ಮಾಲಯ ಅಮಾಸೆ,ಮಾಲರಿ,ಮಾಲಕಿರಿಯ

ಮಾಲಯ ಅಮಾಸೆ,ಮಾಲರಿ,ಮಾಲಕಿರಿಯ

  

ತುಳುನಾಡ ಅವೈದಿಕ ತುಳುವೆರೆಗ್ ಮಾಲಯ ಪನ್ಪುನವು ಆತೊಂಜಿ ಇಸೇಸ ದಾಲ ಅತ್ತ್.ಏರೆಗ್ ಆಟಿದ ಆಚರಣೆ ಉಂಡಾ ಅಕ್ ಲೆಗ್ ಮಾಲಯ ಆಚರಣೆ ಇಜ್ಜಿ.ಆಟಿ ಆಚರಣೆ ಇತ್ತ್ ನಕ್ಲೆಗ್ ಮಾಲಯದ ಪಿತೃ ಪಕ್ಷದ ಅಚರಣೆ ಇಜ್ಜಿ.ದಾಯೆ ಪಂಡ ಆಟಿದ ಅಮಾಸೆದಾನಿ ನಮ್ಮ ಪೂರ್ವ ಹಿರಿಯಾಕ್ಲೆಗ್ ಅಗೆಲ್ ಪಾಡ್ದ್ ಅಕ್ಲೆನ್ ಉಲಯಿ ಲೆಪ್ಪುನ ಕಿರಮ.ನಮ ವೈದಿಕದಲೆಕ ಪಿಂಡ ಪ್ರದಾನ ಮಲ್ತ್ ದ್ ಕರಿದ್ ಪೋಯಿ ಇರಿಯಾಕ್ಲೆನ್ ಕಡಲ್ ಗ್ ಬುಡ್ಪುನ ಕೆರಮ ಇಜ್ಜಾಂಡ್.ಆಟಿ ಅಮಾಸೆಗ್ ಸೀರ್ತ ಮೀಪುನ,ಕಡಲ್ ಮೀಪುನ ಕೆರಮ ಇತ್ತ್ಂಡ್.ನಮ ನಮ್ಮ ಪೂರ್ವ ಹಿರಿಯಾಕ್ಲ್ ನಮ್ಮೊಟ್ಟುಗು ನಮಕ್ ಕಾಪಾದ್ ಉಲ್ಲೆರ್ಂದ್ ಇಲ್ಲದ ಉಲಯಿ ಅಗೆಲ್ ಪಾಡ್ದ್ ಲೆಪ್ಪುವ.ನಿಜವಾದ್ ನಮ್ಮ ಪೂರ್ವಹಿರಿಯಾಕ್ಲೆನ್ ಆರಾದನೆ ಮಲ್ಪುನ ಆಟಿ ತಿಂಗೊಲು ನಮಕ್ ಎಡ್ಡೆ ತಿಂಗೊಲು.ಅಂಚನೆ ಆಟಿದ ಅಮಾಸೆ,ಅವೆರ್ದ್ ಬೊಕ್ಕ ಬರ್ಪುನ ಮಾಲಯ ಅಮಾಸೆ,ಅವೆರ್ದ್ ಬೊಕ್ಕ ಬರ್ಪುನ ದೀಪಾವಳಿ/ಪರ್ಬದ ಅಮಾಸೆ ಇಂಚ ಬೆರಿ ಬೆರಿ ಬರ್ಪುನ ಮೂಜಿ ಅಮಾಸೆಲೆಡ್ ಕರಿದ್ ಪೋಯಿನಕ್ಲೆನ್ ನೇರ್ಪು ಮಲ್ಪುನವು ವೈದಿಕ,ಅವಯದಿಕೊಡು ನೆಗತ್ ತೋಜುಂಡು.ಅಂಚನೆ ಮಾಲಯದ ಆಚರಣೆ ಮಾತೆರೆಗ್ಲ ಎಡ್ಡೆ.ದಾಯೆ ಪಂಡ ವೈದಿಕ ಆವಡ್,ಅವೈದಿಕ ಆವಡ್ ಪಿತೃಲೆನ ಆರಾದನೆ ಮಾತೆರೆಗ್ಲ ಪ್ರದಾನ .ಆಂಡ ಇನಿ ನಮ್ಮ ಹಿರಿಯಾಕ್ಲ್ ಪಂಡ್ ಕೊರಿ ಕಿರಿಯೆಲೆನ್ ಮದತ್ ದ್ ಪಿಂಡ ಬುಡೊಂದುಲ್ಲ.

ವೈದಿಕೆರೆಗ್ ತುಳುವೆರೆ ಆಟಿದ ಆಚರಣೆ ಇಜ್ಜಂದಿನೆರ್ದಾದ್ ಅಕ್ಲೆಗ್  ಮಾಲಯ ಆಚರಣೆ ಉಂಡು.ಮಾಲಯ,ಮಹಾಲಯ ಪಂಡ ಕರಿದ್ ಪೋಯಿನ ,ಮಹಾ ಲಯ ಆಯಿನ ಸರ್ವ ಪಿತೃಲೆನ್ ಒಟ್ಟು ಸೇರಾದ್ ಆರಾದನೆ ಮಲ್ಪುನ ನೂಲು ಪಾಡಿ ಸಂಸಾರದ ಸದ್ಗತಿದ ಕೆರಮ ಮಾಲಯ ಅಮಾಸೆದಾನಿ  ನಡಪುಂಡು.ದೇವೆರೆ ಸೃಷ್ಟಿ ನರಮಾನಿಯಾಂಡಲ ಅಪ್ಪೆ ಅಮ್ಮನ ಸರ್ರ ಸಮ್ಮಂದ,ಅಕ್ಲೆ ಹಿರಿಯಾಕ್ಲೆ ಸಮ್ಮಂದ ನಮ್ಮ ಪುಟ್ಟುಡುಪ್ಪುಂಡು.ದರ್ಮ ಶಾಸ್ತ್ರೊಲು ಪನ್ಪುಲೆಕ ಮೂಜಿ ತರೆ ತರೆ ತರೆ ಪಿರಾಕ್ ದ ಆತ್ಮೊಲು ಸ್ವರ್ಗ ಬೊಕ್ಕ ಬೂಮಿದ ನಡುತ ಪಿತೃ ಲೋಕೊಡುಪ್ಪುವ ಪನ್ಪಿ ನಂಬೊಳಿಗೆ.ಪಿತೃಲೋಕೊನು ತೂವೊನ್ನಾಯೆ ಯಮಧರ್ಮೆ.ನಮ ಪಿತೃ ಪಕ್ಷೊಲೆಡ್ ಪಿತೃಲೆಗ್ ಮಲ್ಪುನ ಸಾರ್ದೊಲು ಯಮದೇವೆರೆ ಮೂಲಕ ಪಿತೃಲೆಗ್ ಮುಟ್ಟುಂಡುಂದು ನಂಬಿನಕುಲು.ಕನ್ಯಾಮಾಸದ ಕೃಷ್ಣಪಕ್ಷೊಡು ಪಿತೃಪಕ್ಷ ಸುರಾಪುಂಡು.

ಎಚ್ಚಾದ್ ಸಾರ್ದೊಲು ಇಲ್ಲಲ್ ಮದ್ದೆನಡ್ ನಡಪುವ.ಕೆಲವೊರ ಸುದೆ ಬರಿಟ್ ನಡಪುವ.ನನ ಕೆಲವೊರ ಪುಣ್ಯ‌ಕ್ಷೇತ್ರದ ಪುಣ್ಯ ತುದೆಕ್ಲೆ ಬರಿಟ್ ನಡಪುವ.

        ಮೂಜಿ ಋಣೊಕುಲೆಡ್ ಪಿತೃ ಋಣ ಒಂಜಿ.ಕರಿದ್ ಪೋಯಿನಕ್ಲೆಗ್ ಸಾರ್ದ ಮಲ್ತ್ಂಡ ವರ್ಸೊಗೊರ ಕರಿದ್ ಪೋಯಿನಕ್ಲೆಗ್ ಮಲ್ಪುನ ಪಿತೃಕಜ್ಜೊಲೆಗ್ ಮಹಾಲಯ ಪನ್ಪೆರ್. ಮಾಲಯ ಅಮಾಸೆದಾನಿ ಪೂರ ಪೂರ್ವಜೆರ್ನ  ಸ್ರಾದ್ದ ಸಂದುಂಡುಂದು ಲೆಕ್ಕ.ನಮ್ಮ ಕುಟುಮೊಲೆಗ್ ದೋಸ ಬರ್ರೆ ಕರಿದ್ ಪೋಯಿನ ಪಿತೃನಕ್ಲೆ ಕಾರಣ  ಪಿತೃಲೆರ್ದ್ ಬರ್ಪುನ ಒವು ದೋಸ  ಬರ್ಪುನ ಇತ್ತ್ಂಡಲ  ಮಾಲಯ ಅಮಾಸೆಗ್ ಲಯ ಆಪುಂಡುಂದು ಅಕುಲು ನಂಬಿನಕುಲು.ವರ್ಸೊಗೊರ ಬರ್ಪುನ ಈ ಅಮಾಸೆದಾನಿ ಏತೋ ಸದ್ಗತಿ ತಿಕ್ಕಂದಿನ ಪ್ರೇತಾತ್ಮೊಲೆಗ್ ಸದ್ಗತಿ ಕೊರ್ರೆ ಆಪುಂಡು.ಮಾಲಯ ಸ್ರಾದ್ದೊನು ಮಲ್ಪುನ ಆಲಯ(ಇಲ್ಲ್) ನ್ ಕರಿದ್ ಪೋಯಿ ಪಿತೃಲು  ಮಹಾಲಯ(ಮಲ್ಲ ಇಲ್ಲ್) ಮಲ್ಪುವೆರ್ ಪಂಡ ವಂಶೊನು ಬೆಳಗಾವೆರ್ಗೆ.ಲಯಕಾರೆರಾಯಿನ ಶಿವೆ,ಯಮೆ ಬೊಕ್ಕ ಪಿತೃಲೆನ್ಆರಾದನೆ ಮಲ್ಪುನ  ಪದಿನಾಜಿ ದಿನೊಕ್ಲೆನ ಗುರ್ತ ದೀನ(ಪ್ರದಾನ) ದಿನೊಕು ಮಹಾಲಯ ಪನ್ಪೆರ್ .ಮಾತ ಕಿರಿಯ ಬಾಗ ಮುಗಿತ್ ಬೊಕ್ಕ ನೀರ್ ಡ್ ಮೂಜಿ ಸರ್ತಿ ಮುರ್ಕ್ ದ್ ಸುದ್ದ ಆಪುನ ಕೆರಮ ಮೊಕ್ಲೆನ.ಸೋಣ ಸಂಕ್ರಾಂತಿ ಕರಿದ್ ಬರ್ಪುನ ನಿರ್ನಾಲದ ಮದ್ಯ ಬಾಗೊಡು ಮಾಲಯ ಅಮಾಸೆ ಬರ್ಪುಂಡು.ಮಾಲಯ ಅಮಾಸೆದ ಪಿತೃಪಕ್ಷದ ಅಮಾಸೆದಾನಿ ಪಿತೃ ಸಾರ್ದ ಮಲ್ಪುವೆರ್.ಆನಿ ಪಿತೃಲೆಗ್  ಆವಾರ ಬಲಸುನೆನ್ ಬೊಳ್ಳಿ,ತಾಮ್ರ,ಮಣ್ಣ್ ದ ಕರೊಕ್ಲೆಡ್ ಬೆಯ್ಪಾದ್ ಬಾರೆದಿರೆತ ಮಿತ್ತ್ ಇಲ್ಲದುಲಯಿ ಬಲಸ್ ದ್ ಪಿತೃಲು ಬರ್ಪುನೆನ್ ಕಾತ್ ಕುಲ್ಲುವೆರ್.ಪೆತ್ತದ ನೆಯಿ,ಎಣ್ಮೆ ಬಿರಾಯಿನ ಅರಿತ,ಗೋದಿದ ಪೊಡಿತ  ಉಂಡೆ(ಪಿಂಡ)ಮಲ್ತ್ ದ್ ಬಾರದಿರೆಟ್ ದೀಪೆರ್. ತಿಲ/ಎಣ್ಮೆದ ತರ್ಪಣ ಆಯಿ ಬೊಕ್ಕ ಒರಿನೆನ್ ಕಕ್ಕೆಗ್ ದೀಪೆರ್. ಚೌತಿರ್ದ್ ಬೊಕ್ಕ ಬರ್ಪುನ ಪುಣ್ಣಮೆರ್ದ್ ಬೊಕ್ಕದ ಪದಿನಾಜಿ ದಿನೊಕ್ಲೆನ್ ಪಿತೃಪಕ್ಷ ಪನ್ಪೆರ್.ಪಕ್ಷ ಪಂಡ ಪದಿನೈನ್ ದಿನ ಪದಿನೈನ್ ದಿನ ಕರಿದ್ ಬರ್ಪುನ ಪದಿನಾಜನೆ ದಿನತ ಅಮಾಸೆನ್ ಸರ್ವ ಪಿತೃಲೆನ ದಿನಂದ್ ಪನ್ಪೆರ್.ಸರ್ವ ಪಿತೃಲೆಗ್ ಸನ್ಮಂತ ಆಂಡ ಅಕುಲುಮಾತಾ ರೀತಿಡ್ ಕುಟುಮ ಸಂಸಾರೊಗು ಎಡ್ಡೆ ಮಲ್ಪುವೆರ್ಂದ್ ನಂಬಿನಕುಲು ವೈದಿಕಾರಾದಕೆರ್.ಅಂಚನೆ ಸಾರ್ದೊಡು ಮೂಜಿ ತರೆತರವಾಡ್ ಗ್ ಪಿಂಡ ಪ್ರದಾನ ಆಂಡ ಮಾಲಯ ಅಮಾಸೆದಾನಿ ತೆರಿನ,ತೆರಿಯಂದಿನ ಸರ್ವ ಪಿತೃಲೆಗ್ ಪಿಂಡಪ್ರದಾನ ಆಪುಂಡು.ಪಿಂಡ ಪ್ರದಾನ ಆಚರಣೆ ಮಾಲಯೊಡು ಮಲ್ಪಂದಿನಕುಲು ಪಿತೃಪಕ್ಷೊಡು ಕರಿದ್ ಪೋಯಿ ಹಿರಿಯೆರೆನ್ ನೆನೆತ್ ದ್ ಕಡಲ್ ಮೀಪೆರ್.ಬಡವೆರೆಗ್ ದಾನ ಧರ್ಮ ಮಲ್ಪುವೆರ್.ಕರಿದ್ ಪೋಯಿನ ಹಿರಿಯೆರೆಗ್ ಕೊಡಿರೆಟ್ ಬಲಸ್ ದ್ ಅಕ್ಲೆನ್ ಕಾತ್ ದ್ ಪ್ರಸಾದದ ಒರುಟು ಅವ್ಲು ಬಲಸಿ ಒನಸ್ ತೆನಸ್ ನ್ ಉನ್ಪೆರ್.ಪಿತೃಪಕ್ಷೊಡು ಅಕುಲು ವಾ ಎಡ್ಡೆ ಕೆಲಸ,ಮದ್ಮೆ ಮಸ್ಕಿರಿ ಮಲ್ಪುಜೆರ್.ಪದ್ದೆಯಿ,ಕುಂಟು ಪೂರ ಪೊಸತ್ ದೆಪ್ಪುಜೆರ್.ಕುಜಲ್,ಉಗುರು,ಗಡ್ಡ ದೆಪ್ಪುಜೆರ್.ಪೊಸತ್ ವಾ ಕೆಲಸಲ ಸುರು ಮಲ್ಪುಜೆರ್.ದೂರದೂರುಗು ಪೋಪುಜೆರ್.ಆಂಡ ತೀರ್ಥಯಾತ್ರೆ ಮಲ್ಪುವೆರ್.

ಪುರಾಣದ ಒರುಟು ತೂಪುಂಡ ಮಹಾಭಾರತ  ಕೊಳಗೊಡು ಕಾಯ ಬುಡಿ ಕರ್ಣೆ ಸೊರ್ಗೊಗು ಪೋನಗ ಆಯಗ ಬಾರೀ ಬಂಜಿ ಸೂಗೆ.ಆಂಡೆ ತಿನೆರೆಂದ್ ದಾದ ದೆತೊಂಡಲ ಅವು ಬಂಗಾರಾವೊಂತ್ಂಡ್ ಗೆ .ಅಂಚಾದ್ ಅಯೆ ಅಮ್ಮೆ ಸೂರ್ಯನೊಟ್ಟುಗು ಇಂದ್ರನಡೆ ಪೋದು ಕೇನ್ನಗ ಈ ಬದ್ ಕ್ ದುಪ್ಪುನಗ ಬಾರ್ಯಾತ್ ಬಂಗಾರ್ ದಾನ ಮಲ್ತ.ನಿನ್ನ ಪೂರ್ವ ಹಿರಿಯಾಕ್ಲೆಗ್ ಸಾರ್ದ,ಪಿತೃತರ್ಪಣ ಕೊರಂದೆ ಅಕ್ಲೆ ಸಾಪ ನಿಕ್ಕ್ ತಿಕ್ ದ್ಂಡ್.ಅಂಚಾದ್ ಈ ಬೂಮಿಗ್ ಪೋದು ಪದಿನೈನ್ ದಿನ ಬೂಮಿಡಿತ್ತ್ ದ್ ಕರಿದ್ ಪೋಯಿನ ಪಿತರಲೆಗ್ ಸಾರ್ದ ಪಿತೃ ತರ್ಪಣ ಮಲ್ಪು,ಬತ್ತಿನಕ್ಲೆಗ್ ಬಡವು ಬಾಜೆಲ್ ಕೊರ್ಲಂದ್ ಬೂಮಿಗ್ ಕಡಪುಡುವೆಗೆ.ಆಯೆ ಇಂದ್ರೆ ಪನ್ಲೆಕ ಮಲ್ಪುವೆಗೆ.ಇತ್ತೆ ಈ ಪದಿನೈನ್ ದಿನೊನು ಪಿತೃ ಪಕ್ಷಂದ್ ಪನ್ಪೆರ್.

ನಮ ತುಳುವೆರ್ ರಟ್ಟೆಡ್ ಬಲ ತೋಜಾಯ.ಅಕುಲು ಇದ್ಯೆ ಬುದ್ದಿಡ್ ಬಲ ತೋಜಾಯೆರ್.ಬುದ್ದಿದ ಎದುರು ಬಲ ಬಲದಾಂತೆ ಒರಿಂಡ್.ಇನಿ ಆಟಿ ಆಚರಿಪುನ ಸೂದ್ರ ತುಳುವೆರೆಗ್ ಈ ಮಾಲಯದ ಕಟ್ಟಿಜ್ಜಿ. ಒಂಜಾತ್ ತುಳುವೆರ್ ಮಾಲಯೊಡು ಮೀನ್ ಮಾಸ ಬುಡ್ಪುನಲ ಉಂಡು.ವೈದಿಕ ಆವಡ್,ಅವೈದಿಕ ಆವಡ್ ಪಿತೃಲೆಗ್ ಬಿಲೆನ್ ಕೊರ್ಪುನೆನ್ ಮದತ್ ಜೆರ್.

ಅಪಗ ಮಾಲಕಿರಿಯ ಪಂಡ ದಾದಂದ್ ಪಿಂದೊನ್ಗ.ಇತ್ತೆ ಮಾಲಕಿರಿಯೊನು ಮಾಲರಿಯ,ಮಾಲಕರಿಯಂದ್ ಲ ಪನ್ಪೆರ್.ಮಾಲಕಿರಿಯ ಪಂಡ ಮಾತ ಸೈತ್ ನಕ್ಲೆಗ್ ಬತ್ತ್ ನಂಚಿನ ಕಿರಿಯ.ಪಂಡ ಕರಿದ್ ಪೋಯಿನ ಮಾತೆರೆಗ್ ಮಲ್ಪುನಂಚಿನ ಕಿರಿಯೊಲು.ಸೈತ್ ನಕ್ಲೆಗ್ ಸಾವುದಾನಿ ನಮ ಮಲ್ಪುನವು ಪೂರ ಮಾಲಕಿರಿಯ.  ಮಾಲಕಿರಿಯ ಕರಿಪುನವು ಸಾವುದಾನಿ ಮಾತ್ರ.

ಅಪಗ ಮಾಲರಿ ಪಂಡ ದಾದ ತೆರಿಕ.ದೈವ ಬೂತಾರಾದನೆಡ್ ಮಾಲರಿ ತೂವೆರೆ ತಿಕ್ಕುಂಡು.ಒಂಜಿ ಕಾಲೊಡು ಬದ್ ಕ್ ದಿತ್ತ್ ದ್ ಬೊಕ್ಕ ಇಜ್ಜಂದಾದ್ ಕಾರ್ನಿಕ ತೋಜಾಯಿನ ದೈವ,ಬೂತೊಲಾಯಿನೆಕ್ .ಅಂಚಾದ್ ಪಿತೃಲೆಗ್ ಸಂದುನ ಪ್ರಕಾರದ ಬೂತಾಲ್ಯದ ಕೆರಮೊನು ಮಾಲರಿ ಪನ್ಪೆರ್.ಸೋಣೊರ್ದು ಬೊಕ್ಕ ಬೂತಾಲ್ಯೊಡು ಈ ಕೆರಮ ತೂಯೆರೆ ತಿಕ್ಕುಂಡು.

ಅಂಚನೆ ಪಿತೃಪಕ್ಷ ಆಚರಣೆ ಮಲ್ಪಂದಿ ತುಳುವೆರೆಗ್ ಮಾಲಯೊಡು ಇಲ್ಲ್ ದಿಂಜಾವೊಲಿ.ಅಂಚನೆ ಪಿತೃ ಪಕ್ಷ ಆಚರಣೆ ಮಲ್ಪುನಕ್ಲೆಗ್ ಮಾಲಯೊಡು ಇಲ್ಲ್ ದಿಂಜವುನವು ನಿಷಿದ್ಧ.