ಆಟಿ ಅಮಾಸೆದ ಅಗೆಲ್

                        ಆಟಿ ಅಮಾಸೆದ ಅಗೆಲ್

          ‌‌‌‌         ರಾವು ಗುಳಿಗಗ್ ಅಗೆಲ್

ಆಟಿಡ್ ಕಲ್ಲುರ್ಟಿಗ್ ಇಲ್ಲದ ಉಲಯಿ,ಗುಳಿಗಗ್ ಗುಡ್ಡೆಡ್ ಅಗೆಲ್ ಪಾಡುವೆರ್.

ಆಟಿಡ್ ಕರಿದ್ ಪೋಯ್ನಕ್ಲೆಗ್  ಅಮಾಸೆದ ಇರ್ಲ್ ಅಗೆಲ್ ಪಾಡ್ವೆರ್.

ನಾಥ ಪಂಥದ ಜೋಗಿಲೆರ್ದ್ ಕಾಲ ಭೈರವಗ್ ಅಸುರಿ ಕಿರಿಯೆದ ಅಗೆಲ್

   ನಾಥ ಪಂಥದ ಜೋಗಿಲೆಡ್ ಕೆಲವೆರ್ ದೇವೆರೆ ಗುಂಡೊಡು ಪೊರಿ ಪೊದ್ದೊಲುಡು ಕಾಲಿ ಕೆತ್ತಿ ಬೊಂಡೊಡು ಪನಿವಾರ ಬಲಸ್ ದ್ ದೇವ ಕಿರಿಯೆಡ್ ಕಾಲ ಬೈರವಗ್ ಬಲಸುನ ಕೆರಮಲ ಉಂಡು.

    ಜೋಗಿಲು ಕೆಲವು ಕೋಡಿಡ್ ತೊಲಸಿ ಕಟ್ಟೆದೆದುರು ಪೊರಿ ಪೊದ್ದೊಲು ಬಲಸ್ ದ್ ನುಪ್ಪುದ ಮುದ್ರೆಗ್ ಕೋಲ್ತಿರಿ ಕುತ್ತುದು ಅವೆಕ್ ಕೋರಿ ಕೊಯ್ಪೆರ್.

ಜೋಗಿಲೆಡ್ ಕೆಲವೆರ್ ಕಾಲ ಬೈರವಗ್ ಇಲ್ಲ ಚಾವಡಿಡ್ ಕೋರಿ ಕೊಯ್ದ್ ಬೊಕ್ಕ ಕಜಿಪು ಮಲ್ತ್ ದ್ ಇಲ್ಲದ ಜಗಲಿಡ್ ಕಾಲ ಬೈರವಗ್ ಆಸುರೀ ಕಿರಿಯೆದ ಅಗೆಲ್ ಪಾಡುವೆರ್.ಅವೆತ ಕೆರಮದ ಬಗೆಟ್ ತೆರಿಯೊನ್ಗ.

ಕಾಲ ಬೈರವಗ್ ಆಸುರೀ ಕಿರಿಯೆದ ಅಗೆಲ್-

   ಸುರುಕು ಕೋಕಾಯಿ ಕೊಯ್ಯಂದಿ,ಮೇಲ್ಡ್ ಓಲ್ಲಾ ಗಾಯ ಇಜ್ಜಂದಿ  ಊರುದ ಪೂಂಜನ್ ದೆತೊನೊಡು.ನಮ ಚೌಳಿ ನೀರ್ ಡ್ ಮೀದ್ ಬೊಕ್ಕ ಬೇಲೆ ಸುರು ಮಲ್ಪೊಡು.ಪೂರಲ ಆಂಜನಕುಲೇ ಮಲ್ಪುನಿ ವಿನಃ ಪೊಂಜನಕುಲೆಗ್ ಮೂಲು ದಾಲ ಬೇಲೆ ಇಜ್ಜಿ.ಪಿದಯಾಪುನ ಉಂತ್ ನ ಪ್ರಾಯದ ಪೊಂಜನಕುಲಿತ್ತೆರ್ಡ ಸೇರೊನೊಲಿ. ಮೂಜಂಜ ಪೊರ್ತು ಕಂತುನ ಏಲ್ಯೊಡು ಚಾವಡಿಡ್ ಮೂಡಾಯಿ ಮೋನೆ ಪಾಡುಲೆಕ ತಿರ್ತ್ ಒಂಜಿ ಮಣೆ ದೀದ್ ಅವೆತ ಮೇಲ್ಡ್ ಗೋಡೆಗೊರಗಾದ್ ಒಂಜಿ ಮಣೆ ದೀದ್,ಕಾಲ ಬೈರವನ ಪಟ ಇತ್ತ್ಂಡ ದೀವೊಡು.ಗೋಡೆಗೊರಗಾಯಿ ಮಣೆಕ್ ತಿರ್ಸೂಲ ಒರಗಾದ್ ದೀದ್ ಭಸ್ಮೊದ ಅಡ್ಡ ನಾಮ ಪಾಡೊಡು.ಮಣೆ ದೀನ ಎದುರುಡು ಇಡಿ ಚಂದ್ರಾಕೃತಿದ ೧೫ ಇಂಚಗಲದ ಮಂಡಲ ಸೇಡಿ ಪೊಡಿಟ್ ಬರೆದ್ ಅವೆತ ಸುತ್ತ ೫ ತಿರ್ಸುಲ ಚಿತ್ರ ಬುಡ್ಪವೊಡು.ಬೊಕ್ಕ ಆ ಮಂಡಲದ ಉಲಯಿ ಒಂಜಿ ಸೇರ್ ಬಾರ್ ಪದ್ ರ್ದ್ ಬುಡೊಡು.ಬಾರ್ ದ ಮಿತ್ತ್ ಅಮುರ್ತ ಪಾಡ್ದ್ ಬಾರೆದಿರೆಟ್ ಮುಚ್ಚಿನ ಮಣ್ಣ್ ದ ತೂರಿನ್ ದೀವೊಡು.ಕಾಲ ಬೈರವನ ತಿರ್ಸೂಲ ದೀನ ಅಂಚಿ ಇಂಚಿ ರಡ್ಡ್ ಎತ್ತರದ ತುಡರ್ ಪೊತ್ತದ್ ದೀಡೊಡು.ಅಂಚನೆ ಅಂಚಿಂಚಿ ಊದತ್ತಿ ಪೊತ್ತದ್ ದೀವೊಡು.ಮಂಡಲದ ಎದುರು ಕೊಡಿ ಬಾರೆದಿರೆನ್ ಮೂಡಾಯಿ ಮೋನೆ ಪಾಡ್ದ್ ಒಂಜಿ ಸೇರ್ ಉರ್ಪೆಲರಿ,ಮುಗಟೆ ಇಜ್ಜಂದಿ ಒಂಜಿ ತಾರಾಯಿ,ಐನ್ ಬಚ್ಚಿರೆ,ಒಂಜಿ ಬಜ್ಜೆಯಿ,ಐನ್ ಪರ್ಂದ್,ಚಿಲ್ಲರೆ ಪಣವುದ ಸುತ್ತೆ ದೀವೊಡು.ದೀನ ಅಮುರ್ತೊಗು ಲೋಬಾನದಾರತಿ ಮಲ್ತೊಂದಿಪ್ಪೊಡು..ಸುತ್ತೆದ ಎದುರು ಮೂಡಾಯಿಗ್ ಮೋನೆ ಪಾಡ್ದ್ ಒಂಜಿ ಕೊಡಿರೆ ದೀದ್ ಅವೆಟ್ ಉರ್ಪೆಲರಿ ನುಪ್ಪುಗು ಕುಂಕುಮ,ಮಂಜಲ್ ಬಿರಾದ್ ಮುದ್ರೆ ಮಲ್ತ್ ದ್ ಅವೆಕ್ ತಾರೆದ ಒಂಜಿ ಮಡಲ್ ಗ್ ಬೊಲ್ದು ಕುಂಟು ಸುತ್ತುದು ಎಣ್ಣೆಡ್ ಮುರ್ಕಾಯಿನ ಕೋಲ್ತಿರಿನ್ ಪೊತ್ತಾದ್ ಮುದ್ರೆಗ್ ಕುತ್ತುದು ದೀವೊಡು.ಬೊಕ್ಕ ಪೂವರಿ ಪತ್ತ್ ದ್ ಇಲ್ಲದ ಹಿರಿಯಾರ್ ರಡ್ಡ್ ಪಾತೆರ ಮದಿತ್ ದ್ ಪ್ರಾರ್ಥನೆ ಮಲ್ತ್ ದ್ ಪೂವರಿನ್ ಸುತ್ತೆದ ಬರಿಟ್ ಮಾತೆರ್ಲ ಪಾಡೊಡು.ಬೊಕ್ಕ ಮುದ್ರೆದ ಮಿತ್ತ್ ಕೋರಿ ಕೊಯ್ದ್ ಕೋಲ್ತಿರಿಕ್ ಮೂಜಿ ಸುತ್ತು ಬರ್ಪಾದ್ ಕೋರಿನ್ ಪಿದಯಗ್ ಕನತ್ ಪಾಡೊಡು.ಕೋರಿದ ಜೂವ ಪೋಯಿ ಬೊಕ್ಕ ನೀರ್ ತಲ್ತ್ ದ್ ಮಾತೆರ್ಲ ಒರ ತಿರ್ಗ್ ದುಂತೊಡು.ಉಲಯಿ ಪೋಯಿನಕುಲು ನೆತ್ತೆರ್ ಬೂರಿ ಜಾಗೆನ್ ಒರೆಸ್ ದ್ ಮುದ್ರೆ ಕೋಲ್ತಿರಿನ್ ಪಿದಯಿ ಓಲಾಂಡಲ ದೀಯೊಡು‌.ಬೊಕ್ಕ ಕೋರಿನ್ ಪೆಜ್ಜಿದ್ ಅಟಿಲ್ ದಟ್ಟಣೆ ಸುರು ಮಲ್ಪೊಡು.ಅಗೆಲ್ ಪಾಡುನ ದುಂಬು ಕುಡೊರ ಮೀದ್ ಅಗೆಲ್ ಪಾಡೊಡು.ಕಾಡ್ ಕೇಪುಲೊನೇ ಗಲಸೊಡು.

ಅಗೆಲ್ ಪಾಡ್ನಗ ಗಲಸೆರೆಂದ್ ಬಾರೆದಿರೆ ಬಾಡಾದ್ ಐನ್ ಚಿಲ್ಲಿ ಮಲ್ಪೆರೆ ಉಂಡು.ಅಟಿಲ್ದ ಕೋಣೆಡ್ ಪ್ರತಿಯೊಂಜಿಲ ಆಂಜನಕ್ಲೆ ಕೆಲಸ.ಮಣ್ಣ್ ದ ಕರಟೇ ಉರ್ಪೆಲರಿತ ನುಪ್ಪು ಮಲ್ಪೊಡು.ಅಂಚನೆ ೩ ಕೊಂಡೆ ಬೊಳಂತೆ ಅರಿನ್ ಕಡೆದ್ ಚಪ್ಪೆ ಆದ್ ಐನ್ ಬಲ್ಚಟ್ ಮಲ್ಪೊಡು.ಅಟಿಲ್ ಆಯಿ ಬೊಕ್ಕ ಅಟಿಲ್ ಕೋಣೆರ್ದ್ ಪೂರ ಜಗಲಿಗ್ ಕನವೊಡು.ಅವ್ಲು ಪಂಚ ಬೂತೊಲೆಗ್ ಸಾಗ್ಸಿಯಾದ್ ಮೂಡಾಯಿಗ್ ಮೋನೆ ಪಾಡ್ದ್ ಐನ್ ಕೊಡಿ ಇರೆ ಪಾಡ್ದ್ ಸುರುಕು ನುಪ್ಪು ಬಲಸ್ ದ್,ಪ್ರತಿ ಇರೆಕ್ ಬಲ್ಚಟ್ ಬಲಸ್ ದ್ ಬೊಕ್ಕ ಪ್ರತಿ ಇರೆಟ್ ಬಾರೆದಿರೆಟ್ ಕಟ್ಟ್ ನ ಚಿಲ್ಲಿ/ದೊಣ್ಣೆ ದೀದ್ ಪ್ರತಿಯೊಂಜಿ ಚಿಲ್ಲಿದ ಉಲಯಿ ಚೂರು ಚೂರು ಅಮುರ್ತ/ಕಲಿ ಪಾಡ್ ದ್ ದೀದ್ ಬೊಕ್ಕ ಲೋಬಾನದ ಆರತಿ ಮಲ್ಪೆರೆ ಉಂಡು.ಬೊಕ್ಕ ಮಾತೆರ್ಲ ಉಂತುದು ಇಲ್ಲದ ಯಜಮಾನಿ ನಾಲ್ ಪಾತೆರ ಪಂಡ್ ದ್ ಕೈ ಮುಗಿದ್ ಪೂವರಿ ಪಾಡ್ ದ್ ಅಡ್ಡ ಬೂರ್ದು ಮಾತೆರ್ಲ ಬಾಕಿಲ್ ಪಾಡ್ದ್  ಪಿದಯಿ ಬತ್ತ್ ದ್ ಉಂತುವೆರ್.ಪಿದಯಿ ಬನ್ನಗ ಇಲ್ಲದ ಯಜಮಾನಿ ಒಂಜಿ ಚೆಂಬು ನೀರ್ ಕನತ್ ದಿಪ್ಪುವೆರ್.ಒಂತೆ ಪೊರ್ತಾದ್ ಇಲ್ಲದ ಯಜಮಾನಿ ನೀರ್ ಬಾಕಿಲ್ಗ್ ತಲ್ತ್ ದ್ ಉಲಯಿ ಪೋದು ಒಂಜಿ ಇರೆನ್ ಜಾರಾಯಿ ಬೊಕ್ಕ ಕೊಡಿರೆಟ್ ಬಲಸ್ ನೆನ್ ಪುರ್ಸಾದ ಆದ್ ಮಾತೆರ್ಲ ತಿನ್ಪೆರ್.ಇಡೆಗ್ ಬೈರವಗ್ ಬಲಸುನ ಕೆರಮ ಮುಗಿಯುಂಡು.ನಾಯಿಗ್ ನುಂಗು ಜಾಸ್ತಿ ಆವಂದಿಲೆಕ, ಕಂಜಿ ಕೈಕಂಜಿಲೆಗ್,ಜೋಕ್ಲು ಬಾಲೆಲೆಗ್ ದೋಷ ಬರಂದಿಲೆಕ ಕಾಲ ಬೈರವೆ ಕಾಪುವೆ ಪನ್ಪಿ ನಂಬೊಳಿಗೆ ಅಕ್ಲೆನ.ಕಪ್ಪು ನಾಯಿ ಕಾಳ ಬೈರವನ ಒಟ್ಟುಗುಪ್ಪುಂಡು.ನಾಥ ಪಂಥದ ಜೋಗಿಲ್ನೊಟ್ಟುಗು ಅಕ್ಲ್ ಜುಂಡಿ ಯಾತ್ರೆ ಪೋನಗ ಒಂಜಿ ನಾಯಿ ಉಪ್ಪುಂಡು.ಕಾಳ ಭೈರವನ ಆರಾದನೆಡ್ ಪ್ರಾದೇಶಿಕ ಆಚರಣೆದ ಕೆರಮ ಬೇತೆ ಬೇತೆ ಉಪ್ಪೆರ್ಲ ಯಾವು.

 ವೀಡಿಯೋ ಲಿಂಕ್-  https://youtu.be/TpNc-Q6rr1Q