ಪೈಚಿಲ್ ನೇಮ-ಪುದ್ದರ್ ಮೆಚ್ಚಿ-ಧರ್ಮ ನೇಮ

               ಪೈಚಿಲ್ ನೇಮ-ಪುದ್ದರ್ ಮೆಚ್ಚಿ-ಧರ್ಮ ನೇಮ

  ತುಳುನಾಡ ದೈವಾರಾದನೆಡ್ ಅಪ್ರೂಪದ ಒಂಜಿ‌ ಆರಾದನೆ.ಧರ್ಮ ನೇಮ , ಕಾಲದಿ/ವರ್ಸಾದಿ ನೇಮ,ಪೂಕರೆ ಕಂಬುಲ ನೇಮ,ಮೆಚ್ಚಿ,ಮೈಮೆ,ಕೋಲ,ಸೇವೆ ಇಂಚ ಬೇತೆ ಬೇತೆ ಪುದರ್ ಡ್ ದೈವಾರಾದನೆ ನಡತ್ಂಡ  ಕೊಟ್ಯದಾಯನ,ಸಾನದಾಯನ,ದೊಂಪದ ಬಲಿ,ಕೆರೆ ನೇಮ,ಪುದ್ದರ್ ಮೆಚ್ಚಿ  ಇಂಚಿಪ್ಪಿ ನೇಮ ನೆರಿ ನಡಪುವ.ಉಲ್ಲಾ ಲ್ದಿಗ್ ಎಚ್ಚಾದ್ ಮೆಚ್ಚಿ,ಪುದ್ದಾರ್ ಮೆಚ್ಚಿ  ನಡಪುಂಡು.ದೈವಾರಾದನೆಡ್ ತೋಜಿದ್ ಬರ್ಪುನ ನನೊಂಜಿ ರೀತಿದ ನೇಮ ಅವ್ವೆ ಪೈಚಿಲ್ ನೇಮ.ಪುದ್ದಾರ್ ಮೆಚ್ಚಿಗ್ಲ ಪೈಚಿಲ್ ನೇಮೊಗ್ಲ ಒಂತೆ ಓಲ್ಪಡಿ ಇತ್ತ್ಂಡಲ ಪುದ್ದರ್ ಮೆಚ್ಚಿ ನೇಮನೇ ಬೇತೆ,ಪೈಚಿಲ್ ನೆಮನೇ ಬೇತೆ.ಬುಳೆ ಪಾಯೊಗು ಬತ್ತ್ ದ್ ಕೊಯ್ಯೆರಾಯಿನ ಪೊರ್ತುಡು ನಡಪುನ ನೇಮ ಪೈಚಿಲ್ ನೇಮ.ಮಲರಾಯಗ್ ಪೈಚಿಲ್ ನೇಮ ನಡಪುಂಡು.ಕೆಯ್ ಕೊಯ್ದ್ ಇಲ್ಲಡ್ ಪೊಸರಿ ಆನಗ ದೈವೊಲೆಗ್, ನಮ ಎಂಚ ಪೊಸರಿತ ಪುದ್ದರ್ ಉನ್ಪನ  ಅವ್ವೇ ರೀತಿಡ್ ದೈವೊಲೆನ ಬಲಿಕ್ ಪೊಸರಿತ ನುಪ್ಪು ಪಾಡ್ದ್ ಪುದ್ದರ್ ಮೆಚ್ಚಿ  ನೇಮ ಕೊರ್ಪ

      ಪೈಚಿಲ್ ನೇಮ ಸುಮಾರ್ ಪದ್ರಾಡ್ ವರ್ಸೊಗೊರ ನಡಪುಂಡು.ಕಣಂದೂರು ಕೂಟಾಜೆಡ್ ಕಾಲಾದಿ ನೇಮ ಉಲ್ಲಾಲ್ದಿಗ್ ನಡಪುನಗ ದೈವದ ರಡ್ಡ್ ಕೈಟ್  ರಡ್ಡ್ ಸೂಟೆ ಕೊರ್ಪೆರ್.ಸೂಟೆ ಪೊತ್ತ್ ದ್ ಒರಿನ ಕಡೆನ್ ಪದ್ರಾಡ್ ವರ್ಸ ಸಾನೊಡಾ ಭಂಡಾರದ ಇಲ್ಲಲಾ ದೆತ್ತ್ ದ್ ದೀದ್ ಪದ್ರಾಡ್ ವರ್ಸೊಗು ಉಲ್ಲಾಲ್ದಿನ ಪೈಚಿಲ್ ನೇಮ ನಡಪುಂಡು.ಪದ್ರಾಡನೆ ವರ್ಸೊಡು ಸುಗ್ಗಿದ ಬುಳೆತಪಗ ಪಂಡ ಮಾರ್ಚಿ-ಎಪ್ರಿಲ್ ತಿಂಗೊಲುಡು ಪೈಚಿಲ್ ನೇಮ ನಡಪುಂಡು.

ಇತ್ತೆ ವರ್ಸಲ ಕೆಲವೊಂಜಿ ರಾಜಂದೈವೊಲೆಗ್ ವರ್ಸೊಗೊರ ಪೈಚಿಲ್ ನೇಮ ನಡಪುಂಡು.ಮುದುಂಗಾರ್ ಕಟ್ಟೆದ ದುಗ್ಗಲಾಪು,ಕಣಂದೂರು ಕೂಟಾಜೆಡ್ ಉಲ್ಲಾಲ್ದಿಗ್ ಪೈಚಿಲ್ ನೇಮ ಇತ್ತ್ಂಡ ದುಗ್ಗಲಾಪುಡು ಪದ್ರಾಡ್ ವರ್ಸೊಗೊರ ಉಲ್ಲಾಲ್ದಿಗ್ ಪೈಚಿಲ್ ಧರ್ಮ ನೇಮ ಕೊರ್ಪೆರ್.ಪದ್ರಾಡ್ ವರ್ಸ ದೆತ್ತ್ ದೀನ ಪೊತ್ತ್ ದ್ ಒರಿನ ಮಡಲ್ದ ಇರ್ವತ್ತ ನಾಲ್ ಸೂಟೆಡ್ ಉಲ್ಲಾಲ್ದಿಗ್ ದರ್ಮ ನೆಮ ಕೊರ್ದು ಮೋನೆಗ್ ಮುಗ ದೀದ್ ಬಲಿ ಬರ್ಪಾವುನೆನ್ ಪೈಚಿಲ್ ನೇಮ ಪನ್ಪೆರ್.ಬೆನ್ನಿ ಸಾಗೊಳಿಗ್ಲ ದೈವೊಲೆಗ್ಲಾ ಮುಟ್ಟ ಸಮ್ಮಂದ ಉಂಡು ಪನ್ಪುನೆಕ್ ಪೂಕರೆದಪಗ ಕಂಡದ ಕರೆಕ್ ಬರ್ಪುನ ದೈವೊಲೆನ್ ತೂನಗ,ದೈವೊಲ್ನ ಪುದ್ದರ್ ಮೆಚ್ಚಿ,ಮದು ಪುದ್ದರ್ ತೂನಗ ಅರ್ಥ ಮಲ್ತೊನೊಲಿ .ಒರಿನಂಚ ಸುಗ್ಗಿದ ಪೊರ್ತುಡು ತುಳುನಾಡ ದೈವೊಲೆಗ್ ಪೈಚಿಲ್ ನೇಮ ಕೊರ್ಪೆರ್.

ಪೈಚಿಲ್-ಪಯಿಚ್ಚಿಲ್-ಪಯಚ್ಚೆಲ್-ಪಯಕೆಲ್;ಬಾರ್ ಕುರಲ್ ಕಟ್ಟುನ ಕಾಲ ಪಂಡ ಕಂಡ ಕೊಯ್ಯೆರಾಪುನ ಪೊರ್ತು ನಡಪುನ ನೇಮ ಪೈಚಿಲ್ ನೇಮ.ಬಾರೀ ಪಿರಾಕ್ ಡ್ 60 ವರ್ಸೊಗೊರ ಧರ್ಮ ನೇಮ ನಡತೊಂದಿತ್ತ್ ದ್ ಕಾಲ ಕರಿಲೆಕ ಅವೆತ ಅವಧಿ 12 ವರ್ಸೊಗೊರ ಧರ್ಮ ನೇಮಂದ್ ಬತ್ತ್ಂಡ್.ದುಂಬು ವರ್ಸೊಗೊರಾಂಡಲಾ ಒಂಜಿ ಧರ್ಮ ನೇಮಲಾ ತಿಕ್ಕೊಂದಿಜ್ಜಾಂಡ್.ಇತ್ತೆ ವರ್ಸೊಡು 25 ದೈವೊಲೆದಾಂಡಲಾ ಧರ್ಮ ನೇಮ ತೂಯೆರೆ ತಿಕ್ಕೊಂದುಂಡು.ಕೆಲವೆರ್ ಗಡಿಯಾನಗ ಧರ್ಮ ನೇಮ ಕೊರ್ದು ಗಡಿಯಾಪೆರ್.ನನ ಕೆಲವೊರ ದೈವನೇ ಕೆಲವೆರೆಡ ಒಂಜಿ ಕೊಂಡೆ ಪೇರ್ ಕೊರುವರಾ ಕೇನ್ನಗ ದೈವ ದಾದ ಕೇನೊಂದುಂಡುಂದು ತೆರಿಯಂದೆ ಕೊರ್ಕ ಪನ್ಪೆರ್.ದೈವ ಧರ್ಮ ನೇಮ ಕೇನೊಂದುಂಡುಂದು ಅಕ್ಲೆಗ್ ಬೊಕ್ಕನೇ ಗೊತ್ತಾಪುನಿ.ಪಂಡಿ ಬೊಕ್ಕ ಧರ್ಮ ನೆಮ ಕೊರಂದೆ ನಿಮುರ್ತಿ ಇಜ್ಜಿ.

ಮಾತಾ ನೇಮೊಡು ನರಮಾನ್ಯನ ಕೊದಿ ಪೋಪುಜಿ.ಆಂಡ ಧರ್ಮ ನೇಮೊಡು ನುಪ್ಪು ದಾನ ಮಲ್ತ್ಂಡ ಒನಸ್ ಮಲ್ಪುನಾಯೆ ಬಲಸುನಾಯೆ ಬಲಸ್ ನಗ ಬಡವು ಮಾಜಿದ್ ಯಾವುಂದು ಪನ್ಪೆ.ನೇಮ ನೆರಿಟ್ ನುಪ್ಪು ದಾನ ದುಂಬು ಇಜ್ಜಾಂಡ್.ಊರಿಡೀ ಇಲ್ಲಲ್ ಲೆಗ್ ಬಿನ್ನೆರ್ ಬರೊಂತ್ ನೆಡ್ದಾದ್ ಅಕ್ಲೆಗ್ ಇಲ್ಲಿಲ್ಲಲೆ ಒಣಸ್ ತಿಕ್ಕೊಂತ್ಂಡ್.ಧರ್ಮ ನೇಮೊಡು ಊರುಗು ನುಪ್ಪು ಪಾಡೊಂತೆರ್.ಉಂದೆನ್ ಸಮರ್ದನೆ ಪನೊಂತೆರ್.ಧರ್ಮ ನೇಮೊಡು ವಾ ದಾನ ಮಲ್ತ್ ಜಿಂಡಲ ನುಪ್ಪು ದಾನ ಮಲ್ಪೊಡೆ.ಬೋಡಾಯ್ನಾತ್ ಇತ್ತ್ ನಾಯೆ ದೈವೊಗು ದರಮ ನೇಮ ಕೊರ್ದು ಗಡಿ ಪತ್ತೊಂತೆ.ಗಡಿ ಪತ್ತಿ ಬೊಕ್ಕ ಚಾಕಿರಿದಕ್ಲೆಗ್ ಗಡಿ ಪತ್ತ್ ನಾಯನ ಇಲ್ಲಲ್ ಪಲಾರ ಕೊರೊಂತೆಡ ಮದ್ದೆನ ಆಂಡ ಚಾಕಿರಿ ಮಾನಿಲೆಗ್ ನುಪ್ಪು ಪಾಡೊಂತೆ.ಇನಿ ಗಡಿ ಪತ್ತ್ ನಾಯೆ ಲಚ್ಚ ಲಚ್ಚ ಕರ್ಚಿ ಮಲ್ತ್ ದ್ ಮಲ್ಲ ಮಲ್ಲ ಹಾಲ್ ಲೆಡ್ ಕಜ್ಜಕೊಟ್ಯ ಮಲ್ತ್ ದ್ ಊರಿಡೀ ಕೋರಿ ಮೀನ್ದ ಒಣಸ್ ಪಾಡೊಂದುಲ್ಲೆ.ಪಾಪದಾಯೆ ಗಡಿ ಪತ್ತೆರೆ ಪೋಡ್ಯುಲೆಕಾಂಡ್,ದುಂಪಿರ ತೂಪುಲೆಕಾಂಡ್.ದೈವದ ಕಲೊಕು ಪೊಸತೊಂಜಿ ಕಟ್ಟ್ ಕನತ್ ಲೆಕಾಂಡ್.ಧರ್ಮ ನೇಮೊಡು ದೈವ ಧರ್ಮ ಸಾಂಗ್ಯೆರಾ ಪಂಡ್ ದ್ ಕೇನುಂಡು.

ರಾಜಂದೈವೊಲೆಗ್ ಧರ್ಮ ನೇಮ ಪದ್ರಾಡ್ ವರ್ಸೊಗೊರ ನಡತ್ಂಡ ಅರಸು ದೈವೊಲೆಗ್ ದರ್ಮ ನೇಮ ಕೊರ್ಪುನ ಕಟ್ಟಿಜ್ಜಿ.ಅಂಚನೆ ಧರ್ಮ ನೇಮ ಅರಸು ದೈವೊಲೆಗ್ ಕೊರ್ರೆ ಪೋಯಿನಕುಲು ಅಳಿಯಂತ್ರ ಅತೆರ್ ಗೆ.ಧರ್ಮ ದೈವೊಲೆಗ್ ಕಾಲಾದಿದ ನಡಾವಳಿ ಇತ್ತ್ಂಡ ಪದ್ರಾಡ್ ವರ್ಸೊಗೊರ ಮಹಾ ನಡಾವಳಿ ನಡತೊಂತ್ಂಡ್.ಉದಾರ್ಮೆಗ್ ದರ್ಮ ತಲತ ಅಣ್ಣಪ್ಪ ಸ್ವಾಮಿಗ್ ಪದ್ರಾಡ್ ವರ್ಸೊಗೊರ  ನಡಪುನ ಮಹಾ ನಡಾವಳಿ.ಆಂಡ ದುಂಬುದ ಕಾಲೊಡು ಧರ್ಮ ದೈವೊಲೆಗ್ ಪದ್ರಾಡ್ ವರ್ಸೊಗೊರ ನಡಾವಳಿ ಇತ್ತ್ಂಡ ಅಜಿಪ ವರ್ಸೊಗೊರ ಮಹಾ ನಡಾವಳಿ ನಡತೊಂತ್ಂಡ್ ಗೆ.ಪದ್ರಾಡ್ ವರ್ಸೊಗೊರ ಬಾಹುಬಲಿ ಸ್ವಾಮಿಗ್ ಮಸ್ತಕಾಭಿಷೇಕ,ದೇವೆರೆಗ್ ಬ್ರಹ್ಮಕಲಶ(ಇತ್ತೆ ದೈವೊಲೆಗ್ಲ ಬ್ರಹ್ಮಕಲಶ ಬೈದ್ಂಡ್),ದೈವೊಲೆಗ್ ಪೈಚಿಲ್ ನೇಮ,ನಡಾವಳಿ,ಧರ್ಮ ನೇಮ ನಡತ್ಂಡ 60 ವರ್ಸೊಗೊರ ಬಾಹುಬಲಿ ಸ್ವಾಮಿಗೆ ಮಹಾ ಮಸ್ತಕಾಭಿಷೇಕ ನಡಪುಂಡು.ಪದ್ರಾಡ್ ವರ್ಸೊಗೊರ ಕುಂಭಮೇಳ ನಡತ್ಂಡ 144 ವರ್ಸೊಗೊರ ಮಹಾ ಕುಂಭಮೆಳ ನಡಪುಂಡು.ಈ ಸರ್ತಿ 2025 ತ ಜನವರಿ ತಿಂಗೊಲುದ 13 ತಾರೀಖ್ ಗ್ ಮಹಾ ಕುಂಭಮೇಳ ಸುರಾಯೆರುಂಡು.

ಅನುಕೂಲ ಇತ್ತ್ ನಾಯೆ ದೈವದ ಪುದರ್ಡ್ ದಾನ ದರ್ಮ ಮಲ್ಪುನ ನೇಮ ಧರ್ಮ ನೇಮ.ನಡಾವಳಿ ಬೇತೆ,ಮಹಾ ನಡಾವಳಿ ಬೇತೆ.ಪಯ-ಪಾಯ-ಕೆಯ್ ಪಾಯೊಗು ಪಂಡ ಕೊಯ್ಯೆರಾಪುನ ಪೊರ್ತುಡು ನಡಪುನ ನೇಮ ಪೈಚಿಲ್ ನೇಮ.ದೈವೊಲೆನ ಬೊಕ್ಕ ಬೆನ್ನಿದ ನಡುತ ಸಮ್ಮಂದ ಉಂದೆಟ್ ತೆರಿಯುಂಡು.ಪರಕೆ ಪಂಡ್ ದ್ ಧರ್ಮ ನೇಮ ಕೊರ್ಯೆರ್ಡಲಾ ಅವ್ಲುಲಾ ನುಪ್ಪು ದಾನ ಪ್ರದಾನ ಅದುಂಡು.12 ಪನ್ಪುನವು ಮೂಲು ಬಾರೀ ಮುಖ್ಯ.ವರ್ಸೊಗು ಪದ್ರಾಡ್ ಸಂಕ್ರಾಂತಿ ದೈವೊಲೆಗ್ ಕರಿತಡ ವರ್ಸಾದಿದ ನೇಮ ವರ್ಸೊಗೊರ ನಡತ್ಂಡ ,ಪದ್ರಾಡ್ ಸಂಕ್ರಾಂತಿದಲೆಕ ಪದ್ರಾಡ್ ವರ್ಸೊಗು  144 ಸಂಕ್ರಾಂತಿ ನಡಪುಂಡು.ಪದ್ರಾಡ್ ವರ್ಸೊಗೊರ ನಡಪುನ ಕುಂಭ ಮೇಳೊಗ್ಲ,ತುಳುನಾಡ್ ಡ್ ಪದ್ರಾಡ್ ವರ್ಸೊಗೊರ ನಡಪುನ ಧರ್ಮ ನೇಮೊಗ್ಲಾ,144 ವರ್ಸೊಗೊರ ನಡಪುನ ಮಹಾ ಕುಂಭ ಮೇಳೊಗ್ಲ ಸಂಬಂದ ಇತ್ತ್ ಲೆಕ ತೋಜುಂಡು.ಕುಂಭ ಮೇಳೊಡು ಅರ್ದ ಕುಂಭ,ಪೂರ್ಣ ಕುಂಭ,ಮಹಾ ಕುಂಭಂದ್ ಮೂಜಿ‌ ಆಚರಣೆಲುಲ್ಲ.ಅವೆಟ್ ಅರ್ದ ಕುಂಭ 6ವರ್ಸೊಗೊರ ಜಗತ್ತ್ ದ 2 ಜಾಗೆಡ್ ನಡಪುಂಡು.ಪ್ರಯಾಗ್ ರಾಜ್ ಸಂಗಮ್ ಬೊಕ್ಕ ಹರಿದ್ವಾರೊಡು.ಪೂರ್ಣ ಕುಂಭ 4 ಜಾಗೆಡ್ ನಡಪುಂಡು. ನಾಸಿಕ್,ಪ್ರಯಾಗ್ ರಾಜ್ ಸಂಗಮ್,ಅವಂತಿಕಾ ನಗರ್ ಉಜ್ಜಯಿನ್ ಮಹಾಕಾಲ್ ಬೊಕ್ಕ ಹರಿದ್ವಾರ.ಮಹಾ ಪೂರ್ಣ ಕುಂಭ ಮೇಳ 12 ಪೂರ್ಣ ಕುಂಭ ಮೇಳ ನಡತಿ ಬೊಕ್ಕ 144ವರ್ಸೊಗೊರ ನಡಪುನಿ.ನಡಪುನ ಜಾಗ-ಪ್ರಯಾಗ್ ರಾಜ್ಯ.ಈ ಸರ್ತಿ 2025 ತ ಮಹಾ ಪೂರ್ಣ ಕುಂಭ ಮೇಳ ಜನವರಿ 13 ರ್ದ್ ಫೆಬ್ರವರಿ 26 ಮುಟ್ಡ ನಡಪೆರುಂಡು ಉಂದೆನ್ ಸಾಹಿ ಸ್ನಾನ್ ಪನ್ಪುನ ಬದಲ್ ಸನಾತನಿಲಾಯಿನ‌ ನಮ ಪೂರ್ಣ ಕುಂಭ ಅಮೃತ ಸ್ನಾನ್ ಪಂಡ್ ದ್ ಪನೊಡುಂದು ಯೋಗಿಲು ಪನ್ಪೆರ್.ದುಂಬು 60 ವರ್ಸೊಗೊರ ನಡತೊಂತಿ ಮಹಾ ನಡಾವಳಿನ್ ಇತ್ತೆ 12 ವರ್ಸೊಗು ಜಪುಡಾದೆರ್.ಸ್ವಾಮೀಜಿಲ್ನ ಚಾತುರ್ಮಾಸ್ಯದ ನಾಲ್ ತಿಂಗೊಲ್ದ ಅವದಿಲ ಇತ್ತೆ ಬಾರೀ ಕಮ್ಮಿಯಾತ್ಂಡ್.ಪಯಚಿಲ್-ಬುಳೆತ ಬುಳೆಚಿಲ್ ಮುಗಿದ್,ಸುಗ್ಗಿದಪಗದ ಬಾರ್ ಇಲ್ಲ್  ದಿಂಜಿ ಪೊರ್ತುಡು ಕೆಯ್ ಪಾಯೊಗು ಬರ್ಪಿನ ಕಾಲೊಡು ನಡಪಿನ ನೇಮ ಪೈಚಿಲ್ ನೇಮ.ಇಂಚ ತುಳುವೆರಾಯಿನ ನಮ ಉನ್ಪಿ ತಿನ್ಪಿ ಆಹಾರೊನು ದೈವೊಲೆಗ್ ಸುದ್ದಾಚಾರೊಡು ಒಪ್ಪಿಪಾಯಡ ದೈವ ಅವೆನ್ ಕಣ್ಣಾರ ತೂದು ಗಾಳ್ಯಾರ ಸ್ವೀಕಾರ ಮಲ್ತ್ ದ್ ಕಾಲ ಕಾಲೊಗು ಬರ್ಸ,ಬುಳೆ ಭಾಗ್ಯ ಕೊರ್ದು ತುನಾಡ್ ನ್ ಒರ್ತ್ ಕಾತೊಂದು ಬರೊಂದುಂಡು.

ದೈವಾರಾದನೆದ ಗಟ್ಟ,ರಾಜ್ಜದ ಕಲ್ಪನೆ

      ದೈವಾರಾದನೆದ ಗಟ್ಟ,ರಾಜ್ಜದ ಕಲ್ಪನೆ

ದೈವದ ನುಡಿಕಟ್ಟ್ ದ ಕಲ್ಪನೆಗ್ಲ ಪ್ರಾಕೃತಿಕ ಗಟ್ಟದ ಕಲ್ಪನೆಗ್ಲ ಒಂತೆ ಎತ್ತೇಸೊ ಉಂಡು.ಮೂಲು‌ ದೈವ ಗಟ್ಟ ಬಡ್ತುನತ್ತ್.ದೈವೊನು ಆರಾದನೆ ಮಲ್ಪುನಕುಲು ದುಂಬುದ ಕಾಲೊಡು ದೈವಾರಾದನೆ ಮುಗಿ ಬೊಕ್ಜ  ಬೆನೆರೆ ಗಟ್ಟೊಗು ಪೋವೊಂತೆರ್.ನನೊಂಜಿ ರೀತಿಡ್ ಪನ್ಪುಂಡ ಕಂಡಸಾಗೊಳಿದ ಬರಿತ ಏರ ಜೇರೊಲೆ ಗಟ್ಟೊಲಾದಿತ್ತ.ದೈವದ ನುಡಿ ಕಟ್ಟ್ ಡ್ ಬರ್ಪಿ ರಾಜ್ಯದ ಕಲ,ರಾಜ್ಯದ ಕಲ್ಪನೆಲ ನಮ್ಮ ಇತ್ತೆದ ರಾಜಕೀಯ ವ್ಯಾಪ್ತಿದ ರಾಜ್ಜೊರ್ದು ಬೇತೆಯಾದುಂಡು. ದೈವದ ನುಡಿಟ್ ಬರ್ಪುನ ಗಡಿ ಮಾಗಣೆ,ಹೋಬಳಿ,ಗ್ರಾಮ

    

                       ‌ ‌‌             ಗಡಿಕಲ್ಲ್

ಮುರ ಕಲ್ಲ್ ದ ಗಡಿಕಲ್ಲ್ ದುಂಬು ಪುದೆ ಜಾಯೆರೆ ಗಲಸೊಂತೆರ್

ಗಡುಪಾಡಿ ಜಾಗೆಲು ಆಧುನಿಕ ತಲೆಮಾರ್ ಗ್ ಅರ್ಥ ಆವಂದಿನೆಟೇ ಒಂಜಿ ಗ್ರಾಮ ದೈವದ ವ್ಯಾಪ್ತಿಡ್ ನಿಷೇಧ ಇತ್ತಿನ ಆರಾಧನೆಲು,

ಆಚರಣೆಲು ಉಲ್ಲಂಘನೆ ಆವೊಂದು ಕಟ್ಟ್ ತತ್ತೊಂದು ಉಂಡು .ತುಳುನಾಡ್ ಡ್ದ್ ಗಟ್ಟದ  ಮಿತ್ತ್ ಗ್  ಕಾಫಿ ತೋಟೊಗು ಬೇಲೆಗ್ ಪೋಯಿನಕುಲು ಏತೋ ವರ್ಷಡ್ದ್  ಅಲ್ಪನೆ  ಬದ್ ಕ್ ಕಟ್ಟೊಂಡಲಾ, ನಂಬೊಲಿಗೆ ಇತ್ತ್ಂಡಲ ಕುಟುಂಬದ ಭೂತೊಗು ಕರಿಪುನಗ  ಊರುಗೆ ಬರ್ಪೆರ್

ದೈವಾರಾದನೆ ಅರಿಗಿರಿದ್ ಪೋವೊಂದುಂಡು

    ದೈವಾರಾದನೆ ಅರಿಗಿರಿದ್ ಪೋವೊಂದುಂಡು

    

              ಪಿಲ್ಚಂಡಿ ಮುಗ ಕೊಲಕಾಡಿ ಮುಲ್ಕಿ

     ತುಳುನಾಡ್ದ ಕಾಸರಗೋಡು,ಕುಡ್ಲ(ದ.ಕ),ಒಡಿಪು ಈ ಮೂಜಿ ಬಾಗೊಲೆಡ್ ಅಷ್ಟಮಂಗಲ,ಬ್ರಹ್ಮ ಕಲಶ ನಡತೊಂದಿತ್ತ್ ದ್ ದೇವೆರೆನ್ ತರೆಟ್ ತುಂಬುನ ಕೆರಮ ಮುಲ್ತ ಸಾನೊಲೆಡ್ ಮಾತ್ರ ತೂಯೆರೆ ತಿಕ್ಕುನಿ . ಇನಿ ತುಳುನಾಡ ದೈವಸಾನ,ಮಠೊಕು ಪೂರ ಅಗತ್ಯ ಇಜ್ಜಾಂದಿ ಅಷ್ಟಮಂಗಲ ಪ್ರಶ್ನೆ ,ಬ್ರಹ್ಮಕಲಶ ಬತ್ತ್ ದ್ ಅವ್ಲಿಪ್ಪಿ ಬೆಮ್ಮೆರೆನ್ ಮೂಲೆಗ್ ಪಾಡ್ದ್ ಅರೆನ ಬದಲ್ ಗ್ ಗಣಪತಿನ್ ತಾಪನೆ ಮಲ್ಪುವೆರ್.ಬ್ರಹ್ಮ ಕಲಶ ಮಲ್ತ್ ದ್ ಅವೆರ್ದ್ ಬೊಕ್ಕ ದೈವದ ಅಣಿತಲೆಕ ದಂಡಮಾಲೆಲ ಪಾಡ್ದ್ ದೇವೆರೆ ಬಲಿ ಮಲ್ತ್ ದ್ ದೈವದ ಬಲಿತ ಅನುಕರಣೆ ಮಲ್ತೊಂದುಲ್ಲೆರ್.ದೈವಾರಾದನೆದ ಬಗೆಟ್ ಪಾತೆರುನಕ್ಲೆನ್ ಲೆಪ್ಪಂದೆ ಧಾರ್ಮಿಕ ಉಪನ್ಯಾಸಂದ್ ದೇವೆರೆ ಬಗೆಟ್ ಪಾತೆರುನಕ್ಲೆನ್ ಲೆತ್ತ್ ದ್ ದೈವೊನು ದೇವೆರ್ ಮಲ್ತೊಂದುಲ್ಲೆರ್.ಇತ್ತೆ ಬಲಿ ತುಂಬುನ ನೂಲು ಪಾಡಿ ಸಂಸಾರೊಗ್ಲ ವಸಾಯ ಬರ್ರೆ ಸುರಾತ್ಂಡ್.ಇಂಚ ದೇವೆರೆ ಬಲಿ ಪೊಸತಾದ್ ಬತ್ತ್ ದ್ ಬೆಮ್ಮೆರೆನ್ ಮೂಲೆಗ್ ಪಾಡ್ಲೆಕ ದೈವೊಲೆನ್ ಮೂಲೆಗ್ ಪಾಡುನ ಕಾಲ ದೂರ ಇಜ್ಜಿಂದ್ ತೋಜುಂಡು.ಅವೆಕ್ ಉದಾರ್ಮೆ ಪಂಡ ಬೆಮ್ಮೆರೆ ಸುತ್ತೆ ದೀಪುನೌಲು ಗಣಪತಿ ದೀಪೆರ್.ಸುದ್ದ ಓಮ ದೀವೊಂತುನೌಲು ಗಣ ಓಮ ದೀಪೆರ್. ಒಂಜಿ ನುಡಿ ಉಂಡು.ತರೆಟ್ ತುಂಬುಂಡ ದೇವೆರ್.ಪುಗೆಲ್ಡ್ ತುಂಬುಂಡ ದೈವಂದ್.ಪಟ್ಟದ ಮುಗ ಸಾನೊಡಿಪ್ಪುಂಡು.ಉಚ್ಚಯ   ಮುಗ ಏರ್ದ್ ದೈವ ಬಂಡಿದ ಮಿತ್ತ್ ಕುಲ್ಲುದು ದೈವದ ಬಂಡಿ ಒಯ್ಪುವೆರ್.ಸ್ವಾಮೀ ಸತ್ಯೊಲೆಂದ್ ಲೆಪ್ಪೊಡಾಯಿನೌಲು ಗೋವಿಂದ ಪಾಡೊಂದುಲ್ಲೆರ್.ದೈವೊನು ದೇವೆರ್ ಮಲ್ತಿಲೆಕಾಂಡ್..ಅಂಚನೆ ಪಟ್ಟದ ಮೂರ್ತಿ ಗರ್ಭ ಗುಂಡೊಡಿಪ್ಪುಂಡು.ಉಚ್ಚಯ ಮೂರ್ತಿ ತರೆಟ್ ತುಂಬೊಂದು ಬಲಿ ಬರ್ಪೆರ್.ತೇರಿತ್ತ್ ನೌಲು ಉಚ್ಚಯ ಮೂರ್ತಿನ್ ತೇರ್ದ ಮಿತ್ತ್ ದೀದ್ ತೇರ್ ಒಯ್ಪುವೆರ್.ದೈವದ ಬಲಿ ಪೋನಗ ದೈವದೊಟ್ಟುಗು ಇಲಾಲ್,ಜೀಟಿಗೆ ಇತ್ತ್ಂಡ ದೇವೆರೆ ಬಲಿ ಪೊನಗ ನೇಲ್ ತುಡರ್,ಕೆಲ ಸಾನೊಲೆಡ್ ಇಲಾಲ್ ಉಪ್ಪುಂಡು.ಇತ್ತೆ ದೇವೆರೆ ಬಲಿಟ್ ಜೀಟಿಗೆಲ ಉಪ್ಪುಂಡು.ಈ ಅರಾದನಾ ಪದ್ದತಿಲು ದೈವಾರಾದನೆಡ್ದ್ ದೇವತಾರಾದನೆಗ್ ಬತ್ತ್ ದಿಪ್ಪು.

          ಪಿಲಿ ಬೂತದ ಮುಗ.ಇರ್ದೆ ಕದಿಕೆ ಚಾವಡಿ

ದೈವ ಗಗ್ಗರದ ಬೂಲ್ಯ ಕೊರ್ನಗ ಐನ್ ಬಚ್ಚಿರೆ ಬೊಕ್ಕ ಪೂಳುಲೆನ್ ಕೊರೊಡು

ದೇವೆರೆ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುನಾಡ ಆರಾದನೆಡ್ ಇತ್ತ್ ನ ತುಳುನಾಡ ಮಣ್ಣ ದೈವೊಲೆನ್ ದೇವೆರೆಡ್ದ್ ಪುಟ್ಟ್ ನ ದೈವೊಲುಂದು ಪಂಡ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ಪೆರೆ ಪೋವಡೆ.ದೈವೊಲೆನ್ ಈ ಮಣ್ಣ್ ಡ್ ಉದಿತಿ ದೈವೊಲಾದೇ ತೂಕ.ದೇವೆರೆನ್ ದೇವೆರಾದೇ ತೂಕ.ದೇವೆರೆನ್ ಸಂಸ್ಕೃತದ ಮಂತ್ರೊಲೆಡ್ ಮಾನಿತೊಂಡ ದೈವೊಲೆನ್ ಸಂದಿ ಪಾಡ್ದನದ ನಿಲೆಟೇ ಅರ್ಥ ಮಲ್ತೊನುಗ.ದೈವೊಲೆನ್ ಆರಾದನೆದ ಒರುತ ಕೊಡಿಯಡಿಟೇ ಮನಿತೊನ್ಗ.ಅವೆನ್ ಬುಡ್ದು ಬೇತೆ ಬೇತೆ ರಂಗೊಲೆಡ್ ಪ್ರದರ್ಶನ ಕಲೆಯಾದ್ ತೂಪರಿಕೆ ಮಲ್ಪಡೆ.

       

ಪರವೆರ್ ಕಟ್ಟಿ ಪಂಜುರ್ಲಿನ ನೆಲಟ್ ಪುರೆಲುನ ಮಡತ್ತಾನ.ಈ ಕಟ್ಲೆ ನಿಜವಾದ್ ದೈವಾರಾದನೆಡ್  ಇಜ್ಜಿ.

ಇತ್ತೆ ಕೆಲವು ಪಂಜುರ್ಲಿ ಕಟ್ಟುನಕುಲು ಕುಟುಮದ ಇಲ್ಲಲ್ ನೇಮ ಮಲ್ಪುನಗ ನೆಲಟ್ ಮಡತ್ತಾನ ಬರ್ಪುನ ತೋಜುಂಡು..ಆತೆನಾ ಅಕಗಲೆನ್ ನೆಲಟ್ ಪುರೆಲ್ಪಾಯೆರೆಂದೇ ಜನ ಉಪ್ಪುಂಡು.ಉಂದು ತಪ್ಪು.ಸರ್ಪಕೊಲೊಡು ಸರ್ಪ ಪಾತ್ರಿ ಪರತೊಂದು ಪರತೊಂದು ಪೋಪೆ.ಆಮಡ ಮೊಕ್ಲೆಲೆಕ ಪೊಡೆರೊಂದು ಮಡತ್ತಾನ ಮಲ್ಪುಜೆ.ಕೆಲವು ನಾಗದರ್ಶನ ಪಾತ್ರಿಲು ನೆಲಟ್ ಪುರೆಲೊಂದು ಮಡತ್ತಾನ ಮಲ್ಪುವೆರ್.ಆಂಡ ಕುಟುಮದ ಅಧಿಕಾರದ ದೈವ ಪಂಜುರ್ಲಿ ಇಂಚ ನೆಲಟ್ ಪುಡೆರೊಂದು ಮಡತ್ತಾನ ಮಲ್ಪುನವು ತಪ್ಪು.

  

    ಗುಡ್ಡಾರ ದೈವ ಶ್ರೀ ಮಹಾದೇವ ದೇವಸಾನ ಕಿದೂರು

    ದೈವಾರಾದನೆದ ದೈವೊಲು ಕುಲ್ಲುನ ನಾಲ್ ಜಿಡ್ಡೆದ ಬಗೆಟ್ ತೆರಿಯೊಂಡೆರ್ಡ ದೈವಾರಾದನೆಡ್ ಏರ್ಲಾ ತಪ್ಪು ಮಲ್ಪಯೆರ್.

1ಅರಸು,ರಾಜಂದೈವೊಲು ಕುಲ್ಲುನ ಉಜ್ಜಾಲ್.ಉದಾರ್ಮೆ -ಜುಮಾದಿ

2.ರಾಜಂದೈವೊಲು ಕುಲ್ಲುನ ಮುಂಡ್ಯೆ.ಉದಾರ್ಮೆ-ಮಲರಾಯೆ

3 ರಾಜಂದೈವೊಲು ಕುಲ್ಲುನ ಮಣೆ ಮಂಚ ‌ಉದಾರ್ಮೆ-ಕಲ್ಲುರ್ಟಿ,ಪಂಜುರ್ಲಿ

4ದೈವೊಲು ಕುಲ್ಲುನ ಬೂಮಿ/ನೆಲ . ಉದಾರ್ಮೆ-ರಾವು,ಗುಳಿಗೆ ನೆಲಟ್ ಕುಲ್ಲುನಿ

ಉಂದೇ ನಾಲ್ ದೈವೊಲು ಕುಲ್ಲುನ ಪ್ರಧಾನ ಜಿಡ್ಡೆಲು.ಅಂಚನೆ ದುಂಬು ಪೂರ ಒಂಜಿ ದೈವ ಒಂಜಿ‌ ಕಲಟ್ ಪ್ರಧಾನ ಆದಿತ್ತ್ ದ್ ಪಾತೆರೊಂತ್ಂಡ್.ಒರಿನ ದೈವೊಲು ಪಾತೆರ್ರೆ ಇಜ್ಜಾಂಡ್.ಇನಿ ಒಂಜಿ ಕಲೊಟುಪ್ಪುನ ಪೂರಾ ದೈವೊಲ್ಲಾ ಪ್ರಧಾನ ಆದ್ ಮಾತ ದೈವೊಲ್ಲಾ ನುಡಿ ಕೊರ್ಪುನಡೆಕ್ ಎತ್ತ್ ದ.ದೈವದ ಜಿಡ್ಡೆದ/ಪೀಠದ ಬಿಲೆ ತೆರಿಯಂದೆ ಕಟ್ಟುನಕುಲು ಇಂಚ ನುಡಿ ಕೊರೊಂದುಲ್ಲೆರ್.

ಬಂಜಿಗ್ ಉನೆರೆ ತಿನೆರೆ ಗತಿ ದಾಂತಿ,ತುತ್ತೆರೆ ತುಂಡು ಕುಂಟು ದಾಂತಿ,ಇದ್ಯೆದ ಗಂದಗಾಳಿ ತೆರಿಯಂದಿ  ಪೂರ್ವಹಿರಿಯಾಕ್ಲ್ ನಂಬೊಂದು ಬತ್ತಿ ದೈವೊಲೆನ ಮಾಯೆ ಮಲ್ಲೆ ಆದಿತ್ತ್ಂಡ್.ಅಡೆಗ್ ಮಂತ್ರ ಬತ್ತ್ ದ್ ಮಾಯೆದ ನಿಲೆ ತತ್ತ್ ದ್ ದೈವೊಲು ದೇವೆರಾಯೆರೆ ಸುರಾಯೆರ್

  ದೈವದ ಕಲೊಕು ನಿಜವಾದ್ ಮದ್ಯಸ್ಥೆರ್ ಪನ್ಪುನ ವ್ಯವಸ್ಥೆನೇ ದುಂಬಿಜ್ಜಾಂಡ್.ಕುಟುಮದಕ್ಲೆಗ್ ದೈವದ ಮಿತ್ತ್ ಅಪಾರ ಭಕ್ತಿ ಇತ್ತ್ಂಡ್.ದೈವದ ಕಾರ್ನಿಕಲ ಅಂಚನೆ ಇತ್ತ್ಂಡ್.ಕುಟುಮದ ಬೊಕ್ಕ ದೈವದ ಸಮ್ಮಂದಲ ಆತ್ ಗಟ್ಟಿ ಇತ್ತ್ಂಡ್.ಏಪ ದೈವದ ಕುಟುಮದ ನಡುಟು ಮದ್ಯಸ್ಥೆ ಪನ್ಪುನಾಯೆ ಬತ್ತೆನಾ ವರ್ಸ ಇಡೀ ಪೂ ನೀರ್ ದೀದ್ ಆರಾದನೆ ಮಲ್ತೊಂತ್ ನಾಯೆ ಮೂಲೆ ಸೇರುಲೆಕಾಂಡ್.ಏರೋ ಗುರ್ತಾರ್ಥ ದಾಂತ್ ನಾಯೆ ದೈವದ ಕಲೊಕು ಬತ್ತ್ ದ್ ಮದ್ಯಸ್ಥಿಕೆ ಮಲ್ತ್ ನೆಡ್ದಾದ್ ದೈವೊಗ್ಲ ಆಯನ ಮಿತ್ತ್ ಮೋಕೆ ಇಜ್ಜಿ.ಇಂಚಿರ್ದ್ ತನನ್ ನಂಬೊಂತಿನಾಯೆ ಮೂಲೆ ಸೇರ್ನಗ ಕಲೊಕು ಬತ್ತಿ ಮದ್ಯಸ್ಥಗ್ ದಾಯೆ ಕಾರ್ನಿಕ ತೋಜಾವೊಡುಂದು ದೈವ ಕಾರ್ನಿಕ ತೋಜಾವುನೆನ್ ಕೈ ಬುಡ್ಂಡ್.ಮೂಲು ಕಲೊಟು ದೈವದ ಬದಲ್ ಕಟ್ಟುನಾಯೆ ಬೊಕ್ಕ ಮದ್ಯಸ್ಥೆ ತನ್ಕುಲ್ನ ಸಂದರ್ಶನ ಮಲ್ಪುಲೆಕಾಂಡ್.ನಮ ಪೂ ನೀರ್ ದೀದ್ ಆರಾದನೆ ಮಲ್ತೊಂತ್ ನ ದೈವೊಲೆಗ್ ಬೇತೆ ಏರಾ ಒರಿ ಪಿದಯಿಡ್ದ್ ಬತ್ತ್ ನಾಯೆ ಕರಿಪುವೆ ಪಂಡ , ನಮ್ಮ ಅಪ್ಪೆ ಅಮ್ಮಗ್ ನಮ ಬಲಸ್ ದ್ ಕೊರ್ಂಡ ನೆಮ್ಮದಿಯತ್ತಂದೆ ಪಿದಯಿಡ್ದ್ ಬತ್ತ್ ನಾಯೆ ಬಲಸ್ ದ್ ಕೊರ್ಂಡ ಎಂಚಾವು?ಅವ್ವೆ ಪರಿಸ್ಥಿತಿ ನಮ್ಮ ದೈವೊಲೆಗಾತ್ಂಡ್.

 

    ಅಣಿತ ಪಿರವು ಮುಗ ಬುಡ್ಪಾವುನ ಕಾಲ ಬತ್ತ್ಂಡ್.

  ನಮ ದೈವದ ಮಿತ್ತ ನಂಬೊಳಿಗೆ ಬುಡ್ದು ಇನಿ ನೇಮದ ಮನದಾನಿ ಜೋಯಿಸೆರ್ಡ ಪೋದು ಕೇನುವ‌.ವಾ ವಾ ದೈವೊಲೆನ್ ವಾ ವಾ ಜಿಡ್ಡೆಲೆಡ್ ದೀದ್ ಆರಾದನೆ ಮಲ್ಪೊಡು ಪಂಡ್ ದ್ ತೆರಿಯಂದಿನ ಪ್ರಶ್ಬೆ ಚಿಂತನೆದಕುಲು,ದೈವಾರಾದನೆದ ಕಟ್ಟ್ ಕಟ್ಲೆದ ಬಗೆಟ್ ತೆರಿಯಂದಿನಕುಲು, ದೈವಾರಾದನೆದ ದೈವೊಲೆನ್ ಇಂಚಿನ ದೈವಂದೇ ಪನೆರೆ ಅರ್ಹೆರತ್ತ್.ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ

ಅರಸು ದೈವೊಲೆ ಸಿರಿ(ತಿರಿ ಅಲಂಕಾರ)ಮುಡಿತ ಅರ್ಥ ತೆರಿಯಂದೆ ಸಿರಿ ಮುಡಿಕ್ ತಿರಿತ ಅಲಂಕಾರದ ಬದಲ್ ಪೂತ ಅಲಂಕಾರ ಮಲ್ತೊಂದುಲ್ಲೆರ್

     ಒಂಜಿ ಕಾಲೊಡು ತನ್ಕ್ ಎದುರುಂತ್ ನ ಬಡವರ್ಗೊನು ಒಂಜಿ ಶ್ರೀಮಂತ ವರ್ಗ ಮೋಸೊಡು ಕೆರ್ದ್ ತನ್ಕುಲೆಗ್ ತೊಂದರೆ ಅಯೆರೆ ಬಲ್ಲಿಂದ್ ದೈವ ಮಾಯ ಮಲ್ತಿನಿ ಪಂಡೆರ್.ಕರಿದ್ ಪೋಯಿನಕ್ಲೆರ್ದ್ ಉಪದ್ರ ತೋಜಿದ್ ಬನ್ನಗ ಅಕ್ಲೆನ್ ದೈವ ಆದ್ ನಂಬ್ಯೆರ್..ಇನಿ ತನ್ನ ಬಂಜಿದ ಗುಜ್ಜರ್ಮೆಗಾದ್ ದೈವೊಲೆನ್ ಸಿನೆಮಾ ನಾಟಕ ಅಟ ದಾರಾವಾಹಿಲೆಡ್ ಕನನಗ ದೈವದ ಅಪ್ಪಣೆ  ದೆತೊಂದು ಅವೆನ್ ಮಲ್ತೊಂದುಲ್ಲ,ಜಗತ್ತ್ ಗ್ ದೈವದ ಕಾರ್ನಿಕೊನು ತೋಜವೊಡುಂದುಲ್ಲಂದ್ ಪನ್ಪೆರ್.ಇಲ್ಲದುಲಯಿ ಪರೊಡಾಯಿನ ಪೇರ್ ನ್ ಜಾಲ್ ಗ್ ಚೇತ್ ಲೆಕಾಂಡ್. ತುಳು ಮಣ್ಣ್ ದ ವಾ ದೈವಲಾ ತುಳುನಾಡ ಮಣ್ಣ ಋಣತಕ್ಲೆನ್ ಬುಡ್ದು ಪಾಡಂದ್. ಇಂಚಿ ಇಚಾರೊಗು ದೈವ ಒಪ್ಪಿಗೆ ಕೊರ್ರೆ ಸಾಧ್ಯನೇ ಇಜ್ಜಿ.ಕೆಲವು ಕಟ್ಟುನಕುಲು ಪಣವುದ ಆಸೆಗ್,ಮಾದ್ಯಮೊಡು ಪುದರ್ ಬರ್ರೆ ಬೋಡಾದ್ ನುಡಿ ಕೊರೊಡಾತೆ.

   

ದೈವೊಲೆಗ್ ಪಾಲೆಡ್/ತಡ್ಪೆಡ್ ಕೊರೊಂತಿ ಆವಾರಾಮೃತ ಪ್ಲಾಷ್ಟಿಕ್ ತಟ್ಟೆಡ್ ಕೊರ್ಪುನ ಪರಿಸ್ಥಿತಿ ಬತ್ತ್ಂಡ್.

ಒಂಜಿ ಕಾಲೊಡು ಕೇರಳದ ಕಾಲಟಿರ್ದ್ ತುಳುನಾಡ್ ಗ್ ಬತ್ತಿನ ಶಂಕರಾಚಾರ್ಯೆರ್ ಉಲ್ಲಾಲ್ದಿನ ದೈವಸಾನೊಲೆಡ್ ಶ್ರೀಚಕ್ರ ದೀದ್ ಉಲ್ಲಾಲ್ದಿ,ಲೆಕ್ಕೆಸಿರಿ ಪೂರಾ ದುರ್ಗಾಪರಮೇಶ್ವರಿ ರಕ್ತೇಶ್ವರಿ ಆಂಡ್.ಶ್ರೀರಾಮಾನುಜಾಚಾರ್ಯೆರ್ ವಿಷ್ಣು ಮೂರ್ತಿನ್ ತುಳುನಾಡ್ ಗ್ ಕನತೆರ್.ಅರಸು ಬಿಟ್ಟಿದೇವನ್ ಆರ್ ಸುರು ವಿಷ್ಣುವರ್ದನಂದ್ ಪುದರ್ ಬದಲ್ತೆರ್.ಕಾಲನುಬಾಗೊಡು ವಿಷ್ಣುಮೂರ್ತಿ ದೈವಲಾ ವಿಷ್ಣುನ,ಗೀತೆದ ಸಂಸ್ಕೃತದ ಸಾಲ್ ಲೆನ್ ಪನೆರೆ ದುರು ಮಲ್ತೆರ್.ವಾದಿರಾಜೆರ್ ಶಿವ ಸನ್ನಿದಿಡ್ ಶಿವಲಿಂಗದ ಮಿತ್ತ್ ವಿಷ್ಣುನ ಸಾಲಿಗ್ರಾಮ ದೀವೊಂದು ಬತ್ತೆರ್.ಇನಿ ಕೇರಳದ ಪ್ರಶ್ನೆ ಚಿಂತನೆದಕುಲು ಅವ್ವೇ ಬೇಲೆನ್ ಮಲ್ತೊಂದುಲ್ಲೆರ್.ಶಿವ ದೇಲ್ಯೊಲೆಗ್,ಜೋಗಿ ಮಠೊಕ್ಲೆಗ್,ದೈವಾಲ್ಯೊಲೆಗ್ ಇಜ್ಜಾಂದಿ ಬ್ರಹ್ಮಕಲಶೊನು ಅಷ್ಡ ಮಂಗಲ ಪ್ರಶ್ನೆ ದೀದ್  ಮಲ್ಪಾಯೆರೆ ಪಂಡೆರ್.ಉಂದು ನಮಕ್ ಗೊತ್ತಾವಂದಿಲೆಕ್ಕ ನಡಪುನ ಧಾರ್ಮಿಕ ಆಕ್ರಮಣನಾ ಅತ್ತ್ ಮತಾಂತರನಾ ತೆರಿಯೊಂದಿಜ್ಜಿ.

  

ದೈವದ ತುತ್ತೈತದ ಕೇಪುಲು ರಂಗ್ ಮಯಕ(ಓಡಮರಾಯ ದೈವ.ತಿಂಗಳೆ ಗರಡಿ ಹೆಬ್ರಿ

  ನಿಜವಾದ್ ತುಳುವೆರೆಗ್ ದೈವಾರಾದನೆದ ಕಟ್ಟ್ ನ್ ತೆರಿಪಾದ್ ಕೊರೊಡಾಯಿನಕುಲು ಕಟ್ಟುನಕುಲು.  ಅಂಚನೆ ಇಂಚಿನ ದೈವೊಗು ಇಂಚಿನ ಬಣ್ಣ,ಇಂಚಿನ ತುತ್ತೈತ,ಇಂಚಿತ್ತ್ ನ ಮಣೆ ಮಂಚ,ಇಂಚಿತ್ತ್ ನ ಉಜ್ಜಾಲ್ಂದ್ ತೆರಿಪಾವೊಡಾಯಿನಕುಲು ಕಟ್ಟುನಕುಲು..ಇನಿ ಅಕುಲೇ ಮಣ್ಣ ಸಂಸ್ಕೃತಿನ್ ಮದತೆರ್ಡ ನನ ಏರೆಡ ಕೇನೊಡು?.ದುಂಬು ದೈವದ ತುತ್ತೈತ,ಅರ್ದಾಲೊಡು ಉಂದು ಗುಳಿಗೆ,ಉಂದು ಪಂಜುರ್ಲಿ,ಉಂದು ಜುಮಾದಿಂದ್ ಗೊತ್ತಾವೊಂತ್ಂಡ್.ಇನಿ ಕಲ್ಲುರ್ಟಿ,ಗುಳಿಗನ್ ಪೂರ ತೂನಗ ದಾದ ಬಣ್ಣಂದೇ ಗೊತ್ತಾವೊಂದಿಜ್ಜಿ.ಪುಟ್ಟುರ್ದು ಸಾವುಮುಟ್ಟದ ಆಚರಣೆಲು ಸಂಪೂರ್ಣ ವೈದಿಕ ಅಯಿಲೆಕ ತುಳುನಾಡ ದೈವಾರಾದನೆದ ಮೂಲ ಪರಂಪರೆ ನಾಶ ಆವೊಂದುಂಡು.

  

ಕೇಪುಲು ರಂಗ್ ತುತ್ತೈತ,ಸೂರ್ಯ ಚಂದ್ರೆ ಮಯಕ

       ಇತ್ತೆ ಕೆಲವೊಂಜಿ ಪ್ರಶ್ನೆ ಚಿಂತನೆದಕುಲು,ಮುಕ್ಕಾಲ್ದಿನಕುಲು ಕುಟುಮೊಡು ದೈವೊನು ಅಂದ್ ಮಲ್ಪುನಗ ನಿಕಿಲು ನೆತ್ತೆರ್ ಕಕ್ಕ್ ದ್ ಸೈಪರ್ಂದ್ ಪೋಡಿ ಕಟ್ಟಾವೊಂದುಲ್ಲೆರ್.ಪಿಂಗಾರ ಸಾರಿ ಯೂನಗ,ಬಚ್ಚಿರೆಡ್ ಸಕನ ತೂನಗಲ ಅಕ್ಲೆ ಬುದ್ಯಂತಿಕೆಡ್ ಸಾರಿ,ಸಕನ ತೂಪೆರ್. ಉಂದು ತಪ್ಪು. .ದುಂಬು ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಇಲ್ಲದುಲಯಿ ಮದನಕೈ ಪಲಯಿಡ್,ಮಣೆಟ್ ದೀದ್ ಆರಾದನೆ ಮಲ್ತೊಂತೆರ್ಡ ತುಡರ್ ದೀದ್,ಸುತ್ತೆ ದೀದ್ ಲ ಆರಾದನೆ ಮಲ್ತೊಂತೆರ್.ಹಿರಿಯಾಕ್ಲೆಗ್ ವರ್ಸೊಗೊರ ಅಗೆಲ್  ಪಾಡ್ದ್ ಕುಟುಮೊಗು ಸೆರ್ಸಾವುನ ಕೆರಮಲ ಇತ್ತ್ಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಒಂಜೆ ಕೋಣೆದುಲಯಿ ಪಂಜುರ್ಲಿನ ಬಲತ್ ಗ್ ಕುಲ್ಲಾದ್ ತಗೆ ತಂಗಡಿಯಾದ್ ಆರಾದನೆ ಮಲ್ಪುನೊಟ್ಟುಗು ರಾವು,ನಾಗೆ,ಪದಿನಾಜಿ ಸೇರ್ನ ಹಿರಿಯೆರ್,ಮುಡಿಪು ಇತ್ತ್ ದ್ ಮುಡಿಪುದ ಕುಟುಮೊಗು ಒಂಜಿ ಸೂತಕ ಇತ್ತ್ ದ್ ದೈವಾರಾದನೆ ಕುಟುಮೊನು ಒಂಜಿ ಸೂತ್ರದಡಿಟ್ ಗಟ್ಟಿ ಮಲ್ತ್ ದಿತ್ತ್ಂಡ್.ಇತ್ತಿತ್ತೆ ಕುಟುಮದ ಕಲ್ಲುರ್ಟಿ ಪಂಜುರ್ಲಿಗ್ ಪಿದಯಿ ಕಲ್ಲ್ ಪಾಡ್ದ್ ನಂಬುನ,ಬೇತೆ ಸಾನ ಕಟ್ಟ್ ದ್ ನಂಬುನ,ಸಾನೊಗು ಮುಗುಳಿ ದೀಪುನ ಕರಮ ಸುರಾತ್ಂಡ್. ಕೇರಳದ ಪ್ರಶ್ನೆ ಚಿಂತನೆದಕ್ಲೆನ ಪಾತೆರ ಕೇಂದ್ ಕಲ್ಲುರ್ಟಿ ಪಂಜುರ್ಲಿನ್ ರಡ್ರಡ್ಡ್ ಕೋಣೆಡ್ ಬೇತೆ ಬೇತೆನೆ ಕುಲ್ಲವುನ ಕೆರಮ ಸುರಾತ್ಂಡ್.ಪಿದಯಿ ಕಲ್ಲ್ ಪಾಡ್ದ್ ನಂಬುನಲಾ ಸಾನದ ಸಂಕಲ್ಪನೇ ಆಂಡ್.ಕೆಲವೊಂಜಿ ಕುಟುಮೊಡು ವರ್ಣಾರ ಪಂಜುರ್ಲಿ ಬತ್ತಿ ಬಿನ್ನೆಯಾಂಡ,ಕುಪ್ಪೆ ಪಂಜುರ್ಲಿ ಪ್ರದಾನ ಆದಿತ್ತ್ಂಡ ಅವುಲು ಕುಪ್ಪೆನ ಎಡತ ಮರ್ಗಿಲ್ ಡ್ ವರ್ಣಾರನ್ ಬೇತೆನೆ ಪಲಯಿಡ್ ದೀದ್ ನಂಬುವೆರ್. 

  ಕುಟುಮದ ಮುಡಿಪುನು ಕಲ್ಲುರ್ಟಿ ಪಂಜುರ್ಲಿನ ಅದೆಟೇ  ದೀವೊಂತೆರ್.ಇತ್ತೆ ಅವ್ವೇ ಅದೆಟ್ ಗೋಡೆ ಕೊರೆದ್ ಪಲಯಿಡ್ ಮುಡಿಪು ದೀಯೊಂದಿಪ್ಪುನವು ಆಯೊಗು ಮಲ್ಪುನ ಒಡಕ್.ಇಲ್ಲಗೊಂಜಿ ತಾರಾಯಿ ಕಟ್ಟ್ ನಗ,ಈಡ್ ಕಟ್ಟ್ ನಗ,ಓಮದ ಪುರ್ಸಾದ ಕಟ್ಟ್ ನಗ ಗೋಡೆಗ್ ನೆಲಕ್ ತಾಗಂದಿಲೆಕ ಕುಬಲ್ ಗ,ಅಟ್ಟದ ಅಡ್ಡೊಗ ಕಟ್ಟೊಂತೆರ್.ಅಂಚನೆ ಮುಡಿಪುನ್ಲ ನೆಲ ಬೊಕ್ಕ ಗೋಡೆಗ್ ತಾಗಂದಿಲೆಕ ದೀಯೊಡು.ಮುಡಿಪು ದೈವದ ಕೋಣೆಡ್ ದೀನವ್ಲು ಅಗೆಲ್ ಪಾಡ್ಂಡ ಅಸುದ್ದಾಪುಂಡುಂದು ದೈವದ ಮಣೆ ಮಂಚದೆದುರು ಅಗೆಲ್ ಪಾಡಂದೆ ಕೋಣೆದ ಪಿದಯಿ ಚಾವಡಿಡ್ ಬಲಸೊಂದುಲ್ಲೆರ್ ಉಂದು ತಪ್ಪು.ನಮ ಕಲ್ಲುನವ್ಲು ಒನಸ್ ಬಲಸಂದೆ ಓಲಾ ಪಿದಯಿ ನಂಕ್ ತೋಜುಲೆಕ ಬಲಸ್ಂಡ ನಮಕ್ ಉನೆರಾಪುಂಡೇ.ಅಂಚನೇ ಅತ್ತೆ ನಮ ನಂಬಿ ದೈವೊಲು.ದೈವೊಗು ಬಲಸುನ ಜಾಗೆ ಸುದ್ದಾಚಾರೊಡುಪ್ಪೊಡುಂದು ಅಟ್ಟ ಇಜ್ಜಂದಿ ಜಾಗೆಡ್ ಕುಬಲ್ ರ್ದ್ ಕಜವು ಬೂರಂದಿಲೆಕ ಅಟ್ಟದ ಬಾಗೊಗು ಬೊಲ್ದು ಕುಂಟು ಕಟ್ಟೊಂತೆರ್.ನಿಚ್ಚ ಗೋಡೆಗ್ ಕುತ್ತು ದೀಪ(ಕೋಲ್ತಿರಿ) ದೀಪುನೆನ್ ತಪ್ಪು ಪಂಡಿ ಪ್ರಶ್ನೆ ಚಿಂತನೆದಕುಲು ನಿತ್ಯ ತುಡರ್ ದೀಯೆರೆ ಪಂಡ್ ದ್ ಪೊತ್ತೊಂತಿ ನಿನೆನ್ ಎಲಿ ಮಾಡ್ ಗ್ ಕೊನೊದು ಇಲ್ಲ್,ಸಾನ ಪೊತ್ತ್ ನಲ ಉಂಡು.ನಿಚ್ಚ ಪೂನೀರ್ ದೀಯೊಡಾಯಿನ ದೈವೊಲೆಗ್ ಸಂಕ್ರಾಂತಿಗೊರ ಬಾಕಿಲ್ ದೆಪ್ಪುನ ಪರಿಸ್ತಿತಿಗ್ ತುಳುವೆರೆನ್ ಅಕುಲು ಕನತ್ ಪಾಡ್ಯೆರ್.

-ಪೂರಕ ಮಾಯಿತಿ-ಶಂಕರ ಕುಂಜತ್ತೂರು.ದೈವಾರಾದನೆ ಕ್ಷೇತ್ರ ಕಾರ್ಯದ ಅನುಭವಿಲು.

           ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು. ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ನಮ್ಮ ಎಡತ ಮರ್ಗಿಲ್ಡೇ ಉಪ್ಪೊಡು,ಕಲ್ಲುರ್ಟಿ ಬಲಬಾಗೊಡೆ ಉಪ್ಪೊಡು .ನಮ ದೈವೊಗು ಎಡತ್ ದ್ ಉಂತುದೇ ಮದಿಪುನ ಕೆರಮ.ದಾಯೆ ಪಂಡ ದೈವದ ನುಡಿಟ್ ಅಪ್ಪೆಯಾಂಡ ಬಲತ ಸಿರಿ ಮಿರೆ ಕೊರ್ದು,ತಮ್ಮಲೆಯಾಂಡ ಬಲತ ತುಡೆ ಮಿತ್ತ್ ಕುಲ್ಲಾದ್ ಪಾಲಿಪುವೆ ಪನ್ಪಿ ನುಡಿ ಉಂಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.

 

                ದೈವಾರಾದನೆದ ಪರಿಸ್ಥಿತಿ ಇಡೆಗೆತ್ತ್ಂಡ್

" ಗಟ್ಟದ ಪುಡೆಡ್ದ್ ಕಡಲ ಬರಿಮುಟ್ಟ ತುಳುನಾಡೊರ್ಮೆಲಾ ಪಟ್ಟ ಆಳುನ ಮಲ್ಲಾಯರ್ದ್ ಪತ್ತ್ ದ್ ಮುಟ್ಟಾಲೆ ದೀದ್ ಬೆನ್ಪುನ ಬಲ್ಲಿ ಬಡವರೆ ಮುಟ್ಟ ಕುಟುಮೊಗು ಗೂಂಟ,ಪೊಣ್ಣಗ್ ತಮೆರಿ,ಆಣಗ್ ತಮ್ಮಲೆ ಪನ್ಪಾವೊಂದು, ಪಕ್ಕಿ ಕುಲ್ಲಂದಿ ಮರ ಇಜ್ಜಿ,ತುಲುನಾಡ ಪಂಜುರ್ಲಿ ಇಜ್ಜಂದಿ ಕುಟುಮ ಇಜ್ಜಿ ಪನ್ಪಾವೊಂದು ಮೆರೆಪುನ ಮಾಮಲ್ಲ ಸತ್ಯ ಪಂಡ್ಂದಾಂಡ  ಅವ್ವೆ ಮಾಯಗಾರೆ ಪಂಜುರ್ಲಿ" ಉಂದು ಪಂಜುರ್ಲಿಗ್ ಮದಿಪುನ ಮದಿಪು.

ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ  ಅಪರಾಧ. ಅಂಚನೆ ದೈವೊಲೆನ್  ನಮಕ್  ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.ಅಂಚನೆ ಲೇಸ್ ಸುದಾರಿಕೆದ ಪಾತೆರ್ನಗ(ನಿರೂಪಣೆ),ಚಾವಡಿದ ಮಿತ್ತ್ ಪಾತೆರ್ನಗ ದೈವ ಕೊಡಿಯಡಿಟ್ ಪನ್ಪುನ ನುಡಿಕಟ್ಟ್ ನ್ ಪನ್ಪುನವು ತಪ್ಪು.ಅಂಚಿ ಅಧಿಕಾರ ಏರೆಗ್ಲ ಇಜ್ಜಿ. ಒರಿ ವ್ಯಕ್ತಿ ಒಂಜಿ ಜಾಗೆಡ್ ಪೂರ್ವ ಹಿತಿಯಾಕುಲು ನಡಪಾವೊಂದಿ ಕಟ್ಲೆನ್ ಪೊಲಿಪಾದ್ ಪೊಸತಾದ್ ಒಂಜಿ ಕಟ್ಲೆನ್ ಕನಪುನವು ತಪ್ಪು.  ದೈವದ ಅಣಿನ್ ವೇದಿಕೆಡ್ ಪಾಡುನವು ತಪ್ಪು.ಕೊಡಿಯಡಿತ ದೈವದ ನುಡಿನ್ ಕೊಡಿಯಡಿಟೇ ಕೇನೊಡು.ದೈವದ ನುಡಿನ್ ಅಂತರ್ಜಾಲೊಡು ದೈವದ ಚಿತ್ರ ಪಾಡ್ದ್ ಬರೆಪುನಲ ಸರಿ ಅತ್ತ್.

  

ದೈವ ಚಾಕಿರಿದಕ್ಲೆಗ್ ದೈವೊರ್ದು ಮಿತ್ತ್ ಪದ್ದೆಯಾಂಡ್

   ಇನಿತ ದಿನಮಾನೊಲೆಡ್ ತುಳುನಾಡ ಬೆಮ್ಮೆರೆನ್ ಆದ್ಯಾತ್ಮ ಪರಬ್ರಹ್ಮ ಮಲ್ಪೆರೆ ಪೋದು ನಮ್ಮ ಜವನೆರೇ ಅಕ್ಲೆ ಸಂಸ್ಕೃತಿಗ್ ಕುಡರಿ ಪಾಡೊಂದುಲ್ಲೆರ್.ನನ ದೈವ,ನಾಗನ ಕೊಡಿಯಡಿಕ್ ಆದ್ಯಾತ್ಮ ಪೊಗ್ಗ್ಂಡ ದೈವೊಲ್ನ ಅಣಿ ಕಡ್ಸಲೆ,ಮುಗ ಮೂರ್ತಿ ಒವ್ಲಾ ಬೋಡಾವಂದ್.ಆತ್ಮ ಸಂಸ್ಕಾರ ಮಲ್ತ್ ದ್ ಅತ್ಮದುಲಯಿ ದೈವೊಲೆನ್ ನಂಬುನ ಕಾಲ ಬರು.ಬಳೆಯಾಪುನ,ಗಡಿಯಾಪುನ,ಮಾನೆಚ್ಚಿ,ನೇಮ,ಕೋಲ,ತಂಬಿಲ ಒವ್ಲ ಉಪ್ಪಂದ್.ಆದ್ಯಾತ್ಮದ ಆತ್ಮ ಪರಮಾತ್ಮನ ಸಮ್ಮಂದ ಗಟ್ಟಿಯಾದ್ ದೈವಾರಾದನೆ ತೆರಿಯಂದಿಲೆಕ ಮಯಕಾಪುನ ದಿನ ದೂರ ಇಜ್ಜಿ.ಅಂಚಾದ್ ಮೂಲ ದೈವಾರಾದನೆನ್ ಒರಿಪುನ ಜವಾಬ್ದಾರಿ ಪ್ರತಿಯೊರಿ ತುಳುವಗ್ಲಾ ಉಂಡು.

  

ಇನಿತ ದಿನಮಾನೊಡು ತುಳುವೆರೆ ಆರಾದನೆದ ತುಳುನಾಡ ದೈವೊಲು ಸಿನೆಮಾ ನಾಟಕ,ಆಟದ ತೂಪರಿಕೆದ ವೇಷೊಲಾಯಿನವು ತುಳುವೆರೆ ದೈವಾರಾದನೆದ ದುರಂತಂದೇ ಪನೊಲಿ.ಅಕ್ಲೆಡ ಕೇಂಡ ಎಂಕುಲು ದೈವದ ಕಲೆ ಕಾರ್ನಿಕೊನು ಲೋಕೊಗು ತೆರಿಪಾವೊಂದುಲ್ಲಂದ್ ಪನ್ಪೆರ್.ದೈವದ ಕಲೆ ಕಾರ್ನಿಕೊನು ತೋಜಾಯೆರೆ ನಮ ಏರ್?.ದುಂಬು ತುಳುನಾಡ ವ್ಯಾಪ್ತಿಡ್ ನಡತೊಂತಿ ದೈವಾರಾದನೆನ್ ಮೊಕ್ಲೆನ ಕಾಸ್ ದ ಅಂಬೆರ್ಪುಡು ಸಾರ್ವತ್ರಿಕ ಮಲ್ತೊಂದು ಪೋಯೆರ್.ಕಟ್ಟುನಕುಲು ಮೂಲ ತುಳುನಾಡ ಚಾಕಿರಿನ್ ಬುಡ್ದು ಕಾಸ್ ದ ಆಸೆಡ್ ಈ ಮಾದ್ಯಮದಕ್ಲೆಗ್ ತಾನ್ ನಂಬೊಂತಿ ದೈವದ ಭಂಡಾರ ಕೊರ್ಪುನವು ದೈವೊನು ಮಾರ್ದ್ ಬುಡ್ಲೆಕಾಂಡ್.

   

          ದೈವಾರಾದನೆಡ್ ದೈವೊಲು ಸಾಲುಂತುಲೆಕಾಂಡ್

ಒರಿ ದರ್ಶನ ಪಾತ್ರಿಗ್ ಒಂಜಿ ದೈವೊಗು ಎಣ್ಣೆ ಆಂಡ ಆಯೆ ನಾಲ್ ಐನ್ ದೈವೊಗು ಕುಂಬರೆರೆ ಇಜ್ಜಿ.ಒಂಜಿ ದೈವೊಗು ಮಾತ್ರ ಓಡೆ ಪೋಂಡಲ ವಸಾಯೊಗುಂತೊಡು.ಅಂಚನೆ ಒರಾನೆ ಆಜೇಳ್ ದೈವೊಲೆಗ್ ಮಾನೆಚ್ಚಿ ಮಲ್ಪುನ ಕಟ್ಟ್ ಲ ಇಜ್ಜಿ.ಒರಿ ದೈವೊಗು ಕಟ್ಟುನಾಯೆ ದೈವೊಗು ಕಟ್ಟುನ ಬುಡ್ಂಡ ಮಾನೆಚ್ಚಿಗ್ ಉಂತೆರೆ ಇಜ್ಜಿ.ಬಲಿಮೆ ಪನೆರೆ ಇಜ್ಜಿ.ಮಾಟ ಕಲೆಯೆರೆ ಇಜ್ಜಿ,ಕಲೆಪುನ ಬೇಲೆ ಮಲ್ಪೆರೆ ಇಜ್ಜಿ.ದರ್ಶನೊಗು ಉಂತುನಕುಲು ಮಾನೆಚ್ಚಿಗ್ ಪೋಪರ್ಡ ಒಂಜಿ ವಾರಾಂಡಲಾ ಮದು ಮಾಸ ಬುಡೊಡು.ವಸಾಯೊಗುಂತುನಗ ಮದ್ದೆನ ಒಂಜಿ ಪೊರ್ತುದ ಒನಸ್ ಮಲ್ಪೊಡು.ಸಿರಿ ಕುಮಾರನಕ್ಲೆಗ್ ಒರಾನೆ ಏಳ್ ಸಿರಿಕುಲೆಗ್ ವಸಾಯ ಬರ್ಪುನಿ.ಅಂಚನೆ ಸಿರಿಕುಲ್ನ ದಲ್ಯೊಡು ಬೆಮ್ಮೆರೆ ಗದ್ದಿಗೆ ಏರುನಿ ಉದಿಪು ದೇವೆರ್ ಕಡಲ್ ಗ್ ಕಂತಿ ಬೊಕ್ಕ.ಸಿರಿಕುಲ್ನೆಟ್ ಕುಮಾರನ ಬೇಟಿ ಸೇಮೆಗಲ್ಲ ಪಂಜುರ್ಲಿನೊಟ್ಟುಗು ಮಾತ್ರ.ತಿಕ್ ನ ದೈವದೊಟ್ಟುಗು  ಬೇಟಿ ಇಜ್ಜಿ.ಸಿರಿನ ಆರಾದನೆ ಬುಡ್ಂಡ ಎಳೇಳ್ ದೈವೊಲೆಗ್ ವಸಾಯ ದೈವಾರಾದನೆಡಿಜ್ಜಿ.ಸಿರಿನ ಕುಮಾರಗ್ ಉಂತುನಕುಲು ಪಂಡ ಆಣ್ ದೈವೊಗು ಉಂತುನಕುಲು ಪೊಣ್ಣು ದೈವೊಗು ಪಿದಯಾವಡ್,ಇಲ್ಲಲಾವಡ್ ದರ್ಶನೊಗು ಉಂತೆರೆ ಬಲ್ಲಿ.ಕೆಲವೆರ್ ಕುಮಾರಗ್ ಉಂತುನಕುಲು ಪಿದಯಿ ಪೋಯಿನಲ್ಪ ಕುಮಾರಗುಂತುದು ಇಲ್ಲಲ್ ಮಂತ್ರಜಾವದೆನ ವದಾಯೊಗುಂತುನಲ ಉಂಡು.ಉಂದು ದೈವದ ಕಟ್ಲೆದ ಪ್ರಕಾರ ಸರಿಯತ್ತ್.ಅಂಚನೆ ಸಿರಿಕ್ ಉಂತುನಕುಲು ಸಿರಿಕೇ ದರ್ಸನೊಗು ಉಂತೊಡು,ಅಬ್ಬಯಗುಂತುನಕುಲು ಸಿರಿಕ್ ಉಂತೆರಾಪುಜಿ.ಸೊನ್ನೆಗುಂತುನಕುಲು ದಾರುಗುಂತೆರಾಪುಜಿ.ಆಯಾ ದೈವೊಗು ಉಂತುನಕುಲು ಅಯಾ ದೈವೊಗೆ ದರ್ಸನೊಗು ಉಂತೊಡು.ಉಂದು ಸಿರಿಕುಲ್ನ ಕಟ್ಟ್.

ನನ ದೈವಾರಾದನೆಡ್ಲಾ ಅಂಚನೆ ಅಳಿಯ ಕಟ್ಟ್,ಮಕ್ಕಳ ಕಟ್ಟ್ಂದ್ ಕಂಟ್ಯೊಂದುಲ್ಲ.ನರಮಾನಿ ಮಲ್ತಿ ಕಟ್ಟುಲೇ ವಿನಃ ದೈವ ಮಲ್ತ್ ನವತ್ತ್.ದೈವ ಓಲ್ಲಾ ಮಕ್ಕಳ್ ಕಟ್ಟ್,ಅಳಿಯ ಕಟ್ಟ್ಂದ್ ಪನೆರೆ ಸಾದ್ಯ ಇಜ್ಜಿ.ದೈವೊಲೆಗ್ ನಂಬಿ ಸಂಸಾರ ಮುಖ್ಯ.ಸಂದಿ ಪಾಡ್ದನೊಲೆಡ್ಲ ಈ ಇಚಾರ ಬರ್ಪುಜಿ.ಪೆದ್ದ್ಂಡ ಅಪ್ಪೆ,ತಾಂಕ್ಂಡ ತಮ್ಮಲೆ ರಡ್ಡ್ ಕಟ್ಟ್ ಡ್ ಲ ಮಾನಾದಿಗೆ ಪಡೆತೆರ್.ಅಂಚಾದ್ ಮಕ್ಕಳ ಕಟ್ಟಾವಡ್,ಅಳಿಯ ಕಟ್ಟಾವಡ್ ದೈವದ ಚಾಕಿರಿದ ಪದಿನಾಜಿ ವರ್ಗೊಡು ಅಕುಲು ರಡ್ಡ್ ಕಟ್ಟ್ ದಕುಲ್ಲಾ ಸೇರ್ದುಲ್ಲೆರ್

      ದೈವದ ಇಚಾರ ತೆರಿಯಂದಿ ಗಟ್ಟದ ಮಿತ್ತ್ ದೈವೊಲೆಗ್ ಕಟ್ಟೆರೆ ಪೋದು ಅಲ್ತಕ್ಲೆಗ್ ತುಳುವ ನಾಡ್ ದ ಕೊಡಿಯಡಿತ ದೈವೊಲು ಆಟ ನಾಟಕದ ವೇಷೊಲಾದ್ ಪೋಯ.ತುಳುನಾಡ ಕೊಡಿಯಡಿತ ಆರಾದನೆದ ದೈವೊಲು ಯಕ್ಷಗಾನೊಡು ವೇಷೊಲಾದ್ ಪೋಯ.ಆರಾದನೆದ ನಂಬೊಳಿಗೆದ ಕಲೆ ಕಾರ್ನಿಕದ ಕೊಡಿಯಡಿತ ದೈವೊಲೆನ್ ಕಲಾಪ್ರಕಾರದ ಬೊಂಬೆಲಾದ್ ಮಲ್ತೆರ್.ಪದಿನಾಜಿ ವರ್ಗೊನು ಒತ್ತಟ್ಟ್ ಡ್ ಉಂತಾದ್ ಪದಿನಾಜಿ ಕಟ್ಲೆಡ್ ಪದಿನಾಜಿ ಕಲೆ ದಿಂಜಿದ್ ಕೊಡಿಯಡಿಟ್ ಉಂತೊಡಾಯಿನ ದೈವೊಲಿನಿ ಅಟ,ನಾಟಕ,ಸಿನೆಮಾದ ಪಾತ್ರೊಲಾದ್ ಪೋಯ.ದೈವದ ಕಲೊಟು ದೈವ ಆವಡ್,ಮುಕ್ಕಾಲ್ದಿ ಆವಡ್ ವಾ ಜಾತಿ ಜನಾಂಗದಕ್ಲೆನ್ಲ ಎಲ್ಯ ಮಲ್ಪೆರೆ ಇಜ್ಜಿ.ಮಾತ ಜಾತಿ ಜನಾಂಗೊಲೆನ್ ಲೆತ್ತ್ ಕೊಂಡಾಡುನಿ.ದೈವ, ಕೂಡಿ ರಾಜ್ಯನಂಬಿ ಸಂಸಾರಂದೆ ಪನ್ಪುನಿ .ನಮ್ಮ ದೈವಾರಾದನೆದ ಮೂಲ ಕಟ್ಲೆ ತತ್ತೊಂದು ಪೋನಗ ಅಡೆಗ್ ಪೊಸತಾದ್ ಬತ್ತ್ ನ ಒಂಜಿ ವರ್ಗ ತುಳುವೆರೆ ದೈವೊಲೆಗಿಜ್ಜಂದಿ ಅಷ್ಟಮಂಗಲ ಪ್ರಶ್ನೆ ದೀದ್,ತುಳುನಾಡ ದೈವೊಲೆಗಿಜ್ಜಾಂದಿ ಬ್ರಹ್ಮ ಕಲಶ ಮಲ್ಪಾದ್ ದೈವದ ಪುದರ್ ನ್ ಪೂರ ಬದಲ್ತ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ತೊಂದು ಪೋಯೆರ್.ದೈವದ ಕೊಡಿಯಡಿತ ಮೂಲ ಚಾಕಿರಿದಕ್ಲೆನ್ ಸುದ್ದಾಚಾರ,ಮಡಿಮೈಲೆಂದ್ ದೂರ ಉಂತಯೆರ್.ನೆತ್ತೆರಾವಾರದ ದೈವೊಲೆಗ್ ಪೊರಿಪೊದ್ದೊಲುದ ತಂಬಿಲ ಕಟ್ಟಾಯೆರ್.ಇತ್ತಿತ್ತೆ ದೈವೊಲೆಗ್ ನೇಮ ದಾಯೆ,ತಂಬಿಲೊಡು ಸುದಾರ್ಪುಗಂದ್ ಪನ್ಪುನಡೆಮುಟ್ಟ ಅಕುಲು ಎತ್ತ್ ದ್ ಬುಡ್ಯೆರ್.ತುಳುನಾಡ ಬೆಮ್ಮೆರೆನ ಪುದರ್ ನ್ ಮುದೆಲ್ ದಾಂತಿನಾತ್ ಅಡಿಕ್ ತರ್ತೆರ್,ವೈದಿಕ ಚತುರ್ಮುಖ ಬ್ರಹ್ಮನ್ ಅಡೆ ಕನತೆರ್.ಅವ್ಲ ಯಾರುಜಿಂದ್ ನಾಗನೊಟ್ಟುಗು ಬೆಮ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗಬ್ರಹ್ಮ ಮಲ್ತೆರ್.ಅವೈದಿಕ ದ್ರಾವಿಡ ತುಳುವ ಕಟ್ಟ್ ದ ಮೂಲ ದೈವಾರಾದನೆ ಸಂಪೂರ್ಣ ಅಡಿ ತತ್ತ್ ದ್ ವೈದಿಕದ ಅನುಕರಣೆಗೆತ್ತ್ ದ್ಂಡ್‌.ಅವೆನ್ ಸರಿ ಮಲ್ಪೆರೆ ಆವಂದಿನಾತ್ ದೂರ ಪೋತ್ಂಡ್.ಅಂಚನೆ ಕಟ್ಟುನಕುಲ್ಲಾ ಅಕ್ಲೆನೊಟ್ಟುಗು ಇತ್ತ್ ನಕ್ಲೆಗ್ ಕೆಲಸ ಆವೊಡುಂದು ಇಲ್ಲಲೊಂಜಿ ದೈವೊಗು ದರ್ಶನ ಮಲ್ಪುನಗ ಕಟ್ಟಿ ನೇಮೊಡು,ನಿಕ್ಲೆ ಇಲ್ಲಡೆ ಒಂಜಿ ಪೊಸ ದೈವ ಬೈದ್ಂಡ್,ನಿಕ್ಲೆ ದೈವೊಗು ಕೊರ್ಪಿ ಅಗೆಲ್ ನ್ ಸ್ವೀಕಾರ ಮಲ್ಪೆರೆ ಬುಡೊಂದಿಜ್ಜಿಂದ್ ನಮನ್ ಮಂಗೆ ಮಲ್ತೊಂದುಲ್ಲೆರ್.  ಕರಿನೆಕ್ ಕಟ್ಟೆ ಕಟ್ಟಂದೆ ಒರಿನೆಕಾಂಡಲ ಕಟ್ಟೆ ಕಟ್ಟುನ ಅನಿವಾರ್ಯತೆ ತುಳುವೆರಾಯಿನ ನಮಕುಂಡು.ಏರ್ ದೈವಾರಾದನೆಡ್ ತಪ್ಪು ಮಲ್ತೆರ್ಡಲ ಅಕ್ಲೆನ್ ಪ್ರಶ್ಬೆ ಮಲ್ಪುನ ಅನಿವಾರ್ಯ ಪರಿಸ್ಥಿತಿ ಬೈದ್ಂಡ್.ಓಡೆಮುಟ್ಟ ಇನಿ ದೈವಾರಾದನೆ ಎತ್ತ್ ದ್ಂಡ್ ಪಂಡ ಬ್ರಹ್ಮ ಸಭೆ,ತಂತಿರ್ದಾರ್,ವೈದಿಕೆರಿಜ್ಜಂದೆ ಕೊಡಿಯಡಿತ ದೈವೊಲೆ ಇಜ್ಜಿ ಪನ್ಪುನಡೆಗ್ ದೈವಾರಾದನೆ ಎತ್ತ್ ದ್ಂಡತ್ತಂದೆ ತುಳುವ ಆಚರಣೆಲಾಯಿನ ಮದಿಮೆ,ಸಾವು ಪೂರ ವೈದಿಕದಡಿಟ್ ನಡತೊಂದುಂಡು ಪಂಡ ಇಡೀ ದೈವಾರಾದನೆದ ವ್ಯವಸ್ಥೆನ್,ತುಳುವ ಆಚರಣೆಲೆನ್,ವೈದಿಕತೆ ಇನಿ ಆಳ್ಯೊಂದುಂಡು.

ಒಂಜಿ ಕುಂದ ನಲ್ಪ ದೈವೊಲು

                       ‌‌ಒಂಜಿ ಕುಂದ ನಲ್ಪ ದೈವೊಲು

     

 ಒಂಜಿ ಕುಂದ/ಕಬೆ ಪಂಡ ಒಂಜೆ ಮಾಡಡಿಟ್ ಒಂಜಾತ್ ದೈವೊಲೆನ್ ಪೂರ್ವ ಹಿರಿಯಾಕ್ಲ್ ನಂಬೊಂದಿತ್ತೆರ್.ಪ್ರತಿಯೊಂಜೆಕ್ಲ ಪೂ ನೀರ್ ದೀಯೆರೆ,ಪನಿವಾರ ಪಾಡೆರೆ ಜಾಗೆದ ಕುಂದೆಲ್ ಇತ್ತ್ ನೆರ್ದಾತ್ರ ಒಂಜಿ ಕುಬಲಡಿಟ್ ಒಂಜಾತ್ ದೈವೊಲೆನ್ ಪುದರ್ ಪಂಡ್ ದ್ ಲೆಪ್ಪಂದೆ ಸಮದಾರಿಕೆಡ್ ನಂಬುದು ಒಂಜಿ ಕುಂದ ನಲ್ಪ ದೈವೊಲು ಪನ್ಪಿ ಪಾತೆರೊನು ಹಿರಿಯಾಕುಲು ಪನೊಂತೆರ್.ಅಂಚನೆ ಒಂಜಿ ಸಾನ ಮಾಡದ ಕಟ್ಟೊನದ ಬೇಲೆ ಆನಗ ಒಂಜೇ ಮರ ಕೊಯ್ದ್ ಅವೆಟೇ ಮಾಡ ಕಟ್ಟೊಂತೆರ್.ಅಂಚಾದ್ ಲ ಈ ಪಾತೆರ ಬತ್ತಿಪ್ಪು.ನನೊಂಜಿ ರೀತಿಡ್ ತೂಪುಂಡ ಕೆಲವೊಂಜಿ ತಿಕ್ ಡ್ ಅರಸು ದೈವೊಲೆ ಮಾಡ ಒಂಜಿ ಕುಂದೊದ ಕೊಡಿಟ್ ರಚನೆಯಾದಿತ್ತ್ ದ್ ಆ ಮಾಡೊಗು ಲೆಂಚಿಡ್ ಪೋದು ನಿನೆ ಪೊತ್ತವೊಂತೆರ್.ಜಾಗೆದ ತತ್ವಾರೊದಾತ್ರ ಕೆಲವೊಂಜಿ ಪರಿವಾರ ಸಕ್ತಿಲೆನ್ ಮೂಲೆ ಸುತ್ತ ಮುತಲಿಗೆಡ್ ನಂಬುದಿಪ್ಪೆರ್.ಅಂಚಾದ್ ಲ ಈ ಪಾತೆರ ಬತ್ತಿಪ್ಪು.ಪಡ್ಢೇಯಿ ಜುಮಾದಿ ಬೊಕ್ಕ ಪರಿವಾರ ಸಗ್ತಿಲು ಒಟ್ಟಿಗೆ ಉಪ್ಪುನೆನ್ಲಾ ಒಂಜಿ ಕುಂದ ನಲ್ಪ ದೈವೊಲುಂದ್ ಲ ಪನ್ಪೆರ್.ಪುತ್ತೂರು,ಸುಳ್ಯದಂಚಿ ಎಚ್ಚ ಈ ಇಚಾರ ತೂಯೆರೆ ತಿಕ್ಕುಂಡು.

ಜಾನಪದ ಸಾಹಿತ್ಯೊದ ಮಾಣಿಕೊದ ಪರೆಲ್ ಬನ್ನಂಜೆ ಬಾಬು ಅಮಿನೆರ್

 ಜಾನಪದ ಸಾಹಿತ್ಯೊದ ಮಾಣಿಕೊದ ಪರೆಲ್ 

            ಬನ್ನಂಜೆ ಬಾಬು ಅಮಿನೆರ್

  

ತುಳುನಾಡ ಜಾನಪದ ವಿದ್ವಾಂಸೆರಾಯಿನ  ನಡತೊಂದು ಪೋಪಿನ ಪೊಲಿಲಪೊಲ್ಸು ಬನ್ನಂಜೆ ಬಾಬು ಅಮಿನೆರ್ನೊಟ್ಟುಗು

            ಸಿರಿ ಕುರಲ್ ಡ್ ನಮ್ಮ ಕಿನ್ಯ ಬರವು

ಅಚ್ಚಿಡ್ ಕೆಲವೊಂಜಿ ಅಕ್ಷರೊಲು ತಪ್ಪಾಯಿನನ್ ಸರಿ ಮಲ್ತ್ ದ್ ಓದ್ ಲೆ