ಗಾಯತ್ರಿ ಮಂತ್ರದ ಸಗ್ತಿ

ಗಾಯತ್ರಿ ಮಂತ್ರದ ಸಗ್ತಿ

    

          

   ಪ್ರತಿಯೊಂಜಿ ನರಮಾನ್ಯನ ಮಾತ ಇಷ್ಟಾರ್ಥೊಲೆನ್ ಈಡೇರಿಸವುನ ಮಹಾನ್ ಮಂತ್ರ ಒವು ಪಂಡ ಅವು ಗಾಯತ್ರಿ ಮಂತ್ರ.ನಮ್ಮ ಅಂತಃಶಕ್ತಿನ್ ಜಾಗೃತ ಮಲ್ಪುನ ಮಂತ್ರ ಗಾಯತ್ರಿ ಮಂತ್ರ.ಅವು ನಮ್ಮ ಉಡಲ್ ದುಲಯಿ ಇತ್ತ್ ದ್ ನಮ್ಮ ಬದ್ ಕ್ ನ್ ಬೆಳಗಾವುಂಡು.ಅಂಚನೆ

ಒವ್ವೇ ಒಂಜಿ ಛಂದೋಬದ್ಧ ಮಂತ್ರೊಲೆಗ್ ಅವೆತನವೇ ಆಯಿನ ಸಗ್ತಿ ಉಂಡು.ಅವೆನ್ ಕೇನುನೆಡ್ದ್,ಪನ್ಪುನೆರ್ದ್ ನಮ್ಮ ಸುತಮುತಲಿಗೆದ ನಕಾರಾತ್ಮಕ ಸಗ್ತಿಲು ದೂರಾಪ.ಅಂಚನೆ ಮಂತ್ರೊಲು ಸಂಸ್ಕೃತ ಬಾಸೆಡಿತ್ತ್ ದ್ ಒವ್ವಾ ಒಂಜಿ ಅನಿವಾರ್ಯ ಸಂದರ್ಬೊಡು ಹೆಚ್ಚಿನ ಸಂಸ್ಕೃತ ಶ್ಲೋಕೊಲು ಉದಿತ್ ಬತ್ತ್ ದುಪ್ಪುವ.ಸಂಸ್ಕೃತ ಛಂದಸ್ಸ್ ಲೆಡ್ ಗಾಯತ್ರಿ ಛಂದಸ್ಸ್,ಅನುಷ್ಣುಪ್ ಛಂದಸ್ಸ್ ಲ್ ಪುಗಾರ್ತೆ ಪಡೆದಿತ್ತ್ ದ್ ಹೆಚ್ಚಿನ ರಚನೆಲು ಈ ಮಾತ್ರಾ ಛಂದಸ್ಸ್ ದ ಅಡಿಟ್ ಬರ್ಪ.ಒವ್ವೇ ಒಂಜಿ ಶ್ಲೋಕೊಲೆನ್ ಓದ್ ನಗಲ ಉಚ್ಛಾರದ ಸ್ಪಷ್ಟತೆ ಬೋಡು.ಒಟ್ಟಾರೆಯಾದ್ ಪಠಣ ಮಲ್ಪೆರೆ ಆಪುಜಿ.ಅಲ್ಪಪ್ರಾಣ-ಮಹಾಪ್ರಾಣ,ಲಘು-ಗುರು ಮಾತ್ರೆ,ಒಂಜೇ ಜಾತಿದ ಒತ್ತಚ್ಚರೊಲು,ಬೇತೆ ಬೇತೆ ಜಾತಿದ ಒತ್ತಚ್ಚರೊಲೆನ್ ಉಚ್ಚಾರ ಮಲ್ಪುನಗ ಚೂರು ತತ್ತ್ಂಡಲ ಅಲ್ತ ಅರ್ಥ ತಪ್ಪುಂಡು.ಅಂಚಾದ್ ಗುರುದೀಕ್ಷೆ ಮೂಲು ಪ್ರದಾನ ಆದ್ ತೋಜುಂಡು.ಗುರು ದೀಕ್ಷೆ ದಾಂ

ತೆಲ ಮಂತ್ರ ಶ್ಲೋಕೊಲೆನ್ ಓದೊಲಿ,ಕಲ್ಪೊಲಿ.ಪನ್ಪುನೆಟ್/ಉಚ್ಛಾರಣೆಡ್ ಸ್ಪಷ್ಟತೆ ಬೋಡಾತೆ.ನಿಜವಾದ್ ಮಂತ್ರ ಶ್ಲೋಕೊಲೆನ ಉಚ್ಚಾರಣೆಗ್ ಜಾತಿದ ಬೇಲಿ ಇಜ್ಜಿ.ಅಂಚಿನ ಸಂಸ್ಕೃತ ಬಾಸೆದ ಒಂಜಿ ಮಾಮಲ್ಲ ಸಗ್ತಿದ ಶ್ಲೋಕ ಗಾಯತ್ರಿ ಮಂತ್ರ.ಗಾಯತ್ರಿ ಮಂತ್ರ ಆದುಪ್ಪುನೊಟ್ಟುಗು ಛಂದಸ್ಸ್ ಲ(ಗಾಯತ್ರಿ ಛಂದಸ್ಸು)ಲ ಆದಿತ್ತ್ ದ್ ಋಗ್ವೇದದ ಕಾಲ್ ಬಾಗದಾತ್ ಗಾಯತ್ರಿಮಂತ್ರ ಛಂದಸ್ಸ್ ಉಂಡು.ಗಾಯತ್ರಿ ಪನ್ಪುನವು ನಿಜವಾದ್ ಒಂಜಿ ಛಂದಸ್ಸ್ ಆಂಡಲಾ,ಗಾಯತ್ರಿ ಮಂತ್ರೊಡು ಬಾರ್ಯಾತ್ ಮಂತ್ರೊಲಿತ್ತಡಲ ಅವೆಟ್ ಪುಗಾರ್ತೆ ಪಡೆಯಿನ ಮಾಮಲ್ಲ ಮಾನಾದಿಗೆದ ಮಂತ್ರ ಒವು ಪಂಡ ನಮ ನಿಚ್ಚ ಪಠಣೆ ಮಲ್ಪುನ ಗಾಯತ್ರಿ ಮಂತ್ರ.ಒಂಜಿ ಛಂದಸ್ಸ್ ದ ದೇವಿ ಗಾಯತ್ರಿ ದೇವಿಯಾಂಡ ಆ ಮಂತ್ರದ ಸಗ್ತಿ ದಾದಂದ್ ನಮಕ್ ಅರ್ಥ ಮಲ್ತೊನೊಲಿ. ಪ್ರಾಯಶ್ಚಿತೊಗು  ಬೋಡಾದ್  ಕಾಮ್ಯ ಕಾಂಡ,ನಿತ್ಯ ಕಾಂಡ,ನೈಮಿತ್ಯಕ ಕಾಂಡ,ಪ್ರಾಯಶ್ಚಿತ ಕಾಂಡೊಡು,ಸಂಸ್ಕಾರ ಕರ್ಮೊಡು ತೆರಿಪಾಯಿನ ಮಹಾ ಮಂತ್ರ ಗಾಯತ್ರಿ ಮಂತ್ರ .ನಮಕ್ ದೋಷ ಬರಂದಿಲೆಕ ರಕ್ಷಣೆ ಮಲ್ಪುನಾಲ್ ಪೆದ್ದಿ ಅಪ್ಪೆಯಾಂಡ ನಮಕ್ ಆದ್ಯಾತ್ಮ ಸಂಪೊತ್ತುನು ಒದಗಾವುನಾಲ್ ಗಾಯತ್ರಿ ದೇವಿ.ಅಂಚಿನ ಮೂಜಿ ಪಾದೊಲಿಪ್ಪುನ (ಸಾಲ್) ಮಂತ್ರ ಗಾಯತ್ರಿ ಮಂತ್ರ.ಒರ್ತಿ ಆಪ್ಪೆ ತನ್ನ  ಬಲ ತುಡೆತ ಮಿತ್ತ್ ಬಾಲೆನ್ ಕುಲ್ಲಾದ್ ವೇದೊಗು ಸಮವಾಯಿನ ಗಾಯತ್ರಿ ಮಂತ್ರೊನು ಬಾಲೆದ ಬಲ ಕೆಬಿಟ್  ಪಂಡಲ್ಡ ಆ ಮಂತ್ರ  ಆ ಬಾಲೆದ ದುಂಬುದ ಬದ್ ಕ್ ನ್ ಬೆಳಗಾವುನೆಕ್ ಸಂಶಯನೆ ಇಜ್ಜಿ.ಒರಿ ಈ ಮಹಾ ಮಂತ್ರದ ಉಪದೇಶ ದೆತೊನಿ ಬೊಕ್ಕ ತನ್ನ ಆತ್ಮಸಗ್ತಿನ್ ಜಾಗೃತಗೊಳಿಸಾದ್ ತನ್ನ ಗುರಿನ್ ಮುಟ್ಟೆರೆ ಸಾದಿ ಮಲ್ತ್ ಕೊರ್ಪುನವು ಗಾಯತ್ರಿ ಮಂತ್ರ.  ಮಂತ್ರ ಪನ್ಪುನವು ಒಂಜಿ ಸವ್ದ. ಮಾತ್ರ ಅತ್ತ್ ಅವೆತ  ಒಟ್ಟುಗು ನಮ್ಮ ಬದ್ ಕ್ ದ ಉದ್ದಾರದ ಕಲ್ಪನೆಲ ಉಂಡು.ಮಂತ್ರ   ಸರಿಯಾದಿತ್ತ್ಂಡ ಅವೆಟ್ ಧನಾತ್ಮಕ ಸಗ್ತಿ ಬುಡುಗಡೆಯಾಪುಂಡು.ಉಚ್ಛಾರಣೆ ಸ್ಪಷ್ಠ ಆದಿಜ್ಜಿಂಡ ಅವೆಟ್ ಋಣಾತ್ಮಕ ಸಗ್ತಿ ಉಂಡಾಪುಂಡು. ಮಂತ್ರೊಲೆನ್ ಪಠಣ ಮಲ್ಪುನಗ ಅವು ಕೇನೆರೆ ಆಪುಲೆಕ ಇಂಪಾದಿಪ್ಪೊಡು ವಿನಃ ಕೇನೆರೆ ಹರಟೆ ಆಪುಲೆಕ ಉಪ್ಪೆರೆ ಬಲ್ಲಿ.ನಮಕ್ ಪಿದಯಿ ತೋಜುನ ಸಗ್ತಿಲು ಬಾರೀ ಕಾರ್ನಿಕದ ಸಗ್ತಿಯಾದ್ ತೋಜುಂಡು . ಆಂಡ ನಮ್ಮುಲಯಿ ಉಪ್ಪುನ ಗಾಯತ್ರಿ ಮಂತ್ರದ ಸಗ್ತಿ ನಮಕ್ ತೋಜುಜಿ.ದುಂಬು ನಮ ಅಂತಃಶಕ್ತಿಯಾಯಿನ ಗಾಯತ್ರಿ ಮಂತ್ರೊಗು ಮಾನಾದಿಗೆ ಕೊರೊಡು.

ಈ ಗಾಯತ್ರಿ ಮಂತ್ರೊನು ಉಂಡು ಮಲ್ತ್ ನಾರ್ ವಿಶ್ವಾಮಿತ್ರ ರುಸಿಕುಲು.ಅರೆಗ್ ಗೇನದ ಉದಿಪುದ ತುಡರಾದ್ ಬೆಳಗ್ ದ್(ಜ್ಞಾನೋದಯ) ಬೈದ್ ನವು ಗಾಯತ್ರಿ ಮಂತ್ರ.ಈ ಇಚಾರದ ವರ್ಣನೆ ರಾಮಾಯಣದ ಬಾಲಕಾಂಡದ ಅದ್ಯಾಯ 51 ರ್ದ್ ಅದ್ಯಾಯ65ಮುಟ್ಟ ಇತ್ತ್ ದ್ ಶತಾನಂದೆರ್ ಶ್ರೀರಾಮದೇವೆರೆಗ್ ಉಂದೆನ್ ಪಂತೆರ್ ಪನ್ಪಿ ಇಚಾರದ ಉಲ್ಲೇಖ ರಾಮಾಯಣದ ಬಾಲಕಾಂಡೊಡು ಉಂಡು.ಆ ಗಾಯತ್ರಿ ಮಂತ್ರ ಇಂಚ ಉಂಡು..

ಓಂ ಭೂರ್ಭುವಃ ಸ್ವಃ

ತತ್ಸವಿತುರ್ವರೇಣ್ಯಂ ಭರ್ಗೋದೇವಸ್ಯ ಧೀಮಹಿ

ಧಿಯೋ ಯೋ ನಃ ಪ್ರಚೋದಯಾತ್

  ಉಂದುವೇ ದೈವೀಕವಾಯಿನ 24 ಅಕ್ಷರೊಲಿಪ್ಪುನ ಗಾಯತ್ರಿ ಮಂತ್ರ. ಮೂಲು ಮೂಜಿ ಸಾಲುಲು ಇತ್ತ್ ದ್ 8 ಸವ್ದೊಲುಲ್ಲ.ಗಾಯತ್ರಿ ಮಂತ್ರದ 24ಅಕ್ಷರೊಲೆಡ್ 24 ದೇವತೆಲಿತ್ತ್ ದ್ ಉಚ್ಛಾರಣೆ ಮಲ್ಪುನಗ ಆ ದೇವತೆಲ್ನ ಆವಾಹನೆಯಾಪುಂಡು.ಈ ಮಂತ್ರೊಗು 24ಜಾಗೃತ ಶಕ್ತಿಲುಂಡು.ಗಾಯತ್ರಿ ಮಂತ್ರ ಪಠಣೆರ್ದಾದ್ ನಮಕ್ ಶಕ್ತಿದೊಟ್ಟುಗು ಸಿದ್ದಿಲು ಪ್ರಾಪ್ತಿಯಾಪುಂಡು. ಓಂ ಭೂರ್  ಭುವಃ ಸ್ವಹ ತತ್ ಸವಿತುರ್ ವರೇಣ್ಯಂ ಭರ್ಗೋ ದೇವಸ್ಯ ಧೀಮಹಿ ದಿಯೋಯೊನಃ ಪ್ರಚೋದಯಾತ್ .ಉಂದು ಆ ಸವ್ದೊಲು.ಮೂಲು ಬರ್ಪುನ ಓಂಕಾರ ಸೊರೊಟು ಪ್ರಕೃತಿದ ಸೃಷ್ಠಿ,ಸ್ಥಿತಿ,ಲಯೊಕುಲು ಸೇರ್ದುಂಡು.ಭೂ ಪಂಡ ಭೂಮಿ,ಭೂಲೋಕ. ರ್ಭುವಃ ಪಂಡ ನಮ್ಮ ಕಣ್ಣ್ ಗ್ ತೋಜುನ ಅಂತ್ರಟ/ಅಂತ್ರಾಟ/ ಅಂತರಿಕ್ಷ/ ಆಕಾಶ.ಆಕಾಶೊಡಿಪ್ಪುನ ಕಾಯೊಲು ಪಂಡ . ಸೂರ್ಯೆ,ಚಂದ್ರೆ,ನಚ್ಚತ್ರ,ಗ್ರಹೊಕುಲು.ಸ್ವಃ ಪಂಡ ಸ್ವರ್ಗ.ಧೀಮಹಿ ಪಂಡ ದ್ಯಾನ ಮಲ್ಪೆರೆ.ಭರ್ಗ ಪಂಡ ಜ್ಞಾನದ ಮಿತ್ತ್.ನನೊಂಜರ್ಥ ಅಜ್ಞಾನ,ಪಾಪ ನಾಶ ಮಲ್ಪುನಂದ್.ವರೇಣ್ಯಂ ಪಂಡ ಮಹಾ ಜ್ಞಾನದ ಮಿತ್ತ್..ದೇವಸ್ಯ ಪಂಡ ದೇವೆರೆನಾತ್ ಮಲ್ಲ ಜ್ಞಾನ.ಜ್ಞಾನದ ದೇವೆರೆ ರೂಪಂದ್ ಲ ಅರ್ಥ ಉಂಡು,.ಸವಿತುರ್ ಪಂಡ ಸೂರ್ಯೆ(ಸೂರ್ಯನಾತ್ ಬೊಲ್ಪು ಬೇತೊಂಜಿಜ್ಜಿ). ತತ್ಸವಿತುರ್ವರೇಣ್ಯಂ ನು ಇಂಚಲ ವ್ಯಾಖ್ಯಾನ ಕೊರ್ಪೆರ್.ತಃ ಪಂಡ ಪರಮಾತ್ಮೆ/ಬ್ರಹ್ಮೆ,ಸವಿತುರ್ ಪಂಡ ದೇವೆರ್/ಬ್ರಹ್ಮಾಂಡದ ಸೃಷ್ಠಿಕರ್ತೆ/ಸೂರ್ಯೆ,ವರೇಣ್ಯಂ ಪಂಡ ಆರಾದನೆ ಪಡೆಯುನಾಯೆ. ಪ್ರಚೋದಯಾತ್ ಪಂಡ ಪ್ರಚೋದನೆಗೊಳಗಾವೊಡು.ಓಡೆಗ್ ಪಂಡ ನಃ ದಿಯ ಪಂಡ ನಮ್ಮ ಬುದ್ದಿಗ್ ಪ್ರಚೋದನೆಯಾವೊಡು.ಧೀಮಹಿ ಧಿಯೋ ಪಂಡ ನಮ ಬುದ್ಧಿ ಬೊಕ್ಕ ಬುದ್ಧಿವಂತಿಕೆನ್ ಧ್ಯಾನ ಮಲ್ಪುವ.ಯೋ ನಃ ಪಂಡ ನಮ.  ನಃ ಪಂಡ ನಮ್ಮ ಪಂಡ್ ದ್ ಅರ್ಥ.ಮೂಲು ಯಾನ್ಂದ್ ಪನಂದೆ ನಮ್ಮ  ಪಂಡ ಜಗತ್ತ್ ದ ಮಾತೆರ್ನಂದರ್ಥ.ಈ ಕಡೇತ ಸಾಲ್ ದ ಅರ್ಥೊರ್ದಾದ್ ಗಾಯತ್ರಿ ಮಂತ್ರ ಜಗತ್ತ್ ದ ಎಚ್ಚಿನಕ್ಲೆಗ್ ಮುಟ್ಟ್ ದ್ಂಡ್. ಯಾನ್ ವಾ ಜ್ಞಾನೊನು ಪಡೆಯೊಡುಂದುಲ್ಲೆನಾ ಆ ಮಾಮಲ್ಲ ಜ್ಞಾನ ಎಂಕ್  ಏರೆರ್ದ್ ಬರೊಡು ಪಂಡ ಸೂರ್ಯರ್ದ್ ಬರೊಡು ಪಂಡ ಸೂರ್ಯನ ಬೊಲ್ಪುದಾತ್ ಬೊಳಿಕಿರಾಯಿನ(ಪ್ರಖರ ಆಯಿನ) ಜ್ಞಾನ ಬರೊಡುಂದರ್ಥ.ನಮ್ಮ ಬದ್ ಕ್ ಎಂಚ ಉಂಡು ಪಂಡ ನಮ ಭೂಲೋಕ,ಅಂತ್ರಾಟ/ ಅಂತರೀಕ್ಷ ಲೋಕ(ಅಕ್ಕಸ ಪಂಡ ಕಣ್ಣ್ ಗ್ ತೋಜುನ ಲೋಕ)  ಬೊಕ್ಕ ಸ್ವರ್ಗ ಲೋಕದ (ಕಣ್ಣ್ ಗ್ ತೋಜಂದಿನ) ಸಂಬಂದೊನು ಪಡೆದುಲ್ಲ.ಅಪಗ ಬೂಮಿಡಿತ್ತ್ ನ ನಮ ಮೋಕ್ಷೊಗು(ಸೊರ್ಗೊಗು) ಪೋವೊಡಂಡ ನಮ ಮಾಮಲ್ಲ ಜ್ಞಾನ ಸಂಪಾದನೆ ಮಲ್ಪೊಡು.ಈ ಮಂತ್ರದ ಒಟ್ಟು ತಿರ್ಲ್ ದಾದ ಪಂಡ ಯಾನ್ ಸವಿತ ದೇವಿನ ಪಂಡ ಸೂರ್ಯನ ದ್ಯಾನ ಮಲ್ತೊಂದುಲ್ಲೆ ಇಜ್ಜಾ ನಮ ಎನ್ನಿನ ದೇವೆರೆ ದ್ಯಾನ ಮಲ್ತೊಂದುಲ್ಲೆ,ಏತ್ ದ್ಯಾನ ಮಲ್ತೊಂದುಲ್ಲೆ ಪಂಡ ಎನ್ನ ಜ್ಞಾನ ಸೂರ್ಯನ ಬೊಲ್ಪುದಾತ್ ಬೊಳಿಕಿರಿದಾತ್ (ಪ್ರಖರವಾಯಿನ) ಮಲ್ಲ ಜ್ಞಾನ ಆದ್, ಎನ್ನ ಜ್ಞಾನ ಮಾಮಲ್ಲ ದೇವೆರೆ  ಜ್ಞಾನದಾತ್ ಮಲ್ಲ ಜ್ಞಾನ ಆದ್ ಪ್ರಚೋದನೆಯಾವಡ್ಂದ್ ದ್ಯಾನ ಮಲ್ತೊಂದುಲ್ಲೆ.ಮೂಲು ವಿದ್ಮಹೆ,ಧೀಮಹಿ,ಪ್ರಚೋದಯಾತ್ ಈ ಮೂಜಿ ಸವ್ದೊಲು ಪ್ರದಾನ ಆದುಂಡು.ಯಾನ್ ದ್ಯಾನ ಮಲ್ಪುವೆ,ಧೀಮಹಿ ಪಂಡ ಧ್ಯಾನ,ಪ್ರಚೋದಯಾತ್ ಪಂಡ ಪ್ರಚೋದನೆ.ಪ್ರಚೋದಯಾತ್ ಪಂಡ ಬೆಳಗ್ ಲ(ಪ್ರಕಾಶಿಸು) ಪಂಡ್ ದ್ ಲ ಅರ್ಥ ಉಂಡು.,ವಿದ್ಮಹೇ ಪಂಡ ಎನ್ನ ಜ್ಞಾನ ಆ ದೇವೆರೆ  ಮಹಾ ಜ್ಞಾನೊಗು ಸರಿ ಸಮಾನ ಆದಿಪ್ಪೊಡುಂದು ಯಾನ್ ಆ ದೇವೆರೆ ಪುದರ್ ಡ್ ಧ್ಯಾನ ಮಲ್ತೊಂದುಲ್ಲೆಂದ್ ಅರ್ಥ.ಅಪಗ ಮೂಲು ಓಂ ಭೂ ಟು ಬೂಮಿ ಪಂಡ ಸೃಷ್ಠಿ ಉಂಡು,ಭುವ ಟ್ ತೋಜುನ ಅಕ್ಕಸ ಉಂಡು,ಸ್ವಃ ಟು ಕಣ್ಣ್ ಗ್ ತೋಜಂದಿ ಸ್ವರ್ಗ ಉಂಡು.ಅಂಚಾದ್ ನಮ್ಮ ವಿಶ್ವ ಕಲ್ಪನೆದ ಬದ್ ಕ್ ಡ್ ಒಂಜೆನ್ ಬುಡ್ದು ಒಂಜಿ ಇಜ್ಜಿ ಪನ್ಪುನವು ಸೊಸ್ಟ ಆದ್ ಮೂಲು ತೋಜುಂಡು.ಒಟ್ಟು ಗಾಯತ್ರಿ ಮಂತ್ರೊನು ಸರಳವಾದ್ ಅರ್ಥ ಮಲ್ತೊನುಂಡ  ಬೂಮಿ ಅಕ್ಕಸ ಸೊರ್ಗೊ ಲೋಕೊಡು ಸಾಸಿತಾದ್ ಉಪ್ಪುನ ಸೃಷ್ಠಿಕರ್ತ ದೇವೆರೆನ್,ಉದಿಪು ದೇವೆರೆನ ಬೊಳಿಕಿರಿನ್ ನಮ ದ್ಯಾನ ಮಲ್ಪುವ,ಆ ದಿವ್ಯವಾಯಿನ ಗೇನದ ಬೊಲ್ಪು ನಮ್ಮ ಬುದ್ದಿನ್ ಸರಿಯಾಯಿನ ಮಾರ್ಗೊಡು ನಡಪಾಯೆರೆ ಸಾದಿ ಮಲ್ತ್ ಕೊರಡ್(ಪ್ರೇರೇಪಣೆ ಮಲ್ಪಡ್) ಪಂಡ್ದ್ ಮಿತ್ತ್ ರ್ದ್ ಮಿತ್ತ್ ಅರ್ಥ ಮಲ್ತೊನೊಲಿ.ಆಂಡ ಉಳ ತಿರ್ಲ್ ದ ಅರ್ಥ ತೆರಿಯೊನೆರೆ ಆತ್ ಮಲ್ಲ ಗೇನ ಸಗ್ತಿ ಬೋಡು.

                       

                ಅಪಗ ಗಾಯತ್ರಿ ಮಂತ್ರ ಉದಿತ್ ನ ಸಂಧರ್ಬೊನು ತೆರಿಯೊನ್ಗ.   ಕುಶ ಸಾಮ್ರಾಜ್ಯದ ದೊರೆ ಕೌಶಿಕ ಮಹಾರಾಜೆ.ಈ ಕೌಶಿಕೆನೆ ದುಂಬುಗು ವಿಶ್ವಾಮಿತ್ರ ಮುನಿಯಾಪುನಿ.ಈ ಕೌಶಿಕೆ ಒಂಜಿ ಅಕ್ಷೋಹಿಣಿ (21870 ತೇರ್ ಲು,21870 ಆನೆಲು,61650 ಕುದುರೆಲು,19350 ಸೈನಿಕೆರ್-ಉಂದು ಒಂಜಿ ಅಕ್ಷೋಹಿಣಿ ಸೈನ್ಯ.ಪ್ರಾಣಿಲೆನ್,ತೇರ್ ಲೆನ್ ಪೂರ ತೋವುನನ ಜನ ಸೇರ್ಂಡ ರಡ್ಡೆರ್ದ್ ಮೂಜಿ ಲಕ್ಷ ಜನ ಆವು ) ಸೈನ್ಯದೊಟ್ಟುಗು ದೇಶ ಸುತ್ತೆರೆ ಪೋಪೆ.ಈತ್ ಮಲ್ಲ ಸೈನ್ಯ ಕಟ್ಟೊಂದು ವಶಿಷ್ಠ ಮುನಿಕ್ಲೆಡ ಪೊ್ಂಬಾಟ ಮಲ್ಪೆರೆ ಪೋಪೆ.ಆಂಡ ವಶಿಷ್ಟೆರ್ ಪೊರ್ಂಬೆರೆ ಪೋವಂದೆ ಅಕ್ಲೆಗ್ ಬಿನ್ನೆರೊರುತ ಸತ್ಕಾರ ಕೊರ್ಪೆರ್.ಅರೆನ ಆಶ್ರಮೊಡು ಶಬಲ ಪನ್ಪುನ ಪೆತ್ತ ಇತ್ತ್ ದ್ ಏರ್ ಏತ್ ಬತ್ತೆರ್ಡಲ ಅಕ್ಲೆ ಬಡವು ಬಸಜೆಲ್ ಮಾಜಾವುನ ತಾಕತ್ತ್ ದ ಕಾಮದೇನು ಅವ್ವಾದಿತ್ತ್ಂಡ್.ಕೌಶಿಕ ಮಹಾರಾಜೆ ವಶಿಷ್ಠೆರ್ಡ ಆ ಪೆತ್ತೊನು ಎಂಕ್ ಕೊರ್ಲೆ,ಇರೆಗ್ ದಾದ ಬೋಡಾಂಡಲಾ ಕೊರ್ಪೆಂದ್ ಪಂಡಲ ವಶಿಷ್ಠೆರ್ ಒಪ್ಪುಜೆರ್.ಯಾನ್ ಈತ್ ಮಲ್ಲ ಮಹಾರಾಜೆ,ಈತ್ ಮಲ್ಲ ಅಕ್ಷೋಹಿಣಿ ಸೈನ್ಯ ಉಂಡು,ಈ ಸನ್ಯಾಸಿ ಒಂಜಿ ಪೆತ್ತನ್ ಕೇಂಡ ಕೊರ್ಜೆತ್ತಂದ್ ಕೌಶಿಕಗ್ ಅವಮಾನ ಆಯಿಲೆಕ ಆದ್ ಎವ್ರ ಬತ್ತ್ ದ್ ಯಾನ್ ದಾದಾಂಡಲ ಸಾಧನೆ ಮಲ್ಪೊಡು ಬ್ರಹ್ಮ ಋಷಿ ಆವೊಡುಂದು ಕೌಶಿಕ ಮಹಾರಾಜೆ ತಪಸ್ಸ್ ಗ್ ಕುಲ್ಲುವೆ.ಏತ್ ಧ್ಯಾನ ಮಲ್ತ್ಂಡಲ ಒಂತೆ ಪೊರ್ತಾನಗ ಏಕಾಗ್ರತೆದ ಸಗ್ತಿ ಕುಂದೆಲಾವೊಂತ್ಂಡ್.ಆಂಡಲ ಹಠ ಬುಡಂದೆ ಕೌಶಿಕೆ ದ್ಯಾನೊಗು ಕುಲ್ಲ್ ನಗ ಒಂಜಿ ದಿನ ಗೇನದ ಒರುಟು ( ಜ್ಞಾನೋದಯ )  ಉದಿತ್ ಬತ್ತ್ ನವೇ ಈ ಗಾಯತ್ರಿ ಮಂತ್ರ.ಆ ಮಂತ್ರದ ಸಗ್ತಿದ ಒರುಟು ಧ್ಯಾನ ಮಲ್ತ್ ದ್ ಬ್ರಹ್ಮನ್ ಕೌಶಿಕೆ ಒಲಿಸಾದ್ ಬ್ರಹ್ಮ ಜ್ಞಾನ ಪಡೆದ್ ಕೌಶಿಕೆ ಪೋದು ವಿಶ್ವಾಮಿತ್ರ ಮಹರ್ಷಿಯಾಪೆ.ಒರಿ ರಾಜೆ ಆದಿತ್ತ್ ನ ವ್ಯಕ್ತಿ ಬ್ರಹ್ಮ ಜ್ಞಾನ ಪಡೆದ್ ವಿಶ್ವೊಗೇ ಮಿತ್ರೆ ಆಪುಲೆಕ ಮಲ್ತ್ ದ್ ನಿ ಆಯನ ಗೇನದ ಬೊಲ್ಪುಡು ಉದಿತಿ ಗಾಯತ್ರಿ ಮಂತ್ರ.

          ಸಂಸ್ಕೃತಿದ ಮೂಲದ ವೇದೊಲೆ ಮಂತ್ರೊಲೆಡ್ ಗಾಯತ್ರಿ ಮಂತ್ರೊಗು ಬಾರೀ ಮಲ್ಲ ಮಾನಾದಿಗೆ ಇತ್ತ್ ದ್ ಉಂದೆನ್ ಮಂತ್ರೊಲೆ ರಾಜೆಂದ್ ಲ ಪನ್ಪೆರ್.ಮಹರ್ಷಿಲು ಈ ಮಂತ್ರೊನು ಒವ್ವಾ ಒಂಜಿ ಅನಿವಾರ್ಯ ಸಂದರ್ಬೊಡು ನಾಡ್ ಪತ್ತ್ ದ್,ಅವೆನ್ ಅಕ್ಲೆ ಬದ್ ಕ್ ಡ್ ಅಲ್ಮೋಗದ ಒರುವಾದ್ ಆಚರಿಸದ್,ಉಪದೇಶದ ಮೂಲಕ ಅವೆತ ಮಹತ್ವೊನು ಲೋಕೊಗು ತೆರಿಪಾದೆರ್.ಗಾಯತ್ರಿ ಮಂತ್ರೊಗು ಅವೆತನವೆ ಆಯಿನ ಮಹತ್ವ ಉಂಡು.ಸಸ್ವರವಾದ್,ಉಡಲ್ ಡ್ ಚಿಂತನೆ ಮಲ್ತೊಂದು ನಮ ಎನ್ನಿನ ದೇವೆರೆನ್(ಸವಿತುರ್ ದೇವೆರ್ ) ಉಡಲ್ ದುಲಯಿ ಬರ್ಪುಲೆಕ ಪ್ರಾರ್ಥನೆ ಮಲ್ತೊಂದು ನಮ ಪತ್ತ್ ಸರ್ತಿ ಗಾಯತ್ರಿ ಮಂತ್ರೊನು ಪಠಣ ಮಲ್ತ ಪಂಡ ನಮ್ಮ ಮೇಧಾ ಸಗ್ತಿ,ಪ್ರಜ್ಞಾ ಸಗ್ತಿ,ಆತ್ಮ ಸಗ್ತಿಲು ತಪಸ್ಸ್ ದ ಸಗ್ತಿಯಾದ್ ನಮ್ಮ ಉಡಲ್ ಗ್ ಬತ್ತ್ ಸೇರುಂಡು.ಗಾಯತ್ರಿ ಉಪಾಸನೆ ಮಲ್ತ್ಂಡ ನಮಕ್ ಐಶ್ವರ್ಯೊಗು ಲಕ್ಷ್ಮಿಯಾದ್ ಅನುಗ್ರಹ ಮಲ್ಪುವಲ್,ವಿದ್ಯೆಗ್,ಜ್ಞಾನೊಗು ಸರಸ್ವತಿಯಾದ್ ಅನುಗ್ರಹ ಮಲ್ಪುವಲ್,ಅನಾವಶ್ಯಕವಾದ್ ನಮನ್ ದ್ವೇಶ ಮಲ್ಪುನಕ್ಲೆಗ್ ಕಾಳಿಯಾದ್ ನಮನ್ ಅಕ್ಲೆರ್ದ್ ರಕ್ಷಣೆ ಮಲ್ಪುವಲ್.ಅಂಚಿನ ಮಹಾನ್ ಗಾಯತ್ರಿ ಮಂತ್ರೊನು ನಮ ಪಠಣೆ ಮಲ್ಪುನೊಟ್ಟುಗು ನಮ್ಮ ಒಟ್ಟೊಟ್ಟುಗು ಅಪ್ಪೆರ್ದ್ ಲೋಕೊಗ್ಲ ಎಡ್ಡೆ ಆವಡ್ಂದ್ ನಟ್ಟೊನುಗ.