ದೈವಾರಾದನೆ ಅಜ ತತ್ತ್ ದ್ ಪೋತ್ಂಡ್

     ದೈವಾರಾದನೆ ಅಜ ತತ್ತ್ ದ್ ಪೋತ್ಂಡ್

    

     

      ಕಂಟೆಲ್ ದ ಮಾಲೆಗ್ ದೈವದ ಪದಕ ಬೈದ್ಂಡ್

ಗುಳಿಗನ್ ಗುಳಿಗೆ ಆದೇ ಆರಾದನೆ ಮಲ್ಪುಗ,ಕ್ಷೇತ್ರಪಾಲೆ,ಪರಿವಾರ ಸಗ್ತಿ,ದೇವೆರಾದ್ ಅತ್ತ್

ಗುಳಿಗನ್ ಗುಳಿಗೆ ಆದೇ ಆರಾದನೆ ಮಲ್ಪುಗ,ಕ್ಷೇತ್ರಪಾಲೆ,ಪರಿವಾರ ಸಗ್ತಿ,ದೇವೆರಾದ್ ಅತ್ತ್.

 

ಕಲ್ಲೆತ್ತಿ ಗುಳಿಗೆ ಅಂಡಿಂಜೆ  
 

  "ನಮ ಇನಿಯತ್ತ್ಂಡ ಎಲ್ಲೆ ಬೂರ್ದು ಸೈಪುನಕುಲು.ನಮ್ಮ ಕಟ್ಟ್ ಕಟ್ಲೆ ಸೈಪುಜಿ.ಅವು ಬದುಕುಂಡು.ಎಲ್ಲಂಜಿ ನಮ್ಮ ಪುದರ್ ಮಾಜುಂಡು.ನಮ ನಂಬಿ ಸತ್ಯೊಲ್ನ ಪುದರ್ ಮಾಜುಜಿ.ಅಂಚಾದ್ ನಮ ಉಪ್ಪಿನ ನಾಲ್ ದಿನ ಸತ್ಯೊಲೆಗ್ ಸರಿಯಾದ್,ಹಿರಿಯಾಕ್ಲೆನ ಕಟ್ಟ್ ಕಟ್ಲೆಗ್ ಸರಿಯಾದ್ ಬದ್ಕ್ಂಡ ಅವ್ವೇ ನಮ್ಮ ದುಂಬುದ ಸಾದಿಗೊಂಜಿ ಬೊಲ್ಪು".

    -ಯಂ.ಡಿ.ಶೆಟ್ಟಿ.ಇರಾ

ಗುಳಿಗ ದೈವೊಗು ಮೂಲದ ಆರಾದನಾ ಕೆರಮ:-

            ತುಳುನಾಡ್ ಡ್ ಬಾರ್ಯಾತ್ ವರ್ಸೊರ್ದು ದುಂಬೇ ಗುಳಿಗನ ಆರಾದನೆ ನಡತೊಂದಿತ್ತ್ ದ್ ಗುಳಿಗನ ಬನತ ಬರಿಟೇ ಗಡುವಾಡಿ ಜಾಗೆಡೇ ಗುಳಿಗಗ್ ಕೋಲ ನಡತೊಂತ್ಂಡ್.ಕೋಲ ಮಾತ್ರ ಬಾರೀ ಅಪ್ರೂಪ ಆದಿತ್ತ್ಂಡ್.ಇನಿತಲೆಕ ಮೋನೆಗ್ ಬಣ್ಣ ಪಾಡುನಾವಡ್,ಕೋರಿ ಅಗ್ಯುನಾವಡ್,ಪಲ್ಟಿ ಹಾಕುನ,ಅಬತಾರ ಕಟ್ಟ್ ದ್ ಇಲ್ಲದಕ್ಲೆಗ್ ನಿಲೆನೇ ಇಜ್ಜಂದಿಲೆಕ ಮಲ್ಪುನ ಕೆರಮನೇ ಇಜ್ಜಾಂಡ್.ಗುಡಿ ಗುಂಡ ಸಾನ ಕಟ್ಟ್ ದ್ ಗುಳಿಗನ್ ನಂಬುನ ಕಟ್ಟೇ ಇಜ್ಜಾಂಡ್.ಗುಳಿಗಗ್ ಬನನೇ ಇತ್ತ್ ನಿ.ಗಡುಪಾಡಿ ಜಾಗೆದ ಬನತ ಬರಿತ ಜಾಗೆನ್ ಒತ್ತರೆ ಮಲ್ತ್ ದ್,ಜಾಗೆನ್ ಕೆರೆತ್ ದ್ ಅಂಬಿ ಅಡಿತ್ ದ್ ಗುಳಿಗಗ್ ಕೋಲ ಕೊರ್ದು ಊರುದ ಮಾರಿ ಗಿಡೆತೊಂತೆರ್.ಇನಿತಲೆಕ ತಿಕ್ ನೌಲು ಪೂರ ಗುಳಿಗೆ ಊರು ಬುಡ್ದು ಬಲಿಪುನ ಕೆರಮ ಇಜ್ಜಾಂಡ್.ಇನಿ ತಿಕ್ ನೌಲು ಪೂರ ಗುಳಿಗನ್ ಕೊನೊದು ನಿಜವಾಯಿನ ಗುಳಿಗಗ್ ಪೂ ನೀರ್ ಇಜ್ಜಂದಿಲೆಕಾಂಡ್.ಇನಿ ಗುಳಿಗನ್ ಪತ್ತ್ ದ್ ದೀಯೆರೆಂದ್ ತುಳುವೆರೆ ಸೈನ್ಯ ಬೋಡಾಪುಂಡು.ಮೋನೆಗ್ ಮಜಿ ಪೂಜಿದ್ ಸುಣ್ಣದ ಬೊಟ್ಟು ಪಾಡ್ದ್ ತಿರಿ ಕಟ್ಟ್ ದ್ ಗುಳಿಗಗ್ ಕೋಲ ನಡತೊಂತ್ಂಡ್.ಒಂಜಿ ಊರುಡು ಗಡುಪಾಡಿ ಜಾಗೆಡ್ ಒಂಜೇ ತಿಕ್ ಡ್ ಎಚ್ಚಾದ್ ಕೋಲ ನಡತೊಂತ್ಂಡ ಕೆಲವೊರ ರಡ್ಡ್ ತಿಕ್ ಡ್ ಕೋಲ ನಡತೊಂತ್ಂಡ್.ಇನಿತಲೆಕ ಕುಟುಮದಿಲ್ಲಲ್,ಇಲ್ಲಿಲ್ಲಲ್ ಪೂರ ಗುಳಿಗನ ಕೋಲ ನಡತೊಂದಿಜ್ಜಾಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿಗ್ ನೇಮ ನಡತೊಂತ್ಂಡ್ ವಿನಃ ಗುಳಿಗನ್ ನಂಬುನ ಕೆರಮ ಇಜ್ಜಾಂಡ್.ಏಪ ಅಷ್ಟಮಂಗಲ ಪ್ರಶ್ನೆ,ತಾಂಬೂಲ ಪ್ರಶ್ನೆಲು ಬತ್ತನ ಇಲ್ಲಲ್ ನಾಲ್ ಜನ ಇತ್ತ್ಂಡ ಪದಿನಾಲ್ ದೈವೊಲೆನ್ ನಂಬುಲೆಕಾಂಡ್.ಕಟ್ಟೆರೆ ಬತ್ತ್ ನಕುಲ್ಲ ನೇಮೊಡು ಪೊಸ ಪೊಸ ದೈವೊಲುಂಡುಂದು ಕುಟುಮೊಡ  ನಂಬಾಯೆರೆ ಸುರು ಮಲ್ಪಾಯೆರ್. ಗುಳಿಗೆ ಇಡಿಡಿ ಕೋರಿ ಅಗ್ಯುನ ಬುಡ್ಲೇ ನೆತ್ತೆರ್ ಬಿಂದುನು ಸಮೇತ ಬಾಯಿಗ್ ಪಾಡ್ರೆ ಇಜ್ಜಾಂಡ್.ಗುಳಿಗಗ್ಂದ್ ಕಟ್ಟ್ ಕಟ್ಟಲೆದಂದ್ ಒಂಜಿ ಕೋರಿ ಮಾತ್ರ ಗಲಸೊಂತೆರ್.ಗುಳಿಗಗ್ ಕೋಲ ರಾತ್ರೆ ಪದ್ರಾಡ್ ಗಂಟೆರ್ದ್ ಬೊಕ್ಕನೇ ನಡತೊಂತ್ ನಿ.ಗಡಿ ಪಾಡ್ನ ಜಾಗೆಡ್ ಗುಳಿಗೆ ಲಕ್ಕ್ಂಡ್ ಪಂಡ ಊರ್ದ ಮಾರಿನ್ ದೇರ್ದ್ ಬರೊಡುಂದು ಲೆಕ್ಕ.ಆಯೆ ಗಡು ಪಾಡಿ ಜಾಗೆಡ್ ಉಪ್ಪುನಾಯೆ.ಬೈಲ ಮಾರಿಡ್ಲ ಊರ್ದ ಮಾರಿನ್ ಗಿಡೆಪುನ ಕೆರಮ ಉಂಡು .ಗುಳಿಗನ ಬನೊಟು ಗುಳಿಗನ ಕಲ್ಲ್ ಗ್ ಕುರ್ದಿ ನೀರ್ ಪಾಡ್ದ್ ,ತುಡರ್ ದೀದ್ ಗುಳಿಗನ ಕೊಡಿಯಡಿಟ್ ಬಲಿಕ್ ಕೋರಿನ್ ಕೊಯ್ದ್ ನೆತ್ತೆರ್ ನ್ ಬಲಿಕ್ ಜಪುಡಾವೊಂತೆರ್.ಪತ್ತ್ ಪದಿನೈನ್ ವರ್ಸೊರ್ದಿಂಚ ಕೋರಿನ್ ಅಗ್ಯುನ‌ ಗುಳಿಗನಕುಲು‌ ತೂಯೆರೆ ತಿಕ್ಕೊಂದುಲ್ಲೆರ್.ಇನಿ ಪೂರಾ ಕಟ್ಲೆಲೆನ್ ನಮ ಪುಡತೊಂದುಲ್ಲ .ಇನಿತಲೆಕ ಅಜ್ಜೊಗೊಂಜಿ ತಿಕ್ ಡ್ ಗುಳಿಗ ಕೋಲ ನಡತೊಂದಿಜ್ಜಾಂಡ್.ಪತ್ತಿರ್ವತ್ತೈನ್ ವರ್ಸೊರ್ದಿಂಚಿ ಗುಳಿಗನ್ ಇಲ್ಲಿಲ್ಲಲ್ ನಂಬೆರೆ ಸುರು ಮಲ್ತೆರ್..ಇನಿ ಕೇನುನಕುಲ್ಲಾ ಇಜ್ಜಿ,ಪನ್ಪುನಕುಲ್ಲಾ ಇಜ್ಜಿಂದಾದ್ ತಾನ್ ಬೀಜುನ ತಂದೇಲೇ ಸರಿಂದ್(ತಂದೆಲ್ ಪಂಡ ಸುತಾಲ ಗೀಸ್ ನ ಸೋಂಟೆ,ಉರುಂಟುದ ದಪ್ಪದ ಕೋಲು,ದಂಟೆ,ತೋರದ ಬೆತ್ತ.ಕಲಸೆದ ಕೋಲುರ್ದು ತಂದೆಲ್ ಒಂತೆ ಉದ್ದ)ಬೀಜೊಂದುಲ್ಲೆರ್.ಇನಿ ಗುಳಿಗನ ಕೋಲ ಮಿತಿ ಮೀರ್ನ ಅಬ್ಬರ ಆದ್ ಪೋಂಡ್.ಗುಳಿಗೆ ತುಳುನಾಡೊರ್ಮೆ ನೆಗತ್ ತೋಜಿದ್ ನಿ ವಿನಃ ಗುಳಿಗನ್ ಪತ್ತ್ ದ್ ದೀನಕುಲಿಜ್ಜೆರ್."ಸ್ವಾಮೀ ಗುಳಿಗ ದೈವ ಕಾತ್ ರಕ್ಷಣೆ ಮಲ್ಪುಲ "ಪನ್ನೌಲು ಆಯೆ ನೆಗತ್ ತೋಜಿದೆ.

       ದುಂಬು ಪೂರ ಗುಳಿಗಗ್ ಕೋಲ ಕೊರ್ಪುನ ಕಿರಮೊನೇ ಇಜ್ಜಾಂಡ್.ಒಂಜಾತ್ ವರ್ಸದ ಇಂಚಿಪ ಬತ್ತಿ‌ ಕೆರಮ ಉಂದು.ಗುಳಿಗಗ್ ಪನಿವಾರ ಬಲಸ್ ದ್ ತಂಬಿಲ ಸೇವೆ ಇತ್ತ್ ನಿ.ಗುಳಿಗಗ್ ತಾರಾಯಿ ದರ್ಪುನನೆ ಕಟ್ಟ್.ಗುಳಿಗನ ಕಲ್ಲ್ ಗ್ ತಾರಾಯಿ ದರ್ಪುನ,ಕೋರಿ ಕೊಯ್ಪುನವೇ ಕಟ್ಟ್.ನಮಡ ಬೋಡಾಯ್ನಾತ್ ದುಡ್ಡಾಂಡ್,ಕೆಲವೆರೆಡ ಉದ್ದ ಉದ್ದದ ವಾರಗಟ್ಲೆ ತೂಪುನ ಅಲ್ಮೋಗದ ಪ್ರಶ್ನೆ ಚಿಂತನೆಯಾಂಡ್.ಅವೆಕ್ ಸರಿಯಾದ್ ಬುದ್ದಿ ಪನ್ಪುನ ವೈದಿಕ ಮಾರ್ಗದರ್ಶನ ಸುರಾಂಡ್.ಅಕುಲೇ ಅರ್ಚಕೆರಾದ್ ಬತ್ತ್ ದ್ ಲಾ ಆಂಡ್.ನಮಡ ದುಡ್ಡಿತ್ತ್ ನಕ್ಲು ಅಕುಲು ಪನ್ನವೇ ಸರಿಂದ್ ಪನ್ನಗ ಚರವಾಯಿನ ದೈವೊಲೆಗ್ ಕಲ್ಲ್ ಪ್ರತಿಷ್ಟೆ,ಬ್ರಹ್ಮ ಕಲಶ ಇಜ್ಜಿಂದ್ ಅಕ್ಲೆಗ್ ಗೊತ್ತಿಂಡಲಾ ನಮ್ಮ ಒತ್ತಡೊರ್ದಾದ್ ಬತ್ತಿನ ಅಕುಲು ನಮ‌ ನಂಬುಲೆಕ  ನಮನ್ ನಂಬಿಸಯೆರ್.ಅಂಚಾದ್ ಗುಳಿಗನ ಮೂಲ ಆರಾದನೆ ತತ್ತ್ ದ್ ಇಂಚ ಪೊಸ ಕಟ್ಟೆಲು ಪೂರ ಬೈದ್ ನಿ.ದುಂಬುಗು ಕೋಲಲಾ ಸೇರೊಂಡ್.ದುಂಬು‌ ಗುಳಿಗಗ್ ಕೋಲದ ಕಟ್ಟಿಜ್ಜಂದೆ ಕೋರಿ ಕೊಯ್ಪುನ ಕಟ್ಟಿತ್ತ್ಂಡ್.

       ದುಂಬುದ ಕಾಲೊಡು ಗುಳಿಗನ ಕೋಲೊಡು ಕೈಟ್ ಕೊರೊಂತುನ ಆಯುಧ ಅರಿತ ಮುಡಿ ಕಟ್ಟ್ ನಗ ಗಲಸುನ ಕೊದಂಟಿ.ಕೊರಗ ತನಿಯನ ಕೈಟ್ ಇತ್ತ್ ನಿ ರಾಜ ದಂಡದ ಒರುತ  ನೆಕ್ಕಿದ ಬೆತ್ತ.ದುಂಬು ಗುಳಿಗನ್ ಗುಡ್ಡೆಡ್ ತಾತ್ಕಾಲಿಕವಾದ್ ಕಲ್ಲ್ ಪಾಡ್ದ್ ನಂಬೊಂದು ಅವ್ಲು ದಾಲ ದೀವೊಂದಿಜ್ಜಾಂಡ್.ಅಂಚಾದ್ ತಾತ್ಕಾಲಿಕವಾದ್ ಮುಡಿ ಕಟ್ಟುನ ಕೊದಂಟಿನ್ ಗುಳಿಗನ ಕೈಟ್ ಕೊರೊಂತೆರ್.ಮಾಡ್ ಮಿನಿ ಇತ್ತ್ಂಡ ಕರ್ಬದ ಆಯುಧ/ತಿರ್ಸೂಲ ,ತಾರಿದ ತಂದೆಲ್ ದೀವೊಂತೆರ್.ತಾರಿದ ತಂದೆಲ್ದ ಕಡೆ ಕೊಡಿಕ್ ರಡ್ಡ್ ಜಾಗೆಗ್ ಬೊಳ್ಳಿದ ಕಟ್ಟ ಪಾಡ್ದ್ ದೀವೊಂತೆರ್.ತಂದೆಲ್ದ ನನೊಂಜಿ ಪುದರ್ ದಂಟೆ.ರಡ್ಡ್ ಕೈ ಬುಡ್ಪನಗಾಪುನಾತ್ ಉದ್ದದ ಪಂಡ ಒಂಜಿ ಮಾರ್ ಉದ್ದದ ದಂಟೆ.ಒಂಜಿ ಕೈಟ್ ಒರಿಯಗ್ ಆಯುಧ ಪತೊನ್ನಾತ್ ಉದ್ದದ ದಂಟೆನೆ ತಂದೆಲ್.ಇನಿ ತಿರ್ಸೂಲ ಕೊರ್ದು ಗುಳಿಗೇಶ್ವರೆ ಮಲ್ದೆರ್.ಗುಳಿಗಾಖ್ಯೆಂದ್ ಆಟೊಡು ರಕ್ಕಸೆ ಮಲ್ತೆರ್.ಗುಳಿಗಜ್ಜಂದ್ ನಡು ಬಲ ಇಜ್ಜಂದಿಲೆಕ ಮಲ್ತೆರ್. ಶನಿ ಬೊಕ್ಕ ನೀಲನ ಮಗೆ ಗುಳಿಗೆಂದ್ ಪುರಾಣ ಸೇರೊಂಡ್.ರಾವು ಕೇತುನು ರಾವು ಗುಳಿಗ ಪನೊಂದುಲ್ಲೆರ್.ಕೊದಂಟಿ ಆಟೊಡು ಬರ್ಪಿ ರಕ್ಕಸ ಏಸದ  ಆಯುಧ ಪಂಡೆರ್.ಗುಳಿಗಗಾವಡ್,ಕೊರಗ ತನಿಯಗಾವಡ್ ಕಾಯೆರ್ದ ದಂಟೆ ಮಲ್ಪೆರೆ ಬಲ್ಲಿ.ಕಾಯೆರ್ದ ಮರ ಬೂತೊಲೆಗೊಂತೆ ದೂರ.ಆಯುಧ ದಿಪುನ ವ್ಯವಸ್ಥೆ ಇತ್ತ್ಂಡ ದೈವ ಕೈಟ್ ಪತ್ತುನಂಚಿನ ಕರ್ಬದ ಗುದಿಗೆ ಮಲ್ತ್ ದ್ ದೀವೊಲಿ.ಇನಿ ಅನುಮಂತನ ಗದೆತಲೆಕ ಬೊಳ್ಳಿದ ಗದೆ ಗುಳಿಗಗ್ ಮಲ್ತೊಂದುಲ್ಲೆರ್.ಅವು ತಪ್ಪು.ಬಬ್ಬರ್ಯನ ಕೈಟ್ ಬೊಳ್ಳಿದ ಕೊದಂಟಿ ಉಪ್ಪುಂಡು.ತೂನಗ ಗದೆತಲೆಕ ಉಪ್ಪುನ ಅವೆನ್ ಮದಿಪುನಕುಲು ವಜ್ರಾಯುಧೊನು ಧಾರಣೆ ಮಲ್ತೊಂಡ ಪನ್ಪೆರ್.ಇತ್ತ್ನ ದೈವೊಲೆನ್ ದೇವೆರೆಗ್ ಓಲ್ಪಡಿ ಮಲ್ತಿ ಮದಿಪುದಕುಲು ಕಡೆಕ್ ಕೋರಿದ ಕಜಿಪುಲಬಲಸಿ ಅಗೆಲ್ ನ್ಲಾ ಗಟ್ಟಿಡೆ ಉಂಡುದು ಪೋಪೆರ್ .ಇಲ್ಲಲ್ ಕೋಲ ಮಲ್ಪವುನಕ್ಲೆಡ ಚಾಕಿರಿಗ್ ಜನ ಇಜ್ಜಿ.ಎಚ್ಚಾದ್ ಸಂಸಾರದಕ್ಲ್ ಪಿದಯೂರುಡು ಇತ್ತ್ ದ್ ವರ್ಸದ ಕೋಲದಪಗ ಬರ್ಪೆರ್.ಇಲ್ಲಲಿತ್ತಿ ಪ್ರಾಯದಕ್ಲೆಗ್ ಇಜ್ಜಾಂದಿ ಸಿರ್ಕ್ ಸಂಕಡೊರ್ದಾದ್ ದುಂಪೋಯೆರೆ ತೀರುಜಿ.ಅಂಚಾದ್ ಒರಿ ಕಟ್ಟುನಾಯಗ್ ಈತ್ ಕಾಸ್ ಗ್ಂದ್ ದೈವ ಚಾಕಿರಿ ಬುಡು ಕೊರ್ಪ.ಆಯೆ ದಾದ ಮಲ್ತ್ಂಡಲ ಅವ್ವೇ ಸರಿ.ನಮಲ ಕೋಲ ರೈಸ್ಂಡ್ ಪನ್ಪ.ಉಂಡಿ ದೆತೊನ್ನಾಯೆಲ ಸೋಕಾಂಡ್ ಪನ್ನಗ ನಂಕ್ ಕೊಸಿಯಾಂಡ್

  

ಗುಳಿಗೆ ಇಂಚ ಗಣೆಗಟ್ಟ ಏರ್ದ್ ಅಬತಾರ ಕಟ್ಟುನ ಕೆರಮ ಇಜ್ಜಿ

        ಕಲ್ಜಿಗೊಡು ಧರ್ಮ ದುಡ್ಡುದಾಯನ ಕೈಟ್ ನಲ್ತೊಂದುಂಡು . ಇನಿ ನೇಮ ಕೋಲ ಮಲ್ಪವುನಕುಲು ಪುದರ್ ದ ಆಸೆಗಾದ್  ನಮ್ಮ ಹಿರಿಯಾಕ್ಲ್ ನಡಪಾವೊಂದು ಬತ್ತಿನ ಪವಿತ್ರವಾಯಿನ ಸ್ಥಾನಮಾನದ,ನಂಬೊಳಿಗೆದ,ಪದಿನಾಜಿ ಕಟ್ಲೆದಡಿಟ್ ಆರಾದನೆ ನಡಪಾವೊಂದು ಬತ್ತಿನ ಬೂತಾರಾದನೆ/ದೈವಾರಾದನೆನ್ ನಾಶ ಮಲ್ತೊಂದುಲ್ಲೆರ್.ನಮ್ಮ ತುಳುವೆರೆಗ್ ಬಾರೀ ಮಲ್ಲ ನಂಬೊಳಿಗೆ ಇತ್ತ್ಂಡ್,ನಮ ನಂಬಿ ದೈವೊಲು ನಮ್ಮ ಕೈ ಬುಡಯಂದ್.ಸತ್ಯ ಕೊರಿ ನುಡಿ ನಮಕ್ ಬೆರಿಸಾಯ ಆದ್ ಬರುಂದು ನಂಬುದಿತ್ತೆರ್.ಅಂಚಿತ್ತ್ ನ ಸತ್ಯೊಲೆನ್ ದುಡ್ಡುದ,ಪುದರ್ದ ಪಿರವು ಬೂರ್ನಕುಲು ನಾಶ ಮಲ್ತೊಂದುಲ್ಲೆರ್.ಸತ್ಯೊಲ್ನ ಮಾನ ಮರ್ಯಾದಿನ್ ದೆತ್ತೊಂದುಲ್ಲೆರ್.

                 ಕತ್ತಲೆಕಾನ ಗುಳಿಗೆ,ರಾವು ಗುಳಿಗೆ

(ನಿಜವಾದ್ ಗುಳಿಗನ ಮೋನೆಡ್ ನಾಗನ ಜಿಡೆ ಬುಡ್ಪಾವುನ ಕೆರಮ ಇಜ್ಜಿ.ಕಪ್ಪು ಬಣ್ಣೊಗು ಬೊಲ್ದು ಸುಣ್ಣದ ಬೊಟ್ಟು ಪಾಡೊಡು)

      

   ಇನಿತ ದಿನಮಾನೊಡು ಗುಳಿಗನ್ ಅಬತಾರ ಕಟ್ಟವುನಾತ್ ಬೇತೆ ವಾ ದೈವೊನ್ಲಾ ಕಟ್ಟಾವೊಂದಿಜ್ಜೆರ್.ತುಳುನಾಡ ಮಣ್ಣ್ ಡ್ ಸಾಂಪ್ರದಾಯಿಕ ಮಣ್ಣ ಪದಿನಾಜಿ ಕಟ್ಲೆದಡಿ ಗುಳಿಗನ್ ನಂಬುನ ಬದಲ್ ತಿಕ್ ನೌಲು ಪೂರ ನಂಬವೊಂದುಲ್ಲೆರ್.ಗಟ್ಟದ ಮಿತ್ತ್ ಓಲೋಲು ಆಪುಂಡಾ ಔಲೌಲು ಗುಳಿಗನ್ ನಂಬವೊಂದುಲ್ಲೆರ್.ನನೊಂಜಿ ಉಂದೇ ಮಾದರಿಡ್ ಕಟ್ಲೆ ಮೀರ್ದ್ ಗಟ್ಟದ ಮಿತ್ತ ಪುಡೆಟ್ ನಂಬುನ ದೈವ ಪಂಡ ಕೊರಗತನಿಯೆ ಕೊರಗ ತನಿಯ ದೈವ. ಎಣ್ಮ,ಪದಿನಾಜಿ ಕೊರಗತನಿಯೆಂದ್ ಒರಾನೆ ಒಂಜೇ ಕೊಡಿಯಡಿಟ್ ಲಕ್ಕವೊಂದುಲ್ಲೆರ್.ದಾಯೆ ತುಳುವ ಗಡಿಪುಡೆ ಮೀರ್ದ್ ದೈವೊನು ತಿಕ್ ನೌಲು ನಂಬವೊಂದುಲ್ಲರ್ಂದ್ ಕೇಂಡ ಹಿಂದೂ ದೇಸೊಡು ಓಲು ಬೋಡಾಂಡಲ ಕಟ್ಟುವಂದ್ ಪನೊಂದುಲ್ಲೆರ್.ನಮ ಇನಿ ಪುಟ್ಟುದು ಎಲ್ಲೆ ಕರಿದ್ ಪೋಪುನ ನರಮಾನಿ.ದೈವ ಅಂಚತ್ತ್,ಅವು ಸಾಸಿತಾದ್ ಒರಿಯುನ.ಅಂಚನೆ ನಮ್ಮ ಪುದರ್ ಕಾಸ್ ದ ತಾಕತ್ತ್ ಡ್ ಇನಿ ಮೆರವು.ಆಂಡ ದೈವದ ಪುದರ್ ಸಾಸಿತಾದ್ ಒರಿಯುನವು.ಅಂಚಿನ ದೈವೊಲೆಗ್ಂದ್  ಇಂಚಿನನೇ ಕಟ್ಟ್ಂದ್ ನಮ್ಮ ಹಿರಿಯಾಕುಲು ಮಲ್ತ್ ದೆರ್.ಆಂಡ ಆ ಕಟ್ಟ್ ನ್ ನಮ ಪುದರ್ ದ ಆಸೆಡ್,ಕಾಸ್ ದ ತಾಕತ್ತ್ ಡ್ ಪೊಳಿತೊಂದುಲ್ಲ.ಉಂದೆರ್ದ್ ತೆರಿದ್ ತಪ್ಪು ಮಲ್ಪಿನ ಕಟ್ಟುನಾಯಗ್ಲ ದೋಸ ಉಂಡು,ತೆರಿದ್ ತಪ್ಪು ಮಲ್ಪವುನಾಯಗ್ಲ ದೋಸ ಉಂಡು.

       ಇನಿ ತುಳುನಾಡ್ ಡ್ ಒರ್ಂಬ ಗುಳಿಗೆ,ಪದಿನೆಣ್ಮ ಗುಳಿಗೆಂದ್ ನಂಬೆರೆ ಸುರು ಮಲ್ತೆರ್.ನಿಜವಾದ್ ಗುಳಿಗೆ ಉಪ್ಪುನಿ ಒರಿಯೆ,ಗುಳಿಗನ ಮೂಲ ಸ್ವರೂಪ ಒಂಜೆ.ಆಯಾ ಮಣ್ಣ್ ದ ಪುರಪುಗು ಸರಿಯಾದ್ ಗುಳಿಗನ ಪುದರ್ ಬೇತೆ ಬೇತೆ ಇತ್ತ್ಂಡಲ ಗುಳಿಗೆ ಒರಿಯೆ ವಿನಃ ಬೇತೆ ಬೇತೆಯತ್ತ್.ಈ ಒರ್ಂಬ,ಪದಿನೆಣ್ಮ ಗುಳಿಗನ ಆರಾದನೆ ಉಂಡು ಪಂಡ್ದಾಂಡ ದೈವಾರಾದನೆದ ಸಾಂಪ್ರದಾಯಿಕ ಮೂಲ ಕಟ್ಟ್ ಕಟ್ಲೆಡ್ ಇಂಚಿತ್ತಿ ಕಿರಮ ಇತ್ತ್ ನೆಕ್ ಆಧಾರ ಉಂಡು ಪಂಡ್ದಾಂಡ ಮಲ್ಪುನಕುಲು ಮಲ್ಪವುನಕುಲು ಅವೆನ್ ತೊಜಪಾವೊಡು.ಮಲ್ಪುನಕ್ಲೆಗ್ ತೆರಿದಿಜ್ಜಿಂಡ ಕಟ್ಟುನಕುಲಾಂಡಲಾ ಆದಾರ ತೋಜಾವೊಡು.ಇಜ್ಜಿ ಪಂಡ್ದಾಂಡ ಇಂಚಿ ಪೊಸ ಕೆರಮೊನು ಮಲ್ಪುನವು ತಪ್ಪು.ಅಂಚಿ ತಪ್ಪು ಮಲ್ಪುನೆನ್ ಕೈ ಬುಡ್ಪುನವು ಮಲ್ಪವುನಕ್ಲೆಗ್ಲ,ಮಲ್ಪುನಕ್ಲೆಗ್ಲ ಎಡ್ಡೆ.ದಾಯೆ ಪಂಡ ಸತ್ಯ,ಧರ್ಮ,ನ್ಯಾಯದ ಕಟ್ಟ್ ಕಟ್ಲೆಡ್ ಇಂಚಿನ ಒವುಲಾ ಇಜ್ಜಿ.ಇನಿ ಒರ್ಂಬ ದೇವಿನಕ್ಲೆನೊಟ್ಟುಗು ಒರ್ಂಬ ಗುಳಿಗೆ ಉಲ್ಲೆರ್ಂದ್ ಪನೊಂದು ಬರೊಂದುಲ್ಲೆರ್.ನಮ್ಮ ಬೂಮಿದ ಮಿತ್ತ್ ಇಜ್ಜಾಂದಿನೆನ್,ಕಟ್ಟ್ ಕಟ್ಲೆಡ್ ಇಜ್ಜಾಂದಿನೆನ್ ಒಂಜಿ ಪುದರ್ ಗ್ ಬೋಡಾದ್ ಮಲ್ತ್ ತೋಜಾದ್ ಪುಗಾರ್ತೆ ಪಡೆಯುನಾತೆ,ಅವ್ಲು ಇಂಚಾತ್ಂಡ್ ಗೆಂದ್.ನಂಬಿಕೆ ಇತ್ತ್ ನಾಯೆ ಎಂಕ್ ಅಡೆ ಪೋದು ಎಡ್ಡೆ ಆಂಡ್ಂದ್ ಪನ್ಪೆ.ನಂಬಿಕೆ ಇಜ್ಜಂದಿನಾಯಗ್ ಟೀಕೆ ಟಿಪ್ಪಣಿ ಮಲ್ಪೆರೆ ಮೊಕ್ಲು ಬೊಕ್ಕಲಾ ಒಂಜಿ ಸಾದಿ ಮಲ್ತ್ ಕೊರ್ಲೆಕಾಂಡ್.ಅಕ್ಲಾನಿ ಅಂಚ ಮಲ್ತೆರ್,ದಾನೇಂಡ್?.ಮೊಕ್ಲೆನ ದೈವ ದಾನೆ ಮಲ್ತ್ಂಡ್?.ಬೊಕ್ಕ ಮೊಕ್ಲೆನ ಬೂತ/ದೈವ ಓಲುಂಡುಂದು?.ಆಯೆ ತಪ್ಪು ಮಲ್ತಿತ್ತೆಡ ಆಯಗ್ ದೈವ ಸಿಗ್ಸೆ ಕೊರೊಡಿತ್ತ್ಂಡತ್ತ?.ದಾಯೆ ಕೊರ್ತ್ ಜಿ?.ಅಪಗ ಪೆಟ್ಟ್ ಬೂರುನಿ ಓಲು ಪಂಡ ನಮ್ಮ ನಂಬೊಳಿಗೆಗ್.

         ತುಳುವೆರೆಗ್  ನ್ಯಾಯಾಲಯ ಬೊಕ್ಕ ಬತ್ತ್ ನಿ.ದೈವೊಲೆ ಚಾವಡಿ ದುಂಬಿತ್ತ್ ನಿ.ಅವ್ಲು ತೀರ್ಮಾನ ಆಯಿನೆಕ್ ಬೇತೆ ಪಾತೆರನೇ ಇಜ್ಜಾಂಡ್.ಆಂಡ ಇನಿ ಇಂಚಿನ ಪೂರ ಅತ್ರಾಣೊಲು ಆವೊಂದಿತ್ತ್ ನೆರ್ದಾದ್ ದೈವೊಲೆನ್ಲ ಕೊನೊದು ಇನಿ ನ್ಯಾಯಾಲಯದ ಮುಟ್ಟು ಬಡ್ತವುಲೆಕಾಂಡ್.ಮೊಕ್ಲು ಪೂರ ನಮ್ಮ ನಂಬೊಳಿಗೆನೆ ಅಡಿಮೇಲ್ ಮಲ್ತ್ ಲೆಕಾಂಡ್.ಗುಳಿಗೆ ಒರಿಯೆ.ಒರ್ಂಬ ದೇವಿನಕ್ಲೆನೊಟ್ಟುಗು ಒರ್ಂಬ ಗುಳಿಗೆಂದಿಜ್ಜಿ.ಆಯೆ ಉಪ್ಪುನಿ ಒರಿಯೆ.ಆಯೆ ಅಭಯ ಕೊರ್ಪುನ ಸಗ್ತಿದಾಯೆ,ಏರ್ನ ಚಾಕಿರಿಭಾಗದಾಯೆ ಅತ್ತ್.ಆಯಾ ಮಣ್ಣ್ ದ ಪುರಪುನು ಒರಿತೊಂದಿ ಗುಳಿಗೆ ಬೇತೆ ಪುದರ್ಡ್ ಉಪ್ಪೆ ವಿನಃ ಆಯನ ಮೂಲ ಸ್ವರೂಪ ಒಂಜೆ.ಆಯೆ ತುಳುನಾಡ್ ಗ್ ದೇವ ದೇವಿನ ಆರಾದನೆ ಬರ್ಪುನ ದುಂಬೇ ತುಳುವೆರೆಡ ಆರಾದನೆ ಪಡೆಯೊಂತ್ ನಾಯೆ.ಒರ್ಂಬ ದುರ್ಗೆನಕ್ಲೆಗ್ ಒರ್ಂಬ ಗುಳಿಗೆ,ಪದಿಬೆಣ್ಮ ಗುಳಿಗೆಂದ್ ಮೊಕ್ಲು ಪಂಡಲಾ ತುಳುವ ಕಟ್ಟ್ ಡ್ ಅವಿಜ್ಜಿ.ತುಳುವ ಕಟ್ಟ್ ನ್ ಪೊಳಿತ್ ದ್ ಇಂಚಿತ್ತಿ ಅಪಚಾರ ಮಲ್ತ್ ದ್ ದೈವಾರಾದನೆದ ಬಿಲೆನ್ ದಾಯೆ ಕಳೆಯೊಂದುಲ್ಲೆರ್?.ಪುರಾಣದ ಪ್ರಕಾರ ತೂಪುಂಡಲಾ  ದೇವಿ ಪುರಾಣೊಡು ಒರ್ಂಬ ದುರ್ಗೆನಕ್ಲೆಗ್ ಒರ್ಂಬ ಗುಳಿಗೆಂದ್ ಓಲುಂಡು?.ಇಂಚ ಪೂರ ಆಂಡ ದೈವಾರಾದನೆಗ್ಂದ್ ಇತ್ತ್ ನ ನಂಬೊಳಿಗೆಗ್,ಮರ್ಯಾದಿಗ್ ಅಪಚಾರ ಆಪುಂಡು.ದೈವಾರಾದನೆದ ಬಿಲೆ ಪೋಪುಂಡು.ನಮಡ ದಾದಾಪುಂಡು ಪನ್ಪುನೆನ್ ತೊಜಪಾದ್ ಕೊರ್ದು ದಾನೇಪುಂಡುಂದು ತಿಗಲೆ ಮರತ್ ಲೆಕಾಪುಂಡು(ಮೆರೆಯಿಲೆಕ).ನಮ ಕಟ್ಟ್ ನ್ ಪೊಳಿತೊಂದು ಪೋವೊಂದುಲ್ಲ.ಕಟ್ಟ್ ನ್ ಪೊಳಿಪುನ ಹಕ್ಕ್ ಏರೆಗ್ಲಾ ಇಜ್ಜಿ.ಕೋಲ ಕಟ್ಟುನಕುಲೆ ಕಟ್ಟೊಡು.ಬೇತೆಕುಲು ಕಟ್ಟ್ಂಡ ಕೋಲ ನೇಮ ಆಪುಂಡಾ?.ಅಂಚನೇ ಅತ್ತೆ ಕಟ್ಟ್ ಕಟ್ಲೆಲ?.ಕೋಲ ಕಟ್ಟುನಕ್ಲೆನ್ ಎಂಚ ಬದಲ್ಪೆರೆ ಆಪುಜಾ ಅಂಚನೇ ಕಟ್ಲೆನ್ ಬದಲ್ಪೆರೆಲಾ ಆಪುಜಿ.ನೆತ್ತೆರ್ ಕೊರ್ಪುನೆಕ್ ನೆತ್ತೆರೇ ಕೊರೊಡು,ಕುಂಬುಡತ್ತ್.

      ದೈವದಪ್ಪಣೆ ಪಂಡ ಒಂಜಿ ಕಾಲೊಡು ತುಳುವೆರೆಗ್ ನ್ಯಾಯಾಲಯದ ತೀರ್ಪುರ್ದ್ ಲಾ ಮಲ್ಲಾದಿತ್ತ್ಂಡ್.ಅಂಚಿತ್ತ್ ನ ನ್ಯಾಯ ತೀರ್ಮಾನ ಮಲ್ಪುನ ದೈವದ ಮಿತ್ತ್ ಸಂಶಯ ಪುಟ್ಟುಲೆಕ ಮಲ್ತೊಂದುಲ್ಲೆರ್.ಇಂಜಿ ದೈವೊಗು ಬಾರ್ಯಾತ್ ಪರಕೆ ಬತ್ತಿತ್ತ್ಂಡ ಅವೆನ್ ಬೇತೆ ಬೇತೆ ರೀತಿಡ್ ಕರಿಪೆರೆ ಆಪುಂಡು,ಸಂಕ್ರಾಂತಿಲೆಗ್ ಕರಿಪೊಲಿ,ಬೇತೆ ಬೇತೆ ದಿನೊಟು ಕರಿಪೊಲಿ,ಮಲ್ಲ ನೇಮ ಮಲ್ತ್ ದ್ ಒರಿನೆನ್ ಕಟ್ಟ್ ಕಟ್ಲೆದಲೆಕ ದೈವೊನು ಪಿರಿಪ ಪಿರಿಪಾದ್ ಮಲ್ಪೊಲಿ.ಒರ ಕಟ್ಟಿ ಅಣಿ,ತಿರಿ,ಬಣ್ಣೊನು ಗಿದ್ ತ್ ದ್ ಪಡಿಯರಿ ಪತ್ತ್ ದ್ ಪಿರ ಕಟ್ಟೊಲಿ.ಪದಿನೆಣ್ಮ ಗುಳಿಗೆ ಆಂಡ ಒಂಜೆ ದೊಂಪದ ಒಂಜೆ ಕೊಡಿಯಡಿಟ್ ಮಲ್ಪೆರೆ ಆಪುಜಿ.ಒರ್ಂಬನಾ,ಪದಿನೆಣ್ಮನ ಕೊಡಿ ಇರೆನ್ ಒಂಜಿ ಬಲಿಕ್ ಪಾಡ್ದ್ ನೇಮ ಕರಿಪೆರೆ ಆಪುಜಿ.ಅಂಚಿ ಕಟ್ಟ್ ತುಳುವ ಮೂಲ‌ ಸಂಪ್ರದಾಯದ ಕಟ್ಟ್ ಡ್ ಇಜ್ಜಿ.ಒಂಜೆ ದೊಂಪದಡಿಟ್ ಕೊಡಿಯಡಿ ಕಟ್ಟ್ ದ್ ಬಂಡಾರ ಏರ್ದ್ ರಾಜಂದೈವೊಲೆಗ್ ಕಟ್ಟ್ಂಡಲ ಆ ನೇಮ ಪಿರಿದ್ ಕೊಡಿಯಡಿರ್ದ್ ಬಂಡಾರ ಪೋಯಿಬೊಕ್ಕ ಒರಿನ ದೈವೊಲೆಗ್ ಅವ್ವೆ ಕೊಡಿಯಡಿಟ್ ಬಂಡಾರ ಕೇರ್ತ್ ದ್ ನೇಮ ನೆರಿ ನಡಪಾವೊಲಿ.ಆಂಡ ಒಂಜೇ ಕೊಡಿಯಡಿಟ್ ಒಂಜೇ ದೈವೊನು ಒರ್ಂಬ,ಪದಿನಾಜಿ ದೈವ ಅದ್ ಆರಾದನೆ ಮಲ್ಪುನ ಕೆರಮ ತುಳುವ ಕಟ್ಟ್ ಡಿಜ್ಜಿ.

      ಒರ್ಂಬ,ಪದಿನೆಣ್ನ ಗುಳಿಗನ್ ಮಲ್ಪೊಡಾಂಡಲ ಒರ್ಂಬ ದೊಂಪ ಪಾಡೊಡು,ಒರ್ಂಬ ಕೊಡಿಯಡಿ ಕಟ್ಟೊಡು,ಒಂಜೇ ದೈವೊನು ಒರ್ಂಬ ಪದಿನೆಣ್ಮಂದ್ ಒಂಜೇ ದೊಂಪ,ಕೊಡಿಯಡಿಟ್ ಲಕ್ಕಯೆರೆ ಸಾದ್ಯ ಇಜ್ಜಿ.ಒರ್ಂಬ ಗುಳಿಗೆ ಒರಾನೆ ಲಕ್ಕುನಿಯಾಂಡ ಒರ್ಂಬ ದೊಂಪಾವೊಡು,ಒರ್ಂಬ ಕೊಡಿಯಡಿ ಆವೊಡು,ಒರ್ಂಬ ಬೇತೆನೇ ಸುದ್ದ ಓಮ‌ ಆವೊಡು,ಒರ್ಂಬ ಬಂಡಾರ ಆವೊಡು,ಅಂಚ ಒರ್ಂಬ ಕೊಡಿಯಡಿಟ್ ಒರ್ಂಬ ಗುಳಿಗನ್ ಲಕ್ಕಂಡ ಬೇತೆ ಬೇತೆನೇ ಆಂಡ್.ಅವು ಬುಡ್ದು ಒಂಜೇ ಕೊಡಿಯಡಿಟ್,ಒಂಜೇ ಸುದ್ದ ಓಮೊಡು,ಒಂಜೇ ಬಲಿಟ್ ಒರ್ಂಬ ಗುಳಿಗನ್ ಲಕ್ಕವುನವು ತಪ್ಪು.ಅಂಚ ಮಲ್ತ್ಂಡ ತುಳುವ ದೈವಾರಾದನೆದ ಕಟ್ಟ್ ನ್ ಪೊಳಿತ್ ಲೆಕಾಂಡ್.ಒಂಜಿ ದೈವೊನು ಎಣ್ಮ,ಪದಿನಾಜಿಂದ್ ಪುಡತ್ ಲೆಜಾಂಡ್.ಒರ್ಂಬ ಪರಕೆ ಬತ್ತಿತ್ತ್ಂಡ ಒರ್ಂಬ ದಿನ ಮಲ್ಪೊಲಿ,ಇಜ್ಜಾ ಒರ್ಂಬ ದೊಂಪೊಡು ಮಲ್ಪೊಲಿ.ಬೂಲ್ಯೊರ್ದು ,ಪಡಿಯರಿ,ಎಣ್ಣೆರ್ದ್ ಸುರಾಯಿನ ಪೂರಲಾ ಬೇತೆನೇ ಆವೊಡು.ಅಪಗಂಡ ಅವೆಕೊಂಜಿ ಅರ್ಥ ಉಂಡು.ದಾಯೆ ಪಂಡ ಪರಕೆ ಸಂದಯೆರೆಂದ್ ಮಲ್ಪುನಿಂದ್.ಇನಿ ಕಟ್ಟುನಾರಾವಡ್,ಮಲ್ಪವುನಾರಾವಡ್ ಕಟ್ಟ್ ಪೊಳಿತ್ ದ್ ದೈವಾರಾದನೆ ಮಲ್ತೆರ್ಡ ಅವೆತ ಸಿಗ್ಸೆ ದೈವ ಖಂಡಿತಾ ಕೊರಂದೆ ಕುಲ್ಲಂದ್.ತಿಕ್ಕ್ ನಗ ಒಂತೆ ಕಡೆಸು ಆತೆ.ಆಂಡ ಅರೆತ್ ನಾಯನ್ಲಾ,ಮೊರೆತ್ ನಾಯನ್ಲ,ಕಡೆಕ್ ಚಾಕಿರಿದ ಮೂಲ್ಯನ್ಲ,ಕಟ್ಟುನಾಯನ್ಲ ದೈವ ಬುಡ್ತ್ ಜಿ.ಗುಳಿಗೆ ಶಕ್ತಿಗ್ ಶಕ್ತಿದಾಯೆಲ ಅಂದ್,ಭಕ್ತಿಗ್ ಬಗ್ಗುನಾಯೆಲಾ ಅಂದ್,ಆಯಗ್ ಜಾಕಿನ ಪನ್ಪುನ ಚೂರ್ಲ ಇಜ್ಜಿ.ಪೆದ್ದಿ ಅಪ್ಪೆನ ನೆತ್ತೆರ್ ಒಯ್ತ್ ನಾಯೆ ಗುಳಿಗೆ.ಅಪ್ಪೆನೆ ಬುಡ್ತ್ ಜೆ. ಬಾಕಿದಕ್ಲೆನ್ ಬುಡುವೆನ?.ನೆತ್ತೆರ್ ಬಿಂದುದಾವಾರದ ದೈವೊನು ಕುಂಬುಡೊಡು ಸಮದಾರಿಕೆ ಮಲ್ಪೆರೆ ಸಾದ್ಯನ?.

    ಮೂಲ ಕಟ್ಲೆನ್ ನಮ ಪಣೊಲಿ ಬೈಲ್ ದ ಅಪ್ಪೆ ಕಲ್ಲುರ್ಟಿನ ಸಾನೊಡು ತೂದು ಕಲ್ಪೊಡು.ಅಡೆಗ್ ಸಾರ ಕಟ್ಲೆ ಕೋಲ ಪರಕೆ ಬತ್ತ್ಂಡಲ ಒರಾನೆ ಎಣ್ಮ,ಪದಿನಾಜಿಂದ್ ದೈವೊನು ಲಕ್ಕಾವುಜೆರ್.ಪಂಡಿ ಪರಕೆ ಒರೊರ ಎತ್ತೊಡಂಡ ನಾಲೈನ್ ವರ್ಸಲ ಕಾಪೊಡಾವು.ಒಂಜಿ ದಿನ ರಡ್ಡಾ ಮೂಜಾ ಪರಕೆ ನಡಪಾವೆರ್.ಪ್ರತಿಯೊಂಜಿ ಪರಕೆ ನಡಪಾನಗಲ ಪದ್ದೆಯಿ,ಅಣಿ ಅರ್ದಾಲ ದೆತ್ತ್ ದ್ ಪೊಸತಾದ್ ಪಡಿಯರಿ ಪತ್ತ್ ದ್ ಬಣ್ಣ ಪಾಡ್ದ್ ಪದ್ದೆಯಿ ಪಾಡ್ದ್ ಆಯುದೊಗು ಕೈ ಕೊರ್ಪೆರ್.ಅಗೆಲ್ ಬೆತೆನೇ ಮಲ್ಪುನಿ,ಕೋರಿ ಬಂಟೆ ಬೇತೆನೇ ಮಲ್ಪುನಿ.ಕಲ್ಲುರ್ಟಿ ಕಲ್ಕುಡಗ್ ಮೋನೆಗ್ ಕಪ್ಪು ಪೂಜಿದ್ ಸುಣ್ಣದ ಬೊಟ್ಟ ಪಾಡುವೆರ್ ವಿನಃ ಇನಿತ ಕಲ್ಲುರ್ಟಿ ಕಟ್ಟುನಕುಲ್ಲೆಕ ಮೋನಗ್ ಆಟದ ದೇವಿನ ಸಿರಿಯೇಸ ಆವಡ್,ಮೋನೆದ ರಂಗಾವಡ್ ಪಾಡುಜೆರ್.ಉಂದು ನಿಜವಾಯಿನ ಆರಾದನೆದ ಕೆರಮ. 

        ಕಟ್ಟೆರೆ ಪದ್ ನೆಣ್ಮ ಜನೊಕು ತಿಕುನೆಡ್ದ್ ಲ ಕಟ್ಟ್ ಪದಿನಾಜಿ ಒರಿಯೊಡು.ಪದಿನೆಣ್ಮ ದೊಂಪಾಂಡಲ ಮಲ್ಲೆತ್ತ್.ಮೂಲ ಪದಿನಾಜಿ ಕಟ್ಲೆ ಒರಿಯೊಡು.ವಾ ಸಂಘಟನೆ ಮಲ್ಪುನ ತೀರ್ಮಾನೊರ್ದ್ ಲಾ ನಮಕ್ ಕಟ್ಟ್ ಕಟ್ಲೆನ್ ಒರಿಪೊಡಾಯಿನವು ಮಲ್ಲೆ.ಪ್ರತಿಯೊಂಜಿ ದೈವೊಗ್ಲ ಅವೆತನವೇ ಆಯಿನ ಒಂಜಿ ಆವಾರ ಸಂಸ್ಕೃತಿಂದುಂಡು.ಅವೆಕ್ ಸಾತ್ವಿಕ ಆವಾರ ಕುಂಬುಡ ಅತ್ತ್.ಅವೆಕ್ ನೆತ್ತೆರ್ ಬಿಂದು ಬೋಡೆ.ಕುಂಬುಡ ಬಿಚ್ಚಾದ್ ಕುಂಕುಮ ತಲಿತ್ಂಡ,ಕುರ್ದಿ ನೀರ್ ದೀಂಡ ಅವು ನೆತ್ತೆರಾವಾರ ಆಪುಜಿ.ಆ ನೆತ್ತೆರ್ ನ್ ಅವು ಬೇತೆ ರೂಪೊಡು ದೆತೊನುಂಡು.ಅಂಚಾದ್ ನಮ ಗುಳಿಗಡ ಗೊಬ್ಬುನವು ಸರಿಯತ್ತ್.ವಾ ದೇವ ದೇವಿನೊಟ್ಟುಗು ಇನಿತ ದಿನಮಾನೊಡು ಗುಳಿಗನ್ ನಮ ನಂಬುಂಡಲಾ ದೇವ ದೇವಿ ಆರಾದನೆ ಬರ್ಪುನ ದುಂಬೇ ತುಳುನಾಡ್ ಡ್ ನೆತ್ತೆರಾವಾರ ಕೊರ್ದೇ ನಮ ಗುಳಿಗನ್ ನಂಬೊಂತ್ ನಿ.ಗುಳಿಗೆ ಗುಳಿಗೆನೆ.ಪ್ರಶ್ನೆ ಚಿಂತನೆದಾರ್ ಪಂಡಿ ಸಾತ್ ಗ್ ಗುಳಿಗೆ ದಾಲ ಬೇತೆ ದೇವೆರ್ ಆಪುಜೆ.ಪ್ರಶ್ನೆದಾರ್ ನಿಕುಲು ಗುಳಿಗಗ್ ಕೋರಿ ಕೊರೊರ್ಚಿ,ಕುಂಬುಡ ಕೊರ್ಲೆಂದ್ ಪಂಡ ದಾಲ ದೋಷ ಬತ್ತ್ಂಡ ಪ್ರಶ್ನೆದಾರ್ ಹೊಣೆ ಉಲ್ಲೆರೆ?,ಇಜ್ಜಿ,ನಮನೇ ಅನುಬವಿಸೊಡು.ಉದಾರ್ಮೆ-ಒಂಜಿ ಊರುಡು ವರ್ಸೊಲ ಮಾರಿಪೂಜೆಗ್ ಕೋರಿ ಕೊಯ್ಯೊಂತೆರ್.ಒಂಜಿ ಸರ್ತಿ ಪ್ರಶ್ನೆ ದೀನಗ ಅವೆಕ್ ಕೋರಿ ಕೊರೊರ್ಚಿ ಅವೆಕ್ ಕುಂಬುಡಲ ಕುರ್ದಿ ನೀರ್ ದೀಂಡ ಯಾವುಂದು ಯಜಮಾನಿಡ ಪಂಡೆರ್.ಆರ್ ಅಂಚನೆ ಮಲ್ತೆರ್.ಊರ್ದ ಮಾರಿ ಪೂಜೆನೆ ಕೆಲವು ವರ್ಸ ಉಂತ್ ದ್ ಪೋಂಡು.ಮಾರಿ ಪೂಜೆ ಉಂತಯಿನ ಇಲ್ಲದ ಯಜಮಾನಿ ಒಂಜಿದಿನ ಅರೆನ ಇಲ್ಲದ ಗೋಡೆದ ಸಿಮೆಂಟ್ ಲಕ್ಕನಗ ಗೋಡೆ ಜರಿದ್ ಮೇಲ್ ಗ್ ಬೂರ್ದು ಮಂಡೆ ದರಿದ್ ನೆತ್ತೆರ್ ಓಕುಲಿ ಪೋದು ಅರೆನ ಜೂವ ಅವ್ಲೆ ಪೋಂಡು.ದಿನ ಕರಿದ್ ಕುಟುಮದಕುಲು ಪ್ರಸ್ನೆ ದೀನಗ ಮಾರಿ ಪೂಜೆ ರಕ್ತ ತರ್ಪಣ ಉಂತಯಿನ ದೋಸೊಗು ಮಾರಿನೊಟ್ಟುಗು ಇತ್ತ್ ನ ಗಂಡ ಗಣೊಕ್ಲು ಆ ರೀತಿಡ್ ರಕ್ತ ತರ್ಪಣ ದೆತೊನ್ನಿಂದ್ ಪಂಡೆರ್.ನನ ಮಿತ್ತ್ ಗ್ ರಕ್ತ ತರ್ಪಣದೊಟ್ಟುಗೆನೆ ಮಾರಿ ಪೂಜೆ ಆವೊಡುಂದು ಪಂಡೆರ್.ಇತ್ತೆ ಅವ್ಲು ಆ ರೀತಿಡೆ ಮಾರಿ ಪೂಜೆ ಆವೊಂದುಂಡು..ತೂಲೆ ಉಂದೆನ್ ಪೂರ ತೂನಗ ನೆತ್ತೆರ್ ಬಿಂದುದ ದೈವಾರಾದನೆಗ್ ವಾ ಕಾರಣೊಗ್ಲಾ ಕುಂಬುಡ,ಕುರ್ದಿ ನೀರ್ ಸಮ ಅತ್ತ್.

   

ಇತ್ತೆ ಪದಿನೆಣ್ಮ ಗುಳಿಗನಕ್ಲೆನ್ ಒಟ್ಟುಗು ಲಕ್ಕದ್ ಕಟ್ಟ್ ಪೊಳಿತೊಂದುಲ್ಲೆರ್

ಗುಳಿಗಗ್ ಅಗೆಲ್ ಪಾಡುನ ಕೆರಮ(ಆಯಾ ಜಾಗೆದ ಕಟ್ಟ್ ಬೇತೆ ಬೇತೆ ಉಪ್ಪು):-

ಕುರ್ದಿ ಮಲ್ತ್ ದ್ ಸುರುಕು ಜಾಗೆಗ್ ತಲಿತ್ ದ್ ಜಾಗೆ ಸುದ್ದ ಮಲ್ತ್ ದ್ ಒಂಜಿ ಕೊಡಿರೆಟ್ ಉರ್ಪೆಲರಿ ಪಾಡ್ದ್ ಬೆಮ್ಮೆರೆ ಸುತ್ತೆ ದೀಪುನಿ.ಒಂಜಿ ಜುಟ್ಟು ದಾಂತಿ ತಾರಾಯಿ,ಐನ್ ಬಚ್ಚಿರೆ,ಒಂಜಿ ಬಜ್ಜೆಯಿ,ಚಿಲ್ಲರೆ ಪಣವು ಪಾಡೊಡು.ತುಡರ್  ದೀವೊಡು,ದೂಪ ಪತ್ತೊಡು,ಅಗೆಲ್ ಬಲಸುನ ದುಂಬುಲ ದೂಪ ಪತ್ತೊಡು,ಬಲಸಿ ಬೊಕ್ಕಲ ದೂಪ ಪತ್ತೊಡು.ಐನಿರೆಟ್ ಅಗೆಲ್ ಪಾಡ್ದ್ ದೂಪ ಪತ್ತ್ ದ್ ಕೈಟ್ ಕಾಡ ಕೇಪುಳ ಪತ್ತ್ ದೇ ಅರಿಕೆ ಮಲ್ಪೊಡು.ಐನಿರೆ ಪಾಡ್ಂಡ ಮಾತೆಕ್ಲ ಸಂದ್ಂಡ್ಂದ್ ಲೆಕ್ಕ.ಮೂಜಿರೆ ಬಲಸ್ಂಡ ರಾವುನ ದೋಸ ತೋಜಿದ್ ಬರು.ಅಂಚಾದ್ ಐನ್ ಕೊಡಿರೆ ಪಾಡ್ದೇ ಅಗೆಲ್ ಬಲಸೊಡು.

ನಮ್ಮ ಈ ಬರವುಗು ಪೂರಕ ಮಾಯಿತಿ-        ಯಂ.ಡಿ.ಶೆಟ್ಟಿ.ಇರಾ.

   ಹಿರಿಯ ಜನಪದ ಚಿಂತಕೆರ್

 

   

ಪಂಚ ವರ್ಣದ ಪುಂಚದ ಮಣ್ಣ್

          ‌‌‌     ಪಂಚ ವರ್ಣದ ಪುಂಚದ ಮಣ್ಣ್

   

             ಪಂಚ ವರ್ಣದ ಮಣ್ಣ್ ಡ್ ನಾಗನ ಪುಂಚ

                                   

ತುಳುನಾಡ್ ಡ್ ಒಂಜಿ ಪಾತೆರ ಉಂಡು ಪಂಚ ವರ್ಣದ ಪುಂಚದ ಮಣ್ಣ್ಂದ್.ಬನೊಟು ನಾಗೆ,ಪುಂಚೊಡು ಸರ್ಪೆ ಸಂಪುಲ್ಲ ಜಾಗೆ ಒಯ್ಪುಲ್ಲ ಸೀಮೆ ನಮ್ಮ ತುಳುನಾಡ್ ಪನ್ಪಿ ಪಾತೆರ ಬರ್ಪುಂಡು.ಅಪಗ ಪಂಚವರ್ಣದ ಮಣ್ಣ್ ದ ಬಗೆಟ್ ತೆರಿಯೊಂಡ ಪುಟ್ಟುರ್ದು ಸಾವುವರೆ ಮುಟ್ಟ ತುಳುವೆರೆಗ್ ಮಣ್ಣ್ ದೊಟ್ಟುಗು ಉಪ್ಪುನ ಸಂಬಂದ ತೆರಿಯುಂಡು.ಅಪಗ ತುಳು ಬಾಷೆಡ್ ಪಂಚ ಪನ್ಪುನ ಸವ್ದ ಉಂಡಾ ಪಂಡ ಖಂಡಿತಾ ಇಜ್ಜಿ.ಪಂಚ ಪನ್ಪುನವು ತುಳುಕು ಬೇತೆ ಬಾಸೆಡ್ದ್ ಬೈದ್ ನವು.ಆಂಡ ಆ ಸವ್ದ ತುಲುತನೇ ಪನ್ಪುನಡೆಮುಟ್ಟ ಅವೆನ್ ನಮ ಒತ್ತೊಂದ.ಅಪಗ ವರ್ಣ ಸವ್ದ ತುಳುತನಾ.ಖಂಡಿತಾ ಅವ್ಲಾ ತುಳುತ ಸವ್ದ ಅತ್ತ್.ಆಂಡ ಅವ್ಲ ಇನಿ ತುಳುತವೇ ಆದ್ ಪೋತ್ಂಡ್.ಪಂಚ ವರ್ಣದ ಮಣ್ಣ್ ಪಂಡ ಸೂಕ್ಷ್ಮವಾದ್ ತೂಂಡ ಅವು ಪಂಚ ಬೂತೊಲೆ.ಪಂಚ ಪನ್ಪುನವು ಐನೆನ್ ತೆರಿಪಾವುಂಡು.ಐಮೂಲೆಂದ್ ತುಳುಟು ಸವ್ದ ಉಂಡು.ಪಂಚ ಜೀಟಿಗೆ,ಪಂಚವರ್ಣ,ಪಂಚ ಪರ್ವೊಲು ಮಾತ ಅಂದ್.ಪಂಚ ವರ್ಣ(ವರ್ಣ ಪಂಡ ಬಣ್ಣ) ಪಂಡ ಐನ್ ಬಣ್ಣಂದ್ ಪಂತೆರತ್ತಂದೆ ನಿಜವಾದ್ ಅವು ಪಂಚ ಬೂತೊಲೆ.ದಾಯೆ ಪಂಡ ಮಣ್ಣ್ ಗ್ ವರ್ಣ ಕೊರ್ಪುನಾತ್ ನಮ ಮಿತ್ತ್ ಪೋತ್ ಜ.ಪಂಚ ವರ್ಣ ಪಂಡ ಐನ್ ಜಾತಿ,ಐನ್ ವಿದಾನ,ಐನ್ ತತ್ವಂದ್ ಅರ್ಥ ಮಲ್ತೊನೊಲಿ.ಕೆಲವೆರ್ ಚಾವಡಿದ ಮಿತ್ತ್ ಪಾತೆರ್ನಗ ಅಕುಲು ಬಿರ್ಸೆರಾವೊಡುಂದು ಕೆಲವೊಂಜಿ ಸಂಸ್ಕೃತ ಸವ್ದೊಲೆನ್ ತುಳುಕು ಸೇರ್ಸಾದ್ ಪನೊಂದು ಬತ್ತೆರ್.ಅಂಚ ತುಳುಕು ಸೇರೊನ್ನ ನನೊಂಜಿ ಸವ್ದ ಪಂಚ ವರ್ಣ.ಕೆಲವೆರ್ ಪಂಚ ಸವ್ದ ತುಳುರ್ದು ಸಂಸ್ಕೃತೊಗು ಪೋಯಿನಿಂದ್ ಲ ಪನ್ಪೆರ್.

ಪ್ರಪಂಚದ ಪಂಚ ತತ್ವೊಲೆ ಪಂಚ ವರ್ಣೊಲು.ಏರೆಗಾಂಡಲಾ ಸಾಪ್ಯುನಗ ಮಣ್ಣ್ ನ್ ಪುಂಡಿ ಪತ್ತ್ ದ್ ರಡ್ಡ್ ಕೈಟ್ ಮೂಜಿ ಸರ್ತಿ ನೆಲಕ್ ಹಾಕ್ಯೆರ್ಡ  ಸಾಪ ಗೆತೊನ್ನಕುಲು‌ ನಿಜವಾದ್ ತಪ್ಪು ಮಲ್ತ್ ದ್ ಇತ್ತೆರ್ಡ ಮಣ್ಣ್ ಅಕ್ಲೆಗ್ ಮುನಿಯುಗೆ.ಅಂಚನೆ ದೈವೊಗು ತಡೆಯೆರೆ ತೀರಂದೆ ದೈವ ನೆಲಕ್ ಪಂಡ ಮಣ್ಣ್ ಗ್ ಕಡ್ಸಲೆ ಊರ್ಂಡ ಊರುಗೇ ದೋಸ.ಏನಿದ ಕಾಲೊಡ್ದಿಂಚ ನರಮಾನಿ ಬದ್ ಕ್ ನಗ ಮಣ್ಣ ಬಾಜನೊನೆ ಗಲಸೊಂತೆರ್.ಅವು ಅಕ್ಲೆ ಉಡಲ್ ಲ ತಲ್ಮೆನ ಆದಿತ್ತ್ ದ್,ಸಿರ್ಕ್ ಸಂಕಡೊಲು ಪೂರ ದೂರ ಇತ್ತ .ಬದ್ ಕ್ ದುಪ್ಪುನಗ ಮಣ್ಣ್ ನ್ ನಂಬುದು ಬದ್ ಕ್ ನಾಯೆ ಒವ್ವಾ ಕಜ್ಜ ಮುಗಿಪಂದೆ ಇತ್ತೆಡ,ಕಡೆಕ್ಲಾ ಆ ಬೇಲೆ ಮಲ್ತೆಂಡ ಸೈತ್ಂಡಲ ಮಣ್ಣ್ ಪತ್ತು ವೆ ಪನ್ಪೆ.ಪಂಚಬೂತದ ಮಣ್ಣ್ ರ್ದ್ ಉದಿತಿ ಜೀವ ಮಣ್ಣ್ ಗೇ ಸಂದಿಗ ಆಪುನ ಪನ್ಪುನೆನ್ ಮದತ್ ದ್ ಯಾನ್ ಮಾತೆನ್ಲ ಪಣವುಡು ದೆತೊನುವೆ ಪನ್ಪಿ ಅಂಕಾರೊಡು ಬದ್ ಕೊಂದುಲ್ಲ.ಆಂಡ ದಾಲ ಕೊರಂದೆ ಮಣ್ಣ್ ನಮನ್ ದೆತೊನುಂಡು ಪನ್ಪುನೆನ್ ಮದಪೆರೆ ಬಲ್ಲಿ.ಒವೆಕ್ಲ ಜೀವೊನು  ಕೊರ್ಯೆರೆ ತಾಕತ್ತಿಪ್ಪುನವು ಮಣ್ಣ್ ಗ್ ಮಾತ್ರ.ನಮನ್ ಪಿರ ಕೊನೊಯೆರ್ಲ ಅಧಿಕಾರ ಉಪ್ಪುನಿ ಮಣ್ಣ್ ಗೆ .ಅಂಚಾದ್ ನಮ ಮಣ್ಣ್ ಗ್ ಅಪ್ಪೆನ ಬಿಲೆ ಕೊರ್ತ.

  

         ಮಣ್ಣ ನಾಗಮೂರಿಡ್ ನಾಗಗ್ ಬನೊಟು ನೀರ್  ದೀವೊಂತೆರ್

ಪಂಚ ವರ್ಣದ ಮಣ್ಣ್:-

     ಪಂಚ ಬೂತೊಗು ಸಾಗ್ಸಿಯಾದ್ ನಾಗ ನಡೆ ಸರ್ಪ ಜಿಡೆ ಬಲಿಪ ಬಾಯಿಡ್ ತುಳುನಾಡ ಪಂಚವರ್ಣದ ಮಣ್ಣ ಗಂದ ಸತ್ವ ನೆಗತ್ ದ್ ತೋಜುಂಡು.ಅವೆಟ್ ನಮ ಮಣ್ಣ್ ನ್ ತೆರಿಯೆರೆ ಪೋಂಡ ಇಂಚ ಐನ್ ಬಗೆತ ಮಣ್ಣ್ ನ್ ಹಿರಿಯ ಪೆರಿಯಾಕುಲು ಗುರ್ತ ಪತ್ತ್ ದೆರ್.ಈ ಪಂಚ ವರ್ಣದ ಮಣ್ಣ್ ಲೆಡ್ ನಾಗನ ಪುಂಚ ತೂಯೆರೆ ತಿಕ್ಕುಂಡು.ಮಣ್ಣ್ ನ್ ಬುಡ್ದು ನಾಗೆ ಇಜ್ಜೆ,ಮಣ್ಣ್ ನ್ ಬುಡ್ದು ಬೆನ್ನಿ ಸಾಗೊಳಿ ಇಜ್ಜಿ.ಬೆನ್ನಿ‌ ಸಾಗೊಳಿ‌ ಬುಡ್ದು ನಮ ಇಜ್ಜ.ಮಣ್ಣ್ ನ್ ಬುಡ್ದು ದೈವೊಲಿಜ್ಜ.ದೈವೊಲೆನ್ ಬುಡ್ದು ನಮ ಇಜ್ಜ.ಬೆನ್ನಿ ಸಾಗೊಳಿದ ಪೂಕರೆಗ್ ದೈವದ ಅನು ಬೋಡು.ಅಂಚಾದ್ ಕುಟುಮ ದೈವ ಆವಡ್,ಜಾಗೆದ,ಗ್ರಾಮದ,ಸೀಮೆ,ಮಾಗಣೆದ ವಾ ನೇಮ ನೆರಿ (ನಿರೆ ಪನ್ಪುನವು ಮೂಲ ಸವ್ದ. ಒಂಜಿ ಸಾಲ್ ಡ್ ಪೋಯಿನವು‌ ಕುಡೊಂಜಿ ಸಾಲ್ ಡ್ ಬರ್ಪುನಿಂದರ್ಥ.ನಿರೆನೇ ತುಳುವೆರೆ ಬಾಯಿಡ್ ನೆರಿ‌ ಆಂಡ್) ಆವಡ್ ಅವು ನಡಪುನಿ ನಮ ಬದ್ ಕೊಂದಿಪ್ಪಿ ಮಣ್ಣ ಮಿತ್ತ್.ಬೂಮಿ ತೂಕದ ದೈವ ಕನ್ಯಾವು ಲೆಕ್ಕೆಸಿರಿ ಪನ್ಪುನವ್ಲು ಮಣ್ಣ್ ನ್ ಬುಡ್ದು ದೈವೊಲಿಜ್ಜ ಪನ್ಪುನೆನ್ ಅರ್ಥ ಮಲ್ತೊನೊಲಿ.ತುಳುನಾಡ ಆರಾದ್ಯ ದೈವ ಬೆಮ್ಮೆರ್ ಮಣ್ಣ ಮೂಲದ  ಸಗ್ತಿ.ಬೆಮ್ಮೆರೆ ಗುಂಡಿ,ಬೆಮ್ಮೆರೆ ಕೂಟೇಲ್,ಬೆಮ್ಮೆರೆ ಪಾದೆ,ಬೆಮ್ಮೆರೆ ಬಾಕ್ಯಾರ್,ಬೆಮ್ಮೆರೆ ಪಾಡಿ,ಬೆಮ್ಮೆರೆ ಬೊಟ್ಟು ಮೂಲು ಪೂರ ಬೆಮ್ಮೆರೆ ನೆಲ ಮೂಲ ಸಂಸ್ಕೃತಿಡ್ ತುಳುವೆರ್ ಮಣ್ಣ್ ಗ್ ಕೊರ್ನ ಬಿಲೆ ಗೊತ್ತಾಪುಂಡು.ಬೆಮ್ಮೆರ್ ಪೊಯ್ಯೆ ಪತ್ತ್ ನಗ ನೀರ್ಂದ್ ಪನ್ಪಾಯೆರ್,ನೀರ್ ಪತ್ತ್ ನಗ ನೆಗರ್ಂದ್ (ಮುದಲೆ/ಲೆಕ್ಕೆಸಿರಿ) ಪನ್ಪಾಯೆರ್,ಮಣ್ಣ್ ಪತ್ತ್ ನಗ ಸೂಂದು ಪನ್ಪಾಯೆರ್,ಪುಂಚ ಪತ್ತ್ ನಗ ಮರಿಂದ್ ಪನ್ಪಾಯೆರ್,ಕಲ್ಲ್ ಪತ್ತ್ ನಗ ಬೂತಂದ್ ಪನ್ಪಾಯೆರ್,ಗುಂಡ ಪತ್ತ್ ನಗ ದೇವೆರ್ಂದ್ ಪನ್ಪಾಯೆರ್ ಪಂಡ ಬೆಮ್ಮೆರೆ ಮೂಲದ ತುಳುನಾಡ ಮಣ್ಣ್ ಗ್ ಬೊಕ್ಕ ತುಲುವೆರೆ ನಡುಟುಪ್ಪುನ ಸಮ್ಮಂದ ನೆಗತ್ ತೋಜುಂಡು.ಐನ್ ವರ್ಣ ಕೊರ್ದು ಪಂಚ ವರ್ಣದ ಮಣ್ಣ್ಂದ್  ತೂಪುಂಡ,

೧.ಕೆಂಪು ಮಣ್ಣ್(ಚಿತ್ರಕೂಟ ಮಲ್ಪೆರೆ,ಗುಂಡ ಕಟ್ಟೆರೆ ಗಲಸೊಂತಿ ಕೆಂಪು ಕಲ್ಲ್ ದ ಮುರ ಮಣ್ಣ್)

೨.ಕಪ್ಪು‌ಮಣ್ಣ್(ಬೆನ್ನಿ ಸಾಗೊಳಿಗ್ ಗಲಸುನ ಮಣ್ಣ್.ಮಣ್ಣ್ ನ್ ಪೊತ್ತಾದ್ ಸೂಂಟಾನ್ ದೀದ್ ಲ ಕಪ್ಪು ಮಣ್ಣ್ ಮಲ್ಪುವೆರ್)

೩.ಸೇಡಿ ಮಣ್ಣ್(ಪೂಕರೆದಪಗ ಕಂಡ ಪುಣಿತ  ತಾರೆಲೆಗ್ ಬರೆಪುನ ಸೇಡಿ ಕೆಮ್ಮಡೆದ ಮಣ್ಣ್)

೪.ಪೊಯ್ಯೆ ಮಣ್ಣ್(ಸಾನ ಗುಂಡದ ಗೋಡೆ ಕಟ್ಟೆರೆ).

 

೫.ಪುಂಚದ ಮಣ್ಣ್.(ಪುರ್ಸಾದ ಅದ್ ಗಲಸೆರೆ)..

ಕೆಂಪು,ಕಪ್ಪು,ಸೇಡಿ,ಪೊಯ್ಯೆ ಮಣ್ಣ್ ಪನ್ಪಿನ ನಾಲೆನ್ ಮೀರ್ನವು ನಮ ಮುಂಡೊಗು ಒರೆಂಕುನ,ಬಂಜಿಗ್ ಗೆತೊನುನ,ಮೇಲ್ ಗ್ ಒರೆಂಕುನ ಐನನೇ ಮಣ್ಣ್ ಪುಂಚದ ಮಣ್ಣ್.ಮೂಲು ಐನ್ ಬಗೆತ ಮಣ್ಣ್ಂದ್,ಅವೆನ್ ಪಂಚ ವರ್ಣದ ಮಣ್ಣ್ಂದ್ ಮಣ್ಣ್ ನ್ ಬೇತೆ ಮಲ್ಪುನೆಡ್ದ್ ಪಂಚ ಬೂತದ ಪಂಚ ತತ್ವೊಲೆ ಪಂಚ ವರ್ಣಂದ್ ಅರ್ಥ ಮಲ್ತೊನೊಡು.

ದೈವದ ಕಲೊಟು ಚರ್ವ ಮಲ್ಪೆರೆ  ಮಣ್ಣ್ ದ ಕರೊಕ್ಲೆನ್ ದೈವದ ಕಲತ ಮೂಲ್ಯಾದಿಗೆದ ಮೂಲ್ಯೆರ್ ಮಲ್ತೊಂತೆರ್.ಅಂಚನೆ ದೈವೊಲೆಗ್ ಪೊರಿ ಪೊದ್ಪೆರೆಲ ಮಣ್ಣ್ ದ ಮಲ್ಲ ಕರೊನೆ ಗಲಸೊಂತೆರ್.ಬಾಲೆಗ್ ಕೊಜಪುದ ಮಣ್ಣ್ ದ ಕುದುಪೆಯಾಂಡ ನಮ ಕರಿದ್ ಪೋನಗಲ ಕಡೆಕ್ ಒಟ್ಟೆ ಮಲ್ತ್ ದ್ ಪಿರವುಗು ದಕ್ಕುನಿ ಮಣ್ಣ್ ದ ಕರನೇ.ದೈವದ ಬದಿಕರ ಬೂಲ್ಯೊಗ್ಲ ಮಣ್ಣ್ ದ ಕರೊನೆ ಗಲಸೊಂತ್ ನಿ.ದೈವೊಗು ಬಲಿತ ತಿರ್ತ್ ಅಮುರ್ತ ದೀಯೆರ್ಲ ಮಣ್ಣ್ ದ ಕರನೇ ಗಲಸೊಂತ್ ನಿ.ದೈವದ ಅಗೆಲ್ ದ ನುಪ್ಪು ಕಜಿಪುಗು ಮಣ್ಣ್ ದ ಕರ ಬಿಸಲೆನ್ ಗಲಸೊಂತೆರ್.ಪಂಚ ಬೂತದ ಒಂಜಿ ಅಂಶ ಅಯಿನ ಮಣ್ಣ್ ಡ್ ಉದಿತಿ ಮಣ್ಣ್ ದ ಕರೊಕ್ಲ,ಪಂಚ ಬೂತೊಲೆಡ್ ಉದಿತಿ  ಪಂಚೇಂದ್ರಿಯದ ನರಪುರಿಕ್ಲ ,ಮಾಯೆಡ್ದ್ ಜೋಗೊದ ಮಾನಿನ‌ ಮಿತ್ತ್ ಬರ್ಪುನ ದೈವೊಗ್ಲಾ ಸಂಬಂದ  ಉಂಡು.ಅಂಚನೆ ಮಣ್ಣ್ ಮರಿಯಾದ್ ಕೊಡಪು ಪನ್ಪುನವ್ಲು ನಾಗೆ ಬೊಕ್ಕ‌ ಮಣ್ಣ್ ಗ್,ನಾಗ ಮೂಲದ ನರಮಾನಿಗ್ ಸಮ್ಮಂದ ಗೋಡಿದ್ ಬರ್ಪುಂಡು.ಮಣ್ಣ ಮಡತ್ತಾನ ದೈವದ ಕಲೊಟು ಮಲ್ಪುನ‌ ನರಮಾನ್ಯಗ್,ಮಣ್ಣ್ ದಪ್ಪಣೆ ದೆತೊಂದು‌ ಸುರಾಪುನ‌ ದೈವಾರಾದನೆಗ್ ಸಮ್ಮಂದ ಉಂಡು.ಮಣ್ಣ್ ಮುನಿಂಡ ಬದ್ ಕೆರೆ ಸಾದ್ಯ ಇಜ್ಜಿ.ಮಣ್ಣ್ ಮೂರಿ ಬತ್ತ್ಂಡ್ ಪಂಡ ಆಯನ ಅವುಸ ಮುಗಿಂಡ್ಂದ್ ಲೆಕ್ಕ.ಕುಟುಮದ ಮುಡಿಪು ಕಟ್ಟೆರೆ ದುಂಬುದ ಕಾಲೊಡು ಮಣ್ಣ್ ದ ಕರೊನೇ ಗಲಸೊಂತೆರ್.ಮಣ್ಣ ಪುರ್ಸಾದ ಕೊರ್ಪುನ ದೈವ,ದೇವಸಾನ ತುಳುನಾಡ್ ಡೇ ಉಂಡು.ಪುಂಚದ ಮಣ್ಣ ಪುರ್ಸಾದ ಕೊರ್ಪುನ ಆದಿ ಸುಬ್ರಹ್ಮಣ್ಯ ದೇಲ್ಯ ತುಳು ನಾಡ್ ಡ್ ಉಂಡು.ದೈವೊಲೆಗ್ ಕೂಚಿ ನೀರ್ ದೀಯೆರೆ,ದೈವೊಲೆಗ್ ಕಲಿ/ಅಮುರ್ತ ದೀಯೆರೆ,ನಾಗಗ್ ತನು ದೀಯೆರೆ ಮಣ್ಣ್ ದ ಕೂಚಿ ಗಲಸೊಂತೆರ್.ದರಿ ಕೂಟ್ ನಗ ದರಿತ ಮಿತ್ತ್ ಮಣ್ಣ ತಿಬಿಲೆ ದೀಂಡ ದೈವ ದರಿ‌ ಕೈಕೊನೊಂತ್ಂಡ್.ದೈವದ ಸುದ್ದ ಕಲಸ ಮಣ್ಣ್ ದ ಮೂರಿಡೆ ಆವೊಂತ್ ನಿ.  ಕಾಚೆಲ್ದ ಉರಿ ಉರ್ದಾಲ ದೊಂಬುದ ಕಾಲದ ಬೇಸೊಡು ನಾಗಗ್ ಮಣ್ಣ್ ದ ಮೂರಿಡ್ ಬನೊಟು  ನೀರ್ ದೀವೊಂತೆರ್.ಆಚಾರಿ ಕೊಟ್ಯೊಡು ದೈವೊಗು ಮಿಲವುದ  ಅಲವುದ ಕಡ್ಸಲೆ ಮಲ್ಪುನಗ ,ಮುಗ ಮೂರ್ತಿ ಮಲ್ಪುನಗ ,ಮುಗ ಮೂರ್ತಿನ್ ಕರಪುನಗ ಅವೆತ ಬೆಚ್ಚೊನು ತಾಂಗೆರೆ ಮಣ್ಣ ಬಾಜನೊನೆ ಗಲಸೊಂತೆರ್.ನಡಿರ್ಲ್ ಆಚಾರ್ಲು ದೈವದ ಮುಗ ಮಲ್ಪೆರೆ ಎರಕ ಪಾಡ್ನಗ ಮಣ್ಣ  ಬಾಜನೊನೆ ಗಲಸೊಂತೆರ್.

       ಪಂಚ ವರ್ಣದ ಪುಂಚದ ಮಣ್ಣ್ ಪನ್ಪುನವ್ಲು ಉದಲ್ ಪುಂಚ ಕಟ್ಟ್ ದ್ ನಾಗೆ ಪುಂಚದ ಸಂಪುದುಲಯಿ ಬದುಕುಂಡು.ಪುಂಚದ ಮಣ್ಣ ಪುರ್ಸಾದ ಬಂಜಿ ಗ್ ದೆತೊಂಡ ಸಿರ್ಕ್ ಮಾಜುಂಡು,ಪುಂಚದ ಮಣ್ಣ್ ಮೇಲ್ ಗ್ ಪೂಜಿಂಡ ಚರ್ಮ ಸಿರ್ಕುಲು ದೂರಾಪುಂಡು.ಅಪಗ ಮಣ್ಣ್ ಗ್ ನಾಗಗ್,ಮಣ್ಣ್ ಡ್ ನಿಲೆಯಾಯಿ ದೈವೊಗು,ನರಮಾನ್ಯಗ್ ಉಪ್ಪುನ ಸಮ್ಮಂದ ತೆರಿಯುಂಡು.ಕೊರಗತನಿಯನ ಪುರ್ಸಾದ ಮಣ್ಣ್ ದ ಪುರ್ಸಾದ ಆದಿತ್ತ್ ದ್ ಪಲಿತ ಕಮ್ಮಿಯಾನಗ ಕೊರಗ ತನಿಯೆ ಪುಂಚದ ಮಣ್ಣ್ ನ್ ಪುರ್ಸಾದ ಆದ್ ಕೊರೊಂತ್ ನಿ.ಇನಿ ಅಡೆ ಕಪ್ಪುದ ಗಂದ ಬೈದ್ಂಡ್.

   ಜೋಕ್ಲೆ ಮನಸ್ ನ್ ಪಜಿ ಮಣ್ಣ್ ಗ್ ಓಲ್ಪಡಿ ಮಲ್ಪುವೆರ್.ನಮ ದಾದ ಪಂಡ್ ಕೊರ್ಪನ,ನಮ ಎಂಚ ಬದುಕುವನಾ ಅವೆನ್ ತೂದು ಬಾಲೆದ ಬದ್ ಕ್ ಬುಳೆಯೊಂದು ಪೋಪುಂಡು.ಅಪಗ ಬಾಲೆಗ್ ಎಲ್ಯೆರ್ದೇ ಸಂಸ್ಕಾರದ ಬದ್ ಕ್ ಕಲ್ಪಾವೊಡು.ನೂಲುದಲೆಕ ಸೀರೆ ಪನ್ಪಿ ಗಾದೆದಲೆಕ ನಮ್ಮ ಬದ್ ಕ್.ದೈವ ದೇವೆರೆ ಮೂರ್ತಿನ್ಲಾ ದುಂಬುದ ಕಾಲೊಡು ಮಣ್ಣ್ ರ್ದೇ ಮಲ್ತೊಂತೆರ್.ಮಣ್ಣ್ ಗ್ ಮಾತ್ರ ತನ್ಕ್ ತಾನಾದೇ ಬುಳೆಯೆರೆ ಸಾದ್ಯ ಆಪುನಿ. ಬೇತೆನ್ಲಾ ಬುಳೆಪವುನನ ಸಗ್ತಿ  ಮಣ್ಣ್ ಗ್ ಉಪ್ಪುಂಡು.ಮಮ್ಮಾಯಿನ್ ಪ್ರಕೃತಿದ ಸಗ್ತಿಯಾದ್ ಮಣ್ಣ ಮೂರ್ತಿ, ವಿಗ್ರಹೊಡು ಹಿರಿಯಾಕ್ಲೆ ಕಾಲೊಡ್ದಿಂಚಿ ಆರಾದನೆ ಮಲ್ತೊಂದು ಬೈದೆರ್.ಮಣ್ಣ್ ದ ಮುಗ‌ ಮೂರ್ತಿಲೆಡ್ ಇತ್ತಿ ಕಲೆ ಕಾರ್ನಿಕ ಇನಿತ ಬೊಳ್ಳಿ ಬಂಗಾರ್ದ ಮುಗ ಮೂರ್ತಿಲೆಡ್ ತೂಯೆರೆ ತಿಕ್ಕಂದ್.ಪಜ್ಜಿ ಮಡಲ್,ಕುಕ್ಕುದ ಅಡ್ಡ ಪಲಯಿಡ್ ನೆಗತ್ ಬತ್ತಿ ದೈವದ ಕಲೆ ಕಾರ್ನಿಕ ಇನಿತ ನಮುನೆ ನಮುನೆದ ಕಾಸ್ ಡ್ ಲತ್ತಿ ಮಣೆ ಮಂಚವುಡು ತೂಯೆರೆ ತಿಕ್ಕಂದ್.ಇನಿಕ್ಲಾ ನಮ ದುಂಬುದ  ನಾಗರಿಕತೆನ್ ನಾಡ್ ಪತ್ತೆರೆ ಬೂಮಿನ್ ಗರ್ಪುನಗ ಅವ್ಲು ಆತ್ ಪಿರಾಕ್ ದ ಮಣ್ಣ್ ದ ಸೊತ್ತುಲು ತಿಕ್ಕುವ ಪಂಡ ಮಣ್ಣ್ ನಮ್ಮ ಬದ್ ಕ್ ದೊಟ್ಟುಗು ಎಂಚ ಗೋಡಿದುಂಡು ಪನ್ಪುನೆನ್ ಅರ್ಥ ಮಲ್ತೊನೊಲಿ.ಒಟ್ಟಾರೆ ತೂಪುಂಡ ಮಣ್ಣ್ ನ್ ಬುಡ್ದು ನಾಗೆ ಇಜ್ಜಿ,ಮಣ್ಣ್ ನ್ ಬುಡ್ದು ದೈವೊಲಿಜ್ಜ,ದೈವೊಲೆನ್ ಬುಡ್ದು ನರಮಾನಿ ಇಜ್ಜಿ.

   

              

    

                        ....‌.‌‌‌‌‌........,,,,,,,,,,,,,.....‌‌‌‌‌‌‌‌‌‌‌‌‌‌‌.‌..
       
                                                              

                                                         

ಮದ್ಯಸ್ಥೆರ್ ದೈವದ ಕಲೊಟು ನ್ಯಾಯ ಒದಗಾವುನಕುಲು

ಮದ್ಯಸ್ಥೆರ್ ದೈವದ ಕಲೊಟು  ನ್ಯಾಯ ಒದಗಾವುನಕುಲು

    

    " ಗ್ರಾಮ ದೈವ ಗುರ್ತ ಮಲ್ತಿನ ಗುರಿಕಾರನಕ್ ಲ್ ಒಂಜಿ ಊರುಡು ಇತ್ತೆರ್ಡ, ಆ ಊರುಡು ವಾ ಪ್ರಶ್ನೆ ದೀಪುನ ಅಗತ್ಯ ಇಜ್ಜಿ.  ಎಂಚಿನ ಇತ್ತ್ಂಡಲ ಅಕ್ಲೆನ ಮದ್ಯಸ್ತಿಕೆಡ್ ತೀರ್ಮಾನ ಆಪುನಿ.ಅಪಗ ಮದ್ಯಸ್ತೆರ್ ಅಗತ್ಯ ಇಜ್ಜಿ".ನರಮಾನ್ಯನ ನಡುತ ವ್ಯಾಜ್ಯೊಲೆಗ್ ಮದ್ಯಸ್ಥೆ ವಿನಃ ದೈವೊಗು ದುಂಬು ಪೂರ ಮದ್ಯಸ್ಥೆ ಪನ್ಪುನಾಯೆ ಇಜ್ಜಾಂಡ್.ದೈವೊಗು ದೈವದ ಮಾನ್ಯೆ,ಚಾಕಿರಿ ಮಾನ್ಯೆಂದ್ ಮಾತ್ರ ಇತ್ತ್ ನಿ.ನಮ ನಂಬುನ ದೈವೊಲೆಗ್ ನಮ್ಮ ಹಿರಿಯಾಕ್ಲೇ ನಾಲ್ ಪಾತೆರ ಪಂಡೊನೊಡು.ದೈವೊಗು ಮದಿಪುನಿ,ದೈವೊಗು ಪಂಡೊನುನಿಂದ್ ಪನೊಂತೆರ್ ವಿನಃ ಇನಿತಲೆಕ ಪಾರಿ ಪನ್ಪುನಿ,ಮದು ಪನ್ಪುನಿಂದ್ ಪನೊಂದಿಜ್ಜಾಂಡ್.ನಮ್ಮ ಹಿರಿಯಾಕ್ಲು ಪಂಡೊನ್ನೆನ್ ಕೇನುಜಿಂದಾಂಡ,ಪಂಡೊನ್ನವು ದೈವೊಗು ಸರಿಯಾಪುಜಿ ಪಂಡ ಅಂಚಿನ ದೈವೊನು ನಂಬೊಡಾ ಪನ್ಪಿ ಪ್ರಶ್ನೆ ಬರ್ಪುನಲಾ ಉಂಡು.ನಮ್ಮ ಮೂಜಿ ನಾಲ್ ತರೆ ಪಿರಾವುಡು ಪಾರಿ ಪಂಡಿತೆರ್,ಮದು ಪಂಡಿತೆರ್ ಪೂರಾ ಏರ್ಲಾ ಇಜ್ಜಾಂಡ್.ದೈವ ಇತ್ತ್ಂಡ್,ನಂಬಿ ಸಂಸಾರ ಇತ್ತ್ಂಡ್ ,ಆರಾದನೆ ಇತ್ತ್ಂಡ್ .

ನಮ ನಂಬಿನ ದೈವೊಲೆಗ್ ನಮ್ಮ ನಡುತ ನಮಕ್ ತೆರಿಯೆರಾವಂದಿನ ಕೂಡು ಕುಟುಮದ ಒಟ್ಟುಗುದ  ಅಪ್ಪೆನ,ತಮ್ಮಲೆನ ಇತ್ತ್ಂಡ್.ಪೆದ್ದ್ಂಡ ಅಪ್ಪೆ,ತಾಂಕ್ಂಡ ತಮ್ಮಲೆಂದ್ ನಮ ದೈವೊನು ಆರಾದನೆ ಮಲ್ತೊಂದು ಬೈದ್ ನಕುಲು.ನೇಮ ನೆರಿ ಕೋಲ ಆನಗ ನಮ ಬೊಕ್ಕ ನಮ್ಮ ದೈವದ ನಡುಟು ಹಿರಿಯಾಕ್ಲೆ ಕಾಲೊಡ್ದಿಂಚ ಒಂಜಿ ರೀತಿದ  ಪಾತೆರಕತೆ ನಡತೊಂತ್ಂಡ್.ನಮ್ಮ ಮದಿಪು ಮಾಯೆಗ್ ಅರ್ಥ ಆವೊಂತ್ಂಡ್.ದೈವದ ಕೈ ಸನ್ನೆ,ಕಣ್ಣ್ ಸನ್ನೆ ನುಡಿ ನಮಕ್ಲ ತೆರಿಯೊಂತ್ಂಡ್.ಹಿರಿಯಾಕ್ಲೆ ಮದಿಪುದ ಎದುರು ವಾ ಅಣ್ಣೆರ್ ನಕ್ಲೆನ ಮದಿಪುಲಾ ಅಗತ್ಯ ಇಜ್ಜಿ.. ಆಂಡ ದೈವ ಬೊಕ್ಕ ನಮ್ಮ ಮದ್ಯೊಡು ಮದ್ಯಸ್ಥೆ ಪನ್ಪಿ ವ್ಯವಸ್ಥೆ ಬತ್ತಿ ಬೊಕ್ಕ ನಮ್ಮ ಹಿರಿಯಾಕ್ಲೆ ಮದಿಪು ದೈವೊಲೆಗ್ ಕೇನಂದೆ ಪೋಂಡು.ಮುಂಡಾಸ್ ಗ್ ದೈವದ ಕೊಡಿಯಡಿಕ್ ಪೋಯೆರೆ ಕಾರ್ ಬತ್ತ್ ಜಿ,ಪುಗೆಲ್ದ ಬೈರಾಸ್ ಜಾರ್ದ್ ಪೋಂಡು.ಹಿರಿಯಾಕ್ಲೆ ಬಿಲೆ ಕೊಡಿಯಡಿ ತಪ್ಪುನಗ ಅಡೆ ಮದ್ಯಸ್ಥೆರ್ ಬತ್ತೆರ್.ದೈವದ ಬಾಸೆನ್ ಅರ್ಥ ಮಲ್ತೊಂದು ದೈವ ನುಡಿತ ಇಚಾರೊನು ಕುಟುಮೊಗು ತೆರಿಪಾಯೆರ್.ಮೂಲು‌ ಮದ್ಯಸ್ಥೆರ್ ಬೊಕ್ಕ ದೈವದ ನಡುಟು ಸಮ್ಮಂದ ಒರಿಂಡ್ ವಿನಃ ಕುಟುಮದ ಹಿರಿಯಾರೆ ಮದಿಪಿಜ್ಜಂದೆ ದೈವದ ಕಾರ್ನಿಕ ನೆಗಪಂದೆ ಪೋಂಡು.ನಮ ನಂಬಿ ದೈವೊಗು ನಮನೇ ಮದಿಪೊಡು ವಿನಃ ಪಿದಯಿಡ್ದ್ ಬತ್ತ್ ನ‌ ಮೂಜನೆದಾಯೆ ಮದಿಪುನತ್ತ್.ಅಪಗ ದೈವ ಕಲೊಕ್ಲ ಬರಂದ್.ನಮ್ಮ‌ಅಪ್ಪೆ ಅಮ್ಮಗ್ ನಮ ಉನ್ಪು ಕಜಿಪು ಪಾಡ್ದ್ ಕೊರ್ಂಡ ಎಡ್ಡೆನಾ,ಪಿದಾಯಿದ ಮೂಜನೆ ವ್ಯಕ್ತಿ‌ಬಲಸ್ ದ್ ಕೊಂರ್ಡ ಎಡ್ಡೆನ?.

ಕುಟುಮದ   ದೈವದ ಕಲೊಟು ಕುಟುಮ ಸಂಸಾರ ಬೊಕ್ಕ ದೈವದ ನಡುಟು ಉಂತುದು ರಡ್ಡ್ ಕಡೆಕ್ಲಾ ಕುಂದೆಲ್ ಬರಂದಿಲೆಕ ಆಯ ನ್ಯಾ ನ್ಯಾಯ ಒದಗಾದ್ ಕೊರ್ಪುನಕುಲು ಮದ್ಯಸ್ಥೆರ್.ದೈವ ಒಂಜಿ ಕೋಡಿ,ಕುಟುಮ ಸಂಸಾರ ಕುಡೊಂಜಿ ಕೋಡಿ,ಮದ್ಯೊಡು ಉಂತುದು ಸರಿ ತಪ್ಪುನು ತುಲಿಪುನಾರ್ ಮದ್ಯಸ್ಥೆರ್.ಕುಟುಮೊಡು ಸಂಸಾರದ ಬಗೆಟ್ ದೈವೊಡ ಸರಿಯಾದ್ ಪಾತೆರುನ ಏರಾಂಡಲಾ ಒರಿ ಹಿರಿಯಾರಿತ್ತೆರ್ಡ ಮದ್ಯಸ್ಥೆರೆನ ಅಗತ್ಯ ಆ ಕಲೊಕಿಜ್ಜಿ.ಅಂಚನೆ ದೈವೊಡ ಮದ್ಯಸ್ಥೆರ್ ಮದಿಪುನ ದುಂಬು ನಾಲಚ್ಚರದ ಮದಿಪಾಂಡಲಾ ಕಟುಮದ ಹಿರಿಯಾರೊರಿ ದೈವಡ ಮದಿಪೊಡು.

ದೈವ ಬೊಕ್ಕ ಸಂಸಾರದ ನಡುಟು ದೈವದ ಬಾಷೆದ ಇಚಾರೊನು ಅರ್ಥ ಮಲ್ಪಾಯೆರೆ ಪ್ರಾಮಾಣಿಕವಾಯಿನ ಮದ್ಯಸ್ಥೆರ್ ಬೋಡು.ಮಣೆ ಮಂಚವುದ ದೈವೊಗು ಮದಿಪುನಾರೆಗ್ ಮರತ ಒಂಜಿ ಪೀಠ ಇತ್ತ್ಂಡ ಎಡ್ಡೆ.ದೈವದ ಕಲೊಕು ಮದ್ಯಸ್ಥೆರ್ ಬತ್ತೆರ್ಡ 4 ಕಂಬದ,16ಕೋಲುದ ಆಯದುಲಯಿ ಆರ್ ಉಪ್ಪೊಡು ವಿನಃ ತಿಕ್ ನೌಲು ಪೂರ ಆರ್ ಪೋಯೆರೆ ಬಲ್ಲಿ.ದೈವದ ಕಲೊಕು ಬತ್ತಿ ಬೊಕ್ಕ ಚಾಕಿರಿ ಮುಗಿಯುನಡೆಮುಟ್ಟ ಬಚ್ಚಿರೆ ಅಗ್ಯೊಂದು ಪೋದು ಉಬ್ಯೆರೆ ಬಲ್ಲಿ.ಅಂಚನೆ ಆರ್ ಪೋಯಿನ ಕುಟುಮದೌಲು ಮದಿಪುನಗ ತನ್ನ ಕುಟುಂಬನೇ ಈ ಸಂಸಾರಲಾ ಪಂಡ್ ದೆನ್ನಿದ್ ಮದಿಪೊಡು.ಅಪಗ ಅರೆಗ್ ಸಂಸಾರೊಗು ನ್ಯಾಯ ದೆತ್ತ್ ಕೊರ್ರೆ ಸಾದ್ಯ ಆಪುಂಡು.ಲೆಪ್ಪಂದೆ ಬತ್ತಿ ಬಿನ್ನಗ್ಲ ಮದಿಪಂದೆ ಬತ್ತಿ ಮಾಯೊಗ್ಲಾ ಮರ್ಯಾದಿ ಇಜ್ಜಿ ಪನ್ಪುನವು ಬೂತಾಲ್ಯದ ಕಟ್ಟ್ ಡುಂಡು.ಆಂಡ ಹಿರಿಯಾಕ್ಲೆ ಮನಬಗ್ತಿಡ್ದ್ ಲಾ ಮದಿಪುದಕ್ಲೆ ಮದಿಪು ದುಂಬು ಪೋವೊಂದುಂಡು .ಒಂಜಿ ಕುಟುಮೊಡು 5 ದೈವೊಲಿತ್ತಡ ಬಾಲೊಲಿದಡಿಟ್ ಸುರುತ ದೈವದ  ನೇಮ ಆಪುನ ದುಂಬು ಬ್ರಹ್ಮಕುಲ,ಗುತ್ತು ಮಡಸ್ತಾನೊಗು ಪುರ್ಪ ತಾರಾಯಿ ಕೊರಿ ಬೊಕ್ಕ ,ಅವೆರ್ದ್ ಬೊಕ್ಕ ನಡಪುನ ದೈವೊಲೆ ನೇಮೊಡು ದೈವ ಮಿತ್ತ್ ಪನ್ನಕುಲೆಗ್ ಮಾನಾದಿಗೆ ಸಂದ್ ದ್ಂಡ ಕೇಂಡ ನಿನ್ನ ಕೊಡಿಯಡಿಟೇ ಸಂದ್ ದ್ಂಡ್ ಪನ್ಪುನ ಮದಿಪುದ ಮದ್ಯಸ್ಥೆರ್ ಬೋಡು.ಕುಟುಮದ ನ್ಯಾಯ ತೀರ್ಮಾನ ಮಂತಿ ದೈವ ಕುಟುಮ ಸಂಸಾರೊನು ಒತ್ತಟ್ಟ್ ಡ್ ಉಂತಾದ್ ಪೇರ್ ಪರ್ಪುನ ದುಂಬು ಮದಿಪುದಾರೆಗ್ ಒಂಜಾ,ರಡ್ಡಾ ತಾರಾಯಿದ ಮಾನಾದಿಗೆ ಕೊರ್ಪುಂಡು.ಅಡೆಮುಟ್ಟಲ ಮದ್ಯಸ್ಥೆರ್ ಕುಟುಮ ಸಂಸಾರದ ಒಟ್ಟುಗಿತ್ತೊಂದು ಕುಟುಮದ ಬೇನೆ ಬೆಸುರ್ಪುನು ಮಾಜಾವುನ ಬೇಲೆ ಮಲ್ಪೊಡು.ಇನಿ ಅವು ಒವುಲಾ ದೈವದ ಕೊಡಿಯಡಿಟ್ ತೂವೆರೆ ತಿಕ್ಕೊಂದಿಜ್ಜಿ.

ದೈವದ ಕೊಡಿಯಡಿಟ್ ದುಂಬು ಪೂರ  ಪಾರಿ/ಮದಿಪು ಪನ್ಪುನ ಕಟ್ಟಿಜ್ಜಾಂಡ್.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಪಂಥ  ಮಲ್ತೊಂದುಲ್ಲೆರ್,ಮೈಕ್ ಬೇತೆ ಮದಿಪುದಕ್ಲೆ ಕೈ ಸೇರೊಂದುಂಡು.ಮದಿಪುದ ,ಪಾರಿದ ಪ್ರಚಾರೊಗು ಪಂಥೊಲು ನಡತೊಂದುಲ್ಲ.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್  ಗಂಟೆಕಟ್ಲೆ  ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್  ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಲ್ಲೆರ್.  ಉಂದು ನಿಜವಾದ್ ಲ ತಪ್ಪು.ಇನಿ ಕೆಲವೊಂಜಿ ಕಟ್ಟುನಕುಲೆಗ್  ಮದ್ಯಸ್ಥೆರಿಜ್ಜಂದೆ ವಸಾಯನೆ ಬರಂದಿಲೆಕ ತೋಜುಂಡು.ಕುಟುಮದ ಹಿರಿಯಾಕ್ಲೆ ಮದಿಪು ಕಟ್ಟುನಕ್ಲೆಗ್ ಅಗತ್ಯದಾಂತೆ ಪೋಂಡ್.ಮದ್ಯಸ್ಥೆರಿಜ್ಜಂದೆ ಎಂಕುಲು ಕಟ್ಟುಜ ಪನ್ಪುನ ಕಟ್ಟುನಕುಲ್ಲ ಉಲ್ಲೆರ್.ಇನಿತ ದಿನೊಕ್ಲೆಡ್ ಕುಟುಮದಕ್ಲೆಗ್ ದೈವದೆದುರು ಕೈ ಮುಗಿದ್ ಉಂತೆರೆ ಮಾತ್ರ.ಆಂಡ ಕಡೆ ಕೊಡಿ ದೈವ ಸಮ್ಮಂದ ದೀವೊಂದಿನಿ ಮದ್ಯಸ್ಥೆರ್ಡ ಪಂಡ ಇಂಚಿ ಕಟ್ಟುನಕ್ಲೆರ್ದ್ ಸಂಸಾರೊಗು ದಾಲ ನ್ಯಾಯ ತಿಕ್ಕೆರೆ ಸಾದ್ಯ ಇಜ್ಜಿ.ಅಂಚನೆ ಪರವೂರುರ್ದು ಮದ್ಯಸ್ಥೆರೆನ್ ಲೆತೊಂದು ಬತ್ತ್ ದ್ ಅಕ್ಲೆಗ್ ಕೊಡಿಯಡಿಟ್ ಮಣೆ ಕೊರ್ದು ನಮ್ಮ ಹಿರಿಯಾಕ್ಲೆನ್ ಪಿರವು ಉಂತವೊಂದಿಪ್ಪುನವು ದುರಂತ.

ಓಜಲಂಗಾಯ ದೈವ

ಓಜಲಂಗಾಯ ದೈವ

         ‌‌             ಜುಮಾದಿನ ಭದ್ರಮುಗ

ಓಜಲಂಗಾಯ ದೈವೊನು ವ/ವಾಜಂಗಲಾಯೆ,ವಜಲಾಯೆಂದ್ ಲ ಲೆಪ್ಪುವೆರ್.ಪರಿಯಾಲದ ಕಡೆಂಜಡ್,ಕೋಟೆಕಾರ್ ಕೊಂಡಾಣದ ಮಾಡೂರುದಲ್ಪ,ಪಿಲಾರ್ ಅರಂತಡೆ,ಕೂಟಾಜೆದ ಉಲ್ಲಾಲ್ದಿನಲ್ಪ,ವಾಮಂಜೂರು ಕೈತಲ್ದ ಪಡುಶೆಡ್ಡೆಡ್ ಓಜಂಗಲಾಯ ದೈವದ ಆರಾದನೆ ಉಂಡು.ಗಟ್ಟಿ ಸಮಾಜದಕ್ಲೆನ ಆರಾದ್ಯ ದೈವ ಉಂದು.ಕೆಲವೆರ್ ಓಜಂಗಲಾಯನ್ ಈ ದೈವ ಮೂಲೊಡು,ಮರ್ಲ್ ಜುಮಾದಿನ ನನೊಂಜಿ ಒರುಂದುಲ ಪನ್ಪೆರ್.ವಜಂಗಲಾಯನ್ ಬಂಟ್ವಾಳ ತಾಲೂಕುದ ಕುದಿ ಗ್ರಾಮ ಮಾಗಣೆಡ್ (ಕಳ್ಳಿಗೆ,ತುಂಬೆ,ಬಂಟ್ವಾಳ ನಡು ಬೊಕ್ಕ ಮೂಡ ಗ್ರಾಮದ ಅರಸು ದೈವ,)  ಕನಪಾಡಿದಾಯೆಂದ್,ಅರ್ಕುಲ ತುಪ್ಪೆಕಲ್ಲ್ ಡ್ ,ಪುರಲ್ದಪ್ಪೆ ಉಲ್ಲಾಲ್ದಿನ ಸಾನೊಡು ಮಗ್ರಂದಾಯೆಂದ್,ಕುಡ್ಲದ ಬಿಜೈಡ್ ಪುಲಂದಾಯೆ ಪನ್ಪಿ ಪುದರ್ ಡ್ ಆರಾದನೆ ಮಲ್ಪುವೆರ್.ಉಂದೆನ್ ತೂನಗ ವಜಲಾಯೆಲ ಜುಮಾದಿನ ನನೊಂಜಿ ಒರುಂದು ತೋಜುಂಡು.

ಸಂಕೇಶ

ಸಂಕೇಶ

 

ಸಂಕೇಶ ಪನ್ಪುನ ಸವ್ದೊಗು ತುಳುಟು ಬೇತೆ ಬೇತೆ ಅರ್ಥೊಲುಲ್ಲ.ಸಂಕೇಶ ಪನ್ಪುನವು ಒಂಜಿ ಊರುದ ಪುದರ್ಲ ಆದುಂಡು.ದೈವಾರಾದನೆಡ್ ಸಂಕೇಶ ಪನ್ನಗ ಬೇತೆ ಬೇತೆ ಅರ್ಥೊಲು ತಿಕ್ಕುವ.ದೇವೆರೆ ಪಕ್ಕಸ್ಥಲೊಟುಂತಿ ದೈವದ ಜಾಗೆನ್ ಸಂಕೇಶ ಪನ್ಪೆರ್.ದೇವೆರೆನ್ ಭೇಟಿಯಾಪುನ ದೈವದ ನಿಲೆನ್ ಸಂಕೇಶ ಪನ್ಪೆರ್. ನೀರ್ ಪಂಡ ದೈವದ ಬಾಸೆಡ್ ಪನ್ಪುಂಡ ಜಲಾದಿ,ಜಲ ತೂದು ನಿಲೆಯಾಪುನ ಜಾಗೆ ಸಂಕೇಶಂದ್ ಪನೊಲಿ.ದೈವ ತಾನ್ ಸಂಕಲ್ಪೊಡು,ಇಚ್ಚೆಡ್,ಸಂಕೇತೊಡು ಜಲ ತೂದು ನಿಲೆ ಆಯಿ ಜಾಗೆನೇ ಸಂಕೇಶ.ಈ ಸಂಕೇಶ ಪನ್ಪುನ ಜಾಗೆ ಹೆಚ್ಚಾದ್ ತಾರ್, ತುದೆತ ನೀರ್ ಪೋದು ಉಂತುನ ಜಾಗೆದಲ್ಪ ಬರ್ಪುಂಡು.

ಸಿಂಗದನ-ದೈವದ ಕೊಡಿ ವಾ ದಿಕ್ಕ್ ಗುಪ್ಪೊಡು

ಸಿಂಗದನ-ದೈವದ ಕೊಡಿ ವಾ ದಿಕ್ಕ್ ಗುಪ್ಪೊಡು

  

ಸಿಂಗದನ

‌ 

ಸಿಂಗದನ.ಒಂಜಿ ರೀತಿಡ್ ತೂಪುಂಡ ಅವು ದೈವೊಲೆ ಸಿಮ್ಮಾಸನ

  

ಮಕರ ಚೋರ್ನ

 ದೈವೊಲೆನ ನೇಮ ಇರ್ಲ್ ನಡಪುಂಡ ರಾವು ಗುಳಿಗ ಕಾಲ ತಪ್ಪಾದ್ ಬೊಲ್ಪುಗು ಸಿಂಗದನ ಕಟ್ಟುವೆರ್.ಧರ್ಮ ನೇಮ ಆಂಡ ಒಂಜಿ ಕೋಡಿಡ್ ಬಾರ್ ದ ಬಿತ್ತ್ ದ ಮುಡಿ,ನನ ಒಂಜಿ ಕೋಡಿಡ್ ಅರಿತ ಮುಡಿ ದೀದ್ ಅವೆತ ಮಿತ್ತ್ ಪಲಯಿ ದೀದ್ ಸಿಂಗದನ ಕಟ್ಟುವೆರ್.ದಲ್ಯ (ಬೊಲ್ದು ಕುಂಟು) ಪಲಯಿದ ಮಿತ್ತ್ ಪಾಡುನೆಡ್ದಾದ್ ಅರಿಬಾರ ಮುಡಿಕುಲು ಕಣ್ಣ್ ಗ್ ತೋಜುಜ.ನಾಲ್ ಮೂಲೆ ಚೌಕಾಕಾರ ಬರ್ಪುಲೆಕ,ಮಿತ್ತ್ ಪೋಯಿಲೆಕ ಸಪೂರ ಆಪುಲೆಕ,ತ್ರಿಕೋನದ ಒರು ಬರ್ಪುಲೆಕ ಸಿಂಗದನ ಕಟ್ಟುವೆರ್.ದರ್ಮ ನೇಮ ಇಜ್ಜಿಂಡ ರಡ್ಡ್ ಕಾರ ಬೆಂಚಿದಾಕಾರದ ಪಲಯಿ ದೀದ್ ತಿರ್ತ್ ಚೌಕಾಕಾರೊಡು,ಮಿತ್ತ್ ಪೋಯಿಲೆಕ ತ್ರಿಕೋನ ಬರ್ಪುಲೆಕ ಸಿಂಗದನ ಕಟ್ಟುವೆರ್.ಸಿಂಗದನೊಟು ಮೂಜಿ ಅಂತರೊಲು(ಅಂತಸ್ತು-ಮಾಡದ ರೀತಿ) ಇತ್ತ್ ದ್ ಚೌಕಾಕಾರದ ಮಿತ್ತ್ ತ್ರಿಕೋನಾಕರ ಮಲ್ತ್ ದ್ ಬೊಲ್ದು ಕುಂಟು ಸುತ್ತುದು ತಿರ್ತ ನಾಲ್ ಸುತ್ತಲ ಕೆಂಪು ಕಪ್ಪು ಅರು ಕಟ್ಟುವೆರ್.

  

ಮೇಲ್ಕಾಪು.ತಾರಾಯಿ,ಬಚ್ಚಿರೆ ಬಜ್ಜೆಯಿ,ತಾರೆದ ತಿಗ್ ತಿ ಒಲಿ ಕಟ್ಟ್ ದುಪ್ಪುವೆರ್.

        ಸಿಂಗದನತ ಉಲಯಿ ದೀಪುನ ಸೊತ್ತುಲೆನ್ ತೂಪುಂಡ ತಿರ್ತ ಅಂತರದ ಕೋಣೆದುಲಯಿ ಬಾರ್ ಪಾಡ್ದ್ ಅವೆತ ಮಿತ್ತ್ ಕೊಡಿರೆ ಪಾಡ್ದ್ ಅವೆಟ್ ಉರ್ಪೆಲರಿ,ಕಲೆಯಿನ ತಾರಾಯಿ,ಬಚ್ಚಿರೆ ಬಜ್ಜೆಯಿ ದೀಪೆರ್.ಉಂದೆನ್ ಬೆಮ್ಮೆರೆ ಸುತ್ತೆ/ದೀಸುತ್ತೆ ಪನ್ಪೆರ್.ಸುತ್ತೆದ ಅಂಚಿಂಚಿ ಬೊಂಡ ದೀದುಪ್ಪುವೆರ್.ಅವ್ವತ್ತಂದೆ ಪೊರಿ ಬೆಲ್ಲ ಪಂರ್ಂದ್ ಬಿರಾಯಿನ ಪನಿವಾರ ಪಾಡ್ದಿಪ್ಪುವೆರ್.ಒಟ್ಟು ಮೂಜಿ ಅಂತರೊಡು ಒಂಜೊಂಜೆತಲೆಕ ಮೂಜಿ ಸುತ್ತೆ,ಮೂಜಂತರೊಟು ರಡ್ರಡ್ಡೆತಲೆಕ ಆಜಿ ಪನಿವಾರೊಲು ಉಪ್ಪುವ.ಸಿಂಗದನತ ಕೊಡಿಕ್ ಮುಗುಳಿ ದೀದುಪ್ಪುವೆರ್ .ಎದುರು ಒಂಜಿ ಗುಜ್ಜಣೆದಂಚಿನ(ಗುಜ್ಜಣೆ-ಜೀಟಿಗೆಗ್ ಎಣ್ಣೆ ಪಾಡುನ ದೂಂಚಿ ಮೋನೆದ ಕೂಜೆದಂಚಿ ಒರು )ಗಿಂಡೆಡ್ ಕುಂಟುದ ಬತ್ತಿ ಮಲ್ತ್ ದ್ ಬಾರೆದ ಬಂಬೆಡ್ ಪೊತ್ತದ್ ತುಡರ್ ದಲೆಕ ದೀಪೆರ್.ನೇಮ ಸುರಾನಗ ಪೊತ್ತಂಡ ನೇಮ ಪಿರಿನೇಟ ಅವು ಪೊತ್ತೊಂದೆ ಉಪ್ಪೊಡು ಪನ್ಪಿ ಕೆರಮ.ಸಿಂಗದನತ ಎದುರು ತಿರ್ತ್ ದೈವದ ಬಂಡಾರ ಉಪ್ಪುಂಡು.ಸಿಂಗದನತ ಎದುರು ತಿರ್ತ್ ದಿನ ಪಲಯಿಗ್ ದಲ್ಯ ಪೊದಿದ್ ಅವತ ಮಿತ್ತ್ ಉರ್ಪೆಲರಿತ ಸುತ್ತೆ ದೀದ್ ಅವೆತ ಮಿತ್ತ್ ನೇಮ ನಡಪುನ ಪ್ರದಾನ ದೈವದ ಮುಗ ದೀಪೆರ್.ಆ ಅರಿ ದಲ್ಯ ಪಾಡ್ ನ ಮಡ್ಯೆಲೆರೆಗ್.ಸಿಂಗದನತ ಉಲಯಿ ಪಾಡ್ನ ಪನಿವಾರ,ಅರಿ,ತಾರಾಯಿ ಮಡ್ಯೆಲೆರೆಗ್.

  ದೊಂಪದ ಬಲಿ ನೆಮೊಡು ರಾಜಂದೈವೊಲೆಗ್ ಸಿಂಗದನ ಪಾಡ್ದ್ ನೇಮ ಕೊರಿಯೆರ್ಡ(ದೈವ ಸಾನ ಇಜ್ಜಂದಿ ಜಾಗೆಡ್ ಬಂಡಾರ ಬತ್ತ್ ದ್ ದೊಂಪದಡಿಟ್ ಸಿಂಗದನೊತ ಎದುರು ಬಂಡಾರ ದೀದ್ ನೇಮ ಆಪುನಿ) ಇಲ್ಲದೆಚ್ಚಿದ ನೇಮೊಲೆಡ್ ಕೊಡಿಯಡಿ ಕಟ್ಟ್ ದ್(ಬಾಲೊಲಿ) ಕೊಡಿಯಡಿಟ್ ಬಲಿ ದೀದ್ ಬಲಿತ ಪಿರವು ಬಂಡಾರ ಕೇರ್ತ್ ದ್ ನೇಮ  ಕೋಲ ಕೊರ್ಪೆರ್.ಸಿಂಗದನೊನು ಕೆಲವು ಕೋಡಿಡ್ ಬೊಲ್ದುದ ಎಣ್ಮ ಮರಂಗೆದ ಕುಂಟುಡು  (ವೇಷ್ಟಿಡ್) ಸುತ್ತುವೆರ್,ಬಂಬೆಲ ದೀಪೆರ್.ಕೆಲವು ತಿಕ್ ಡ್ ಮಡ್ಯೆಲೆರ್ ಅಕ್ಲೆಗ್ ಸಕಾಯ ಆಪುಲೆಕ  ಪ್ರತೀ ಮುಗ ಮೂರ್ತಿಲೆಗ್ಲಾ ಬೇತೆ ಬೇತೆ ಸುತ್ಯೆ ದೀದ್ ಅವೆತ ಮಿತ್ತ್ ಮುಗ ದೀಪೆರ್.ನಿಜವಾದ್ ಒಂಜೇ ಸುತ್ತೆ ದೀಯೆರೆ ಉಪ್ಪುನಿ.ಅವು ಬೆಮ್ಮೆರೆ ಸುತ್ತೆ. ಸಿಂಗದನತ ತಿರ್ತ್ ಎದುರು ಪಲಾಯಿಡ್ ಅರಿ,ತಾರಾಯಿ,ಬಚ್ಚಿರೆ ಬಜ್ಜೆಯಿದ ಒಂಜಿ ಸುತ್ತೆ, 16 ಪನಿವಾರ ಪಾಡುವೆರ್.ಕೆಲವು ತಿಕ್ ಡ್ 48 ಪನಿವಾರ ದೀಪುನ ಕೆರಮಲ ಉಂಡು.ಅವು ಪ್ರಾದೇಶಿಕ ಎತ್ತೇಸೊಲಾತೆ.ದೈವಾರಾದನೆಡ್ ಊರುಗೊಂಜಿ ಕಟ್ಟ್ ದೇಶೊಗೊಂಜಿ ಬಾಸೆಂದ್ ಉಪ್ಪುಂಡು.

                  ಕೊಡಿ ಮರಟ್ ಕೊಡಿ ಏರ್ದ್ ನಿ

       ತುಳುನಾಡ ದೈವಾರಾದನೆದ ಕೊಡಿಯಡಿ ಪಂಡ ಅವು ಸಾನದ ನನೊಂಜಿ ರೂಪ.ಕೊಡಿಯಡಿ,ಸಾನ,ಇಲ್ಲ್,ಮಾಡ,ಗುಂಡ,ಚಾವಡಿ,ಬೂತದ ಕೊಟ್ಯೊಗು ಮೂಡಾಯಿ ಪ್ರದಾನ.ಪ್ರತಿಯೊಂಜೆಕ್ಲ ಮೂಡಾಯಿ ಬಾಕಿಲ್.ಅಂಚಾದ್ ಕೊಡಿಯಡಿತ ದೊಂಪೊಗು ಪಾಡುನ ಮೊಡೆಯಿ ಮಡಲ್ದ ಕೊಡಿ ಮೂಡಾಯಿಗಿಪ್ಪೊಡು,ಕಡೆ ಪಡ್ಡೇಯಿಗುಪ್ಪೊಡು.ಸಾನದ ಬೊಕ್ಕೊಂಜಿ ರೂಪನೇ ಕೊಡಿಯಡಿ.ಒಂಜಿ ಸಾನೊರ್ದು ಬಂಡಾರ ಜತ್ತ್ ದ್ ಕೊಡಿಯಡಿಟ್ ಭಂಡಾರ ಏರುನಿ.ಅಂಚಾದ್ ಕೊಡಿಯಡಿಕ್ ಮೂಡಾಯಿ ಸುದ್ದ.ಮೂಡಾಯಿ ಕಟ್ಟ್ ದಿತ್ತ್ಂಡ,ಮೂಡಾಯಿಡ್ ಜಾಗೆನೇ ಇಜ್ಜಿಂಡ ಬಡಕಾಯಿಗ್/ಉತ್ತರೊಗು ಕೊಡಿ ಪಾಡೊಲಿ.ನಮ್ಮ ದೈವಸಾನೊಲೆನ,ಭಂಡಾರದಿಲ್ಲದ,ಕುಟುಮದಿಲ್ಲದ ಕಡೆಕ್ ಇಲ್ಲದ ಬಾಕಿಲ್ಲ ಮೂಡಾಯಿಗ್ ಉಪ್ಪುನಿ.ದೈವದ ಮಣೆ ಮಂಚದ ಮೋನೆ ಮೂಡಾಯಿಗ್ ಇತ್ತ್ ದ್ ಕುಟುಮದ ಪಂಜುರ್ಲಿನ ಮಣೆಮಂಚದ ದತ್ತ ಬಾಗೊಡು ಉಂತುದೇ ಪ್ರಾರ್ಥನೆ ಮಲ್ಪುನ ಕೆರಮ.ಮೂಡಾಯಿಗ್,ಪಡ್ಡೆಯಿಗ್ ಬೆರಿಪಾಡ್ದ್ ಉಂತೆರೆ ಬಲ್ಲಿ.

ದೈವದ ಕೊಡಿಯಡಿಟ್ ದೊಂಪಲ ಬತ್ತ್ಂಡ್.ದೊಂಪೊಗು ಮೊಡೆಯಿ ಮಡಲ್ ಪಾಡ್ನಗಲ ಮೂಡಾಯಿಗ್ ಮಡಲ್ದ ಕೊಡಿ ಉಪ್ಪೊಡು.ಪಡ್ಡೆಯಿಗ್ ಮಡಲ್ದ ಕಡೆ ಉಪ್ಪೊಡು.ಮೂಡಾಯಿ ಬರೆಗಿರೆ ಕಟ್ಟ್ ದಿತ್ತ್ಂಡ ಬೇತೆಕ್ಲೆ ಜಾಗೆದ ತಕ್ರಾರ್ ಇತ್ತ್ಂಡ ಮಾತ್ರ ಬಡಕಾಯಿ/ಉತ್ತರ ಗ್ ಮಡಲ್ದ ಕೊಡಿ ಬರ್ಪುಲೆಕ ದೊಂಪ ಪಾಡೊಲಿ.ಆಂಡ ಮೂಡಾಯಿ ಬಡಕಾಯಿ ಕಟ್ಟ್ ದಿತ್ತ್ಂಡ ಪಡ್ಡೆಯಿಗ್ ಮಡಲ್ದ ಕೊಡಿ ಬರ್ಪುಲೆಕ ಪಾಡೊಲಿ.ಆಂಡ ವಾ ಕಾರಣೊಗ್ಲಾ ತೆನ್ಕಾಯಿ ಮೋನೆ ಪಾಡ್ದ್ ದೊಂಪದ ಮಡಲ್ದ ಕೊಡಿ ಉಪ್ಪೆರೆ ಬಲ್ಲಿ.ಆಂಡ ಗೊತ್ತಿಜ್ಜಂದೆ ಇನಿ ತಿಕ್ಕ್ ನ ದಿಕ್ಕ್ ಲೆಗ್ ಮೊಡೆಯಿ ಮಡಲ್ದ ಕೊಡಿ ಪಾಡೊಂದುಲ್ಲೆರ್.ಕೆಲವೊಂಜಿ ಕೊಡಿಯಡಿಟ್ ಮರತ ಎತ್ತರದ ಪಲಯಿಡ್ ಬಂಡಾರ ಕೇರ್ತೆರ್ಡ ಕೆಲವೊಂಜಿ ತಿಕ್ ಡ್ ದೊಂಪದಾಯನೊಡು ಕೊಡಿಯಡಿತ ದೊಂಪದ ಉಲಯಿ ಸಿಂಗದನ ಮಲ್ತ್ ದ್ ಅವೆತ ತಿರ್ತ್ ದೈವದ ಬಂಡಾರ ಕೇರ್ಪುವೆರ್.

ಇನಿ ದೈವದ ಕೊಡಿಯಡಿಕ್ ಬತ್ತಿ ವೈದಿಕ ಆರಾದಕೆರ್ ಸಿಂಗದನೊನು ಬ್ರಹ್ಮ ,ವಿಷ್ಣು,ಮಹೇಶ್ಚರೆಂದ್ ಪನೆರೆ ಸುರು ಮಲ್ದೆರ್.ದೈವದ ಕೊಡಿಯಡಿಕ್ ದೈವೊಲೇ ವಿನಃ ದೇವೆರೆ ಆರಾದನೆಯತ್ತ್.ಅಂಚನೆ ಸಿಂಗದನತ ಎದುರು ದೈವ ಬಂಡಾರದೊಟ್ಟುಗು ದೀನ ಪನಿವಾರೊಲೆನ್ ಗುತ್ತು,ಬರ್ಕೆ,ಚಾಕಿರಿದಕ್ಲೆಗ್ ಪಟ್ಟುವೆರ್.