ದೊಂಪ

ದೊಂಪ

 

 

ನಾಲ್ ಕಬೆ ಕೌಂತುದು ಪಾಡುನವು ದೊಂಪ.ಬೊಕ್ಕ ಆಜಿ ಕಬೆ,ಎಣ್ಮ ಕಬೆ ಪಾಡೊಲಿ.ಆಜಿ ಕಬೆ ಪಾಡ್ನೆನ್ ದೊಂಪಂದ್ ಪನೆರೆ ಆಪುಜಿ.ಜಪುಡುಂದೇ ಪನ್ಪುನಿ. ಆಂಡ ನಿಜವಾಯಿನ ದೊಂಪೊಗು ನಾಲೇ ಕಬೆ.ನಿಚ್ಚಯ,ಮದಿಮೆ,ಸಾವುಗು ಪಾಡುನಿ ದೊಂಪ.ದೈವದ ಆಂಡ ದೊಂಪ ಏರುನಿ ಪನ್ಪೆರ್.ದೊಂಪೊಗು ಮೊಡೆಯಿನನ ಮಡಲೇ ಪಾಡೊಡು.ಮೊಡೆಯಿನ ಇಡೀ ಮಡಲ್ಲ ಪಾಡೆರೆ ಬಲ್ಲಿ.ತಿಗ್ ತ್ ದೇ ಪಾಡೊಡು,ಪಂಡ ಇಡೀ ಮೊಡೆತಿ ಮಡಲ್ ನ್ ನಡುಡ್ದು ತಿಗ್ ತ್ ದೇ ಪಾಡೊಡು.ದೊಂಪೊಗು ಮೊಡೆಯಿನ ಮಡಲೇ ಪೊರ್ಲು,ಮೊಡೆಯಿನ ಮಡಲೇ ಸುದ್ದ.ದೊಂಪೊಗು ಮೂಜಿ,ಐನ್,ಏಳ್ ಕಂಬ ಇಂಚ ಮುಗುಳಿ ಬರ್ರೆ ಬಲ್ಲಿ‌.ಇಲ್ಲ್ ಗ ಜಪುಡ್ನಗಲ ಮೂಜಿ ಕುಂದ ಬರ್ರೆ ಬಲ್ಲಿ. ದೊಂಪೊಗು ಕಂಬ ಸರಿಯೇ ಬರೊಡು.ಆಂಡ ದೈವದ ಸಕನ‌ ತೂನಗ  ಮುಗುಳಿಯೇ ಬರೊಡು ಪಂಡ ಸಿರ್ದ್ ದ್ ಬರೊಡು,ಸರಿ ಬರ್ರೆ ಬಲ್ಲಿ ಪಂಡ ಕಟ್ಟ್ ದ್ ಬರ್ರೆ ಬಲ್ಲಿ.

ಮೂಜಿ ಕಂಬದ ದೊಂಪ ಜವನೆರೆಗ್ ಪೊರ್ಲು ತೋಜು.ಆಂಡ ಅವು‌ ಸರಿಯತ್ತ್ .  ಇತ್ತೆ ಮೂಜಿ ದಿಕ್ಕೆಲ್ದ ಗ್ಯಾಸ್ದ ದಿಕ್ಕೆಲುಲು ಬೈದ.ಅವು ಸರಿಯತ್ತ್.ರಡ್ಡ್ ದಿಕ್ಕೆಲ್ ಸರಿ.ನಾಲ್ ದಿಕ್ಕೆಲ್ ಲ ಪಾಡೊಲಿ.ಆಂಡ ಮೂಜಿ ದಿಕ್ಕೆಲ್ ಇತ್ತ್ ನ ಇಲ್ಲ್ ಲು ದುಂಬು ದಿಕ್ಕಾಪಾಲ್ ಆದ್ ಪೋತ್ಂಡ್ ಪನ್ಪುನೆನ್ ಹಿರಿಯಾಕ್ಲು ನೆಂಪು ಮಲ್ಪುವೆರ್.ದೈವದ ದೊಂಪೊಗು ಈತ್ ಕೋಲು ಉದ್ದ,ಈತ್ ಕೋಲು ಅಗೆಲ,ಈತ್ ಕೋಲು ಎತ್ತರಂದ್ ಆಯ ಉಂಡು.ನಿಚ್ಚಯದ, ಮದಿಮೆದ ದೊಂಪೊಗು ಆಯ ಇಜ್ಜಿ.ಜಾಲ್ ಏತ್ ಮಲ್ಲ ಉಂಡಾ ಆತ್ ಮಲ್ಲ ದೊಂಪ ಪಾಡೊಲಿ.ಮದಿಮೆದ ದೊಂಪೊಗಂಡ ದೊಂಪದ ಎದುರುಡು ಪೊಗ್ಗುನಲ್ಪ ರಡ್ಡ್ ಬಾರೆ ಕಟ್ಟ್ ದ್,ಬಾರೆ ಕಟ್ಟಿ ರಡ್ಡ್ ಕಂಬೊಗು ಕುಕ್ಕು ತಪ್ಪು ಕಟ್ಟ್ ದ್ ಮಕರ ಚೋರ್ನ ಪಾಡುನ ಕೆರಮ ಇತ್ತ್ಂಡ್.

   ಮದಿಮೆಗ್ಂದ್ ಪಾಡ್ ನ ದೊಂಪ ಒರಿಯೊಲಿ.ಸಾವುಗುಂದು ಪಾಡುನ ದೊಂಪ ಒರಿಯೆರೆ ಬಲ್ಲಿ.ಅಯಿನ್ ಸಾವು ಕರಿನ ಮನದಾನಿ ದೊಂಪ ಪಗರೊಡು ಪಂಡ ದೊಂಪ ದೆಪ್ಪೊಡು.ಒಂಜಿ ವೇಳೆ ಮದಿಮೆಗ್ಂದ್ ದೊಂಪ ಪಾಡಿನ ಇಲ್ಲಲ್ ಕಾರಣಾಂತರೊಡು ಮರಣ ಮಿನಿ ಆಂಡ ಅವ್ವೇ ದೊಂಪೊಡು ಸಾವು ಮಲ್ಪೆರೆ ಬಲ್ಲಿ.ದೊಂಪದ ಮಡಲ್ ನಾಂಡಲ ದೆತ್ತ್ ದ್  ಕುಡ ಮಡಲ್ ಸುರುರ್ದು ಪಾಡೊಡು.ಸಾವುಗುಲ ಮದಿಮೆಗ್ ಲ ಒಂಜೇ ದೊಂಪನಾಂದ್ ಪನ್ಪುನ ಒಂಜಿ ಪಾತೆರ ಉಂಡು.ಮದಿಮೆಗ್ಲ ಮರಣೊಗ್ಲ ಒಂಜೇ ವಾದ್ಯನಾ ಪನ್ಪಿ ಪಾತೆರಲ ಉಂಡು.

   ತುಳುವೆರೆಗ್ ಪ್ರತಿಯೊಂಜಿ ಇಸಯೊಗ್ಲ ದೊಂಪದಡಿತ ನಿರೆಲೇ ಮೂಲಾದಿತ್ತ್ಂಡ್.ಅಂಬಿ ಅಡ್ತಿ ನೆಲಟ್ ಸಿರ್ಕ್ಸಂಕಡ ದೂರಾದಿತ್ತ್ಂಡ್.ದೈವೊಗು ದೊಂಪದಾಯನ,ದೊಂಪದ ಬಲಿ ನಡತೊಂತ್ಂಡ್.ದೊಂಪದಡಿಟ್ ಸಿಂಗದನ ಪಾಡ್ದ್ ದೊಂಪದಾಯನ ನಡಪಾವೊಂತೆರ್.ದುಂಬು ಮೊಡಯಿನ ದೊಂಪದಡಿಟ್ ಮೊಡೆಯಿನ ಪಜ್ಜಿ ಮಡಲ್ದ ಮಿತ್ತ್ ದೈವದ ಬಂಡಾರ ಕೇರ್ತೊಂತೆರ್.ದೈವೊದ ನೇಮ ನೆರಿಕ್ ದೊಂಪ ಏರುನಿಂದ್ ಪನ್ಪೆರ್.ಒರಿನಂಚ ದೊಂಪ ಪಾಡುನಿಂದ್ ಪನ್ಪುನಿ.ಕೆಲವು ತಿಕ್ ಡ್ ಬೆನೆರೆ ಜಡ ಪತ್ತಿನಕುಲು ಮೊಡೆವಂದಿ ಮಡಲ್ದ ದೊಂಪಲಾ ಪಾಡ್ವೆರ್.ಕೆಲವು ತಿಕ್ ಡ್ ದೊಂಪೊಗು ರಡ್ಡ್ ಕಾರಣೊಗು ಈಂದ್ ದ ಕೈ ಪಾಡೊಂತೆರ್.ಒಂಜಿ ಪೊರ್ಲುಗು,ಒಂಜಿ ಸಂಪುಗು,ದುಂಬು ಪೂರ ದೊಂಪದ ಸುತಾಲ ಈಂದ್ ದ ಕೈ ಕಟ್ಟೊಂದಿತ್ತೆರ್.ದೊಂಪದ ಉಲಯಿ ಸಂಪಿಪ್ಪಡ್ಂದ್ ಈಂದ್ ದ ಕೈ ಅಂಚ ಕಟ್ಟೊಂತೆರ್.ಅವು ಪಚ್ಚೆ ಪಚ್ಚೆ ಆದ್ ಚೋರಣ ಕಟ್ಟ್ ಲೆಕ ತೋಜೊಂತ್ಂಡ್.ದುಂಬು ಪೂರ ಹೋಟೆಲ್ ಲೆ ಎದುರು ದೊಂಪ ಇತ್ತ್ ದ್ ಅವೆಕ್ ಸುತಾಲ ತಟ್ಟಿ ಕಟ್ಟ್  ದ್ ದಾದಾಂಡಲ ಪಟ್ಟಾಂಗ ಲಕ್ಕಾವೊಂತೆರ್.

  ದುಂಬು ಬೆಂದ್ ರ್ದ ಮಾಡ್ ಗ್ ಸೋಗೆ ಪಾಡೊಂತೆರ್.ಕಿದೆಕ್ಲ ಸೋಗೆ ಪಾಡೊಂದಿಜ್ಜಾಂಡ್.ಮಾಡ್ ಗ್ ಮುಳಿ ಬೇಯೊಂತೆರ್.ಅಂಚಿನ ಬಚ್ಚೆಲ್ದ ಬಡಪೊತ್ತು ಇತ್ತ್ ನಾಯೆ ಕಿದೆಕ್ಲ ಸೋಗೆ ಪಾಡೊಂತೆ.ಮುಳಿತ ಮಾಡ್ ಪೊರ್ಲುಲ,ಧೈರ್ಯಲ,ಸೋಗೆದ ಮಾಡ್ ಪೊರ್ಲುಲ ಅತ್ತ್,ಧೈರ್ಯದಲ ಅತ್ತ್.ಇನಿ ದೊಂಪ ಮೂರ ಮಯಕಾದ್ ಆ ಜಾಗೆಗ್ ಶಾಮಿಯಾನ ಬೈದ್ಂಡ್.