ಕುಡುಪುದ ಸುಬ್ರಾಯೆ ಅನಂತ ಪದ್ಮನಾಭೆ ಆನಗ
ಜನಪದ ಮೂಲದ ಕಥೆ
ಜಲ ಪ್ರಳಯ ಆದ್ ಗಟ್ಟದ ಮುದೆಲ್ ಮುಟ್ಟ ನೀರ್ ಬತ್ತ್ ದ್ ಜನಮಂದೆ ಪೂರ ಅಳಿದ್ ಪೋನಗ ಡೋಲುದ ಉಲಯಿ ಒರಿನ ಒಂಜಿ ಆಣ್ ಪೊಣ್ಣರ್ದ್ ಇಡೀ ಜನೊಕುಲು ಉಂಡಾಯೆರ್ ಪನ್ಪುನ ನಂಬೊಳಿಗೆ ಕೊರಗ ಜನಾಂಗದ.ಅಕುಲು ಮೂಲೊಡು ಬೆನ್ನಿ ಸಾಗೊಳಿ ಬೆನೊಂತೆರ್.ಕಾಡ್ ಲೆಡ್ ತಿಕ್ಕೊಂತಿನ ಪಂರ್ದ್ ಲೆನ್ ಪಕ್ಕಿ ಪೆರಣಿಗ್ಂದ್ ದೀದ್ ಮೊಕ್ಲು ತಿನೊಂದಿಜ್ಜಾಂಡ್.ಇನಿಕ್ ಏತ್ ಬೋಡು ಅವೆನೆ ದೆತೊನೊಂತೆರ್ ವಿನಃ ಎಲ್ಲೆದ ಚಿಂತೆ ಮಲ್ತ್ ನಕ್ಲತ್ತ್.ಎಲ್ಲೆದ ದೇವೆರೆಗ್ಂದ್ ಬುಡ್ನಕುಲು.ಕಾಡ್,ನೀರ್,ಪಕ್ಕಿ,ಪೆರಣಿ ಪೂರ ನಮ್ಮಂದ್ ಎನ್ನಿದ್ ಬದ್ ಕ್ ನಕುಲು.ಕೊರಗ ಜನಾಂಗದಕುಲೆನ್ ಕಾಡಿನಕುಲು ಇಜ್ಜಾ ಕೊರ್ರುಂದು ಪನೊಂತ್ ನಿ.ಅಕ್ಲೆ ಬಾಸೆ ಕೊರ್ರು ಬಾಸೆ.ಗುರ್ತ ಇಜ್ಜಂದಿ ಜಾಗೆಗ್ ಅಕುಲು ಪೋನಗ ಅಕ್ಲೆ ಜನಾಂಗದಕ್ಲೆನ ಎದುರು"ಎಂಕ್ಲು ಕೊರ್ರು ಬತ್ತ"ಪನ್ಪೆರ್.ಅಪಗ ಎಂಕ್ಲೆನ ಜನೊಕ್ಲು ಬತ್ತೆರ್ಂದ್ ಬಾರಿ ಕೊಸಿಯಾಪುಂಡು.ಇಜ್ಜಿಂಡ ಅಕುಲು ಮೊಕ್ಲೆನ್ ಕೈತಲ್ ಲೆತೊನುಜೆರ್.ಜಾತಿದೊಟ್ಟುಗು ಬರಿನ್ ಪಂಡ ಅಕ್ಲೆಗಾಪುನ ಕೊಸಿಯೇ ಬೇತೆ.ಒಂಜೆ ಬರಿಂದ್ ಪಂಡಿ ಸಾತ್ ಗ್ ಒಂಜಪ್ಪೆ ಬಾಲೆಲ್ಲೆಕಂದ್ ಮೋಕೆ ಮಲ್ಪುವೆರ್.
ಕಾಡ್ ನೇ ದೇವೆರ್ಂದ್ ನಂಬೊಂದು ಬೈದ್ ನ ಕೊರಗ ಜನಾಂಗ ತುಳುನಾಡ ಮೂಲ ನಿವಾಸಿಲಾದಿತ್ತೆರ್.ತುಳುನಾಡ ಪವಿತ್ರ ಕ್ಷೇತ್ರೊಲೆನ ಬಗೆಟ್ ತೆರಿನಗ ಜನಪದ ಮೂಲದ ಕಥೆಕುಲೆಡ್ ಕೊರಗ ಜನಾಂಗದ ಶ್ರೇಷ್ಠತೆ ನಮಕ್ ತೆರಿದ್ ಬರ್ಪುಂಡು.ತುಳುನಾಡ ಎಚ್ಚಿನ ದೇವೆರ್ನಕುಲು ಪೂರ ಕೊರಗ ಜನಾಂಗೊಗು ಒಲಿದ್ ಬೈದೆರ್.ಅಕ್ಲೆಗ್ ಕಾಡೇ ಬದ್ ಕ್,ಕಾಡೇ ದೇವೆರ್.ನುಂಗಂದಿ ಪಜ್ಜಿ ಗೆಲ್ಲ್ ನಾವಡ್,ತಾರೆದ ತಿರಿನಾವಡ್ ದೆಪ್ಪಯೆರ್.ಪಡ್ಡೆಯಿಗ್ ದಂಗಿನ ಮರತ ಪಂರ್ದ್ಲೆನ್ ಪಕ್ಕಿ ಪೆರಣಿಲೆಗ್ಂದ್ ಕೊಯ್ಯಂದೆ ದೀಪೆರ್.ಅಂಚಿತ್ತಿ ಕೊರಗ ಜನಾಂಗದ ಜನೊಕುಲೆ ಪುದರ್ ಡ್ ಕೆಲವೊಂಜಿ ಊರ ಪುದರ್ ಲೆನ್ ತೆರಿಯೊಂದು ಪೋವೊಲಿ.
ಕುಡುಪು ಪುದರ್ ಎಂಚ ಬತ್ತ್ಂಡ್:-
ಒಂಜಿ ಕಾಲೊಡು ಕುಡುಪು ಪನ್ಪಿ ಜಾಗೆಡ್ ದೇಲ್ಯ ಇಜ್ಜಾಂಡ್.ಆ ಕಾಲೊಡು ಕೊರಗ ಜನಾಂಗದ ಒರ್ತಿ ಪೊಂಜೊವು ಆ ಊರುಡು ಇಲ್ಲಿಲ್ಲಗ್ ಪೋದು ಕುಡುಪು ಮಾರೊಂದಿತ್ತೆರ್.ಆರ್ ದಿಂಜ ಕುಡುಪು ಮಲ್ತ್ ದ್ ಒಂಜಿ ಜಾಗೆಡ್ ಅವೆನ್ ದೀದ್ ಒಂತೊಂತೆನೆ ಇಲ್ಲಿಲ್ಲಗ್ ಕೊನೊವೊಂತೆರ್.ಇಂಚ ಕೊನೊವೊಂತ್ ನ ಅರ್ ಒಂಜಿ ದಿನ ಕುಡುಪು ಮಾರ್ದ್ ಪಿರ ಬನ್ನಗ ಒಂಜಿ ಮರಿ ಬತ್ತ್ ದ್ ಕುಡುಪುದ ಉಲಯಿ ಕುಲ್ಲುದಿತ್ತ್ಂಡ್.ಅಪಗಾರ್ ಬೊಬ್ಬೆ ಪಾಡ್ ದ್ ಜನೊಕ್ಲೆಡ ಕುಡುಪುದ ಉಲಯಿತ್ತಿ ಮರಿನ್ ತೋಜಾವೊಂದಿತ್ತೆರ್.ಆಂಡ ಜನೊಕ್ಲೆಡ ದಾದ ತೋಜುಂಡು ಕೇನ್ನಗ ಬತ್ತಿನಕುಲು ಕುಡುಪು,ಕುಡುಪುಂದೇ ಪಂಡೆರ್ ವಿನಃ ಅಕ್ಲೆಗ್ ಮೇರ್ ತೊಜಾವೊಂದಿತ್ತ್ ನವು ಮರಿಂದ್ ಗೊತ್ತೇ ಆಯಿಜಿ.ಕಡೆಕ್ಲಾ ಜನೊಕುಲು ಅರೆನ ಪಾತೆರ ತೆರಿದ್ ತೂನಗ ಕುಡುಪುದ ಉಲಯಿ ಮರಿ ತೆತ್ತಿ ದೀದ್ ಕುಲ್ದಿನವು ಮಾತೆರೆಗ್ಲ ತೋಜಿಂಡ್.ಅಂಚ ಈ ಜಾಗೆಗ್ ಕುಡುಪುಂದು ಪುದರ್ ಬತ್ತ್ಂಡ್.
ಒಂಜಿ ಕಾಲೊಡು ಕೊರಗೆರ್ ಅಡೆ ಪೋಪುನೆಕ್ ಅಡ್ಡ ವಿಡ್ಡೂರೊಲು ಇಜ್ಜಾಂಡ್.ಅಡೆಗೊಂಜಿ ಪೊಸ ವ್ಯವಸ್ಥೆ ಬನ್ನಗ ಮೊಕ್ಲೆನ್ ಅಕುಲು ದೂರ ದೀಯೆರ್.ಇನಿಲ ಕುಡುಪುದ ಷಷ್ಠಿ ಜಾತ್ರೆದಪಗ ಪುಲ್ಯಕಲೊಕು ದೇಲ್ಯೊಗು ಕೊರಗ ಜನಾಂಗದಕುಲು ಉಪ್ಪು ಬೊಕ್ಕ ರಡ್ಡ್ ಸೇರಾ,ನಾಲ್ ಸೇರಾ ಅರಿನ್ ಸಂದಾಯ ಮಲ್ಪುನ ಕೆರಮ ಉಂಡು.ಅವೆತ ಹಿನ್ನೆಲೆ ದಾದ ಪಂಡ ದುಂಬುದ ಕಾಲೊಡು ಮರಿ ತೆತ್ತಿ ದೀನಡೆ ಅವೆನ್ ತೂಯೆರೆ ಬತ್ತ್ ನ ಜನತ ಒಣಸ್ ದ ಖರ್ಚಿ ಕೊರಗೆರ್ನವುಗೆ.ಇನಿ ಷಷ್ಠಿಂದ್ ಪನ್ಪ.ಅಪಗ ಅಂಚ ಇಜ್ಜಾಂಡ್.ಬತ್ತ್ ನಕ್ ಲೆಗ್ ಉಪ್ಪುಲ ಗಂಜಿಲ ಆತೆ.ಬೇತೆ ದಾಲ ಇಜ್ಜಾಂಡ್.ಇನಿ ಅಡೆಗ್ ಪುರಾಣದ ಕಥೆ ಸೇರ್ದ್ಂಡ್.
ಇತ್ತೆದ ಕುಡುಪು ಪ್ರದೇಶೊಡು ಒರಿ ಬೂರುಡು ಕುಡುಪು ಮಲ್ತೊಂದಿತ್ತ್ ದ್ ಕುಡೊಂಜಿ ಕುಡುಪು ಮಲ್ಪೆರಾನಗ ಕುಡುಪುದ ಅರು ಕಟ್ಟೆರೆ ಬೂರು ಯಾರುಜಿಂದ್ ಬೂರು ಕನಯೆರೆ ಪೋಪೆರ್.ಅಂಚ ಬೂರು ಪತೊಂದು ಬನ್ನಗ ಮಲ್ತ್ ದ್ ದೀನ ಕುಡುಪುದ ಮಿತ್ತ್ ಉಚ್ಚು ಕುಲ್ಲುದಿತ್ತ್ಂಡ್.ರಡ್ಡ್ ಕತೆಟ್ಲ ಕುಎಉಪುಲ ಸತ್ಯನೆ ಕುಡುಪುಡು ಕುಲ್ದಿನ ನಾಗೆಲ ಸತ್ಯನೆ.ಅವೆನ್ ಬದಲ್ ಮಲ್ಪೆರೆ ಆಪುಜಿ.ಅಡೆ ಬತ್ತ್ ದ್ ತೂಯಿನಕುಲು ಕುಡುಪು ಕುಡುಪುಂದೆ ಪಂಡೆರ್ ವಿನಃ ನಾಗನ್ ತೂಯ್ಜೆರ್.ಕಡೆಕ್ ತೂಯೆರ್ .ಅಂಚಾದ್ ಆ ಜಾಗೆಗ್ ಕುಡುಪುಂದು ಪುದರ್ ಬತ್ತ್ಂಡ್.
ನನ ಕೆಲವೆರ್ ಪನ್ಪುಲೆಕ ಕುಡುಪು ಪುದರ್ದ ಆ ಜಾಗೆಡ್ ರಡ್ಡ್ ನಾಗರ ಉಚ್ಚುಲು ಕಂಕನೆ ಬೂರ್ನ ಕುಡುಪುದ ಉಲಯಿತ್ತ್ ದ್ ಅವೆರ್ದ್ ಬೊಕ್ಕ ಅಡೆ ಕುಡುಪು ಪುದರಾಂಡ್ ಗೆ.ವಾ ಮೂಲೊಡು ತೂಂಡಲ ಕುಡುಪುಡು ಇತ್ತ್ ನ ನಾಗರ್ದಾದ್ ಕುಡುಪಾಂಡ್ಂದ್ ತೆರಿಯುಂಡು.
ಅದ್ದೆ ಪನ್ಪುನ ಕೊರಗ ಜನಾಂಗದಾಯರ್ದ್ ಅದ್ಯಪಾಡಿ,ಕಟ್ಲೆ ಪನ್ಪುನಾಯರ್ದ್ ಕಟೀಲ್, ಎಲ್ಲುರ್ದು ಎಲ್ಲೂರು,ಮದರುರ್ದು ಮದವೂರು,ದೆಸಿಲರ್ದ್ ಶಿಶಿಲ,ಕಾರಿಂಜರ್ದ್ ಕಾರಿಂಜೆ,ಕಾಂತಾರ ಪನ್ಪುನಾಯರ್ದ್ ಕಾಂತಾವರ,ಪೊರಲೆ ಪನ್ಪಿ ಕೊರಗ ಜನಾಂಗದಾಯರ್ದ್ ಪುರಲ್(ಇನಿ ಪೊಳಲಿ ಆತ್ಂಡ್) (ಪುರಲ್ ಡ್ ಕೊರಗ ಜನಾಂಗದ ಒಂಜಿ ಶ್ರೀಮಂತ ಕುಟುಂಬ ಒಂಜಿ ಕಾಲೊಡಿತ್ತ್ಂಡ್.ನಾಲ್ ಜೋಡಿ ಎರ್ಲು,ಪದ್ರಾಡ್ ಮುಡಿ ಬಾರ್ ಬಿತ್ತುನ ಕಂಡ ಅಕ್ಲೆಗಿತ್ತ್ಂಡ್.ಬರ್ಕೆಂದ್ ಇಲ್ಲ್ ಇತ್ತ್ ದ್ ಬರ್ಕೆದ ಇಲ್ಲ್ ಕೊರಗೆರ್ನ ಆದಿತ್ತ್ಂಡ್.)ಇಂಚ ಮೂಲ ಜನಾಂಗದಕ್ಲೆ ಪುದರ್ಡ್ ತುಳುವ ಸಾನಿಧ್ಯಲೆನ ಊರುದ ಪುದರುಲಿತ್ತ.ಇಂಚಿ ದೈವ,ದೇವೆರ್ ಪೂರ ಮೂಲ ನಿವಾಸಿಲೆಗ್ ತಿಕ್ಕ್ ದ್ ಇನಿ ಅಕ್ಲೆನ ಕೈಡ್ದ್ ಪೊಸತಾದ್ ಬತ್ತಿ ವ್ಯವಸ್ಥೆ ಅವೆನ್ ಪೂರಾ ತಾನ್ ಒಯ್ತೊಂದು ದೇವೆರೆಗ್ ಕೈತಲಾಯಿನ ಅಕ್ಲೆನ್‌ ಮಡಿವಂತೆರ್ ದೂರನೇ ದೀತ್ ನವು ದುರಂತ.ಮಂಜಗ್ ಬಲ್ಲೊಡು ತಿಕ್ಕಿ ನಾಗೆ(ಬಲ್ಲಮಂಜ ಊರುದ ಪುದರಾಂಡ್),ಕೊರಗೆದಿ ಪೊಂಜೊವುಗು ಕುಡುಪುಡು ತಿಕ್ಕಿ ನಾಗೆ(ಕುಡುಪು ಊರ್ದ ಪುದರಾಂಡ್),ಕುಕ್ಕೆ ಬೊಕ್ಕ ಸುಬ್ವೆ ಪನ್ಪಿ ಮಲೆ ಕುಡಿಯೆರೆಗ್ ಬೆದ್ ರ್ದ ಪುಂಡೆಲ್ದ ನಡುಟು ತಿಕ್ಕಿ ನಾಗೆ(ಕುಕ್ಕೆ,ಸುಬ್ಬರ್ದ್ ಕುಕ್ಕೆ ಸುಬ್ರಹ್ಮಣ್ಯ ಪುದರಾಂಡ್) ಪೂರ ಜನೊಕುಲೆರ್ದ್ ಮಯಕಾದ್ ಪೋದು ಅಡೆ ಪೊಸ ಆರಾದನಾ ಕೆರಮ ಬೈದ್ಂಡ್.ಮೂಲ ಮಣ್ಣ ಗಂದ ಸತ್ವದ ನಾಗಕೋಲ,ಸರ್ಪ ಕೋಲ ಮಯಕಾದ್ ಅಡೆ ಪೊಸತಾದ್ ಬ್ರಹ್ಮ ಮಂಡಲ,ನಾಗಮಂಡಲ,ಡಕ್ಕೆ ಬಲಿ ಪೂರ ಬತ್ತ್ ದ್ ಸರ್ಪಕೋಲದ ಮಣ್ಣ್ ಡ್ ಪುರೆಲುನ ಮಡತ್ತಾನ ಕೆರಮ ಮಯಕಾದ್ ರಾಸಿ ರಾಸಿ ಪಿಂಗಾರ ಪುರ್ಪೊನು ಮೋನೆಗ್ ಪೂಜೊಂದು ನಡಪುನ ನಾಗಾರಾದನೆ ಬೈದ್ಂಡ್.
ಕುಡುಪು-
ಕುಡುಪು ಪಂಡ ದಾದಂದ್ ಇನಿತ ಜೋಕ್ಲೆಗಾವಡ್,ಜನೊಕ್ಲೆಗಾವಡ್ ತೆರಿದ್ ಜ್ಜಿ.ಆತ್ ತುಳುನಾಡ ಮೂಲ ಸೊತ್ತುಲೆನ್,ಅವೆತ ಪುದರ್ಲೆನ್ ಕಳೆವೊಂದ.ನುಪ್ಪು ಕಬಿಡ್ ನಗ ಕುಡುಪುದ ಮಿತ್ತ್ ದೀವೊಂತಿ ತಂರ್ಬುಚ್ಚಿ,, ಕಡ್ಯ,ಕರ,ಬಿಸಲೆದಡಿಕ್ ದೀವೊಂತಿ ತೆರಿಯೆ ಒವ್ವುಲ ತೆರಿಯಂದಿಲೆಕಾಂಡ್.ಕುಡುಪು,ಕುರುವೆ,ಕಾಂಟ್ಯ,ಬಟ್ಟಿ,ಕುತ್ತರಿ ಪೂರಲ ಬೇತೆ ಬೇತೆನೆ.
ವೀಡಿಯೋ ಲಿಂಕ್-
ಲೇಖನೊಗು ಮಾಯಿತಿ-ಯಂ.ಸುಂದರ.ಬೆಳುವಾಯಿ
ಕೊರಗರ ಸಂಘದ ದಕ್ಷಿಣ ಕನ್ನಡ ಜಿಲ್ಲಾ ಗುರ್ಕಾರ್ರ್
No comments:
Post a Comment