ವಾಕ್ ದೋಸ ಬೊಕ್ಕ ಪಿರಿಕಟ್ಟ್

ವಾಕ್ ದೋಸ ಬೊಕ್ಕ ಪಿರಿಕಟ್ಟ್

 

ದೈವ ದರಿ ತುಡರ್ ಕೈಕೊನುನ ಬಾರೆದ ಬಂಬೆದ ಕುಂದ
  

-ಪಾತೆರ ಬುಡಯೆ ಮಂಜುನಾಥೆ. ಅಂಚಾದ್ ಮಂಜುನಾಥಗ್ ವಾಕ್ ಸಂದಾಯ್ತ .

ಕಾಸ್ ಬುಡಯೆ ತಿಮ್ಮಪ್ಪೆ.ಅಂಚಾದ್ ತಿಮ್ಮಪ್ಪಗ್ ಮುಡಿಪು ಸಂದಾಯ್ತ-

            ದೈವಾರಾದನೆನ್ ಮಲ್ಪುನ ಹೆಚ್ಚಿನ ಕುಟುಮೊಲೆಡ್,ಇಲ್ಲಲ್ ಅಕ್ಲೆ ಹಿರಿಯಾಕ್ಲ್ ದಾದನಾ ಕೋಪೊಡು ದೈವದ ಮಿತ್ತ್ ವಾಕ್ ದೀದುಪ್ಪುವೆರ್.ಆ ವಾಕ್ ಮರಿತ ಇಸತಾತ್ ಪಲಿಪು ಇಪ್ಪುಂಡು.ಅಂಚಾಂದ್ ತರೆ ಬೆಚ್ಚ ಮಲ್ಪೊಡುಂದು ಇಜ್ಜಿ.ಅವೆಕೊಂಜಿ ಪಿರಿ ಕಟ್ಟ್ ಲಾ  ಉಪ್ಪುಂಡು. ಬೊಳ್ಳಿಡೇ ಕೈ ನಾಲಾಯಿ ಒಪ್ಪಿಸವುನಿ.ಬಂಗಾರ್ಡ್ ಒಪ್ಪಿಸವೊಡುಂದಿಜ್ಜಿ.ಅವು ಮಾತ ಆಡಂಬರ .ಹಿರಿಯಾಕ್ಲ್ ದೀನ ವಾಕ್ ನಮಕ್ ತೆರಿದುಪ್ಪುಜಿ.ಆಂಡ ಅವೆತ ಪೆಟ್ಟ್ ಕುಟುಮದ,ಸಂಸಾರದ ಮಿತ್ತ್ ಖಂಡಿತಾ ಬೂರುಂಡು.ದೈವದ ಮಿತ್ತ್ ವಾಕ್ ದೀದ್ ಅವೆತ ದೋಸೊಡು ಕುಟುಮ ಅಳಿಯಂತ್ರ ಆಯಿನಲಾ ಉಂಡು.ಅವು ಪ್ರಸ್ನೆ ಚಿಂತನೆಡಾ ಕುಟುಮದ ಪಂಜುರ್ಲಿನ ನಡೆಟ್ ದೈವದ ನುಡಿಟ್ ನಮಕ್ ಒರೊರ ಗೋಚಾರ ಆಪುಂಡು‌.ಕೆಲವೊರ ಮಾನೆಚ್ಚಿಲ್ ದೀನಗ ಅಕುಲು ನಿಕ್ಲೆ ಕುಟುಮೊಗು ವಾಕ್ ದೋಸ ಉಂಡುಂದು ಪನ್ಪುನಲಾ ಉಂಡು.ಅಕುಲು ಪಂಡೆರ್ಂದ್ ನಂಬುನಿಯತ್ತ್. ಏಕಪಕ್ಷೀಯ ನಿರ್ಣಯೊರ್ದು ಬಹುಪಕ್ಷೀಯ ವಿಮರ್ಷೆ ಎಡ್ಡೆ.ಅಂಚಾದ್ ಒಂಜಿ ದಿನ ಐತಾರದಾನಿ ಬಲ್ಯಾಯನಡೆ ಪೋದು ರಾಸಿ ಭಾವೊಡು ಎಂಕ್ಲೆನ ದೈವದಲಾ,ಎಂಕ್ಲೆ ಕುಟುಮದ ನಡವಳಿಕೆದ ಬಗೆಟ್ ಒಂಜಿ ಪ್ರಶ್ನೆ ಬೋಡುಂದು ಕೇನೊಡು. ತತ್ತ್ ದ್ ಮಿನಿ ವಾಕ್ ದೋಸದ ದೃಷ್ಟಾಂತೊಡು ಪಾಪೆ ಬೂರೊಂದುಂಡಾಂದ್ ನಮ ಪ್ರಸ್ನೆ ಪಾಡೆರೆ ಬಲ್ಲಿ. ನಮ ಅಂಚ ಕೇಂಡ ಅವೆಕ್ ಬೋಡಾಯಿಲೆಕ ಅಕುಲು ಪ್ರಸ್ನೆ ತಿರ್ಗಾವೆರ್.ಪ್ರಶ್ನೆಡ್ ಉತ್ತರ ತಿಕ್ ಜಿಂಡ ಪಾಪೆಗ್ಲ ವಾಕ್ ಗ್ಲ ದಾದ ಸಮ್ಮಂದಂದ್ ಅಕ್ಲೆಡ  ವಿಮರ್ಷೆ ಮಲ್ಪೊಲಿ .ಇಸಯ ತೆರಿನೆರ್ದ್ ಬೊಕ್ಕ ನಮ ಅವೆಕೊಂಜಿ ಪಿರಿಕಟ್ಟ್ ಮಲ್ಪೊಡಾಯಿನವು ನಮ್ಮ ಕರ್ತವ್ಯ.ಇಜ್ಜಿಂಡ ಕುಟುಮ ಸಂಸಾರೊಗು ಕುಡಲಾತ್  ದೋಸೊಲು,ಕಷ್ಟ ಕೊರೊದೊಲು ಬರ್ಪ.ಕೆಲವೊಂಜಿ ಕುಟುಮೊದ ಇಲ್ಲಲಾ,ಅತ್ತ್ ಇಲ್ಲಲಾ ದೈವದ ಸಂಕ್ರಾಂತಿ ಕರಿಪುನಗ ದೈವದ ಮಣೆ ಮಂಚೊಡು ಬಲಸಿ ಪನಿವಾರ,ಬೊಂಡ ಪೂರ ಇತ್ತ್ ಲೆಕನೆ ದೈವದ ಮಣೆ ಮಂಚ ಕಡಿದ್ ಬೂರುನಲಾ ಉಂಡು.ಕೆಲವು ತಿಕ್ ಡ್ ಪ್ರತಿ ಸರ್ತಿ ಸಂಕ್ರಾಂತಿ ಕರಿಪುನಗಲಾ ಒಂಜತ್ತ್ ಒಂಜಿ‌ ದೈವದ ಪಾಪೆ ಬೂರುನಲಾ ಉಂಡು.ಒಂಜಿ ಕಾಲದ ದೈವದ ಮಿತ್ತ್ ದೀನ ವಾಕ್ ರ್ದಾದ್ ದೈವ ಸಾನಿದ್ಯೊಗು ಕುಂದೆಲ್ ಬನ್ನಗ ಅವು ಕೆಲವೊಂಜಿ ದೃಷ್ಟಾಂತೊಲೆನ್ ತೋಜಾವುಂಡು .ಉಂದು ವಾಕ್ ದೋಸದ ಸಕನಂದ್ ಹಿರಿಯಾಕ್ಲ್ ಪನ್ಪೆರ್.ಕೆಲವೊರ ಇಂಚಾಯೆರೆ (ಮಣೆ ಮಂಚ ಬೂರೆರೆ,ಪಾಪೆಲು ಬೂರೆರೆ)ವಾಕ್ ದೋಸ ಆದಿಪ್ಪು ಪನ್ಪಿ ಸಂಸಯಲಾ ನಮಡ ಉಪ್ಪುಂಡು.ಅಂಚಾಂದ್ ವಾಕ್ ದೋಸೊಗು ನೇರ ದೃಷ್ಟಾಂತ ತಿಕ್ಕುನಿ ಕಮ್ಮಿ.ದೈವದ ಮಿತ್ತ್ ವಾಕ್ ದೀದಿತ್ತೆರ್ಡ ಇಂಚಿನ ಪೂರ ದೋಸೊಲು ತೋಜೆರೆ ಸಾದ್ಯ. 

ವಾಕ್ ಡ್ ರಡ್ಡ್ ನಮುನೆದ ವಾಕ್ ಉಂಡು

1.ವ್ಯಕ್ತಿರ್ದ್ ವ್ಯಕ್ತಿಗ್ ದೀಪುನ ವಾಕ್.

2.ಕುಟುಮ ಸಮ್ಮಂದಿಯಾಯಿನ ವಾಕ್.

           1.   ವ್ಯಕ್ತಿರ್ದ್ ವ್ಯಕ್ತಿಗ್ ದೈವದ ಮಿತ್ತ್ ದೀನ ವಾಕಾಂಡ ರಡ್ಡ್ ಕಡೆತಕ್ ಲ್ಲ ಇತ್ತೆರ್ಡ ರಡ್ಡ್ ಇಲ್ಲದಕುಲ್ಲ ಅಕ್ಲಕ್ಲೆನ ಇಲ್ಲದ ದೈವ ದೇವೆರೆಗ್ ಕೈಮುಗಿದ್ ವಾಕ್ ಪಿರಿಪುನ ಸೊತ್ತುಲೆನ್ ಒಪ್ಪಿಸಾವುನ ಇಲ್ಲದಕುಲು ಮಾತ್ರ ಒಪ್ಪಿಸವುನ ಸೊತ್ತುಲೆನ್ ತೊಲಸಿ ಕಟ್ಟೆದ ಎದುರು ದೀದ್ ಅವ್ಲು ತೊಲಸಿ ಕಟ್ಟೆಗ್ ಅಡ್ಡ ಬೂರೊಡು.ಬೊಕ್ಕ ಅಕ್ಲಕ್ಲೆನ ಇಲ್ಲಲ್ ರ್ದೇ ಪಿದಡೊಡು.ರಡ್ಡ್ ಇಲ್ಲದಕುಲ್ಲಾ ಬೇತೆ ಬೇತೆಯಾದ್ ಲ ಪಿದಡೊಲಿ .ಬೊಲ್ಪುಗು ತೊಲಸಿಗ್ ನೀರ್ ಮೈಪುನ ದುಂಬು ವಾಕ್ ಸಮ್ಮಂದದ ಸೊತ್ತುಲೆನ್ ತೊಲಸಿ ಕಟ್ಟೆಡ್ ದೀದಾವೊಡು .

ಅಂಚನೆ ದೈವ ದೇವೆರೆಗ್ ಕೈ ಮುಗಿನಗಲ,ತೊಲಸಿಗ್ ಕೈ ಮುಗಿನಗಲ  ಇಂಚ ಮದಿಪೆರೆ ಉಂಡು.

"ಎಂಕ್ಲು ಇಂಚಿತ್ತ್ ನ ಕೆಲಸೊಗು ಪಿದಡೊಂದುಲ್ಲ, ಇಂಚಿತ್ತ್ ನ ಸೊತ್ತುಲೆನ್ ಅಡೆ ಕಾನಿಗೆ ರೂಪೊಡು ಸಂದಾಯ್ತಮಲ್ತೊನ್ರೆ ಉಲ್ಲ.ಅಂಚಾದ್ ಎಂಕುಲು ತಲೊಕು ಪೋದು ಕಾರ್ಯೊನು‌ ನಡಪಾವುನಲ್ಪ ನಂಬಿ ಸತ್ಯೊಲು ಬೆರಿಸಾಯ ಆದಿತ್ತ್ ದ್,ನನ ಮೇಲ್ ಗ್ ಆ ವಾಕ್ ಪರಿಹಾರ ಆದ್, ಎಂಕ್ಲೆಗ್ ಆ ವಾಕ್ ದೋಸ ಇಜ್ಜಿ‌ ಪನ್ಪುನಡೆಮುಟ್ಟ ನಿಕುಲು ಎಂಕ್ಲೆನ್ ನಡಪಾದ್ ಕೊರ್ಲೆ" ಪಂಡ್ ದ್ ಪ್ರಾರ್ಥನೆ ಮಲ್ಪೆರೆ ಉಂಡು . ಅವೆರ್ದ್ ಬೊಕ್ಕ  ತಲೊಕು ಪೋದು ಕಾವಂದೆರ್ಡ ಪಂಡ್ ದ್,ಇಂಚಿತ್ತ್ ನ ಕಾರಣೊಗು ಎಂಕ್ಲೆಗ್ ವಾಕ್ ದೋಷಂದ್ ತೋಜಿದ್ ಬತ್ತ್ ದ್ ಅಯಿಕ್ ಪರಿಹಾರೊಗುಂದು ಎಂಕುಲು ಇಂಚಿತ್ತ್ ನ ಸೊತ್ತುನು ಒಪ್ಪಿಸಾಯ.ಎಂಕ್ಲೆಗ್ ಮುಲ್ಪರ್ದ್  ಆ ವಾಕ್ ಸಂದಾಯ್ತ ಆದ್,ಅಯಿರ್ದ್ ಬುಡುಗಡೆಯಾದ್ ಎಂಕ್ಲೆಗ್ ಪ್ರಸಾದ  ತಿಕ್ಕೊಡುಂದು ಕೇನೊಡು.ಕಾವಂದೆರ್ ಪ್ರಸಾದ ಕೊರ್ನಡೆಗ್ ವಾಕ್ ಪಿರಿಲೆಕ.

ವಾಕ್ ದೀನಾರ್ ಇತ್ತೆರ್ಡ ಆರ್ಲ ಮೊಕ್ಲೆನೊಟ್ಟುಗು ಪೋವೊಡು.ಇಜ್ಜಿಂಡ ವಾಕ್ ಒರಿಯುಂಡು.

ಸತ್ಯೊಲ್ನ ಇಚಾರ ಎಂಚಂದ್ ಪಂಡ ನಮ್ಮ ಉಡಲ್ಡ್ ಇತ್ತ್ ನ ಭಕ್ತಿಯೇ ಸಮರ್ಪಣೆ ಹೊರತು ಆಡಂಬರ ಇಜ್ಜಿ.

2.ಕುಟುಮೊಗು ಸಮ್ಮಂದ ಪಟ್ಟ್ ನ ವಾಕಿತ್ತ್ಂಡ್ಂದಾಂಡ ವಾಕ್ ಗ್ ಸಮ್ಮಂದ ಪಟ್ಟ್ ನ ಸೊತ್ತುಲೆನ್ ಕುಟುಮದ ನಮ್ಮ ತರವಾಡ್ ಓಲುಂಡುಂದು ತೂದು ಆ ಸೊತ್ತುಲೆನ್ ದೈವೊಲ್ನೆದುರು ದೀದ್,  ಅಲ್ಪ ಕೈ ಮುಗಿದ್,ಅಲ್ಪರ್ದ್ ಒಟ್ಟಾದ್ ಪಿದಡ್ದ್ ತಲೊಕು ಪೋವೊಡು.ಕುಟುಮ ಸಮ್ಮಂದ ಪಟ್ಟ್ ದ್ ಇತ್ತ್ ನೆರ್ದಾತ್ರ ಕುಟುಮದಕುಲು ಪೋವೊಡು.

ವ್ಯಕ್ತಿಗತವಾದ್ ವಾಕಿತ್ತ್ಂಡ ಏರ್ನ ಮಿತ್ತ್ ವಾಕುಂಡ ಅಕುಲು ಮಾತ್ತ ಕೈ ನಾಲಾಯಿ ಪಾಪೆ ಒಪ್ಪಿಪೆರೆ.ವಾಕ್ ದೀನಾರ್ ಹೆಚ್ಚಾದ್ ಒಪ್ಪಿಪೆರೆ ಇಜ್ಜಿ.ವಾಕ್ ದೀನೆರ್ದ್ ಏರೆಗ್  ದೋಸ ತೋಜಿದ್ ಬತ್ತ್ಂಡ ಅಕುಲು ಕೈ ನಾಲಾಯಿ ಒಪ್ಪಿಸಯೆರ್ಡ ಯಾವು.ವಾಕ್ ದೀಯೆರೆ ಸುಲಭ.ಅವೆನ್ ಅನುಭವಿಸವುನಕ್ಲೆ ಬಂಙ ತೆರಿಂಡ ಏರ್ಲ ವಾಕ್ ದೀವಾಯೆರ್.ದುಂಬುದಕುಲ್ಲೆಕ‌ ಇತ್ತೆ ತಿಕ್ ನೆಕ್ ಪತ್ತ್ ನೆಕ್ ಪೂರ ಏರ್ಲ ವಾಕ್ ದೀಪುಜೆರ್.ಎದುರುದಕುಲು ತಪ್ಪು ಮಲ್ಪಂದೆ ಇತ್ತೆರ್ಡ ಕೆಲವೊರ ವಾಕ್ ದೀನಕ್ಲೆಗೇ ವಾಕ್ ತಿರ್ಗ್ ದ್ ಮುಟ್ಟುದು ಅಕುಲು‌ ಕೈ ನಾಲಾಯಿ ಒಪ್ಪಿಸಯಿನಲ ಉಂಡು.

                ವಾಕ್  ಪಿರಿಪೆರೆ ದರ್ಮ ತಲೊಕೇ ಪೋವೊಡು,ಮುಡಿಪು ತಿರ್ಪತಿಗೇ ಕಟ್ಟೊಡು ಪನ್ಪಿ ಪಾತೆರ ತುಳುನಾಡ್ ಡ್ ಉಂಡು.ಕದಿರೆದ ಮಂಜುನಾಥನ್ ಮತ್ಸ್ಯೇಂದ್ರ ನಾಥೆರ್ ತಾಪನೆ ಮಲ್ದಿನಿ. ಅವ್ಲು ವಾಕ್ ದೋಸ ಪಿರಿಪೆರೆ ಇಜ್ಜಿ.ಆಂಡ ಧರ್ಮತಲೊಟು ಉಪ್ಪುನಿ ಮತ್ಸ್ಯೇಂದ್ರ ನಾಥೆರೆ ಶಿಷ್ಯೆ ಗೋರಖನಾಥೆರ್ ಕಾಸಿರ್ದ್ ಕನತ್ ದ್ ಕದಿರೆದ ಕೆದುಟು ನೀರ್ದ ಉಲಯಿ ಪಾಡ್ದ್ ನ ಲಿಂಗ.ಅವನ್ ಕುಡುಮ ತಲತ ಅಣ್ಣಪ್ಪ ಸ್ವಾಮಿ ವಾದಿರಾಜೆರ್ನ ಮೂಲಕ ತಲೊಟು ತಾಪನೆ ಮಲ್ತ್ ದ್ ನಿ.ಆ ಲಿಂಗರೂಪದ ಮಂಜುನಾಥ ಸ್ವಾಮಿಗ್ ವಾಕ್ ಪಿರಿಪುನ ಕ್ರಮ‌ ಉಪ್ಪುನಿ.ತಿರ್ಪತಿಗ್ ಮುಡಿಪು ಕಟ್ಟುನಲ ಕೃಷ್ಣದೇವರಾಯನ ಕಾಲೊರ್ದು ಬೊಕ್ಕ ಬೈದ್ ನಿ. ಅವೆಕ್ ದುಂಬು ತಿರ್ಪತಿಗ್ ಮುಡಿಪು ಕಟ್ರೆ ಇಜ್ಜಾಂಡ್.ತುಳುನಾಡ ಕೆಲವು ತಿಕ್ ಡ್ದ್ ತಲೊಕು ಪೋಪುನ,ತಿರ್ಪತಿಗ್ ಮುಡಿಪು ಕಟ್ಟುನ  ಕೆರಮ ಇನಿಕ್ಲಾ ಇಜ್ಜಿ.