ಚಿತ್ತಾರಿ,ಚಿತ್ತಾರಿಕೆ,ಚಿತ್ತೆರಿ,ಚಿತ್ತೇರಿ

ಚಿತ್ತಾರಿ,ಚಿತ್ತಾರಿಕೆ,ಚಿತ್ತೆರಿ,ಚಿತ್ತೇರಿ

ನರಮಾನ್ಯನ ಪುಟ್ಟು ಸಾವುದ ನಡುತ ಕಡೆತ ಸೂತ ಪೊತ್ತುದ ಕುಕ್ಕುದ ಮರತ ಪೊತ್ತ್ ದೊರಿ ಕೊಳ್ಳಿ ಗ್ಲ ಪುಟ್ಟಿ ಬಾಲೆದ ಸುರತ ತೊಟ್ಟಿಲ್ ಗ್ಲ ಉಪ್ಪುನ ಸಮ್ಮಂದ ತುಳುವೆರೆಗ್ ತೆರಿ ಇಚಾರ.ದೈವ   ತನ್ನ ಚಾಕಿರಿಗ್ ಏರ್ಂದ್ ಬಾಲೆ ಅಪ್ಪೆನ ಬಂಜಿಡುಪ್ಪುನಗನೇ ನಿರ್ದಾರ ಮಲ್ತ್ ದಿಪ್ಪುಂಡು. ಆಂಚನೆ ನರಮಾನ್ಯನ ಬದ್ ಕ್ ದ ಕಡೆಕೊಡಿಮುಟ್ಟ ದೈವಾರಾದನೆ ಮೊಡೆದುಪ್ಪುಂಡು.ನಮ ಕರಿದ್ ಪೋಯಿನಕ್ಲೆನ್ ಹಿರಿಯೆರ್ನೊಟ್ಟುಗು ಸೇರಾವುನ,ಆ ಮೂಲಕ ಕುಟುಮದ ದೈವದ ಕೈಕ್ ಕರಿದ್ ಪೋಯಿನಕುಲೆನ್ ಒಪ್ಪಿಪುನ,ಅಕುಲು‌ ನಮಕ್ ಕಾಪಾದಿಪ್ಪೆರ್ಂದ್ ಅಕ್ಲೆನ್ ವರ್ಸೊಗೊರ ಉಲಯಿ ಲೆಪ್ಪುನ ತೂನಗ ಕರಿ ಪೋಯಿ ಬೊಕ್ಕಲ ತುಳುವೆರ್ ಆ  ಜೀವೊಗು ಏತ್ ಬಿಲೆ ಕೊರ್ತೆರ್ಂದ್ ತೆರಿಯುಂಡು.ಅಂಚಾದ್ ತುಳುವೆರ್ ಪುಟ್ಟುರ್ದು ಜಾಸ್ತಿ ಮರಣೊಗು ಬಿಲೆ ಕೊರ್ತೆರ್.ಉಂದೆಕ್ ಸಾಕ್ಷಿಯಾದ್ ದೂಳೊಪ್ಪ ಪಂಡ ಸರ್ರ ಪೊತ್ತಿಬೊಕ್ಕದ ಬೊಣ್ಯೊನ್ ಒಟ್ಟು ಮಲ್ತ್ ದ್ ದೂಪೆ ಪಂಡ ಚಿಟ್ಟೆ ಕಟ್ಟ್ ದ್ ಅವ್ವೇ ಕಟ್ಟಿ ಚಿಟ್ಟೆ ದುಂಬುಗು ಚಿತ್ತಾರಿಕೆ ಆಂಡ್ .ಉಂದುವೇ ದೂಪೆ ದುಂಬುಗು ಸ್ಥೂಪ ಆಂಡ್.

        ತುಳುವೆರೆಗ್ ಅದಿ ಅಂತ್ಯ ಪೂರ ಬೆಮ್ಮೆರೆ.ಕರಿದ್ ಪೋಯಿನಕ್ಲೆನ್ ಬೆಮ್ಮೆರೆ ಪಾದೊಗು ಸೇರಾವೆರ್.

    

ನಂದೊಳಿಗೆ ಸಿರಿ ಆಲಡೆ ಬೊಕ್ಕ ನಾಗಬನದ ಬರಿಟೆ ಉಪ್ಪುನ ಚಿತ್ತಾರಿಕೆ

ಪಿರಾಕ್ ಡ್ ಕರಿದ್ ಪೋಯಿನಕ್ಲೆನ್ ಕೌಂತಿನ,ಪೊತ್ತಾಯಿನ‌ ಜಾಗೆಡೇ ಚಿತ್ತಾರಿಕೆ,ಮುಡಿಂಜ ಕಟ್ಟ್ ದ್ ಅವೆತ ಕೈತಲೇ ಬೆಮ್ಮೆರೆನ್,ನಾಗನ್ ನಂಬೊಂದು ಬತ್ತೆರ್.ಬೆಮ್ಮೆರೊಟ್ಟುಗು ನಾಗನ್ ಸೇರಾದ್ ನಾಗಬೆಮ್ಮೆರ್ ಮಲ್ತೆರ್.ಅಂಚಾದ್ ದೈವಾರಾದನೆ ಪಂಡ ಹಿರಿಯೆರೆ ಆರಾದನೆಂದ್ ತೆರಿಯೊನೊಲಿ.ಕೂಡು ಕುಟುಮೊಲು ಪುಡದ್ ಬೇತೆ ಬೇತೆ ದಿಕ್ಕೆಲ್ಲಾನಗ ಪಂಡ ಬೇತೆ ಬೇತೆ ಇಲ್ಲ್  ಕಟ್ಟ್ ದ್ ಬದ್ ಕ್ ನಗ  ದೂರೊಡಿಪ್ಪುನ ಕರಿದ್ ಪೋಯಿ‌ ಹಿರಿಯೆರೆ ಚಿತ್ತಾರಿಕೆಗ್ ಪೋದು ಪೂ ನೀರ್ ದೀಯೆರೆ ಕಷ್ಟ ಆಂಡ್.ಅಪಗ ತನ್ಕುಲೆ ಇಲ್ಲ ಜಾಲ್ ಡ್ ಚಿತ್ತಾರಿಕೆದಂಚಿನ ರುಂದನ ಮಲ್ತ್ ದ್ ಹಿರಿಯೆರೆ ಆರಾದನೆ ಮಲ್ಪೆರೆ  ಸುರು ಮಲ್ತೆರ್.ವೈಷ್ಣವ ಆರಾದನೆ ತುಳುನಾಡ್ ಗ್ ಬತ್ತಿ ಬೊಕ್ಕ ರುಂದನ ಕಟ್ಟೆಡ್ ತೊಲಚಿ ದೈ ಬತ್ತ್ ದ್ ತೊಲಚಿದ ಕಟ್ಟೆದ ಆರಾದನೆ ಸುರಾಂಡ್.ಇನಿ ತೊಲಚಿ ಕಟ್ಟೆ ಉಪ್ಪಂದಿ ತುಳುವೆರೆ ಇಲ್ಲ್ ಉಪ್ಪಂದ್.ಮದಿಮೆದ ದುಂಬುದ ಪೇರ್ ಮಂಜಲ್ ಕೆರಮ,ದೈವದ ಪ್ರಶ್ನೆ ಚಿಂತನೆಲು,ಪೊಸತ್ ಸಾನ ಕಟ್ಟ್ ದ್ ಸಾನದೊಕ್ಕೆಲಾಪುನ ದುಂಬು ದೈವದ ಬಂಡಾರ ದೀಪುನ,ನೇಮದಪಗ ದೈವ ತೊಲಚಿಕಟ್ಟೆ ಗ್ ಸುತ್ತು ಬತ್ತ್ ದ್ ಮೂಡಾಯಿಗ್ ಮೋನೆ ಪಾಡ್ದ್ ಜೀಟಿಗೆದ ಬೊಲ್ಪು ತೋಜಾದ್ ಬೊಂಡ ಕಾನಿಕೆ ದೀಪುನ ಜಾಗೆ ತೊಲಚಿಕಟ್ಟೆ.ಮೂಲು ನಮಕ್ ದೈವಾರಾದನೆ ಹಿರಿಯೆರೆ ಆರಾದನೆ ಪನ್ಪುನೆಕ್ ಸೊಸ್ಟತೆ ತಿಕ್ಕುಂಡು.ಅಂಚನೆ ಮೂಲ ಆರಾದನೆ,ಮೂಲ ನಾಗೆ ಪಂಡ ಮೂಲ ಹಿರಿಯಾಕ್ಲೆ ಆರಾದನೆಂದ್ ಅರ್ಥ ಮಲ್ತೊನೊಡು.ಅಮ್ಮೆರ್,ಅಜ್ಜೆರ್,ಪಿಜ್ಜೆರ್,ಮುತ್ತಜ್ಜೆರ್ ಇಂಚ ಸರಪೊಳಿ ಪಿರ ಪಿರ ಗೋಡ್ಯೊಂದು ಸರಪೊಳಿದ ಸುರುಕು ಉಂತುನಾರ್  ಬೆಮ್ಮೆರ್.

ಪುಂಚೊಡು ಸರ್ಪೆ,ಕಲ್ಲ್ ಡ್ ನಾಗೆ ಪನ್ಪಿ ಪಾತೆರ ಉಂಡು.ದೈವದ ಪ್ರತಿಯೊಂಜಿ ಸೊತ್ತುಲೆಡ್ ನಾಗನ‌ ಒರು ಬುಡ್ಪಾವೆರ್.ನಾಗೆ ಪಂಡ ನರಮಾನ್ಯಗ್ ಪೋಡಿಗೆ.ನಾಗನ ಒರು ಬುಡ್ಪಾಂಡ ಆ ಸೊತ್ತುಲೆನ್ ಕಲುವೆರ್ ದೋಸ ಬರುಂದು ಮುಟ್ಟೊಂದಿಜ್ಜಾಂಡ್.ನಾಗೆ ತುಚ್ಚಿಂಡ ನರಮಾನಿ ಬದ್ ಕೊಂದಿಜ್ಜಾಂಡ್.ಅಂಚಾದ್ ನಾಗನ್ ದೈವ ಅದ್,ದೇವೆರಾದ್ ಆರಾದನೆ ಮಲ್ತೊಂದು ಬತ್ತೆರ್.ಅಂಚಾದ್ ಕಲ್ಲ್ ಡ್ ಲ ನಾಗನ ಒರು ಬುಡ್ಪಾದ್ ಆರಾದನೆ ಮಲ್ತೆರ್.ಮೂಲು ಅಲಂಕಾರಲ ಆಂಡ್,ಪೋಡಿಗೆಲ ಬರ್ಪುಲೆಕಾಂಡ್.ಪ್ರಪಂಚದ ಮಾತ ದೈವ ದೇವೆರೆ ಕೆತ್ತನೆಲೆಡ್ ನಾಗನ ಒರು ಪ್ರತಿಯೊಂಜೆಟ್ಲ ಉಂಡು.

                    ಚಿತ್ರಕೂಟದ ಮಿತ್ತ್ ಮರ ಬುಳೆತ್ ನಿ

ತುಳುನಾಡ್ ದ ಬನ,ಆಲಡೆ,ಚಿತ್ತಾರಿಕೆ ಪಿರಾಕ್ ದ ಈಸರ ದೇಲ್ಯೊಲೆನ್ ತೂನಗ ಪಿರಾಕ್ ಡ್ ಉಂದೆತ ನಡುಟು ಇತ್ತಿ ಸಂಬಂದೊಲು ತೆರಿದ್ ಬರು.ಉದಾರ್ಮೆಗ್ ಬಸ್ರೂರುದ ತೌಳವೇಶ್ವರ ದೇಲ್ಯ

                ತುಳುವೆರೆ ಮೂಲತಾನದ ಚಿತ್ರಕೂಟ,ಚೈತ್ಯ.ಮಿತ್ತ್ ಶಿವಲಿಂಗದೊರು ಉಂಡು

 ಚಿತ್ರಕೂಟೊನು ತೀರ್ನಕ್ ಲೆಗ್ ಕಟ್ಟ್ ನ ಗೋರಿಂದ್ ಲ ಪನ್ಪೆರ್.ತೀರ್ನಕ್ಲೆಗ್ ಕಟ್ಟ್ ನ ಚಿತ್ತಾರಿಕೆಂದ್ ಲ ಪನ್ಪೆರ್.ಚಿತ್ರದಲೆಕ ಕಟ್ಟ್ ನ ಆಯ ಉಂದೆತವಾದಿಪ್ಪುಂಡು.ಏತೋ ತುಳುನಾಡ ಬನೊಕ್ಲೆಡ್ ಉಪ್ಪುನ ಚಿತ್ತಾರಿಕೆಲು  ಕರಿದ್ ಪೋಯಿನಕ್ಲೆ ಸಮಾದಿಲಾದುಲ್ಲ.ಆಂಡ ಇನಿತ ದಿನಮಾನೊಲೆಡ್ ಬನೊಟಿತ್ತಿ ಹಿರಿಯೆರೆ ಸಮಾದಿಲೆನ್ ಗರ್ತ್ ದ್ ಪೊಸತ್ ಚಿತ್ರಕೂಟ ಕಟ್ಟ್ ದ್ ಎದುರುಗು ನಾಗನ ಉಬ್ಬು ಶಿಲ್ಪೊಲೆದ ಕಲ್ಲ್ ದೀಯೊಂದುಲ್ಲೆರ್.ಉಂದು ಸರಿಯತ್ತ್.

ದುಂಬುದ ಕಾಲೊಡು ಕುಟುಮದ ಹಿರಿಯಾರ್,ಮಲ್ಲ ಮಾನಾದಿಗೆದಾರ್ ತೀರ್ಪೋಯೆರ್ಡ ಕುಟುಮದ ನಾಗ ಬನತ,ನಾಗ,ಬೆಮ್ಮೆರ್,ಲೆಕ್ಕೆಸಿರಿ,ದೈವ ಸಾನ ಗುಂಡದ ಕೈತಲ್ ಕೌಂತ್ ದಾ ಪೊತ್ತದಾ ಅವೆತ ಕೈತಲೇ ಅಕ್ಲೆನ ಚಿತ್ತಾರಿಕೆ/ಗೋರಿ ಕಟ್ಟೊಂತೆರ್.ಆಂಡ ಅವು ಲೆಕ್ಕೆಸಿರಿ,ಬೆಮ್ಮೆರೆ ಸಾನಿಧ್ಯ ಅತ್ತ್.

" ಯಾನ್ ಇತ್ತ್ಂಡ ಮೂಲು,ಸೈತ್ಂಡ ಬೆಮ್ಮೆರೊಟ್ಟುಗು " ಪನ್ಪಿ ಪಾತೆರ ಹಿರಿಯಾಕ್ಲೆ ಬಾಯಿ ಪಾತೆರ ಆದಿತ್ತ್ಂಡ್. ಇಲ್ಲದ ಯಜಮಾನನ,ಯಜಮಾಂದಿನ ಸಾವುದಾನಿ ಪೂಕರೆದಾತ್ ಎತ್ತರ ಪಾಡುನ ಗುರ್ಜಿ ಕಂಬಲ ಕರಿದ್ ಪೋಯಿನ ಅಕುಲು ಬೆಮ್ಮೆರೆ ಪಾದೊಗು ಸಂದಿಯೆರ್ ಪನ್ಪುನೆನ್ ತೆರಿಪಾವುಂಡು.ಅಂಚಾದ್ ಹಿರಿಯೆರೆ ಆರಾದನೆದೊಟ್ಟೊಟ್ಟುಗು ಬೆಮ್ಮೆರೆ ಆರಾದನೆ ನಡಪುಂಡು.ಕೆಲಿಂಜದ ಉಲ್ಲಾಲ್ದಿನ ಎತ್ತರದ ಮಾಡೊನು‌ ಚಿತ್ತಾರಿಕೆ ಪನ್ಪೆರ್.ಅಂಚಾದ್ ಜಗಲಿ ದೊರುತ ಎತ್ತರದ ಮಾಡೊನು ಚಿತ್ತಾರಿಕೆ ಪನೊಲಿ.ಚಿತ್ತಾರಿಕೆದ ಬೆಮ್ಮೆರ್ ಪನ್ಪಿ ಉಲ್ಲೇಖ ಸಾಸನೊಲೆಡ್ ಬರ್ಪುಂಡುಂದು ಹಿರಿಯ ಜನಪದ ವಿದ್ವಾಂಸೆರಾಯಿನ ಪುರುಷೋತ್ತಮ ಬಲ್ಯಾಯೆರ್ ಬರವೊಂಜೆಟ್ ತೆರಿಪಾದೆರ್