ವಿಷ್ಣುಮೂರ್ತಿ ದೈವದ ಗೆಂಡಸೇವೆ -vishnumoorthydaiva gendaseve

                          ವಿಷ್ಣುಮೂರ್ತಿ ದೈವದ  ಗೆಂಡಸೇವೆ 

                ವಿಷ್ಣು ಮೂರ್ತಿ ದೈವದ ಗೆಂಡಸೇವೆದ ಚಿತ್ರ

ಮಲವೆರ್ ಫಣಿಕ್ಕರ ಅಪುನ ಕಟ್ಟ್:-

ವಿಷ್ಣುಮೂರ್ತಿಗ್ ಕಟ್ಟುನಕುಲು ಮಲವೆರ್.ಅಕ್ಲೆಗ್ ದೈವದ ಚಾಕಿರಿಗ್ ನೇಮೊಡು ಬಳೆ ಕೊರ್ದು ಪಣಿಕ್ಕರೆರ್ಂದ್ ಲೆಪ್ಪುವೆರ್. ನೇಮ ನೆರಿ ಆಯಿಬೊಕ್ಕ ಅರಸುಲ್ನಡೆ ಕಟ್ಟುನಾರೆನ್ ಬಳೆ ಕೊರ್ಪುನಕುಲು ಲೆತೊಂದು ಪೋದು ಇಂಚಿನ ದೈವೊಗು ನೇಮ ಕಟ್ಟೆರೆ ಬಳೆ ಕೊರೊಂದುಲ್ಲ.ಮೊಕ್ಲೆನ್ ಪಣಿಕ್ಕರೆರ್ಂದ್ ಪುರಪು ಲೆಪ್ಪೊಡುಂದು ಅರಸುಲೆಡ ಕೇನೊನುವೆರ್ ಅರಸುಲು ಪಣಿಕ್ಕರೆರ್ಂದ್  ಪುರಪು  ಪನ್ಪೆರ್.ಅಂಚ ಪುರಪು ಲೆಪ್ಪೊಡಂಡ ದುಂಬು ಫಣಿಕ್ಕರೆರಾಯಿನ ನಾಲ್ ಜನ ಅಡೆ ಬರೊಡು.ಪೊಸ ಫಣಿಕ್ಕರೆ ಅಪುನಾರ್ ಅರಸುಲೆನ ಕಾರ್ ಪತ್ತ್ ದ್ ,ಲೆತೊಂದು ಪೋಯಿನಕುಲು ಅರಸುಲೆಗ್ ಕಾನಿಕೆ ದೀಯೆರೆ ಉಂಡು.ಪೊಸ ಪಣಿಕ್ಕರೆ ಆಪುನಾರ್ ಮೀದ್ ಬತ್ತ್ ದ್ ಬೊಲ್ದು ಕುಂಟುದ ಮಿತ್ತ್ ಕೆಂಪು ಕುಂಟು ಸುತ್ತುದು ಅವೆತ ಮಿತ್ತ್ ಒಂಜಿ ಬೈರಾಸ್/ಶಾಲ್ ಸುತ್ತುವೆರ್.ಅರಸುಲು ಫಣಿಕ್ಕರ್ನಕ್ಲೆ ಕೈಟ್ ಬಳೆ ಕೊರ್ದು ಆರ್ ಪೋಯಿಬೊಕ್ಕ ನಾಲ್ ಜನ ಫಣಿಕ್ಕರನಕುಲು ಪೊಸ ಫಣಿಕ್ಕರ ಆಪುನಾರ್ನ ಬಲತ ಕೈಕ್ ಬಳೆ ಪಾಡ್ದ್ ಮುಂಡೊಗು ಬಸ್ಮದ ಅಡ್ಡ ನಾಮ ಪಾಡ್ದ್  ಪೊಸ ಪಣಿಕ್ಕರೆ ಆಯಿನಾರ್ ಅರಸುಲೆನ್ ಒಂಜಿ ಲೆಪ್ಪುನ ಕೆರಮ ಉಂಡು.ಅಂಚ ಲೆತ್ತ್ ದ್ ಕೈ ಮುಗಿ ಬೊಕ್ಕ  ಮೂಲ ಪುದರ್ ಬುಡ್ದು ಮೂಲ ಪುದರ್ದೊಟ್ಟುಗು ಅರಸುಲು ಪಣಿಕ್ಕರ ಸೇರ್ಸಾದ್ ಮೂಜಿ ಸರ್ತಿ ಪುರಪು ಲೆತ್ತಿ ಬೊಕ್ಕ ಫಣಿಕ್ಕರ ಆಪುನಿ. ಪಣಿಕ್ಕರೆ ಅಯಿನಾರೆನ ಇಲ್ಲಡೆ ಬಳೆ ಕೊರ್ನಕುಲು‌ ಬತ್ತ್ ದ್ ಅವ್ಲು ನಟ್ಟಿ ಕಾಯಿದ ಒಣಸ್ ಸಾರ್ವಜನಿಕೆರೆಗ್ ಕೊರ್ದು ಬಳೆ ಕೊರ್ನಕುಲು ಪೊಸ ಪಣಿಕ್ಕರನ ತರೆಕ್ ಅರಿ ಪಾಡ್ದ್ ಆಶೀರ್ವಾದ ಮಲ್ತ್ ದ್ ಅವೆರ್ದ್ ಬೊಕ್ಕ ಊರುಡು ಪಣಿಕ್ಕರೆರ್ಂದ್ ಪೊಸ ಪಣಿಕ್ಕರಗ್ ಮಾನಾದಿಗೆ ತಿಕ್ಕುಂಡು.

.ಅಂಚನೆ ವಿಷ್ಣುಮೂರ್ತಿ ದೈವ  ಲಕ್ಕ್ ದ್ ದೇವೆರೆ ದರ್ಶನ ಮಲ್ತ್  ಪೋಯಿ ಬೊಕ್ಕನೆ ಅಸುರ ಕಿರಿಯೆ ಸುರಾಪುನಿ.ಮದುಮಾಸ ತಿಂದಿ ದೈವ ತೊಲಸಿ ಕಟ್ಟೆ ಮುಟ್ರೆ ಬಲ್ಲಿ.ಅಂಚನೆ‌ ತೊಲಸಿ ಕಟ್ಟೆದ ಎದುರು ದೀನ ಕೈ ಕಾಣಿಕೆನ್ ದೈವ ದಂಟೆರೆ ಬಲ್ಲಿ.

              ವಿಷ್ಣು ಮೂರ್ತಿ ದೈವ ಕಟ್ಟುನಾರೆನ ಮೋನೆದೈತ

                         ತುಳುನಾಡ ಪ್ರಕೃತಿ ಪುರುಷ ಶಕ್ತಿಲಾಯಿನ ದೈವೊಲೆನ್ ಶೈವೆರ್ ಶಿವಗಣಂದ್ಲಾ , ವೈಷ್ಣವೆರ್ ವಿಷ್ಣುನ ಅಂಶಂದ್ ಲ ,ಶಾಕ್ತೇಯೆರ್ ದೇವಿನ ಅವತಾರಂದ್ಲಾ ಪನೊಂದು ಕತೆ ಕಟೈರ್ . ಆಂಡ ದೈವನೇ ಬೇತೆ ,ದೇವೆರೇ ಬೇತೆ . ಜಲ ಸಂಸ್ಕೃತಿರ್ದ್ ಬತ್ತಿನ ನಮ ಅವೆನ್  ಬುಡುದು ವೈದಿಕೆರ್ನ ಅಗ್ನಿ ಸಂಸ್ಕೃ ತಿಗ್ ಮಣೆ ಪಾಡ್ಯ . ಅಕ್ಲ್ ದೈವೊಲೆಗ್ ದೇವೆರೆ ಕತೆ ಕಟ್ದ್ ನಮನ್ ಮಂಗೆ ಮಲ್ದೆರ್ . ಲೆಕ್ಕೆಸಿರಿನ್ ರಕ್ತೇಶ್ವರಿಂದ್ ,ಮೈಸಂದಾಯನ್ ಮೈಸಾಸರೆಂದ್,ನಂದಿಗೋಣೆಂದ್,ಚವುಂಡಿನ್ ಚಾಮುಂಡಿಂದ್ ,ಪಂಜುರ್ಲಿ ,ಮಲರಾಯನ್ ವರಾಹ ಮೂರ್ತಿಂದ್,ಪಿಲಿಭೂತ ,ಪಿಲ್ಚಂಡಿನ್ ವ್ಯಾಘ್ರ ಚಾಮುಂಡಿಂದ್ ನಮಡನೆ ಪನ್ಪಾಯೆರ್ . ಅಂಚನೆ ಆಣ್ ದೈವೊಲೆನ್ ಪೊಣ್ಣು ಮಲ್ದೆರ್ . ಮಲರಾಯನ್ ಮಲರಾಯಿಂದ್ ,ಕೊಡಮಂದಾಯನ್ ಕೊಡಮಣಿತ್ತಾಯಿಂದ್ ಪನ್ಪಾಯೆರ್ . ಅಂಚನೆ ಕೊರಗ ತನಿಯನ ಕತೆಕ್ ಈಶ್ವರನ ಕತೆ ಸೇರ್ಸಾಯೆರ್ . ವಿಷ್ಣುಮೂರ್ತಿ ದೈವೊನು ವಿಷ್ಣುನ ನರಸಿಂಮಾವತಾರ ಪಂಡೆರ್ .ಆಂಡ ವಿಷ್ಣುಮೂರ್ತಿ ದೈವ ಬೇತೆನೇ ಆದುಂಡು .ಅಕುಲು ವಿಷ್ಣು ದೇವೆರ್ಂದ್ ಪಂಡಿ ಸಾತ್ ಗ್ ದೈವ ಪೋದು ದೇವೆರಾಯೆರೆ ಸಾದ್ಯನೆ ಇಜ್ಜಿ
                       

                                ವಿಷ್ಣುಮೂರ್ತಿ ದೈವ

                ಕೇರಳ ಭಾಗೊಡು ವಿಷ್ಣುಮೂರ್ತಿ ದೈವದ ಗೆಂಡಸೇವೆ ಹೆಚ್ಚಿಗೆ ನಡಪುಂಡು .ಅಲ್ತ ದೈವದ ದುತೈತ ಅಂಚನೆ ಮೋನೆದ ಬಣ್ಣ ಕೇಸರಿ ಕೆಂಪಾದಿಪ್ಪುಂಡು . ತುಳುನಾಡ್ ರ್ದ್ ಬಿರನೆರ್ ಒಂಜಿ ಕಾಲೊಡು ಕೇರಳ ಭಾಗದ ದೇವಸ್ಥಾನೊಲೆಗ್ ಅರ್ಚಕೆರಾದ್ ಪೋದಿತ್ತೆರ್ . ವೈಷ್ಣವೆರೆ ಈ ವಿಷ್ಣು ವೇ ಬೇತೆ . ನಮ್ಮ ದೈವಾರಾಧನೆದ ವಿಷ್ಣುಮೂರ್ತಿ ದೈವನೇ ಬೇತೆ .ತುಳುನಾಡ್ಡ್  ಕೊರಗ ತನಿಯೆ ಮಾಪಲ ಕಾಯಿ ಕೊಯಿನಗ ತುಳುನಾಡ ರಾಜಂದೈವೊಲು ಆಯನ್ ಮಾಯಕ ಮಲ್ತೆರ್ ಪನ್ಪಿ ಕತೆ ಉಂಡು.  ಆಂಡ ಆಯನ್ ಕದ್ರಿದ ವೈದಿಕ ವರ್ಗ ಕೆರ್ದ್ ಆಯೆ ಮಾಯಕಾಯೆನ್ಡ್ ದೋಸ ಬನ್ನಗ ಆಯನ್ ನಂಬೆರೆ ಸುರು ಮಲ್ತೆರ್ . ಅಂಚನೆ ಈ ವಿಷ್ಣುಮಮೂರ್ತಿನ ಕತೆಲ ದುರಂತಮಯ ಆದುಂಡು .ವಿಷ್ಣು ಮುರ್ತಿ ದೈವೊನು ಪಿಲ್ಚಮಡಿನ ಒರುಂದುಲ ಪನ್ಪೆರ್.
                                             

               ಗೆಂಡಸೇವೆಗ್ ದುಂಬು ವಿಷ್ಣುಮೂರ್ತಿ ದೈವ ಪಾತ್ರಿಗ್ ಬಾರೆದ ಬಂಬೆ ,ಪಾಳೆ ,ತಾರೆದ ತಿರಿ ಸುತ್ತುನಿ

               
  ಗೆಂಡಸೇವೆಡ್ ವಿಷ್ಣುಮೂರ್ತಿ ದೈವ ಸೂಕು ಲಾಗ್ಯುಂಡು .ಅಂಚನೆ ಮುಕಾಂಬಿ ಜೇವು ಪನ್ಪಿ ಬ್ರಾಂದಿ ಮದಿಮಾಲ್ ತಾನ್ ನಮಬಿ ಗುಳಿಗನ್ ಎನ್ನಿದ್ ಸೂಕು ಲಾಗಿದ್ ಗುಲಿಗನೊಟ್ಟುಗು ಸೇರ್ದ್ ಮುಕಾಂಬಿ ಗುಳಿಗ ಪನ್ಪಿ ಪುದರ್ ಡ್ ಅರಾದನೆ ಉಂಡು.  ಇತ್ತೆ ಅಗ್ನಿ ಕಲ್ಲುರ್ಟಿಂದ್ ಪೊಸತೊಂಜಿ ಅರಾದನೆಲ ತುಳುನಾಡ್ ಡಿತ್ತ್ ದ್ ಉಂದು ಎಂಚ ಉದಿತ್ಂಡ್ಂದ್ ತೆರಿಯೊಂದಿಜ್ಜಿ.
                                           

     ಗೆಂಡಸೇವೆಗ್ ದುಂಬು ವಿಷ್ಣು ಮೂರ್ತಿ ದೈವೊನು ಸೂಕರ ಪೂಜಿದ್ ಇಂಚ ಮುಚ್ಚಿಬೆರ್

                ಪಾಲಂತಾಯಿ ಕಣ್ಣ ಪನ್ಪಿ ತಿಯಾ ಸಮುದಾಯದ ಪಾಪದ ಆಣ್ ನೀಲೇಶ್ವರ ಕೋಲತ್ನಾಡು ಅರಸುನ್ ಕಾಪುನ ಕುರುಪ್ /ಕುರುವ ನಟ್ ಕುರುಪ್ ನ ಊಳಿಗದಾಯೆ ಆದಿತ್ತೆ . ಆ ಹುಡುಗೆ ಕುಕ್ಕುದ ಮರಟ್ ಕುಕ್ಕು ತಿಂದ್ ದ್ ಕೊರಂಟ್ ನ್ ತಿರ್ತ್ ಪಾಡ್ ವೆ . ಆ ಕೊರಂಟ್ ಮರತ ತಿರ್ತ್ ಜೆಯ್ದ್ ನ ಕುರುಪ್ ನ ತಿಗಲೆಗ್ ಬೂರುಂಡು . ಆಯೆ ಆ ಹುಡುಗನ್ ತೀರ್ನಾತ್ ಪೆಟ್ಟ್ ಪಾಡ್ದ್ ಊರುರ್ದು ಪಿದಾಯಿ ಪಾಡ್ವೆ . ಉಂದು ಒಂಜಿ ಕತೆ .

                                             

ಗೆಂಡದ ರಾಶಿಗ್ ಬೂರ್ರೆ ಬಲ್ತೊಂದು ಬರ್ಪಿನ ವಿಷ್ಣುಮೂರ್ತಿ ದೈವ

            ಕುಡೊಂಜಿ ಕತೆತ ಪ್ರಕಾರ ಕುರುವ ನಟನ ಮಗಳ್ ಇಲ್ಲದ ಕೈಕಂಜಿಲೆನ್ ತಾಂಕುನ ಪಾಪದಾಯೆ ಕಣ್ಣನ್ ಪ್ರೀತಿ ಮಲ್ಪುವಲ್ . ಉಂದೆನ್ ತೆರಿನ ಆಲ್ನ ಅಮ್ಮೆ ಆಯನ್ ಊರುರ್ದು ಪಿದಾಯಿ ಪಾಡ್ವೆ  .

         ಗೆಂಡಸೇವೆಗ್  ದುಂಬು ಗೆಂಡದ ರಾಶಿಗ್ ಕಟ್ಟುನಾರ್ ಆರತಿ ಮಲ್ಪೆರೆ ಉಂಡು

           ಈ ಬಡ ಆಣ್ ಕುಡ್ಲದ ಬಂದರ್ದ ಕೈತಲ್ದ ಜಪ್ಪುದ ಗುತ್ತುದ ದನಿ  ಪ್ರಾಯದ ಬಿರ್ವೆದಿ  ಪೊಂಜೊವು ತಂಡುಲರ್ ಕೈತಲ್ ಆಶ್ರಯ ಪಡೆಪೆ .ಕೊರಗ ತನಿಯನ ಕತೆಟ್ಲಾ ಪೂಜಾರ್ದಿ ಪೊಂಜೊವೆ ಆಯಗ್ ಆಶ್ರಯ ಕೊರ್ಪುನಿ .
                               

        ವಿಷ್ಣುಮೂರ್ತಿ ದೈವದ ವಸಾಯದ ಏರ್ತೆದ ಪೊರ್ತು

                    ಜೋಕ್ಲಿಜ್ಜಂದಿನ ತಂಡುಲರ್ ಬಿರುವೆದಿ ಪೊಂಜೊವು ದಿನೋಲ ವಿಷ್ಣುಮೂರ್ತಿ ದೇವೆರೆಗ್ ಕಣ್ಣಡ  ಪೇರ್ ನೀರ್ನ್ ದೀಪಾದ್  ಪೂಜೆ ಮಲ್ಪವೊಂತಲ್ . ಏತೋ ಸಮಯೊರ್ದು ಬೊಕ್ಕ ಒಂಜಿ ದಿನ ಕಣ್ಣಗ್ ಕನೊಟು ಈ ಊರ್ಗು ಪೋಲ ಪನ್ಲೆಕಾಂಡ್ . ಅಂಚ ಹಟೋಟು ಆಯೆ ಪಿದಾಡ್ನಗ ಆ ಪೊಂಜೊವು ಆಯಗ್ ತಾನ್ ನಂಬಿನ ವಿಷ್ಣುಮೂರ್ತಿ ದೇವೆರ್ನ ಕತ್ತಿ ಬೊಕ್ಕ ಆಸ್ರೊಡೆನ್ ಕೊರ್ಪಲ್ . ಆಸ್ರೊಡೆ ಪಂಡ ಒಲಿತ ಕೊಡೆ . ಆಯಿನ್ ಪತೊಂದು ಕಣ್ಣನ್ ಆ ಊರುಗು ಬರ್ಪೆ .
                     

                       ಪುಲ್ಯಕಲೊಗು ನಡಪಿ ಗೆಂಡಸೇವೆದ ಗೆಂಡದ ರಾಶಿಗ್ ಚಾಕಿರಿದಾಕ್ಲ್ ಪುಡ್ಯ ಪಾಡುನಿ

                            ಈ ಕಣ್ಣೆ ಊರುಗು ಬರ್ಪುನೇನ್ ಕಾತ್ ಕುಲ್ದಿನ ಕುರುವಾಟ್ ಕುರೂಪ್ ಬೊಕ್ಕ ಆಯನ ಜನ ಕಣ್ಣೆ ಕತ್ತಿ ಬೊಕ್ಕ ಪನೆಕೊಡೆನ್ ಕೆದುತ ಬರಿಟ್ ದೀದ್ ಮೀಯೆರೆ ಜಪ್ಪುನೆನ್ ತೂದು ಆಯಗ್ ಕಡ್ಪುವೆರ್ . ಕಣ್ಣೆ ಅವ್ಲೆ ಕರಿದ್ ಪೋಪೆ.
                    

               ವಿಷ್ಣುಮೂರ್ತಿ ದೈವ ಲಾಗ್ಯುನ ಗೆಂಡದ ರಾಶಿ
                             
                           ಆಯೆ ತೀರಿ ಬೊಕ್ಕ ಆ ಕುರುವಾಟ್ ಕುಟುಮೊಗು ಬಾರ್ಯಾತ್ ಸಿರ್ಕ್ ಸಂಕಡೊಲು ಬತ್ತ್ ದ್  ಅಕ್ಲ್ ಸುರುಕು ಅವೆನ್ ನಂಬಂದೆ ಕಡೆಕ್ ಕಣ್ಣನ್ ಒಟ್ಟುಗು ಬತ್ತಿ ದೈವದ ದೋಸಂದ್ ತೆರಿದ್ ನಂಬೆರೆ ಸುರು ಮಲ್ದೆರ್ .
                   

          ವಿಷ್ಣುಮೂರ್ತಿ ದೈವ ಗೆಂಡೊದ ರಾಶಿಗ್ ಲಾಯ್ಪುನಿ
       
           ವಿಷ್ಣು ಭಕ್ತೆ ಆಯಿನ ಪಾಲಂದಾಯಿ ಕಣ್ಣೆನೇ ಈ ವಿಷ್ಣುಮೂರ್ತಿ ದೈವ . ತುಳುನಾಡ್ ಡ್ಲಾ ಕೆಲವು ತಿಕ್ ಡ್ ವಿಷ್ಣುಮೂರ್ತಿ ದೈವದ ಒತ್ತೆ ಕೋಲ ನಡಪುಂಡು .ತುಳುನಾಡ ಕೇರಳ ಗಡಿ ಭಾಗೊಡು ಹೆಚ್ಚಿಗೆ ನಡಪುಂಡು .

                  ಗೆಂಡದ ರಾಸಿದ ಮಿತ್ತ್ ವಿಷ್ಣುಮೂರ್ತಿ ದೈವ

ಆಂಡ ವಿಷ್ಣುಮೂರ್ತಿ ದೈವೊಗು ಕಟ್ಟುನ ಮಲವೆರ್ ಇನಿತ ದಿನಮಾನೊಲೆಡ್ ವಿಷ್ಣು ಮೂರ್ತಿ ದೈವೊನು ವಿಷ್ಣು ದೇವೆರ್ ಮಲ್ತ್ ಲೆಕ ತೋಜೊಂದುಂಡು.ವಿಷ್ಣುಮೂರ್ತಿ ದೈವದ ಕೊಡಿಯಡಿಟ್ ಕೋಲ ಸುರಾಪುನ ದುಂಬು ವಿಷ್ಣು ದೇವೆರೆ ಶ್ಲೋಕ " ಶಾಂತಾಕಾರಂ ಭುಜಗ ಶಯನಂ,ಪದ್ಮನಾಭಂ ಸುರೇಶಂ,ವಿಷ್ವಾಧಾರಂ ಗಗನ ಸದೃಷಂ ಮೆಘವರ್ಣಂ ಶುಭಾಂಗಂ,

ಲಕ್ಷ್ಮೀ ಕಾಂತಂ ಕಮಲ ನಯನಂ,ಯೋಗಿ ಹೃದ್ಯಾನ ಗಮ್ಯಂ,ವಂದೇ ವಿಷ್ಣುಂ ಭವ ಭಯ ವರದಂ,ಸರ್ವ ಲೋಕೈಕ ನಾಥಂ " ಪಂಡ್ ದ್ ಕೋಲ ಸುರು ಮಲ್ಪುವೆರ್. ಕೋಲ ಮುಗಿನಗ " ಯದಾ ಯದಾಹಿ ಧರ್ಮಸ್ಯ ಗ್ಲಾನಿರ್ಭವತಿ ಭಾರತ,ಅಭ್ಯುತ್ತಾನಂ ಅಧರ್ಮಸ್ಯ,ತದಾತ್ಮಾನಾಂ ಸೃಜಾಮ್ಯಹಂ,

ಪರಿತ್ರಾಣಾಯ ಸಾಧೂನಾಂ ವಿನಾಶಾಯಚ ದುಷ್ಕೃತಾಂ, ದರ್ಮ ಸಂಸ್ಥಾಪನಾರ್ಥಾಯ  ಸಂಭವಾಮಿ ಯುಗೇ ಯುಗೇ" ಪಂಡ್ ದ್ ಕೋಲ ಪಿರಿಪುವೆರ್.ನಮ ನಂಬಿ ದೈವೊನು ಬುಡುದು ದೇವೆರೆ ಮಂತ್ರ ಪಂಡ ಮದಿಪುದ,ಸಂದಿದ ದೈವೊಲು ಕಲೆ ಕಾರ್ನಿಕೊನು ತೋಜಾಯೆರೆ ಸಾದ್ಯ ಇಜ್ಜಿ.ದಾಯೆ ಪಂಡ ನಮ್ಮ ಇಲ್ಲಲಿತ್ತ್ ನಕ್ಲೆನ್ ಬುಡ್ದು ಪಿದಾಯಿಡ್ದ್ ಬತ್ತ್ ನಕ್ ಲೆಗ್ ಬಲಸೊಂದು ಕುಲ್ಲುಂಡ ನಮ ಮಲ್ತಿನವು ತಪ್ಪಾದ್ ಪೋವು.ಅಂಚಾದ್ ದೆವೆರೆನ್  ದೇವೆರಾದೇ ತೂದು ದೈವೊಲೆನ್ ದೈವೊಲಾದೇ ತೂಂಡ ನನಲಾ ದೈವ ತನ್ನ ಕಲೆ ಕಾರ್ನಿಕೊನು ಖಂಡಿತಾ ತೋಜಾವು.

      

ಕಾನತ್ತೂರುದ ನಾಲ್ವೆರ್ ದೈವೊಲೆಡ್ ಒಂಜಾಯಿ ವಿಷ್ಣುಮೂರ್ತಿ ದೈವ ತನ್ನ ಕೈ ಸೇರಿಗೆಡ್ ಇತ್ತ್ ನ ಪ್ರೇತೊಲೆನ್ ಕುಟುಮದಕ್ಲೆನ ಕೈಟ್ ಒಪ್ಪಿಪುನಿ(ತುಳು ಮಲೆಯಾಳ ಬಾಸೆದ ಸೇರಿಗೆದ ದೈವಾರಾದನೆ )

ವಿಷ್ಣುಮೂರ್ತಿ ದೈವದ ನುಡಿ(ಮಲೆಯಾಲ ಬಾಸೆಡ್):-

" ಮಂಗಲಾಪುರತ್ತೆ ಕೊಯಿಲ್ ಕುಡುಪ್ಪಾಡಿ ಬೀಡ್ ಆಧಾರಮಾಯಿ ನಾಡ್ ತೇಚ ಕಣ್ಣನೆ ಕಂಡ್ಕಿಟ್ಟಿ,ಕಣ್ಣನೆ ಕೈಯ್ಯೆ ಪಿಡಿಚ್ಚು ಒರು ವ್ಯಾಯವಟ್ಟಕಾಲಂ ಕಣ್ಣನ್ ತನ್ನೆ ಪಾಲಾಮೃತಂ ಅನುಭವಿಚ್ಚಿ,ಎನ್ನಿತೋ ಮೂನರ ಕೋಟಿ ತುಳುವನ್ ಪುಲಿಬೂತಂ ಎನ್ನ್ ಪೇರುಂ ವೆಚ್ಚ್ ವಿಳಿಚ್ಚು. ತುಳುನಾಡಿನ್ನ್ ಮಲನಾಡ್ ಕಾಣಾಮೆನ್ನ್ ಕರುದಿ ಪಾಲಂದಾಯಿ ಕಣ್ಣನೆ ಕೂಡಿ ಕೋಲತ್ತ್ ನಾಡಿಲೇಕ್ಕ್ ಕೈಯೆಡುತ್ತ್,ಕದಳಿಕೊಳಂ ಸಮೀಪಿಕ್ಕ್ಯುಂ ಕುರುವಾಡನ್ ಅಗಂಬಡಿ ಕಣ್ಣನೆ ನಾಶಂ ಚೆಯ್ದು. ಕುರುವಾಡನ್ ವೀಡ್ ಚೆಂಡಡಿಚ್ಚ ಕಳಮಾಯಿ ತೀರ್ತು. ಶೇಷಂ ಕೋಟಕ್ಕ್ ಪುರಮೆ ಮೇಲೇರಿಯುಂ ಕೂಟ್ಟಿ ಏಳ್ ದಿವಸತ್ತೆ ಅತ್ತಂ ತೋತ್ತಂ ಕೈಪಿಚ್ಚು ಎಟ್ಟಾಂ ದಿವಸಂ ಕೋಟಯುಂ ತಗರ್ತ್ ದುಷ್ಟಮ್ಮಾರೆ ನಿಗ್ರಹಿಚ್ಚ್ ಭಕ್ತನ್ಮಾರೆ ಉದ್ದರಿಚ್ಚ್ ನೂಟ್ಟಿಅರುವದ್ ಗಾವುದಂ ಭೂಮಿಕ್ಕ್ ಅವಿಡವಿಡೆ ಮಹಾವಿಷ್ಣುಮೂರ್ತಿಯೆನ್ನ್ ನೆಲನಿನ್ನು. ಪಂಡ್ ಪರದೇವತ ದೇವನ್ಮಾರ್ಕುಂ ಆಯಿಟ್ ತಪಸ್ವಿಗಳ್ಕ್ ಆಯಿಟ್ಟ್ ಕಾಣಾಂಕಿಟ್ಟಾತ್ತ ಮಾಯೆ ಕಲಿಕಾಲತ್ತ್ ಕಣ್ಣನೆ ನಿಮಿತ್ತಂ ಕೋಟಪ್ಪುರಂ ಮೊಗೆಯಂಡೆ ಪಡಿಞಾಟ್ಟಯಿಲ್ ಎಲ್ಲಾವರ್ಕ್ ಕಂಡ್ಕಿಟ್ಟಿ "

ಮಾಯಿತಿ :-
                  ಒಂತೆ ಮಾಯಿತಿ ರಕ್ಷಿತಣ್ಣಡ ದೆತೊಂದ .
                       

ಚಿತ್ರ :-
           ಒಂಜಿ ರಡ್ಡ್ ಚಿತ್ರ ಮನೋಜ್ ಶೆಟ್ರೆರ್ದ್ ದೆತೊಂದ

   

   

ಚಿತ್ರ ಮಾಯಿತಿ :-
                       ಮಹೇಂದ್ರನಾಥ್  ಸಾಲೆತ್ತೂರ್
ವೀಡಿಯೊ ಲಿಂಕ್ :-
೧. https://www.youtube.com/results?search_query=vishnumoorthi+gendaseve+guvedapadpu