ತುಳುವ ಬದ್ ಕ್ ದ ಕೈಕನ್ನಡಿ ನಮ್ಮ ಕುಡ್ಲ ವಾರ್ತಾ ವಾಹಿನಿ

ತುಳುವ ಬದ್ ಕ್ ದ ಕೈಕನ್ನಡಿ ನಮ್ಮ ಕುಡ್ಲ ವಾರ್ತಾ ವಾಹಿನಿ

                                                           

        ದುಂಬತ್ತ ನಮ್ಮ ಕುಡ್ಲ ವಾರ್ತಾ ವಾಹಿನಿಗ್  ೨೫ ನೇ ವರ್ಸೊಗು ಪಜ್ಜೆ ದಿಪುನ ಈ ಅಮುರ್ತ ಏಳ್ಯೊದ ಬೊಳ್ಳಿ ಪರ್ಬೊಗು ಮೋಕೆದ ಎಡ್ಡೆಪ್ಪುನು ತುಳು ಒರಿಪುಗ ಬೊಕ್ಕ ತುಳು ಸಾಹಿತ್ಯ ಪರಿಷತ್ ಅಂತರ್ಜಾದ ಪರವಾದ್ ಮೋಕೆದ ಎಡ್ಡೆಪ್ಪುನು ಬಾಮ್ಯೊಂದುಲ್ಲ.ತುಲು ಬಾಸೆದ ಬುಳೆಚಿಲ್ ನರ್ಗೊಂದುಪ್ಪುನ ಪೊರ್ತುಗು ತುಳು ಬಾಸೆದ ಒರಿಪುಗಾದ್ ಉದಿತ್ ಬತ್ತ್ ನ ನಮ್ಮ ಕುಡ್ಲ ವಾರ್ತಾ ವಾಹಿನಿದ ಗೇನದ ಪಜ್ಜೆಲು ಇನಿ ಕಡಲ ಗಡಿ ಪುಡೆ ದಾಂಟ್ ದ್ ಏಳ್ ಕಡಲಾಯೆರೆಗ್ ಪಸರ್ದ್ಂಡ್ ಪಂಡ ಅವು  ನಮ್ಮ ಕುಡ್ಲ ವಾರ್ತಾ ವಾಹಿನಿದ ಉಲತಿರ್ಲ್ ದ ತಾಕತ್ತ್ಂದ್ ಪನೊಡು.ದೃಶ್ಯ ಮಾದ್ಯಮೊಲಾವಡ್,ಶ್ರಾವ್ಯ ಮಾದ್ಯಮೊಲಾವಡ,ಪತ್ರಿಕಾ ಮಾದ್ಯಮೊಲಾವಡ್ ಬುಳೆಯೊಡು ಪಂಡ ಅವೆನ್ ನಡಪಾವುನ ಸಾರಥಿನ ಉಡಲ್ ಬುಡು ಉಡಲಾದಿಪ್ಪೊಡು,ಮಾತೆರೆನ್ ಅರ್ತಿ ಪಿರ್ತಿಡ್ ನಡಪಾವೊಂದು ಪೋಪುನ ಮೋಕೆ ದಿಂಜಿನ ಉಡಲ್ದ  ಪನಿ ನೀರ ವಸರ್ ಮುಗುರು ತೆಲಿಕೆದ ಒರುಟುಪ್ಪೊಡು.ಅಪಗಂಡ ಮಾತ್ರ ಮಾದ್ಯಮೊಲು ಬಾರ್ಯಾತ್ ಕಾಲ ಬುಳೆದ್ ಒರಿದ್ ಬರ್ಯೆರೆ ಸಾದ್ಯ.ಈ ಗುರ್ತೊಡು ತೂಪುಂಡ ನಮ್ಮ ಕುಡ್ಲ ವಾರ್ತಾ ವಾಹಿನಿ ಕೇವಲ ಸುತಮುತಲಿಗೆದ ಇಚಾರೊಲೆನ್ ಮಾತ್ರ ನಮ್ಮೊಟ್ಟುಗು ಪಟ್ಟೊನ್ನವಾದಿಪ್ಪಂದೆ ತುಳುವ ಬದ್ ಕ್ ದ ಸಂಸ್ಕೃತಿದ ಕನ್ನಡಿಯಾದ್ ಕಜ್ಜ ಮಲ್ತೊಂದುಂಡು.ಇಂಚಿ ವಾರ್ತಾ ವಾಹಿನಿ ನಮ್ಮ ತುಳುವೆರೆಗೊಂಜಿ ಪೆರ್ಮೆ.

ಒವ್ವೇ ಒಂಜಿ ಮಾದ್ಯಮೊನು ನಡಪಾವೊಡಾಂಡ ಬಾರೀ ಬಂಙಲ ಬರೊಡು. ಅವ್ಲು ಮಾದ್ಯಮೊನು ನಡಪಾವುನಾರೆನ ಇಚ್ಚಾಸಗ್ತಿ ಅಗತ್ಯವಾದುಂಡು.ಅರೆನ್ ಬೆರಿಬೊಟ್ಟುದು ನಡಪಾವುನ ಪಾಸಾಡಿಲೆನ ಒತ್ತು ಸೇರಿಗೆ ಉಪ್ಪೊಡಾಪುಂಡು.ಬೇನೆ ಬೆಸರ್ ಗ್ ಬೆರಿತಾಂಗ್ ಕೊರ್ಪುನ ನಂಬುಗೆದ ಜನೊಕುಲಿಪ್ಪೊಡಾಪುಂಡು.ಅಪಗ ಮಾತ್ರ ಒರಿ ಮಾದ್ಯಮದ ಗುರ್ಕಾರ್ರೆಗ್ ಸಾರಥಿಯಾದ್ ಮಾದ್ಯಮೊನು ನಡಪಾಯೆರೆ ಸಾದ್ಯ.ಮೂಲು ಪಣವು ಇತ್ತ್ಂಡ ಯಾರುಜಿ. ಅವು ವಾಹಿನಿದ ಒಂಜಿ ಪಾಲ್ ಮಾತ್ರ ಆದಿಪ್ಪುಂಡು.ಆಂಡ ಅವೆತೊಟ್ಟುಗು ಗೇನ ಪಟ್ಟುನ ಇಚಾರೊಲೆನ್ ಪ್ರಸಾರ ಮಲ್ರ್ಂಡ ಜನೊಕುಲು ತಾನಾದ್ ವಾಹಿನಿನ್ ಮೋಕೆಡ್ ತರ್ಕೊನುವೆರ್.ಆ ತಾದಿಡ್ ತೂಪುಂಡ ನಮ್ಮ ಕುಡ್ಲ ವಾರ್ತಾ ವಾಹಿನಿದ ಬುಳೆಚಿಲ್ದ ಚಾತುರ್ಪು ಮಲ್ಲ.ನಮ್ಮ ಕುಡ್ಲ ವಾಹಿನಿಡ್ ದಾದ ಉಂಡುಂದು ನಾಡುನ ಬದಲ್ ದಾದ ಇಜ್ಜಿಂದ್ ನಾಡೊಡಾವು.ಆತ್ ತುಳುನಾಡ ಸಂಸ್ಕೃತಿದ ಎಗ್ಗೆಲು ಅವ್ಲುಲ್ಲ.ತುಳು ಬಾಸೆ,ಸಂಸ್ಕೃತಿ,ಆಚಾರ-ಇಚಾರ,ನಂಬೊಳಿಗೆ,ಆರಾಧನೆ,ಆಚರಣೆ ಇಂಚ ವಾ ಮರ್ಗಿಲ್ ಡ್ ನಾಡ್ಂಡಲ ಅವ್ಲೊಂಜಾತ್ ಇಚಾರೊಲು ನಮ್ಮ ಕಣ್ಣೆದುರು ಬರ್ಪುಂಡು.ಆತ್ ಮಟ್ಟ್ ಗ್ ನಮ್ಮ ಕುಡ್ಲ ವಾರ್ತಾ ವಾಹಿನಿ ತುಳುನಾಡ್ ಡ್ ತುಳುಕಾದ್ ಪ್ರಾಮಾಣಿಕವಾದ್ ಬೆನೊಂದುಂಡು ಪಂಡ ತಪ್ಪಾವಂದ್.ಮೂಲು ವಾಹಿನಿದ ಗುರ್ಕಾರ್ಲಾದಿಪ್ಪಡ್,ಸಂಪೊಳಿಗೆದಕುಲು,ಪದುಕೆದರಾದಿಪ್ಪಡ್ ಒಂಜಪ್ಪೆ ಬಾಲೆಲ್ಲೆಕ ಎನ್ನಂದ್ ಎನ್ಯಂದೆ ನಮ್ಮಂದ್ ಎನ್ನಿದ್ ಬೆನ್ಪುನೆಡ್ದಾದ್ ನಮ್ಮ ಕುಡ್ಲ ವಾರ್ತಾ ವಾಹಿನಿ ತುಳುವನೆಲತ ವಿಶ್ವ ತುಳುವ ಬಂದುಲ್ನೊಟ್ಟುಗು ಇರ್ವತ್ತೈನ್ನೇ ವರ್ಸೊಗು ಪಜ್ಜೆ ದೀದ್ ಬೊಳ್ಳಿ ಪರ್ಬೊನು ಆಚರಣೆ ಮಲ್ತೊಂದುಂಡು.ಈತ್ ಉದ್ದೋದ್ದೊಗು ಬುಳೆದ್ ಬರ್ಯೆರೆ ಮೂಲು ಪ್ರಸಾರ ಆಪುನ ಕಾರ್ಯಕ್ರಮೊಲೆ ಸಾಗ್ಸಿ.

          ಒಂಜಿ ವಾಹಿನಿದ ಮಲ್ಲ ಕೆಲಸ ಪಂಡ ನಮ್ಮ ಸಂಸ್ಕೃತಿನ್ ಜಗತ್ತ್ ದೆದುರು ಪಟ್ಟೊನುನವು.ಅಂಚ ಪಟ್ಟೊನ್ನಗ  ಮೂಲು ಜಾತಿಬೇದ,ಲಿಂಗ ಬೇದೊಲು ಉಪ್ಪುಜ.ಮಾತ ಜಾತಿ ಮತ ದರ್ಮೊಲು ಒಂಜಾದಿಪ್ಪುನ ಒಟ್ಟು ತುಲುನಾಡ್ ವಾಹಿನಿಗ್ ತೋಜುಂಡು.ಮಾತೆರೆ ಏಳಿಗೆದೊಟ್ಟುಗು ನಮ ಬುಳೆಯೊಡು ವಿನಃ ನಮ ಮಾತ್ರ ಬುಳೆದ್ ಒರಿನವು ಕಳೆ ಪಂತಿಯಾಂಡ ದಾದ ಪೆರಜನ?.ಅಂಚಾವಂದಿಲೆಕ ಮಾತೆರೆ ಇಸ್ವಾಸೊನು ಒರ್ತೊಂದು ನಮ್ಮ ಕುಡ್ಲ ವಾರ್ತಾ ವಾಹಿನಿ ಇಡೆಮುಟ್ಟ ಬುಳೆದ್ ಬೈದ್ಂಡ್,ನನ ದುಂಬುಲಾ ಉಂದೆರ್ದ್ ಜಾಸ್ತಿ ಬುಳೆಚಿಲ್ದ ತಾದಿಡ್ ಪಜ್ಜೆ ದೀಯೊಂದು ಪೋಫುಂಡಂದು ಸರ್ವ ತುಳುವೆರೆಗ್ಲ ಇಸ್ವಾಸ ಉಂಡು.ಕೆಲವೊರ ಒಪ್ಪು ತಪ್ಪುಲು ನರಮಾನಿಯಾದ್ ಬತ್ತಿ ಬೊಕ್ಕ ಸಹಜ.ಅವು ವಾ ಮಾದ್ಯಮೊನ್ಲ ಬುಡ್ತ್ ಜಿ .ಅಂಚಾಂದ್ ತಪ್ಪು ತರ್ವೆಲ್ ನ್ ಸರಿ ಮಲ್ತೊಂದು ಪೋಂಡ ಅವ್ಲು ಗೇಲ್ ಖಂಡಿತ.ಒಂಜಿ ಮಾದ್ಯಮ ಸಮಾಜದ ಮೋನೆಯಾದುಂಡು.ಆ ಮೋನೆ ಪೊರ್ಲ ಪೊಲಿಕೆಡ್ ಮೆನ್ಕುನಿ ಸಂಸ್ಕೃತಿದ ತಿರ್ಲ್ ನ್ ಪಟ್ಟೊಂಡ ಮಾತ್ರ.ಅಪಗ ತುಳುವೆರ್ ಬೆರಿ ಬಲ ಕೊರ್ದು ಮಾದ್ಯಮೊನು ಬುಳೆಪಾವೆರ್.ಅಂಚಾದ್ ನಮ್ನ ಕುಡ್ಲ ವಾರ್ತಾ ವಾಹಿನಿ ನಡಪಾವುನ ಮಾತಾ ಕಜ್ಜೊಲೆಗ್ಲ ತುಳುವೆರ್ ಬೆರಿಸಾಯಾದ್ ಬರ್ಪುನಿ..

     ನಮ್ಮ ತುಳು ಬಾಸೆಗಾದ್ ಬೆನ್ಪುನ ಕೆಲವೊಂಜಿ ಪತ್ರಿಕೆಲು,ಶ್ರಾವ್ಯ ಮಾದ್ಯಮೊಲು,ದೃಶ್ಯ ಮಾದ್ಮೊಲು ಬುಡ್ಂಡ ತುಳು ಬಾಸೆ,ಸಂಸ್ಕೃತಿದ ಒರಿಪುಗಾದ್ ಬೆನ್ಕೆಮಲ್ಪುನ ತುಲುನಾಡ ಪೆರ್ಮೆದ ವಾಹಿನಿ ನಮ್ಮ ಕುಡ್ಲ ವಾರ್ತಾ ವಾಹಿನಿ.ಬೂತಾರಾದನೆ,ಕಂಬುಲ,,ದರ್ಮ ನಂಬೊಳಿಗೆ,ಬೆನ್ನಿ ಸಾಗೊಳಿ,ಯಕ್ಷಾರಾದನೆ,ನಾಟಕ,ಇದ್ಯೆ,ಗೊಬ್ಬುಲು ಇಂಚ ತುಲುನಾಡ್ ಗ್ ಸಮ್ಮಂದಪಟ್ಟ್ ಮಾತ ವಿಬಾಗದ ಇಚಾರೊಲೆನ್ ಧನಾತ್ಮಕವಾದ್ ನಮ್ಮ ಕುಡ್ಲ ವಾರ್ತಾ ವಾಹಿನಿ ಕರಿನ ಇರ್ವತ್ತೈನ್ ವರ್ಸೊರ್ದಿಂಚಿ ಕೊರೊಂದುಂಡು.ಜನೊಕ್ಲೆಗ್ ನಮ್ಮ ಕುಡ್ಲ ವಾಹಿನಿ ಧನಾತ್ಮಕ ಚಿಂತನೆಲೆನ್ ಕೊರ್ಪುನ ಮೂಲಕ ಸಮಾಜೊದ ಸಂಸ್ಕೃತಿದ ಒಂಜಿ ಬಾಗವಾದ್. ಪ್ರಾಮಾಣಿಕವಾದ್ ಬೆನೊಂದುಂಡು.ಜಗತ್ತ್ ದ ವಾ ಮೂಲೆಡ್ ನಮ ಇತ್ತಡಲ ನಮ್ಮ ಕುಡ್ಲ ವಾರ್ತಾ ವಾಹಿನಿ ಪನ್ನಗ ನಮ್ಮ ನೆಲತ,ನಮ್ಮ ಅಪ್ಪೆ ಬಾಸೆದ,ನಮ್ಮ ಸಂಸ್ಕೃತಿದ ವಾಹಿನಿ ಪನ್ಪಿ ಪೆರ್ಮೆ ವಿಶ್ವ ತುಳು ಬಂದುಲೆಗುಂಡು.ಜನೊಕ್ಲೆಡ ನಮ್ಮ ಪನ್ಪಿ ಬಾವನೆನ್ ನಮ್ಮ ಕುಡ್ಲ ವಾರ್ತಾ ವಾಹಿನಿ ಆನಿರ್ದ್ ಇನಿ ಮುಟ್ಟಲ ಜಕ್ಕಡ ಜವನಲೆಕ ಅವ್ವೇ ದೇಕಿಡ್ ಒರ್ತೊಂದು ಬೈದ್ಂಡ್.ಒಂಜಿ ಮಾದ್ಯಮ ಈತ್ ಎಡ್ಡೆಡ್ ಬುಳೆದ್ ಬರ್ಯೆರೆ,ತುಳುವ ಬಾಸೆ ಒರಿಯೆರೆ,ತುಳುವ ಸಂಸ್ಕೃತಿ ನೆಗತ್ ತೋಜೆರೆ ತುಳುವ ಸಮಾಜದ ಒರಿಪುದ ನಂದಲಾದ್ ಬೆಳಗ್ ದ್ ಬರ್ಯೆರೆ ದರಿತುಡರಾಯಿನ ನಮ್ಮ ಕುಡ್ಲ ವಾರ್ತಾ ವಾಹಿನಿಗ್ ಕುಡೊರ ಮೋಕೆ ಮೋವದ ಎಡ್ಡೆಪ್ಪುನು ಬಯಕೊಂದುಲ್ಲ..