ಅಂಚಿತ್ತಿ ಕೊರಗತನಿಯನ ಬಗೆಟ್ ಅಕ್ಲೆ ಜನಾಂಗದ ಹಿರಿಯಾಕ್ಲೆಡ ತೆರಿದ್ ಬರೆಯಿ ಬರವುನು ತನಿಯನ ಪಾದೊಗು ಸಮರ್ಪಣೆ ಮಲ್ತೊಂದುಲ್ಲೆ.ಪಣಂಬೂರ ಪಟ್ಟಸಾಲೆಡ್ ತನಿಯನ ಅಮ್ಮೆರೆನ ಕುಟುಮದ ಇಲ್ಲ್ ಇತ್ತ್ ನೆಡ್ದಾತ್ರ ತನಿಯೆ ಇಂಚಿಗ್ ಬನ್ನಗ ಅಡೆಲ ಬತ್ತ್ ದ್ ಪೋಪೆ.ಅವೆಡ್ದ್ ಬೊಕ್ಕದ ಕಥೆ ಮಾತೆರೆಗ್ಲ ತೆರಿದುಂಡು.ಅಂಚಾಂದ್ ಆಯನ ಬದ್ ಕ್ ಕರಿನ ಜಾಗೆ ಕದಿರೆ ದೇಲ್ಯ ಅತ್ತ್.ಆಯೆ ವಾ ಮಾಪಲಲ,ನಾರಂಗಾಯಿಲ ಕೊಯ್ಯೆರೆ ಅಡೆಗ್ ಬೈದ್ ಜೆ.ಕೊರಗ ತನಿಯನ ಮೂಲ ಕಥೆನೇ ಬೇತೆ ಉಂಡು.ಕೊರಗ ತನಿಯೆ ಪುಟ್ಟಿ ಜಾಗೆ ಪಂಡ ಆಯನ ಆದಿ ಸ್ಥಳ ಬಾರಕೂರುದ ಕೊರ್ರೆಪಾಡಿ.ಕುತ್ತಾರ್ ಅತ್ತ್(ಕೊರ್ರೆಪಾಡಿ-ಬಾರ್ಕೂರುಡು ಜತ್ತ್ ದ್ ಚೂರು ಎದುರು ಪೋನಗ ಎಡತ್ ಗ್ ಒಂಜಿ ಜೈನ ಬಸ್ತಿ ಉಂಡು.ಬಸ್ತಿದ ಚೂರು ಎದುರು ಪೋನಗ ಒಂಜಿ ಕೆದು/ಕೆರೆ ಉಂಡು.ಕೆರೆತಲ್ಪನೆ ಒಂಜಿ ಮಣ್ಣ ಮಾರ್ಗ ಉಂಡು.ಮಣ್ಣ ಮಾರ್ಗೊಡೆ ಒಂತೆ ಮಿತ್ತ್ ಪೋನಗಅವ್ಲೆ ಕೊರ್ರೆಪಾಡಿ ಉಂಡು.ಇಂಚಿಡೆ ಪೋಂಡ ಕೊರ್ರೆಪಾಡಿ ಬಾರ್ಕೂರುದ ಅಸತ್ರೆದ ಪಿರವು ಮೆಯ್ಯಾಪುಂಡು.).ನಮಕ್ ಕೊರಗತನಿಯನ ಮೂಲ ಕಥೆ ಕೊರ್ನಾರ್ ಓಲ್ಲಾ ಕೊರಗಜ್ಜೆಂದ್ ಪಂತ್ ಜೆರ್.ಕೊರಗ ತನಿಯನ ಅಜ್ಜೆರೆ ಪುದರ್ ಕುರುವ,ಅಜ್ಜಿನ ಪುದರ್ ಪಾಡಿ.ಅಪ್ಪೆನ ಪುದರ್ ಕೊರೊಪೊಲು,ಅಮ್ಮೆರ್ನ ಪುದರ್ ಓಡಿ.ತಮ್ಮಲೆ ಪುದರ್ ಗುರುವ,ಮಾಮಿನ ಪುದರ್ ಬೈಕಾಡ್ತಿ.ಬೈಕಾಡ್ತಿನ ಆರಾದನೆ ಇನಿ ತುಳುನಾಡ ಕೆಲವೊಂಜಿ ಬಾಗೊಡು ತೂಯೆರೆ ತಿಕ್ಕುಂಡು.ತನಿಯನ ಅಪ್ಪೆ ಕೊರೊಪೊಲುಗು ಬಾರೀ ಕಿನ್ಯ ಪೆರಯೊಡೆ ಮದ್ಮೆ ಆಪುಂಡು.ಅಪಗ ಬಾಲ್ಯವಿವಾಹ ಪದ್ದತಿ ಇತ್ತ್ಂಡ್.ಎಲ್ಯ ಪ್ರಾಯೊಡು ಮದ್ಮೆ ಆಂಡಲ ಕಂಡನಿ ಬುಡೆದಿನ್ ಒಟ್ಟುಗೆ ಉಪ್ಪೆರೆ ಬುಡ್ಪುಜೆರ್.ಅಕ್ಲು ಒಟ್ಟಾವೊಡಾಂಡ ಒಟ್ಟುಗುಪ್ಪೊಡಾಂಡ ಅಕ್ಲೆಗ್ ಸರಿಯಾಯಿನ ಪ್ರಾಯ ಬರೊಡು.ಪೊಣ್ಣು ಪೋದು ಪೊಂಜೊವಾಯಿ ಬೊಕ್ಕ ಅಕ್ಲೆನ್ ಒಟ್ಟು ಸೇರ್ಯೆರೆ ಬುಡೊಂತಡ್.ಮದಿಮೆ ಆಯಿ ಬೊಕ್ಕ ಕೊರೊಪೊಲು ಅಪ್ಪೆ ಇಲ್ಲಡೇ ಉಪ್ಪುವಲ್.ಕೊರೊಪೊಲು ಪೊಣ್ಣು ಪೋದು ಪೊಂಜೊವಾನಗ ಓಡಿಗ್ ಸುದ್ದಿ ಮುಟ್ಟುಂಡು.ಇಸಯ ತೆರಿನ ಓಡಿ ಅಡೆಗ್ ಬರ್ಪೆರ್.ಒಂಜಿ ಇಸೇಸ ಪಂಡ ಕೊರಗ ಜನಾಂಗೊಡು ಪೊಣ್ಣು ಮದಿಮೆಯಾದ್ ಕಂಡನಿ ಇಲ್ಲಲ್ ಉಪ್ಪುನಿಯತ್ತ್.ಅಪ್ಪೆ ಇಲ್ಲಲೇ ಪೊಣ್ಣು ಉಪ್ಪುನಿ.ಅಲೆನ ಕಂಡನಿ ಮಾಮಿ ಇಲ್ಲಡೇ ಬತ್ತ್ ದ್ ಕುಲ್ಲೊಡು.
ಬಾರ್ಕೂರು ಸೀಮೆದ ಗಡಿಟ್ ಕೊರಗ ತನಿಯನ ಹಿರಿಯಾಕ್ಲೆನ ಏಳ್ ಕೊಪ್ಪೊಲಿತ್ತ್ ನಿ.ಕೊಪ್ಪೊಲು ಒಂಜಿ ರಡ್ಡ್ಂದ್ ಉಪ್ಪುಜಿ.ಏಳ್,ಪತ್ತ್ ಕೊಪ್ಪೊಲುಂದು ಕೈತಲ್ ಕೈತಲ್ ಉಪ್ಪುವ.ಒಂಜಿ ಕೊಪ್ಪಂದ್ ಉಪ್ಪುನ್ನೇ ಇಜ್ಜಿ.ಕೊಪ್ಪೊಲು ಐನೆರ್ದ್ ಮಿತ್ತ್ ಉಪ್ಪೊಡೆ.ಮೂಲು ಕೊರಗ ತನಿಯೆ ಪುಟ್ಟ್ ನ ಜಾಗೆ ಕೊರ್ರೆಪಾಡಿ.ಅವು ಉಪ್ಪುನಿ ಬಾರ್ಕೂರುಡು.ಒಡಿಪು ಕಾಪುದ ಮಡಂಬುಡ್ದು ಕಾಂತಾವರೊಗು ತನಿಯನ ಕುಟುಮದ ಮೂಲದಕುಲು ಬತ್ತ್ ದ್ ಬದ್ ಕ್ ಕಟ್ಟೊಂದ್ ನಿ.ಮಡಂಬುಡು ಸೆರ್ಗೆನ್ನಾರ್ ಬರಿತಕುಲಿತ್ತೆರ್.ಮುಲ್ತು ಒಂಜಿ ಪಾಲ್ ಕಾಂತಾವರೊಗು ಪೋಯಿ ಬೊಕ್ಕ ಕಾಂತಾರ ಸೆರ್ಗೆನ್ನಾರ್ಂದ್ ಆಯೆರ್.ಮಡುಂಬುಡು ಮೊಕ್ಲೆನ ಮೆಗ್ ದಿ ಪಾಲಿತ್ತ್ಂಡ ಕಾಂತಾರೊಡು ಪಲಿ ಪಾಲ್ದಕುಲುಲ್ಲೆರ್.ಒಂಜಿ ಕಾಲೊಡು ಕೊರಗ ಸಮುದಾಯ ಕಾಂತಾರದ ಮಿತ್ತಮಲೆ,ತಿರ್ತಮಲೆಂದ್ ರಡ್ಡ್ ತಿಕ್ ಡ್ ಬದ್ ಕೊಂತೆರ್.ಕಾಂತಾವರ ಕ್ಷೇತ್ರ ಮಹಾತ್ಮೆ ಬರವುಡ್ಲಾ ಕಾಂತಾರೊಡು ಕೊರಗೆರ್ನ ಬಾರ್ಯಾತ್ ಕೊಪ್ಪೊಲಿತ್ತ್ ನ ಇಚಾರ ತೆರಿಯುಂಡು.ಮಿತ್ತಮಲೆ ತನಿಯನ ಆಂಡ ತಿರ್ತಮಲೆ ತನಿಯನ ಅಪ್ಪೆ ಕೊರೊಪೊಲ್ನ.ಓಡಿ,ತನಿಯೆ ಪೂರ ಕೊರಗ ಜನಾಂಗೊಡು ನಡುಸಾಲ್ ದ ಕೊರಗೆರ್ಂದ್ ಪುಗರ್ತೆ ಪಡೆಯಿನಕುಲು.ಬಾರ್ಯಾತ್ ಕೊರಗ ಸಮುದಾಯ ಕಾಂತಾವರೊಡು ಇತ್ತ್ ದ್ ಕಾಂತಾವರದ ದೇವೆರ್ ಈ ಸಮುದಾಯೊಗು ತಿಕ್ಕ್ ದ್ ಅಕುಲು ಬಾರಾಡಿ ಬೂಡುದ ಬಲ್ಲಾಲ್ರೆಗ್ ತೆರಿಪಾಯಿ ಬೊಕ್ಕ ಕಾಂತೇಶ್ವರ ದೇಲ್ಯ ಅವ್ಲು ತಾಪನೆಯಾಂಡ್ ಪನ್ಪಿ ಇಚಾರ ಕಾಂತಾವರ ಕ್ಷೇತ್ರ ಮಹಾತ್ಮೆ ಬೂಕುಡುಂಡು.ಓಡಿ ಬೊಕ್ಕ ಕೊರೊಪೊಲ್ನ ಪುಟ್ಟು ಕಾಂತಾರ-ಕಾರ್ಲ-ಕುಡ್ಲದ ನಡುಟುಂಡು.ತನಿಯನ ಅಮ್ಮೆರೆಗ್ ಮದಿಮೆದ ಸಂದರ್ಭ ಪೊಣ್ಣು ( ಕೊರೊಪೊಲ್ನು) ನಿಗಂಟ್ ಮಲ್ಪೆರೆ ಜನ ಲೆಪ್ಪೆರೆ ಮುಲ್ಕಿ,ಕಾಂತಾರ,ಕಬತ್ತಾರ್ ಗ್ ಪೋಪುನ ಉಲ್ಲೇಖ ಗಿರಿ ಕಾವ್ಯೊಡು ಉಂಡು.ಕೊರೊಪುಲುಗು ಬಾಲೆ ಆವೊಡಾಂಡ ಕೊರಗತನಿಯನ ಅಜ್ಜಿ ಕಾಂತಾವರ ದೇವೆರೆಗ್ ಪುಂಡಿಪಣವು ಪರಕೆ ಪಂಡಿ ಇಚಾರ ಈ ಕಾವ್ಯೊಡುಂಡು.ಕಾಂತೇಶ್ವರ ದೇವೆರೆ ಪರಕೆಡ್ ಪುಟ್ಟಿ ತನಿಯನ್ ಇನಿ ತುಳುನಾಡ್ ಡ್ ಈಸರ ದೇವೆರೆನಂಶಂದ್ ಆರಾದನೆ ಮಲ್ತೊಂದುಲ್ಲೆರ್.ಗಿರಿ ಕಾವ್ಯೊಡು ಕೊರಗ ಜನಾಂಗದ ಏಳ್ ಬರಿಕುಲು ಬತ್ತ್ ದ್ ಮೂಲು ಕೊರಗ ತನಿಯಗ್ ಸಂಬಂದಪಟ್ಟ್ ನ ಬರಿತ ಬಗೆಟ್ ಮಾತ್ರ ತೆರಿಕ.ಕೊರಗತನಿಯನ,ಅಪ್ಪೆನ ಬರಿ ಸೋಮಣ್ಣಾಯ ಬರಿ,ಕೊರಗ ತನಿಯನ ಅಮ್ಮೆರ್ ನ ಬರಿ ಇರೋಡಿಯನ್ ಬರಿ.ಕೊರಗ ತನಿಯನ ಅಮ್ಮೆರ್ ಓಡಿ ಆ ಕಾಲದ ನ್ಯಾಯ ತೀರ್ಮಾನ ಮಲ್ಪುನ ವ್ಯಕ್ತಿಯಾದಿತ್ತೆರ್.ಆ ಕಾಲೊಡು ಐಕಳ ಮೂಲದ ಪಾಡ್ದನ್ನಾರ್ ಬರಿ ( ಬಂಗೇರನ್ನ ಬರಿಂದ್ ಇತ್ತೆ ಪನ್ಪೆರ್ ) ಸುರುತ ಮರ್ಯಾದಿದ ಬರಿಯಾದಿತ್ತ್ಂಡ್.ಮಡಂಬುದ ಸೆರ್ಗೆನ್ನಾರ್ ಬರಿ ರಡ್ಡನೆ ಮರ್ಯಾದಿದ ಬರಿಯಾದಿತ್ತ್ಂಡ್.ದಾದನಾ ಬರಿತ ನಡುತ ಉಲತ್ತುಲಯಿದ ಲಡಯಿನ್ ಸರಿ ಮಲ್ಪೆರೆ ಕೂಡುಕೂಟ ಮಲ್ತ್ ನ ತನಿಯನ ಅಮ್ಮೆರ್ ಓಡಿ , ಇನಿರ್ದ್ ಬೊಕ್ಕ ಪಾಡ್ದನ್ನಾರ್ ಬರಿಕ್ ಸುರುತ ಮಾನಾದಿಗೆ ಇಜ್ಜಿ,ಆ ಮಾನಾದಿಗೆನ್ ಮಡಂಬುದ ಸೆರ್ಗೆನ್ನಾರ್ ಬರಿಕ್ ಕೊರೊಡುಂದು ಮಾತೆರ್ಲ ಒಪ್ಪಿಗೆ ಮಲ್ತೊಂಡೆರ್ ಗೆ.ಅವೆರ್ದ್ ಬೊಕ್ಕ ಸೆರ್ಗೆನ್ನಾರ್ ಬರಿಕ್ ಸುರುತ ತಾನಮಾನ ತಿಕ್ಕ್ಂಡ್.ಪಾಡ್ದನ್ನಾರ್ ಬರಿಕ್ ರಡ್ಡನೇ ಮರ್ಯಾದಿ ತಿಕ್ಕ್ಂಡ್.ಕೂಟದ ಕಲೊಟು ಸೆರ್ಗೆನ್ನಾರ್ ಬರಿತಕ್ಲೆನ ಕಡೇತ ತೀರ್ಮಾನ.ಒವ್ವೇ ಒಂಜಿ ಕೂಟ ಆನಗಲ ಸೆರ್ಗೆನ್ನಾರ್ ಬರಿತ ಒಂಜಿ ಬಾಲೆಯಾಂಡಲ ಉಪ್ಪೊಡು.ಇಜ್ಜಿಂಡ ಇನಿಕ್ಲಾ ಅವ್ಲು ಕೂಟದ ನ್ಯಾಯ ತೀರ್ಮಾನ ಆಪುಜಿ.ಸೆರ್ಗೆನ್ನಾರ್ ಬರಿತಕ್ಲೆನ್ ಬರಿಕ್ ದೀಯೆರ್ಡ ,ಸೆರ್ಗೆನ್ನಾರ್ ಬರಿತಕುಲು ಇಜ್ಜಂದಿ ಕೂಟದ ನ್ಯಾಯ ತೀರ್ಮಾನ ಪೂರ್ಣ ಆಪುಜಿ.ಇನಿಕ್ಲಾ ಆ ಸಂಪ್ರದಾಯ ಒರಿದುಂಡು.ಈ ಬರಿತಕುಲು ಬಾರೀ ಬುದ್ಯಂತೆರ್,ಪಾತೆರಕತೆಟ್ ಎಡೇನ ತೆರಿನಕುಲು.ಅಂಚ ಮಾತಾ ಮಾನಾದಿಗೆನ್ ಸೆರ್ಗೆನ್ನಾರ್ ಬರಿಕ್ ಕೊರ್ಯೆರ್.ಕೊರಗ ಜನಾಂಗದಕುಲು ಸೂರ್ಯೆ,ಚಂದ್ರೆ ನೀರ್,ಗಾಳಿ,ಕಲ್ಲ್,ಮರ ಇಂಚ ಪ್ರಕೃತಿಡ್ ದೇವೆರೆನ್ ತೂದು ಮೊಕುಲು ಆರಾದನೆ ಮಲ್ಪುವೆರ್.ಮೂಡಾಯಿ ಮುಟ್ಟುರ್ದೇ ಪಂಡ ಮೂಡಾಯಿಗ್ ಮೋನೆ ಪಾಡ್ದೇ ಮೊಕ್ಲು ಕೈ ಮುಗಿಯುನಿ.ಮೊಕ್ಲು ದುಂಬು ಪಟ ದೀದ್,ಮೂರ್ತಿ ದೀದ್ ಆರಾದನೆ ಮಲ್ತ್ ನಕ್ ಲತ್ತ್,ಮೂಲ ಪ್ರಕೃತಿದನೇ ಆರಾದನೆ ಮಲ್ತೊಂದು ಬತ್ತೆರ್.
ಇಂಚ ಕೊರೊಪೊಲ್ನ ಇಲ್ಲಡೆ ಬತ್ತ್ ದ್ ಓಡಿ ಕುಲ್ಲುದು ಒಂತೆ ಸಮಯೊಡು ಕೊರೊಪೊಲು ಬಂಜಿನಾಲಾಯಲ್.ಮೂಜಿ ತಿಂಗೊಲು ಪೋದು ಆಜಿ ತಿಂಗೊಲು,ಆಜಿ ತಿಂಗೊಲು ಪೋದು ಒರ್ಂಬ ತಿಂಗೊಲು,ಒರ್ಂಬ ತಿಂಗೊಲುಡು ಅಲೆಗ್ ಪೆದ್ದುನ ಬೇನೆ ಬರ್ಪುಂಡು.ಅಲೆಗ್ ಬೇನೆ ಬನ್ನಗ ಪ್ರಕೃತಿಡ್ ,ವಾತಾವರಣೊಡು ಬಾರೀ ಬದಲಾವಣೆ ಆಪುಂಡು.ಸಹಜ ಸ್ಥಿತಿಟ್ ಪ್ರಕೃತಿ ಉಪ್ಪುಜಿ.ಅಲೆಗ್ ಬೇನೆ ಜಾಸ್ತಿಯಾಪುಂಡು.ಸನಿವಾರದಾನಿ,ಪುಣ್ಣಮೆದಾನಿ ರಾಸ್ ದ ಪೊರ್ತು( ಮದ್ಯರಾತ್ರೆ) ತನಿಯನ ಜಲ್ಮ ಆಪುಂಡು.ಒಂಜಿ ಮೂಲದ ಪ್ರಕಾರ ಕೊರಗತನಿಯನ ಬದ್ ಕ್ ದ ಕಾಲ ಇನಿರ್ದ್ ಸುಮಾರ್ ಎಣ್ಮನೂದು ವರ್ಸ ಪಿರವು ಪಂಡ ಪದ್ರಾಡನೆ ಶತಮಾನಂದ್ ಹಿರಿಯಾಕುಲು ಪನ್ಪೆರ್.ಕೋರ್ದಬ್ಬು ಬೊಕ್ಕ ಕೊರಗತನಿಯೆ ಸಮಕಾಲೀನೆರ್ಂದ್ ಪನ್ಪೆರ್.ತನಿಯೆ ಪುಟ್ಟುನ ಪೊರ್ತುಗು ಕಡಲ ನೀರ್ ಉರ್ಕುಂಡು,ಗಾಳ್ಯಾ ಬರ್ಸ ಬರ್ಪುಂಡು,ಮೆಂಚಿ ತೆಡಿಲ್ ಬರ್ಪುಂಡು,ಎರ್ಮೆಲು ಅರೆದುಂಡು,ತಾಮರೆ ಅರಲುಂಡು,ಬೂಮಿಯೇ ನಡುಗುನ ಸ್ಥಿತಿ ಅವ್ಲು ಆಪುಂಡು.ಉಂದೊಂಜಿ ಇಚಿತ್ರ ಜನನಂದ್ ಮಾತೆರ್ಲ ಎನ್ಯುವೆರ್.ಪೆದ್ದಿ ಬಾಲೆದ ಬಲಕೆ ತೂನಗ ಪೆದ್ದ್ ನಪಗನೇ ರಡ್ಡ್ ಮೂಜಿ ದಿನತ ಬಾಲೆದ ಬಲಕೆ ತನಿಯನವಾದಿಪ್ಪುಂಡು.ಮೂಜಿ ದಿನತ ಬಾಲೆದ ಆಜಿ ದಿನತ ಬಲಕೆ,ಆಜಿ ದಿನತ ಬಾಲೆದ ಒರುಂಬ ದಿನತ ಬಲಕೆ,ಅಂಚಿತ್ತಿ ಬಲಕೆ ಆ ಬಾಲೆಡ ತೋಜಿದ್ ಬರ್ಪುಂಡು.ಕೊರಗ ಜನಾಂಗೊಡು ಏಳೆಟ್ ಅಮೆ ಕರಿಪುವೆರ್.ಅಕ್ಲೆನೆಟ್ ಏಳೆಕ್ ಬಾರ್ಯಾತ್ ಮಾನಾದಿಗೆ ಉಂಡು.
ತನಿಯೆ ಆಣ್ ಬಾಲೆ ಆಯಿನರ್ದಾತ್ರ ಬಾಲೆದ ಅಮ್ಮೆ,ಅಜ್ಜೆರ್,ಕುಟುಮದಕ್ಲು,ಗುರಿಕಾರ್ರ್ ಇತ್ತ್ ದ್ ಕುಟುಮದ ಗುರಿಕಾರೆ ತನಿಯನ ಅಮ್ಮೆರ್ ಡ ಆಣ್ ಗಡಿ ತಾರಾಯಿ ಕೊರ್ಪೆರ್(ಇಡಿ ತಾರಾಯಿದ ಪುದರ್ ಪುಡತಿ ಬೊಕ್ಕ ಆಣ್ ಗಡಿ,ಪೊಣ್ಣು ಗಡಿ ಆಪುನವು ಇಸೇಸ).ಅವೆರ್ದ್ ಬೊಕ್ಕ ಅಮ್ಮೆರ್ಡ ಬಾಲೆದ ಪುದರ್ ಲೆಪ್ಪೆರೆ ಪನ್ಪೆರ್.ಅಮ್ಮೆ ಇಜ್ಜಂದಿ ಪೊರ್ತುಡು ಅಜ್ಜೆರ್ ಪುದರ್ ದೀಪುನಿ.ಪುದರ್ ದೀಪುನ ದುಂಬೇ ದಿನೊನು ಗುರ್ತ ಮಲ್ತ್ ದಿಪ್ಪುವೆರ್.ಬಾಲೆದ ರೂಪ,ಬಾಲೆದ ನಡಕೆ,ಬಾಲೆದ ಅಜ್ಜ ಅಜ್ಜಿನ ಪುದರ್ ತೂದು ಪರಂಪರೆರ್ದ್ ಇತ್ತ್ ನ ಪುದರ್ ನೇ ದೀಪೆರ್.ಸನಿವಾರದಾನಿ,ಪುಣ್ಣಮೆದಾನಿ ಬಾಲೆ ಪುಟ್ಟ್ ನೆರ್ದಾತ್ರ ತನಿಯೆಂದ್ ಪುದರ್ ಲೆತ್ತೆರ್.ಏಳ್ ದಿನತ ಅಮೆ ಕರಿ ಬೊಕ್ಕ ತನಿಯನ ಅಪ್ಪೆ ಕರಿದ್ ಪೋಪಲ್.ಕಟ್ಟುನಕುಲು ತನಿಯನ ಅಪ್ಪೆ ಪೆದ್ದ್ ನಾನಿ ತೀರ್ದ್ ಪೋತ್ ನಿಂದ್ ಪನ್ಪುನವು ಸರಿಯತ್ತ್.ಮೂಲ ಕಥೆ ತೆರಿಯಂದೆ ಅಕ್ಲೆರ್ದ್ ಈ ತಪ್ಪಾವೊಂದುಂಡು.ಬಾಲೆದ ಅಮೆ ಕರಿಪುನ ಏಳನೆ ದಿನತಾನಿ ತನಿಯನ ಅಪ್ಪೆ ಕೊರೊಪೊಲು ಕರಿದ್ ಪೋಪುನಿ.ಅಂಚನೆ ತನಿಯನ ಅಮ್ಮೆರ್ ತೀರ್ನಗ ತನಿಯೆ ನಲ್ಪ ದಿನತ ಬಾಲೆ.ಬಾಲೆ ತನಿಯೆ ಮೋನೆ ತೂದು ತೆಲಿಪುನ ಪೊರ್ತುಗು ಅಮ್ಮೆರ್ ತೀರ್ವೆರ್.ದುಂಬುಗು ಬಾಲೆ ತನಿಯನ ಜಬದಾರಿಕೆ ತನಿಯನ ಮಾಮಿ ಬೈಕಾಡ್ತಿಗ್ ತಿಕ್ಕುಂಡು.ಅಪ್ಪೆ ತೀರಿ ಬೊಕ್ಕ ತನಿಯಗ್ ಅಪ್ಪೆನ ಸ್ಥಾನ ದಿಂಜಯಿನಾಲ್ ತನಿಯನ ಮಾಮಿ ಬೈಕಾಡ್ತಿ.ತನಿಯೆ ಬುಳೆಯೊಂದಿಪ್ಪುನಗನೆ ತನಿಯನ ಅಜ್ಜಿ ಅಜ್ಜೆರ್ ಕರಿದ್ ಪೋಪೆರ್.ಬೊಕ್ಕ ತನಿಯೆ,ತನಿಯನ ಮಾಮಿ,ತನಿಯನ ತಮ್ಮಲೆ ಮೊಕ್ಲು ಮೂಜಿ ಜನ ಮಾತ್ರ ಒರಿಪೆರ್.ಮೊಕ್ಲು ತನಿಯನ್ ತನ್ನ ಬಾಲೆ ಪಂಡ್ ದೇ ಸಾಂಕುವೆರ್.ಬಾರೀ ಜಬದಾರಿಕೆಡ್ ತನಿಯನ್ ತಮ್ಮಲೆ ತಾಂಕೊಂದು ಬರ್ಪೆರ್.ಮಾಮಿಲ ಅಂಚನೆ ತನಿಯನ್ ಮಲ್ಲೆ ಮಲ್ತೊಂದೆ ಬರ್ಪೆರ್.ಪತ್ತನೆ ವರ್ಸೊಡು ತನಿಯನ ಇರ್ವನೆ ವರ್ಸದ ಬಲಕೆ ತೋಜುಂಡು.ಬಲಕೆ ಈ ರೀತಿ ಇತ್ತ್ಂಡಾಯನ.ಏಪ ತನಿಯೆ ಪಾತೆರ್ರೆ ಸುರು ಮಲ್ಪುವೆನಾ ಅಲ್ಪರ್ದ್ ಮಾಮಿಡ ಪ್ರಶ್ನೆ ಮಲ್ಪೆರೆ ಸುರು ಮಲ್ಪುವೆ.ಯಾನ್ ಏರ್?,ಎನ್ನ ಕುಟುಮ ಸಂಸಾರ ಓಲುಲ್ಲೆರ್ಂದ್ ಕೇನುವೆ.ಅಪಗ ಅಕುಲು ಎಂಕುಲೇ ನಿನ್ನ ಸಂಸಾರಂದ್ ಪನ್ಪೆರ್.ಎನ್ನ ಅಜ್ಜೆ ಅಜ್ಜಿನಕುಲು ಓಲುಲ್ಲೆರ್ಂದ್ ತನಿಯೆ ಪ್ರಶ್ನೆ ಮಲ್ಪುವೆ.ತನಿಯಗ್ ತನ್ನ ಬದ್ ಕ್ ಡ್ ದಾದನಾ ಆವೊಂದುಂಡುಂದು ಗೊತ್ತಾಯೆರೆ ಸುರಾಪುಂಡು.ಇಂಚ ಅಲಚನೆ ಬರ್ಪುನ ಕಾಲೊಡು ತನಿಯನ ತಮ್ಮಲೆಲಾ ಕರಿದ್ ಪೋಪೆರ್.ಬೊಕ್ಕ ತನಿಯನ ಪಾಲ್ ಗ್ ಒರಿಯುನಿ ಆಯನ ಮಾಮಿ ಬೈಕಾಡ್ತಿ ಮಾತ್ರ.
ಇಂಚ ಕಾಲ ಕರಿಲೆಕ ಒಂಜಿ ದಿನ ಮಾಮಿಡ ಅಪ್ಪೇ ಎಂಕೀರ್ ಕಥೆ ಪನೊಡುಂದು ತನಿಯೆ ಪನ್ಪೆ.ಪೂರ ಕಥೆನ್ ಪಂಡಿನ ತನಿಯನ ಮಾಮಿ ಈ ದಾಯೆಗ್ಲಾ,ಏರೆಗ್ಲ ಪೋಡ್ಯೊಡ್ಚಿ ಮಗಾ,ನಮಕ್ ದೇವೆರುಲ್ಲೆರ್,ತೆನ್ಕಾಯಿ ರಾಜ್ಯೊಡು ನಮನ್ ಕಾಪುನ,ನಮಕ್ ಸಕಾಯ ಮಲ್ಪುನ ಧರ್ಮಿಷ್ಠೆರುಲ್ಲೆರ್,ನಮ್ಮ ಸಂಸಾರದಕುಲ್ಲಾ ಉಲ್ಲೆರ್,ನಮ್ಮ ಅಪ್ಪೆ ಸಂತಾನದಕುಲು ತೆನ್ಕಾಯಿ ರಾಜ್ಯೊಡುಲ್ಲೆರ್ ಮಗಾಂದ್ ಮಾಮಿ ಪನ್ನಗ ಪೂರ ಇಚಾರೊನು ತನಿಯೆ ಮನಸ್ ಗ್ ದೆತೊನುವೆ.ಕೊರಗ ತನಿಯಗ್ ತೆನ್ಕಾಯಿ ರಾಜ್ಯ ತೂವೊಡುಂದಾಪುಂಡು.ಇಂಚಿ ಬರ್ಯೆರ್ಲಾ ಆಸೆ ಆಯಗಾಪುಂಡು.ಮಾಮಿಡ ದಿನೋಲ ಒಂಜತ್ತ್ ಒಂಜಿ ಪ್ರಶ್ನೆನ್ ತನಿಯೆ ಕೇನೊಂದಿಪ್ಪುವೆ.ಮಾಮಿ ಬೊಲ್ಪುಗು ಬೇಲೆಗ್ ಪೋಯೆರ್ಡ ಬಯ್ಯಗೆ ಕೊಪ್ಪೊಗು ಬರೊಂತ್ ನಿ.ಕೊಪ್ಪೊಡು ಮೊಕ್ಲು ರಡ್ಡೇ ಜನ ಇತ್ತ್ ನಿ,ಮಾಮಿ ಬೈಕಾಡ್ತಿ,ಮರ್ಮಾಯೆ ತನಿಯೆ.ತನಿಯೆ ಅಪ್ಪೆ ಪಂಡ ಮಾಮಿ ಪನ್ನೆನ್ ತಪ್ಪುಜೆ.ಅಪ್ಪೆಗ್ ವಿರುದ್ದವಾದ್ ಲ ನಡಪುಜೆ.ಮಾತೆರೆನ್ಲ ಒಂಜೇ ಲೆಕ್ಕ ತೂವೊಡು,ಮಾತೆರೆಡಲ ಎಡ್ಡೆಡೇ ಉಪ್ಪೊಡುಂದು ಅಪ್ಪೆ ತನಿಯಗ್ ಪಂಡ್ ದಿಪ್ಪುವೆರ್.ಅಕುಲು ಬೇತೆ,ನಮ ಬೇತೆಂದ್ ಎನ್ಯೆರೆ ಬಲ್ಲಿ,ನಮ್ಮ ಹಿರಿಯಾಕ್ಲ್ ಎಡ್ಡೆ ಕೆಲಸ ಮಲ್ತೊಂದು ಬೈದೆರ್,ನಮಲ ಎಡ್ಡೆ ಕೆಲಸನೇ ಮಲ್ಪೊಡು,ನಮನ್ ಮಾತೆರ್ಲ ಮೆಚ್ಚುಲೆಕಾವೊಡುಂದು ಮಾಮಿ ಬೈಕಾಡ್ತಿ ಮರ್ಮಯೆ ತನಿಯಗ್ ಪಂಡ್ ದಿಪ್ಪುವೆರ್.ಈ ಇಚಾರೊನು ಮಾತ ತನಿಯೆ ತರೆಟ್ ದೀಯೊಂದಿಪ್ಪುವೆ.ತನಿಯನ ಮಾಮಿಗ್ ಪೂರಾ ಬೇಲೆಲ ತೆರಿಯು.ಇಂಚಿರ್ದ್ ಸಾಗೊಳಿದ ಬೇಲೆಲ ಗೊತ್ತಿತ್ತ್ಂಡ್,ಅಂಚಿರ್ದ್ ಕುಲ ಕಸುಬುದ ಬೇಲೆಲಾ ಗೊತ್ತಿತ್ತ್ಂಡ್.ಸೀಕ್ ಗ್ ಪುಲ ಮರ್ದ್ ಲ ಕೊರೊಂತೆರ್,ಸೋಂಕುಗು ತಪ್ಪುಲಾ ಪಾಡೊಂತೆರ್.ಅರೆನ ಆ ಬೇಲೆನ್ ಪೂರಾ ತನಿಯೆಲ ಕಲ್ತ್ ದೆ.ಮಾಮಿ ತಮ್ಮಲೆ ದಾದ ಮಲ್ತೊಂತೆರ ಅಕ್ಲೆನ್ ತೂದು ತನಿಯೆ ಪೂರೆನ್ಲ ಕಲ್ತ್ ದೆ.ದೋಲು ಬೊಟ್ಟುನ,ಓಂಟೆ(ಪುರಲ್) ಉರಿಪುನ,ಕುರುವೆ,ಪುಡಾಯಿ ಮಲ್ಪುನ,ಸಾಗೊಳಿದ ಪೂರ ಬೇಲೆನ್ಲಾ ತನಿಯೆ ಕಲ್ತ್ ದೆ.ಆಯಗ್ ಗೊತ್ತಿಜ್ಜಂದಿನ ಬೇಲೆ ದಾಲ ಇಜ್ಜಾಂಡ್.ನಾಲ್ ಜನತ ಬೇಲೆನ್ ಒರಿಯೆ ಮಲ್ತೊಂತೆ.ಎಲ್ಯ ಪ್ರಾಯೊಡೇ ಆಯಡ ಆತ್ ತಾಕತ್ತ್ ಇತ್ತ್ಂಡ್.
ಇಂಚ ಕಾಲ ಕರಿಯೊಂದಿಪ್ಪುನಗ ಒಂಜಿ ದಿನ ಅಪ್ಪೆ ಬೈಕಾಡ್ತಿ ಇರ್ಲ್ ಅಮರ್ ನಗಲ(ಕತ್ತಲೆ-ಕತ್ತಲೆ ಬೂರ್ ನಗ)ಬರಂದೆ ಉಪ್ಪುನಗ ತನಿಯಗ್ ತರೆ ಬೆಚ್ಚ ಆಪುಂಡು.ಏಪಲಾ ಪೊರ್ತುಗು ಬರೊಂತಿ ಮಾಮಿ ದಾನೆ ನನಲಾ ಬೈಜೆರ್? ಅಲಚನೆಡೆ ಕುಲ್ಲೊಂದೆ.ಆನಿ ಅಮಾಸೆ ಬೇತೆ.ಆಯಗ್ ಮಾಮಿ ಬೆನೆರೆ ಪೋಪುನ ಜಾಗೆ ತೆರಿದಿತ್ತ್ಂಡಲ ಪೋಯೆರಾವಂದಿಲೆಕ ಕಣ್ಣ್ ಕುಟ್ಟ್ಂಡಲ ತೋಜಂದಿ ಕತ್ತಲೆ ಇತ್ತ್ಂಡ್.ಓಡೆ ಪೋಪುನಿಂದ್ ಲ ತನಿಯಗ್ ಗೊತ್ತಾಪುಜಿ.ಏತ್ ಇರ್ಲಾಂಡಲ ಮಾಮಿ ಬರಂದೆ ಉಪ್ಪುನಗ ತಮ್ಮಲೆನ ದೋಲು ದೆತೊಂದು ತನಿಯೆ ದೋಲು ಬೊಟ್ಟುವೆ.ಕೊರಗ ಜನಾಂಗದಕುಲು ಕೊಸಿಯಾನಗಲ ದೋಲು ಬೊಟ್ಟುವೆರ್,ಬೇಜರಾನಗಲ ದೋಲು ಬೊಟ್ಟುವೆರ್.ಮನಸ್ ಗ್ ಬೇನೆ ಆನಗ ದೋಲು ಬೊಟ್ಟುದು ಸಮದಾನ ಮಲ್ತೊನುವೆರ್.ಕೊಸಿ ಕ್ ದೋಲು ಬೊಟ್ಟುದು ನಲಿತೆರ್ಡ ಬೇನೆ ಮದಪರೆ ದೋಲು ಬೊಟ್ಟುವೆರ್.ಆಂಡ ಮೂಲು ತನಿಯೆ ಒರಿಯೆ ದೋಲು ಬೊಟ್ಟು ಬೊಟ್ಟುದು ನಲಿಪುವೆ.ಓಂಟೆ ಉರಿಪುವೆ.ಓಂಟೆ ಪಂಡ ಬೆದ್ ರ್ದ ಪುರಲ್.ಓಂಟೆ ಉರ್ತು ಉರ್ತುದು ಪೊರ್ತು ಪೋಯಿನ ತನಿಯಗ್ ಗೊತ್ತಾಯಿಜಿ.ಬಚ್ಚಿದ್ ಓಂಟೆನ್ ತನಿಯೆ ಬರಿಟ್ ದೀನಗ ಬೊಲ್ಪುದ ಕೋರಿ ಕೆಲೆಪುಂಡು.ಪುಲ್ಯಕಲದ ಕೋರಿ ಕೆಲೆಪುನಗಲ ಅಪ್ಪೆ ಬೈಜೆರ್ ಪಂಡ್ ದ್ ನನ ಯಾನೇ ಪೋಪೆ ಪಂಡ್ ದ್ ತಮ್ಮಲೆನ ಅಂಕೋಡಿನ್ ( ಸೊಂಟ ಪಟ್ಟಿನ್ ) ತನ್ನ ಸೊಂಟೊಗು ಕಟ್ಟೊನುವೆ.ಅಜಕುರುವೆನ್ ತನ್ನ ಪುಗೆಲ್ ಗ್ ಪಾಡೊನ್ವೆ.ಅಜಕುರುವೆ ಪಂಡ ಪುಗೆಲ ಕುರುವೆ.ಇನಿ ತನಿಯನ ಕೋಲೊಡು ಕೆಲವೊಂಜಿ ಕಟ್ಟುನಕುಲು ಅಜಕುರುವೆನ್ ಪುಗೆಲ್ ಗ್ ಪಾಡೊಂದಿಪ್ಪುವೆರ್.ತಮ್ಮಲೆ,ಅಪ್ಪೆ,ಮಾಮಿ ಒವು ಮಾತ ಮರ್ದ್ ಲೆನ್ ಕೊರೊಂತೆರ ಅವೆನ್ ಮಾತ ಕುರುವೆಗ್ ಪಾಡ್ವೆ.ರಡ್ಡ್ ಕತ್ತಿನ್ ಸೊಂಟೊಡು ದೀಯೊನ್ವೆ.ಅಂಚನೆ ತಮ್ಮಲೆನ ಓಂಟೆನ್ ಕುರ್ವೆದುಲಯಿ ಪಾಡೊನ್ವೆ.ತರೆಕ್ ಒಂಜಿ ಮೂಡೆ ದೀಯೊನ್ವೆ. ಕೊರ್ರ ಬಾಸೆ ಪಂಡ ಕೊರಗ ಬಾಸೆ.ಕೊರಗ ಬಾಸೆಡ್ ಮೂಡೆ ಪಂಡ ಮುಟ್ಟಾಲೆ.ಬೈಕಾಡ್ತಿ ಬೈಕಾಡಿ ಪನ್ಪಿ ಜಾಗೆಗ್ ಬೇಲೆಗ್ ಪೋವೊಂತ್ ನಿ.ಅಡೆಗ್ ತನಿಯೆ ಅಪ್ಪೆನ್ ನಾಡೊಂದು ಬರ್ಪೆ.ಬೈಕಾಡಿ ಬ್ರಹ್ಮಾವರ ಕೈತಲಿತ್ತ್ ನ ಜಾಗೆ.ಸೂರ್ಯ ದೇವೆರ್ ಉದಯಾಪುನ ಪೊರ್ತುಗು ಬೈಕಾಡಿಗ್ ತನಿಯೆ ಎತ್ವೆ.ಆಯೆ ಅಡೆಗ್ ಎತ್ತುನಾತ್ ಪೊರ್ತುಗಾನಗನೆ ಮಾಮಿ ಬೈಕಾಡ್ತಿ ಮಾಯ ಆದ್ ಆತ್ಂಡ್.ಆಯಗ್ ಇಡೀ ಪರ್ವತನೇ ತರೆಕ್ ಬೂರ್ಲೆಕಾಂಡ್.ದಾದ ಮಲ್ಪುನಿಂದೇ ಆಯಗ್ ಗೊತ್ತಾಯಿಜಿ.ಓಡೆಗ್ ನನ ಯಾನ್ ಪೋವೊಡು,ನನ ಯಾನ್ ಎಂಚಿನ ಮಲ್ಪೊಡು,ಒಂಜಿಲಾ ಆಯಗ್ ತರೆಕ್ ಪೋಪುಜಿ.ದಾಲ ದಿಕ್ಕ್ ದೆಸೆ ತೋಜಂದೆ ಅವ್ಲೆ ಬೂರ್ವೆ.ಆಯಗ್ ಪೂರಲ ಕಾಲಿ ಕಾಲಿಯಾದ್ ತೋಜುಂಡು.ಸುಮಾರ್ ಪೊರ್ತು ಮನಿಮಂಬಿಜ್ಜಂದೆ ಕುಲೊಂದಿಪ್ಪುವೆ. ಇಡೀ ಕುಟುಮ ಇತ್ತ್ ನ ತನಿಯೆ ಒರ್ಯೊರ್ಯನೇ ಕಳೆಯೊಂದು ಒರಿಯೆ ಒರಿನಗ ಆಯನ ಉಡಲ ಬೇನೆ ಎಂಚ ಉಪ್ಪುಂದು ಅನುಬಯಿಸಾಯಿನ ಆಯಗೇ ಗೊತ್ತು.
ಅಂಚ ತನಿಯೆ ಕುಲೊಂದಿಪ್ಪುನಗ ಆಯನ ಮಾಮಿ ಬೈಕಾಡ್ತಿ ಪಂಡಿ ಪಾತೆರ ಆಯಗ್ ನೆಂಪಾಪುಂಡು,ಅಪ್ಪೆ ಪಂಡಿ ಕಥೆ ನೆಂಪಾಪುಂಡು.ಮೂಲು ಅಪ್ಪೆಂದ್ ಆಯೆ ಲೆತ್ತೊಂತ್ ನಿ ಮಾಮಿನ್.ತೆನ್ಕಾಯಿ ರಾಜ್ಯೊಡು ಎಡ್ಡೆ ಜನೊಕುಲುಲ್ಲೆರ್,ಬೆನ್ಪುನಾತ್ ಬೇಲೆ ಉಂಡು,ಉನ್ಪುನಾತ್ ನುಪ್ಪು ಕೊರುವೆರ್,ಏರ್ಲಾ ನಮನ್ ದಕ್ಕ್ ದ್ ಪಾಡುನಕುಲು ಇಜ್ಜಿ,ನಮ್ಮ ಹಿರಿಯಾಕ್ಲು ಬಾಲೆನ್ ಪತ್ತ್ ಕೊರ್ದು ಆ ಬಾಲೆಲೆಗ್ ಬೇತೆ ಬೇತೆ ಪುದರ್ ದೀತೆರ್.ಅವು ಮೈರೆ ಆದಿಪ್ಪು,ಕೊರೊಪೊಲು ಆದಿಪ್ಪು,ತನಿಯೆ ಆದಿಪ್ಪು,ತುಕ್ರೆ,ಕೊರಗೆ,ಗುರುವೆ ಆದಿಪ್ಪು -ಇಂಚ ಪುದರ್ ದೀಯೊನ್ನ ಮಲ್ಲ ಮಲ್ಲ ಜನೊಕುಲು ತೆನ್ಕಾಯಿ ರಾಜ್ಯೊಡುಲ್ಲೆರ್.ಅಕುಲು ನಮನ್ ಸಾಂಕ್ವೆರ್,ನಮನ್ ದಕ್ಕ್ ದ್ ಪಾಡುಜೆರ್,ಅಕುಲು ನಮಕ್ ರಕ್ಷಣೆ ಕೊರ್ಪೆರ್ಂದ್ ಮಾಮಿ ಪಂಡಿ ಕಥೆ ತನಿಯಗ್ ನೆಂಪಾಪುಂಡು. ತಾನ್ ತೆನ್ಕಾಯಿ ರಾಜ್ಯೊಗು ಪೋಪೆಂದ್ ಮನಸ್ ಡ್ ಎನ್ನಿವೆ.ಅಲ್ತ್ ರ್ದ್ ಪಿದಾಡ್ ದ್ ಬತ್ತ್ ದ್ ಪೇರೂರು ಸುದೆ ಕಡತ್ ದ್ ಬರ್ಪೆ.ಪೇರೂರು ಸುದೆ ಕಡತ್ ಬನ್ನಗ ಕೊಡಂಗೆ ಬನ್ನಾರ್ರೆನ ಇಲ್ಲದ ಎದುರೇ ಪೋಪಿ ಬರ್ಪಿ ಸಾದಿ ಇತ್ತ್ ನಿ.ಇನಿತಲೆಕ ಅಪಗ ಸಾದಿ,ಸಂಕ ಪೂರಾ ಇಜ್ಜಾಂಡ್.
ಒಡಿಪು ಸಂತೆಕಟ್ಟೆರ್ದ್ ಎಡತ್ ಗ್ ಕೆಮ್ಮಾನ್ (ಪಂಡ ಒಡಿಪುದ ಹನುಮಂತ ನಗರೊರ್ದು ಉಲಯಿ ಪೋನಗ ಕೆಮ್ಮಾನ್ ) ಪನ್ಪಿ ಊರು ತಿಕ್ಕುಂಡು.ಕೆಮ್ಮಾನ್ ಡ್ ಕೊಡಂಗೆ ಬನ್ನಾರ್ರೆನ ಗುತ್ತು ಉಪ್ಪುಂಡು.ಇನಿಲಾ ಆ ಗುತ್ತು ಉಂಡು.ಕೊಡಂಗೆ ಬನ್ನಾರ್ರೆನ ಗುತ್ತುದಡೆಮುಟ್ಟ ಕೊರಗ ತನಿಯೆ ಒರಿಯೆ ಬರ್ಪುನಿ.ಅವ್ಲು ಗುತ್ತುದ ಜಾಲ್ ಡ್ ತನಿಯಗ್ ಬಬ್ಬುನ ಭೇಟಿಯಾಪುಂಡು.ಅಕ್ಲೆ ಇರ್ವೆರೆ ಬದ್ ಕ್ ಡ್ಲಾ ಅಪ್ಪೆ ಅಮ್ಮನ್ ಕಳೆಯೊನ್ನಕುಲು.ನನೊಂಜಿ ಮೂಲದ ಪ್ರಕಾರ ಮಾಮಿ ಬೈಕಾಡ್ತಿನ್ ಕಳೆಯೊನ್ನ ತನಿಯೆ ಪೇರೂರ(ಹೇರೂರು) ತುದೆ ಕಡತ್ ದ್ ಕಡಲ ಕರೆತ ತಾದಿಯೆ ತೆನ್ಕಾಯಿದಂಚಿ ಪೋವೊಂದಿಪ್ಪುವೆ.ಅಪಗ ತನಿಯೆ ತನ್ನಲೆಕನೆ ಗಟ್ಟಿದ ಜೂವದ ಒರಿಯನ್ ತೂಪೆ.ಆ ಜವನೆ ತನಿಯಡ ಈ ಏರ್,ಈ ದೂರ ಪೋಪುನಿಂದ್ ಇಚಾರ ಮಲ್ಪುವೆ.ಅಡೆಮುಟ್ಟ ಕಣದುಃಖೊಡು ಬರೊಂತ್ ನ ತನಿಯೆ ಆಯಡ ತನ್ನ ಬದ್ ಕ್ ಡ್ ನಡತಿನ ಇಚಾರೊನು ತೆರಿಪಾವೆ.ಯಾನ್ ಬಡಕಾಯಿ ಬಾರ್ಕೂರ ಗಡಿಡ್ದ್ ಬೈದ್ ನಾಯೆ,ಮಂಗ್ಳೂರ ಗಡಿಕ್ ಪೋವೊಂದುಲ್ಲೆಂದ್ ಪನ್ಪೆ.ಈ ಏರ್ಂದ್ ಬಬ್ಬು ಕೇನ್ನಗ ಯಾನ್ ಕಾಡಿನಾಯೆ ಕೊರಗತನಿಯೆಂದ್ ಪನ್ಪೆ.ತನಿಯೆ ಬಬ್ಬುಡ ಈ ಏರ್ಂದ್ ಕೇನ್ನಗ ಬಬ್ಬು ಪನ್ಪೆ,ಎನ್ನ ಪುದರ್ ಬಬ್ಬು.ಉಂದೇ ಊರುಡು ಯಾನುಲ್ಲೆ.ಎನ್ನ ಅಪ್ಪೆನ ಇಲ್ಲ್ ಕಚ್ಚೂರುಂದು ಪನ್ಪೆ.ಯಾನ್ಲಾ ತೆನ್ಕಾಯಿ ರಾಜ್ಯೊಗು ಪೋವೊಂದುಲ್ಲೆ,ತೆನ್ಕಾಯಿ ರಾಜ್ಯೊಡು ಭಾರೀ ಧರ್ಮ ಉಂಡುಗೆ,ಅಧರ್ಮೊಗು ಧರ್ಮ ಸಾರೊಡು ಪನ್ಪಿ ಆಸೆ ಎಂಕುಂಡು,ಅಂಚ ಯಾನ್ಲಾ ತೆನ್ಕಾಯಿ ರಾಜ್ಯೊಗು ಪೋವೊಂದುಲ್ಲೆಂದ್ ಬಬ್ಬು ತನಿಯಡ ಪನ್ಪೆ.ಅಂಚ ಒಟ್ಟುಗು ಇರ್ವೆರ್ಲ ಉದ್ಯಾವರ ಸುದೆತಡೆಮುಟ್ಟ ಬರ್ಪೆರ್.ಉದ್ಯಾವರ ತುದೆತೌಲು ಬಬ್ಬು ತನಿಯಡ ಈ ದುಂಬು ಪೋಲ,ಯಾನ್ ಪಿರವುಂತುವೆಂದ್ ಪನ್ಪೆ.ಅವೆಕ್ ತನಿಯೆ ದಾಲಾ ಪ್ರಶ್ನೆ ಮಲ್ಪುಜೆ.ಮಂಗ್ಳೂರ ಗಡಿಟ್ ಮಾಯದ ಭೇಟಿಯಾಕಂದ್ ಬಬ್ಬುಡ ತನಿಯೆ ಪಂಡ್ ದ್ ತನಿಯೆ ದುಂಬುಗು ಪಿದಡ್ವೆ.ಕಾಪುಡು ಬಬ್ಬು ಪಿರ ಉಂತ್ವೆ.ತನಿಯೆ ದುಂಬು ಬರ್ಪೆ.ತನಿಯೆ ಕಾಪುದಡೆ ಬನ್ನಗ 7 ಮಲೆತ 7 ಜಿಡೆತ ಸಂಕಮಾಲೆ ಸಾದಿಡ್ ಜೆತ್ತ್ ದುಪ್ಪುವೆ.ಅವು ತನಿಯಗ್ ದೂರೊಡೇ ತೆರಿಯುಂಡು.ಉಚ್ಚುದ ಕೈತಡೆ ಬತ್ತ್ ನ ತನಿಯೆ,ಯಾನ್ ಬಡಕಾಯಿ ರಾಜ್ಯೊರ್ದು ತೆನ್ಕಾಯಿ ರಾಜ್ಯೊಗು ಪೋಯೆರೆ ಬತ್ತ್ ದೆ,ಎಂಕ್ ಸಾದಿ ಬುಡ್ಲಂದ್ ಕೇನುವೆ.ಮೂಜಿ ಸರ್ತಿ ಸಾರ್ದ್ ಪನ್ನಗಲ ಉಚ್ಚು ಪಂದುಜಿ.ಕೋಪ ಬತ್ತ್ ನ ತನಿಯಗ್ ಅಂಚಿಂಚಿ ತೂನಗ ನೆಡಿಲ್ದ ಬೂರು ತೋಜುಂಡು.ಸೀದಾ ಪೋದು ಸೊಂಟದ ಅಂಕೋಡಿಡ್ದ್ ಕತ್ತಿ ದೆತ್ತ್ ದ್ ನೆಡಿಲ್ ಬೂರು ಕಡ್ಪುವೆ.ನೆಡಿಲ್ದ ಬೂರು ತೂವೆರೆ ಪದ್ಪೆದ ದಂಟ್ ದಲೆಕ ಉಪ್ಪುಂಡು.ಹಾಕ್ ನಗ ಪಲ್ಕುಂಡು.ನೆಡಿಲ್ದ ಬೂರುದ ಪೆಟ್ಟ್ ಕಾಯುನಿ ಜಾಸ್ತಿ.ಕೊರಗ ಜನಾಂಗದ ಬೇಲೆಗ್ ಒದಗುನ ಬೂರವು.ನೆಡಿಲ್ದ ಬೂರುಡು ಆ ಉಚ್ಚುನು ಮುಗಿತ್ ದ್ ಬುಡ್ಪೆ." ಇನಿರ್ದ್ ಬೊಕ್ಕ ಇಡೀ ಎನ್ನ ಕುಲ ಜಾತಿಗ್ ಒವ್ವೇ ಒಂಜಿ ಇಸ ಜಂತುದ ದೋಸ ಇಜ್ಜಿ " ಪನ್ಪೆ.ಮೂಜಿ ಸರ್ತಿ ಎನ್ನ ಕುಲ ಬರಿತಕುಲು ಸಾರುವೆರ್.ಮೂಜಿ ಸರ್ತಿ ಎನ್ನ ಕುಲಬರಿತಕುಲು ಸಾರ್ನಗ ಸಾದಿ ಬುಡ್ಜಿಂಡ ನಿನ್ನ ಕುಲತ ಇಸ ಜಂತುಲೆನ ಕಥೆ ಮುಗಿತೆರ್ಡ ಅವೆರ್ದ್ ಬೊಕ್ಕ ಬರ್ಪುನ ಒವ್ವೇ ದೋಸ ಇನಿರ್ದ್ ಬೊಕ್ಕ ಎನ್ನ ಕುಲ ಬರಿಕ್ ಇಜ್ಜಿಂದ್ ತನಿಯೆ ಪನ್ಪೆ.
ಏಳ್ ಮಲೆ,ಏಳ್ ಜಿಡೆತ ಸಂಕಮಾಲೆನ್ ಮುಗಿತ್ ನ ತನಿಯೆ ಸೀದಾ ಕಾಪುದ ತನ್ನ ಸಮುದಾಯದಕ್ಲೆನ ಇಲ್ಲಡೆ ಪೋಪೆ.ಕಾಪುಡು ತನಿಯನ ಅಮ್ಮೆ ಓಡಿನ ಕುಟುಮ ಇತ್ತ್ ದ್ ಅಡೆಗ್ಲಾ ಬತ್ತ್ ದ್ ಒಂಜಿ ಇರ್ಲ್ ಅವ್ಲು ಇತ್ತ್ ದ್ ಪೋಪೆ.ಮೂಲೆ ಕುಲ್ಲಂದ್ ಕಾಪುದಕುಲು ಪನ್ನಗ,ಇಜ್ಜಿ,ಎನ್ನ ಬೇಲೆ ಮಸ್ತ್ ಉಂಡು,ಎನ್ನ ಬೇಲೆ ಆಯಿ ಸಾತ್ ಗ್ ಯಾನ್ ನಿಕ್ಲೆಗ್ ತಿಕ್ವೆಂದ್ ಪನ್ಪೆ.ದುಂಬುಗು ಅವ್ಲವ್ಲು ಉಂತುದು ಬೇತೆ ಬೇತೆ ತಿಕ್ ಡ್ ಬಾಜೆಲ್ ಕೇನೊಂದು ಬರ್ಪೆ.ಬತ್ತ್ ಬತ್ತ್ ದ್ ಕಡೇಕ್ ಮಂಗ್ಳೂರ ಗಡಿಕ್ ಬರ್ಪೆ.ಅವು ಓಲು ಪನ್ಪುನ ಸ್ಪಷ್ಟತೆ ಈ ಜನಾಂಗದ ಕಥೆಟಿಜ್ಜಿ.ಕೆಲವೊಂಜಿ ಮೂಲದ ಪ್ರಕಾರ ಕೊರಗತನಿಯನ ಕಥೆ ಪಣಂಬೂರ ಪಟ್ಟಸಾಲೆರ್ದ್ ಸುರಾಪುಂಡು.ಆಂಡ ಪಣಂಬೂರುಡು ಕೊರಗ ತನಿಯನ ಅಮ್ಮೆರ್ನ ಕುಟುಮದ ಇಲ್ಲ್ ಇತ್ತ್ಂಡ್.ಆಂಡ ಕೊರಗ ತನಿಯನ ಕಥೆಟ್ ಬರ್ಪುನ ಆನಿದ ಪಣಂಬೂರು ಕಡಲ್ದಡಿಟ್ ಉಂಡುಗೆ.ಕಡಲ್ ಏತೋ ದೂರ ಬೂಮಿನ್ ನಿಂಗೊಂದು ಬೈದ್ಂಡ್ ಗೆ.ಕೊರಗತನಿಯೆ ಅಮ್ಮೆರ್ ಓಡಿನ ಪಣಂಬೂರು ಪಟ್ಟಸಾಲೆಗ್ ಬೈದ್ ನವು ಸತ್ಯ.ಆನಿದ ಪಣಂಬೂರ್ದ ಕೊರಗೆರಿತ್ತಿ ಜಾಗ್ ಕಡಲ್ದ ಅಡಿಟುಂಡುಗೆ.ಇತ್ತೆದ ಪಣಂಬೂರುಡು ಉಂದು ತಿಕ್ಕುಜಿ.ಒಂಜಿ ಕಾಲೊಡು ಪಣಂಬೂರುದ ಆ ಜಾಗೆಡ್ ಬಾರ್ಯಾತ್ ಕೊರಗ ಜನಾಂಗದ ಕುಟುಮೊಲಿತ್ತ್ ದ್ ಕೊರಗತನಿಯನ ಅಮ್ಮೆರ್ನ ಕುಟುಮದಕುಲು ಅವ್ಲಿತ್ತೆರ್.ಪೋನಗ ಅಡೆಗ್ಲಾ ಪೋಯಿಂದ್ ತನಿಯೆ ಪಣಂಬೂರ್ದ ಪಟ್ಟಸಾಲೆಗ್ ಬತ್ತ್ ದ್ ಪೋಪೆ.ಇಂಚ ತನಿಯೆ ಸಾದಿಡೆ ಪೋವೊಂದಿಪ್ಪುನಗ ಮೈರೆ ಬೈದ್ಯೆದಿ ಕಡ್ಯಡ್ ಕಲಿ ತಂಬೊಂದು ಪೋಪುನ ಸಾದಿಡ್ ತನಿಯಗ್ ತಿಕ್ವೆರ್.ಕೊರಗ ಜನಾಂಗದ ಕೊರಗ ತನಿಯನ ಕತೆಟ್ ಕಲ್ಲ ಪಾಪು-ಕಲ್ಲಾಪುದ ಇಚಾರ ಆವಡ್,ಕದ್ರಡ್ದ್ ಬೆದ್ರಗ್ ಕಲಿ ಕೊನೊಪುನ ಇಚಾರ ಆವಡ್ ಬರ್ಪುಜಿ.ಕೊರಗತನಿಯನ ಕೊರಗಜನಾಂಗದ ಕತೆಟ್ ನಿರ್ದಿಷ್ಟ ಜಾಗೆದ ಬಗೆಟ್ ಪಂತ್ ಜೆರ್. ಮುಲ್ತ ಪಾಡ್ದನೊಡು ಇತ್ತಿ ಇಚಾರ ಕೊರಗ ಜನಾಂಗದ ಮೂಲ ಕಥೆಟ್ ಇಜ್ಜಿ.ಬಡಕಾಯಿ ರಾಜ್ಯೊರ್ದು ತೆನ್ಕಾಯಿ ರಾಜ್ಯ,ಬಾರ್ಕೂರ ಗಡಿಡ್ದ್ ಮಂಗ್ಳೂರ ಗಡಿಂದೇ ಮೂಲ ಕಥೆಟ್ ಉಪ್ಪುನಿ.ಅಂಚನೆ 7-8ವರ್ಸ ಪ್ರಾಯೊಡು ಕೊಪ್ಪ ಬುಡ್ದು(ಎಲ್ಯ ಪ್ರಾಯ ಆಂಡಲ ಪ್ರಾಯೊನು ಮೀರ್ನ ಗೇನ ತನಿಯನವು.ಅಂಚಾದ್ ತನಿಯೆ ದೈವತ್ವೊನು ಪಡೆದ್ ಮಾತೆರೆನ ರಕ್ಷಣೆಗುಂತುದೆ) ಪಿದಡ್ನ ತನಿಯೆ 7 ಇರ್ಲ್7ಪಗೆಲ್ಡ್ ಮಂಗ್ಳೂರು ಗಡಿನ್ ದಾಂಟ್ವೆ.ಅಪ್ಪೆ ಪಂಡ ಮಾಮಿ ಬೈಕಾಡ್ತಿ ಪಂಡಿನ ಪುದರ್ದಕ್ಲೆನ್ ಆನಿ ಎಂಚ,ಇನಿ ಎಂಚಂದ್ ತನಿಯೆ ಪರೀಕ್ಸೆ ಮಲ್ತೊಂದೆ ಬೈದೆ.ಅಪ್ಪೆ ಪಂಡಿ ಪುದರುಲು ಪೂರ ಆಯಗ್ ನೆಂಪಿತ್ತ್ಂಡ್.ಎನ್ನ ಹಿರಿಯಾಕ್ಲು ಅಕ್ಲೆಗ್ ಪುದರ್ ದೀದ್ ಅಕ್ಲು ಎಡ್ಡೆ ಗುಣ ನಡತೆಡ್ ನಡತೊಂದು ಬೈದೆರಾ,ಇನಿ ಎಂಚ ಗುಣನಡತೆಡ್ ಉಲ್ಲೆರ್ಂದ್ ತನಿಯೆ ಪರೀಕ್ಸೆ ಮಲ್ತೊಂದೇ ಬೈದೆ.ಆಂಡ ಓಲ್ಲಾ ಯಾನ್ ಗುಣ ನಡತೆ ಪರೀಕ್ಸೆ ಮಲ್ಪೆರೆ ಬೈದ್ ನಿಂದ್ ಪಂತ್ ಜೆ.
ಇಂಚ ತನಿಯೆ ನಡತೊಂದು ಬನ್ನಗ ಕೊರಗ ತನಿಯನ್ ತೂಯಿ ಮೈರೆ ಬೈದುಲು ,ಈ ಏರ್,ಈ ದೂರ ಪೋಪಿನಾಯೆಂದ್ ಕೇನುವೆರ್.ಅರೆನೊಟ್ಟುಗು ಅಪಗ ಅರೆನ ಮಗೆ ಚೆನ್ನಯ ಬೈದ್ಯೆಲ ಇತ್ತೆ.ತನಿಯೆ ಮೈರೆ ಬೈದುಲ್ಡ ಪನ್ಪೆ,ಯಾನ್ ಕಾಡಿನಾಯೆ,ಕೊರಗತನಿಯೆ,ಬಡಕಾಯಿ ರಾಜ್ಯೊರ್ದು ತೆನ್ಕಾಯಿ ರಾಜ್ಯೊಗು ಬತ್ತೆ.ಏರ್ ಬೆನ್ಪಿನಾತ್ ಬೇಲೆ ಕೊರ್ಪೆರಾ,ಉನ್ಪುನಾತ್ ನುಪ್ಪು ಕೊರ್ಪೆರಾ ಅಕ್ಲೆ ಇಲ್ಲಡೆ ಪೋಪೆಂದ್ ತನಿಯೆ ಪನ್ಪೆ.ಮೈರೆ ಬೈದ್ಯೆದಿಡ ಅಪ್ಪೆರೆ,ಇರೆನ ಪುದರ್ ದಾದಂದ್ ತನಿಯೆ ಕೇನುವೆ.ಅಪಗ ಆರ್ ಎನ್ನ ಪುದರ್ ಮೈರೆ ಬೈದ್ಯೆದಿಂದ್ ಪನ್ಪೆರ್.ಅಪಗ ತನಿಯಗ್ ಮಾಮಿ ಬೈಕಾಡ್ತಿ ಪನ್ನ ಪಾತೆರ ಸತ್ಯಂದ್ ತೋಜುಂಡು.ಮೈರೆ ಬೈದ್ಯೆದಿ ತನಿಯಡ ನಮ್ಮ ಇಲ್ಲಡೆ ಬರುವನಾಂದ್ ಕೇನ್ನಗ ತನಿಯೆ ಬರ್ಪೆಂದ್ ಪನ್ಪೆ.ಮೈರೆ ಪನ್ಪುನಕುಲು ಲೆತ್ತ್ಂಡ,ಯಾನಡೆ ಪೋಂಡ ಪೊರ್ಲುಡೆ ಎನನ್ ತೂವೆರ್ಂದ್ ತನಿಯಗ್ ನಂಬಿಕೆ ಇತ್ತ್ಂಡ್.ಅಂಚ ಅರೆನೊಟ್ಟುಗು ತನಿಯೆ ಎನ್ಸೂರು/ಎಲ್ಸೂರ ಬರ್ಕೆಗ್ ಪೋಪೆ.ಸುಮಾರ್ 10 ವರ್ಸದಾತ್ ಕಾಲ ತನಿಯೆ ಎಲ್ಸೂರ ಬರ್ಕೆಡ್ ಬೆನೊಂದಿಪ್ಪುವೆ.
................
ಎಲ್ಸೂರ ಬರ್ಕೆ
ಕೊರಗ ಸಮುದಾಯದ ನಂಬಿಕೆ ಪ್ರಕಾರ ಎಲ್ಸೂರ ಬರ್ಕೆ ಬಂಟಾಲ ತಾಲೂಕುದ ಸುಲ್ಲಮಲೆ-ಬಲ್ಲಮಲೆ,ಅನಂತಾಡಿದ ಆಸ್ ಪಾಸ್ ಡ್ ಇತ್ತ್ಂಡ್ ಗೆ.ಎಲ್ಸೂರ ಬರ್ಕೆಗ್ಲ ಕುತ್ತಾರ್ ಗ್ಲ ಮುಟ್ಟ ಉಲಸಾದಿ ಇತ್ತ್ಂಡ್ ಗೆ.ಆಂಡ ಮೂಲು ಅಕುಲು ಪನ್ಪುನ ಎಲ್ಸೂರ ಬರ್ಕೆದ ಮಾಯಿತಿ ತಿಕ್ಕೊಂದಿಜ್ಜಿ.ಆಂಡ ಮೈರೆ ಬೈದುಲ್ನಲ್ತ್ ಪಿದಡ್ದ್ ಬತ್ತ್ ನ ತನಿಯೆ ಸುಲ್ಲ ಮಲೆಟ್ ತನ್ನ ಕುಲ ಕಸುಬು ಮಲ್ತೊಂತೆ,ಅಡೆಗ್ ತನಿಯನ್ ನಾಡೊಂದು ಬತ್ತಿ ಮೈರೆ ಬೈದುಲು ಆಯನ್ ಒಪ್ಪಿಸಾದ್ ಕುಡ ಎಲ್ಸೂರ ಬರ್ಕೆಗ್ ಲೆತೊಂದು ಪೋಯೆರ್ ಪನ್ಪಿ ಉಲ್ಲೇಖ ಮೂಲ ಕಥೆಟುಂಡು.ಎಲ್ಸೂರ ಬರ್ಕೆ ಕಾಲಾಂತರೊಡು ಇಜ್ಜಂದೆ ಆದಿಪ್ಪೊಡು.ದುಂಬು ಅನಂತಾಡಿ ಆಸ್ ಪಾಸ್ ದ ಊರುದ ಜನೊಕುಲು ದಾದಾಂಡಲ ಎಡ್ಡೆ ಕೆಲಸೊಗು ಜಪ್ಪುನಗ ಸುಲ್ಲಮಲೆಕ್ ಕೈ ಮುಗಿಪುನ ಕಟ್ಟಿತ್ತ್ಂಡ್ ಗೆ.ಇನಿಲಾ ಅವು ಅವ್ಲವ್ಲು ತೋಜಿದ್ ಬರ್ಪುಂಡು.ಜಾರ್ದೆ ತಿಂಗೊಲ್ಡು ಅನಂತಾಡಿ ಆಸ್ ಪಾಸ್ ದ ಊರುಲೆಗ್ ಕೊರಗತನಿಯಗ್ ಕಟ್ಟ್ ದ್ ಕಂಬುಲ ಕೋರಿಗ್ ಲೆಪ್ಪೆರೆ ಪೋಯೆರೆ ಉಂಡು.ಅಪಗ ಇಲ್ಲದಕುಲು ತನಿಯಗ್ ಬಡವು ಆಸರ್/ಬಾಜೆಲ್ ಪೂರ ಕೊರ್ದು ಮಾನಾದಿಗೆ ಮಲ್ಪುನ ಕೆರಮ ಉಂಡು.ಈತೊಂಜಿ ಸಾಕ್ಷಿಲು ಕೊರಗ ತನಿಯನ ಬಗೆಟ್ ತಿಕ್ ನಗ ಕೊರಗ ಜನಾಂಗದ ಮೂಲ ಕತೆಟ್ ಬರ್ಪುನ ಎಲ್ಸೂರ ಬರ್ಕೆ ಮೂಲೇ ಆಂಚಿಂಚಿದ ಊರುಡು ಇತ್ತ್ ದಿಪ್ಪು.ಕಾಲಾಂತರೊಡು ಅವು ಅರಿಗಿರಿದ್ ಪೋದಿಪ್ಪು.
ಪೊಲಬು - ಸುಂದರ ಕೊರಗ(ಹಿರಿಯಾರ್)
.................
ನನೊಂಜಿ ಮೂಲದ ಪ್ರಕಾರ,ಕೊರಗ ತನಿಯನ ಕಥೆಟ್ ಬರ್ಪುನ ಎಲ್ಸೂರ ಬರ್ಕೆದ ಇಚಾರ ಇಂಚ ಬರ್ಪುಂಡು.ಒಂಜಿ ಮೂಲದ ಪ್ರಕಾರ ಕಾರ್ಲದ ಕೈತಲ್ದ ಕುಕ್ಕುಂದೂರುರ್ದು ಬೈಲೂರ ಸಾದಿಡೆ 2 ಮೈಲ್ ದಾತ್ ದೂರ ಪೋನಗ ಕುಕ್ಕುಂದೂರು ಬರ್ಕೆ ತಿಕ್ಕಂಡು.ಉಂದೆನ್ ಇತ್ತೆ ಮುಲ್ಕಿಬೆಟ್ಟು ಬರ್ಕೆಂದ್ ಪನ್ಪೆರ್.ಆಂಡ ಮೂಲೊಡು ಉಂದು ಎಲ್ಸೂರ ಬರ್ಕೆ ಆದಿತ್ತ್ಂಡ್ಂದ್ ಪನ್ಪೆರ್.ಒಂಜೆ ಪುದರ್ದ ಗುತ್ತು ಬರ್ಕೆಲು ಸಾಮಾನ್ಯವಾದ್ ದೂರ ದೂರದ ಊರುಡು ಉಪ್ಪೆರ್ಲ ಯಾರು.ದಾಯೆ ಪಂಡ ಒಂಜಿ ಗುತ್ತು ಬರ್ಕೆದ ಕುಟುಮದ ಏರಾಂಡಲ ಬೇತೆ ಊರುಗು ಪೋನಗ ಮೂಲ ಗುತ್ತು ಬರ್ಕೆದ ಪುದರ್ ನ್ ದೀಯೊನೆರೆಲ ಯಾರು..ಕುಕ್ಕಂದೂರ ಬರ್ಕೆದಕ್ಲೆಗ್(ಎಲ್ಸೂರ ಬರ್ಕೆ) ಊರ್ದ ಉಲ್ಲಾಲ್ದಿನ ಸಾನದ ಮಾಡ್ ಗ್ ವರ್ಸಲ ಮುಳಿ ಬೇಪುನ ಹಕ್ಕ್ ತಿಕ್ಕ್ ನೆರ್ದಾದ್ ಕುಕ್ಕುಂದೂರ ಬರ್ಕೆ ದುಂಬುಗು ಊರ್ದ ಉಲ್ಲಾಲ್ದಿನ ಸಾನದ ಮಾಡ್ ಗ್ ಮುಳಿಬೇಪುನ ಬರ್ಕೆದ ಪುಗಾರ್ತೆಡ್ ಮುಲ್ಕಿಬೆಟ್ಟು ಬರ್ಕೆಯಾಂಡ್.1977ನೇ ಇಸ್ವಿದ ಅಮೃತ ಸೋಮೇಶ್ವರೆರ್ನ ಪಾಡ್ದನ ಸಂಗ್ರಹೊಡು ದೇರ್ಲಕಟ್ಟೆ ಕುತ್ತಾ್ ದಾರ್ ಪಂಡಿ ಪಾಡ್ದನೊಡು ಒಂಜಿ ಇಚಾರ ಬರ್ಪುಂಡು.ದಾದ ಪಂಡ ಪಾಡ್ದನ ಪಂಡಿನಾರ್ ಪಂಡಿ ಪಾಡ್ದನದ ಉಲ್ಲೇಖದ ಪ್ರಕಾರ-"ಕಾರ್ಲ ಕುಕ್ಕಂದೂರು ಮುಲ್ಕಿಬೆಟ್ಟು ಬರ್ಕೆ" ಪನ್ಪಿ ಉಲ್ಲೇಖ ಉಂಡು.ಅವ್ವೆ ತನಿಯನ ಕಾಲದ ಕುಕ್ಕುಂದೂರು ಬರ್ಕೆ.ಇನಿತ ಮುಲ್ಕಿಬೆಟ್ಟು ಬರ್ಕೆಯಾದ್ ಅವ್ಲು ತನಿಯನ್ ನಂಬಿನ ಕಟ್ಟೆ ಮೂಲರೂಪೊಡೆ ಉಂಡು.ಆ ಪಾಡ್ದನೊಡು ಉಲ್ಲೇಖ ಆತಿನ ಗೋಸಂಪಗೆದ ಮರ ಇತ್ತೆಲಾ ಅವ್ಲುಂಡು.ಕೊರಗತನಿಯೆ ಕದ್ರಡ್ದ್ ಬೆದ್ರೊಗು ಕಲಿ ತಂಬೊಂದು ಬರೊಂತೆ ಪನ್ಪಿ ಉಲ್ಲೇಖ ಉಂಡು.ಕಾಂತಾವರದ ಸುತ್ತಮುತಲಿಕೆದ ಕಾಡ್ ಲೆಡ್ ಕೊರಗ ಜನಾಂಗದಕುಲು ಬದ್ ಕೊಂತೆರ್.ಕಾಂತೇಶ್ವರ ದೇವೆರ್ಲಾ ತಿಕ್ ದ್ ನಿ ಈ ಜನಾಂಗದ ಹಿರಿಯ ಪೊಂಜೊವುಗು.ಇನಿಕಾನಗ ಕಟ್ಟುನಕ್ಲೆ ಪಾಡ್ದನ ತರೆರ್ದ್ ತರೆ,ಬಾಯಿರ್ದ್ ಬಾಯಿಗ್ ಪರತ್ ದ್ ಬನ್ನಗ ಬದಲಾವೊಂದು ಪೋತ್ಂಡ್.ಕಥೆ ಎತ್ತೇಸ ಆದ್ ಪೋತ್ಂಡ್.ಕೊರಗ ತನಿಯನ ಪಾಡ್ದನೊಡು "ಗುಡ್ಡೆ ಕುಕ್ಕುಂದೂರು,ಮುಲ್ಕಿಬೆಟ್ಟುಮೂಲ ಬೇಲೊಟ್ಟು ಸಾನ"ಪಂಡ್ ದ್ ಬರ್ಪುಂಡು.
ಪೊಲಬು:ಸುಧೀರ್ ಕುಕ್ಕುಂದೂರು
..................
ಕೊರಗ ಜನಾಂಗದ ಮೂಲ ಕತೆತ ಪ್ರಕಾರ ಕಾರ್ಲ ಕುಕ್ಕುಂದೂರುಡು ಎಲ್ಸೂರ ಬರ್ಕೆದ ಸಂಬಂದದಕುಲಿಪ್ಪುವೆರ್.ಅಲ್ತ ಕುಟುಮದ ನೇಮೊಗಾ ಕೋಲೊಗಾ ಅವ್ಲು ಸಿರಿ ಪಿಂಗಾರ ದೆಪ್ಪೆರೆ ಜನ ತಿಕ್ಕುಜಿ.ಅಂಚ ಅಕುಲು.ಅಡೆ ತನಿಯನ್ ಸಿರಿ ಪಿಂಗಾರ ದೆಪ್ಪುನ ಬೇಲೆಗ್ ಲೆತೊಂದು ಪೋಪೆರ್.ಅಲ್ತ ಬೇಲೆ ಆದ್ ತನಿಯೆ ಎಲ್ಸೂರ ಬರ್ಕೆಗ್ ಬರ್ಪೆ ಪನ್ಪಿ ಇಚಾರ ಕೊರಗ ಜನಾಂಗದ ಕತೆಟುಂಡು.ಅಕುಲ್ನ ಕತೆಟ್ ಕಾರ್ಲ ಕುಕ್ಕುಂದೂರ ಬರ್ಕೆ-ಮುಲ್ಕಿಬೆಟ್ಟು ಬರ್ಕೆನೇ ಎಲ್ಸೂರ ಬರ್ಕೆಂದ್ ಬರ್ಪುಜಿ.ಜಾಮಂದ ಮಲೆಂದ್ ತನಿಯನ ಪಾಡ್ದನೊಡು ಬರ್ಪುಂಡು.ಉಂದೆನ್ ಕೊರಗ ತನಿಯನ ಮೂಲಂದ್ ಲ ಪನ್ಪೆರ್.ಆಂಡ ಕೊರಗ ತನಿಯೆ ಪುಟ್ಟ್ ನ ಜಾಗೆ ಬಾರಕೂರ ಕೈತಲ್ದ ಕೊರ್ರೆಪಾಡಿ ಪನ್ಪನವು ಸತ್ಯ.
...................
ಮುಲ್ತ ಕಟ್ಟುನಕುಲು ತನಿಯೆ ಮೈರೆ ಬೈದುಲ್ನಡೆ ಬನ್ನಗ ಆಯನ ಮಾನ ತೋಜೊಂತ್ಂಡ್, ತನಿಯಗ್ ಸೊಂಟೊಗು ಸುತ್ತೆರೆ ಕುಂಟು ಮೈರೆ ಬೈದುಲು ಕೊರ್ನಿಂದ್ ಪನ್ಪೆರ್.ಆಂಡ ಕೊರಗ ಜನಾಂಗದ ಮೂಲ ಕತೆಟ್ ಮೈರೆ ಬೈದುಲು ತುಂಬೊಂತ್ ನ ಕಡ್ಯದಡಿತ ತೆರಿಯೆ(ಬೈರಾಸ್)ನ್ ತನಿಯಗ್ ಕೊರ್ಪೆರ್.ಆರ್ ಕೊರ್ನ ಬೈರಾಸ್ ನ್ ತನಿಯೆ ತೆರಿಯೆದಲೆಕ ಮಲ್ತ್ ದ್ ಮಂಡೆಗ್ ತರೆತ್ರ ಆದ್(ಮುಂಡಾಸ್/ತೆರಿಯೆ) ಕಟ್ವೆ.ತೆರಿಯೆದ ಮಿತ್ತ್ ಮೂಡೆ(ಮುಟ್ಟಲೆ) ದೀದ್ ಕಡ್ಯದ ಕಲಿನ್ ತುಂಬೊಂದು ಪೋಪೆ.ಮೈರೆ ಬೈದುಲು ದುಂಬುಡೆ ಪೋನಗ ತನಿಯೆ ಪಿರವುಡೆ ಪೋಪೆ.ತನಿಯೆ ನೆಕ್ಕಿ ತಪ್ಪು ಸೊಂಟೊಗು ಕಟ್ಟ್ ದ್ ಮಾನ ಮುಚ್ಚೊಂದು ಬೈದೆ ವಿನಃ ಕಟ್ಟುನಕುಲು ಪನ್ಪಿ ಸಂದಿದಲೆಕ ಬತ್ತಲೆ ಬೈಜೆ(ಕಟ್ಟುನಕುಲು ಪನ್ಪಿ ಸಂದಿದ ಪ್ರಕಾರ ಅಂಡ್ ಗ್ ಕುಂಟು ಮೈರೆ ಬೈದುಲು ಕೊರ್ಪೆರ್ಂದ್ ಉಂಡು).ಕಟ್ಟುನಕ್ಲೆನ ಪಾಡ್ದನೊಡು ತನಿಯೆ ಬತ್ತಲೆ ಇತ್ತೆ,ಪುದೆಲ್ದ ಅಡ್ಡೊಡು ಉಂತ್ಯೆಂದ್ ಬರ್ಪುಂಡು.ಆಂಡ ಕೊರಗ ಸಮಾಜೊಡು ಬೆತ್ತಲೆ ಪನ್ಪುನ ಏರೆಗ್ಲಾ ಇಜ್ಜಾಂಡ್.ಅನಾದಿಡ್ ಕೊರಗ ಜನಾಂಗದಕುಲು 3 ರೀತಿಡ್ ಮಾನ ಮುಚ್ಚೊಂತೆರ್,
1.ನೆಕ್ಕಿ ತಪ್ಪು
2.ದಡ್ಡಲ್ದ ನಾರ್
3.ದಡ್ಡಿದ ನಾರ್
ಈ 3 ಪ್ರಾಕೃತಿಕ ಸೊತ್ತುಲೆಡ್ ಮಾನ ಮುಚ್ಚೊಂತೆರ್ ಜೋಕ್ಲು ಎಲ್ಯ ಉಪ್ಪುನಗನೆ ಅವೆನೆಂಚ ಗಲಸೊಡುಂದು ಹಿರಿಯಾಕ್ಲು ಪಂಡ್ ಕೊರೊಂತೆರ್.ಸೊಂಟೊರ್ದು ಮಿತ್ತ್ ಆನಿದ ಕಾಲದ ಈ ಸಮುದಾಯದ ಪೊಂಜನಕುಲು ಇಡೀ ಮೇಲ್ ಗ್ ಮಣಿಸರಕ್ ಪಾಡೊಂದು ಮಾನ ಮುಚ್ಚೊಂತೆರ್.
ಕೊರಗ ಜನಾಂಗದ ಮೂಲ ಕಥೆತ ಪ್ರಕಾರ ಕೊರಗತನಿಯೆ ಬಡಕಾಯಿದ ಬಾರ್ಕೂರ ಗಡಿಡ್ದ್ ಪಿದಾಡ್ನಗ ಆಯಗ್ ಏಳ್-ಎಣ್ಮ ವರ್ಸ ಪ್ರಾಯ ಆದಿತ್ತ್ಂಡ್.ಆಯೆ ಕುಡ್ಲ/ಮಂಗ್ಳೂರ ಗಡಿಕ್ ಏಳ್ ಇರ್ಲ್-ಏಳ್ ಪಗೆಲ್ ಡ್ ನಡತೊಂಉ ಬತ್ತ್ ದ್ ಎತ್ವೆ.ಎಲ್ಸೂರ ಬರ್ಕೆಗ್ ಬತ್ತ್ ನ ತನಿಯೆ,ಯಾನೊಂಜಿ ಮಡಲ್ದ ಕೊಟ್ಯ ಕಟ್ಟ್ ದ್ ಅವ್ಲೆ ಕುಲ್ವೆಂದ್ ಪನ್ಪೆ.ಮೈರೆ ಬೈದುಲು ಬೊಡ್ಚಿಂದ್ ಪಂಡಲ ಆಯೆ ಬೇತೆನೇ ಉಪ್ವೆ.ಎಲ್ಸೂರ ಬರ್ಕೆದ ಸಾಗೊಳಿನ್ ಪೂರ ತನಿಯೆ ಮಲ್ಪುವೆ.ಕಂಡಸಾಗೊಳಿಗ್ ಬೋಡಾಯಿನ ಕುರುವೆ,ಕುಡ್ಪು ಇಂಚಿ ಸೊತ್ತುಲೆನ್ ಸಮುದಾಯದ ಬೇಲೆಂದೆನ್ನಿದ್ ಮಲ್ಪುವೆ.ಸುಮಾರ್ ಪತ್ತ್ ವರ್ಸದಾತ್ ಕಾಲ ತನಿಯೆ ಎಲ್ಸೂರ ಬರ್ಕೆಡ್ ಬೆನ್ಪೆ. ಏಪ ತನಿಯೆ ಆ ಇಲ್ಲಗ್ ಕಾರ್ ದೀಪೆನಾ ಆನಿರ್ದ್ ಆ ಇಲ್ಲ್ ಡ್ ಪೊಲಿಪೊಲ್ಸು ದಿಂಜೆರೆ ಸುರಾಂಡ್.ಅಪಗದ ಪೊಲಿ ಪೊಲ್ಸು ಪಂಡ ಇನಿತಲೆಕದ ಪದ್ದೇಯಿ ಬಂಗಾರತ್ತ್.ಅರಿಬಾರೇ ಆನಿದ ಕಾಲದ ಪೊಲಿಪೊಲ್ಸಾದಿತ್ತ್ಂಡ್.ಒಂಜೆರ್ದ್ 7 ಪಾಲ್ ಅಕುಲು ಎಡ್ಡೆ ಆವೊಂದು ಪೋಪೆರ್.ಒಂಜಿ ದಿನ ಮೈರೆ ಬೈದುಲು ತನಿಯಡ ಸರ್ಗೊಬ್ಬರ(ಕಿದೆ ಗೊಬ್ಬರ) ಕಿದೆಡ್ದ್ ದೆಪ್ಪೆರೆ ಪನ್ಪೆರ್.ಅಡೆಮುಟ್ಟ ತನಿಯೆ 7 ಜನ ಮಲ್ತೊಂತಿ ಬೇಲೆನ್ ಒರಿಯೆ ಮಲ್ತೊಂತೆ.ಏರೆಗ್ಲ ಅವು ತೆರಿಯೊಂದಿಜ್ಜಾಂಡ್." ಸರ್ಗೊಬ್ಬರ ದೆಪ್ಪೆರೆ ಯಾನ್ ನಿಕ್ಲೆ ಮುಕ್ಕೊಲ್ದಾಯೆ ಅತ್ತ್ "ಂದ್ ತನಿಯೆ ಪನ್ಪೆ.ತನಿಯಗ್ ಬೈದುಲು ಪಂಡಿ ಇಚಾರೊಡು ಬೇಜಾರ್ಲ ಆಪುಂಡು,ಕೋಪಲಾ ಬರ್ಪುಂಡು.ಆನಿದ ದಿನ ತನಿಯೆ ವಾ ಬೇಲೆನ್ಲಾ ಮಲ್ಪುಜೆ.ಈ ಇಲ್ಲ್ ನನ ಎಂಕ್ ಬೊಡ್ಚಿಂದ್ ಪನ್ಪುನ ಭಾವನೆಲ ಆಯಗ್ ಬರ್ಪುಂಡು.ಬೊಕ್ಕ ಆಯಗಾಯೆನೆ ಸಮದಾನ ಮಲ್ತೊನುವೆ.ತನಿಯಗ್ ತಾನ್ ಸರ್ಗೊಬ್ಬರ ದೆಪ್ಪೆರೆ ಪಂಡಿ ಬಗೆಟ್ ಬೇಜರಾತ್ಂಡ್ಂದ್ ತೆರಿನ ಮೈರೆ ಬೈದುಲು ತನಿಯಡ,ನಿನ್ನ ಬೇಲೆನ್ ಈ ಮಲ್ಪು, ಸರ್ಗೊಬ್ಬರ ದೆಪ್ಪುನ ಆ ಬೇಲೆನ್ ಬೇತೆಕ್ಲೆಡ ಮಲ್ಪವೆಂದ್ ಬೇತಕ್ಲೆಡ ಮಲ್ಪವೆರ್.ಅಂಚ ಸುಮಾರ್ ಪತ್ತ್ ವರ್ಸ ಕೊರಗತನಿಯೆ ಎಲ್ಸೂರ ಬರ್ಕೆಡ್ ಬೆನೊಂದಿಪ್ವೆ.
ಇಂಚ ಉಪ್ಪುನ ಪೊರ್ತುಗು ಒಂಜಿ ದಿನ ಚೆನ್ನಯೆ ಉಸಾರಿಜ್ಜಂದೆ ಬೂರ್ವೆ.ವಾ ಮರ್ದ್ ಕೊರ್ಂಡಲ ಸೀಕ್ ಗುಣಾವೊಂದಿಜ್ಜಿ.ಅಪಗ ಮೈರೆ ಬೈದುಲು ದಾದ ದೋಸಂದ್ ಬಲಿಮೆಡ್ ಕೇನ್ವೆರ್.ಬಲಿಮೆದಾರ್ "ಕಾಡಿನಕ್ಲೆಗ್ ನುಪ್ಪು ದಾನ ಕೊರೊಡು,ನೀಚದಾನ ಕೊರೊಡು"ಂದು ಪನ್ಪೆರ್.ಓಲು ನಾಡ್ಂಡಲ ಅಕ್ಲೆಗ್ ಕಾಡಿನಕುಲು ಪಂಡ ಕೊರಗ ಜನಾಂಗದಕುಲು ತಿಕ್ಕುಜೆರ್.ಏರಾ ಊರ್ಯಕುಲು ಮೈರೆ ಬೈದುಲ್ಡ ,ನಿಕುಲು ಓಲೋಲು ನಾಡುನ ಬದಲ್ ಆ ಜನಾಂಗದ ತನಿಯೆ ನಿಕ್ಲೆ ಇಲ್ಲಲೇ ಉಲ್ಲೆತ್ತಾಂದ್ ಪನ್ಪೆರ್.ಮೈರೆ ಬೈದುಲು ತನಿಯನ್ ತನ್ನ ಸ್ವಂತ ಇಲ್ಲದ ಬಾಲೆದಲೆಕ ತೂತಿನಾರ್.ಚೆನ್ನಯೆ ಬೇತೆತ್ತ್,ತನಿಯೆ ಬೇತೆತ್ತ್ಂದ್ ತಾಂಕಿನಾರ್.ತನಿಯೆಲ ಅಂಚನೆ ತನ್ನ ಮಾಮಿನ್ ಅಪ್ಪೆನ ಸ್ಥಾನೊಡು ತೂಯಿಲೆಕನೆ ಮೈರೆ ಬೈದುಲೆನ್ಲ ಅಪ್ಪೆನ ಸ್ಥಾನೊಡು ತೂಯಿನಾಯೆ.ತನಿಯನ್ ಲೆತ್ತ್ ದ್ ಮೈರೆ ಬೈದುಲು, " ಅಂದ ತನಿಯ,ಚೆನ್ನಯಗ್ ಸೌಖ್ಯ ಇಜ್ಜಂದಿನೆಕ್ ಕಾಡಿನಕ್ಲೆಗ್ ನುಪ್ಪು ದಾನ ಕೊರೊಡುಂದು ಬಲಿಮೆದಾರ್ ಪಂತೆರ್.ಓಲು ನಾಡ್ ನಗಲ ನಂಕ್ ಏರ್ಲಾ ತಿಕ್ಕ್ ಜೆರ್,ಈ ಕಾಡಿನಾಯೆತ್ತಾ ದಾನ ಪತ್ತೊಲಿಯಾ"ಂದ್ ಕೇನ್ವೆರ್.ತನಿಯಗ್ ಬಾರೀ ಬೇಜಾರಾಪುಂಡು.ಪತ್ತುಜಿಂದ್ ಪನ್ರೆಲಾ ಗೊತ್ತ್ ಜ್ಜಿ,ಪತ್ವೆಂದ್ ಪನ್ರೆಲಾ ಆಪುಜಿ.ಎನನ್ ಇಂಚಿನಾಯೆಂದ್ ಗುರ್ತ ಪತ್ಯೆರತ್ತಾಂದ್ ಆಯಗ್ ಬಾರೀ ಬೇಜಾರಾಪುಂಡು.ಆಂಡಲ ತನ್ಕಾಯಿ ಬೇನೆನ್ ತೊಜಪಾವಂದೆ ,"ಆವು ಯಾನ್ ಪತ್ವೆ"ಂದ್ ತನಿಯೆ ಪನ್ಪೆ."ಒಂಜಿ ಮುಡಿ ಅರಿ ಬೆಯ್ಪಾವೊಡು,ಅಯಿಕ್ ಬೋಡಾಯಿನಾತ್ ಕುಂಬುಡದ ಕಜಿಪು ಮಲ್ಪೊಡು,ಒಂಜಿ ಮುಡಿ ನುಪ್ಪು ಪತ್ತುನ ತಡ್ಪೆನ್ ಯಾನ್ ಮಲ್ತ್ ಕನಪೆ"ಂದ್ ತನಿಯೆ ಬೈದುಲ್ಡ ಪನ್ಪೆ. ತನಿಯೆ ಸೀದಾ ಕಾಡ್ ಗ್ ಪೋದು ನೆಡಿಲ್ದ ಬೂರು ದೆತ್ತ್ ದ್ ತಡ್ಪೆ ಕಟ್ಟುವೆ.ತನಿಯೆ ತಡ್ಪೆ ಪತೊಂದು ಬನ್ನಗ ಮೂಲು ಅಟಿಲ್ ತಯಾರಾದಿತ್ತ್ಂಡ್.ಇಲ್ಲದಕುಲು ಚೆನ್ನಯನ್ ಜಾಲ ಬರಿಟ್ ಕುಲ್ಲವೆರ್.ಮೂಡಾಯಿಗ್ ಮೋನೆ ಮಲ್ತ್ ದ್ ತನಿಯೆ ತಡ್ಪೆ ದೀಪೆ.ತಡ್ಪೆಗ್ ಕೊಡಿ ಇರೆ ಪಾಡ್ವೆರ್.ಒಂಜಿ ಮುಡಿ ಅರಿತ ನುಪ್ಪು ಬಲಸುವೆರ್.ಬೋಡಾಯಿನಾತ್ ಕರ್ಕುಂಬುಡದ ಕಜಿಪು ಪಾಡ್ವೆರ್.ಅವೆನ್ ದೆಪ್ವೆ ತನಿಯೆ,ಚೆನ್ನಯಗ್ ಮೂಜಿ ಸರ್ತಿ ತೆರೆಕಾಯ್ಗ್ ತೊರಪುವೆ,ಮೂಜಿ ಸುತ್ತು ತರೆಕ್ ತೊರಪ್ವೆ,ಜಾಲ್ ಜತ್ತ್ ದ್ ಮೂಜಿ ಮುಟ್ಟು ದುಂಬು ಬರ್ಪೆ,ಇಡೀ ನುಪ್ಪುದ ತಡ್ಪೆನ್ ಕಂಕನೆ ಪಾಡ್ವೆ.ಬೆರಿಪಾಡ್ದ್ ಸೀದಾ ಪೋಪೆ.ಅಂಚ ಪೋಯಿನಾಯೆ ವರ್ಸಕಟ್ಲೆ ಓಲುಲ್ಲೆಂದಿಜ್ಜೆ.ಅಂಚ ಪೋಯಿನಾಯೆ ಒಂಜಿ ಮಲೆತ ಬರಿಟಿತ್ತೆ.ಆ ಮಲೆತ ಪುದರ್ ನ್ ಕೊರಗ ಜನಾಂಗದಕುಲು ಪನ್ಪುಜೆರ್.ಆಂಡ ಕೊರಗ ಸಮುದಾಯದ ನಂಬೊಳಿಗೆದ ಪ್ರಕಾರ ಸುಲ್ಲ ಮಲೆ-ಬಲ್ಲ ಮಲೆ ಎಲ್ಸೂರ ಬರ್ಕೆದ ಕೈತಲಿತ್ತ್ ನೆಡ್ದಾದ್ ಅವ್ಲು ಓಲಾ ಒಂಜಿ ಮಲೆಟ್ ಆಯೆ ಇತ್ತ್ ದುಪ್ಪೊಡು.ಆ ಮಲೆಟ್ ತಿಕ್ಕುನ ಬೂರುಲೆನ್ ದೆತ್ತ್ ದ್ , ಜಾತಿದ ಕಸುಬು ಮಲ್ತ್ ದ್ ದಿನ ದೆತ್ತೊಂದಿತ್ತೆ.ಎಲ್ಸೂರ ಬರ್ಕೆರ್ದ್ ತನಿಯೆ ಬೇಜಾರ್ಡೇ ಜತ್ತ್ ಪೋಯಿನೆರ್ದಾತ್ರ ಎಲ್ಸೂರ ಬರ್ಕೆದ ಪೊಲಿ ಪೊಲ್ಸು ಅಳಿಯಂತ್ರೊಗು ಪೋಯೆರೆ ಸುರಾಪುಂಡು.ತನಿಯೆ ಜತ್ತ್ ದ್ ಪೋದು ಇಂಚಾಂಡ್ಂದ್ ಬೈದುಲು ಎನ್ನಿವೆರ್.ಇಂಚ ಉಪ್ಪುನಗ ಮೈರೆ ಬೈದುಲು ತನಿಯನ್ ಲೆತ್ತ್ ಲೆತ್ತೊಂದು ನಾಡೊಂದು ಪಿದಡುವೆರ್.3 ಸರ್ತಿ ಬೈದುಲು ಲೆಪ್ಪುನಗ ಒಂಜಿ ತಿಕ್ ಡ್ ಕುಲೊಂದು ಕುಲಕಸುಬು ಮಲ್ತೊಂತಿ ತನಿಯೆ ಓಕೊನುವೆ.ದಾನೆ ಬತ್ತರ್ ಅಪ್ಪೆರೆಂದ್ ತನಿಯೆ ಬೈದುಲ್ಡ ಕೇನುವೆ.ಎಂಕ್ಲೆಡ ತಪ್ಪಾತ್ಂಡ್ ತನಿಯಂದ್ ಮೈರೆ ಬೈದುಲು ತನಿಯಡ ಪನ್ಪೆರ್.ತನಿಯೆ ದಾಲ ಮನಿಪುಜೆ. ಈ ಇಲ್ಲಡೆ ಪಿರ ಬರೊಡು ತನಿಯ,ಎಂಕ್ಲೆನವು ಸರ್ವಲಾ ತಪ್ಪಾಂಡ್ಂದ್ ಮೈರೆ ಬೈದುಲು ತನಿಯಡ ಪನ್ಪೆರ್.ದಾದ ಮಲ್ಪೊಡುಂದು ತನಿಯೆ ಬಾರೀ ಅಲಚನೆ ಮಲ್ಪುವೆ.ಅಕುಲು ಒಂಜಾತ್ ಕಾಲ ತಾಂಕ್ ದ್ ನ ನುಪ್ಪುದ ಋಣ ಉಂಡು ತನಿಯಗ್.ತಪ್ಪಾಂಡ್ಂದ್ ಬೈದುಲು ಪಂಡಿ ಪಾತೆರೊನು ತನಿಯೆ ಮನಸ್ ಗ್ ದೆತೊನುವೆ.ಆವು ಬರ್ಪೆ,ಈರ್ ಪೋಲೆಂದ್ ಪನ್ಪೆ.ತನಿಯೆ ಪಿರ ಎಲ್ಸೂರ ಬರ್ಕೆಗ್ ಬರ್ಪೆ.ಬರ್ಕೆಡ್ ದುಂಬು ದಾದ ಕೆಲಸ ಮಲ್ತೊಂತೆನ ಅವೆನೆ ತನಿಯೆ ಕುಡ ಮಲ್ತೊಂದು ಪೋಪೆ.ಎಲ್ಸೂರ ಬರ್ಕೆದ ಎರ್ಲೆನಾದಿಪ್ಪು,ಕಂಜಿ ಕೈಕಂಜಿಲೆನಾದಿಪ್ಪು ಉಂದೆನ್ ಮಾತ ತನಿಯೆ ಬರ್ಕೆರ್ದ್ ಕುತ್ತಾರ್ ಪದವುಗು ಕಾಂಡೆ ದೇರೊಂದು ಪೋಯೆಡ ಬಯ್ಯಗ್ ಬರೊಂತೆ(ಇನಿಲಾ ಕಂಜಿ ಕೈಕಂಜಿಲು ತಪ್ಪಾನಗ ಕೊರಗ ತನಿಯಗ್ ಪರಕೆ ಪಂಡ ಕಿದೆಕವೆನ್ ಮಾಯಾಸಗ್ತಿಡ್ ಮುಟ್ಟಾವೆ). ಕುತ್ತಾರ್ ಪದವುಡು ಕೊರಗ ಸಮುದಾಯದ 7 ಕೊಪ್ಪೊಲಿತ್ತ.ತನ್ನ ಸಮುದಾಯದಕ್ಲೆಡ ಸುಖ ಕಷ್ಟ ಪಾತೆರೊಂದು ಕತ್ತಲೆ ಆಯೆರಾನಗ ಕಂಜಿ ಕೈಕಂಜಿಲೆನ್ ದೇರೊಂದು ತನಿಯೆ ಎಲ್ಸೂರ ಬರ್ಕೆಗ್ ಎತ್ತೊಂತೆ.ಕುತ್ತಾರ್ ಪದವುದ 7 ಕೊಪ್ಪದಕ್ಲೆಗ್ ತನಿಯನ ಮಿತ್ತ್ ಬಾರೀ ಮೋಕೆ ಉಪ್ಪುಂಡು.ಅಲ್ತ 7 ಕೊಪ್ಪದ ಕೊರಗ ಸಮುದಾಯದಕುಲ್ಲಾ ತನಿಯನ್ ಸ್ವಂತ ಇಲ್ಲದಾಯಲೆಕ ತೂವೊಂತೆರ್.
ಮುಲ್ತುರ್ದು ಬೊಕ್ಕ ಕೊರಗ ಜನಾಂಗದ ಕೊರಗ ತನಿಯನ ಮೂಲ ಕತೆಕ್ಲಾ ನಮ ಇತ್ತೆ ತುಳುನಾಡ್ ಡ್ ತೂವೊಂದಿಪ್ಪುನ ಕತೆಕ್ಲಾ ಬಾರ್ಯಾತ್ ಎತ್ತೇಸ ತೋಜುಂಡು.ಮೂಲು ಕದಿರೆ ದೇಲ್ಯೊಡು ತನಿಯೆ ಮಯಕಾಯೆಂದ್ ಕಥೆ ಇತ್ತ್ಂಡ ನಿಜವಾದ್ ಮೂಲ ಕೊರಗ ಜನಾಂಗದ ಕೊರಗ ತನಿಯನ ಕಥೆಟ್ ಈ ಇಚಾರ ಬರ್ಪುಜಿ.ಮೂಲ ಕೊರಗ ಜನಾಂಗದ ಕಥೆಟ್ ದನಿ ಒಕ್ಕೆಲ್ದ ಗೇಣಿ ಸಂದಾಯಯದ ಇಚಾರೊಡ್ದಾದ್ ಕೊರಗ ತನಿಯೆ ವ್ಯವಸ್ಥೆದ ವಿರುದ್ಧ ತಿರ್ಗ್ ದ್ ಬೂರ್ದು ಪೊರ್ಂಬಾಟ ಮಲ್ತ್ ದ್ ಮಾಯ ಸೇರ್ನ ಇಚಾರ ಬರ್ಪುಂಡು.ಆ ಕಾಲದ ಸ್ಥಿತಿ ಗತಿ ತೂನಗ ಬಡವೆರೆ ಬದ್ ಕ್ ದ ಬೇನೆ ಬೆಸರ್,ಬಂಜಿದ ಗುಜ್ಜಾರ್ಮೆಗಾದ್ ನಟ್ಟ ತಿರ್ಗುನ ಬಡವೆರೆ ಬೆಂಗ್ ದ ಇಚಾರೊಲು ಮೂಲ ಕೊರಗ ಜನಾಂಗದ ಕಥೆಟ್ ತೂಯೆರೆ ತಿಕ್ಕುಂಡು.ಎಲ್ಸೂರ ಬರ್ಕೆದಕುಲು ಪ್ರತಿ ವರ್ಸ ದನಿಕುಲೆಗ್ ಗೇಣಿ ಸಂದಾಯ್ತ ಮಲ್ಪುನಗ ಬೇತೆಕ್ಲೆನ್ ಕಡಪುಡೊಂದಿತ್ತೆರ್.ಈ ಒಂಜಿ ವರ್ಸ ಗೇಣಿ ತಂಬೊಂದು ಪೋಯೆರೆ ಏರೆನ್ ಬೇಲೆದಕ್ಲೆನ್ ಲೆತ್ತ್ಂಡಲ ಅಕುಲು ಬರ್ಪುಜೆರ್.ಗೇಣಿ ಎತ್ತಾವಂದೆ ನಿಮುರ್ತಿ ಇಜ್ಜಿ.ಮೂಲದ ಚಾಕಿರಿದಕ್ಲೆನ್ ಲೆತ್ತ್ಂಡಲ ಬರ್ಪುಜೆರ್.ದುಂಬುದ ಕಾಲೊಡು ಗೇಣಿ ಪಂಡ ಅರಿಬಾರ್ ಮಾತ್ರ ಅತ್ತ್,ಅಕ್ಲು ಬುಳೆಯಿನ ಬುಳೆಕುಲೆನ ಬುಳೆಕಾಣಿಕೆನ್ಲಾ ದೀದ್ ಗೇಣಿ ಕೊರೊಡಿತ್ತ್ಂಡ್.ಒಂಜಿ ಗೇಣ್ ಬಂಜಿಗಾದ್ ಬಡವೆರ್ ನೆತ್ತೆರ್ ನ್ ಬೆಗರಾದ್ ಜಪುಡ್ಂಡಲ ಅಕ್ಲೆಗ್ ಉನೆರೆ ತಿನೆರೆ ಅರಿಬಾರ್ ತಿಕ್ಕೊಂದಿಜ್ಜಾಂಡ್.ಎಲ್ಸೂರ ಬರ್ಕೆದಕುಲು ಜೈನ ಮನೆತನದ ಒಕ್ಕೆಲ್ದಕುಲು.ಹೊಸೂರು ಬೊಕ್ಕ ಎಲ್ಸೂರು ಬರ್ಕೆದಕುಲು ಬೂಮಿನ್ ಗೇಣಿಗ್ ಬೆನೊಂತ್ ನಿ.ಎಂಕ್ಲೆ ಗೇಣಿನ್ ದನಿಕ್ಲೆಗ್ ಎತ್ತವುನಕುಲು ಏರ್ಲಾ ಇಜ್ಜೆರಾಂದ್ ಮೈರೆ ಬೈದುಲು ಎತೆಟುಪ್ಪುವೆರ್.ಅಪಗ ಅರೆಗ್ ತನಿಯೆ ತೋಜುವೆ.ಅಪಗ ಆರ್ ತನಿಯಡ ತನಿಯಾ,ದಾದ ಮಲ್ಪುನಿಂದೇ ಗೊತ್ತಾವೊಂದಿಜ್ಜಿ.7 ಜನ ತುಂಬುನ 7 ಪುದೆತಾತ್ ಗೇಣಿ ದನಿಕುಲೆಗ್ ಕೊರೆರೆ ಇತ್ತ್ಂಡ್.7 ಪುದೆ ತುಂಬುನ 7 ಜನೊಕುಲ್ಲಾ ಬತ್ತ್ ದ್ ಜೆರ್.ಯಾನಿನಿ ಗೇಣಿನ್ ಸಂದಾಯ ಮಲ್ಪೊಡೆ.ಎನ್ನ ಮರ್ಯಾದಿ,ಮಾನ,ಪ್ರಾಣದ ಇಸಯಂದ್ ಪನ್ಪೆರ್.ಅಪಗ ತನಿಯೆ ಮೈರೆ ಬೈದುಲ್ಡ ಪನ್ಪೆ,ಈರ್ ದಾಲ ಎತೆ ಮಲ್ಪಡೆ,ಯಾನ್ ತುಂಬೊಂದು ಕೊನೊಪೆ,ಈರ್ ಬುಲಿಪಡೆಂದ್ ಪನ್ಪೆ.ಯಾನ್ ಈತೆನ್ ತುಂಬೊಡುಂದಾಂಡ ಎನ್ನ ಒಂಜಿ ಪಾತೆರ ಉಂಡು.ದಾದಂದ್ ಮೈರೆ ಬೈದುಲು ತನಿಯಡಪಗ ಕೇನ್ವೆರ್.ಅಪಗ ತನಿಯೆ ಪನ್ಪೆ," 7 ಮುಡಿ ಬಾರ್ ಕೊರೊಡು,7 ಜನ ಪರ್ಪಿನ ಬಾಜೆಲ್ ಕೊರೊಡು,7 ಜನ ತಿನ್ಪಿನ ಬಚ್ಚಿರೆ ಪೂಳು ಕೊರೊಡು,ಅಪಗ 7 ಜನ ತುಂಬುನ ಪುದೆನ್ ಯಾನೊರಿಯೆ ಕೊನೊಪೆ"ಂದ್ ಪನ್ಪೆ.ಮೂಲೋಲ್ಲಾ ಬೀಡದ ಉಲ್ಲೇಖ ಇಜ್ಜಿ.ಬಚ್ಚಿರೆನ್ ಅವೆತ ಕಡೆಟ್ ನಡುನು ಒಟ್ಟೆ ಮಲ್ತ್ಂಡ ಅಸುದ್ಧ ಆಂಡ್.ತನಿಯೆ ಮೈರೆ ಬೈದುಲ್ಡ ಬಾಜೆಲ್ ಕೇಂದೆ ವಿನಃ ಒವುಂದು ಪಂತ್ ಜೆ.ಆಯೆ ಕೇನ್ನೆನ್ ಅಪ್ಪೆರ್ ಪಂಡ ಮೈರೆ ಬೈದುಲು ಆವುಂದು ಪಂತೆರ್.ಇನಿ ಮುಲ್ತ ಕೋಲದಕುಲು ಪನ್ಪುನ 70 ಬಂಗುಡೆದ ಕಜಿಪಾವಡ್,ಕುಡು ಬಸಳೆದ ಕಜಿಪಾವಡ್,ಕಲಿ ಗಂಗಸರ ಆವಡ್ ( ಇನಿ ಕೆಲವು ಕಟ್ಟುನಕುಲು 7 ಕುಜಿಲಿ ಕಲಿಂದ್ ಪನೊಂದುಲ್ಲೆರ್ ) ,ತೆತ್ತಿದ ರಾಸಿಯಾವಡ್,ಚಕ್ಕುಲಿದ ರಾಸಿ ಆವಡ್,ಬೀಡ ಆವಡ್,ನಾರಂಗಾಯಿದ ಉಪ್ಪಡಾವಡ್ ತನಿಯೆ ಕೇಂದಿನ ಉಲ್ಲೇಖ ಕೊರಗ ಜನಾಂಗದ ಮೂಲ ಕೊರಗ ತನಿಯನ ಕಥೆಟಿಜ್ಜಿ.ಅಂಚನೆ ಕಲಿಕ್ ಬೊಳ್ಳೆಂದ್,ಗಂಗಸರೊಗು ಕಾಳೆಂದ್ ಲೆಪ್ಪುನ ಕಟ್ಟುನಕುಲೆನ್ ತೂನಗ ಬೇಜರಾಪುಂಡು.ಅವು ಪೂರ ಕಟ್ಟುನಕ್ಲೆನ ಆಹಾರ ಸಂಸ್ಕೃತಿದ ಪೊಸ ಸೇರ್ಪಡೆಲು.ಅಂಚನೆ ಬಾಯಿಡ್ ತಿನ್ಪುನ ಬಚ್ಚಿರೆನ್ ,ಬಂಜಿಗ್ ತಿನ್ಪಿ ಚಕ್ಕುಲಿನ್ ಮಾಲೆ ಮಲ್ತ್ ದ್ ಪಾಡ್ದ್ ಬಡವು ಬಾಜೆಲ್ ಗ್ ಒತ್ತು ಕೊರ್ನ ಕೊರಗ ತನಿಯಗ್ ಜನ ಬೇನೆ ಮಲ್ತೊಂದುಲ್ಲೆರ್.
ಮೈರೆ ಬೈದುಲು ಸುರುಕಾದ್ ತನಿಯಗ್ 7 ಮುಡಿ ಬಾರ್ ಕೊರ್ಪೆರ್.ಈ 7 ಮುಡಿ ಬಾರ್ ತುಂಬೊದು ತನಿಯೆ ಕುತ್ತಾರ್ ದ 7 ಕೊಪ್ಪೊಲೆಗ್ ಬತ್ತ್ ದ್ ಒಂಜೊಂಜಿ ಕೊಪ್ಪೊಗು ಒಂಜೊಂಜಿ ಮುಡಿ ಬಾರ್ ಕೊರ್ಪೆ 7 ಪನ್ಪುನವು ಕೊರಗ ಜನಾಂಗದ ಪವಿತ್ರ ಸಂಕ್ಯೆ,7ಇರ್ಲ್,7ಪಗೆಲ್,7ಮಲೆ,7ಕಡಲ್,7ಮಲೆತ,7ಜಿಡೆತ ಸಂಕಮಾಲೆ,7ಟ್ ಅಮೆ ಕರಿಪುನ,ಇಂಚ ಮೂಲು 7ಕ್ ಮಾನಾದಿಗೆ).ಉಂದು ಎನ್ನ ನೆಂಪುಗಾದ್ ಯಾನಿನಿ ನಿಕ್ಲೆಗ್ ಕೊರ್ಪುನಿ.ಬತ್ತ್ಂಡ ಯಾನ್ ಬರ್ಪೆಂದ್ ಪನ್ಪೆ.ತಾನ್ ಇನಿ ಕಾಯ ಬುಡ್ದು ಮಾಯ ಸೇರುವೆ ಪನ್ಪಿ ಇಚಾರ ತನಿಯಗ್ ಸೊಸ್ಟ ಗೊತ್ತಿತ್ತ್ಂಡ್.ಕುತ್ತಾರ್ ದ 7 ಕೊಪ್ಪೊಲೆರ್ದ್ ತನಿಯೆ ಸೀದಾ ಎಲ್ಸೂರ ಬರ್ಕೆಗ್ ಬರ್ಪೆ.7 ಜನತ ಪುದೆನ್ ಒಂಜಿ ಮಲ್ಪುವೆ,7 ಜನ ತಿನ್ಪಿ ಒನಸ್ ತೆನಸ್ ನ್ ಒರಿಯೆ ತಿನ್ಪೆ,7 ಜನ ಪರ್ಪಿ ಬಾಜೆಲ್ ನ್ ಒರಿಯೇ ಪರ್ಪೆ ( ಬಾಜೆಲ್ ಪಂಡ ' ಬಡವು ಮಾಜಾವುನ, ಬಾಜೆಲ್ ಮಾಜಾವುನ ಗಂಜಿ ತೆಲಿಯಾದಿಪ್ಪು,ಅಳೆತ ನೀರ್ ಪಾಡಿನ ಗಂಜಾದಿಪ್ಪು '.ಕಲಿ ಗಂಗಸರಂದ್ ಓಲ್ಲಾ ಪಂತ್ ಜೆ ).ಕೊರಗ ಜನಾಂಗದಕುಲು ಇನಿಲಾ ಬಾಜೆಲ್ಂದೇ ಪನ್ಪುನಿ.ಕಲಿ ಗಂಗಸರಂದ್ ಕೊರಗತನಿಯನ ಇಚಾರೊಡು ಪನ್ಪುಜೆರ್.ಅಪಗ ಕಟ್ಟುನಕುಲು ಬೊಳ್ಳೆ ಕಾಳೆಂದ್ ಕಲಿ ಗಂಗಸರಂದ್ ಪನ್ಪುನವು ಸರಿಯತ್ತ್.7 ಜನ ತಿನ್ಪಿ ಬಚ್ಚಿರೆ ಪೂಳುನು ಒರಿಯೇ ತಿನ್ಪೆ.ಪುದೆನ್ ನೆಲರ್ದ್ ದೆರ್ತ್ ದ್ ಮೊರಂಪುಗು ದೀಪೆ,ಮೊರಂಪುರ್ದು ದೆತ್ತ್ ದ್ ಪುಗೆಲ್ ಗ್ ದೀಪೆ,ಪುಗೆಲ್ ರ್ದ್ ದೆರ್ತ್ ದ್ ತರೆಕ್ ದೀಪೆ.ಮೈರೆ ಬೈದುಲ್ಡ ತನಿಯೆ ಪನ್ಪೆ," ಅಪ್ಪೆರೆ ಎನ್ನ ಬೆರಿ ತೂಲೆ,ಬೆರಿ ಪಾಡ್ದ್ ಪೋಯಿನಾಯೆ ಬಂಜಿ ಪಾಡ್ದ್ ಬರ್ಪೆಂದ್ ನೆನೆಪೊಡ್ಚಿ " ಂದ್ ಪಂಡ್ ದ್ ಪಿದಡ್ದ್ ಪೋಪೆ.ಅಂಚ ಜತ್ತ್ ಪೋಯಿನಾಯೆ ಕದಿರೆಗ್ ಜೈನ ಮಡಸ್ತಾನ ಕರ್ತುಲೆಗ್ ಗೇಣಿ ಸಂದಾಯೆರೆ ಪೋಪೆ.ಕದಿರೆಡ್ ಜೈನ ಬಸ್ತಿಲು ಇತ್ತಂದ್ ಕೊರಗ ಜನಾಂಗದ ಹಿರಿಯೆರ್ ಪನೊಂತೆರ್ ಗೆ.ಕದ್ರಡ್ ಓಲಾಂಡಲ ಜೈನ ಮಡಸ್ತಾನದ ಇಲ್ಲ್ ಆ ಕಾಲೊಡು ಇತ್ತ್ ದಿಪ್ಪು.ತನಿಯೆ ಪುದೆ ತುಂಬೊಂದು ಇಂಚಿ ದನಿನ ಇಲ್ಲದ ಬಾಕಿಲ ಎದುರು ಬರ್ಪುನೆನ್ ಬಾಕಿಲ ಅಂಚಿಂಚಿ ಉಂತಿ ಇರ್ವೆರ್ ಲಟ್ಟ ಜವನೆರ್ ದೂರೊಡ್ದೇ ತೂಪೆರ್.ತನಿಯೆ ಅಕ್ಲೆನ ಕೈತಡೆ ಬನ್ನಗ,ಈ ಏರ್,ಓಡೆ ಪೋಪುನಿಂದ್ ಕೇನ್ವೆರ್.ಅಪಗ ತನಿಯೆ,ಮೈರೆ ಬೈದುಲ್ನ ಎಲ್ಸೂರ ಬರ್ಕೆರ್ದ್ ಗೇಣಿ ಸಂದಾಯೆರೆ ಬತ್ತ್ ನಿಂದ್ ಪನ್ಪೆ.ಈ ಏರ್ಂದ್ ಅಕುಲು ಕೇನ್ನಗ ,ಯಾನ್ ಕಾಡಿನಾಯೆ ಕೊರಗ ತನಿಯೆಂದ್ ಪನ್ಪೆ.ಅಪಗ ಅಕುಲು ಪನ್ಪೆರ್,ಈ ಕಾಡಿನಾಯೆ ಕೊರಗತನಿಯೆ ಆಂಡ ದೂರ ಉಂತೊಡು.ಪುದೆನ್ ಎಂಕ್ಲೆ ಕೈತಲ್ ಗ್ ದೀವೊಡುಂದು ಪನ್ಪೆರ್.ತನಿಯೆ ದೂರೊಡುಂತುದೆ ಪುದೆನ್ ಅಕ್ಲೆ ಕೈತಡೆಗ್ ದೀಪೆ.ಮೊಕ್ಲೆನ್ ತೂಯಿನ ಕೊರಗತನಿಯೆ 7 ಜನ ತುಂಬುನ ಪುದೆನ್ ಯಾನ್ ದೂರೊಡುಂತುದು ಮೊಕ್ಲೆನ ಕೈತಲ್ ದೀಯೊಲಿ,ಆನೆ ಬಾಕ್ ಲ್ ಡ್ದ್ ಯಾನ್ ಪೊಗ್ಗ್ಂಡ ದಾನೆ ಆವುಂದು ಎನ್ನಿವೆ.ಎಂಕ್ ಉಲಯಿ ಪೋವೊಡುಂದು ತನಿಯೆ ಅಕ್ಲೆಡ ಪನ್ನಗ ಉಲಯಿ ಪೋಯೆರಾಪುಜಿಂದ್ ಅಕುಲು ಬಾಕಿಲ್ ಗ್ ಅಡ್ಡ ಉಂತ್ಯೆರ್.ತನಿಯೆ ಕನತಿನ ಗೇಣಿದ ಪುದೆನ್ ಅವ್ಲೆ ದೀದ್ ಸೀದಾ ಆನೆ ಬಾಕಿಲ್ಡ್ ಪೊಗ್ಗೆರೆ ತೂಪೆ.ಮೊಕ್ಲು ಆಯಗ್ ಅಡ್ಡ ಉಂತುವೆರ್.ತನಿಯಗ್ ಬೊಕ್ಕ ಈ ಇರ್ವೆರೆಗ್ಲಾ ಒಯ್ಯಾ ಕಯ್ಯಾ ಉರ್ಡಾ ಪತ್ತಾ ಬೂರ್ದು ಪೆಟ್ಟ್ ಲಡಾಯಾದ್ ಮೂವೆರ್ಲಾ ಕಾಯ ಬುಡ್ದು ಮಾಯ ಸೇರ್ವೆರ್ ಪಂಡ ಕರಿದ್ ಪೋಪೆರ್.
ಮೂಲು ಪ್ರಚಾರೊಡುಪ್ಪುನ ಕಥೆ ತೂಪುಂಡ ಕದಿರೆ ದೇಲ್ಯೊಗು ತನಿಯೆ ಪುದೆ ಕೊನೊನಗ ಪುದೆನ್ ಪಿದಯಿಡ್ದ್ ದೇಲ್ಯದ ಉಲಯಿ ದಕ್ಕ್ ನಗ ಆಯಗ್ ಮಾಡ ಬರಿತ ಮರಟಿತ್ತಿ ಮಾಪಳ ತೋಜಿದ್ ಅವೆನ್ ಅಪ್ಪೆರೆಗ್ಂದ್ ಕೊಯ್ಯೆರೆ ಮಾಡ್ ಗ್ ಕಾರ್ ದೀನಗ ಮಾಡಡಿತ್ತಿ ಮೈಸಂದಾಯೆ ಬೊಕ್ಕ ಕೊಡಂಗೆನ್ನಾಯೆ ದೈವೊಲು ಆಯನ್ ಮಯಕ ಮಲ್ತೆರ್ಂದ್ ಕಥೆ ಬರ್ಪುಂಡು.ಕೊರಗ ಜನಾಂಗದ ಕೊರಗ ತನಿಯನ ಮೂಲ ಕಥೆಟ್ ಆಯೆ ಎಲ್ಸೂರ ಬರ್ಕೆದ ಗೇಣಿ ಸಂದಾಯೆರೆ ಕದಿರೆದ ಜೈನ ಮಡತ್ತಾನದ ಇಲ್ಲಗ್ ಪೋಪೆಂದೇ ಬರ್ಪುನಿ.ಅವ್ಲು ಕದಿರೆ ದೇಲ್ಯದ ಮಾಪಳದ ಕಥೆ,ಉಪ್ಪಡ್ ದ ಥೆ ಓಲ್ಲಾ ಬರ್ಪುಜಿ.ಆಯೆ ಕದಿರೆ ದೇಲ್ಯೊಗು ಪೋಪುನ ಕಥೆನೇ ಮೂಲೊಡಿಜ್ಜಿ ಪಂಡ ಮಾಪಳದ ಕಥೆಕ್,ಉಪ್ಪಡ್ ದ ಕಥೆಕ್ ಅರ್ಥನೇ ಇಜ್ಜಿ.
ತನಿಯೆ ಗೇಣಿ ದೆತೊನುನ ದನಿನ ಇಲ್ಲದ ಉಲಯಿ ಪೊಗ್ಗು ನ ದುಂಬೇ ಲಟ್ಟ ಜವನೆ ತನಿಯನ್ ಇರ್ವೆರ್ ದನಿನ ಬಾಕಿಲ್ ಕಾಪುನಕುಲು ಮುಗಿತ್ ದೆರ್.ತನಿಯೆಲಾ ಅಂಚನೆ ಆಯನ್ ಎದುರು ಪಾಡೊಂದು ಲಡಾಯಿ ಮಲ್ತ್ ನ ಇರ್ವೆರೆನ್ಲಾ ಮುಗಿತ್ ದೇ ಕರಿದ್ ಪೋತೆ.ಕೊರಗ ತನಿಯೆ ಜಾತಿ ವೈಷಮ್ಯೊಗು ತಿಕ್ ದ್ ಕರಿದ್ ಪೋಪೆ.ದನಿ ಒಕ್ಕೆಲ್ದ ಕಾಲದ ಗೇಣಿದಕ್ಲೆನ ಬಡಪೊತ್ತು,ಕಷ್ಟ-ನಷ್ಟದ ಇಚಾರೊಲೆನ್ ಕೊರಗ ಜನಾಂಗದ ಕೊರಗ ತನಿಯನ ಮೂಲ ಕಥೆಟ್ ತೆರಿಯೊಲಿ.ತನಿಯಗ್ ಪೊಸತಾದ್ ಕಥೆ ಕಟ್ಟ್ ನಕುಲು ಕದಿರೆ ದೇಲ್ಯ,ದೈವೊಲೆನ್ ಪೂರ ಅಡೆಗ್ ಕನತೆರ್.ತಾನ್ ಆಯನ ಕಥೆ ಮುಗಿತ್ ದ್ ದೈವೊಲೆಗ್ ದೂರು ಪಾಡ್ಂಡ ಏರ್ಲ ಕೇನುಜೆರ್ಂದ್ ಅಕುಲು ತನಿಯನ್ ಅಕ್ಲೆ ಕಥೆಟ್ ಮುಗಿತ್ ದ್ ದೈವೊಲು ಮಯಕ ಮಲ್ತಂದ್ ದೂರು ಪಾಡ್ಯೆರ್.ಆಯೆ ಉಂಡ್ ತಿಂದ್ ನ ಇಲ್ಲದ ಚಾಕಿರಿಂದ್ ಗೇಣಿದ ಪುದೆ ತಂಬೊಂದು ಪೋಯಿನಿ ವಿನಃ ದೇಲ್ಯೊಗು ಪೋಯಿನತ್ತ್.ಅಪಗದ ಕಾಲೊಡು ಕೆಲವೊಂಜಿ ದನಿನಕುಲು,ಗೇಣಿ ದೆತೊನ್ನ ಬಡವೆರ್ ಚೂರುಬೆನ್ನಿ ಸಾಗೊಳಿಡ್ ಎಡ್ಡೆ ಆಪೆರ್ಂದ್ ತೋಜಿನಗ ಅಕ್ಲೆನ ಕಥೆನ್ ಮುಗಿತೊಂತೆರ್.ಅವೆಕ್ ಬಲಿಪಶು ಬಡವೆರಿಲ್ಲದ ಚಾಕಿರಿದಕುಲು ಆವೊಂತೆರ್ ಪನ್ಪುನೆಕ್ ತನಿಯನ ಕಥೆ ಸಾಕ್ಷಿಯಾಪುಂಡು.ತನಿಯನ್ ಇಂಚನೇ ಬುಡ್ಂಡ ಇಂಬ್ಯೆ ದಾದಾಂಡಲ ಮಲ್ಪೆಂದ್ ಪೋಡಿದ್ ಉಪಾಯೊಡು ಅಕುಲು ಕೊರಗ ತನಿಯನ್ ಮುಗಿತ್ ದ್ ನಿ. ಬಡವೆರೆನ್ ಮುಗಿತ್ಂಡ ಅಕ್ಲೆ ಸಂಪೊತ್ತುನ್ಲಾ ಉಲಯಿ ಪಾಡೊಲಿಂದ್ ದನಿನಕುಲು ಕಾತ್ ಕುಲ್ಲೊಂತಿ ಕಾಲ ಅವು.ದನಿನ ಇಲ್ಲದ ಆನೆ ಬಾಕಿಲ್ಡ್ ಪೊಗ್ಗೆರೆ ತೂಯಿನಾಯೆ ಪಿದಯಿ ಬರಂದೆ ಅವ್ಲೆ ಮಯಕಾಯೆಂದ್ ಕೊರಗ ಜನಾಂಗದ ತನಿಯನ ಕಥೆಟ್ ಬರ್ಪುಂಡು.ತನಿಯೆ ಮಾಯೆ ಆಯಿ ಬೊಕ್ಕ ಮೈರೆ ಬೈದುಲು ಎದುರುಡು ಲೆಪ್ಪುನಗ ಪಿರವುಡೆ ಓಕೊನೊಂತೆಗೆ,ಪಿರವುಡು ಲೆಪ್ಪುನಗ ಎದುರುಡು ಓಕೊನೊಂತೆಗೆ.
ಕೊರಗತನಿಯೆ ಕಾಯ ಬುಡ್ದು ಮಾಯೆ ಆಯಿನ ಇಚಾರ ಸುರುಕು ತಿಕ್ಕುನಿ ಕುತ್ತಾರ್ ದ 7 ಕೊಪ್ಪದಕ್ಲೆಗ್.ದಾಯೆ ಪಂಡ ತನಿಯೆ ದಿನೋಲ ಬರೊಂದು ಪೋವೊಂದು ಇತ್ತ್ ನ ಜಾಗ್ ಅವು.ಬೊಕ್ಕ ಎಲ್ಸೂರ ಬರ್ಕೆಗ್ ಸುದ್ದಿ ಗೊತ್ತಾಪುಂಡು.ಬಾರ್ಕೂರುರ್ದು ಕುಡ್ಲದ ಗಡಿಮುಟ್ಟದ ಸಮುದಾಯದ ಮಾತರೆಗ್ಲಾ ತನಿಯೆ ಕಾಯ ಬುಡ್ದು ಮಾಯೆ ಆಯಿನವು ತೆರಿಯುಂಡು.ಅಂಚ ತನಿಯಗ್ ಸುರುಕು ಏಮೆದ ಅಗೆಲ್ ಮಲ್ತ್ ದ್ ಬಲಸ್ ದ್ ನ ಜಾಗೆನೇ ಕುತ್ತಾರ್ ಪದವು.ಅಲ್ಪ 7 ಕೊಪ್ಪದಕುಲು 7 ಜಾಗೆಡ್ಲ ಸುರುಕು ಏಮೆದ ಕಜಿಪುದ ಅಗೆಲ್ ತನಿಯಗ್ ಪಾಡ್ದೆರ್.ದಾಯೆ ಪಂಡ ಆನಿದ ಕಾಲದ ಆಹಾರ ಸಂಸ್ಕೃತಿಡ್ ಏಮೆಲಾ ಬರ್ಪುಂಡು.ಇನಿ ಕೊರಗತನಿಯನ ಆದಿಸ್ಥಳಂದ್ ಜನಮಂದೆ ನಂಬುನ ಜಾಗೆಡೇ ಕೊರಗ ಸಮುದಾಯದಕುಲು ತನಿಯಗ್ ಸುರೂಕು ಏಮೆದ ಅಗೆಲ್ ಪಾಡ್ದ್ ನಿ.ಆಂಡ ಕೊರಗ ತನಿಯೆ ಪುಟ್ಟ್ ನ ಮೂಲ ಜಾಗೆ ಬಾ್ಕೂರುದ ಕೊರ್ರೆ ಪಾಡಿಯೇ ಆದುಂಡು.ತನಿಯೆ ಕರಿ ಬೊಕ್ಕ ಕುತ್ತಾರ್ ರ್ದ್ ಕೊರಗ ಜನಾಂಗ ಆ ಜಾಗೆ ಬುಡ್ದು ಬೇತೆ ಬೇತೆ ಜಾಗೆಗ್ ಪೋದಿಪ್ಪೆರ್.ಎಲ್ಸೂರ ಬರ್ಕೆಡ್ಲಾ ಕೊರಗತನಿಯೆ ಮಯಕಾಯಿ ಬೊಕ್ಕ ಆಯನ್ ನಂಬುದೆರ್.ಎಳಸೂರು/ಎಲ್ಸೂರು/ಎನ್ಸೂರು ಬರ್ಕೆಂದ್ ಬೇತೆ ಪುದರ್ ಡ್ ಆ ಬರ್ಕೆನ್ ಲೆಪ್ಪುವೆರ್.ತನಿಯೆ ಮಯಕಾಯಿ ಬೊಕ್ಕ ಕೊರಗ ತನಿಯನ ಬಗೆಟ್ ಬತ್ತ್ ನ,ಸೇರಿಗೆಯಾಯಿನ ಪೊಸ ಪೊಸ ಕಥೆಕುಲು ಮೂಲ ಕೊರಗ ಜನಾಂಗದ ಸಂದಿಡಾವಡ್,ಅಕ್ಲೆ ಪೂರ ಹಿರಿಯಾಕುಲು ಪಂಡಿ ಕಥೆಟಾವಡ್ ಇಜ್ಜಿ.ಅಂಚನೆ ಕೊರಗ ಜನಾಂಗದ ಹಿರಿಯಾಕುಲೇ ಬತ್ತ್ ದ್ ಕೊರಗ ತನಿಯನ ಆರಾದನೆನ್ ಓಲಾಂಡಲ ಪೂರ ಕಟ್ಟ್ ಪ್ರಕಾರ ಕಲ್ಲ್ ನಾಟಾದ್ ಆರಾದನೆ ಮಲ್ಪಯೆರ್ಡ ಅವುಲು ಬೊಕ್ಕ ಕೊರಗ ತನಿಯಗ್ ಕೋಲ ಮಲ್ಪುಲೆಕ ಇಜ್ಜಿ.ಅಂಚನೆ ಕೋರಿ ಪೊಜೆಂಕ್ ದ್ ವರ್ಸೊಗೊಂಜಿ ಅಗೆಲ್ ಪಾಡ್ರೆ ಮಾತ್ರ ಉಪ್ಪುಂಡು.ಅಂಚನೆ ಅವ್ಲು ಗಂಗಸರ,ಚಕ್ಕುಲಿ,ಬೀಡ ಇಂಚ ಅಗತ್ಯ ಇಜ್ಜಂದಿನೆನ್ ಪೂರ ದೀಯೆರೆ ಉಪ್ಪುಜಿ.
ಕೊರಗ ತನಿಯನ ಪೊಸ ಕತೆಟ್ ಊರುದ ರಾಜಂದೈವೊಗು ಪುದೆ ಕೊನೊತ್ ನಿಂದ್ ಬತ್ತ್ಂಡ ಕೆಲವು ಕತೆಟ್ ಕದಿರೆ ದೇಲ್ಯೊಗು ಪುದೆ ಕೊನೊತ್ ನಿಂದ್ ಬರ್ಪುಂಡು.ಆಂಡ ಕೊರಗತನಿಯನ ಕೊರಗ ಜನಾಂಗದಕ್ಲೆನ ಮೂಲ ಕತೆಟ್ ಈ ಇಚಾರ ಬರಂದೆ ದನಿಕ್ ಗೇಣಿ ಸಂದಾಯೆರೆ ಪೋನಗ ಆಯೆ ಕಾಯ ಬುಡ್ದು ಮಾಯ ಆಯಿನ ಇಚಾರನೇ ಬರ್ಪುಂಡು.ಈ ಕಥೆ ಸ್ಪಷ್ಟವಾದುಂಡುಂದು ನಮ ಅರ್ಥ ಮಲ್ತೊನೊಲಿ.ಮೂಲ ಕೊರಗ ಜನಾಂಗದ ಕಥೆಟ್ ಕದಿರೆಗ್ ತನಿಯೆ ಗೇಣಿ ಸಂದಾಯೆರೆ ಬನ್ನಗ ಅರಂತಡೆದನಾ/ದನಿನನಾ ಇಲ್ಲದ ಆನೆ ಬಾಕಿಲ್ ಡ್ ರಡ್ಡ್ ಜನ ಬಾಕಿಲ್ ಕಾಪುನಕುಲು ಇತ್ತೆರ್ಂದ್ ಬರ್ಪುಂಡು.ಅಕುಲು ಇರ್ವೆರ್ ಏರ್, ಒಲ್ತು ಬತ್ತೆರ್ ಪನ್ಪಿನ ಸ್ಪಷ್ಟತೆ ಇಜ್ಜಿ.ಅಂತೂ ಕೊರಗ ತನಿಯನ ಕಥೆ ಮಾತ್ರ ದನಿ ಒಕ್ಕೆಲ್ದ ಕಾಲದ ,ಗೇಣಿದ ಕಾಲದ ಕಥೆ ಪನ್ಪುನವು ಸ್ಪಷ್ಟ.ಬಾರ್ಕೂರ ಗಡಿತ ಕೊರ್ರೆಪಾಡಿಡ್ ಪುಟ್ಟ್ ನ ತನಿಯೆ ಮಾತೆರೆನ್ ಕಳೆಯೊಂದು,ಕೋಡಿಕಂಡಾಲ ಗುತ್ತುಡು ತಿಕ್ಕ್ ನ ಕೋರ್ದಬ್ಬುನೊಟ್ಟುಗು ಬತ್ತ್ ದ್ ,ಕಾಪುದೌಲು ಬಬ್ಬು ಉಂತ್ಯೆಡ ತನಿಯೆ ಮಂಗ್ಳೂರ ಗಡಿಕ್ ಬತ್ತ್ ದ್ ,ಎಲ್ಸೂರ ಬರ್ಕೆ ಸೇರ್ದ್ ಮಾಯೆದ ನಿಲೆಟ್ ಕುತ್ತಾರ್ ಡ್ ನಿಲೆಯಾಯಿನಡೆಮುಟ್ಟ ಕೊರಗತನಿಯನ ಕಥೆ ಉಂಡು.ತನಿಯನ್ ಮನ ಬಗ್ ತಿಡ್ ನಂಬುನಕ್ಲೆನ್,ಕಂಜಿ ಕೈಕಂಜಿಲೆನ ಕೈಬುಡಂದೆ ಕಾತಿನ ಮಾಮಲ್ಲ ಮಾಯಕಾರೆ ಕೊರಗತನಿಯೆಂದ್ ಪುಗಾರ್ತೆ ಪಡೆಪೆ.ಕಾರ್ನಿಕದ ಸಗ್ತಿಯಾದ್ ತುಳುನಾಡ್ ಡ್ ಬೆಳಗೊಂದುಲ್ಲೆ.ಕೊರಗ ಜನಾಂಗದ ಮೂಲಾರಾದನಾ ಕೆರಮೊನು ಅಕ್ಲೆ ಹಿರಿಯಾಕ್ಲೆಡ ಪಿಂದೊಂದು ತನಿಯನ ಆರಾದನೆ ಮಲ್ತ್ಂಡ ಆಯೆ ಏಪಲಾ ಮಾಯೆದ ನಿಲೆಟ್ ನಮನ್ ರಕ್ಷಣೆ ಮಲ್ಪುವೆ.
https://youtu.be/sPVqY3RyomY
ಕೊರಗ ಜನಾಂಗ ಕೊರಗತನಿಯನ್ ಆರಾದನೆ ಮಲ್ಪುನ ಕ್ರಮ:-
ಇಚಾರೊಲು ದುಂಪೋಪುಂಡು.........
ಲೇಖಕೆರ್:-
ಕೆ.ಮಹೇಂದ್ರನಾಥ್ ಸಾಲೆತ್ತೂರು.ಎಂ.ಎ.
ಬರವುಗು ಮೂಲ ಆಕರ :-
ಎಂ.ಸುಂದರ ಬೆಳುವಾಯಿ
ಅದ್ಯಕ್ಷರು,ದ.ಕ.ಕೊರಗರ ಜಿಲ್ಲಾ ಸಂಘ(ರಿ),
ಒತ್ತಿನ ಗುರಿಕಾರ,
ಕಡಂದಲೆ, ಬಾರೆಟ್ಟು ಕೊರಗರ ಕೂಡು ಕುಟುಂಬ.
ಬಾಬು ಪಾಂಗಾಳ, ಕೊರಗ ಭಾಷಾ ತಜ್ಞೆರ್
https://udupitimes.com/udupi-times-12594/
