ಕಾಡ್ಯ ನಾಟೊರ್ದು ನಾಗ ಮಂಡಲ,ಕಡ್ಯೊರ್ದು ಕಲ್ಸೆ/ಕಳಶ
ಕಾಡ್ಯ ಸಾನಿಧ್ಯ ಬಡಗುಡ್ಡೆ ಕಬ್ಬಿನಾಲೆ
ಚಿತ್ರ ಕೃಪೆ-ಮಂಜುನಾಥ್ ನಾಯಕ್
ಕಾಡ್ಯ/ಕಾಡ್ಯನಾಟ:-
ಒವ್ವೆ ಒಂಜಿ ಆರಾಧನೆ ಮೂಲ ರೂಪ ಬುಡುದು ಪೊಸ ರೂಪ ಪಡೆದ್ ನಾಡ್ ಡ್ ಮಾನಾದಿಗೆ ಪಡೆವೊಂದುಪ್ಪುನವು ಸರ್ವೇ ಸಾಮಾನ್ಯ .ಅಂಚನೆ ದುಂಬುದ ಕಾಲೊಡು ಸಮಾಜೊಡು ಆದಿಮ ಜನಾಂಗದಕ್ಲ್ ನಲ್ತೊಂತಿನ ನಲಿಕೆ ಇತ್ತೆ ಭರತ ನಾಟ್ಯಂದ್ ಪುದರ್ ಪಡೆಂಡ ಯಕ್ಷಗಾನಲ ಆದಿಮ ಜನಾಂಗೋರ್ದು ಬುಲೆದ್ ಇನಿ ಗುರು ಶಿಷ್ಟ ಪರಂಪರೆಯಾಂಡ್. ಪೋಡಿ ಕಟ್ಟಾವುನ ,ಸಾವು ಕನಪುನ ಪ್ರಾಣಿ ,ಉಚ್ಚುನು ನಮ ಗೆಲ್ಪೆರಾವಂದೆ ರಾಜಿ ಮಲ್ತೊಂದು ದೈವ ಆದ್ ಮೂಲ ತುಳುವೆರ್ ತೂದು ಆರಾದನೆ ಮಲ್ತೆರ್ .ದೈವದೊಟ್ಟುಗೆ ಮರಿ ತುಚ್ಚಿಂಡ ನಮ ಸೈಪ ಪನ್ಪಿ ಪೋಡಿಗೆಡ್ ಇಸತ ಮರಿನ್ ನಾಗಬೂತ ಆದ್ ಆರಾಧನೆ ಮಲ್ತೆರ್.ಅಂಚನೆ ಪ್ರಕೃತಿದ ಒರುವಾಯಿನ‌ನೀತ ಬೂಮಿದ ಉಲ ಪರಿಪುದ ವಸರ್ ನ್ ನಾಗೆ ಆದ್ ಆರಾದನೆ ಮಲ್ತೆರ್. ದೈವ ಆದಿತ್ತ್ ನ ನಾಗನ್ ವೈದಿಕ ಪ್ರಭಾವೊರ್ದಾದ್ ತುಳುವೆರ್ ನಾಗದೇವೇರಾದ್ ತೂಯೆರ್.
ದುಂಬು ಕಾಡ್ ಡ್ ವಾಸ ಮಲ್ತೊಂತಿನ ಒಂಜಿ ಮೂಲ ಜನಾಂಗ (ಮೇರ ಜನಾಂಗ)ಕಾಳಿಂಗ ಸರ್ಪೊನು ಕಾಳಿಂಗಂದ್ ಪನೊಂತೆರ್.ಕಾಡ್ ದಕ್ಲ್ ಆರಾದನೆ ಮಲ್ತೊಂತಿ ನಾಗಾರಾದನೆನ್ ಕಾಡ್ಯನ ಆರಾದನೆಂದ್ ಪನ್ಪೆರ್
ಅವೈದಿಕವಾದ್ ಗಡಿ ಪತ್ತಿನಾರ್ ನಾಗಗ್ ತನು ಮೈಪುನಿ
ಕಡ್ಯದ ಅಡಿಟ್ ಕಾಳಿಂಗ ಸರ್ಪೆ ತಿಕ್ಕ್ ನೆರ್ದಾದ್ ಅವೆನ್ ಪೂಜೆ ಮಲ್ತ್ ದ್ ಅವೆನ್ ಕಾಡ್ಯಂದ್ ಲೆಪ್ಪೆರೆ ಸುರು ಮಲ್ತೆರ್ಂದ್ ಕೆಲವೊಂಜಿ ಹಿರಿಯ ಮೂಲಾರಾಧಕೆರೆ ಅಭಿಪ್ರಾಯ.ಅಂಚನೆ ಕುಡುಪುದ ಉಲಯಿ ನಾಗೆ ತಿಕ್ಕ್ ನೆರ್ದಾದ್ ಒಂಜಿ ಊರುಗು ಕುಡುಪುಂದು ಪುದರಾಂಡ್.ಕುಕ್ಕೆ ಬೊಕ್ಕ ಸುಬ್ಬೆ ಪನ್ಪಿ ಮಲೆಕುಡಿಯೆರೆಗ್ ನಾಗೆ ತಿಕ್ಕ್ ನೆರ್ದಾದ್ ಕುಕ್ಕೆ ಸುಬ್ರಹ್ಮಣ್ಯ ಆಂಡ್.ಬಲ್ಲೊಡು ಮಂಜಗ್ ತಿಕ್ಕಿ ನಾಗರ್ದಾದ್ ಬಲ್ಲಮಂಜ ಊರುದ ಪುದರಾಂಡ್.ನಾಗ ಬನೊಟು ಮಣ್ಣ್ ದ ಕಡ್ಯೊಡು ನೀರ್ ದಿಂಜದ್ ಪಿಂಗಾರ ಪುರ್ಪ ದೀದ್ ಅರಾದನೆ ಮಲ್ತೊಂತೆರ್.ನೀರ್ ದಿಂಜಯಿನ ಪಿಂಗಾರ ಪುರ್ಪೊಡು ಸಿಂಗಾರ ಮಲ್ತಿನ ಕಡ್ಯ ಫಲವಂತಿಕೆದ,ಬಂಜಿನ ಪೊಣ್ಣನ ಒರುತ ಸಂಕೇತ.ಬೇಸದ ಪೊರ್ತುಡು ದೊಂಬುದ ಉರಿಟ್ ನೀರ್ ದಾಂತೆ ಉಪ್ಪುನಗ ಉಚ್ಚು,ಮುರ್ಗೊಲೆಗ್ಂದ್,ಮರ ದೈಕುಲೆಗ್ ತನು ಬೋಡುಂದು ಮಣ್ಣ್ ದ ಕಡ್ಯೊಡು ಬನೊಟು ನೀರ್ ದೀವೊಂತೆರ್.ಉಂದೆನ್ ಬೇಸದ ತನುಂದು ಪನ್ಪೆರ್.ಈ ನೀರ್ದ ಮಣ್ಣ್ ದ ಕಡ್ಯೊನು ಮೂರಿಂದ್ ಪನೊಂತೆರ್.ಆಂಡ ಬರ್ಸದ ಪೊರ್ತುಡು ನಾಗಗ್ ತನು ಮೈಪುನ ಪೆರಜನ ದಾಂತಿ ಕೆರಮ ಒಂಜಾತ್ ವರ್ಸದ ಪಿರಾಕ್ ರ್ದ್ ಬೈದ್ ನವು.ಜೋಕ್ಲಾವಂದಿನ ಪೊಂಜನಕ್ಲೆಗ್ ನಾಗಗ್ ಸಂತಾನೊಗಾದ್ ನಾಗಮುರಿತ ಪರಕೆ ಪನ್ಪೆರ್.ಬ್ರಹ್ಮಾವರ,ಕುಂದಾಪುರತ ಕೈತಲ್ದ ಕೆಲ ನಾಗ ಬನೊಕ್ಲೆಡ್(ಸ್ವಾಮಿ ಮನೆ)ಇನಿಕ್ಲಾ ನೀರ್ ದಿಂಜಿನ ಐನ್ ಇಜ್ಜಾ ಏಳ್ ಕಡ್ಯೊಲೆನ್ ಸಂತಾನದ ಪರಕೆಗಾದ್ ದೀದ್ ಆರಾದನೆ ಮಲ್ಪುವೆರ್.ಈ ಏಳ್ ಕಡ್ಯೊಲೆನ್ ನಾಗ ಸಿರಿಕುಲುಂದು,ಸಪ್ತ ನಾಗ ಕನ್ನಿಕೆಲುಂದು ಪನ್ಪೆರ್.ಎಳ್ವೆರ್ ಸಿರಿಕುಲ್ನ ಆರಾದನೆಡ್ ಬರ್ಪುನ ಕಲ್ಸೆದ ಮಿತ್ತ್ ದೀಪುನ ಏಳ್ ಜಿಡೆತ ನಾಗಗ್ಲ ಉಂದೆಕ್ಲ ದಾದಾಂಡಲ ಸಮ್ಮಂದ ಇಪ್ಪೊಡು.ಈ ನಾಗ ಕನ್ನಿಕೆನ್ ಏಳ್ ನಾಗ ಕನ್ನಿಕೆಲೆಡ್ ಒರ್ತಿ ಆಯಿನ ಮಂದಾರತಿಂದ್ ಪನ್ಪೆರ್.ಆ ಮಂದಾರತಿನ್ ಬಾರ್ಕೂರ್ದ ಕೈತಲ್ ಮಂದಾರ್ತಿ ದೇವಿಯಾದ್ ಆರಾದನೆ ಮಲ್ಪುವೆರ್.ಆಂಡ ಮೂಲ ಮಂದಾರ್ತಿ ಅವ್ಲೇ ಕೈತಲ್ದ ಕಾಡ್ ಡ್ ಮೇರ ಜನಾಂಗದಕ್ಲೆರ್ದ್ ಕಡ್ಯ ಸಿರಿನ(ಕನ್ನಿಕೆ) ಒರುಟು ಇನಿಲಾ ಆರಾದನೆ ಪಡೆಯೊಂದುಲ್ಲಲ್.ನಮ ಇನಿ ಪೂಜೆಗ್ ದೀಪುನ ಕಲಶೊಲು ಮೂಲ ಜನಾಂಗದಕುಲು ಬನೊಟು ದೀವೊಂತ್ ನ ಕಡ್ಯದ(ಮೂರಿ) ಒರುಂದು(ರೂಪಾಂತರ) ಪೆರಿಯಾಕ್ಲೆ ಅಭಿಪ್ರಾಯ.
ವೈದಿಕತೆ ಬನೊಕ್ಲೆಗ್ ಬತ್ತಿ ಬೊಕ್ಕ ಕಡ್ಯೊಲು ಮಯಕಾದ್ ನಾಗ ಶಿಲೆಕುಲು ಬನೊಕು ಬೈದ.ವೈದಿಕೆರ್ ತುಳುವೆರ್ ಆರಾದನೆಗ್ ಗಲಸೊಂತ್ ನ ಮಣ್ಣ ಬಾಜನೊಲೆನ್ ಆರಾದನೆಗ್ ಗಳಸಂದೆ ಅವೆಬ್ ತೋಡ ನೀರ್ ಗ್ ದಕ್ಕಾದ್ ಮಣ್ಣ ಮೂಲ ಸಂಸ್ಕೃತಿಗ್ ಮಡುತ ಪೆಟ್ಟ್ ಪಾಡ್ಯೆರ್.ನಮ ಮೂಲೊಡು ಆರಾದನೆ ಮಲ್ತೊಂತಿ ನಾಗ ಬನೊಕ್ಲೆನ್ ಕಡ್ಪಾದ್,ಪುಂಚೊಲೆನ್ ಗರ್ಪಾದ್ ಸಿಮೆಂಟ್ ದ ಕಟ್ಟೆ,ನಾಗನ ಕಲ್ಲ ಶಿಲ್ಪ ಮಲ್ಪಾಯೆರ್.ನಾಗನ,ಸಂತಾನದ ಒರು ಆಯಿನ ಸಾರ ಸಾರ ಪಿಂಗಾರ ಪಾಳೆದ ಪುರ್ಪೊಲೆನ್ ನಾಗ ಮಂಡಲದ ಒರುಟು ನಾಶ ಮಲ್ತೊಂದು ಬತ್ತೆರ್.
ತುಲುನಾಡ್ ದ "ಕಾಡ್ಯ"ನ ಪುದರ್ ದ ನಾಗಬನೊಕುಲು;-
1)ಮುದ್ರಾಡಿ-ಕಬ್ಬಿನಾಲೆ-ಕೊಂಕರಣಬೆಟ್ಟು(ಹೆಬ್ರಿ ತಾಲೂಕು)
2)ಕುತ್ಯಾರ್ ಅರಂತಡೆದ ಕೈತಲ್ದ ಪುಟ್ಟಯಧಿಕಾರಿ ಬೆಟ್ಟು.
3)ಬಾರಕೂರು-ರಂಗನಕೆರೆತ ಕೈತಲ್
ಕಾಡ್ಯ ನಾಟ ಪಂಡ ಕಾಡ್ಯನ ನಲಿಕೆದ ಒರುತ ಆರಾದನೆ.ನಾಟ ಪಂಡ ನಾಟಾವುನಿ,ದೀಪುನಿಂದ್ ಅರ್ಥಲ ಉಂಡು.ಪ್ರಾಕೃತಿಕ ಅರಾದನೆದ ಕಾಡ್ಯನಾಟದ ನಾಗಾರಾದನೆದ ಮಂಡಲೊಗು ಐನ್ ಬಗೆತ ಮಣ್ಣ್ ನ್ ಗಲಸುವೆರ್.ಅಂಚಾದ್ ಪಂಚವರ್ಣದ ಪುಂಚದ ಮಣ್ಣ್ಂದ್ ತುಳುನಾಡ ಮಣ್ಣ್ ನ್ ಪನ್ಪೆರ್.ಮೂಲ ಜನಾಂಗದಕುಲು ಕಾಡ್ಯನ ನಾಟ/ನಾಟ್ಯ ನಡಪುನ ಜಾಗೆನ್ ಕಾಡ್ಯನ ಇಲ್ಲ್ / ಮನೆಂದ್ ಪನ್ಪೆರ್.ಕಾಡ್ಯನ್ ಅಮ್ಮ ಕಾಳಿಕಾಂಬಂದ್ ಲ ಪನ್ಪೆರ್. ಕಡ್ಯ,ಕಡ್ಯರ ಪಂಡ ಮಣ್ಣ್ ದ ಕೊಡಪಾನ ಪಾತ್ರೆಂದ್ ಪನೊಲಿ.ಅಂಚನೆ ಕಾಡ್ಯ ನಾಟೊಡು ಮಣ್ಣ್ ದ ಮೂರಿನ್/ ತೂರಿನ್ ಅವ್ಲು ಆರಾಧನೆಗ್ ದೀಪೆರ್ .ಅಂಚನೆ ಆ ಮಂಡಲೊಗು ಮಣ್ಣ್ ಡ್ ದ ಮೂರಿದ ನಾಗನ ರೂಪ ಮಲ್ತ್ ದ್ ನಾಟ್ಯ ಮಲ್ಪುವೆರ್ .ಮೊಕ್ಲು ಕರಿನಾಗನ್ ಕಾಡ್ಯ ನ್ದ್, ಕಾಡ್ಯನ್ ಸಂಕಪಾಲೆಂದ್ ಲೆಪ್ವೆರ್ .ಏಳ್ ಜಿಡೆತ ಸಂಕ ಪಾಲೆ,ಐನ್ ಜಿಡೆತ ಕಾಲಿಂಗೆ ,ಮೂಜಿ ಜಿಡೆತ ಕಾಲಿಂಗೆ ಇಂಚ ಮಸ್ತ್ ವಿಧ ಉಂಡು .ಕಾಡ್ಯ ಪಂಡ ಕಾಲಿಂಗೆಂದ್ ಲೆತ್ತ್ಂಡಲ ಕಾಡ್ದಕ್ಲು ಆಚರಣೆ ಮಲ್ಪುನ ನಾಗಾರಾಧನೆಂದ್ ಅರ್ಥ ಮಲ್ತೊನೋಲಿ .ಕಾಡ್ಯನ ಇಲ್ಲಲ್ ಪುಂಚ ಉಪ್ಪುಂಡು .ಮಂಡಲೊಡು ಮೀನ್,ಕಕ್ಕೆ,ಸರ್ಪ,ಗುರ್ಬಿ ಪಕ್ಕಿ,ಬಸವೆ,ತಡ್ಪೆ,ಉಜ್ಜೆರ್ ಇಂಚ ಪ್ರಾಕೃತಿಕವಾಯಿನ ಒರು ಬುಡ್ಪಾವೆರ್.ನಾಲ್ ದಿನ ಮುಟ್ಟ ನಡಪುನ ಈ ಆರಾದನೆಡ್ ಬೈದ್ಯೆರ್ ಡೋಲು ಬೊಟ್ಟೊಂದು ಕಾಡ್ಯನ ಪುಟ್ಟು,ಕಲ್ಸೆ ಪದ,ಪೊಂಜೋಕ್ಲೆ ಪುಟ್ಟು ಪದ,ಕಲ ಮಗ್ ರ್ತೆ ಪದ,ಮಂಡಲ ಬರೆಪುನ ಪದ ಉಪ್ಪುಂಡು.ಕಾಡ್ಯನ ಇಲ್ಲಲ್ ಪುಂಚ ಇತ್ತ್ ದ್ ಸ್ವಾಮಿ,ಬೆಮ್ಮೆರ್/ಬ್ರಹ್ಮ,ಯಕ್ಷಿ ,ಉಮ್ಮಲ್ತಿ,ಬಬ್ಬರ್ಯ/ಬೊಬ್ಬರ್ಯ,ಗಾಮ,ಜಟ್ಟಿಗ,ಪಂಜುರ್ಲಿ,ಕಲ್ಕುಡ,ಹಾಯ್ಗುಳಿ ನಕ್ಲೆನ ಕಲ್ಲುಲುಪ್ಪುವ.ಕಾಡ್ಯನಾಟೊಡು ಬಿರನೆರೆ ಕೋಲ,ಕೊರಗೆರೆ ಕೋಲ,ತಗುಲೆ ಕೋಲ,ಕುದುರೆ ಕೋಲ,ಪಿಲಿ-ಪಂಜಿ ಕೋಲ,ದಾಸೆರೆ ಕೋಲ,ಕೆಮ್ಮಣ ಕೋಲ,ಜ್ವರಕೋಲ ಮಲ್ಪುವೆರ್.ಕಡೆಕ್ ಮಾತೆರಪ್ಪ ಸೇರೊಂದು ಬಂಜಿ ಬಂಜಾರ ಉನ್ಪೆರ್.
ಒಂಜಿ ಮೂಲ ರೂಪ ಪಡೆಯಿನ ನಮ್ಮ ತುಳುನಾಡ್ ದ ಆರಾಧನಾ ಸಂಸ್ಕೃತಿ ಕಾಲೊಗು ತಕ್ಕ ಬದಲಾವೊಂದಿತ್ತ್ಂಡಲ ಮೂಲು ಮೂಲ ಉದ್ದೇಸೊನು ಬುಡ್ ದು ನಾಗಾರಾಧನೆ ಅಡಿ ತತ್ತ್ ದ್ ಸಂಪೂರ್ಣ ಬದಲಾತ್ಂಡ್.
ಶತಮಾನೊಡ್ದಿಂಚಿ ಆಚರಣೆಗ್ ಬತ್ತಿನ ವೈದಿಕ ನಾಗಮಂಡಲೊಡು ಜನಪದ ನೃತ್ಯೊಗು ದೈವತ್ವದ ಲೇಪ ಕೊರ್ದು ಜನೊಕ್ಲೆಡ ಭಕ್ತಿ ಮೂಡುಲೆಕ ಮಲ್ದೆರ್ .ವೈದಿಕ ನಾಗಾರಾಧನೆಡ್ ಆಶ್ಲೇಷ ಬಲಿ,ನಾಗ ಮಂಡಲ,ಅವೆಟ್ ಚತುಷ್ಪವಿತ್ರ,ಅಷ್ಟ ಪವಿತ್ರ,ಷೋಡಷ ಪವಿತ್ರ ನಾಗಮಂಡಲ,ಡಕ್ಕೆ ಬಲಿ,ಬ್ರಹ್ಮ ಮಂಡಲ ನಡಪುಂಡು.ವೈದಿಕೆರ್ ನಾಗನ್ ದೇವೆರ್ ಮಲ್ತ್ ದ್ ಅಕುಲೆ ನಾಗಗ್ ವಸಾಯೊಗುಂತುವೆರ್.ನಾಗ ಮಂಡಲೊಡು ಮೊಕ್ಲು ಸಾರ ಸಾರ ಪಿಂಗಾರ ಪಾಲೆನ್ ನೀರ್ ಗ್ ಮುರ್ಕಾದ್ ಮೋನೆಗ್ ಉರ್ದುದು ದಕ್ಕ್ ದ್ ಪ್ರಕೃತಿನ್ ನಾಶ ಮಲ್ತೆರ್ಡ ಸರ್ಪ ಕೋಲದ ಪಾತ್ರಿ ಮಣ್ಣ್ ಡ್ ಪೊರೆಲೊಂದು ಮಡತ್ತಾನದೊರುತ ಸರ್ಪಕೋಲ ಮಲ್ಪುವೆರ್.ನಿಜವಾದ್ ನೂಲು ಪಾಡಿ ಸಂಸಾರೊಗು,ಗಾಯತ್ರಿ ಉಪಾಸಕೆರೆಗ್,ಪರತಿ ಪೋಪಿ ನಾಗಗ್(ನಾಗ ಪಂಡ ಒಂಜರ್ಥ ವಸರ್.ನನೊಂಜರ್ಥ ಸರ್ಪೆ),ದೇವೆರೆಗ್ ವಸಾಯ ಇಜ್ಜಿ. ಆಂಡ ಮೂಲ ಅವೈದಿಕ ನಾಗಾರಾದನೆಡ್ ನಾಗನ್ ಬೂತ ಆದ್ ತೂಯಿನ ಮೂಲ ಜನಾಂಗದಕುಲು ನಾಗಗ್ ಕೋಲ ಕೊರ್ಯೆರ್.ಅವ್ಲುನಾಗಗ್ ವಸಾಯ ಉಂಡು.ನಾಗಕೋಲ,ಸರ್ಪಕೋಲಂದ್ ಉಂದೆನ್ ಪನ್ಪೆರ್.ಕಾಸರಗೋಡುದ ಬಾಕುಡೆರ್ ,ಕುಂದಾಪುರದ ಪಾನಾರ ಜನಾಂಗದಕ್ಲ್ ಆದಿಡ್ದೇ ನಾಗಾರಾಧನೆ ಮಲ್ತೊಂದು ಬೈದೆರ್ .ಆಂಡ ವೈದಿಕೆರ್ ನಡಪಾವುನ ಇತ್ತೆದ ನಾಗ ಮಂಡಲದ ಮೂಲ ರೂಪ" ಕಾಡ್ಯ ನಾಟ " .ಕಾಡ್ಯ ನಾಟದ ನನೊಂಜಿ ಸುದ್ದಾಚಾರದ ಒರು ಇನಿತ ವೈದಿಕ ನಾಗ ಮಂಡಲ . ಮೂಲು ವೈದಿಕೆರ್ ನಾಗ ಮಂಡಲೋಡು ಭಜನೆ ಪಂಡೊಂದು ಡಕ್ಕೆ ಬೊಟ್ಟೊಂದು ಮಂಡಲೋಗು ಸುತ್ತು ಬರ್ಪೆರ್.ಇತ್ತೆ ಕಾಳಸರ್ಪ ದೋಷಂದ್ ಪೊಸತೊಂಜಿ ದೋಷೊನು ಮೊಕ್ಲು ಉಂಡು ಮಲ್ತ್ ದ್ ಜನೊಕ್ಲೆನ್ ಪೋಡಿಪಾವೊಂದುಲ್ಲೆರ್. ನಾಗಮಂಡಲೊಡು ಪೇರ್ ಲ ಬೊಳಂತೆ ಬಂದ ಬಿರಾದ್ ಹಾಲಿಟ್ಟು ಸೇವೆ ಕೊರ್ಪೆರ್ .ಪೇರ್ ಪರ್ಂಡ ನಾಗೆ ಬದ್ ಕುಜಿ .ಮಂಜಲ್ ಬಣ್ಣ ಇತ್ತ್ಂಡ ಆ ಊರುಗು ನಾಗೆ ಬರ್ಪುಜಿ . ಮೂಲು ಒಂಜಿ ಸಂತೋಷ ಪಂಡ ನುಪ್ಪು ದಾನ ಮಲ್ಪುನವು .ನುಪ್ಪುದ ರಾಸಿಗ್ಲ ಪಿಂಗಾರ ಪಾಡ್ ದ್ ಹಾಳ್ ಮಲ್ಪುವೆರ್ . ದೈವದ ಧರ್ಮ ನೇಮದಪಗಲ ಪಲ್ಲ ಪೂಜೆ ಆನಗ ನುಪ್ಪುದ ಮಿತ್ತ್ ರಾಸಿ ಪೂ ಪಾಡ್ವೆರ್ .ಇಂಚ ತಿನ್ಪುನ ನುಪ್ಪುದ ರಾಸಿಗ್ ಏರ್ ಪೂ ಪಾಡ್ವೆರಾ ಸುರುಕು ಆ ಮಿತ್ತ್ ದ ನುಪ್ಪುನು ಅಕ್ಲೆಗೆ ಬಲಸ್ದ್ ಕೊರೊಡು.ಅಪಗ ಸರಿ ಆಪುಂಡು.
ನಾಗನ್ ಪಂಡ ಉಚ್ಚುನು ದೇವೆರಾದ್ ಮೊಕ್ಲು ನಮಡ ಆರಾಧನೆ ಮಲ್ಪಾಯೆರ್ಡಲ ನಮ ನಾಗನ್ ಬೂತ ಆದ್ ಆರಾಧನೆ ಮಲ್ತ್ ನತ್ತಂದೆ ಅವೆಕ್ ಕೋಲ ಕೊರ್ನಕ್ಲು . ಸರ್ಪಕೋಲ ,ಕಾಡ್ಯ ನಾಟೊಡು ಅವೈದಿಕ ನಾಗಾರಾಧನೆ ಇನಿಲಾ ತುಳುನಾಡ್ ಡ್ ಒರಿದ್ ಬೈದ್ಂಡ್ .ಇನಿ ಕಾಡ್ಯ ನಾಟದ ಒಂಜೇ ಒಂಜಿ ಅಂಶ ತೋಜಂದಿಲೆಕ ಮಣ್ಣ್ ದ ಮೂರಿನೇ ಬದಲ್ತ್ ದ್ ರಂಗ್ ರಂಗ್ ದ ರಂಗೋಲಿ ಪಂಥೊದ ಪೊಡಿಕ್ಲೆಡ್ ಬುಡ್ಪಾಯಿ ಉಚ್ಚುಲೆ ಗಂಟ್ ದ ಮಂಡಲ ಬರೆದ್ ನಾಗಮಂಡಲ ಮೆನ್ಕೊಂದುಂಡು. ಮಣ್ಣ ಮೂರಿದ ಮೂಲ ನಾಗಾರಾಧನೆ ಕಾಡ್ಯನಾಟ ಮೂಲೆ ಸೇರೊಂದುಂಡು .ಸರ್ಪಕೋಲಲ ಅಂಚನೆ ನಾಶದ ಆಳಿವೆ ಬಾಕ್ ಲ್ಡುಂಡು . ಅವ್ಲೊಂಜಿ ಮೂಲೊಂಜಿಂದ್ ಒರಿದ್ ನೆನಾಂಡಲಾ ದುಂಬುದ ಜೋಕ್ಲೆಗ್ ಒರಿಪುಗ . ನಾಗಮಂಡಲ,ನಾಗದರ್ಸನೊಡು ಒಂಜಿ ಜನಾಂಗದ ಜೀವನ ಆರಾಮೊಡು ನಡತ್ಂಡಲ ಪ್ರಕೃತಿದ ಒರಿಪುಗಾದ್ ಇತ್ತ್ ನ
ನಾಗ ಬನ ಕಡ್ಪಡ್ ಕಟ್ಟೆ ಮಲ್ಪದ್ ಸಾರ್ವಜನಿಕ ನಾಗಾರಾಧನೆ ಮಲ್ಪಾವುನವು ಸರಿಯತ್ತ್ .ಪ್ರಕೃತಿ ನಾಶ ಆವೊಂದು ಪೋಂಡ ಪೂಜೆ ಮಲ್ಪಾಯಿನಕುಲ್ಲಾ ಒರಿಯುಜೆರ್ ,ಮಲ್ತ್ ನಕುಲ್ಲಾ ಒರಿಯುಜೆರ್ . ಅಂಚಿನ ಆರಾಧನಾ ಸಂಸ್ಕೃತಿದ ತುಳುನಾಡ್ ದ ನಾಗಾರಾದನೆದ ಸಂಸ್ಕೃತಿನ್ ನನ ದುಂಬುದ ಕಿನ್ನಿ ಕಿರ್ತಾಲೆಲೆಗ್ ಒರಿಪಾವೊಡಾಯಿನವು ನಮ್ಮ ಕರ್ತವ್ಯ.
