ಕಾಂತಾರರ್ದ್ ಕಾಂತಾರ / ಕಾಂತಾವರ

           ಕಾಂತಾರರ್ದ್ ಕಾಂತಾರ / ಕಾಂತಾವರ

    ಕಾಂತಾವರ ದೇಲ್ಯದ ಪಿದಯಿ ಎಡತ ಗೋಡೆದ ಚಿತ್ರ

ದುಂಬುದ ಕಾಲೊಡು ಕಾಂತಾವರ ಕಾಡಾದಿತ್ತ್ ದ್ ಅವ್ಲು ಕೊರಗೆರೆ ಕೊಪ್ಪೊಲಿತ್ತ.ಒಂಜಿ ಬಾಲೆ ತೀರ್ನೆನ್ ಅವ್ಲು ಮಣ್ಣ್ ಮಲ್ತಿತ್ತೆರ್.ಆಬಾಲೆಗ್ ಸುಮಾರ್ 8 ವರ್ಷ ಆದಿತ್ತ್ಂಡ್.ಆ ಬಾಲೆದ ಪುದರ್ ಕಾಂತಾರೆ.ಬಾಲೆದ ಪುದರ್ ಕಾಂತಾರರ್ದ್ ಕಾಂತರ/ಕಾಂತಾವರ ಪುದರ್ ಬತ್ತ್ಂಡ್ ಪನ್ಪೆರ್ .ಬಾರೀ ಮಲ್ಲ ಉದ್ಭವ ಲಿಂಗ ಆದಿತ್ತ್ ದ್ ಈ ಲಿಂಗ ದಿನತ ಮೂಜಿ ಪೊರ್ತು ಮೂಜಿ ವರ್ಣೊಡು ತೋಜುಂಡು.

ಆ ಬಾಲೆ ತೀರ್ದ್ ನಿ ಎಂಚಂದ್ ತೆರಿಯಂದ್.ತೀರ್ನ ಬಾಲೆನ್ ಅವ್ಲು ಮಣ್ಣ್ ಮಲ್ತ್ ದಿಪ್ಪುವೆರ್.ಆ ಕಾಡ್ ಡ್ ಮಣ್ಣ್ ಮಲ್ತ್ ನ ಗೊತ್ತು.ಆಂಡ ಬೂರುಗು ಪೋತಿನಕ್ಲೆಗ್ ಜಾಗೆ ಮದತ್ ಪೋತ್ಂಡ್.

ಕೊರಗೆರ್ ಕಾಡ್ ಡ್ ನರೆ ಗರ್ತೊಂತೆರ್.ಅವೆನ್ ಕಾಡ ಕೆರೆಂಗ್ಂದ್ ಪನ್ಪೆರ್.ಬೆಯ್ಪಾದ್ ತಿಂದ್ಂಡ ಬಾರೀ ಪೌಷ್ಟಿಕವಾಯಿನ ಆಹಾರಗೆ.ಅಂಚ ನರೆ ಗರ್ತೊಂದು ಪೋಯಿನ  ಮೂಲ ಸೆರ್ಗೆನ್ನಾರ್ ಮಡುಂಬು ಬರಿತಾರ್,ಕಾಂತಾರೊಗು ಬತ್ತಿ ಬೊಕ್ಕ ಕಾಂತಾರ ಸಿರ್ಗೆನ್ನಾರ್ (ಮಡುಂಬು ಪಂಡ ಒಡಿಪು ಕಾಪುದ ಕೈತಲ್ ಇತ್ತ್ ನ ಈ ಜಾತಿದ  ಒಂಜಿ ಬರಿ) ಆಯೆರ್.ಮಡಂಬು ಬರಿತ  ಕೊರಗ ಜನಾಂಗದ  ಕಾಂತಾರನ ಅಪ್ಪೆಗ್ ಆ ಕಾಡ್ ಡ್ ಕಂಡೆ ಗರ್ಪುನಗ ಮಣ್ಣ್ ರ್ದ್ ನೆತ್ತೆರ್ ರಟ್ಟ್ಂಡ್ ಗೆ.ಬಾಲೆದ ಮೇಲ್ ಗ್ ಕತ್ತಿ ತಾಗ್ ದ್ ನೆತ್ತೆರ್ ಬತ್ತ್ಂಡ್ಂದ್ ಆ ಕರಿದ್ ಪೋಯಿನ ಬಾಲೆನ್ ದೆತ್ತ್ ದ್ ಆರ್ ಮಟ್ಟೆಲ್ ಡ್ ಪಾಡ್ ದ್ "ಓ ಮಗಾ ಕಾಂತಾರಾ ಈ ಮೂಲುಲ್ಲನಾ" ಪನ್ಪಿ ಪುರಾಪು ಅಪಗ ಅವ್ಲು ಲಿಂಗ ಮೂಡ್ಂಡ್ ಗೆ.ಕಾಂತಾವರದವು ಬಾರೀ ಮಲ್ಲ ಉದ್ಭವ ಲಿಂಗ.

 ಜೈನ ಬಲ್ಲಾಲ್ರೆನ ಅರಸೊಳಿಗೆ ಇತ್ತ್ ನ ಅಲ್ತ ಬಲಿಟ್ ಜೋಡಿ ಮೂರ್ತಿಲಿತ್ತ್ ದ್ ಕೊರಗ ಜನಾಂಗದಕುಲು ಕಾಂತಾರೆ ಬೊಕ್ಕ ಕಾಂತಾರನ ಅಪ್ಪೆಂದ್ ಪಂಡ ಒರಿನಂಚ ಜನ ಶಿವ ಪಾರೊತಿಂದ್ ಪನ್ಪೆರ್.ಕಾಂತಾರೊಡಿಪ್ಪುನಾಯೆಲ ಶಿವೆನೆ.ಅಂಚಾದ್ ಕಾಂತೇಶ್ವರಂದ್ ಆದಿಪ್ಪೊಡು.

ರೆಂಜಾಳ ಮುನಿರಾಜ ಬಲ್ಲಾಲ್ರ್ ಬರೆಯಿ ಕಾಂತಾವರ ಕ್ಷೇತ್ರ ಮಹಾತ್ಮೆಡ್ ಕಾಂತಾರದ ಕಾಂತಾರೆ ಕೊರಗೆರೆಗ್ ತಿಕ್ ದ್ ನಿಂದ್ ರಡ್ಡ್ ಗೆರೆ ಬರೆದ್,ಅವೆನ್ ಆಡಲ್ತೆ ಮಂಡಳಿಡ್,ಊರ್ದ ಹಿರಿಯಾಕ್ಲೆಡ ಪಿಂದೊಂದೇ ಬರೆತ್ ನಿಂದ್ ತೆರಿಪಾದೆರ್ .ಅಯಿಕ್ ಪೂರಕವಾದ್ ದೇಲ್ಯದ ಎಡ ಬಾಗೊಡು ಕಾಂತಾರನ ಅಪ್ಪೆ ನರೆ ಒಕ್ಕುನ,ಸಿವ ಲಿಂಗದ ಚಿತ್ರ ಪೂರ ಉಂಡು.

  

       ಕಾಂತಾವರ ದೇವಸಾನದ ಉಲಯಿ ಪುಡೆತ ಎದುರು ಗೋಡೆಡ್ ಕೊರಗ ಜನಾಂಗದ ಪೊಂಜೊವು ನರೆ ಒಕ್ಕುನ ,ಅರೆಗ್ ಲಿಂಗ ತಿಕ್ಕುನ ಚಿತ್ರ ಇತ್ತ್ಂಡ್.ಅವೆನ್ ಇತ್ತೆ ಅಳಿತ್ ದೆರ್. ಅವೆನ್ ಅಡೆಗ್ ಬತ್ತಿ ಪೊಸ ವ್ಯವಸ್ಥೆ ದೇವಸಾನದ ಉಲಯಿ ಬಾಗದ ಪಿದಯಿ ಗೋಡೆದ ಎಡತ್ ಗ್ ಪಾಡ್ಪಾದೆರ್.ಇನಿ ಅವ್ಲು ಆ ಚಿತ್ರ ಸಾರ್ವಜನಿಕೆರೆಗ್ ತೋಜೆರೆ ಬಲ್ಲಿಂದ್ ಗೋಡೆದ ಬರಿಕ್ ತಗಡ್ ಮುಚ್ಚಿದ್ ಗೋಡೆದ ಚಿತ್ರ ತೋಜಂದಿಲೆಕ ಮಲ್ತೆರ್.ದಾದ ಮಲ್ತ್ಂಡಲ ಸತ್ಯ ಸತ್ಯನೆ ಅತ್ತೆ.

         ಒಂಜಾತ್ ವರ್ಸದ ಪಿರವು ಕಾಂತಾವರ ಜಾತ್ರೆದಪಗ ಕಾಂಡೆದ ದೇವೆರೆ ಬಲಿ ಪಿದಾಡ್ದ್  ತೇರ್ ದ ಕೈತಡೆ ಬನ್ನೇಟ ಕೊರಗ ಜನಾಂಗದ ಒಂಜಿ ಹಿರಿಯ ಪೊಂಜೊವುಗು ವಸಾಯ ಬರೊಂತ್ಂಡ್.ಆರ್ ಇತ್ತೆ ನಮ ಉಲ್ಲೇಖ ಮಲ್ತಿ ಸುಂದರಣ್ಣನ ಅಜ್ಜಿಯಾದಿತ್ತೆರ್.ಸುಂದರಣ್ಣನ ಅಮ್ಮಲ ವಸಾಯೊಗು ಉಂತೊಂತೆರ್.ಕೊಡಿ ಏರ್ದ ತೇರ್ ದ ಉಚ್ಚಯ ಮುಟ್ಟ ವಸಾಯೊಗುಂತುನಾರ್ ಮದ್ದೆನ ಒಂಜಿ ಪೊರ್ತು ಮೀದ್ ಆರೇ ಅಟಿಲ್ ಮಲ್ತ್ ದ್ ಉಂಡುದು ಪಾಸ ಕುಲ್ಲೊಂತೆರ್.ತೇರ್ ದಾನಿ ಸಾನದ ಎದುರುದ ಕೆದುಟು ಮೀದ್ ಪಗೆಲ್ 11-11.30  ಗಂಟೆದ ಪೊರ್ತುಗು ಆರ್ ವಸಾಯೊಗು ಉಂತೊಂತೆರ್.ಇಂಚಿಪ್ಪ 15 -20 ವರ್ಸೊರ್ದಿಂಚಿ ವಸಾಯ ಉಂತ್ ದ್ಂಡ್.ತೇರ್ ದಡೆ ವಸಾಯದಾರ್ ಬತ್ತ್ ದ್ ಉಂತ್ ನಗ ತೇರ್ ದಡೆ ಬತ್ತಿ ಕೊರಗ ಜನಾಂಗದ ಹಿರಿಯಾರೆಡ ತೇರ್ ದ ದೇವೆರೆ ಪೂಜೆ ಮಲ್ಪುನಾರ್ ಸುರುಕು ರಡ್ಡ್ ಬೊಂಡ ,ಪಾಳೆ ಪಿಂಗಾರ ದೆತೊಂದು ಸುರುಕು ಮೊಕ್ಲೆಗ್ ಅಣ್ಣ್ ಕಾಯಿ ಕೊರಿ ಬೊಕ್ಕ ಒರಿನಕ್ಲೆಗ್ ಅಣ್ಣ್ ಕಾಯಿ ಕೊರೊಂತೆರ್.ದೇಲ್ಯೊರ್ದು ಬಲಿ ಪಿದಡ್ದ್ ತೇರ್ ದಡೆ ದೇವೆರೆ ಮೂರ್ತಿ ಬತ್ತ್ ದ್ ತೇರ್ ಏರ್ನೇಟ ಮೇರ್ನ ವಸಾಯ ಅಂಚನೆ ಉಪ್ಪುಂಡು. ಕೊರಗ ಜನಾಂಗದ ಪೊಂಜೊವುಗು ಬರೊಂತಿ ವಸಾಯೊನು ಅವ್ಲು ಪೂಜೆ ಮಲ್ಪುನಾರ್ ತೇರ್ ರ್ದ್ ಜತ್ತ್ ದ್ ಬತ್ತ್ ದ್ ತೀರ್ಥ ತಲಿತ್ ದ್ ನಿಲೆ ಮಲ್ಪುನ ಕೆರಮ ದುಂಬಿತ್ತ್ಂಡ್.ಬೊಕ್ಕ ಪಟ್ಟ ಪರಕೆಯಾಯಿನ ರಡ್ಡ್ ಬೊಂಡ ಬೊಕ್ಕ ಪಾಳೆ ಪಿಂಗಾರೊನು ಕೊರಗ ಜನಾಂಗದ ಹಿರಿಯಾರ್ಡ ಪೂಜೆ ಮಲ್ಪುನಾರ್ ದೆತೊನುವೆರ್.ಆರ್ ಮೊಕ್ಲೆಗ್ ಅಣ್ಣ್ ಕಾಯಿ ಸುರುಕು ಕೊರ್ದು ಬೇತಕ್ಲೆಗ್ ಬೊಕ್ಕ ಕೊರ್ಪೆರ್.ಅವೆರ್ದ್ ಬೊಕ್ಕ ತೇರ್ ಒಯ್ಪುನ ದುಂಬು ಕೊರಗ ಜನಾಂಗದಕುಲು ತೇರ್ ದ ಬಲ್ಲ್ ಕಡಪುನ ಕೆರಮ ಇತ್ತ್ಂಡ್.ಅಕುಲು ಕಡತಿ ಬೊಕ್ಕ ಜನೊಕುಲು ತೇರ್ ಒಯ್ಪುನ ಕೆರಮ ಇತ್ತ್ಂಡ್.ಅವ್ಲು ಕೊರಗ ಜನಾಂಗೊಗು ರಾಜ ಮರ್ಜಿ ಇತ್ತ್ಂಡ್.ಆಂಡ ರಡ್ಡ್ ವರ್ಸ ಮುಲ್ತ ಪೂಜೆದಕುಲು ಕೊರಗ ಜನಾಂಗದ ಪಟ್ಟ ಪರಕೆಲ ದೆತೊನ್ರೆ ಬತ್ತ್ ಜೆರ್,ಕೊರಗ ಜನಾಂಗದ ಪೊಂಜೊವುನ ಮಿತ್ತ್ ಬರೊಂತ್ ನ ವಸಾಯೊನು ಉಂತಾಯೆರೆ ತೀರ್ಥ ತಲಿಪೆರೆ ಬತ್ತಿಜೆರ್.ಅಂಚಾದ್ ಆ ಜನಾಂಗದ ತೆರಿನಕುಲು ತೇರ್ದೆದುರು ವಸಾಯೊಗು ಪೊಂಜೊವುನು ಉಂತವುನಲ ಬೊರ್ಚಿ,ಪಟ್ಟ ಪರಕೆ ಕೊರ್ಪುನಲ ಬೊಡ್ಚಿ,ದಾದ ಇತ್ತ್ಂಡಲ ದೇವಸಾನದ ಉಲಯಿ ಪೋದು ಕೊರ್ಕಂದ್ ನಿರ್ದಾರ ಮಲ್ತೆರ್.ಅಂಚಾದ್ ಇನಿ  ಬೊಲ್ಪು ಏಳ್ ಗಂಟೆದ ಪೊರ್ತು ಇತ್ತೆದಾರ್ ಸುಂದರ ಕೊರಗ ಪನ್ಪುನಾರ್ ದೇಲ್ಯದ ಉಲಯಿ ಪೋದು ಕೊರಗ ಜನಾಂಗದ ಮೂಲ ಪಟ್ಟ ಪರಕೆಯಾದ್ ಕೊರ್ಪುನ ರಡ್ಡ್ ಬೊಂಡ,ಒಂಜಿ ಪಾಳೆ ಪಿಂಗಾರೊನು ದೆತೊಂದು  ದೇಲ್ಯದ ಪೂಜೆದಾರ್ ಸುರುಕಾದ್ ದೇವೆರೆ ಲಿಂಗೊಗು ಮೇರ್ ಕೊರಿ ಬೊಂಡದ ಅಭಿಷೇಕ ಮಲ್ತ್ ದ್ ಪಿಂಗಾರ ದೇವೆರೆಗ್ ಸಿಂಗಾರ ಮಲ್ತ್ ದ್ ಜಾತ್ರೆದ ಬಗೆಟ್ ತೇರದ ಉಚ್ಚಯ ನಡಪುಂಡು.ಸುಮಾರ್ ಬೊಲ್ಪುಗು ಏಳ್ ಏಳರೆ ಗಂಟೆಗ್ ಅಬಿಷೇಕ ನಡಪುಂಡು.ಅವೆರ್ದ್ ಬೊಕ್ಕ  ಅಣ್ಣ್ ಕಾಯಿ,ಆಪೂಜೆ ಈ ಪೂಜೆ ದಾದ ಬೋಡಾಂಡಲ ಮಲ್ಪೊಲಿ.ಆಂಡ ರಡ್ಡ್ ಬೊಂಡಲ ಒಂಜಿ ಪಾಳೆ ಪಿಂಗಾರಲ ಪ್ರಧಾನ.

      ನಿಟ್ಟೋಣಿ ಪನ್ಪುನ ಮೂಲ ಜನಾಂಗದಾರೆರ್ದ್ ನೆಟ್ಟಣಿಗೆ ಊರಾಂಡ್.ಮುಗೇರ್ದಿ(ಮೇತಿ-ಮೇರ ಜನಾಂಗದ ಪೊಂಜನಕ್ಲೆನ್ ಅಂಚ ಪನ್ಪೆರ್) ಪೊಂಜೊವು ನರೆ ಒಕ್ಕ್ ನಗ ಶಿವಲಿಂಗೊಗು ಕತ್ತಿ ತಾಗ್ ದ್ ನೆತ್ತೆರ್ ಬರ್ಪುಂಡು.ಅಪಗ ಆಲ್ ಮಗನ್ ಲೆತ್ತ್ ದ್ ಚಿಕ್ ಪುತ್ರಂದ್ ಲೆತ್ತಲ್ ಗೆ.ಈ ಪುತ್ರ ದುಂಬುಗು ಪುತ್ತೂರು ಆಂಡ್ಂದ್ ಪನ್ಪೆರ್ .ಬಟ್ಯ ಪನ್ಪಿ ಮೇರ ಜನಾಂಗದಾರ್ ಕಂಡದ ಪುಣಿ ಕಡ್ಪುನಗ ಶಿವ ಲಿಂಗೊಗು ಕೊಟ್ಟು ತಾಗ್ ದ್ ನೆತ್ತೆರ್ ಬರ್ಪುಂಡು.ಅಪಗ ಆಯೆ ಬುಡೆದಿನ್ ಲೆತ್ತ್ ದ್ ಸೀರೆ ಪತ್ತ್ ಪನ್ನಗ,ಆಲ್ ಸೀರೆ ಸೆರಂಗ್ ಪತ್ತ್ ನಗ ಸೆರಂಗ್ ಗ್ ಸಿವ ಲಿಂಗೊನು ಪಾಡ್ವೆ.ದೇವೆರೆನ್ ಸೀರೆ ಸೆರಂಗ್ ಡ್ ಕನತಿನಕಾರಣ ಶಿರಿಯಂದ್ ಪುದರಾಂಡ್(ಕುಂಬ್ಳೆ ಆರಿಕ್ಕಾಡಿ ಕೈತಲ್ದ ಊರು). ಎಲ್ಲುರ್ದು ಎಲ್ಲೂರು ದೇಲ್ಯ,ಅದ್ದೆ ಪನ್ಪುನಾಯರ್ದ್ ಆದ್ಯಪಾಡಿ, ,ಮದರುರ್ದು ಮದವೂರು ದೇವಾಲ್ಯ(ಮದನಂತೇಶ್ವರ),ಅಡ್ರುರ್ದು ಅಡೂರು(ಮಹಲಿಂಗೇಶ್ವರ),ದೆಸಿಲುರ್ದ್ ಶಿಶಿಲ,ಪೊರಲರ್ದ್ ಪುರಲ್,ಕಾಂತಾರರ್ದ್ ಕಾಂತಾರ,ಕಟ್ಲೆ ಪನ್ಪುನಾಯರ್ದ್ ಕಟೀಲ್,ಕರಿಂಜುರ್ದು ಕಾರಿಂಜ,ಕುಕ್ಕೆ-ಸುಬ್ಬರ್ದ್ ಕುಕ್ಕೆ ಸುಬ್ರಹ್ಮಣ್ಯ,ಬಳ್ಳಡ್ ಮಂಜಗ್ ತಿಕ್ಜಿ ನಾಗೆ,ಕುಡುಪುಡು ನಾಗೆ ತಿಕ್ಕ್ ದ್ ಕುಡುಪು, ಉಂದೆನ್ ಪೂರ ತೂನಗ ಮೂಲ ಜನಾಂಗೊಗು ಬೊಕ್ಕ ತುಳುನಾಡ ದೈವ ದೇವಾರಾದನೆಗ್ ಉಪ್ಪುನ ಸಮ್ಮಂದ ತೆರಿಯುಂಡು.ಆಂಡ ದೈವ ದೇವಾಲ್ಯೊಗು ಅಕ್ ಲ್ ಮಂತ್ ನ ಸೊತ್ತುಲೆನ್ ಗಲಸ್ಂಡಲ ಅಕ್ಲೆನ್ ವ್ಯವಸ್ಥೆ ನನಲಾ ದೂರ ದೀತ್ಂಡ್.

ಪೊಲಬು-

ಎಂ.ಸುಂದರ.ಬೆಳುವಾಯಿ

 ಕೊರಗರ ಸಂಘದ ದಕ್ಷಿಣ ಕನ್ನಡ ಜಿಲ್ಲಾ ಗುರ್ಕಾರ್ರ್