ಕೊಡಿ ಏರುನಿ ಕೊಡಿ ಜಾಪುನಿ ಕೊಡಿ ಮರಕ್ ಗಡಿ ದೀಪುನಿ

ಕೊಡಿ ಏರುನಿ, ಕೊಡಿ ಜಾಪುನಿ, ಕೊಡಿ ಮರಕ್ ಗಡಿ‌ ದೀಪುನಿ-

          ಕೊಡಿ ಏರ್ದ್ ನಿ.ಕೊಡಿ ಮರಟ್ ಕುಂಟುದ ಗರುಡೆ.ಕೊಡಿ ಮರಟ್ ಉಪ್ಪುನ ಗರುಡನ್ ಬೇತಾಳೆಂದ್ ಲ ಪನ್ಪೆರ್

           ದೈವದ ಭಂಡಾರದಿಲ್ಲಲ್ ರ್ದ್ ಪುಲ್ಯಕಾಂಡೆ ಭಂಡಾರ ಬತ್ತ್ ದ್  ಸಾನೊಡು ಕೊಡಿ ಏರೊಂತ್ಂಡ್.ಸಾಸಿತ ಕೊಡಿ ಮರಂದ್ ಇನಿತಲೆಕ ಇಜ್ಜಾಂಡ್.ಇನಿ ಕೊಡಿ ಏರುನ ಕೊಡಿ ಜಾಪುನ ಧ್ವಜಾರೋಹಣ,ಧ್ವಜಾವರೋಹಣ ಆತ್ಂಡ್.ಕೊಡಿ ಮರ ನಡೆರೆಂದೆ ಮೂಜಿ ಸುತ್ತ ಕಪ್ಪು ಕಲ್ಲ್ ದ ಕುಂದೊಲಿತ್ತ್ ದ್ ನಾಲನೆ ಪುಡೆ ಕಾಲಿ ಇತ್ತ್ ದ್ ಆ ಇಡೆಟೆ ಕೊಡಿಮರ ನಡೊಂತೆರ್.ಕೊಡಿ ಮರನ್ ಕುಕ್ಕು ತಪ್ಪುಡು ಸುತ್ತೊಂತೆರ್.ಕುಕ್ಕು ತಪ್ಪುಡು ಸುತ್ತುದು ಏರೊಂತಿ ಕೊಡಿ ಮರ (ಕುಕ್ಕು ತಪ್ಪುದ ಪಜ್ಜಿ ಇರೆಟ್ ಬೋಡಾಯ್ನಾತ್ ಆಮ್ಲ ಜನಕ ತಿಕ್ಕೊಂತ್ಂಡ್) ಇನಿ ಸಾಸಿತ ಕೊಡಿಮರ ಆದ್ ಕೊಡಿ ಮರಕ್ ತಾಮ್ರ,ಬೊಳ್ಳಿ,ಬಂಗಾರ್ ಮುಚ್ಚೊಂದುಲ್ಲೆರ್.ದುಂಬು ಹಿರಿಯಾಕ್ಲ್ ನಮ್ಮ ಆರೋಗ್ಯೊನು ಒರಿಪೆರೆ ಪ್ರಾಕೃತಿಕವಾಯಿನ ಇಂಚಿನ ಸೊತ್ತುಲೆನ್ ಗಲಸೊಂತೆರ್.ಉಂದೆನ್ ಒಂಜಿ ಕಟ್ಟಾದ್ ಮಲ್ತೊಂಡೆರ್.ಕೊಡಿ ಮರಟ್ ಗರುಡೆ ಕುಂಟುದವಾದಿತ್ತ್ ದ್ ಕೊಡಿತ ನನೊಂಜಿ ಬರಿಟ್ ಗಂಟೆ ಕಟ್ಟೊಂತೆರ್.ಕುಂಟುದ ಗರುಡೆ ಗಾಳಿಡ್ ತೇಲ್ನಗ ಗಂಟೆ ಹಾಕೊಂತ್ ನ ದೂರೊಗು ಊರಿಡೀ ಕೇನೊಂತ್ಂಡ್.ಏರಿ ಕೊಡಿ ಆ ಊರ್ದ ಎಚ್ಚಿನ ಜಾಗೆಲೆಗ್ ತೋಜೊಂತ್ಂಡ್.ಇನಿ ಕುಂಟುದ ಗರುಡೆ ಮಯಕಾದ್  ಬೊಳ್ಳಿದ ,ಬಂಗಾರ್ ದ ಗರುಡೆ ಪೂರ ಬೈದ್ಂಡ್.ಅವೆತ ದಿನ್ನೊಡ್ದಾದ್ ಬೊಳ್ಳಿ,ಬಂಗಾರ್ದ ಗರುಡೆ ಆಡಂದೆ ಕೊಡಿ ಮರತ ಗಂಟೆದ ಸೊರೊ ಕೇನೊಂದಿಜ್ಜಿ.ದೈವದ ಮಿತ್ತ್ ಮನ ಬಗ್ ತಿ ಕಮ್ಮಿಯಾದ್ ದೈವೊಗು ಬೊಳ್ಳಿ ಬಂಗಾರ್ ಎಚ್ಚ ಪಾಡೊಂದುಲ್ಲ.

  ಉದ್ಯಾವರ ಅರಸು ದೈವೊಲ್ನ ಮಾಡದ ಕೊಡಿ ಏರುನಿ:-

 

ಕೊಡಿ ಏರುನಿ ಪಂಡ ಒಂಜಿ ಗಡು ಪಾಡುನಿಂದ್ ಅರ್ಥ.ಕೊಡಿ ಏರ್ದ್ ಕೊಡಿ ಜಾನ ಮುಟ್ಟ ಆ ದೈವ ಗಡುಟು(ಅವದಿಡ್) ಅವ್ಲು ಉಂತುದಿಪ್ಪುಂಡು.

ದೈವದ ಕೊಡಿ ಏರ್ದುಪ್ಪುನಗ ನರಮಾನ್ಯಗ್ ಆಪುನ ಎಡ್ಡೆ ಕೆಲಸೊಗು ನಿಶಿದ್ಧ.ದಾಯೆ ಪಂಡ ಆ ಪೊರ್ತುಡು ದೈವದ ಎಡ್ಡೆ ಕೆಲಸ ಮಾತ್ರ ನಡಪುನಿ.ಐಕ್ಂದೆ ಗಡು ಪಾಡುನಿ(ಕೊಡಿ ಏರ್ದ್ ಕೊಡಿ ಜಾಪುನೇಟ)

     ಕೊಡಿ ಮರತ  ಮುದೆಲ್ಡ್ ಕಲಸ ಕನ್ನಡಿ ಕಟ್ಟುವೆರ್. ಬೊಂಡ,ತಾರಾಯಿ,ಬಜ್ಜೆಯಿ,ಪಿಂಗಾರ,ಗುಜ್ಜೆ, ಅರಿತ ಮುಡಿ ಪೂರ ಕೊಎಇ ಮರಕ್ ಕಟ್ಟುವೆರ್.ಕೊಡಿ ಮರತ ಮುದೆಲ್ಡ್ ಅರಿವಾಣೊಡು ಅರಿ ದೀಪೆರ್,ನೀರ್ (ಜೀವ ಜಲ) ದೀಪೆರ್,ತುಡರ್ ದೀಪೆರ್.ಪ್ರಕೃತಿಡ್ ತಿಕ್ಕುನ,ನಮ ಗಲಸುನ ಪ್ರತಿಯೊಂಜಿ ಬುಳೆ ಸೊತ್ತುಲೆನ್ಲಾ ಕೊಡಿ ಮರಕ್ ಕಟ್ಟೊಲಿ.ನಮ ಸೊತ್ತುಲೆನ್ ಅಡೆ ಎತ್ತಂಡ ಸಾನೊಗು ಸಮ್ಮಂದಪಟ್ಟ್ ನಕುಲು ಅವೆನ್ ಕೊಡಿ ಮರತ ಮುದೆಲ್ಗ್ ಕಟ್ಟುವೆರ್.ಕೊಡಿ ಜಾಯಿನೆರ್ದ್ ಬೊಕ್ಕ ಆ ಸೊತ್ತುಲು ದೈವಸಾನೊಗ್ಲ ಅತ್ತ್,ದೇವಸಾನೊಗ್ಲ ಅತ್ತ್ ಪೂರ ದೈವಸಾನದ ಚಾಕಿರಿದ ಅಕ್ಲೆಗೇ ಸಂದೊಡಾಯಿನಿ.ನಮಾವಡ್,ಬೇತೆಕ್ಲಾವಡ್ ಅವೆನ್ ದೆತೊನೆರೆ ಇಜ್ಜಿ.

  ಏರಿ ಕೊಡಿ ಬರ್ಸೊಗು ನನೆಯೆರೆ  ಬಲ್ಲಿಂದ್ ಉಂಡು.ಆಂಡ ನನೆದ್ ಚಂಡಿಯಾಂಡ ದೋಸ ದಾಲ ಇಜ್ಜಿ.ನನೆಂಡ್ಂದ್ ಕೊಡಿನ್ ಜಾದ್ ಕುಡ ಏರಾವೊಡುಂದಿಜ್ಜಿ.ಬರ್ಸ,ಗಾಳಿ,ದೊಂಬು ಪೂರ ಪ್ರಕೃತಿದವು

          ಕೊಡಿ ಮರೊಕು ಕೊಡಿ ಏರ್ಸಾವುನ ಕುಂಟುದ ಗರುಡೆ

        ‌‌‌‌‌‌‌‌                   ಕೊಡಿ ಏರ್ದ್ ನಿ

ಧ್ವಜೊಕುಲು-ವೈಷ್ಣವೆರೆಗ್ ಗರುಡ ಧ್ವಜ-ಮಂಜಲ್ ಬಣ್ಣ.

                ಶೈವೆರೆಗ್ ಬಸವ ಧ್ವಜ-ಬೊಲ್ದು ಬಣ್ಣ

                ಶಾಕ್ತೆರೆಗ್ ಬೇತಾಳ ಧ್ವಜ-ಕೆಂಪು ಬೊಲ್ದು ಬಣ್ಣ

                ಸುಬ್ರಹ್ಮಣ್ಯ  ಕುಕ್ಕುಟ ಧ್ವಜ -ಕೆಂಪುಬಣ್ಣ

                 ಗಣಪತಿ  ಮೂಷಕ ದ್ವಜ ಪನ್ಪೆರ್.ಆಂಡ ನಿಜವಾದ್ ಗಣಪತಿಗ್ ಇಂಚಿನವೆ ಧ್ವಜಂದಿಜ್ಜಿ.

ತುಳುವೆರೆ ಕೊಡಿ ಧ್ವಜ‌ ಅತ್ತ್.ಅವು‌ ಕೊಡಿಯೆ.

                          ಕೊಡಿ ಏರ್ನಗದ ಕಟ್ಟ್ ಕಟ್ಲೆ

                     ‌‌‌‌‌‌  ಕೊಡಿ ಮರೊಟು ಗರುಡೆ

ದುಂಬುದ ಕೆರಮದಲೆಕ ಕುಂಟುದ ಗರುಡೆ.ಕೊಡಿ ಏರುನಿ ಪಂಡ ಕೊಡಿತ ಒಂಜಿ  ಬರಿಟ್ ಗರುಡೆ,ಕುಡೊಂಜಿ ಬರಿಟ್ ಗಂಟೆ ಕಟ್ಟ್ ದುಪ್ಪುವೆರ್.ಕೊಡಿ ನಾಲೂರುಗು ತೋಜುನತ್ತಂದೆ ಗಂಟೆದ ಸೊರೊಲ ಕೇನುಂಡು.ಗರುಡೆ/ಗಿಡಿಲ ಎತ್ತರೊಡು ರಾಪುನಿ.ಅಂಚ ಉಂದೆಕ್ ಗರುಡೆಂದ್ ಪುದರ್ ಬತ್ತಿಪ್ಪು.ಕೊಡಿ ಏರ್ನಗ ಇತ್ತ್ ನಕುಲು ಕೊಡಿ ಜಾನೇಟ ಊರುರ್ದು ಪಿದಯಿದ ಊರುಗು ಪೋಯೆರೆ ಬಲ್ಲಿ.ಕೊಡಿ ಏರಿ ಬೊಕ್ಕ ಊರುಡು ಓಲ್ಲ ಕೋರಿ ಕೊಯ್ಯೆರೆ ಬಲ್ಲಿ.ಕೊಯ್ಪುಂಡಲ ಊರ ಸುದೆ ಆಯೆರೆಡ್ ಕೋರಿ ಪೊಜೆಂಕ್ ದ್ ಕನತ್ ದ್ ಕಜಿಪು ಮಲ್ಪೊಡು

ವೀಡಿಯೋ ಲಿಂಕ್-    https://youtube.com/shorts/RmCWkOwXhLc?feature=share

   ಕೊಡಿ ಏರ್ನಗ ಊರುದ ಉಲಯಿ ಇತ್ತ್ ನಕುಲು ಕೊಡಿ ಜಾನೇಟ ಆ ದೈವ ಸಾನದ ಮೊಕ್ತೇಸರ್ರೆಗ್ ತೆರಿಪಾವಂದೆ ಊರು ಬುಡ್ದು ಪೋಯೆರೆ ಇಜ್ಜಾಂಡ್.ಕೊಡಿ ಏರಿ ಬೊಕ್ಕ ಊರುದ ಗಡಿ ಮುಟ್ಟ ಒವ್ವೇ ಎಡ್ಡೆ ಕೆಲಸ,ಮದಿಮೆ ಮಸ್ಕಿರಿ ಮಲ್ಪೆರೆ ಇಜ್ಜಿ.ಕೋರಿ ಕುದ್ಪುಂಡ ಸುದೆತ ಆಯೆರೆಗ್ ಪೋದ್ ಕುತ್ತುದು ಕನವೊಡು.ಕೊಡಿ ಏರ್ನಪಗ ಆ ಊರುಡು ದೈವದ ಚಾಕಿರಿ ವರ್ಗೊಗು ಸಮ್ಮಂದ ಪಟ್ನಕುಲು  ಕರಿದ್ ಪೋಯೆರ್ಡ ಇಸಯ ತೆರಿ ಸಾತ್ ಗ್ ಕೊಡಿ ತಿರ್ತ್ ಜಾದ್ ಪುಣ ದೆತ್ತಿ ಬೊಕ್ಕ ಮಡ್ಯೆಲೆರೆ ಸುದ್ದ ಮಲ್ತ್ ದ್ ಕೊಡಿ ಕುಡ ಏರಾದ್ ನೇಮ ನೆರಿ ನಡಪಾವೊಡು. ದೈವ ಚಾಕಿರಿಗ್ ಸಮ್ಮಂದ ಇಜ್ಜಂದಿನಕುಲು ತೀರಿಯೆರ್ಡ ಕೊಡಿ ಜಾಯೆರೆ ಇಜ್ಜಿ .

    

ಕೊಡಿಮರತ ಮುದೆಲ್ಡ್ ನಮಕನತಿ ಬೆನ್ನಿದ ಸೊತ್ತುಲೆನ್ ಕಟ್ಟ್ ದ್ ನಿ 

      ಕೊಡಿ ಜಾಯಿನೆನ್ ವೈದಿಕೆರ್ ಸುದ್ದ ಮಲ್ಪುನತ್ತ್,ಮಡ್ಯೆಲೆರೆ ಸುದ್ ಮಲ್ಪುನಿ. ಕೊಡಿ ಏರ್ದುಪ್ಪುನಗ ಬರ್ಸ ಬತ್ತ್ಂಡ ಕೊಡಿ ಚಂಡಿಯಾಂಡ ದೋಷ ದಾಲ ಇಜ್ಜಿ.ಅವು ಪ್ರಾಕೃತಿಕವಾದ್ ನಡಪುನ ಇಚಾರ.ಕೊಡಿ ಚಂಡಿಯಾಂಡ್ಂದ್ ಕೊಡಿ ಜಾವೊಡುಂದಿಜ್ಜಿ .ದೈವದ ಕೊಡಿ ಏರಾವುನ ಚಾಕಿರಿ ಉಪ್ಪುನಿ ಮಡ್ಯೆಲೆರೆಗ್.ದೇವೆರೆ ಕೊಡಿ ಏರಾವೊಂತ್ ನಿ ಬೋವಿನಕುಲು.ಇನಿ ಅಡೆ ವೈದಿಕೆರ್ ಬೈದೆರ್.ಇನಿ ಅಕುಲು.ಓಡೆ ಮುಟ್ಟ ಪಂಡ ನಮ್ಮಕ್ಲೆನ ಪಿಂಡ ಬುಡ್ರೆ ಪೋಪೆರ್,ನಾಗನ ಸಾವು ಪಾಲ್ ಗ್ ಉಂತುವೆರ್,ಹಾಲ್ ಲೆಡ್ ಸಾವು ಮಲ್ಪಂಡ ಸೈತ್ ನಡೆ ದುಂಬು ಕೊನೊಪುನ ನುಪ್ಪುನು ಅಕ್ಲೇ ಬಲಸ್ ದ್ ಕೊರ್ಪೆರ್.ನುಪ್ಪುನು ಅಕುಲು ಒಂಜಿ ತಟ್ಟೆಡ್ ಬಲಸ್ ದ್ ದೀದ್ ನಮಡ ಉಂದೆನ್ ಕೈ ಮುಗಿದ್ ಕಕ್ಕೆಗ್ ದೀಲೆ ಪನ್ಪೆರ್.ಮೊಕ್ಲು ನಮ್ಮ ಕುಟುಮದ ತೀರ್ನಕ್ಲೆಗ್ ಬಲಸೆರೆ ಇಜ್ಜಿ.ನಮನೆ ಬಲಸೊಡು.ನಮ್ಮ ಕುಟುಮೊಡಿಜ್ಜಂದಿ ಆರ್ ಎಂಚ ಬಲಸೆರೆ ಸಾದ್ಯ?.ನಮ್ಮ ಬಚ್ಚೆಲ್ ರ್ದಾದ್ ನಮ್ಮ ಆಚರಣೆಲೆನ್ ನಮ ಬೇತೆಕ್ಲೆಗ್ ಬುಡ್ದು ಕೊರೊಂದುಲ್ಲ.

      

               ತಾಮ್ರದ ಪೊದಿಕೆ ಮುಚ್ಚಿನ ಕೊಡಿ ಮರ

ಕೊಡಿ ಜಾಪುನಿ:-

   ಕೊಡಿ ಏರುನಿಂದ್ ಕೊಡಿ ಜಾಪುನಡೆಮುಟ್ಟ ಒಂಜಿ ಗಡು ಪಾಡುನಿ.ಗಡು ಪಂಡ ಈತ್ ದಿನತಂದ್ ಲೆಕ್ಕಾಚಾರ.ಕೊಡಿ ಏರ್ನಗ ವಾ ಪೂರ ಚಾಕಿರಿಲೆನ್ ಮಲ್ತನಾ ಕೊಡಿ ಜಾನಗಲಾ ಅವ್ವೇ ಚಾಕಿರಿಲೆನ್ ಮಲ್ಪೊಡು.ಕೊಡಿ ಏರ್ನಗ ವಿದಿ ವಿದಾನೊಲೆನ್ ಮಲ್ತ್ ದ್ ಕೈ ಮುಗಿದ್ ಅಡ್ಡ ಬೂರ್ದು ಪ್ರಸಾದ ಪಾಡ್ಲೆಕ ಕೊಡಿ ಜಾನಗಲ ಅವ್ವೆ ಕೆರಮ ಮಲ್ಪೊಡು.  ಕೊಡಿ ಜಾಯೆರೆ ಐಕ್ ದೈವದ ಅಪ್ಪಣೆ ಪಡೆದ್,ಪ್ರಸಾದ ಪಡೆದ್ ,ಕೈ ಮುಗಿದ್ ಅಡ್ಡ ಬೂರ್ದು ಕೊಡಿ ಜಾವೊಡು.ಕೊಡಿ ಏರ್ನಗಲ ಅವ್ವೇ ಕೆರಮ.ದೈವ ದೇವೆರೆ ಬೇಲೆಲೆಡ್ ಆರಂಭ ಎಂಚನಾ ಅಂಚನೆ ಅಂತ್ಯ ಉಪ್ಪುಂಡು.ಐಟ್ ನಮ್ಮ ಕೆಲಸ ಆಂಡ್,ಮನಿಪಂದೆ ಕುಲ್ಲ್ ಗಂದ್ ಕುಲ್ಲುನ ಪ್ರಶ್ನೆನೇ ಇಜ್ಜಿ.ದೇವೆರ್ನೌಲಂಡ ಪೂಜೆ,ದೈವೊಲ್ನವುಲಂಡ ತಂಬಿಲ ಕರಿತ್ ದೇ ಸುರು ಮಲ್ಪುನಿ.ಸುರುಕು ಮಲ್ತ್ ನೆನೇ ಅಕೇರಿಗ್ ಕೊಡಿ ಜಾನಗಲ ಮಲ್ಪುನಿ.ಅವೆನ್ ಮೀರ್ದ್ ತುಳುಟು ಬೇತೆ ಪದ್ಧತಿ ಇಜ್ಜಿ.

ಮಂಜನಾಡಿ ಮಲರಾಯ ಸಾನೊಡು ಕೊಡಿ ಏರುನಿ:-

 

 

       ಕೆಲವು ಕೋಡಿಡ್ ಕೋರಿ ಕುಂಟಾನಗನೆ ಕೋರ್ದ ಕಟ್ಟ ಸುರಾಪುಂಡು.ಅಂಚಿನವ್ಲು ಕೊಡಿ ಏರ್ನೆರ್ದ್ ಬೊಕ್ಕ ಕೋರಿದ ಕಟ್ಟ ಮಲ್ಪೆರೆ ಬಲ್ಲಿಂದ್ ದಾಲ ಇಜ್ಜಿ.ಕೆಲವು ಕೋಡಿಡ್ ಕೊಡಿ ಏರ್ದುಪ್ಪುನಗ ಕೋರಿದ ಕಟ್ಟ ಆಯೆರೆ ಬಲ್ಲಿಂದ್ ಉಂಡು.ಅವು ಆ ಊರುಡು ಆ ಜಾಗೆಡ್ ಮಲ್ತ್ ನ ಕಟ್ಟ್.ದೈವ ದೇವಸಾನೊಡು ಏರ್ದಿ ಕೊಡಿ ಜಾನ ಮುಟ್ಟ ಊರುಡು ವಾ ಎಡ್ಡೆ ಕೆಲಸ ಮಲ್ಪೆರೆಲ ಬಲ್ಲಿ.ಕೋರಿ ಮೀನ್ ಮದು ಮಾಸ ಅಡ್ರೆ ಬಲ್ಲಿನಿಚ್ಚಯ,ಮದ್ಮೆ,ಬಯಕೆ,ಸಮ್ಮನ ಮಲ್ಪೆರೆ ಬಲ್ಲಿ.  

    ಕೊಡಿ ಮರೊಕು ಗಡಿ ದೀಪುನಿ ಮರ ಕಡ್ಪುನ ಕೆರಮ:-

           ದೈವ ಸಾನೊಗು ಕೊಡಿ ಮರ ಕಡ್ಪುಂಡ ದೈವ ಸಾನೊಗು ಸಮ್ಮಂದ ಪಟ್ಟಿನ ಬಳೆ ಆಯಿನಕುಲು ಐನ್ ಸರ್ತಿ ಕುಡರಿಡ್/ಮಡುಟು ಗಡಿ ದೀದ್ ಮೂರ್ತ ಮಲ್ಪುನಿ(ಕರಿದ್ ಪೋಯಿನಕ್ಲೆಗ್ ಮರ ಕಡ್ಪುಂಡ ಮೂಜಿ ಸರ್ತಿ ಮಡುಟು ಗಡಿ ದೀದ್ ಅವೆರ್ದ್ ಬೊಕ್ಕ ಮರ ಕಡ್ಪುನಿ).ದೇವಸಾನೊಗಂಡ ಆ ದೇವಸಾನೊಗು ಸಮ್ಮಂದಪಟ್ನ ಪುರೋಹಿತೆರ್ ಗಡಿ ದೀಪುನಿ.ಕೊಡಿ ಮರೊಕು ಮೂರ್ತ ದೀದ್ ಗಡಿ ದೀ ಬೊಕ್ಕ ಆಚಾರಿನಕುಲು ಕಡ್ಪುನತ್ತ್.ಏರೆಗ್ಲ ಮರ ಕಡ್ತ್ ದ್ ಕೊರೊಲಿ.ಕೊಡಿ ಮರೊನು ಕೆತ್ತುನಕುಲು ಆಚಾರಿನಕುಲು.ಕೆತ್ತ್ ನೆರ್ದ್ ಬೊಕ್ಕ ಆ ಕೊಡಿ ಮರನ್ ನಲ್ಪ ದಿನ ಮುಟ್ಟ ಎಣ್ಮೆದ ಎಣ್ಣೆಡ್ ಮುರ್ಕದ್ ದೀವೊಡು ಪಂಡ ಎಣ್ಣೆಡೆ ಕೊಡಿ ಮರನ್ ಜೆಪುಡಾದ್ ದೀಪುನಿ.ಮರ ಅಯಿಕ್ ಬೋಡಾಯಿನಾತ್ ಎಣ್ಣೆನ್ ಒಯ್ತೊಂಡು.ಕೆತ್ತುನ ಮುಗಿ ಬೊಕ್ಕ ಕೊಡಿ ಮರನ್ ಬುಡ್ದು ಕೊರ್ಪುನಿ ಆಚಾರಿನಕುಲು(ಕುಟ್ಟಿ ಆಕ್ ನ ಅಚಾರಿ ಇಲ್ಲ್ ಬುಡ್ದು ಕೊರ್ಲೆಕ).ಬೊಕೊರ್ಯಗ್ ಬುಡ್ದ್ ಕೊರ್ಪುನ ಹಕ್ಕಿಜ್ಜಿ..ಕೊಡಿ ಮರ ಕೆತ್ತ್ ದ್ ಕೊಡಿ ಮರ ಉಂತವುನಡೆ ಮುಟ್ಟ ಆಚಾರಿನಕುಲು ಬೋಡು.

ದುಂಬು ಪೂರ ಕೇಪುಲ್ದ ಮರಟ್ ಕೊಡಿ ಮರ (ಕಣಂದೂರು ವೈದ್ಯನಾಥ ಸಾನದ ದುಂಬುದ ಕೊಡಿ ಮರ ಕೇಪುಲ್ದ.ಇತ್ತೆದ ತೆಕ್ಕಿದ.) ಮಲ್ತೊಂತೆರ್ಡ ಇತ್ತೆ ತೆಕ್ಕಿದ ಮರೊಟು ಕೊಡಿ ಮರ ಮಲ್ಪುವೆರ್.ಕೇಪುಲ್ದ ಮರ ತಿಕ್ಂಡ ಅವೆತ ಬಗೆಟ್ ರಡ್ನೆ ಪಾತೆರ ಪನೆರೆನೆ ಇಜ್ಜಿ.ಉಲಯಿಡಿತ್ತ್ ನ ಸತ್ಯೊಲೆರ್ದ್ ಮಿತ್ತ್ ಕೊಡಿ ಮರಟ್ ಕಾರ್ನಿಕ ಬರು.ಐಕೆ ಪನ್ಪುನಿ ಕೊಡಿ ಮರ ಉಪ್ಪುನ ಅಂಗನೊಗು ಜಪ್ಪಡೆಂದ್.ಕೊಡಿ ಮರತ ಅಂಗನೊಡು ದಾಲ ಬೊಡ್ಚಾಂದಿನ ಪಾತೆರ್ದ್ ದಾಲ ಕಟೊನಡೆಂದ್ ಹಿರಿಯಾಕ್ಲು ಪನೊಂತೆರ್.ಕೊಡಿ ಮರಕ್,ಕೊಡಿ ಮರತ ಪೀಠೊಗು,ಕೊಡಿ ಮರತ ಗರುಡಗ್ ಆಯ ಉಂಡು.ಅಂಚಾದ್ ಪೂರಲ ಒಂಜಿ ಜೀವಂತ ಸಗ್ತಿದ ಲೆಕ್ಕಾಚಾರೊಡು ಮಲ್ಪುನಿ.

        ಕೆಲವೊಂಜಿ ದೈವೊಲಿಪ್ಪಿ ದೇವಸಾನೊಲೆಡ್ಲಾ ಕೊಡಿ ಏರುಂಡು.ಉದಾರ್ಮೆಗ್ ಪಂಚಲಿಂಗೇಸರ ದೇವಸಾನ ಇಟ್ಟೇಲ್.

  

         ಪಂಚ ಲಿಂಗೇಸರ ದೇಲ್ಯೊಡು ಕೊಡಿ ಏರ್ದ್ ನಿ ಇಟ್ಟೆಲ್

ನಮ ತೆರಿಯೊನ್ನ ಬಾರಿ ಕಮ್ಮಿ,ತೆರಿಯೊಡಾಯಿನ ಬಾರಿ ಉಂಡು:-

   ಪರಪುನ ತುದೆಟ್ ನೀರ್ ಮಸ್ತುಂಡು.ಆ ಮಲ್ಲ ಸುದೆ ಬರಿಟ್ ನಮ ಒಂಜಿ ಚೆಂಬು ಪತೊಂದು ಕುಲ್ದಿನಕುಲು,ನಮ ಕೊನೊಯಿನ ಚೆಂಬು ಏತ್ ಮಲ್ಲ ಉಂಡ ಆತೆನೆ ಕೊಂಡು ಬರೊಲಿ.ಸುದೆ ಅವ್ಲೆ ಉಪ್ಪುಂಡು.ನಮ್ಮ‌ಒಂಜಿ ಚೆಂಬುಡು ಇಡೀ ಸುದೆ ಇಜ್ಜಿ.

ನಮ ಒಂಜಿ ಚೆಂಬು ನೀರ್ ನ್ ಮಾತ್ರ ಕನವೊಲಿ ವಿನಃ ಇಡೀ ಸುದೆನ್ ನಮರ್ದ್ ಕನಯೆರೆ ಸಾಧ್ಯ ಇಜ್ಜಿ.ದೈವಾರಾದನೆದ ಬಗೆಟ್ ನಮಕ್ ಗೊತ್ತಿತ್ತ್ ನ ನಮ ಅರ್ಥ ಮಲ್ತೊಂದಿ ಸತ್ಯ ಉಂದು-

ದೈವಾರಾದನೆಡ್ ಪ್ರದೇಶಾಚಾರಂದ್ ಉಂಡು.ಒಂಜಿ ಕಡೆತ ಕಟ್ಟ್ ನನೊಂಜಿ ಕಡೆತ ಆವೊಡುಂದಿಜ್ಜಿ.ಅಲ್ತ ಹಿರಿಯಾಕ್ಲ್ ನಡತೊಂದು ಬತ್ತ್ ಲೆಕನೆ ಅಲ್ತಕುಲು ನಡಪೊಡು.ಏರಾಂಡಲ ಪಂಡೆರ್ಂದ್ ಕಟ್ಟ್ ಬದಲ್ಪುನತ್ತ್.ಒಂಜಿ ಊರುಡು ನಡತೊಂದು ಬತ್ತ್ ನ ಕಟ್ಟ್ ನ್ಲಾ ನಮಕ್ ಪೊಳಿಪುನ ಅಧಿಕಾರ ಇಜ್ಜಿ.ಕಟ್ಟ್ಂದ್ ಪನ್ಪುನವು ನಮ್ಮ ಹಿರಿಯಾಕ್ಲ್ ಉಂಡು ಮಲ್ತಿನವು.ಅಯಿರ್ದ್ ಬೊಕ್ಕದಕ್ ಲ್ ಪಾಲಿತೊಂದು ಬತ್ತ್ ನವು,ಅಯಿರ್ದ್ ಬೊಕ್ಕದಕ್ ಲ್ ಒರಿತೊಂದು ಬತ್ತ್ ನವು,ಇತ್ತೆ ನಮ ಅವೆನ್ ಪತೊಂದಿಪ್ಪುನವು.ಅಂಚಾದ್ ಹಿರಿಯಾಕ್ಲ್ ಮಲ್ತಿ ಕಟ್ಟ್ ನ್ ನಮಕ್ ಪೊಳಿಪೆರೆ ಅಧಿಕಾರ ಇಜ್ಜಿ.

ಭಗವತಿ/ಸಗ್ತಿ,ಪಂಚಲಿಂಗೇಶ್ವರ,ಮಹಾಲಿಂಗೇಶ್ವರ ದೇಲ್ಯೊಲೆಡ್ ಬೇತಾಳ ಧ್ವಜ‌ಉಪ್ಪುಂಡು.ಕೇರಳದ ಶಾಕ್ತ ಪುರಾಣೊಡು ಕಾಳಿ ಬೇತಾಳನ್ ವಾಹನ ಮಲ್ತೊಂದು ದಾರಿಕಾಸುರನ್ ಕೆರ್ತ್ ನಿಗೆ.ದುಂಬುದ ಕಾಲೊಡು ಪೊರ್ಂಬಾಟ ಗೆಲ್ತ್ ನ ಸೈನಿಕನ ಒರುವಾದ್ ಬೇತಾಳನ್ ನೇಲ್ಪಾದಿಪ್ಪೆರ್.ಪೊರ್ಂಬಾಟೊಗು ಪೋನಗ ಸೈನಿಕೆರೆಗ್ ಪೋಡಿಗೆ ಆಯೆರೆ ಬಲ್ಲಿಂದ್ ಒರಿ‌ ಸೈನಿಕನ್ ಜೂವಪ್ಪ ಇಂಚ ನೇಲ್ಪಾವೊಂತೆರ್ ಗೆ.ಪೊರ್ಂಬಾಟೊಡು ಸೋತ್ ನಾಯನ್ ಇಂಚ ನೇಲ್ಪಾದಿಪ್ಪೆರ್ಲ ಯಾರು.(ವಾಟ್ಸಾಪ್ ಕೃಪೆ)

     ಪೊಲಬು-ಎಂ.ಡಿ.ಶೆಟ್ಟಿ ಇರಾ