Thursday 4 October 2012

ಆಟಿದ ಮಾರಿಪೂಜೆ

 ಆಟಿದ ಮಾರಿ ಪೂಜೆ
                                   
            ಗದ್ದಿಗೆದ ಮಿತ್ತ್ ಮಾರಿನ ಬೊಂಬೆ.ಪಳ್ಳಿ ಒಡಿಪು
  
                     ಆಟಿದ ಮಾರಿಗ್ ವೈದಿಕ ಪೂಜೆ.ಪಳ್ಳಿ
   
             ಮಾರಿ ಬೊಂಬೆನ್ ಮೆರವಣಿಗೆಡ್ ಕೊನೊಪುನಿ.ಪಳ್ಳಿ
   
 
ಮಾರಿ ಬೊಂಬೆನ್ ನಾಲ್ ಜನ ತುಂಬೊಂದು ಕೊನೊಪುನಿ.ಪಳ್ಳಿ

       ಆಟಿದ ಮಾರಿ ಪೂಜೆ ಕುಂದಾಪುರ, ಒಡಿಪು, ಕಾಪು,ಪಳ್ಳಿ,ಶಿರ್ವ,ಕುಡ್ಲ,ಬಂಟಾಲದ ಕೆಲವು ಜಾಗೆಡ್ ನಡಪುಂಡು. ವೈದಿಕ ರೀತಿಡ್ ಕುಂಕುಮಾರ್ಚನೆ,ಪೂತಪೂಜೆ,ಗದ್ದಿಗೆ ಪೂಜೆ ನಡತ್ಂಡ ಅವೈದಿಕವಾದ್ ಊರ್ದಕುಲು ಮಾರಿಗ್ ಕೋರಿ ಬಲಿ‌ ಕೊರ್ಪೆರ್.
  

ಒಡಿಪುದ ಪಳ್ಳಿ, ಶಿರ್ವಡ್  ಮಾರಿ ಬೊಂಬೆನ್ ಮಲ್ತೆರ್ಡ ಒರಿನಂಚ ಕೆಲವು ತಿಕ್ ಡ್ ಶಾಶ್ವತ ಬೊಂಬೆ ಮಲ್ದೆರ್.ಪೊಂಗರೆ,ಪಾಳೆ ಮರಟ್ ಅಜಲಾತಿಕೆದ ಆಚಾರ್ಲು ಮಾರಿ ಬೊಂಬೆ ಮಲ್ಪುವೆರ್.ಅಕ್ಲೆಗ್ ಅಮೆ ಸೂತಕ ಬತ್ತ್ಂಡ ಅಕುಲು ಬೇತೆಕ್ಲೆಡ ಬೊಂಬೆ ಮಲ್ಪಾವೆರ್.
ಆಟಿದ ಸುರೂತ ಅಂಗಾರೆದಾನಿ ಮಾರಿ ಪೂಜೆಗ್ ದಿನ ದೀಪೆರ್.ದಿನ ದೀನ ಬೊಕ್ಕ ಒಂಜಿ ವಾರದ ಅಂತರೊಡು ಗೊಂಬೆ ತಯಾರಿ ಮಲ್ಪುವೆರ್.ಅಂಗಾರೆರ್ದ್ ಅಂಗಾರೆಗ್ ಒಂಜಿ ವಾರ ಆದ್ ವಾರ ಕರಿನ ಅಂಗಾರೆ ಬಯ್ಯಗ್ ಪ್ರತಿಷ್ಠೆ ಮಲ್ತ್ ದ್ ಬುದಾರ ಬೈಯ್ಯ ಮುಟ್ಟ ಉಪ್ಪುಂಡು.ಊರುದ ಪ್ರತಿ ಇಲ್ಲದಕುಲ್ಲಾ ಕೋರಿ ಕೊಯ್ದ್ ಮಾರಿನ್ ಆರಾದನೆ ಮಲ್ಪುವೆರ್.
ಆಟಿದ ಮಾರಿಪೂಜೆ ವರ್ಸೊಗೊರ ಆಟಿಡ್ ಮಾತ್ರ ನಡಪುಂಡು.ಬರ್ಸ ಬನ್ನಗಲ ಈ ಮಾರಿಪೂಜೆ ನಡಪುಂಡು.
ಪಳ್ಳಿ ಬೊಕ್ಕ ಕಾಪುಡು ಒಂಜೇ ದಿನ ಆಟಿದ ಮಾರಿಪೂಜೆ ನಡಪುಂಡು.ಊರುಡು ಮಾರಿ ಬೊಂಬೆನ್ ನಾಲ್ ಜನ ಪುಗೆಲ್ಡ್ ತುಂಬೊಂದು ಗಡಿ ಬಾಗೊಗು ಪೋದು ಅವ್ಲು ಬೊಂಬೆನ್ ಜಪುಡ್ದು ಪಿರ ಬರ್ಪೆರ್.ಆಟಿದ ಬೊಂಬೆ ದೇರುನಪಗ ಮಾತ್ರ ಮಾರಿ ಬೊಂಬೆನ್ ಸಾನ ಗುಂಡದುಲಯಿ ಗದ್ದಿಗೆದ ಮಿತ್ತ್ ದೀದ್ ವೈದಿಕ ಪೂಜೆ ನಡತ್ ದ್ ಬೊಕ್ಕ ಮೆರವಣಿಗೆಡ್ ಮಾರಿ ಬೊಂಬೆನ್ ಗಡುಪಾಡಿ ಜಾಗೆಗ್ ಕೊನೊಪೆರ್.ಮಾರಿಪೂಜೆದಪಗ ಮಾತ್ರ ಮಾರಿ ಬೊಂಬೆನ್ ಗುಂಡದುಲಯಿ ದೀದ್ ಆರಾದನೆ ಮಲ್ತೆರ್ಡ ಒರಿನಪಗ ಗುಂಡದುಲಯಿ ಕಾಲಿ ಗದ್ದಿಗೆ ಉಪ್ಪುಂಡು.ವರ್ಸ ವರ್ಸ ಬೊಂಬೆ ಬೇತೆನೇ ಮಲ್ಪುವೆರ್.
    ಚಿತ್ರ,ವೀಡಿಯೋ-ಸೂರಿ ಪಳ್ಳಿ , ಮಂಜುನಾಥ್ ನಾಯಕ್ ಒಡಿಪು


 

No comments:

Post a Comment