ಬಚ್ಚಿರೆ , ಪಂಚೋಲಿ ಬಚ್ಚಿರೆ /bachire,pancholi bachire
ಬಚ್ಚೆಲರಪೆರೆ ಬೋಡಾಯ್ನವೇ ಬಚ್ಚಿರೆ .
ಅಂಚಿನ ಬಚ್ಚಿರೆನ್ ತಿನ್ನಗ ಕೊಡಿ ಕಿನ್ಕ್ ದೇ ತಿನೊಡು
ಪಂಚೋಲಿ ಬಚ್ಚಿರೆ ಪಂಡ ಸತ್ಯದ ಬಚ್ಚಿರೆ .ಭೂಮಿಡ್ ತಿಕ್ಕ್ ನ ಸುರೂತ ಬಚ್ಚಿರೆನೇ ಅವ್ವೆ.
ಪಂಚೋಲಿ ಬಚ್ಚಿರೆ ಪಂಡ ತೂವೆರೆ ಬಾಮದ ಅಸ್ಸತ್ತ ಇರೆತಲೆಕ ಆಗೇಲಾದ್ ದೈವದ ಸಿರಿಮುಡಿತಲೆಕ ಉಪ್ಪುಂಡು .
ಕೊಡಿ ದೂಂಚಿ ಉಪ್ಪುಂಡು . ಬಚ್ಚಿರೆದ ಕೊಡಿಟ್ ಲಚಿಮಿ ಉಪ್ಪುವಲ್
ದೈವಾರಾಧನೆದ್ ಗಂಧ ಕೊರ್ಯೆರೆ ಈ ಬಚ್ಚಿರೆನ್ ಗಲಸುವೆರ್ .
ಸತ್ಯಪ್ರಮಾಣದ ಒವ್ವೆ ಕಜ್ಜಗ್ ಅವೆನ್ ಉಪಯೋಗ ಮಲ್ಪುವೆರ್. .
ಬಚ್ಚಿರೆಡ್ ಪಂಚೋಲಿ ಬೊಕ್ಕ ಮುಂಡೋಳಿ ಬೊಕ್ಕ ಕಾಪ್ರೊಲಿ ಬಚ್ಚಿರೆ ಪುಗಾರ್ತೆದವು .
ಆಂಡ ಈ ಬಚ್ಚಿರೆನ್ ಜಮಿಪೆರೆ ತಂತಿರ್ದಾರ್ ತಾರಿದೊಲಿ ಗಲಸ್ಲೆಕ ಗಲಸುವೆರ್ .
ಪಂಚೋಲಿ ಬಚ್ಚಿರೆನ್ ಜಮಿತ್ದ್ ಅವೆನ್ ಕಂಕನೆ ಪಾಡ್ ದ್ ಅವೆತ ಮೇಲ್ಡ್ ಕುಲ್ಯೆರ್ಡ ದೈವೊಗು ವಸಾಯ ಬರ್ಪುಜಿಗೆ .
ಒವ್ವೆ ಎಡ್ಡೆ ಕಜ್ಜಗ್ ವೀಳ್ಯ ಕೊರ್ಪುನ ಕಿರಮೋ ಉಂಡು.
ಜೋಯಿಸೆರ್ನಕಲ್ ತಾಂಬೂಲ ಪ್ರಶ್ನೆಡ್ ಕುಟುಮ ದೋಸೊನು ತೆರಿಪಾವೆರ್ .
ದಯ್ಯೊಂಗುಲು ಪಂಡ ಅರಸು ದೈವೊಲೆಗ್ ಹೆಚ್ಚಿನ ತಿಕ್ ಡ್ ಗಂಧ ಕೊರ್ಪುನಿ ಪಂಚೋಲಿ ಬಚ್ಚಿರೆಡ್ .
ಮಂಚಿ ಇರಟ್ ದಯ್ಯೊಂಗುಲೆಗ್ ಗಂಧ ಕೊರ್ಪುನಿ ಪಂಚೋಲಿ ಬಚ್ಚಿರೆಡ್ .
ಪಂಚೋಲಿ ಪಂಡ ನಡುಟು ಒಂಜಿ ದಾರ ಅಂಚಿಂಚಿ ರಡ್ಡ್ ದಾರ ಇತ್ತ್ ದ್ ಒಟ್ಟು ಐನ್ ದಾರ ಉಪ್ಪುಂಡು.
ಒಲಿ ಪಂಡ ಇರೆ . ಪಂಚ ಭೂತೊಲೆಗ್ ಸಾಕ್ಷಿಯಾದ್ ಉಂದು ಉಂಡು .
ತಾರಿದೋಲಿಟ್ ಬರೆಯಿಲೆಕ ಪಂಚೋಲಿ ಬಚ್ಚಿರೆಡ್ ಬರೆದ್ ಜಮಿಪೆರಾಪುಂಡುಗೆ .
ತಿನೆರೆ ಉಪಯೋಗ ಮಲ್ಪುವೆರ್.ಒಂತೆ ಖಾರ ಈ ಬಚ್ಚಿರೆ . ಗಡಿಪತ್ತ್ ನಕ್ಲೆಗ್ ಬೂಳ್ಯ ಕೊರೊಡಾಂಡ ಪಂಚೋಲಿ ಬಚ್ಚಿರೆನೆ ಆವೊಡು .
ಸುರುತ ನೇಮೊಡಾದ್ ಸಕನ ಪಂಡ ಶಕುನ ತೂಪುನೆಲ ಪಂಚೋಲಿ ಬಚ್ಚಿರೆಡೆ.
ಪಂಚೋಲಿ ಬಚ್ಚಿರೆದೊಟ್ಟುಗು ಗಂಧ ಪಿಂಗಾರ ಕೇಪುಳ ಪೂರಾ ಪಾಡ್ ದ್ ೩ ಸರ್ತಿ ಸಕನ ತೂಪೆರ್ .
ಸುರುತ ನೇಮೊಡಾದ್ ಬಚ್ಚಿರೆ ಪಾರಾದ್ ದೈವ ಸಕನ ತೂಪುನಿ .
ಬಂಜಿ ಬೇನೆಗ್ ಉಪ್ಪು ಸೇರಾದ್ ಈ ಬಚ್ಚಿರೆ ತಿಂದ್ಂಡ ಬಂಜಿ ಬೇನೆ ದೂರಾಪುಂಡು .
ಕಫ ಚೆಮ್ಮಗ್ ಈ ಬಚ್ಚಿರೆ ಎಡ್ಡೆ ಮುಂಚಿದೊಟ್ಟುಗು ಅಗ್ಯರ್ಡ ಕಫ ನೀರಾಪುಂಡು .
ದೈವದ ಸಂದಿ ಪಾರ್ದನೊಲೆಡ್ ಬರ್ಪಿ ಪಂಚೋಲಿ ಬಚ್ಚಿರೆ ನ್ಯಾಯ ತೀರ್ಮಾನ ಮಲ್ತೊಂತ್ಂಡ್.
ಬಚ್ಚಿರೆ ತಿನ್ಪುನಕ್ಲೆನ ಕೂಲಿ ಪೊಟ್ಟಾಪುಣಿ ,ತಾಲುನಿ ಪೂರ ಕಮ್ಮಿ .
ದುಂಬು ದಿಬ್ಬಣ ಪಿದಡ್ರೆ ದುಂಬು ಪೊಣ್ಣಗ್ ಬಾಯಿಗ್ ಬಚ್ಚಿರೆ ಪಾಡಾವೊಂತೆರ್ .
ಬಿಮ್ಮ ಕೆಂಪು ತೋ ಜೆರೆ, ಪೆದ್ಮೆದಿ ೪೦ ನೀರ್ ಮೀನಗ ತರೆ ತೊರತ್ ದ್ ಬಚ್ಚಿರೆ ಬಜ್ಜೆಯಿ ಅರಿನ್ ಗುವೆಲ್ಗ್ ಪಾಡೊಂತೆರ್
ಬಾಲೆಗ್ ಕೆಬಿ ಕುತ್ತಾನಗ ಬಚ್ಚಿರೆ ಬಜ್ಜೆಯಿದ ಗಣಪತಿ ದೀದ್ ಕುತ್ತವೆರ್ .
ಪೊಣ್ಣು ಪೋದು ಪೊಂಜೊವಾನಗ ತರೆಕ್ ನೀರ್ ,ಕರ ಪತ್ತಾವುನ ಕಿರಮೊಡ್ಲಾ ಪೊನ್ನನ ಕೈಟ್ ಬಚ್ಚಿರೆ ಬಜ್ಜೆಯಿ ದೀದ್ ಜಾಲ್ಡ್ ಪದ್ ರ್ನ ಬಾರ್ ದ ಮಿತ್ತ್ ಕೆರ್ಚಿ ತಾರಾಯಿ ಬೊಕ್ಕ ಉಜ್ಜೆರ್ ದೀದ್ ಅವೆತ ಮೇಲ್ಡ್ ಅಲೆನ್ ಕುಲ್ಲವೆರ್.
ಆನ್ ಪೊಣ್ಣಗ್ ನಿಗಂಟಾನಗಲ ಬಚ್ಚಿರೆ ಪೂಳು ಪಗತೊನ್ನ ಕಿರಮ ಉಂಡು .
ಮದಿಮೆದ ಧಾರೆಡ್ ಮದ್ಮಯೆ ಮದ್ಮಲೆ ಕೈಟ್ ಗೆಜ್ಜೆಕತ್ತಿ ಬಚ್ಚಿರೆ ಬಜ್ಜೆಯಿ ಕೊರ್ಪುನಿ ,
ಧಾರೆ ಮೈಪುನಗ ಅಂಗೈಡ್ ಬಚ್ಚಿರೆ ಬಜ್ಜೆಯಿ ದೀಪುನಿ ,ಬಿನ್ನೆರೆನ್ ಬಚ್ಚಿರೆ ಬಜ್ಜೆಯಿ ಕೊರ್ದು ತಮ್ಮನೊಗು ಲೆಪ್ಪುನಿ .
ಪಣವುದೊಟ್ಟುಗು ಬಚ್ಚಿರೆ ಬಜ್ಜೆಯಿ ದೀದ್ ಪೊಣ್ಣಗ್ ಶಿರಡಿಸಿ/ಸಿರ್ದೇಸಿ/ಸೆ ಕಟ್ಟುನಿ ಬಚ್ಚಿರೆದ ಮಾನಾದಿಗೆನ್ ತೆರಿಪಾವುಂಡು .
ಪುಣ ಪಿದಾಯಿ ದೀಪುನ ದುಂಬು ಬಚ್ಚಿರೆ ಬಜ್ಜೆಯಿ ಗುದ್ದುದು ಪುಣತ ಕುಂಟುಗು ಕಟ್ಟುನ ಕಿರಮಲ ಉಂಡು .
ಅನುಮಂತಗ್ ಬಚ್ಚಿರೆದ ಮಾಲೆ ಪಾಡುವೆರ್.
ನೇಮ ,ಕೋಲ,ನಾಗಮಂಡಲ,ತಂಬಿಲೊಗು ,ದೈವದ ಗಂಧ ಕೊರ್ರೆ ,ದೈವದ ಅರಿಕೆಡ್ ದೈವ ಬಚ್ಚಿರೆ ಪಾರಾದ್ ಶಕುನ ತೂಪುನಿ ಉಂದೆ ಬಚ್ಚಿರೆಡೆ .
ಬಚ್ಚಿರೆದ ಬೂರುನು ಇಲ್ಲದ ಯಜಮಾನಿ ನಡಿಯೆಂಡ ಆಯೆನೆ ಕೊಯ್ಯೊಡು .
ಸೂತಕದ ದಿನೊಟು ಪೊಂಜನಕ್ಲ್ ಬಚ್ಚಿರೆದ ಬೂರು ಮುಟ್ರೆ ಬಲ್ಲಿ ,ಮುಟ್ಟ್ಂಡ ದೋಸ .
ಪೊರ್ತು ಕಂತಿ ಬೊಕ್ಕ ಬಚ್ಚಿರೆ ಕೊಯ್ಯೆರೆ ಬಲ್ಲಿ .
೨೫ ಬಚ್ಚಿರೆದ ಕವಲೆ ,ನೂದು ಬಚ್ಚಿರೆದ ಸೂಡಿ ಮಲ್ಪುವೆರ್ ..ಇತ್ತೆ ಕವಲೆ ೨೦ ಬಚ್ಚಿರೆಗೆತ್ತ್ ದ್ಂಡ್.
ತಿನೆರೆ ಮುಂಡೋಳಿ ಬಚ್ಚಿರೆ ,ದೈವ ಕಲೊಕು ,ಪುಲಮರ್ದ್ ಗ್ ಪಂಚೋಲಿ ಬಚ್ಚಿರೆ ಗಲಸುವೆರ್ .
ಜೋಕ್ಲೆಗ್ ಬಂಜಿ ಬೇನೆ ಸುರಾಂಡ ಬಚ್ಚಿರೆದ ರಸೋಕು ಒಂಜಿ ಕಲ್ಲ್ ಉಪ್ಪು ಬಿರಾದ್ ಕೊರ್ಪೆರ್.
ಮಲ್ಲಕ್ಲೆಗ್ ವಾಯಿರ್ದ್ ಬಂಜಿ ಉಬ್ಬೇರ್ನ್ದರಡ್ಡ್ ಬಚ್ಚಿರೆಗ್ ಒಂಜಿ ಚಂಚದಾತ್ ಓಮ ಪಾಡ್ ದ್ ಆಗ್ಯೆರೆ ಕೊರ್ನ್ದ ರಸ ಬಂಜಿಗ್ ಎತ್ತುನ ದುಂಬು ಉಬ್ಬೇರ್ನವು ಸರಿ ಆಪುಂಡು.
ಬಂಜಿನ ಪೊಣ್ಣಗ್ ತರೆಕ್ ಪಿಂಗಾರ ದೀನಗ ಇಡೀ ಪಿಂಗಾರ ದೀಯೆರೆ ಇಜ್ಜಿ.ನಲ್ಲಿ/ಉರುವೆ ಇತ್ತ್ ನ ಪಿಂಗಾರದ ಕಣ್ಣಿದ ಎಲ್ಯಕೋಪೆನ್ ಬಲತ ಕೈತ ಉಗುರುಡು ಮದಿಮಾಯೆ ಪುಡತ್ ದ್ ಬಂಜಿನಾಲೆ ತರೆಕ್ ದೀಪೆ.ಮದಿಮೆ ಆಪುನ ದುಂಬು ಮದಿಮಾಯೆ ಆವಡ್,ಮದಿಮಾಲ್ ಆವಡ್ ಬಲತ ಕೈಕ್ ಮದಿರೆಂಗಿ ದೀಯೆರೆ ಇಜ್ಜಿ.ಸತ್ಯನಾಪುರ ಸಿರಿಕ್ ಅರೆನ ಅಜ್ಜೆರ್ ಕೈಕ್ ಮದಿರೆಂಗಿ ದೀತ್ ನಿ.
೧.ಮುಂಡೊಲಿ ಬಚ್ಚಿರೆ
೨.ಪಂಚೊಲಿ ಬಚ್ಚಿರೆ (ತೂಯೆರೆ ಅತ್ತೋಸು ಇರೆತಲೆಕ ಆಕಾರ. ಸತ್ಯ ಪ್ರಮಾಣದ ಬಚ್ಚಿರೆ)
೩.ಕುಜುಂಬು ಬಚ್ಚಿರೆ
೪.ಸೇಲಂ ಬಚ್ಚಿರೆ
೫.ಮರಪೊಲಿ ಬಚ್ಚಿರೆ
೬.ಕಲ್ಕತ್ತ ಬಚ್ಚಿರೆ
೭.ಮೈಸೂರು ಬಚ್ಚಿರೆ
೮.ಕುದ್ಕ ಬಚ್ಚಿರೆ.
ಮಾಯಿತಿ ಸಕಾಯೋ :ಕುಶಾಲಾಕ್ಷಿ .ವಿ .ಕುಲಾಲ್
No comments:
Post a Comment