ಬರಿ-ಬಂಗ್ರ

ಬರಿ-ಬಂಗ್ರ

ತುಳುನಾಡ್ ಡ್ ಅಳಿಯ ಕಟ್ಟ್ ಡ್ ಬರಿ-ಬಂಗ್ರ ತೂಯೆರೆ ತಿಕ್ಕುಂಡು.ಬರಿ ಬೇತೆನೇನೇ ಉಪ್ಪುಂಡು.ಬಂಗ್ರ ಬೇತೆನೇ ಉಪ್ಪುಂಡು.ಅಪ್ಪರ್ದ್  ಬತ್ತ್ ನವು ಬರಿ.ಅಮ್ಮೆರೆರ್ದ್ ಬತ್ತ್ ನವು ಬಂಗ್ರ.ಬಂಗ್ರ ಪಂಡ ಜನನ.ಬರಿನ್ ಪತ್ತ್ ದ್ ನಮ ಕುಟುಮ ಪನ್ಪುನಿ.ಆ ಬರಿತಕುಲುಅಂದ್ಂದಾಂಡ ಕುಟುಮಂದಾಪುಂಡು.ಆ ಬರಿ ಓಲು ಇತ್ತ್ಂಡಲ ಕುಟುಮದ ಮೂಲಂದ್ ಎನ್ಯೊಲಿ.ಬರಿ ಮಾತಾ ಜಾತಿಲೆಡ್ ಉಂಡು.ಬರಿತ ಪುದರ್ ಬೇತೆ ಉಪ್ಪೆರೆಲ ಯಾರು.ಅಳಿಯ ಕಟ್ಟ್ ಡ್ ಮಾತೆರೆಗ್ಲ ಬರಿ ಉಂಡು.ಬಂಗ್ರ ಪನ್ಪುನವು ಅಮ್ಮೆರ್ದ್ ಬತ್ತಿ ಜನನ.ಸೆಟ್ಟಿ,ರೈಅಡಪ,ಅರಸ,ಸೇನವ,ಪಲಯಿ,ಮಾನಯಿ,ಇಂಚ.ಅವು ಅಮ್ಮೆರೆರ್ದ್ ಬತ್ತಿನ ಜನನ.ಅಪ್ಪೆರ್ದ್ ನಮಕ್ ಬರಿಯಂಡ ಅಮ್ಮರ್ದ್ ನಮಕ್ ಜನನ.

   ಅಪ್ಪೆ ಒಂಜಿ ವೇಳೆ ಕಾಡ್ಯರಣ್ಣ ಬರಿತಾಲಂಡ ಆ ಜೋಕುಲು ಪೂರ ಕಾಡ್ಯರಣ್ಣ ಬರಿತಕ್ ಲಾಪ.ಅವೆಟ್ ಅಲೆನ ಜೋಕುಲು ಆಣ್ ಪೊಣ್ಣು ಪೂರ ಬತ್ತ್ಂಡ್.ಜೋಕ್ಲೆಡ್ ಆಣಗ್ ಬೇತೆ ಪೊಣ್ಣಗ್ ಬೇತೆಂದ್ಎತ್ತೇಸೊ ಇಜ್ಜಿ.ಅಳಿಯಕಟ್ಟ್ ಡ್ ಪನ್ನಗ ಪೂರ ಅಂಚನೆ ಬರ್ಪುಂಡು.ಒಂಜೇ ಬರಿತಕುಲು ಮದಿಮೆ ಆಯೆರೆ ಬಲ್ಲಿ.ದಾಯೆ ಪಂಡ ಒಂಜೇ ನೆತ್ತೆರ್ಂದಾದ್ ಪುಟ್ಟುನ ಜೋಕ್ಲೆಗ್ ಅಂಗ ಊನ ಬರ್ರೆ ಸಾದ್ಯ ಉಂಡು.ಎಲ್ಲೆದ ಸಂತಾನ ಹಾಳಾಯೆರೆ ಬಲ್ಲಿಂದ್ ಹಿರಿಯಾಕುಲು ಒಂಜೇ ಬರಿತುಲಯಿ ಮದ್ಮೆ ಆಯೆರೆ  ಬಲ್ಲಿ ಪಂತ್ ನಿ.ಅಮ್ಮಗ್ ಜೋಕುಲು ಸಂತಾನ.ಆಂಡ ಅಪ್ಪೆಗ್ ಜೋಕುಲು ಕುಟುಮ.ಅಮ್ಮಗ್ ಜೋಕುಲು ಕುಟುಮ ಅತ್ತ್.ಜೋಕುಲು ಆಯನ ಸಂತಾನ.ಬೊಡೆದಿ ಜೋಕುಲು ರಡ್ಡಲ ಆಯನ ಸಂಸಾರ.ಕಾಲಿ ಜೋಕ್ಲೆನ್ ದೆತೊನ್ನಗ ಅವು ಆಯನ ಸಂತಾನ.ಅಪ್ಪೆಗ್ ಜೋಕುಲು ಇಂಚ ಸಾಮಾನ್ಯ ಆಂಡಲ ಅವು ಅಲೆನ ಕುಟುಮ.ಪೆರಡೆದ ಪಿರವುದ ಕಿನ್ನಿಲು  ಪೆರಡೆದ ಕಿನ್ನಿಲೆಂಚ ಆಪನ ಅಲೆನ ಜೋಕುಲು ಪೂರ ಅಲೆನ ಕುಟುಮ.

ಬರಿ ನಮ್ಮ ಕುಟುಮದ ಪೂರ್ವ ವ್ಯಕ್ತಿಲಾದ್ ಏರ್ ಇತ್ತೆರ್,ಏರೆರ್ದ್ ಸುರು ಆಂಡ್ ,ಅವೆನ್ ಇನಿ ಬಹುಷ ಏರೆಗ್ಲ ಪನ್ಯೆರೆ ಕಷ್ಟ.ಒಂಜಿ ವಿಚಾರದಲೆಕ ಕೇನ್ನಗ 12 ತರೆರ್ದ್ ಬೊಕ್ಕದೆನ್ ಲೆಕ್ಕ ದೀಯೊಡುಂದಿಜ್ಜಿ ಪನ್ಪೆರ್.ಬೊಕೊಂಜಿ ಲೆಕ್ಕ ದೀನಗ ಪನ್ಪೆರ್,ಮೂಜಿ ತರೆರ್ದ್ ಬೊಕ್ಕ ಲೆಕ್ಕ ದೀಯೊಡುಂದಿಜ್ಜಿಂದ್.ಆಂಡ 4-5ತರೆಮುಟ್ಟ ಲೆಕ್ಕ ತಿಕ್ಕುಂಡು.ಇಂಚಿನಾರ್ನ ಮಗಲ್,ಇಂಚಿನಾರ್ನ ಮರ್ಮಾಲ್,ಇಂಚಿನಾರ್ನ ಪುಳ್ಳಿ ಇಂಚ ಮಾತ ಲೆಕ್ಕ ತಿಕ್ಕೊಂದು ಬರ್ಪುಂಡು.ಅಳಿಯಕಟ್ಟ್ ಡ್ ಅಪ್ಪೆನ ಸಮ್ಮಲೆ ನಮಕ್ ಅಜ್ಜೆ.ಅಜ್ಜಿನ ಸಮ್ಮಲೆ ನಮಕ್ ಪಿಜ್ಜೆ.ಅಜ್ಜಿನ ಸಮ್ಮಲೆಲ ನಮ್ಮ ಕುಟುಮನೆ.ಮಲ್ಲಪ್ಪೆನ ಸಮ್ಮಲೆ ದುಂಬುಡು ಇತ್ತ್ ನಾರಾಂಡ ಆರ್ ನಮ್ಮ ಕುಟುಮದ ಇರಿಯಾರ್.ಮೂಲು ಮಲ್ಲಪ್ಪೆನ(ಅಜ್ಜಿ) ಅಮ್ಮೆರತ್ತ್,ಮಲ್ಲಪ್ಪೆನ ಸಮ್ಮಲೆ.ಅಳಿಯ ಕಟ್ಟ್ ಡ್ ಸಮ್ಮಲೆ ಪ್ರದಾನ.ಅಳಿಯಕಟ್ಟ್ ದಕ್ಲೆಗ್ ಸಮ್ಮಲೆ ಪಂಡ ಬೇಲಿಗ್ ತೂನ ಪಾಡ್ಲೆಕ.ತೂನ ಪಾಡುನಿ ಬೇಲಿಗ್ ಗಟ್ಟಿಗ್ ಬೊಕ್ಕ ರಕ್ಷಣೆಗ್.ಅಳಿಯಕಟ್ಟ್ ದ ಪದ್ದತಿಡ್ ತಮ್ಮಲೆ ತೂನೊಗು ಸಮಾನ.ಆ ಕುಟುಮೊನು ಗಟ್ಟಿಯಾದ್ ಒರಿಪೆರೆ ಸಮರ್ಥೆ ಆಯೆ.

  ಏತೋ ಕುಟುಮೊಡು 4-5 ತರೆಕ್ ದುಂಬು,7-8ತರೆಕ್ ದುಂಬು ಗಡಿ ಪತ್ತ್ ನಕುಲು ಉದಾರ್ಮೆಗ್  ದೈವದ ಕಲೊಟು ಗಡಿ ಪತ್ತುಂಡು.ಕೋಟಿ ಸೆಟ್ಟಿ,ಕೊಡ್ಸರಾಳ್ವೆ,ಸಾಮಾನಿ,ಮಂಜನೆ ಪುದರುಲು ಬರ್ಪುಂಡು.ಆಯೆ ಏರ್ ಏಪದಾಯೆಂದ್ ಏರ್ಡಲ ಲೆಕ್ಕ ಇಜ್ಜಿ.ಆಂಡ ಆ ಪುದರುಲು ಅವ್ಲೆ ಉಪ್ಪುಂಡು.ಆ ಮೂಲ ಪುದರುಲು ತೂನದಲೆಕ.ಆಯೆ ಆಣ್ ಅಂದ್ಂದಾಂಡಲ ಕುಟಮೊಡು ಆಯೆ ಮೂಲ ವ್ಯಕ್ತಿಯಾಯೆ.ಣಂದೂರುಡು ದೈವದ ಗಡಿಯಾನಗ ಏರೆಗೇ ಆವಡ್ ಮಂಜು ಭಂಡಾರಿಂದೆ ಲೆಪ್ಪುನಿ.ಮಂಜು ಭಂಡಾರಿ ಪನ್ಪುನಾರ್ ಏರೆ ಕಾಲೊಡೊ ಇತ್ತಿನಾರ್.ನಾರ್ಯದಕ್ಲೆಗ್ ಆರ್ ಪೂರ್ವ ಪುರುಷೆ.ಆ ಕಾಲೊಡು ಆರ್ ತಮ್ಮಲೆ ತಾನೊಡು ಇತ್ತ್ ನಾರ್.ಅವ್ವೇ ಬರಿಯಾದ್ ಬುಲೆದ್ ಬರ್ಪುನಿ.ಆರ್ ವಾ ಬರಿಟ್ ಪುಟ್ಟುದಿತ್ತೆರ್ ಆ ಬರಿ ಆ ಕುಟುಮೊಗು ಸಂದೋಂದು ಬರ್ಪುಂಡು.ಅಂಚಾದ್ ಅಳಿಯ ಕಟ್ಟ್ ಡ್ ಬಂಗ್ರ ಮಲ್ಲ ಲೆಕ್ಕಾಚಾರನೆ ಅತ್ತ್.

ಬಂಟೆರೆಡ್ ಬೊಕ್ಕೊಂಜಿ ಸವ್ದ ಬರ್ಪುಂಡು ಬಂಟೆ-ಬಾರಗೆ ಪಂಡ್ದ್.ಬಂಟೆ ಸವ್ದ ಒಂಜಾಂಡ ಬಾರಗೆ ಪನ್ಪುನಾಯೆ ದುಂಬುಡು ಒಂಜಿ ಕಾಲೊಡು ಆಳ್ವಿಕೆಗ್ ಒತ್ತುದ ಯಜಮಾನಿಯಾದಿತ್ತ್ ನಾಯೆ.ಬಂಟೆ ದಳವಾಯಿ ಆದ್ ಇತ್ತ್ ನಾಯೆ.ಮೂಲು ಬಂಟೆ ಪ್ರದಾನ ಆದಿತ್ತ್ ದ್ ಬಾರಗೆ ಒತ್ತುಗು ಇತ್ತ್ ನಾಯೆ(ರಾಷ್ಟ್ರಪತಿ-ಉಪರಾಷ್ಟ್ರಪತಿ ಇತ್ತ್ ಲೆಕ).ಆ ಸವ್ದ ಅಳಿಯಕಟ್ಟ್ ಡ್ ಒರಿದ್ ಉಂಡು.

 ಮಕ್ಕಳ ಕಟ್ಟ್ ದುಂಬುಡೇ ಉಂಡು.ಬೂತಾಳ ಪಾಂಡ್ಯರ್ದ್ ಬೊಕ್ಕ ಅಳಿಯ ಕಟ್ಟ್ ಚಾಲ್ತಿಗ್ ಬತ್ತ್ಂಡ್.ಮಕ್ಕಳ ಕಟ್ಟ್ ಡ್ ಬರಿ ಬಂಗ್ರದ ಬದಲ್ ಗೋತ್ರೊಗು ಮಹತ್ವ ಇತ್ತ್ಂಡ್.ಆ ಗೋತ್ರೊಗ್ಲ ಮೂಲಪುರುಷೆ ಒರಿ ಆಣಾದೇ ಉಪ್ಪುವೆ.ಆಳಿಯ ಕಟ್ಟ್ ಗ್ ಲ ಒರಿ ಮೂಲ ಪುರುಷೆ ಆಣಾದೇ ಉಪ್ಪುವೆ.