ಕುಪ್ಪೆ ಪಂಜುರ್ಲಿ ದೈವದ ಸಂಪೂರ್ಣ ಕಥೆ
ಬರವು - ಚಂದು
ಕುಪ್ಪೆ ಪಂಜುರ್ಲಿ ಪನ್ಪಿನವು ತುಳುನಾಡ ಮಣ್ಣುಡು ಒಂಜಿ ವಿಶೇಷವಾಯಿನ ಭಾರಿ ಪಿರಾಕುದ ದೈವ.ಬಿಲ್ಲವ ಜನಾಂಗದ ರೋಮಡು ಪುಟ್ಟಿ ಕಲೆ ಧರ್ಮದೈವ ಕುಪ್ಪೆ ಪಂಜುರ್ಲಿ ಪನ್ಪೆರು.
ಬರಿಕ್ಕ್ ಬಣ್ಣಗು ಬಂಗಾರು ಆದ್,ಸೋಮಣ್ಣ(ಸುವರ್ಣ) ಬರಿತ್ತ ಪೊಣ್ಣುಲೆನ ಬೆರಿ ಪತ್ತೊಂದು ತುಳುನಾಡೊರ್ಮೆ ಕುಪ್ಪೆ ಪಂಜುರ್ಲಿ ಆರಾಧನೆ ಪಡೆಯೊಂದು ಬತ್ತುಂಡು ಪನ್ಪೆರು.
ತುಳುನಾಡುದ ಆದಿಮೂಲದ ದೈವ ಪಂಜುರ್ಲಿ ಪನ್ಪೆರು,ಅವು ಯೆಂಚ ಪಂಡ ಮೇಲು ಸೀಮೆಡ್ ಕರ್ತುಕನ್ನಡೆರ್,ಕೀಳ್ ಸೀಮೆ ಬೈರಸೂಡೆರ್, ಕುಕ್ಕಲದ ಬಲ್ಲಾಳೆರು,ಹೊಮಂಧ ಬಲ್ಲಾಳೆರು,ನಾಮಂಧ ಬಲ್ಲಾಳೆರು,ಬೊಟ್ಟಿ ಬಲ್ಲಾಳೆರು,ಬೊಮ್ಮ ನಾಯಕೆರು,ಐವೆರ್ ಆಡಿಗೆರ್,ಏಳ್ವೆರ್ ಅಚಾರ್ಲು ಪನ್ಪಿ ಈ ಜನಮಂದೆಲು ಪ್ರಧಾನವಾದು ನಂಬಿನ ದೈವ ಉಂದು.ಅಂಚಾದ್ ತುಳುನಾಡೊರ್ಮೆ ಜಾಗ ಜಾಗೆಡು,ಬನಟ್ಟ್,ಸಾನ ಮುಂಡಿಗೆಡು ಆದಿಮೂಲರ್ದು ಆರಾಧನೆ ಪಡೆಯಿನ ಒಂಜಿ ಪ್ರಮುಖ ದೈವ ಕುಪ್ಪೆ ಪಂಜುರ್ಲಿ.
ಕುಪ್ಪೆ ಪಂಜುರ್ಲಿನ ಕಥೆಟ್ಟ್ ಸುರುಕ್ಕು ಭೂಮಿ ಉಂಡಾದು ಅಯಿಟ್ಟ್ ಜೀವ ರಾಶಿಲು,ಪಜೀರ್,ಪುಲ್ಲು,
ದೈಯಿ ಮರಕ್ಕುಲು,ಕಾಯಿ ಕರ್ಕು ಉಂಡಾಯಿನ ಕಥೆ,ಬಲ್ಲಾಕ್ಲೆ ಆಡಳಿತ,ತುಳುವೆರೆ ಜೀವನಶೈಲಿ,ಬಿರುವೆರೆರ್ನ ಕುಲಕಸುಬು,ದೈವದ ಅವತಾರ ಈ ರೀತಿ ಉಲ್ಲೇಖ ಬರ್ಪುಂಡು.
ಈ ಕಥೆ ಇಂಚ ಸುರು ಅಪುಂಡು.ಮೂಲು ಸಂಪೂರ್ಣ ಕಥೆನು ಸಂಧಿ ರೂಪಕಡು ಕೊರಿಯರ ಅಪುಜಿ.
ಕೆಲವೊಂಜಿ ಕಥೆ ರೂಪಕಡ್ ಉಂಡು.
(ಅಧ್ಯಾಯ೧ .ಭೂಮಿ ಉಂಡಾಯಿ ಕತೆ.
ಉಂದು ಸಂದಿ ರೂಪಕಡ್ ಉಂಡು).
ವೊ..ಡೆನ್ನ..ಡೆನ್ನ..ಡೆನ್ನಾನ...
ಭೂಮಿ ಉದ್ಯ ಬೆನ್ಪೆರು ದೇವೆರು...!
ಭೂಮಿ ಉದ್ಯ ಬೆನ್ಪೆರುಯೆ....!
ಮೂಡಾಯಿದ ಉದಿಪುಗು ಸೂರ್ಯ ದೇವೆರು ವೊಲಾಗ ಅಯೆರು,
ಪಡ್ಡಾಯಿ ಕಂತುಗು ಚಂದ್ರ ದೇವೆರು ವೊಲಾಗ ಅಯೆರು,
ತೆಂಕಾಯಿಗು ಸೇಲ್ಯೆಯೆಂದ್ರೆ ವೊಲಾಗ ಅಪೆರು.
ಬಡಕಾಯಿ ಬಾಲ್ಯನ ಕುಮಾರೆ ವೊಲಾಗ ಲಾನಗಯೆ....!
ನಾಲು ದಿಕ್ಕುಗು ನಾಲು ಗುಂಡ ದೇವೆರು,
ಮೂಜಿ ದಿಕ್ಕುಗು ಮೂಜಿ ಸಾನ ಬೂತೊಲು.
ಹಾಳು ಪತ್ತಿನ ರಾವುಸುರೆರು,
ಗುಂಡ ಪತ್ತುನಾಗ ದೇವೆರು ನನ,
ಮಾಡ ಪತ್ತುನಾಗ ಬೂತೊಲು,
ಪುಂಚೊಡು ಸರ್ಪೆ,ಕಲ್ಲುಡು ನಾಗೆ,
ಬನಟ್ಟು ಬಿರ್ಮೆರ್ ಉದ್ಯೊ ಬೆಂದಿನ ಕಾಲೊಡುಯೆ.....!
ಎದಂಗು ತೂಯೆರು ಭೂಮಿ ದಾಂತೆ ಕಾಲೊಡು,
ಬಲಂಗು ತೂಯೆರು ಬಾನದಾಂತಿ ಕಾಲೊಡುದೆ ನನ,
ಲೋಕ ಬಾರಿ ಈಸರ ದೇವೆರು
ಬಲಂಗು ತಟ್ಯೆರು ಸ್ವಾಮಿ,ಬಾನ ಯೆರ್ತೆರು.
ಎಡಂಗು ತಟ್ಯೆರು ಸ್ವಾಮಿ ಭೂಮಿ ತರ್ತೆರು.
ಬಾನ ಅಜೆತ್ತರಗು ಯೆರಿದು,ಭೂಮಿ ಮೂಜಿ ಎತ್ತರ ತಾರುದು ಬತ್ತುನ ಕಾಲೊಡುದೆ...!
ಬಾನ ಮುತ್ಯೆರೆ,ಭೂಮಿ ಬಿತ್ಯೆರೆ, ಸರಿದು ಬೈದಿನ ಕಾಲೊಡುದೆ.
ಬಾನೊದ ಕೊಡಿರ್ದು ಮೇಲು ಉದ್ಯ ಬೆನ್ಪುಂಡು.
ಅಂಗಲು ಮುಂಗಲು ಪನ್ಪಿ ಬಿರ್ಸನೆ ಗಾಳಿ ದಾನೆ ಬೀಜುಂಡೆ.
ಅಬ್ಬೆಲೆಕ್ಕಂದಿ ತೆಡಿಲ ಜಾರೆಡು ತಲವ ತಂಬವೆ ಪನ್ಪಿ ತೆಡಿಲು ದಾನೆ ಮೆದ್ದುಂಡು.
ಕುಂಕುಮ ಪನಿ ಪನ್ಪಿ ಬರ್ಸ ದಾರೆ ದಾನೆ ಭೂಮಿಗು ಯೆರಗುನ ಕಾಲೊಡುದೆ...!
ಭೂಮಿಡು ಕೊಡಿತುದು ಮೇಲು ಉದ್ಯ ಬೆನ್ಪುಂಡುಯೆ...!
ಕದಿಕೆ ಪಂತಿ,ಕಡೀರಿನ ದೈ,
ಕರಿಯ ನೆಕ್ಕಿ,ಬೊಳಿಯ ತುಂಬೆ ಉದ್ಯ ಬೆನ್ಪುಂಡುಯೆ..!
ಬುಳೆಟ್ಟು ಮೇಲು ಉದ್ಯ ಬೆನ್ಪುಂಡು,
ಅತಿಕಾರೆ ಪನ್ಪಿ ರಾಜಕಾಯಮ್ಮೆ ಸತ್ಯದ ಬುಳೆ.
ನಟ್ಟಿಡು ದಾನೆ ಉದ್ಯ ಬೆನ್ಪುಂಡು,
ಪದ್ಪೆಡು ಮೇಲು ಉದ್ಯ ಬೆನ್ಪುಂಡು
ರಾಜಗಿರಿ ಕೆಂಪು‌ಪದ್ಪೆ.
ಒಂಜಿ ಪುರ್ಪಗು ಒಂಜಿ ಕಾಯಿದಲೆಕ್ಕ ಉದ್ಯ ಬೆನ್ಪುಂಡೆ ಸಾರತ್ತೊಂಜಿ ಬಿನ್ನದ ಮನೊಲಿ ನಟ್ಟಿ ಉದ್ಯ ಬೆನ್ಪುಂಡುಯೆ...!
ಕಂಡೆಡು ಮೇಲಾಪ ಉದ್ಯ ಬೆನ್ಪುಂಡು
ನರೆ,ಮೂಂಡಿ,ಕೂವೆ ಕೆರೆಂಗು ಉದ್ಯ ಬೆನ್ಪುನ ಕಾಲೊಡುದೆ...!
ಮರಟ್ಟು ಮೇಲಾಪ ಉದ್ಯ ಬೆನ್ಪುಂಡು ಮರ್ವ,ಮೈರೊಲು,ಪೊಣ್ಣೆ,ನೇರೊಳು ಪನ್ಪಿ ಜಾತಿ ಮರಕ್ಕುಲು ಉದ್ಯ ಬೆನ್ಪುಂಡುಯೆ...!
ಪಲಟ್ಟು ಮೇಲಾಪ ಉದ್ಯ ಬೆನ್ಪುಂಡೆ ಕುಕ್ಕು,ಪೆಲಕಾಯಿ ಪಲ ಉದ್ಯ ಬೆನ್ಪುನ ಕಾಲೊಡುದೆ..!
ದೇವೆರೆಡ ಮೇಲು ಉದ್ಯ ಬೆನ್ಪೆರು ಬಡಕಾಯಿ ಕೋಟೆಶ್ವರ ದೇವೆರು.
ದೈವೊಡು ಮೇಲು ಉದ್ಯ ಬೆನ್ಪೆರು ರಾಜ್ಯೊಗು ಮಲರಾಯೆ ದೈವ.
ಕೋಪೊಗು ಅವುಲು ಉದ್ಯ ದಾನೆ ಬೆನ್ಪೆರು ಸಿರಿಬೊಲ್ಲಿ ಲೆಕ್ಕೆಸಿರಿ ಬೂತ.
ಪೊರ್ಲುಗು ಅವುಲು ಉದ್ಯ ದಾನೆ ಬೆಂತೆರು ಪಂಜುರ್ಲಿ ಕುಮಾರೆ.
ಬಲ್ಲಾಳೆಡು ಮೇಲಾಪ ಉದ್ಯ ಬೆಂದೆರು ಕುಕ್ಯಡು ತುಂಬೆತ್ರಾಯ ಬಲ್ಲಾಕ್ಲು.
ಬಾಲೊಲಿಡು ಮೇಲು ಉದ್ಯ ಬೆನ್ಪೆರು
ಭೀಮರಾಯ ಬಾಲೊಲಿ.
ಬಂಗಾರುಡು ಮೇಲಾಪ ಉದ್ಯ ಬೆನ್ಪುಂಡು ರಾಮಟೊಂಕೆ ಪನ್ಪಿ ಬಂಗಾರುದೆ.
ವರಣುಡು ಮೇಲು ಉದ್ಯ ಬೆನ್ಪುಂಡು ಇಕ್ಕೆರಿ ಸಕ್ಕೆರಿ ಚಕ್ರ ಪಾದೇರಿ ವರಣುಯೆ...!
ಗೋವುಡು ಮೇಲು ದಾನೆ ಉದ್ಯ ಬೆನ್ಪುಂಡು ಕಾಜಿ ಕಬುಲ್ತಿ ಗೋವು.
ಬಾರೆಡು ದಾನೆ ಉದ್ಯ ಬೆನ್ಪುಂಡು ಅದಾಳೆ ಬೊದಾಳೆ ದೈ ಬಾರೆದೆ.
ಚಾಲ್ಯೆರು ಮೂಲ್ಯೆರು ಬಂಗೆರು ಚೌಟೆರು ಬಾರಿನ ಕಾಲೊಡುದೆ,
ಹೋಮಂಧ ಬಾಲೊಲಿ,ನಾಮಂಧ ಬಾಲೊಲಿ,ಬೂತ ಪತ್ತುನ ಬಾಲೊಲಿ,
ಮೂವೆರು ಬಾಲೊಲಿ ಬಾರಿನ ಕಾಲೊಡುದೆ.
ಅನ್ ಪೊಣ್ಣೊಗು,ಪಕ್ಕಿ,ಪಶುಕ್ಕು ಉದ್ಯ ಬೆಂಪಿನ ಕಾಲೊಡುದೆ ಪಂಜಿಗೊಂಜಿ ಉದ್ಯ ಬೆಂದೆರುಯೆ ಲೋಕ ಬಾರಿ ದೇವೆರ್....!
ಭೂಮಿ ಉದ್ಯ ಬೆಂದುದು ಪಿರ ವೊರಿದು ಬತ್ತಿನ ಕಾಲೊಡುದೆ....!
(ಅಧ್ಯಾಯ ೨ ಪಂಜಿ ಪುಟ್ಟಿನ ಕಥೆ)
"ಪಂಜಿ ಪುಟ್ಟಿನ ರಾಯನಾಡ ಸೀಮೆ ಒಂಜಿ ಉಂಡು ಪನ್ನಾಗ ದಾನೆ ತೊಜುಂಡೆ.
ಘಟ್ಟದ ಮಿತ್ತು ವೇಲೂರು ಬೂಡು ಪದವುಡು ತೋಜುಂಡುಯೆ.
ಬೇಲೂರ ಪದವುದ ಕಂಡ ಬುಳೆರಿಡು,
ಕರ್ಮಿನ ಸಾಲೆಡು,ಬೆತ್ತದ ಮಲೆಟ್ಟು
ಈಜಾ ನಗರಡು,ಅಣಿಕಲ್ಲ ಸಂದುದ ನೀರಪರಿಪುಡು,ಸರೊಳಿದ ಮರತ್ತ ತಂಪುಲ್ಲ ನೆಲೆಟ್ಟು ಪಂಜಿಲು ದಾನೆ ಉದ್ಯ ಬೆನ್ಪುಂಡುಯೆ.
ಬೊಳಿಯ ತುಂಬೆದ ಪುರ್ಪದ ವರ್ಣಗು ಸರಿಯಾಯಿ ಗುಜ್ಜರೆ ಅನ್ ಪಂಜಿ ಉದ್ಯ ಬೆಂದೆಯೆ.
ಕಪ್ಪು ಕರಂಡೆ ಕಾಯಿದ ವರ್ಣಗು ಸರಿಯಾಯಿ ಕಪ್ಪು ಕಾಳಿ ಪೊಣ್ಣು ಪಂಜಿ ಉದಿಯಲಾತುಂಡುಯೆ.
ಬೊಲಿಯ ಕಾಳಿ ಪಂಜಿಲೆನ ಕಾಲೊಡು,ಚಿಮುಳ್ಳ ಬಲ್ಲೆ ಅಕ್ಲೆ ಮೂಲ ಉಂಡುಯೆ,
ಸತ್ತಿಗೆದಾತು ಉದ್ದ,ಹರಿವಾಣದಾತು ಉರುಂಟುಡು ತುಳುವ ನಾಡು ತೋಜಿನ ವೊಂಜಿ ಕಾಲೊಡುದೆ,
ತುಳುವನಾಡು ಜಪ್ಪೊಡು ಪನ್ಪೆರುಯೆ.
ಸ್ವಾಮಿಲೆನ ಅಪ್ಪಣೆ ಭೂಮಿ ಲೋಕ ತಿರ್ತು ತೂವೊಡು ಪಂಡನೆ.ಘಟ್ಟ ಜಪ್ಪೊಡು ಪನ್ಪಾಯೆ. ವೊ.. ಲಾನಗ,
ತುಳುವ ಸೀಮೆಗು ಜಪ್ಪೊಡು ಯೆಂಕುಲು,
ಭೂಮಿ ಲೋಕ ತೂವೊಡು ಪನ್ಪ ಪಂಜಿಲು.
ಬಿಧೆ, ಬಾರು ಬುಳೆಸಲೆ,ಸೂರ್ಣ ಮೂಂಡಿ,ಕೇನೆ ಕಂಡೆ,ಬಾರೆ ಬಾನ್ಯೊಡು ಪನ್ಪ ಪಂಜಿಲು.
ಉಬ್ಬ ಸಿಡ್ತೆರು,ತಾಟೆ ಮಸೆಪೆರೆ,
ನೆಲೆ ಬುಡುದು ಬರುವೆರು ಇರ್ವೆರು ಎಣೆ ಪಂಜಿಲುಯೆ..!
ವೊವ್ವು ಘಟ್ಟಡೆ ಜಪ್ಪುನ ಕೆಂಡನ,
ಮೂಡಾಯಿಡು ಉಂಡು ಮುಗುಳಿದ ಘಟ್ಟ
ಪಡ್ಡಾಯಿಡು ಉಂಡು ಪಂಚಗಿರಿ ಘಟ್ಟ
ತೆಂಕಾಯಿಡು ಉಂಡು ಸೇಲಿಯೆಂದ್ರ ಘಟ್ಟ
ಬಡಕಾಯಿಡು ಉಂಡು ಬಾಲೆ ಬಂಗಾಡಿ ಘಟ್ಟ.
ಅವ್ವನ ಪೊರ್ತುಗು ಕಾಳಿ ಪಂಜಿ ಪನ್ಪಲು,
ಕುಕ್ಕೆದ ಘಟ್ಟ ಜಪ್ಪೊಡು ನಮ,ಸುಬ್ರಾಯ ದೇವೆರೆ ಅಂಗಣ ತೂವೊಡು ಪಂಡೊಲುಯೆ...!
ಸಂತಾನ ಶಾಪ ನಮ ಕೇನೊಡು ದಾನೆ ಪಂಡಲು.
ಕುಕ್ಕೆದ ಘಟ್ಟಗು ಜತ್ತೊಂದು ದಾನೆ ಪಂಜಿಲು ಬರುವೆರು.
ಪಂಜಿಲು ಘಟ್ಟ ಜಪ್ಪಿನ ಸುದ್ದಿಮದಿಮ ಕುಕ್ಕೆದ ಸುಬ್ರಾಯ ದೇವೆರು ಕೇಂಡೆರು.
ಕುಕ್ಕೆದ ಘಟ್ಟ ಜಪ್ಪರ ಬಲ್ಲಿಂದು ಕುಕ್ಕೆದ ಸುಬ್ರಾಯ ದೇವೆರು ಪನ್ಪೆರುಯೆ.
ಕೋಟೆ ಕಟ್ಟದೆರು,ಕೊತ್ತಲೆ ಯೆರದೆರೆ,ಕಲ್ಲ ಕಟನಿ ಕಟ್ಟದೆರು.ಮಣ್ಣ ಪುಣಿ ಮೆತ್ತದೆರು.
ಅಲವುದ ಕೋಟೆಗು ಕಂಚಿದ ಬೇಲಿ ಪಾಡದೆರೆ.
ಕೋಟೆದ ಸಂಧೆಗ ಮಂತಿನ ತೂಯನ ದಾನೆ ಪಂಜಿಲು.ಶಕ್ತಿಡು ಕಟ್ಟಿನ ಕೋಟೆನು ನಮ ಯುಕ್ತಿಡು ಜೈಪೊಡುಂದು ದಾನೆ ಪಂಡ ಪಂಜಿಲು.
ನಟ್ಟ ನಡೀರ ಜಾಮಂಧ ಪೊರ್ತುಡು ದಾನೆ ಪಂಜಿಲು ಅಲವುದ ಕೋಟೆದ ಸಂದುಡು ನೂರ್ಕೆರು,
ಕಲ್ಲಕರೆನು ಲಾಗಿದು ದಾನೆ ಬರೆವೆರು.
ಕಲ್ಲಕರೆ ಲಾಗಿದು ಅವುಲು, ಮುಳ್ಳ ಬೇಲಿನು ನುರ್ಕ ಪೊಲ್ತೊಂದು ದಾನೆ ಬರುವೆರೆ.
ಕುಕ್ಕೆ ಘಟ್ಟ ಜತ್ತುದು ಕುಲ್ಕುಂದದ ಮಜಲುಗು ಬನ್ನಗ ದಾನೆ,
ಕುಕ್ಕೆದ ದೇವೆರೆಗು ಯೆರುದುಂಡು ಕೊಡಿ, ದಿತುಂಡು ಕೊಪ್ಪರಿಗೆ, ನಡಪುಂಡು ಎಣ್ಣೆಪೂಜೆ ದೇವೆರೆಗು.
ದೇವೆರೆನು ದಾನೆ ತೂಯೆರುಯೆ, ಬೂರ್ಯೆರುಯೆ.ಎರಾಕ ಬುರ್ದು ಶರಣು ಪತ್ಯೆರುಯೆ.
ಈಶರ ಜಳಕದ ಕೆದುನಡೆ ಕಾಳಿ ಗುಜ್ಜರೆ ಪಂಜಿ ಬರುವೆರು.
ಜಳಕಗು ಬತ್ತಿ ಈಸರ ದೇವೆರೆಗು ಎರ್ಕ ಬಂಜಾರ ಅಡ್ಡ ಬುರಿಯೆರು.
ಅ ಪೊರ್ತುಗು ದೇವೆರು ದಾನೆ ತೇರ ವೊಲಾಗಡು ಅತೆರೆಯೆ.
ಇನಿಮುಟ್ಟ ಬರಂದಿ,ಕಾರಣ ಪತ್ತೊಂದು ಅಸುರಮುರ್ಗೊಲು ಇನಿ ದಾನೆ ಕಜ್ಜ ಕಾರ್ಯಡು ಪಯಣ ಪತ್ಯರುಂದು ಈಸರ ದೇವೆರು ಪಂಜಿಲೆಡ ಕೇನುವೆರೆ.
ನಾಲು ಕಾರ ಪಶುಕ್ಕು,ರಡ್ಡು ಕಾರ ಮಾನ್ಯಗು,ರಾಪಿ ಪಕ್ಕಿಗು,ಪರಪಿ ಪಿಜಿನಿಗು, ಸಂತಾನದ ಶಾಪ ಉಂಡುಗೆ,
ಯೆಂಕ್ಲೆ ಜಾತಿಗು ಸಂತಾನದ ಶಾಪ,ಸೂತಕಗು ಸಿರಿಪಲ ಉಂಡ.ಯೆಂಕ್ಲೆನ ಸಂತಾನಗು ಯೆಂಚ ಬೊಡು, ದಾಯೆಗ್ ಬೊಡೆ, ಇತ್ತಿನ ದಾಲ ಪಂಡಿಜರೆ.?
ಕಡೆ ಕಣ್ಣ ದುಃಖ ಕೊಡಿಕಣ ಕಣನೀರು ಪಂಜಿಲು ದಾನೆ ದೀನಾಗ,
ತೇರುನು ಯೆರಿ ಕುಮಾರ ದೇವೆರು
ಯೆರಿಯ ಪಂಜಿಲೆ ಲೆತ್ತೆರುಯೆ.
ಇನಿತ್ತ ದಿನೊಟ್ಟು ಕೊರ್ಪಿನ ವರನು ಕೊರ್ದು ಮುತ್ತುಂಡು ಪಂಜಿಲೆ.
ಯೆಲ್ಲೆದ ದಿನೊಕ್ಕು ಬಲೆ.
ಸೂರ್ಯನ ಉದಯಗು,ಚಂದ್ರನ ಅಸ್ತಮದ ಉಲಾಯಿಡು,ಬೊಲ್ಪುದ ಪೂಜೆಡು,ವಲಸರಿ ಮುಗಿತುದು ಲಾಗಿತ್ತು ಕೊರ್ವೆನೆಂದು ಪಂಡೆರು.
ಅ ದಿನ ದಾನೆ ಕರಿದುಂಡೆ ಮಗುರು ಮನದಾನಿ ಬೈದುಂಡೆ.
ಸೂರ್ಯನ ಉದಯಗು ಯೆಣೆ ಪಂಜಿಲು ದಾನೆ ದೇವೆರೆ ಅಂಗಣೊಗು ಪೋಯೆರೆ.
ನಾಗದರ್ಬೆದ ಕಡ್ಡಿ ಪತ್ತುದೆರು,ಮುತ್ತಿ ಗಿಂಡ್ಯೆದ ನೀರು ಪತ್ತುದೆರು,ಲೋಕ ಬಾರಿನ ಕುಮಾರೆ.
ಹುಬ್ಬ ಹಿಸ್ಯೆರು,ಮೂಜಿ ಬೊಟ್ಟು ನೀರು ಬುಡ್ಯೆರ್ಯೆ.
ದತ್ತ ಮೈ ಹಿಸ್ಯೆರು ಐನ್ ಕುರ್ಲೆದ ಶಾಪ,ಬಲತ್ತ ಮೈ ಹಿಸ್ಯೆರು,
ಪತ್ತು ಕುರ್ಲೆದ ಶಾಪ ಕೊರ್ಪೆರು ದೇವೆರುಯೆ. ತಗೆ ತಂಗಡಿ ನನ ಇಜ್ಜಿ ಪಂಜಿಂದು,
ಕಂಡನಿ ಬೊಡೆದಿ ಅಲೆಂದು ದಾನೆ ಪಂಡೆರು.
ಶಾಪ ಕೊರ್ಪೆರು ಪಂಡುಂಡ ಅವುಲು, ಸಂತಾಂದ ವರ ಕೊರ್ಪೆರು ಕುಕ್ಕೆದ ಸುಬ್ರಾಯ ದೇವೆರು.
ದೇವೆರೆಡ ಪಾದ ಕೆಂಡೆರು, ದೇವೆರೆ ಪಾದ ಪತ್ತುದು ದಾನೆ ಹುಬ್ಬ ಸಿಡ್ತೊಂಡು,ತಾಟೆ ಮಸೆಯೊಂದು ಬರುವೆರು.
ಕುಕ್ಕೆ ಕಡತ್ತೊಂದು,ವರ ಪಡೆತೊಂದು ಬನ್ನಗ ದಾನೆ ಚಿಮುಳ್ಳ ಜಿಡ್ಡೆದಡ್ಕಗು ಪಂಜಿಲು ಬರುವ, ಮುಳ್ಳು ಘಟ್ಟಂದಡ್ಕ ಕಡತ್ತ,ಬೊಲ್ಲು ಕಲ್ಲುದಡ್ಕದ ಗುಡ್ಡೆಡು ಬನ್ನಗ.
ಒಂಜಿ ಸಾದಿಡು ಪೊಯಿನ ಪಂಜಿಲು ತಗೆ ತಂಗಡಿ ಭಾಮ ಕಡಿತ್ತೆರು,
ರಡ್ಡು ಸಾದಿಡು ಗೊಡಿವುನವುಲು ಪಂಜಿಲು ಬಾವೆ ಮೈತಿದಿ ಸೂಕೆಡು ಬರುವೆರು.
ಮೂಜಿ ತಾದಿ ಗೊಡಿನವುಲು ಕಂಡನಿ ಬುಡೆದಿ ಭಾಗ್ಯ ದೆತ್ತುದು,
ಈಹ ತಡೆತೊಂದು ಮೋಹ ಪಡೆತೊಂದು ಒಟ್ಟುಗು ಕೂಡ್ಯೆರು,
ಘಟ್ಟ ಬಲಿ ಜತ್ತು ಬತ್ತನ ಪಂಜಿಲು.
ವೊ ಲಾನಗ...
ಘಟ್ಟ ಬಲಿ ಜತ್ತುನಂದ ಪೊರ್ತುಗು
ಬಡಕಾಯಿ ಗಂಗೆ ಮುಡಿಪು ತೀರ್ಥ ಮೀಯೊಡುಂದು ದಾನೆ ಪಂಡ,
ಗಂಗೆ ಉದಿಪು ತೀರ್ಥ ಮೀದು,
ಮೀಯಿ ನೀರು ಪೊಣ್ಣು ಪಂಜಿಗು ಗರ್ಬೊಗೊಡಿದು ಬರ್ಪುನ ಕಾಲೊಡು,
ಲಾನಗ.
ಒಂಜಿ ಪೊದು ರಡ್ಡು ಮೂಜಿ ನಾಲು ತಿಂಗೊಳು ಐನ್ ಅಜಿ ಏಳು ತಿಂಗೊಳು ಕರಿನಗ,
ಪೊಣ್ಣು ಪಂಜಿ ಕಾಳಿ ಪನ್ಪಾಲಾಲುಯೆ,
ಬಯಕೆದ ತಮ್ಮನ ಮಲ್ಲ ಮಲ್ಲ ತಿನೊಡುಂದು ಪಂಜಿ ಅನ್ ಗುಜ್ಜರಡ ಪಂಡಲು.
ಕರ್ಕು,ಕೆನೆ ಕೆರೆಂಗೆ ತಿಂದಲು ಪಂಜಿ,
ಬಾಯಿಡು ಉದಲೆ ಕಾರ್ಯೊಲು,
ಬಾರೆ ಬಲ್ಲಿ ಗರ್ತು ತಿಂದೊಳು ಪಂಜಿ,. ಬಾಯಿಡು ನುಲ್ಲು ಕಾರ್ಯಲು,
ಕೇನೆ,ಕೆರೆಂಗು,ಮೂಂಡಿ ಮರಂಗೆ,
ವೊಕ್ಕುದು ತಿಂದೊಳು ಬಾರು ತಿಂದೊಳು ಲಾನಗ...!
ಒರುಂಬೊ ತಿಂಗೊಳು ಕರಿದು ಬನ್ನಗ ಬಂಜಿಗೆ ಬೇನೆ ಬರ್ಪುಂಡು.
ಬಂಜಿಡು ಬರ್ಪುಂಡು ಬೆರ್ಮ ದೇವೆರೆ ಬೇನೆ ಪಂಜಿಗು ದಾನೆ ಲಾನಗ...!
ಬೇನೆ ಬನ್ನಗ ಅರೆದ್ಯಲು ಪಂಜಿ,
ಅಜರೆ ಲೋಕಗು ಕೇನುಂಡು,
ಮುರೆಡ್ಯಲು ಪಂಜಿ ಮೂಜಾರೆ ಲೋಕಗು ಕೆನ್ನಾಗ,
ಬೇನೆ ಬನ್ನಾಗ ಪಂಜಿ ಕಿನ್ನಿ ದೀಯರ ಜಾಗು ವೊಲುಂದು ತೂನ್ನಾಗ,
ಮಲೆ ಪರ್ವತ್ತದ ಗಿರಿ ಪರ್ವತ್ತದ ನಡು ತೂನಾಗ ಪಂಜಿಗು ಗುಣಕ್ಕು ಮೆಚ್ಚಿದು,
ಮನೊಕ್ಕು ಒಪ್ಪೊಂದಿನ ಕಾಲೊಡು..
ಖಾರಿ ಕಟ್ಟೊಡು,ಬಾರಿ ಲಯಕುಲಾವೊಡು ದಾನೆ ಪಂಡೆಲು.
ಈಶರ ದೇವೆರೆನ ಗೀರಿ ನಂದನದ ಬಿತ್ತಿಲುಗು ದಾನೆ ಬರುವೆರುಗೆನೆ,ಪೂವುತ ತೋಟೊಗೆ ಪೊಗ್ಯೆರು.
ಈಸರೆ ನಡ್ತಿನ ನಟ್ಟಿ ನಂದನ ತೂನಗ,ನೀರುಗು ನಿರ್ಮಲಾ,ತಾವುಗು ತಂಪು ಅವು ಕೂಡುದು ಬನ್ನಗ,
ಎಡತ್ತು ಉಂಡುಗೆ ನಾಗ ಸಂಪಿಗೆ,ಬಲತ್ತುಡು ಉಂಡುಗೆ ದೇವ ಸಂಪಗೆ,ನಡುಟ್ಟು ಉಂಡು ಕಡೀರ ದೇವ ಚಂದನದ ಮರಗೆ,
ಕಡೀರ ದೇವ ಚಂದನದ ಮರಟ್ಟುಗೆ ಕೇಂಜವೆ ಪಕ್ಕಿದ ಖಾರಿಗೆ.
ಕಡೀರ ದೇವ ಚಂದನದ ಮರತ್ತ ಮುದೆಲುಡು ಗೂಡು ಕಟ್ಟುವಲು ಪಂಜಿ .
ನಟ್ಟ ನಡಿರೆ ಜಾಮೊಂಧ ಪೊರ್ತುಡು,
ವೊಕ್ಕೊಡು ಮೂಡುಂಡೆ,ವೊಕ್ಕೊಲು ಬೇನೆ ದಾನೆ ತೋಜುಂಡೆ.
ಬೆರಿಟ್ಟೆ ಬರ್ಪುಂಡೆ ಬ್ರಹ್ಮ ದೇವೆರೆ ಬೇನೆಗಾವುಲು ಪಂಜಿಗಾಪುಂಡು ಕುರ್ಲೆದ ಬಂಜಿ ಬೇನೆ.
ನರಲ್ಯಾಲು ಪಂಜಿ ನಾಲಾರೆ ಗಾವೊಗು,
ಮುರಿಲ್ಯಾಲು ಪಂಜಿ ಮೂಜಾರೆ ಗಾವುಗು ಕೇನುಂಡು.
ಬಂಜಿಡು ಬರ್ಪುಂಡು ಏಳು ಕಿನ್ನಿಲೆ ಬೇನೆ ಬನ್ನಗ,
ನಾರಲ್ಯಲ್ ಪಂಜಿ ನಾಲೆರೆ ಗಾವುಗ್ ಕೇನುಂಡು,
ಮುರೆಡ್ಯಲ್ ಪಂಜಿ ಮೂಜಿ ಲೋಕೊಗು ಕೇನುಂಡು.
ಅರೆದ್ಯಲು,ಮೂರೆಡ್ಯಲು ಪಂಜಿ, ಪೊರೆಡುನ ಕಾಲೊಡು,
ಪನಂದಿ ಪರಕೆ ಪನ್ಪಲು ಪಂಜಿ ಲಾನಗ,
ಯಾನ್ ಪೊರ್ಲುಡು ಕಿನ್ನಿ ದೀದು ತರೆ ದೆರ್ತುಂಡ,
ಯೆನ್ನ ಕಿನ್ನಿಲೆಡ ಸುಗ್ಗಿಲೆದ ಬುಲೆಸಲೆ ದೊಂಕಾವೆಂದು ಪಂಜಿ ಪನ್ನಗ,
ಪಂಡಿ ನಾಲಯಿ ದೊಂಡೆಡ್ ಅವೊಡ್ನ ಏಳ್ ಕಿನ್ನಿಲೆಗು ಜನ್ಮ ಕೊರ್ದು ತರೆ ದೆರ್ತು ಮೆರೆಯಲ್ ಪಂಜೀ ಲಾನಗ.
ವೊಕ್ಕೊಡು ಮೂಡುನ ಬೇನೆಗ್ ಬಂಜಿ ನಂಜಿಗು ಒಂಜಿ ಕುರ್ಲೆನು ದಾನೆ ತಿನಿಯಳು.
ಪತ್ತು ಕಿನ್ನಿಲೆ ಜನ್ಮ ಕೊರ್ಪುನ ಸೊರ,ಪಂಜಿದ ಸೊರೊ ಈಸರ ಅರಮನೆಗ್ ಕೇಂದ್ ಬನ್ನಗ..
ದಿಡ್ಕ ಲಕ್ಕುವೆರೆ ಲೋಕ ಬಾರಿ ಈಸರೆರು..
ಚಾವಡಿದಣ್ಣ ಮುಂದೆಲೆನು,ಲೆತ್ತು ಕೇನುವೆರು ಕಾಡುಮುರ್ಗದ ಕಾಟ ಹೆಚ್ಚಿ ಅತುಂಡುಗೆಲಾ
ಕಾಡು ದಟ್ಟಿದು ಬೊಂಟೆ ದೇರೊಡು ನಮ ವೊಂತೆ.
ಬೋಂಟೆಗಾಪಿನ ಜನಮಂದಿಲೆನು ಕೂಡದೆರು
ಲಾನಗ..
ಬೊಂಟೆಗು ದಿನಮಾನ ದಿಡಿನ ಕಾಲೊಡುದೆ,
ಕಾಡು ದೆರದೆರು,ಬೊಂಟೆ ಮಲ್ಪದೆರ್ ಉಲೋಕ ಬಾರಿನ ಈಸರೆ.
ಬೊಲಿರಿ ನಾಯಿ ಬಲ್ಲೆಗು ದರ್ಗಿನಂಡು, ದರ್ಗುನ ಕಾಲೊಡು ಎಲ್ಯ ಎಲ್ಯ ಪಂಜಿಲು ಲಕ್ಕಿಯ ಅವುಲು,ಎಲ್ಯ ಎಲ್ಯ ಪುದೆಲು ಸೇರ್ಯ, ಮಲ್ಲ ಮಲ್ಲ ಪಂಜಿಲು ಲಕ್ಯ ಅವುಲು, ಮಲ್ಲ ಮಲ್ಲ ಕಾಡು ಮಲೆ ಪಾರುದು ಸೆರ್ಯ,
ಬಲ್ಲೆ ಪುದೆಲು ಕಾಡು ಮಲೆ ಪಂಜಿಲು ಸೇರಿನ ಕಾಲೊಡುದೆ,
ಪತ್ತೆಟ್ ಒಂಜಿ ವೊಡ್ಕದ ಕುರ್ಲೆ ಅವುಲು ಖಾರಿ ದೆಚ್ಚಿಡು ಅತೆಯೆ.
ಪಂಜಿದ ಖಾರಿಗು ಪೊಗ್ಯೆರುಯೆ,
ಪಂಜಿದ ಕುರ್ಲೆ ಪತ್ಯೆರುಯೆ,
ಮುಂಡೊಡ್ ಕೊಡ್ಯೆ,
ಬಿಲೊಡು ಬುಲಾಯಿ,
ನಾಲು ಕಾರ ಮಂಗಳ ಕುರ್ಲೆ.
ಎಡತ್ತು ಪೂಜ್ಯೆರು ಎಡಮರೆ ಗೆತ್ತೆರು,
ಬಲತ್ತು ಪೂಜ್ಯೆರು ಬಲಮರೆ ಗೆತ್ತೆರು
ಎಸಲು ಮೂಜಿ ನಾಮ ಪಾಡುದು ಯೆನ್ನ ಚೆನ್ನು ಪಾರ್ವತಿಗು ಬಾಲೆಲಿಜ್ಜ ಬಬ್ಬುಲಿಜ್ಜಂದು ಎರಮನೆಕ್ಕು ಕೊನೆತ್ತೆರುಯೆ.
ಯೆನ್ನ ಚೆನ್ನೆ ಪಾರ್ವತ್ತಿಗು ಬಾಲೆ ಬಬ್ಬುಲಿಜ್ಜಂದು ಈ ಒಂಜಿ ಪಂಜಿ ಕಿನ್ನಿನು ಬಾಲೆಲೆಕ್ಕಂದು ಅರ್ತಿ ಪೊರ್ಲುಡು ಸಾಂಕೊಂದು ಇಪ್ಪೊಡುಂದು ಪನ್ಪೆರು.
ಚೆನ್ನೆ ಪಾರ್ವತಿನು ಲೆತ್ತೆರು ಈಸರೆ.ಬನ್ನಗ ಕುರ್ಲೆ ಕೊನದೆರುಗೆನ ಅಕ್ಯೆ ಪಾರ್ವತ್ತಿಗೆ,ಕುರ್ಲೆನು ತಾಣೆ ಪತ್ತೊಂದಿಗೆ ಥೈ..ಥೈ.. ದಾನೆ ನಲಿತೆರು.
ಪಂಜಿದ ಕುರ್ಲೆ ನಿಗುಲು ಸಾಂಕುವರ,ನಿಕ್ಲು ಸಲಗುವರ ಪಂಡುದು ಈಸರೆ ಕೆನ್ನಾಗ,
ಮುಗೈಡು ಪೇರು ಕೊರುವೆನ ಸ್ವಾಮಿ,
ಮರಾಯಿಡು ಮಡ್ಡಿ ಕೊರುದು ಸಾಂಕುವೆ.
ಸಾಂಕ್ಯರ ಸಲಗ್ಯರ ಮಡ್ಡಿದರಿ ದೀಡುದೆರವುಲು ಕುರ್ಲೆನು ದಾನಿಕ್ಕು ದಾನೆ ಸಾಂಕುವೆರೆ.
ತಡ್ಪೆಡು ಕಲ್ಲಾ ಬಾರು,ಪಿಂಗಾನಿ ಪೇರು ದೀಡುದು ಸಾಂಕುನ ಒಂಜಿ ಕಾಲೊಡುದೆ,
ಅ ಕಾಲ ಪೊದು ಮೇಲು ಕಾಲ ಬನ್ನಗ ಎಲ್ಯ ಪಂಜಿ ಪೊಯೆ,ಮಲ್ಲ ಪಂಜಿ ಅಯೆ.
ನನೊಂಜಿ ಕಾಲ ಬನ್ನಗ ಮಲ್ಲ ಪಂಜಿ ಪೊಯೆ ಅಯೆ ವರ್ಗಲ ಪಂಜಿ ಅದ್ ಬೊಳೆನಗದೆ,
ಒಂಜಿ ವರ್ಷೊಡು,ಅಜಿ ತಿಂಗೊಳುಡು ಪಂಜಿನು ದಾನೆ ಸಾಂಕಿನ ಒಂಜಿ ಕಾಲೊಡು,
ನೆರೆಕರೆತ್ತ ದೂರುದುರ್ಜನ,ಮೂಂಕು ವೊಯಿಮಲೆ ಕೋನತೆಯೆ.
ಚೇವು,ಬಾರೆ ನಡಿನೆನು ಬುಡುಜೆ,
ಉಮಿ ಬಾರು ನುಂಗ್ಯರ ಬುಡುಜೆ.
ಊರು ದುರ್ಜನ ಬರ್ಪಿನ ಒಂಜಿ ಪೊರ್ತುಡು,
ಖಾರಿದ ಇಡೆತ್ತಡೆ ಕೊನೆದೆರುಗೆನ ಕೊರಜ್ಜಿದ ಗುಜ್ಜಿ ನೆಡುದೆರು ಈಸರೆ.
ಪಂಜಿದ ಲೂಟಿ ತಡೆಯರ ತೀರಂದೆ,ಕೊರಜ್ಜಿದ ಗುಜ್ಜಿಗು ಕರ್ಬದಟ್ಟೆ ತಂಕೊಲೆ ಕಟ್ಟುದು ದಾನೆ ಪಾಡುವೆರೆ,
ಹೊ.. ಕೊರಜ್ಜಿದ ಗುಜ್ಜಿಗು ಕರ್ಬದಟ್ಟೆ ಕರ್ಬ ತಂಕೊಲೆಗು ಕಟ್ಟುದು ಪಂಜಿನು ಅಲುನಾ ಕಾಲೊಡುಯೆ.
ಬಿರ್ಮಣ ಬಾರ್ಯೆ ಬಲ್ಲಾಳು ಬಾರಿ ಕಾಲೊಡುದೆ,
ತನ್ನ ರಾಜ್ಯೊಡು ಬೂಡು ಬಿರ್ಮಣ ಬಲ್ಲಾಳೆ ಸುಗ್ಗಿದ ಬುಲೆಸಲೆ ಬೇಗ ವೊಂಜ ಬೊಳೆತೆರೆ.
ಕಂಡೊನ ನಡ್ಯೆರು,ನಡ್ಪೆದರವುಲು ಬಿತ್ತನ ಬುಲೆ ಬಿತ್ಯೆರುಯೆ.
ಅಸಿರ ಕಾಯಮ್ಮೆ,ದೇವ ಕಾಯಮ್ಮೆ,ಅತಿಕಾರೆ ಬುಲೆ ಬಿತ್ತಿನ ಒಂಜಿ ಕಾಲೊಡುದೆ,
ನಟ್ಟ ನಡೀರ ಜಾಮೊಂಧ ಪೊರ್ತುಡು,
ಬುಳೆತ್ತ ಕಮ್ಮೆನ ಬತ್ತಿನ ಒಂಜಿ ಪಂಜಿದ ದುಡಿಕ್ಕು ಅವುಲು ಬತ್ತುಂಡೆ,
ಹೊ.. ಸುಗ್ಗಿದ ಬುಲೆಸಲೆ ಪರಿಮಳ ಪಂಜಿದ ದೂಡಿಕ್ಕು ಬನ್ನಗ, ದಿಡ್ಕ ಲಕ್ಕುವೆ ಪಂಜಿ,ಯೆನ್ನ ಅಪ್ಪೆ ಪಂಡಿನ ಪರಕೆ ವೊಂಜಿ ಉಂಡು ಪನ್ಪೆ.
ಕಲ್ಲಗುಜ್ಜಿದ ಕೊರಜ್ಜಿದ ಗೂಂಟ ಪೊರ್ತೆ ಕರ್ಬದಟ್ಟೆನು ಪೊಲ್ತೆನ ಪಂಜಿ,
ಬೂಡು ಬಿರ್ಮಣ ಬಲ್ಲಾಳೆ ಬುಳೆತ್ತಿನ ಕಂಡೊಗು ದಾನೆ ಜತ್ತೆ.
ಕೊಂಟುಡು ವೊಂತೆ ತಿಂದ್ಯೆ,ನಡುಕ್ಕು ಬರಿಕೆ ಪಾಡ್ಯಯೆ,ನಡುಟ್ಟು ವೊಂತೆ ತಿಂದೆ, ಕೊಂಟುಡ್ ಬರಿಕ್ಕ್ ಪಾಡ್ಯಯೆ.
ಐಂಬಲ ತಿಂದ್ಯೆ,ಪರಿಮಳ ಸೆಟ್ಯುನ ಕಾಲೊಡುದೆ,
ಬಿರ್ಮಣ ಬಲ್ಲಾಳು ಮೂಡಾಯಿ ಕುಕ್ಕೆರ್ದ್ ಲಕ್ಕುದು ಕಂಡೊನು ಬತ್ತುದು ತೂನಾಗ,
ಅರಿಬಾರ ತಿಂತ್ಯೆ, ಬಂಜಿ ಬಲಪದು,ಬೊಳೆತ್ತಿ ಕಂಡೊಡು ಪಂಜಿ ದಾನೆ ಬತ್ತೆ.
ರಾಮಕಾಲನೇ ಈಸರೆ ಒಂಜಿ ಪಂಜಿ ಸಾಂಕ್ಯೆರೆ,ಯೆನ್ನ ರಾಜ್ಯನ,ಅರ್ನನ ರಾಜ್ಯಂದು ತೂದು,ನಿರ್ಸಂತ ರಾಜ್ಯ ಅದು ಪೊಂಡುದು ಪನ್ನಗ,ಜನನು ಎದುರು ಬಲತ್ತ್ ಕೂಡದೆರುಯೆ .
ಕಟ್ಟಿನ ವೊಕ್ಕೊಲೆ ಬಿಚ್ಚೆರುಯೆ,
ವೊಲೆ ಮಣೆ ದೆತ್ತೆರುಯೆ.
ವೊಲೆ ಬರೆಯೆರು,ಮಾನ್ಯಮಾರು ಕಡದೆರು, ಈಸರ ದೇವೆರ ಅರಮನೆಕ್ಕು.
ಈಸರೆ ಅರಮನೆಗು ದೂರು ಕೊಂಡುದು ಪೊತೆರೆ.
ಈಸರೆರೆಗು ಲೆತ್ತು ಪಂಡೆರು ಬೂಡು ಬಿರ್ಮಣ ಬಲ್ಲಾಳೆ.
ವೊಯ.. ಈಸರೆರೆ ಈರ್ ಕೆಂಡರ ಈರ್ ಒಂಜಿ ಪಂಜಿ ಸಾಂಕುದು ಯೆನ್ನ ರಾಜ್ಯನೆ ಪೊಂಡೆ.ಯೆನ್ನ ರಾಜ್ಯ ಪೊಡೆಂದೆ ವ್ಯಥೆ ಮಲ್ಪುನಗ.
ಈರ್ ಸಾಂಕಿನ ಪಂಜಿಡುಗೆನ ಈರ್ ಜಯಿಪುವರ,
ಯಾನ್ ಯೆನ್ನ ಮೂಲದಕ್ಲೆಡ ಯಾನ್ ಜಯಿಪೊಡಂದು ಕೆಂಡೆರು.
ವೊ.. ದಿಡ್ಕ ಲಕ್ಕುವೆರೆ,ದಡ್ಕ ಕುಲ್ಲುವೆರ್, ಲೋಕ ಬಾರಿ ಈಸರೆರು ಪನ್ಪೆರಾರು,
ಯಾನ್ ಸಾಂಕಿನ ಪಂಜಿರ್ದಾದ್ ಈರೆ ರಾಜ್ಯ ಪೊಯೆರೆ ಬಲ್ಲಿ ಪನ್ಪೆರು.
ತ್ರಿಶೂಲ ದೆರ್ತೆರು ಬಲತ್ತ ಪುಗ್ಗೆಲ್ ದೀವೊಂದು ಬೂಡು ಬಿರ್ಮಣ ಬಲ್ಲಾಳೆ ನಡ್ತಿನ ಕಂಡದ ಮುದೆಲುಗು ಲೋಕ ಬಾರಿನ ಈಶರ ದೇವೆರು ಬನ್ನಗಾ,
ಯೆರಿದುನ ಕೋಪಡೆ ಬತ್ತೆರುಗೆ,
ಬೊಳ್ಳಿದ ಬಿರು,ಬುಗೊರಿದ ಪಗರಿ,ಮರಣದ ಶೂಲ ಪತ್ತುದೇ ಬತ್ತೆರುಯೆ.
ಬಿರ್ಮಣ ಬಾರಿನ ಕಂಬುಲೊಗು ದಾನೆ ಈಸರ ದೇವೆರು ಬನ್ನಗಾ,
ಅರಿಬಾರು ಲೇಚ್ಚಿದೆ,ಕೆಯಿ ಬಾರು ಮೊಲೆಚ್ಚತೆ, ಬೊಳೆತಿ ಕೈಯಿ ಬುಲೆನು ತಿಂತ್ಯೆ.
ಪಾಪಡು ಸಾಂಕಿನ ಪಂಜಿನು ಯಾನ್ ಮೋಸಡು ಜಯಿಪಂದೆ ಪಂಡೆರೆ.
ಈಶರ ದೇವೆರು ಬರ್ಪಿನ ಪೊರ್ಲು ತೂಯೆಗೆನವುಲು ಪಂಜಿ.
ಹುಬ್ಬ ಸಿಡ್ತೊಂದು,ತಾಟೆ ಮಸೆಯುಂಡು,ದುರ್ಬುದ್ದಿ ಪುಟ್ಟವೊಂದು ತೂಯೆನ ಅವುಲು ಪಂಜಿ.
ವೊ.. ಲಾನಗ ಯೆನ್ನ ಮಾನಗು ಅಪಮಾನ ಮಲ್ತಿ ಪಂಜಿ,ಇಪ್ಯರ ಬಲ್ಲಿ ಪಂಡುದು ಬಿರು ಪಗರಿನು ದಾನೆ ಪತ್ಯೆರು.
ಅಡ್ಯೊಗು ದಾನೆ ತೂಯೆರುಯೆ,ನೀಟಾಗು ಪಗರಿನು ಬುಡಿಯೆರು.
ವೊರುವರೆ ದೆಚ್ಚಿಡು,ಮರಣದ ದಿಚ್ಚಿಡು ಪಂಜಿನ್ ದಾನೆ ಜಯಿತೆರು.
ಸಾಂಕುದಿನ ಅಸೆ ಭಾಸೆಗು ಪಾರು ಬತ್ತೆ ಪಂಜಿ,
ಈಶರ ದೇವೆರೆ ಕಾರಮುದೆಲುಗ್ ಬನ್ನಗ,
ವೊ ಪಂಜಿದ ಬಲತ್ತ ಗೊವ್ ಕೊರೆಗು ಒಂಜಾ ಪಾಡುನಗ,
ವೊ ದವುಲಾ ದಡ್ಡಿ ಪೊಂಡು ಪಂಜಿಗು ಮರಣಗು ವೊಂದುದು ಬನ್ನಗ ಪಾರು ಬರ್ಪೆನ ಪಂಜಿ.
ಪಾರ್ ಬತ್ತೆ ಪಂಜಿ ಈಸರ ಯೆರೆಮನೆತ್ತ ಕಾರ ಮುದೆಲುಗು ಬನ್ನಗ .
ಈಶರರ್ಮನೆಕ್ಕು ಬತ್ತೆ ಪಂಜಿ ತೆಂಕಾಯಿ ತರೆ ಬಡಕಾಯಿ ಬಿಲ,ಪಡ್ಡಾಯಿ ಬೆರಿ,ಮೂಡಾಯಿಗು ಕಾರು ಪಾಡುದು ಅರಬೈ ಕೊರ್ನ ಒಂಜಿ ಕಾಲೊಡು,
ಧರ್ಮದ ಮುಟ್ಟುಗು ತರೆ ಕೊರುದು ದಾನೆ ಮುರುಳುನಾಗ,
ಚೆನ್ನೆ ಪಾರ್ವತಿ ಪಾರೊಂದು ದಾನೆ ಬತ್ತೆರು.
ಅವ್ವ ಪಂಜಿದ ದೂಡಿನು ದೆರ್ತುದು ಜಕ್ಕೆಲುಡು ದೀಡುದು ದಾನೆ ಪಂಡೆರು.
ಬಾಲೆಲೆಕ್ಕನೆ ಸಾಂಕ್ಯೆನೆ ಸ್ವಾಮಿಂದು ಅಕ್ಯೆ ಪಾರ್ವತ್ತಿ ಪಂಡೆರು,
ಬಟ್ಟಲುಡು ಪೇರು ಕೊರ್ದು ಸಾಂಕ್ಯೆನ ಸ್ವಾಮಿ,
ಮರಾಯಿಡು ಮಡ್ಡಿ ಕೊರ್ದು ಸಾಂಕಿನ ಯೆನ್ನ ಪಂಜಿನು ಯೆರು ಕೆರ್ನಿಂದು ಕೇನುವೆರೆ.
ಈಸರೆರು ಅಪಗ ಪನ್ಪೆರರುಯೆ.
ವೊ.. ಚೆನ್ನೆ ಪಾರ್ವತಿ ವ್ಯಥೆ,ವೆಸನ ದೆಪ್ಪಡ,ಸೈತಿ ಪಂಜಿನು ಯಾನು ಕೆರ್ನಿ,ಯಾನ್ ಕೆರ್ನಿಂದು ಪನ್ನಗ,
ಪಂಜಿದ ದೂಡಿನು ಬುಡ್ಪೆರು ಪಾರ್ವತಿಯೆ.
ವೊ. ಈಸರೆರೆ ವೊ.. ಈಸರೆರೆ..
ಲೋಕಬಾರುದು ಬೆಳಗುನರು,ತೆರಿದ್‌ಉ ತೆರಿಯಂದೇ ಕೆಲಸ ಮಂತರ,ಕಯ್ಯಾರೆ ಸಾಂಕಿನ ಬಾಲೆನು ಕೆರ್ನ ಪಾಪ ಮುಟ್ಟಡೆ ಸ್ವಾಮಿ,
ಸೋಲು ಪತ್ತವೊನೊಡೆ ಸ್ವಾಮಿ,
ಸೈತಿನ ಪಂಜಿಗು ಜೀವಕಲೆ ಕೊರೊಡು ಪಂಡೆರುಯೆ.
ಬಾಲೆಲೆಕ್ಕ ಕಯ್ಯಾರೆ ಸಾಂಕುದು ಕೈಯ್ಯಾರೆ ಕೆರಿಯರ.
ಶಾಪ ದೋಷಗು ವೊಡೆಗು ಪೊಪರು ಈಸರೆಂದು ಕೆನ್ನಾಗ,
ವ್ಯಥೆ ದೆತ್ತುದು ಈಸರೆರು,ಕಯ್ಯಾರೆ ಸಾಂಕುದು ಕೈಯ್ಯಾರೆ ಕೆರ್ನ ಶಾಪ ದೋಷಗು ಯಾನು ಬುರಯೆ.
ವೊ..ಸ್ವಾಮಿ ಲೋಕೊಡು ಮೂಜಿ ಸಿರಿ ನಿಂದುನ,ಬೈಲ ನಾಲು ನಾಗ ಧರ್ಬೆದ ದೈ ಕಡ್ಡಿ ದೆತ್ತುದೆರು ಲಾನಗ,
ಪಂಚ ಬಳ್ಳಿದ ಬಚ್ಚಿರೆ ವೊಂಜ ಕೊನದೆರು,
ಹೊ.. ಐನ್ ತಿರಿ,ಐನ್ ಬೊಂಡ, ತಾಟೆ ಪಂಜಿದ ತರೆ ಮಿತ್ತು ದೀದು ಪಂಜಿದ ಮೇಲುಗು ನಾಗ ಧರ್ಬೆದ ಕಡ್ಡಿಡು ಮಂತ್ರಿತ್ತುದು ಸಿರಿದಾಡೆಗು ನೀರು ದಾನೆ ಬುಡ್ನಗ
ಸೈತಿ ಪಂಜಿ ದಿಡ್ಕ ಲಕ್ಕುವೆ,
ಲಕ್ಕುದು ಪಾರುದು ಪಾರ್ವತಿನ ಪಾದೊಗು ಬುರ್ನಗ,
ಈಶ್ವರ ಪಾರ್ವತಿ ಶಾಪ ವರ ಕೊರ್ಪೆರು,
ಜೋಗದ ಪಂಜಿ ಪೊಲ ಈ ಪಂಜಿ ಮಾಯಕೊದ ದೈವ ಅಲ,
ಸ್ವಾಮಿ ಲೋಕ ಬುಡ್ಲ ಪಂಜಿ,
ಭೂಮಿ ಲೋಕ ತೂಲಂದು ದಾನೆ ಪನ್ನಗ,
ವೊ.. ಜೋಗದ ಪಂಜಿ ಪೊಯೆ ಅಯೆ,
ವೊ..ಮಾಯಕೊಡು ದೈವ ಅಯೆ.
ಈಶ್ವರನ ವರ ಪಾರ್ವತಿನ ಅಪ್ಪಣೆ ಪಡೆತಿನ ಕುಮಾರೆ,ಸ್ವಾಮಿ ಲೋಕ ಬುಡ್ಪೆ,ಭೂಮಿ ಲೋಕ ತೂಪೆಂದು ಪನ್ನಗ,ಐಶದ ಪಟ್ಟ,ಜಪತ್ತ ಮಾಲೆ ಪಡೆತ್ತೊಂಡೆ ಕುಮಾರೆ,
ಯಾನು ಪೊಪೆ,ಯಾನು ಸ್ವಾಮಿ ಲೋಕ ಬುಡ್ಪೆ, ಭೂಮಿ ಲೋಕ ತೂಪೆಂದು ದಾನೆ ಪನ್ನಗ,
ಲಾನಗಯೆ.ವೊ.....!
ಮೇಗಿನ ಲೋಕರ್ದು ತಿರ್ತ
ಭೂಮಿ ಲೋಕಗು ದಾನೆ ಜಪ್ಪುವೆನ ಬೂತ.
(ಪಂಜಿ ಕಥೆ ಮುಕ್ತಾಯ)
---------------------
ಮುಲ್ಪರ್ದು ಪಂಜಿ ಪೋದು ಪಂಜಿಬೂತ, ಪಂಜುರ್ಲಿ ದೈವ ಆದ್ ತುಳುನಾಡೊರ್ಮೆ ಆರಾಧನೆ ಪಡೆಯೆ.ಅಂಚನೆ ಕುಡುಮಗ್ ಪೋದು ಅಣ್ಣಪ್ಪನ ಪಂಜುರ್ಲಿ ಅಪೆ.ಮಣ್ಣುದ ಪಂಜಿದ ಮೂರ್ಲಿದ ಆರಾಧನೆ ಪಡೆದು ಪಂಜುರ್ಲಿ ಅಪೆ.ಏಳ್ ಬೂಡುದ ಬಲ್ಲಾಕ್ಲು ಈ ದೈವೊನು ಬೂಡುದ ದೈವ ಆದ್ ಆರಾಧನೆ ಮನ್ಪುವೆರು.ಅಯಿಟ್ಟ್ ಪಾರೆಂಗಿ ಬೂಡು ಒಂಜಿ.ಅಲ್ಪ ಪಾರೆಂಗಿ ಬಲ್ಲಾಳೆರೆನ ಕಟ್ಟು ಪಡೆತೊನುವೆ.ಇಂಚ ದೈವ ತುಳುನಾಡೊರ್ಮೆ ಪ್ರಸರಣೆ ಅಪೆ.ಬಂಗೇರ ಸೀಮೆಗ್ ಬನ್ನಾಗ ಬಂಗಾರಿನ ಪಾಪೆ ಕೈಕೊನುವೆ (ಕೆಲವೆರು ಬಂಗಾರುದ ಕಡ್ಸಲೆ ಪನ್ಪೆರು) ಮೂಲ್ಯೆರೆ ಸೀಮೆಗ್ ಬನ್ನಾಗ ಮುತ್ತಿನ ಮುಗ ಕೈಕೊನುವೆ,ಅಜೀಲೆರೆ ಸೀಮೆಗ್ ಬನ್ನಾಗ ಅಚ್ಚಿದ ಅಡ್ಡಣ ಕೈಕೊನುವೆಂದು ಪನ್ಪೆರು.
ಬಡಕಾಯಿ ರಾಜ್ಯೊಡು ನರಸಿಂಗ ಪಕ್ಕಲೆರ್ ಬೊಕ್ಕ ಉರುಂದಾರ ಬಾರಿ ಬಿರ್ಮು ಬೈದ್ಯನ ಆಯ ನ್ಯಾಯಡ್ ಉರುಂದಾರ ಬರ್ಕೆಡು ಉರುಂದ್ರಾಯ,ಉರುಂದಾರ ಮಾರ್ಲೆ ಪಂಜುರ್ಲಿ ಪನ್ಪಿ ಪುರುಪು ಪಡೆಪೆ.ತೆಂಕಾಯಿಡು ವೊರ್ನಾರ,ವೊರ್ನಾರ ಮಾರ್ಲೆ ಪನ್ಪಿ ಪುರಪು ಪಡೆಪೆ.ಅಂಚನೆ ಪೊಣ್ಣಂಗಿಲಾರ್ದು ಕುಪ್ಪೆಟ್ಟು ಬರ್ಕೆಗ್ ಬತ್ತುದು ಕುಪ್ಪೆಟ್ಟು ಪಂಜುರ್ಲಿ ಪನ್ಪಾವೆ.ಸುಳ್ಳಮಲೆ,ಬಲ್ಲಾಮಲೆಟ್ಟ್ ಅರದ್ಧರೆನ ಜಾಪಂಧ ಕಲ್ಲುಡು,ಜವರಂಧ ಕೆದುಟ್ಟು ಉದ್ಯ ಬೆಂದುಂದು ಮುಗೇರ ಪಂಜುರ್ಲಿ ಪನ್ಪಿ ಪುರಾಪು ಪಡೆಯೊಂದು ಬರ್ಪೆ.ಇಂಚ ತುಳುನಾಡೊರ್ಮೆ ನಾನ ಪುದರುಡು ಪುರಪು ಪಡೆನಗ,ಬಡಕಾಯಿ ರಾಜ್ಯೊಡು ಕಾರ್ಲ ಸೀಮೆಡು ದೈವ ಕುಪ್ಪೆರ್ಲೆ ಕಟ್ಟುಗ್ ಬೊಡಾದು ಬೂತ ಆದ್ ಉದ್ಯ ಬೆನ್ಪೆ.
.......................... .. ....................
(ಅಧ್ಯಾಯ ೩ ಪಂಜಿ ಬೂತ,ಪಂಜುರ್ಲಿ ಬೂತ)
ಬೂತ ಪುಟ್ಟುನ ಸೀಮೆ, ಭೂಮಿ ನಾಡು ವೊಂಜಿ ಉಂಡು ಪನ್ನಗ.
ಬಡಕರಾಜ್ಯೊಡು ಬಾಲೊಲಿ ಪದೊಲಿಡು
ಅರದ್ದೆರು ಪಾಡಿನ ಜಫಂದ ಕಲ್ಲುಡು,
ಜವರಮ್ಮ ಕೆದುನಲ್ಲು,ತೂನಾಗ ಪೊರ್ಲೆ
ತಾನು ಮರ್ಲೆ,ಕಪ್ಪು ಸುರ್ಪಡು,ವಜ್ರ ಅವುಸಡು,ವರಾಹ ದಾಡೆಡು ಉದ್ಯ ಬೆಂದ್ಯೆರು.
ಅಸುರ ಮುರ್ಗದ ಪಂಜಿ,ದೇವ ಮುರ್ಗದ ದೈವ,ಸರ್ಪ ಮುರ್ಗಂಧ ಬಲ್ಲಾಳೆರೆನ ಸೇರಿಗೆಡ್ ದೈವ ಕೊಂಡ ಉದ್ಯ ಬೆಂದೆ.
ಘಟ್ಟದ ಮಿತ್ತು ಬಾಲೊಲಿ ಸೀಮೆಡು,
ಬಾಲೊಲಿ ಬಜನಿಕೆಡು ದೈವಂಡ ದಾನೆ ಉದ್ಯ ಬೆನ್ಪೆ.
ಬಾಲೊಲಿಡ ಪನ್ಪೆ ದೈವ ಇರೆನ ಪೆರ ಬಜನಿಕೆ ಯೆಂಕ್ ಯಾವು.ಯಾನ್ ತಿರ್ತ ತುಳುವ ರಾಯ ಸೀಮೆ ತೂವೊಡು ಪನ್ಪೆ.
ಅವ್ವನ ವೊಂಜಿ ಕಾಲೊಡುಗೆನ ಘಟ್ಟ ಜಪ್ಪೊಡು ಬೊಟ್ಟು ಮಗುರೊಡು ಪನ್ಪೆನಾ ದಾನೆ ದೈವ.
ವೊವ್ವು ಘಟ್ಟ ಜಪ್ಪೊಡು ಪನ್ನಗ ಮೂಡಾಯಿಡು ಉಂಡು ಮುಗುಳಿದ ಘಟ್ಟ,
ಬಡಕಾಯಿಡು ಉಂಡು ಬಾಲೆ ಬಂಗಾಡಿ ಘಟ್ಟ.
ಕರಿಯ ಘಟ್ಟ ಜಪ್ಪುವೆ ಪನ್ಪೆ,
ಬೊಳಿಯ ಘಟ್ಟ ಜಪ್ಪುವೆ ಪನ್ಪೆನೆ ದೈವ.
ದೈವ ಘಟ್ಟ ಜತ್ತೊಂದು ಬನ್ನಗ ದಾನೆ ಗಾಳಿಗೊಂಜಿ ಬಜಕಿರೆ,
ಬೂರಿಗೊಂಜಿ ಮೆನ್ನಿ ದಾನೆ ಬರ್ಪುಂಡೆ.
ಕಾಯಿಯುಳ್ಳ ಮರ ಕಲ್ಕ ಪೋಪುಂಡೆ .
ಪೂವುಳ್ಳ ಮರ ಪುರ್ಪ ಪೋಪುಂಡು.
ಗುಂಡುಕಲ್ಲು ನೀರು ದಾನೆ ಅಪುಂಡು.
ಗೆಂಡದ ಬರ್ಸನೆ ದಾನೆ ಭೂಮಿಗು ಯೆರಗುಂಡೆ.
ಪೊಟ್ಯನ್ನ ಕೈಯಿ, ತಲಬೀರ ದಾನೆ ಪೋಪುಂಡೆ.
ತನೆವುಳ್ಳ ಪೆತ್ತ ಸಯ್ಯಕಂಜಿ ಪಾಡುಂಡು.
ನೀರಿಡಿತ್ತಿ ನೀರಮಚ್ಚಂಗಲು ಬೊಟ್ಟುಡು ಜೋಗ ಬೆನ್ಪನೆ.
ಬೊಟ್ಟುಡಿತ್ತಿ ಕಾಟು ಮುರ್ಗೊಲು ನೀರುಡು ಜೋಗ ಬೆನ್ಪನೆ.
ಬಂಜಿನ ಪೊಂಜೊವುನ ಗರ್ಭ ತತ್ತು ವೊಡೆವುಂಡೆ.
ಬೂತ ಘಟ್ಟ ಜಪ್ಪುನ ಕಾಲೊಡುಗೆನ ಭೂಮಿಡು ವಿಕೃತಿ ಅಪುನ ವೊಂಜಿ ಪೊರ್ತುಡುಯೆ ದೈವಂಡ ಘಟ್ಟ ಜಪ್ಪುವೆನೆ,
ಕರಿಯ ಕಟ್ಟ ಜತ್ತೆನ ದೈವ ಕಂಗನಾಡಿ ಅರದ್ದೆರೆ ಬೂಡುಗು ದಾನೆ ಬರುವೆ,
ಬೊಳಿಯ ಘಟ್ಟ ಜತ್ತೆನ ದೈವ ಬೊಮ್ಮನಾಡಿ ಬಲ್ಲಾಕ್ಲೆ ಬೂಡು ಪೊಗ್ಗುವೆನೆ.
ಬೊಮ್ಮನಾಡಿ ಬಲ್ಲಾಳೆ ಬಾರಿನ ವೊಂಜಿ ಕಾಲೊಡುದೆ,
ಶಕ್ತಿಡು ಘಟ್ಟ ಜತ್ತೆ ಬಲ್ಲಾಳೆ ಭಕ್ತಿಡು ಪೇರು ಕೊರ್ಲೆಂದು ಬಲ್ಲಾಳೆಡ ದಾನೆ ಕೇನುವೆನ.
ಶಕ್ತಿಡು ಬತ್ತಿ ದೈವೊಗು ಯಾನ್ ಭಕ್ತಿಡು ಪೇರು ಕೊರಯೆಂದು ಬಲ್ಲಾಳು ದಾನೆ ಕೊಲ್ಕೆ ಪನುವೆರೆ.
ಅತನ ವೊಂಜಿ ಪೊರ್ತುಡುಗೆನ ಕೊರಂದಿ ಬಲ್ಲಾಳನ ಕೈರ್ದು ದೆತ್ತೊನಂದೆ ಕುಲ್ಲುನ ದೈವ ಯಾನಾತ್ತುಂದು ಪನ್ಪೆ.
ಯೆನ್ನ ಕಾರ್ನಿಕ ತೋಜಾವೆಂದು ದಾನೆ ಪನ್ಪೆ ದೈವ.
ಬಲ್ಲಾಳೆರೆನು ಯಾನು ತೂಪೆಂದು ದಾನೆ ಪನ್ಪೆ ದೈವ.
ನಂಬಂದಿ ಬಲ್ಲಾಳಗು ಮಾಯಡು ಬೇನೆ ಬೆನ್ಪೆ ಪನ್ಪೆ ದೈವ.
ಬೂಡುಡಿತ್ತಿ ಪಟ್ಟದ ಆನೆಗು ದಾನೆ ಪಾರ ಪಾಡ್ಯೆ.
ಕಂಚಿಲುದ ಬಾಲೆಲೆನ ದ್ವನಿ ಸ್ವರ ದಾನೆ ಕೆಂಡೆ,ಕಂಚಿಲುಗು ಬೂತ ಪಾರ ಪಾಡ್ಯೆ.
ಮಾನ್ಯನು ಕೆರ್ಯೆ ದೈವ ಮುರಿಯೊದ ಸ್ವರ ದಾನೆ ಕೇನುಂಡೆ,ಕಂಡೊಡು ಕಾಟ ವೊಯಿಪಾಯೆ.
ಮರ್ಲು ಪತ್ತಾಯೆ ದೈವ,ಪೊಣ್ಣಗು ದುರ್ಬಿಲೆ ಪಾಡ್ಯೆನ,
ಕರೆಂಕಿಡು ಪಶುಕ್ಕುಲೆ ದ್ವನಿ ಸ್ವರ ಕೇನುಂಡು,ಪಶುಕ್ಕು ಪಾರ ಪಾಡುವೆ,
ಬುಳೆಯಿ ಬುಳೆಸಲೆಕ್ಕು ನಚ್ಚ ಬೆಂದ್ಯೆ ದೈವ.
ನಂಬಂದಿ ಬಲ್ಲಾಳಗು ಅರಿಯೊ ಮುರಿಯಾ,ಸಾವು,ನಚ್ಚದ ಕಜ್ಜ ದೈವ ಬೆನ್ಪುನ ಒಂಜಿ ಕಾಲೊಡುದೆ,
ಉಂದು ದಾನೆ ಕಷ್ಟ ಗಲಿಗೆ,ಜೋಗ ಮಾಯೆ ಪನ್ಪೆರೆ ಬೊಮ್ಮನ್ನ ಬಲ್ಲಾಕ್ಲು.
ಸಾರಿ ತೂಪಿ ಪಂಚ ಕೋಟಿ ಬಲ್ಯಾಯನು ಚಾವಡಿಗು ದಾನೆ ಲೆಪುಡದೆರು.
ಬೊಮ್ಮನಾಡಿ ಬಲ್ಲಾಕ್ಲೆ ಬೂಡುಗು ಬತ್ತಿ ಬಲ್ಯಾಯಡ ಚಾವಡಿಡು ಸಾರಿ ಪಾಡ್ಯರ ಪನುವೆರು ಬಲ್ಲಾಳು.
ಯೆನ್ನ ಚಾವಡಿಡು ಸಾರಿ ಪಾಡು ಬಲ್ಯಾಯ,ಅಲಿತ್ತು ತೂಲ ಬಲ್ಯಾಯ ಮಗ ಗುಣಿತ್ ಪನ್ಲಾಂದು ದಾನೆ ಪಂಡೆರು.
ಅತನ ವೊಂಜಿ ಪೊರ್ತುಡುಗೆನ
ಯಾನ್ ಪನ್ಪಿ ಜೋಡನೆ ಮಲ್ಪುಲೆ ಬಲ್ಲಾಳೆ,
ಯಾನ್ ಪನ್ಪಿ ಕಜ್ಜೊನು ಮನ್ಪಲೆ ಬಲ್ಲಾಳೆಂದು ದಾನೆ ಬಲ್ಯಾಯೆ ಪನ್ಪೆ.
ಕರಿಯ ಮರ ಕಡ್ಪೊಡು ಬಲ್ಲಾಳೆ,
ಬೊಳಿಯ ಸಾರಿದ ಮಣೆ ಕೆತ್ತವೊಡುಂದು ಪನ್ಪೆ.
ಕರಿಯ ಕಧೊಳಿದ ಇರೆಟ್ಟು ಮಣೆ ದೀವೊಡು ಬಲ್ಲಾಲೆ,
ಬೊಳಿಯ ಸಾರಿದ ಮಣೆಟ್ಟು ಬೊಲ್ಲಿ ನೀಡೆ ಸಾರಿ ಪಾಡೊಡು ಪನ್ಪೆನೆ.
ಅತನ ವೊಂಜಿ ಪೊರ್ತುಗೆನ,
ಬೊಳಿಯ ಸಾರಿದ ಮಣೆಟ್ಟು,ಬೊಲ್ಲಿದ ಇಡೆ ಸಾರಿ ಪುಂಡಪ್ಪ ಪತ್ತುದೇ ಬಲ್ಯಾಯೆ.
ಕಾಣಿಕೆ ದೀಲೆ ಬಲ್ಲಾಕ್ಲೆ ಸಾರಿ ಮುಟ್ಟುಲೆಂದು ದಾನೆ ಪಂಡೆ,
ಪುಂಡಪ್ಪ ಕೌಡಿಗೆ ತಟ್ಯೆನ ಬಲ್ಯ್ಯಾಯೆ,
ಸಾರಿ ಪತ್ತುದು ಯೆನಿಪುವೆ ಬಲ್ಯಾಯೆ,
ವೊಲೆ ಪತ್ತುದು ದಾನೆ ವೊದುವೆ.
ಪಾಡಿ ಸಾರಿಡು ಅನಿತು ತೂಪೆ,ಗುಣಿತ್ತು ದಾನೆ ಪನ್ಪೆನ ಬಲ್ಯಾಯ ಮಗೆ.
ವೊಯ..ಬಲ್ಲಾಕ್ಲೆ..ವೊಯ ಬಲ್ಲಾಕ್ಲೆ..
ಉಂದೊಂಜಿ ಈ ನಾಡುದ ಕುಲೆ ಬೂತ ಅತ್ತ್ ಬಲ್ಲಾಕ್ಲೆ,
ಘಟ್ಟದ ಮಿತ್ತುರ್ದು ಬಡಕ ರಾಜ್ಯೊರ್ದು,ತೆಂಕಾಯಿ ರಾಜ್ಯೊಗು,ಗಾಳಿಗೊಂಜಿ ಬಜಕ್ಕಿರೆ,ಬೀರಿಗೊಂಜಿ ಮೆನ್ನುಡು ಪೊಸಬೂತ ದೈವ ಬೈದುಂಡತ್ತೆ ಪನ್ಪೆನ ಬಲ್ಯಾಯ ಮಗೆ.
ಈ ವೊಂಜಿ ದೈವೊನು ತಂತ್ರೊಡು ಲೆಪ್ಪೊಡು ಬಲ್ಲಾಲೆ,ಮಂತ್ರೊಡು ಪತ್ತೊಡು ಬಲ್ಲಾಳೆಂದು ದಾನೆ ಪನ್ಪೆ.
ತಂತ್ರೊಡು ಲೆಪ್ಪುವೆ ಬಲ್ಯಾಯ ಮಗೆ,ಮಂತ್ರೊಡು ಜಪಿಪುನ ವೊಂಜಿ ಪೊರ್ತುಡುಗೆನ ದೈವ ನರಳುನ ಕೇನುಂಡೆ ನಾಲಾರೆ ಗಾವುದೊಗು,ಮುರುಳುನ ಕೇನುಂಡೆ ಮೂಜಾರೆ ಗಾವುದಗು ಕೇನುಂಡು.
ಬಲ್ಯಾಯ ಮಗೆ ಮಂತ್ರ ಜಪಿಪುನ ತೂದು ಪನುವೆನ ದಾನೆ ಅಲ್ಪ ದೈವ.
ವೊಯ ಬಲ್ಯಾಯ..ವೊಯ ಬಲ್ಯಾಯ..
ನಿನ್ನ ಮಂತ್ರ ತಂತ್ರ ಯಾನು ತೂತೆಗೆ,
ನಿನ್ನ ಮಂತ್ರ ತಂತ್ರೊಗು ಬಗ್ಗುನ ದೈವ ಯಾನತ್ತು ಪನ್ಪೆ,
ಯೆನ್ನಂಡ ಬಾಲೊಲಿ ಪನ್ನಗ ಉಲ್ಲೆರು ಘಟ್ಟದ ಮಿತ್ತುಡು,ಗುರುರಾಯೆರು ಗುರ್ತಬನ್ನಾರು ಕಂಚಿಡು ಕನ್ನಡೆ ಕಾಲಪ್ಪ ನಾಯಿಕೆರು ಅಕ್ಲೆನ ಬೆರಿ ಮೂಲ ಪತ್ತುದು ಯಾನಾಂಡ ಪೊವೆಂದು ದಾನೆ ಪನ್ಪೆ.
ಅತನ ವೊಂಜಿ ಪೊರ್ತುಡು ಬೊಮ್ಮನಾಡಿ ಬಲ್ಲಾಕ್ಲು ಘಟ್ಟದ ಮಿತ್ತುಗು
ಘಳಿಗೆ ಸಂಕ್ಯೆಡು ವೊಂಜಿ ವೊಲೆ ಬರೆದೆರೆ,
ವೊಯ ಬಾಲೊಲಿ,ವೊಯ ಬಾಲೊಲಿ ಇರೆನ ಬೂತದ ಬೀರಿಡು ಯೆಂಕ್ಲೆ ರಾಜ್ಯೊಡು ಬಾಲ್ಯಾರ ಬದುಕ್ಯರ ಅವಂದೆ ದಾನೆ ಪೊಂಡು.
ಇರೆನ ಬೂತೊನು ಕೊನೊದು ಇರ್ ಪೊವಾರ,ಇಜಿನಾಂಡ ಚೆಂಬಿನ ಕೊಡಪಾನಡು ಪತ್ತುದು ಯೆಂಕ್ಲೆಗು ಕೊರುವರಂದು ದಾನೆ ಬರೆದು ವೊಲೆಮಾನಿದೊಟ್ಟು ಕಡದೆರು.
ವೊಲೆ ಓದಿ ಬಾಲೊಲಿ ಬೊಮ್ಮನಾಡಿ ಬಲ್ಲಾಳೆ ಬೂಡುಗು ಬರುವೆರೆ.
ಬೂಡು ಬಲ್ಲಾಕ್ಲೆಗು ಸೊಲ್ಮೆನು ದಾನೆ ಸಂದಾಯೆರೆ.
ಯೆನ್ನ ಬೂತರ್ದು ನನ ಇರೆಗು ನಚ್ಚ ಅವಂದು ದಾನೆ ಭಾಷೆ ಪನ್ಪೆರು.
ಯೆನ್ನ ಬೂತ ಪತ್ತೊಡಂಡ ಇಂದ್ರನಿವನಂಧ ಅಡ್ಡ ಪೈಂಗೊಲು,ನೀಟಾ ಓರುಂಭಕೊಲು ಕೊಟ್ಯ ಕಟ್ಟೊಡು ಬಲ್ಲಾಳೆ ಪನ್ಪೆರು,
ಪದಿನಾಜಿ ಬಾಕೀಲು ದೀವೊಡುಂದು ಪನ್ಪೆರು.
ಪದಿನಾಜಿ ಕೊಂಟುದ ಬಾನ ಚಕ್ರಂಪಿ ಬಲಿ ಕಟ್ಟೊಡು.
ಭೂಮಿ ಚಕ್ರಾಂಪಿ ಮಂಡಲ ದಾನೆ ಬರೆಯೊಡು.
ಅತ್ತರಡು ಚಾರ್ವ ಬೈಯಿಪವೊಡು,
ಕೊಪ್ಪರಿಗೆಡು ಕುರ್ದಿ ಕಲಡವೊಡು.
ಕಂದೆಲುಡು ಕಲಿ ದಿಂಜಾವೊಡು.
ಪೂಬಾರೆದ ಪರುಂದು ಅವೊಡು ದಾನೆ.
ಗೆಂದೇ ತಾರೆದ ಬೊಂಡ ಅವೊಡು.
ಎರ್ಮೆದ ಪಾರೊಲು ಅವೊಡು ಬಲ್ಲಾಳೆ
ಬಡಕಾಯಿ ಬಾಕಿಲುಗು ಬೊಲ್ಲೆಸಾಸ್ರ ಪೂಂಜನು ಕಟ್ಟೊಡು.
ಪತ್ತು ಪದಿನಾಜಿ ಬಗೆತ್ತ ಇಂಡಿ ಜೋಡಣೆ ಮನ್ಪೊಡು ದಾನೆ ಪಂಡೆರೆ.
ಏಳ್ ಇರ್ಲು,ಏನ್ಮ ಪಗೆಲು,ನೀರುಡು ಹೋಮ, ಬೊಟ್ಟುಡು ಜಪ ಮನ್ಪೊಡು ದಾನೆ ಪಂಡೆರೆ.
ನೀರುಡು ಹೋಮ ದೀಯರೆ ಬಾಲೊಲಿ,
ಬೊಟ್ಟೊಡು ಜಪನು ದಾನೆ ಕರ್ತೆರು,
ಅಂಗಣಡು ಅಂಜನ ದಾನೆ ದೀದು ದೈವೊನು ಲೆಪ್ಪೆರು.
ಕೊಟ್ಯದ ಉಲಾಯಿ ಕುಲ್ಯೆರು ಬಾಲೊಲಿ,
ಪಿದಾಯ್ ಬತ್ತೆರು ಬಲ್ಲಾಳು.
ಉಲಾಯಿ ಬರೆಯೆರು ಬಾಲೊಲಿ ರೂಪ,ಪಿದಾಯಿಡು ಬರೆಯೆರು ದೈವದ ರೂಪ.
ಅಂಜನ ದೀದು ವೊರುವರೆ ಸಾವಿರತ್ಯೊಂಜಿ ಗಾವುದಡು ದೂರೊಡು ಬಜನಿತು ಲೆತ್ತೆರು ದಾನೆ ದೈವೊನು.
ಲೆಪ್ಪುನಗ ದೈವಾಂಡ ದಾನೆ
ವೊತ್ತೆ ಕೊಲ್ತಿರಿ ಕಂಗುದ ಮಡಲುದ ರೂಪೊಡು ದೈವ ತೋಜುವೆ.
ಇರುವರೆ ಏಳಾರೆ ಗಾವುದೊಡು ಬಜನಿತುದು ಲೆಪ್ಪುನಗ ಪಂಜಿದ ವೊರುವಾದು ತೋಜುವೆನ.
ಮುತ್ತಾರೆ ಒಂಜಾರೆ ಗಾವುದೊಡು ಬಜನಿತು ಜಪಿತ್ತೆರು ಬಾಲೊಲಿ ಪಜ್ಜಿಮರಿ ಸಗಿನದು ದೈವ ತೋಜುವೆನ.
ಬಾಲೊಲಿ ಬಜನೆಗು,ಮಂತ್ರ ತಂತ್ರೊಗು ಆನೆ ಬಾಕಿಲುಡು ಬತ್ತು ಉಂತ್ಯೆನ ದೈವ.
ಬಾಲೊಲಿನು ತೂಯೆನ ದೈವ ಪಂಜಿದ ಉರುಲಿ ಮಂತುದು ಯೆನನ್ ಅಯಿಟ್ಟು ಮಂತ್ರಿತ್ತುದು ಪಾಡೊಡು ಪನ್ಪೆನ.
ಅತನ ವೊಂಜಿ ಪೊರ್ತುಡು ವೊಪ್ಪ ಸರಿ ಬಾಲೊಲಿ ಮಂತೆರು.
ದೈವೊನು ಪತ್ಯೆರು ಬಾಲೊಲಿ,
ಪಂಜಿದ ಉರ್ಲಿಡು ಪಾಡುವೆರೆ.ಅತನ ವೊಂಜಿ ಪೊರ್ತುಡು ದೈವಂಡ ಕೇನುವೆ.
ಇನಿ ಬೊಲ್ಯಾಲ ಗುಂಡಿಡು ತಾರ್ತುನ ಯಾನ್ ನನ ಯೆನಿಗು ನೆಗೆತುದು ಬರೊಡು,ಯೆಂಕಿತ್ತಿನ ಶಾಪ ಕೊರ್ಲೆಂದು ಬಾಲೊಲಿಡ ಕೆಂಡೆನ.
ಯೆರಿ ದೈವ ಇನಿ ತಾರ್ತಿನ ದೈವ ಕಜಂಗೆ ನಟ್ಟಿಲ್ಲಾ ಬರ್ಕೆಡು ಒಂಜಿ ಅಪ್ಪೆ ಬಂಜಿದ ಇರ್ವೆರು ಬಾಲೆಲು ಇರ್ವೆರು ಕೋಟ್ಯಾನ್ನ ಕುಪ್ಪೆರ್ಲು ಬಾರುವೆರು.
ವೃತ್ತಿ ಧರ್ಮ ಬೆನ್ಪೆರು,ಈಂದ್ ಇಸೆಲುದ ಮೂರ್ತೆ ಮನ್ಪೆರು.ಅವ್ವೊನ ವೊಂಜಿ ಕಾಲೊಡು ಕೊಂಬು ಜಾರು ಕಂಬುಲು ಬೂರು.ಕಲಿತ್ತ ನೂರೆಕ್ಕು ಸಾರ ಪಡವುದ ಮೀನಾದು ಬಲ.
ಕಂಚಿನ ಕೈಗಿಲೆ,ಬೊಲ್ಲಿನ ಬಾಯಿಮುಲು,ಚೆಂಬಿನ ಅಲಕೈ ಪತ್ತುದು ಆನೆಗು ಅಜಕೈ ಕುದುರೆಗು ಬಲವಾಯಿ ದೈವೊನು ವಜ್ರದುಂಬಿದ ವೊರುಕ್ಕು ಕೊನತ್ತುದು ಬೊಲ್ಲೆ ಗುಂಡಿಡು ತಾರ್ತೆರು.
ದೈವಾಂಡ ದಾನೆ ಮೀನುದ ವೊರುಟ್ಟು ಮೇಲು ಕಾಲೊಗು ಕುಪ್ಪೆರ್ಲೆ ಧರ್ಮೊಗು ಕಾತೆಯೆ.
(ಅಧ್ಯಾಯ ಮುಕ್ತಾಯ)
ಮುಲ್ಪರ್ದು ಬೊಕ್ಕ ದೈವ ಕುಪ್ಪೆರ್ಲೆ ಕಾಲೊಗು ದೈವ ಮೀನುದ ವೊರುವಾದು ಬೊಲ್ಯಾಯ ಗುಂಡಿಡು ಕಾತೆ.ಅಯಿರ್ದ್ ಬೊಕ್ಕ ಕುಪ್ಪೆರ್ಲೆನ ಕಥೆ ಬರ್ಪುಂಡು.ಮೂಡಾಯಿ ಬಡಕಾಯಿಡು ಕುಪ್ಪೆರ್ಲೆನ ಪುದರುಡು ವ್ಯತ್ಯಾಸ ಬರ್ಪುಂಡು.ಬಡಕಾಯಿಡು ಜಾನುಕುಪ್ಪೆ,ಜಯಕರ ಕುಪ್ಪೆ,ಮಂಜು ಕುಪ್ಪೆ,ಅಂಕರಕುಪ್ಪೆ ಪನ್ಪಿ ಪುದರ್ ಬರ್ಪುಂಡು,ಆಂಡ ತೆಂಕಾಯಿಡ್ ಕೆಲವೊಂಜಿ ಪುದರ್ ವ್ಯತ್ಯಾಸ ಉಂಡು.ಅಂಚನೆ ಅಕ್ಲ್ ಬಾರಿನ ಬರ್ಕೆ ಬಡಕಾಯಿಡು ಬೀರೊಟ್ಟಿ ಬರ್ಕೆ,ಪಕ್ಯೊಟ್ಟು ಬರ್ಕೆ ಪಂದು ಲೆಪ್ಪುವೆರು,ತೆಂಕಾಯಿಡ್ ಮಾಪಳ ಬರ್ಕೆ ಮಡೆಂಜಲಾ ಬರ್ಕೆ ಪನ್ಪೆರ್.ತೆಂಕಾಯಿ ಬೊಕ್ಕ ಬಡಕಾಯಿದ ಕುಪ್ಪೆರ್ಲೆನ ಕಥೆಕ್ಕುಲಾ ವೊಂತೊಂತೆ ವ್ಯತ್ಯಾಸ ಉಂಡು.ತೆಂಕಾಯಿಡ್ ಕುಪ್ಪೆರ್ಲು ಕಡ್ತು ಕನ್ನಡೆರೆಡ ದಂಡ್ ಸಾದುನ ಕಥೆ ಇಜ್ಜಿ,ಬೊಮ್ಮಣ್ಣ ಬಲ್ಲಾಳೆ ಅಪ್ತೆರ್,ಒಕ್ಕೆಲುದಕ್ಲ್ ಪನ್ಪೆರ್.ಬಡಕಾಯಿಡ್ ಬೈರಸೂಡೆರೆ ದಳವಾಯಿ ಅದಿತ್ತುದು,ದಂಡ್ ಜೈತ್ ಕೊರ್ಯೆರ್,ಅಂಚಾದ್ ಕಾರ್ಲದ ಬಾಕ್ಯರ್ ಮುಟ್ಟ ಅಕ್ಲೆಗ್ ಉತ್ತರುಂಬಲಿ ಕೊರ್ಯೆರ್ ಪನ್ಪೆರ್.
ಮೂಲು ಬೊಕ್ಕೊಂಜಿ ವಿಚಾರ ಪಂಡ ಕಾರ್ಲ ಬೈರಸೂಡೆರು ಬೊಕ್ಕ ಬೈಲಬೂಡು ಬೊಮ್ಮಣ್ಣ ಬಲ್ಲಾಕ್ಲು ವೊರಿಯೆನ? ಅತ್ತ್ ಬೇತೆ ಬೇತೆನ ಪನ್ಪಿನ ಪ್ರಶ್ನೆಗ್ ಉತ್ತರ ತಿಕಿಜಿಂಡಲಾ,ಬೈಲಡ್ಕ ಬೂಡು ಅರರಿ ಬುರ್ದು ಇತ್ತೆಲಾ ಉಂಡು. ಇಂಚ ಕೆಲವೊಂಜಿ ಜಿಜ್ಞಾಸೆ ಇತ್ತುಂಡಲಾ ದುಂಬುದ ಕಥೆಕ್ಕು ಪೊಯಿ.
(ಅಧ್ಯಾಯ ೪ .ಬಡಕರಾಜ್ಯ ದೈವ ಪಂಜುರ್ಲಿ)
ಮೇಲು ಸೀಮೆಡು ಬಾರ್ಯೆರು ಕರ್ತು ಕನ್ನಡೆರು.ಕೀಳು ಸೀಮೆಡು ಬಾರ್ಯೆರು ಕಾರ್ಲದ ಬೈರಸೂಡೆರು.
ಪಣವು,ತೆರಿಗೆ,ಕುತ್ತಿಎಣ್ಣೆ ಕೊರಿಯರವಂದೇ
ಕೀಳು ಸೀಮೆದ ಕರ್ತು ಕೆಟ್ಟುನ ಒಂಜಿ ಕಾಲೊಡುದೆ,
ಮೇಲು ಸೀಮೆಡು ಬಾರಿನ ಕನ್ನಡರಸು ಬದುಕು ಬಂಗಾರು ಪದ್ದಾಯಿಡು ಮೇಲು ಪೊಪೆರೆ.
ಬಾರಿಯರ ಬದುಕ್ಯರ ಕಷ್ಟ ಕಾಲ ಪನ್ಪೆರೆ ಬೈರಸೂಡೆರು.
ವೊರಿಯಲೆಕ್ಕ ಯೆಂಕ್ಲಾ ಅವೊಡು ಪಂಡುದು ತೀರ್ಮಾಣ ದೆತೊನುವೆರೆ.
ವೊಕ್ಕೆಲು ಸಕ್ಕೆಲು ಕೂಡಾಯೆರ್ ಬಲ್ಲಾಕ್ಲು,
ಕಣ್ಣುಡು ನೆತ್ತೆರ್ ದಾಂತಿ ಕಾರ್ಯ ಕರ್ಪಯೆರು.
ಕತ್ತೆನು ಕಟ್ಟಬೆರು ಬಲ್ಲಾಕ್ಲು,ಪಾದೆನು ದಪ್ಪವೆರು.
ಕವಡಿಗೆ ಬಿದೆ ಬಿತ್ತವೆರು ಬಲ್ಲಾಕ್ಲು ಮುತ್ತು ರತ್ನ ಬೇಗಡೆ ಬುಳೆಪವೆರೆ.
ಅನ್ ಪತ್ತದೆರು,ಕಣ್ಣುನು ಗುದ್ದೊಲಿಡು ತೊಡದೆರು.
ಮೂಂಕುಗು ಸುಣ್ಣನೀರು ಬುಡ್ಪದೆರೆ.
ಉಗುರುಗು ನರೆಸ ಬೊಟ್ಟದೆರು.
ಪೊಣ್ಣ ಕಟ್ಟದ,ಮೀರೆನು ದಾನೆ ಇಕ್ಕುಲಿಡು ಕೊಯಿಪದೆರೆ.
ಬರನ ಭಂಗ ಬರ್ಪವೆರು ಬಲ್ಲಾಕ್ಲು,ಕೊರನ್ನ ಶಿಕ್ಷೆ ಕೊರ್ಪವೆರೆ.ಬೆನ್ನಿ ಸಾಗೊಲಿ ಮನ್ಪವೆರು.
ಇಂಚಿತ್ತಿ ಬಲ್ಲಾಳೆನಲ್ಲು ಬಾರುದು ದಾನೆ ಪಲ,ಬದುಕುದು ದಾನೆ ಪಲ ಪನ್ಪೆರೆ ಒಕ್ಕೆಲೆರು.
ಮಿತ್ತುಡುಲ್ಲೆರು ಕಡ್ತಿ ಕನ್ನಡೆರು,ದೂರು ದುರ್ಜನ ಅರೆಗ್ ಕೊನವೊಡು ಪನ್ಪೆರ್.
ನಟ್ಟನಡೀರ ಜಾಮಂಧ ಪೊರ್ತುಡು ಕಾಂಟ್ಯಡು ಕಟ್ಯೆರು ಕರಕೈಲು,ಕುಂಟುಡು ಕಟ್ಯೆರು ನಿಚ್ಚ ತುತೈತ,ತರೆಟ್ಟ್ ತುಂಬ್ಯೆರು ಮೇಲು ಸೀಮೆ ಘಟ್ಟ ಬರ್ತುದು ಪೋಯೆರು.
ಕನ್ನಡ ಅರಸೆರೆಗ್ ಸೋಲುದ ಸೊಲ್ಮೆ ಮಂತೆರು.
ತುಳುವ ಸೀಮೆರ್ದ್ ಘಟ್ಟ ದಾನೆ ಬತ್ತರುಂದು ಕಡ್ತಿ ಕನ್ನಡ ಅರಸೆರ್ ಕೆನ್ನಾಗ,
ಕಾರ್ಲ ಬೈರಸೂಡೆರ್ ಮಂತಿನ ಕಾರ್ಯದ
ದೂರು ದುರ್ಜನ ಪಂಡೆರು.ಚಾಡಿ ತರ್ಲೆ,ತಂಕ್ ಅಯಿನ ಕಷ್ಟ ಕೊಟಲೆ ಪಂಡೆರು.
ಅತನ ವೊಂಜಿ ಪೊರ್ತುಡು ಕನ್ನಡ ಅರಸು ಪನ್ಪೆರು.
ಯೆಂಕ್ಲೆ ಹಿರಿಯ ಪೆರಿಯಕ್ಲೆ ಕಾಲೊರ್ದುದಿಂಚಿದ ಬಾಕಿ ಅತಿನ ಸರ್ಕಾರಿ ತೆರಿಗೆ,ಗೇಣಿ ಪನವು,ಕುತ್ತಿದೆಣ್ಣೆ ಕೀಳ್ ಸೀಮೆರ್ದ್ ನನಲಾ ಬತ್ತಿಜಿ,ಯಾನಾದುಲಾ ಕೇಂದಿಜೆ ಪನ್ಪೆರು.
ವೊಕ್ಕೆಲು ಸಕ್ಕೆಲುಗು ಅಯಿ ದುರ್ಜನಗು ಉಗ್ರ ಅಯೆರ್.
ಘಳಿಗೆ ಸಂಕ್ಯೆಡು ವೊಲೆ ಬರೆಪದೆರ್,
ವೊಲೆಮನಿ ರಬ್ಬನನು ಬೂಡುಗು ಲೈದೆರು.ವೊಲೆ ಪತ್ತೊಂದು ಘಟ್ಟ ಜತ್ತುದು ಕಾರ್ಲ ಬೂಡುಗು ಯೆತ್ತವೊಡು ಪನ್ಪೆರು.
ಅತನ ವೊಂಜಿ ಪೊರ್ತುಡು ವೊ.. ಕರ್ತುಲೆ ಕಷ್ಟಕಾಲ,ಘಟ್ಟ ಜಪ್ಪೊಡು,ಮಲೆಕಾಡು ಕಡಪೊಡು,ಕಾಡ ಮುರ್ಗೊಲೆ ಭಯ ಉಂಡು ಕರ್ತುಲೆ,ವೊವ್ವ್ ಕಾರ್ಯಂಡ ಪನ್ಲೆ ಕರ್ತುಲೆ,ಈ ಕಾರ್ಯವೊಂಜಿ ತೀರಂದು ಕರ್ತುಲೆಂದು ಲಬ್ಬನೆ ಪನ್ನಾಗ,
ಸೇಜ ಕೆನ್ಯಾರ ಪಿನುವನ ಲಬ್ಬಣ,ಚಾಕ್ರಿ ಮನ್ಪರ ಪಿನಾಯನ ಲಬ್ಬಣಂದು ಪನ್ಪೆರು.
ವೊರೆ ಕೊರೆ ಪಂಡೆರು,ಮರ್ಲು ಮಗ್ಗಿನ ಮಂತೆರು,ಸೇಜ ಪನವುದ ಆಸೆ ಪುಟ್ಟಾವೆರು.
ಶಕ್ತಿ ಯುಕ್ತಿ ತೋಜಾಯೆರು ಕರ್ತುಲು,ಸೆರಂಗುಡು ಪಡಿಯರಿ,ಮುನ್ನಿಡು ವೊಲೆ ಕಟ್ಟುದು ಮರ್ಲು ಮಗ್ಗಿನ ಮಂತುದು ದಾನೆ ಕೀಳುಸೀಮೆಗು ಕಡದೆರು.
ಅಸರ್ ಬೆಸರುಡು ಮನವೊಪ್ಪಂದಿ ಕಾರ್ಯಡ್ ಘಟ್ಟ ಜಪ್ಪುವೆನೆ ದಾನೆ ಲಬ್ಬಣೆ.
ವೊಲೆ ಲಬ್ಬನೆ ವೊಲೆ ದಾನೆ ಪತ್ತೊಂದು ಘಟ್ಟ ಜತ್ತೆ,ಮಲೆ ಕಾಡು ಜತ್ತು ಬತ್ತೆ,ಸುದೆ ಕರಿಯ ಕಡತು ಬತ್ತೆ,ಕಂಡ ಪದವು ಕಡತುದು ದಾನೆ ಕಾರ್ಲದ ಬೂಡುಗು ಬನ್ನಗ,ದೂರೊಡು ತೂಯೆರು ಕಾರ್ಲದ ಅರಸು,
ಕಾರ್ಲದ ಬೂಡುಗು ಮೂಡಾಯಿದ ಭಾಕಿಲುಡು ಪೊಗ್ಗುವೆ ಲಬ್ಬನೆ,
ಮೂಡಾಯಿ ಬಾಕಿಲುಡು ಪೊಗ್ಗುನಗ ಪಡ್ಡಾಯಿ ಬಾಕಿಲುಗು ಪಿಜಿರುದು ಕುಲ್ಯೆರು ಬಲ್ಲಾಕ್ಲು,
ಪಡ್ಡಾಯಿದ ಬಾಕಿಲುಡು ಪೊಗ್ಯೆನೆ ಲಬ್ಬನೆ,ಮೂಡಾಯಿದ ಬಾಕಿಲುಗು ಪಿಜಿರುದು ಕುಲ್ಯೆರು ಕರ್ತುಲು.
ವೊ ಕರ್ತುಲೆ ಯೆನಡ ಪಗೆದೂಷನೆ ಇರೆನ ಸರಿಯತ್ತ್ ಪಂಡೆನೆ ವೊಲೆಮಾನಿ ಲಬ್ಬನೆ,
ಯೆನ್ನ ಅರಸುಲು ಕಡ್ತಿ ಕನ್ನಡೆರು ಕಡದೆರು ಘಟ್ಟದ ಮಿತ್ತುರ್ದು ಇರೆಗೊಂಜಿ ವೊಲೆ,
ನೆಕ್ಕೊಂಜಿ ಉತ್ತರ ಕೊರ್ದು ಯೆನನ್ ಯೆನ್ನ ರಾಜ್ಯೊಗು ಕಡಪಲೆಂದು ಲಬ್ಬನೆ ಬಿನ್ನಯ ಪನ್ನಗ,
ವೊಲೆ ವೊದ್ಯೆರು,ಏಳ್ ಲೋಕದ ಉಗ್ರ ತೋಜಾಯೆರು ಕಾರ್ಲದ ಕರ್ತುಲು.
ಲಬ್ಬಣಗು ಕೊರಂದಿ ಕಷ್ಟ ಕೊರ್ಯೆರು,ಬರಂದಿ ಭಂಗ ಬರ್ಪಯೆರು.
ಯೆನ್ನ ಹಿರಿಯಾಕ್ಲೆ ಕಾಲೊರ್ದಿಂಚಿ ವೊರಿದು ಬತ್ತಿನ ಗೇಣಿ ಪನವು ಈ ರೀತಿ ಕೊರ್ಪವೆ ಪಂಡುದು ನೋತುದು ಪಿರ ಕಡಪಯೆರು.
ಪೆಟ್ಟು ತಿಂದುದು ಬತ್ತಿ ಲಬ್ಬಣೆ,ಕಡ್ತಿ ಕನ್ನಡ ಅರಸುಲೆಡ ವಿಚಾರ ಪಂಡೆ,ಕೊರಿ ಕಷ್ಟನು ಅಕಿಲಾಸ ಬುಡುದು ಪಂಡೆನೆ.
ಅತನ ವೊಂಜಿ ಪೊರ್ತುಡು,
ಕಾರ್ಲದ ಬಲ್ಲಾಳನ ಪೆಟ್ಟ್ ನಿಕ್ಕಾಂಡ ಲಬ್ಬಣ,ಬೇನೆ ಯೆಂಕಾಂಡು,ನೆಕ್ಕ್ ಪರಿಹಾರ ಯಾನ್ ನಾಡುವೆ ಪನ್ಪೆರು.
ಇಂಚಿತ್ತಿ ಕಾರ್ಲ ಬೈರಸೂಡನು ತೂವೊಡು ಪನ್ಪೆರು,ದಂಡು ಕಟ್ಯೆರು ದಳವಾಯಿ ಉಂತಾಯೆರು,ಕೀಳು ಸೀಮೆಗು ದಂಡು ಕೊನಪೆರೆ ಕನ್ನಡ ಅರಸುಲು.
ಕಡ್ತಿ ಕನ್ನಡ ಅರಸುಲೆ ದಂಡ್ ದಾನೆ ಬೇಡವಗುಡ್ಡೆಡು ತೋಜುಂಡು.
ವೊಲೆಮಾನಿ ದಾನೆ ಪಗೆಮಾನಿ ದಂಡುದ ಇಚಾರ ಬೊಮ್ಮಣ್ಣ ಬಲ್ಲಾಕ್ಲೆಡ ಪಂಡೆನೆ.
ಕಡ್ತಿ ಕನ್ನಡೆರೆ ದಂಡುದ ಸುದ್ದಿಮದಿಮ ಕೆಂಡೆರ್ ದಾನೆ ಬಲ್ಲಾಳ್.
ಅಂಕ ಕಾದ್ಯರ ಬೈಲಬೂಡುದ ದಂಡುದ ಬಂಟೆರು ಬಲ್ಲಾಕ್ಲೆ ಚಾವಡಿಡ್ ಕೂಡೊಡು ಪನ್ಪೆರ್.
ತನ್ನ ವೊಪ್ಪತಪ್ಪದ ಪಾಸಡಿ ಬಲ್ಲಾಳೆರೆಗು ವೊಲೆ ಬರೆದು ವೊಲೆಮಾನಿನು ಊರುರುಗು ಕಡಪಯೆರ್.
ಕಡಪಯಿ ವೊಲೆಗು ವೊಂಕೊಂದು ಮೂಲ್ಕಿ ಸೀಮೆದ ಸಾಮಂತೆರು,ಪಡ್ಡೆದ್ರದ ಅಳ್ವೆರು, ಕಾಪು ಬೂಡುದ ಮರ್ದಡೆ,ಚಿಟ್ಪಾಡಿ ಬೂಡುದ ಬಲ್ಲಾಳ್, ಅಂಜಾರು ಬೂಡುದ ಕುರ್ಲ ಪೆರ್ಗಡೆ,ಕಟಪಾಡಿದ ಅರಸುಲು,ಪಡ್ಡಾಮೆದ ಹೆಗ್ಗಡೆನ ದಂಡು, ಗರಡಿ,ಗೊಂದೆದ ಜಗಜಟ್ಟಿ ಮಲ್ಲನಕ್ಲೆನು ಕೂಡವೊಂದು ಕಾರ್ಲದ ಅರಮನೆಕ್ಕ್ ಬತ್ತೆರು.
ಬೈಲಸೂಡದ ರಾಜ ಚಾವಡಿಡು ಬೈಲಸೂಡ ಬೊಮ್ಮಣ್ಣ ಬಲ್ಲಾಕ್ಲು ಕುಲ್ಲುದು ತೂನಗ, ಅಂಕದ ಸುಡಲದ ಕಂಡೊಡು ಪಗೆಮಾನಿಡ ಅಂಕ ಕಾದ್ಯರ ನಮ್ಮ ಮಂದೆರ್ದು ಯೆರ್ ಬತ್ತುದೆರ್,ಯೆರ್ ಬತ್ತಿಜೆರ್ ಪಂಡುದು ಶೋಧನೆ ಮಲ್ತೆರು.ಅದಾಗ ಬೈಲಸೂಡ ಬೊಮ್ಮಣ್ಣ ಬಲ್ಲಾಕ್ಲೆ ಒಕ್ಕೆಲುದ ಮಪಳಬರ್ಕೆ,ಮಡೆಂಜಲಾ ಬರ್ಕೆದ ಕುಪ್ಪೆ ಕೋಟಿ ಕುಜಂಬ ಬೈದ್ಯ ಬಾಲೆಲು ಬತ್ತಿಜೆರು ಪನ್ಪೆರು. ಗಳಿಗೆ ಸಂಕೆಡ್ ಅಕ್ಲೆಗೊಂಜಿ ವೊಲೆಮಾನಿ ಕಡದೆರು.
ವೊಲೆಗ್ ವೊಕೊಂದು ಕೋಟಿ ಕುಪ್ಪೆರ್,ನಟ್ಟಿರುಲುಡು ಜೆಪ್ಪಂದೆ ಕೋಟಿ ಬೈದೆರ್,ಅಟ್ಟೊಗು ಲೆಂಚಿ ದೀಯೆರ್, ಒಂಜಿ ಚೆಪ್ಪುಳ್ಳ ತಾರಯಿ ದೆತ್ತುದು, ಚೆಪ್ಪು ದೆತ್ತೆರ್,ಸೊಕು ಪೆರೆಸ್ಯೆರ್ "ಬಲ್ಲಾಕ್ಲೆ ಗದ್ದುಗೆಗ್ ಕಾಣಿಕೆ" ದೀಯರಗುಂದು ತನ್ನ ಒಂಜಿ ಕುಂಟುಡು ಕಟ್ಯೆರ್.ತನ್ನ ಹಿರಿಯಾಕ್ಲೆ ಯಮಗತ್ತಿ ಸುರಿಯೊನು ವೊಚ್ಚಿಗು ಬೊಲ್ಲುಕಲ್ಲ ಪೊಡಿ ಪಾಡುದು ಅಡಿಯರ ಮೇಲಾರ ಮಸೆಕ್ಯೆರ್. ಸೊಂಟದ ಉದೆಕ್ಕ್ ಕೊತೆರ್‌.ಚಾವಡಿದ ದೈವೊಲೆಗ್ ನೀಟಾಪ್ಪ ಅಡ್ಡಬೂರ್ಯೆರ್.ಧರ್ಮ ಗೆಂದದ್ ಕೊರ್ಲೆ ಸತ್ಯೊಲೇ ಪಂಡುದು ನಟ್ಟೊನ್ಯೆರ್.ಹಿರಿಯಾಕ್ಲೆ ಕಾರ್ ಪತ್ಯೆರ್.ಸಾಧಿದ ಶಗಿನ ತೂಯೆರ್.
ಬೈಲಬೂಡ ಬೊಮ್ಮಣ್ಣ ಬಲ್ಲಾಕ್ಲೆ ಬೂಡುಚಾವಡಿಗ್ ಬರುವೆರು.
ಬೈಲಬೂಡ ಬಲ್ಲಾಕ್ಲೆಗು ಸೋಲುದ ಸೊಲ್ಮೆ ಸಂದಾಯಿತ ಮಲ್ತೆರ್.
ಕುಂಟುಡು ಕಟ್ಟುದಿ ತಾರಯಿನ್ ಬಲ್ಲಾಕ್ಲೆ ಗದ್ದುಗೆದ ಮಣೆಟ್ಟು ದೀಯೆರು.
"ಬಲ್ಲಾಕ್ಲೆ ಇರೆನ ರಾಜ ವೊಲಾಗದ ದುಂಬು, ಇತ್ ಜನ ಮಾರ್ಯದೆಡು ಉಂತುದೆರು,ಅಂಡ ಯೆನನ್ ಲೆತ್ತುದು ಬರಿಯರ ಪಂಡಿನ ಕಜ್ಜಕಾರ್ಯ ದಾದಂದು" ಕೆಂಡೆರು.
ಅತನ ಪೊರ್ತುಗು
"ಕುಪ್ಪೆ ಕೋಟಿ ಬೈದ್ಯ ಅನಾದಿ ಕಾಲೊರ್ದಿಂಚಿ ಈ ಕಾರ್ಲದ ನಾಡುಡ್ ಯೆಂಕ್ಲೆನ ರಾಜ್ಯೊಗು ವೊಕ್ಕೆಲು ಅದಿತ್ತುನಕ್ಲ್,ವೊಪ್ಪತಪ್ಪ ಆದಿತ್ತುನ ನಿಕ್ಲೆನ ಹಿರಿಯಾಕ್ಲು, ಇನಿ ನಮ್ಮ ರಾಜ್ಯೊಗು ಗಂಡಾಂತರ ಬೈದುಂಡು,ಅಯಿನ್ ಪರಿಹಾರ ಮಲ್ತು ಕೊರೊಡು.
ನಿನ್ನ ಹಿರಿಯಾಕ್ಲ್ ಬೊಕ್ಕ ಈ ನಂಬೊಂದು ಬತ್ತಿನ ದೈವೊಲೆ ಸತ್ಯೊಡು ಈ ರಾಜ್ಯೊನು ರಕ್ಷಣೆ ಮಲ್ತು ಕೊರೊಡುಂದು" ಪಂಡೆರ್.
ಆತಾನ ಪೊರ್ತುಗು ಅ ಕೂಟಡು ಬಲ್ಲಾಕ್ಲು ಪಂಡಿನ ಕಜ್ಜೊನು ಕೋಟಿ ಬೈದೆರು ತರೆಟ್ಟ್ ದೀವೊಂದು ವಯಿಸೊನ್ಯೆರು.ಅಂಕೊಗು ಬೊಡಪಿನ ಸರ್ವ ತಯಾರಿ ಮಲ್ತೊನ್ಯೆರು.
ಅಪಗ ಬಲ್ಲಾಕ್ಲು ಪನ್ಪೆರ್,ವೊಂಜ ಯೆನ್ ಬೆಂದುನ, ಯೆಂಕ್ ಬಗೆಯಂದಿ ಪದ್ದಾಯಿ ಬಂಗಾರ್ ಉರಿಯಯಗ್ ದಕ್ಯರ ಬಲ್ಲಿ ಪನ್ಪೆರ್.ಚೆಂಬುಟ್ಟಿಕಾರನ್ ಚಾವಡಿಗು ಲೆಪ್ಟಾದೆರ್,ಪದಿನಾಜಿ ಕೈತ್ತ ಕೊಪ್ಪರಿಗೆ ಮನ್ಪಾದೆರು.ಕೆದು ತೋಡಿ ಮಾನ್ಯೆರೆ ಲೆಪದೆರ್ ಬಲ್ಲಾಳ್ ಏಳ್ ಗಂಗೆ,ನಾಲು ಸಮುದ್ರಗ್ ಸರಿಯಾಯಿ ರಾಮಸಮುದ್ರ ಕೆದು ಕಾರ್ಲದ ಮೂಡಾಯಿಡು ತೊಡಾಯೆರ್.
ಬಂಗಾರ್ ಪದ್ದಾಯಿ,ವಜ್ರ, ವೈಡೂರ್ಯ,ಪನಾವು ಚುಂಗುಡಿನು ಕೊಪ್ಪರಿಗೆ ದಿಂಜಾದೆರು.ರಾಮಸಮುದ್ರದ ನಡುನೀರುಡು ಅಡಿಯಾರ ದಾನೆ ತಾರಯೆರು.
ಕುಪ್ಪೆ ಕೋಟಿ ಬೈದೆರೆನ ದಂಡುಗು ದಳವಾಯಿ ಉಂತ್ಯೆರು. ಅನೆ,ಕುದುರೆದ ದಂಡು ಕೊಳಲಾದ ಬಾಕ್ಯರುಗು ಬತ್ತುಂಡು.ಸಾದಿ ಮದ್ಯೊಡು ಆನೆಕೆರೆ ಕಟ್ಟದಲ್ಪ ಬೊಮ್ಮಣ್ಣ ಬಲ್ಲಾಕ್ಲು ಉಂತ್ಯೆರು.ವೊರ ಬೈಲಬೂಡುದ ತನ್ನ ರಾಜಮಾಡನು ತಿರ್ಗುದು ತೂದು ಅಕಿಲಾಸ ಬುಡ್ಯೆರು.
ಮನಸ್ಸುಡೆ ಬೇಜಾರು ಯೆನ್ಯೆರು.ಯೆಂಕ್ಲೆನ ಪೂರ್ವ ಹಿರಿಯಾಕ್ಲು ಬಾರುದು, ಬದುಕುನ ರಾಜಮಾಡನು ಬುಡುದು ಬರ್ಪಿಲೆಕ್ಕ ಅಂಡತ್ತ ಪಂಡುದು ಕಣ್ಣುಡು ಕಣದುಖ ಬುಡಿಯೆರು.
ಅತನ ಪೋರ್ತುಗು ಕೋಟಿ ಬೈದೆರು "ಅರಸುಲೆ ದಾಯೆ ಬೇನೆ, ಬೇಸರ್ ದೆಪ್ಪುವರು,ಯಾನ್ ನಂಬಿನ ಧರ್ಮ ದೈವೊಲೆ ಸತ್ಯೊಡು,ಕಾರ್ಲದ ಪಗೆಮಾನಿಲೆರ್ದು,ಇರೆಗು ಜಯ ಕೊನತುದು ಕೊರ್ಪವೆ ಪಂಡುದು ತನ್ನ ಕೊಂಬ ಮೀಸೆಗು ಕೈ ಪಾಡುದು ಹೀಸುದು,ಬಲ್ಲಾಳೆರೆಗು ಧೈರ್ಯೊದ ಭಾಷೆ ಕೊರಿಯೆರು.
ದಂಡು ಸಾಗುದು ಕಾಂಜರಂಗಡಿ,ಕಜಮಾರ ಗುತ್ತು, ಬಾರೀಕೆನು ದಾಂಟುದು ಬೊಮ್ಮನಂಗಡಿಡು ಉಂತ್ಯೆರು.ಎದುರು ಬೇಡವ ಗುಡ್ಡೆಡು ಕಡ್ತಿ ಕನ್ನಡ ಅರಸುಲೆ ದಂಡು ಉಂತುದುಂಡು.
ದಂಡು ಎದುರು ಎದುರು ಅದು ಅಂಕ ಶುರು ಅಂಡು,ರಣ ಕಾಳಗಡು ರಡ್ಡು ದಂಡುದಕ್ಲುಲಾ ಭಾರಿ ಬೀರ ಬಿರ್ಸದಿಗೆಡು ಯುದ್ದ ಮಲ್ಪುನಗ,ಯೆರೆಗ್ ಸೋಲು ಯೆರೆಗ್ ಗೆಲ್ಕಯಿ ಪಂಡುದು ನಿರ್ಣಯ ಮಲ್ಪರ ಅಯಿಜಿ.
ಅತನ ಪೊರ್ತುಗು ಕುಪ್ಪೆ ಕೋಟಿ ಬೈದೆರೆಗು ತನ್ನ ಅರಸುಲೆಗು ಕೊರ್ನ ವಾಕ್ಸನನು ನೆಂಪು ಮಲ್ತೊನ್ಯೆರು.
ತಾನು ನಂಬಿನ ದೈವೊಲೆನು ಮನಸ್ಸರೆ ವೊರನೆ ನೆನೆತೊಂದು ಸುರಿಯ ಪತ್ತುದು ಅಂಕೊಗು ಜತ್ತೆರು,ಸುರಿಯ ಪೊಯಿನಲ್ಲು ಪಗೆಮಾನಿ ದಂಡುದ ರುಂಡ ರಟ್ಟುಂಡು,ಸತ್ಯದ ಸುರಿಯದ ಶಕ್ತಿಡು ಪಗೆಮಾನಿಲೆ ಬಲ ಕಮ್ಮಿಯಾದ್ ಬೈಲಬೂಡ ಬೊಮ್ಮಣ್ಣ ಬಲ್ಲಾಕ್ಲೆಗು ಜಯ ಯೆರಗುದು ಬತ್ತುಂಡು.
ಕೋಟಿ ಬೈದ್ಯೆ ಅಪಗೊಂಜಿ ಪಾತೆರ ಪಂಡೆರು. ಅರಸುಲೆ ಇನಿಕ್ಕ್ ಕಡ್ತಿಕನ್ನಡ ಅರಸುಲೆನ ಋಣ ಸಂದಾಯ ಅಂಡು,ನನ ಪೊಡಿಗೆ ಬೊರ್ಚಿ ಪಂಡುದು ಅಭಯ ಕೊರಿಯೆರುಗೆ. ಅರಸುಲೆಗ್ ಬಾರಿ ಸಂತೋಷ ಅಂಡುಗೆ.
ಕುಪ್ಪೆ ಕೋಟಿ ಬೈದ್ಯೆರೆಗ್ ಸಮ್ನನ,ಬಲ್ಮನ ಮಂತೆರುಗೆ, ಇನಿರ್ದ್ ಬೊಕ್ಕ ನಿಕ್ಲು ಬೊಮ್ಮಣ್ಣ ಬಲ್ಲಾಳನ ಒಕ್ಕೆಲ್ ಅತ್ತು,ನಿಕ್ಲೆಗ್ ದೋಲು ತಂಬಡ ಸ್ವರ ಕೆಂಡಿನತ್,ಶಂಖ ಕೊಂಬುದ ನಾದ ಬತ್ತಿನಾತ್ ಜಾಗು ಉತ್ತರುಂಬಲಿ ಕೊರ್ಪೆ ಪಂಡೆರು.ಬೈಲಬೂಡುದ ಬಾಕ್ಯರ್ ಮುಟ್ಟ ಉತ್ತರುಂಬಲಿ ಕೋಟಿ ಕುಪ್ಪೆರೆಗು ಒದಗುದು ಬತ್ತುಂಡು.
( ಮುಕ್ತಾಯ,ಮೂಲು ಕೆಲವೊಂಜಿ ವಿಚಾರಲೂ ಗೊಂದಲ ಉಂಡು,ಕಾರ್ಲ ಬೂಡು,ಬೈಲಬೂಡು ಇಂಚ ಆಂಡ ಜಾನಪದ ಸಾಹಿತ್ಯಡ್ ಸಾಕ್ಷಿ ಕೊರ್ರ ಅಪುಜಿ.ಹಿರಿಯಾಕ್ಲ್ ಎಂಚ ಪಂತೆರ ಅಂಚನೆ ಅವು ದುಂಬು ಪೋಂಡ ಮಸ್ತ್ ಯೆಡ್ಡೆ.)
....,........................................... .,..........
(ಅಧ್ಯಾಯ ೫ .ಕುಪ್ಪೆರ್ಲೆ ಕಟ್ಟುಗ್ ಬತ್ತಿನ ಪಂಜುರ್ಲಿ ದೈವ)
ಬಡಕ ರಾಜ್ಯೊಡು ಬಾಲೊಲಿಲು,ತೆಂಕಾಯಿ ರಾಜ್ಯೊಡು ಕುಪ್ಪೆರ್ಲು ಬಾರಿಯೆರು,ಏಳ್ ದೋಲಾ ಪದಿನಾಜಿ ಬರ್ಕೆಡು ಬಾರಿಯೆರು.ಕದಿಕ್ಕೆ ನಟ್ಟಿಲ್ಲ ಬರ್ಕೆದ
ಮಪಳ ಬರ್ಕೆ ಮಡೆಂಜಳ ಬರ್ಕೆಡು ಬಾರಿಯೆರು. ಒಂಜಿ ಅಪ್ಪೆ ಬಂಜಿದ ಬಾಲೆಲು ಕುಪ್ಪೆದ ಕೋಟಿ ಕುಜುಂಬ ಬಾಲೆಲು ಪಂಡೆರು.
ಪಲೆ ಕೋಟಿ ಕುಪ್ಪೆ,ಮೆಗ್ಯೆ ಚೆನ್ನಯ ಕುಪ್ಪೆ ಅಕ್ಲೆನ ವೊಪ್ಪ ತಪ್ಪಡ್ ಎಲ್ಯಪದ್ಮು,ಮಲ್ಲ ಪದ್ಮು,ಗುಡ್ಡೆ ತಂಕರು,ಮಜಲು ದಾರಕ್ಕು,ಬಾಲೆ ಸಂಕೆ ಬೈದೆತಿ,ವೊಡ್ಕೊದ ಕುಂಜಿ ಬೈದೆತಿ.
ಮಾಳೊಡ್ ಜತ್ತು ಬೈದ್ಯೆ,ದುರ್ಗಾಡು ಕೋಶ ಬೈದ್ಯೆ, ರಾಯಿಡ್ ಕಾಂತಗೆ ಬೈದ್ಯೆ,ಅಂಕೊಡ್ ಬಿರ್ಮು ಬೈದ್ಯೆ,
ನಾಟೊಡು ನರಂಗ ಬೈದ್ಯೆ ಬಾರಿನ ಒಂಜಿ ಕಾಲೊಡು.
ಕೊಟ್ಯಣ್ಣ ಕುಪ್ಪೆರ್ಲು ಮೆಗ್ಯೆ ಚೆನ್ನಯ್ಯ ಬೈದ್ಯೆರೆಡ ಪನ್ಪೆರು,
ನಮ್ಮ ಹಿರಿಯಾಕ್ಲು ಬೆಂದಿನ ಕುಲಕಸುಬು ಜಾವಿದ ಬೇಲೆ ಬೆನೊಡು ಪನ್ಪೆರು.
ಹಿರಿಯಾಕ್ಲು ಬರೆದು ದೀನ, ತಾರಿದ ಗುಜ್ಜಿವೊಲೆನು ಕಲ್ಲಕಲೆಂಬಿರ್ದು ದೆತ್ತ್ ಶಾಸ್ರ ಗ್ರಂಥ ತೂಯೆರು.
ಕಡೆ ಕಜಂಗೆ,ಕೊಡಿ ಮುಂಡಾಜೆ,ನಡು ಬೊಲ್ಯಾಳ ಗುಂಡಿ‌ಮುಟ್ಟ ಮುರಾಂದಿ ಮೂರ್ತೆ ಮುರೊಡುಂದು,ಕಟ್ಟಾಂದಿ ರಾವುಮರ ಕಟ್ಟೊಡುಂದು ವೊಲೆ ಓದ್ಯೆರು.
ಒಂಜಿ ಅಂಗರೆ ಪೋಯೆರು ಬೈದ್ಯೆರು ಕೆರ್ಪುದ ಸಂದೆಗ ತೂಯೆರ್.
ಮಗುತ್ತೊಂಜಿ ಅಂಗರೆ ಪೋಯೆರು ಬೈದ್ಯೆರು,ಬಲ್ಲುದ ಸಂದೆಗ ತೂಯೆರ್,
ತಾರಿದ ಸಂದೆಗ ಮಂತೆರ್,ಇಂದ್ ಇಸಲುದ ಸಂದೆಗ ಮಂತೆರು.ಏಳ್ ಗಂಟ್ ಕೆರ್ಪು ದೀಯೆರ್,ಕಟ್ಟಂದಿನ ರಕ್ಕಸ,ರಾವು ಮರ ಕಟ್ಯೆರ್.ಕಡೆ ಕಡೆಕ್ಕಾರುರ್ದು,ಕೊಡಿ ಮುಂಡಾಜೆ ಮುಟ್ಟ ಕಟ್ಟಂದಿ ರಾವು ರಕ್ಕಸ ಮರತ್ತ ಮೂರ್ತೆ ಬೆಂದ್ಯೆರು.
ಒಂಜಿ ಅಂಗಾರೆದ ಸಿಂಗಾಂದ ರಾಶಿಡು ಕೋರಿದ ಕೆಲೆಪ್ಪುಗು ಬೊಲ್ಯಾಲ ಗುಂಡಿದ ಕೈತಲ್,ಈಂದ್ ಇಸಲುದ ಮರ ಏರುದು ನೀಟಾಂದ ಕೊಂಬುಗ್,ಅಡ್ಡಂದ ಗಡಿ ಪಾಡುನಗ,ಕೊಂಬು ಜಾರುಂಡು,ಕಂಬುಲು ಬುರುಂಡು.ಈಂದುದ ನಲ್ಲಿಗ್,ಕಲಿತ್ತ ನುರೆಕ್ಕ್,ಸಾರ ಕೀಜನ ಮೀನುದ ಪುಂಡು ಬತ್ತುಂಡು.ಅಯಿಟ್ಟೊಂಜಿ ಮೀನು ಅಡಿಯಾರ ನೀರು ಕಲೆಂಕವೊಂದು,ಮೇಲಾರ ನೀರು ಸೆಲೆಪವೊಂದು,ಬಟ್ಟಲು ಮೊನೆ,ಕುಪ್ಪುಲು ಕಣ್ಣುದ ಮೀನು,ಆನೆಗ್ ಅಡೆಕಾಯಿ,ಕುದುರೆಗು ಬಲವಾಯಿ ಸಾರಪಡವುದ ಮೀನಾದ್ ದೈವ ತೋಜುಯೆ.
ಮೀನುದ ಪೋರ್ಲು ತೂಯಿನ ಇರ್ವೆರ್ ಕುಪ್ಪೆರ್ಲು ಬಾಲೆಲು ಸೋಜಿಗ ಅಯೆರ್.
ಅಪಗ ಮೆಗ್ಯೆ ಚೆನ್ನಯ್ಯ ಬೈದ್ಯೆರು ಪಂಡೆರು.ಯೆರ್ ಪಲಯ ಕೋಟ್ಯಣ್ಣ,ಇಂಚಿನ ಮೀನುನು ನಮ ಇಡೆಮುಟ್ಟು ತೂತುಜ,ನನ ದುಂಬುಗು ತೂಯರಿಜ್ಜಿ
ಇನಿ ಮುಟ್ಟ ಜೈತಿಜ,
ನಮಕ್ಕ್ ಇನಿ ತೋಜಿನ ಮೀನು ಯೆಲ್ಲೆ ಬತ್ತುಂಡ ಅವ್ವೊಂಜಿ ಮೀನು ಜೈಪೊಡು ಪಂಡುದು,ಮೀಸೆದ ಮಿತ್ತ್ ಕೈಪಾಡುದು,ಭಾಷೆ ಕಟ್ಯೆರು.ಅಪಗ ಪಲೆ ಕೋಟಿ ಬೈದ್ಯೆರು ಪಂಡೆರು.ಇನಿಯಂಡ ಅಯಿಜಿ ಮೆಗ್ಯ ಅಂಗಾರೆ ಬರೊಡು,ಸಿಂಗಾಂಧ ರಾಶಿಡು,ಈ ಮೀನು ಜೈಪೊಡುಂದು ಪಂಡೆರು.
ಅ ದಿನ ತನ್ನ ದೋಲಾ ಬಾರೀಕೆಗು ಬರುವೆರು.
ನುಗತ ಕುಂಡಲ,ನಾಯರುದ ಪನೊರು,ಪತ್ತೊಂದು,ಮಿತ್ತ ಬೊಟ್ಟು ದೇವನಚಾರಿ ಕೊಟ್ಯಗು ಪೋಯೆರ್.
ಎಂಟಿ ಕೊಲಿಕ್ಕೆದ ಕೊರ್ಯಂಬು,ಪದಿನಾಜಿ ದಾರೆದ ಪಗರಿ ಮನ್ಪಾಯೆರು,ಕೊಕ್ಕಿನ ಮಲೆಕ್ಕ್ ಪೋದು ಪತ್ತಿನ ಪೊಯಿಂಕೊಲು ಮಂತೆರು.
ಮಗುತ್ತಂಗಾರೆ ಸಿಂಗಾಂದ ರಾಶಿಗು ಬೊಲ್ಯಾಲ ಗುಂಡಿದ ಕೈತಡೆ ಬರುವೆರು.
ಬೊಲ್ಯಾಲ ಗುಂಡಿದ ಬರೀಟ್ಟ್ ನಾಣೀಲುದ ಮರ ಮಿತ್ತು ಅಟ್ಟಲಿಗೆ ಕಟ್ಟುದ್ ಕುಲ್ಯೆರು.
ಅತನ ಪೊರ್ತುಗು ಕೀಜನ ಮೀನುದ ಪುಂಡುದೊಟ್ಟು ಬೂತ ಮಲ್ಲ ಮೀನುದ ವೊರುಟ್ಟು ದಾನೆ ಬರುವೆ,ಅಲವುದ ಬಿರುಟ್ಟು ಮಿಲವುದ ಪಗರಿನು ಮೀನುಗು ಕೊಟ್ಯಣ್ಣ ಬೈದೆರ್ ಅಡ್ಯೊಗು ತೂದು,ನೀಟೊಗು ಬುಡ್ಯೆರ್.ಪಗರಿ ಮೀನುಗು ಪೊಗ್ಗುಂಡು,
ಅಣ್ಣೆ ಮೆಗ್ಯೆ ಬೈದ್ಯನಕ್ಲು ಕೈ ಕೈ ಪತೊಂದು ಮರರ್ದು ಜತ್ತೆರ್,ನೀರುಗು ಜತ್ತುದು ಮೀನುದ ಕೆಬುಲುಡು ಪತ್ತುದ್ ಕಡಂದಲೆ ಬಾಕ್ಯರುಗು ವೊಯಿತ್ ಪಾಡುವೆರು.ಮೀನುದ ಒಂಜಿ ಪೊಡೆ ಮೀನಾದು ತೋಜಿಂಡ,ನನೊಂಜಿ ಪುಡೆ ಪಂಜಿಯಾದು ತೋಜಿಂಡು.ನೆನ್ನು ತೂದು ಇರ್ವೆರು ಶೊದ್ಯ ಆಯೆರು.
ವೊಯಿತ್ ಪಾಡಿನ ಮೀನುಗು,ಪೊಯ್ಯೆಬೊಟ್ಟುದ ದಗ್ಗು ಬೈದ್ಯೆ ತನ್ನ ಕತ್ತಿಡು ಸುರುತ್ತ ಕುರ್ಪ ದೀಯೆರು.
ಎಲ್ಯ ಪದ್ಮು,ಮಲ್ಲ ಪದ್ಮು,ಗುಡ್ಡೆ ತಂಕರು,ಮಜಲು ದಾರಕ್ಕು,ವೊಡ್ಕದ ಕುಂಜಿ,ಬಾಲೆ ಕುಂಜಿ, ಬಾಲೆ ಸಂಕೆ ಬೈದೆತಿ ಪೂರ ಬತ್ತುದು ಮೀನುನು ದಾಯ ಪಂಡ ಅಜಕಲೆ ಮಲ್ಪುವೆರು.ಊರುಗು ಕೊಟ್ಟ ದೀಯೆರು.
ಮಾಸ ಕೊನದ್ ಇಲ್ಲಡು ಮಣ್ಣುದ ನೆಸಲೆಡು ದೀಡುದ್ ಬೈಯಿಪವೆರು,ಆಂಡ ಅಡುಂಡ ಸುಡುಂಡ ಮೀನು ಬೈಪುಂಜಿಂದು ಎಲ್ಯಪದ್ಮು,ಮಲ್ಲ ಪದ್ಮು ಪಂಡೆರು.
ಅತನ ಪೋರ್ತುಗು ನೆಸಲೆಡ್ ಮಾಸ ಕೊದ್ಯೊಂದು ಕೊದ್ಯೊಂದು ನೆತ್ತೆರು ಮಾತ್ರ ತೋಜುಂಡು.ಅಪಗ ಪಲೆ ಕೊಟ್ಯಣ್ಣ ಬೈದೆರು ಪಂಡೆರ್ ಕಜಿಪುನು ಬಾರೆದ ಮುದೆಲೆಗು ಚೇಪ್ಯರ ಪಂಡೆರ್.ಅಪಗ ಅಲ್ಪ ದೈವ ಪಂಜಿದ ವೊರುಟ್ಟು ಲಕ್ಕುದು ಪೊಯೆ.
ಅಪಗ ಕೋಟಿ ಬೈದ್ಯೆರೆಗ್ ಬಂಜಿ ಬಾನೆ ದೈವ ಪಾಡ್ಯೆ.ಉಂದು ದಾನೆ ಸೋಜಿಗ ಚೊದ್ಯಂದು ತಾರಾಯಿ ಕೆರ್ಚಿ ಪಾಡುದು ಕೊನೊದು, ಬಲ್ಮೆ ಬಲ್ಯಾಯಡ ಕೆನ್ನಾಗ ಕುಪ್ಪೆರ್ಲೆ ನಿಕ್ಲೆನ ಧರ್ಮ ಪತ್ತುದು ದೈವ ಪಂಜುರ್ಲಿ ಬತ್ತುದೆ ಪನ್ಪೆರು.
ಯೆಂಕ್ಲ್ ಇತ್ತೆ ದಾದ ಮಲ್ಪೊಡು ಪಂಡುದ್ ಕುಪ್ಪೆರ್ಲು ಕೆನ್ನಾಗ ಏಳ್ ದೋಲಾ ಪದಿನಾಜಿ ಬರ್ಕೆದಕ್ಲು ಸೇರ್ದ್, ವೊತ್ತಿ ಕಟ್ಟುದ್ ಪಾರಿ ಪನೊಡು ಪನ್ಪೆರ್.ದರಿಕೂಟುದು ಧರ್ಮನೇಮ ಕೊರೊಡು ಪಂಡೆರು.
ಅಂಚಂಡ ಎಂಕ್ಲೆನ ಬೈದೆರ್ಲೆನ ದೋಲಾ ಬಾರೀಕೆ, ಏಳ್ ದೋಲಾ ಪದಿನಾಜಿ ಬಾರೀಕೆಗ್ ಸತ್ಯ ಬತ್ತುನುಂದಂಡ ವೊತ್ತಿ ಕಟ್ಯ ಪಾರಿ ಪನ್ಪ ಪಂಡುದ್ ಅಕ್ಲ್ ಪಂಡುನಗ ದೈವ ಬಾಲೆ ಸಂಕೆ ಬೈದ್ಯೆತಿಗು ದಡಿಮೊಟ್ಟುದ್ ದರ್ಶನ ಬರ್ಪುಂಡು.ಅಂಚ ದೈವೊನ್ ನಂಬುವೆರು. ಒಂಜಿ ವರ್ಷ ಅಜಿ ತಿಂಗೊಳುಡು ಪರ್ವ ಬಲಿ ಕೊರಿಯೆರು.ಅಯಿರ್ದು ಬೊಕ್ಕ ನೇಮ ನೆರಿ ಕೊರಿಯೆರ್.ನೇಮ ಕಟ್ಯರ ಬಂಗಾಡಿದ ಬೀರು ಕೋಪಾಲನು ಲೇಪುಡಯೆರ್.
ಇಂಚಿನ ಒಂಜಿ ಪೊಸ ದೈವೊಗ್ ನೇಮ ಕಟ್ಟೊಲಿಯಂದು ಕೆನ್ಯೆರ್.ಕಟ್ಯರ ಕಟುವೆನೆ.ಹುಟ್ಟು ಕಟ್ಟು ತೆರಿಯಂದ್,ಸಂದಿ ಬೀರ ಪಿನಿಯಂದ್ ಯೆಂಕ್ ಪನ್ನಗ,
ಕುಕ್ಕಲದ ತೋಟಗು ಪೋದು ಪಾಲೆ ಕೊನತುದು ಪಂಜಿದ ಮೋನೆ ತೂದು,ಮೊಗ ಪರಿಪುಲ ಪಂಡೆರು,ಗೋಡೆದ ಚಿತ್ರ ತೂದು ಅಣಿಕ್ಕ್ ವರ್ಣ ಬರೆಲಾ ಪಂಡೆರು.
ತೋಡುದ ಬರಿರ್ದ್ ಆನೆಮಂಜಲು ಕೊನತ್ತುದು,ಮೋನೆಗು ಅರ್ದಳ ಪಾಡುಲಾ,ಗುಡ್ಡೆದ ಕೇಪುಳು ಕೊನತುದು ಅಯಿನ್ ಕಟ್ಟುದು,ತರೆಕ್ಕ್ ತರೆದಂಡೆ,ಕೈಕ್ಕ್ ಕೈದಂಡೆ ಕಟ್ಟುಲಾ ಪಂಡೆರು.ಈ ರೀತಿಡು ಏಳ್ ದೋಲಾ ಪದಿನಾಜಿ ಬರ್ಕೆದಕ್ಲ್ ಗುಪ್ಪೆಯಾದು(ರಾಶಿ) ಸೇರ್ದು ಧರ್ಮ ನೇಮ ಕೊರ್ದು ಕುಪ್ಪೆ ಪಂಜುರ್ಲಿ ಪನ್ಪಿ ಪಂಡುದ್ ಪೊರಪು ಪಡೆಯೊನ್ಯೆ.
ಇಡೆಗ್ ಕುಪ್ಪೆ ಪಂಜುರ್ಲಿನ ಕಥೆ ಮುಗಿತಲ ಅಪುಂಡು.
ತುಳುನಾಡುದ ಕಟ್ಟಿ ಇಲ್ಲ್,ಜತ್ತಿ ಬಾಕಿಲುಡು,ಉಲಾಯಿಗ್ ಅಪ್ಪೆ,ಪಿದಾಯಿಗ್ ತಮ್ಮಲೆ ಆದ್ ಕಾತೊಂದು ಬತ್ತಿನ *ಕುಟುಂಬದ ದೈವ ಪಂಜುರ್ಲಿ* ಜಾಗುದ ದೈವ *ಕುಪ್ಪೆ ಪಂಜುರ್ಲಿ* ನಮನ್ ಮಾತ ಕಾತೊಂದು ಬರಡ್.
