ತುಳು ಬಾಸೆ ತುಳು ಧರ್ಮ ತುಳು ಆಚರಣೆಲು ಅಳಿಯಂತ್ರ ತಾದಿಡ್.....
ದೈವೊಲೆ ಬಾಸೆಡ್ ಬರ್ಪಿ ನುಡಿಕಟ್ಟ್ ತೂಂಡ "ಪೂರ್ವಹಿರಿಯಾಕ್ಲು ಮಲ್ತಿ ಅನಾದಿ ಕಾಲದ ಕಟ್ಟ್", ಪನ್ಪಿ ಸಾಲ್ ಬರ್ಪುಂಡು ಪಂಡ ತುಳುನಾಡ್ ಗ್ ದೇವೆರೆ ಆರಾದನೆ ಬರ್ಪುನ ದುಂಬೇ ತುಳುನಾಡ್ ಡ್ ಬೂತಾರಾದನೆ/ದೈವಾರಾದನೆ(ದೈವಾರಾದನೆ ಪನ್ಪಿ ಸವ್ದ ದೇವೆರೆ ಆರಾದನೆ ತುಳುನಾಡ್ ಗ್ ಬತ್ತಿ ಬೊಕ್ಕ ದೇವೆರ್ ಸವ್ದೊಗು ಪ್ರತಿಯಾದ್ ದೈವ ಪನ್ಪಿ ಸವ್ದ ಬೈದ್ಂಡ್)ಇತ್ತ್ಂಡ್.ಜಾತಿ,ಮತ,ಧರ್ಮ,ಪಂಥ ಮೀರ್ನ ಒಂಜೇ ಒಂಜಿ ಆರಾದನೆ ಪಂಡ ದೈವಾರಾದನೆ.ದೇವತಾರಾದನೆಡ್ ಒಂಜಿ ನಿರ್ದಿಷ್ಠ ಜಾತಿಗ್ ಪ್ರಧಾನ ಚಾಕಿರಿಯಾಂಡ ಒಂಜೆ ಕೊಡಿಯಡಿಟ್ ಮಾತ ಜಾತಿ ಮತ ಧರ್ಮೊಗು ಮಣೆ ಕೊರ್ನ ಒಂಜೇ ಒಂಜಿ ಆರಾದನೆ ಅವು ತುಳುವೆರೆ ಬೆರಿ ಎಲು ದೈವಾರಾದನೆ.ಇನಿತ ಕಾನೂನು ಕಟ್ಟೆ ಬರ್ಪುನ ದುಂಬೇ ನ್ಯಾಯ ತೀರ್ಮಾನ ಮಲ್ತೊಂತಿ ತುಳು ದರ್ಮ ಚಾವಡಿ ಇತ್ತ್ ನಿ ತುಳುನಾಡ್ ಡ್.ಅಂಚಿತ್ತಿ ಮಾನವೀಯ ನಿಲೆತ ತುಳು ಧರ್ಮೊನು ಒವ್ವೇ ಸಂಘ,ಸಂಸ್ಥೆ,ಸಂಘಟನೆಡ್ ಕಟ್ಟ್ ಪಾಡ್ಯೆರೆ ಸಾಧ್ಯ ಇಜ್ಜಿ.ತುಳುಕು ನಿರ್ದಿಷ್ಟವಾಯಿನ ಕೊಡಿಯುಂಡು,ಕೊಡಿಯಡಿಯುಂಡು.ಸರ್ವ ಜಾತಿ ಮತ ಧರ್ಮೊಲೆನ್ ಮಾನಿತೊನ್ನ ತುಳುವೆರ್ ಓಲ್ಲಾ ಒಂಜಿ ನಿರ್ದಿಷ್ಟ ಸಂಘಟನೆಲೆಡ್ ಗುರ್ತಿಸಯಿನಕುಲತ್ತ್.ಅಕ್ಲ್ ಕೇಂಡೊಂದು ಬುಳೆಯಿ ದೈವೊದ ಒಂಜಿ ಸೊರೊ" ಕೂಡಿ ರಾಜ್ಯ ನಂಬಿ ಸಂಸಾರ".ಅಂಚಾದಿಪ್ಪುನಗ ನಮ ಬೇತೆನೇ ಒಂಜಿ ಸಂಘ ಸಂಘಟನೆದೊಟ್ಟುಗು ಅರ್ಕಟ್ಟ್ ಪಾಡೊನುನ ಬದಲ್ ನಮ್ಮ ಹಿರಿಯಾಕುಲು ಪಾಡ್ ದ್ ಕೊರ್ನ ಬದ್ ಕ್ ದ ಪದಿನಾಲ್ ಕಟ್ಟ್ ಕಟ್ಲೆಲೆನ್,ದೈವಾರಾದನೆದ ಪದಿನಾಜಿ ಕಟ್ಟ್ ಕಟ್ಲೆಲೆನ್ ಒರಿತೊನುನ ಅನಿವಾರ್ಯ ನಮಕುಂಡು.
ಬನತ ಪುಂಚೊಡು ಆರಾದನೆ ಮಲ್ತೊಂತಿ ನಾಗನ್ ಸರ್ಪ ಕೋಲ ಕೊರ್ದು, ನಾಗ ಕೋಲ ಕೊರ್ದು ಮಾನಿತೊನ್ನಕುಲು ನಮ ತುಳುವೆರ್.ತುಳು ನಾಡ್ ಗ್ ಬೇತೆ ಬೇತೆ ಕಾಲಗಟ್ಟೊಡು ಬೇತೆ ಬೇತೆ ಮತ ದರ್ಮ ಪಂಥೊಲು ಬನ್ನಗ ತುಳುವೆರೆಗ್ ಅವು ಇಷ್ಟಾವೊಂದು ಪೋಂಡು,ಮುಲ್ತ ತುಳು ಮಣ್ಣ್ ದ ಸಂಸ್ಜೃತಿದ ಒಂಜೊಂಜೇ ಮೊಟ್ಟು ಜರಿಯೊಂದು ಪೋಂಡು.ತುಳುವ ಮೂಲದ ಬೆಮ್ಮೆರೆನ್ ಪಿದಯಿರ್ದ್ ಬತ್ತ್ ನಕುಲು ಬ್ರಹ್ಮ ಪನ್ನಗ ನಂಕ್ ಕೊಸಿಯಾಂಡ್.ಬೆಮ್ಮೆರ್ ಸವ್ದ ಮಯಕಾಂಡ್.ಇನಿ ಬೆಮ್ಮೆರೆ ಬದಲ್ ಗ್ ಬ್ರಹ್ಮಲಿಂಗೇಶ್ವರೆ,ಮಹಾಲಿಂಗೇಶ್ವರೆ,ಅನಂತೇಶ್ವರೆ,ಬೂತನಾಥೇಶ್ವರೆ ಬತ್ತೆರ್.ಬೆಮ್ಮೆರೆ ಗುರ್ತನೇ ತುಳುವೆರೆಗ್ ಮದತ್ ಪೋಪುನಾತ್ ಬೆಮ್ಮೆರ್ ಮೂಲೆ ಸೇರ್ಯೆರ್.ಬೂತಾಳ ಪಾಂಡ್ಯ ರ್ದ್ ಅಳಿಯ ಕಟ್ಟ್ ಉಂಡಾಂಡ್ಂದ್ ನಮ ಓದಿನ ನೆಂಪು.ಆಂಡ ಒಂಜಿ ವ್ಯಕ್ತಿ ಇಡೀ ಸಮಾಜದ ಒಂಜಿ ಕಟ್ಲೆನ್ ಮಲ್ಪೆರೆ ಸಾಧ್ಯ ಇಜ್ಜಿ.ಅಪಗ ಆಯರ್ದ್ ದುಂಬು ತುಳುವೆರಿಜ್ಜಾಂಡಾ?.ಅಕ್ಲೆಗೊಂಜಿ ಬದ್ ಕ್ ದ ಕಟ್ಟಿಜ್ಜಾಂಡಾ?.ಉಂದು ಅಲಚನೆ ಮಲ್ಪೊಡು.ಉಂದುಲಾ ತುಳುವೆರೆರ್ದ್ ಉದಿತಿ ಕಟ್ಟಾದಿಪ್ಪಂದ್.
ತುಳುನಾಡ್ ಗ್ ಬೌದ್ದ,ಜೈನ,ಶೈವ,ವೈಷ್ಣವ,ಶಾಕ್ತ,ಗಾಣಪತ್ಯ,ಸ್ಕಂದ,ಸೌರ ಇಂಚ ಬೇತೆ ಬೇತೆ ಮತ ಧರ್ಮೊಲು ಬತ್ತ.ಆಂಡ ತುಳುವೆರ್ ಉಂದು ಒಯ್ಕ್ ಲ ಸೇರ್ನಕುಲು ಅತ್ತ್.ಉಂದು ಬರ್ಪುನ ದುಂಬೇ ತುಳುವೆರಿತ್ತೆರ್,ತುಳುನಾಡಿತ್ತ್ಂಡ್.ತುಳುವೆರೆಗ್ಂದ್ ಅಕ್ಲೆನವೇ ಆಯಿನ ತುಳು ಧರ್ಮ ಇತ್ತ್ಂಡ್,ಅಕ್ಲೆಗ್ ತುಳುವೇ ಸರ್ವಸ್ವ ಆದಿತ್ತ್ಂಡ್ ವಿನಃ ಸಂಸ್ಕೃತ ಮಂತ್ರ ತಂತ್ರೊಲಾವಡ್,ದೇವೆರಾವಡ್ ಗೊತ್ತಿಜ್ಜಾಂಡ್.ಅವು ಪೂರ ಮತ ಧರ್ಮೊಲ್ನೊಟ್ಟುಗು ತುಳುನಾಡ್ ಗ್ ಬತ್ತ್ಂಡ್.ಪ್ರಕೃತಿ ಆರಾದಕ ತುಳುವೆರೆಗ್ ಪೂರಲ ಬೆಮ್ಮೆರೆ ಆದಿತ್ತೆರ್.ಮೂಲತಾನ,ಆದಿ ಆಲಡೆ,ಬನೊಕ್ಲೆಡ್ ಇನಿಕ್ಲಾ ತುಳುವೆರೆ ಆರಾದ್ಯ ದೈವ ಬೆಮ್ಮೆರುಲ್ಲೆರ್ ವಿನಃ ದೇವೆರಿಜ್ಜೆರ್.ಇಡೆ ಬತ್ತಿ ಮತ ಧರ್ಮೊಲ್ನ ಎಡ್ಡೆಂತಿನೆನ್ ತುಳುವೆರ್ ದೆತೊಂಡೆರ್‌.ಆಂಡ ತುಳುವೆರೆ ನ್ ಓಲು ಎಂಚ ಸೋಪಾವೊಲಿಂದ್ ಲೆಕ್ಕ ಪಾಡ್ನಕುಲು ಸುರುಕು ನಾಗನ್ ದೆತೊಂದು ತುಳುವೆರೆಗ್ ಇಜ್ಜಾಂದಿ ದೋಸೊಲೆನ್ ಪಂಡ್ ದ್ ಪೋಡಿಕಟ್ಟಾಯೆರ್.ಉಂದೆರ್ದಾದ್ ತುಳುವೆರೆಗ್ ಸುರುಕು ಪೆಟ್ಟ್ ಬೂರ್ನಿ ಅಕ್ಲೆ ನಾಗಾರಾದನೆಗ್.ರಡ್ಡನೇ ಪೆಟ್ಟ್ ಪಾಡ್ನಿ ತುಳುವೆರೆ ದೈವಾರಾದನೆದ ಮಿತ್ತ್.ಬೊಕ್ಕ ತುಳುವೆರೆ ಒಂಜೊಂಜೇ ಆಚರಣೆಲೆನ ಮಿತ್ತ್ ಸವಾರಿ ಮಲ್ತ್ ದ್ ತುಳುವೆರೆಗ್ ಮೂಲದ ಆಚರಣೆ ದಾದಂದೆ ಇನಿ ತೆರಿಯಂದಿಲೆಕಾತ್ಂಡ್.ಪೊಸ ಪೊಸ ಪ್ರಶ್ನೆ ಚಿಂತನೆದಕುಲು ಪುಟ್ಟೊಂಡೆರ್.ಅಕ್ಲೆ ಬಂಜಿ ದಿಂಜಾಯೆರೆ ಅಷ್ಟಮಂಗಲ,ತಾಂಬೂಲ,ಸ್ವರ್ಣ ಪ್ರಶ್ನೆಂದ್ ವಾರಗಟ್ಲೆ ಪ್ರಶ್ನೆ ದೀಯೆರ್,ತುಲುವೆರೆ ನೆತ್ತೆರೊಯ್ತೆರ್. ದೇವೆರತ್ತಂದಿ ದೈವೊನು ದೇವೆರ್ ಮಲ್ತ್ ದ್ ಬ್ರಹ್ಮ ಕಲಶ ಮಲ್ಪಾಯೆರ್.ಈ ಗೌಜಿ ತುಳುವೆರೆಗಿಷ್ಟ ಆಂಡ್.ಮೊಕ್ಲು ನಮ್ನ ಆರಾದನೆ ಪನ್ಪಿ ಮರತ ಮುದೆಲ್ ಗ್ ಮಡು ಪಾಡ್ಯೆರ್ ಪನ್ಪುನವು ನಮಕ್ ತೆರಿಯಂದೆ ಪೋಂಡು.ತುಳುವೆರ್ ಬನೊಟು ಪುಂಚೊಡು,ಕಲ್ಲ್ ಡ್ ನಾಗನ್ ಅಕ್ಲಕ್ಲೇ ಪೋದು ಆರಾದನೆ ಮಲ್ತೊಂತಿನಕುಲು.ವರ್ಸದ ಒಂಜಿ ನಿರ್ದಿಷ್ಟ ದಿನ,ಪಂಡ ಎಚ್ಚ ಬೇಸದ ಕಾಚೆಲ್ದಪಗ ಬನೊಕು ಪೋದು ನಾಗನ್ ನಂಬೊಂತೆರ್.ನಾಗನ್ ದೈವ ಆದ್ ಕೋಲ ಕೊರ್ದು ಆರಾದನೆ ಮಲ್ತೊಂತೆರ್.ಇಡೀ ದೇಶೊಡು ಪುರಾಣ ಕಲ್ಪನೆದ ದೇವೆರೆ ಆರಾದನೆ ಇತ್ತ್ಂಡಲ ತುಳುನಾಡ್ ಡ್ ಅನಾದಿಡ್ದೇ ದೈವೊಲೆ ಆರಾದನೆನೇ ಇತ್ತ್ ನಿ.ತುಳುವೆರ್ ದೈವ ದೇವೆರ್ ದೀಲೆಕಂದೇ ಪನೊಂತ್ ನಿ.ತುಳುವೆರೆ ದೈವ ಆರಾದನೆದ ಮುದೆಲ್ ಗ್ ಏಪ ದೇವೆರೆ ಆರಾದನೆದಕ್ಲೆ ಸೇರಿಗೆ ಆಂಡ ಸುರುಕು ಪೆಟ್ಟ್ ಬೂರ್ನಿ ನಾಗಾರಾದನೆದ ಮಿತ್ತ್.ಆತ್ ಪೊರ್ತುಗಾನಗನೇ ತುಳುವೆರೆಗ್ ನಿಮಿತ್ತ ನೋಟದ ಬಲ್ಯಾಯನಕುಲು ಮದತ್ ಪೋಯೆರ್.ಪೊಸತಾದ್ ಪಿದಯಿರ್ದ್ ಬತ್ತಿ ಪ್ರಶ್ನೆ ಚಿಂತನೆದಕುಲು ತುಳುವೆರೆಗ್ ಕೈತಲಾಯೆರ್.ಪಿದಯಿರ್ದ್ ಬತ್ತ್ ನಕ್ಲೆಗ್ ಮುಲ್ತ ಕಟ್ಟ್ ಕಟ್ಲೆ ತೆರಿಯಂದೆ ಅಕುಲು ತುಳುವೆರೆ ಪರ ಉಂತಂದೆ ಅಕ್ಲೆ ಜಾತಿ ಜನಾಂಗೊಗು ಉಪಕಾರ ಆಪುಲೆಕ ತೂಯೆರ್.ಆನಿರ್ದ್ ಬೊಕ್ಕ ದೈವ ಆದ್ ನಂಬೊಂತಿ ನಾಗನ್ ಪ್ರಶ್ನೆ ಚಿಂತನೆದಕುಲು ನಾಗ ದೇವೆರ್ ಮಲ್ತ್ ಬುಡ್ಯೆರ್.ತುಳುವೆರೆಗ್ ಐನ್ ಕೇನೆರ್ಲಾ ಕೊಸಿಯಾಂಡ್.ಅಲ್ತ್ ರ್ದ್ ಬೊಕ್ಕ ಪೊಸತಾದ್ ಬತ್ತ್ ನಕುಲು ನಾಗನ ಬನೊನು ಕಡ್ಪಾದ್ ನಮ ನಂಬೊಂತಿ ಪ್ರಕೃತಿನ್ ನಮ್ಮ ಕೈಟೇ ನಾಶ ಮಲ್ಪಾಯೆರ್,ಬನತ ಪುಂಚ ಗರ್ಪಾದ್ ಅಡೆಗ್ ಸಿಮೆಂಟ್ ದ ಕಟ್ಟೆ ಕಟ್ಟಾಯೆರ್.ಕಟ್ಟೆ ಕಟ್ಟಾಯಿನಕುಲು ನಮ,ಕರ್ಚಿ ಮಲ್ತ್ ನಕುಲು ನಮ,ಆಂಡ ಕಟ್ಟೆದುಲಯಿ ಪೂಜೆಗ್ ಮಾತ್ರ ಅಕುಲು,ನಮ ನಾಗನ ಕಟ್ಟೆದ ಪಿದಯಿ ಬೂರ್ಯ.ಮೂಲು ಸುರುತ ಸರ್ತಿ ನಾಗಾರಾದನೆಡ್ ಸೋತು ಪೋಯ..ಮೂಲ ಪನ್ಪಿ ಕಲ್ಪನೆ ಇಜ್ಜಂದಿ ತುಳುವೆರೆಗ್ ನಾಗಮೂಲಂದ್ ಪನ್ಪಿ ಕಲ್ಪನೆ ಪುಟ್ಟಯೆರ್,ನಾಗದೋಸ,ಕಾಳಸರ್ಪ ದೋಸಂದ್ ಪೋಡ್ಯಾದ್ ತುಳುವ ಕಟ್ಟ್ ಡ್ ಇಜ್ಜಾಂದಿ ಪೂಜೆ ಮಂಡಲಂದ್ ತುಳುವೆರ್ ಕೈಕಾರ್ ಬುಡ್ಪುಲೆಕಾಂಡ್.ಆತೇ ಅತ್ತ್ ದಾದಾಂಡಲ ಬದ್ ಕೆರೆ ತುಳುವೆರೆಗ್ ಸಾಯ ಆವೊಂತಿ ಕಂಗ್ ದ ಸಾರ ಸಾರ ಪಿಂಗಾರ ಪಾಳೆಲೆನ್ ನಾಗಮಂಡಲಂದ್ ಮೋನೆಗ್ ಉರ್ದುದು ದಕ್ಕ್ ಯೆರ್.ಈ ಮಂಡಲ ಬಲಿಕುಲು ಪೂರ ಬರ್ಪುನ ದುಂಬೇ ಪೊಂಜನಕುಲು ತರೆಕ್ ಪಿಂಗಾರ ಪೂ ದೀವೊಂತೆರ್.ಅಕುಲು ಏರ್ಲಾ ಪೆದ್ದಂದೆ ಕುಲ್ಲೊಂದಿಜ್ಜಾಂಡ್.ಪಿಂಗಾರ ಪುರ್ಪದ ಕಮ್ಮೆನೊಗು ಸಂತಾನ ಕೊರ್ಪುನ ತಾಕತ್ತಿತ್ತ್ಂಡ್.ನಾಗದೋಸೊಡು ಸಂತಾನ ನಿಕ್ಲಗ್ ಆವೊಂದಿಜ್ಜಿಂದ್ ಪೋಡಿಕಟ್ಟಾದ್ ನಾಗಮಂಡಲ ಮಲ್ಪಾಯೆರ್.ಮೂಲ್ಲಾ ಪಿಂಗಾರದ ಕಮ್ಮೆನೊನೆ ಸಂತಾನದ ತಾಕತ್ತ್ ಗ್ ಸಾಕ್ಷಿಯಾಪುನಿ ಪನ್ಪಿ ಕಿನ್ಯ ಇಚಾರೊನೇ ತುಳುವೆರೆಗ್ ತೆರಿಯಂದೆ ಪೋಂಡು.ಇತ್ತೆ ಮಾತ್ರ ಈ ಬಗೆಟ್ ಒಂತೆ ತುಳುವೆರೆಗ್ ಎಚ್ಚರ್ಗೆ ಆತ್ಂಡ್
ತುಳುವೆರೆಗ್ ದೈವಾರಾದನೆ ಮೂಲೊಡಿತ್ತ್ ನವು.ಅವೆನ್ ದೇವೆರೆ ಆರಾದನೆದೊಟ್ಟುಗು ಸಾರ್ವತ್ರಿಕ ಮಲ್ಪುನ ಸರಿಯತ್ತ್.ದಾಯೆ ಪಂಡ ಅವೆಕ್ ತುಳುನಾಡ ಗಡಿಪುಡೆ ಬುಡ್ದು ವ್ಯಾಪ್ತಿ ಇಜ್ಜಿ.ಅವು ತುಳುವ ಬದ್ ಕ್ ಗ್ ಪೂರಕವಾದಿಪ್ಪುನ ಆರಾದನೆ ಮಾತ್ರ.ಗಣಪತಿ ರಾವ್ ಐಗಳ್, ಬಿ.ಯಸ್.ಸಾಲೆತೊರೆ ,ಪಾದೂರು ಗುರುರಾಜ ಭಟ್,ಪೊಳಲಿ ಶೀನಪ್ಪ ಹೆಗಡೆ, ಕೆ.ವಿ ರಮೇಶ ಮೊಕ್ಲೆನ ಚರಿತ್ರೆದ ಬೂಕುಲೆಡ್ ಚೌಟೆರ್ , ಬಂಗೆರ್, ಅಜಿಲೆರ್ ತೊಳಹಾರೆರ್ದ್ ರಾಜ ಮನೆತನೊಲೆನ್ ಪಂತೆರತ್ತಂದೆ ಮೊಕ್ಲೆನ್ ಹಿಂದುಲುಂದು ಓಲ್ಲಾ ಪಂತಿಜೆರ್. ನಮ್ಮವುಲು ತುಳುವೆರ್, ಪಲ್ಲವೆರ್, ಪಾಂಡ್ಯೆರ್, ಕದಂಬೆರ್, ಚೋಳೆರ್ , ಪೇಶ್ವೆಲು, ಮಾತಾ ಇತ್ತೆರ್; ಹಿಂದುಲುಂದು ಓಲ್ಲಾ ತೋಜುಜೆರ್. ಪಂಡ ರಾಜೆರ್ನ ಕಾಲೊಡು ಮಾತೆರ್ ಒಟ್ಟಾದ್ ಬದ್ ಕೊಂತೆರ್. ಆಲಿ ಬೂತ, ಬಬ್ಬರ್ಯ ಬೂತೊಲೆನ್ಂದ್ ಮಾತಾ ಜಾತಿ ಜನಾಂಗದಕುಲು ದೈವ ಅಯಿನೆನ್ಲಾ ತುಳುವೆರ್ ನಂಬಿನಕುಲು.ಅಕುಲ್ನ ತುಳು ಧರ್ಮೊಡು ಮಾತೆರೆಗ್ ಮಾನಾದಿಗೆ ಇತ್ತ್ಂಡ್.ತುಳುವ ಧರ್ಮೊಡು ಮೀನ್ ಮಾಸ ತಿನ್ಪುನಕುಲ್ಲಾ ಉಲ್ಲೆರ್ ,ತಿನಂದಿನಕುಲ್ಲಾ ಉಲ್ಲೆರ್.ಅಂಚಾಂದ್ ಅಕ್ಲೆನೊಟ್ಟುಗು ಮೊಕ್ಲೆನ್ ಓಲ್ಪಡಿ ಮಲ್ಪೆರೆ ಬಲ್ಲಿ.ಅಂಚಾದ್ ಬೇತೆ ಬೇತೆ ಸಂಸ್ಕೃತಿ,ಅಚಾರ ಇಚಾರೊಲಿಪ್ಪುನ ನಮ್ಮ ದೇಸೊನು ಒಂಜಿ ನಿರ್ದಿಷ್ಟ ದರ್ಮೊಡು ಕಟ್ಟ್ ಪಾಡೆರೆ ಆಪುಜಿ.ಅಂಚ ಮಲ್ಪುನಲಾ ತಪ್ಪು.ಅವ್ವವು ಅಲ್ತಡೆಗಡೆಗ್ ಪೊರ್ಲು
ಅಂಚನೇ ಪ್ರಶ್ನೆ ಚಿಂತನೆದಕುಲು ಒಂಜೊಂಜೇ ದೈವದ ಪುದರ್ ನ್ ಬದಲ್ತೊಂದು ಪೋದು ತುಳುವೆರೆ ಸಾನದೊಕ್ಕೆಲ್ ಮಯಕಾದ್,ಪೂ ಪೂಜನೆ ಮಯಕಾದ್ ಅಡೆಗ್ ಅಷ್ಟಮಂಗಲ ಪ್ರಶ್ನೆ,ತಾಂಬೂಲ ಪ್ರಶ್ನೆ,ಬ್ರಹ್ಮ ಕಲಶ,ಪೂಜೆ,ಹೋಮ,ಆರತಿಲು ಬತ್ತ.ದೈವೊಲೆಗ್ ಪೂರ ದೇವೆರೆ ಪೂಜೆ ಪುನಸ್ಕಾರ ಮಲ್ತೆರ್.ನಿಜವಾದ್ ಏರ್ ಮುಗ ಮೂರ್ತಿ ಮಲ್ತೆರಾ ಆ ವಿಶ್ವಕರ್ಮೆರೆಗ್ ಮಾತ್ರ ಆ ದೈವ ದೇವೆರೆನ್ ನಿಲೆ ಮಲ್ಪೆರೆ ಸಾದ್ಯ.ದೈವಲ ಅಂಚನೆ ನೂಲು ಪಾಡಿ ಸಂಸಾರಂದ್ ಅಚಾರಿನಕ್ಲೆನೇ ಲೆತ್ತೊಂತ್ ನಿ.ಕಾಲಾನುಬಾಗೊಡು ನೂಲು ಪಾಲ್ ಬ್ರಹ್ಮಕುಲಂದ್ ಲೆಪ್ಪೆರೆ ಸುರು ಮಲ್ತೆರ್.ಬೊಕ್ಕ ಬ್ರಹ್ಮ ಕುಲ ಕೈ ಸೇರ್ದೆರಾಂದ್ ಲೆಪ್ಪೆರೆ ಸುರು ಮಲ್ತೆರ್.ಇತ್ತೆ ನೇರ ತಂತಿರ್ದಾರೇಂದ್ ದೈವ ಲೆತ್ತೊಂದುಂಡು.ನಿಜವಾದ್ ದುಂಬು ನೆತ್ತೆರಾವಾರದ ದೈವದ ಕೊಡಿಯಡಿಕ್ ಬ್ರಹ್ಮ ಕುಲ ಬರ್ರೆ ಇಜ್ಜಾಂಡ್.ಮಾತ ಜಾತಿ ಮತ ದರ್ಮದಕುಲು ಒಟ್ಟು ಸೆರ್ದ್ ನಡಪಾವೊಂತಿ ದೈವಾರಾದನೆದ ದೈವೊಗು ಸಂಕ್ರಾಂತಿ ಕರಿಪೆರೆ ಸಾನದುಲಯಿ ಪೊಗ್ಗಿನ ನೂಲುಪಾಲ್ ಸಂಸಾರ ಪಾಗರದುಲಯಿ ನಡತೊಂತಿ ನೇಮದ ದೈವೊಲೆನ್ ಪಾಗರದ ಪಿದಯಿ ಪಾಡ್ಪಾಯೆರ್.ಅಕುಲು ಇಲ್ಲದುಲಯಿ ಪೊಗ್ಗುದು ಇಲ್ಲದುಲಯಿದ ಯಜಮಾನನ್ ಪಿದಯಿ ಪಾಡ್ಲೆಕಾಂಡ್.ಆಂಡಲಾ ತುಳುವೆರ್ ಅಕ್ಲೆ ಪಾತೆರೊಗು ತರೆ ಆಡಾವೊಂದೇ ಪೋಯೆರ್.ಕೇಂಡ ಬ್ರಹ್ಮ ಶಾಪ ತಾಗುಂಡುಂದು ಪೋಡಿದ್ ತುಳುವೆರೆ ಮುಲ ದೈವಾರಾದನೆ ಅಡಿ ಪತ್ತ್ಂಡ್. ಅಂಚನೆ ದೈವದ ಮುಗ ಮೂರ್ತಿಲೆನ್ ಪೂರ ಕರಪಾದ್,ಆಯುದೊಲೆನ್ ಪೂರ ತುದೆಕ್ ಪಾಡ್ಪಾದ್ ನನ ದುಂಬು ನಿಕ್ಲೆನ ದೈವಾರಾದನೆಗ್ ದಾದ ಪಿರಾಕುಂಡುಂದು ಕೇಂಡ ನಮ ತರೆ ಅಡಿಕ್ ಪಾಡ್ದ್ ಕುಲ್ಲೊಡಾತೆ.ನಮ್ಮ ಜುಟ್ಟುನು ಬೆತೆಕ್ಲೆ ಕೈಟ್ ಕೊರ್ದು ನಮ ಇನಿ ಅಕ್ಲೆನ ಸೂತ್ರದ ಗೊಂಬೆಲಾದ್ ಪೋತ.ಇನಿ ದೈವೊಲೆನ್ ಪೂರ ದೇವೆರ್ ಮಲ್ಪೆರೆ ಪಿದಡ್ದ್,ಇನಿ ದೇವೆರೊಟ್ಟುಗು ದೈವೊಲೆನ್ ಸೇರಾದ್ ಸಾರ್ವತ್ರಿಕ ಮಲ್ಪೆರೆ ಪಿದಾಡ್ದೆರ್.ಅಕುಲು ನಮ್ಮ ದೈವೊನು ದೇವೆರ್ಂದ್ ಪನ್ನಗ ನಮಕ್ ಕೊಸಿಯಾಂಡ್.ದೈವದ ಕಲೊಟು ದೇವೆರ್ಂದ್ ದೈವೊಗು ಬಜನೆ ಸುರು ಮಲ್ತ.ದೈವೊಲೆ ಬಂಡಿ ಮಯಕಾದ್ ಅಡೆಗ್ ತೇರ್ ಬೈದ್ಂಡ್.ದೈವೊನು ದೇವೆರೆ ಪುದರ್ಡ್ ಲೆಪ್ಪೆರೆ ಸುರು ಮಲ್ತಿ ಬೊಕ್ಕ ನಮ್ಮ ಹಿರಿಯಾಕ್ಲು ದೀನ ಮೂಲ ದೈವದ ಪುದರ್ ಸಂಪೂರ್ಣ ಮಾಜಿದ್ ಪೋಂಡು ಪನ್ಪಿ ಸಾಮಾನ್ಯ ಗೇನಲ ತುಳುವೆರೆಗ್ ಬರಂದೆ ಪೋಂಡು.ತುಳುವ ಕಟ್ಟ್ ಕಟ್ಲೆಡ್ ಮಾತೆರಪ್ಪ ಕೂಡ್ದು ಮಲ್ತೊಂತಿ ದೈವಾರಾದನೆಗ್ ಹಿಂದುತ್ವದ ಕಲ್ಪನೆ ಬತ್ತ್ಂಡ್.ಈ ಇಚಾರೊಲು ದುಂಬು ದೈವದ ಕಲೊಟಿಜ್ಜಾಂಡ್.ಕೊಡಿಯಡಿ,ಚಾಕಿರಿ ಬಾಗೊಗು ಪೂರ ಬೊಲ್ದು ತುತ್ತೈತ ಇತ್ತ್ಂಡ ದೈವದ ತುತ್ತೈತ ಪೂರ ಕೇಪುಲು ರಂಗಾದಿತ್ತ್ಂಡ್.ಇನಿ ಅಡೆಗ್ ಕೇಸರಿ ಬೈದ್ಂಡ್.
ಅಲಂಕಾರೊಗು ಕಟ್ಟುನ ಪೂರ ಕೇಸರಿಯಾಂಡ್.ಚಾಕಿರಿದಕ್ಲೆ ತುತ್ತೈತಲ ಕೇಸರಿಯಾಂಡ್.ಕಟ್ಟುನಕುಲ್ಲಾ ತುಳುನಾಡ ಗಡಿಪುಡೆತ ಬಗೆಟ್ ಗೇನದಾಂತೆ ಎಂಕುಲು ಹಿಂದುಲು,ಭಾರತದ ಓಲು ಬೋಡಾಂಡಲ ಕಟ್ಟುವ ಪನೊಂದುಲ್ಲೆರ್.ಹಿಂದೂ ಪನ್ಪಿ ಪರಿಕಲ್ಪನೆ ಬರ್ಪುನ ದುಂಬೇ ತುಳುನಾಡ್ ಡ್ ದೈವಾರಾದನೆ ಇತ್ತ್ಂಡ್ ಪನ್ಪುನೆನ್ ಮೊಕುಲು ಮದತ್ಲೆಕ ತೋಜುಂಡು.ಅವೆತ ಬದಲ್ ಮೂಲು ದೈವಾರಾದನೆಗ್ ಆವೊಂದಿಪ್ಪುನ ತಪ್ಪುನು ಪ್ರಶ್ನೆ ಮಲ್ಪುಜೆರ್.ದೈವದ ಕಲೊಟು ರಾಮೆ ಕೃಷ್ಣೆ ಉಲ್ಲೆರ್ಂದ್ ದೈವಾರಾದೆನ್ ದೇವೆರೆ ಆರಾದನೆಗ್ ಓಲ್ಪಡಿ ಮಲ್ಪುನ ಸರಿಯತ್ತ್.ದಾಯೆ ಪಂಡ ತುಳುನಾಡ್ ಬುಡ್ದು ದೈವಾರಾದನೆ ಇಜ್ಜಿ.ಇನಿ ಕಾಸ್ ಗ್,ಪುದರ್ ಗ್ ಬೋಡಾದ್ ಒಲ್ಪಲ ಮಲ್ಪೆರ್ಲ ಯಾವು.ವಾ ವಾ ಕಲೊಕು ಒವ್ ಒವ್ ಉಪ್ಪೊಡೊ ಅವಿತ್ತ್ಂಡ ಮಾತ್ರ ಪೊರ್ಲು.ಬದಲಾವಣೆ ಪ್ರಕೃತಿ ನಿಯಮ.ಅಂಚಾಂದ್ ಒಂಜಿ ಮೂಲ ನಂಬೊಳಿಗೆ,ಆರಾದನೆ ,ಆಚರಣೆಲೆನ್ ಪೊಲಿತ್ ದ್ ಅವೆತ ಮಿತ್ತ್ ಸವಾರಿ ಮಲ್ಪುನ ಪೊಸ ಆಚರಣೆ ನಮಕ್ ಖಂಡಿತಾ ಅಗತ್ಯ ಇಜ್ಜಿ.
ತುಳು ನಾಡ ಅಪ್ಪೆ ಕಟ್ಟ್(ಮಾತೃಪ್ರದಾನ), ಅಮ್ಮಕಟ್ಟ್(ಪಿತೃಪ್ರದಾನ)ಲೆಡ್ ಮೂಲ ತುಳುವ ಆಚರಣೆದ ಕೆರಮೊಲು ಬೇತೆನೇ ಇತ್ತ್ ದ್ ಅಪ್ಪೆ ಕಟ್ಟ್ ಡ್ ಪುಟ್ಟುರ್ದು ಸೈಪುನಡೆಮುಟ್ಟ ಆಚರಣೆಲೆಡ್ ಮಡ್ಯೆಲೆರೆಗ್,ಬಂಡಾರಿಲೆಗ್ ಬಾರೀ ಮಾನಾದಿಗೆ ಇತ್ತ್ಂಡ್.ಆ ಆಚರಣೆದ ಮುದೆಲ್ ಗ್ ವೈದಿಕ ಆರಾದನೆ ಬತ್ತಿ ಬೊಕ್ಕ ತುಳುವ ಕಟ್ಟ್ ಡ್ ನಡತೊಂತಿ ಅವೈದಿಕ ಆಚರಣೆ ಮದತ್ ದೇ ಪೋತ್ಂಡ್.ಸ್ವರ್ಗ ನರಕ,ಪಿಂಡ ಬುಡ್ಪುನ,ಪುನರ್ಜನ್ಮ ತುಳುವ ಕಟ್ಟ್ ಡ್ ಒವುಲಾ ಇಜ್ಜಾಂಡ್.ನಮ ಕರಿದ್ ಪೋಯಿ ಬೊಕ್ಕ ನಮ ನಂಬಿ ದೈವೊಲೆ ಕೈಕ್ ಕೊರೊಂತ.ಇನಿ ಪಿಂಡ ಬುಡ್ದು ಕುಡ ನಮ ಉಲಯಿ ಲೆಪ್ಪುವ ಪಂಡ ಈ ಆಚರಣೆಗ್ ಅರ್ಥನೇ ಇಜ್ಜಿ.
ವರ್ಸದ ಪದ್ರಾಡ್ ತಿಂಗೊಲ್ಡು ನಡತೊಂತ್ ನ ತುಳುವ ಆಚರಣೆಲೆನ ಬಗೆಟ್ ನಮಕ್ ನೆಂಪಿಜ್ಜಿ.ಪೊಸತಾದ್ ಬತ್ತ್ ನ ಸತ್ಯನಾರಾಯಣ ಪೂಜೆ,ವರಮಹಾಲಕ್ಷ್ಮಿ ಪೂಜೆ,ಶನೈಶ್ಚರ ಪೂಜೆದ ಬಗೆಟ್ ನಮಕ್ ಎಸಲೆಸಲ್ ಗೊತ್ತುಂಡು.ಆಂಡ ಕೆಡ್ಡಸ ಪಂಡ ದಾದ,ಪತ್ತನಾಜೆ ಪಂಡ ದಾದ,ಸಂಕ್ರಾಂತಿ ಪಂಡ ದಾದ ನಮಕ್ ಮದತೇ ಪೋತ್ಂಡ್.ತುಳುವಾಲ ಬಲಿಯೇಂದ್ರನ್ ಮದತ,ಪರಶುರಾಮೆನೆ ಸರ್ವಸ್ವಂದ್ ಪಂಡ.ನಮ್ಮ ಮೂಲ ಅಚರಣೆಲೆನೇ ಮದತ್ ಬುಡ್ಯ.ಇಲ್ಲಲ್ ದೊಂಪದಡಿಟ್ ನಡತೊಂತಿ ನಿಚ್ಚಯ,ಮದಿಮೆ,ಬಯಕೆನ್ ಪೂರ ಇಲ್ಲದ ಪಿದಯಿ ಮಲ್ತ.ಕಡೆಕ್ ಬದ್ ಕ್ ದ ತರೇರ್ತರೆ ಇತ್ತ್ ನ ಇಲ್ಲಲ್ ಮಲ್ಪುನ ಸಾವುನು ದೇಲ್ಯೊಲೆಡ್ ಮಲ್ತ,ತುದೆ ಬರಿಟ್ ಪಿಂಡ ಬುಡ್ಯ.ಉಂದೆನ್ ತೂನಗ ಪಿದಯಿದ ಬದ್ಕ್ ದ ಆಸೆಡ್ ನಮ್ಮ ಮೂಲೊನೇ ನಮ ಕಳೆಯೊಂದುಲ್ಲಂದಾಪುಂಡು. ನಮ ಒರ್ಯನೊರಿ ಕಾರ್ ಒಯ್ಪುನ ಬದಲ್,ಯಾನ್ ಪನ್ನವೇ ಸರಿ ಪನ್ಪುನ ಬದಲ್ ತುಳು ಬದ್ ಕ್ ದ ಉಲತಿರ್ಲ್ ದಾದ ಪಂಡ್ ದ್ ತೆರಿದ್ ಸರಿ ಮಲ್ತೊಂದು ಪೋಂಡ,ಅಕ್ಲಕ್ಲೆ ಗೇನ ಅಕ್ಲಕ್ಲೆಗ್ ಮಲ್ಲೆಂದ್ ಇತ್ತ್ಂಡಲ ಬದುಕುನ ,ಬದ್ ಕ್ ಕಟ್ಟೊನುನ ಜಾಗೆದ ಹಿರಿಯಾಕ್ಲೆ ಚಿಂತನೆನ್ಲ ಸೇರಾವೊಂಡ ನನಲಾತ್ ಸಂಸ್ಕೃತಿ ಅರ್ಲೆರೆ ಸಾದ್ಯ.ಸಂಸ್ಕೃತಿ ಉಂತುನ ನೀರಾಯೆರೆ ಬಲ್ಲಿ.ಪರತ್ ಪೋಪುನ ತೆಲಿ ನೀರಾವೊಡು.ಅಂಚಿ ತೆಲಿನೀರ ಮಿತ್ತ್ ಬೇತೆ ಸಂಸ್ಕೃತಿ ಮಾರಿ ಬೊಲ್ಲ ಅವೊಂದಿಪ್ಪುನಗ ತೆಲಿನೀರ್ ಓಡೆ ಪೋಂಡುಂದು ನಾಡುನ ಪರಿಸ್ಥಿತಿ ಆಯೆರೆ ಬಲ್ಲಿ. ಇನಿ ಪುಟ್ಟುರ್ದು ಸೈಪುನಡೆಮುಟ್ಟ ವೈದಿಕ ಅಚರಣೆ ಇಜ್ಜಂದೆ ತುಳುವೆರೆ ಆಚರಣೆನೇ ಇಜ್ಜಂದಿಲೆಕಾಂಡ್.ನಮನ್ ತುಂಬ್ ನ ತುಳುವ ನೆಲತ ಬಿಲೆನ್ ಮದತ್ ಬುಡ್ಯ.ಪೂರ ಮಾಜಿ ಬೊಕ್ಕ ನಾಡ್ಂಡ ದಾದ ತಿಕ್ಕು?.
ನಮಕೊಂಜಿ ಪೊರ್ಲ ತುಳುಬಾಸೆ ಉಂಡು.ನಮಕ್ ಇಂಗ್ಲಿಷ್ ಬಾಸೆದ ಮರ್ಲ್ ಡ್ ತುಳು ಬಾಸೆನ್ ಮದತೊಂದುಲ್ಲ.ನಮ್ಮ ತುಳು ಬಾಸೆಡ್ ಇಂಗ್ಲಿಷ್ ಹಿಂದಿ ಸವ್ದೊಲು ಸೇರ್ದ್ ತುಳುತ ಅವ್ವೇತೋ ಪೊರ್ಲುದ ಸವ್ದೊಲು ಮಯಕಾತ.ಅಂಚನೇ ತುಳುಟು ಉಪ್ಪುನಾತ್ ಸವ್ದದ ಅರ್ಥವ್ಯಾಪ್ತಿ ಬೇತೆ ಬಾಸೆಡ್ ಉಪ್ಪೆರೆನೇ ಸಾದ್ಯ ಇಜ್ಜಿ.ಒಂಜೇ ಶಬ್ದೊಡು ಎಡ್ಡೆ,ಹಾಳ್ ರಡ್ಡ್ ಅರ್ಥಲ ಉಪ್ಪುನ ಬಾಸೆ ನಮ್ಮ ತುಳು.ನಮ ಅಂಚಿ ಮಣ್ಣ ಬಾಸೆನ್ ಸಂಪೂರ್ಣ ಮದತೊಂದುಲ್ಲ. ನಮಕೊಂಜಿ ತುಳು ಧರ್ಮಂದ್ ಆರಾಧನಾ ಸಂಸ್ಕೃತಿಡ್ ಇತ್ತ್ಂಡ್.ಅವ್ಲು ಹಿಂದುಲು,ಬೌದ್ದೆರ್,ಜೈನೆರ್,ಬ್ಯಾರ್ಲು,ಕಿರ್ಸ್ತಾನ್ ದಕುಲು ಪೂರೆರ್ಲ ಇತ್ತೆರ್.ಅಕುಲು ಮಾತೆರ್ಲ ಪೆರ್ಮೆಡ್ ಎಂಕುಲು ತುಳುವೆರ್ಂದೆ ಪನ್ಪುನಿ.ಉಂದು ತುಳು ಧರ್ಮ.ಮಾತೆರೆನ್ ಒಂಜಪ್ಪೆ ಬಾಲೆಲುಂದು ಎನ್ನಿದ್ ಬದ್ ಕುನವು ತುಳು ಧರ್ಮ.ಬತ್ತಿ ಬಿನ್ನಗ್ ಇತ್ತಿ ಉಪಚಾರ ಮಲ್ಪುನವು ತುಳು ಧರ್ಮ.ಇಂಚಿಪ್ಪಿ ತುಳು ಧರ್ಮೊನು ಭಾವನಾತ್ಮಕವಾದ್ ಜಾತಿ,ಧರ್ಮ ಸಂಘಟನೆಂದ್ ಕಟ್ಟ್ ದ್ ಪಾಡೆರೆ ಸಾದ್ಯ ಇಜ್ಜಿ.ದಾಯೆ ಪಂಡ ಅವೆಟ್ ಒಂಜೆನ್ ಕಡಿತ್ಂಡಲ ತುಳು ಧರ್ಮ ಪರಿಪೂರ್ಣ ಆಪುಜಿ.ಅಂಚ ನಮ ಬೇತೆಕ್ಲೆ ಪಾತೆರ ಕೇಂದ್ ಪುಡಪೆರೆ ಪೋಂಡ ತುಳು ಧರ್ಮ ಒಂಜಾತ್ ವರ್ಸೊಡು ಸಂಪೂರ್ಣ ನಾಶ ಆದ್ ಪೋವು.
No comments:
Post a Comment