ದೈವ ಜುಮಾದಿ ಧೂಮಾವತಿಯತ್ತ್

                ‌‌‌ದೈವ ಜುಮಾದಿ  ಧೂಮಾವತಿಯತ್ತ್  

   

           ಕಡಂದಲೆ ಪರಾಡಿ ಮಂಜಲ್ ಜುಮಾದಿ ಬಂಟ

  

ತುಳುನಾಡ ದೈವೊಲೆನ್ ಪೂರಹಿರಿಯಾಕ್ಲು ದೀನ ಪುದರ್ಡೆ ಮಾನಿತೊನ್ನ ಆದಿ ಮಲಾರ ಬೂಡು

   ಗಿಡೆದೆರುತ ಒರುಟ್ಟು ಕಂಬುಲಗ್ ಜತ್ತ್ ದ್ ಪಿಲಿ ಬಲಿಪೆ ಆದ್ ಮಂಜೊಟ್ಟಿ ಮಿತರ್ದ್ ಅನಾವುದ ಮರಟ್ ಕಂಚಿದ  ಕೋರಿಯಾದ್ ಕೆಲೆತ್ ದ್ ಎರುತ್ತ ಮೋನೆದ ರೂಪೊಡ್ ಜುಮಾದಿ ಬಂಟೆರ್ ಆದ್ ಆರಾಧನೆ ಪಡೆಪಿನ ಜಾಗ್ - ಕಡಂದಲೆ ಪರಾಡಿ ಮಂಜೊಟ್ಟಿ ದೈವಸ್ಥಾನ

 

    

  

ತುಳುನಾಡ ಜುಮಾದಿ ದೈವ ಧೂಮಾವತಿಯತ್ತ್.ಉತ್ತರ ಭಾರತೊಡಿಪ್ಪುನ ಧೂಮಾವತಿ ದೇವಿನ ಆರಾಧನೆಗ್ಲಾ  ತುಳುನಾಡ ಸೈನಿಕ ದೈವೊಗ್ಲಾ ವಾ ಸಮ್ಮಂದಲ ಇಜ್ಜಿ.ದೇವಿನ 10ತಾಂತ್ರಿಕ ಸಗ್ತಿಲೆಡ್ ಧೂಮಾವತಿಲ ಒಂಜಿ.ಕಾಳಿ,ತಾರಾ,ತ್ರಿಪುರ ಸುಂದರಿ,ಭುವನೇಶ್ವರಿ,ಚಿನ್ನಮಸ್ತ,ಭೈರವಿ,ಧೂಮಾವತಿ,ಬಗಲಾಮುಖಿ,ಮಾತಂಗಿ ಬೊಕ್ಕ ಕಮಲ ಈ 10ತಾಂತ್ರಿಕ ಸಗ್ತಿಲೆಡ್ ಧೂಮಾವತಿ ಒರ್ತಿ.ಆಂಡ ತುಳುನಾಡ ಜುಮಾದಿಗ್ಲಾ ಧೂಮಾವತಿಗ್ಲಾ ವಾ ಸಮ್ಮಂದಲ ಇಜ್ಜಿ.10ತಾಂತ್ರಿಕ ಮಹಾವಿದ್ಯಾಲೆಡ್ ಧೂಮಾವತಿ ಒರ್ತಿ.ಕಕ್ಕೆದ ಮಿತ್ತ್ ಕುಲ್ದಿನ,ಇಜ್ಜಾ ಕುದುರೆ ಇಜ್ಜಂದಿ ತೇರ್ ಡ್ ಪೋಪುನ,ಮಸಣೊಡಿಪ್ಪುನ(ಪಾರೊತಿನ ಒಂಜಿ ಅಂಶ ಪನ್ಪೆರ್),ಕುರ್ತೆಲ್,ಕಂಡನಿ ತೀರ್ನ ವಿದವೆಯಾದ್ ಧೂಮಾವತಿನ್ ಚಿತ್ರಿಸದೆರ್.ಧೂಂ ಧುಮ್ ಧೂಮಾವತಿ ಸ್ವಾಹಾ-ಧೂಮಾವತಿನ ಮಂತ್ರ. ಅಂಚಿನ ಧೂಮಾವತಿಯೋಲು,ಸಂಧಿ ಪಾಡ್ದನದ,ತುಳುನಾಡ ಸೈನಿಕ ಒರುತ ಸ್ವತಂತ್ರ ಸಗ್ತಿ  ಜುಮಾದಿ ಓಲು?.

ವೀಡಿಯೋ ಲಿಂಕ್-

  https://youtu.be/bSBf_V_qDiA

   

ಜುಮಾದಿ ದೈವ.ಜಂತಬೆಟ್ಟು ಬಂಟ ಜುಮಾದಿ ದೈವಸಾನ ಕುತ್ತೆತ್ತೂರು.ಚಿತ್ರ-ಅನೂಪ್ ಸೂರಿಂಜೆ

ಜುಮಾದಿನಾವಡ್,ಮಲರಾಯನಾವಡ್,ಕೊಡಮಂದಾಯನಾವಡ್,ಮಗ್ರಂದಾಯನಾವಡ್,ನಾಲಾಯಿದಾಯನಾವಡ್ ಆಯೆ ಇಂಬೆಂದೇ ಲೆತ್ತೊಂತೆರ್ ವಿನಃ ಇನಿತಲೆಕ ಅರ್ಥ ಇಜ್ಜಾಂದಿ ತ್ತಾಯ,ತ್ತಾಯಿಂದ್ ಲೆತ್ತೊಂದಿಜ್ಜಾಂಡ್.

    

 ಜುಮಾದಿ,ಬಂಟೆ,ಮಲರಾಯೆ ಈ ಮೂಜಿ ದೈವದ ಮುಗತ ರಚನೆ

ಬೇತೆ ಬೇತೆನೇ ಉಪ್ಪುಂಡು.ಜುಮಾದಿಗ್ ಪಂಜಿದೊರುತ ಮುಗ ಇತ್ತ್ಂಡಲ ನರಮಾನ್ಯನೊರುತ ಕಣ್ಣ್,ಕೆಬಿ ಇತ್ತ್ ದ್ ಮೂಂಕುದ ಒಟ್ಟೆಲು ಮಲ್ಲ ಉಪ್ಪುವ.                              

ಮಲರಾಯನ ಮುಗಲ ಪಂಜಿದ ಮುಗೊರ್ದು ಬೇತೆಯಾದ್ ಮುದಲೆದ ಮೋನೆದಲೆಕ ತೋಜಿಂಡ(ಲೆಕ್ಕೆ ಸಿರಿನ್ ಮುದಲೆದೊರು ಪನ್ಪೆರ್) ಮೂಂಕುದೊಟ್ಟೆಲು ಎಲ್ಯ ಇತ್ತ್ ದ್ ಪಂಜಿದ ಮೋನೆದೊರು ಇಜ್ಜಿ.ಮಲರಾಯನ ಮುಗತ ಕಣ್ಣ್ ಬೊಕ್ಕ ಕೆಬಿ ನರಮಾನ್ಯಲೆಕ ಉಂಡು.ಆಂಡ ಪಂಜುರ್ಲಿನ ಮುಗೊಟು ಕಣ್ಣ್,ಕೆಬಿ ಪಂಜಿದ ಮೋನೆನೆ ಉಪ್ಪುಂಡು.

                              

ಜುಮಾದಿನ ಒಟ್ಟುಗು ಬಂಟೆ ಇತ್ತ್ಂಡ ಜುಮಾದಿಗ್ ಭದ್ರ ಮುಗ ಬೊಕ್ಕ ಬಂಟಗ್ ಪಂಜಿದ ಮುಗ ಉಪ್ಪುಂಡು.ಜುಮಾದಿಗ್ ಮುಗ ದೀಪುನ,ಮುಗ ಏರುನ ರಡ್ಡ್ ಕಟ್ಟ್ ಲ ಉಂಡು.ಮಲರಾಯಗ್,ಪಂಜುರ್ಲಿಗ್ ಮುಗ ದೀದ್ ನೇಮ ನಡತ್ಂಡ ಅಣ್ಣಪ್ಪ ಪಂಜುರ್ಲಿಗ್ ಭದ್ರ ಮುಗ ಏರ್ ದ್ ನೇಮ ಆಪುನಿ.ದೈವಾರಾದನೆಡ್ ಪ್ರಧಾನ ಬೋಂಟೆ ಇತ್ತ್ ನಿ ಬುಳೆ ಸೆಲೆನ್ ನಾಶ ಮಲ್ಪುನ ಕಾಡ ಪಂಜಿಲೆನ್ ಬೋಂಟೆ ದೇರುನ.ಊರುದ ಅರಸುಲು,ದಂಡ್ ದ ದಳವಾಯಿ ಬೋಂಟೆ ದೇರೊಂತೆರ್.

                                     

   ಮಲೆ ರಾಯ ಒಂಜಿ ರೀತಿಯಾಂಡ ಮಲಾರ ಆಯದ ,ಉದಿಪುದ ದೈವಂದ್ ಮಲರಾಯನ್ ಪನ್ಪೆರ್.ಪಂಜಿದ ಬೋಂಟೆ ದೇರ್ನೆಕ್ ಸಾಗ್ಸಿಯಾದ್ ಅರಸುಲು ಪಂಜಿದ ತರೆನ್ ಸಾಗ್ಸಿಯಾದ್ ಕನಪೆರ್ .ಆ ಗುರ್ತ ಸಾಸಿತಾಯೆರೆ ಪಂಜಿದ ಮುಗತ ಕಲ್ಪನೆ ಬತ್ತಿಪ್ಪು.ಬಿರು ಪಗರಿ ಪತೊಂದು ದೈವೊಲು ವಲಸಾರಿ ಪೋಪುನಲ ಬೋಂಟೆದ ಗುರ್ತೊನು ತೆರಿಪಾವುಂಡು.ಜುಮಾದಿ ಸೈನ್ಯಾದಿಕಾರಿನ ಒರುವಾದ್,ಭದ್ರ ಮುಗ ಏರ್ದಿತ್ತ್ಂಡ ಬಂಟೆ ಪಂಜಿದ ಮುಗ ಏರ್ದಿಪ್ಪುಂಡು.

                           

ಜುಮಾದಿ ಒಂಜೆ ಇತ್ತ್ಂಡ ಪಂಜಿದ ಮುಗತೊರು ಉಪ್ಪುಂಡು.ನಿಜವಾದ್ ತೂಯೆರೆ ಪೋಂಡ ಒವ್ವೇ ದೈವೊಲೆಗ್ ಮೂಲೊಡು ಮುಗ ಇಜ್ಜಾಂಡ್.ಪಾಲೆಡ್ ಮುಗತ ರಚನೆ ಮಲ್ತೊಂತೆರ್.ದುಂಬುಗು ದೈವದ ಮುಗ ಸಾಸಿತಾದ್ ಉಪ್ಪಡ್ಂದ್ ಅರಸುಲು,ಬೂಡು,ಗುತ್ತು,ಬರ್ಕೆದಕುಲು ನರಮಾನ್ಯನ ಕಲ್ಪನೆದಾದಾರೊಡು ಮುಗತ ಒರು ಮಲ್ಪಾಯೆರ್.

                                 

ದೈವದ ಮುಗ ಮಲ್ಪುನ ಅಚಾರಿಲು  ದೈವದ ನೇಮ ನೆರಿ ಮಲ್ಪವುನ ಮನೆತನದಾರೆನ ಮೋನೆದಾದಾರೊಡು ಕಂಚಿ ಪಿತ್ತಾಳೆಡ್ ಎರಕ ಪಾಡ್ದ್ ಮುಗತ ಒರು ಮಲ್ತೆರ್.ಅಂಚಾದ್ ಎಚ್ಚಿನ ದೈವದ ಮುಗೊಟು ಮೀಸೆ ಉಪ್ಪುಂಡು.

                              

    ಮುಗ ಮಲ್ಪುನಗ ಒಂತೆ ಪೋಡಿ ಕಟ್ಟಾವುಲೆಕ ಉಗ್ರ ರೂಪ ತೋಜುನಂಚಿ ಮುಗತ ಒರು ಮಲ್ತೆರ್.ನೇಮೊಡ್ಲ ಅಂಚನೆ ವ್ಯಕ್ತಿ ಶಕ್ತಿಯಾನಗ ಅಡ್ಡೊಗು ಅಗೆಲ,ನೀಟೊಗು ಎತ್ತರದ ಅಣಿ,ಮೋನೆಗ್ ಅರದಲ,ಕಾರ್ ಗ್ ಗಗ್ಗರ ಇಂಚ ಒಂಜಿ ರೀತಿದ ವಾತಾವರಣ ಸೃಷ್ಠಿಯಾದ್ ಅವ್ಲು ನಂಬೊಳಿಗೆ ಸುರಾಂಡ್.  ಕಾರ ಗಗ್ಗರ ದೀದಾನಗ ದೈವದ ಪರಿಪೂರ್ಣ ಕಲೆ ಪತಿಮಾನಿನ ಮಿತ್ತುಪ್ಪುಂಡು.    

                     ಚಿತ್ರ_ಶರತ್ ಪೂಜಾರಿ

  ಅಪಗ ಜುಮಾದಿ ಪಂಡ ದಾದಂದ್ ತೆರಿಕ.ಜುಮಾದಿನ್ ಬೇತೆ ಬೇತೆ ಒರುಟು ತುಳುವೆರ್ ಅರ್ಥ ಮಲ್ತೊಂದುಲ್ಲೆರ್.ದಂಡ್ ದ ಕಲೊಟು ಜೂವ ಒರ್ತ್ ನಾಯೆ ಜುಮಾದಿಂದ್ ಪನ್ಪೆರ್.
                             

   ಗರಡಿ ಇದ್ಯೆ ಕಲ್ತ್ ದ್ ಬನ್ನಗ ಅಕ್ಲೆನೊಟ್ಟುಗು ಜುಮಾದಿನ್ ಕಾಪಾದ್ ಕೊರೊಂತೆರ್/ಬುಡೊಂತೆರ್.         

ಎಡತ್ಡ್  ಎಲ್ಯ ಮಂಚವುಡು ಜೂಮ್ರ ,ಮಲ್ಲ ಮಂಚವುಡು ಜುಮಾದಿ.ಒಟ್ಟುಗು ಜೂಮ್ರ ಜುಮಾದಿ ಪನ್ಪೆರ್ .ಮರಣ ಗುತ್ತು ಬಂಟಾಲ ತಾಲೂಕು.ಜೂಮ್ರ ಪಂಡ ಬಂಟೆ

            

ಜುಮಾದಿ ಇಲ್ಲ ಹಿರಿಯಾಯೆ.ದುಂಬುದ ಕಾಲೊಡು ದಂಡ್ ದ ಕಲೊಟು ಪೊರ್ಂಬಾಟ ಮಲ್ತ್ ದ್ ಜೂವ ಬುಡ್ನಾಯೆ ಜುಮಾದಿ.ಏರೇರ್ನ ಇಲ್ಲದ  ದುಂಬುದ ಪೆರಿಯಾಕ್ಲು ದಂಡ್ ದ ಕಲೊಟು ಪೊರ್ಂಬುದು ಜೂವ ಬುಡ್ಯೆರಾ ಅಕುಲು ಇಲ್ಲದ ಪೆರಿಯಾರಾಯೆರ್,ಜುಮಾದಿಯಾಯೆರ್.ಇನಿಲಾ ತುಳುನಾಡ್ ಡ್ 5ಅಡಿ ಎತ್ತರದ ಜುಮಾದಿನ ಮೂರ್ತಿಲುಲ್ಲ.

                ‌‌                
ಸೈನಿಕ ನ ಒರುತ ನರಮಾನಿ ಮೀಸೆ ದೈವದ ಮುಗೊಟಿತ್ತ್ ದ್ ಕೈಟ್ ಕಡ್ಸಲೆ ಉಂಡು. ಸೈನಿಕೆ ಒರಿ ಯುದ್ಧರಂಗೊಡು ಕರಿದ್ ಪೋಯೆಡ ಕನ್ನಡೊಡು ಹುತಾತ್ಮ ಪನ್ಪೆರ್.ತುಳುಟು ಅವ್ವೇ ಹುತಾತ್ಮನ್ ಜುಮಾದಿ ಪನ್ಪೆರ್.ಈ ಇಚಾರೊನು ಪೆರಿಯ ಜನಪದ ವಿದ್ವಾಂಸೆರಾಯಿನ ಡಾ ವೈ ಯನ್ ಶೆಟ್ರ್ ಪನ್ಪೆರ್.

  ದಂಡ್ ದ ಕಲೊಟು ಜೂವ ಬುಡ್ನಾಯೆ ರಾಜೆ ಆದಿತ್ತ್ಂಡ ಆಯನ್ ಆ ಪ್ರದೇಶದಮಾಗಣೆ,ಸೀಮೆ,ಗ್ರಾಮದ ದೈವ ಆದ್ ಆರಾಧನೆ ಮಲ್ಪುವೆರ್.ದಂಡ್ ದ ಕಲೊಟು ತೀರ್ನಾಯೆ ಸೈನಿಕೆ ಆದಿತ್ತೆಡ ಆಯನ್ ಚಾವಡಿದ ಸತ್ಯ ಆದ್ ಆರಾದನೆ ಮಲ್ಪುವೆರ್.

              ‌‌‌‌‌‌‌‌‌‌‌               ಧೂಮಾವತಿ
ಈ ಚಿತ್ರ ತೂನಗ ನರಸಿಂಹ ದೇವೆರೆ ಕೈತಲ್ ಧೂಮಾವತಿ ಇತ್ತ್ ಲೆಕ ತೋಜುಂಡು.ನರಸಿಂಹ ದೇವೆರೆ ಕೈತಲ್ ಲಕ್ಷ್ಮಿ ನರಮಾನ್ಯನೊರುಟು ಉಪ್ಪುನಗ ಧೂಮಾವತಿ ಒರುತ ಸಗ್ತಿ ಉಂದು ಒವು?.ವಿಷ್ಣು ವರಾಹಾವತಾರ ದೆತೊನ್ನಗ ವಿಷ್ಣುನ  ನರಸಿಂಹಾವತಾರೊಡು ಲಕ್ಷ್ಮಿ ನರಮಾನಿಯೊರುಟಿತ್ತ್ ನಾರ್ ವರಾಹ ರೂಪಿ ವಿಷ್ಣುನೊಟ್ಟುಗ್ಲ ಲಕ್ಷ್ಮಿ ನರಮಾನಿ ಒರುಟಿಪ್ಪೊಡಾಂಡ್ .ಆಂಡ ವರಾಹರೂಪಿ ವಿಷ್ಣುನೊಟ್ಟುಗು ಲಕ್ಷ್ಮಿ ನರಮಾನಿ ಒರುಟೆ ಉಪ್ಪೊಡಾಂಡ್.ಆಂಡ ವಿಷ್ಣುನೊಟ್ಟುಗು ಉಪ್ಪುನ ವಾರಾಹಿ ಏರುಂದು?.  ಒಂತೆ ದೈವಾರಾದಕೆರ್ ಅಲಚನೆ ಮಲ್ಪೊಡಾಯಿನ ಇಚಾರ
                 

ಒಡಿಪು ಮಲ್ಪೆ ಕೈತಲ್ದ ಜುಮಾದಿ ನಗರ,ಬಂಟಾಲದ ಬೆರ್ಮೆರೆ ಕೂಟೇಲ್ದಲ್ತ ಜುಮಾದಿ ಗುಡ್ಡೆ,ಬೊಳ್ತೇರ್ ಗುರುವಾಯನಕೆರೆ ಗೋಂಕುದ ಕಟ್ಟೆದಲ್ಪದ ಜುಮಾದಿ ಗುಡ್ಡೆ,ಉಲ್ಲಾಲೊಡ್ದು ಪಳ್ಳಿ ಬರಿಯೆ ತೊಕ್ಕೊಟ್ಟುಗು ಬರ್ಪುನ ಸಾದಿದ  ಜುಮಾದಿ ಸಾನ,ಪುತ್ತೂರುದ ಮುರತಲ್ಪದ ಜುಮಾದಿಪಲ್ಕೆ ಉಂದೆಡ್ದ್ ಮಲ್ಲ ಸಾಗ್ಸಿ ಜುಮಾದಿದೈವ ಪನ್ಪುನೆಕ್ ಬೇತೆ ದಾದ ಬೋಡು

          

 ಜುಮಾದಿ ದೈವ ತಾಂತ್ರಿಕ ಸಗ್ತಿಯಾತುಂಡ ತುಳುನಾಡ್ ಡ್ ಪಟ್ಟದ ದೈವ ಆದ್ ಆರಾದನೆ ದೆತೊಂದಂಡ್.ತುಳುನಾಡ್ ಗ್ ನಾಥ ಪಂಥದ ಸನ್ಯಾಸಿಲು ಧೂಮಾವತಿ ಪನ್ಪಿ ತಾಂತ್ರಿಕ ಸಗ್ತಿನ್ ಕನಪುನ ದುಂಬು ಮೂಲು ಜುಮಾದಿನ ಆರಾಧನೆ ಇತ್ತ್ಂಡ್.ಅಂಚಾದ್ ದೈವದ ಪುದರ್ ಬದಲ್ಪುನಕುಲು ದೈವದ ಹಿನ್ನೆಲೆ ತೆರಿದಿಪ್ಪೊಡಾಪುಂಡು.

ಬಾಲೆ ಪುಟ್ಟುದು ಮಲ್ಲೆ ಆದ್ ಅವೆತ ಅವುಸಾನಕಾಲಮುಟ್ಟ ಪೆರಿಯಾಕ್ಲ್ ದೀನ ಪುದರೇ ಉಪ್ಪುಂಡು.ನಮ್ಮ ದೈವೊಗು ಪರಿಯಾಕ್ಲ್ ನಂಬುದು ದೀನ ಪುದರ್ ನ್ ಬದಲ್ಪುನ ಅಧಿಕಾರ ಏರೆಗ್ಲಾ ಇಜ್ಜಿ.ಅಂಚ ಪುದರ್ ಬದಲ್ತ್ ನೆರ್ದಾದ್ ದೈವೊನು ಮೂಲ ಪುದರ್ಡ್ ಲೆಪ್ಪಂದೆ ಪೊಸ ಪುದರ್ಡ್ ಲೆತ್ತೆರ್ಡ ಎನ್ನ ಪುದರತ್ತ್ಂದ್ ಕಲೊಕು ಬರಂದ್.ಬೊಕ್ಕ ಓಡೆ ಕಾರ್ನಿಕ ತೋಜಾವುನಿ?.

           

             

ಇಂಚಿಪ್ಪ ಒಂಜಿ ತಿಕ್ ಡ್ ಪ್ರಶ್ನೆ ದೀನಕುಲು ಜುಮಾದಿನ್ ಧೂಮಾವತಿ ಮಲ್ತ್ ದ್ ವಾಹನ ಕಕ್ಕೆ ಮಲ್ಪೆರೆ ಪಂಡೆರ್.ಆಂಡ ತೆರಿನಕುಲು ಕಕ್ಕೆ ಬೊಡ್ಚಿ ದುಂಬುದ ಪಂಜಿ ವಾನ ಯಾವುಂದೇ ಪನ್ನಗ ಮನಿಪಂದೆ ಕುಲ್ಯೆರ್

        

ಎಡತ  ಕೈಟ್ ಅಗ್ಗಿ ಪತ್ತೊಂಡೆ,ಬಲತ ಕೈಟ್ ಅಲವುದ ಆಯುಧೊಲೆನ್ ಪತ್ತೊಂಡೆಂದ್ ಜುಮಾದಿ ಪನ್ನಗ ದೈವಾರಾದನೆ ವೀರೆರೆ ಆರಾಧನೆಂದ್ ಒತ್ತೊನೊಡು.                       

      ಇನಿ ಕೆಲವು ಪ್ರಶ್ನೆಚಿಂತನೆದಕ್ಲ್ ಜುಮಾದಿನ್ ಧೂಮಾವತಿ ಪನ್ಪುನ ಮಾತ್ರ ಅತ್ತಂದೆ ನಿಕುಲು ಧೂಮಾವತಿಗ್ ಪಂಜಿದ ಬಂಡಿದ ಬದಲ್ ಕಕ್ಕೆದ ಬಂಡಿ ಮಲ್ಪುಲೆ ಪನೊಂದುಲ್ಲೆರ್.ಓಡೆಗೆತ್ತ್ಂಡ್ ದೈವಾರಾದನೆದ ಸ್ಥಿತಿ?

ದೇವೆರೆ ಆರಾದನೆಡ್ ಕಂಡನಿ ಬುಡೆದಿನ ಆರಾದನೆ ಉಂಡು.ದೈವೊಲೆಡಿಜ್ಜಿ.ಅಂಚಾದ್ ಉಲ್ಲಾಯ ಉಲ್ಲಾಲ್ದಿನ್ ಈಸರ ಪಾರೊತಿ ಪನ್ಪುನವು ಸುದ್ದ ತಪ್ಪು

ವೀಡಿಯೋ ಕೊಂಡಿ_  https://youtu.be/otWGG8p21zc

           

                

ಅನಾದಿಡ್ ಜುಮಾದಿ ದೈವದೊಟ್ಟುಗು ಪಂಜಿ ದೈವಂದ್ ಒಂಜಿ ದೈವ ಇತ್ತ್ ದ್ ಅವು ಪಾತೆರೊಂದಿಜ್ಜಾಂಡ್.ಅವೆರ್ದ್ ಬೊಕ್ಕ ಜುಮಾದಿನೊಟ್ಟುಗು ಬಂಟ ದೈವ ಬತ್ತ್ ದ್ ದೈವ ಪಾತೆರಂದೆ ಬಂಟನ ಅಣಿಟ್ ಪಂಜಿದ ಮುಗ ಇತ್ತ್ಂಡ್.ಅಂಚಾಂದ್ ದೈವೊಗು ಬಾಯಿ ಬರ್ಪುಜಿಂದತ್ತ್.ರಾಜೆ  ಉಪ್ಪುನಗ ಚಾಕಿರಿದಾಯೆ ಪಾತೆರುನ ಕಿರಮ ಇಜ್ಜಿ.

ಸಾನ ಕಟ್ಟ್ಂಡ ಸಾರಾಳ ಜುಮಾದಿ,ಗುಡಿ ಕಟ್ಟ್ಂಡ ಅಮ್ನೋರು ಪನ್ಪಾವೊಂಡೆಂದ್ ದೈವ ಪನ್ಪುಂಡು.ಪಡ್ಡೇಯಿ ಜುಮಾದಿನ್ ಕೇರಳೊಡು ಪಡಿಂಞಾರ್ ಚಾಮುಂಡಿಂದ್ ಪನ್ಪೆರ್.ಕೇರಳೊಡು ಜುಮಾದಿನ್ ಭಗವತಿಂದ್ ಲ ಪನ್ಪೆರ್.

ಜುಮಾದಿ ಭಾರೀ ಪ್ರಾದೇಶಿಕ ಹಿನ್ನೆಲೆ ಉಪ್ಪುನ ದೈವ.ಎಂಚ ಪಂಡ ಬೇತೆ ಬೇತೆ ಅರಸುಲು ತುಳುನಾಡ ಬೇತೆ ಬೇತೆ ಜಾಗೆಡ್ ಅರಸೊಳಿಗೆ ಮಲ್ತೊಂದಿತ್ತ್ ದ್ ಅಕ್ಲೆನೊಟ್ಟುಗು ಕೊಳಗೊಡು ಕರಿದ್ ಪೋಯಿನಕ್ಲು ಜುಮಾದಿಯಾಂಡ ತುಳಜನಾಡ ಬೇತೆ ಬೇತೆ ಬಾಗೊಡು ಬೇತೆ ಬೇತೆನೇ ಜುಮಾದಿನ ಆರಾದನೆ ಉಪ್ಪುಂಡು.ಅಂಚಾದ್ ದೈವಾರಾದನೆ ಬೀರೆರೆ ಆರಾದನೆ.

ಜುಮಾದಿಗ್ ಒಂಜಿ ಪ್ರದೇಶೊಡು,ಅವೆತ ಸುತಮುತಲಿಗೆಡ್ ಕಟ್ಟುನಕುಲು ತುಳುನಾಡ ದೂರದ ಬೇತೆ ಜಾಗೆಡ್ ಕಟ್ಟೆರೆ ಸಾಧ್ಯ ಇಜ್ಜಿ.ದಾಯೆ ಪಂಡ ಅಲ್ತ ಕಟ್ಲೆ,ಅಡೆ ಜುಮಾದಿ ಬತ್ತಿ ಇಚಾರೊನೇ ಬೇತೆ ಉಪ್ಪುಂಡು.

ಧೂಮಾವತಿ ಜುಮಾದಿಯತ್ತ್-https://en.wikipedia.org/wiki/Dhumavati