ಪಂಚ ವರ್ಣದ ಪುಂಚದ ಮಣ್ಣ್

          ‌‌‌     ಪಂಚ ವರ್ಣದ ಪುಂಚದ ಮಣ್ಣ್

   

             ಪಂಚ ವರ್ಣದ ಮಣ್ಣ್ ಡ್ ನಾಗನ ಪುಂಚ

                                   

ತುಳುನಾಡ್ ಡ್ ಒಂಜಿ ಪಾತೆರ ಉಂಡು ಪಂಚ ವರ್ಣದ ಪುಂಚದ ಮಣ್ಣ್ಂದ್.ಬನೊಟು ನಾಗೆ,ಪುಂಚೊಡು ಸರ್ಪೆ ಸಂಪುಲ್ಲ ಜಾಗೆ ಒಯ್ಪುಲ್ಲ ಸೀಮೆ ನಮ್ಮ ತುಳುನಾಡ್ ಪನ್ಪಿ ಪಾತೆರ ಬರ್ಪುಂಡು.ಅಪಗ ಪಂಚವರ್ಣದ ಮಣ್ಣ್ ದ ಬಗೆಟ್ ತೆರಿಯೊಂಡ ಪುಟ್ಟುರ್ದು ಸಾವುವರೆ ಮುಟ್ಟ ತುಳುವೆರೆಗ್ ಮಣ್ಣ್ ದೊಟ್ಟುಗು ಉಪ್ಪುನ ಸಂಬಂದ ತೆರಿಯುಂಡು.ಅಪಗ ತುಳು ಬಾಷೆಡ್ ಪಂಚ ಪನ್ಪುನ ಸವ್ದ ಉಂಡಾ ಪಂಡ ಖಂಡಿತಾ ಇಜ್ಜಿ.ಪಂಚ ಪನ್ಪುನವು ತುಳುಕು ಬೇತೆ ಬಾಸೆಡ್ದ್ ಬೈದ್ ನವು.ಆಂಡ ಆ ಸವ್ದ ತುಲುತನೇ ಪನ್ಪುನಡೆಮುಟ್ಟ ಅವೆನ್ ನಮ ಒತ್ತೊಂದ.ಅಪಗ ವರ್ಣ ಸವ್ದ ತುಳುತನಾ.ಖಂಡಿತಾ ಅವ್ಲಾ ತುಳುತ ಸವ್ದ ಅತ್ತ್.ಆಂಡ ಅವ್ಲ ಇನಿ ತುಳುತವೇ ಆದ್ ಪೋತ್ಂಡ್.ಪಂಚ ವರ್ಣದ ಮಣ್ಣ್ ಪಂಡ ಸೂಕ್ಷ್ಮವಾದ್ ತೂಂಡ ಅವು ಪಂಚ ಬೂತೊಲೆ.ಪಂಚ ಪನ್ಪುನವು ಐನೆನ್ ತೆರಿಪಾವುಂಡು.ಐಮೂಲೆಂದ್ ತುಳುಟು ಸವ್ದ ಉಂಡು.ಪಂಚ ಜೀಟಿಗೆ,ಪಂಚವರ್ಣ,ಪಂಚ ಪರ್ವೊಲು ಮಾತ ಅಂದ್.ಪಂಚ ವರ್ಣ(ವರ್ಣ ಪಂಡ ಬಣ್ಣ) ಪಂಡ ಐನ್ ಬಣ್ಣಂದ್ ಪಂತೆರತ್ತಂದೆ ನಿಜವಾದ್ ಅವು ಪಂಚ ಬೂತೊಲೆ.ದಾಯೆ ಪಂಡ ಮಣ್ಣ್ ಗ್ ವರ್ಣ ಕೊರ್ಪುನಾತ್ ನಮ ಮಿತ್ತ್ ಪೋತ್ ಜ.ಪಂಚ ವರ್ಣ ಪಂಡ ಐನ್ ಜಾತಿ,ಐನ್ ವಿದಾನ,ಐನ್ ತತ್ವಂದ್ ಅರ್ಥ ಮಲ್ತೊನೊಲಿ.ಕೆಲವೆರ್ ಚಾವಡಿದ ಮಿತ್ತ್ ಪಾತೆರ್ನಗ ಅಕುಲು ಬಿರ್ಸೆರಾವೊಡುಂದು ಕೆಲವೊಂಜಿ ಸಂಸ್ಕೃತ ಸವ್ದೊಲೆನ್ ತುಳುಕು ಸೇರ್ಸಾದ್ ಪನೊಂದು ಬತ್ತೆರ್.ಅಂಚ ತುಳುಕು ಸೇರೊನ್ನ ನನೊಂಜಿ ಸವ್ದ ಪಂಚ ವರ್ಣ.ಕೆಲವೆರ್ ಪಂಚ ಸವ್ದ ತುಳುರ್ದು ಸಂಸ್ಕೃತೊಗು ಪೋಯಿನಿಂದ್ ಲ ಪನ್ಪೆರ್.

ಪ್ರಪಂಚದ ಪಂಚ ತತ್ವೊಲೆ ಪಂಚ ವರ್ಣೊಲು.ಏರೆಗಾಂಡಲಾ ಸಾಪ್ಯುನಗ ಮಣ್ಣ್ ನ್ ಪುಂಡಿ ಪತ್ತ್ ದ್ ರಡ್ಡ್ ಕೈಟ್ ಮೂಜಿ ಸರ್ತಿ ನೆಲಕ್ ಹಾಕ್ಯೆರ್ಡ  ಸಾಪ ಗೆತೊನ್ನಕುಲು‌ ನಿಜವಾದ್ ತಪ್ಪು ಮಲ್ತ್ ದ್ ಇತ್ತೆರ್ಡ ಮಣ್ಣ್ ಅಕ್ಲೆಗ್ ಮುನಿಯುಗೆ.ಅಂಚನೆ ದೈವೊಗು ತಡೆಯೆರೆ ತೀರಂದೆ ದೈವ ನೆಲಕ್ ಪಂಡ ಮಣ್ಣ್ ಗ್ ಕಡ್ಸಲೆ ಊರ್ಂಡ ಊರುಗೇ ದೋಸ.ಏನಿದ ಕಾಲೊಡ್ದಿಂಚ ನರಮಾನಿ ಬದ್ ಕ್ ನಗ ಮಣ್ಣ ಬಾಜನೊನೆ ಗಲಸೊಂತೆರ್.ಅವು ಅಕ್ಲೆ ಉಡಲ್ ಲ ತಲ್ಮೆನ ಆದಿತ್ತ್ ದ್,ಸಿರ್ಕ್ ಸಂಕಡೊಲು ಪೂರ ದೂರ ಇತ್ತ .ಬದ್ ಕ್ ದುಪ್ಪುನಗ ಮಣ್ಣ್ ನ್ ನಂಬುದು ಬದ್ ಕ್ ನಾಯೆ ಒವ್ವಾ ಕಜ್ಜ ಮುಗಿಪಂದೆ ಇತ್ತೆಡ,ಕಡೆಕ್ಲಾ ಆ ಬೇಲೆ ಮಲ್ತೆಂಡ ಸೈತ್ಂಡಲ ಮಣ್ಣ್ ಪತ್ತು ವೆ ಪನ್ಪೆ.ಪಂಚಬೂತದ ಮಣ್ಣ್ ರ್ದ್ ಉದಿತಿ ಜೀವ ಮಣ್ಣ್ ಗೇ ಸಂದಿಗ ಆಪುನ ಪನ್ಪುನೆನ್ ಮದತ್ ದ್ ಯಾನ್ ಮಾತೆನ್ಲ ಪಣವುಡು ದೆತೊನುವೆ ಪನ್ಪಿ ಅಂಕಾರೊಡು ಬದ್ ಕೊಂದುಲ್ಲ.ಆಂಡ ದಾಲ ಕೊರಂದೆ ಮಣ್ಣ್ ನಮನ್ ದೆತೊನುಂಡು ಪನ್ಪುನೆನ್ ಮದಪೆರೆ ಬಲ್ಲಿ.ಒವೆಕ್ಲ ಜೀವೊನು  ಕೊರ್ಯೆರೆ ತಾಕತ್ತಿಪ್ಪುನವು ಮಣ್ಣ್ ಗ್ ಮಾತ್ರ.ನಮನ್ ಪಿರ ಕೊನೊಯೆರ್ಲ ಅಧಿಕಾರ ಉಪ್ಪುನಿ ಮಣ್ಣ್ ಗೆ .ಅಂಚಾದ್ ನಮ ಮಣ್ಣ್ ಗ್ ಅಪ್ಪೆನ ಬಿಲೆ ಕೊರ್ತ.

  

         ಮಣ್ಣ ನಾಗಮೂರಿಡ್ ನಾಗಗ್ ಬನೊಟು ನೀರ್  ದೀವೊಂತೆರ್

ಪಂಚ ವರ್ಣದ ಮಣ್ಣ್:-

     ಪಂಚ ಬೂತೊಗು ಸಾಗ್ಸಿಯಾದ್ ನಾಗ ನಡೆ ಸರ್ಪ ಜಿಡೆ ಬಲಿಪ ಬಾಯಿಡ್ ತುಳುನಾಡ ಪಂಚವರ್ಣದ ಮಣ್ಣ ಗಂದ ಸತ್ವ ನೆಗತ್ ದ್ ತೋಜುಂಡು.ಅವೆಟ್ ನಮ ಮಣ್ಣ್ ನ್ ತೆರಿಯೆರೆ ಪೋಂಡ ಇಂಚ ಐನ್ ಬಗೆತ ಮಣ್ಣ್ ನ್ ಹಿರಿಯ ಪೆರಿಯಾಕುಲು ಗುರ್ತ ಪತ್ತ್ ದೆರ್.ಈ ಪಂಚ ವರ್ಣದ ಮಣ್ಣ್ ಲೆಡ್ ನಾಗನ ಪುಂಚ ತೂಯೆರೆ ತಿಕ್ಕುಂಡು.ಮಣ್ಣ್ ನ್ ಬುಡ್ದು ನಾಗೆ ಇಜ್ಜೆ,ಮಣ್ಣ್ ನ್ ಬುಡ್ದು ಬೆನ್ನಿ ಸಾಗೊಳಿ ಇಜ್ಜಿ.ಬೆನ್ನಿ‌ ಸಾಗೊಳಿ‌ ಬುಡ್ದು ನಮ ಇಜ್ಜ.ಮಣ್ಣ್ ನ್ ಬುಡ್ದು ದೈವೊಲಿಜ್ಜ.ದೈವೊಲೆನ್ ಬುಡ್ದು ನಮ ಇಜ್ಜ.ಬೆನ್ನಿ ಸಾಗೊಳಿದ ಪೂಕರೆಗ್ ದೈವದ ಅನು ಬೋಡು.ಅಂಚಾದ್ ಕುಟುಮ ದೈವ ಆವಡ್,ಜಾಗೆದ,ಗ್ರಾಮದ,ಸೀಮೆ,ಮಾಗಣೆದ ವಾ ನೇಮ ನೆರಿ (ನಿರೆ ಪನ್ಪುನವು ಮೂಲ ಸವ್ದ. ಒಂಜಿ ಸಾಲ್ ಡ್ ಪೋಯಿನವು‌ ಕುಡೊಂಜಿ ಸಾಲ್ ಡ್ ಬರ್ಪುನಿಂದರ್ಥ.ನಿರೆನೇ ತುಳುವೆರೆ ಬಾಯಿಡ್ ನೆರಿ‌ ಆಂಡ್) ಆವಡ್ ಅವು ನಡಪುನಿ ನಮ ಬದ್ ಕೊಂದಿಪ್ಪಿ ಮಣ್ಣ ಮಿತ್ತ್.ಬೂಮಿ ತೂಕದ ದೈವ ಕನ್ಯಾವು ಲೆಕ್ಕೆಸಿರಿ ಪನ್ಪುನವ್ಲು ಮಣ್ಣ್ ನ್ ಬುಡ್ದು ದೈವೊಲಿಜ್ಜ ಪನ್ಪುನೆನ್ ಅರ್ಥ ಮಲ್ತೊನೊಲಿ.ತುಳುನಾಡ ಆರಾದ್ಯ ದೈವ ಬೆಮ್ಮೆರ್ ಮಣ್ಣ ಮೂಲದ  ಸಗ್ತಿ.ಬೆಮ್ಮೆರೆ ಗುಂಡಿ,ಬೆಮ್ಮೆರೆ ಕೂಟೇಲ್,ಬೆಮ್ಮೆರೆ ಪಾದೆ,ಬೆಮ್ಮೆರೆ ಬಾಕ್ಯಾರ್,ಬೆಮ್ಮೆರೆ ಪಾಡಿ,ಬೆಮ್ಮೆರೆ ಬೊಟ್ಟು ಮೂಲು ಪೂರ ಬೆಮ್ಮೆರೆ ನೆಲ ಮೂಲ ಸಂಸ್ಕೃತಿಡ್ ತುಳುವೆರ್ ಮಣ್ಣ್ ಗ್ ಕೊರ್ನ ಬಿಲೆ ಗೊತ್ತಾಪುಂಡು.ಬೆಮ್ಮೆರ್ ಪೊಯ್ಯೆ ಪತ್ತ್ ನಗ ನೀರ್ಂದ್ ಪನ್ಪಾಯೆರ್,ನೀರ್ ಪತ್ತ್ ನಗ ನೆಗರ್ಂದ್ (ಮುದಲೆ/ಲೆಕ್ಕೆಸಿರಿ) ಪನ್ಪಾಯೆರ್,ಮಣ್ಣ್ ಪತ್ತ್ ನಗ ಸೂಂದು ಪನ್ಪಾಯೆರ್,ಪುಂಚ ಪತ್ತ್ ನಗ ಮರಿಂದ್ ಪನ್ಪಾಯೆರ್,ಕಲ್ಲ್ ಪತ್ತ್ ನಗ ಬೂತಂದ್ ಪನ್ಪಾಯೆರ್,ಗುಂಡ ಪತ್ತ್ ನಗ ದೇವೆರ್ಂದ್ ಪನ್ಪಾಯೆರ್ ಪಂಡ ಬೆಮ್ಮೆರೆ ಮೂಲದ ತುಳುನಾಡ ಮಣ್ಣ್ ಗ್ ಬೊಕ್ಕ ತುಲುವೆರೆ ನಡುಟುಪ್ಪುನ ಸಮ್ಮಂದ ನೆಗತ್ ತೋಜುಂಡು.ಐನ್ ವರ್ಣ ಕೊರ್ದು ಪಂಚ ವರ್ಣದ ಮಣ್ಣ್ಂದ್  ತೂಪುಂಡ,

೧.ಕೆಂಪು ಮಣ್ಣ್(ಚಿತ್ರಕೂಟ ಮಲ್ಪೆರೆ,ಗುಂಡ ಕಟ್ಟೆರೆ ಗಲಸೊಂತಿ ಕೆಂಪು ಕಲ್ಲ್ ದ ಮುರ ಮಣ್ಣ್)

೨.ಕಪ್ಪು‌ಮಣ್ಣ್(ಬೆನ್ನಿ ಸಾಗೊಳಿಗ್ ಗಲಸುನ ಮಣ್ಣ್.ಮಣ್ಣ್ ನ್ ಪೊತ್ತಾದ್ ಸೂಂಟಾನ್ ದೀದ್ ಲ ಕಪ್ಪು ಮಣ್ಣ್ ಮಲ್ಪುವೆರ್)

೩.ಸೇಡಿ ಮಣ್ಣ್(ಪೂಕರೆದಪಗ ಕಂಡ ಪುಣಿತ  ತಾರೆಲೆಗ್ ಬರೆಪುನ ಸೇಡಿ ಕೆಮ್ಮಡೆದ ಮಣ್ಣ್)

೪.ಪೊಯ್ಯೆ ಮಣ್ಣ್(ಸಾನ ಗುಂಡದ ಗೋಡೆ ಕಟ್ಟೆರೆ).

 

೫.ಪುಂಚದ ಮಣ್ಣ್.(ಪುರ್ಸಾದ ಅದ್ ಗಲಸೆರೆ)..

ಕೆಂಪು,ಕಪ್ಪು,ಸೇಡಿ,ಪೊಯ್ಯೆ ಮಣ್ಣ್ ಪನ್ಪಿನ ನಾಲೆನ್ ಮೀರ್ನವು ನಮ ಮುಂಡೊಗು ಒರೆಂಕುನ,ಬಂಜಿಗ್ ಗೆತೊನುನ,ಮೇಲ್ ಗ್ ಒರೆಂಕುನ ಐನನೇ ಮಣ್ಣ್ ಪುಂಚದ ಮಣ್ಣ್.ಮೂಲು ಐನ್ ಬಗೆತ ಮಣ್ಣ್ಂದ್,ಅವೆನ್ ಪಂಚ ವರ್ಣದ ಮಣ್ಣ್ಂದ್ ಮಣ್ಣ್ ನ್ ಬೇತೆ ಮಲ್ಪುನೆಡ್ದ್ ಪಂಚ ಬೂತದ ಪಂಚ ತತ್ವೊಲೆ ಪಂಚ ವರ್ಣಂದ್ ಅರ್ಥ ಮಲ್ತೊನೊಡು.

ದೈವದ ಕಲೊಟು ಚರ್ವ ಮಲ್ಪೆರೆ  ಮಣ್ಣ್ ದ ಕರೊಕ್ಲೆನ್ ದೈವದ ಕಲತ ಮೂಲ್ಯಾದಿಗೆದ ಮೂಲ್ಯೆರ್ ಮಲ್ತೊಂತೆರ್.ಅಂಚನೆ ದೈವೊಲೆಗ್ ಪೊರಿ ಪೊದ್ಪೆರೆಲ ಮಣ್ಣ್ ದ ಮಲ್ಲ ಕರೊನೆ ಗಲಸೊಂತೆರ್.ಬಾಲೆಗ್ ಕೊಜಪುದ ಮಣ್ಣ್ ದ ಕುದುಪೆಯಾಂಡ ನಮ ಕರಿದ್ ಪೋನಗಲ ಕಡೆಕ್ ಒಟ್ಟೆ ಮಲ್ತ್ ದ್ ಪಿರವುಗು ದಕ್ಕುನಿ ಮಣ್ಣ್ ದ ಕರನೇ.ದೈವದ ಬದಿಕರ ಬೂಲ್ಯೊಗ್ಲ ಮಣ್ಣ್ ದ ಕರೊನೆ ಗಲಸೊಂತ್ ನಿ.ದೈವೊಗು ಬಲಿತ ತಿರ್ತ್ ಅಮುರ್ತ ದೀಯೆರ್ಲ ಮಣ್ಣ್ ದ ಕರನೇ ಗಲಸೊಂತ್ ನಿ.ದೈವದ ಅಗೆಲ್ ದ ನುಪ್ಪು ಕಜಿಪುಗು ಮಣ್ಣ್ ದ ಕರ ಬಿಸಲೆನ್ ಗಲಸೊಂತೆರ್.ಪಂಚ ಬೂತದ ಒಂಜಿ ಅಂಶ ಅಯಿನ ಮಣ್ಣ್ ಡ್ ಉದಿತಿ ಮಣ್ಣ್ ದ ಕರೊಕ್ಲ,ಪಂಚ ಬೂತೊಲೆಡ್ ಉದಿತಿ  ಪಂಚೇಂದ್ರಿಯದ ನರಪುರಿಕ್ಲ ,ಮಾಯೆಡ್ದ್ ಜೋಗೊದ ಮಾನಿನ‌ ಮಿತ್ತ್ ಬರ್ಪುನ ದೈವೊಗ್ಲಾ ಸಂಬಂದ  ಉಂಡು.ಅಂಚನೆ ಮಣ್ಣ್ ಮರಿಯಾದ್ ಕೊಡಪು ಪನ್ಪುನವ್ಲು ನಾಗೆ ಬೊಕ್ಕ‌ ಮಣ್ಣ್ ಗ್,ನಾಗ ಮೂಲದ ನರಮಾನಿಗ್ ಸಮ್ಮಂದ ಗೋಡಿದ್ ಬರ್ಪುಂಡು.ಮಣ್ಣ ಮಡತ್ತಾನ ದೈವದ ಕಲೊಟು ಮಲ್ಪುನ‌ ನರಮಾನ್ಯಗ್,ಮಣ್ಣ್ ದಪ್ಪಣೆ ದೆತೊಂದು‌ ಸುರಾಪುನ‌ ದೈವಾರಾದನೆಗ್ ಸಮ್ಮಂದ ಉಂಡು.ಮಣ್ಣ್ ಮುನಿಂಡ ಬದ್ ಕೆರೆ ಸಾದ್ಯ ಇಜ್ಜಿ.ಮಣ್ಣ್ ಮೂರಿ ಬತ್ತ್ಂಡ್ ಪಂಡ ಆಯನ ಅವುಸ ಮುಗಿಂಡ್ಂದ್ ಲೆಕ್ಕ.ಕುಟುಮದ ಮುಡಿಪು ಕಟ್ಟೆರೆ ದುಂಬುದ ಕಾಲೊಡು ಮಣ್ಣ್ ದ ಕರೊನೇ ಗಲಸೊಂತೆರ್.ಮಣ್ಣ ಪುರ್ಸಾದ ಕೊರ್ಪುನ ದೈವ,ದೇವಸಾನ ತುಳುನಾಡ್ ಡೇ ಉಂಡು.ಪುಂಚದ ಮಣ್ಣ ಪುರ್ಸಾದ ಕೊರ್ಪುನ ಆದಿ ಸುಬ್ರಹ್ಮಣ್ಯ ದೇಲ್ಯ ತುಳು ನಾಡ್ ಡ್ ಉಂಡು.ದೈವೊಲೆಗ್ ಕೂಚಿ ನೀರ್ ದೀಯೆರೆ,ದೈವೊಲೆಗ್ ಕಲಿ/ಅಮುರ್ತ ದೀಯೆರೆ,ನಾಗಗ್ ತನು ದೀಯೆರೆ ಮಣ್ಣ್ ದ ಕೂಚಿ ಗಲಸೊಂತೆರ್.ದರಿ ಕೂಟ್ ನಗ ದರಿತ ಮಿತ್ತ್ ಮಣ್ಣ ತಿಬಿಲೆ ದೀಂಡ ದೈವ ದರಿ‌ ಕೈಕೊನೊಂತ್ಂಡ್.ದೈವದ ಸುದ್ದ ಕಲಸ ಮಣ್ಣ್ ದ ಮೂರಿಡೆ ಆವೊಂತ್ ನಿ.  ಕಾಚೆಲ್ದ ಉರಿ ಉರ್ದಾಲ ದೊಂಬುದ ಕಾಲದ ಬೇಸೊಡು ನಾಗಗ್ ಮಣ್ಣ್ ದ ಮೂರಿಡ್ ಬನೊಟು  ನೀರ್ ದೀವೊಂತೆರ್.ಆಚಾರಿ ಕೊಟ್ಯೊಡು ದೈವೊಗು ಮಿಲವುದ  ಅಲವುದ ಕಡ್ಸಲೆ ಮಲ್ಪುನಗ ,ಮುಗ ಮೂರ್ತಿ ಮಲ್ಪುನಗ ,ಮುಗ ಮೂರ್ತಿನ್ ಕರಪುನಗ ಅವೆತ ಬೆಚ್ಚೊನು ತಾಂಗೆರೆ ಮಣ್ಣ ಬಾಜನೊನೆ ಗಲಸೊಂತೆರ್.ನಡಿರ್ಲ್ ಆಚಾರ್ಲು ದೈವದ ಮುಗ ಮಲ್ಪೆರೆ ಎರಕ ಪಾಡ್ನಗ ಮಣ್ಣ  ಬಾಜನೊನೆ ಗಲಸೊಂತೆರ್.

       ಪಂಚ ವರ್ಣದ ಪುಂಚದ ಮಣ್ಣ್ ಪನ್ಪುನವ್ಲು ಉದಲ್ ಪುಂಚ ಕಟ್ಟ್ ದ್ ನಾಗೆ ಪುಂಚದ ಸಂಪುದುಲಯಿ ಬದುಕುಂಡು.ಪುಂಚದ ಮಣ್ಣ ಪುರ್ಸಾದ ಬಂಜಿ ಗ್ ದೆತೊಂಡ ಸಿರ್ಕ್ ಮಾಜುಂಡು,ಪುಂಚದ ಮಣ್ಣ್ ಮೇಲ್ ಗ್ ಪೂಜಿಂಡ ಚರ್ಮ ಸಿರ್ಕುಲು ದೂರಾಪುಂಡು.ಅಪಗ ಮಣ್ಣ್ ಗ್ ನಾಗಗ್,ಮಣ್ಣ್ ಡ್ ನಿಲೆಯಾಯಿ ದೈವೊಗು,ನರಮಾನ್ಯಗ್ ಉಪ್ಪುನ ಸಮ್ಮಂದ ತೆರಿಯುಂಡು.ಕೊರಗತನಿಯನ ಪುರ್ಸಾದ ಮಣ್ಣ್ ದ ಪುರ್ಸಾದ ಆದಿತ್ತ್ ದ್ ಪಲಿತ ಕಮ್ಮಿಯಾನಗ ಕೊರಗ ತನಿಯೆ ಪುಂಚದ ಮಣ್ಣ್ ನ್ ಪುರ್ಸಾದ ಆದ್ ಕೊರೊಂತ್ ನಿ.ಇನಿ ಅಡೆ ಕಪ್ಪುದ ಗಂದ ಬೈದ್ಂಡ್.

   ಜೋಕ್ಲೆ ಮನಸ್ ನ್ ಪಜಿ ಮಣ್ಣ್ ಗ್ ಓಲ್ಪಡಿ ಮಲ್ಪುವೆರ್.ನಮ ದಾದ ಪಂಡ್ ಕೊರ್ಪನ,ನಮ ಎಂಚ ಬದುಕುವನಾ ಅವೆನ್ ತೂದು ಬಾಲೆದ ಬದ್ ಕ್ ಬುಳೆಯೊಂದು ಪೋಪುಂಡು.ಅಪಗ ಬಾಲೆಗ್ ಎಲ್ಯೆರ್ದೇ ಸಂಸ್ಕಾರದ ಬದ್ ಕ್ ಕಲ್ಪಾವೊಡು.ನೂಲುದಲೆಕ ಸೀರೆ ಪನ್ಪಿ ಗಾದೆದಲೆಕ ನಮ್ಮ ಬದ್ ಕ್.ದೈವ ದೇವೆರೆ ಮೂರ್ತಿನ್ಲಾ ದುಂಬುದ ಕಾಲೊಡು ಮಣ್ಣ್ ರ್ದೇ ಮಲ್ತೊಂತೆರ್.ಮಣ್ಣ್ ಗ್ ಮಾತ್ರ ತನ್ಕ್ ತಾನಾದೇ ಬುಳೆಯೆರೆ ಸಾದ್ಯ ಆಪುನಿ. ಬೇತೆನ್ಲಾ ಬುಳೆಪವುನನ ಸಗ್ತಿ  ಮಣ್ಣ್ ಗ್ ಉಪ್ಪುಂಡು.ಮಮ್ಮಾಯಿನ್ ಪ್ರಕೃತಿದ ಸಗ್ತಿಯಾದ್ ಮಣ್ಣ ಮೂರ್ತಿ, ವಿಗ್ರಹೊಡು ಹಿರಿಯಾಕ್ಲೆ ಕಾಲೊಡ್ದಿಂಚಿ ಆರಾದನೆ ಮಲ್ತೊಂದು ಬೈದೆರ್.ಮಣ್ಣ್ ದ ಮುಗ‌ ಮೂರ್ತಿಲೆಡ್ ಇತ್ತಿ ಕಲೆ ಕಾರ್ನಿಕ ಇನಿತ ಬೊಳ್ಳಿ ಬಂಗಾರ್ದ ಮುಗ ಮೂರ್ತಿಲೆಡ್ ತೂಯೆರೆ ತಿಕ್ಕಂದ್.ಪಜ್ಜಿ ಮಡಲ್,ಕುಕ್ಕುದ ಅಡ್ಡ ಪಲಯಿಡ್ ನೆಗತ್ ಬತ್ತಿ ದೈವದ ಕಲೆ ಕಾರ್ನಿಕ ಇನಿತ ನಮುನೆ ನಮುನೆದ ಕಾಸ್ ಡ್ ಲತ್ತಿ ಮಣೆ ಮಂಚವುಡು ತೂಯೆರೆ ತಿಕ್ಕಂದ್.ಇನಿಕ್ಲಾ ನಮ ದುಂಬುದ  ನಾಗರಿಕತೆನ್ ನಾಡ್ ಪತ್ತೆರೆ ಬೂಮಿನ್ ಗರ್ಪುನಗ ಅವ್ಲು ಆತ್ ಪಿರಾಕ್ ದ ಮಣ್ಣ್ ದ ಸೊತ್ತುಲು ತಿಕ್ಕುವ ಪಂಡ ಮಣ್ಣ್ ನಮ್ಮ ಬದ್ ಕ್ ದೊಟ್ಟುಗು ಎಂಚ ಗೋಡಿದುಂಡು ಪನ್ಪುನೆನ್ ಅರ್ಥ ಮಲ್ತೊನೊಲಿ.ಒಟ್ಟಾರೆ ತೂಪುಂಡ ಮಣ್ಣ್ ನ್ ಬುಡ್ದು ನಾಗೆ ಇಜ್ಜಿ,ಮಣ್ಣ್ ನ್ ಬುಡ್ದು ದೈವೊಲಿಜ್ಜ,ದೈವೊಲೆನ್ ಬುಡ್ದು ನರಮಾನಿ ಇಜ್ಜಿ.

   

              

    

                        ....‌.‌‌‌‌‌........,,,,,,,,,,,,,.....‌‌‌‌‌‌‌‌‌‌‌‌‌‌‌.‌..
       
                                                              

                                                         

ಮದ್ಯಸ್ಥೆರ್ ದೈವದ ಕಲೊಟು ನ್ಯಾಯ ಒದಗಾವುನಕುಲು

ಮದ್ಯಸ್ಥೆರ್ ದೈವದ ಕಲೊಟು  ನ್ಯಾಯ ಒದಗಾವುನಕುಲು

    

    " ಗ್ರಾಮ ದೈವ ಗುರ್ತ ಮಲ್ತಿನ ಗುರಿಕಾರನಕ್ ಲ್ ಒಂಜಿ ಊರುಡು ಇತ್ತೆರ್ಡ, ಆ ಊರುಡು ವಾ ಪ್ರಶ್ನೆ ದೀಪುನ ಅಗತ್ಯ ಇಜ್ಜಿ.  ಎಂಚಿನ ಇತ್ತ್ಂಡಲ ಅಕ್ಲೆನ ಮದ್ಯಸ್ತಿಕೆಡ್ ತೀರ್ಮಾನ ಆಪುನಿ.ಅಪಗ ಮದ್ಯಸ್ತೆರ್ ಅಗತ್ಯ ಇಜ್ಜಿ".ನರಮಾನ್ಯನ ನಡುತ ವ್ಯಾಜ್ಯೊಲೆಗ್ ಮದ್ಯಸ್ಥೆ ವಿನಃ ದೈವೊಗು ದುಂಬು ಪೂರ ಮದ್ಯಸ್ಥೆ ಪನ್ಪುನಾಯೆ ಇಜ್ಜಾಂಡ್.ದೈವೊಗು ದೈವದ ಮಾನ್ಯೆ,ಚಾಕಿರಿ ಮಾನ್ಯೆಂದ್ ಮಾತ್ರ ಇತ್ತ್ ನಿ.ನಮ ನಂಬುನ ದೈವೊಲೆಗ್ ನಮ್ಮ ಹಿರಿಯಾಕ್ಲೇ ನಾಲ್ ಪಾತೆರ ಪಂಡೊನೊಡು.ದೈವೊಗು ಮದಿಪುನಿ,ದೈವೊಗು ಪಂಡೊನುನಿಂದ್ ಪನೊಂತೆರ್ ವಿನಃ ಇನಿತಲೆಕ ಪಾರಿ ಪನ್ಪುನಿ,ಮದು ಪನ್ಪುನಿಂದ್ ಪನೊಂದಿಜ್ಜಾಂಡ್.ನಮ್ಮ ಹಿರಿಯಾಕ್ಲು ಪಂಡೊನ್ನೆನ್ ಕೇನುಜಿಂದಾಂಡ,ಪಂಡೊನ್ನವು ದೈವೊಗು ಸರಿಯಾಪುಜಿ ಪಂಡ ಅಂಚಿನ ದೈವೊನು ನಂಬೊಡಾ ಪನ್ಪಿ ಪ್ರಶ್ನೆ ಬರ್ಪುನಲಾ ಉಂಡು.ನಮ್ಮ ಮೂಜಿ ನಾಲ್ ತರೆ ಪಿರಾವುಡು ಪಾರಿ ಪಂಡಿತೆರ್,ಮದು ಪಂಡಿತೆರ್ ಪೂರಾ ಏರ್ಲಾ ಇಜ್ಜಾಂಡ್.ದೈವ ಇತ್ತ್ಂಡ್,ನಂಬಿ ಸಂಸಾರ ಇತ್ತ್ಂಡ್ ,ಆರಾದನೆ ಇತ್ತ್ಂಡ್ .

ನಮ ನಂಬಿನ ದೈವೊಲೆಗ್ ನಮ್ಮ ನಡುತ ನಮಕ್ ತೆರಿಯೆರಾವಂದಿನ ಕೂಡು ಕುಟುಮದ ಒಟ್ಟುಗುದ  ಅಪ್ಪೆನ,ತಮ್ಮಲೆನ ಇತ್ತ್ಂಡ್.ಪೆದ್ದ್ಂಡ ಅಪ್ಪೆ,ತಾಂಕ್ಂಡ ತಮ್ಮಲೆಂದ್ ನಮ ದೈವೊನು ಆರಾದನೆ ಮಲ್ತೊಂದು ಬೈದ್ ನಕುಲು.ನೇಮ ನೆರಿ ಕೋಲ ಆನಗ ನಮ ಬೊಕ್ಕ ನಮ್ಮ ದೈವದ ನಡುಟು ಹಿರಿಯಾಕ್ಲೆ ಕಾಲೊಡ್ದಿಂಚ ಒಂಜಿ ರೀತಿದ  ಪಾತೆರಕತೆ ನಡತೊಂತ್ಂಡ್.ನಮ್ಮ ಮದಿಪು ಮಾಯೆಗ್ ಅರ್ಥ ಆವೊಂತ್ಂಡ್.ದೈವದ ಕೈ ಸನ್ನೆ,ಕಣ್ಣ್ ಸನ್ನೆ ನುಡಿ ನಮಕ್ಲ ತೆರಿಯೊಂತ್ಂಡ್.ಹಿರಿಯಾಕ್ಲೆ ಮದಿಪುದ ಎದುರು ವಾ ಅಣ್ಣೆರ್ ನಕ್ಲೆನ ಮದಿಪುಲಾ ಅಗತ್ಯ ಇಜ್ಜಿ.. ಆಂಡ ದೈವ ಬೊಕ್ಕ ನಮ್ಮ ಮದ್ಯೊಡು ಮದ್ಯಸ್ಥೆ ಪನ್ಪಿ ವ್ಯವಸ್ಥೆ ಬತ್ತಿ ಬೊಕ್ಕ ನಮ್ಮ ಹಿರಿಯಾಕ್ಲೆ ಮದಿಪು ದೈವೊಲೆಗ್ ಕೇನಂದೆ ಪೋಂಡು.ಮುಂಡಾಸ್ ಗ್ ದೈವದ ಕೊಡಿಯಡಿಕ್ ಪೋಯೆರೆ ಕಾರ್ ಬತ್ತ್ ಜಿ,ಪುಗೆಲ್ದ ಬೈರಾಸ್ ಜಾರ್ದ್ ಪೋಂಡು.ಹಿರಿಯಾಕ್ಲೆ ಬಿಲೆ ಕೊಡಿಯಡಿ ತಪ್ಪುನಗ ಅಡೆ ಮದ್ಯಸ್ಥೆರ್ ಬತ್ತೆರ್.ದೈವದ ಬಾಸೆನ್ ಅರ್ಥ ಮಲ್ತೊಂದು ದೈವ ನುಡಿತ ಇಚಾರೊನು ಕುಟುಮೊಗು ತೆರಿಪಾಯೆರ್.ಮೂಲು‌ ಮದ್ಯಸ್ಥೆರ್ ಬೊಕ್ಕ ದೈವದ ನಡುಟು ಸಮ್ಮಂದ ಒರಿಂಡ್ ವಿನಃ ಕುಟುಮದ ಹಿರಿಯಾರೆ ಮದಿಪಿಜ್ಜಂದೆ ದೈವದ ಕಾರ್ನಿಕ ನೆಗಪಂದೆ ಪೋಂಡು.ನಮ ನಂಬಿ ದೈವೊಗು ನಮನೇ ಮದಿಪೊಡು ವಿನಃ ಪಿದಯಿಡ್ದ್ ಬತ್ತ್ ನ‌ ಮೂಜನೆದಾಯೆ ಮದಿಪುನತ್ತ್.ಅಪಗ ದೈವ ಕಲೊಕ್ಲ ಬರಂದ್.ನಮ್ಮ‌ಅಪ್ಪೆ ಅಮ್ಮಗ್ ನಮ ಉನ್ಪು ಕಜಿಪು ಪಾಡ್ದ್ ಕೊರ್ಂಡ ಎಡ್ಡೆನಾ,ಪಿದಾಯಿದ ಮೂಜನೆ ವ್ಯಕ್ತಿ‌ಬಲಸ್ ದ್ ಕೊಂರ್ಡ ಎಡ್ಡೆನ?.

ಕುಟುಮದ   ದೈವದ ಕಲೊಟು ಕುಟುಮ ಸಂಸಾರ ಬೊಕ್ಕ ದೈವದ ನಡುಟು ಉಂತುದು ರಡ್ಡ್ ಕಡೆಕ್ಲಾ ಕುಂದೆಲ್ ಬರಂದಿಲೆಕ ಆಯ ನ್ಯಾ ನ್ಯಾಯ ಒದಗಾದ್ ಕೊರ್ಪುನಕುಲು ಮದ್ಯಸ್ಥೆರ್.ದೈವ ಒಂಜಿ ಕೋಡಿ,ಕುಟುಮ ಸಂಸಾರ ಕುಡೊಂಜಿ ಕೋಡಿ,ಮದ್ಯೊಡು ಉಂತುದು ಸರಿ ತಪ್ಪುನು ತುಲಿಪುನಾರ್ ಮದ್ಯಸ್ಥೆರ್.ಕುಟುಮೊಡು ಸಂಸಾರದ ಬಗೆಟ್ ದೈವೊಡ ಸರಿಯಾದ್ ಪಾತೆರುನ ಏರಾಂಡಲಾ ಒರಿ ಹಿರಿಯಾರಿತ್ತೆರ್ಡ ಮದ್ಯಸ್ಥೆರೆನ ಅಗತ್ಯ ಆ ಕಲೊಕಿಜ್ಜಿ.ಅಂಚನೆ ದೈವೊಡ ಮದ್ಯಸ್ಥೆರ್ ಮದಿಪುನ ದುಂಬು ನಾಲಚ್ಚರದ ಮದಿಪಾಂಡಲಾ ಕಟುಮದ ಹಿರಿಯಾರೊರಿ ದೈವಡ ಮದಿಪೊಡು.

ದೈವ ಬೊಕ್ಕ ಸಂಸಾರದ ನಡುಟು ದೈವದ ಬಾಷೆದ ಇಚಾರೊನು ಅರ್ಥ ಮಲ್ಪಾಯೆರೆ ಪ್ರಾಮಾಣಿಕವಾಯಿನ ಮದ್ಯಸ್ಥೆರ್ ಬೋಡು.ಮಣೆ ಮಂಚವುದ ದೈವೊಗು ಮದಿಪುನಾರೆಗ್ ಮರತ ಒಂಜಿ ಪೀಠ ಇತ್ತ್ಂಡ ಎಡ್ಡೆ.ದೈವದ ಕಲೊಕು ಮದ್ಯಸ್ಥೆರ್ ಬತ್ತೆರ್ಡ 4 ಕಂಬದ,16ಕೋಲುದ ಆಯದುಲಯಿ ಆರ್ ಉಪ್ಪೊಡು ವಿನಃ ತಿಕ್ ನೌಲು ಪೂರ ಆರ್ ಪೋಯೆರೆ ಬಲ್ಲಿ.ದೈವದ ಕಲೊಕು ಬತ್ತಿ ಬೊಕ್ಕ ಚಾಕಿರಿ ಮುಗಿಯುನಡೆಮುಟ್ಟ ಬಚ್ಚಿರೆ ಅಗ್ಯೊಂದು ಪೋದು ಉಬ್ಯೆರೆ ಬಲ್ಲಿ.ಅಂಚನೆ ಆರ್ ಪೋಯಿನ ಕುಟುಮದೌಲು ಮದಿಪುನಗ ತನ್ನ ಕುಟುಂಬನೇ ಈ ಸಂಸಾರಲಾ ಪಂಡ್ ದೆನ್ನಿದ್ ಮದಿಪೊಡು.ಅಪಗ ಅರೆಗ್ ಸಂಸಾರೊಗು ನ್ಯಾಯ ದೆತ್ತ್ ಕೊರ್ರೆ ಸಾದ್ಯ ಆಪುಂಡು.ಲೆಪ್ಪಂದೆ ಬತ್ತಿ ಬಿನ್ನಗ್ಲ ಮದಿಪಂದೆ ಬತ್ತಿ ಮಾಯೊಗ್ಲಾ ಮರ್ಯಾದಿ ಇಜ್ಜಿ ಪನ್ಪುನವು ಬೂತಾಲ್ಯದ ಕಟ್ಟ್ ಡುಂಡು.ಆಂಡ ಹಿರಿಯಾಕ್ಲೆ ಮನಬಗ್ತಿಡ್ದ್ ಲಾ ಮದಿಪುದಕ್ಲೆ ಮದಿಪು ದುಂಬು ಪೋವೊಂದುಂಡು .ಒಂಜಿ ಕುಟುಮೊಡು 5 ದೈವೊಲಿತ್ತಡ ಬಾಲೊಲಿದಡಿಟ್ ಸುರುತ ದೈವದ  ನೇಮ ಆಪುನ ದುಂಬು ಬ್ರಹ್ಮಕುಲ,ಗುತ್ತು ಮಡಸ್ತಾನೊಗು ಪುರ್ಪ ತಾರಾಯಿ ಕೊರಿ ಬೊಕ್ಕ ,ಅವೆರ್ದ್ ಬೊಕ್ಕ ನಡಪುನ ದೈವೊಲೆ ನೇಮೊಡು ದೈವ ಮಿತ್ತ್ ಪನ್ನಕುಲೆಗ್ ಮಾನಾದಿಗೆ ಸಂದ್ ದ್ಂಡ ಕೇಂಡ ನಿನ್ನ ಕೊಡಿಯಡಿಟೇ ಸಂದ್ ದ್ಂಡ್ ಪನ್ಪುನ ಮದಿಪುದ ಮದ್ಯಸ್ಥೆರ್ ಬೋಡು.ಕುಟುಮದ ನ್ಯಾಯ ತೀರ್ಮಾನ ಮಂತಿ ದೈವ ಕುಟುಮ ಸಂಸಾರೊನು ಒತ್ತಟ್ಟ್ ಡ್ ಉಂತಾದ್ ಪೇರ್ ಪರ್ಪುನ ದುಂಬು ಮದಿಪುದಾರೆಗ್ ಒಂಜಾ,ರಡ್ಡಾ ತಾರಾಯಿದ ಮಾನಾದಿಗೆ ಕೊರ್ಪುಂಡು.ಅಡೆಮುಟ್ಟಲ ಮದ್ಯಸ್ಥೆರ್ ಕುಟುಮ ಸಂಸಾರದ ಒಟ್ಟುಗಿತ್ತೊಂದು ಕುಟುಮದ ಬೇನೆ ಬೆಸುರ್ಪುನು ಮಾಜಾವುನ ಬೇಲೆ ಮಲ್ಪೊಡು.ಇನಿ ಅವು ಒವುಲಾ ದೈವದ ಕೊಡಿಯಡಿಟ್ ತೂವೆರೆ ತಿಕ್ಕೊಂದಿಜ್ಜಿ.

ದೈವದ ಕೊಡಿಯಡಿಟ್ ದುಂಬು ಪೂರ  ಪಾರಿ/ಮದಿಪು ಪನ್ಪುನ ಕಟ್ಟಿಜ್ಜಾಂಡ್.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಪಂಥ  ಮಲ್ತೊಂದುಲ್ಲೆರ್,ಮೈಕ್ ಬೇತೆ ಮದಿಪುದಕ್ಲೆ ಕೈ ಸೇರೊಂದುಂಡು.ಮದಿಪುದ ,ಪಾರಿದ ಪ್ರಚಾರೊಗು ಪಂಥೊಲು ನಡತೊಂದುಲ್ಲ.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್  ಗಂಟೆಕಟ್ಲೆ  ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್  ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಲ್ಲೆರ್.  ಉಂದು ನಿಜವಾದ್ ಲ ತಪ್ಪು.ಇನಿ ಕೆಲವೊಂಜಿ ಕಟ್ಟುನಕುಲೆಗ್  ಮದ್ಯಸ್ಥೆರಿಜ್ಜಂದೆ ವಸಾಯನೆ ಬರಂದಿಲೆಕ ತೋಜುಂಡು.ಕುಟುಮದ ಹಿರಿಯಾಕ್ಲೆ ಮದಿಪು ಕಟ್ಟುನಕ್ಲೆಗ್ ಅಗತ್ಯದಾಂತೆ ಪೋಂಡ್.ಮದ್ಯಸ್ಥೆರಿಜ್ಜಂದೆ ಎಂಕುಲು ಕಟ್ಟುಜ ಪನ್ಪುನ ಕಟ್ಟುನಕುಲ್ಲ ಉಲ್ಲೆರ್.ಇನಿತ ದಿನೊಕ್ಲೆಡ್ ಕುಟುಮದಕ್ಲೆಗ್ ದೈವದೆದುರು ಕೈ ಮುಗಿದ್ ಉಂತೆರೆ ಮಾತ್ರ.ಆಂಡ ಕಡೆ ಕೊಡಿ ದೈವ ಸಮ್ಮಂದ ದೀವೊಂದಿನಿ ಮದ್ಯಸ್ಥೆರ್ಡ ಪಂಡ ಇಂಚಿ ಕಟ್ಟುನಕ್ಲೆರ್ದ್ ಸಂಸಾರೊಗು ದಾಲ ನ್ಯಾಯ ತಿಕ್ಕೆರೆ ಸಾದ್ಯ ಇಜ್ಜಿ.ಅಂಚನೆ ಪರವೂರುರ್ದು ಮದ್ಯಸ್ಥೆರೆನ್ ಲೆತೊಂದು ಬತ್ತ್ ದ್ ಅಕ್ಲೆಗ್ ಕೊಡಿಯಡಿಟ್ ಮಣೆ ಕೊರ್ದು ನಮ್ಮ ಹಿರಿಯಾಕ್ಲೆನ್ ಪಿರವು ಉಂತವೊಂದಿಪ್ಪುನವು ದುರಂತ.

ಓಜಲಂಗಾಯ ದೈವ

ಓಜಲಂಗಾಯ ದೈವ

         ‌‌             ಜುಮಾದಿನ ಭದ್ರಮುಗ

ಓಜಲಂಗಾಯ ದೈವೊನು ವ/ವಾಜಂಗಲಾಯೆ,ವಜಲಾಯೆಂದ್ ಲ ಲೆಪ್ಪುವೆರ್.ಪರಿಯಾಲದ ಕಡೆಂಜಡ್,ಕೋಟೆಕಾರ್ ಕೊಂಡಾಣದ ಮಾಡೂರುದಲ್ಪ,ಪಿಲಾರ್ ಅರಂತಡೆ,ಕೂಟಾಜೆದ ಉಲ್ಲಾಲ್ದಿನಲ್ಪ,ವಾಮಂಜೂರು ಕೈತಲ್ದ ಪಡುಶೆಡ್ಡೆಡ್ ಓಜಂಗಲಾಯ ದೈವದ ಆರಾದನೆ ಉಂಡು.ಗಟ್ಟಿ ಸಮಾಜದಕ್ಲೆನ ಆರಾದ್ಯ ದೈವ ಉಂದು.ಕೆಲವೆರ್ ಓಜಂಗಲಾಯನ್ ಈ ದೈವ ಮೂಲೊಡು,ಮರ್ಲ್ ಜುಮಾದಿನ ನನೊಂಜಿ ಒರುಂದುಲ ಪನ್ಪೆರ್.ವಜಂಗಲಾಯನ್ ಬಂಟ್ವಾಳ ತಾಲೂಕುದ ಕುದಿ ಗ್ರಾಮ ಮಾಗಣೆಡ್ (ಕಳ್ಳಿಗೆ,ತುಂಬೆ,ಬಂಟ್ವಾಳ ನಡು ಬೊಕ್ಕ ಮೂಡ ಗ್ರಾಮದ ಅರಸು ದೈವ,)  ಕನಪಾಡಿದಾಯೆಂದ್,ಅರ್ಕುಲ ತುಪ್ಪೆಕಲ್ಲ್ ಡ್ ,ಪುರಲ್ದಪ್ಪೆ ಉಲ್ಲಾಲ್ದಿನ ಸಾನೊಡು ಮಗ್ರಂದಾಯೆಂದ್,ಕುಡ್ಲದ ಬಿಜೈಡ್ ಪುಲಂದಾಯೆ ಪನ್ಪಿ ಪುದರ್ ಡ್ ಆರಾದನೆ ಮಲ್ಪುವೆರ್.ಉಂದೆನ್ ತೂನಗ ವಜಲಾಯೆಲ ಜುಮಾದಿನ ನನೊಂಜಿ ಒರುಂದು ತೋಜುಂಡು.

ಸಂಕೇಶ

ಸಂಕೇಶ

 

ಸಂಕೇಶ ಪನ್ಪುನ ಸವ್ದೊಗು ತುಳುಟು ಬೇತೆ ಬೇತೆ ಅರ್ಥೊಲುಲ್ಲ.ಸಂಕೇಶ ಪನ್ಪುನವು ಒಂಜಿ ಊರುದ ಪುದರ್ಲ ಆದುಂಡು.ದೈವಾರಾದನೆಡ್ ಸಂಕೇಶ ಪನ್ನಗ ಬೇತೆ ಬೇತೆ ಅರ್ಥೊಲು ತಿಕ್ಕುವ.ದೇವೆರೆ ಪಕ್ಕಸ್ಥಲೊಟುಂತಿ ದೈವದ ಜಾಗೆನ್ ಸಂಕೇಶ ಪನ್ಪೆರ್.ದೇವೆರೆನ್ ಭೇಟಿಯಾಪುನ ದೈವದ ನಿಲೆನ್ ಸಂಕೇಶ ಪನ್ಪೆರ್. ನೀರ್ ಪಂಡ ದೈವದ ಬಾಸೆಡ್ ಪನ್ಪುಂಡ ಜಲಾದಿ,ಜಲ ತೂದು ನಿಲೆಯಾಪುನ ಜಾಗೆ ಸಂಕೇಶಂದ್ ಪನೊಲಿ.ದೈವ ತಾನ್ ಸಂಕಲ್ಪೊಡು,ಇಚ್ಚೆಡ್,ಸಂಕೇತೊಡು ಜಲ ತೂದು ನಿಲೆ ಆಯಿ ಜಾಗೆನೇ ಸಂಕೇಶ.ಈ ಸಂಕೇಶ ಪನ್ಪುನ ಜಾಗೆ ಹೆಚ್ಚಾದ್ ತಾರ್, ತುದೆತ ನೀರ್ ಪೋದು ಉಂತುನ ಜಾಗೆದಲ್ಪ ಬರ್ಪುಂಡು.

ಸಿಂಗದನ-ದೈವದ ಕೊಡಿ ವಾ ದಿಕ್ಕ್ ಗುಪ್ಪೊಡು

ಸಿಂಗದನ-ದೈವದ ಕೊಡಿ ವಾ ದಿಕ್ಕ್ ಗುಪ್ಪೊಡು

  

ಸಿಂಗದನ

‌ 

ಸಿಂಗದನ.ಒಂಜಿ ರೀತಿಡ್ ತೂಪುಂಡ ಅವು ದೈವೊಲೆ ಸಿಮ್ಮಾಸನ

  

ಮಕರ ಚೋರ್ನ

 ದೈವೊಲೆನ ನೇಮ ಇರ್ಲ್ ನಡಪುಂಡ ರಾವು ಗುಳಿಗ ಕಾಲ ತಪ್ಪಾದ್ ಬೊಲ್ಪುಗು ಸಿಂಗದನ ಕಟ್ಟುವೆರ್.ಧರ್ಮ ನೇಮ ಆಂಡ ಒಂಜಿ ಕೋಡಿಡ್ ಬಾರ್ ದ ಬಿತ್ತ್ ದ ಮುಡಿ,ನನ ಒಂಜಿ ಕೋಡಿಡ್ ಅರಿತ ಮುಡಿ ದೀದ್ ಅವೆತ ಮಿತ್ತ್ ಪಲಯಿ ದೀದ್ ಸಿಂಗದನ ಕಟ್ಟುವೆರ್.ದಲ್ಯ (ಬೊಲ್ದು ಕುಂಟು) ಪಲಯಿದ ಮಿತ್ತ್ ಪಾಡುನೆಡ್ದಾದ್ ಅರಿಬಾರ ಮುಡಿಕುಲು ಕಣ್ಣ್ ಗ್ ತೋಜುಜ.ನಾಲ್ ಮೂಲೆ ಚೌಕಾಕಾರ ಬರ್ಪುಲೆಕ,ಮಿತ್ತ್ ಪೋಯಿಲೆಕ ಸಪೂರ ಆಪುಲೆಕ,ತ್ರಿಕೋನದ ಒರು ಬರ್ಪುಲೆಕ ಸಿಂಗದನ ಕಟ್ಟುವೆರ್.ದರ್ಮ ನೇಮ ಇಜ್ಜಿಂಡ ರಡ್ಡ್ ಕಾರ ಬೆಂಚಿದಾಕಾರದ ಪಲಯಿ ದೀದ್ ತಿರ್ತ್ ಚೌಕಾಕಾರೊಡು,ಮಿತ್ತ್ ಪೋಯಿಲೆಕ ತ್ರಿಕೋನ ಬರ್ಪುಲೆಕ ಸಿಂಗದನ ಕಟ್ಟುವೆರ್.ಸಿಂಗದನೊಟು ಮೂಜಿ ಅಂತರೊಲು(ಅಂತಸ್ತು-ಮಾಡದ ರೀತಿ) ಇತ್ತ್ ದ್ ಚೌಕಾಕಾರದ ಮಿತ್ತ್ ತ್ರಿಕೋನಾಕರ ಮಲ್ತ್ ದ್ ಬೊಲ್ದು ಕುಂಟು ಸುತ್ತುದು ತಿರ್ತ ನಾಲ್ ಸುತ್ತಲ ಕೆಂಪು ಕಪ್ಪು ಅರು ಕಟ್ಟುವೆರ್.

  

ಮೇಲ್ಕಾಪು.ತಾರಾಯಿ,ಬಚ್ಚಿರೆ ಬಜ್ಜೆಯಿ,ತಾರೆದ ತಿಗ್ ತಿ ಒಲಿ ಕಟ್ಟ್ ದುಪ್ಪುವೆರ್.

        ಸಿಂಗದನತ ಉಲಯಿ ದೀಪುನ ಸೊತ್ತುಲೆನ್ ತೂಪುಂಡ ತಿರ್ತ ಅಂತರದ ಕೋಣೆದುಲಯಿ ಬಾರ್ ಪಾಡ್ದ್ ಅವೆತ ಮಿತ್ತ್ ಕೊಡಿರೆ ಪಾಡ್ದ್ ಅವೆಟ್ ಉರ್ಪೆಲರಿ,ಕಲೆಯಿನ ತಾರಾಯಿ,ಬಚ್ಚಿರೆ ಬಜ್ಜೆಯಿ ದೀಪೆರ್.ಉಂದೆನ್ ಬೆಮ್ಮೆರೆ ಸುತ್ತೆ/ದೀಸುತ್ತೆ ಪನ್ಪೆರ್.ಸುತ್ತೆದ ಅಂಚಿಂಚಿ ಬೊಂಡ ದೀದುಪ್ಪುವೆರ್.ಅವ್ವತ್ತಂದೆ ಪೊರಿ ಬೆಲ್ಲ ಪಂರ್ಂದ್ ಬಿರಾಯಿನ ಪನಿವಾರ ಪಾಡ್ದಿಪ್ಪುವೆರ್.ಒಟ್ಟು ಮೂಜಿ ಅಂತರೊಡು ಒಂಜೊಂಜೆತಲೆಕ ಮೂಜಿ ಸುತ್ತೆ,ಮೂಜಂತರೊಟು ರಡ್ರಡ್ಡೆತಲೆಕ ಆಜಿ ಪನಿವಾರೊಲು ಉಪ್ಪುವ.ಸಿಂಗದನತ ಕೊಡಿಕ್ ಮುಗುಳಿ ದೀದುಪ್ಪುವೆರ್ .ಎದುರು ಒಂಜಿ ಗುಜ್ಜಣೆದಂಚಿನ(ಗುಜ್ಜಣೆ-ಜೀಟಿಗೆಗ್ ಎಣ್ಣೆ ಪಾಡುನ ದೂಂಚಿ ಮೋನೆದ ಕೂಜೆದಂಚಿ ಒರು )ಗಿಂಡೆಡ್ ಕುಂಟುದ ಬತ್ತಿ ಮಲ್ತ್ ದ್ ಬಾರೆದ ಬಂಬೆಡ್ ಪೊತ್ತದ್ ತುಡರ್ ದಲೆಕ ದೀಪೆರ್.ನೇಮ ಸುರಾನಗ ಪೊತ್ತಂಡ ನೇಮ ಪಿರಿನೇಟ ಅವು ಪೊತ್ತೊಂದೆ ಉಪ್ಪೊಡು ಪನ್ಪಿ ಕೆರಮ.ಸಿಂಗದನತ ಎದುರು ತಿರ್ತ್ ದೈವದ ಬಂಡಾರ ಉಪ್ಪುಂಡು.ಸಿಂಗದನತ ಎದುರು ತಿರ್ತ್ ದಿನ ಪಲಯಿಗ್ ದಲ್ಯ ಪೊದಿದ್ ಅವತ ಮಿತ್ತ್ ಉರ್ಪೆಲರಿತ ಸುತ್ತೆ ದೀದ್ ಅವೆತ ಮಿತ್ತ್ ನೇಮ ನಡಪುನ ಪ್ರದಾನ ದೈವದ ಮುಗ ದೀಪೆರ್.ಆ ಅರಿ ದಲ್ಯ ಪಾಡ್ ನ ಮಡ್ಯೆಲೆರೆಗ್.ಸಿಂಗದನತ ಉಲಯಿ ಪಾಡ್ನ ಪನಿವಾರ,ಅರಿ,ತಾರಾಯಿ ಮಡ್ಯೆಲೆರೆಗ್.

  ದೊಂಪದ ಬಲಿ ನೆಮೊಡು ರಾಜಂದೈವೊಲೆಗ್ ಸಿಂಗದನ ಪಾಡ್ದ್ ನೇಮ ಕೊರಿಯೆರ್ಡ(ದೈವ ಸಾನ ಇಜ್ಜಂದಿ ಜಾಗೆಡ್ ಬಂಡಾರ ಬತ್ತ್ ದ್ ದೊಂಪದಡಿಟ್ ಸಿಂಗದನೊತ ಎದುರು ಬಂಡಾರ ದೀದ್ ನೇಮ ಆಪುನಿ) ಇಲ್ಲದೆಚ್ಚಿದ ನೇಮೊಲೆಡ್ ಕೊಡಿಯಡಿ ಕಟ್ಟ್ ದ್(ಬಾಲೊಲಿ) ಕೊಡಿಯಡಿಟ್ ಬಲಿ ದೀದ್ ಬಲಿತ ಪಿರವು ಬಂಡಾರ ಕೇರ್ತ್ ದ್ ನೇಮ  ಕೋಲ ಕೊರ್ಪೆರ್.ಸಿಂಗದನೊನು ಕೆಲವು ಕೋಡಿಡ್ ಬೊಲ್ದುದ ಎಣ್ಮ ಮರಂಗೆದ ಕುಂಟುಡು  (ವೇಷ್ಟಿಡ್) ಸುತ್ತುವೆರ್,ಬಂಬೆಲ ದೀಪೆರ್.ಕೆಲವು ತಿಕ್ ಡ್ ಮಡ್ಯೆಲೆರ್ ಅಕ್ಲೆಗ್ ಸಕಾಯ ಆಪುಲೆಕ  ಪ್ರತೀ ಮುಗ ಮೂರ್ತಿಲೆಗ್ಲಾ ಬೇತೆ ಬೇತೆ ಸುತ್ಯೆ ದೀದ್ ಅವೆತ ಮಿತ್ತ್ ಮುಗ ದೀಪೆರ್.ನಿಜವಾದ್ ಒಂಜೇ ಸುತ್ತೆ ದೀಯೆರೆ ಉಪ್ಪುನಿ.ಅವು ಬೆಮ್ಮೆರೆ ಸುತ್ತೆ. ಸಿಂಗದನತ ತಿರ್ತ್ ಎದುರು ಪಲಾಯಿಡ್ ಅರಿ,ತಾರಾಯಿ,ಬಚ್ಚಿರೆ ಬಜ್ಜೆಯಿದ ಒಂಜಿ ಸುತ್ತೆ, 16 ಪನಿವಾರ ಪಾಡುವೆರ್.ಕೆಲವು ತಿಕ್ ಡ್ 48 ಪನಿವಾರ ದೀಪುನ ಕೆರಮಲ ಉಂಡು.ಅವು ಪ್ರಾದೇಶಿಕ ಎತ್ತೇಸೊಲಾತೆ.ದೈವಾರಾದನೆಡ್ ಊರುಗೊಂಜಿ ಕಟ್ಟ್ ದೇಶೊಗೊಂಜಿ ಬಾಸೆಂದ್ ಉಪ್ಪುಂಡು.

                  ಕೊಡಿ ಮರಟ್ ಕೊಡಿ ಏರ್ದ್ ನಿ

       ತುಳುನಾಡ ದೈವಾರಾದನೆದ ಕೊಡಿಯಡಿ ಪಂಡ ಅವು ಸಾನದ ನನೊಂಜಿ ರೂಪ.ಕೊಡಿಯಡಿ,ಸಾನ,ಇಲ್ಲ್,ಮಾಡ,ಗುಂಡ,ಚಾವಡಿ,ಬೂತದ ಕೊಟ್ಯೊಗು ಮೂಡಾಯಿ ಪ್ರದಾನ.ಪ್ರತಿಯೊಂಜೆಕ್ಲ ಮೂಡಾಯಿ ಬಾಕಿಲ್.ಅಂಚಾದ್ ಕೊಡಿಯಡಿತ ದೊಂಪೊಗು ಪಾಡುನ ಮೊಡೆಯಿ ಮಡಲ್ದ ಕೊಡಿ ಮೂಡಾಯಿಗಿಪ್ಪೊಡು,ಕಡೆ ಪಡ್ಡೇಯಿಗುಪ್ಪೊಡು.ಸಾನದ ಬೊಕ್ಕೊಂಜಿ ರೂಪನೇ ಕೊಡಿಯಡಿ.ಒಂಜಿ ಸಾನೊರ್ದು ಬಂಡಾರ ಜತ್ತ್ ದ್ ಕೊಡಿಯಡಿಟ್ ಭಂಡಾರ ಏರುನಿ.ಅಂಚಾದ್ ಕೊಡಿಯಡಿಕ್ ಮೂಡಾಯಿ ಸುದ್ದ.ಮೂಡಾಯಿ ಕಟ್ಟ್ ದಿತ್ತ್ಂಡ,ಮೂಡಾಯಿಡ್ ಜಾಗೆನೇ ಇಜ್ಜಿಂಡ ಬಡಕಾಯಿಗ್/ಉತ್ತರೊಗು ಕೊಡಿ ಪಾಡೊಲಿ.ನಮ್ಮ ದೈವಸಾನೊಲೆನ,ಭಂಡಾರದಿಲ್ಲದ,ಕುಟುಮದಿಲ್ಲದ ಕಡೆಕ್ ಇಲ್ಲದ ಬಾಕಿಲ್ಲ ಮೂಡಾಯಿಗ್ ಉಪ್ಪುನಿ.ದೈವದ ಮಣೆ ಮಂಚದ ಮೋನೆ ಮೂಡಾಯಿಗ್ ಇತ್ತ್ ದ್ ಕುಟುಮದ ಪಂಜುರ್ಲಿನ ಮಣೆಮಂಚದ ದತ್ತ ಬಾಗೊಡು ಉಂತುದೇ ಪ್ರಾರ್ಥನೆ ಮಲ್ಪುನ ಕೆರಮ.ಮೂಡಾಯಿಗ್,ಪಡ್ಡೆಯಿಗ್ ಬೆರಿಪಾಡ್ದ್ ಉಂತೆರೆ ಬಲ್ಲಿ.

ದೈವದ ಕೊಡಿಯಡಿಟ್ ದೊಂಪಲ ಬತ್ತ್ಂಡ್.ದೊಂಪೊಗು ಮೊಡೆಯಿ ಮಡಲ್ ಪಾಡ್ನಗಲ ಮೂಡಾಯಿಗ್ ಮಡಲ್ದ ಕೊಡಿ ಉಪ್ಪೊಡು.ಪಡ್ಡೆಯಿಗ್ ಮಡಲ್ದ ಕಡೆ ಉಪ್ಪೊಡು.ಮೂಡಾಯಿ ಬರೆಗಿರೆ ಕಟ್ಟ್ ದಿತ್ತ್ಂಡ ಬೇತೆಕ್ಲೆ ಜಾಗೆದ ತಕ್ರಾರ್ ಇತ್ತ್ಂಡ ಮಾತ್ರ ಬಡಕಾಯಿ/ಉತ್ತರ ಗ್ ಮಡಲ್ದ ಕೊಡಿ ಬರ್ಪುಲೆಕ ದೊಂಪ ಪಾಡೊಲಿ.ಆಂಡ ಮೂಡಾಯಿ ಬಡಕಾಯಿ ಕಟ್ಟ್ ದಿತ್ತ್ಂಡ ಪಡ್ಡೆಯಿಗ್ ಮಡಲ್ದ ಕೊಡಿ ಬರ್ಪುಲೆಕ ಪಾಡೊಲಿ.ಆಂಡ ವಾ ಕಾರಣೊಗ್ಲಾ ತೆನ್ಕಾಯಿ ಮೋನೆ ಪಾಡ್ದ್ ದೊಂಪದ ಮಡಲ್ದ ಕೊಡಿ ಉಪ್ಪೆರೆ ಬಲ್ಲಿ.ಆಂಡ ಗೊತ್ತಿಜ್ಜಂದೆ ಇನಿ ತಿಕ್ಕ್ ನ ದಿಕ್ಕ್ ಲೆಗ್ ಮೊಡೆಯಿ ಮಡಲ್ದ ಕೊಡಿ ಪಾಡೊಂದುಲ್ಲೆರ್.ಕೆಲವೊಂಜಿ ಕೊಡಿಯಡಿಟ್ ಮರತ ಎತ್ತರದ ಪಲಯಿಡ್ ಬಂಡಾರ ಕೇರ್ತೆರ್ಡ ಕೆಲವೊಂಜಿ ತಿಕ್ ಡ್ ದೊಂಪದಾಯನೊಡು ಕೊಡಿಯಡಿತ ದೊಂಪದ ಉಲಯಿ ಸಿಂಗದನ ಮಲ್ತ್ ದ್ ಅವೆತ ತಿರ್ತ್ ದೈವದ ಬಂಡಾರ ಕೇರ್ಪುವೆರ್.

ಇನಿ ದೈವದ ಕೊಡಿಯಡಿಕ್ ಬತ್ತಿ ವೈದಿಕ ಆರಾದಕೆರ್ ಸಿಂಗದನೊನು ಬ್ರಹ್ಮ ,ವಿಷ್ಣು,ಮಹೇಶ್ಚರೆಂದ್ ಪನೆರೆ ಸುರು ಮಲ್ದೆರ್.ದೈವದ ಕೊಡಿಯಡಿಕ್ ದೈವೊಲೇ ವಿನಃ ದೇವೆರೆ ಆರಾದನೆಯತ್ತ್.ಅಂಚನೆ ಸಿಂಗದನತ ಎದುರು ದೈವ ಬಂಡಾರದೊಟ್ಟುಗು ದೀನ ಪನಿವಾರೊಲೆನ್ ಗುತ್ತು,ಬರ್ಕೆ,ಚಾಕಿರಿದಕ್ಲೆಗ್ ಪಟ್ಟುವೆರ್.

ದೈವಾರಾಧನೆದ ತುಳುನಾಡ್

                                                                                                                                                                                                                  ತುಳುನಾಡ್ ಮೂಡಾಯಿ,ಪಡ್ಡೆಯಿ,ತೆನ್ಕಾಯಿ ಬಡಕೈ ಮಾತ ಸುತ್ತುಡ್ಲ ತುಳುವೆರೆನ್ ಮೊಕೆಡೆ ತಾಂಕುನ ತುಳುವಪ್ಪೆನ ಸಂಸ್ಕೃತಿ ಸಿರಿತ ಮಟ್ಟೆಲ್. ತುಳುವಪ್ಪೆನ ಸಂಸ್ಕೃತಿನೆ  ಮಟ್ಟೆಲಾದ್ ಪಡೆಯಿನ ನಮ್ಮ ತುಳುವೆರ್ ಭಾಗ್ಯವಂತೆರ್ಂದ್ ಪನೋಡು.ಅಂಚನೆ ಈ ಮಲ್ಲ ತುಳುಸಂಸ್ಕ್ರಿತಿ ನಂಬಿಕೆ ,ಆಚರಣೆ,ಕೃಷಿ ಪ್ರಧಾನ ರೂಪಾದ ಜನಪದ ನಮ್ಬಿಕೆದೆ ಉಂಥ್ಡ್ನ್ದ್.ಪುತ್ತುನ ಬಾಲೆಡ್ ದ್ ತೈಪಿನ ಜೀವ ಮುತ್ತ ನಮ್ಮ ಆಚರಣೆ ಸಂಸ್ಕೃತಿ ಬುಲೆದುಂಡು.ತುಳು ಹಿಂದೂ ಸಂಸ್ಕ್ರಿತಿದ್ ಜೀವ ಪೋಇನೆದ್ ದ್ ಬೊಕ್ಕಳ ಹಿರಿಯಾಕ್ಲೆಗ್ ತಟ್ಟಿದ ದೀದ್ ಲೆಪ್ಪುವ ಪಾಂಡಾ ನಮ್ಮ ತುಳುನಾಡ ಸಂಸ್ಕ್ರಿತಿದ ಮಲ್ಲಾತಿಗೆ ತೆರಿವತ್ತೇ .ಅಂಚಿನ ಮಲ್ಲ ಸಂಸ್ಕ್ರಿತಿದ್ ಪುಟ್ಟನ ಮದಿಮಲ್ ಪೊನ್ನು ಮದಿಮೆ ಆದ್ ಬಂಜಿನಾಲ್ ಆನಗ ನಮ್ಮ ತುಳು ಸಂಸ್ಕ್ರಿತಿದ ಗಥ್ ಅವ್ಲು ತೊಜಿದ್ ಬರು .ಪೂರ ಅಲ್ತ ಆಚರಣೆ ಶ್ರೀಷ್ಟಿದ ಸಂಕೇತ ಆದುಪ್ಪುಂದು .ತರೆಕ್ ದೀಪಿನ ರದ್ದ್ ಬಜ್ಜೆಯಿ ,ಒಂಜಿ ಯೆಯ್ಪಂಜಿದ ಮುಳ್ಳು ಆನನ ಸಂಕೇತ ಅಂದ .ಇಡಿ ಪಿನ್ಗಾರೋನು ಕನತ್ದ್ ಪೊನ್ನನ ತರೆತ್ ಪುದಪುನ ಹಿರಿಯಾಕ್ಲೆ ಚಿಂತನೆ ಶೃಷ್ಟಿ ಕಾರ್ಯೋನು ತೊಜಪಾವುಂಡು.ಅಂಚನೆ ಪೊನ್ನು ತುತ್ತುನ ಸೀರೆ ಪಚೆ ,ಕಾಜಿ ಪಚೆ ಉಂದು ಪೂರ ಕೃಷಿ ಪ್ರಧಾನ ನಮ್ಮ ತುಳು ಜನಪದ ಸಂಸ್ಕ್ರಿತಿನ್ ಬಿಬಿಸಾವುಂಡು.ಕಂಡ,ಪಚೆ ಪಜಿರ್ ನಮ್ಮ ಪ್ರಕೃತಿ ಸಂಕೇತ .ಅಂಚನೆ ಪೋನ್ನುಲ .ನಾನಾ ಕಂಬಳ ,ಉಂಡುಳ ನಮ್ಮ ಕೃಷಿಪ್ರಧಾನ ವ್ಯವಸ್ಥೆದ ಆಚರನೆನೆ ದೆರ್ತ್ ತೊಜಪಾವುಂಡು .ನಮ್ಮ ನಮ್ಮ ತುಳು ಸಂಸ್ಕ್ರಿತಿದ ಮಾನಾದಿಗೆದ ಬಗ್ಗೆ ಪಾಡನ ಪೀಟಿಕೆ ಈತ್ ಯಾವು .ದಾಯೆ ಪಂಡ ನಮ ಪಂರೆ ಪಿದಾಡ್ ದಿನಿ ನಮ್ಮ ತುಳು ನಾಡ್ ದ ದೈವ ಸಂಸ್ಕ್ರಿತಿದ ಬಗ್ಗೆ .   ತುಳುನಾಡ್ ದುಪ್ಪುನಾತ್ ದೈವೊಳು ಜಗತ್ದ ವಾ ಭಾಗೊದ್ಲ ಉಪ್ಪಯ .ನಮ ಪ್ರತಿಯೊಂಜೆನ್ಲ ಇಸ್ವಾಸೋದು ನಮ್ಬುನ ,ಕಾಲ್ ಪಾಡ್ ದ್ ,ಪೂ ಪೇರ್ ಪಾಡ್ ದ್ ನಮ್ಬುನಕುಲು.ಅನ್ಚಾದುಪ್ಪುನಗ ನಮ್ಮ ದೈವ ಸಂಸ್ಕೃತಿ ನಮಕ್ ಮಲ್ಲ .ಒವ್ವೆ ಒಂಜಿ ಉದ್ದೇಶ ಇಜ್ಜಂದೆ ವಾ ಶ್ರೀಷ್ಟಿಲ ಆವೆರೆ ಸಾಧ್ಯ ಇಜ್ಜಿ .ನಮ್ಮ ಹಿಂದೂ ಧರ್ಮೋದು ದೇವೆರೆಗ್ ಪ್ರತಿಯಾದ್  ದೈವೊಳು ಬತ್ತ ,ವಿರೋಧ ಆದ್ ಅತ್ತ್.ಉತಾರ್ನೆಗ್ ಪನೋಡು ಪಂಡ್ ದಾಂಡ ವಿಷ್ಣು ನ ಬದಲಾದ್ ವಿಷ್ಣುಮೂರ್ತಿ ದೈವ ಲೆಥ,ವರಾಹನ ಬದಲಾದ್ ಪಂಜುರ್ಲಿ ಮಾಲತ ,ದುರ್ಗದೆವಿನ ಬದಲಾದ್ ಚಾಮುಂಡಿ ಲೇತಾ.ಇಂಚ ನಮ್ಮ ವಿವರ ,ದೈವದ ಪುದರ್ ಸೇರೊಂದು ಪೊಪುಂಡು.ಅಂದ ದೇವೆರಾವದ್,ದೈವೊಲಾವಡ್ ಧರ್ಮರಕ್ಷನೆನೆ ಮಲ್ಪುವ .ಆನ ದೈವದಲೆಕನೆ ಪೊನ್ನ ದೈವೊಲ್ಲಾ ಉಲ್ಲ.ಕೆಲವು ದೈವೊಳು ನಮ್ಮ ತುಳುನಾಡ್ ಡೆ ಪುತ್ತುದು ಸಮಜೋದು ಆಯಿನ ಅನ್ಯಾಯೋನು ಎದುರ್ಸೆರಾವಂದೆ ಮಾಯೋಕದ ಕೈ ಸೇರ್ದ್ ದೈವೊಲಾತ.ಅವೇಕ್ ಎದ್ದೆ ಉತಾರ್ಮೆ ನಮ್ಮ ಕಲ್ಕುಡ ಕಲ್ಲುರ್ತಿ,ಕೊರಗ ತಣಿಯೆ .ಉಂದು ನಿಜವಾದಲ ತುಳುನಾಡ್ ಡೆ ಪುತ್ತುದು ದೈವೊಲಾಯಿನ ಸತ್ಯ ಮೂರ್ತಿಲು .ಕಲ್ಕುಡ ಕಲ್ಲುರ್ಟಿನ ವೇಷ ಭೂಶನಳ ಯಾನ್ ಎಕಾದೆ ಪನ್ಲೇಕ ನಮ್ಮ ಪ್ರಕ್ರಿತಿಗ್ ಸಂಬಂಧ ಪತ್ತ್ದುಪ್ಪುಂದು,ಅಕ್ಲೇನ್ ವ್ರಿತ್ತಿಗ್ ಸಂಬಂಧ ಪತ್ತ್ದುಪ್ಪುಂಡು.ಅಕ್ಲ್ ಕಲ್ಲು ಕುತ್ತಿನಕ್ಲು.ಅಕ್ಲೆನ ಮೊನೆ ವರ್ಣನೆದ ಚುಕ್ಕಿಲ ಆ ಕಲ್ಲ್ಗ್ ಅಚಿ ಪಾಡುನ ಕಿರಮೊನೆ ತೊಜಪಾವುಂಡು .ನಮ್ಮ ದೈವದ ಮೊಗ ಆವಡ್ ಅಣಿ ಆವಡ್ ,ತಾರೆದ ತಿರಿ,ಬಾರೆದಂಟ್,ಇಂಚಿನ ಪ್ರಕ್ರಿತಿಡ್ ತಿಕ್ಕುನ ವಸ್ತುಲೆದ್ ತಯಾರಿ ಮಲ್ಪುವೆರ್ .ಅಂಚನೆ ಕೊಡಿಮರಕ್ ಕಟ್ಟುನ ವಸ್ತುಲ್ಲಾ ನಮ್ಮ ಪ್ರಕೃತಿದ ಸಂಕೇತೊನೆ ತೊಜಪಾವುಂಡು .

                                              ತುಳುತ ನಿಜವಾಯಿನ ಸಬ್ದ ತೆರಿಯೋದಂಡ ನಮ ಪರವೆರನ ,ಪಂಬದೆರ್ನ ಕೈತದೆ ಪೋವೋದು .ದೈವದ ನಿಜವಾಯಿನ ನುದಿತ್ ತುಳು ಎಡ್ ಡೆ  ಪದೊಕುಲು ತಿಕ್ಕುವ .ಬೊಂತೆ ಸಂಸ್ಕ್ರಿತಿಡ್ ಬತ್ಹ್ನ ನಮ್ಮ ದೈವಾರಾಧನೆ ಇತ್ತೇ  ನಮ್ಮ ತುಳುನಾಡ್ ಡ್ ಮಾನಾದಿಗೆ ಪದೆವೊಂದುಂಡು,ಕಾರ್ನಿಕ ತೊಜಾವೊಂದುಂಡು.ಸಿರಿನ ಬಗ್ಗೆ ತೂಕ,  ಅವ್ಲು ಬರ್ಪಿನ ಸೊನ್ನೆ ಕಾಲಿ,ಕುಮಾರೆ ಎಲ್ಯ ಬಾಲೆ ,ಸಿರಿ ಕಂದನಿಯನ ಅನ್ಯಾಯೋನು ತೋಡು ಸಹಿಸಂದೆ ಮಾಯೋಕಾದ್ ತುಳುನಾಡ್ ದ ಯೇತೋ ಪೋನ್ನುಲೆನ ಮಯಿಟ್ ಬರ್ಪಾಲ್ .ಮೂಲು ಸ್ತ್ರೀವಾದಿನಕುಲ್ಲಾ ಚಿಂತನೆ ಮಲ್ಪೋಲಿ .ಅಂದ ಮೂಲು ಸಿರಿ ಮೆಯ್ಟ್ ಬರ್ಪುನ ಪೊಂಜನಕ್ಲೆದ ಕೆನ್ಲೆ .ಅಕ್ಲ್ ದಾದಾನ್ಡಲ ಕುಟುಂಬದ ತೊಂದರೆದುಪ್ಪುವೆರ್ .ಅಂಚಾಂಡ ದೈವೊಳು ಸಮಾಜೋಡಿತ್ತದ್ ಸಮಾಜದ ಬೇನೆ ಬೆಂಗ್ ಮದಪಾವುನ ಬೆಲೆ ಮಲ್ಪುವ ಪಂಡ ನಮ್ಮ ಪರಂಪರೆ ಎತ್ ಮಲ್ಲಂದ್ ತೆರಿವತ್ತೇ ?.ಒವ್ವೆ ದೈವ ಆವಡ್ ಅವು ನಮ್ಮ ಮನಸದ ಭಾವನೆದೊತ್ತಿಗೆ ಉಪ್ಪುವ .ಅವು ಬುದ್ ದು ದೈವೊಳು ಒಳ್ಲ ಉಪ್ಪಯ .ತುಳುಬಸೆದ ಏರ್ತೆ ತೂವೊದಂಡ ದೈವ ನುಡಿ ಕೊರ್ನಗ ಅವೆತ ಯೆದುರುನ್ತುದುಪ್ಪೋದು .ಒವ್ವೆ ಒಂಜಿ ಜೀವಿನ್ ನಾಶ  ಆಪುಂಡು ಪನ್ನಗ ಅವೆನ್ ದೆವೆರೆ ರೂಪೋದು ,ಬೆಮ್ಮೆರೆ ರೂಪೋದು ತೂಯಿನಕುಲು ನಮ್ಮ ದುಮ್ಬುದಾಕುಲು.ಉತಾರ್ನೆಗ್ ನಾಗರ ಉಚು ದೋಸ ಮಲ್ಪುಂದು ಪಂದಾನಗ ಅವೆನ್ ನಗಬೇಮ್ಮೆರಾದ್ ಪೂಜೆ ಮಲ್ತೆರ್ ,ಊರುಗೆ ಸೀಕ್ ಬತ್ತದ ಜನ ಸೈನಾಗ  ಆ ಸೀಕ್ನ್ ಮಾರಿಯಮ್ಮ ಆದ್ ತೂಯೇರ್ ..ಅಂಚನೆ ದೈವೊದೊತ್ತಿಗೆಲ ಉಗ್ರ ಪ್ರಾನಿಲೆನ ಬೇರಿಸಾಯ ಕೊರಿಯೇರ್ .ಉತಾರ್ನೆಗ್ ಪಿಲಿ-ಚಾಮುಂಡಿ,ಪಂಜುರ್ಲಿ ,ವ್ಯಾಗ್ರ ಚಾಮುಂಡಿ ಇಂಚ .ದೈವೊಗು ಜಾತಿ ,ಊರುದ ಒಟ್ಟಿಗೆ ಸೇರೊಂದು ಪುದರ್ಲಾ ದೀಯೇರ್ .ಅಂಚನೆ ಕಲೆ ಕಾರ್ನಿಕದ ವೊವ್ವೆ ದೈವ ಆವಡ್ ಅವು ಪ್ರಕೃತಿದ ಜನಪದ ಚಿಂಥನೆದ ರೂಪೋಲು ಪಂಡ ತಪ್ಪಾವಂದ್ .

                     ಯಜಮಾನ ಸಂಸ್ಕ್ರಿತಿದ ಕಾಲೋಡೆ ಪುಟ್ಟನಿ ಈ ದೈವ ಸಂಸ್ಕೃತಿ .ಒಂಜಿ ವ್ಯವಸ್ಥೆನ್ ನಿಜ ಜೀವನೋದು ಎದುರ್ಸಾಯೇರೆ ಆವಂದೆ ಅವೆನ್ ದೈವದ ,ಶಕ್ತಿದ ರೂಪೋದು ಎದುರ್ಸಾಯೇರೆ ಪ್ರಯತ್ನ ಮಲ್ತೆರ್ ಪಿರಾಕ್ದ ತುಳುವೆರ್ .ದೆವೆರೆ ಸಂಸ್ಕ್ರಿತಿಗ್ ಪ್ರತಿಯಾದ್ ಬತ್ತಿನ ದೈವೀ ಸಂಸ್ಕೃತಿ,ನಿಜ

ಜೀವನೋದು ಪೋದ್ ತದ್ ,ದರ್ಶನೋದು ಪೋದಿಪಾದ್  ದೈವದ ರೂಪೋಡು ಸಮಾಜದ ತಿರ್ತ ಜಾತಿದಕ್ಲು ಮಾನಾದಿಗೆ ಪಡೆಯೆರ್.ಇನ್ಚಾದೆ ಕೆಲವು ದೈವದ ಬಾಸೆದ ಸಬ್ದೊಲೆದ್ ಅವು ಗೊತ್ತಾಪುಂಡು.ನಮ ಪೂರ ಆಹಾರ ತಿನ್ಪ .ಅಂದ ದೈವೊಳು ಪಾರ್ನೆ ಮಲ್ಪುವ ,ಮುಕ್ಕುವ .ಮೂಲೆ ವಾಸ್ತವತೆ ತೆರಿಯು .ದೈವ ಪಾತ್ರಿ ಪೋರಿನ್ ಮುಕಕ್ ಮುಕ್ಕ್ದ್ ದಕ್ಕುವೆ ,ಕೋರಿದ ನಾಲಿ ತುಂಡು ಮಲ್ತ್ದ್ ಜುಮ್ಬುದು ದಕ್ಕ್ವೆ ,ಬೋಂಡ ಒಂತೊಂತೆ ಪರದ ದಕ್ಕುವೆ .ಉಂದೆನ್ ತೂನಗ ಆಯನ ನಿಜ ಜೀವನದ ಬದಪಥ್ದ್ ಆಯಗ್ ಉಂದು ಪೂರ ತಿಕ್ಕ್ದುಪ್ಪುಜಿ .ಅವೆಕಾದ್ ಇನ್ಚ್ಹಾನ್ಡಲ ಹಾಳ್ ಮಲ್ಪುಗಾಂದ್  ಮಲ್ಪುವೆರ್ .ಲೈತ್ ಲೈಥ್ದ್ ಬೊಬ್ಬೆ ಪಾದ್ವೇರ್ ಪಂಡ ಯಜಮಾನ ಸಂಸ್ಕ್ರಿತಿನ್ ದೈವದ ರೂಪೋಡು ಎದುರ್ಸಾವೆರ್ನ್ದ್ ತೆರಿಯುಂಡು .ಇಂಚ ಎದುರಿಸಾನಗ ಕಾರ್ನಿಕ ಪಂಪಿ ತರೆಕರ್ಚಿ ಎದ್ದೆ ಬೆಲೆ ಮಲ್ಪುಂದು .ದಾದನೆ ಆವಡ್ ನಮಕ್ ನಮ್ಮ ತುಳುನದ ದಿವಿ ಸಂಸ್ಕೃತಿ ಮಲ್ಲನೆ ಆದುಂಡು.

               ನಮ್ಮ ಸಂಸ್ಕ್ರಿತಿಡ್ ಪ್ರೇತ ,ಭೂತ ,ದೈವೊಳು ತೊಜಿದ್ ಬರಪ .ಅಂದ ದೈವದೆವೆರ್ನ್ದೆ ಪನ್ನಗ ದೆವೆರೆನಾತೆ ಮರ್ಯಾದಿ ನಮ ದೈವೊಲೆಗ್ಲ ಕೊರ್ಪ .ಎವೆರೆ ಗುಡಿ ಕತ್ತಾಯಿಲೇಕ,ಪೂಜೆ ಮಲ್ತಿಲೇಕ ದೈವೊಗ್ಲ ನಡತೊನ್ಬ.ಭೂತಾರಾಧನೆ ನಮ್ಮ ತುಳುನಾಡ್ ದ ಮಲ್ಲ ಆರಾಧನೆ .ದೆವೆರೆನ ಅನುಯಾಯಿನಕುಲು,ಕ್ಷೆತ್ರಪಾಳಕೆರೆ ಈ ದೈವೊಲು.ಗ್ರಾಮದೇವತೆ ಇತ್ಹ್ಲೆಕನೆ ಗ್ರಾಮ ದೈವೊಲ್ಲಾ ಉಪ್ಪುವ .ದೆವೆರೆರ್ದ್ ಬೊಕ್ಕ ದೆವೆರೆ ಅನುಯಾಯಿಲು,ದೆವೆರೆ ಬಂಟರ್ ಈ ದೈವೊಲು .ದೇವೆರೆಗ್ ವರ್ಸೋಗೊರ ಜಾತ್ರೆ ಇತ್ಹ್ಲೆಕನೆ ದೈವೊಲೆಗ್ಲ ವಲಸರಿ ,ನೇಮ ,ಕೊಳ ,ತಂಬಿಲ ,ಜಾತ್ರೆ ನಡಪುಂಡು.ಕೆಲವು ದೈವೊಲೆಗ್  ಮೇಲ್ದ್ ಆವಾಹನೆ ಆಪುಂಡು ಅವು ಅದೇಗೆ ಸೀಮಿತ ಉಂದೆನ್ ಕೊಲಂದ್ ಪನ್ಪ..ಪ್ರಕ್ರಿತಿಡ್ತಿಕ್ಕುನ ಒಲಿಮದಲ್ ,ತಿರಿ ಕತ್ತೊಂದು ,ಅವೇಕ್ ಸಮನಾಯಿನ ವೇಷ ಭೂಷಣ ಪಾಡೊಂದು ಮೇಲ್ಗ್ ದೈವೊಲೆನ್ ಆವಾಹನೆ ಮಲ್ತೊಂದು ,ನಲ್ತೊಂದು,ಅವೆತನೆ ಒಂಜಿ ಮಾದರಿದ್ ರಾತ್ರೆಡ್ ದ್ ಬೊಲ್ಪು ಮುತ್ತ ನದಪುನವೇ ದೈವದ ಕೊಳ .ಉಂದೊಂಜಿ ನದಾವಲಿದಲೇಕ ನದತೊಂದು ಬರ್ಪುಂಡು ,ವಂಶಪಾರಮ್ಪರ್ಯವಾದ್ ನಡತೊಂದು ಬರ್ಪುಂಡು .

                 ದೈವೊಲು ದೆವೆರೆ ಪ್ರತಿನಿಧಿಲು ಪಂಡ ತಪ್ಪಾವಂದ್ .ದೇವೆರ್ ಒಂಜಿ ಸೂತ್ರ ಅಂದ ದೈವೊಲು ಆ ಸೂತ್ರದಾರಿನ ಪಾತ್ರೋಲುಂದು ಪನೋಲಿ ..ಪ್ರತಿಯೊಂಜಿ ನರಮಾನ್ಯನ ಮೆದುಳುದು ೭೨,೦೦೦ ನರತಂತುಲು ಉಲ್ಲ .ಅಂಚನೆ ನಮ್ಮ ಮನಸ್ದ್,ಶರೀರೋದು ಮಸ್ತ್ ಚಕ್ರೋಲು ಉಲ್ಲ .ಉಂದೆನ್ ಕಾಲಾತೀತ ಚಕ್ಕ್ರೋಳುಂದು ಪನ್ಪ .ಪುನರ್ಜನ್ಮದ ಕಲ್ಪನೆಲ ಮೂಲು ಕೆಲಸ ಮಲ್ಪುಂದು .ಕೆಲವೆರೆಗ್ ನಾನಾ ದುಮ್ಬಾಪುನ ಇಚಾರೋ ಇತ್ತೇನೆ ತೆರಿದುಪ್ಪುಂಡು. ಅಕ್ಲ್ ಆ ಘಟನೆ ನದಪುನಗ ಯಾನ್  ಉಂದೆನ್ ಒಳಾ ತೂತೆಂದ್ ಗೆರೆಪ್ವೆರ್ .ಅಂದ ಆಕಳು ಅವೆನ್ ಯೇತೋ ದುಂಬು ಕನೋತು ತೂದುಪ್ಪುವೆರ್ .ಅಂಚನೆ ದೈವೊಲ್ಲ .ಅವೇಕ್ ದರ್ಶನದ ಘಳಿಗೆ ಕಾಳೋದು ಕಾಲಾತೀತ ಜ್ಞಾನ ಉಂಡಾಪುಂದು .ಆ ಸಮಯೋದು ಅವು ಈ ದುಮ್ಬುದೆನ್ ,ನಾನಾ ನದಪಿನೇನ್ ಪಂಡ ಅವು ಸತ್ಯ ಆಪುಂಡು .ನಿಜವಾಯಿನ ಒಂಜಿ ದೈವ ಪಾತ್ರಿ ಬಾರಿ ಶುದ್ದೊದುಪ್ಪೋದಾಪುಂಡು.ದೈವ ಪಾತ್ರಿ ನಡೆತುಂತುದು ದೈವದ ಮೂರ್ತಿದೆದುರು ,ಪಾಪೆದೆದುರು ,ಮಣಿಮಂಚವುದೆದುರು ಉಂಟುದು ಭಕ್ತಿಡ್ ಪ್ರಾರ್ಥನೆ ಮಲ್ತೊಂದು ,ಎನ್ನ ಮೇಲ್ದ್ ಬಥ್ದ್ ,ಎನ್ನ ಬಾಯಿಡ್ ದ್ ಸತ್ಯದ ಪತೆರೋನೆ ಕೊರ್ಪಾಲಂದ್ ಕೈಮುಗಿದ್ ಎಣ್ಣೆ ,ಆರತಿ ದೆತೊಂದು ಗಗ್ಗರ ಸೇವೆ ಮಲ್ಪುವೆ .ಅವೇಕ್ ಪೂರಕವಾದ್ ಪಾಡ್ ದನ ಸಂಧಿದ ಸೇವೆಲ ನಡಪುಂಡು .ಯೇರ್ನ ಮೇಲೆದ್ಲ  ದೇವೆರ್ ಬರ್ಪುನೇನ್ ವಾ ಧರ್ಮ ಶಸ್ತ್ರೋಲ್ಲ ಪನ್ಪುಜ.ಅಂದ ಭೂತ ದೈವೊಳು ನರಮಾನ್ಯನ ಮೇಲೆಗ್ ಆವಾಹನೆಯಾಪುನೇನ್ ಅಥರ್ವಣ ವೇದ ಪಂಪುಂದು .ದೈವ ದೆವೆರೆ ಪ್ರತಿನಿಧಿ .ಪ್ರತಿಯೊಂಜಿ ಗ್ರಾಮೊಗು ,ಪ್ರತಿಯೊಂಜಿ ಕುತುಮ್ಬೋಗು ಒಂಜೋನ್ಜಿ ದೈವೊಳುಪ್ಪುವ .ದೆವೆರೆನ್ ಎಂಚ ಪ್ರತಿಷ್ಟಾಪನೆ ಮಲ್ಪುವನೋ ಅಂಚನೆ ದೈವ ಪ್ರತಿಷ್ಟಾನಳ ನಡಪುಂಡು.ಭೂತ,ದೈವದ ಸನ್ನಿದಾನೋದು ದೈವ ಪಾತ್ರಿ ನಡೆತುಂತುದುಎನ್ನ ಮಿಥ್ ನಿನ್ನ ಶಕ್ತಿ  ಆವಾಹನೆಯಾದ್ ಎನ್ನ ಬಾಯಿಡ್ ಬರ್ಪಿನ ಪಾತೆರ ನಿನ್ನ ಶಕ್ತಿದ ಸತ್ಯದ ಪಾತೆರ ಆದ್ ಬೆಳಗಾದ್ ಕೊರುಂದು ಪ್ರಾರ್ಥನೆ ಮಲ್ಪುವೆ .ಅಪಗ ಆಯನ ಮನಸಸ್ ಬಿರಿಯೊಂದು,ಅರಲೊಂದು ಬರ್ಪುಂಡು ..ಆಯನ ಮನಸಸ್ ನಡೆತ ಸನ್ನಿದಾನೋದು ಸುತ್ತೊಂದುಪ್ಪುಂದು . ಅನುರೂಪಿ ಮನಸಸ್  ಸೂಕ್ಷ್ಮ ರೂಪ ದೆತೊಂದು .ಆಯನ ಬುದ್ದಿ ಸ್ತಿಮಿತ ತತ್ತ್ದ್  ಜನ ಕೆನುನ ಮಾತ್ರ ಆಯಗ್ ಅರ್ಥ ಆಪುನಿ ..ಆಯನ ಆತ್ಮ ಮಾತ್ರ ಕಾಯೋದುಪ್ಪುನಗ ,ಆಯೇ ಈ ಸನ್ನಿದಾನೋದು ಶೂನ್ಯ ಆದುಪ್ಪುನಗ ಆ ದೈವಶಕ್ತಿ ಒಂಜರ್ಧ ಘಳಿಗೆ ಆಯನ ಮಇಕ್ ಆವಾಹನೆಯಾಪುಂದು .ಆ ಸಮಯೋದು ಆಯಗ್ ಡಾಲಾ ಗೊತ್ತುಪ್ಪುಜಿ .ಆಯೆ ದಾದ ಪಂದಳ ಅವು ನಿಜವಾಯಿನ ದೈವದ ಸತ್ಯದ ಪಾತೆರ ಆದುಪ್ಪುಂಡು.ಅಪಗ ದುಮ್ಬಾಯಿನೇನ್ ಪನ್ದೆಂದ ಅವು ಸತ್ಯ ಆದುಪ್ಪುಂಡು .ನಾನಾ ದುಮ್ಬಾಪುನೇನ್ ಪನ್ದೆಂದ ಅವಳ ಸತ್ಯ ಆಪುಂಡು .ದೈವ ಶಕ್ತಿ ಆವಾಹನೆಯಾಪುನೆಕ್ ದುಮ್ಬಾವಾದ್,ಬೋಕ್ಕಾವಾದ್ ಅವು ಕುಣಿತ ಮಾತ್ರ .ಅವ್ಳು ನಮ್ಮ ದೈವಸಂಸ್ಕ್ರಿತಿದ ಪೊರ್ಲು ತೂವೊಲಿ ಆತೆ .ಭೂತೊಗು ವರ್ಸೋಗೊರ ಕರ್ತೊಂಲೆಕನೆ ತುಂಡು ಭೂತೊಗ್ಲ ಕರಿಪುನ ಕಿರಮೋ ಉಂಡು .ವಿಜ್ಞಾನ ದೈವ,ಭೂತೋನು ಒಪ್ಪಿಜಿನ್ದಲ ವಿಜ್ನಾನೋನು ಮೀರಿನ ಶಕ್ತಿ ಜಗತ್ತುದುಂದು ಪಂಪಿನವು ಸತ್ಯ .ಒಟ್ಟಾರೆ ನಮ್ಮ ಮಲ್ಲ ಸಂಸ್ಕ್ರಿತಿದ್ ಸೇರಿಗೆಯಾದ್ ನಮ್ಮ ದೈವ ಸಂಸ್ಕೃತಿ ,ತುಳುನಾಡ ದೈವ ಸಂಸ್ಕ್ರಿತಿಂದೆ ಪುದರ್ ಪಡೆಯಿನ ನಮ್ಮ ತುಳು ಸಂಸ್ಕ್ರಿತಿನ್ ಒರಿಪೋದಾಯಿನ ,ನಮ್ಮ ದುಮ್ಬುದ ಪೀಲಿಗೆಗ್ ತುಳು ಒರಿಪೋದಾಯಿನ ನಮ್ಮ ಮಾತ ಕರ್ತವ್ಯ ಆದುಂಡು.ನಮ ಮಾತ ತುಳು ಸಂಸ್ಕೃತಿ,ಆಚಾರ ವಿಚಾರ ,ಜನಪದಕಲೆ ,ಒಟ್ಟಾರೆ "ತುಳು ಒರಿಪುಗ ".

ಯುಗಾದಿ ಪೊಸ ವರ್ಸದ ಸುರುತ ತಾದಿ

ಯುಗಾದಿ ಪೊಸ ವರ್ಸದ ಸುರುತ ತಾದಿ

      ಸನಾತನ ಸಂಸ್ಜೃತಿದ ಪೊಸ ವರ್ಸದ ಸುರುತ ದಿನೊನು ಸೌರಮಾನ,ಚಾಂದ್ರಮಾನ ರೀತಿಂದ್ ರಡ್ಡ್ ಒರುಟು ಆಚರಣೆ ಮಲ್ಪುವೆರ್.ಚಾಂದ್ರಮಾನಿಲೆಗ್ ಯುಗಾದಿ ಪೊಸ ವರ್ಸದ ಸುರಾಂಡ ಸೌರಮಾನಿಲೆಗ್ ಬಿಸುರ್ದು ಬೊಕ್ಕ ಪೊಸ ವರ್ಸ.ಇಸೇಸ ಪಂಡ ಚಾಂದ್ರಮಾನ ಯುಗಾದಿ ಕರಿದ್ 15 ದಿನತ ಅಂತರೊಡು ಸೌರಮಾನ ಯುಗಾದಿ ಪಂಡ ಸೌರಮಾನಿಲೆನ ಬಿಸು ಬರ್ಪುಂಡು.   ಯುಗಾದಿ ಆಚರಣೆ ಸೌರಮಾನಿ ತುಳುವೆರೆನ ಆಚರಣೆ ಅತ್ತ್ಂಡಲ ತುಳು ನಾಡ್ ಡ್ ಬದ್ ಕೊಂದಿಪ್ಪಿ ಚಾಂದ್ರಮಾನಿಲು ಯುಗಾದಿನ್ ಪೊಸ ವರ್ಸದ ಉದಿಪಾದ್ ಆಚರಣೆ ಮಲ್ತೊಂದುಲ್ಲೆರ್.ಮಾತ ಪರ್ಬ ಪರ್ವೊಲೆನ್ ಮಾತೆರಪ್ಪ ಒಡ್ಡೊಂದು ಆಚರಣೆ ಮಲ್ಪುನವು ತುಲು ನಾಡ್ ದ ಇಸೇಸ.ಬ್ರಹ್ಮ ದೇವೆರ್ ಸೃಷ್ಠಿನ್ ಸುರು ಮಲ್ತಿನ ದಿನ ಯುಗಾದಿಪನ್ಪಿ ನಂಬೊಳಿಗೆಲ ಉಂಡು..

  

          ಬ್ರಹ್ಮ ಧ್ವಜ.ಯುಗಾದಿದಾನಿ ಬೊಲ್ಪು ಸೂರ್ಯೋದಯೊರ್ದು ದುಂಬು ಏರಾದ್ ಸೂರ್ಯಾಸ್ತ ಆಯಿ ಕೂಡ್ಲೆ ಜಾವೊಡು.ಧ್ವಜದ ಕೊಡಿಕ್ ರೇಷ್ಮೆದ ಕುಂಟು ಕಟ್ಟ್ ದ್ ಕೊಡಿಕ್ ಕಲಶ ಕಂಕನೆ ಪಾಡ್ದ್ ಅವೆತ ತಿರ್ತ್ ಕೊಡಿಕ್ ಕುಕ್ಕು ತಪ್ಪು ಕಟ್ಟ್ ದ್,ಕೊಡಿಕ್ ಕೈಬೇವುದ ಮಾಲೆ ಪಾಡ್ದಿಪ್ಪುವೆರ್.ಕೆಲವೆರ್ ಗೊಂಡೆ ಪೂತ ಮಾಲೆ ಪಾಡ್ಯೆರ್ಡ ಕೆಲವೆರ್ ಶುಭ ಸೂಚಕವಾಯಿನ ಕೆಂಪು ಪೂತ ಮಾಲೆ ಪಾಡ್ವೆರ್.ಬ್ರಹ್ಮ ದೇವೆರ್ ಬೂಮಿನ್ ಸೃಷ್ಟಿ ಮಲ್ತ್ ನ ದಿನ ಯುಗಾದಿಂದ್ ಚಾಂದ್ರಮಾನಿಲು ನಂಬುದು ದೇವೆರೆನ್ ಆರಾದನೆ ಮಲ್ತೊಂದು ಯುಗಾದಿನ್ ಆಚರಣೆ ಮಲ್ತೊಂದುಲ್ಲೆರ್.

  

   ಅಪಗ ಯುಗಾದಿ ಪಂಡ ದಾದ,ಅವೆತ ಅರ್ಥವ್ಯಾಪ್ತಿ ದಾದಂದ್ ತೂಪುಂಡ ಯುಗಾದಿ ಪನ್ಪಿ ಸವ್ದ ಸಂಸ್ಕೃತ ಮೂಲದವು.ಅವ್ಲು ಅವೆತ ಅರ್ಥ ದಾದ ಪಂಡ ಪೊಸ ಯುಗತ ಉದಿಪನೊ ಪಂಡ್ ದ್ ಅರ್ಥ.ಇನಿ ಕನ್ನಡದ ಸವ್ದ ಉಂದು ಪನ್ಪುನಡೆಮುಟ್ಟ ಅವು ಮಾತೆರೆ ಬಾಯಿಪಾತೆರೊಡುಂಡು.ಚೈತ್ರ ಮಾಸದ ಸುರುತ ದಿನ ಯುಗಾದಿ/ಉಗಾದಿ.ಚೈತ್ರ ಮಾಸದ ಋತುಕುಲೆ ರಾಜೆ ವಸಂತ ಋತುತ ಕಾಲ.ಬೂಮ್ಯಪ್ಪೆ ಪಚ್ಚೆ ಪಜಿರ್ ಲೆಡ್,ಪೂ ಪರ್ಂದ್ ಲೆಡ್ ಮೈ ದಿಂಜಿ ಕಾಲ.ವರ್ಸದ ಪೊಸ ಫಲ ಬರ್ಪುನ ಕಾಲ ಯುಗಾದಿ.ಈ ಪೊಸಪು ನರಮಾನ್ಯಡಲ ಪೊಸ ಉರ್ಕುಲ್ಲಾಸ ದಿಂಜವುನ ಕಾಲ ಯುಗಾದಿ  ನಮ್ಮ ದೇಶದ ಹೆಚ್ಚಿನ ಬಾಗೊಲೆಡ್ ಉಂದೇ ವರ್ಸದ ಸುರೂತ ದಿನ ಯುಗಾದಿ.ಯುಗ+ಆದಿ=ಯುಗಾದಿ.ಪೊಸ ಯುಗ ಪಂಡ ಪೊಸ ವರ್ಸ ಸುರೂಂದು ಅರ್ಥ.ಚಾಂದ್ರಮಾನ ಯುಗಾದಿದಾನಿಯೆ ಹಿಂದೂ ಪಂಚಾಂಗದ ಪೊಸ ಸಂವತ್ಸರ ಸುರಾಪುನಿ.ಅನಿ ದೇವೆರೆ ಕೋಣೆಡ್ ದೇವೆರೆದುರು ಪಂಚಾಂಗ ದೀದ್. ಪಂಚಾಂಗೊಗು ಆರತಿ ದೆರ್ಪುವೆರ್.ಅಂಚನೆ ಆಚಾರ್ಯೆರ್ ವರ್ಸದ ಬುಳೆಸೆಲೆ,ಬರ್ಸ ದೊಂಬುದ ಬಗೆಟ್ ಪಂಚಾಂಗ ತೂದು ಪನ್ಪೆರ್.ಆರ್ ಪಂಚಂಗ  ಓದೊಂದು ಇಲ್ಲದಕ್ಲೆನ ವರ್ಸದ ರಾಸಿ ಪಲ ಪನ್ನಗ ಇಲ್ಲದಕುಲು ಅರೆನ ಎದುರು ಕುಲ್ಲುದು ಆರ್ ಪನ್ಪುನೆನ್ ಕೇನುವೆರ್.ಪಂಚಾಂಗೊಲು ಕೇವಲ ದಿನಮಾನೊನು ಮಾತ್ರ ತೆರಿಪಾವುನತ್ತ್,ಅವು ಬರ್ಸ ದೊಂಬು,ಬುಲೆಸೆಲೆ,ರಾಶಿ ಫಲ,ಮದಿಮೆ ಮಸ್ಕಿರಿಗಿಂದ್ ದಿನ ತೂಪುನ ಮೂರ್ತೊಲೆನ್ಲ ತೆರಿಪಾವುಂಡು.ಒಟ್ಟಾರೆ ಪನ್ಪುಂಡ ಪಂಚಾಗೊಲು ಬದ್ ಕ್ ದ ಒಂಜಿ ಬಾಗವಾದುಂಡು.

      

  ಸೂರ್ಯ ಚಂದ್ರೆರೆ ಸುತ್ತುನ ಒರುಟು 11ಡ್ದ್ 13ಪುಣ್ಣಮೆ ಅಮಾಸೆಗೊರ ಚಾಂದ್ರಮಾನ ಯುಗಾದಿ ಬರ್ಪುಂಡು.ಬೂಮಿರ್ದ್ ಉಂತುದು ಮಿತ್ತನ್ನಾನಗ ಸೂರ್ಯೆ,ದಾರಗೆಲು ಮೆಲ ಮೆಲಾನೆ ಪೋಯಿಲೆಕ ತೋಜುಂಡು.ವೇದಾಂಗ ಜ್ಯೋತಿಷ್ಯದ ಪ್ರಕಾರ ಸುರುತ ದಾರಗೆ ಅಶ್ವಿನಿ ನಚ್ಚತ್ರ-ಏಷ ರಾಶಿದ 0-13:20ಬಾಗ/ಡಿಗ್ರಿಡ್ ಸೂರಿಯ ನಾರಾಯಿಣ ದೇಬೆರುಪ್ಪುನಗ ಬೂಮಿದ ಬಡಕಾಯರ್ದ /ಉತ್ತರಾರದ ಗೋಲೊಡು ದೈ ಮರೊಕ್ಲೆಡ್ ಪೊಸ ತೆಗ್ ಲೆ ತೋಜೆರೆ ಸುರಾಪುಂಡು.ಅಶ್ವಿನಿ ನಚ್ಚತ್ರೊಗು ಉದಿಪು ದೇವೆರ್ ಪೊಗ್ಗುನ ಕಾಲೊನುಸೌರಮಾನ ಯುಗಾದಿ ಪನ್ಪೆರ್.ತುಲುವೆರ್ ಅವೆನ್ ಬಿಸು ಆದ್ ಆಚರಣೆ ಮಲ್ಪುವೆರ್.ಉಂದು ಎಪ್ರಿಲ್ 14-15ತಾರೀಕ್ ಗ್ ಬರ್ಪುಂಡು.ಆಂಡ ಚಂದ್ರೆ ಬೀಸ ಬೂಮಿಗ್ ಸುತ್ತು/ಪ್ರದಕ್ಷಿಣೆ ಬರ್ಪುನೆಡ್ದಾದ್ ಒಂಜೊಂಜಿ ಪ್ರದಕ್ಷಿಣೆ ಒಂಜೊಂಜಿ ತಿಂಗೊಲಾದ್ 12ತಿಂಗೊಲುಗು ಒಂಜಿ ಸಂವತ್ಸರ ಆದ್ ಚಾಂದ್ರಮಾನ ಯುಗಾದಿ ಬರ್ಪುಂಡು.

 

ಯುಗಾದಿದಾನಿ ಸೂರ್ಯ ದೇವೆರೆಗ್ ನಮಸ್ಕಾರ ಮಲ್ಪುನವು ಇಸೇಸ.ಆಂಡ ತೊಲಚಿಗ್ ನೀರ್ ಮೈಪುನಕುಲು ಸೂರ್ಯದೇವೆರೆಗ್ ನಿಚ್ಚ ನಮಸ್ಕಾರ ಮಲ್ಪುವೆರ್.ಅಂಚನೆ ಯುಗಾದಿದಾನಿ ವರ್ಸದ ಎಡ್ಡೆಪ್ಪುಗಾದ್ ಪಂಚಾಂಗ ಓದಾವುನ ಕೆರಮಲ ನಡಪುಂಡು.ಯುಗಾದಿ ಬ್ಪುನ ಒಂಜಿ ವಾರ ದುಂಬೇ ಇಲ್ಲದುಲಯಿ,ಇಲ್ಲ ಪಿದಯಿ ಪೂರ ಸೊಚ್ಚೊ ಮಲ್ಪೆರ ಸುರು ಮಲ್ಪುವೆರ್. ಇಲ್ಲಿಲ್ಲಲ್  ಬೊಡೆದ್ಯಲ್ಲು ಕಂಡನಿಯನ ತರೆಕ್ ಮೈಕ್ ಎಣ್ಣೆ ಪೂಜುನ ಕೆರಮಲ ಯುಗಾದಿದಾನಿ ಬೊಲ್ಪುಗು ಕೆಲವು ಕೋಡಿಡ್ ತೂಯೆರೆ ತಿಕ್ಕುಂಡು.ಮೀನಗ ಹೆಚ್ಚಾದ್ ಸಾಬನದ ಬದ್ಲ್ ಸೀಗೆ ಕಾಯಿದ ಪೊಡಿ ತರೆಕ್ ಮೈಕ್ ಪೂಜಿದ್ ಮೀಪೆರ್. ದೇವೆರೆದುರು ಪೊಸತಾದ್ ಬತ್ತಿನ ಪಲ ಸೊತ್ತುಲೆನ್ ದೀದ್ ,ಹಿರಿಯಾಕ್ಲೆನ ಕಾರ್ ಪತ್ತುನ ಕೆರಮ ನಡಪುಂಡು.ಕೆಲವಿಲ್ಲಲ್ ಕಲಶೊಡು ದೇವೆರೆಗ್ ದೀನ ನೀರ್ ನ್ ಇಲ್ಲದ ಸುತ್ತಲ ಕುಕ್ಕು ತಪ್ಪುಡು ತಲಿಪುವೆರ್.ಕೆಲವಿಲ್ಲಲ್ ಕಾರ್ ಪತ್ತಿ ಜೋಕ್ಲೆಗ್ ಹಿರಿಯಾಕುಲು ಉಡಿಗಿರೆ ಕೊರ್ಪುನ ಕೆರಮಲಾ ಉಂಡು.ಅಂಚನೆ ಯುಗಾದಿದಾನಿ ಚಾಂದ್ರ ಮಾನಿಲು ಪೊಸ ತುತ್ತೈತ ಪಾಡ್ ದ್ ಬಾರೀ ಕೊಸಿಟ್ ದೇಲ್ಯೊಲೆಗ್ ಪೋದು ಪೂಜೆ ಪುನಸ್ಕಾರ ಪೂರ ಮಲ್ಪವೆರ್.

         ಉಗಾದಿದಾನಿ ಕಾಂಡೆ ಇಲ್ಲಲ್ ಮಾತೆರ್ಲ ಬೇಗ ಲಕ್ಕ್ ದ್ ಎಣ್ಣೆ ಪೂಜಿದ್ ಮೀದ್ ಇಲ್ಲದೆದುರ್ದ ಬಾಕಿಲ ದಾರಂದೊಗು ಕೈಬೇವು,ಕುಕ್ಕುತಪ್ಪುದ ಚೋರ್ನ ಕಟ್ಟುವೆರ್.ಪೊಂಜನಕುಲು ಇಲ್ಲದೆದುರು ರಂಗೋಲಿ ಬುಡ್ಪಾವೆರ್.ದೇವೆರೆ ಕೋಣೆನ್ ಪುರ್ಪೊಡು ಅಲಂಕಾರ ಮಲ್ತ್ ದ್ ಪಂರ್ದ್,ಪಲವಸ್ತುಲೆನ್ ದೀದ್,ಕೈಬೇವು-ಬೆಲ್ಲ ಬಿರಾಯಿ ಪುರ್ಸಾದ ದೀದ್ ,ಪಾಯ್ಸ,ಸೀಪೆ ತೆನಸ್ ಲೆನ್ ದೀಪೆರ್.ಕೈಬೇವುದಿರೆ,ಪೂಕುಲೆನ್ ಪೊಡಿ ಮಲ್ತ್ ದ್ ಬೆಲ್ಲ ಬಿರಾದ್ ಮಾತೆರೆಗ್ ತಿನೆರೆಗ್ ಕೊರ್ದು ಮಾತೆರಪ್ಪ ಒಟ್ಟುಗು ಕುಲ್ಲುದು ಬಂಜಿ ಬಂಜಾರ ಒವಸ್ ಮಲ್ಪುವೆರ್.ಅಂಚನೆ ಕುಲ ಪುರೋಯಿತೆರೆನ್ ಲೆತ್ತ್ ದ್ ಕರಿದ್ ಪೋಯಿನ ಹಿರಿಯಾಕ್ಲೆಗ್ ಕೊಡಿ ಇರೆಟ್ ಬಲಸುನ ಕೆರಮಲ ಕೆಲವು ತಿಕ್ ಡ್ ನಡಪುಂಡು.ಪೊಸ ಸಂವತ್ಸರೊನು ಎದ್ ಕೊನ್ನಗ ಕರಿದ್ ಪೋಯಿ ಹಿರಿಯ ಪೆರಿಯಾಕ್ಲೆನ ಆಶೀರ್ವಾದಲ ತನ್ಕುಲೆ ಎಡ್ಡೆ ಬುಳೆಚಿಲ್ ಗಾದ್ ಬೋಡುಂದು ಇಂಚ ಹಿರಿಯಾಕ್ಲೆಗ್ ಯುಗಾದಿದಾನಿ ಬಲಸುವೆರ್.

      

         ಪೊಸತಾದ್ ಮದ್ಮೆ ಆಯಿನ ಪೊಣ್ಣು ಮಗಳ್ ಯುಗಾದಿದಾನಿ ಕಂಡನಿಯನೊಟ್ಟುಗು ಅಪ್ಪೆ ಇಲ್ಲಗ್ ಪೋಪುನ ಕೆರಮ ಕೆಲವು ಕೋಡಿಡುಂಡು.ಅವ್ಲು ಪೊಣ್ಣನ ಅಪ್ಪೆ ಅಮ್ಮೆ ಕಂಡನಿ ಬುಡೆದಿನ್ ಮಣೆಟ್ ಒಟ್ಟುಗು ಕುಲ್ಲಾದ್ ಅಕ್ಲೆಗ್ ಆರತಿ ದೆರ್ತ್ ದ್ ದೇಸೆ ಪಾಡ್ದ್ ತುತ್ತೈತದ,ಪದ್ದೆಯಿದ ಉಡಿಗಿರೆ ಕೊರ್ಪುನೊಟ್ಟುಗು ಅಕ್ಲೆಗ್ ಇಲ್ಲಗ್ ಬೋಡಾಯಿ ಸೊತ್ತುಲೆನ್ ಕೊರ್ಪುನ ಕೆರಮಲ ಉಂಡು.

    ಯುಗಾದಿದಾನಿ ಕೈಬೇವು ಬೊಕ್ಕ ಬೆಲ್ಲೊಗು ಬಾರೀ ಮಹತ್ವ ಉಂಡು.ಮೂಲು ಬದ್ ಕ್ ಡ್ ಬರ್ಪುನ ಕಷ್ಟ ಸುಕೊಕ್ಲೆನ್ ಒಂಜೇ ರೀತಿ ತೂದು ಅವೆಕ್ ಸರಿಯಾದ್ ಬದ್ ಕ್ ನ್ ಕಟ್ಟೊನೊಡು ಪನ್ಪಿ ಪೊರ್ಲ ಸಂದೇಶೊನು ಹಿರಿಯಾಕ್ಲ್ ಚೀಪೆ ಕೈಪೆನ್ ತಿನ್ಪುನ ಮೂಲಕ ಎದ್ಕೊನೊಡುಂದು ತೆರಿಪಾದೆರ್.ಕೈಪೆ ಇತ್ತ್ಂಡ ಮಾತ್ರ ಸೀಪೆದ ಬಿಲೆ ಗೊತ್ತಾವು.ಕಷ್ಟ ಬತ್ತ್ಂಡ ಮಾತ್ರ ಸುಖತ ಬಿಲೆ ಗೊತ್ತಾವು ಪನ್ಪಿ ಪೊರ್ಲ ಸಂದೇಶ ಈ ಯುಗಾದಿದ ಆಚರಣೆಡುಂಡು.

  

  ಸೌರಮನ ಯುಗಾದಿ ಪಂಡ ಬಿಸುತಾನಿ ನಮ ಬಿಸು ಕಣಿ ತೂಪುನ ಕೆರಮ ಉಂಡುಮೂಲು ಕೊಡಿ ಬಾರೆದಿರೆಟ್ ನಮ್ಮ ಬಿತ್ತ್ ಲ್ ಡ್ ಬುಳೆಯಿ ನಟ್ಟಿ ಕಾಯಿ,ಅರಿ,ತಾರಾಯಿ,ಕುರಲ್,ಪೂ ಪರ್ಂದ್,ಕನ್ನಡಿ ದೀದುಪ್ಪುವೆರ್..ಬಿಸು ಕಣಿ ತೂದು,ಕನ್ನಡಿಡ್ ಮೋನೆ ತೂದು ಹಿರಿಯ ಪೆರಿಯಾಕ್ಲೆ ಕಾರ್ ಪತ್ತ್ ದ್ ಅಕುಲು ಕೊರ್ನ ಉಡಿಗಿರೆನ್ ಕಿರಿಯಾಕುಲು ದೆತೊಂದು ಆಚರಣೆ ಮಲ್ಪುನ ತುಲುವೆರೆ ಆಚರಣೆ ಬಿಸು.ಆಂಡ ಚಾಂದ್ರಮಾನಿಲು ದೇವೆರೆ ಕೋಣೆಡ್ ದೇವೆರೆದುರು ಅರಿವಾಣ ದೀದ್ ಪೂ ಪಂರ್ದ್,ಫಲ ವಸ್ತುಲು,ನಟ್ಟಿ ಕಾಯಿಲು,ಕನ್ನಡಿನ್ ದುಂಬುನಾನಿ ರಾತ್ರೆ ದೀದುಪ್ಪುವೆರ್.ಅಂಚನೆ ದೀನ ಸೊತ್ತುಲು,ದೇವೆರೆ ಪಟನಾ,ಮೂರ್ತಿಯಾ ತೋಜುಲೆಕ ಕನ್ನಡಿನ್ ದೀದುಪ್ಪುವೆರ್. ಬೊಲ್ಪುಗು ಮಾತೆರ್ಲ ಬೇಗ ಲಕ್ಕ್ ದ್  ದೇವೆರಗ್ ತುಡರ್ ದೀದ್ ,ದೀನ ಕನ್ನಡಿಡ್ ದೀನ ಸೊತ್ತುಲೆನ್,  ದೇವೆರೆ ಪಟನಾ,ಮೂರ್ತಿನಾ ತೂದು ತುಡರ್ ಪೊತ್ತವೆರ್. ಬೊಕ್ಕ ಆನಿದ ಎಡ್ಡೆ ಕೆಲಸೊಲೆನ್ ಪೂರ ಮಲ್ಪುನ ದಿನ ಚಾಂದ್ರಮಾನ ಯುಗಾದಿ.

  

                          ಬ್ರಹ್ಮ ದ್ವಜ

          ಬ್ರಹ್ಮ ಧ್ವಜ.ಯುಗಾದಿದಾನಿ ಬೊಲ್ಪು ಸೂರ್ಯೋದಯೊರ್ದು ದುಂಬು ಏರಾದ್ ಸೂರ್ಯಾಸ್ತ ಆಯಿ ಕೂಡ್ಲೆ ಜಾವೊಡು.ಧ್ವಜದ ಕೊಡಿಕ್ ರೇಷ್ಮೆದ ಕುಂಟು ಕಟ್ಟ್ ದ್ ಕೊಡಿಕ್ ಕಲಶ ಕಂಕನೆ ಪಾಡ್ದ್ ಅವೆತ ತಿರ್ತ್ ಕೊಡಿಕ್ ಕುಕ್ಕು ತಪ್ಪು ಕಟ್ಟ್ ದ್,ಕೊಡಿಕ್ ಕೈಬೇವುದ ಮಾಲೆ ಪಾಡ್ದಿಪ್ಪುವೆರ್.ಕೆಲವೆರ್ ಗೊಂಡೆ ಪೂತ ಮಾಲೆ ಪಾಡ್ಯೆರ್ಡ ಕೆಲವೆರ್ ಶುಭ ಸೂಚಕವಾಯಿನ ಕೆಂಪು ಪೂತ ಮಾಲೆ ಪಾಡ್ವೆರ್.ಬ್ರಹ್ಮ ದೇವೆರ್ ಬೂಮಿನ್ ಸೃಷ್ಟಿ ಮಲ್ತ್ ನ ದಿನ ಯುಗಾದಿಂದ್ ಚಾಂದ್ರಮಾನಿಲು ನಂಬುದು ದೇವೆರೆನ್ ಆರಾದನೆ ಮಲ್ತೊಂದು ಯುಗಾದಿನ್ ಆಚರಣೆ ಮಲ್ತೊಂದುಲ್ಲೆರ್.ಕರ್ನಾಟಕ ಆಂದ್ರೊಡು ಯುಗಾದಿ ಪಂಡೆರ್ಡ ಮಹಾರಾಷ್ಟ್ರೊಡು ಗುಡಿಪಾಡ್ ಪಾಡ್ಯೆಮಿ ಪನ್ಪೆರ್.ಅಂಚನೆ ಮದ್ಯ ಪ್ರದೇಶ, ದಾದ್ರಾ,ನಗರ ಹವೇಇ,ದಿಯು ದಮನ್ ಡ್ ಲ ಯುಗಾದಿ ಆಚರಣೆ ಮಲ್ಪುವೆರ್.ಯುಗಾದಿದಾನಿ ಒವ್ವಾಂಡಲ ಬೇರನಾ,ಅಂಗಡಿ ಇಂಚ ಒವ್ವಾಂಡಲ ಪೊಸ ವ್ಯವಹಾರ ಸುರು ಮಲ್ತ್ಂಡ ಬಾರೀ ಎಡ್ಡೆಗೆ.

ಯುಗಾದಿದಾನಿದ ಒಂಜಿ ಶ್ಲೋಕ ಇಡೀ ವರ್ಸದ ಎಡ್ಡೆಪ್ಪುನು ನಮಕ್ ತೆರಿಪಾವುಂಡು.

"ಶತಾಯುಃ ವಜ್ರ ದೇಹಾಯ ಸರ್ವ ಸಂಪತ್ಕರಾಯಚ

ಸರ್ವಾರಿಷ್ಟ ವಿನಾಶಾಯ ನಿಂಬ ಕಂದಳ ಭಕ್ಷಣಂ" 

ಪಂಡ ನೂದು ವರ್ಸದಾತ್ ಅವುಸ,ಕಲ್ಲ್ ದಂಚ ಗಟ್ಟಿದ ಆರೋಗ್ಯದ ಸರ್ರೊ,ಸರ್ವ ಸಂಪೊತ್ತು ಪೊಲಿ ಪೊಲ್ಸು ಒದಗ್ ದ್ ಬರ್ರೆ,ಬರ್ಪುನ ಮಾತ ಅಡ್ಡ ವಿಡ್ಡೂರ ದೋಸೊಲು ದೂರಾಯೆರೆ ಕೈಬೇವು ಬೆಲ್ಲ ತಿನೊಂದುಲ್ಲೆ. ಪನ್ಪುನವು ಈ ಸಾಲ್ಲೆನ ಅರ್ಥ.