ತುಳುವೆರೆ ಶಿವರಾತ್ರೆ
ಶಿವರಾತ್ರೆ ತುಳುವೆರೆ ಸುರುತ ಪರ್ಬಂದೇ ಪನೊಲಿ.ಇಸರ ದೇವೆರೆ ನೆನವರಿಕೆಡ್ ಆದಿನಾಥೆ ಶಿವನ ಆರಾದನೆಗ್ ಇರ್ಲಿಡೀ ಜಾಗರಣೆ ಕುಲ್ಲುನ ಇರ್ಲ್ ನ್ ಶಿವರಾತ್ರೆಂದ್ ಪನ್ಪೆರ್.ಪುರಾಣ ಕಥೆಕುಲು ಒವ್ವಿತ್ತಡಲ ತುಳುವರೆ ಶಿವರಾತ್ರೆದ ಇಚಾರೊನೇ ಬೇತೆ.ಶಿವರಾತ್ರೆಲ ತುಳುವೆರೆ ಪಾಲ್ ದ ಬೆನ್ನಿಸಾಗೊಳಿದ ನನೊಂಜಿ ಭಾಗನೇ ಆದುಂಡು.ಜನಮಂದೆಗ್ ಚಳಿ ಸೆಕೆತ ಅಂತರೊನು ದೂರ ಮಲ್ತ್ ದ್ ಆಯೆ ಪೊಸ ಬೆನ್ನಿಗ್ ಮೈ ಕುಡ್ತ್ ಲಕ್ಕೆರೆ ಒಂಜಿ ಗಡು ಸಿವರಾತ್ರೆ.ಶಿವರಾತ್ರೆರ್ದ್ ಬೊಕ್ಕ ಚಳಿತ ಪ್ರಶ್ನೆನೇ ಇಜ್ಜಾಯಗ್.ಒರದ ಬುಲೆಸೆಲೆದ ಬೇಲೆ ಮಾತ ಮುಗಿದಾದ್ ಆಯೆ ಕುಸಾಲ್ ಡ್ ಲಕ್ಕ್ ದುಂತುನ ಪೊರ್ತು ಸಿವರಾತ್ರೆ.ಸಿವರಾತ್ರೆಗ್ ದಂಬು ಪೂರಾ ತೌತೆನಾ, ಕಾಯಿ ಕಜಿಪಾ,ಅವ್ವಾ,ಉಂದುವಾ,ಕೈಕ್ ತಿಕ್ ನ ಸೊತ್ತುಲೆನ್ ಕಂಡ್ ದ್ ಓಲೊಕ್ಕೋಲು ದಾದದಾದನಾ ಮಲ್ತೊಂತ್ ನ ರಾತ್ರೆ ಸಿವರಾತ್ರೆ.ಅಂಚಿತ್ತ್ ನ ಗೊಬ್ಬು ಗೊಬ್ಬುದು ಒರಿಯಕ್ಕೊರಿಯಗ್ ಬೋಡ್ಚಾಂದಿನ ಕೀಟಲೆ ಮಲ್ತೊಂದು ನೆರಡೆ ತಿನೊಂತೆರ್.ಆನಿದ ದಿನೊಕು ಆಣಾವಡ್,ಪೊಣ್ಣಾವಡ್ ನೆರಡೆ ತಿಂದೆರ್ಡ ಚಲ್ಲತ್ತ್, ಎಡ್ಡೆಂದ್ ಪನ್ಪುನ ನಂಬೊಳಿಗೆ.ಶಿವ ಜಾಗರಣೆ ಪನ್ಪುನವು ದುಂಬುಡೇ ಇತ್ತ್ಂಡ್,ಇಜ್ಜಿಂದತ್ತ್.ಸಿವರಾತ್ರೆ ತುಳುವೆರೆಗೊಂಜಿ ಗಡು ಪಾಡಿನ ಲೆಕ್ಕಾಚಾರದ ದಿನಂದ್ ಪನೊಲಿ.ಮುರಾನಿಯೊರ ಮುರ್ಗೊಲೆ ಬೋಂಟೆ ದೇರುನ ಕೆಡ್ಕಡ ಕರಿಂಡ್,ಒರ ಬೂಮ್ಯಪ್ಪೆ ಲಕ್ಕ್ ದ್ ಉಂತ್ಯಲ್.ಬೂಮ್ಯಪ್ಪೆನ್ ಪೊಣ್ಣ ಸಗ್ತಿ ಪ್ರಕೃತಿಯಾದ್ ತೂಯಿನಕುಲು ತುಳುವೆರ್.ಕೆಡ್ಡಸೊರ್ದು ಬೊಕ್ಕ ಬರ್ಪುನ ಎಡ್ಡೆ ದಿನನೇ ಸಿವರಾತ್ರೆ.ಗೇನದ ಒರು ಆಯಿನ ಇಸರ ದೇವೆರ್ ಪ್ರಕೃತಿದ ಒಂಜಿ ಭಾಗವಾಧ್ ಒರು ದಾಂತಿ ಲಿಂಗೊಡು ಆರಾದನೆ ದೆತೊನುನಾರ್.ಅರೆನ ಇಡೀ ಸರ್ರನೇ ಪ್ರಕೃತಿದ ಒರುವಾದುಂಡು.
ಕೆಡ್ಡಸ ಕರಿದ್ ಬೂಮ್ಯಪ್ಪೆ ಮದಿಮಲಾದ್ ಪೊಸ ಬುಲೆಕ್ ಐತ ಆಪುನ ಪೊರ್ತು,ಸಿವರಾತ್ರೆಗ್ ನರಮಾನಿ ಬುಲೆ ಸೆಲೆಕ್ ಮೈ ಕುಡ್ತುದು ಲಕ್ಕ್ ದುಂತುನ ಪೊರ್ತು,ಆ ಪೊರ್ತುಡು ಜನೊಕುಲು ಒರಿಯಕ್ಕೊರಿಯನ್ ಕೂಟು ಪಾಡ್ಯೆರೆ ಮಲ್ತೊಂದಿನ ಲೆಕ್ಕಾಚಾರ.ಇನಿತ ದಿನಮಾನೊಡು ದೇಲ್ಯೊಲೆಡ್ ನಡಪುನ ಪರ್ವಾದಿಲು ಪೂರ ದುಂಬುದ ಕಾಲೊಡು ಇಜ್ಜಾಂಡ್.ಕಾವೊರಿ ಸಂಕ್ರಾಂತಿರ್ದ್ ಸುರು ಆಯಿನವು,ಪೊಸ ಬುಳೆಕ್ ತುಳುವೆ ಲಕ್ಕ್ ದುಂತುನವು,ಈ ಪೊರ್ತುಡು ಇತ್ತ್ಂಡ ದಾಲ ಕಾಯಿಕಜಿಪುದ ಓಲ್ಯೊಲ,ದೊಂಪೊಲ ಇತ್ತಿ ಪೊರ್ತು.ಬೊಕ್ಕ ದಾಲ ಕಂಡೊಡು ಬುಳೆ ಉಪ್ಪುನ ಪೊರ್ತತ್ತ್.ಮಲ್ಲ ಬೇಲೆದ ತುರ್ತೈತದ ಪೊರ್ತತ್ತ್.ಅಂಚಾದ್ ಕುಸಾಲ್ಡ್ ಕಾವೇರಿ ಸಂಕ್ರಾಂತಿದ ಲೆಕ್ಕೊಡು ಅವ್ಲು ಬೋಂಟೆ ದೇರ್ದಾದ್ ,ಕೆಡ್ಡಸ ಕರಿನೆರ್ದ್ ಬೊಕ್ಕ ,ಬೂಮಲ್ಯಪ್ಪೆ ಮದ್ಮಲಾದ್ ಮೈಕುಡ್ತುದು ಲಕ್ಕ್ ದುಂತಿ ಬೊಕ್ಕ ಕಾಡ ಮುರ್ಗೊಲೆನ್ ಪೂರ ಬೋಂಟೆ ದೇರ್ದ್ನಮ ಬುಳೆಸೆಲೆಕ್ ತಯಾರಾಪುನ ಪೊರ್ತುಡು,ಜನೊಕುಲು ಉಲ್ಲಾಸೊಗು ಬೋಡಾದ್ ಒರಿಕ್ಕೊರಿ ಕುಸಾಲ್ದ ಗೊಬ್ಬು ಗೊಬ್ಬುದು ಪೊಸ ಬೆನ್ನಿಗ್ ತಯಾರಾಪುನ ಪೊರ್ತು ಶಿವರಾತ್ರೆದ ಪೊರ್ತು. ಆ ಪೊರ್ತುಗು ಆಯನ ಜಾಗರಣೆಗ್ ಬೋಡಾದ್ ಈ ಗೊಬ್ಬುಲೆನ್ ರಾತ್ರೆದ ಪೊರ್ತುಗು ದೀವೊಂದೆರ್.ಮೂಲು ಕಂಡುನಿಂದ್ ಮೇಲ್ದಿಟ್ಟಿಗ್ ತೋಜಿಂಡಲಾ ಅಕುಲು ಕಂಡೆರೆ ಪೋಪುನಕುಲು,ಮೊಕುಲು ಕಾತ್ ದ್ ಕುಲ್ಲುನಕುಲು.ಒಂಜಿ ವೇಳೆ ಕೈಕ್ ತಿಕ್ ದ್ ಇಲ್ಲದಕುಲು ದಾಲ ನೆರಿಯೆರ್ಡ ನೆರಡೆಡ್ ದಾಲ ಚಲ್ಲಿಜ್ಜಿ,ದೋಷ ಇಜ್ಜಿ.ನೆರ್ಪುನಕ್ಲೆಗೆ ದೋಷ.ಕೆಲವೆರ್ ದಾದನಾ ಪಗೆ ಕಟ್ಟ್ ದ್ ಪಗೆ ಸಿವರಾತ್ರೆದಾನಿ ಬೂಟುವೆರ್.ಅಕುಲು ಬೋಡ್ಚಾಂದ್ ನ ಶಿವರಾತ್ರೆದಾನಿ ಮಲ್ತೆರ್ಡ ದೋಷ ಇಜ್ಜಿ.
ಶಿವರಾತ್ರೆದಾನಿ ಏರಾಂಡಲ ಕಂಡ್ಯೆರ್ಂದ್ ಕಂಡಿನಾಯೆ ಹಾಳಾವೊಡುಂದು ಪಟ್ಟ ಪರಕೆ ಪಂಡೆರ್ಡಲ ಆನಿದ ದಿನೊಕು ಪಲಿಪುಜಿ.ದಾಯೆ ಪಂಡ ಅವು ಶಿವನ ಪುದರ್ಡ್ ಇರ್ಲ್ ನಡಪುನ ಕುಸಲ್ದ ಗೊಬ್ಬುಲು.ಒರಿಪುನಾಯೆಲ ಆಯೆನೆ,ಕರಿಪುನಾಯೆಲ ಆಯೆನೆ.ಶಿವ ಗೇನದ ಸಂಕೇತಲಾ ಅಂದ್,ತ್ಯಾಗದ ಸಂಕೇತಲಾ ಅಂದ್.ಶಿವನ ಪುದರ್ಡ್ ಒಂಜಿ ಇರ್ಲ್ ನ್ ಕಳೆಯೆರೆ ತುಳುವೆರ್ ಇಂಚಿ ಕುಸಾಲ್ದ ಗೊಬ್ಬುನು ದೀವೊಂದೆರ್.ಕಾವೇರಿ ಸಂಕ್ರಾಂತಿ,ಕೆಡ್ಡಸ,ಕೆಡ್ಡಸ ಕರಿದ್ ಬರ್ಪುನ ಶೈವಾರಾದಕ ತುಳುವೆರೆನ ಸುರುತ ಪರ್ಬನೇ ಶಿವರಾತ್ರೆ.ಕಂಡುನ ಒರುತ ಕುಸಾಲ್ದ ಗೊಬ್ಬುಲು ಮೂಲದವಾದಿತ್ತ್ಂಡ್.ರಾತ್ರೆಬೊಲ್ಪಾನೇಟ ಅವು ನಿಜವಾದ್ ಕಂಡೆರೆ ಪೋಪುನ ಕ್ರಮಂದತ್ತ್,ಒರಿಯನ್ ಬಚ್ಚಾಯೆರೆ ಪೋಪುನ ಕೆಲಸೊಲು.ಒರಿಯನ ಇಲ್ಲದ ಮಂಡೆನ್ ಬೊಕ್ಕೊರ್ಯನ ಇಲ್ಲಲ್ ಕೊನೊದು ದೀಪುನಿ,ಒರಿಯನ ಇಲ್ಲದ ಬಸಲೆದ ದೊಂಪೊನು ಬೊಕ್ಕೊರ್ಯನ ಜಾಲ್ಡ್ ಕೊನೊದು ದೀಪುನಿ,ಒರಿಯನ ಇಲ್ಲಲ್ ನಡ್ತಿನ ಕಾಯಿಕಜಿಪುನು ಪೊರ್ತುದು ಬುಕ್ಕೊರ್ಯನ ಜಾಲ್ಡ್ ನಡ್ಪುನಿ,ಉಂದೆನ್ ಕಂಡುನಿಂದ್ ಪನ್ಪುಜೆರ್,ಒಂಜಿ ರೀತಿದ ಗೊಬ್ಬುಂದು ಪನ್ಪೆರ್.ಇಂಚ ಪೋಕ್ರಿ ಬುದ್ದಿದಕುಲು ಉಪದ್ರ ಮಲ್ಪುವೆರ್ಂದ್ ಇಡೀ ಇರ್ಲ್ ಕಾತ್ ಕುಲ್ಲುನಕುಲ್ಲಾ ಉಲ್ಲೆರ್-ಬರಡ್ ಕಲ್ಪವಾಂದ್.ಮೊಕ್ಲು ಬೊಲ್ಪಾನೇಟ ಕಾ್ ಕುಲ್ಲೆಕನೆ,ಅಕುಲು ಬೇತೊಂಜಿ ತಿಕ್ ಡ್ ಬತ್ತ್ ದ್ ದಾಲ ಮಲ್ತಾದ್ ಪೋದಾದಿಪ್ಪುಂಡು.ಅಂಚ ತಿಕ್ ದ್ ಬೂರ್ಯೆರ್ಡಲಾ ಆನಿದ ದಿನೊಕು ಹಾಕೆರೆ ಬಲ್ಲಿ.ಶಿವರಾತ್ರೆದಾನಿ ಪಟ್ಟ ಪರಕೆ ಪನ್ರೆ ಬಲ್ಲಿ.ಅತಿ ಮೀರ ಪಂಡೆರ್ಡ ಕೈತೆಣ್ಣೆ ಕಣ್ಣ್ ಗ್ ತಾಗು,ಪಂಡ ಪಂಡ್ ನಕ್ ಲೆಗೆ ದೋಸ.ಅಕ್ ಲೆಗ್ ದೋಸ ಇಜ್ಜಿ.
ಶಿವರಾತ್ರೆದಾನಿ ಒವ್ವೇ ಸೊತ್ತುಲೆನ್ ಕಂಡ್ಯೆರ್ಂದಾಂಡ ಅವೆನ್ ತಿನೊಲಿ,ಮಾರ್ದ್ ಪಣವು ಮಲ್ಪೆರೆ ಬಲ್ಲಿ.ಅಂಚಿತ್ತಿ ಕಟ್ಟುಂಡು.ಸೊತ್ತುನು ಮಾರ್ದ್ ಪಣವು ಮಲ್ತ್ಂಡ ಕಂಡ್ ನಿಂದೇ ಲೆಕ್ಕ.ಕಂಡ್ ನ ಬೊಂಡ,ಪಂರ್ದ್ ಬೋಡಾಯಿನಾತ್ ಬಂಜಿ ಬಂಜಾರ ದಾರಾಳ ತಿನೊಲಿ,ಪರೊಲಿ.ಬೋಡಿತ್ತ್ ನಕ್ ಲೆಗ್ ತಿನೆರೆ,ಪರೆರೆ ಕೊರೊಲಿ.ಅಂಚ ಕೊರ್ಂಡ ಕಂಡ್ ನ ಇಲ್ಲದಕ್ಲೆಗ್ ಸುಲಬೊಡು ಗೊತ್ತಾಪುಂಡು.ಎಂಚ ಪಂಡ ಇಲ್ಲದಕುಲು ನೆರೊಂದಿಪ್ಪುನಗ ಕಂಡ್ ನಕ್ಲ್ ಕೊರ್ನೆನ್ ದೆತೊನ್ನಕುಲು ಇಲ್ಲದಕ್ಲೆಡ ಇಂಚಿಂಚಿನಕುಲು ನಿಕ್ಲೆನಲ್ತ್ ಕಂಡಿನೆನ್ ಎಂಕ್ಲೆಗ್ಲ ತಿನೆರೆ ಪರೆರೆ ಕೊರ್ದಿತ್ತೆರ್ಂದ್.ಕಲ್ಪವೆ ನಿಕ್ಕ್ಂದ್ ಇಲ್ಲದಕುಲು ಪಂಡೆರ್ಡ ಎಂಕುಲು ಕೋಡೆನೇ ಕಲ್ಪದಾತ್ಂಡ್ಂದ್ ಕಂಡಿನಕುಲು ಪನ್ಪುನ ಕುಸಲ್ದ ಗೊಬ್ಬು.
ಕೆಡ್ಡಸ ಆಯಿನೆರ್ದ್ ಬೊಕ್ಕ,ಬೋಂಟೆ ಪರ್ವೊಲು ಪೂರ ಮುಗಿನೆರ್ದ್ ಬೊಕ್ಕ ಶಿವರಾತ್ರೆದಾನಿ ಮದುಮಾಂಸ ಒಂಜಿ ತಿನ್ಪುಜೆರ್.ಶಿವರಾತ್ರೆದ ಕಟ್ಟನಾ,ಶಿವರಾತ್ರೆದ ಕೂಟನಾ,ಶಿವರಾತ್ರೆದ ನೇಮನಾಂದ್ ಪನ್ಪುನ ಇಚಾರ ಇಜ್ಜಿ.ಶಿವರಾತ್ರೆ ಬೆನ್ನಿ ಸಾಗೊಳಿದನೇ ಒಂಜಿ ಒರು..ಬೂಮ್ಯಪ್ಪೆ ಮದ್ಮಲಾದ್,ಆಲ್ ಮೂಜಿ ನೀರ್ ಮೀದ್ ಮೈ ಕುಡ್ತ್ ದ್ ಲಕ್ಕ್ ದ್ ಉಂತ್ ನೆಡ್ದ್ ಬೊಕ್ಕ ಸುರುಕು ತುಳುವೆರೆಗ್ ಬರ್ಪುನ ಎಡ್ಡೆ ದಿನೊನೆ ಶಿವರಾತ್ರೆ.ಬೂಮ್ಯಪ್ಪೆಗ್ ಮೂಜಿ ದಿನ ಎಣ್ಣೆನೀರ್ ನ್ ಕೊರ್ನಕುಲು ತುಳುವೆರ್.ಬೂಮ್ಯಪ್ಪೆ ಮದಿಮಲಾದ್ ಫಲವಂತಿಕೆಗಾದ್ ಲಕ್ಕ್ ದುಂತುನಗ ಬರ್ಪುನ ಪರ್ಬನೇ ಶಿವರಾತ್ರೆ.ತುಳುವೆರ್ ಆನಿದ ಇರ್ಲ್ ಕಂಡಾಟದ ಗೊಬ್ಬುಡು ಇರ್ಲಿಡೀ ಜಾಗರಣೆ ಉಪ್ಪುವೆರ್.ಶಿವರಾತ್ರೆದಾನಿ ಕಂಡುನಿಂದ್ ಪನ್ಪುಜೆರ್.ಯಾನ್ ನಿನ್ನ ಇಲ್ಲದ ಸೊತ್ತುನು ತಪ್ಪಾದ್ ಬುಡುವೆಂದ್ ಪಂಡ,ಯಾನ್ ನಿನನ್ ಪತ್ತ್ ದ್ ತೋಜವೆಂದ್ ಒರ್ಯನೊರಿ ಕಾರೊಯ್ತೊಂದು ಇಡೀ ಇರ್ಲ್ ಜಾಗರಣೆ ಕುಲ್ಲುನ ರಾತ್ರೆ ತುಳುವೆರೆ ಶಿವರಾತ್ರೆ.ಶೈವಾಂಶ ದೈವೊಲೆಗ್ ನೇಮ ನೆರಿ ಇರ್ಲ್ ಡ್ ನಡತ್ಂಡ,ದೈವ ಬೂತೊಲೆ ಗುರಿಕಾರೆ ಶಿವಗಾದ್ ಇರ್ಲಿಡೀ ಒಂಜಿ ಗೊಬ್ಬುಡು ಕಾಪುನ ರಾತ್ರೆಏ ಶಿವರಾತ್ರೆ.ತಳುನಾಡ ಶಿವರಾತ್ರೆದ ಈತ್ ಪೊರ್ಲ ಕಲ್ಪನೆ ನಮಡ್ದಿನಿಮದೆಕ್ ಸೇರ್ದ್ ಅಡೆಗ್ ಪುರಾಣ ಕಥೆಕುಲು ಸೇರ್ದ್ ಫೋತ. ಅಂಚಿ ತುಳುವೆರೆ ಇರ್ಲ್ ಜಾಗರಣೆದ ಶಿವರಾತ್ರೆದ ಬಗೆಟ್ ದುಂಬುದ ಪೀಳಿಗೆಗ್ ತೆರಿಪಾವುನ ಕೆಲಸ ನಮಡ್ದಾವೊಡು.
ಬರವುಗು ಬೆರಿತಾಂಗ್:-ಯಂ.ಡಿ.ಶೆಟ್ಟಿ.ಇರಾ.
No comments:
Post a Comment