ದೈವಾರಾದನೆ ಪ್ರಾಕೃತಿಕವಾಯಿನ,ಪ್ರಕೃತಿನ್ ಮೀರ್ನ ಆರಾದನೆ

ದೈವಾರಾದನೆ ಪ್ರಾಕೃತಿಕವಾಯಿನ, ಪ್ರಕೃತಿನ್ ಮೀರ್ನ ಆರಾದನೆ

 

ದೈವಾರಾದನೆ ಪ್ರಕೃತಿಡ್ ತಿಕ್ಕುನ ಸೊತ್ತುಲೆಡ್ ಕಲ್ಲ್ ಡ್,ನೀರ್ ಡ್,ಕೇಪುಲ ಪುರ್ಪೊಡು ಮಲ್ಪುನ ಆರಾದನೆಯಾಂಡಲಾ ಪ್ರಕೃತಿನ್ ಮೀರ್ನ ಸಗ್ತಿ ದೈವ ಆದುಂಡು.ಆಕಾಶ ಬುಡ್ಲ ಬೂಮಿಡಾಲ ಪನ್ಪುನವ್ಲು ಬೂಮಿ ಬೊಕ್ಕ ಅಕ್ಕಸ ನಮ್ಮ ಕಣ್ಣ್ ಗ್  ತೋಜುಂಡು.ದೈವ ಕಣ್ಣಾರ ತೂದು ಗಾಳ್ಯಾರ ಪೋಫೆಂದ್ ಆವಾರ ಸ್ವೀಕಾರ ಮಲ್ಪುನಗ ಪನ್ಪುಂಡು.ಮಾಯಕದ ಗಾಳಿ ಬೀಜುಂಡುಂದು ಪನ್ಪ.ಮಾಯದ ಗಾಳಿಂದ್ ಪನ್ಪ.ಬೂಮಿ ಅಕ್ಕಸದ ನಡುತ ಗಾಳಿಡ್ ಮಾಯೆ ಇತ್ತ್ ದ್ ನಮ್ಮ ಲೆಪ್ಪುಗು ದೈವ ಓಕೊನುಂಡು..ಮೂಲು ಮಾಯೆಲ ಕಣ್ಣ್ ಗ್ ತೋಜುಜಿ,ಗಾಳಿಲ ಕಣ್ಣ್ ಗ್ ತೋಜುಜಿ.ಆಂಡ ನಮ ಬದ್ ಕೆರೆ ಗಾಳಿ ಬೋಡು,ನಮ್ಮ ರಕ್ಷಣೆಗ್ ಮಾಯೆ ಬೋಡು.  ರಡ್ಡೆತ ಕೆಲಸಲ ತೋಜುಂಡು.     ಸಾರಮಾನಿ ಬೂತೊಲಿತ್ತಡಲಾ ಅವೆಕ್ ಪೂ ನೀರೇ ಪ್ರದಾನ.ಸಾರ ನಾಗನಕ್ಲೆಗ್ ಒರಿ ಮಾಶೇಸೆ ಯಾನ್ಂದ್ ಪನ್ಪುನವ್ಲು ಮೂಲ ಪ್ರಾಕೃತಿಕ ಸಗ್ತಿ ಒಂಜೆಂದ್ ದೈವ ತೆರಿಪಾಯಿಲೆಕಾಪುಂಡು.ಕುಟುಮದ ದೈವೊಲೆಗಾವಡ್,ಇಲ್ಲದ ದೈವೊಲೆಗಾವಡ್,ಗ್ರಾಮದ ದೈವೊಲೆಗಾವಡ್,ರಾಜಂದೈವೊಲೆಗಾವಡ್,ಅರಸು ದೈವೊಲೆಗಾವಡ್ ಪೂ ನೀರೇ ದೀಪುನಿ.ನೀರ್ ರ್ದ್ ಸುದ್ದವಾಯಿನ,ಸುಲಬೊಡು ತಿಕ್ಕುನ ನನೊಂಜಿಜ್ಜಿಂದ್ ದೈವೊನು ಸರಳವಾದ್ ನಂಬೆರೆ ಪೂರ ಹಿರಿಯಾಕುಲು ಪೂನೀರ್ ದೀಯೊಂದು ಬತ್ತೆರ್.ಸಂಕ್ರಾಂತಿಗ್ ಬೊಂಡ ದೀಯೆರ್.ಬೊಂಡೊಡ್ಲ ಉಪ್ಪುನಿ ಪರಿಶುದ್ದ ನೀರೆ.ದೈವಾರಾದನೆಡ್ ಪುರ್ಪ ಪಾರಾದ್,ಬಚ್ಚಿರೆ ಪಾರಾದ್ ಸಕನ ತೂಪೆರ್ ಪಂಡ ಪೂತ ದುನ್ನಬನ್ನ ನಂಕ್ ತೆರಿಯುಂಡು.ಕಲ್ಲ್ ಡ್ ನೀರ್ ಪಾಡ್ದ್ 'ತರೆತಿ ಗಂದೊಡು ಕಮ್ಮೆನ ಪುಟ್ಟಾವೆ'ಪಂಡ್ ದ್ ದೈವ ಪನ್ಪುಂಡು.ನಮ ತರೆತ್ ಕೊರ್ನ ಗಂದದಲೆಕನೆ ನಮ್ಮ ಕುಟುಮ ಸಂಸಾರೊಗು ದೈವ ಕಮ್ಮೆನ ಕೊರ್ಪುಂಡು ಪಂಡ ಕುಟುಮ ಸಂಸಾರೊನು ಬೆಳಗವುಂಡು ಪನ್ಪುನೆನ್ ಅರ್ಥ ಮಲ್ತೊನೊಡು.ನೀರ್ ನ್,ಮಣ್ಣ್ ನ್ ಬುಡ್ದು ದೈವೊಲಿಜ್ಜ ಅಂಚನೆ ನಮಲ ಇಜ್ಜಂದ್ ತೆರಿಯೊನೊಡು.

 

ದೈವದ ನಿಲೆ ಕಲೆ:-

1.ಕಾಟ್ ಕಲ್ಲ್-ಪರಪುನ ತುದೆ ನೀರ ಅಡಿತ ಕಲ್ಲ್

2.ತೋಡ ನೀರ್-ತೋಡಿ ಗುವೆಲ್ ದ ವಸರ ನೀರ್/ಪರತ್ ಪೋಪಿನ ತೋಡನೀರ್.ಬಾನೊರ್ದು ಬೂಮಿಗ್ ನಿತ್ಯ ನಿರಂತರ ಪರತ್ ಬರ್ಪುನ ನೀರ್.

3.ಕಾಡಪುರ್ಪ-ಕೇಪುಲ

         ತುಳುನಾಡ ಜನ ಮಂದೆ ಮಣ್ಣ್ ಡ್  ಬದ್ ಕ್ ಕಟ್ಟೊನ್ನಗ ಅಕುಲು ಪ್ರಕೃತಿನ್ ಆರಾದನೆ ಮಲ್ತೊಂದು ಬತ್ತೆರ್.ಅಕುಲೆಗ್ ಬದ್ ಕ್ ಕಟ್ಟೊನ್ನಗ ಅಡ್ಡ ಬತ್ತಿ ಅಡ್ಡವಿಡ್ಡೂರೆಲೆನ್ ಗೆಲ್ಪೆರೆ ಸಾದ್ಯ ಆವಂದೆ ಆನಗ ಆ ಪ್ರಕೃತಿಕ ಸಗ್ತಿನ್ ರಾಜಿದ ಒರುಟು ದೈವವಾದ್ ನಂಬೊಂದು ಬತ್ತೆರ್.ಉಂದುವೆ ದೈವಾರಾದನೆಯಾದ್ ಇನಿಕ್ಲ ಒರಿದ್ ಬೈದ್ಂಡ್.ಕಾಡ್ ಕಡ್ತ್ ದ್ ನಾಡ್ ಮಲ್ತ್ ದ್ ಒಂಜಿ ತಿಕ್ ಡ್ ಒಟ್ಟಾದ್ ಬದ್ ಕ್ ನಗ ಅಕ್ ಲೆಗ್ ಬೆನ್ನಿ ಸಾಗೊಳಿದ ಪೊಲಬಾಂಡ್.ಕಾಡ ಏರ ಜೇರೊಲೆಡ್ ನೀರ್ ದಾಂತೆ ಕುಡು ಬುಳೆಯೆರ್.ಬೆನ್ನಿಗಾದ್ ಕಾಡ ಎರ್ಲೆನ್ ಪತ್ತ್ ದ್ ಮಾದಾದ್  ಕಂಡ ಸಾಗೊಳಿ ಮಲ್ತ್ ದ್ ಬಾರ್ ಬಿತ್ತ್ ದ್ ಅರಿ ನಾಡ್ ಪತ್ಯೆರ್.ಕುಡು ಅರಿಟ್ ಉದಿತಿ ತುಲುನಾಡ್ ಡ್ ನಮ್ಮ ಮೂಲದ ಹಿರಿಯಾರ್ ಬೆಮ್ಮೆರೆನ್ ಪ್ರಕೃತಿದ ಮೂಲ ಒರುವಾದ್ ಬನ ಆಲಡೆಲೆಡ್ ಆರಾದನೆ ಮಲ್ತೊಂದು ಬತ್ತೆರ್. ಬೆನ್ನಿಗಾದ್ ಸಕಾಯ ಮಲ್ತಿನ ಎರ್ಲೆನ್ ಮೈಸಂದಾಯ ದೈವವಾದ್ ಸುರುತ ನೇಮ ಕೊರ್ದು ಆರಾದನೆ ಮಲ್ತೊಂದು ಬತ್ತೆರ್.

ಪ್ರಾಕೃತಿಕವಾದ್ ದೈವಾರಾದನೆನ್ ಅರ್ಥ ಮಲ್ತೊಂದು ಪೋಪುಂಡ ಮಣ್ಣ್ ನೀರ್ ನ್ ಬುಡ್ದು ದೈವೊಲಿಜ್ಜ ಪನ್ಪುನ ಸತ್ಯ ನಮ್ಮ ಕಣ್ಣೆದುರು ಬರ್ಪುಂಡು.ದೈವಾರಾದನೆನ್ ಪ್ರಾಮಾಣಿಕವಾದ್ ಮಲ್ತ್ಂಡ ಸರಳವಾದ್ ಮಲ್ಪೊಲಿಂದ್ ಕಾಟ್ ಕಲ್ಲ್ ,ಕಾಡ ಪುರ್ಪ, ತೋಡನೀರ್ ದ ಆರಾದನೆದ ಕಲ್ಪನೆನ್ ಹಿರಿಯಾಕುಲು ನಮಕ್ ತೆರಿಪಾದ್. ಕೊರ್ಯೆರ್,ಮಣ್ಣ್ ನ್ ದಂಟ್ಂಡ ಮಣ್ಣ್ ಮರಿಯಾದ್ ಕೊಡಪು.ದೈವಾರಾದನೆದ ಪದಿನಾಜಿ ಕಟ್ಟ್ ಕಟ್ಲೆಲೆಡ್ಲ ಮಣ್ಣ್ ದಪ್ಪಣೆ ಪನ್ಪಿ ಒಂಜಿ ಕಟ್ಲೆ ಉಂಡು.ನಮ ತಪ್ಪು ಮಲ್ತ್ಂಡ ದೈವ ಕಡ್ಸಲೆನ್ ತಿರ್ಗದ್ ಮಣ್ಣ ನೆಲಕ್ ಊರ್ಂಡ ನಮಕ್ ಊರುಗು ಪೂರ ದೋಷ.ದೈವ ಧರ್ಮೆತ್ತಿ ಮಣ್ಣ್ ಡೆ ನಿಲೆಯಾತ್ ನಿ.ಜಲತೂದು ನಿಲೆಯಾಯಿ ದೈವ ಯಾನ್ಂದ್ ದೈವ ಪನ್ಪುನವ್ಲುನೀರ್ ನ್ ಬುಡ್ದು  ದೈವೊಲಿಜ್ಜಂದ್ ತೆರಿಯುಂಡು..ಪುಂಚೊಡು ಮರಿಯಾದ್ ದೈವ ಉಪ್ಪುಂಡು ಪಂಡ ಮೂಲುಲ ದೈವ ಮಣ್ಣ್ ನ್ ಬುಡ್ದು ಇಜ್ಜಿ ಪನ್ಪುನ ತೆರಿಯುಂಡು.

    ಮೂಲು ನಮ ನೀರ್ ಡ್ ದೈವದ ಸಗ್ತಿನ್ ತೂಪುಂಡ ನೀರ್ ಡ್ ನೆಗರಾದ್ ದೈವ ನೆಗತ್ ತೋಜುಂಡು.ನಮ ದೈವೊನು ನೀರ್ ಡೆ ನಂಬುದಿನಿ.ಪರತ್ ಪೋಪಿನ ನೀರ್ ನ್ ಎನ್ನವುಂದು ಪನೆರೆ ಸಾದ್ಯ ಇಜ್ಜಿ.ದೈವಲ ಅಂಚನೆ ಎನ್ಂದ್ ಪಂಡ ಏರ್ನ ಪತ್ತ್ ಗ್ ಲ ತಿಕ್ಕಂದ್.ನಮ ಬದ್ ಕೆರೆ ಎಂಚ ನೀರ್ ನ್ ಗಲಸುವನ ಮಾಯೆದ ದೈವೊಲೆಗ್ ಜೂವದ ಒರುವಾದ್ ಕಲೆಕುರೆ ದಾಂತಿ ಪರಪಿ ನೀರ್ ನ್ ಗಿಂಡೆ/ಕೂಚಿಡ್ ದೀದ್ ಆರಾದನೆ ಮಲ್ಪುವ.ಏತ್ ಮಲ್ಲಾಯೆನೇ ಆವಡ್,ಏತ್ ಪಾಪದಾಯೆನೇ ಆವಡ್ ಆಯೆ ನೀರ್ ನೇ ಗಿಂಡೆಡ್ ದೀಯೊಡು ಪನ್ಪುನವ್ಲು ದೈವೊಲೆಗ್ ಮಾತೆರ್ಲ ಒಂಜೆಂದ್ ಅರ್ಥ ಮಲ್ತೊನೊಲಿ.ಪರಪಿ ನೀರ್ ಕಲೆ ಕುರೆನ್ ಒವೆನ್ಲ ದೀವಂದಿ ಸುದ್ದ ನೀರಾದುಪ್ಪುಂಡು.ದೈವೊನು ಉಂಡುಮಲ್ಪೆರೆ ತಲಿಪುಗು ನೀರ್ ಬೋಡು ದೈವೊನು ನಿಲೆ ಮಲ್ಪೆರೆಲ ನೀರ್ ಬೋಡು.ಅಂಚಾದ್ ದೈವೊಲೆಗ್ ನೀರ್ ಪ್ರಧಾನ ಆದುಂಡು.ಪರ್ ಪೋಪುನ ನೀರಾವಡ್,ಬೀಜುನ ಗಾಳಿಯಾವಡ್ ವಾ ಕುರೆನ್ಲ ತಾನ್ ದೀಯೊನಂದೆ ಸುದ್ದ ಆದಿಪ್ಪುಂಡು.ಅಂಚಾದ್ ಪರಪಿ ಸುದ್ದ ನೀರ್ ಡ್ ದೈವೊಲುಲ್ಲ.ಸುದ್ದ ಗಾಳಿಡ್ ಮಾಯೆದ ಒರುಟು ದೈವೊಲುಲ್ಲ.ಏರೆಗಾಂಡಲ ನರಮಾನ್ಯಗಾ,ಕಂಜಿ ಕೈಕಂಜಿಲೆಗಾ ಬರಿ ಬೂರ್ಂಡ(ಲಕ್ವ) ಐವದ ಗಾಳಿಸೋಂಕು ಪೆಟ್ಟ್ ಬೂರ್ದ್ಂಡ್ ಪನ್ಪ.ಸಾಯದ ಗಾಳಿಯಾದ್ ದೈವ ನಮನ್ ಕಾಪುಂಡು ಪನ್ಪುನವ್ಲು  ಉಂದೆನ್ ಅರ್ಥ ಮಲ್ತೊನೊಲಿ.ನೀರ್ ನ್ ವಾ ಆಕಾರದ ಪಾತ್ರೆಡ್ ಪಾಡ್ಂಡಲ ಅವೆತ ಆಕಾರೊಗು ತಕ್ಕ ಒಂದ್ಂಡಲ ಮಿತ್ತ್ ಸಮಾನವಾದೆ ಉಪ್ಪುಂಡು. ನಮ್ಮ ಕುಟುಮದ ಒರಿಯೊರಿಯನ ಬುದ್ದಿ ನಂಜಿ ಮಚ್ಚರ ಒಂಜೊಂಜಿ ರೀತಿ ಇತ್ತ್ಂಡಲ ದೈವ ಅವೆನ್ ಪೂರ ಸರಿ ಮಲ್ಪಾದ್ ಕುಟುಮೊನು ಎಡ್ಡೆ ಬದುಕುಲೆಕ ಸಾದಿ ತೋಜಾವುಂಡು.ಪರಪುನ ನೀರ್ ದ ಪರಪುಡು ದೋಷ ಇಜ್ಜಂದೆ ಎಂಚ ಶುದ್ದನಾ ದೈವಲ ಅಂಚನೆ ಪರಿಶುದ್ದವಾಯಿನ ಸಗ್ತಿ.ದೈವೊಲೆಗ್ ಮಲ್ಲಾಯೆ,ಪಾಪದಾಯೆ,ಆಣ್ ಪೊಣ್ಣು ಪನ್ಪುನ ಏದ ಬೇದ ಇಜ್ಜಿ.ಅವ್ಲು ದೈವೊಲೆಗ್ ಬೋಡಾಯಿನಿ ನಿಷ್ಕಲ್ಮಶ ಮನಬಗ್ ತಿ.ದೈವೊಲು ಬಡಕಾಯಿ ಪೆರಿಯಗಂಗೆಗ್ ಮೀಯೆರೆ ಪೋತ ಪಂತಿನವ್ಲು ದೈವೊಲು ಬಯಕ್ ದ್ ನಿ ಪರಪುದ ನೀರ್ ನ್ಂದ್ ಅರ್ಥ ಮಲ್ತೊನೊಲಿ.ನಮ ಒವ್ವೆ ಮಟ್ಟೊಲೆನ್ ಸರಿಯಾದುಂಡ ಪಂಡ್ ದ್ ತೂನಗ ಜಮಟ್ಟೊರ್ದು ಮಲ್ಲ ಸಮಾನವಾಯಿನ ಮಟ್ಟ ನನೊಂಜಿ ತೂವೆರೆ ತಿಕ್ಕಂದ್.ಅಂಚನೆ ದೈವೊಲು ಪ್ರತಿಯೊರಿಯನ್ಲ ಏದಬೇದ ದಾಂತೆ ಮಾತೆರೆನ್ಲ ಸಮಾನವಾದ್ ತೂಪುಂಡು.ನೀರ್ ನ್ ಕಡ್ತ್ ದ್ ರಡ್ಡ್ ತುಂಡು ಮಲ್ಪೆರೆ ಆಪುಜಿ.ಅಂಚನೆ ದೈವೊನು ನಂಬಿ ಸಂಸಾರದ ನಡುಟು ಒಡಕ್ ಬತ್ತ್ಂಡಲ ದೈವ ಅಕ್ ಲೆಗ್ ಸರಿಯಾಯಿನ ಪಿರಿಕಟ್ಟ್ ಮಲ್ಪಾದ್ ಕುಟುಮೊನು ಗೋಡ್ಯಾವುನ ಬೇಲೆ ಮಲ್ಪುಂಡು ವಿನಃ ಕುಟುಮೊನು ಪುಡಪುನ ಬೇಲೆನ್ ದೈವ ಏಪಲಾ ಮಲ್ಪಂದ್.ಸುದ್ದ ನೀರ್ ಡ್ ಆಡಿತ ಬಾಗ ಸ್ಪಷ್ಟವಾ್ ತೋಜುಲೆಕ ಕುಟುಮೊಡು ಆಯಿ ತಪ್ಪುಒಪ್ಪುಲೆನ್ ದೈವ ಸರಿಯಾದ್ ತೂದು ಸರಿಮಲ್ಪುನ ಬೇಲೆ ಮಲ್ಪುಂಡು.ಮಣ್ಣ್ ಬೊಕ್ಕ ನೀರ್ ಗ್ ಮುಟ್ಟ ಸಮ್ಮಂದ ಉಂಡು.ನೀರ್ ದ ಮಿತ್ತ್ ಮಣ್ಣ್ ಉಂಡು ಪಂಡ ಪಂಚಬೂತೊಲೆಡ್ ರಡ್ಡ್ ಬೊಕ್ಕ ಮೂಜನೆ ಅಂಸೊಲು ಉಂದಾದುಂಡು.ಮಣ್ಣ್ ಡ್ ದೂಳು ರಾನಗ ಮಣ್ಣ್ ಗ್ ನೀರ್ ತಲಿತ್ಂಡ ಮಣ್ಣ ದೂಳುನು ನೀರ್ ಒಯ್ತೊಂದು ಮಣ್ಣ್ ನ್ ಅಂಟಾವೊಂಡು.ಅಂಚನೆ ಕೂಡು ಕುಟುಮೊಡು ಪೆಟ್ಟ್ ಲಡಯಾದ್ ಒರಿ ಯಾನ್ ಜತ್ತ್ ಪೋಪೆ ಪಂಡ ದೈವ ಆಯನ್ ತನ್ನಂಚಿ ಒಯ್ತೊಂದು ಆಯಗ್ ಬುದ್ದಿ ಪಂಡ್ ದ್ ಆಯೆ ಕೂಡು ಕುಟುಮೊದ ಒಂಜೆ ಪುಂಡಿದುಲಯಿ ಒರಿಯುಲೆಕ ಮಲ್ಪುಂಡು. ವಿಜ್ಞಾನದ ಪ್ರಕಾರ ಆಕಾಶ ಗಂಗೆ(ತಾರಗೆಲ್ನ ಕೋಪೆ) ಪನ್ಪುನವು ಅಕ್ಕಸೊಡು ಉಪ್ಪುನವು.ನೀರ್ ಲ ಬಾನೊರ್ದು ಬೂಮಿಗ್ ಬೂರುನವು. ಬೂಮಿಡ್ ಗಂಗೆಯಾದ್ ಪಂಡ ತುದೆಯಾದ್ ಪರಪುನವು.ಈ ಪರಪಿ ತುದೆನೆ ದೈವೊಲು ಮೀಯೆರೆ ಪೋಪುನ ಬಡಕಾಯಿ ಗಂಗೆಯಾದ್ ತೋಜುನಿ.ಅಂಚನೆ ದೈವೊನು.ಲೆಪ್ಪುನಗಲ ಆಕಾಸ ಬುಡ್ಲ ಬೂಮಿಡಾಲಂದ್ ಪನ್ಪ.ಮೂಲು ದೈವ ನೀರ್ ಡ್ ಉಂಡುಂದು ಸ್ಪಷ್ಟವಾದ್ ತೆರಿಯುಂಡು.ನಮ ದೈವೊನು ಬಾನ ತೂದು ಕೈ ಮುಗಿದ್ ಆಯೆ ಮಿತ್ತ್ ದಾಯೆ ಉಲ್ಲೆ ತೂವೆಂದ್ ಪನ್ಪ.ಅಪಗ ನೀರ್ ಲ ಮಿತ್ತ್ ಡಿತ್ತ್ ನ,ನೀರ್ ದ ಒರುವಾಯಿ ದೈವೊಲ ಮಿತ್ತ್ ಡ್  ಪಂಡ ಬಾನೊಡಿತ್ತ್ ನ.ಬೂಮಿಗ್ ಬತ್ತ್ ನ ಸುದ್ದ ನೀರ್ ನಮ್ಮ ಬದ್ ಕ್ ಗ್ ಬೋಡಾಯಿನ  ಮಾತ ಬೆನ್ನಿನ್ಲ ಒದಗಾದ್ ನಮಕ್ ಉನ್ಪುನೀರ್ ತಿಕ್ಕುಲೆಕ ಮಲ್ತ್ಂಡ್.ಅವ್ವೆ ನಮ ಉನ್ಪುನ ತಿನ್ಪುನೆನ್ ಪ್ರಕೃತಿದ ಒರುವಾಯಿನ ದೈವೊಲೆಗ್ ಸುದ್ದಾಚಾರೊಡು ಕೊರೊಂದು ಬತ್ತ.ಬಾನೊರ್ದು ಬತ್ತಿ ನೀರ್ ಬುಳೆಸೆಲೆನ್ ಕೊರ್ಂಡ್,ಪಿರಾ ನೀರ್  ಮೈಂದಾದ್ ಬಾನ ಸೇರ್ಂಡ್.ಕುಡ ನೀರಾದ್ ಬೂಮಿಗ್ ಬತ್ತ್ಂಡ್.ಅಂಚನೆ ನೀರ್ ದ ಒರುವಾಯಿನ ಮಾಯ(ಗಾಳಿ-ಪ್ರಕೃತಿ) ದ ದೈವ ನಮ್ಮ ಮದಿಪುಗು ಬೂಮಿಗ್ ಬರ್ಪುಂಡು.ಕುಡ ನಿಲೆಯಾಯಿಬೊಕ್ಕ ಮಾಯೆಯಾದ್ ಬಾನ ಸೇರುಂಡು.ಉಂದು ನಿತ್ಯನಿರಂತರವಾದ್ ನಡಪುನವು.ಬಾನೊರ್ದು ಪರತ್ ಬತ್ತಿ ಸುದ್ದ ನೀರ್ ತೋಡುದ ನೀರಾದ್ ಪರಪುಂಡು.ಆಕಾಸ ಬುಡ್ನ ಪರಪುದ ನೀರ್ ದ ಒರುತ ದೈವ ಬೂಮಿಡ್ ಮಾಯೆರ್ದ್ ಜೋಗದ ಮಾನಿನ ಮಿತ್ತ್ ವಸಾಯದ ರೂಪೊಡು ಪರತ್ ಬರ್ಪುಂಡು.ಬೂಮಿ ಬಾನದ ನಡುಟು ಗಾಳಿದ ಸಾಯೊಡು ಪರತ್ ಬರ್ಪುನ ನೀರ್ ದ ಒರುತ ದೈವ ನಮ್ಮ ಬದ್ ಕಾದುಂಡು.ಪ್ರಕೃತಿಡ್ ಒದಗ್ ದ್ ಬತ್ತಿನ(ಬರ್ಸ-ಆ ನೀರ್ ಗ್ ಏದ ಬೇದ ಇಜ್ಜಿ.ಮಾತಾ ತಿಕ್ ಡ್ಲ ಬರ್ಸ ಬರ್ಪುಂಡು) ನೀರ್ ನ ದೈವದ ಒರುಟು ಪ್ರಕೃತಿಗ್ ಕೊರ್ದು ಅವೆಟ್ ನೆಮ್ಮದಿನ್ ತೂಯಿನಕುಲು ನಮ

     ಕಾಟ್ ಕಲ್ಲ್ ಡ್ ಸರಳವಾದ್ ದಾಯೆ ದೈವೊನು ಆರಾದನೆ ಮಲ್ತೆರ್ ಪಂಡ ಕಲ್ಲುಲು ಬಾರ್ಯಾತ್ ಕಾಲ ಬಾಳಿಕೆ ಬರ್ಪ.ಈ ದೂರದೃಷ್ಟಿ  ದೀದ್ ಕಾಟ್ ಕಲ್ಲ್ ನ್ ಆಯ್ಕೆ ಮಲ್ತ್ ದಿಪ್ಪೆರ್.ತಾನ್ ಅಳಿದ್ ಪೋಂಡಲ ತಾನ್ ಕಲ್ಲ್ ಡ್ ನಂಬಿನ ದೈವ ಸಾಸಿತಾದಿಪ್ಪಡ್ಂದ್ ಆನಿದ ಕಾಲೊಡು ದೈವೊನು ಕಾಟ್ ಕಲ್ಲ್ ಡ್ ನಂಬುದುಪ್ಪೆರ್.ಕಾಟ್ ಕಲ್ಲ್ ಲ ಪ್ರಾಕೃತಿಕವಾದ್ ಸಗ್ತಿ ದಿಂಜಿದಿತ್ತಿನ ಪರತ್ ಪೋಪಿ ತುದೆತ ನೀರಡಿತ ಕಲ್ಲೇ ಆವೊಡಿತ್ತ್ಂಡ್.ಅಂಚನೆ ಕಲ್ಲ್ ನ್ ಒಡಕ್ ಬತ್ತ್ಂಡ ವಿಸರ್ಜನೆ ಮಲ್ಪುನ್ಲ ಪರತಿ ಪೋಪಿ ತುದೆ ನೀರ್ ಡೆ.ದಾಯೆ ಪಂಡ ಕಲ್ಲ್ ಡ್ ಇತ್ತ್ ನ ಸಗ್ತಿನ್ ಒಯ್ತೊನ್ ತಾಕತ್ತಿಪ್ಪುನಿ ನೀರ್ ಗ್ ಮಾತ್ರ.ಅರಸುಲು ಶಾಸನೊನ್ಲಾ ಬಾಳಿಕೆ ಬರ್ಪುಲೆಕ ಕಲ್ಲ್ ಡೇ ಬರೆಪಾವೊಂತೆರ್.ಪ್ರಕೃತಿಡ್ ತಿಕ್ಕುನ ಕಾಟ್ ಕಲ್ಲ್ ಡ್ ದೈವೊನು ನಂಬ್ಯೆರ್ ಪಂಡ ಕಾಟ್ ಕಲ್ಲ್ ಅವ್ಲು ದೈವದ ಒರುವಾದ್ ತೋಜಿಂಡ್ .ಆಂಡ ಕಾಟ್ ಕಲ್ಲೇ ದೈವ ಅತ್ತ್.ಪ್ರಕೃತಿನ್ ಮೀರ್ನ ಸಗ್ತಿಯಾಯಿನ ದೈವೊನು ನಂಬೆರೆ ಒಂಜಿ ಸೊತ್ತು ಕಾಟ್ ಕಲ್ಲ್.ಕಾಟ್ ಕಲ್ಲೇ ದೈವ ಆತುಂಡ ಕಲ್ಲ್ ಗ್ ಒಡಕ್ ಬನ್ನಗ ದೈವೊನು ಸಂಕೋಚ ಮಲ್ತ್ ದ್ ಕಲ್ಲ್ ನ್ ವಿಸರ್ಜನೆ ಮಲ್ಪುನಗ  ದೈವಲ ಪೋವೊಡಾಂಡ್.ಅಂಚಾವಂದೆ ಅವ್ವೇ ದೈವೊನು ನನೊಂಜಿ ಕಲ್ಲ್ ಕನತ್ ದ್ ಅವೆಟ್ ಆರಾದನೆ ಮಲ್ಪೊಲಿ ಪಂಡ ದೈವ ಪ್ರಕೃತಿದ ಸೊತ್ತುಲೆಡ್ ಆರಾದನೆ ದೆತೊಂಡಲ ಪ್ರಕೃತಿನ್ ಮೀರ್ನ ಸಗ್ತಿ ದೈವ ಆದುಂಡುಂದು ತೆರಿಯುಂಡು  ದೈವ ಪ್ರಕೃತಿದ ಒಟ್ಟುಗೆ ಇತ್ತ್ ದ್ ಪ್ರಕೃತಿನ್ ಮೀರ್ನ ಸಗ್ತಿಯಾದುಂಡು.ನಮ ನಂಬುನಗ ನಮ ನಂಬಿ ಕಲ್ಲ್ ದ ಉಲಯಿಲ ದೈವ ಉಪ್ಪುಂಡು,ಕಲ್ಲ್ ದ ಪಿದಯಿದ ಪ್ರಕೃತಿಡ್ಲ ದೈವ ಉಪ್ಪುಂಡುಂದು ನಮ ಅರ್ಥ ಮಲ್ತೊನೊಡು ಆತೆ.ದೈವಾರಾದನೆ ಅಪಗ ಪ್ರಕೃತಿದ ಸೊತ್ತುಲೆನ್ ಗಲಸೊಂದು ಮಲ್ಪುನ ಪ್ರಕೃತಿನ್ ಮೀರ್ನ ಆರಾದನೆಂದಾಂಡ್.ತತ್ಕಾಲೊಗು ಕಲ್ಲ್ ಪಾಡ್ದ್ ನಂಬುನ ದೈವೊಲು(ಕಾಟ್ ಕಲ್ಲ್ ಡ್ ದೈವೊಲೆನ್ ಅಂದ್ ಮಲ್ತ್ ದ್ ನೆತ್ತೆರಾವಾರ ಕೊರ್ದು ಅವೆರ್ದ್ ಬೊಕ್ಕ ಸಂಕೋಚ ಮಲ್ತ್ ದ್ ಪಂಡ ಕಲ್ಲ್ ರ್ದ್ ದೈವದ ಸಗ್ತಿ ದೆತ್ತ್ ದ್-ಅಪಗ ಅವು ಸಾಮಾನ್ಯ ಕಲ್ಲಾಪುಂಡು) ಕೆಲವಿತ್ತಡ ಸಾಸಿತವಾದ್ ಕಲ್ಲ್ ಪಾಡ್ದ್ ನಂಬಿನ ದೈವೊಲು ತುಳುನಾಡ್ ಡುಲ್ಲದಾಂಚನೆ ದೈವೊಲೆಡ್ ಮುಗ ಮೂರ್ತಿದ ದೈವೊಲು,ಮಣೆ ಮಂಚದ ದೈವೊಲುಂದುಲ ಉಲ್ಲ.ಆಂಡ ದೈವ ತನ್ನ ಗುಟ್ಟುನು ಏರೆಗ್ಲ ಇಡೆಮುಟ್ಟ ಪೂರ್ತಿಯಾದ್ ಬುಡುಕೊರ್ತ್ ಜಿ.ಅಂಚಾದ್ ನಮ ಸಾಸಿತ ಅತ್ತ್ಂಡಲ ನಮ ನಂಬಿಂಚಿ ದೈವೊಲೆನ್ ದುಂಬುದ ಪೀಳಿಗೆಗ್ ಒರಿಪೆರೆ ಸಾಸಿತವಾದ್ ಒರಿಯುನ ಕಾಟ್ ಕಲ್ಲ್ ಡ್ ದೈವೊನು ನಂಬ್ಯೆರ್.ಮಣ್ಣ್ ಕರವು,ಮರ ಉದಲ್ ಪತ್ತ್ ಪೋವು.ಆಂಡ ಕಲ್ಲ್,ಕಂಚಿ ಪಿತ್ತಾಲೆದ ದೈವದ ಸೊತ್ತುಲು ಸಾಸಿತಾದ್ ಒರಿಯು.

  ದೈವಾರಾದನೆನ್ ಸರಳವಾದ್ ಮಲ್ಪೊಲಿ ಪನ್ಪುನೆಕ್ ಕಾಡ ಕೇಪುಲೊನು(ಪೂತಡೆ ಪೂತ ಎಸಲ್ ಲಾವು)ತೋಜಾದ್ ಕೊರ್ಯೆರ್.ಕಾಡ ಕೇಪುಲ ಪ್ರಾಕೃತಿಕವಾದ್ ವರ್ಸ ಇಡೀ ತಿಕ್ಕುಂಡು.ಅಂಚಾದ್ ದೈವೊಲೆನ್ ಪೂನೀರ್ ದೀದ್ ಆರಾದನೆ ಮಲ್ಪುವ.ಕೇಪುಲ ಪೂ ಬೇಗ ಹಾಳಾಪುಜಿ,ಬೇತೆ ಪೂತಲೆಕ ಕುರಿಯುಜಿ.ನುಂಗುಂಡು ಆತೆ.ಕೇಪುಲ ಪೂ ಎಚ್ಚ ದಿನ ಬರ್ಪುನೆರ್ದಾದ್ ಸಂಕ್ರಾಂತಿರ್ದ್ ಸಂಕ್ರಾಂತಿಮುಟ್ಟ ದೀಪೆರ್.ಆತ್ ದಿನಮುಟ್ಟಲ ಕೇಪುಲ ಪೂತ ಪಲ ಉಪ್ಪುಂಡು.ನಿಜವಾದ್ ಕೇಪುಲ ಪೂಕು ಕಮ್ಮೆನ ಉಪ್ಪುಜಿ(ದೈವದ ಒಂಜಿ ನುಡಿ-ಕೊರಿ ಗಂದೊಗು ಕಮ್ಮೆನ ಪುಟ್ಟಾವೆ).ಆಂಡ ನಮ ಮನ ಬಗ್ ತಿಡ್ ದೈವೊಗು ಒಪ್ಪಿತ್ ನ ಕೇಪುಲ ಪೂಕು ದೈವ ಕಮ್ಮೆನ ಪುಟ್ಟಾವು ಪಂಡ ನಮ್ಮ ಬದ್ ಕ್ ಡ್ ಪರಿಮಳ ಪುಟ್ಟಾವು ಪಂಡ್ದ್ ಅರ್ಥ ಮಲ್ತೊನೊಡು.