ಪಚ್ಚಡೆ ಪೊತ್ತಾವುನಿ
ದೈವದ ಬಂಡಿ ಬಾಕ್ಯಾರ್ ಗ್ ಜತ್ತ್ ದ್ ಪಿರ ಪೋದು ಬಂಡಿದ ಕೊಟ್ಯದ ಉಲಯಿ ಪೋಯಿ ಬೊಕ್ಕ ಸೆಟ್ಟಿಗಾರ ಜನಾಂಗದಕುಲು ದೈವದ ಬಂಡಿದ ಬೊಕ್ಕ ದೈವದ ಎದುರು ಬೊಲ್ದು ಕುಂಟು ಪೊತ್ತಾವುನ ಕೆರಮ ಉಂಡು.ಉಂದೆನ್ ಪಚ್ಚಡೆ ಪೊತ್ತಾವುನಿ,ದೈವದ ದೃಷ್ಠಿ ದೆಪ್ಪುನಿಂದ್ ಪನ್ಪೆರ್.ದೈವದ ಬಂಡಿ ಬಂಡಿಕೊಟ್ಯದ ಉಲಯಿ ಪೋಯಿ ಬೊಕ್ಕ ಬಂಡಿದ ಎದುರು ಪಚ್ಚಡೆ ಪೊತ್ತವೆರ್.ದೇವೆರೆ ತೇರ್ ಒಯ್ತಿ ಬೊಕ್ಕ ದೇವೆರೆ ತೇರ್ ದ ಎದುರು ಪಚ್ಚಡೆ ಪೊತ್ತವೆರ್.ಕನಪಾಡಿ ದೈವ ವಲಸಾರಿ ಜಪ್ಪುನಗ ಲಕ್ಕಂಬಟ್ಟೆರೆ ಸಂಸಾರ ಪಚ್ಚಡೆ ಪೊತ್ತವುನ ಕೆರಮ ಉಂಡು.
ದೇವೆರ್ ತೇರ್ ಆದ್ ಬತ್ತಿ ಬೊಕ್ಕ ತೇರ್ ದ ಎದುರು ಪಚ್ಚಡೆ ಪೊತ್ತಾದ್ ನಿ
ಚಿತ್ರ ಕೃಪೆ-ಶ್ರೀ ಕೃಷ್ಣ ಕಡೇಶ್ವಾಲ್ಯ
ದೈವದ ಬಂಡಿ ಒಯ್ಪುನಗ ಕೆಲವು ತಿಕ್ ಡ್ ಗೋವಿಂದ ಪಾಡೊಂದುಲ್ಲೆರ್.ಕೆಲವು ತಿಕ್ ಡ್ ಜೈ ಶ್ರೀರಾಮ್ ಪನೊಂದುಲ್ಲೆರ್.ಆಂಡ ದುಂಬುದ ಕಾಲೊಡು ದೈವದ ಬಂಡಿ ಒಯ್ಪುನಗ ಇಂಚಿತ್ತ್ ನ ಪೂರ ಕೇನೊಂದಿಜ್ಜಾಂಡ್.
ಕೆಲವು ತಿಕ್ ಡ್ ಕುಲು ಕುಲು ಕೂ....ಕುಲು ಕುಲು ಕೂ... ಪಂಡೊಂದು ದೈವದ ಬಂಡಿ ಒಯ್ತೊಂತೆರ್ಡ ನನ ಕೆಲವು ಕೋಡಿಡ್ ಒಯ್ಪುಲೆ..ಒಯ್ಪುಲೆ..ಬರಡ್...ಬರಡ್...ಒಯ್ಪಿ..ಒಯ್ಪಿಂದ್ ಬಂಡಿ ಒಯ್ತೊಂತೆರ್.
ದುಂಬು ಕೆಲವು ತಿಕ್ ಡ್ ಬೋವಿ ಜನಾಂಗೊಗು ದೈವದ ಬಂಡಿ ಒಯ್ಪುನ ಅಧಿಕಾರ ಇತ್ತ್ಂಡ ನನ ಕೆಲವು ತಿಕ್ ಡ್ ಪೂಜಾರಿ ಜನಾಂಗದಕ್ಲೆಗ್ ದೈವದ ಬಂಡಿ ಒಯ್ಪುನ ಅಧಿಕಾರ ಇತ್ತ್ಂಡ್.ಇತ್ತೆ ಗ್ರಾಮಸ್ಥೆರ್ ಪೂರ ಸೇರ್ದ್ ಬಂಡಿ ಒಯ್ಪೆರೆ ಸುರು ಮಲ್ತಿ ಬೊಕ್ಕ ಈ ಗೋವಿಂದ ಗೋವಿಂದ ಪೂರ ಸುರಾತ್ಂಡ್.ಆತೇ ಅತ್ತ್.ಇತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.
No comments:
Post a Comment