ಉಜೆ ಭಸ್ಮ -uje bhasma

                    ಉಜೆ ಭಸ್ಮ -uje bhasma

ತುಳುವ ದೈವ ದೇವೆರೆ ಆರಾದನೆಡ್ ಜನಮಂದೆಲೆನ ಬದ್ ಕ್ ದ ಆಚರಣೆಲೆಡ್ ಮಡಿವಾಳೆರೆಗ್ ಅಕ್ಲೆನವೇ ಒಂಜಿ ಮಾನಾದಿಗೆ ಇತ್ತ್ಂಡ್.ಅಂಚನೆ ದುಂಬುದ ಕಾಲೊಡು ದೇವಸಾನೊಲೆಡ್ ಮಡ್ಯೆಲೆರ್ ಸುದ್ದ ಮಲ್ರ್ ದ್ ದಲ್ಯ ಪಾಡಂದೆ ದೇವೆರೆ ಬಲಿ ಪೋಪುನ ಕೆರಮ ಇಜ್ಜಾಂಡ್.ದೈವಸಾನೊದ ಸುದ್ದಾಚಾರೊಡ್ಲ ಮೊಕ್ಲೆಗ್ ಮಲ್ಲ ಮಾನಾದಿಗೆ ಉಂಡು. ಬಂಟದಾರೆದ ಧಾರಾಕಲಶೊನು ಮಡಿವಾಳೆರೇ ಮಲ್ತ್ ಕೊರ್ಪುನಿ.  ಅಳಿಯಕಟ್ಟ್ ದ ಪುರೋಹಿತೆರಾದ್ ಮೊಕ್ಲು ಮೊಕ್ಲೆನ ಕೆಲಸ ಮಲ್ತೆರ್ಡ ಆಣ್ ಪೊಣ್ಣನ ತಮ್ಮಲೆಡಿಕುಲು‌ ಮದಿಮೆಡ್ ದಾರೆ ಏರಾವುನಿ.ಮಕ್ಳ್ ಕಟ್ಟ್ ಡ್ಲ ಮಡ್ಯೆಲೆಗ್ ಎಡ್ಡೆ ಮಾನಾದಿಗೆ ಉಂಡು.ಅಕ್ಲೆನ್ ಬುಡ್ದು ಒವ್ವೇ ಎಡ್ಡೆ ಕೆಲಸೊನು ಮಲ್ಪುಜೆರ್.ದೈವ ದೇವೆರೆನ್ ಸುದ್ದ ಮಲ್ಪುನಕುಲು ಮಡ್ಯೆಲೆರಾಂಡ ಸಾವುದಾನಿ ಮಡ್ಯೆಲೆರೆಗ್ ತಲಿಪುದ ಸುದ್ದದ ಕೆರಮ ಇಜ್ಜಿ.ಅನಿ ತಲಿಪುದ ಸುದ್ದದ ಕೆರಮ ಉಪ್ಪುನಿ ಬಂಡಾರಿ ಸಮುದಾಯದಕುಲೆಗ್. ದಲ್ಯದ ಮಡಿಕುಂಟು ದೈವಸ್ಥಾನದ ಕೊಡಿಯಡಿ ದೇವಸ್ಥಾನದ ಮಡಿಪಟ್ಟೆ ದೈವದ ಬಾಲ್ ಬಂಡಾರ

ಇಂಚಿತ್ತಿನ ಕಾರ್ಯೊಗು ಮಡಿವಾಳ ಸಮುದಾಯದಕುಲೆ ಬೋಡಾಯಿನಿ. ಉಂದು ಪೂರ್ವಾದಿ ಕಾಲೊಡ್ದೇ ಬತ್ತಿಂಚಿ ಕಟ್ಟ್ .

                               ಉಜೆ ಭಸ್ಮ.
                  ಉಜೆ ಪನ್ಪಿ   ಈ ಸವ್ದ ಇತ್ತೆದ ಎಚ್ಚಿನಕ್ಲೆಗ್ ತೆರಿದಿಪ್ಪೆರೆ ಸಾಧ್ಯ ಇಜ್ಜಿ . ದಾಯೆ ಪಂಡ ಉಂದು ದೈವದ ಪ್ರಧಾನ ಚಾಕಿರಿ ಭಾಗ ಆಯಿನ ಮಡ್ಯೆಲೆರೆಗ್ ಮಾತ್ರ ತೆರಿದುಪ್ಪೆರೆ ಸಾಧ್ಯ . ದುಂಬುದ ಕಾಲೊಡು ಇತ್ತೆದಲೆಕ ಸಾಬೂನು ,ಸರ್ಪು ಪೊಡಿ ಇಜ್ಜಾನ್ಡ್ . ಅಪಗ ಅಕ್ಲು ಬೊಲ್ದು ಕುಂಟು ಅರ್ದಿ ಬೊಕ್ಕ ಕುಂಟು ಪೂರ ಸೊಚ್ಚೊ ಆಯೆರೆ ಉಜೆ ಭಸ್ಮೊ ಮುರ್ಕಯಿ  ನೀರ್ಗ್ ಪಾಡೊಂತೆರ್ . ಅಂಚನೆ ಪ್ರಧಾನವಾದ್ ಈ ಬೊನ್ಯೊನು ಭಸ್ಮದ ಒರಟು ದೈವೊದ ಮುಂಡ್ಯೆಗ್ ಗಲಸುನ ದಲ್ಯೊ ಪಂಡ ಬೊಲ್ದು ಕುಂಟುನು ಸುದ್ದ ಮಲ್ಪೆರೆ ಗಲಸೊಂತೆರ್.ಲೆಕ್ಕ ಪ್ರಕಾರ ತಾರೆದ ಕೊಂಬು,ಪೆತ್ತ್ ದ ಅಂಬಿದ ಬಜಂಟ್ ಬೊಕ್ಕ ಪುಣೊಕು ಪೊದೆತಿ ದೆತ್ತ್ ನ ಕುಂಟುನು ಪೊತ್ತಾದ್ ಉಜೆ ಬಸ್ಮ ಮಲ್ತೊಂತೆರ್.ನನ ಕೆಲವೆರ್ ತಾರೆದ  ಕೊತ್ತಲಿಂಗೆ ನುಂಗಾದ್ ಅವೆತ ಚೋಲಿ ದೆತ್ತ್ ದ್ ,ಪೊತ್ತಾದ್ ಬೊನ್ಯ ಮಲ್ತ್ ದ್ ,ಬಾರೆದ ಕೈಲ್ಡ ದಂಡ್ ನ್ ನುಂಗಾದ್ ಪೊತ್ತಾದ್ ಬೊನ್ಯ ಮಲ್ತ್  ದ್ ,ಪೆತ್ತದ ಅಂಬಿದ ಬೆಜಂಟ್ ನ್ ನುಂಗಾದ್ ಪೊತ್ತಾದ್ ಬೊನ್ಯ ಮಲ್ತ್  ದ್ ಉಜೆ ಭಸ್ಮ ಮಲ್ತೊಂತೆರ್. ಇಂಚ ಪೊತ್ತಾಯಿ  ಬೊನ್ಯೊನು ಒಟ್ಟು ಬಿರಾದ್ ಒಂಜಿ ಮಡಿ ದಲ್ಯ ಪಂಡ ಬೊಲ್ದು ಕುಂಟುಡು ಸುತ್ತುದು ನೀರ್ಡ್ ಮುರ್ಕಾದ್ ದೆತ್ತ್ ನೆಕ್ "ಉಜೆ ಭಸ್ಮ" ಪನ್ಪಿ ಪುದರ್ . ಉಜೆತೊಟ್ಟುಗು ತಿಕ್ ದ್ ನ ಕುಂಟು ನುಂಗಾದ್, ಉದ್ದೊಗು ಬುಡ್ಪಾಯಿ ಕುಂಟುಗು, ಬಂಗಾರ್ದ ಸರಿಯೆ ದೀದ್ ,ಮಡಿ ಮಲ್ತಿ ಕುಂಟು ನುಂಗಿ ಬೊಕ್ಕ ಉದ್ದದ ಪಲಯಿಡ್ ದೀದ್ ಪೂಜೊಡು . ಬೊಕ್ಕ ಉರುಂಟಾದ್ ಸುತ್ತುದು ಕುಂಟುನು ಮಡಿತ್ ದೀಪುನಡೆ ಮಡಿ ಸುದ್ದ ಆಂಡ್ಂದ್ ಲೆಕ್ಕ . 

                 ಬಾರೆದ ಕೈಲ್ನ್ ತಿಗ್ತ್ದ್ ,ನುಂಗಾದ್ ಪೊತ್ತಾದ್ ಬೊನ್ಯ ಮಲ್ತ್ದ್ ಭಸ್ಮ ಮಲ್ಪುನಿ

     
       ನನೊಂಜಿ ಅಭಿಪ್ರಾಯೊನು ತೂಪುಂಡ ಉಜ್ಜಿ  ಭಸ್ಮೊನು ಸುದ್ದ ಕಾರ್ಯೊಗು ಗಲಸೊಂತೆರ್ಗೆ . ಬೆಜನ್ಟ್ ದ ಬೊನ್ಯ ಅತ್ತ್ ನ್ಡ  ಕೇವ್ ಬೊನ್ಯೊನು ಗಾಲ್ತ್ ದ್ ಕಮ್ಮೆನೊಗು ದೂಪದ ಬೊನ್ಯ ಕೂಟೊಂದು ಬೊಲ್ದು ಕುಂಟುಡು ಸುತ್ತುದು ದೀವೊಂತೆರ್ಗೆ . ದುಂಬು ಪೊಣ್ಣು ಪೋದು ಪೊಂಜೊವಾಯಲ್ದ,ಪೊಂಜನಕ್ಲೆ ಆಮೆ ಸೂತಕೊಗು ಮಡ್ಡೆಲೆರ್ ಬತ್ತ್ ದ್ ಈ ಭಸ್ಮ ಕಲತ್ದ್ ,ತಲಿತ್ದ್ ಸುದ್ದ ಮಲ್ತೊನ್ತೆರ್ಗೆ . ಬಟ್ರ್ ನಕುಲ್ಲಾ ಉಂದೇ ಸುದ್ದಾಚಾರೊಗುಂದು ಮಡ್ಯೆಲೆರ್ನ ಇಲ್ಲಡೆ ಬತ್ತ್ದ್ ಉಜೆ ಭಸ್ಮ ಕೊನೊ ವೊಂತೆರ್ಗೆ,ಸುದ್ದ ಕಾರ್ಯೋಗು ಮಾತ್ರ ಗಲಸೊನ್ತೆ ರ್ಗೆ . ದುಂಬು ಮಡ್ಯೆ ಲೆರ್ ಆಮೆ ಬೆನ್ಯೆರೆ ೫ ಟ್ ಬತ್ತೆರ್ಡ ಆಮೆ ಬೆಂದ್ ದ್ ಪೋನಗ ಆಯೆ ಬಾಲೆಗ್ ಈ ಭಸ್ಮೊನು ಇಡೀ ಮೆಯ್ಕ್ ಪೂಜಿದ್ ಮೀಪಾಲೆಂದ್ ಕೊರ್ದು ಪೋವೊಂತೆಗೆ . ಉಂದು ಉಜೆ ಭಸ್ಮ . ಆಂಡ ಇತ್ತೆ ಮಡ್ಯೆ ಲೆರ್ ಆಮೆ ಬೆನ್ರೆ ಬರ್ಪಿನ ಕಿರಮ ಇಜ್ಜಿ. ಅಕ್ಲೆಗ್ ಇತ್ತೆ  ಆಮೆ ಸೂತಕೊಗು ಪನ್ಪುನಕುಲ್ಲ ಇಜ್ಜಿ . ಇತ್ತೆ ದೇವೆರೆ ನೀರ್ ಕನತ್ ದ್ ತಲಿತ್ ನಡೆ ಆಮೆ ಸುದ್ದಾನ್ಡ್ ಪಂಡ್ ದ್ ಎನ್ಯುವೆರ್ . ಇತ್ತೆ ದುಂಬುದ ತುಳುವ ನಾಡ್ ದ ಸಂಪ್ರದಾಯ ಪೂರ ನಾಶ ಆವೊಂದಿಪ್ಪುನವು ದುರಂತ .

                         ಕೊತ್ತಲಿಂಗೆನ್ ನುಂಗಾದ್ ಚೋಲಿ ದೆತ್ತ್ದ್ ಚೋಲಿನ್ ಪೊತ್ತಾದ್ ಬೊನ್ಯ ಮಲ್ತ್ದ್ ಭಸ್ಮ ಮಲ್ಪುನಿ

          ಈ ಉಜೆ ಭಸ್ಮ ಕಾಸಿ ಬಾಗೀರ್ತಿ ಸೀರ್ತೋರ್ದ್ ಲ ಜಾಸ್ತಿ ಮಾನಾದಿಗೆ ಪಡೆದಿತ್ತ್ ನ್ಡ್ . ಆಂಡ ದೈವ ಸಾನದ ಉಲಯಿ ಪೋದು ಚಾಕಿರಿ ಮಲ್ತೊನ್ತಿನ ಮಡ್ಯೆಳೆರ್ ಸಾನೊರ್ದು ಪಿದಾಯಿ ಬೂರ್ದು ದೈವದ ಮುಗ ಪತ್ತ್ದ್ ದರಿಪುಲೆಕಾನ್ಡ್ . ಒವ್ವೆ ದೈವ ಚಾಕಿರಿದ ಕಲೊಟು ಅಕ್ಲ್ ಬೊಲ್ದುದ ಶುದ್ಧದ ದುತ್ತೈ ತ ಬುಡ್ದು ಬೇತೆ ತುತ್ತಯೆರ್ .೧೦-೧೧ ತಿಂಗೊಲು ಇಜ್ಜಾ ವರ್ಸೊಡು ನಡಪೊಡಾಯಿನ ಬಾಲೆ ನಡತ್ ಜಿಂಡ ಮಲ್ಪೊಡಾಯಿನ ಬೇಲೆನ್ ಬಾಲೆ ಮಲ್ತಿಜಿಂಡ ಆ ಬಾಲೆಗ್ ಆಮೆ ಸೊಂಕ್ದ್ ನ್ಡ್ ನ್ದ್,ಮುಟ್ಟಿ ಚಟ್ಟೆ ಆತ್ ನ್ಡ್ ,ಆ ಬಾಲೆನ್ ಮಡ್ಡೆಲ ಕಲ್ಲ್ ಡ್ ಕುಲ್ಲಾದ್  ಮೀಪಾವೊಡುಂದು ಪನೊಂತೆರ್ . ನರಮಾನಿ ಸೊರೊ ಕೇನುನ ದುಂಬು ಪುಲ್ಯಕಲೊಗು ಮಡಿ ತೊಯ್ಪುನ ಮಡ್ಯೆಲೆ ಮಡ್ಯೆಲ ಕಲ್ಲ್ ದ ಮಿತ್ತ್ ಬಾಲೆನ್ ಕುಲ್ಲದ್ ಆ ಬಾಲೆನ್ ಆಯೆ  ಮೀಪಂಡ ಮುಟ್ಟಿಚಟ್ಟೆ  ದೋಸ ದೂರಾದ್ ಬಾಲೆಗ್ ನಡಪೆರೆ ಕೈಕಾರ್ ಸರಿ  ಬರ್ಪುಂಡು . ಆತ್ ಶಕ್ತಿ ಇಪ್ಪೆದ್ ನ್ಡ್ ಮಡ್ಯೆಲೆರ್ ಬಾಲೆನ್ ಮೀಪಾವುನ ನೀರ್ಗ್ .ಮಡಿ ಮಲ್ಪುನ ಮಡ್ಯೆಲೆರೆಡ ಇನಿಲಾ ಉಜೆ ಭಸ್ಮ ಕೇಂಡ ಅಕ್ಲು ಖಂಡಿತ ಕೊರ್ಪೆರ್ . 
                   

                           ಪೆತ್ತದ ಅಂಬಿದ ಬೆಜಂಟ್

        ದೈವದ  ಪಟ್ಟದ ಮುಗ ದೀಯೆರೆ ದಲ್ಯ ಪಾಡೆರೆ ,ಮುಂಡ್ಯೆಡ್ ಮುಗ ದೀಯೆರೆ ದಲ್ಯ ಪಾಡೆರೆ ,ಕೊಡಿಯಡಿತ ಮುಗ ಮೂರ್ತಿ ದೀಪುನ ದಲ್ಯ ಪಾಡೆರೆ ,ಸಿಂಗದನ ದಲ್ಯ ಪಾಡೆರೆ ಸುದ್ದೊಗು ಉಜೆ ಭಸ್ಮ ಗಲಸುವೆರ್.ದೈವದ ದಲ್ಯೊಗು ಪಂಡ ಬೊಲ್ದು ಕುಂಟುಗು ಉಜೆ ಭಸ್ಮ ಅಗತ್ಯ . ದೈವದ ಕೊಡಿಯಡಿತ ಮೇಲ್ಕಾಪಾವಡ್ [ಬಾಲುಲಿ ],ಮಕರ ಚೋರ್ನದ ದಲ್ಯ ಆವಡ್ ಅವೆನ್ ಮಡ್ಯೆಲೆರೇ ಪಾಡುನಿ . ದುಂಬುದ ಕಾಲೊಡು ಮಡ್ಯೆಲೆರೆ ಪೌರಹಿತ್ಯೋಡು ತುಳುನಾಡ ಮದ್ಮೆಲು ನಡತೊಂತ .ಇನಿ ಅಡೆ ವೈದಿಕತೆ ಬತ್ತ್ ನ್ಡ್ . ಮದ್ಮೇದ ದೊಂಪಡ್ ಮಡ್ಯೆಲೆರಿತ್ತೆರ್ ಪಂಡ ಉಜೆ ಭಸ್ಮದ ಸುದ್ಧತೆ ಆ ಜಾಗೆಡಿತ್ತಿಲೆಕೊನೆನ್ದ್ ನಂಬಿನಕ್ಲ್ ತುಳುವೆರಾದಿತ್ತೆರ್ . ಇನಿ ವೈದಿಕ ದೇವೆರೆ ಸೀರ್ತೊಗು ಉಜೆ ಭಸ್ಮ ಬಿರಾದ್ ಆಮೆ ಸೂತಕ ಕಳೆಯೆರೆ ತಲಿಪುನ ಕಿರಮ ಕೆಲವು ತಿಕ್ಕ್ ಡ್ ತೋಜುಂಡು. ಇಂಚ ಮಲ್ಪುನವು ತಪ್ಪು . ಉಜೆ ಭಸ್ಮೊಗು ಅವೆತನೇ ಆಯಿನ ಪಾವಿತ್ರ್ಯ ಉಂಡು  . ಉಂದು ಉಜೆ ಭಸ್ಮದ ಮಾನಾದಿಗೆ.ಮಡ್ಯೆಲೆರ್ ಉಜೆ ಬಸ್ಮೊನು‌ ಪಾಡ್ದ್  ಆರ್ ಬಣ್ಣಂಗಾಯಿದ ನೀರ್ ನ್ ಓಡ ಮರಾಯಿಗ್ ಪಾಡ್ದ್  ಗುವೆಲ್ದ ನೀರ್ ನ್ ತಲಿತ್ ದ್ ಕುಕ್ಕು ಪೆಲತ ಕೊಡಿಟ್ ತಲಿತಿಂಚಿನ ತಲಿಪು 

ಉಂದು ಪವಿತ್ರ.ಅವ್ಲು ಮಂಜಲರಿ ಪತ್ತುನವಾದಿಪ್ಪು,ಕೆಬಿಕ್  ನೀರ್ ಕುಂಟು ದೀಪುನವಾದಿಪ್ಪುನೀರ್ ನಿರೆಲ್ ಕಟ್ಟುನವಾದಿಪ್ಪು ,

ಪಿಚ್ಚಂಗಾಯಿಡ್(ಬೆರಿಕ್ ತಿರ್ಗಾದ್ ಪತ್ತಿ ಎಡತ ಅಂಗೈ) ಪಚ್ಚೆ ಪೀಲಿ ಮನ್ಪುನೆ ಉಂದು ಪೂರ ಮಯಕಾತ್ಂಡ್‌.ಈ ಕೆರಮೊಲೆಡ್ ಕಾಲೆ ಪರಿಶುದ್ದ ಅದ್ ಕುಲೆಯಾಪುಂಡುಆಸೆಡ್ ನಮ ಸೈತಂಡ ನಮ ಕಾಲೆಯಾಪುನಿ.ಅಂಚಾದ್ ಇಲ್ಲದುಲಯಿ ತೆನ್ಕಾಯಿಗ್ ತರೆ ಪಾಡ್ದ್ ಪುಣ/ಶಾಮ ದೀಬೊಕ್ಕ ಮುಳಿತ ಇಲ್ಲಾಂಡ ಮುಳಿ ಜಾರಾದ್ಓಡುದ ಇಲ್ಲಾಂಡ ಓಡು ಜಾರಾದ್ ಕಾಲೆ ಪಿದಯಿ ಪೋಯೆರೆ ಜಾಗೆ ಮಲ್ತ್ ಕೊರ್ಪ.ಆ ಕುಲೆನ್ ನಮ ರಾತ್ರೆ ಉಲಯಿ ಲೆಪ್ಪುನಿ.ಒಂಜಿ ಕೊಡಿರೆಟ್ ಬಲಸುನಿ.ಅವೆರ್ದ್ ಬೊಕ್ಕ ಕುಲೆ ಸುದ್ದ ಆಪುನಿ ಪದ್ರಾಡ್ ಸಂಕ್ರಾಂತಿ ಕರಿಬೊಕ್ಕ.ಅವೆರ್ದ ಬೊಕ್ಕ ಕುಟುಮದೌಲು ಉಲಯಿ ಲೆಪ್ಪುನಿ.ದಯವ ಪಂಜುರ್ಲಿನ ಪಾದೊಗು ಕುಲೆನ್ ಸೇರಾವುನಿ.

ಮಡ್ಯೆಲೆರ್ ಇಲಾಲ್ ಗ್ ,ಜೀಟಿಗೆಗ್ ಕಟ್ಯೆರೆ,ಕೊಡಿಯಡಿ ಕಟ್ಟೆರೆ ಪುಣತ ಕುಂಟುನೇ ಗಲಸೊಂತೆರ್.ದಾಯೆ ಪಂಡ ಮಸನೊಡುಪ್ಪಿ ಸಿವನ ಗಣೊಕ್ಲು ನಮ್ಮ ದೈವೊಲು. 

ನರಮಾನಿ ಬಾಲೆಯಾದ್ ಸುರುಟು ಜೆಪ್ಪುನ್ಲ ಬೊಲ್ದು ಕುಂಟುಡೆ.ಸೈತಿ ಬೊಕ್ಕ ಪುಣ ಆದ್ ಜೆಪ್ಪುನ್ಲ ಬೊಲ್ದು ಕುಂಟುಡೆ.ಅಂಚಾದ್ ತುಳುವೆರ್ ಪುಟ್ಟುರ್ದು ಸಾವುಗು ಜಾಸ್ತಿ ಮಹತ್ವ ಕೊರ್ತೆರ್.

ಬಾಲೆ ಜೆಪ್ಪುನ ತೊಟ್ಟಿಲ್ ಗ್ ಕಾಟದ ಟಡಿತ ಪೊತ್ತ್ ದ್ ಒರಿನ ಮರ ಪಾಡೊಂತೆರ್.

ಅಂಚನೆ ಒಂಜಿ ಕಾಲೊಡು ಪುಣತ ಮೇಲ್ ಗ್ ಪಾಡ್ ನ ಕುಂಟುನು‌ ದೆಕ್ಕ್ ದ್ ಜೀಟಿಗೆಗ್ ಸುತ್ತೊಂತೆರ್.ಕುಂಟು ಕನಪುನಾತ್ ಲ ಬಡಪೊತ್ತ್ ದ. ಕಾಲ ಅವ್ವಾದಿತ್ತ್ಂಡ್ ಗೆ.

   

ಮಡ್ಯೆಲೆರ್ ಬೊಂಡದ ನೀರ್ಡ್ ತೆಂಡೆಲ್ ತರೆತ್ ದ್  ಗಂದ ಮಲ್ತೊಂತೆರ್.ಸಾಸ್ತ್ರೊಗು ತಕ್ಕ ಪೆತ್ತದ ಅಂಬಿ,ಪೆತ್ತದ ಪಡಿಕೆ ಅವೆಕ್ ಪಾಡೊಂತೆರ್.ಇನಿ ಅಕುಲ್ಲ ಕೂಚಿಡ್ ಕಾಲಿ ನೀರ್ ಕನವೊಂದುಲ್ಲೆರ್.ದುಂಬುದ ಕೆರಮ ಕೆಲವೆರೆಗ್ ಮದತ್ ಪೋತ್ಂಡ್.ಕೆಲವು ತಿಕ್ ಡ್ ತೆಂಡೆಲ್ ಉಪ್ಪುನ ಕೊಂಬುನು ತರೆತ್ ದ್ ಗಂದ ಮಲ್ತೊಂತೆರ್.ಅವೆನ್ ಬೊಂಡ ನೀರ್ದ ತೀರ್ಥೊಗು ಪಾಡೊಂತೆರ್.

ಲೇಖನೊಗು ಸಕಾಯೊ :-
ಉಮೇಶ್ ಶಿರಿಯ
ಪ್ರಶಾಂತ್ ಬಂಗೇರ