣ್ ಮುಚ್ಚಿದ್ ಬುಲಾವುನೆಕ್ ದುಂಬು ವಸಾಯಾವೊಂತ್ ನ,ಒರ ಮೆಂಚಿ ದಕ್ಕ್ ಲೆಕ,ಕಣ್ಣ್ ದ ಮೆನ್ಪುರಿ ರಟ್ಟ್ ನಾತ್ ಸೆನೊಟು ಬತ್ತ್ ಪೋವೊಂತ್ ನ,ಉಸುಲು ದೆತೊಂದು ಬುಡ್ಪುನಾತ್ ಪೊರ್ತುದ ವಸಾಯೊನು ಪೊರ್ಲ ತಿರ್ಲ ದೈವಾರಾದನೆದ ತುಳು ಬಾಸೆಡ್ ಮುಕ್ಕಾಲ್ ಮೂಜಿ ಗಳಿಗೆಂದ್ ಪಂಡೆರ್.ಉಂದೆನ್ ಮೂಜಿ ಸರ್ತಿ,ಮೂಜಿ ಪೊರ್ತುದ ವಸಾಯಂದ್ ಲ ಪನೊಲಿ.ಒಂಜಿ ಸೆನ ಬತ್ತಿನ ವಸಾಯದ ಪ್ರಭಾವ ಕಟಿ ಮಾನಿನ ಮಿತ್ತ್ ಇತ್ತ್ ದ್ ಏರಿ ಬಂಡಾರದ ಕಲೆ,ಸತ್ಯ ಮಾತ್ಮೆದ ಕಲೆ,ಪತ್ತಿ ಅಯುದದ ಕಲೆ,ಇತ್ತಿ ಮಣ್ಣ್ ದ ಕಲೆ ಸೇರ್ದ್ ದೈವದ ನಾಲಾಯಿದ ಕೊಡಿತ ಪಾತೆರ ಪಲಿತೊಗು ಬರೊಂತ್ಂಡ್.ಪೂರಹಿರಿಯಾಕ್ಲ್ ಮುಕ್ಕಾಲ್ ಮೂಜಿ ಗಳಿಗೆದ ಉಳ ತಿರ್ಲ್ ನ್ ಬುಡ್ಪಾಯೆರೆ ನಮ್ಮ ಗೇನೊಗೆ ಬುಡ್ದು ಬುಡಿಯೆರ್.

  

       ಪೂವರಿ ಪತ್ತ್ ದ್ ಮದಿತ್ ದ್ ವಸಾಯ/ಜೋಗ ಸುಮಾರ್  ನಿಮಿಷದಾತ್ ಇತ್ತ್ಂಡಲ ದೈವ ಕಟಿ ಮಾನಿನ ಮಿತ್ತ್ ಪೂವರಿ ಪಾಡ್ದ್ ಮದಿಪುನಗ ದೈವ ಒಂಜಿ ಸೆನ ಬತ್ತ್ ದ್ ಪೋಪುಂಡು. ಪದಿನಾಜೆನ್ ಮೂಜಿ ಬಾಗ ಮಲ್ಪುಂಡ ಒಂಜನೆದಾದ್ ಪೂವರಿ ಪತ್ತ್ ದ್ ಮದಿಪುನಗ,ರಡ್ಡನೆ ಸರ್ತಿ ಗಗ್ಗರದೆಚ್ಚಿಗ್ ಮದಿಪುನಗ,ಮೂಜನೆ ಸರ್ತಿ ಪಿರಿ ಬೂಲ್ಯ ಪತ್ತ್ ದ್ ವಸಾಯ ಪಿರಿನಗ ಇಂಚ ಮೂಜಿ ಸರ್ತಿ ಮಲ್ಲ ವಸಾಯ ಬರ್ಪುಂಡು.ದುಂಬು ಉಗ್ರದ ವರ್ಣಾರ ಪಂಜುರ್ಲಿಗ್ ಬುಡ್ಂಡ ಬೇತೆ ದೈವೊಲೆಗ್ ಗಗ್ಗರದೆಚ್ಚಿ ಇಜ್ಜಾಂಡ್.ಇನಿಕ್ ಒಂಜಾತ್ ವರ್ಸದ ಪಿರಾವುರ್ದು ಮಾತಾ ದೈವೊಲೆಗ್ಲ ,ರಾಜಂದೈವೊಲೆಗ್ಲ ಗಗ್ಗರೆದೆಚ್ಚಿ ಸುರಾತ್ಂಡ್.ಆತೆನಾ ಪೂವರಿ ಪತ್ತಂದೆ,ಮದಿಪಂದೆನೇ ಎಣ್ಣೆ ಕೊರ್ನಗನೇ ದೈವೊಗು ವಸಾಯ ಬತ್ತ್ ದ್ ತರೆಕ್ ಬಟ್ಟಲ್ ನ್ ಹಾಕೊನುವೆರ್(ದಾಲ ಗಟ್ಟಿದ ಕರ್ಬದ ಪಾತ್ರೆ ಕೊರ್ಂಡ ಹಾಕೊನುವೆರಾ ದಾನ್ನ) ಪಂಡ್ದಾಂಡ,ಗಗ್ಗರದೆಚ್ಚಿಡ್ ಗಗ್ಗರೊನು ತಿಗಲೆಗ್,ತರೆಕ್ ಹಾಕೊನುವೆರ್ ಪಂಡ್ದಾಂಡ ಪೂರಹಿರಿಯಾಕ್ಲ್ ಮಲ್ತ್ ನ ಪದಿನಾಜಿ ಕಟ್ಲೆಗ್ ಅಪಚಾರ ಮಲ್ತಿಲೆಕ. ರಾಜಂದೈವೊಲೆಗ್ ಬಣ್ಣ ಪಾಡ್ದ್ ಕಾರ್ ಗ್ ಗಗ್ಗರ ಪಾಡಿ ಬೊಕ್ಕನೆ ವಸಾಯೊಗುಂತೊಂತ್ ನಿ ನಿ.ರಾಜಂದೈವೊಲೆದ ಮೂಜಿ ಮಲ್ಲ ವಸಾಯ ಪಂಡ ಒಂಜನೆದಾದ್ ಕಟಿ ಮಾನಿ ಕಾರ್ ಗ್ ಗಗ್ಗರ ಕಟ್ಟ್ ದ್ ಪೊಡಿ ನಲಿಕೆಗ್(ಅಣಿದಾಂತೆ) ಉಂತ್ ನಗ ಗಡಿ ಪತ್ತ್ ನಾರ್ ಮದಿಪುನಗ,ರಡ್ಡನೆದಾದ್ ಅಣಿ ಎರ್ದ್,ಮುಗ ದೀದಾ,ಮುಗ ಏರ್ದಾ ಮದಿಪುನಗ,ಮೂಜನೆದಾದ್ ದೈವ ಬಾರ್ನೆ ಪೋದು ಪಿರಿನಗ ಇಂಚ ಮೂಜಿ ಸರ್ತಿ ಮಲ್ಲ ವಸಾಯ ಬತ್ತ್ ದ್ ಪೋಪುಂಡು.ಇಂಚ ನಮ ಮುಕ್ಕಾಲ್ ಮೂಜಿ ಗಳಿಗೆದ ವಸಾಯೊನು ಅರ್ಥ ಮಂತೊನೊಲಿ.

     ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ನಮ್ಮ ಎಡತ ಮರ್ಗಿಲ್ಡೇ ಉಪ್ಪೊಡು,ಕಲ್ಲುರ್ಟಿ ಬಲಬಾಗೊಡೆ ಉಪ್ಪೊಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.