ದೈವಾರಾದನೆ
"ಮೂಡಾಯಿ ಗಟ್ಟೊರ್ದು ಪಡ್ಡೇಯಿ ಕಡಲಕರೆಮುಟ್ಟ,ಬಡಕಾಯಿ ಬಾರ್ಕೂರ ಗಡಿರ್ದ್ ತೆನ್ಕಾಯಿನೀಲೇಶ್ವರ ಗಡಿಮುಟ್ಟ,ಅಜ್ಜೊಗೊಂಜಿ ಬಲಿ,ಮುಟ್ಟುಗೊಂಜಿ ಪುರಪು,ಕಟ್ಟಿಲ್ಲ್,ಜತ್ತಿಬಾಕಿಲ್ ಎಂಕುಲು ನೆಲೆ ಊರ್ನ ದೈವೊಲು" ಪಂಡ್ ದ್ ಪೆರ್ಮೆಡ್ ಪನ್ಪುನ ದೈವೊಲು ನಮ್ಮ ತುಳುನಾಡ ದೈವೊಲು.ಅಡ್ಕದ ಪೂ,ತೋಟದ ಪಾಳೆ,ಕಂಠೆ ತೆಂಬರೆಡ್ ದುಂಬು ವೈಭವದ ಕೋಲೊಡು ಸತ್ಯದ ನುಡಿ,ಸಾಯದ ಗಂಧ ಆ ಕಾಲೊಡು ದೈವೊಲು ಕೊರೊಂತ.ದೈವದ ಎವ್ರ ಮಲ್ಲ ಆನಗ ಹಿರಿಯಾರ್,'ಉಂತು,ಮಿತ್ತ್ ಸ್ವಾಮಿ ಮಲ್ಲೆ,ತಿರ್ತ್ ಬೂಮಿ ಮಲ್ಲೆ,ನಿನನ್ ನಂಬಿನ ಎಂಕುಲು ಮಲ್ಲೆ,ಉಂತು'ಪಂಡ್ದ್ ತಲ್ತಿ ನೀರ್ ಗ್ ಪಂಡಿ ಪಾತೆರೊಗು ಉಂತುನ ದೈವ ಖಂಡಿತ ಉಂಡು.
" ಗಟ್ಟದ ಪುಡೆಡ್ದ್ ಕಡಲ ಬರಿಮುಟ್ಟ ತುಳುನಾಡೊರ್ಮೆಲಾ ಪಟ್ಟ ಆಳುನ ಮಲ್ಲಾಯರ್ದ್ ಪತ್ತ್ ದ್ ಮುಟ್ಟಾಲೆ ದೀದ್ ಬೆನ್ಪುನ ಬಲ್ಲಿ ಬಡವರೆ ಮುಟ್ಟ ಕುಟುಮೊಗು ಗೂಂಟ,ಪೊಣ್ಣಗ್ ತಮೆರಿ,ಆಣಗ್ ತಮ್ಮಲೆ ಪನ್ಪಾವೊಂದು, ಪಕ್ಕಿ ಕುಲ್ಲಂದಿ ಮರ ಇಜ್ಜಿ,ತುಲುನಾಡ ಪಂಜುರ್ಲಿ ಇಜ್ಜಂದಿ ಕುಟುಮ ಇಜ್ಜಿ ಪನ್ಪಾವೊಂದು ಮೆರೆಪುನ ಮಾಮಲ್ಲ ಸತ್ಯ ಪಂಡ್ಂದಾಂಡ ಅವ್ವೆ ಮಾಯಗಾರೆ ಪಂಜುರ್ಲಿ."
ಬಂಜಿಗ್ ಉನೆರೆ ತಿನೆರೆ ಗತಿ ದಾಂತಿ,ತುತ್ತೆರೆ ತುಂಡು ಕುಂಟು ದಾಂತಿ,ಇದ್ಯೆದ ಗಂದಗಾಳಿ ತೆರಿಯಂದಿ ಪೂರ್ವಹಿರಿಯಾಕ್ಲ್ ನಂಬೊಂದು ಬತ್ತಿ ದೈವೊಲೆನ ಮಾಯೆ ಮಲ್ಲೆ ಆದಿತ್ತ್ಂಡ್.ಅಡೆಗ್ ಮಂತ್ರ ಬತ್ತ್ ದ್ ಮಾಯೆದ ನಿಲೆ ತತ್ತ್ ದ್ ದೈವೊಲು ದೇವೆರಾಯೆರೆ ಸುರಾಯೆರ್.
ದೇವೆರೆ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುನಾಡ ಆರಾದನೆಡ್ ಇತ್ತ್ ನ ತುಳುನಾಡ ಮಣ್ಣ ದೈವೊಲೆನ್ ದೇವೆರೆಡ್ದ್ ಪುಟ್ಟ್ ನ ದೈವೊಲುಂದು ಪಂಡ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ಪೆರೆ ಪೋವಡೆ.ದೈವೊಲೆನ್ ಈ ಮಣ್ಣ್ ಡ್ ಉದಿತಿ ದೈವೊಲಾದೇ ತೂಕ.ದೇವೆರೆನ್ ದೇವೆರಾದೇ ತೂಕ.ದೇವೆರೆನ್ ಸಂಸ್ಕೃತದ ಮಂತ್ರೊಲೆಡ್ ಮಾನಿತೊಂಡ ದೈವೊಲೆನ್ ಸಂದಿ ಪಾಡ್ದನದ ನಿಲೆಟೇ ಅರ್ಥ ಮಲ್ತೊನುಗ.ದೈವೊಲೆನ್ ಆರಾದನೆದ ಒರುತ ಕೊಡಿಯಡಿಟೇ ಮಾನಿತೊನ್ಗ.ಅವೆನ್ ಬುಡ್ದು ಬೇತೆ ಬೇತೆ ರಂಗೊಲೆಡ್ ಪ್ರದರ್ಶನ ಕಲೆಯಾದ್ ತೂಪರಿಕೆ ಮಲ್ಪಡೆ.
ಇನಿತ ದಿನಮಾನೊಡು ತುಳುವೆರೆ ಆರಾದನೆದ ತುಳುನಾಡ ದೈವೊಲು ಸಿನೆಮಾ ನಾಟಕ,ಆಟದ ತೂಪರಿಕೆದ ವೇಷೊಲಾಯಿನವು ತುಳುವೆರೆ ದೈವಾರಾದನೆದ ದುರಂತಂದೇ ಪನೊಲಿ.ಅಕ್ಲೆಡ ಕೇಂಡ ಎಂಕುಲು ದೈವದ ಕಲೆ ಕಾರ್ನಿಕೊನು ಲೋಕೊಗು ತೆರಿಪಾವೊಂದುಲ್ಲಂದ್ ಪನ್ಪೆರ್.ದೈವದ ಕಲೆ ಕಾರ್ನಿಕೊನು ತೋಜಾಯೆರೆ ನಮ ಏರ್?.ದುಂಬು ತುಳುನಾಡ ವ್ಯಾಪ್ತಿಡ್ ನಡತೊಂತಿ ದೈವಾರಾದನೆನ್ ಮೊಕ್ಲೆನ ಕಾಸ್ ದ ಅಂಬೆರ್ಪುಡು ಸಾರ್ವತ್ರಿಕ ಮಲ್ತೊಂದು ಪೋಯೆರ್.ಕಟ್ಟುನಕುಲು ಮೂಲ ತುಳುನಾಡ ಚಾಕಿರಿನ್ ಬುಡ್ದು ಕಾಸ್ ದ ಆಸೆಡ್ ಈ ಮಾದ್ಯಮದಕ್ಲೆಗ್ ತಾನ್ ನಂಬೊಂತಿ ದೈವದ ಭಂಡಾರ ಕೊರ್ಪುನವು ದೈವೊನು ಮಾರ್ದ್ ಬುಡ್ಲೆಕಾಂಡ್.ದೈವದ ಇಚಾರ ತೆರಿಯಂದಿ ಗಟ್ಟದ ಮಿತ್ತ್ ದೈವೊಲೆಗ್ ಕಟ್ಟೆರೆ ಪೋದು ಅಲ್ತಕ್ಲೆಗ್ ತುಳುವ ನಾಡ್ ದ ಕೊಡಿಯಡಿತ ದೈವೊಲು ಆಟ ನಾಟಕದ ವೇಷೊಲಾದ್ ಪೋಯ.ತುಳುನಾಡ ಕೊಡಿಯಡಿತ ಆರಾದನೆದ ದೈವೊಲು ಯಕ್ಷಗಾನೊಡು ವೇಷೊಲಾದ್ ಪೋಯ.ಆರಾದನೆದ ನಂಬೊಳಿಗೆದ ಕಲೆ ಕಾರ್ನಿಕದ ಕೊಡಿಯಡಿತ ದೈವೊಲೆನ್ ಕಲಾಪ್ರಕಾರದ ಬೊಂಬೆಲಾದ್ ಮಲ್ತೆರ್.ಪದಿನಾಜಿ ವರ್ಗೊನು ಒತ್ತಟ್ಟ್ ಡ್ ಉಂತಾದ್ ಪದಿನಾಜಿ ಕಟ್ಲೆಡ್ ಪದಿನಾಜಿ ಕಲೆ ದಿಂಜಿದ್ ಕೊಡಿಯಡಿಟ್ ಉಂತೊಡಾಯಿನ ದೈವೊಲಿನಿ ಅಟ,ನಾಟಕ,ಸಿನೆಮಾದ ಪಾತ್ರೊಲಾದ್ ಪೋಯ.ನಮ್ಮ ದೈವಾರಾದನೆದ ಮೂಲ ಕಟ್ಲೆ ತತ್ತೊಂದು ಪೋನಗ ಅಡೆಗ್ ಪೊಸತಾದ್ ಬತ್ತ್ ನ ಒಂಜಿ ವರ್ಗ ತುಳುವೆರೆ ದೈವೊಲೆಗಿಜ್ಜಂದಿ ಅಷ್ಟಮಂಗಲ ಪ್ರಶ್ನೆ ದೀದ್,ತುಳುನಾಡ ದೈವೊಲೆಗಿಜ್ಜಾಂದಿ ಬ್ರಹ್ಮ ಕಲಶ ಮಲ್ಪಾದ್ ದೈವದ ಪುದರ್ ನ್ ಪೂರ ಬದಲ್ತ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ತೊಂದು ಪೋಯೆರ್.ದೈವದ ಕೊಡಿಯಡಿತ ಮೂಲ ಚಾಕಿರಿದಕ್ಲೆನ್ ಸುದ್ದಾಚಾರ,ಮಡಿಮೈಲೆಂದ್ ದೂರ ಉಂತಯೆರ್.ನೆತ್ತೆರಾವಾರದ ದೈವೊಲೆಗ್ ಪೊರಿಪೊದ್ದೊಲುದ ತಂಬಿಲ ಕಟ್ಟಾಯೆರ್.ಇತ್ತಿತ್ತೆ ದೈವೊಲೆಗ್ ನೇಮ ದಾಯೆ,ತಂಬಿಲೊಡು ಸುದಾರ್ಪುಗಂದ್ ಪನ್ಪುನಡೆಮುಟ್ಟ ಅಕುಲು ಎತ್ತ್ ದ್ ಬುಡ್ಯೆರ್.ತುಳುನಾಡ ಬೆಮ್ಮೆರೆನ ಪುದರ್ ನ್ ಮುದೆಲ್ ದಾಂತಿನಾತ್ ಅಡಿಕ್ ತರ್ತೆರ್,ವೈದಿಕ ಚತುರ್ಮುಖ ಬ್ರಹ್ಮನ್ ಅಡೆ ಕನತೆರ್.ಅವ್ಲ ಯಾರುಜಿಂದ್ ನಾಗನೊಟ್ಟುಗು ಬೆಮ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗಬ್ರಹ್ಮ ಮಲ್ತೆರ್.ಅವೈದಿಕ ದ್ರಾವಿಡ ತುಳುವ ಕಟ್ಟ್ ದ ಮೂಲ ದೈವಾರಾದನೆ ಸಂಪೂರ್ಣ ಅಡಿ ತತ್ತ್ ದ್ ವೈದಿಕದ ಅನುಕರಣೆಗೆತ್ತ್ ದ್ಂಡ್.ಅವೆನ್ ಸರಿ ಮಲ್ಪೆರೆ ಆವಂದಿನಾತ್ ದೂರ ಪೋತ್ಂಡ್.ಕರಿನೆಕ್ ಕಟ್ಟೆ ಕಟ್ಟಂದೆ ಒರಿನೆಕಾಂಡಲ ಕಟ್ಟೆ ಕಟ್ಟುನ ಅನಿವಾರ್ಯತೆ ತುಳುವೆರಾಯಿನ ನಮಕುಂಡು.ಏರ್ ದೈವಾರಾದನೆಡ್ ತಪ್ಪು ಮಲ್ತೆರ್ಡಲ ಅಕ್ಲೆನ್ ಪ್ರಶ್ಬೆ ಮಲ್ಪುನ ಅನಿವಾರ್ಯ ಪರಿಸ್ಥಿತಿ ಬೈದ್ಂಡ್.ಓಡೆಮುಟ್ಟ ಇನಿ ದೈವಾರಾದನೆ ಎತ್ತ್ ದ್ಂಡ್ ಪಂಡ ಬ್ರಹ್ಮ ಸಭೆ,ತಂತಿರ್ದಾರ್,ವೈದಿಕೆರಿಜ್ಜಂದೆ ಕೊಡಿಯಡಿತ ದೈವೊಲೆ ಇಜ್ಜಿ ಪನ್ಪುನಡೆಗ್ ದೈವಾರಾದನೆ ಎತ್ತ್ ದ್ಂಡತ್ತಂದೆ ತುಳುವ ಆಚರಣೆಲಾಯಿನ ಮದಿಮೆ,ಸಾವು ಪೂರ ವೈದಿಕದಡಿಟ್ ನಡತೊಂದುಂಡು ಪಂಡ ಇಡೀ ದೈವಾರಾದನೆದ ವ್ಯವಸ್ಥೆನ್,ತುಳುವ ಆಚರಣೆಲೆನ್,ವೈದಿಕತೆ ಇನಿ ಆಳ್ಯೊಂದುಂಡು.
ರಾಜ ದಂಡ
ಚಿತ್ರೊಡುಪ್ಪುನಾರ್ ಹೆಬ್ರಿ ಕೈತಲ್ದ ತಿಂಗಳೆ ವಿಕ್ರಮಾರ್ಜುನ ಹೆಗ್ಗಡೆರ್.ತುಳು ನಾಡ್ ಡ್ ಅರಸೊಳಿಗೆದ ಕಾಲೊಡು ಅರಂತಡೆದ ದೇವೆರೆ ಕೋಣೆದುಲಯಿ,ರಾಜಂದೈವದ ಕೋಣೆದುಲಯಿ ದೀವೊಂತ್ ನ ಮಾನಾದಿಗೆದ ನ್ಯಾಯ ದಂಡೊನು ರಾಜ ದಂಡ ಪನೊಂತೆರ್.ಚೋಳ ಅರಸೆರೆ ಕಾಲೊಡು ಒರಿ ಅರಸೆ ಕುಡೊರಿ ಅರಸಗ್ ರಾಜ್ಯದ ಅಧಿಕಾರ ಬುಡು ಕೊರ್ನಗ, ರಾಜೆರೆಗ್ ರಾಜ್ಯಾಭಿಷೆಕ/ಪಟ್ಟಾಭಿಷೇಕ ಆನಗ ವೈದಿಕೆರ್ ರಾಜ ದಂಡೊಗು ಕಲಸ ನೀರ್ ಮೈತ್ ದ್ ಅರಸುಲ್ನ ಕೈಟ್ ರಾಜದಂಡ ಕೊರೊಂತೆರ್.ಮೂಜಿ ಮೂಜರೆ ಅಡಿ ಎತ್ತರ ಉಪ್ಪುನ ಈ ರಾಜದಂಡದ ತರೆಟ್ ನಂದಿದ ಕೆತ್ತನೆ ಉಪ್ಪುಂಡು.ಉಂದೆನ್ ನ್ಯಾಯ ದಂಡಂದ್ ಲ ಪನ್ಪೆರ್.ದೈವ ದೇವೆರೆ ಸಾಕ್ಷಿಯಾದ್ ಅರಸುಲು ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡೊನು ಪತೊಂದಿಪ್ಪುವೆರ್.ದೈವ ನ್ಯಾಯ ತೀರ್ಮಾನ ಮಲ್ಪುನಗ , ನುಡಿ ಕೊರ್ನಗ ಜೀಟಿಗೆದ ಅಗ್ಗಿ ಅವೆಕ್ ಸಾಕ್ಷಿಯಾಯಿಲೆಕ ಒರಿ ಅರಸು ಕುಡೊಂಜಿ ಅರಸುಗು ಅಧಿಕಾರ ಬುಡು ಕೊರ್ನಗ , ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡ ಅವೆಕ್ ಸಾಕ್ಷಿಯಾದಿಪ್ಪುಂಡು. ಒರಿ ಅರಸು ಬೊಕ್ಕೊಂಜಿ ಅರಸುಗು ಅಧಿಕಾರೊನು ಬುಡು ಕೊರ್ನಗ ರಾಜ ದಂಡದೊಟ್ಟುಗು ಅಧಿಕಾರ ಬುಡು ಕೊರೊಂತೆರ್.
ಜನ ಸಾಮಾನ್ಯೆರ್,ಪೊಂಜನಕುಲು ರಾಜ ದಂಡೊನು ಮುಟ್ಟುಲೆಕಿಜ್ಜಾಂಡ್. ಒರಿ ಅರಸು ಅಧಿಕಾರ ಬದಲ್ಪುನಗ, ನ್ಯಾಯ ತೀರ್ಮಾನ ಮಲ್ಪುನಗ,ವಿಶೇಷ ಧಾರ್ಮಿಕ ಉಚ್ಚಯದಪಗ ಅರಸುಲು ರಾಜ ದಂಡೊನು ಪತೊಂತೆರ್.ಕಾಲಾನು ಭಾಗೊಡು ಅರಸೊಳಿಗೆ ಉಂತಿ ಬೊಕ್ಕಲ ಅರಸುಲೆ ಒರುವಾದ್ ಕೆಲವು ತಿಕ್ ಡ್ ಇನಿಕ್ಲ ರಾಜದಂಡೊಗು ಅರಸುಲೆ ಮಾನಾದಿಗೆ ತಿಕ್ಕೊಂದುಂಡು.ರಾಜದಂಡೊನು ತಮಿಳ್ಡ್ ಸೆಂಗೋಲ್ ಪನ್ಪೆರ್.ತುಳು,ಕನ್ನಡೊಡು ರಾಜ/ನ್ಯಾಯ ದಂಡ ಪನ್ಪೆರ್.ಧರ್ಮದ ಸಂಕೇತ ಆಯಿನ ,ನ್ಯಾಯದ ಸಂಕೇತ ಆಯಿನ ನ್ಯಾಯ,ಧರ್ಮ ದಂಡೊನು ರಾಜ ದಂಡಂದ್ ಪನ್ಪೆರ್.ರಾಜ ದಂಡೊನು ತೂನಗ,ಅವೆನ್ ಗಲಸೊಂತ್ ನ ಅರಸುಲೆನ್ ತೂನಗ ಮೂಲ ದ್ರಾವಿಡ ಜನಾಂಗ ಮುಲ್ತ ಮೂಲ ಜನಾಂಗಂದ್ ಲ ಅರ್ಥ ಮಲ್ತೊನೊಲಿ.
ಚಿತ್ರ ಬೊಕ್ಕ ಪೊಲಬು-ವಿ.ಕೆ.ವಾಲ್ಪಾಡಿ.ಹಿರಿಯ ಪತ್ರಕರ್ತೆರ್.
ದೈವಾರಾದನೆಡ್ ಅಯಾ ಪ್ರದೇಶಾಚಾರಂದಿಪ್ಪುಂಡು.ಒಂಜಿ ತಿಕ್ ಡ್ ಸರಿ ಇತ್ತ್ ನವು ನನೊಂಜಿ ತಿಕ್ ಡ್ ತಪ್ಪಾದಿಪ್ಪು.ಅಂಚಾಂದ್ ಅವು ಸರಿ ಉಂದು ತಪ್ಪುಂದು ದೈವಾರಾದನೆದ ಆಚರಣೆಡ್ ಪನೆರೆ ಬಂಙ.ಅಕ್ಲೆ ಪೂರ್ವ ಹಿರಿಯಾಕ್ಲ್ ಮಲ್ತಿ ಕಟ್ಟ್ ನ್ ಅಕ್ಲ್ ಪಾಲಿತೊಂದು ಪೋವೊಡು.ನಮ ಪೊಸತಾದ್ ಒಂಜಿ ಕಟ್ಟ್ ಮಲ್ತ್ ದ್ ಅವೆನ್ ಪೂರೆರ್ಲ ಪಾಲಿಪೊಡು ಪಂಡ ಸರಿಯತ್ತ್.
ದೈವ ಕುದುರೆ ಬಂಡಿದ ಮಿತ್ತ್. ಚಿತ್ರ-ಮಧುಸೂದನ್ ಶೆಟ್ಟಿ
ಉಲ್ಲಾಲ್ದಿ ದೈವ ಚಿತ್ತಾರಿ ಚಾವಡಿ ಪೈವಳಿಕೆ
ದೈವಸಾನೊಡು ದೈವೊನೇ ಉಪ್ಪೊಡು ವಿನಃ ದೇವೆರತ್ತ್.ದೇವಸಾನೊಡು ದೇವೆರೇ ಉಪ್ಪೊಡು ವಿನಃ ದೈವೊಲತ್ತ್. ದಾಯೆ ಪಂಡ ತುಳುನಾಡ್ ಡ್ ಮೂಲೊಡು ದೈವಸಾನೊಲೆ ಇತ್ತ್ ನಿ.
ಇನಿ ತುಳುವೆರೆಗ್ ದೈವಾರಾದನೆದ ಮಿತ್ತ್ ವಿಶ್ವಾಸ ಪೋವೊಂದುಂಡು.ಇಂಚಾಯೆರೆ ಕಾರಣ ನಮನೆ.ದುಂಬು ದೈವಾರಾದನೆಡ್ ಒಂಜಿ ಶಿಸ್ತು ಇತ್ತ್ಂಡ್,ದೈವದ ಕಲೆಕಾರ್ನಿಕ ಇತ್ತ್ಂಡ್.ದೈವದ ಮಿತ್ತ್ ಭಕ್ತಿ ಇತ್ತ್ಂಡ್. ಇನಿತ ಕಟ್ಟುನಕುಲ್ನ ಅಬತಾರ ತೂದು ಜನೊಕ್ಲೆಗ್ ದೈವಾರಾದನೆದ ಮಿತ್ತ್ ವಿಶ್ವಾಸ ಕಮ್ಮಿಯಾವೊಂದುಂಡು.ಇಂಚಿನ ಅಬತಾರೊಲು ದುಂಬಿಜ್ಜಾಂಡ್,ವಾ ಸಂದಿ ಪಾಡ್ದನೊಲೆಡ್ಲಾ ಈ ಇಚಾರ ಇಜ್ಜಿ.ತುಳು ನೆಲತ ಗಡಿ ಪುಡೆ ಬುಡ್ದು ಬೇತೆ ಓಲ್ಲಾ ದೈವಾರಾದನೆ ಮಲ್ಪೆರಿಜ್ಜಿ.ದೈವಾರಾದನೆ ಭಕ್ತಿನ್ ಬುಡ್ದು ಕಾಸ್ ದ ಪಿರವು ಪೋವೊಂದುಂಡು.ಇನಿ ನಮ್ಮ ತುಳು ನೆಲತ ಕಲಾವಿದೆರ್ ಆಟ,ನಾಟಕ,ಸಿನೆಮೊಲೆಡ್ ದೈವದ ವೇಸ ಪಾಡ್ದ್ ತೋಜಾಯೆರೆ ಸುರು ಮಲ್ತ್ ದ್ ದೈವೊಲ್ನ ಮಿತ್ತ ವಿಶ್ವಾಸ ಜನೊಕ್ಲೆಗ್ ಕಮ್ಮಿಯಾವೊಂದುಂಡು.ಉಂದೆರ್ದಾದ್ ದೈವೊಲೆನ ಬಗೆಟ್ ತೆರಿಯಂದಿನಕುಲು ದೈವದ ಛದ್ಮ ವೇಷ ಪಾಡೊಂದುಲ್ಲೆರ್.ಅಕ್ಲೆಗ್ ತುಳುವೆರೆ ಆರಾದನೆದ ದೈವ ಛದ್ಮವೇಷದ ವೇಷಾದ್ ಪೋಂಡ್.ಅಕ್ಲೆಗ್ ಮುಲ್ತ ದೈವದ ಬಗೆಟ್ ತೆರಿಯಂದಿನೆರ್ದಾದ್ ದೈವೊನ್ಲಾ ಆಟದ ವೇಷಂದೆನ್ನಿದ್ ಕಟ್ಟುವೆರ್.
ಪಂಜಿದ ಮೇಲ್ಡ್ ಕುಲ್ದಿನ ನರಮಾನಿ ಮೋನೆದ ದೈವ ಉದ್ರಾಂಡಿ
ಕಲಾವಿದೆರ್ಡ ಕೇಂಡ ಎಂಕುಲು ದೈವದ ಕಾರ್ನಿಕೊನು ಪ್ರಚಾರ ಮಲ್ತೊಂದುಲ್ಲಂದ್ ಪನೊಂದುಲ್ಲೆರ್.ದೈವದ ಕಲೆ ಕಾರ್ನಿಕೊನು ಸಿನೆಮ,ನಾಟಕ,ಆಟೊಡು ತೋಜಾದ್ ಪ್ರಚಾರ ಮಲ್ಪೊಡುಂದಿಜ್ಜಿ.ದೈವದ ಕಾರ್ನಿಕ ತೆರಿಯೊಡಂಡ ದೈವೊಲೆಗ್ಂದ್ ಉಪ್ಪುನ ಕೊಡಿಯಡಿಕ್ ಬತ್ತ್ ದ್ ಪಿಂದೊನಡ್.ದುಂಬು ನಮನ್ ನಮ್ಮ ಹಿರಿಯಾಕ್ಲು ದೈವದ ಕಲೊಕು ಲೆತೊಂದು ಪೋದು ದೈವದ ಇಚಾರ ತೆರಿಪಾವೊಂತೆರ್.ಅವೆನ್ ಅಡೆಗೇ ಪೋದು ಪಿಂದೊನೊಡು ವಿನಃ ಆಟ,ನಾಟಕ,ಸಿನೆಮಾ,ದಾರಾವಾಹಿಲೆಡ್ ತೆರಿಯೊನುನ ಅಗತ್ಯ ಇಜ್ಜಿ.ಅಂಚನೆ ದೈವದ ದಾದ ಇಚಾರ ಇತ್ತ್ಂಡಲ ದೈವದ ಕೊಡಿಯಡಿಟೇ ತೂವೊಡು ವಿನಃ ಅವೆನ್ ಆಟ ಸಿನೆಮಾ ನಾಟಕೊಡು ತೂಪಿನತ್ತ್.ದೈವಾರಾದನೆ ದೈವಸಾನದ ಗಡಿಪುಡೆ ಬುಡ್ದು ಬೇರೊಗುಂದು ಪಿದಯಿ ಪೋಪುನ ಬೊಡ್ಚಿ.
ಉಲ್ಲಾಕ್ಲೆನ ಸಿರಿಮುಡಿ
ದೈವೊಲೆಗ್ ಪನಿವಾರ ಪಾಡ್ದ್ ನಿ
ಒಂಜಿ ಕಾಲೊಡು ಉರ್ಪೆಲರಿಟ್ ದೀವೊಂತಿ ಸುತ್ತೆ ಇನಿ ಮಯಕಾದ್ ಬೊಳಂತೆಡ್ ಗಣಪತಿ ದೀಯ.ಗಿಂಡೆ ನೀರ್ ದ ತಲಿಪು ಮಯಕಾದ್ ಬೊಳ್ಳಿದ ಕಲಶ ಬತ್ತ್ಂಡ್.ಚಿತ್ರ-ಬ್ಯೂಟಿ ಆಫ್ ತುಳುನಾಡ್ 
ಬೋರಿದ ಮೋನೆಗ್ ಅರ್ದಾಲ ಪೂಜಿಯೆರ್
ಪ್ಯಾಂಟ್ ಪಾಡೊಂದು ದೈವದ ಪಲ್ಲೆಂಕಿ ತುಂಬುನಿ
ಗಿರಾವು ದೈವದ ಮುಗ.ಇತ್ತೆ ಕಿರಾತೇಶ್ವರ ಆತ್ಂಡ್
ಮಣೇಲ್ ಮಟ್ಟಿ ಬಾರೆ ಬಿತ್ತಿಲ್ ಪಂಜಿದ ಮಿತ್ತ್ ಕುಲ್ದಿನ ಅಣ್ಣಪ್ಪ ಸ್ವಾಮಿ
ದೈವೊಲೆಗ್ ಪಿಲಿತ ಏಸೊಗು ನೋಟುದ ಮಾಲೆ ಪಾಡುಲೆಕ ಪಾಡೆರೆ ಸುರು ಮಲ್ತೆರ್.
ಅರಸು ದೈವೊಲ್ನ ಸಿರಿಮುಡಿಟ್ ಸೂರ್ಯ ಚಂದ್ರೆ ಮಯಕ
ಉಲ್ಲಾಲ್ದಿನ ಸಿರಿ ಮುಡಿತ ಪಿರವುದ ಪೂತ ಅಲಂಕಾರ ಬೊಕ್ಕ ಜಡೆ
ಜುಮಾದಿ ದೈವ ತಾರೆಬರಿ 
.jpg)
ಮಾಕಾಲ್ದಿನ ನೀಲಿ ಬಣ್ಣದ ಮೋನೆದ ರಂಗ್.ನೀಲಿ ರಂಗ್ ಯಕ್ಷಗಾನದ ರಾಮ,ಕೃಷ್ಣ,ವಿಷ್ಣುಗು ಪಾಡ್ವೆರ್.ದೈವೊಲೆಗ್ ಮಂಜಲ್ದ ಅರದಲ ಮಾತ್ರ. 
ತುಳುನಾಡ ದೈವನಾ ಆಟದ ದೇವಿಯಾ ಗೊತ್ತಾಪುಜಿ
ದೈವೊಲೆಗ್ ಸಂಸ್ಕೃತದ ದೇವತಾಭ್ಯಾಂ,ನಮಃ ಬೈದ್ಂಡ್
ಪಿಲ್ಚಂಡಿ ದೈವದ ಮೋನೆದ ಅರ್ದಾಲ ಪೋದು ಪಿಲಿತ ಏಸದ ಮೋನೆದ ಬಣ್ಣ ಬೈದ್ಂಡ್ 
ಪಿಲ್ಚಂಡಿ ದೈವ
ಮಂಡಲ ಬರೆನಗ ದೈವ ಜುಮಾದಿನ ಚಿತ್ರ ಬುಡ್ಪಾದ್ ನಿ. 
ಪೊಸ ನಮುನೆದ ದೈವ ಮುಗ 
ದುಂಬು ನಾಗ ಮಂಡಲ ಸುರಾನಗ ಅವ್ಲು ಪಂತೊಲು ನಡತೊಂತ್ ಲೆಕ ತೋಜೊಂತ.ಪಂಡ ಅಲ್ತ್ ರ್ದ್ ನಮ್ಮ ಜಾಸ್ತಿ ಉಪ್ಪೊಡುಂದು ಪಂತೊಡು ಮಲ್ತೊಂತೆರ್.ಇನಿ ಅಷ್ಟಮಂಗಲ ಪ್ರಸ್ನೆ ಚಿಂತನೆಲು ಅವ್ವೇ ಸಾದಿಡ್ ಪೋವೊಂದುಲ್ಲ.ಅವ್ಲು ಆತ್ ದಿನತ ಪ್ರಶ್ನೆಗೆ,ಮೂಲು ಅಲ್ತ್ ಜಾಸ್ತಿ ಆವೊಡು,ಅವ್ಲು ಆತ್ ದಿನತ ಬ್ರಹ್ಮ ಕಲಶಗೆ,ಮೂಲು ಅಲ್ತ್ ಜಾಸ್ತಿ ದಿನ ಆವೊಡುಂದು ಪಂತ ನಡತೊಂದುಂಡು.ದೈವದ ಕಲೊಕು ಅಗತ್ಯ ಇಜ್ಜಿಂಡಲ ಬಿರ್ಸಾದಿಗೆ ತೋಜಾಯೆರೆ ಪೋದು ಇನಿ ದೈವದ ಮೂಲ ಪುದರುಲು ಮಯಕಾದ್ ಕೇರಳದ ಪ್ರಶ್ನೆ ಚಿಂತನೆದಕುಲು ಪಂಡಿ ಪುರಾಣದ ಪುದರ್ ಲೆನ್ ದೈವೊಗು ದೀದ್ ಹಿರಿಯಾಕ್ಲ್ ದೀನ ಪುದರ್ ಮದತ್ ದ್ ಪೊಸತ್ ನ್ ತೋಡುನ ಮರ್ಲ್ ಡ್ ಪರತ್ ನ್ ನಿಗಿತ್ ಬುಡ್ಯ.ನಮ್ಮ ಊರ್ದ ಬಲ್ಯಾಯೆರ್,ಜೋಯಿಸೆರ್ ನಂಕ್ ಬೊಡ್ಚಿ,ದೂರದ ಕೇರಳದ ಪ್ರಶ್ನೆ ಚಿಂತನೆದಕ್ಲೆ ನಂಕ್ ಬೋಡು.ಅಕ್ಲೆ ಕ್ರಮೊನು ನಮ್ಮ ದೈವಾರಾದನೆಗ್ ಅಕ್ಲ್ ಕನನಗಲ ಮನಿಪಂದೆ ಕುಲ್ಯ.ನಮ್ಮ ಅರಸುದೈವೊಲ್ನ,ರಾಜಂದೈವೊಲ್ನ ಒರಿನ ದೈವೊಲ್ನ ಕೆರಮ ಬೇತೆ ಬೇತೆ ಇತ್ತ್ಂಡಲ ಅಕುಲು ಅವೆನ್ ಅಕ್ಲೆ ಅಲಚನೆದಲೆಕ ಒಂಜೇ ಮಲ್ಪೆರೆ ಪಿದಡೊಂದುಲ್ಲೆರ್.ತಗೆ ತಂಗಡಿನ ಒರುತ ಕಲ್ಲುರ್ಟಿ ಪಂಜುರ್ಲಿನ್ ಬೇತೆ ಬೇತೆ ಕೋಣೆಡ್ ಕುಲ್ಲಾವೊಂದುಲ್ಲೆರ್. ಪಂಜುರ್ಲಿನ ಬಲತ ಬಾಗೊಡು ಕುಲ್ಲೊಡಾಯಿನ ಕಲ್ಲುರ್ಟಿನ್ ಎಡತ ಬಾಗೊಡು ಕುಲ್ಲಾಯೆರೆ ಪನ್ಪೆರ್.ಎಡತ ಬಾಗೊಡು ಕುಲ್ಲವುನೆತ ಅರ್ಥ ಬೇತೆನೇ ಆಪುಂಡು
ದೈವದ ಕಾರ ಗಗ್ಗರೊನು ಕಟ್ಟುನಾರ್ ತಿಗಲೆಡ್ ಟಾಟೂ ಪಾಡುನವು ಸರಿಯತ್ತ್.
ದೈವದ ಅಣಿತ ಅಂಚಿಂಚಿ ದೇವೆರೆ ಚಿತ್ರ 
ಮಲರಾಯನ ಅಣಿತ ಪಿರವು ಪೊಣ್ಣನ ಜಿಡೆ ಬುಡ್ಪಾಯೆರ್
ದೈವದ ಅಣಿತ ಪಿರವು ದೈವೊಲ್ನ ಮುಗತಟ್ಟೆಡ್ ದೀನ ಮುಗತ ಚಿತ್ರ ಬುಡ್ಪಾವುನ ಕಾಲ ಬತ್ತ್ಂಡ್
ದೈವದ ಅರದಾಲ ಮಯಕಾದ್ ಪೋಂಡ್ 
ಮಂತ್ರಜಾವದೆಗ್ ಯೋಗ ದಂಡ,ಕಮಂಡಲ ಬೈದ್ಂಡ್
ಕಾಜು ಕುಜುಂಬ ದೈವ
ಐನ್ ವರ್ಸೊಗೊರ ನಡಪುನ ನೇಮಪಂಚವಾರ್ಷಿಕ ಕೋಲಂದಾಂಡ್
ಕಲ್ಕುಡ ದೈವ ಕುದುರೆ ಬಂಡಿದ ಮಿತ್ತ್ ಕುಲ್ದು ಸವಾರಿ.ಪಳ್ಳಿ ಅಡಪಾಡಿ ದೈವಸಾನ. ಚಿತ್ರ - ಉಡುಪೀಯ ಕಂಡೀರಾ 
ಕಲ್ಕುಡ , ವರ್ತೆ ಕುದುರೆ ಬಂಡಿಯೇರ್ದ್ ವಲಸರಿ .ಪಳ್ಳಿ ಅಡಪಾಡಿ
ಒವ್ವೇ ಒಂಜಿ ದೈವ ರಡ್ರಡ್ಡ್ ಪಂಚ ಜೀಟಿಗೆ,ಮೂಜಿ ಮೂಜಿ ಒತ್ತೆ ಜೀಟಿಗೆ ಒಟ್ಟಿಗೆ ಪತೊನುನ ಕೆರಮ ಇಜ್ಜಿ. 
ಅರಸುಲೆ ಸಿತರಿ ಮುಡಿಟ್ ಸೂರ್ಯ ಚಂದ್ರೆ ಮಯ
ದೈವ ಇಂಚ ಬಾಲೆನ್ ತಟೊನುನ ಕೆರಮ ಇಜ್ಜಿ.ಬಾಲೆ ಮಡೆ ಮಲ್ತ್ಂಡ ಏರ್ ಜವಾಬ್ದಾರಿ
ಮಂತ್ರಜಾವದೆಗ್ ಕಟ್ಟ್ ನಾರ್ನ ನಾಲಾಯಿಡ್ ಪೊಂಜೊವೊರ್ತಿ ಕರ್ಪೂರ ಪೊತ್ತದ್ ದೀತ್ ನಿ
ಕೇರಳ ಭಾಗದ ದೈವದ ಮೋನೆದ ಅರದಾಲ
ಇನಿ ಪೊಣ್ಣು ದೈವೊಲೆಗ್ ಕಟ್ಟುನಕುಲು ಮೋನೆಗ್ ಆಟದ ಪೊಸ ಪೊಸ ರಂಗ್ ಪಾಡ್ದ್ ಅರ್ದಾಲ ಪಾಡೊಂದಿಜ್ಜೆರ್ಅಂಚನೆ ಆಟದಕುಲು ಗಲಸುನ ತುತ್ತೈತ ಮಲ್ತ್ ದ್ ಮೂಲ ದೈವದ ತುತ್ತೈತ ಬುಡ್ದು ಬುಡ್ತೆರ್.ಅಕ್ಲೆ ತರೆಟ್ ತಾನ್ ದೈವೊಗು ಕಟ್ಟ್ ದ್ ನಿಂದಿಜ್ಜಿ.ತಾನ್ ಆಟೊಡು ಪಾಡುನ ಸಿರಿಯೇಸಂದ್ ಎನ್ನಿದೆರ್. 
ತುಳುನಾಡ ದೈವೊಲೆಗ್ ಬೊಲ್ದು ಬೊಕ್ಕ ಕೇಪುಳ ರಂಗ್ಂದ್ ಇಂಚಿನವೇ ರಂಗ್ ದ ತುತ್ತೈತಂದ್ ನಮ್ಮ ಹಿರಿಯಾಕ್ಲು ಮಲ್ತ್ ದಿತ್ತೆರ್.ಆಂಡ ನಮ ಅವೆನ್ ಕಳೆಯೊಂದುಲ್ಲ.ಉಂದು ನಮ್ಮ ತುಲುವ ಮಣ್ಣ ಸಂಸ್ಕೃತಿಗ್ ನಮ ಮಲ್ಪುನ ಅನ್ಯಾಯ.ನಮ್ಮತುಳು ಮಣ್ಣ್ ದ ದೈವಾರಾದನೆಗಿಜ್ಜಂದಿ ಕೇಸರಿ ರಂಗ್ ದ ತುತ್ತೈತ ನಮಕ್ ತೂವೆರೆ ತಿಕ್ಕೊಂದುಂಡು.ಉಂದು ಸಾಂಸ್ಕೃತಿಕ ಧಾಳಿಯಾ,ಯಜಮಾನಿಕೆನಾ ದಾದಂದ್ ತೆರಿಯೊಂದಿಜ್ಜಿ 
ದೈವೊಲೆಗ್ ಪಾಲೆಡ್/ತಡ್ಪೆಡ್ ಕೊರೊಂತಿ ಆವಾರಾಮೃತ ಪ್ಲಾಷ್ಟಿಕ್ ತಟ್ಟೆಡ್ ಕೊರ್ಪುನ ಪರಿಸ್ಥಿತಿ ಬತ್ತ್ಂಡ್
ದೈವದ ಕೊಡಿಯಡಿತ ಕಿರ್ ವಾಲ್/ಬಾಲ್ ಬಂಡಾರೊನು ಕಟ್ಟುನಕುಲು ಸಿನೆಮಾ,ನಾಟಕದಕುಲೆಗ್ ಕೊರ್ದು ಇನಿ ಈ ಪರಿಸ್ಥಿತಿ ಬೈದ್,ಡ್.ನಮ್ಮ ತುಳುನಾಡ ವ್ಯಾಪ್ತಿದುಲಯಿ ನಡಪುನ ದೈವಾರಾದನೆನ್ ಪಿದಯಿದ ಜಗತ್ತ್ ಗ್ ತೋಜಾದ್ ಮಲ್ಲ ಸಾಧನೆ ಮಲ್ಪೆರೆ ದಾಲ ಇಜ್ಜಿ
ಪಿಲಿ ಬೂತ ಇರ್ದೆ ಕದಿಕೆ ಚಾವಡಿ
ಅಣ್ಣಪ್ಪ ಸ್ವಾಮಿ ದೈವ ಕಾಂಚೋಡು ಬಾಳಿಲ
ಇಂಚಲಾ ತುಳುನಾಡ್ ಡ್ ದೈವಾರಾದನೆ ನಡತೊಂದುಂಡು.
ದೈವೊಲ್ನ ತುತ್ತೈತದ ರಂಗ್ ಬದಲ್ಂಡ್.ಓಡಮರಾಯ ದೈವ ತಿಂಗಳೆ ಗರಡಿ ಹೆಬ್ರಿ
.jpg)
ಕೇಪುಲ ರಂಗ್ ತುತ್ತೈತ,ಸೂರ್ಯ ಚಂದ್ರೆ ಮಯಕ
ಮಲರಾಯ ದೈವ ಪಿಲಿಗುಂಡ ಕೂಟೇಲು
ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾನಗ ದೈವೊಲೆನ್ ಬುಡ್ದು ಅಡೆ ದೇವೆರೆನ್ ಕುಲ್ಲಾಯೆರ್.ದೈವೊಲೆನ್ ಬುಡೆರೆ ಆವಂದಿ ಜಾಗೆಡ್ ದೇವೆರೆ ಗುಂಡದುಲಯಿ ದೇವೆರೆ ಬಲತ ಬಾಗೊಡಾ,ಅಗ್ನಿಮೂಲೆಡಾ ದೈವೊಲೆನ್ ಕುಲ್ಲಾಯೆರ್.
ನಮ್ಮ ಮೂಲ ದೈವಾರಾದನೆ.ಅಂಚಾದ್ ನಮ ಸುರುಕು ದೈವಂದ್ ದೈವ ದೇವೆರ್ ದೀಲೆಕಂದ್ ಪನ್ಪ.ದೈವೊಲೆನ ಮಾತ ಕಟ್ಟ್ ಕಟ್ಲೆ ನ್ ಬದಲ್ತ್ ನಕ್ಲೆಗ್,ದೈವದ ಪುದರ್ ಬದಲ್ತ್ ನಕ್ಲೆಗ್, ಆಣ್ ದೈವೊನು ಪೊಣ್ಣು ಮಲ್ತ್ ನಕ್ಲೆಗ್ ದೈವ ದೇವೆರೆನ್ ದೇವೆರ್ ದೈವ ಮಲ್ಪೆರೆ ನನಲಾ ಆತ್ ಜಿ.ಅವು ದೈವಾರಾದನೆದ ತಾಕತ್ತ್.
ಇನಿ ಕೆಲವು ಪ್ರಶ್ನೆಚಿಂತನೆದಕ್ಲ್ ಜುಮಾದಿನ್ ಧೂಮಾವತಿ ಪನ್ಪುನ ಮಾತ್ರ ಅತ್ತಂದೆ ನಿಕುಲು ಧೂಮಾವತಿಗ್ ಪಂಜಿದ ಬಂಡಿದ ಬದಲ್ ಕಕ್ಕೆದ ಬಂಡಿ ಮಲ್ಪುಲೆ ಪನೊಂದುಲ್ಲೆರ್.ಓಡೆಗೆತ್ತ್ಂಡ್ ದೈವಾರಾದನೆದ ಸ್ಥಿತಿ?.ಅಂಚನೆ ದೈವದ ಕಲೊಟು ಕೆಲವೆರ್ ಕಟ್ಟುನಕುಲು ಜನೊಕ್ಲೆನ್ ಪೋಡಿ ಕಟ್ಟಾವೊಂದುಲ್ಲೆರ್.ಪೆಟ್ಟ್ ಒಂಜಿ ರಡ್ಡ್ ತುಂಡುಂದಾ,ನೆತ್ತೆರ್ ಕಕ್ಕಾವೆಂದಾ ಪನೊಂದುಲ್ಲೆರ್.ದೈವ ಏಪಲ ಅಂಚ ಮಲ್ಪಂದ್.
ದೇವೆರೆ ಆರಾದನೆಡ್ ಕಂಡನಿ ಬುಡೆದಿನ ಆರಾದನೆ ಉಂಡು.ದೈವೊಲೆಡಿಜ್ಜಿ.ಅಂಚಾದ್ ಉಲ್ಲಾಯ ಉಲ್ಲಾಲ್ದಿನ್ ಈಸರ ಪಾರೊತಿ ಪನ್ಪುನವು ಸುದ್ದ ತಪ್ಪು.ದೈವಾರಾದನೆಡ್ ತನ್ನಿಮಾನಿಗಗ್ ಮದಿಮೆ ಆಪುನ ಕೆರಮ ತೋಜಾವೆರ್.
ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾದ್ ದೈವೊಲು ದೇವೆರಾಯಿಲೆಕ,ಕೇತ್ರುಲ್ಲಾಯೆ/ಕ್ಷೇತ್ರದ ಉಲ್ಲಾಯೆ ಆದಿತ್ತಿ ಒಡೆಯೆ ಆದಿತ್ತಿ ದೈವೊಲು ಕ್ಷೇತ್ರಪಾಲೆ ಪನ್ಪಿ ಚಾಕಿರಿದಾಯೆ,ಬೇಲೆದಾಯೆ ಆಯಿಲೆಕ,ತುಳುವ ಮಣ್ಣ್ ದ,ತುಳು ಧರ್ಮದ ಸ್ವತಂತ್ರ ಸಗ್ತಿಲಾಯಿನ ದೈವೊಲು ಪರಿವಾರ ಸಗ್ತಿಲಾಯಿಲೆಕ,
ಇನಿ ಕುಡ ದೈವದ ಪುದರ್ ಬದಲ್ತ್ ದ್ ದೇವೆರ್ ಮಲ್ಪುನ,ಕಟ್ಟ್ ಕಟ್ಲೆಲೆನ್,ಚಾಕಿರಿ ಭಾಗೊಲೆನ್ ಪೊಳಿಪುನ ವ್ಯವಸ್ಥಿತ ಉನ್ನಾರ ನಡತೊಂದುಂಡು.ತುಳುವೆರೆಗ್ ನನಲ ಜಡ ಬುಡ್ಜಿಂಡ,ಬುದ್ಧಿ ಬತ್ತ್ ಜಿಂಡ ದೈವಾರಾದನೆ ಇತ್ತ್ಂಡ್ ಪನ್ಪುನವೇ ಒಂಜಾತ್ ವರ್ಸೊಡು ಮಾಜಿದ್ ಪೋವು.
ದಾಯೆ ಪಂಡ ದೈವದ ಗಂದಗಾಳಿ ತೆರಿಯಂದಿ,ಒಲ್ತನಾ ಪ್ರಶ್ನೆ ಚಿಂತನೆದಕುಲು ಪಂಡೆರ್ಂದ್ ದಾಖಲೆಗಿತ್ತ್ ನ ಮಣೆ ಮಂಚಾವುನು ಇತ್ತೆನೇ ಪೊತ್ತದಾತ್ಂಡ್.ಮುಗ ಮೂರ್ತಿಲೆನ್ ನೀರ್ ಗ್ ಪಾಡ್ ದಾತ್ಂಡ್, ಮಣೆ ಮಂಚ,ಮುಗ ಮೂರ್ತಿ ಪೊಸತ್ ಮಲ್ತಾತ್ಂಡ್.
ಅವ್ವೆ ಪ್ರಶ್ನೆ ಚಿಂತನೆನಕುಲು ಎದುರುಂತುದು ದೈವಾರಾದನೆದ ಪಿರಾಕ್ ಗ್ ಸಾಕ್ಷಿ ಓಂಡು ಕೇಂಡ ತರೆ ತಗ್ಗಾದ್ ನೆಲ ತೂಪಿನ ಕಾಲ ಬರು.ಇಂಚಿಪ್ಪ ಒಂಜಿ ತಿಕ್ ಡ್ ಪ್ರಶ್ನೆ ದೀನಕುಲು ಜುಮಾದಿನ್ ಧೂಮಾವತಿ ಮಲ್ತ್ ದ್ ವಾಹನ ಕಕ್ಕೆ ಮಲ್ಪೆರೆ ಪಂಡೆರ್.ಆಂಡ ತೆರಿನಕುಲು ಕಕ್ಕೆ ಬೊಡ್ಚಿ ದುಂಬುದ ಪಂಜಿ ವಾನ ಯಾವುಂದೇ ಪನ್ನಗ ಮನಿಪಂದೆ ಕುಲ್ಯೆರ್.
ದೈವೊಲೆಗ್ ಪನೆರೆ ವಾ ವೇದ ಶಾಸ್ತ್ರೊಡ್ಲಾ ವಾ ಮಂತ್ರ ಶ್ಲೋಕಲ ಇಜ್ಜಿ.ಸಂಧಿ ಪಾಡ್ದನೊಲು ಮಾತ್ರ ಉಪ್ಪುನಿ.
ದೈವೊಲೆಗ್ ಪಾರಿ/ಮದಿಪು ಪನ್ಪುನವು ಇಜ್ಜಿ.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಸ್ಪರ್ದೆ ಮಲ್ತೊಂದುಲ್ಲೆರ್,ಮೈಕ್ ಬೇತೆ,ಪಾರಿದ ಪ್ರಚಾರೊಗು.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್ ಗಂಟೆಕಟ್ಲೆ ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್ ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಪ್ಪುನವು ನಿಜವಾದ್ ಲ ತಪ್ಪು.
ದೈವದ ಕಲೊಟು ದೈವದ ಕಟ್ಟ್ ಬುಡ್ದು ಪೊಸತೊಂಜಿ ಸರಿಯತ್ತ್
ಕಾಲದ ಪರಪುಡು ಕರದ್ ಪೋವೊಂದಿಪ್ಪುನ,ಆರಾದನೆದ ಎತ್ಯಯೊಡು ಅಳಿಯಂತ್ರ ಸಾದಿಡುಪ್ಪುನ ತುಳುವ ಧರ್ಮದ ದೈವಾರಾದನೆದ ಮೂಲ ನಂಬೊಳಿಗೆ,ಆರಾದನೆದ ಪದಿನಾಜಿ ಕಟ್ಲೆಲು,ಆಚರಣೆಲೆನ್ ಪೆರಿಯಾಕ್ಲ್ ಪಾಡ್ದ್ ಕೊರ್ನ ಸಾದಿಡೆ ಕುಡೊರ ತುಳುವ ಮಣ್ಣ್ ಡ್ ದೆರ್ತ್ ಪತ್ತುನ ಕಾಲ ಬೈದ್ಂಡ್.ಪೊಸತ್ ನ್ ತೋಡುದು,ಪರತ್ ನ್ ನಿಗಿತ್ ದ್ ಮಣ್ಣೇ ಮರಿಯಾದ್ ಕೊಡಪುನ ದುಂಬು ಮೂಲ ನಂಬೊಳಿಗೆ ದಾದ ಪನ್ಪುನೆನ್ ಪೆರಿಯಾಕ್ಲೆಡ ಕೇಂದ್ ಪಿಂದೊನುಗ.
.jpg)
ಅಷ್ಟ ಮಂಗಲ ಇಂಚಿಪ್ಪಿ ಪೊಸ ದೇಕಿದ ಪ್ರಶ್ನೆದ ಬದಲ್ ಪೆರಿಯಾಕ್ಲ್ ನಂಬೊಂದು ಬತ್ತಿ ದೈವದ ನುಡಿಕ್ ಬಿಲೆ ಕೊರ್ಕ.ಅಂಚನೆ ಮೂಲ ನಂಬೊಲಿಗೆದ ಬಲ್ಯಾಯನ ನಿಮಿತ್ತ ನೋಟೊನು ಕುಡೊರ ಮಾನಿತೊನ್ಗ. ಬ್ರಹ್ಮಕಲಸ ದಾಂತೆ ತುಳುವೆರ್ ಮೂಲೊಡು ದೈವದ ಮಣೆಮಂಚದೆದುರು ಹಿರಿಯಾಕ್ಲೆ ಮದಿಪುದ ಪಾತೆರೊಗು ಬಿಲೆ ಕೊರ್ದು ಸಾನ ಗಿರಿತ್ ದ್ ಸಾನ ಕಟ್ಟಾದ್ ದೈವೊಲೆನ್ ಅಂದ್ ಮಲ್ಪುನ ಸಾನದೊಕ್ಕೆಲ್ ನ್ ಮೂಲ ಕಟ್ಲೆಡೆ ಮಲ್ಪುನ ಕಾಲ ಒದಗ್ ದ್ ಬರೊಂದುಂಡು.
ತುಳುನಾಡ್ದ ಕಾಸರಗೋಡು,ಕುಡ್ಲ(ದ.ಕ),ಒಡಿಪು ಈ ಮೂಜಿ ಬಾಗೊಲೆಡ್ ಅಷ್ಟಮಂಗಲ,ಬ್ರಹ್ಮ ಕಲಶ ನಡತೊಂದಿತ್ತ್ ದ್ ದೇವೆರೆನ್ ತರೆಟ್ ತುಂಬುನ ಕೆರಮ ಮುಲ್ತ ಸಾನೊಲೆಡ್ ಮಾತ್ರ ತೂಯೆರೆ ತಿಕ್ಕುನಿ.ಇನಿ ತುಳುನಾಡ ದೈವಸಾನ,ಮಠೊಕು ಪೂರ ಅಗತ್ಯ ಇಜ್ಜಾಂದಿ ಅಷ್ಟಮಂಗಲ ಪ್ರಶ್ನೆ ,ಬ್ರಹ್ಮಕಲಶ ಬತ್ತ್ ದ್ ಅವ್ಲಿಪ್ಪಿ ಬೆಮ್ಮೆರೆನ್ ಮೂಲೆಗ್ ಪಾಡ್ದ್ ಅರೆನ ಬದಲ್ ಗ್ ಗಣಪತಿನ್ ತಾಪನೆ ಮಲ್ಪುವೆರ್.ಬ್ರಹ್ಮ ಕಲಶ ಮಲ್ತ್ ದ್ ಅವೆರ್ದ್ ಬೊಕ್ಕ ದೈವದ ಅಣಿತಲೆಕ ದಂಡಮಾಲೆಲ ಪಾಡ್ದ್ ದೇವೆರೆ ಬಲಿ ಮಲ್ತ್ ದ್ ದೈವದ ಬಲಿತ ಅನುಕರಣೆ ಮಲ್ತೊಂದುಲ್ಲೆರ್.ದೈವಾರಾದನೆದ ಬಗೆಟ್ ಪಾತೆರುನಕ್ಲೆನ್ ಲೆಪ್ಪಂದೆ ಧಾರ್ಮಿಕ ಉಪನ್ಯಾಸಂದ್ ದೇವೆರೆ ಬಗೆಟ್ ಪಾತೆರುನಕ್ಲೆನ್ ಲೆತ್ತ್ ದ್ ದೈವೊನು ದೇವೆರ್ ಮಲ್ತೊಂದುಲ್ಲೆರ್.ಇತ್ತೆ ಬಲಿ ತುಂಬುನ ನೂಲು ಪಾಡಿ ಸಂಸಾರೊಗ್ಲ ವಸಾಯ ಬರ್ರೆ ಸುರಾತ್ಂಡ್.ಇಂಚ ದೇವೆರೆ ಬಲಿ ಪೊಸತಾದ್ ಬತ್ತ್ ದ್ ಬೆಮ್ಮೆರೆನ್ ಮೂಲೆಗ್ ಪಾಡ್ಲೆಕ ದೈವೊಲೆನ್ ಮೂಲೆಗ್ ಪಾಡುನ ಕಾಲ ದೂರ ಇಜ್ಜಿಂದ್ ತೋಜುಂಡು.ಅವೆಕ್ ಉದಾರ್ಮೆ ಪಂಡ ಬೆಮ್ಮೆರೆ ಸುತ್ತೆ ದೀಪುನೌಲು ಗಣಪತಿ ದೀಪೆರ್.ಸುದ್ದ ಓಮ ದೀವೊಂತುನೌಲು ಗಣ ಓಮ ದೀಪೆರ್. 
ಜಠಾಧಾರಿ ದೈವ.ಜಠಾಧಾರಿಗ್ ಮೈಮೆ ನಡಪುಂಡು
ಮೂವೆರ್ ಉಳ್ಳಾಕುಲು ಬಲರಾಮ ಕೃಷ್ಣ ಸುಭದ್ರೆ ಆನಗ
ಪೊಸಪ್ಪೆನ/ಸತ್ಯ ಜಾವದೆನ ಗದ್ದಿಗೆದ ಬೊಂಬೆ.ಈ ಗದ್ದಿಗೆದ ಬೊಂಬೆ ಏರ್ ಪಂಡ ಮಮ್ಮಾಯಿ.ಬೊಂಡೊನು ಪೊರ್ಲುಡು ಇಡೀ ಕೆತ್ತ್ ದ್ ಬೊಂಬೆ ಮಲ್ಪುವೆರ್.ದೈವೊಗು ತೊಲಸಿ ಮಾಲೆ ಪಾಡೆರೆ ಇಜ್ಜಿ.ಗುಡಿ ಪತ್ತ್ಂಡ ಸತ್ಯ ಜಾವದೆ,ಇಲ್ಲ್ ಪತ್ತ್ಂಡ ಆಲ್ ಅಮ್ನೋರು,ಪೊಸಪ್ಪೆ.ಪುರಲ್ಡ್ ಭದ್ರಕಾಳಿಯಾದ್ ಆರಾದನೆ ಪಡೆಪುನಾಲ್ ಈ ಪೊಸಪ್ಪೆ.ಮಮ್ಮಾಯಿನ ಗದ್ದಿಗೆ ಏರ್ದೇ ಪೊಸಪ್ಪೆಗ್ ನೇಮ ನಡಪುನಿ.ಬೊಂಡೊನು ಕೆತ್ತ್ ದ್ ಪೆರೆಸ್ ದ್ ನರಮಾನಿಯನ ಮೋನೆದ ಒರು ಮಲ್ತ್ ದ್ ಕಲಸ/ಚೆಂಬುದ ಮಿತ್ತ್ ದೀದ್ ಪಿಂಗಾರೊಡು ಐತ ಮಲ್ತ್ ದ್ ಮಮ್ಮಾಯಿನ ಗದ್ದಿಗೆ ಏರಿ ಬೊಕ್ಕನೆ ಪೊಸಪ್ಪೆಗ್ ನೇಮ ನಡಪುನಿ.ಕುಟುಮದ ಪಂಜುರ್ಲಿ ತುಳುವೆರೆನ ಕುಟುಮದ ಕಾಪುದ ದೈವ ಆಂಡ ಅಪ್ಪೆನ ತಾನೊಡುಂತುದು ಕುಟುಮಪನು ಪಾಲಿಪುನಾಲ್ ಪೊಸಪ್ಪೆ/ಸತ್ಯ ಜಾವದೆ. .jpeg)
ಬಾದಾಮಿದ ಬನಶಂಕರಿ ದೇವಿ 
ಬನಶಂಕರಿ ದೇವಿಗ್ ಪುಣ್ಣಮೆದ ಲೆಕ್ಕೊಡು ದೈವದ ಅಣಿತ ಅಲಂಕಾರ ಮಲ್ದೆರ್
ಹೊಸಮ್ಮ ದೈವ ಪೊಸ ರೀತಿದ ಮೋನೆದ ಬಣ್ಣಗಾರಿಕೆ
ದರಿ-ತಾರೆ,ತಾರಿದ ನೀಟ ಕುಂದ,ಕಂಗ್ ದ ತಲಕೆದ ಅಡ್ಡ ರೀಪು 
ದೈವ ದರಿ ತುಡರ್ ಕೈಕೊನುನ ಬಾರೆದ ಬಂಬೆದ ಕುಂದ
ಶ್ರೀಮಂತ ರಾಜ ಗುಳಿಗೆ
.jpg)
ದೈವದ ಕೈಟ್ ಪೆಲಸ್ಟಿಕ್ ಬಟ್ಟಿ
ಹಿರಿಯೆರ್ ಪನ್ಪುನ ಪಾತೆರೊರ್ದು ಮಲ್ಲ ಮದ್ಯಸ್ಥಿಕೆಯತ್ತ್.ಅವ್ಲು ಕಾಸ್ ಗ್ ಪಾತೆರ,ಮೂಲು ಮನ ಬಗ್ತಿದ ಮದಿಪು.ಇನಿ ಕೆಲವು ಸಾನೊಲೆಡ್ ಒಂಜಾತ್ ವರ್ಸೊರ್ದಿಂಚಿ ನೇಮದಪಗ ಒಂಜಿ ಸುತ್ತು ಬಜನೆ ಪನೆರೆ ಸುರಾತ್ಂಡ್.ದೈವದ ಮುಗೊನು ಕಟಿ ಮಾನಿ ದೀದ್ ನೇಮ ಅನಗ ದೈವ ಆಯಿನವು ಸಾನದ ಉಲಯಿ ಪೋಯಿ ಸಾತ್ ಗ್ ದೇವಿಯಾದ್ ಅವ್ಲು ಕುಂಕುಮಾರ್ಚನೆ,ಕರ್ಪೂರಾರತಿ,ನವರಾತ್ರೆ ಪೂಜೆ ಸುರಾಂಡ್ ಪಂಡ ದೈವಸಾನ ದೂರಾದ್ ದೇವಸಾನ ಆಪುನ ಕಾಲ ದೂರ ಇಜ್ಜಿ. 
ಬೈಲ ಬಾಕುಡೆರೆ ಕುಕ್ಕಂಬಿಲ ಪ್ರಕೃತಿ ಆರಾದನೆ- ಇಚ್ಚಿಲಾಡಿ
ದೈವ ಪನ್ಪುನೆಕ್ ಸಾಗ್ಸಿಯಾದ್ ಬಂಟ್ವಾಳ ತಾಲೂಕುದ ಮುಲ್ಕಾಜೆ ಮಾಡ(ಮಾಡ ಪನ್ಪುನವು ಉಲ್ಲಾಲ್ದಿ,ಲೆಕ್ಕೆಸಿರಿಕ್ ಉಪ್ಪುಂಡು) ,ಮಣಿ ನಾಲ್ಕೂರು(ಭಂಡಾರದೊಟ್ಟುಗು ಮಣಿ ಬರೊಂತಿ ನಾಲೂರ ಮನೆತನೊಲು ಇತ್ತಿಪ್ಪು)ಕೈತಲ್ದ ದೈವಸ್ಥಳ 
ದೈವದ ಭಂಡಾರ ಕೇರ್ಪುನ ಕೊಡಿಯಡಿ.
ಲೆಕ್ಕೆ ಸಿರಿ ದೈವದ ಗಗ್ಗರದೆಚ್ಚಿ 
ಲೆಕ್ಕೆ ಸಿರಿ ದೈವದ ಧರ್ಮನೇಮ ಸಂದೈತ ಆಂಡ್ಂದ್ ತೂಯೆರೆ ಸಾಸ್ರ ಬೊಳ್ಳೆ ಕೋರಿಗ್ ದೈವದ ಕಲೊಟು ದೈವದ ಎದುರು ಅರಿ ಪಾಡುವೆರ್.ಅವೆನವು ತಿಂದ್ಂಡ ಧರ್ಮ ಸಂದೈತ ಆಂಡ್ಂದ್ ಲೆಕ್ಕ. 
ಹನುಮಂತ ದೈವ
ಬಜನೆ,ಮಂತ್ರ,ಶ್ಲೊಕ,ಹೋಮ,ಪೂಜೆ,ಪಂಚಕಜ್ಜಾಯ.ದೈವೊಲೆಗ್ ಸಂದಿ ಪಾಡ್ದನ,ದೂಪ,ಗಿಂಡೆ ನೀರ್,ಮದಿಪು,ಅಗೆಲ್. ಇನಿ ದೈವದ ಕಲೊಕು ಬಜನೆದಂಚ ಓಮ,ಕಲಸ,ಪೂಜೆ,ಆರತಿ,ಪಂಚಜ್ಜಾಯ ಬತ್ತ್ ದ್ ದೈವಸಾನನಾ,ದೇವಸಾನನ ಗೊತ್ತಾವೊಂದಿಜ್ಜಿ.
ದೈವದ ಸಿರಿ ಸಿಂಗಾರದ ನೇಮದ ಅಣಿ
ಮಾಂಕಾಳಿ ದೈವದ ಕೈಕ್ ಪೆಲಷ್ಟಿಕ್ ದ 3-3 ಕೈ ಕಟ್ಟ್ ದ್ ನಿ
ಅಂಬ್ಡೇಲು ಗುತ್ತು ಪಟ್ಟದ ಪಂಜುರ್ಲಿ ಉಚ್ಚಯ ಮುಗ ಪಾಂಡವರ ಕಲ್ಲು
ಹಿರಿಯಾಕ್ಲು ಕಟ್ಟೊಡಾಯಿನ ಒತ್ತೆ ಕೋಲೊನು ಜೋಕ್ಲೆಡ ಕಟ್ಟಾವುನ ತಪ್ಪು
ಲೆಕ್ಕೆಸಿರಿನ ಪೊಸ ತುತ್ತೈತೊಡು ರಕ್ತೇಶ್ವರಿ ಮಲ್ತೆರ್
1935 ತ ದೈವದ ತುತ್ತೈತ 
ಗಣಪತಿ ದೇವೆರೆಗ್ ದೈವದ ಅಣಿತ ಸಿಂಗಾರ
ಪಂಜುರ್ಲಿ ದೈವ ಕುಟುಮೊಗು ಕೊರ್ಪುನ ನುಡಿ
ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ.
ಮೂವೆರ್ ಉಳ್ಳಾಕುಲು ಬಲರಾಮ ಕೃಷ್ಣ ಸುಭದ್ರೆ ಆನಗಒಂಜಿ ನುಡಿ ಉಂಡು.ತರೆಟ್ ತುಂಬುಂಡ ದೇವೆರ್.ಪುಗೆಲ್ಡ್ ತುಂಬುಂಡ ದೈವಂದ್.ಪಟ್ಟದ ಮುಗ ಸಾನೊಡಿಪ್ಪುಂಡು.ಉಚ್ಚಯ ಮುಗ ಏರ್ದ್ ದೈವ ಬಂಡಿದ ಮಿತ್ತ್ ಕುಲ್ಲುದು ದೈವದ ಬಂಡಿ ಒಯ್ಪುವೆರ್.ಸ್ವಾಮೀ ಸತ್ಯೊಲೆಂದ್ ಲೆಪ್ಪೊಡಾಯಿನೌಲು ಗೋವಿಂದ ಪಾಡೊಂದುಲ್ಲೆರ್.ದೈವೊನು ದೇವೆರ್ ಮಲ್ತಿಲೆಕಾಂಡ್..ಅಂಚನೆ ಪಟ್ಟದ ಮೂರ್ತಿ ಗರ್ಭ ಗುಂಡೊಡಿಪ್ಪುಂಡು.ಉಚ್ಚಯ ಮೂರ್ತಿ ತರೆಟ್ ತುಂಬೊಂದು ಬಲಿ ಬರ್ಪೆರ್.ತೇರಿತ್ತ್ ನೌಲು ಉಚ್ಚಯ ಮೂರ್ತಿನ್ ತೇರ್ದ ಮಿತ್ತ್ ದೀದ್ ತೇರ್ ಒಯ್ಪುವೆರ್.ದೈವದ ಬಲಿ ಪೋನಗ ದೈವದೊಟ್ಟುಗು ಇಲಾಲ್,ಜೀಟಿಗೆ ಇತ್ತ್ಂಡ ದೇವೆರೆ ಬಲಿ ಪೊನಗ ನೇಲ್ ತುಡರ್,ಕೆಲ ಸಾನೊಲೆಡ್ ಇಲಾಲ್ ಉಪ್ಪುಂಡು.ಇತ್ತೆ ದೇವೆರೆ ಬಲಿಟ್ ಜೀಟಿಗೆಲ ಉಪ್ಪುಂಡು.ಈ ಅರಾದನಾ ಪದ್ದತಿಲು ದೈವಾರಾದನೆಡ್ದ್ ದೇವತಾರಾದನೆಗ್ ಬತ್ತ್ ದೀಪೆರ.
.jpeg)
ದೈವೊಲೆಗಿಜ್ಜಂದಿ ಗಣ ಓಮ,ಮೃತ್ಯುಂಜಯ ಓಮ, ದುರ್ಗಾ ನಮಸ್ಕಾರ,ಪೂಜೆ,ಮಂತ್ರ,ಆರತಿ ಉಂದೆನ್ ಬುಡ್ಡು ಮೂಲ ಕಟ್ಲೆಡ್ ಹಿರಿಯಾಕ್ಲ್ ಎಂಚ ನಡಪಾವೊಂದು ಬತ್ತೆರ್ಂದ್ ಕೇಂದ್ ತೆರಿದ್ ಅಂಚನೆ ನಡಪುಗ.ದೈವೊಗು ಹಿರಿಯಾಕ್ಲೆ ಮದಿಪುರ್ದು ಮಲ್ಲ ಮದಿಪಿಜ್ಜಿ,ಕುಟುಮದಕ್ಲ್ ಬಲಸುನೆರ್ದ್ ಮಲ್ಲ ಅಗೆಲಿಜ್ಜಿ.
ದೈವದ ಕೊಡಿಯಡಿಟ್ ನುಪ್ಪು ದಾನ ಇಜ್ಜಿ.ಅವ್ಲು ಪೊರಿ ಬಜಿಲ್ ಪಾನಕ ಉಪ್ಪುನಿ.ದಾಯೆ ಪಂಡ ಜಾತ್ರೆದಪಗ ದೈವದ ಲೆಕ್ಕೊಡು ಆ ಗಿರಮ,ಊರುದ ಪ್ರತಿ ಇಲ್ಲಲ್ಲ ಒನಸ್ ಇಪ್ಪುಂಡು.ನಮ ನಂಬೊಂದು ಬತ್ತಿನ ದೈವೊಲೆಗ್ ಪಿದಯಿದಕ್ಲೆನ್ ಲೆತ್ತ್ ದ್ ಅಕ್ಲೆ ಕೊಸ್ವಾಸಿ ಬಲಸಂಡ ದೈವ ಖಂಡಿತಾ ಒಪ್ಪಂದ್.ನಮ್ಮ ಅಪ್ಪೆ ಅಮ್ಮಗ್ ನಮ ಬಲಸ್ ದ್ ಕೊರ್ನಗ ಆಪುನ ಕೊಸಿ ಪಿದಯಿರ್ದ್ ಬತ್ತ್ ನಕುಲು ಬಲಸ್ಂಡ ಆವಂದ್.
ಕಿರುವಾಲ್ ಬನ್ನಗ ತಿಬಿಲೆ ಪೊತ್ತವೆರ್
ನಮಕ್ ಬೇನೆ ಬೆಸರ್ ಗ್ ದೈವ ಕೊರ್ಪುನಿ ಅಭಯದ ನುಡಿ,ಕೈ ನೀರ್ನಡೆ ಸಾಯದ ಗಂಧ.ಇನಿ ದೈವಡ ಕೇಂಡ ಶನಿ ಪೂಜೆ ಮಲ್ಪುಲೆ,ಅತ್ತೋಸು ಕಟ್ಟೆಗ್ ಸುತ್ತು ಬಲೆ,ದುರ್ಗಾ ನಮಸ್ಕಾರ ಪೂಜೆ ಮಲ್ಪುಲೆಂದ್ ಪನ್ಪುಂಡು.ಆತ್ ಬಂಙೊಡು ದಾಯೆ ಮೊಕ್ಲು ದೈವೊಗು ಕಟ್ಟೊಡು,ದೇಲ್ಯದ ಚಾಕಿರಿ ಮಲ್ಪೊಲಿಯತ್ತೆ.
ದೈವದ ಬಂಡಾರ ಬನ್ನಗ ಸಾದಿಡ್ ದರಿ ಪಾಡುವೆರ್.
ದರಿತ ಉಲಯಿಡೆ ಭಂಡಾರ ಪೋಪುನಿ
ನಮಕ್ ತೆರಿ ಮಟ್ಟ್ ಗ್ ನಮ ಹಿರಿಯಾಕ್ಲೆಡ ಕೇಂದ್ ಮಲ್ತೊಂದು ಪೋಯಿ.ದೈವ ತಪ್ಪು ಮಲ್ಪಾಯೆರೆಂದ್ ಉಪ್ಪುನಿ.ಆಂಡ ಪೆದ್ದ್ಂಡ ಅಪ್ಪೆ ತಾಂಕ್ಂಡ ತಮ್ಮಲೆಯಾದ್ ನಮ್ಮ ತರೆ ಬೆರಿ ಮಾನೊನು ಕಾಪುನ್ಲ ನಮ ನಂಬಿಂಚಿ ದೈವೊಲೆ.ಮೂಲ ಕಟ್ಟ್ ನ್ ಪೊಲಿಪೆರೆ ಸುರು ಮಲ್ತ್ ದ್ ಕುಟುಮದ ಸಮ್ಮಂದಲ ಅವ್ವೇ ಲೆಕ ಇನಿಕಾನಗ ಪೊಲಿದಾತ್ಂಡ್. ನಿಚ್ಚ ಪೂ ನೀರ್ ದೀವೊಂತಿ ಇಲ್ಲ ಚಾವಡಿದ ದೈವೊಲೆನ್ ನಮಟೊರಿಂದ್ ನಮ ಎನ್ನಿದಿತ್ತ್ ದ್,
ಏತೊಂಜಿ ತೊಟಿಲುಲು ತೂಂಕೊಂತಿ ಕೂಡು ಕುಟುಮದ ಇಲ್ಲುಲು,ಚಾವಡಿಡ್ ಉಜ್ಜಾಲ್ ಡ್ ದೈವೊಲು ,ಇಲ್ಲದ ಹಿರಿಯಾಕುಲ್ಲೆಕ ಇತ್ತ್ ನ ದೈವೊಲೆನ್ ಏಪ ಪಿದಯಿರ್ದ್ ಬತ್ತ್ ನಕುಲು ಪಂಡೆರ್ಂದ್ ಪಿದಯಿ ಸಾನ ಕಟ್ಟಾದ್ ಇಲ್ಲದುಲಯಿರ್ದ್ ಪಿದಯಿ ಸಾನದುಲಯಿ ಪಾಡ್ದ್ ಸಂಕ್ರಾಂತಿಗೊರ ಪೂ ನೀರ್ ದೀದ್ ತಂಬಿಲ ಕರಿತ್ ದ್ ತಿಂಗೊಲಿಡೀ ಬಾಕಿಲ್ ಮುಚ್ಚಿದ್ ಕುಲ್ಲಿಯನ ಅಡೆಗ್ ತುಳುವೆರೆ ಕೂಡು ಕುಟುಮದ ಸಮ್ಮಂದದ ಗೋಡೆಲು ಜರಿಯೆರೆ ಸುರಾಯ.
.jpg)
ಇನಿ ದೈವೊನು ದೇವೆರೆ ಪುದರ್ಡ್ ಲೆತ್ತ್ ದ್ ಒಂಜಾತ್ ವರ್ಸ ಕರಿನಗ ಜನೊಕ್ಲೆ ಬಾಯಿಡ್ ಮೂಲ ದೈವದ ಪುದರ್ ಮಯಕಾದ್ ದೇವೆರೆ ಪುದರ್ ಮಾತ್ರ ಒರಿಯು.ಪ್ರಸ್ನೆ ಚಿಂತನೆದಕ್ಲ್ ಪಂಡೆರ್ಂದ್ ದೈವದ ಪರ ಮುಗ ಮೂರ್ತಿಲೆನ್ ತೋಡು ಸುದೆಕ್ ಬುಡ್ದು,ಮಣೆ ಮಂಚಾವುನು ಪೊತ್ತಾದ್ ದುಂಬುಗು ನಮ್ಮ ಪಿರಾಕ್ ದ ದೈವಂದ್ ಪನ್ನಗ ಅಕ್ಲ್ ಸಾಗ್ಸಿ ಕೇಂಡ ನಮಡ ಕೊರ್ಯೆರೆ ಪರ ಮುಗ ಮೂರ್ತಿಲಾ ಇಜ್ಜಿ,ಪರ ಮಣೆ ಮಂಚಲಾ ಇಜ್ಜಿ.ಇತ್ತೆನೇ ಸುಮಾರ್ ಕಳೆವೊಂದಾತ್ಂಡ್. ಮುಗ ಮೂರ್ತಿ,ಮಣೆ ಮಂಚವುದ ಸಗ್ತಿ ದೆತ್ತಿ ಬೊಕ್ಕ ಅವೆನ್ ನೀರ್ ಗ್ ದಕ್ಕುನ ಬದಲ್,ತೂಟು ಪೊತ್ತಾವುನ ಬದಲ್ ಸೊತ್ತು ಜಾಗ್ ರ್ತೆ ದೆತ್ತ್ ದೀಪುನ ವಸ್ತು ಸಂಗ್ರಹಾಲಯೊಗು ಕೊರ್ಂಡ ನೆನೆಪಾನಗ ತೂದು ಬರೊಲಿ.
ದೈವೊಲೆಗ್ ವಾ ಕಾರಣೊಗ್ಲಾ ಬಜನೆ ಪನ್ಪುನ ಕಟ್ಟಿಜ್ಜಿ.ಬಜನೆ ಪನ್ಪುಂಡ ದೈವ ಬೊಕ್ಕ ದೇವೆರೆಗ್ ದಾದ ಎತ್ತೇಸ?.ದೇವೆರೆಗ್ ಕಲಶ,
ಬಜನೆ,ಮಂತ್ರ,ಶ್ಲೊಕ,ಹೋಮ,ಪೂಜೆ,ಪಂಚಕಜ್ಜಾಯ.ದೈವೊಲೆಗ್ ಸಂದಿ ಪಾಡ್ದನ,ದೂಪ,ಗಿಂಡೆ ನೀರ್,ಮದಿಪು,ಅಗೆಲ್. ಇನಿ ದೈವದ ಕಲೊಕು ಬಜನೆದಂಚ ಓಮ,ಕಲಸ,ಪೂಜೆ,ಆರತಿ,ಪಂಚಜ್ಜಾಯ ಬತ್ತ್ ದ್ ದೈವಸಾನನಾ,ದೇವಸಾನನ ಗೊತ್ತಾವೊಂದಿಜ್ಜಿ.
ತುಳುನಾಡ ಸ್ವತಂತ್ರ ಸಗ್ತಿಲಾಯಿನ ದೈವೊಲೆನ್ ದೇವೆರೆ ಅಂಸ ಮಲ್ತ್ ದ್,ದೈವೊಲು ದೇವೆರೆನ್ ಕಾಪುಲೆಕ ಆಂಡ್.ಸ್ವಂತ ಅಸ್ಥಿತ್ವ ಇತ್ತ್ ನ ದೈವೊಲೆಗ್ ಪುರಾಣ ಸೇರಾದ್ ಆಸುರೀ ಕಿರಿಯೆದ ಬದಲ್ ದೇವ ಕಿರಿಯೆಡ್ ಕರಿತೊಂದುಲ್ಲೆರ್.ದೇವ ಕಿರಿಯೆಡ್ ಕರಿಪುನಕ್ಲ್ ಅಂಚನೇ ಕರಿಪಡ್.ಆಂಡ ಆಸುರೀ ಕಿರಿಯೆಡ್ ಕರಿಪುನಕ್ಲೆನ್ಲಾ ನಿಕುಲು ದೇವ ಕಿರಿಯೆಡ್ ಮಲ್ಪುಲೆ ಪನ್ಪುನ ಅಗತ್ಯ ಇಜ್ಜಿ.ನಮ ದುಂಬೆಂಚ ನಂಬೊಂದು ಬತ್ತ್ ನ ಅಂಚನೆ ನಂಬುಗ. ದೈವೊಲು ನಮನ್ ಮಾತ ಒರ್ತು ಕಾಪುವ ಪನ್ಪುನೆನ್ ಮದಪೆರೆ ಬಲ್ಲಿ.ನಮಕ್ ಬದ್ ಕ್ ಡ್ ದಾಲ ನಿಮುರ್ತಿ ಇಜ್ಜಿ ಪಂದಾನಗ ನಮ ಕೈ ಕಟ್ಟ್ ದ್ ತರೆ ತಗ್ಗಾದ್,ಬೆರಿ ಬಗ್ಗಾದ್ ಉಂತುನಿ ನಮ ನಂಬಿ ದೈವೊಲೆನ ಎದುರು ಪನ್ಪುನೆನ್ ಮದಪೆರೆ ಬಲ್ಲಿ.
ನಮ್ಮ ತುಳುನಾಡ ದೈವೊಲು ನಮನ್ ಮಾತ ಕಾಪುನ ಪಂಡ ರಕ್ಷಣೆ ಮಲ್ಪುನ ಸ್ವತಂತ್ರ ಸಗ್ತಿಲು.ಅವು ವಾ ದೇವೆರೆ ಚಾಕಿರಿದವತ್ತ್ .ತುಳು ದರ್ಮದ ನ್ಯಾಯೊನು ರಾಜ್ಯದ ಕಲೊಟು ಇತ್ಯರ್ಥ ಮಲ್ತೊಂತಿ ಸಗ್ತಿಲು.ಇನಿ ನಮ್ಮ ದೈವಾರಾದನೆನ್ ಮದತ್ ದ್ ನಮನೇ ನಮ ಕಳೆವೊಂದುಲ್ಲ.ನಮಕ್ ಮನಿಪುನ ದೈವೊಲು ದುಂಬು,ಮನಿಪಂದಿ ದೇಬೆರ್ ಬೊಕ್ಕ .ಆಸತ್ರೆಡ್ ದಮ್ಮು ಕಟ್ಟ್ ನಾಯನ್ ಒರಿಪೆರೆ ಆಪುಜಿ ಪಂಡ್ ದ್ ವೈದ್ಯೆರ್ ಪಿರ ಬುಡಿಯೆರ್ಡ ಕುಟುಮದ ಪಂಜುರ್ಲಿಗ್ ಅರಿಕೆ ಮಲ್ತ್ ದ್ ತರೆ ತೊರತ್ ದ್ ಕೋರಿ ಬುಡ್ದು ಅಕ್ಲೆಡ 48ದಿನ ಪ್ರತಿ ದಿನಲ ತರೆ ತೊರಪಾದ್ ಬಂಜಾರ ಕೋರಿಗ್ ತಿನ್ಪಾದ್ ಅಕ್ಲೆ ಜೂವ ಒರಿತಿ ಪಂಜುರ್ಲಿರ್ದ್ ಮಲ್ಲ ನಮನ್ ಒರ್ತ್ ಕಾಪುನೆಕ್ ಸಾಗ್ಸಿ ಬೋಡೆ?.
ದೈವೊಲೆಗ್ ಸಂದಿ ಪಾಡ್ದನೊಲೆಡ್ದ್ ಮಲ್ಲ ಒವುಲಾ ಇಜ್ಜಿ.ಮೂಲೊಡು ಇದ್ಯೆ ದಾಂತಿ ತುಳುವೆರೆಗ್ ಬಜನೆ,ಶ್ಲೊಕ,ಮಂತ್ರ ಪೂರ ಓಲು ತೆರಿದಿತ್ತ್ಂಡ್?.ಅಕ್ಲೆಡ ಇತ್ತಿನಿ ನಿರ್ಮಲವಾಯಿನ ಮನಬಗ್ತಿ,ದೈವೊನು ಲೆತ್ತ್ ಕೊಂಡಾಡುನ ಸಂದಿ ಪಾಡ್ದನೊಲು.ತಾಸೆ,ದೋಲು,ಸುತಿ/ಬಾಂಕೆ,ನಾಗಸರೊಟು ಲಕ್ಕೊಂತಿ ದೈವೊಲೆಗ್ ವಾವಾ ನಮುನೆದ ವಾದ್ಯೊಲು ಇನಿ ಬೈದ.ಇನಿ ದೈವದ ಕಲನ,ಆಟದ ರಂಗತಲೊನ,ಪದ ರಂಗಿತೊದ ರಂಗ ಚಾವಡಿಯ ಒಂಜಿಲಾ ಅರ್ತ ಆವೊಂದಿಜ್ಜಿ.
ಪೊಣ್ಣು ಮಗಲೊರ್ತಿ ಚದ್ಮವೇಸೊಡು ದೈವೊಗು ಕಟ್ಟ್ ದ್ ನಿ
ಮಾತ ಗಾಂಡ್ ಗೌಜಿದ ನಡುಟು ಮನ ಬಗ್ ತಿ ದಾಂತೆ ಕಲೊಟು ದೈವೊಲು ಖಂಡಿತಾ ಉಪ್ಪೆರೆ ಸಾದ್ಯ ಇಜ್ಜಿ.ಪೆರಿಯಾಕ್ಲ್ ದೀನ ತುಳುವ ಮಣ್ಣ್ ದ ದೈವದ ಪುದರ್ ನ್ ಬದಲ್ತ್ ದ್ ಲೆತ್ತ್ ದ್ ಉಂದೆನನ್ ಲೆಪ್ಪುನತ್ತ್ಂದ್ ದೈವ ಕಲೊಕು ಬರ್ರೆ ಸಾದ್ಯಲ ಇಜ್ಜಿ.ನಮಕ್ ಪೆರಿಯಾಕ್ಲ್ ದೀನ ಪುದರ್ ವಾ ಬಾಸೆಡ್ ಪಂಡಲ,ವಾ ದೇಸೊಡು ಪಂಡಲ ಒಂಜೇ ಪುದರ್.
ನಮ ನಂಬಿಂಚಿ ದೈವೊಲೆಗ್ಲ ಅಂಚನೆ.ಪೆರಿಯಾಕ್ಲ್ ದೀನ ಪುದರ್ ಡೇ ಲೆಪ್ಪೊಡು.ಕನ್ನಡ,ಸಂಸ್ಕೃತೊಡು ಲೆತ್ತಿ ಸಾತ್ ಗ್ ಮೂಲ ಪುದರ್ ದಾಲ ಬದಲಾಪುಜಿ.ಮೂಲ ಪುದರ್ ಅವ್ವೇ ಆದಿಪ್ಪುಂಡು.
ದೈವಾರಾದನೆ ತುಳುನಾಡ್ ಬುಡ್ದು ಇನಿ ಪಿದಯಿ ಪೋವೊಂದುಂಡು.ನರಮಾನಿ ಕುಂಬರೊಲಿ,ನುಡಿ ಕೊರ್ಪಿ ದೈವ ಮಾಯೆರ್ದ್ ಅವ್ಲು ಜೋಗೊಡು ಬರೆರೆ ಸಾದ್ಯ ಇಜ್ಜಿ.ಅಂಚಾದ್ ದೈವದ ಮೂಲ ಪದಿನಾಜಿ ಕಟ್ಲೆನ್ ಮೂಲದೊರುಟು ಒರಿತ್ ದ್ ದುಂಬುದ ಜೋಕ್ಲೆಗ್ ದೈವಾರಾದನೆನ್ ತೆರಿಪಾವುನ ಬೇಲೆ ನಮ ಮಾತೆರೆಡ ಆವೊಡು.ಮಾತೆರೆ ಪಾತೆರೊಗು ಬಿಲೆ ಕೊರ್ಕ.ಅಂಚಾಂದ್ ಮೂಲ ದೈವಾರಾದನೆಗ್ ಒಡಕ್ ಬರಂದಿಲೆಕ ತೂಕ.
 |
| ಅಂಬ್ಡೇಲು ಗುತ್ತು ಪಟ್ಟದ ಪಂಜುರ್ಲಿ |
ಗ್ರಾಮ ದೈವೊಲ್ನ ಕಾಲಾದಿ 16 ಕಟ್ಲೆದ ಪೊರ್ಲೇ ಬೇತೆ.ವರ್ಸೊಗು 12ಸಂಕ್ರಾಂತಿಲು,1ಚೌತಿದ ಪಾಡ್ಯ,1ಪರ್ಬೊದ ಬಿನ್ನದೊನ್ಯ,1ದೊಂಪದ ಬಲಿ,1 ಸಾನದ ನೇಮ ಇಂಚ ಒಟ್ಟು 16 ಕಟ್ಲೆಲು ದೈವಾರಾದನೆದ ಕಾಲಾದಿಡ್ ನಡಪುವ.
ಮಂಡಲ ಬರೆನಗ ದೈವದ ಚಿತ್ರೊನು ರಂಗೋಲಿ ಪೊಡಿಟ್ ಬರೆತ್ನಿ
ಅಂಚ ಬರೆಪುನ ತಪ್ಪು.
ದೈವದ ಮಂಡಲ
ದೈವದ ಕೊಡಿಯಡಿತ ಚಾಕಿರಿಗ್ ಮದುಮಾಸ ತಿನಂದಿನಕುಲು ಬತ್ತ್ ದ್ ದೈವೊನ್ಲಾ ಶಾಖಾಹಾರಿಲಾದ್ ಮಲ್ತೊಂದುಲ್ಲೆರ್.
ಉಂದು ಖಂಡಿತವಾದ್ಲ ತಪ್ಪು
ನೇಮ ಕಟ್ಟುನಾರೆ ಪದ್ದೈ.ದೈವದ ಪಾಪೆನ್ ನರಮಾನ್ಯನ ಶರೀರೊಗು ಪಾಡೆರೆ ಬಲ್ಲಿ
ಇನಿ ಕುರ್ಸಿದ ಮಿತ್ತ್ ಕುಲ್ದ್ ವೈದಿಕೆರ್/ತಂತ್ರಿಲು ಮೈಕ ಪತೊಂದು ಎಕ್ಕ ಕೊರ್ದು ಮದಿಪು ಪನ್ಪುನಡೆಮುಟ್ಟ ದೈವಾರಾದನೆ ಎತ್ತ್ಂಡ್
ದೈವಾರಾದನೆಡ್ 48 ಚಾಕಿರಿ ಬಾಗದಕ್ಲೆನ ಪಾಲುಂಡು.16ಗುತ್ತುಲು,16ಉಳಗುತ್ತುಲು,16 ಚಾಕಿರಿ ವರ್ಗೊಲು.ಪ್ರತಿಯೊರಿಯಗ್ಲ ಅಕ್ಲೆನವೇ ಚಾಕಿರಿದ ಪಾಲುಂಡು.ಒಂಜಿ ನಿರ್ದಿಷ್ಟ ಚಾಕಿರಿ ವರ್ಗದ ಸೊತ್ತು ದೈವಾರಾದನೆಯತ್ತ್.ಪ್ರತಿಯೊಂಜಿ ಚಾಕಿರಿ ಬಾಗದಕುಲು ಅಕ್ಲೆನ ಚಾಕಿರಿ ಮಲ್ತೆರ್ಡ ಮಾತ್ರ ಪರಿಪೂರ್ಣ ದೈವಾರಾದನೆ.ಕಟ್ಟುನಕ್ಲೆರ್ದ್ ದೈವ ಅತ್ತ್.ದೈವೊರ್ದು ಕಟ್ಟುನಕುಲು ಪನ್ಪುನೆನ್ ಮದಪೆರೆ ಬಲ್ಲಿ.ನೂಲು ಪಾಲ್ ಸಂಸಾರೊರ್ದು ದೋಲು ಪಾಲ್ ಸಂಸಾರ ಮುಟ್ಟ ದೈವ ಚಾಕಿರಿದ 16 ವರ್ಗದ ಪಾಲುಂಡು.ಕಟ್ಟುನಕುಲು ಕಟ್ಟುಜಿ ಪನೊಲಿ.ದೈವಾರಾದನೆ ಒರಿಯುಜಿ.ಪೂ ನೀರ್ ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ಪೊಲಿ.ಅಂಚಾಂದ್ ದೈವಾರಾದನೆ ಮಲ್ಪವುನಕುಲು ನೇಮ ಮಲ್ಪಾವುನ ಬುಡ್ದು ಪೂನೀರ್,ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ತೆರ್ಡ ನೇಮ ನೆರಿ ಉಂತುದು ಪೋವು
ಮಂತ್ರಜಾವದೆನ ಕೈಟ್ ಕಪ್ಪುದ ಚವಳ ಬೈದ್ಂಡ್.
ಒಂಜಿ ಕಾಲೊಡು ತನ್ಕ್ ಎದುರುಂತ್ ನ ಬಡವರ್ಗೊನು ಒಂಜಿ ಶ್ರೀಮಂತ ವರ್ಗ ಮೋಸೊಡು ಕೆರ್ದ್ ತನ್ಕುಲೆಗ್ ತೊಂದರೆ ಅಯೆರೆ ಬಲ್ಲಿಂದ್ ದೈವ ಮಾಯ ಮಲ್ತಿನಿ ಪಂಡೆರ್.ಕರಿದ್ ಪೋಯಿನಕ್ಲೆರ್ದ್ ಉಪದ್ರ ತೋಜಿದ್ ಬನ್ನಗ ಅಕ್ಲೆನ್ ದೈವ ಆದ್ ನಂಬ್ಯೆರ್..ಇನಿ ತನ್ನ ಬಂಜಿದ ಗುಜ್ಜರ್ಮೆಗಾದ್ ದೈವೊಲೆನ್ ಸಿನೆಮಾ ನಾಟಕ ಅಟ ದಾರಾವಾಹಿಲೆಡ್ ಕನನಗ ದೈವದ ಅಪ್ಪಣೆ ದೆತೊಂದು ಅವೆನ್ ಮಲ್ತೊಂದುಲ್ಲ,ಜಗತ್ತ್ ಗ್ ದೈವದ ಕಾರ್ನಿಕೊನು ತೋಜವೊಡುಂದುಲ್ಲಂದ್ ಪನ್ಪೆರ್.ಇಲ್ಲದುಲಯಿ ಪರೊಡಾಯಿನ ಪೇರ್ ನ್ ಜಾಲ್ ಗ್ ಚೇತ್ ಲೆಕಾಂಡ್. ತುಳು ಮಣ್ಣ್ ದ ವಾ ದೈವಲಾ ತುಳುನಾಡ ಮಣ್ಣ ಋಣತಕ್ಲೆನ್ ಬುಡ್ದು ಪಾಡಂದ್. ಇಂಚಿ ಇಚಾರೊಗು ದೈವ ಒಪ್ಪಿಗೆ ಕೊರ್ರೆ ಸಾಧ್ಯನೇ ಇಜ್ಜಿ.ಕೆಲವು ಕಟ್ಟುನಕುಲು ಪಣವುದ ಆಸೆಗ್,ಮಾದ್ಯಮೊಡು ಪುದರ್ ಬರ್ರೆ ಬೋಡಾದ್ ನುಡಿ ಕೊರೊಡಾತೆ.
ತೆರಿಯೊನ್ಗ:-
ಇನಿ ದೈವಾರಾದನೆದ ಅಜ ತಪ್ಪೆರೆ ಒಂಜಿ ಕಾರಣ ಚಾಕಿರಿ ವರ್ಗಂದ್ ಲ ಪನೊಲಿ.ದಾಯೆ ಪಂಡ ನೇಮದ ಕೊಡಿಯಡಿಕ್ ಒರಿ ಸಿನೆಮ ಮಲ್ಪುನಾಯೆ,ರಾಜಕೀಯದಾಯೆ ಬತ್ತೆಡ ಸುರುಕು ದೈವ ಆಯನ ಕೈ ಪತೊಂದು ತನ್ನ ತಿಗಲೆ ಮುಟ್ಟುದು ಯಾನುಲ್ಲೆ ಪಂಡ ಮೂಲು ದೈವ ಅಂಚ ಪನೆರೆ ಸಾಧ್ಯನೇ ಇಜ್ಜಿ.ದಾಯೆ ಪಂಡ ಅಕುಲೇರ್,ಮೊಕುಲೇರ್ಂದ್ ದೈವೊಗು ಗೊತ್ತಿಪ್ಪೆರೆ ಸಾಧ್ಯನೇ ಇಜ್ಜಿ..ಉಂದು ಚಾಕಿರಿದಾರೆ ಬೇಲೆ.ದಾಯೆ ಪಂಡ ಅರೆಗ್ ಗುರ್ತ ಮಲ್ಲಕ್ಲೆನ ಉಪ್ಪುಂಡತ್ತೆ.ಅಂಚ ಆರ್ನ ಕಾರ್ಬಾರ್ ನ್ ದೈವದ ಕಲೊಟು ತೋಜಾವೆರ್.ದುಂಬು ಪೂರ ದೈವ ಏರೆನ ಮೈ ಕೈ ಮುಟ್ಟುನ ಕೆರಮ ಇಜ್ಜಾಂಡ್,ಬೂಲ್ಯೊನು ದೂರೊರ್ದೆ ದೆತೊನ್ನಾರೆನ ಕೈಕ್ ಬೂರುಲೆಕ ಕೊರೊಂತ್ಂಡ್.ದುಂಬು ರಾಜಂದೈವದ ಕಲೊಟು ದೈವ ಭಂಡಾರದ ಮುಗ,ಕಡ್ಸಲೆನ್ ಪತಿ ಮಾನಿ (ಭಂಡಾರೊನು/ಕಿರ್ವಾಲ್ ನ್/ಆಯುಧ/ಕಡ್ಸಲೆನ್ ಪತೊಂದಿನ ಪತಿಮಾನಿ) ವಸಾಯೊಡು ಕಟಿಮಾನಿ ನ ಕೈಕ್ ಒಪ್ಪಿತೊಂತೆರ್.ಇನಿ ತಿಕ್ ನೌಲು ಪೂರ ತಿಕ್ ನ ದೈವೊಗು ಪೂರ ಮಾನೆಚ್ಚಿಲಾವೊಂದುಂಡು.ಓಡೆ ಮುಟ್ಟ ಪಂಡ ದೈವದ ಮುಗೊನ್ಲ ಮೊಕ್ಲೇ ಒಪ್ಪಿಪಾವೊನ್ನಡೆಮುಟ್ಟ ಎತ್ತ್ ದೆರ್.ದೈವದ ಕಲೊಟು ಇಜ್ಜಾಂದಿ ಉಚ್ಚಾಟನೆಲೆನ್ ಮೂಲ ಚಾಕಿರಿದಕುಲು ಮಲ್ತೊಂದುಲ್ಲೆರ್.ಇಂಚನೆ ಆಂಡ ದೈವದ ಮಿತ್ತ ನಂಬೊಳಿಗೆ ಮಯಕಾಯೆರೆ ಮೊಕ್ಲೆ ಕಾರಣೆರಾಪೆರ್.ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತಿ ತುಳುನಾಡ ದೈವೊಲೆನ್ ಮೊಕ್ಲು ಕುಡ ಗಟ್ಟ ಬಡ್ತಾವೊಂದುಲ್ಲೆರ್ ಪಂಡ ದೈವದ ಕಲೊಕು ವೈದಿಕದಕುಲು ಮಲ್ಪುನ ಎತ್ತೇಸೊಗ್ಲ,ಕಟ್ಟುನಕುಲು ಮಲ್ಪಿ ಎತ್ತೇಸೊಗ್ಲ ದಾದ ಪರಕುಂಡು.ವೈದಿಕೆರಾಂಡಲ ದೈವದ ಚಾಕಿರಿನ್ ತುಳುನಾಡ ವ್ಯಾಪ್ತಿಡೇ ಮಲ್ತೊಂದುಲ್ಲೆರ್.ಚಾಕಿರಿದಕುಲು ದೈವೊನು ಗಟ್ಟದ ಮಿತ್ತ್ ಕೊನೊದು ಅಕ್ಲೆ ಬಂಜಿದ ಪಾಡ್ ತೂಯೆರ್ ವಿನಃ ಮೂಲ ಒಲ್ತ ಆರಾದನೆ ಪನ್ಪುನೆನ್ ಮದತ್ ಬುಡ್ಯೆರ್
ಇನಿ ಕೆಲವು ಕಟ್ಟುನಕುಲು ಎಂಕುಲು ಕಟ್ಟುನೆನ್ ಉಂತಾಂಡ ನಿಕ್ಲೆಗ್ ದಾಲ ಮಲ್ಪೆರೆ ಸಾದ್ಯ ಇಜ್ಜಿಂದ್ ಕೆಲವೆರೆನ್ ಪೋಡಿ ಕಟ್ಟಾವೊಂದುಲ್ಲೆರ್ ಗೆ.ಮೊಕ್ಲು ಕಟ್ಟ್ ಜಿಂಡ ದಾಲ ದೈವಾರಾದನೆ ಒರಿಯುಜಿ.ಕೊರೊನ ಸೀಕ್ ಬನ್ನಗ ಮೊಕ್ಲು ಓಲಿತ್ತೆರ್?.ದೈವದ ಚಾಕಿರಿ ದಾಲ ಬಾಕಿ ಆತ್ ಜಿ.ಕುಟುಮದಕ್ಲಿತ್ತ್ ದ್ ಪೊರ್ಲುಡೆ ಸಂಕ್ರಾಂತಿಲ ಕರ್ತ್ ದೆರ್.ದೈವೊಲೆಗ್ ತಂಬಿಲಲ ಕಟ್ಟ್ ದೆರ್ ಅಗೆಲ್ಲ.ಪಾಡ್ದೆರ್.ದೈವಾರಾದನೆ ಓಲ್ಲಾ ಉಂತ್ ದ್ ಜಿ.
ದೈವದ ನುಡಿಕಟ್ಟ್ ದ ಕಲ್ಪನೆಗ್ಲ ಪ್ರಾಕೃತಿಕ ಗಟ್ಟದ ಕಲ್ಪನೆಗ್ಲ ಒಂತೆ ಎತ್ತೇಸೊ ಉಂಡು.ಮೂಲು ದೈವ ಗಟ್ಟ ಬಡ್ತುನತ್ತ್.ದೈವೊನು ಆರಾದನೆ ಮಲ್ಪುನಕುಲು ದುಂಬುದ ಕಾಲೊಡು ದೈವಾರಾದನೆ ಮುಗಿ ಬೊಕ್ಜ ಬೆನೆರೆ ಗಟ್ಟೊಗು ಪೋವೊಂತೆರ್.ನನೊಂಜಿ ರೀತಿಡ್ ಪನ್ಪುಂಡ ಕಂಡಸಾಗೊಳಿದ ಬರಿತ ಏರ ಜೇರೊಲೆ ಗಟ್ಟೊಲಾದಿತ್ತ.ದೈವದ ನುಡಿ ಕಟ್ಟ್ ಡ್ ಬರ್ಪಿ ರಾಜ್ಯದ ಕಲ,ರಾಜ್ಯದ ಕಲ್ಪನೆಲ ನಮ್ಮ ಇತ್ತೆದ ರಾಜಕೀಯ ವ್ಯಾಪ್ತಿದ ರಾಜ್ಜೊರ್ದು ಬೇತೆಯಾದುಂಡು. ದೈವದ ನುಡಿಟ್ ಬರ್ಪುನ ಗಡಿ ಮಾಗಣೆ,ಹೋಬಳಿ,ಗ್ರಾಮ
ಗಡುಪಾಡಿ ಜಾಗೆಲು ಆಧುನಿಕ ತಲೆಮಾರ್ ಗ್ ಅರ್ಥ ಆವಂದಿನೆಟೇ ಒಂಜಿ ಗ್ರಾಮ ದೈವದ ವ್ಯಾಪ್ತಿಡ್ ನಿಷೇಧ ಇತ್ತಿನ ಆರಾಧನೆಲು,
ಆಚರಣೆಲು ಉಲ್ಲಂಘನೆ ಆವೊಂದು ಕಟ್ಟ್ ತತ್ತೊಂದು ಉಂಡು .ತುಳುನಾಡ್ ಡ್ದ್ ಗಟ್ಟದ ಮಿತ್ತ್ ಗ್ ಕಾಫಿ ತೋಟೊಗು ಬೇಲೆಗ್ ಪೋಯಿನಕುಲು ಏತೋ ವರ್ಷಡ್ದ್ ಅಲ್ಪನೆ ಬದ್ ಕ್ ಕಟ್ಟೊಂಡಲಾ, ನಂಬೊಲಿಗೆ ಇತ್ತ್ಂಡಲ ಕುಟುಂಬದ ಭೂತೊಗು ಕರಿಪುನಗ ಊರುಗೆ ಬರ್ಪೆರ್.
ಅರಸು ದೈವೊಲೆ ಸಿರಿ(ತಿರಿ ಅಲಂಕಾರ)ಮುಡಿತ ಅರ್ಥ ತೆರಿಯಂದೆ ಸಿರಿ ಮುಡಿಕ್ ತಿರಿತ ಅಲಂಕಾರದ ಬದಲ್ ಪೂತ ಅಲಂಕಾರ ಮಲ್ತೊಂದುಲ್ಲೆರ್.
ಇನಿ ಅರಸು ದೈವೊಲು ಪೂರ ನೀಲಿಯಾಡ್ಯಾನೇ ರಂಗಾ...ದಿಡ್ ಕ್ಕ ದಿಡ್ ಕ್ಕ...ಪದೊಕು ವಲಸಾರಿ ಬರ್ಪುಲೆಕಾಂಡ್.ತಾಸೆ ವಾದ್ಯದೊಟ್ಟುಗು ನೇಮ ನಡತೊಂತಿನಡೆ ಕೇರಳ ಚೆಂಡೆಗ್ ದೈವೊಲು ನಲಿಪುಲೆಕಾಂಡ್.ಅಂಚನೆ ಇತ್ತೆ ಒಂಜಿ ಸುರಾತ್ಂಡ್.ಇಲ್ಲಿಲ್ಲಲ್ ನಡಪುನ ಕೋಲದಡೆ ವಾದ್ಯದಕುಲು ಸೊರೊ ಪೆಟ್ಯೆ(ಸೌಂಡ್ ಬಾಕ್ಸ್)ಕನತ್ ದ್ ವಾದ್ಯ ಉರಿಪುನ ಎದುರು ಮೈಕ್ ದೀದ್ ಜೋರು ಸೊರೊ ಲಕ್ಕವೆರ್.ಉಂದು ತಪ್ಪು .ಇಂಚನೇ ಆಂಡ ನನೊಂಜಾತ್ ವರ್ಸೊಡು ನೇಮ ನೆರಿ ಉಂತುದು ಪೋಪುಂಡು.ಕಟ್ಟುನಕುಲು ಒವೆಕ್ಲಾ ಮನಿಪಂದೆ ಬೊಟ್ಟ್ ನೆಕ್,ಉರ್ತ್ ನೆಕ್ ಪೂರಾ ನಲಿತೊಂದು ಅಕ್ಲೆ ಬಂಜಿಗ್ ಅಕ್ಲೇ ಕಲ್ಲ್ ಪಾಡೊಂದುಲ್ಲೆರ್.ದೈವದ ನೇಮ ನೆರಿ ಉಂತುದು ವೈದಿಕ ತನು ತಂಬಿಲೊಡು ದೈವಾರಾದನೆನ್ ಸುದಾರ್ಪುನ ಕಾಲ ಬರ್ಪುಂಡು.ಜವನೆರ್ ಎಂಚಾಂಡಲ ಕೂಲಿ ಬೇಲೆಗ್ ಪೋದು ಬೆಂದ್ ದ್ ಬದ್ ಕೊನುವೆರ್.ಪಾಪ ಪ್ರಾಯದ ಚಾಕಿರಿದಕ್ಲೆಗ್ ಉನೆರೆ ತಿನೆರೆ ಬಂಙಾಪುನ ಕಾಲ ಬರ್ಪುಂಡು.ಇತ್ತ್ ನೆನಾಂಡಲ ಮೂಲ ಸೊರ್ಪೊಡು ಒರಿಪುನ ಬೇಲೆ ಮಲ್ಪುಗ.
ಇನಿ ದೈವದ ಕಲ ಮೀರ್ದ್ ದೈವದ ಚಾಕಿರಿ ಬಾಗದಕುಲು ದೂರದೂರುಗು,ಪಿದಯಿ ರಾಜ್ಯೊಗು ಪೋದು ನೇಮ ನೆರಿ ಕಟ್ಟೊಂದುಲ್ಲೆರ್.ಅಕ್ಲ್ ಪಣವುದಂಚಿ ತೂವಂದೆ ತುಳುನಾಡ ಆರಾದನೆನ್ ಬೇತೆ ಓಲ್ಲಾ ಕನಪುಜ ಪಂತುವೆರ್ಡ ಇಂಚ ಪೂರ ಆತಂದ್.ಮೊಕ್ಲು ಕಟ್ಟುಜಿ ಪಂತುವೆರ್ಡ ಅಕ್ಲೆಗ್ ದಾಲ ಒಯ್ತೊಂದು ಪೋದು ನೇಮ ಮಲ್ಪಾಯೆರೆ ಸಾದ್ಯ ಇಜ್ಜಾಂಡ್.
ಪೊಂಜನಕ್ ಲ್ ಮಂತ್ರಜಾವದೆನ ಬಾಯಿಗ್ ಕರ್ಪೂರ ಪೊತ್ತದ್ ದೀತ್ ನಿ
ದೈವಾರಾದನೆ ಮಾಯೆ(ಅಲೌಕಿಕ) ಬೊಕ್ಕ ಜೋಗ(ಲೌಕಿಕ)ದ ನಡುತ ತೋಜಂದಿ ಬೊಲ್ಪು.ಆಂಡ ಆ ಮಾಯೆ ಇಡೀ ಬದ್ ಕ್ ಗ್ ಸಾಂತ್ವನ,ನೆಮ್ಮದಿ ಕೊರ್ಪುನ ಸಗ್ತಿಯಾದುಂಡು.ದೈವದ ಕಲೊಟು ದೈವದ ಅರ್ಥ ಆವಂದಿ ನುಡಿ ಕಟ್ಟುಲು,ಕಣ್ಣ್ ಕೈ ಬಾಸೆಲು ನಮಕ್ ದಾದನೋ ಒಂಜಿ ಬದ್ ಕ್ ಗ್ ಧೈರ್ಯ ಕೊರ್ಪುಂಡು.ದೈವದ ನುಡಿ,ಅಭಯದ ಮದಿಪುಗು ನಮಕ್ ನಮ್ಮ ಉಡಲ್ದ ಉಲಯಿದ ಬೇನೆ ಬೆಸರ್ ಗ್ ಪೂರ ಸಾಂತ್ವನ ತಿಕ್ಕುಂಡು.
ತುಳುನಾಡ ದೈವೊಲೆಗ್ ಬೊಲ್ದು ಬೊಕ್ಕ ಕೇಪುಳ ರಂಗ್ಂದ್ ಇಂಚಿನವೇ ರಂಗ್ ದ ತುತ್ತೈತಂದ್ ನಮ್ಮ ಹಿರಿಯಾಕ್ಲು ಮಲ್ತ್ ದಿತ್ತೆರ್.ಆಂಡ ನಮ ಅವೆನ್ ಕಳೆಯೊಂದುಲ್ಲ.ಉಂದು ನಮ್ಮ ತುಲುವ ಮಣ್ಣ ಸಂಸ್ಕೃತಿಗ್ ನಮ ಮಲ್ಪುನ ಅನ್ಯಾಯ.ನಮ್ಮತುಳು ಮಣ್ಣ್ ದ ದೈವಾರಾದನೆಗಿಜ್ಜಂದಿ ಕೇಸರಿ ರಂಗ್ ದ ತುತ್ತೈತ ನಮಕ್ ತೂವೆರೆ ತಿಕ್ಕೊಂದುಂಡು.ಉಂದು ಸಾಂಸ್ಕೃತಿಕ ಧಾಳಿಯಾ,ಯಜಮಾನಿಕೆನಾ ದಾದಂದ್ ತೆರಿಯೊಂದಿಜ್ಜಿ
ನಿಜವಾದ್ ತುಳುವೆರೆಗ್ ದೈವಾರಾದನೆದ ಕಟ್ಟ್ ನ್ ತೆರಿಪಾದ್ ಕೊರೊಡಾಯಿನಕುಲು ಕಟ್ಟುನಕುಲು. ಅಂಚನೆ ಇಂಚಿನ ದೈವೊಗು ಇಂಚಿನ ಬಣ್ಣ,ಇಂಚಿನ ತುತ್ತೈತ,ಇಂಚಿತ್ತ್ ನ ಮಣೆ ಮಂಚ,ಇಂಚಿತ್ತ್ ನ ಉಜ್ಜಾಲ್ಂದ್ ತೆರಿಪಾವೊಡಾಯಿನಕುಲು ಕಟ್ಟುನಕುಲು..ಇನಿ ಅಕುಲೇ ಮಣ್ಣ ಸಂಸ್ಕೃತಿನ್ ಮದತೆರ್ಡ ನನ ಏರೆಡ ಕೇನೊಡು?.ದುಂಬು ದೈವದ ತುತ್ತೈತ,ಅರ್ದಾಲೊಡು ಉಂದು ಗುಳಿಗೆ,ಉಂದು ಪಂಜುರ್ಲಿ,ಉಂದು ಜುಮಾದಿಂದ್ ಗೊತ್ತಾವೊಂತ್ಂಡ್.ಇನಿ ಕಲ್ಲುರ್ಟಿ,ಗುಳಿಗನ್ ಪೂರ ತೂನಗ ದಾದ ಬಣ್ಣಂದೇ ಗೊತ್ತಾವೊಂದಿಜ್ಜಿ.ಪುಟ್ಟುರ್ದು ಸಾವುಮುಟ್ಟದ ಆಚರಣೆಲು ಸಂಪೂರ್ಣ ವೈದಿಕ ಅಯಿಲೆಕ ತುಳುನಾಡ ದೈವಾರಾದನೆದ ಮೂಲ ಪರಂಪರೆ ನಾಶ ಆವೊಂದುಂಡು.
ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ ಅಪರಾಧ. ಅಂಚನೆ ದೈವೊಲೆನ್ ನಮಕ್ ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.ಅಂಚನೆ ಲೇಸ್ ಸುದಾರಿಕೆದ ಪಾತೆರ್ನಗ(ನಿರೂಪಣೆ),ಚಾವಡಿದ ಮಿತ್ತ್ ಪಾತೆರ್ನಗ ದೈವ ಕೊಡಿಯಡಿಟ್ ಪನ್ಪುನ ನುಡಿಕಟ್ಟ್ ನ್ ಪನ್ಪುನವು ತಪ್ಪು.ದೈವದ ಅಣಿನ್ ವೇದಿಕೆಡ್ ಪಾಡುನವು ತಪ್ಪು.ಕೊಡಿಯಡಿತ ದೈವದ ನುಡಿನ್ ಕೊಡಿಯಡಿಟೇ ಕೇನೊಡು.ದೈವದ ನುಡಿನ್ ಅಂತರ್ಜಾಲೊಡು ದೈವದ ಚಿತ್ರ ಪಾಡ್ದ್ ಬರೆಪುನಲ ಸರಿ ಅತ್ತ್.
ಮುಳ್ಳು ಗುಳಿಗೆ
ಉಲ್ಲಾಲ್ದಿ ದೈವ ಇಡಿಯಡ್ಕ ಪೆರ್ಲ
ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ ಅಪರಾಧ. ಅಂಚನೆ ದೈವೊಲೆನ್ ನಮಕ್ ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.
ದೈವಾರಾದನೆ ಅವು ಮೂಡ ನಂಬಿಕೆಯತ್ತ್.ಮಂತ್ರ ಪೂಜೆಲ ಅತ್ತ್.ಅವು ಬದ್ ಕ್ ಗ್ ಒಂಜಿ ಎಡ್ಡೆ ಸಾದಿ ಮಲ್ತ್ ಕೊರ್ಪುನ ವ್ಯವಸ್ಥೆ,ನ್ಯಾಯಾಂಗ ವ್ಯವಸ್ಥೆ.ನಂಬೊಳಿಗೆನೇ ಮೂಲು ಬದ್ ಕ್ ದ ಬಾಜಿರ ಕಂಬ.
ಚೌಂಡಿ ದೈವ ಅಮ್ಮುಂಜೆ
ಕುಟುಮ ಸಂಸಾರ ಓಲೋಲು ಪದ್ ರ್ದ್ ಇತ್ತ್ಂಡಲ ವರ್ಸೊಗೊರ ಒಂಜೆ ಕೊಡಿಯಡಿಟ್ ಸೇರಾವೊಂತ್ ನಿ ದೈವಾರಾದನೆ.ವಾ ಕೋಪ,ಓದುಒರಂಟ್ ಇತ್ತ್ಂಡಲ ಒಂಜಿ ದಿನತ ಮಟ್ಟ್ ಗಾಂಡಲ ಒಟ್ಟು ಸೇರಾವೊಂತ್ ನಿ ದೈವಾರಾದನೆ.
ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ಎಡತ ಮರ್ಗಿಲ್ಡೇ ಉಪ್ಪೊಡು. ನಮ ದೈವೊಗು ಎಡತ್ ದ್ ಉಂತುದೇ ಮದಿಪುನ ಕೆರಮ.ದಾಯೆ ಪಂಡ ದೈವದ ನುಡಿಟ್ ಅಪ್ಪೆಯಾಂಡ ಬಲತ ಸಿರಿ ಮಿರೆ ಕೊರ್ದು,ತಮ್ಮಲೆಯಾಂಡ ಬಲತ ತುಡೆ ಮಿತ್ತ್ ಕುಲ್ಲಾದ್ ಪಾಲಿಪುವೆ ಪನ್ಪಿ ನುಡಿ ಉಂಡು .ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.
ದುಂಬು ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಇಲ್ಲದುಲಯಿ ಮದನಕೈ ಪಲಯಿಡ್,ಮಣೆಟ್ ದೀದ್ ಆರಾದನೆ ಮಲ್ತೊಂತೆರ್ಡ ತುಡರ್ ದೀದ್,ಸುತ್ತೆ ದೀದ್ ಲ ಆರಾದನೆ ಮಲ್ತೊಂತೆರ್.ಹಿರಿಯಾಕ್ಲೆಗ್ ವರ್ಸೊಗೊರ ಅಗೆಲ್ ಪಾಡ್ದ್ ಕುಟುಮೊಗು ಸೆರ್ಸಾವುನ ಕೆರಮಲ ಇತ್ತ್ಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಒಂಜೆ ಕೋಣೆದುಲಯಿ ಪಂಜುರ್ಲಿನ ಬಲತ್ ಗ್ ಕುಲ್ಲಾದ್ ತಗೆ ತಂಗಡಿಯಾದ್ ಆರಾದನೆ ಮಲ್ಪುನೊಟ್ಟುಗು ರಾವು,ನಾಗೆ,ಪದಿನಾಜಿ ಸೇರ್ನ ಹಿರಿಯೆರ್,ಮುಡಿಪು ಇತ್ತ್ ದ್ ಮುಡಿಪುದ ಕುಟುಮೊಗು ಒಂಜಿ ಸೂತಕ ಇತ್ತ್ ದ್ ದೈವಾರಾದನೆ ಕುಟುಮೊನು ಒಂಜಿ ಸೂತ್ರದಡಿಟ್ ಗಟ್ಟಿ ಮಲ್ತ್ ದಿತ್ತ್ಂಡ್.ಇತ್ತಿತ್ತೆ ಕುಟುಮದ ಕಲ್ಲುರ್ಟಿ ಪಂಜುರ್ಲಿಗ್ ಪಿದಯಿ ಕಲ್ಲ್ ಪಾಡ್ದ್ ನಂಬುನ,ಬೇತೆ ಸಾನ ಕಟ್ಟ್ ದ್ ನಂಬುನ,ಸಾನೊಗು ಮುಗುಳಿ ದೀಪುನ ಕರಮ ಸುರಾತ್ಂಡ್. ಕೇರಳದ ಪ್ರಶ್ನೆ ಚಿಂತನೆದಕ್ಲೆನ ಪಾತೆರ ಕೇಂದ್ ಕಲ್ಲುರ್ಟಿ ಪಂಜುರ್ಲಿನ್ ರಡ್ರಡ್ಡ್ ಕೋಣೆಡ್ ಬೇತೆ ಬೇತೆನೆ ಕುಲ್ಲವುನ ಕೆರಮ ಸುರಾತ್ಂಡ್.ಪಿದಯಿ ಕಲ್ಲ್ ಪಾಡ್ದ್ ನಂಬುನಲಾ ಸಾನದ ಸಂಕಲ್ಪನೇ ಆಂಡ್.ಕೆಲವೊಂಜಿ ಕುಟುಮೊಡು ವರ್ಣಾರ ಪಂಜುರ್ಲಿ ಬತ್ತಿ ಬಿನ್ನೆಯಾಂಡ,ಕುಪ್ಪೆ ಪಂಜುರ್ಲಿ ಪ್ರದಾನ ಆದಿತ್ತ್ಂಡ ಅವುಲು ಕುಪ್ಪೆನ ಎಡತ ಮರ್ಗಿಲ್ ಡ್ ವರ್ಣಾರನ್ ಬೇತೆನೆ ಪಲಯಿಡ್ ದೀದ್ ನಂಬುವೆರ್.
ಕುಟುಮದ ಮುಡಿಪುನು ಕಲ್ಲುರ್ಟಿ ಪಂಜುರ್ಲಿನ ಅದೆಟೇ ದೀವೊಂತೆರ್.ಇತ್ತೆ ಅವ್ವೇ ಅದೆಟ್ ಗೋಡೆ ಕೊರೆದ್ ಪಲಯಿಡ್ ಮುಡಿಪು ದೀಯೊಂದಿಪ್ಪುನವು ಆಯೊಗು ಮಲ್ಪುನ ಒಡಕ್.ಇಲ್ಲಗೊಂಜಿ ತಾರಾಯಿ ಕಟ್ಟ್ ನಗ,ಈಡ್ ಕಟ್ಟ್ ನಗ,ಓಮದ ಪುರ್ಸಾದ ಕಟ್ಟ್ ನಗ ಗೋಡೆಗ್ ನೆಲಕ್ ತಾಗಂದಿಲೆಕ ಕುಬಲ್ ಗ,ಅಟ್ಟದ ಅಡ್ಡೊಗ ಕಟ್ಟೊಂತೆರ್.ಅಂಚನೆ ಮುಡಿಪುನ್ಲ ನೆಲ ಬೊಕ್ಕ ಗೋಡೆಗ್ ತಾಗಂದಿಲೆಕ ದೀಯೊಡು.ಮುಡಿಪು ದೈವದ ಕೋಣೆಡ್ ದೀನವ್ಲು ಅಗೆಲ್ ಪಾಡ್ಂಡ ಅಸುದ್ದಾಪುಂಡುಂದು ದೈವದ ಮಣೆ ಮಂಚದೆದುರು ಅಗೆಲ್ ಪಾಡಂದೆ ಕೋಣೆದ ಪಿದಯಿ ಚಾವಡಿಡ್ ಬಲಸೊಂದುಲ್ಲೆರ್ ಉಂದು ತಪ್ಪು.ನಮ ಕಲ್ಲುನವ್ಲು ಒನಸ್ ಬಲಸಂದೆ ಓಲಾ ಪಿದಯಿ ನಂಕ್ ತೋಜುಲೆಕ ಬಲಸ್ಂಡ ನಮಕ್ ಉನೆರಾಪುಂಡೇ.ಅಂಚನೇ ಅತ್ತೆ ನಮ ನಂಬಿ ದೈವೊಲು.ದೈವೊಗು ಬಲಸುನ ಜಾಗೆ ಸುದ್ದಾಚಾರೊಡುಪ್ಪೊಡುಂದು ಅಟ್ಟ ಇಜ್ಜಂದಿ ಜಾಗೆಡ್ ಕುಬಲ್ ರ್ದ್ ಕಜವು ಬೂರಂದಿಲೆಕ ಅಟ್ಟದ ಬಾಗೊಗು ಬೊಲ್ದು ಕುಂಟು ಕಟ್ಟೊಂತೆರ್.ನಿಚ್ಚ ಗೋಡೆಗ್ ಕುತ್ತು ದೀಪ(ಕೋಲ್ತಿರಿ) ದೀಪುನೆನ್ ತಪ್ಪು ಪಂಡಿ ಪ್ರಶ್ನೆ ಚಿಂತನೆದಕುಲು ನಿತ್ಯ ತುಡರ್ ದೀಯೆರೆ ಪಂಡ್ ದ್ ಪೊತ್ತೊಂತಿ ನಿನೆನ್ ಎಲಿ ಮಾಡ್ ಗ್ ಕೊನೊದು ಇಲ್ಲ್,ಸಾನ ಪೊತ್ತ್ ನಲ ಉಂಡು.ನಿಚ್ಚ ಪೂನೀರ್ ದೀಯೊಡಾಯಿನ ದೈವೊಲೆಗ್ ಸಂಕ್ರಾಂತಿಗೊರ ಬಾಕಿಲ್ ದೆಪ್ಪುನ ಪರಿಸ್ತಿತಿಗ್ ತುಳುವೆರೆನ್ ಅಕುಲು ಕನತ್ ಪಾಡ್ಯೆರ್.
-ಪೂರಕ ಮಾಯಿತಿ-ಶಂಕರ ಕುಂಜತ್ತೂರು.ದೈವಾರಾದನೆ ಕ್ಷೇತ್ರ ಕಾರ್ಯದ ಅನುಭವಿಲು.
.jpg)
ನಮ ಮಾತ ತರೆನೇ ತೂವೊಂದು ಪೋಯ.ಕಾರ ಮುದೆಲ್ ತೂಯ್ಜ.ನೆಲ ಮೂಲ ಸಂಸ್ಕೃತಿದ ಬೆನ್ನಿ ಮದತ.ಅರಸೊತ್ತಿಗೆಡ್ದೇ ತೂವೊಂದು ಬತ್ತ.ಕಾರ್ ದಂಟ್ ದ್ ಬೂರ್ನಗ ನೆಲತ ಬಿಲೆ ತೆರಿಂಡ್.ಬೂರ್ದು ಲಕ್ಕೊಂದು ಪರತೊಂದು ಉಂತ್ ನಗ ಕಾಲ ಕರಿದ್ ಪೋಂಡ್.ಮುಂಡಾಸ್ ದಾಯೆ ಆಯೆರೆ ಆಯಿಜಿ.ಮುಟ್ಟಲೆ ಪಾಡ್ರೆ ಮನಸ್ ಬತ್ತ್ ಜಿ
ಇನಿತ ದಿನಮಾನೊಲೆಡ್ ತುಳುನಾಡ ಬೆಮ್ಮೆರೆನ್ ಆದ್ಯಾತ್ಮ ಪರಬ್ರಹ್ಮ ಮಲ್ಪೆರೆ ಪೋದು ನಮ್ಮ ಜವನೆರೇ ಅಕ್ಲೆ ಸಂಸ್ಕೃತಿಗ್ ಕುಡರಿ ಪಾಡೊಂದುಲ್ಲೆರ್.ನನ ದೈವ,ನಾಗನ ಕೊಡಿಯಡಿಕ್ ಆದ್ಯಾತ್ಮ ಪೊಗ್ಗ್ಂಡ ದೈವೊಲ್ನ ಅಣಿ ಕಡ್ಸಲೆ,ಮುಗ ಮೂರ್ತಿ ಒವ್ಲಾ ಬೋಡಾವಂದ್.ಆತ್ಮ ಸಂಸ್ಕಾರ ಮಲ್ತ್ ದ್ ಅತ್ಮದುಲಯಿ ದೈವೊಲೆನ್ ನಂಬುನ ಕಾಲ ಬರು.ಬಳೆಯಾಪುನ,ಗಡಿಯಾಪುನ,ಮಾನೆಚ್ಚಿ,ನೇಮ,ಕೋಲ,ತಂಬಿಲ ಒವ್ಲ ಉಪ್ಪಂದ್.ಆದ್ಯಾತ್ಮದ ಆತ್ಮ ಪರಮಾತ್ಮನ ಸಮ್ಮಂದ ಗಟ್ಟಿಯಾದ್ ದೈವಾರಾದನೆ ತೆರಿಯಂದಿಲೆಕ ಮಯಕಾಪುನ ದಿನ ದೂರ ಇಜ್ಜಿ.ಅಂಚಾದ್ ಮೂಲ ದೈವಾರಾದನೆನ್ ಒರಿಪುನ ಜವಾಬ್ದಾರಿ ಪ್ರತಿಯೊರಿ ತುಳುವಗ್ಲಾ ಉಂಡು
ಬರವುದ ಕೊಂಡಿಲು-
No comments:
Post a Comment