ತೆಂಬರೆ , ಕರಂಡೆ ,ಪಟವು ,ಇಡೆದೋಲು
ತುಲುನಾಡ ದೈವಾರಾದನೆಡ್ ಕಟ್ಟುನಕುಲೆಗ್ ದೈವೀ ಸಗ್ತಿನ್ ಒದಗಾದ್ ಕೊರ್ಪು ಲಯಬದ್ದವಾಯಿನ ತೆಲ್ಪು ಚರ್ಮ ಗಲಸಿನ ಬೊಟ್ಟುನ ಸೊತ್ತುನು ತೆಂಬರೆ ಪನ್ಪೆರ್ .ತೆನ್ ಪಂಡ ತೆಲ್ಪು,ಮೆತ್ತೆನ ಪನ್ಪಿ ಅರ್ಥ ಉಂಡು.ಪರೆ ಪಂಡ ( ಪೊರೆ )ಚರ್ಮ. ತೆನ್+ಪರೆ=ತೆಂಬರೆ ಇಂಚ ಅರ್ಥ ಮಲ್ತೊನೊಲಿ.ಬೇತೆ ಬೇತೆ ಕಿನ್ಯ ಚರ್ಮ ವಾದ್ಯೊಲೆಡ್ ತೆಂಬರೆಗ್ ಅವೆತನವೇ ಆಯಿನ ಮಾನದಿಗೆ ಉಂಡು ಪೊನ್ನೆ ಮರತ ಕರೊಕು( ಆಕೃತಿ ) ಪುಲ್ಯಕಲೊಡು ಕುದಿಕನ ಚರ್ಮ ಮುಚ್ಚಿದ್ ತೆಂಬರೆ ಮಲ್ಪುವೆರ್..ದೈವಾರಾದನೆದ ಕೊಡಿಯಡಿಟ್ ದೈವ ಚಾಕಿರಿದ ವಸಾಯೊಗುಂತುನ ನಲಿಕೆ,ಪರವ,ಪಂಬದ ಜನಾಂಗದಕುಲು ತೆಂಬರೆನ್ ಗಲಸ್ಂಡಲ ನಲಿಕೆದಕುಲು ಅವೆನ್ ತೆಂಬರೆಂದೆ ಪನ್ಪುನಿ.
ತೆಂಬರೆದ ಬಗೆಟ್ ದೈವ ಗಟ್ಟ ಜಪ್ಪುನ ಸಂದಿಡ್ ಇಚಾರ ಬರ್ಪುಂಡು.
ಕಟ್ಟುನಕುಲು ಆಯ ಬೀರ ಪನ್ನಗ ಇಂಚ ಪನ್ಪೆರ್ - "ಲಯ್ಯ ಕೇನ್ ದೇರ್ ಲಯ್ಯಂಗುಲ ಮಗೆ,ಬೀರ ಕೇನ್ ದೇರ್ ಬೀರಂಗುಲ್ಲ ಬೆಮ್ಮೇರ್ ಕೇನೊಡೇ....ಎಕ್ಕ(ಏಕ ಚಿತ್ತ-ಏಕಾಗ್ರತೆ) ಚಿತ್ತೋಡು ಎಣ್ಣೆ ಬೂಲ್ಯ ಮೈಮೆ,ಕಂಠೆ ದಲ್ಯೋಡು ಕರಂಡೆತ್ತ ಬೀರ,ನರಲೋಕ ನ್ಯಾಯ,ದೇವಲೋಕ ಸಂಧಿ,ಕೇನ್ ಬಲ್ಲ ಕುಮಾರ..ಏ.....”.ಅವೆಡ್ದ್ ಬೊಕ್ಕ ಆ...ಯೇ….ಆ.....ಇಂಚ ಲಯಬದ್ಧವಾದ್ ಸಂಧಿ ಉಪ್ಪುಂಡು.ಮೂಲು ಕರಂಡೆ ಪಂಡ ತೆಂಬರೆ.ಕಂಠೆ ಪಂಡ ಕಂಚಿದ ಬಟ್ಟಲ್.ದಲ್ಯೋಡು / ದಲಿಯುನಿ ಪಂಡ ಬೊಟ್ಟುನಿಂದರ್ಥ.ಕಂಠೆ , ಕರಂಡೆದ ಸೊರತ ಲಯಂದ್ ನಮ ಅರ್ಥ ಮಲ್ತೊನೊಡು.ತೆಂಬರೆನ್ ಎಂಚೆಂಚ ಎಂಚಿತ್ತ್ ನವುಲು ಬೊಟ್ಟೆರೆ.ಅವೆಕ್ ನಿರ್ಧಿಷ್ಠವಾಯಿನ ಜಾಗೆಂದುಂಡು.ಆ ಜಾಗೆನ್ ದೈವದ ಕೊಡಿಯಡಿಂದ್ ಲ ಪನೊಲಿ . ದುಂಬು ದೈವೊಗು ಕಟ್ಟುನಾಯೆ ಮೋನೆಗ್ ಅರ್ದಾಲ ಪಾಡೊಂದುಪ್ಪುನಗ ಅಕ್ಲೆ ಜನಾಂಗದ ಹಿರಿಯ ಪೊಂಜನಕುಲು ತೆಂಬರೆ ಬೊಟ್ಟೊಂದು ಪಾಡ್ದನ ಪನ್ನಗ ಕಟ್ಟುನಾರ್ ತೆಂಬರೆದ ಲಯತೊಟ್ಟುಗುದ ಪಾಡ್ದನದೊಟ್ಟುಗು ತಾನ್ ದೈವ ಆವೊಂದಿಪ್ಪುಲೆಕ ಮಾನಸಿಕವಾದ್ ತಯಾರಾವೊಂತೆರ್.ಅಂಚಾದ್ ಪದ-ಪಾಡ್ದನ-ತೆಂಬರೆ-ಕಟ್ಟುನಾರ್ ಬೊಕ್ಕ ದೈವದ ನಡುತ ಸಮ್ಮಂದೊಲು ಗೋಡ್ಯೊಂದುವ್ಯಕ್ತಿ ಸಗ್ತಿದೊರುತ ದೈವವಾದ್ ಲಕ್ಕ್ ದುಂತೊಂತೆರ್.
ತೆಂಬರೆ ಎಂಚ ಪುಟ್ಟುಂಡು ಪನ್ಪುನೆಕ್ ನಲಿಕೆ ಜನಾಂಗದ ಪೂರ ಹಿರಿಯಾಕ್ಲೆಡ ಪುರಾಣ ಸಮ್ಮಂದಿ ಒಂಜಿ ಕಥೆ ಇತ್ತ್ಂಡ್.ಸಮುದ್ರ ಮಥನದ ಕಾಲೊಡು ದೇವತೆಲು ಅಮುರ್ಥೊನು ಪರ್ದ್ ಇರ್ಲ್ ಮರ್ಲ್ ಆನಗ ಅಕ್ಲೆನ್ ಸರಿ ಅಜ್ಜೊಡು ಉಂತಯೆರೆ ಇಸರ ದೇವೆರೆಗ್ ಸಾದ್ಯ ಆಪುಜಿ.ಅಪಗ ಆರ್ ಮಣ್ಣ್ ದ ಮುದ್ದೆಡ್ ಒಂಜಿ ನರಮಾನ್ಯನ್ ಮಲ್ತ್ ದ್ ಅವೆಕ್ ಜೂವಕಲೆ ಕೊರ್ದ ಇಸರ ದೇವೆರೆ ಪುಗೆಲ್ ಡಿತ್ತ್ ನ ಡಮರುಗೊನು ಇಂಬ್ಯನ ಪುಗೆಲ್ ಗ್ ಪಾಡ್ದ್ ಬೊಟ್ಟಾಯೆರ್ ಗೆ.ಅವೆನ್ ಬೊಟ್ಟ್ ನಗ ದೇವತೆಲ್ನ ಇರ್ಲ್ ಮರ್ಲ್ ಪಿರಿದ್ ಸರಿ ಸಾದಿಗ್ ಬತ್ತೆರ್ ಗೆ.ದೇವೆರೆ ರೆನ ಚಾಕಿರಿಗ್ ಬೋಡಾದ್ ಎನನ್ ಉಂಡು ಮಲ್ತರ್,ಎನಡ ಚಾಕಿರಿ ದೆತೊಂಡರ್,ನನ ದುಂಬುಗು ಎನ್ನ ಕಥೆ ದಾದಂದ್ ಆಯೆ ಕೇನ್ನಗ ತುಲು ನಾಡ್ ಡ್ ಧರ್ಮೆತ್ತಿ ಮಣ್ಣ್ ಡ್ ದೈವೊಲೆನ್ ಉಂಡು ಮಲ್ಪುವೆ.ಅವೆತ ಆರಾದನೆಗ್ ನಿಕುಲು ತೆಂಬರೆ ಬೊಟ್ಟುದು ನೇಮ ಕಟ್ಟ್ ದ್ ಬದ್ ಕ್ ಕರಿಪುಲೆಂದ್ ಇಸರ ದೇವೆರ್ ಅನುಗ್ರಹ ಮಲ್ತೆರ್ ಗೆ.ಅಂಚ ತೆಂಬರೆ ಉದಿತ್ಂಡ್ಂದ್ ಪುರಾಣ ಕಥೆ ಪನ್ಪೆರ್. ಆಂಚಾದ್ ದೈವಾರಾದನೆಲ ಶೈವಾಂಶ ಮೂಲವಾದ್ ಅವೈದಿಕ ದ್ರಾವಿಡ ತುಳುವ ಆರಾದನೆಯಾದ್ ತೋಜಿದ್ ಬರ್ಪುಂಡು.
ಇಡೆದೋಲು
ಇಡೆಧೋಲು ಪನ್ಪಿನವು ನೇಮ ಕೋಲದ ಕಲೊಟು ನಲಿಕೆ /ಪಾಣಾರ ಜನಾಂಗದಕುಲು ಬೊಟ್ಟುನ ಚರ್ಮ ವಾದ್ಯ , ಅಂಡ ಉಂದು ಮಲ್ಲ ಗಾತ್ರದವು.ಕೇರಳ ಬಾಗದ ಕಟ್ಟುನಕುಲು ಎಚ್ಚ ಉಂದೆನ್ ಗಲಸುವೆರ್ . ಉಂದೆರ್ದ್ ಎಲ್ಯವು ನಲಿಕೆ ಜನಾಂಗದಕ್ಲೆನ ತೆಂಬರೆ . ಪಂಬದೆರ್ ದೈವ ಸಂಧಿಗ್ ಬೊಟ್ಟು ನ ಸೊತ್ತುನು ಕರಂಡೆ ಪನ್ಪೆರ್ . ಉಂದು ಎಲ್ಯ ಗಾತ್ರದವು . ಅರಸು ದೈವೊಲೆಗ್ ಪಂಬದೆರ್ ಸಂಧಿಗ್ ಪಟವು ಪನ್ಪಿ ತೆಂಬರೆದೊರುತ ಮಲ್ಲ ತೆಂಬರೆನ್ ಗಲಸುವೆರ್. ಗಾತ್ರೊಡು ಉಂದು ಒಂತೆ ಉದ್ದ ಇಪ್ಪುಂಡು . ಪಟವುನು ಪಂಬದೆರ್ ಮಾತ್ರ ಗಲಸುನಿ .
ಪಂಬದೆರ್ ಉಪಯೋಗ ಮಲ್ಪುನ ಕರಂಡೆ
ಪಂಬದೆರ್ನ ಕರಂಡೆಗ್ ಕೆಂಪು ಕುಂಟು ಸುತ್ತ್ ದಿತ್ತೆರ್ಡ ನಲಿಕೆ ,ಪರವೆರ್ನ ತೆಂಬರೆಗ್ ಕೆಂಪು ಕುಂಟು ಸುತ್ತುದಿಪ್ಪುಜಿ
.
ನಲಿಕೆದಕ್ಲ್ ,ಪಂಬದೆರ್ ದೈವ ಸಾನದ ಎದುರು ವಸಾಯೊಗು ಉಂತುದು ತೆಂಬರೆ ಬೊಟ್ಟುದು ಪಾಡ್ದನ ಪಂಡೆರ್ಡ ಕೆಲವೊರ ದೈವೊಗು ಕಟ್ಟುನಕುಲ್ನ ಪಿರವು ಉಂತುದು ಕುಡೊರಿ ತೆಂಬರೆ ಬೊಟ್ಟುದು ಪಾಡ್ದನ ಪನ್ಪುನವುಲ
ಉಂಡು.
.
No comments:
Post a Comment