ಪೈಚಿಲ್ ನೇಮ-ಪುದ್ದರ್ ಮೆಚ್ಚಿ

               ಪೈಚಿಲ್ ನೇಮ-ಪುದ್ದರ್ ಮೆಚ್ಚಿ

  ತುಳುನಾಡ ದೈವಾರಾದನೆಡ್ ಅಪ್ರೂಪದ ಒಂಜಿ‌ ಆರಾದನೆ.ಧರ್ಮ ನೇಮ , ಕಾಲದಿ/ವರ್ಸಾದಿ ನೇಮ,ಪೂಕರೆ ಕಂಬುಲ ನೇಮ,ಮ ಮೆಚ್ಚಿ,ಮೈಮೆ,ಕೋಲ,ಸೇವೆ ಇಂಚ ಬೇತೆ ಬೇತೆ ಪುದರ್ ಡ್ ದೈವಾರಾದನೆ ನಡತ್ಂಡ  ಕೊಟ್ಯದಾಯನ,ಸಾನದಾಯನ,ದೊಂಪದ ಬಲಿ,ಕೆರೆ ನೇಮ,ಪುದ್ದರ್ ಮೆಚ್ಚಿ  ಇಂಚಿಪ್ಪಿ ನೇಮ ನೆರಿ ನಡಪುವ.ಉಲ್ಲಾ ಲ್ದಿಗ್ ಎಚ್ಚಾದ್ ಮೆಚ್ಚಿ,ಪುದ್ದಾರ್ ಮೆಚ್ಚಿ  ನಡಪುಂಡು.ದೈವಾರಾದನೆಡ್ ತೋಜಿದ್ ಬರ್ಪುನ ನನೊಂಜಿ ರೀತಿದ ನೇಮ ಅವ್ವೆ ಪೈಚಿಲ್ ನೇಮ.ಪುದ್ದಾರ್ ಮೆಚ್ಚಿಗ್ಲ ಪೈಚಿಲ್ ನೇಮೊಗ್ಲ ಒಂತೆ ಓಲ್ಪಡಿ ಇತ್ತ್ಂಡಲ ಪುದ್ದರ್ ಮೆಚ್ಚಿ ನೇಮನೇ ಬೇತೆ,ಪೈಚಿಲ್ ನೆಮನೇ ಬೇತೆ.ಬುಳೆ ಪಾಯೊಗು ಬತ್ತ್ ದ್ ಕೊಯ್ಯೆರಾಯಿನ ಪೊರ್ತುಡು ನಡಪುನ ನೇಮ ಪೈಚಿಲ್ ನೇಮ.ಮಲರಾಯಗ್ ಪೈಚಿಲ್ ನೇಮ ನಡಪುಂಡು.ಕೆಯ್ ಕೊಯ್ದ್ ಇಲ್ಲಡ್ ಪೊಸರಿ ಆನಗ ದೈವೊಲೆಗ್, ನಮ ಎಂಚ ಪೊಸರಿತ ಪುದ್ದರ್ ಉನ್ಪನ  ಅವ್ವೇ ರೀತಿಡ್ ದೈವೊಲೆನ ಬಲಿಕ್ ಪೊಸರಿತ ನುಪ್ಪು ಪಾಡ್ದ್ ಪುದ್ದರ್ ಮೆಚ್ಚಿ  ನೇಮ ಕೊರ್ಪ

  

ದೈವಾರಾದನೆದ ಗಟ್ಟ,ರಾಜ್ಜದ ಕಲ್ಪನೆ

      ದೈವಾರಾದನೆದ ಗಟ್ಟ,ರಾಜ್ಜದ ಕಲ್ಪನೆ

ದೈವದ ನುಡಿಕಟ್ಟ್ ದ ಕಲ್ಪನೆಗ್ಲ ಪ್ರಾಕೃತಿಕ ಗಟ್ಟದ ಕಲ್ಪನೆಗ್ಲ ಒಂತೆ ಎತ್ತೇಸೊ ಉಂಡು.ಮೂಲು‌ ದೈವ ಗಟ್ಟ ಬಡ್ತುನತ್ತ್.ದೈವೊನು ಆರಾದನೆ ಮಲ್ಪುನಕುಲು ದುಂಬುದ ಕಾಲೊಡು ದೈವಾರಾದನೆ ಮುಗಿ ಬೊಕ್ಜ  ಬೆನೆರೆ ಗಟ್ಟೊಗು ಪೋವೊಂತೆರ್.ನನೊಂಜಿ ರೀತಿಡ್ ಪನ್ಪುಂಡ ಕಂಡಸಾಗೊಳಿದ ಬರಿತ ಏರ ಜೇರೊಲೆ ಗಟ್ಟೊಲಾದಿತ್ತ.ದೈವದ ನುಡಿ ಕಟ್ಟ್ ಡ್ ಬರ್ಪಿ ರಾಜ್ಯದ ಕಲ,ರಾಜ್ಯದ ಕಲ್ಪನೆಲ ನಮ್ಮ ಇತ್ತೆದ ರಾಜಕೀಯ ವ್ಯಾಪ್ತಿದ ರಾಜ್ಜೊರ್ದು ಬೇತೆಯಾದುಂಡು. ದೈವದ ನುಡಿಟ್ ಬರ್ಪುನ ಗಡಿ ಮಾಗಣೆ,ಹೋಬಳಿ,ಗ್ರಾಮ

    

                       ‌ ‌‌             ಗಡಿಕಲ್ಲ್

ಮುರ ಕಲ್ಲ್ ದ ಗಡಿಕಲ್ಲ್ ದುಂಬು ಪುದೆ ಜಾಯೆರೆ ಗಲಸೊಂತೆರ್

ಗಡುಪಾಡಿ ಜಾಗೆಲು ಆಧುನಿಕ ತಲೆಮಾರ್ ಗ್ ಅರ್ಥ ಆವಂದಿನೆಟೇ ಒಂಜಿ ಗ್ರಾಮ ದೈವದ ವ್ಯಾಪ್ತಿಡ್ ನಿಷೇಧ ಇತ್ತಿನ ಆರಾಧನೆಲು,

ಆಚರಣೆಲು ಉಲ್ಲಂಘನೆ ಆವೊಂದು ಕಟ್ಟ್ ತತ್ತೊಂದು ಉಂಡು .ತುಳುನಾಡ್ ಡ್ದ್ ಗಟ್ಟದ  ಮಿತ್ತ್ ಗ್  ಕಾಫಿ ತೋಟೊಗು ಬೇಲೆಗ್ ಪೋಯಿನಕುಲು ಏತೋ ವರ್ಷಡ್ದ್  ಅಲ್ಪನೆ  ಬದ್ ಕ್ ಕಟ್ಟೊಂಡಲಾ, ನಂಬೊಲಿಗೆ ಇತ್ತ್ಂಡಲ ಕುಟುಂಬದ ಭೂತೊಗು ಕರಿಪುನಗ  ಊರುಗೆ ಬರ್ಪೆರ್

ದೈವಾರಾದನೆ ಅರಿಗಿರಿದ್ ಪೋವೊಂದುಂಡು

    ದೈವಾರಾದನೆ ಅರಿಗಿರಿದ್ ಪೋವೊಂದುಂಡು

    

              ಪಿಲ್ಚಂಡಿ ಮುಗ ಕೊಲಕಾಡಿ ಮುಲ್ಕಿ

     ತುಳುನಾಡ್ದ ಕಾಸರಗೋಡು,ಕುಡ್ಲ(ದ.ಕ),ಒಡಿಪು ಈ ಮೂಜಿ ಬಾಗೊಲೆಡ್ ಅಷ್ಟಮಂಗಲ,ಬ್ರಹ್ಮ ಕಲಶ ನಡತೊಂದಿತ್ತ್ ದ್ ದೇವೆರೆನ್ ತರೆಟ್ ತುಂಬುನ ಕೆರಮ ಮುಲ್ತ ಸಾನೊಲೆಡ್ ಮಾತ್ರ ತೂಯೆರೆ ತಿಕ್ಕುನಿ . ಇನಿ ತುಳುನಾಡ ದೈವಸಾನ,ಮಠೊಕು ಪೂರ ಅಗತ್ಯ ಇಜ್ಜಾಂದಿ ಅಷ್ಟಮಂಗಲ ಪ್ರಶ್ನೆ ,ಬ್ರಹ್ಮಕಲಶ ಬತ್ತ್ ದ್ ಅವ್ಲಿಪ್ಪಿ ಬೆಮ್ಮೆರೆನ್ ಮೂಲೆಗ್ ಪಾಡ್ದ್ ಅರೆನ ಬದಲ್ ಗ್ ಗಣಪತಿನ್ ತಾಪನೆ ಮಲ್ಪುವೆರ್.ಬ್ರಹ್ಮ ಕಲಶ ಮಲ್ತ್ ದ್ ಅವೆರ್ದ್ ಬೊಕ್ಕ ದೈವದ ಅಣಿತಲೆಕ ದಂಡಮಾಲೆಲ ಪಾಡ್ದ್ ದೇವೆರೆ ಬಲಿ ಮಲ್ತ್ ದ್ ದೈವದ ಬಲಿತ ಅನುಕರಣೆ ಮಲ್ತೊಂದುಲ್ಲೆರ್.ದೈವಾರಾದನೆದ ಬಗೆಟ್ ಪಾತೆರುನಕ್ಲೆನ್ ಲೆಪ್ಪಂದೆ ಧಾರ್ಮಿಕ ಉಪನ್ಯಾಸಂದ್ ದೇವೆರೆ ಬಗೆಟ್ ಪಾತೆರುನಕ್ಲೆನ್ ಲೆತ್ತ್ ದ್ ದೈವೊನು ದೇವೆರ್ ಮಲ್ತೊಂದುಲ್ಲೆರ್.ಇತ್ತೆ ಬಲಿ ತುಂಬುನ ನೂಲು ಪಾಡಿ ಸಂಸಾರೊಗ್ಲ ವಸಾಯ ಬರ್ರೆ ಸುರಾತ್ಂಡ್.ಇಂಚ ದೇವೆರೆ ಬಲಿ ಪೊಸತಾದ್ ಬತ್ತ್ ದ್ ಬೆಮ್ಮೆರೆನ್ ಮೂಲೆಗ್ ಪಾಡ್ಲೆಕ ದೈವೊಲೆನ್ ಮೂಲೆಗ್ ಪಾಡುನ ಕಾಲ ದೂರ ಇಜ್ಜಿಂದ್ ತೋಜುಂಡು.ಅವೆಕ್ ಉದಾರ್ಮೆ ಪಂಡ ಬೆಮ್ಮೆರೆ ಸುತ್ತೆ ದೀಪುನೌಲು ಗಣಪತಿ ದೀಪೆರ್.ಸುದ್ದ ಓಮ ದೀವೊಂತುನೌಲು ಗಣ ಓಮ ದೀಪೆರ್. ಒಂಜಿ ನುಡಿ ಉಂಡು.ತರೆಟ್ ತುಂಬುಂಡ ದೇವೆರ್.ಪುಗೆಲ್ಡ್ ತುಂಬುಂಡ ದೈವಂದ್.ಪಟ್ಟದ ಮುಗ ಸಾನೊಡಿಪ್ಪುಂಡು.ಉಚ್ಚಯ   ಮುಗ ಏರ್ದ್ ದೈವ ಬಂಡಿದ ಮಿತ್ತ್ ಕುಲ್ಲುದು ದೈವದ ಬಂಡಿ ಒಯ್ಪುವೆರ್.ಸ್ವಾಮೀ ಸತ್ಯೊಲೆಂದ್ ಲೆಪ್ಪೊಡಾಯಿನೌಲು ಗೋವಿಂದ ಪಾಡೊಂದುಲ್ಲೆರ್.ದೈವೊನು ದೇವೆರ್ ಮಲ್ತಿಲೆಕಾಂಡ್..ಅಂಚನೆ ಪಟ್ಟದ ಮೂರ್ತಿ ಗರ್ಭ ಗುಂಡೊಡಿಪ್ಪುಂಡು.ಉಚ್ಚಯ ಮೂರ್ತಿ ತರೆಟ್ ತುಂಬೊಂದು ಬಲಿ ಬರ್ಪೆರ್.ತೇರಿತ್ತ್ ನೌಲು ಉಚ್ಚಯ ಮೂರ್ತಿನ್ ತೇರ್ದ ಮಿತ್ತ್ ದೀದ್ ತೇರ್ ಒಯ್ಪುವೆರ್.ದೈವದ ಬಲಿ ಪೋನಗ ದೈವದೊಟ್ಟುಗು ಇಲಾಲ್,ಜೀಟಿಗೆ ಇತ್ತ್ಂಡ ದೇವೆರೆ ಬಲಿ ಪೊನಗ ನೇಲ್ ತುಡರ್,ಕೆಲ ಸಾನೊಲೆಡ್ ಇಲಾಲ್ ಉಪ್ಪುಂಡು.ಇತ್ತೆ ದೇವೆರೆ ಬಲಿಟ್ ಜೀಟಿಗೆಲ ಉಪ್ಪುಂಡು.ಈ ಅರಾದನಾ ಪದ್ದತಿಲು ದೈವಾರಾದನೆಡ್ದ್ ದೇವತಾರಾದನೆಗ್ ಬತ್ತ್ ದಿಪ್ಪು.

          ಪಿಲಿ ಬೂತದ ಮುಗ.ಇರ್ದೆ ಕದಿಕೆ ಚಾವಡಿ

ದೇವೆರೆ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುನಾಡ ಆರಾದನೆಡ್ ಇತ್ತ್ ನ ತುಳುನಾಡ ಮಣ್ಣ ದೈವೊಲೆನ್ ದೇವೆರೆಡ್ದ್ ಪುಟ್ಟ್ ನ ದೈವೊಲುಂದು ಪಂಡ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ಪೆರೆ ಪೋವಡೆ.ದೈವೊಲೆನ್ ಈ ಮಣ್ಣ್ ಡ್ ಉದಿತಿ ದೈವೊಲಾದೇ ತೂಕ.ದೇವೆರೆನ್ ದೇವೆರಾದೇ ತೂಕ.ದೇವೆರೆನ್ ಸಂಸ್ಕೃತದ ಮಂತ್ರೊಲೆಡ್ ಮಾನಿತೊಂಡ ದೈವೊಲೆನ್ ಸಂದಿ ಪಾಡ್ದನದ ನಿಲೆಟೇ ಅರ್ಥ ಮಲ್ತೊನುಗ.ದೈವೊಲೆನ್ ಆರಾದನೆದ ಒರುತ ಕೊಡಿಯಡಿಟೇ ಮನಿತೊನ್ಗ.ಅವೆನ್ ಬುಡ್ದು ಬೇತೆ ಬೇತೆ ರಂಗೊಲೆಡ್ ಪ್ರದರ್ಶನ ಕಲೆಯಾದ್ ತೂಪರಿಕೆ ಮಲ್ಪಡೆ.

    ದೈವಾರಾದನೆದ ದೈವೊಲು ಕುಲ್ಲುನ ನಾಲ್ ಜಿಡ್ಡೆದ ಬಗೆಟ್ ತೆರಿಯೊಂಡೆರ್ಡ ದೈವಾರಾದನೆಡ್ ಏರ್ಲಾ ತಪ್ಪು ಮಲ್ಪಯೆರ್.

1ಅರಸು,ರಾಜಂದೈವೊಲು ಕುಲ್ಲುನ ಉಜ್ಜಾಲ್.ಉದಾರ್ಮೆ -ಜುಮಾದಿ

2.ರಾಜಂದೈವೊಲು ಕುಲ್ಲುನ ಮುಂಡ್ಯೆ.ಉದಾರ್ಮೆ-ಮಲರಾಯೆ

3 ರಾಜಂದೈವೊಲು ಕುಲ್ಲುನ ಮಣೆ ಮಂಚ ‌ಉದಾರ್ಮೆ-ಕಲ್ಲುರ್ಟಿ,ಪಂಜುರ್ಲಿ

4ದೈವೊಲು ಕುಲ್ಲುನ ಬೂಮಿ/ನೆಲ . ಉದಾರ್ಮೆ-ರಾವು,ಗುಳಿಗೆ ನೆಲಟ್ ಕುಲ್ಲುನಿ

ಉಂದೇ ನಾಲ್ ದೈವೊಲು ಕುಲ್ಲುನ ಪ್ರಧಾನ ಜಿಡ್ಡೆಲು.ಅಂಚನೆ ದುಂಬು ಪೂರ ಒಂಜಿ ದೈವ ಒಂಜಿ‌ ಕಲಟ್ ಪ್ರಧಾನ ಆದಿತ್ತ್ ದ್ ಪಾತೆರೊಂತ್ಂಡ್.ಒರಿನ ದೈವೊಲು ಪಾತೆರ್ರೆ ಇಜ್ಜಾಂಡ್.ಇನಿ ಒಂಜಿ ಕಲೊಟುಪ್ಪುನ ಪೂರಾ ದೈವೊಲ್ಲಾ ಪ್ರಧಾನ ಆದ್ ಮಾತ ದೈವೊಲ್ಲಾ ನುಡಿ ಕೊರ್ಪುನಡೆಕ್ ಎತ್ತ್ ದ.ದೈವದ ಜಿಡ್ಡೆದ/ಪೀಠದ ಬಿಲೆ ತೆರಿಯಂದೆ ಕಟ್ಟುನಕುಲು ಇಂಚ ನುಡಿ ಕೊರೊಂದುಲ್ಲೆರ್.

ಬಂಜಿಗ್ ಉನೆರೆ ತಿನೆರೆ ಗತಿ ದಾಂತಿ,ತುತ್ತೆರೆ ತುಂಡು ಕುಂಟು ದಾಂತಿ,ಇದ್ಯೆದ ಗಂದಗಾಳಿ ತೆರಿಯಂದಿ  ಪೂರ್ವಹಿರಿಯಾಕ್ಲ್ ನಂಬೊಂದು ಬತ್ತಿ ದೈವೊಲೆನ ಮಾಯೆ ಮಲ್ಲೆ ಆದಿತ್ತ್ಂಡ್.ಅಡೆಗ್ ಮಂತ್ರ ಬತ್ತ್ ದ್ ಮಾಯೆದ ನಿಲೆ ತತ್ತ್ ದ್ ದೈವೊಲು ದೇವೆರಾಯೆರೆ ಸುರಾಯೆರ್

  ದೈವದ ಕಲೊಕು ನಿಜವಾದ್ ಮದ್ಯಸ್ಥೆರ್ ಪನ್ಪುನ ವ್ಯವಸ್ಥೆನೇ ದುಂಬಿಜ್ಜಾಂಡ್.ಕುಟುಮದಕ್ಲೆಗ್ ದೈವದ ಮಿತ್ತ್ ಅಪಾರ ಭಕ್ತಿ ಇತ್ತ್ಂಡ್.ದೈವದ ಕಾರ್ನಿಕಲ ಅಂಚನೆ ಇತ್ತ್ಂಡ್.ಕುಟುಮದ ಬೊಕ್ಕ ದೈವದ ಸಮ್ಮಂದಲ ಆತ್ ಗಟ್ಟಿ ಇತ್ತ್ಂಡ್.ಏಪ ದೈವದ ಕುಟುಮದ ನಡುಟು ಮದ್ಯಸ್ಥೆ ಪನ್ಪುನಾಯೆ ಬತ್ತೆನಾ ವರ್ಸ ಇಡೀ ಪೂ ನೀರ್ ದೀದ್ ಆರಾದನೆ ಮಲ್ತೊಂತ್ ನಾಯೆ ಮೂಲೆ ಸೇರುಲೆಕಾಂಡ್.ಏರೋ ಗುರ್ತಾರ್ಥ ದಾಂತ್ ನಾಯೆ ದೈವದ ಕಲೊಕು ಬತ್ತ್ ದ್ ಮದ್ಯಸ್ಥಿಕೆ ಮಲ್ತ್ ನೆಡ್ದಾದ್ ದೈವೊಗ್ಲ ಆಯನ ಮಿತ್ತ್ ಮೋಕೆ ಇಜ್ಜಿ.ಇಂಚಿರ್ದ್ ತನನ್ ನಂಬೊಂತಿನಾಯೆ ಮೂಲೆ ಸೇರ್ನಗ ಕಲೊಕು ಬತ್ತಿ ಮದ್ಯಸ್ಥಗ್ ದಾಯೆ ಕಾರ್ನಿಕ ತೋಜಾವೊಡುಂದು ದೈವ ಕಾರ್ನಿಕ ತೋಜಾವುನೆನ್ ಕೈ ಬುಡ್ಂಡ್.ಮೂಲು ಕಲೊಟು ದೈವದ ಬದಲ್ ಕಟ್ಟುನಾಯೆ ಬೊಕ್ಕ ಮದ್ಯಸ್ಥೆ ತನ್ಕುಲ್ನ ಸಂದರ್ಶನ ಮಲ್ಪುಲೆಕಾಂಡ್.ನಮ ಪೂ ನೀರ್ ದೀದ್ ಆರಾದನೆ ಮಲ್ತೊಂತ್ ನ ದೈವೊಲೆಗ್ ಬೇತೆ ಏರಾ ಒರಿ ಪಿದಯಿಡ್ದ್ ಬತ್ತ್ ನಾಯೆ ಕರಿಪುವೆ ಪಂಡ , ನಮ್ಮ ಅಪ್ಪೆ ಅಮ್ಮಗ್ ನಮ ಬಲಸ್ ದ್ ಕೊರ್ಂಡ ನೆಮ್ಮದಿಯತ್ತಂದೆ ಪಿದಯಿಡ್ದ್ ಬತ್ತ್ ನಾಯೆ ಬಲಸ್ ದ್ ಕೊರ್ಂಡ ಎಂಚಾವು?ಅವ್ವೆ ಪರಿಸ್ಥಿತಿ ನಮ್ಮ ದೈವೊಲೆಗಾತ್ಂಡ್.

 

    ಅಣಿತ ಪಿರವು ಮುಗ ಬುಡ್ಪಾವುನ ಕಾಲ ಬತ್ತ್ಂಡ್.

  ನಮ ದೈವದ ಮಿತ್ತ ನಂಬೊಳಿಗೆ ಬುಡ್ದು ಇನಿ ನೇಮದ ಮನದಾನಿ ಜೋಯಿಸೆರ್ಡ ಪೋದು ಕೇನುವ‌.ವಾ ವಾ ದೈವೊಲೆನ್ ವಾ ವಾ ಜಿಡ್ಡೆಲೆಡ್ ದೀದ್ ಆರಾದನೆ ಮಲ್ಪೊಡು ಪಂಡ್ ದ್ ತೆರಿಯಂದಿನ ಪ್ರಶ್ಬೆ ಚಿಂತನೆದಕುಲು,ದೈವಾರಾದನೆದ ಕಟ್ಟ್ ಕಟ್ಲೆದ ಬಗೆಟ್ ತೆರಿಯಂದಿನಕುಲು, ದೈವಾರಾದನೆದ ದೈವೊಲೆನ್ ಇಂಚಿನ ದೈವಂದೇ ಪನೆರೆ ಅರ್ಹೆರತ್ತ್.ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ

ಅರಸು ದೈವೊಲೆ ಸಿರಿ(ತಿರಿ ಅಲಂಕಾರ)ಮುಡಿತ ಅರ್ಥ ತೆರಿಯಂದೆ ಸಿರಿ ಮುಡಿಕ್ ತಿರಿತ ಅಲಂಕಾರದ ಬದಲ್ ಪೂತ ಅಲಂಕಾರ ಮಲ್ತೊಂದುಲ್ಲೆರ್

     ಒಂಜಿ ಕಾಲೊಡು ತನ್ಕ್ ಎದುರುಂತ್ ನ ಬಡವರ್ಗೊನು ಒಂಜಿ ಶ್ರೀಮಂತ ವರ್ಗ ಮೋಸೊಡು ಕೆರ್ದ್ ತನ್ಕುಲೆಗ್ ತೊಂದರೆ ಅಯೆರೆ ಬಲ್ಲಿಂದ್ ದೈವ ಮಾಯ ಮಲ್ತಿನಿ ಪಂಡೆರ್.ಕರಿದ್ ಪೋಯಿನಕ್ಲೆರ್ದ್ ಉಪದ್ರ ತೋಜಿದ್ ಬನ್ನಗ ಅಕ್ಲೆನ್ ದೈವ ಆದ್ ನಂಬ್ಯೆರ್..ಇನಿ ತನ್ನ ಬಂಜಿದ ಗುಜ್ಜರ್ಮೆಗಾದ್ ದೈವೊಲೆನ್ ಸಿನೆಮಾ ನಾಟಕ ಅಟ ದಾರಾವಾಹಿಲೆಡ್ ಕನನಗ ದೈವದ ಅಪ್ಪಣೆ  ದೆತೊಂದು ಅವೆನ್ ಮಲ್ತೊಂದುಲ್ಲ,ಜಗತ್ತ್ ಗ್ ದೈವದ ಕಾರ್ನಿಕೊನು ತೋಜವೊಡುಂದುಲ್ಲಂದ್ ಪನ್ಪೆರ್.ಇಲ್ಲದುಲಯಿ ಪರೊಡಾಯಿನ ಪೇರ್ ನ್ ಜಾಲ್ ಗ್ ಚೇತ್ ಲೆಕಾಂಡ್. ತುಳು ಮಣ್ಣ್ ದ ವಾ ದೈವಲಾ ತುಳುನಾಡ ಮಣ್ಣ ಋಣತಕ್ಲೆನ್ ಬುಡ್ದು ಪಾಡಂದ್. ಇಂಚಿ ಇಚಾರೊಗು ದೈವ ಒಪ್ಪಿಗೆ ಕೊರ್ರೆ ಸಾಧ್ಯನೇ ಇಜ್ಜಿ.ಕೆಲವು ಕಟ್ಟುನಕುಲು ಪಣವುದ ಆಸೆಗ್,ಮಾದ್ಯಮೊಡು ಪುದರ್ ಬರ್ರೆ ಬೋಡಾದ್ ನುಡಿ ಕೊರೊಡಾತೆ.

   

ದೈವೊಲೆಗ್ ಪಾಲೆಡ್/ತಡ್ಪೆಡ್ ಕೊರೊಂತಿ ಆವಾರಾಮೃತ ಪ್ಲಾಷ್ಟಿಕ್ ತಟ್ಟೆಡ್ ಕೊರ್ಪುನ ಪರಿಸ್ಥಿತಿ ಬತ್ತ್ಂಡ್.

ಒಂಜಿ ಕಾಲೊಡು ಕೇರಳದ ಕಾಲಟಿರ್ದ್ ತುಳುನಾಡ್ ಗ್ ಬತ್ತಿನ ಶಂಕರಾಚಾರ್ಯೆರ್ ಉಲ್ಲಾಲ್ದಿನ ದೈವಸಾನೊಲೆಡ್ ಶ್ರೀಚಕ್ರ ದೀದ್ ಉಲ್ಲಾಲ್ದಿ,ಲೆಕ್ಕೆಸಿರಿ ಪೂರಾ ದುರ್ಗಾಪರಮೇಶ್ವರಿ ರಕ್ತೇಶ್ವರಿ ಆಂಡ್.ಶ್ರೀರಾಮಾನುಜಾಚಾರ್ಯೆರ್ ವಿಷ್ಣು ಮೂರ್ತಿನ್ ತುಳುನಾಡ್ ಗ್ ಕನತೆರ್.ಅರಸು ಬಿಟ್ಟಿದೇವನ್ ಆರ್ ಸುರು ವಿಷ್ಣುವರ್ದನಂದ್ ಪುದರ್ ಬದಲ್ತೆರ್.ಕಾಲನುಬಾಗೊಡು ವಿಷ್ಣುಮೂರ್ತಿ ದೈವಲಾ ವಿಷ್ಣುನ,ಗೀತೆದ ಸಂಸ್ಕೃತದ ಸಾಲ್ ಲೆನ್ ಪನೆರೆ ದುರು ಮಲ್ತೆರ್.ವಾದಿರಾಜೆರ್ ಶಿವ ಸನ್ನಿದಿಡ್ ಶಿವಲಿಂಗದ ಮಿತ್ತ್ ವಿಷ್ಣುನ ಸಾಲಿಗ್ರಾಮ ದೀವೊಂದು ಬತ್ತೆರ್.ಇನಿ ಕೇರಳದ ಪ್ರಶ್ನೆ ಚಿಂತನೆದಕುಲು ಅವ್ವೇ ಬೇಲೆನ್ ಮಲ್ತೊಂದುಲ್ಲೆರ್.ಶಿವ ದೇಲ್ಯೊಲೆಗ್,ಜೋಗಿ ಮಠೊಕ್ಲೆಗ್,ದೈವಾಲ್ಯೊಲೆಗ್ ಇಜ್ಜಾಂದಿ ಬ್ರಹ್ಮಕಲಶೊನು ಅಷ್ಡ ಮಂಗಲ ಪ್ರಶ್ನೆ ದೀದ್  ಮಲ್ಪಾಯೆರೆ ಪಂಡೆರ್.ಉಂದು ನಮಕ್ ಗೊತ್ತಾವಂದಿಲೆಕ್ಕ ನಡಪುನ ಧಾರ್ಮಿಕ ಆಕ್ರಮಣನಾ ಅತ್ತ್ ಮತಾಂತರನಾ ತೆರಿಯೊಂದಿಜ್ಜಿ.

  

ದೈವದ ತುತ್ತೈತದ ಕೇಪುಲು ರಂಗ್ ಮಯಕ(ಓಡಮರಾಯ ದೈವ.ತಿಂಗಳೆ ಗರಡಿ ಹೆಬ್ರಿ

  ನಿಜವಾದ್ ತುಳುವೆರೆಗ್ ದೈವಾರಾದನೆದ ಕಟ್ಟ್ ನ್ ತೆರಿಪಾದ್ ಕೊರೊಡಾಯಿನಕುಲು ಕಟ್ಟುನಕುಲು.  ಅಂಚನೆ ಇಂಚಿನ ದೈವೊಗು ಇಂಚಿನ ಬಣ್ಣ,ಇಂಚಿನ ತುತ್ತೈತ,ಇಂಚಿತ್ತ್ ನ ಮಣೆ ಮಂಚ,ಇಂಚಿತ್ತ್ ನ ಉಜ್ಜಾಲ್ಂದ್ ತೆರಿಪಾವೊಡಾಯಿನಕುಲು ಕಟ್ಟುನಕುಲು..ಇನಿ ಅಕುಲೇ ಮಣ್ಣ ಸಂಸ್ಕೃತಿನ್ ಮದತೆರ್ಡ ನನ ಏರೆಡ ಕೇನೊಡು?.ದುಂಬು ದೈವದ ತುತ್ತೈತ,ಅರ್ದಾಲೊಡು ಉಂದು ಗುಳಿಗೆ,ಉಂದು ಪಂಜುರ್ಲಿ,ಉಂದು ಜುಮಾದಿಂದ್ ಗೊತ್ತಾವೊಂತ್ಂಡ್.ಇನಿ ಕಲ್ಲುರ್ಟಿ,ಗುಳಿಗನ್ ಪೂರ ತೂನಗ ದಾದ ಬಣ್ಣಂದೇ ಗೊತ್ತಾವೊಂದಿಜ್ಜಿ.ಪುಟ್ಟುರ್ದು ಸಾವುಮುಟ್ಟದ ಆಚರಣೆಲು ಸಂಪೂರ್ಣ ವೈದಿಕ ಅಯಿಲೆಕ ತುಳುನಾಡ ದೈವಾರಾದನೆದ ಮೂಲ ಪರಂಪರೆ ನಾಶ ಆವೊಂದುಂಡು.

  

ಕೇಪುಲು ರಂಗ್ ತುತ್ತೈತ,ಸೂರ್ಯ ಚಂದ್ರೆ ಮಯಕ

        ದುಂಬು ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಇಲ್ಲದುಲಯಿ ಮದನಕೈ ಪಲಯಿಡ್,ಮಣೆಟ್ ದೀದ್ ಆರಾದನೆ ಮಲ್ತೊಂತೆರ್ಡ ತುಡರ್ ದೀದ್,ಸುತ್ತೆ ದೀದ್ ಲ ಆರಾದನೆ ಮಲ್ತೊಂತೆರ್.ಹಿರಿಯಾಕ್ಲೆಗ್ ವರ್ಸೊಗೊರ ಅಗೆಲ್  ಪಾಡ್ದ್ ಕುಟುಮೊಗು ಸೆರ್ಸಾವುನ ಕೆರಮಲ ಇತ್ತ್ಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಒಂಜೆ ಕೋಣೆದುಲಯಿ ಪಂಜುರ್ಲಿನ ಬಲತ್ ಗ್ ಕುಲ್ಲಾದ್ ತಗೆ ತಂಗಡಿಯಾದ್ ಆರಾದನೆ ಮಲ್ಪುನೊಟ್ಟುಗು ರಾವು,ನಾಗೆ,ಪದಿನಾಜಿ ಸೇರ್ನ ಹಿರಿಯೆರ್,ಮುಡಿಪು ಇತ್ತ್ ದ್ ಮುಡಿಪುದ ಕುಟುಮೊಗು ಒಂಜಿ ಸೂತಕ ಇತ್ತ್ ದ್ ದೈವಾರಾದನೆ ಕುಟುಮೊನು ಒಂಜಿ ಸೂತ್ರದಡಿಟ್ ಗಟ್ಟಿ ಮಲ್ತ್ ದಿತ್ತ್ಂಡ್.ಇತ್ತಿತ್ತೆ ಕುಟುಮದ ಕಲ್ಲುರ್ಟಿ ಪಂಜುರ್ಲಿಗ್ ಪಿದಯಿ ಕಲ್ಲ್ ಪಾಡ್ದ್ ನಂಬುನ,ಬೇತೆ ಸಾನ ಕಟ್ಟ್ ದ್ ನಂಬುನ,ಸಾನೊಗು ಮುಗುಳಿ ದೀಪುನ ಕರಮ ಸುರಾತ್ಂಡ್. ಕೇರಳದ ಪ್ರಶ್ನೆ ಚಿಂತನೆದಕ್ಲೆನ ಪಾತೆರ ಕೇಂದ್ ಕಲ್ಲುರ್ಟಿ ಪಂಜುರ್ಲಿನ್ ರಡ್ರಡ್ಡ್ ಕೋಣೆಡ್ ಬೇತೆ ಬೇತೆನೆ ಕುಲ್ಲವುನ ಕೆರಮ ಸುರಾತ್ಂಡ್.ಪಿದಯಿ ಕಲ್ಲ್ ಪಾಡ್ದ್ ನಂಬುನಲಾ ಸಾನದ ಸಂಕಲ್ಪನೇ ಆಂಡ್.ಕೆಲವೊಂಜಿ ಕುಟುಮೊಡು ವರ್ಣಾರ ಪಂಜುರ್ಲಿ ಬತ್ತಿ ಬಿನ್ನೆಯಾಂಡ,ಕುಪ್ಪೆ ಪಂಜುರ್ಲಿ ಪ್ರದಾನ ಆದಿತ್ತ್ಂಡ ಅವುಲು ಕುಪ್ಪೆನ ಎಡತ ಮರ್ಗಿಲ್ ಡ್ ವರ್ಣಾರನ್ ಬೇತೆನೆ ಪಲಯಿಡ್ ದೀದ್ ನಂಬುವೆರ್. 

  ಕುಟುಮದ ಮುಡಿಪುನು ಕಲ್ಲುರ್ಟಿ ಪಂಜುರ್ಲಿನ ಅದೆಟೇ  ದೀವೊಂತೆರ್.ಇತ್ತೆ ಅವ್ವೇ ಅದೆಟ್ ಗೋಡೆ ಕೊರೆದ್ ಪಲಯಿಡ್ ಮುಡಿಪು ದೀಯೊಂದಿಪ್ಪುನವು ಆಯೊಗು ಮಲ್ಪುನ ಒಡಕ್.ಇಲ್ಲಗೊಂಜಿ ತಾರಾಯಿ ಕಟ್ಟ್ ನಗ,ಈಡ್ ಕಟ್ಟ್ ನಗ,ಓಮದ ಪುರ್ಸಾದ ಕಟ್ಟ್ ನಗ ಗೋಡೆಗ್ ನೆಲಕ್ ತಾಗಂದಿಲೆಕ ಕುಬಲ್ ಗ,ಅಟ್ಟದ ಅಡ್ಡೊಗ ಕಟ್ಟೊಂತೆರ್.ಅಂಚನೆ ಮುಡಿಪುನ್ಲ ನೆಲ ಬೊಕ್ಕ ಗೋಡೆಗ್ ತಾಗಂದಿಲೆಕ ದೀಯೊಡು.ಮುಡಿಪು ದೈವದ ಕೋಣೆಡ್ ದೀನವ್ಲು ಅಗೆಲ್ ಪಾಡ್ಂಡ ಅಸುದ್ದಾಪುಂಡುಂದು ದೈವದ ಮಣೆ ಮಂಚದೆದುರು ಅಗೆಲ್ ಪಾಡಂದೆ ಕೋಣೆದ ಪಿದಯಿ ಚಾವಡಿಡ್ ಬಲಸೊಂದುಲ್ಲೆರ್ ಉಂದು ತಪ್ಪು.ನಮ ಕಲ್ಲುನವ್ಲು ಒನಸ್ ಬಲಸಂದೆ ಓಲಾ ಪಿದಯಿ ನಂಕ್ ತೋಜುಲೆಕ ಬಲಸ್ಂಡ ನಮಕ್ ಉನೆರಾಪುಂಡೇ.ಅಂಚನೇ ಅತ್ತೆ ನಮ ನಂಬಿ ದೈವೊಲು.ದೈವೊಗು ಬಲಸುನ ಜಾಗೆ ಸುದ್ದಾಚಾರೊಡುಪ್ಪೊಡುಂದು ಅಟ್ಟ ಇಜ್ಜಂದಿ ಜಾಗೆಡ್ ಕುಬಲ್ ರ್ದ್ ಕಜವು ಬೂರಂದಿಲೆಕ ಅಟ್ಟದ ಬಾಗೊಗು ಬೊಲ್ದು ಕುಂಟು ಕಟ್ಟೊಂತೆರ್.ನಿಚ್ಚ ಗೋಡೆಗ್ ಕುತ್ತು ದೀಪ(ಕೋಲ್ತಿರಿ) ದೀಪುನೆನ್ ತಪ್ಪು ಪಂಡಿ ಪ್ರಶ್ನೆ ಚಿಂತನೆದಕುಲು ನಿತ್ಯ ತುಡರ್ ದೀಯೆರೆ ಪಂಡ್ ದ್ ಪೊತ್ತೊಂತಿ ನಿನೆನ್ ಎಲಿ ಮಾಡ್ ಗ್ ಕೊನೊದು ಇಲ್ಲ್,ಸಾನ ಪೊತ್ತ್ ನಲ ಉಂಡು.ನಿಚ್ಚ ಪೂನೀರ್ ದೀಯೊಡಾಯಿನ ದೈವೊಲೆಗ್ ಸಂಕ್ರಾಂತಿಗೊರ ಬಾಕಿಲ್ ದೆಪ್ಪುನ ಪರಿಸ್ತಿತಿಗ್ ತುಳುವೆರೆನ್ ಅಕುಲು ಕನತ್ ಪಾಡ್ಯೆರ್.

-ಪೂರಕ ಮಾಯಿತಿ-ಶಂಕರ ಕುಂಜತ್ತೂರು.ದೈವಾರಾದನೆ ಕ್ಷೇತ್ರ ಕಾರ್ಯದ ಅನುಭವಿಲು.

           ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು. ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ನಮ್ಮ ಎಡತ ಮರ್ಗಿಲ್ಡೇ ಉಪ್ಪೊಡು,ಕಲ್ಲುರ್ಟಿ ಬಲಬಾಗೊಡೆ ಉಪ್ಪೊಡು .ನಮ ದೈವೊಗು ಎಡತ್ ದ್ ಉಂತುದೇ ಮದಿಪುನ ಕೆರಮ.ದಾಯೆ ಪಂಡ ದೈವದ ನುಡಿಟ್ ಅಪ್ಪೆಯಾಂಡ ಬಲತ ಸಿರಿ ಮಿರೆ ಕೊರ್ದು,ತಮ್ಮಲೆಯಾಂಡ ಬಲತ ತುಡೆ ಮಿತ್ತ್ ಕುಲ್ಲಾದ್ ಪಾಲಿಪುವೆ ಪನ್ಪಿ ನುಡಿ ಉಂಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.

" ಗಟ್ಟದ ಪುಡೆಡ್ದ್ ಕಡಲ ಬರಿಮುಟ್ಟ ತುಳುನಾಡೊರ್ಮೆಲಾ ಪಟ್ಟ ಆಳುನ ಮಲ್ಲಾಯರ್ದ್ ಪತ್ತ್ ದ್ ಮುಟ್ಟಾಲೆ ದೀದ್ ಬೆನ್ಪುನ ಬಲ್ಲಿ ಬಡವರೆ ಮುಟ್ಟ ಕುಟುಮೊಗು ಗೂಂಟ,ಪೊಣ್ಣಗ್ ತಮೆರಿ,ಆಣಗ್ ತಮ್ಮಲೆ ಪನ್ಪಾವೊಂದು, ಪಕ್ಕಿ ಕುಲ್ಲಂದಿ ಮರ ಇಜ್ಜಿ,ತುಲುನಾಡ ಪಂಜುರ್ಲಿ ಇಜ್ಜಂದಿ ಕುಟುಮ ಇಜ್ಜಿ ಪನ್ಪಾವೊಂದು ಮೆರೆಪುನ ಮಾಮಲ್ಲ ಸತ್ಯ ಪಂಡ್ಂದಾಂಡ  ಅವ್ವೆ ಮಾಯಗಾರೆ ಪಂಜುರ್ಲಿ" ಉಂದು ಪಂಜುರ್ಲಿಗ್ ಮದಿಪುನ ಮದಿಪು.

ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ  ಅಪರಾಧ. ಅಂಚನೆ ದೈವೊಲೆನ್  ನಮಕ್  ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.ಅಂಚನೆ ಲೇಸ್ ಸುದಾರಿಕೆದ ಪಾತೆರ್ನಗ(ನಿರೂಪಣೆ),ಚಾವಡಿದ ಮಿತ್ತ್ ಪಾತೆರ್ನಗ ದೈವ ಕೊಡಿಯಡಿಟ್ ಪನ್ಪುನ ನುಡಿಕಟ್ಟ್ ನ್ ಪನ್ಪುನವು ತಪ್ಪು.ದೈವದ ಅಣಿನ್ ವೇದಿಕೆಡ್ ಪಾಡುನವು ತಪ್ಪು.ಕೊಡಿಯಡಿತ ದೈವದ ನುಡಿನ್ ಕೊಡಿಯಡಿಟೇ ಕೇನೊಡು.ದೈವದ ನುಡಿನ್ ಅಂತರ್ಜಾಲೊಡು ದೈವದ ಚಿತ್ರ ಪಾಡ್ದ್ ಬರೆಪುನಲ ಸರಿ ಅತ್ತ್.

   ಇನಿತ ದಿನಮಾನೊಲೆಡ್ ತುಳುನಾಡ ಬೆಮ್ಮೆರೆನ್ ಆದ್ಯಾತ್ಮ ಪರಬ್ರಹ್ಮ ಮಲ್ಪೆರೆ ಪೋದು ನಮ್ಮ ಜವನೆರೇ ಅಕ್ಲೆ ಸಂಸ್ಕೃತಿಗ್ ಕುಡರಿ ಪಾಡೊಂದುಲ್ಲೆರ್.ನನ ದೈವ,ನಾಗನ ಕೊಡಿಯಡಿಕ್ ಆದ್ಯಾತ್ಮ ಪೊಗ್ಗ್ಂಡ ದೈವೊಲ್ನ ಅಣಿ ಕಡ್ಸಲೆ,ಮುಗ ಮೂರ್ತಿ ಒವ್ಲಾ ಬೋಡಾವಂದ್.ಆತ್ಮ ಸಂಸ್ಕಾರ ಮಲ್ತ್ ದ್ ಅತ್ಮದುಲಯಿ ದೈವೊಲೆನ್ ನಂಬುನ ಕಾಲ ಬರು.ಬಳೆಯಾಪುನ,ಗಡಿಯಾಪುನ,ಮಾನೆಚ್ಚಿ,ನೇಮ,ಕೋಲ,ತಂಬಿಲ ಒವ್ಲ ಉಪ್ಪಂದ್.ಆದ್ಯಾತ್ಮದ ಆತ್ಮ ಪರಮಾತ್ಮನ ಸಮ್ಮಂದ ಗಟ್ಟಿಯಾದ್ ದೈವಾರಾದನೆ ತೆರಿಯಂದಿಲೆಕ ಮಯಕಾಪುನ ದಿನ ದೂರ ಇಜ್ಜಿ.ಅಂಚಾದ್ ಮೂಲ ದೈವಾರಾದನೆನ್ ಒರಿಪುನ ಜವಾಬ್ದಾರಿ ಪ್ರತಿಯೊರಿ ತುಳುವಗ್ಲಾ ಉಂಡು.

  

ಇನಿತ ದಿನಮಾನೊಡು ತುಳುವೆರೆ ಆರಾದನೆದ ತುಳುನಾಡ ದೈವೊಲು ಸಿನೆಮಾ ನಾಟಕ,ಆಟದ ತೂಪರಿಕೆದ ವೇಷೊಲಾಯಿನವು ತುಳುವೆರೆ ದೈವಾರಾದನೆದ ದುರಂತಂದೇ ಪನೊಲಿ.ಅಕ್ಲೆಡ ಕೇಂಡ ಎಂಕುಲು ದೈವದ ಕಲೆ ಕಾರ್ನಿಕೊನು ಲೋಕೊಗು ತೆರಿಪಾವೊಂದುಲ್ಲಂದ್ ಪನ್ಪೆರ್.ದೈವದ ಕಲೆ ಕಾರ್ನಿಕೊನು ತೋಜಾಯೆರೆ ನಮ ಏರ್?.ದುಂಬು ತುಳುನಾಡ ವ್ಯಾಪ್ತಿಡ್ ನಡತೊಂತಿ ದೈವಾರಾದನೆನ್ ಮೊಕ್ಲೆನ ಕಾಸ್ ದ ಅಂಬೆರ್ಪುಡು ಸಾರ್ವತ್ರಿಕ ಮಲ್ತೊಂದು ಪೋಯೆರ್.ಕಟ್ಟುನಕುಲು ಮೂಲ ತುಳುನಾಡ ಚಾಕಿರಿನ್ ಬುಡ್ದು ಕಾಸ್ ದ ಆಸೆಡ್ ಈ ಮಾದ್ಯಮದಕ್ಲೆಗ್ ತಾನ್ ನಂಬೊಂತಿ ದೈವದ ಭಂಡಾರ ಕೊರ್ಪುನವು ದೈವೊನು ಮಾರ್ದ್ ಬುಡ್ಲೆಕಾಂಡ್.ದೈವದ ಇಚಾರ ತೆರಿಯಂದಿ ಗಟ್ಟದ ಮಿತ್ತ್ ದೈವೊಲೆಗ್ ಕಟ್ಟೆರೆ ಪೋದು ಅಲ್ತಕ್ಲೆಗ್ ತುಳುವ ನಾಡ್ ದ ಕೊಡಿಯಡಿತ ದೈವೊಲು ಆಟ ನಾಟಕದ ವೇಷೊಲಾದ್ ಪೋಯ.ತುಳುನಾಡ ಕೊಡಿಯಡಿತ ಆರಾದನೆದ ದೈವೊಲು ಯಕ್ಷಗಾನೊಡು ವೇಷೊಲಾದ್ ಪೋಯ.ಆರಾದನೆದ ನಂಬೊಳಿಗೆದ ಕಲೆ ಕಾರ್ನಿಕದ ಕೊಡಿಯಡಿತ ದೈವೊಲೆನ್ ಕಲಾಪ್ರಕಾರದ ಬೊಂಬೆಲಾದ್ ಮಲ್ತೆರ್.ಪದಿನಾಜಿ ವರ್ಗೊನು ಒತ್ತಟ್ಟ್ ಡ್ ಉಂತಾದ್ ಪದಿನಾಜಿ ಕಟ್ಲೆಡ್ ಪದಿನಾಜಿ ಕಲೆ ದಿಂಜಿದ್ ಕೊಡಿಯಡಿಟ್ ಉಂತೊಡಾಯಿನ ದೈವೊಲಿನಿ ಅಟ,ನಾಟಕ,ಸಿನೆಮಾದ ಪಾತ್ರೊಲಾದ್ ಪೋಯ.ನಮ್ಮ ದೈವಾರಾದನೆದ ಮೂಲ ಕಟ್ಲೆ ತತ್ತೊಂದು ಪೋನಗ ಅಡೆಗ್ ಪೊಸತಾದ್ ಬತ್ತ್ ನ ಒಂಜಿ ವರ್ಗ ತುಳುವೆರೆ ದೈವೊಲೆಗಿಜ್ಜಂದಿ ಅಷ್ಟಮಂಗಲ ಪ್ರಶ್ನೆ ದೀದ್,ತುಳುನಾಡ ದೈವೊಲೆಗಿಜ್ಜಾಂದಿ ಬ್ರಹ್ಮ ಕಲಶ ಮಲ್ಪಾದ್ ದೈವದ ಪುದರ್ ನ್ ಪೂರ ಬದಲ್ತ್ ದ್ ತುಳುನಾಡ ದೈವೊಲೆನ್ ದೇವೆರ್ ಮಲ್ತೊಂದು ಪೋಯೆರ್.ದೈವದ ಕೊಡಿಯಡಿತ ಮೂಲ ಚಾಕಿರಿದಕ್ಲೆನ್ ಸುದ್ದಾಚಾರ,ಮಡಿಮೈಲೆಂದ್ ದೂರ ಉಂತಯೆರ್.ನೆತ್ತೆರಾವಾರದ ದೈವೊಲೆಗ್ ಪೊರಿಪೊದ್ದೊಲುದ ತಂಬಿಲ ಕಟ್ಟಾಯೆರ್.ಇತ್ತಿತ್ತೆ ದೈವೊಲೆಗ್ ನೇಮ ದಾಯೆ,ತಂಬಿಲೊಡು ಸುದಾರ್ಪುಗಂದ್ ಪನ್ಪುನಡೆಮುಟ್ಟ ಅಕುಲು ಎತ್ತ್ ದ್ ಬುಡ್ಯೆರ್.ತುಳುನಾಡ ಬೆಮ್ಮೆರೆನ ಪುದರ್ ನ್ ಮುದೆಲ್ ದಾಂತಿನಾತ್ ಅಡಿಕ್ ತರ್ತೆರ್,ವೈದಿಕ ಚತುರ್ಮುಖ ಬ್ರಹ್ಮನ್ ಅಡೆ ಕನತೆರ್.ಅವ್ಲ ಯಾರುಜಿಂದ್ ನಾಗನೊಟ್ಟುಗು ಬೆಮ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗಬ್ರಹ್ಮ ಮಲ್ತೆರ್.ಅವೈದಿಕ ದ್ರಾವಿಡ ತುಳುವ ಕಟ್ಟ್ ದ ಮೂಲ ದೈವಾರಾದನೆ ಸಂಪೂರ್ಣ ಅಡಿ ತತ್ತ್ ದ್ ವೈದಿಕದ ಅನುಕರಣೆಗೆತ್ತ್ ದ್ಂಡ್‌.ಅವೆನ್ ಸರಿ ಮಲ್ಪೆರೆ ಆವಂದಿನಾತ್ ದೂರ ಪೋತ್ಂಡ್.ಕರಿನೆಕ್ ಕಟ್ಟೆ ಕಟ್ಟಂದೆ ಒರಿನೆಕಾಂಡಲ ಕಟ್ಟೆ ಕಟ್ಟುನ ಅನಿವಾರ್ಯತೆ ತುಳುವೆರಾಯಿನ ನಮಕುಂಡು.ಏರ್ ದೈವಾರಾದನೆಡ್ ತಪ್ಪು ಮಲ್ತೆರ್ಡಲ ಅಕ್ಲೆನ್ ಪ್ರಶ್ಬೆ ಮಲ್ಪುನ ಅನಿವಾರ್ಯ ಪರಿಸ್ಥಿತಿ ಬೈದ್ಂಡ್.ಓಡೆಮುಟ್ಟ ಇನಿ ದೈವಾರಾದನೆ ಎತ್ತ್ ದ್ಂಡ್ ಪಂಡ ಬ್ರಹ್ಮ ಸಭೆ,ತಂತಿರ್ದಾರ್,ವೈದಿಕೆರಿಜ್ಜಂದೆ ಕೊಡಿಯಡಿತ ದೈವೊಲೆ ಇಜ್ಜಿ ಪನ್ಪುನಡೆಗ್ ದೈವಾರಾದನೆ ಎತ್ತ್ ದ್ಂಡತ್ತಂದೆ ತುಳುವ ಆಚರಣೆಲಾಯಿನ ಮದಿಮೆ,ಸಾವು ಪೂರ ವೈದಿಕದಡಿಟ್ ನಡತೊಂದುಂಡು ಪಂಡ ಇಡೀ ದೈವಾರಾದನೆದ ವ್ಯವಸ್ಥೆನ್,ತುಳುವ ಆಚರಣೆಲೆನ್,ವೈದಿಕತೆ ಇನಿ ಆಳ್ಯೊಂದುಂಡು.

ಒಂಜಿ ಕುಂದ ನಲ್ಪ ದೈವೊಲು

                       ‌‌ಒಂಜಿ ಕುಂದ ನಲ್ಪ ದೈವೊಲು

     

 ಒಂಜಿ ಕುಂದ/ಕಬೆ ಪಂಡ ಒಂಜೆ ಮಾಡಡಿಟ್ ಒಂಜಾತ್ ದೈವೊಲೆನ್ ಪೂರ್ವ ಹಿರಿಯಾಕ್ಲ್ ನಂಬೊಂದಿತ್ತೆರ್.ಪ್ರತಿಯೊಂಜೆಕ್ಲ ಪೂ ನೀರ್ ದೀಯೆರೆ,ಪನಿವಾರ ಪಾಡೆರೆ ಜಾಗೆದ ಕುಂದೆಲ್ ಇತ್ತ್ ನೆರ್ದಾತ್ರ ಒಂಜಿ ಕುಬಲಡಿಟ್ ಒಂಜಾತ್ ದೈವೊಲೆನ್ ಪುದರ್ ಪಂಡ್ ದ್ ಲೆಪ್ಪಂದೆ ಸಮದಾರಿಕೆಡ್ ನಂಬುದು ಒಂಜಿ ಕುಂದ ನಲ್ಪ ದೈವೊಲು ಪನ್ಪಿ ಪಾತೆರೊನು ಹಿರಿಯಾಕುಲು ಪನೊಂತೆರ್.ಅಂಚನೆ ಒಂಜಿ ಸಾನ ಮಾಡದ ಕಟ್ಟೊನದ ಬೇಲೆ ಆನಗ ಒಂಜೇ ಮರ ಕೊಯ್ದ್ ಅವೆಟೇ ಮಾಡ ಕಟ್ಟೊಂತೆರ್.ಅಂಚಾದ್ ಲ ಈ ಪಾತೆರ ಬತ್ತಿಪ್ಪು.ನನೊಂಜಿ ರೀತಿಡ್ ತೂಪುಂಡ ಕೆಲವೊಂಜಿ ತಿಕ್ ಡ್ ಅರಸು ದೈವೊಲೆ ಮಾಡ ಒಂಜಿ ಕುಂದೊದ ಕೊಡಿಟ್ ರಚನೆಯಾದಿತ್ತ್ ದ್ ಆ ಮಾಡೊಗು ಲೆಂಚಿಡ್ ಪೋದು ನಿನೆ ಪೊತ್ತವೊಂತೆರ್.ಜಾಗೆದ ತತ್ವಾರೊದಾತ್ರ ಕೆಲವೊಂಜಿ ಪರಿವಾರ ಸಕ್ತಿಲೆನ್ ಮೂಲೆ ಸುತ್ತ ಮುತಲಿಗೆಡ್ ನಂಬುದಿಪ್ಪೆರ್.ಅಂಚಾದ್ ಲ ಈ ಪಾತೆರ ಬತ್ತಿಪ್ಪು

ಜಾನಪದ ಸಾಹಿತ್ಯೊದ ಮಾಣಿಕೊದ ಪರೆಲ್ ಬನ್ನಂಜೆ ಬಾಬು ಅಮಿನೆರ್

 ಜಾನಪದ ಸಾಹಿತ್ಯೊದ ಮಾಣಿಕೊದ ಪರೆಲ್ 

            ಬನ್ನಂಜೆ ಬಾಬು ಅಮಿನೆರ್

  

ತುಳುನಾಡ ಜಾನಪದ ವಿದ್ವಾಂಸೆರಾಯಿನ  ನಡತೊಂದು ಪೋಪಿನ ಪೊಲಿಲಪೊಲ್ಸು ಬನ್ನಂಜೆ ಬಾಬು ಅಮಿನೆರ್ನೊಟ್ಟುಗು

            ಸಿರಿ ಕುರಲ್ ಡ್ ನಮ್ಮ ಕಿನ್ಯ ಬರವು

ಅಚ್ಚಿಡ್ ಕೆಲವೊಂಜಿ ಅಕ್ಷರೊಲು ತಪ್ಪಾಯಿನನ್ ಸರಿ ಮಲ್ತ್ ದ್ ಓದ್ ಲೆ 

ನೇಮದ ಲೆಪ್ಪೋಲೆ ತುಳು ಬಾಸೆಡ್

                ನೇಮದ ಲೆಪ್ಪೋಲೆ ತುಳು ಬಾಸೆಡ್

    

ತುಳುನಾಡ ತುಳು ಧರ್ಮದ ಪದಿನಾಜಿ ಕಟ್ಟ್ ಕಟ್ಲೆದ ನಿಲೆಟ್ ನೇಮ ನಡಾರಿ/ನೇಮ ನೆರಿ ನಡಪುನ,ತುಳುಟೇ  ಪಾತೆರುನ  ದೈವದ ನೇಮ ನೆರಿತ ಲೆಪ್ಪೋಲೆನ್ ತುಳು ಬಾಸೆಡೇ ಬರೆಂಡ ಪೊರ್ಲು. 

ಪರಸಾನ ಪೊಲಿತ್ ದ್ ಪೊಸ ಸಾನ ಕಟ್ಟುನ ಕೆರಮ

     ಪರಸಾನ ಪೊಲಿತ್ ದ್ ಪೊಸ ಸಾನ ಕಟ್ಟುನ ಕೆರಮ

    

                         ಬೆಮ್ಮೆರೆ ಗುಂಡ ಕೆಮ್ಮಲೆ

 

 

ವೀಡಿಯೋ ಕೊಂಡಿ-

https://youtu.be/Pi7JoPnm5Fc?si=_7I-MgdmJKXFVjID

‌ 

ಪುದರ್ ಪೋಯಿನ ತುಳುನಾಡ ಕಂಬುಲೊಲು

     ಪುದರ್ ಪೋಯಿನ ತುಳುನಾಡ ಕಂಬುಲೊಲು

    

ಮೂಲ್ಕಿ ಅರಸು ಕಂಬುಲ

ವಂಡಾರು ಅರಸು ಕಂಬುಲ

ಎರ್ಮಾಲು ಬೂಡು ಕಂಬುಲ

ಕದ್ರಿ ದೇವೆರೆ ಕಂಬುಲ

ಬಜಗೋಳಿ ಕಂಬುಲ

ಬೆದ್ರದ/ಮೂಡಬಿದ್ರೆದ ಕಂಬುಲ

ಬಲ್ಲಮಂಜ ಕಂಬುಲ

ತೊರತ್ತಲ್/ ಸುರತ್ಕಲ್ ಕಂಬುಲ

ಕಾರ್ನಾಡ್ ಕಂಬುಲ

ಏಣೂರ್/ವೇಣೂರ್ ಕಂಬುಲ

ತಲಪಾಡಿ ಕಂಬುಲ

ಮಂಜೇಸರ ಕಂಬುಲ

ಒಕ್ಕಾಡಿಗೋಳಿ/ಹೊಕ್ಕಾಡಿಗೋಳಿ ಕಂಬುಲ

ಕಳತ್ತ ಮಜಲು ಕಂಬುಲ

ಅರುವದ/ಅಳದಂಗಡಿ ಕಂಬುಲ

ಮರವೂರು ಕಂಬುಲ

ಉಬಾರ್/ಉಪ್ಪಿನಂಗಡಿ ಕಂಬುಲ

ಬೋಳಂತೂರು ಕಂಬುಲ

ಮಿಂಜಾರು ಕಂಬುಲ

ಪಡ್ಡೆದ್ರೆ/ಪಡುಬಿದ್ರೆ ಕಂಬುಲ

ಕಟಪಾಡಿ ಕಂಬುಲ

ಐಕಲಬಾವ ಕಂಬುಲ

ಶೀಮಂತೂರು ಕಂಬುಲ

ಪುತ್ತೂರು ಕಂಬುಲ

ಪಾಣೇರ್ ಕಂಬುಲ

ಅರಿಬೈಲ್ ಕಂಬುಲ

ಕಾಂತಮಂಗಲ ಕಂಬುಲ

ಕುಂದಾಪುರ-

ಬಾರ್ಕೂರು

ಮಂದಾರ್ತಿ

ವಂಡಾರು

ಆದಿಮನೆ ಕೊರ್ಗಿ ಕಂಬುಲ

ಬೈಂದೂರುಡ್ಲ ಕಂಬುಲ ನಡಪುಂಡು

ಮಾಯಿತಿ-

ಮುಗೇರರ ದುಡಿ ಕುಣಿತಗಳು ಸ್ವರೂಪ ಮತ್ತು ಸಂಸ್ಕೃತಿ

-ಡಾ.ಕೋಯಿರಾ ಯನ್ ಬಾಳೆಪುಣಿ

ಪುರ್ಸೆ ಕಟ್ಟುನಿ-ಪುರ್ಸೆ ಏಸ

    ಪುರ್ಸೆ ಕಟ್ಟುನಿ-ಪುರ್ಸೆ ಏಸ,ಬಜಿಲ್ ಪೂಜೆ,ಪುರ್ಸ ಕಟ್ಟ್

              ಪುರ್ಸ ಪೂಜೆ,ಬಜಿಲ್ ಪೂಜೆ,ಸುಗ್ಗಿ ಉಚ್ಚಯ

                 ‌‌       -ಸುಗ್ಗಿದ ಪುಣ್ಣಮೆದಾನಿ-

           ‌             ಒರಿ ಸನ್ಯಾಸಿ-ಐವೆರ್ ಪುರ್ಸೆರ್

                   ಕದ್ರಾದ ದೇವೆರ್-ಬೆದ್ರಾದ ಪುರ್ಸೆರ್

ಪುರ್ಸೆ ಕಟ್ಟುನಪಗ ಬಂಡಾರ ಕೇರ್ಪುನಿ

ಒಂಜಿ ಮೂಲದ ಪ್ರಕಾರ ಗೌಡ ಜನಾಂಗದಕುಲು ನಾಥ ಪಂಥೊನು ಪ್ರಚಾರ ಮಲ್ಪೆರೆ ಬೋಡಾದ್ ಸುಳ್ಯದಂಚಿ ಸಿದ್ಧವೇಷ ಮಲ್ತೆರ್ಡ ಬೋಲ್ತೇರ್ದಂಚಿ ಪುರ್ಸೆ ಕಟ್ಟ್ ದ್ ಅರಾಧನೆ ಮಲ್ಪುವೆರ್.ಮೂಲು ಮಂಜುನಾಥ ದೇವೆರೆಗೆ ಮಾನಾದಿಗೆ.ಉತ್ತರ ಭಾರತೊಡ್ದು ತುಳುನಾಡ್ ಗ್ ಬತ್ತಿ ಜೋಗಿ ಸನ್ಯಾಸಿಲು ತುಳುವೆರೆ ಮನಸ್ಸ್ ಗ್ ಬಾರೀ ಮುಟ್ಟ ಆದಿತ್ತೆರ್.ಅಕ್ಲೆ ಬಾಸೆ ತುಳುವೆರೆಗ್ ತೆರಿದಿಜ್ಜಾಂಡ್.ಅಂಚ ಅಕ್ಲೆ ಬಾಸೆ ಪಾತೆರುವ ಪನ್ಪಿ ಕಲ್ಪನೆಡ್ ಪಾತೆರ್ನಗ ಒಂತೆ ಬೊಡ್ಚಾಂದಿ ಬಾಸೆದಲೆಕ ತೋಜಿಂಡಲ ಹೆಚ್ಚಿನ ತುಳುವ ಜಾತಿ ಜನಾಂಗದ ಜನೊಕುಲು‌ ಸೇರ್ದ್ ಪುರ್ಸ ಏಸ ಪಾಡ್ದ್ ನಲಿಪುವೆರ್. ವೈದಿಕ ಪ್ರಭಾವೊರ್ದು ಅಳಿಯಂತ್ರ ಸಾದಿಗ್ ಪೋಯಿನ ದೈವಾರಾದನೆನ್ ಕುಡೊರ ತುಳುನಾಡ್ ಡ್ ಲಕ್ಕ್ ದುಂತಯಿನಕುಲು ಜೋಗಿ ಸನ್ಯಾಸಿಲು,ಅಕ್ಲೆ ಜಾತಿ ಜನಾಂಗದಕ್ಲೆ ವಾದ್ಯ ಚಾಕಿರಿ ಇನಿಲ ದೈವದ ಕಲೊಟುಂಡು.ದೈವಲ ನೇಮ ಕೋಲೊಡು ಜೋಗಿ ಮಠೊಕುಂದು ಉರಿಪುನಕ್ಲೆಗ್ ತಾರಾಯಿ ಕೊರ್ಪುನ ಕೆರಮ ಇನಿಕ್ಲ ಒರಿದ್ ಬೈದ್ಂಡ್.

ತರೆಟ್ ತುಂಬುನ ದರ್ಶನ ಬಲಿತ ಅಲಂಕಾರ

ಪುರ್ಸನಲಿಕೆ ಒಂಜಿ ದಾರ್ಮಿಕ ನಲಿಕೆಯಾದಿತ್ತ್ ದ್ ಬೆನ್ನಿ ಸಾಗೊಳಿ ಮುಗಿಯುನ ಪೊರ್ತುದ ಬೇನೆ ಬೆಸರ್,ಬಚ್ಚೆಲ್ ಮಾಜಯೆರೆ ಈ ನಲಿಕೆನ್ ಮನೋರಂಜನೆದ ಒರುಟು ಜನಮಂದೆಗ್ ಕೊಸಿ ಆಪುಲೆಕ ನಡಪಾವೆರ್.ಜೋಗಿ ಪುರ್ಸೆರೆ ತುಳುನಾಡ್ ದವೇ ಆಯಿನ‌ ಆಚರಣೆ ಪುರ್ಸ ನಲಿಕೆ.

                     ಪುರ್ಸೆ ಕಟ್ಟುನೆತ ಬಜಿಲ್ ಪೂಜೆ

          ಪುರ್ಸೆರ್ ಕಟ್ಟುನೆಟ್ ತುಳುವ ಸಂಸ್ಕೃತಿದ ಅನಾವರಣ ತೋಜುಂಡು. ಪುರ್ಸೆರ್ ಕಟ್ಟುನಿ ಜಾತ್ಯಾತೀತ ಕಲ್ಪನೆನ್ ತೆರಿಪಾವುನ ಮಲ್ಲ ಆಚರಣೆ  ಪಂಡಲ ತಪ್ಪಾವಂದ್.ಪುರ್ಸೆರ್ ಸುಗ್ಗಿದ ಪೂವೆ ಪುಣ್ಣಮೆಗ್ ಊರ್ದ ಉಲಯಿಡ್ ಇಲ್ಲ್ ಇಲ್ಲಗ್ ಪೋದು ಇಲ್ಲ ಜಾಲೆದುರ್ದ ತೊಲಚಿ ಕಟ್ಟೆದೆದುರು ಪುರ್ಸ ನಲಿಕೆ ಮಲ್ತ್ ದ್ ಊರುಗು ಬತ್ತಿ ಮಾರಿ ಕಳೆಪೆರ್.

               ‌‌              ಬಜಿಲ್ದ ರಾಸಿ

ಜೋಗಿ ಸನ್ಯಾಸಿಲು ಪುಟ್ಟುರ್ದು ಬರ್ಪುನ ಜಾತಿಗ್ ಏಪಲಾ ಮಣೆ ದೀನಕುಲತ್ತ್.ಅಂಚಾದ್ ಪುರ್ಸೆ ಕಟ್ಟುನೆಟ್ ಸರ್ವ ಜಾತಿ ಮತ ಬಾಂದವೆರೆನ್ಲ ಏಸ ಪಾಡ್ ದ್ ತೂಪಾವುನತ್ತಂದೆ ಅಳಿಯಂತ್ರ ಆಯಿನ ಆಚರಣೆಲೆನ್ ಕುಡೊರ ತುಳುನಾಡ್ ಗ್ ಕನಪುನ ಸಾಂಸ್ಕೃತಿಕ ರಾಯಬಾರಿಲಾದ್ ತೋಜುವೆರ್.

   

ಪುರ್ಸ ಪೂಜೆಡ್ ಮಂಜುನಾಥ ದೇವೆರೆ ಭಂಡಾರದೆದುರು ಬಜಿಲ್ದ ರಾಸಿ

ಆಂಡ ಬೆರಣೆರ್,ಜೈನೆರ್,ಮೂಲ ಜನಾಂಗದಕುಲು ಮೂಲು ಪುರ್ಸ ಏಸ ಪಾಡುಜೆರ್.ಒರಿನಂಚ ಹೆಚ್ಚಿನ ಜಾತಿ ಜನಾಂಗದಕುಲು ಏಸ ಪಾಡುವೆರ್.

.    ಸುಗ್ಗಿದ ಪುಣ್ಣಮೆದಾನಿ ಬಜಿಲ್ ದ ರಾಸಿ ಮಲ್ತ್ ದ್ ಕೆಲವು ತಿಕ್ ಡ್ ಬಜಿಲ್ದ ರಾಸಿದ ಕೊಡಿಕ್ ಪಿಂಗಾರ ಪುರ್ಪ ಕುತ್ತಿಯೆರ್ಡ ಕೆಲವು ತಿಕ್ ಡ್ ನೆಕ್ಕಿ ತಪ್ಪುದ ಸೂಡಿ ಕುತ್ತುವೆರ್,ಹೆಚ್ಚಾದ್ ಮಲ್ಲಿಗೆ ಪೂಟು ಅಲಂಕಾರ ಮಲ್ತ್ ದ್ ಬಜಿಲ್ ಪೂಜೆ ಮಲ್ತ್ ದ್ ಪುರ್ಸ ವೇಷ ಪಾಡ್ನಕುಲು ಬಜಿಲ್ದ ರಾಸಿಗ್ ದಿಮ್ಮಿಸಾಲೇ..... ಪನೊಂದು ಮೂಜಿ ಸುತ್ತು ಬರ್ಪೆರ್.

   ಪುರ್ಸ ನಲಿಕೆದ  ಸುರುತ ದಿನ ಕಂಡೊಡು ಇಜ್ಜಿಂಡ ಒಂಜಿ ಆ ಊರ್ದ ಪುದರ್ದ ಗೌಡ್ರೆನ ಇಲ್ಲಲ್ ಸಮ್ಮಂದಪಟ್ನ ದೈವ ದೇವೆರೆಗ್ ಕೈ ಮುಗಿದ್ ಏಸ ಪಾಡುವೆರ್.

   

                                     ಬಜಿಲ್ದ ರಾಸಿ

  ದೇವೆರೆನ್ ತುಂಬುನಾರ್,ನೇಮ ಕಟ್ಟ್ ನ ಏಸ,ಬೋಂಟೆ ದೇರುನಾರ್,ಸಿಮ್ಮ,ಬ್ಯಾರಿ,ಕಂಡನಿ-ಬುಡೆದಿ ಇಂಚ ಬೇತೆ ಬೇತೆ ಏಸೊಲಿತ್ತ್ ದ್ ಅವ್ಲು ಕುಸಾಲ್ ಕುಸೆಲ್ ಉಪ್ಪುಂಡು.ಒಂಜಿ ವೇಷೊನು ಒರಿ ಪಾಡ್ಂಡ ತರೇರ್ತರೆ ಅವ್ವೇ ಏಸೊನು ಆಯೆ ಪಾಡೊಡು.

              ‌            ಬಜಿಲ್ದ ರಾಸಿಗ್ ಪೂತ ಅಲಂಕಾರ

         ಒಂಜಿ ಆ ಊರ್ದ ಪುದರ್ದ ಗೌಡೆರಿಲ್ಲಲ್ ಏಸ ಪಾಡ್ದ್ ವಾದ್ಯದಕ್ಲೆನೊಟ್ಟುಗು ದಿಮ್ಮಿಸಾಲೇ......ದಿಮ್ಮಿಸಾಲೇ.....ಪನೊಂದು ಇಲ್ಲಿಲ್ಲಗ್ ಪೋದು ನಲಿಪುವೆರ್.ಪಾತೆರಕತೆಟ್ಲ,ನಲಿಕೆಡ್ಲ ಕುಸಾಲ್ ದಿಂಜಿದುಪ್ಪುಂಡು.

               ಬೆಲ್ಲದ ಪಾಕೊಡು ಬಿರಾಯಿನ ಬಜಿಲ್ದ ರಾಸಿ

   ಮೊಕ್ಲೆ ಕುಸಾಲ್ ಕುಸೆಲ್ ತೂದು ಇಲ್ಲದಕ್ಲೆಗ್ ಕೊಸಿಯಾಪುಂಡು.ದುಂಬು ಪೂರ ನಲಿತಿ ಬೊಕ್ಕ ಇಲ್ಲದಕುಲು ಅರಿ ತಾರಾಯಿ ಕೊರೊಂತೆರ್ಡ ಇತ್ತೆ ಪಣವು ಕೊರ್ಪೆರ್.

      ಬಜಿಲ್ದ ರಾಸಿನ್ ಗೋಪುರದಲೆಕ ಬಲಸ್ ದ್ ಕೊಡಿಕ್ ನೆಕ್ಕಿ ತಪ್ಪುದ ಸೂಡಿ ಕಟ್ಟುನಿ

     ತೊಲಸಿಕಟ್ಟೆದ ಕೈತಲ್ ಪೂಜೆ ಮಲ್ತ್ ದ್ ಇಲ್ಲದಕುಲು ಕೊರ್ನ ಕಾಣಿಕೆನ್ ದೆತೊಂದು ನನೊಂಜಿ ಇಲ್ಲದಂಚಿ ಪಿದಾಡುವೆರ್.ಅಕುಲು ಪೋಯಿನ ಪ್ರತಿ ಇಲ್ಲಲ್ ಕದ್ರಿ ಮಂಜುನಾಥ ದೇವೆರೆಗ್ ಪೂಜೆ ಮಲ್ಪುವೆರ್.ನಾಥ ಪಂಥದ ಕದ್ರಿ ಮಂಜುನಾಥ ದೇವೆರೆನ್ ಇಲ್ಲಿಲ್ಲಗ್ ಎತ್ತವುನ ಬೇಲೆ ಮಲ್ಪುವೆರ್.

                ಪುರ್ಸೆ ಕಟ್ಟುನೆತ ಭಂಡಾರ ಕೇರ್ತ್ ದ್ ನಿ

   ಜಾಗೆರ್ದ್ ಜಾಗೆಗ್ ಆಚರಣೆ,ಆರಾದನೆ,ತುತ್ತೈತ,ಕಥೆ ಬದಲಾಪುಂಡು.ಕಡೇತ ದಿನ ಪಂಡ ಸುಗ್ಗಿದ ಪುಣ್ಣಮೆದಾನಿ ಊರ್ದ ಪುದಾರ್ದ ಗೌಡ್ರೆನ ಇಲ್ಲಲಾ,ಗೊತ್ತು ಮಲ್ತಿ ಜಾಗೆಡಾ ಮಲ್ಲ ಮಟ್ಟ್ ದ ಬಜಿಲ್ದ ಪೂಜೆ ನಡಪುಂಡು.

  

      

                        ಬಜಿಲ್ದ  ರಾಸಿಗ್ ಆರತಿ

ಬೆಲ್ಲದ ಪಾಕ ಬಿರಾದ್ ಬಜಿಲ್ದ ರಾಶಿ ಮಲ್ತ್ ದ್ ಪೂಜೆ ಮಲ್ಪುನತ್ತಂದೆ ಮೂಲ್ಲಾ ಪುರ್ಸೆ ಕಟ್ಟ್ ದ್ ನಲಿಕೆ ಉಪ್ಪುಂಡು.ಕಡೆಕ್ ಪರಕೆ ಕೊರ್ನಕ್ಲೆಗ್,ಬತ್ತ್ ನಕ್ಲೆಗ್ ಬಜಿಲ್ ಪಟ್ಟುವೆರ್.

ಬಜಿಲ್ದ ರಾಸಿರ್ದ್ ಬತ್ತಿನ ಮಾತೆರೆಗ್ಲ ಬಜಿಲ್ದ ಪುರ್ಸಾದ ಕೊರ್ಪೆರ್

ಸುಗ್ಗಿದ ಪುಣ್ಣಮೆಗ್ ಮೂಜಾ ,ಐನಾ ದಿನ ದುಂಬು ಪುರ್ಸ ಕಟ್ಟ್ ದಕುಲು ಕೈತಲ್ದ  ದೈವ ದೇವಸಾನ,ಗರೊಡಿಲೆಗ್ ಪೋದು ,ಕದಿರೆ ಮಂಜುನಾಥ ದೇಲ್ಯ,ಜೋಗಿ ಮಠೊಕು ಪೋದು ಪುರ್ಸಾದ ಕನಪೆರ್.

  

ದೇವೆರೆ ಭಂಡಾರ ಕೇರ್ಪುನಿ

ಆ ಪ್ರಸಾದೊನು ಸುಗ್ಗಿದ ಪುಣ್ಣಮೆದಾನಿ ಬೆಲ್ಲದ ಪಾಕೊಡು ಬಜಿಲ್ ಮೊರೆಪುನಗ ಅವೆಕ್ ಬಿರಾಪೆರ್.ಬಜಿಲ್ದ ಪುರ್ಸಾದದೊಟ್ಟುಗು ಅಕುಲು ಕನತಿ ಪುರ್ಸಾದಲ ಮಾತೆರೆಗ್ ತಿಕ್ ಲೆಕಾಪುಂಡು.

ಕೆಲವು ತಿಕ್ ಡ್ ಬಜಿಲ್ದ ರಾಸಿದ ಎದುರು ಮೂಜಿ ಕೊಡಿರೆ ಪಾಡ್ದ್ ಅಗೆಲ್ ಬಲಸುವೆರ್

 ಪುರ್ಸೆ ಕಟ್ಟುನಕುಲು  ಬಜಿಲ್ದ ರಾಸಿಗ್ ದಿಮ್ಮಿಸಾಲೇ... ಪನೊಂದು ಮೂಜಿ ಸುತ್ತು ಬರ್ಪುನಿ.

ದಿಮ್ಮಿಸಾಲೆ:-

   ರಾಗೊಡು ದಿಮ್ಮಿಸಾಲೇ..ಪನೊಂದು ಇಲ್ಲಿಲ್ಲಗ್ ಪೋಪೆರ್.ಒಂಜನೆದಾದ್ ಅಂಚ ದಿಮ್ಮಿಸಾಲೆ ಪನೊಂದು ಪೋಂಡ ಆ ಸೊರೊ ಕಂತುನಾತ್ ದೂರೊಗು ಕಷ್ಟ ದುಃಖೊಲು ಪೂರ ದೂರಾಪಗೆ.ಊರುಗು ಬತ್ತಿ ಮಾರಿಲು ದೂರಾಪಗೆ.ರಡ್ಡನೆದಾದ್ ಇರ್ಲ್ ಡ್ ಪುರ್ಸ ನಲಿಕೆ ಪೋಪುನೆಡ್ದಾದ್ ದಿಮ್ಮಿಸಾಲೆದ ಸೊರೊ ಕೇನ್ನಗ ಇಲ್ಲದಕುಲು ಲಕ್ಕುವೆರ್ ಗೆ.ಮೂಜನೆದಾದ್ ಬೇತೆ ಪುರುಷ ವೇಷದಕುಲು,ಗುಮ್ಮಟೆದಕುಲು,ಕರ್ಂಗೋಲುದಕುಲು ತನ್ಕುಲು ಪೋಪುನ ಜಾಲ್ ಗ್ ಜಪ್ಪೆರೆ ಬಲ್ಲಿಂದ್ ದಿಮ್ಮಿಸಾಲೆ ಪನೊಂದು ಪೋಪೆರ್.

      

                               ಕರಡಿದ ನಲಿಕೆ

     ಮೂಲು ಬೆನ್ನಿ ಸಾಗೊಳಿಗ್ಲ ಪುರ್ಸೆರೆ ನಲಿಕೆಗ್ಲ ಸಮ್ಮಂದ ಉಂಡು.ಬಾರ ತುಪ್ಪೆದ ನೇರ್ಪುಗಾದ್ ಅರಿಟ್ ಮಲ್ತಿ ಬಜಿಲ್ ದ ಕುತ್ತ ಗೋಪುರದೊರುತ ರಾಸಿದ ಸುತ್ತ (ತುಪ್ಪೆದಲೆಕ) ನಲಿಪುವೆರ್ ಪಂಡ ಬೂಮ್ಯಪ್ಪೆ ಒದಗಾದ್ ಕೊರ್ನ ನುಪ್ಪು ನೀರ್ ದ ಋಣೊಕು ಅಗೆಲ್ ಪಾಡುನೊಟ್ಟುಗು ಸರ್ವ ಜಾತಿ ಮತ ಧರ್ಮದಕುಲೆ ವೇಷದೊರುಟು ಒಟ್ಟುಗಿತ್ತ್ ದ್ ನಲಿಪುವೆರ್.ಕುಸೆಲದೊಟ್ಟುಗು ಆಚರಣೆಲೆನ ಜಬದಾರಿಕೆನ್ ಮೊಕುಲು ತೆರಿಪಾವೆರ್

  

ಬೆದ್ ರಾದ ಪುರ್ಸೆರ್ ಕದ್ ರಾದ ದೇವೆರೆನ್ ತುಂಬೊಂದು ಬಜಿಲ ರಾಸಿಗ್ ಸುತ್ತು ಬರ್ಪುನಿ.ಮುಲ್ತುರ್ದು ಬೊಕ್ಕ ಪುರ್ಸೆರೆ ಕಟ್ಟ್ ನಕ್ಲೆ ಗೊಬ್ಬು ಸರು.

ಬಜಿಲ್ದ ರಾಸಿಗ್ ಪುರ್ಸೆ ಕಟ್ಟುನಕುಲು ಸುತ್ತು ಬತ್ತಿ ಬೊಕ್ಕದ ಸುರುತ ಗೊಬ್ಬು ಕದ್ ರಾದ ದೇವೆರೆನ್ ತುಂಬೊಂದು.

  

ಕದ್ ರಾದ ದೇವೆರೆನ್ ತುಂಬೊಂದು ಬತ್ತಿ ಬೆರಿಕ್ಕ್ ದೈವದ ಮಾನೆಚ್ಚಿ(ಮೂಲು ಕೊಡಮಂದಾಯನ ಮಾನಿಯಾದ್ ) ಬರ್ಪುಂಡು.

   

              ‌‌‌‌ ‌‌‌    ದೈವ ಕೊಡಮಂದಾಯನ ವಸಾಯ

                ‌‌‌‌          ಕುಮಾರನ ವಸಾಯ

                             ದೈವೊಲ್ನ ವಸಾಯ

  ಅವೆರ್ದ್ ಬೊಕ್ಕ ತುಳುನಾಡ್ ಡ್ ಪುಟ್ಟುರ್ದು ಕರಿದ್ ಪೋಯಿನಡೆಮುಟ್ಟದ ಆಚರಣೆಲೆನ್,ಆರಾದನೆಲೆನ್ ಪುರ್ಸೆ ಕಟ್ಟ್ ದ್ ತೊಜಪಾವೆರ್.

            

                          ಕುಲೆತ ನಲಿಕೆ

     

                  ಪುರ್ಸ ನಲಿಕೆಡ್ ಮಂಗನ್ ನಲಿಪಾವುನಿ

                   ಮಂತ್ರವಾದಿ ಮಾಟ ಕಳೆಯುನಿ

   

                     ಮದಿಮೆಡ್  ಧಾರೆ ಮೈತ್ ಕೊರ್ಪುನಿ

ಪೊಣ್ಣೊಚ್ಚಿದ್ ಕೊರ್ಪುನಿ

ಪುರ್ಸೆ ಕಟ್ಟುನೆಟ್ ಜೋಕ್ಲೆಗ್ ಮಾನಾದಿಗೆ ಜಾಸ್ತಿ.ಮಾತೆರೊಟ್ಟುಗು ಜೋಕುಲು ನಲಿಪುವೆರ್ ತರೆಕ್ ಪಾಳೆದ ಮುಟ್ಟಲೆ ಮಲ್ತ್ ದ್ ಕೊಡಿಕ್ ಗೋಸಂಪಗೆದ ಪೂ ದೀಪೆರ್

ಜೋಗಿ ಸನ್ಯಾಸಿ,,ಬ್ಯಾರ್ಲು,ಪೋಲಿಸ್ದಾರ್ರೆನ ಒರು

ಪುರ್ಸ ಕಟ್ಟುನೊಟ್ಟುಗು ಪೋಲಿಸ್ ಏಸ

ಪುರ್ಸೆ ಕಟ್ಟುನೆಟ್ ಕಂಬುಲದ ಎರ್ಲೆನ ಒರುನ್ಲಾ ತೋಜಾವೆರ್

ಕುರು ಕುರು ಮಾಮನಕ್ಲೆನ್ ತೋಜಾವೆರ್.ಮೂಲು‌ ಮೊಕ್ಲು ಪನ್ಪುನ ದೇವೆರೆಗ್ಲಾ ಆ ದೇವಸಾನೊಗ್ಲ ಸಮ್ಮಂದ ಉಪ್ಪುಜಿ..ಕೊಲ್ಲೂತರುಡು ಮೂಕಾಂಬಿಕೆನ ಬದಲ್ ವಿಶ್ವನಾಥ ಪನ್ಪೆರ್.

  

ಪುರ್ಸ ಏಸೊಡು ಗುಳಿಗಗ್ ಕಟ್ಟುವೆರ್

ನಟ್ಟುನಾಕ್ಲೆನ್ ತೋಜಾವೆರ್

ಐವೇರ್ ಪುರ್ಸೆರ್-ಇರ್ವೇರ್ ಸಾಯ್ಬೆರ್ಂದ್ ಪುರ್ಸೆರ್ ಕಟ್ಟುನೆಟ್ ಬರ್ಪುಂಡು.

ಪುರ್ಸೆ ಕಟ್ಟುನೆಟ್ ಒರಿ ಬ್ಯಾರಿ,ಇರ್ವೆರ್ ಸೈಬೆರ್ನ ಒರು ಕಟ್ಟ್ ದುಪ್ಪುವೆರ್

ಪುರ್ಸೆರ್ ಕಟ್ಟುನೆಟ್ ಮುರ್ಗೊಲ್ನ ಏಸ ಪಾಡ್ದ್ ನಲಿಪುವೆರ್.

ಪಿಲಿ,ಕರಡಿಸಿಮ್ಮ,ಮಂಗನ್ ನಲಿಪಾವುನೆನ್ ತೋಜಾವೆರ್.

  

ಪಂಜುರ್ಲಿ ದೈವೊಗು ಇಡೀ ಮೇಲ್ ಗ್ ನುಂಗಿನ ಬಾರೆದಿರೆ ಸುತ್ತುದು ತರೆಕ್ ನೆಕ್ಕಿ ತಪ್ಪು ಸೂಡಿ ಕಟ್ಟುವೆರ್.

   ತುಳುನಾಡ ಆಚರಣೆಲೆಡ್ ಶೈವ ನಾಥ ಪರಂಪರೆಗ್ ಸಮ್ಮಂದಪಟ್ನ ಆಚರಣೆಲಿತ್ತ್ ದ್ ಆ ಆಚರಣೆಲೆಗ್ ಅವೆತನೇ ಆಯಿನ ಮಾನಾದಿಗೆ ಉಂಡು.ತುಳುನಾಡ ದೈವಾರಾದನೆ ನಡಪುನ ದುಂಬು ತುಳುವೆರ್ ಕದ್ರಿ ಮಠೊಕು ಪೋದು ಗುರುಕುಲ್ಡ ಅನು ದೆತೊನುನ ಕೆರಮ ಇತ್ತ್ಂಡ್.ಆಂಡ ಇನಿ ಅವು ಮದೆಕ್ ಸೇರ್ದ್ಂಡ್.ಆಂಡ ತುಳುನಾಡ ಜನಪದ ಆಚರಣೆಯಾಯಿನ ಪುರ್ಸೆ ಕಟ್ಟುನ ಪುರ್ಸೆ ಕಟ್ಟ್(ಪದ್ಧತಿ)ದ ದುಂಬು ಇನಿಲಾ ಕಟ್ಟುನಕುಲು ಕದಿರೆ ಜೋಗಿ ಮಠೊಕು ಪೋದು ದುನಿತ ಬಸ್ಮ ಬೊಕ್ಕ ಸೀರ್ತ ಪತೊಂದು ಬತ್ತ್ ದೇ ಆಚರಣೆ ಸುರು ಮಲ್ಪುವೆರ್.ಅಂಚನೆ ತುಳುವೆರ್ ಶೈವ ನಾಥ ಪಂಥದ ಗುರುಕುಲೆನ್ ತನ್ಕುಲೆ ಗುರುಕುಲೆಂದೆನ್ನಿದ್ ಮಾನಾದಿಗೆ ಕೊರ್ತಿನಕುಲು.ಅಂಚಾದ್ ನಾಥ ಪಂಥೊಗು ಸಮ್ಮಂದ ಪಟ್ನ ಅವ್ವೇತೋ ಜನಪದ ಆರಾದನೆಲು ತುಳುನಾಡ್ ಡ್ ನಡಪುವ.ಉದಾರ್ಮೆಗ್- ಸೋಣದ ಜೋಗಿ ಕಾವೇರಿ ಪುರುಷೆರ್,ಮಾಯಿದ ಪುರ್ಸೆರ್ ಅಂಚನೆ ಪುರ್ಸೆ ಕಟ್ಟುನಿ.ಪುರ್ಸೆ ಕಟ್ಟುನೆನ್ ಪುರ್ಸ ಏಸ,ಬಜಿಲ್ ಪೂಜೆಂದ್ ಲ ಪನ್ಪೆರ್.ಸುಗ್ಗಿದ ಪುಣ್ಣಮೆಗ್ ಈ ಆರಾದನೆ ನಡಪುಂಡು

          ಪುರ್ಸ ವೇಸದಕ್ಲು ಗಲಸುನ ಗೋಸಂಪಗೆದ ಪೂ

ಚಿತ್ರ ಕೃಪೆ -ಕಹಳೆ ನ್ಯೂಸ್