ಪಚ್ಚಡೆ ಪೊತ್ತಾವುನಿ,ಬಂಡಿ ಒಯ್ಪುನಿ
ದೈವಾರಾದನೆದ ಪ್ರತಿಯೊಂಜಿ ಆಚರಣೆಡ್ಲಾ ಪೂರ ಹಿರಿಯಾಕುಲು ಪದಿನಾಜಿ ಜಾತಿ ವರ್ಗೊಗುಂದು ಪದಿನಾಜಿ ಚಾಕಿರಿ ಪಟ್ಟ್ ದ್ ಕೊರ್ತೆರ್.ಅಂಡ ಇನಿತಕ್ಲೆಗ್ ವಾ ಜಾತಿಗ್ ವಾ ಚಾಕಿರಿಂದ್ ಮದತ್ ಪೋತ್ಂಡ್.ದೈವದ ಕಲೊಕೇ ಬರಂದಿನಕುಲು ಇನಿ ಇಡೀ ದೈವಾರಾದನೆದ ವ್ಯವಸ್ಥೆನ್ ಆಳ್ಯೊಂದುಲ್ಲೆರ್.ಇನಿ ದೈವೊಲೆಗ್ ಕಟ್ಟುನ ಕೆಲವೆರ್ ಅಕ್ಲೆನ ಪರವಾದೇ ಪಾತೆರ್ದ್ ಯಾನ್ ಆ ದೇವಿನಂಶ, ಈ ದೇವೆರಂಶಂದ್ ನೇಮ ಕಟ್ಟ್ ದ್ ಪನೊಂದುಲ್ಲೆರ್.ದೈವದ ಬೂಲ್ಯ ಪತ್ತಂದಿನ,ದೈವದ ಚಾಕಿರಿಗ್ ಗಂದ ಒರೆಂಕಂದಿನ,ದೈವದ ಅಸರ್ ಗ್ ಬೊಂಡ ಕೆತ್ತಂದಿನ,ದೈವದ ಆವಾರೊಗು ಪಂರ್ದ್ ದ ಚೋಲಿ ದೆಪ್ಪಂದಿನಕುಲೆನ ಪಾತೆರ ಇಡೀ ದೈವದ ಕಲತಕುಲು ಕೇನುಲೆಕಾಂಡ್. .ಅಂಚಿನ ದೈವ ಚಾಕಿರದ ಪದಿನಾಜಿ ಜಾತಿಲೆಡ್ ಒಂಜಿ ಜಾತಿ ದೈವದೆದುರು ಪಚ್ಚಡೆ ಪೊತ್ತಾವುನ ಶೆಟ್ಟಿಗಾರ ಜಾತಿ.
ಒಂಜಿ ಬೆದ್ ರ್ ದ ಕೊಡಿಕ್ ಬೊಲ್ದು ಕುಂಟು ಜಪುಡ್ದ್ ಕಟ್ಟ್ ದ್ ಅವೆನ್ ದೈವದ ಬಂಡಿದ ಕೊಟ್ಯದ ಎದುರು ದೈವದ ಬಂಡಿದೆದುರು ಪದ್ಮಶಾಲಿ ಜನಾಂಗದಕುಲು ಪಚ್ಚಡೆ ಪೊತ್ತವೆರ್.ಸೂತಾತ್ ಸುದ್ದ ಮಲ್ಪುನ ಸೊತ್ತು ನನೊಂಜಿಜ್ಜಿ..ಸೂತ ಮೂಲಕ ಸುದ್ದ ಮಲ್ಪುನಿ.ದೇವೆರ್ನ ಜಾತ್ರೆಡ್ಲ ದೇವೆರ್ನ ಬಲಿಪೂರ ಆಯಿನೆರ್ದ್ ಬೊಕ್ಕ ಸಂಪ್ರೋಕ್ಷಣೆ ಪನ್ಪಿ ವಿಧಿ ಉಂಡು.ದಾಯೆ ಪಂಡ ದೇವೆ್ ಸವಾರಿ ಪೋದು ಬನ್ಗಗ ಬರ್ಪಿ ಸಾದಿಡ್ ಅವ್ವೆತೋ ಸುದ್ದ ಅಸುದ್ದದ ಜನೊಕ್ಲಿಪ್ಪುವೆರ್.ಆಅಸುದ್ದೊಲೆನ್ ಪೂರ ಕಳೆದ್ ದೇವೆರೆನ್ ಸುದ್ದ ಮಲ್ತ್ ದ್ ದೇವೆರೆಗ್ ಪೂರ್ಣ ಕಳೆ ದಿಂಜಾವುನ ಕ್ರೀಯೆ.ಅವೆನ್ ಸಂಪ್ರೋಕ್ಷಣೆ ಪನ್ಪುನಿ.
ದೈವ ಬಂಡಿಗ್,ದೈವ ಪಾಪೆಗ್ ಒವ್ವೆ ಒಂಜಿ ರೀತಿದ ಅನಿಷ್ಟ / ದೃಷ್ಟಿ ದೋಷ ಬರಂದಿಲೆಕ ಕಳೆಪುನೆನ್ ಪಚ್ಚಡೆ ಪೊತ್ತಾವುನಿ ಪನ್ಪೆರ್.ದೈವದ ಬಂಡಿ ಬಂಡಿದ ಕೊಟ್ಯಗ್ ಪೊಗ್ಗಿನೆರ್ದ್ ಬೊಕ್ಕ ನನ ಒವ್ವಾಂಡಲ ಬೊಡ್ಚಂದಿನ ದೃಷ್ಟಿ ಬಂಡಿಗ್ ತಾಗೆರೆ ಬಲ್ಲಿ ಪನ್ಪಿ ಉದ್ದೇಷೊಡೇ ಅಂಚ ದೃಷ್ಟಿ ಕಳೆಪುನಿ.
ದೈವದ ಬಂಡಿ ಬಂಡಿಕೊಟ್ಯದ ಉಲಯಿ ಪೋಯಿ ಬೊಕ್ಕ ಪಚ್ಚಡೆ ಪೊತ್ತದ್ ನಿ.ಸರ್ವ ರೀತಿದ ದೋಷ ದೃಷ್ಟಿಲೆನ್ ಕಳೆಪುನ ಕ್ರೀಯೆನ್ ಪಚ್ಚಡೆ ಪೊತ್ತವುನಿ ಪನ್ಪೆರ್.ಶೆಟ್ಟಿಗಾರ ಜನಾಂಗ ಕುಂಟು ನೆಯ್ಪುನಕುಲಾದಿತ್ತ್ ದ್ ಮಡಿ ಕುಂಟುಡೆ ಪಚ್ಚಡೆ ಪೊತ್ತಾದ್ ದೈವದ ಬಂಡಿ ಬೊಕ್ಕ ಪಾಪೆದ ದೃಷ್ಟಿ,ಅನಿಷ್ಟ ಕಳೆಪೆರ್.
ದೈವದ ಬಂಡಿ ಬಾಕ್ಯಾರ್ ಗ್ ಜತ್ತ್ ದ್ ಪಿರ ಪೋದು ಬಂಡಿದ ಕೊಟ್ಯದ ಉಲಯಿ ಪೋಯಿ ಬೊಕ್ಕ ಪದ್ಮಶಾಲಿ /ಸೆಟ್ಟಿಗಾರ ಜನಾಂಗದಕುಲು ದೈವದ ಬಂಡಿದ ಬೊಕ್ಕ ದೈವದ ಎದುರು ಬೊಲ್ದು ಕುಂಟು ಪೊತ್ತಾವುನ ಕೆರಮ ಉಂಡು.ಉಂದೆನ್ ಪಚ್ಚಡೆ ಪೊತ್ತಾವುನಿ,ದೈವದ ದೃಷ್ಠಿ ದೆಪ್ಪುನಿಂದ್ ಪನ್ಪೆರ್.ದೈವದ ಬಂಡಿ ಬಂಡಿಕೊಟ್ಯದ ಉಲಯಿ ಪೋಯಿ ಬೊಕ್ಕ ಬಂಡಿದ ಎದುರು ಪಚ್ಚಡೆ ಪೊತ್ತವೆರ್.ದೇವೆರೆ ತೇರ್ ಒಯ್ತಿ ಬೊಕ್ಕ ದೇವೆರೆ ತೇರ್ ದ ಎದುರು ಪಚ್ಚಡೆ ಪೊತ್ತವೆರ್.ಕನಪಾಡಿ ದೈವ ವಲಸಾರಿ ಜಪ್ಪುನಗ ಲಕ್ಕಂಬಟ್ಟೆರೆ ಸಂಸಾರ ಪಚ್ಚಡೆ ಪೊತ್ತವುನ ಕೆರಮ ಉಂಡು.
ದೇವೆರ್ ತೇರ್ ಆದ್ ಬತ್ತಿ ಬೊಕ್ಕ ತೇರ್ ದ ಎದುರು ಪಚ್ಚಡೆ ಪೊತ್ತಾದ್ ನಿ
ಚಿತ್ರ ಕೃಪೆ-ಶ್ರೀ ಕೃಷ್ಣ ಕಡೇಶ್ವಾಲ್ಯ
ಮೂಲು ಅನಿಷ್ಟ ಕಳೆಪುನಿ,ದೃಷ್ಟಿ ಕಳೆಪುನೆಕ್ ಪೂರಕವಾದ್ ನಮ ಜುಮಾದಿ ದೈವದ ಕೊಂಡೆ ಬಲಿನ್ ಅರ್ಥ ಮಲ್ತೊನೊಲಿ.ಪ್ರತಿಯೊಂಜಿ ಕುಟುಮದ ಮೂಲ ಪುರುಷೆ ಅರಸೊಳಿಗೆದ ಕಾಲದ ದಂಡ ನಾಯಕೆ,ಜೂವ ಒರ್ತ್ ನಾಯೆ ಜೂವದ ಆದಿ ಜುಮಾದಿ.ಆಯೆ ದಂಡ್ ದ ಕಲೊಟು ಜಯಿತ್ ದ್ ತನ್ನ ಸರ್ರೊಗಾಯಿನ ನೆತ್ತೆರ ಕಲೆನ್ ಮಾಜಾಯೆರೆ ನೇಮದ ಕಲೊಟು ಕೊಂಡೆ ಬಲಿಟ್ ಅಗ್ಗಿದಾವಾರ ದೆತೊನುನ ಕೆರಮ ಉಂಡು.ಸೂಟು ಕಳೆಯಿನಡೆಗ್ ಪೂರಲ ಕಳೆಂಡ್ಂದ್ ಲೆಕ್ಕ.
ಅಂಚನೆ ದೈವದ ಬಂಡಾರ ದೆಪ್ಪುನಗ, ಕೊಡಿಯಡಿಟ್ ಬಂಡಾರ ಕೇರ್ಪುನಗ,ಕುಡ ಬಂಡಾರ ಮೂಲ ಸಾನೊಡು ದೀನಗ ಮೂಜಿ ಸರ್ತಿಲ ದೂಪ ಪತ್ತುವೆರ್.ಉಂದುಲ ದೃಷ್ಟಿ ಕಳೆಪುನ ಒಂಜಿ ವಿದಾನಂದ್ ಪನೊಲಿ.ವಿದಿ ವಿದಾನ ಬೇತೆ ರೂಪೊಡುಪ್ಪು.ಆಂಡ ಕಲ್ಪನೆ ಒಂಜೆ.ಉಂದೆನ್ ಪುಊರ ತೂನಗ ಹಿರಿಯಾಕ್ಲೆ ಮಾಮಲ್ಲ ಚಿಂತನೆ ನೆಗತ್ ತೋಜುಂಡು.ಅಕುಲು ಬರವುಡು ಬರೆದ್ ದೀಜೆರ್.ಬಾಯಿರ್ದ್ ಬಾಯಿಗ್,ಕೈರ್ದ್ ಕೈಕ್, ತರೆರ್ದ್ ತರೆಕ್ ಕೊರೊಂದು ಬತ್ತೆರ್.ವಾ ವಾ ಜಾಗೆಡ್ ವಾ ವಾ ರೀತಿಡ್ ಜನೊಕ್ಲೆಗ್ ದೈವ ದೇವೆರೆ ಕಲೆ ಕಾರ್ನಿಕ ಉಂಡುಂದು ತೆರಿಪಾಯೆರೆ, ಅಕ್ಲೆ ಮನಸ್ ಗ್ ಆ. ಬಾವನೆನ್ ಕನತ್ ಕುಲ್ಲಾಯೆರೆ ಬೋಡಾದ್ ಅಡೆಗ್ ಬೇತೆ ಬೇತೆ ವ್ಯವಸ್ಥೆಲೆನ್ ಕನತೆರ್.ಒಞಮತೆ ಜನ ಸೇರುಗಡೆ ಅಣಿ ಪಾಡ್ದ್ ನೇಮ,ಜಾಸ್ತಿ ಜನ ಕೂಡುನಡೆ ದೈವದ ಎಲ್ಯ ಬಂಡಿ,ಬಾರ್ಯಾತ್ ಜನ ಸೇರುನಡೆ ದೈವದ ಮಲ್ಲ ಪಾಪೆದ ಬಂಡಿ ಕನತೆರ್,ಐಕೈಕ್ ಬೋಡಿತ್ತ್ ನ ಆಕಾರಲ ಕೊರ್ತೆರ್.
ದೈವದ ಪಿಲಿ ಬಂಡಿ ಒಯ್ಪುನಿ
ನಿಜವಾದ್ ಬಂಡಿ ಒಯ್ಪುನಗದೈವದ ಕರ ಗಗ್ಗರದ ಸೊರೊ,ಬಂಡಿದ ಚಕ್ರದ ಸೊರೊ ಮಾತ್ರ ಕೇನೊಂತ್ಂಡ್.ದೈವದ ಬಂಡಿ ಒಯ್ಪುನಗ ಕೆಲವು ತಿಕ್ ಡ್ ಗೋವಿಂದ ಪಾಡೊಂದುಲ್ಲೆರ್.ಕೆಲವು ತಿಕ್ ಡ್ ಜೈ ಶ್ರೀರಾಮ್ ಪನೊಂದುಲ್ಲೆರ್.ಆಂಡ ದುಂಬುದ ಕಾಲೊಡು ದೈವದ ಬಂಡಿ ಒಯ್ಪುನಗ ಇಂಚಿತ್ತ್ ನ ಲೆಪ್ಪು ಪೂರ ಕೇನೊಂದಿಜ್ಜಾಂಡ್.
ಕೆಲವು ತಿಕ್ ಡ್ ಕುಲು ಕುಲು ಕೂ....ಕುಲು ಕುಲು ಕೂ... ಪಂಡೊಂದು ದೈವದ ಬಂಡಿ ಒಯ್ತೊಂತೆರ್ಡ ನನ ಕೆಲವು ಕೋಡಿಡ್ ಒಯ್ಪುಲೆ..ಒಯ್ಪುಲೆ..ಬರಡ್...ಬರಡ್...ಒಯ್ಪಿ..ಒಯ್ಪಿಂದ್ ಬಂಡಿ ಒಯ್ತೊಂತೆರ್.
ದೈವದ ಪಂಜಿದ ಬಂಡಿ ಒಯ್ಪುನಿ
ದುಂಬು ಕೆಲವು ತಿಕ್ ಡ್ ಬೋವಿ ಜನಾಂಗೊಗು ದೈವದ ಬಂಡಿ ಒಯ್ಪುನ ಅಧಿಕಾರ ಇತ್ತ್ಂಡ ನನ ಕೆಲವು ತಿಕ್ ಡ್ ಪೂಜಾರಿ ಜನಾಂಗದಕ್ಲೆಗ್ ದೈವದ ಬಂಡಿ ಒಯ್ಪುನ ಅಧಿಕಾರ ಇತ್ತ್ಂಡ್.ಇತ್ತೆ ಗ್ರಾಮಸ್ಥೆರ್ ಪೂರ ಸೇರ್ದ್ ಬಂಡಿ ಒಯ್ಪೆರೆ ಸುರು ಮಲ್ತಿ ಬೊಕ್ಕ ಈ ಗೋವಿಂದ ಗೋವಿಂದ ಪೂರ ಸುರಾತ್ಂಡ್.ಆತೇ ಅತ್ತ್.ಇತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ನಮ ಇನಿ ಆಚಾರೊಡು ತತ್ತ,ಜೀವನ ಪದ್ದತಿಡ್ ತತ್ತ.ಆರದನಾ ಪದ್ದತಿಡ್ ತತ್ತ.ಪೂರೆನ್ಲ ನಮ ಕಾಸ್ ಡ್ ಲಪ್ಪೆರೆ ಪೋದು ದೈವಾರದನೆದ
ಮೂಲ ಮುದೆಲ್ ತತ್ತೊಂದುಂಡು.
.jpg)
