ಸಂಧಿ-ಪಾಡ್ದನ-ಬೀರ-ಬಿರ್ದಾಳಿ

                   ಸಂಧಿ-ಪಾಡ್ದನ-ಬೀರ-ಬಿರ್ದಾಳಿ

  

ದೈವೊಗು ಕಟ್ಟುನಾರ್ ಮೋನೆಗ್ ಅರ್ದಾ ಲ ಪಾಡೊಂದಿಪ್ಪುನಗ ಸಂಧಿ ಪನೆರೆ ಸುರು ಮಲ್ಪುವೆರ್.ಒಟ್ಟುಗು ಇತ್ತ್ ನಾರ್ ತೆಂಬರೆ ಬೊಟ್ಟೊಂದು ಅರೆನ ಒಟ್ಟುಗು ಸಂದಿ ಪನ್ಪೆರ್

         

  

           ನಮ ಇನಿ ಸಂದಿ,ಪಾಡ್ದನದ ಅರ್ಥೊಲೆನ್ ಮದತ್ ನೆಡ್ದಾದ್ ಪಾಡ್ದನ ಒವು ಸಂದಿ ಒವುಂದು ತೆರಿಯೊಂದಿಜ್ಜಿ.ಪೂರಲ ನಮಕ್ ಪಾಡ್ದನೊಲಾದ್ ಪೋತ.ದೈವದ ಆರಾದನೆಡ್ ದೈವದ ಸಂದಿಲು ಉಲ್ಲ.ಅಂಚನೆ ದೈವಾರಾದನೆಡ್ ಪಾಡ್ದನೊಲ ಉಲ್ಲ.ಸಮಯ ಸಂದರ್ಬೊಗು ಸರಿಯಾದ್ ಸಂದಿ-ಪಾಡ್ದನೊನು ನಮ ಅರ್ಥ ಮಲ್ತೊನೊಡಾತೆ. ದೈವೊಲೆಗ್ ಸಂದಿಲು ಮಾತ್ರ, ಪಾಡ್ದನ ಇಜ್ಜಿಂದ್ ಕೆಲವೆರ್ ಪನ್ಪೆರ್.ಸಂದಿ-ಪಾಡ್ದನ ರಡ್ಡಲ ದೈವದ ಕಲೊಟು ಉಂಡು.

           

ಎಣ್ಣೆ ಬೂಲ್ಯ/ವೀಳ್ಯ ಪತ್ತ್ ದ್ ತೆಂಬರೆ ಬೊಟ್ಟುದು ಪನ್ಪುನಿ-ಬೀರ.ಪೊಣ್ಣು ಬೂತೊಲೆಗ್/ಕಲ್ಲುರ್ಟಿಗ್ ಕೋಲ ಸುರು ಮಲ್ಪುನ ದುಂಬು ಪನ್ಪುನ ಬೀರ ಇಂಚ ಉಂಡು -” ಲಯ ಕೇನೊಡು ಲಯಂಗುಲ್ಲರ ಮಗೆ,ಬೀರ ಕೇನೊಡು ಬೀರಂಗುಲ್ಲ ಬೆಮ್ಮೆರ್,ಏಕಚಿತ್ತೊಡು ಎಣ್ಣೆಬೂಲ್ಯ ಮಯಿಮೆಡ್ ಕಂಠೆ ದಲ್ಯೊಡು ಕರಂಡೆದ ಬೀರೊಡು, ನರಲೋಕ ನ್ಯಾಯ,ಬೂಲೋಕ ಸಂಧಿ ,ವಸಯದ ಮೂಲ ಸಂದಿ ಕೇನ್ ಬಲ್ಲ ಕುಮಾರ“.ಉಂದು ಬೀರ. ಉಂದೆತ ಅರ್ಥ ಲಯ ಪಂಡ ಹಾವ-ಭಾವ ಕೇನೊಡು ,ಲಯಂಗುಲ್ಲ ಕುಮಾರ ಪಂಡ ಆಯಗಾರ ಮಗಟ ಪಂಡ ಆಯ ಮಲ್ಪುನಾಯನ ಮಗಟ ಪಂಡ ಕಲ್ಲ ಶಿಲ್ಪಿಡಂದ್ ಅರ್ಥ.ಶಿಲ್ಪಕಲೆಕ್ ಸೇರುಂಡುಂದರ್ಥ.ಬೀರಂಗುಲ್ಲ ಬೆಮ್ಮೆರ್ ಪಂಡ ಬೆಮ್ಮೆರೆರ್ದ್ ಉದಿತಿ ದೈವೊಲುಂದು ಅರ್ಥ.ಏಕ ಚಿತ್ತೊಡು ಪಂಡ ಏಕಾಗ್ರತೆಡ್ ,ಎಣ್ಣೆ ಬೂಲ್ಯ ಮೈಮೆ(ಮೈಮೆ ಪಂಡ ನೇಮ)ಡ್,ಕಂಠೆ ದಲ್ಯೊಡು ಪಂಡ ಕಂಠೆ ತೆಂಬರೆಡ್,ಕರಂಡೆತ ಬೀರೊಡು ಪಂಡ ತೆಂಬರೆ(ಬೊಟ್ಟೊಂದು)ದ ಬೀರೊಡುಂದರ್ಥ.ಉಂದು ಸುರೂತ ಬೀರ.ಉಂದೆನ್ ವಸಯೊದ ಸಂದಿಂದ್ ಲ ಪನ್ಪೆರ್.ಅಂಚಾದ್ ಬೀರ ಬೊಕ್ಕ ಸುರುತ ವಸಯದ ಸಂದಿಗ್ ಸಮ್ಮಂದ ಇಪ್ಪುನೆನ್ ತೆರಿಯೊನೊಲಿ.

ಕಟ್ಟುನಕುಲು ಬಣ್ಣೊಗು ಕುಲ್ಲ್ ನಗ,ಐತ ಆನಗ ತೆಂಬರೆ ಬೊಟ್ಟೊಂದು ಪೊಂಜನಕುಲು ಕುಲ್ಲೊಂದು ಪನ್ಪುನವು-ಪಾಡ್ದನ.ಅಂಚನೆ ಕಂಡೊಡು ಪೊಂಜನಕುಲು ಪನ್ಪುನಲ ಪಾಡ್ದನ.ಕಂಡೊಡ್ದು ಬತ್ತ್ ನ ದೈವದ ಚಾಕಿರಿಮುಟ್ಟ ಆಂಜನಕುಲು ಕುಲ್ಲುದುಪ್ಪುನಗ ಪೊಂಜನಕುಲು ಕುಲ್ಲುದು ತೆಂಬರೆ ಬೊಟ್ಟೊಂದು ಪನ್ಪುನವು ಪಾಡ್ದನ.

ಅಂಚ ಕಟ್ಟುನಕುಲು ಅಣಿ ಕಟ್ಟ್ ದ್  ,ಕದ್ರ್ ಮುಡಿ ಕಟ್ಟ್ ದ್ ಪನ್ಪುನವು ಸಂಧಿ.ಸಂದಿನ್ ಕಟ್ಟುನ ಆಂಜನಕುಲೆ ಪನ್ಪುನಿ.ಅಂಚಾದ್ ಸಂದಿಲ ಪಾಡ್ದನೊಗು ಸೇರ್ಪಡೆಯಾದುಂಡು,ಪಾಡ್ದನಲ ಸಂದಿಗ್ ಸೇರ್ಪಡೆಯಾದುಂಡು.ಆ ಪೊರ್ತು ಪೊರ್ತುಗು ಪನ್ಪುನೆಕ್ ಅಯಿಕೊಂಜೊಂಜಿ ಪುದರ್ ಸಂಧಿ ಬೊಕ್ಕ ಪಾಡ್ದನ.ಸಂದಿಡಾವಡ್,ಪಾಡ್ದನೊಡಾವಡ್ ರಡ್ಡೆಟ್ಲ ದೈವದ ನಡೆನೆ ಪನ್ಪುನಿ.

  ಅಲಂಕಾರ ಸಂದಿಂದ್ ಕಲ್ಲುರ್ಟಿನ ಸಂದಿಡ್ ಬರ್ಪುಂಡು. ಪೀಠದ ಮಿತ್ತ್ ಕುಲ್ಲುದು ಕನ್ನಡಿದೆದುರು  ದೈವದ ಮೋನೆದ ಅಲಂಕಾರ,ತುತ್ತೈತದ ಅಲಂಕಾರ ಮಲ್ಪುನೆನ್ ಅಲಂಕಾರ ಸಂದಿ ಪನ್ಪೆರ್.ಉಂದೆನ್ ಪೀಠ ಸಂದಿಂದ್ ಲ ಪನ್ಪೆರ್.ಅವು ಇಂಚ ಉಂಡು-“ಐತ ಮಲ್ಪುನ ಪೆರಿಯ ಸಿಂಗಾರ ಆಪುಂಡು,  ಆ...ತರೆ ಬಾರ್ಯಾಲ್,ಎಣ್ಣೆ ಉಲೂ ಒಯ್ತಾಲ್ ,ಎಡತ್ ಮುಡ್ತಾಲ್ ನಾಗಸಂಪಗೆ..ತಂಗಡಿ.,ಬಲತ್ ಮುಡ್ತಾಲ್ ಬಾಲೆ ಪಿಂಗಾರಯೇ...ಆ..ಕರಡೆಡ್ ಮೇಲಾಯಿ ಪದ್ದೆಯಿ ನಾನೋ..ದೀತಲೆ,ಪಟ್ಟೆಡ್ ಮೇಲಾಯಿ ಉಡಿಸೀರೆ ತುತ್ಯಾಲ್ ಯೇ...ಪಟ್ಟೆದ ಮೇಲ್ ಗ್  ಪರೆಂಗಿ ಸರಪೊಳಿ ಎಣ್ಣೆಕೊಪ್ಪು,ಎಸಳ್ ಬುಗುಡಿ ದೀಯಲೆ,ಮುನ್ನಿದ ಮೇಲ್ ಗ್ ಮುತ್ರುಪೋಯಿ ವಡ್ಯಾಣಯೇ.....ಆ...ಕಣ್ಣ್ ಗ್ ಕೋಲ್ ಮೈಯಿ ಒಯ್ತಾಲೋ ತಂಗಡಿ ,ಪೊರ್ಲು ಕುಂಕುಮೊ ಕುರ್ಡೊಗು ದೀಯಲ್ ಯೇ....ಆ....”ಉಂದು ಕಲ್ಲುರ್ಟಿ ದೈವದ ಅಲಂಕಾರ ಸಂದಿ.

ಬಿರ್ದಾಳಿಂದ್  ದೈವದ ಕೊಡಿಯಡಿಟ್ ತೂಯೆರೆ ತಿಕುಂಡು.ಬಿರುದು ಬಾವಳಿ ಪಂಡ ವೈಭವ.”  ಆಳ್ ಪಲ್ಲೆಂಕಿ,ಕೊಂಬು ತಂಬಡ, ಪಕ್ಕಿ ನಿರ್ಸಾನಿ,ಸಕನತ್ತ ಕೊಂಬು,ವಯನತ್ತ ಬೆಡಿ,ಸರ್ವ ಬಿರ್ದ್,ಸೂಳೆಲೆ ಮೇಳ,ರಂಬೆಲೆ ನಾಟಕ,ತಾರಾಯಿದ ತಪ್ಪಂಗಾಯಿ,ಬಜ್ಜೆಯಿನ ಜೂಜು,ಕೋರಿದ ಕಟ್ಟ,ಮಂದೆಲೆ ಮಿನದನ,ಉಂದು ದೈವದ ಬಿರ್ದಾಳಿಡ್ ಬರ್ಪುಂಡು.

  ದೈವೊಲು ಗಟ್ಟ ಜತ್ತ್ ದ್ ಬರ್ಪುನ ಸಂದಿಡ್  ಬಾರ್ಯಾತ್ ಕಟ್ಲೆಲು ಸೇರಿಗೆಯಾದುಲ್ಲ.ದೈವ ಬೂತೊಲು ಪೂರ ಗಟ್ಟ ಜತ್ತ್ ದೇ ಬೈದ್ ನವು.”ಬಲ್ಲಯ ಬೂತ ಬಲ್ಲ ಬೂತೊಲು,ಅರಸುಲೆ ಬೆರಿಯುಳ್ಳ ಬೂತೊಲಾಂಡ ಬೊಳ್ಳಿ ಕುದುರೆಡ್ ಬೊಲ್ಗುಡೆ ಸತ್ತಿಗೆಡ್,ಕಾಳಿ ಕುದುರೆಡ್ ಕಲ್ಗುಡೆ ಸತ್ತಿಗೆಡ್ ಬಲ್ಲೆಂದ್ “ಬೂತ ಗಟ್ಟ ಜಪ್ಪುನ ಸಂದಿಡುಂಡು.

  "ಲಯ್ಯ ಕೇನ್ ದೇರ್ ಲಯ್ಯಂಗುಲ ಮಗೆ,ಬೀರ ಕೇನ್ ದೇರ್ ಬೀರಂಗುಲ್ಲ ಬೆಮ್ಮೇರ್ ಕೇನೊಡೇ....ಎಕ್ಕ(ಏಕ ಚಿತ್ತ-ಏಕಾಗ್ರತೆ) ಚಿತ್ತೋಡು ಎಣ್ಣೆ ಬೂಲ್ಯ ಮೈಮೆ,ಕಂಠೆ ದಲ್ಯೋಡು ಕರಂಡೆತ್ತ ಬೀರ,ನರಲೋಕ ನ್ಯಾಯ,ದೇವಲೋಕ ಸಂಧಿ,ಕೇನ್ ಬಲ್ಲ ಕುಮಾರ..ಏ.....”.ಅವೆಡ್ದ್ ಬೊಕ್ಕ  ಆ...ಯೇ….ಆ.....ಇಂಚ ಲಯಬದ್ಧವಾದ್ ಸಂಧಿ ಉಪ್ಪುಂಡು. ದೈವೊಲು ಗಟ್ಟ ಪ್ಪುನ ಸಂದಿ ಇಂಚ ಉಂಡು-“ಬಲ್ಲೆಯ ಬೂತೋಲೇ..ಬಲ್ಲೆ ನಿಕುಲು..ಗಟ್ಟ ಜಪ್ಪುನಾನೇ ಬೂತೊಲು ನಿಕೂಲು...ಅಂದ್ ಡಾ..ಓಲು ಕೂಡೋಡು,ಓಲು.ಮದಿಪೋಡು,ಆಯೆರೆ ಈಯೇರೇ ಮಂಜತೊಟ್ಟಿ ಬಾಕಿತಿಮಾರ್ ಡ್....”(ಬಂಗಾಡಿದ ಮಂಜತೊಟ್ಟಿ ಬಾಕ್ಯಾರ್/ಬಾಕಿಮಾರ್).ಅವ್ಲು ಕೂಡೊಡುಂದು ಪನ್ಪೆರ್.ಅವ್ಲು ಕೂಡೊಡಾಂಡ,  “ಅರಸುಗು ಬರಿವುಲ್ಲ ಬೂತೊಲಾಂಡ ಬೊಳ್ಳಿ ಕುದುರೆಡ್ ಬೊಲ್ಗುಡೆ ಸತ್ತಿಗೆಡ್ ಬಲೆ,ಪೊಣ್ಣ ಗ್ ಸಮ್ಮಂದಪಟ್ನ ಬೂತೊಲಾಂಡ ಎಣ್ಣೆಕುಪ್ಪು,ಎಸಲ್ ಬುಗುಡಿಡ್ ಜಪ್ಪುಲೆ,ಕಾಮಾಜಿ,ಕಟ್ಟಾಜಿ,ಪೇರ್ ನ ಇಡೆಕಾಜಿ ಕಲ್ಲ್ ಬಳೆಸಾರ ಪಾಡೊಂದು ಬಲೆ”ಂದ್ ಪನ್ಪೆರ್ ಆ ಕಾಲದ ಪದ್ದೆಯಿ ಬಂಗಾರ್ದ ಪುದರವು.ಅಂಚ ಗಟ್ಟ ಜತ್ತ್ ದ್ ಬರೊಡಂಡ ಈತ್  ಮಾತ ಇತ್ತ್ಂಡ ಬರ್ಪಂದ್  ದೈವೊಲು ಪನ್ಪ-“ ಅಜ್ಪಲ್ಲದಡೆ ಆಜಿಮುಡಿತಡೆ ಅಂಗಣ ಪೆರೆಸಾವೊನು,ಮುಪ್ಪಲ್ಲದಡೆ ಮೂಜಿ ಮುಡಿತಡೆ ಮೇಲೊಯ್ತ್ ಬಚ್ಚಿರೆಡ್ ಪನಿದೊಂಪ ಪಾಡೊಡು,ಕಂರ್ಬುಡು ಕಂಬಲ್,ಬೆಲ್ಲೊಡು ದಿಕ್ಕೆಲ್,ಪಿಂಗಾರೊಡು ಗಿಡ್ಕೆ,ಸುಣ್ಣೊಡು ಸೂತ್ರ ಮಲ್ಪೊಡು.”ಂದು ದೈವೊಲು ಪನ್ಪ.ಅಂಚ ಊರ್ದಕುಲು ಸೇರ್ದ್ ವರಡ್ ವಂತಿಕೆಡ್(ದುಡ್ಡು-ಗಿಡ್ಡು ಇತ್ತ್ ಲೆಕ) ಈ ವ್ಯವಸ್ಥೆ ಮಲ್ತಿಪ್ಪೆರ್.ಅಜಿಲ ಸೀಮೆಡ್ ಬಂಗಾಡಿದ ಅರಸುಲು ಬಾರೀ ಪುಗಾರ್ತೆ ಪಡೆಯಿನ ರಾಜವಂಶ.ಸಂದಿ ದುಂಬತ್ತೊಂದು, “ ಬಂಟ ಮಗೆ ಬರೊಡು ಬರವಂದ ಓಲೆ ಬುಡ್ಪಾವೊಡು,ಮಡ್ಯೆಲೆ ಬರೊಡು ಸಕನ ದಲ್ಯ ಪಾರಾವೊಡು,.....ಇಂಚ ಪದಿನಾಜಿ ಚಾಕಿರಿ ವರ್ಗವಕುಲು ಬರೊಡುಂದು ದೈವ ಪನ್ಪುಂಡು.ಬೆರಮಣೆ ಬೈದ್ಂಡ್,ಜಪುಡಾದ್ಂಡ್

ಬಾಲ್ ಬಂಡಾರ,ಏರ್ದ್ಂಡ್ ಸಿಂಗದನ,ಒರುವಾರೊಡು ಒರುಬೂಲ್ಯದಚ್ಚನೆ,ಇರ್ ವಾರೊಡು ಇರು ಬೂಲ್ಯದಚ್ಚನೆ,ಮುತ್ತಾರೊಡು ಮೂಜಿ ಬೂಲ್ಯದಚ್ಚನೆ,ನಾಲ್ತರೊಟು ನಾಲ್ ಬೂಲ್ಯದಚ್ಚನೆ,ಐನ್ ತರೊಟು ಐನ್ ಬೂಲ್ಯದಚ್ಚನೆ,ಆಜ್ತರೊಟು ಆಜಿ ಬೂಲ್ಯದಚ್ಚನೆ,ಏಲ್ತರೊಟು ಏಲ್ ಬೂಲ್ಯದಚ್ಚನೆಯಾದ್ ಮಾಯಾಲೆ ದೈವೊಲೆ"ಂದ್ ಸಂದಿಡ್ ಬರ್ಪುಂಡು ಬೊಕ್ಕ ದೈವೊಲು  ತುಳುನಾಡೊರ್ಮೆ ಪೋಪೆರ್.ಉಂದು ದೈವೊಲು.ಗಟ್ಟ ಜಪ್ಪುನ ಸಂಧಿಯಾದುಂಡು.

  ಅಂಚನೆ ಪಂಜಿ ಪುಟ್ಟಿನ  ನಾಡ್ ದ ಇಚಾರ ಸಂದಿಡ್ ತೂನಗ, "ಈಜಾ ನಗರ,ಕಂರ್ಬಿನ ಸಾಲೆ()ಸಾಲ್),ಹೂವಿನ ಬಿತ್ತ್ ಲ್,ಬಡಕಾಯಿ ಬಲ್ಲಾಲೆ ಬೊಟ್ಟುಸಿಟ್ಯೆಡ್ ಪಂಜಿಲು ರಡ್ಡ್ ಉದಿಯ ಬೆಂದ್ಂಡ್,ಒಂಜಿ ಆಣ್ ಪಂಜಿ,ಒಂಜಿ ಪೊಣ್ಣು ಪಂಜಿ"ಂದ್ ಪಂಜಿ ಪುಟ್ಟಿನ ಸಂದಿಡ್ ಬರ್ಪುಂಡು.ಆ ರಡ್ಡ್ ಪಂಜಿಲು ತಗೆ ತಂಗಡಿಂದ್ ಬರ್ಪುಂಡು..

ದೈವ ಪುಟ್ಟಿನ ನಾಡ್ಂದ್ ನಮ ಗುರ್ತ ಪತ್ತುಂಡ  ಗಟ್ಟ ಜತ್ತ್ ಬತ್ತಿನ ದೈವೊಲು ಸುರುಕಾದ್ ಬಂಗಾಡಿದ ಮಂಜತೊಟ್ಟಿ ಬಾಕಿಮಾರ್ ಡ್ ಕೂಡ್ದ್ ಅಲ್ಪ ಪೂರ ಆದ್ ಅಕುಲು ಮಾಯಾಲೆಂದ್ ಪನ್ಪೆರತ್ತ ,ಅಲ್ತ್ ರ್ದ್ ದೈವ ಬೂತೊಲು ತುಳುನಾಡ ಬೇತೆ ಬೇತೆ ತಿಕ್ ಗ್ ಪೋಪುನಿ(ಈ ಪಿರವು ಬರವುಡು ಬರೆಯಿಲೆಕ).ದೈವ ಪುಟ್ಟಿ ನಾಡ್ ಓಲುಂದು ಕೇಂಡ,”ಬೆರ್ಮ ಸೃಷ್ಠಿಡ್, ಓರೆ ಒತ್ತರೊಡು,ರಾಮಗದ್ದಿಗೊಡು,ಆಜಿ ಎಸಲ್ ದ ಮೂಜಿ ಕುಸುಮೊಡು ಉದಿಯ ಉದಿಪನ ಬೆನ್ಪೆರ್"ಂದ್ (ದೈವ ಫುಟ್ಟ್ಂಡ್) ಸಂದಿ ಪನ್ಪುಂಡು.ವಾ ಊರುಡು ದೈವ ಪುಟ್ಟ್ಂಡ್ಂದ್ ಸಂದಿ ಪನ್ಪುಜಿ.ಬೂಮಿದ ಅಧಿಕಾರ ಉಪ್ಪುನಿ ಪಂಜುರ್ಲಿಗ್.ಇತಿಹಾಸ ತೂಪುಂಡ ಕುಪ್ಪೆ ಪಂಜುರ್ಲಿನ ಸಂದಿ ಕಾರ್ಲ ಬೈರವರಸುನ ಸಂದಿ.ಬೆದ್ರದ ಚೌಟರಸೆರ್ ಕಾರ್ಲದ ಬೈರವರಸುನ ಅಧೀನೊಡಿತ್ತ್ ನಕುಲು.ಸಂದಿಡ್ ಬರ್ಪುನ ಎಲ್ಯಣ್ಣ ಸೆಟ್ಟಿ,ಮಲ್ಲಣ್ಣ ಸೆಟ್ಟಿ,ಚಿಕ್ಕಯ್ಯ ಸೆಟ್ಟಿ ಅಕ್ಲೆ ಪುದರ್ಡೆ ಕುಪ್ಪೆ ಪಂಜುರ್ಲಿನ ಸಂದಿ ಪನ್ಪೆರ್.

   

         ದೈವದ ಕಥೆಟ್ ನನೊಂಜಿ ಬಾಲಿ ಸಂದಿಂದ್ ಬರ್ಪುಂಡು.ಅವೆಟ್ ಬೂಮಂಡಲೊಡು ಒಲ್ಪೊಲ್ಪ ಎಂಚೆಂಚಿನ ಆತ್ಂಡ್ಂದ್ ಬರ್ಪುಂಡು.ಬಾಲಿ ಸಂದಿಡ್ ಮಾಯ್ಕಂದ ಮದಿಮೆಗ್ ಜೋಗಂದ ಅಟಿಲ್ ಮಲ್ಪುನಕುಲು ಏರುಲ್ಲೆರ್ಂದ್ ಬರ್ಪುಂಡು.ಗಟ್ಟದ ಮಿತ್ತುಡುಲ್ಲೆ ಒರಿ ಬಲಸರ ಕುಮಾರೆಂದ್ ಬರ್ಪುಂಡು.ಆಯಗ್ ಒಂಜಿ ಓಲೆ ಕಡಪುಡುವೆರ್.ನುಪ್ಪು ಮಲ್ತ್ ಕೊರ್ಪುನ ಅತ್ಯಾರ್ ತಯಾರ್ ಮಲ್ತ್ ಕೊರ್ಂಡ ಯಾನ್ ಬರ್ಪೆಂದ್ ಪನ್ಪೆ.ಅತ್ತರ್ ಮಾರ್ ಗ್ ಅತ್ತರ್ ಕನಪಾವೊಡು ಕೊಪ್ಪರಿಗೆ ಮಾರ್ ಗ್ ಕೊಪ್ಪರಿಗೆ ಕನಪಾವೊಡು ಬೆಲ್ಲೊಡು ದಿಕ್ಕೆಲ್ ಮಲ್ಪಾವೊಡು,ಸುಣ್ಣೊಡು ಸೂತ್ರ ಮಲ್ಪಾವೊಡುಂದು ಪನ್ಪೆ.ನುಪ್ಪು ಮಲ್ಪುನಗ ಬಾಲಿಂದ್ ಪನ್ಪುನ ಪೊಣ್ಣಗ್ ಬಂಜಿಡ್ ಬಂಜಿ ಬೇನೆ ಬರ್ಪುಂಡು.ಆಲ್ ಬಂಜಿ ಬೇನೆಡ್ ಒಲಿತ ಉಚ್ಚಾದ್  ನುಪ್ಪುದ ಮಿತ್ತ್ ಪುಡೆರ್ನಗ ನುಪ್ಪು ಪೂರಾ ಚಲ್ಲಾಪಿಲ್ಲಿಯಾಪುಂಡು.ಇಂಚ ಬಾಲಿ ಸಂಧಿ ದುಂಪೋಪುಂಡು..

ಅಲಂಕಾರ ಸಂದಿಗ್  ನನೊಂಜಿ ಉದಾರ್ಮೆ ಪೆರುಮಾಳ ಬಲ್ಲಾಲ್ರೆನ ಪುಟ್ಟುದ ಸಂಧಿ.ಮೂಲು ಬಾಲೆದ ಪುಟ್ಟು,ಬಾಲ್ಯದ ವರ್ಣನೆ ಬರ್ಪುಂಡು.ಉಂದೆನ್ ಪುಟ್ಟುದ ಸಂದಿಂದ್ ಲ ಪನ್ಪೆರ್. ಕುಪ್ಪೆ ಪಂಜುರ್ಲಿನ ಸಂದಿಡ್  ಪೆರುಮಳೆ ಬಲ್ಲಾಲ್ರೆನ ಸಂದಿ ಬರ್ಪುಂಡು.ಪೆರುಮಾಳೆ ಬಲ್ಲಾಲ್ರ್ಂದ್ ಬಾಲೆಗ್ ಪುದರ್ ದೀಪುನ ಪೊರ್ತುದ ಸಂದಿ ಇಂಚ ಬರ್ಪುಂಡು ." ಬಂಜಿಡ್ ನರನರ ಬೇನೆ ಬನ್ನಗ ನೇಲೆದ ಬಲ್ಲ್ ಪಾಡ್ಪಾವೆರ್.ನೇಲೆದ ಬಲ್ಲ್ ಡ್ ನೇಲಾದ್ ಬಂಜಿಡ್ ಬೇನೆ ಬನ್ನಗ ಬಾಲೆ ತಿರ್ತ್ ಬೂರುಂಡು, ಬಾಲೆ ತಿರ್ತ್ ಬೂರ್ನಗ ಕಂಠೆ ಮಲ್ಪದೆರ್,ಪೋಡಿಗೆ ದೆಪ್ವೆರ್,ಪಾಲೆಗ್ ಮಗ್ ತೆರ್,ಪಾಲೆದ ಬಾಲೆ ಪೋದು ತೊಟ್ಟಿಲ ಸಕನೊಗು ಬೂರ್ಂಡ್,ತೊಟ್ಟಿಲ ಸಕನೊರ್ದು  ಪೋದು ತಿರ್ತ್ ಮುಂಡು ಜಗಲಿಗ್,ಮುಂಡು ಜಗಲಿರ್ದ್ ಪೋದು ಮಟ ಮಟ ನಾಲ್ ಸುತ್ತ ನಡತೊಂದು ಬನ್ನಗ ಅಮ್ಮೆರ್ ಬಾಲೆದ ಪೊರ್ಲು ತೂಪೆರ್.ಕಾರ್ದ ಪೊರ್ಲು ತೂಪೆರ್,ಕಾರ್ ಗ್ ಕರ್ಕಡ,ಕೈತ ಪೊರ್ಲು ತೂಪೆರ್,ಕೈಕ್ ಚಾಲಕ್,ಕಂಟೆಲ್ ಗ್ ಕುರುಜಾತ ಸರ,ಸೊಂಟೊಗು ಒಯ್ಪಲ್ಲ ನೂಲು,ನೆಗಪ್ಲ ಮಣಿ ದೀಪೆರ್,ಆಚಾರಿನ್ ಬರ್ರೆ ಪಂಡ್ ದ್ ಮೂಜಿ ಕಾರ್ ದ,ಮೂಜಿ ಚಕ್ರದ ಒಯ್ಪಲ್ಲ ಬಂಡಿ ಮಲ್ಪವೆರ್"-ಇಂಚ ಬಾಲೆದ ಬಾಲ್ಯದ ವರ್ಣನೆದ ಸಂದಿ ಬರ್ಪುಂಡು.

           ಜಾರೆ ಸಂದಿಂದ್ ಒಂಜಿ ಸಂದಿ ಉಂಡು . 

ಕುಪ್ಪೆಟ್ಟು ಪಂಜುರ್ಲಿನ ಕಥೆಟ್  ಮದಿಮೆದ ಸಂದಿ ಇತ್ತ್ ದ್ ಚೌಕಾರು ಮಂತ್ರವಾದಿ ಗುಳಿಗನ ಕಥೆಟ್ಲಾ ಮದಿಮೆದ ಸಂದಿ ಬ್ಪುಂಡು.ಕುಪ್ಪೆಟ್ಟು ಪಂಜುರ್ಲಿನ ಮದಿಮೆದ ಸಂದಿನ್ ಬೊಲ್ಪಾಯೆರಾಗ ಪನ್ಪೆರ್.

ಪೊನ್ನಂಗಿಲ(ಬಂಟ್ವಾಳ ಕೈತಲ್) ಸಾರಳಪಟ್ಟೊಗು ಕೊರಗ ಬೈದ್ಯೆ ಪೊದುನು ಕೇನೆರೆ ಪೋಪುನಿ.ಕೊರ್ಪುನ ಪೊಣ್ಣು ಉಂಡ,ಮಾರುನ ಎರು ಉಂಡ ಕೇನ್ನಗ ಕೊರ್ಪುನ ಪೊಣ್ಣು ಕೊರ್ದಾತ್ಂಡ್,ಮಾರುನ ಎರು ಮಾರ್ದಾತ್ಂಡ್,ನನೊಂಜಿ ಬಾಲೆ ಪ್ರಾಯದ ಪೊಣ್ಣುಂಡು  ಪನ್ಪೆರ್.ಅಯಿಕ್ ಗಿದ್ ರಿ ಕುಂಟು ಕಟ್ಟೆರೆ ಗೊತ್ತಿಜ್ಜಿ ಪನ್ಪೆರ್.ಅಂಚಾಂಡ ಎಂಕ್ ಲೆ ಬಾಲೆಲ ಅಂಚನೆ,ಎಲ್ಯ ಪ್ರಾಯದ ಆಣ್,ಪಾತೆರಕತೆ ಆದ್ ಮದಿಮೆಗ್ ದಿನ ದೀಪೆರ್.ಪಗ್ಗು 18ನಾನಿ ಅಂಗಾರೆಬಾರೊಗು ಸಿಂಗಂದರಾಸಿಗ್ ದಿಬ್ಬಣ ಕಟ್ಟೊಂದು ಬರ್ಪಂದ್ ಕುಪ್ಪೆಟ್ಟುದ ಕೊರಗ ಬೈದ್ಯೆ  ಪನ್ಪೆರ್.ನಿಜವಾದ್ ಅಂಗಾರೆದಾನಿ ಮದಿಮೆ ಮಸ್ಕಿರಿ ಆಪುಜಿ.ಆನಿ ಸಿಂಹ ಲಗ್ನ ಬತ್ತ್ ನೆಡ್ದಾದ್ ಮದಿಮೆಗ್ ದಿನ ಆವುಂದು ತೂಯೆರ್.ತಾರಾವಳಿ ಕೂಡ್ದ್ ಬತ್ತ್ ನೆರ್ದಾತ್ರ ಆನಿದ ದಿನ ಮದಿಮೆಗ್ ದಿನ ದೀಪೆರ್.ಪಗ್ಗು ಪದ್ಮೆನ್ಮದಾನಿ ಕುಪ್ಪೆಟ್ಟುದ ಕೊರಗ ಬೈದ್ಯೆರ್ ಪೊನ್ನಂಗಿಲ ಸಾರಲ ಪಟ್ಟೊಗು ದಿಬ್ಬಣ ಪತೊಂದು ಪೋಪೆರ್.ಪೊನ್ನಂಗಿಲ.ಸಾರಳ ಪಟ್ಟದಕುಲು ದೂರೊರ್ದು ಬರ್ಪಿ ಬಿನ್ನೆರೆ ಪೊರ್ಲು ತೂಪೆರ್,ಪೊನ್ನಂಗಿಲದ ಬೀರಣ ಬೈದ್ಯೆ ಅರ್ಸದ ಮೆಯ್(ಸಂತೋಸುದ ಮೆಯ್-ಉಲ್ಲಾಸದ ವಾತಾವರಣ ನಿರ್ಮಾಣ) ಮಲ್ಪುವೆರ್.ಬತ್ತಿ ಬಿನ್ನೆರೆಗ್ ದೇಸೆಂದರಿ ಪಾರಾಬೆರ್,ದೊಂಪೊಗೆದ್ಕೊನ್ಬೆರ್.ಮುತ್ತಿಗೆದ ನೀರ್ ಕೊ್ಪೆರ್,ಪರ್ರೆ ಬೆಲ್ಲದ ನೀರ್ ಕೊರ್ಪೆರ್,ಕುಲ್ಲೆರೆ ಪಜೆ ಕೊರ್ಪೆರ್,ರಡ್ಡ್ಕೋಡಿದಕುಲ್ಲ ಪಾತೆರೊನ್ವೆರ್ - ಮದ್ಮೆ ದುಂಬ,ದಾರೆ ದುಂಬ  -ಂದ್.ನಮ್ಮ ಜಾತಿ ಕಟ್ಟ್ ಡ್ ದಾರೆನೆ ದುಂಬಾವೊಡು,ವನಸ್ ಬೊಕ್ಕ ಕೊರ್ಕಂದ್ ಪನ್ಪೆರ್.ಆತಾನಗ ಚೌಕೊಗು ಪಜೆ ಪಾಡ್ವರ್,ಚೌಕೊಗು ಕುಲ್ಲುವೆರ್,ಬರಿಬಂದ್ರ,ಗುತ್ತುಮುಟ್ಟೆಲ್,ಸರಸಂಬದ ಕಟ್ಟ್ ಪ್ರಕಾರ ಪಂಡರ್,ಕಾಯಿ ಪೂಳು ಪಗಪ್ವರ್,ಆಣ ಪೊಣ್ಣ ಐತ ಮಲ್ಪೆರೆ ಪಂಡ್ ದ್ ಪೊಣ್ಣಗ್ ಪೂ ಸೀರೆ ಕೊರ್ಪೆ್.ಪೂ ಸೀರೆದೊಟ್ಟುಗು ತೆರವುದ ಪಣವು ಕೊರ್ಪೆರ್.ಉಲಯಿ ದೊಂಪೊಡು ಆಣಪೊಣ್ಣನ್ ಐತ ಮಲ್ಪವೆರ್,ಪಿದಯಿ ದೊಂಪೊಡು ದಾರೆದ ಮಣೆ ದೀಪಾವೆರ್ಆಣ್ ಪೊಣ್ಣನ್ ಐತ ಮಲ್ಪಾದ್ ದಾರೆದ ಮಣೆಕ್ ಆಣ್ ಪೊಣ್ಣನ್ ಲೆತೊಂದು ಬರ್ಪೆರ್. ದಾರೆದ ಮಣೆಟ್ ಆಣ್ ಪೊಣ್ಣನ್ ಜಪುಡಾವೊಂದು ಬರ್ಪೆರ್.ದಾರೆದ ಮಣೆಟ್ ಕುಲ್ಲಾದ್ ಕೈಮುಟ್ಟು ಕೈದಾರೆ,ಮೈಮುಟ್ಟು ಮೈ ದೇಸ,ಅಕಣೊಡು ಆರತಿ,ಮುತ್ತುಡು ದೇಸೆ ಈತಾಪುಂಡು(ಅಕಲ-ಕಂಚಿದ ಬಟ್ಟಲ್-ಅರಿವಾಣ).ಅಪಗ ಇರ್ವೇ್ ಬೂತೊಲು ಅಕ್ಲೆನ ಮೆಯ್ ಟ್ ಬರ್ಪುಂಡು ಬರ್ಕೆಡ್ ದಾರೆಯಾದ್ ಕುಪ್ಪೆಟ್ಟು ಬರ್ಕೆಗ್ ಕೊರಗ ಬೈದ್ಯೆರ್ ಬುಡೆದಿನ್ ಲೆತೊಂದು ಬರ್ಪೆರ್. ಪೊಣ್ಣ ಬೆರಿ ಪತೊಂದು ರಡ್ಡ್ ಬೂತೊಲು ಕುಪ್ಪೆಟ್ಟು ಬರ್ಕೆಗ್  ಬರ್ಪ.ಅರೆಗ್ ಅವ್ಲು ಬೇತೆ ಬೇತೆ ಸಮಸ್ಯೆಲು ಬರ್ಪ,ಅಪಗ ಆರ್ ಬಲಿಮೆ ಕೇನ್ಯೆರೆ ಪೋಪೆರ್.ಫ್ರಶ್ನೆಡ್ ಕೇನ್ನಗ ಪಶುತ್ತ ಬಾರ,ಮಾನ್ಯಗ್ ದುರ್ಬರ ಮಲ್ಪುನ ನಿಕ್ಲೆ ಪೊದ್ದೆರೆ ಬೂತ ಬೈದ್ಂಡ್ಂದ್ ಬಲಿಮೆಡ್ ತೋಜುಂಡು.ಪೊಣ್ಣು ಎಲ್ಲೆ ಬುಡ್ಂಡಲ,ಪೊದು ಕಡಿಂಡಲ ಪೊದ್ದೆರೆ ದೈವೊಗು ಯಾನ್ ದಾಲ ಕೊರಯೆಂದ್ ಕೊರಗಬೈದ್ಯೆರ್ ಪನ್ಪೆರ್.ನಿಕ್ಕ್ ಕೊರಂದೆ ಸಲ್ಲಂದ್,ಯಾನ್ ದೆತೊನಂದೆ ಬುಡಯೆಂದ್ ಪಂಜುರ್ಲಿ ಪನ್ಪೆ.ಬೊಕ್ಕ ಕೊರಗ ಬೈದ್ಯೆರ್ ಆ ಬೂತೊಲೆನ್ ದೈ ಕುಕ್ಕುದ ಮುದೆಲ್ಡ್ ನಂಬುನಿ.ಕುಪ್ಪೆಟ್ಟುಡು ಸುರುತ ಸಾನ ದೈ ಕುಕ್ಕಿನ ಮುದೆಲ್ ಡ್.ಪೊನ್ನಂಗಿಲೊರ್ದು ಬತ್ತಿನ ಕಲ್ಲುರ್ಟಿ ಪಂಜುರ್ಲಿ ಉಪ್ಪುನಿ ಕುಪ್ಪೆಟ್ಟು ಬರ್ಕೆದ ದೈಕುಕ್ಕಿನ ಮುದೆಲ್ಡ್.

ಜಾಮಂದ ಬಂಟೆ ಪಂಡ.ಪುಲ್ಯಕಲೊಗು.ಕೆಲೆಪುನ ಕೋರಿನ್ ಮಾತ್ರ ಪಂಜುರ್ಲಿಗ್ ಕೊಯ್ಯೊಡುಂದು ಕಟ್ಟ್ ಉಂಡು.

  

    ಬೇಲೂರ ಸೀಮೆಂದ್ ದೈವೊಲೆ ಸಂದಿಡ್ ಬತ್ತ್ಂಡಲ ಕಲ್ಕುಡ ಕಲ್ಲುರ್ಟಿ ಮಾತ್ರ ಬೇಲೂರ ಸೀಮೆಗ್ ಪೋತ್ ನಿ.ಒರಿನಂಚ ವಾ ದೈವೊಲ್ಲಾ ಅಡೆ ಪೋತ್ ಜ..ಇನಿ ಕಲ್ಕುಡ ಕಲ್ಲುರ್ಟಿನ್  ಮದು ಪನ್ಪುನಕುಲು ಅಮರ್ ಜೋಕುಲುಂದು ಪನೆರೆ ಸುರು ಮಲ್ದೆರ್.ಮೊಕ್ಲು 5 ಆಣ್ ಜೋಕುಲು,6 ನೆದಾಲ್ ಕಾಳಮ್ಮ.ಬೆಳುವಾಯಿದ ಕೈತಲ್ ಕಲ್ಕುಡ ಕಲ್ಲುರ್ಟಿ ಪುಟ್ಟು ಬಲತಿನ ಇಲ್ಲ್ ಕೆಲ್ಲಪುತ್ತಿಗೆ(ಪಡು ಮಾರ್ನಾಡ್ ದ ಕೈತಲ್) ಡ್ ಇನಿಕ್ಲಾ ತೂಯೆರೆ ತಿಕ್ಕುಂಡು. ಸಂದಿಡ್ ಕೆಲ್ಲ ಪುತ್ತಿಗೆ ಮಾರ್ನಾಡ್ ದೇಸಂದ್ ಬರ್ಪುಂಡು.ಅವ್ಲೆ ಮುಟ್ಟೊಡು ಅಳಿಯೂರುದ ಕೈತಲ್ ಶಿಲೆ ಕಲ್ಲ್ ದ ಕಲ್ಕುಡನ ದಂಟೆ ಕಾಡಮದ್ಯದ ಪುದೆಲ್ದ ನಡುಟುಂಡು.ಆ ದಂಟೆನೆ ಆತ್ ಎತ್ತರ ಉಪ್ಪುನಗ ಕಲ್ಕುಡನ ಸರ್ರ ದೇಕಿ ಎಂಚ ಉಪ್ಪುಂದು ನಮಕ್ ಕಲ್ಪನೆ ಮಲ್ಪೆರೆ ಸಾದ್ಯ ಇಜ್ಜಿ.ಕಲ್ಕುಡನ  ಅಮ್ಮೆರ್ ನಾಲ್ ಜನ ಜೋಕ್ಲೆಗ್  ಬೇತೆ ಬೇತೆ ಬೇಲೆ ಕಲ್ಪಾದ್ ಕಲ್ಕುಡಗ್ ಶಿಲ್ಪಕೆತ್ತನೆ ಕಲ್ಪಾವುನಿ.ಆ 5 ಜನೊನು ಪಂಚ ಕರ್ಮೆರ್,ಶಿಲ್ಪಿಲುಂದು ಪನ್ಪೆರ್.

  ಮಾತ ಕಟ್ಟುನಕುಲ್ಲಾ ಕಲ್ಲುರ್ಟಿ ಎಂಚ ಪುಟ್ಟಿಯಲ್ಂದ್ ಪನ್ಪುಜೆರ್.ಒರಿನ ಕಥೆ ಪನ್ಪೆರ್.ಮೂಲು(ತುಳುನಾಡ್) ಅಧರ್ಮ ಮೆರೆಯೆರೆ ಸುರಾಂಡ್.ಕಲ್ಕುಡೆ ಅಮ್ಮನ್ ನಾಡೊಂದು ಬೇಲೂರುಗು ಪೋಪೆ.ಬೇಲೂರುಡು ಕಲ್ಕುಡನ ಅಮ್ಮೆ ಬಿಸತ್ತಿ ಫಾಡೊಂದು ಸೈಪೆ,ಅಮ್ಮನ್ ಕೆರ್ನ ಮಗೆಂದ್  ಕಾರ್ಲದ ಬೈರರಸು ಕಲ್ಕುಡನ ಕೈಕಾರ್ ಕಡ್ಪಾವೆ.ಉಂದೆನ್ ತೂಯಿನ ಕಲ್ಕುಡನ ಅಪ್ಪೆ , ಇಂಚಿಂಚ ಅಧರ್ಮನೇ ನಡತೊಂದುಂಡೆ ದೇವೆರೆಂದ್ ಕಣನೀರ್ ಪಾಡೊಂದಿಪ್ಪುವಲ್.ಉಂದೆಕ್ ದಾಲ ಪರಿಹಾರ ಇಜ್ಜಾ ದೇವೆರೆಂದ್  ಆಲ್ ನಟ್ಟ್ ನಗ ಅಲೆನ ಬಂಜಿಡ್ ಕಾಲಮ್ಮ ಜಾವದೆಯಾದ್ ಕಲ್ಲುರ್ಟಿ ಪುಟ್ಟುವಲ್.ಆಂಡ ಅಪ್ಪೆ ಪೆದ್ಯಲ್ ಪನ್ಪಿ ಇಚಾರ ಓಲ್ಲಾ ತಿಕ್ಕುಜಿ.ಕಾಲಮ್ಮ ಜಾವದೆಯಾದ್ ಉದಿಪುವಲ್(ಇಡೆ ಬರ್ಪಲ್ಂದ್ )ಂದ್ ಸಂದಿಡ್ ಬರ್ಪುಂಡು.

ನಮ ದೈವದ ಪುಟ್ಟು ಪುರಾಪು ತೆರಿಯೊಡಂಡ ಸಂದಿ ಪಾಡ್ದನೊಲೆನ್ ಅರ್ಥ ಮಲ್ತೊನೊಡು ಅಪಗ ಮಾತ್ರ ದೈವದ ನಿಲೆ ಕಲೆನ್ ಅರ್ಥ ಮಲ್ತೊನೆರೆ ಸಾದ್ಯ.

  ಬರವುಗು ಆಕರ-ಯನ್.ಕೆ.ಸಾಲ್ಯಾನ್-ಅರಸು ಪಟ್ಟಿಯಾಯಿನ  ದೈವೊಲೆಗ್ ಕಟ್ಟುನ ಬಾರೀ ಹಿರಿಯಾರ್.