ಮಣೇಲ ಜುಮಾದಿ ಮರ್ಲ್ ಜುಮಾದಿಯಾನಗ

ಮಣೇಲ ಜುಮಾದಿ ಮರ್ಲ್ ಜುಮಾದಿಯಾನಗ

   

ಜುಮಾದಿ ದೈವದ ಮುಗ

  

ತುಳುನಾಡ ಆರಾದ್ಯ ದೈವ ಜುಮಾದಿ ಇನಿ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಆದ್ ಧೂಮಾವತಿಯಾಂಡಲ ಸಂದಿ ಪಾಡ್ದನೊಲೆಡ್,ಜನೊಕ್ಲೆ ಬಾಯಿಡ್ ಜುಮಾದಿಯಾದೇ ಒರಿದ್ಂಡ್.ನಮ್ಮ ತುಳುನಾಡ ಜುಮಾದಿ ನಮ್ಮ ಕುಟುಮದ ಜೂವದ ಆದಿ ಪಂಡ ಸುರೂತ ತರೆ ಪಂಡಲಾ ತಪ್ಪಾವಂದ್.ತುಳುನಾಡ ಅರಸೊಳಿಗೆದ ದಳವಾಯಿಯಾ,ದಂಡನಾಯಕೆನಾ ಆದಿತ್ತ್ ನ ನಮ್ಮಕುಟುಮದ ಜೂವದ ಆದಿ ನರಮಾನಿ ಸರ್ರ ಬುಡ್ದು ಮಾಯ ಸಂದಿ ಬೊಕ್ಕ ಜುಮಾದಿಯಾದ್ ಆರಾದನೆ ತುಳುನಾಡೊರ್ಮೆ ಪಡೆಯೊಂದುಲ್ಲೆ.ಅವೆಕ್ ಸಾಕ್ಷಿ ನೂರ್ದಾಲ,ಸಾರಾಳ,ಮೂಸ್ರಾಳ ಸೈನ್ಯದ ಕಲ್ಪನೆ. ಅವೈದಿಕ ಶೈವ ತುಳುನಾಡ ಜನಪದ ಮೂಲ  ದೈವಾರಾದನೆದ ಜುಮಾದಿನ್ ವೈಷ್ಣವಾರಾದನೆದ ಪುರಾಣದ ಧೂಮಾವತಿಂದ್ ಪನ್ಪುನವು ಶುದ್ಧ ತಪ್ಪು.ನಮ್ಮ ತುಳುನಾಡ ದೈವಾರಾದನೆದ ಗಂದಗಾಳಿ ಗೊತ್ತಿಜ್ಜಂದಿನ,ದೈವದ ಬೂಲ್ಯ ಪತ್ತಂದಿನಕುಲು ನಮ್ಮ ಆರಾದನೆದ ಜುಮಾದಿನ್ ಧೂಮಾವತಿ ಮಲ್ಪುನಗಲ ನಮ ಅಕುಲು ಪನ್ನ‌ಪುದರ್ ನ್ ಪಾಡ್ದ್ ನಮ್ಮ ಮೂಲ ದೈವೊನು ಕಳೆಯೊಂಡ.ಬೊಕ್ಕ ಓಡೆ ದೈವ ಕಾರ್ನಿಕ ತೋಜಾವುನಿ?.ನಮಡ ಬೋಡಾಯ್ನಾತ್ ಕಾಸ್ ಉಂಡುಂದು ಏರಾ ಪಂಡಿ ಪುದರ್ ನ್ ನಮ್ಮ ದೈವೊಗು‌ ದೀದ್ ಅಪಚಾರ ಮಲ್ತ್ ನೆಡ್ದಾವರ ಇನಿ ತುಳುನಾಡ್ ಡ್ ಬೆಚ್ಚ ಗಾಳಿದ ಉರಿ ಉರ್ದಾಲ ದೊಂಬುನು ಅನುಭವಿಸವೊಂದುಲ್ಲ.ಮಲೆಯಾದ್ ಬರ್ಪುನ ಕಷ್ಟೊನು ದೈವ ಮೈಂದಾದ್ ಇನಿ ಮಯಕ ಮಲ್ತೊಂದಿಜ್ಜಿ.ದಾಯೆ ಪಂಡ ದೈವೊನು ನಮ ಮದತ್ ದ್ ಗುಂಡೊಡಿನಿ ದೈವನೇ ಇಜ್ಜಿ.ನಮನೇ ಏರೆನವೋ ಪಾತೆರ ಕೇಂದ್ ದೈವೊನು ಮದತ್ ದ್ ಮಂಚದಾಯೆ ತೂವೊಂದಿಜ್ಜೆ ಪಂಡ ಅವೆಕ್ ಅರ್ಥ ಇಜ್ಜಿ.ಇನಿ ದೈವದ ಕಾರ್ನಿಕ ನಮ್ಮ ಪಣವುದ ಅಂಕಾರೊಡು ಮದೆಕ್ ಸೇರ್ಂಡ್.

  

ಜುಮಾದಿ ದೈವ

            ಈ ಬೂಮಿಡ್ ಏತೇ ಕಾಸ್ ದವಿಪ್ಪಡ್ ಯಾನ್ ದೆತೊನ್ವೆ ಪನ್ಪಿ ಅಂಕಾರ ನಂಕ್.ಆಂಡ ಬೂಮ್ಯಪ್ಪೆ ನಮನ್ ಯಾನ್ ದಾಲಾ ಕೊರಂದೆ ಇಂಬ್ಯನ್ ದೆತೊನ್ವೆಂದ್ ಕಾತೊಂದಿಪ್ಪುವಲ್.ಅಂಚನೆ ದೆತೊನ್ವಲ್ಲ.ಆಂಡ ಅಂಕಾರ ಮಲ್ಪಂದೆ ನಮ ನಂಬಿ ದೈವೊಲೆನ್ ಮೂಲ ಹಿರಿಯಾಕ್ಲು ನಂಬಿ ಸಾದಿಡೇ ಆರಾದನೆ ಮಲ್ತೊಂದು ಬತ್ತಡ ಬೂಮ್ಯಪ್ಪೆ ಉಪ್ಪುನಡೆಮುಟ್ಡ ದೈವ ಅಕ್ಲೆನ ಪುದರ್ ನ್ ಸಾಸಿತಾದ್ ಒರಿಪುಂಡು.ಇಜ್ಜಿಂಡ ಮಾರಿಗುಡಿ ಮಾರಿಯಮ್ಮ ದೇವಸಾನ ಆದ್ ಒಂಜಿ ಮೂಲದ ಜನಪದ ನಂಬೊಳಿಗೆದ ಕೊಂಡಿಯೇ ಕಡಿದ್ ಪೋಪುಂಡು.ನಮ ಮೂಲೊಡೇ ಪಂಜುರ್ಲಿ ದೈವೊನು ಅರಾದನೆ ಮಲ್ತೊಂದು ಬೈದ್ ನಕುಲು.ತುಲುನಾಡ್ ಡ್ ವೈದಿಕತೆ ಬತ್ತ್ ದ್ ಮೂಲ ದೈವಾರಾದನೆ ನಾಶ ಅನಗ ಕುಡೊರ ತುಳುನಾಡ್ ಡ್ ದೈವಾರಾದನೆನ್ ನೆಲಮೂಲೊಗು ಕನತ್ ನಕುಲು ಶೈವ ಜೋಗಿ ಸನ್ಯಾಸಿಲು.ಅಂಚನೆ ಅಕ್ಲೆನ ತಾಂತ್ರಿಕ ಸಿದ್ದಿದ ಜುಮಾದಿ ದೈವೊನು ತುಳುನಾಡ ಅವ್ವೇತೋ ಧರ್ಮಿಷ್ಟೆರೆಗ್ ಕೈ ಏರ್ದ್ ಕೊರ್ತೆರ್.ಪಾಂಡಿಬೈದ್ಯೆರ್,ಮರ್ದ ಬೈದ್ಯೆರೆಗ್ ಜುಮಾದಿನ್,ಅಂಚನೆ ತುಲುನಾಡ ಕೆಲವೊಂಜಿ ದರ್ಮಿಷ್ಟ ಬೈದ್ಯೆರೆಗ್ ವೈದ್ಯನಾಥನ್ ಕೈಯೇರ್ದ್ ಕೊರ್ನಕುಲು ಜೋಗಿ ಸನ್ಯಾಸಿಲು.ಶೈವ ತಾಂತ್ರಿಕ ಸಿದ್ದಿದ ಹಠ ಯೋಗಿಲಾಯಿನ ಅಕ್ಲೆನ್ ಏರೆಗ್ಲಾ ಗೆಲ್ಪೆರೆ ಸಾದ್ಯ ಇಜ್ಜಾಂಡ್.ಅಂಚನೆ ತಾಂತ್ರಿಕ ಸಿದ್ದಿದ ಜೋಗಿ ಮಠತ ಗುರುಕುಲು ನಮಕ್ ಉಪ್ಪುನಗ ಅಕುಲೆ ನಮಕ್ ಪ್ರದಾನ.ಅಕುಲು ಮಲ್ತಿ ಪೂಜೆನೆ ಶಿವಗ್ ಅರ್ಪಣೆ ಆಪುನಿ ಆಪುನಿ.ಜೋಗಿ ಅರಸುಲ್ನ ಎದುರು ವಾ ತಂತಿರ್ದಾರ್ಲಾ ಅಗತ್ಯ ಇಜ್ಜಿ.ದಾಯೆ ಪಂಡ ಆತ್ ನಿಷ್ಠೆದ ಪೂಜೆ ನಮ್ಮ ಗುರುಕುಲೆಗ್ ತೆರಿದುಪ್ಪುಂಡು.ಗುರುಕುಲ್ನಕುಲ್ಲಾ ಬೇತೆಕ್ಲೆ ಪ್ರಶ್ನೆ ಚಿಂತನೆಲೆನ್ ಒಪ್ಪುಜೆರ್.ಆಂಡ ನಮ ಗುರುಕುಲ್ನ ಪಾತೆರ ಮೀರ್ದ್ ಪೋದು ನಮನ್ ನಮ ಕಳೆಯೊಂದುಲ್ಲ.ಇನಿ ದೈವ ಚಾಕಿರಿದ ಮೂಲ ನೂಲುಪಾಲ್ ನೂರ್ದಾಲ್ ಸಂಸಾರದ ವಿಶ್ವಕರ್ಮೆರೆನ್ ದೈವ ಮದತ್ ದ್(ದೈವೊಗು ಕಟ್ಟುನಾಯೆ) ತಂತಿರ್ದಾರೇಂದ್ ಸುರುತ ಲೆಪ್ಪು ಕೊರೊಂದುಂಡು.ದೈವದ ಕಲೊಟು ಬೂಲ್ಯ ಪತ್ತಂದಿನ,ದೈವದ ಗಂದೊನು ಮುಂಡೊಗು ಪಾಡಂದಿನ,ದೈವದ ಅಸರ್ ಗ್ ಬೊಂಡ ಕೆತ್ತ್ ದ್ ಕೊರಂದಿನ,ದೈವದ ಅವಾರೊಗು ಒಂಜಿ ಪಂರ್ದ್ ದ ಚೋಳಿ ದೆತ್ತ್ ಕೊರಂದಿನಕ್ಲೆನ್ ದೈವ ಎಂಚ ಲೆಪ್ಪುಂಡ ?.ಅಂಚನೆ ದಾಲಾ ಮಲ್ಪಂದಿನಕ್ಲೆ ಕೈಪುಂಡಿದುಲಯಿ ತುಳುವೆರೆ ದೈವಾರಾದನೆ ತಿಕ್ಕ್ ದ್ ಅಕುಲು ದೈವೊಲೆನ್ ದೇವೆರ್ ಮಲ್ಪುನಗ ಮನಿಮಂಬಿಜ್ಜಂದೆ ಕುಲ್ಲ್ ನ ತುಳುವೆರ್ ಇನಿ ಬರೆಲೊಂದುಲ್ಲೆರ್.ಆಂಡಲಾ ಅಕುಲು ಮಲ್ತಿ ತಪ್ಪು ತುಳುವೆರೆಗ್ ಅರ್ಥ ಅತ್ ಜಿ.ನಮ ಅಕ್ಲೆನ ತಪ್ಪುನು ತೆರಿಪಾಂಡ ನಮಕ್ ದಾಲ ಬೇಲೆ ಇಜ್ಜಿ ಪನ್ಪೆರ್.

  

                   ತುಳುನಾಡ್ ಡ್ ಬೇತೆ ಬೇತೆ ಪುದರ್ ಡ್ ಜುಮಾದಿನ ಆರಾದನೆ ಇತ್ತ್ ದ್ ಸಾರಾಳ ಜುಮಾದಿ,ಪಡ್ಡೈ ಜುಮಾದಿ,ಕಾಂತೇರಿ ಜುಮಾದಿ,ಪಡ್ರೆ ಜುಮಾದಿ ಇತ್ತ್ ಲೆಕನೆ ಮಣೇಲ ಜುಮಾದಿಂದ್ ಆರಾದನೆ ಬಾರೀ ದುಂಬಿತ್ತ್ಂಡ್ಂದ್ ಬಾರೀ ಹಿರಿಯಾಕ್ಲು ಪನೊಂತೆರ್.ಮಣೇಲ ಜುಮಾದಿ ಜೋಗಿ ಪುರ್ಸೆರೆ ಗುರುಕುಲಾಯಿನ ಜೋಗಿ ಸನ್ಯಾಸಿಲೆ ತಾಂತ್ರಿಕ ಸಿದ್ದಿದ ದೈವ ಆದಿತ್ತ್ಂಡ್.ಮಣೇಲ ಜುಮಾದಿಗ್ ಜೋಗಿ ಮಠೊಕ್ಲೆಡ್ ಉಜ್ಜಾಲ್ ಇತ್ತ್ ದ್ ಇಟ್ಟೇಲ ಜೋಗಿ ಮಠತ ಮಣೇಲ ಜುಮಾದಿನ ಮುಗ ಇತ್ತ್ ನೆಟ್ ಬಾರೀ ಪಿರಾಕ್ ದ ಮುಗ.ಆ ಮುಗತ ತಾಕತ್ತ್ ಏತ್ ಉಂಡು ಪಂಡ ಕೇನ್ನಕ್ಲೆಗ್ ಮೈ ಇರ್ಮೆನ ಆವು.ಉಂದು ನಮಕಾಯಿ ಸೊಂತ ಅಲ್ಮೋಗ.ಇಟ್ಟೇಲ ಮಠತ ಉಜ್ಜಾಲ್ ಡ್ ಇತ್ತಿ ಮುಗತ ಪಟ ದೆಪ್ಪೆರೆ ಏತೇತ್ ಬಂಙ ಬತ್ತ್ಂಡಲಾ ಎನನ್ ಪಿರವುಗು ಏರಾ ನೂಕ್ಲೆಕ  ಆವೊಂತ್ಂಡ್.ಕಡೆಕ್ ತರೆ ತಗ್ಗಾದ್ ಎನ್ನ  ಉದ್ದೇಶ ದೈವೊದೆದುರು ಅರಿಕೆ ಮಲ್ತಿ ಬೊಕ್ಕ ಪಟ ದೆಪ್ಪೆರೆ ಸಾದ್ಯ ಆಂಡ್.ಅಂಚನೆ ದೈವದ ಉಜ್ಹಾಲ್ ದ ಎದುರು ನಮ ಕಣ್ಣ ಮುಚ್ಚಿದ್ ಅಟ್ಟೆ ಪಾಡ್ದ್ ಕುಲ್ಲ್ಂಡ ನಮಕ್ ಈ ಜಗತ್ತ್ ದ ಗೇನನೇ ಒಂಜಾತ್ ಪೊರ್ತು ತಿಕ್ಕಂದೆ ಇಡೀ ಮೈ ಕುಂಬರುಲೆಕ ಆದ್ ಬೆಗರ್ ದ್ ಚಂಡಿ ಆಯಿನ ಅನುಭವ ಪಟ್ಟೊನ್ನಕುಲ್ಲಾ ಉಲ್ಲೆರ್.ಅತ್ ಪಿರಾಕ್ ದ ಆತ್ ಸಗ್ತಿದ ಮುಗ ಇಟ್ಟೇಲ ಮಠತ ಉಜ್ಜಾಲ್ ಡಿತ್ತಿ ಜುಮಾದಿನ ಮುಗ.ಅಂಚಿನ ಜೋಗಿಲೆ ಆರಾದ್ಯ ದೈವ ಮಣೇಲ ಜುಮಾದಿನ್ ಏರ್ ವಾ ಕಾಲೊಡು ಮರ್ಲ್ ಜುಮಾದಿ ಮಲ್ತೆರ್ ಪನ್ಪುನವು ತೆರಿಯೊಂದಿಜ್ಜಿ.ಅಂಚನೆ ತನ್ನ ತಂತ್ರ ಸಿದ್ದಿದ ದೈವ ಜುಮಾದಿನ ಉಜ್ಜಾಲಡ್ ಕುಲ್ಲುನ ಸಂಪೂರ್ಣ ಅದಿಕಾರ,ಯೋಗ ಉಪ್ಪುನಿ ಕದಿರೆ ಜೋಗಿ ಮಠತ ಜೋಗಿ ಅರಸುಲೆಗ್.ಜೋಗಿ ಸನ್ಯಾಸಿಲೆ ಸಿದ್ದಿದ ದೈವ ಮಣೇಲ ಜುಮಾದಿ ಮರ್ಲ್ ಜುಮಾದಿ‌ ಆಯೆರೆ ಸಾದ್ಯನೇ ಇಜ್ಜಿ.ವೀರೆರೆ ಆರಾದನೆದ ಅರಸೊಳಿಗೆದ ದಂಡ್ ದ ಮೂಲ ದಳವಾಯಿ ಜುಮಾದಿಯಾಂಡಲ ಆಯೆ ಮರ್ಲ್ ಜುಮಾದಿ ಅಯೆರೆ ಸಾದ್ಯ ಇಜ್ಜಿ.ಯೋಧ ಸಂಸ್ಕೃತಿಡ್ ಜುಮಾದಿ ಒರಿ ಜೂವ ದ ಆದಿ ಜುಮಾದಿ.ಮಣೇಲ ಜುಮಾದಿನ್ ವಾ ದೃಷ್ಟಿ ಕೋನೊಡು ತೂಪುಂಡಲಾ ಆಯೆ ಒರಿ ಅರಸೊಳಿಗೆದ ಯೋಧೆಂದ್ ಅರ್ಥ ಆಪುಂಡು. ಅಪಗ ಆಯೆ ಜೂವದ ಅದಿ,ನಮ್ಮ ಹಿರಿಯ ತಲೆಮಾರ್ದಾಯೆ ಆಯೆ ಎಂಚ ಮರ್ಲ್ ಜುಮಾದಿ ಆಪುನಿ.ಆಯೆ ಮಣೇಲ ಮಣ್ಣ್ ಡ್ ಜೋಗಿ ಸನ್ಯಾಸಿಲು ಸಿದ್ದಿ ಮಲ್ತ್ ನ  ಮಣೇಲ ಜುಮಾದಿಯೇ ಸರಿ.ಅವೆಕ್ ಸ್ಪಷ್ಟ ದಾಖಲೆಯಾದ್ ಕಟ್ಟುನೆಕ್ ದುಂಬುದ ದೈವದ ಉಗ್ತ ಅಬತಾರ ಸಾಗ್ಸಿಯಾಪುಂಡು.ಮರ್ಲ್ ಜುಮಾದಿಯಾಂಡ‌ ಈ ಕಟ್ಲೆ ಉಪ್ಪೆರೆ ಇಜ್ಜಾಂಡ್.ಅಂಚನೆ ಕಟ್ಟುನಕುಲು ಗುಳಿಗೆ ಅಗಿಲೆಕ ಮರ್ಲ್ ಜುಮಾದಿಗ್ ಲಾ ಕಟ್ಟ್ ದ್ ಪಜ್ಜಿ ಕೋರಿ ಅಗಿಪುನವು ಏತ್ ಸರಿ?ಜುಮಾದಿ ರಾಜಂದೈವ.ಅವೆತ ಗತ್ತ್ ಗಾಂಬೀರ್ಯನೇ ಬೇತೆ ಅಂಚಾದಿಪ್ಪುನಗ ರಾಜಂದೈವ ಆಯಿನ,ಜೋಗಿ ಸನ್ಯಾಸಿಲೆ ತಾಂತ್ರಿಕ ಸಿದ್ದಿದ ದೈವ ಆಯಿನ ಜುಮಾದಿ ಗುಳಿಗಲೆಕ ಕೋರಿ ಅಗ್ಯೆರ್ನೇ ಇಜ್ಜಿ.ಅಂಚ ಜುಮಾದಿಗ್ ಕಟ್ಟ್ ದ್ ಕೋರಿ ಅಗ್ಯೆರ್ಡ ರಾಜಂದೈವದ ಅರ್ಥ ಮಯಕಾವು.ನಿಜವಾದ್ ಜುಮಾದಿನ ಬಲತ ಕೈಟ್ ಕಡ್ಸಲೆ ಇತ್ತ್ ದ್ ಎಡತ ಕೈಟ್ ಅಗ್ಗಿದಾವಾರದ ಕೊಂಡೆ ಬಲಿ ಉಪ್ಪೊಡಾಂಡ್.ವೀರ ಯೋದೆರೆ ಸಂಕೇತ ಕಡ್ಸಲೆ ಆಂಡ,ಕೊಲಗೊಡು ಪೊರ್ಂಬುದು ಮೈ ಇಡೀ ನೆತ್ತೆರ್ ಆಯಿನೆಕ್ ಆ ದೋಷೊನು ‌ಕಳೆಯೆರೆ ದೈವ ಕೊಂಡೆ ಬಲಿನ್ ಅಗ್ಗಿದಾವಾರಂದ್ ಮೋನೆಗ್ ಪತ್ತ್ ದ್ ಸುದ್ದ ಆವೊಂತ್ಂಡ್. ಅಂಚಿನ ದೈವ ಕೋರಿ ಅಗ್ಯುನವು ಏತ್ ಸಂಗೀತ

ಅಂಚನೆ ಅನಾದಿಡ್ ಇಟ್ಟೇಲ ಜೋಗಿ ಮಠೊಟು ಮಣೇಲ ಜುಮಾದಿನ ಆರಾದನೆ ಇತ್ತ್ ದ್ ವಾ ಕಾಲೊಡು ಜುಮಾದಿನ್ ಪಿಲ್ಚಂಡಿ ಮಲ್ತೆರ ತೆರಿಯಂದ್.ಪಿಲ್ಚಂಡಿ ದೈವ ವಿಷ್ಣುಮೂರ್ತಿ ದೈವ ಆದ್ ಆರಾದನೆ ಪಡೆಯೊಂದಿಪ್ಪುನವು ಸತ್ಯ.ಆಂಡ ಜೋಗಿಲು ಉಪ್ಪುನವ್ಲು ಉಪ್ಪೊಡಾಯಿನ ಜುಮಾದಿ ದೈವ  ಇಟ್ಟೇಲ ಮಠೊಟು ಪಿಲ್ಚಂಡಿಯಾಯಿನವು ಚೋದ್ಯನೇ ಸರಿ.ಆಂಡ ಇಂಚಿಪ್ಪ ಇಟ್ಟೇಲ ಮಠತ ದೈವ ಸಾನಿದ್ಯದ ಬಗೆಟ್ ತೆರಿಯೆರೆ ಅಲ್ತ(2025 ಫೆಬ್ರವರಿ) ಹಿರಿಯಾಕ್ಲ್  ಕದಿರೆ ಜೋಗಿ ಮಠತ ನೇಮೊಡು ಕೇನ್ನಗ ದೈವ ನುಡಿ ಕೊರ್ಲೆಕ ಇಟ್ಟೇಲ ಜೋಗಿ ಮಠೊಟ್ಲಾ ಯಾನೆ ಜುಮಾದಿ ಉಪ್ಪುನಿಂದ್ ತೆರಿಪಾಂಡ್ ಗೆ.

ತುಳುನಾಡ ಅವ್ವೇತೋ ದೈವೊಲ್ನ ಪುದರ್ ಬದಲ್ತ್ ಲೆಕ ಜೋಗಿ ಸನ್ಯಾಸಿಲೆ ಸಿದ್ದಿದ ದೈವ ಮಣೇಲ ಜುಮಾದಿನ್ಲ ಮರ್ಲ್ ಜುಮಾದಿ ಮಲ್ತಿಪ್ಪೆರ್.ಉಮ್ಮದ ಉರುಂದಾರ ಪಂಜುರ್ಲಿನ್ ವರ್ಣಾರ ಪಂಜುರ್ಲಿ ಮಲ್ತ್ ಲೆಕ,ಲೆಕ್ಕೆಸಿರಿನ್ ರಕ್ತೇಶ್ವರಿ ಮಲ್ತ್ ಲೆಕ,ಮೈಸಂದಾಯನ್ ಮಹಿಷಂತಾಯಿ ಮಲ್ತ್ ಲೆಕ ನಮ್ಮ ಮಣೇಲ ಜುಮಾದಿನ್ ಮರ್ಲ್ ಜುಮಾದಿ ಮಲ್ತಿಪ್ಪೆರ್.ಅಂಚನೆ ತುಳವ ಜೋಗಿ ಅಣ್ಣು ಪುರ್ಸೆ ಕದಿರೆದ ಕೆದುಡ್ದು ಗೋರಕ ನಾಥೆರ್ ಕಾಶಿರ್ದ್ ಕನತ್‌ದ್ ನೀರ್ಡ್ ಕೌಂತ್ ದೀನ ಶಿವ ಲಿಂಗೊನು ತಲೊಕು ಕೊನತ್ ಬತ್ತ್ ದ್ ತಾಪನೆ ಮಲ್ಪುವೆ.ಅವೆರ್ದ್ ಬೊಕ್ಕ ಆಯೆ ದೈವ ಸ್ವರೂಪೊಡು ಮಾಯೆಡ್ ನೆಗತ್ ತೋಜುವೆ ಪಂಡ ಆಯನ ಅಂತ್ಯ ಎಂಚ ಆಂಡ್ ತೆರಿಯುಜಿ.ಆಂಡ ಆಯೆ ಪಂಜುರ್ಲಿನ ಸೇರಿಗೆಡ್ ಸೇರ್ದ್ ಅಣ್ಣಪ್ಪ ಪಂಜುರ್ಲಿಯಾದ್ ಜೋಗಿಲ್ನ ಕುಟುಮದ ಇಲ್ಲಲ್ ಧರ್ಮ ದೈವ ಆದ್ ಆರಾದನೆ ಪಡೆಯೊಂದುಲ್ಲೆ.