ತುಳುನಾಡ ಮಾರಿ ಮಮ್ಮಾಯಿ ಆರಾದನೆ

ತುಳುನಾಡ ಮಾರಿ ಮಮ್ಮಾಯಿ ಆರಾದನೆ

  

ಕಾಪುದಪ್ಪೆ ಮಾರಿಯಮ್ಮ

  ನಮ್ ತುಳುನಾಡ ಮಾರಿ ಮಮ್ಮಾಯಿನ ಗುಡಿಕುಲು ಮಹಾಮಾಯೆ ದೇವಿನ ದೇವಲ್ಯಾದ್ ಕಾಲಾನುಬಾಗೊಡು ಮಾರಿನ ನೆತ್ತೆರಾವಾರದ ಆಚರಣೆ ಉಂತುದು ಪೋಪುನ ಲಚ್ಚಣೊಲು ತುಳುನಾಡೊರ್ಮೆ ಇನಿ ತೋಜೊಂದುಂಡು.ಇತ್ತೆನೇ ನೆತ್ತೆರಾವಾದ ದೈವೊಲೆಗ್ ಕುಂಬುಡ ಕಡ್ತ್ ದ್ ಅಗೆಲ್ ಪಾಡ್ದ್ ಸುದಾರ್ಯುನ ವೈದಿಕ ಆಚರಣೆ ತುಳುನಾಡ್ ಗ್ ಬತ್ತ್ ದ್. ಮೂಲ ದೈವೊಲೆ ಪುದರ್ ಮಯಕಾದ್ ದೇವ ದೇವಿನೊರುತ ಪುದರಾದ್ ದೈವಾರಾದನೆ ದೇವೆರೆ ಆರಾದನೆಯಾದ್ ಪೋತ್ಂಡ್.ಅವ್ಲಿತ್ತಿ ಪದಿನಾಜಿ ಚಾಕಿರಿವರ್ಗ ದೂರಾದ್ ಒವ್ವಾ ಒಂಜಿ ವರ್ಗದ ಚಾಕಿರಿಡ್ ದೈವಾರಾದನೆ ಒರಿಯುಲೆಕಾಂಡ್.ಒರಿದಿನೆನಾಂಡಲ ಮೂಲ ಸೊರ್ಪೊಡು ದುಂಬುದ ಪೀಳಿಗೆಗ್ ಒರಿಪುನ ಅನಿವಾರ್ಯತೆ ನಮ್ಮವಾದುಂಡು.ತುಳುನಾಡ ದೈವಾರಾದನೆದ ಒಂಜಿ ಮರ್ಗಿಲ್ ಡ್ ಮಾರಿ ಮಮ್ಮಾಯಿನ ಆರಾದನೆಲಾ ತೋಜಿದ್ ಬರ್ಪುಂಡು.ಆಟಿಡ್ ಬೈಲಮಾರಿ ದೇರುನಿಂದ್ ಗುಳಿಗನ ಆರಾದನೆಡ್ ಮೂಡಾಯಿ ತುಳುನಾಡ ಬಾಗೊಡಿತ್ತ್ಂಡ ಒಡಿಪು ಕಾರ್ಲದಂಚಿ ಗಂಬೆದೊರುಟು ಮಾರಿ ದೇರುನ ಆಚರಣೆ ನಡಪುಂಡು.ಗುಳಿಗನ ಬೈಲ ಮಾರಿ ದೇರುನೆಟ್, ಆಟಿ ಕಳೆಂಜೆ,ಮಾಂಕಾಳಿ ನಲಿಕೆಡ್ ಲ ಮಾರಿ ದೇರುನ ಕೆರಮ ಉಂಡು.ಮೂಲು ಮೊಕುಲು ಸಿರ್ಕ್ ಸಂಕಡೊನು ದೂರ ಮಲ್ಪುನಕುಲುಂದು ಅರ್ಥ ಬರ್ಪುಂಸು.ಕೆಲವೊಂಜಿ ರಾಜಂದೈವೊಲೆ ಆರಾದನೆಡ್ ಮಾರಿ ದೇರುನ ಒರುವಾದ್ ಮಾರಿತೂಟೆ ಪೊತ್ತಾವುನ,ಮಾರಿ ತೂಟೆ ಪಾರಾವುನ ಕೆರಮ ಉಂಡು.ನಾಲಾಯಿದಾಯೆ ದೈವೊಗು,ಪಂಜುರ್ಲಿಗ್,ಕಟಿಲ್ದಪ್ಪೆ ಉಲ್ಲಾಲ್ದಿಗ್,ಗುಳಿಗಗ್ ತೂಟೆದಾವಾರ ಉಂಡು.ದೈವೊಲೆಗ್ ಬಲಿಕ್ ನೆತ್ತೆರಾವಾರ ಕೊರ್ಂಡ ಗುಳಿಗಗ್ ಬನೊಟು ನೆತ್ತೆರಾವಾರ ಕೊರ್ಪುನ ಕಟ್ಟ್.ಇನಿತಲೆಕ ಕಟ್ಟುನಕುಲು ಗುಳಿಗನ ಕೋಲೊಡು ಕೋರಿ ಅಗ್ಯೆರೆ ಇಜ್ಜಾಂಡ್.ಅಂಚನೆ ಮೂಲೊಡು ಗುಳಿಗಗ್ ಕೋಲನೇ ಇಜ್ಜಾಂಡ್.ಆಂಡ ಮಾರಿಗ್ ನೆತ್ತೆರಾವಾರ ಕೊರ್ನಗ ಇಡೀ ಊರು ಕೂಡುನ ಕಟ್ಟ್.

        

          ಮಾರಿಂದ್ ಪಂಡ ತುಳುಟು ಬೇತೆ ಬೇತೆ ಅರ್ಥೊಲು ಉಲ್ಲ.ಇನಿ ಮಾರಿ ಪಂಡ ನೆತ್ತೆರಾವಾರದ ಒಂಜಿ ಸಗ್ತಿಂದ್ ಎನ್ನಿದ .ಮೂಲೊಡು ಮಾರಿ ಪಂಡ ಮಲ್ಲ ಪನ್ಪಿ ಅರ್ಥ ಇಪ್ಪೆದ್ಂಡ್.ಮಾರಿ ಪಂಡ ಬೂಮಿಗ್. ಬರ್ಸೊನು ಕೊರ್ದು ತನು ತಂಪು ಪನ್ಪುನ ಪ್ರಕೃತಿ ಶಕ್ತಿಂದ್ ಅರ್ಥ ಉಂಡು.ಮಾರಿ ಪಂಡ ಸಿರ್ಕ್ಂದ್ ದಾಯೆ ಅರ್ಥ ಬತ್ತ್ಂಡ್ಂದ್ ತೆರಿಯುಜಿ.ಮಾರಿಗುಡಿ,ಮಾರಿ ಜರ,ಮಾರಿ ಬಲೆ,ಮಾರಿ ಕಿದೆ,ಮಾರಿ ತೂಟೆ ಮೂಲು ಪೂರ ಮಾರಿ ಪಂಡ ಮಾಮಲ್ಲಂದೆ ಅರ್ಥ ಬರ್ಪುಂಡು ಶಿವಾಯ್ ಸೀಕ್ಂದ್ ಅರ್ಥ ಬರ್ಪುಜಿ.ತೂಟೆದಾವಾರ,ಮಾರಿ ಗಿಡೆರುನಿ/ಮಾರಿ ದೇರುನಿ,ಮಾರಿ ಮಗ್ಗಿ ಕಳೆಯುನಿ ಮೂಲು ಮಾರಿ ಪಂಡ ಮಲ್ಲಂದ್ ಅರ್ಥ ಬರ್ಪುಂಡು.ಒಂಜಿ ತಿಕ್ ಡ್ ಉರಿ ಉರ್ದಾಲ ದೊಂಬುದ ಪೆಟ್ಟ್,ನನೊಂಜಿ ತಿಕ್ ಡ್ ಬರ್ಸದ ಕೆಸರ್ ಕುರ್ತೆಲ್ ಡ್ ಕಾರ್ ಪುರಿ ನಂಜಿ ತಿನ್ಪುನ ಪೊರ್ತುಗು ಮಾರಿಬೀರಿ ಕಳೆಯುನ ಆಚರಣೆ ಬರ್ಪುಂಡು.

           ಮಾರಿನ್. ಅಪ್ಪೆ,ಅಮ್ಮಂದ್ ಪುದರ್ ದೊಟ್ಟುಗು ಸೇರ್ಸಾವೊಂದು ಬೈದೆರ್.ಮಾರಿಯಪ್ಪೆ,ಮಾರಿಯಮ್ಮ ಇಂಚ..ಮೇಲ್ಡ್ ನೀರ್ಗುಳ್ಳೆದಲೆಕ ಬೂರ್ನಗ ಪುಲಮರ್ದ್ ಪಂಡಿತೆರ್ ಮರ್ದ್ ಕೊರ್ದು ಅಮ್ಮ ಬೈದೆರ್ ಸುದ್ದಾಚಾರೊಡಿತ್ತ್ ದ್ ಪುರಲ್ದಪ್ಪೆನ ಪುರ್ಸಾದೊನು ನಿಕುಲು ಜೆಪ್ಪುನ ತರೆತಡಿಟ್ ದೀಲೆಂದ್ ಪನ್ಪೆರ್.ಮಾರಿ ಪಂಡ ನಮ್ಮ "ಕಾಲ ದೇವತೆ",ಮಾರಿ ದೇವತೆಂದ್ ಲ ಪನ್ಪೆರ್.ಮೂಲು ಕಾಲ ಪಂಡ ಅರೆಗಾಲ ಮರಿಯಾಲಂದ್ ತೆರಿಯೊಡು.ಮಾರಿಯಮ್ಮಪಂಡ "ಫಲವಂತಿಕೆದ ದೇವತೆ",ಹವಾಮಾನದ ದೇವತ" ಪಂಡ ಕಾಲದೇವತೆಂದ್ ಲ ಆರಾದನೆ ಮಲ್ಪುವೆರ್.ನಮ್ಮ ದೇಸದ ತೆನ್ಕಾಯಿ(ದಕ್ಷಿಣ) ಬಾಗೊಲೆಡ್ ಮಾರಿನ ಆರಾದನೆ ಉಂಡು.ಅರೆಗಾಲ ಸುರಾನಗ ಎಚ್ಚಾದ್ ಮಾರಿನ ಆರಾದನೆ ನಡಪುಂಡು ಪಂಡ ಸುಗ್ಗಿ ಪಗ್ಗುದ(ಮಾರ್ಚಿ-ಎಪ್ರಿಲ್)ಪೊರ್ತುಡು ಮಾರಿಪೂಜೆ ನಡಪುಂಡು.ಕಾಲ ಕಾಲೊಗು ಬರ್ಸೊನು ಒದಗಾಯೆರೆಗಾದ್ ಪ್ರಕೃತಿ ಸಗ್ತಿಯಾದ್ ಮಾರಿನ ಆರಾದನೆ ನಡಪುಂಡು.ಅರೆಗಾಲ ಉರಿ ಉರ್ದಾಲ ದೊಂಬುದ ಪೆಟ್ಟ್ ಡ್ ಸರ್ರೊಗು ಉಷ್ಣ ಏರ್ದ್ ಮೇಲ್ಡ್ ಬೂರುನ ಕೋರೆ ಕೊಟ್ಲೆದಂಚಿ ಸಿರ್ಕ್ ಲೆನ್ ದೂರ ಮಲ್ಪೆರೆ ಮಾರಿನ ಆರಾದನೆ ನಡಪುಂಡು.ಮಾರಿಗ್ ಗ್ರಾಮ ದೈವದಾತೇ ಮಾನಾದಿಗೆ ಕೊರ್ನ ತುಳುವೆರ್ ಮಾರಿನ್ ಗ್ರಾಮ ದೇವತೆಯಾದ್,ಊರು ಕಾಪುನ ದೈವವಾದ್ ಆರಾದನೆ ಮಲ್ಪುವೆರ್.ಕೆಲವೊಂಜಿ ದೈವೊಲು ಮಾರಿ ಮಮ್ಮಾಯಿನ ಬೇಟಿ ಮಲ್ಪುನ ಕೆರಮಲ ಉಂಡು.ಮಾರಿಯಮ್ಮ,ಮಾರಿ ದೇವತೆ,ಮಾರಿ ದೈವ,ಮಾರಿ ಬೂತ,ಮಮ್ಮಾಯಿ ಇಂಚ ಬೇತೆ ಬೇತೆ ಪುದರ್ ಡ್ ಮಾರಿನ್ ಆರಾದನೆ ಮಲ್ಪುವೆರ್.ಕಾಳಿ/ಭದ್ರಕಾಳಿ,ಶಕ್ತಿ/ಪಾರೊತಿನ ಒರುವಾದ್ ಲಶೈವಾಂಶ ಸಗ್ತಿಯಾದ್ ಮಾರಿನ ಆರಾದನೆ ಮಲ್ಪುವೆರ್.ಬೂಮಿ ಅಲೆನ ನಿಲೆಯಾಂಡ ಕತ್ತಿ,ತಿರ್ಸುಲ,ತೂಟೆ,ಬೆತ್ತ ಅಲೆನ ಆಯುಧೊಲಾದುಂಡು.ಬಡಕಾಯಿ /ದಕ್ಷಣ ಕರ್ನಾಟಕದ ಬಾಗೊಲೆಡ್ ಮಾರಿಯಮ್ಮ ಪೊಣ್ಣುಲೆ ಮೇಲ್ಡ್ ವಸಾಯೊಡು ಬತ್ತಲ್ಡ ತುಳುನಾಡ್ ಡ್ ಆಂಜನಕ್ಲೆಗ್ ಮಾರಿ ದರ್ಸನ ಉಪ್ಪುಂಡು.

              ಮಾರಿನ ಆರಾದನೆ ದ್ರಾವಿಡ ಜನಪದ ಅವೈದಿಕ ಧರ್ಮದ ನೆತ್ತೆರಾವಾರದ ಆರಾದನೆ.ತಮಿಳ್ನಾಡ್ ಡ್ ಅಪ್ಪೆಯಾದಿತ್ತ್ ದ್(ಮಾತೃದೇವತೆ) ಯಾದಿತ್ತ್ ದ್ ತೆನ್ಕಾಯಿ/ದಕ್ಷಿಣ ಭಾರತದ ಎಚ್ಚಿನ ಗೆರಮೊಲೆಡ್ ಮಾರಿ ಮಾರಿದೈವ ಆದ್ ಆರಾದನೆ ಪಡೆಯೊಂದುಲ್ಲಲ್.ಮಾರಿ ಪನ್ಪಿ ಸವ್ದದ ಬಗೆಟ್ ಸಂಗಂ ತಮಿಳು ಮೂಲೊಡು ಉಲ್ಲೇಖ ಉಂಡು.ಮಾರಿ ಪಂಡ ಬರ್ಸ.ದ್ರಾವಿಡ ಮೂಲದ ಅಮ್ನ ಪಂಡ ತುಳುಟು ಅಪ್ಪೆ.ಅಂಚ ಮಾರಿಯಪ್ಪೆ ಪಂಡ ಬರ್ಸೊನು ಕನಪುನ ಅಮ್ಮ/ಅಪ್ಪೆಂದ್ ಅರ್ಥ.ಅರೆಗಾಲದ ಉರಿ ಉರ್ದಾಲ ದೊಂಬುದ ಮಾರಿಬೀರಿ ಸಿರ್ಕ್ ಲೆನ್ ದೂರ ಮಲ್ತ್ ದ್ ಬರ್ಸೊನು ಕನತ್ ದ್ ಬೂಮಿಗ್ ತನು ತಂಪು ಮಲ್ಪುನಾಲ್ ಮಾರಿಯಮ್ಮ.ಪುರಾತನ ತಮಿಳೆರ್ ಮಾರಿಯಮ್ಮನ್  ಬರ್ಸ ಕನಪುನ ದೇವತೆಯಾದ್ ಆರಾದನೆ ಮಲ್ತೊಂತೆರ್.ಪ್ರಕೃತಿನ್ ಅಪ್ಪೆನ ಒರುಟು ತೂಯಿನ ಮಾತೃ ಪ್ರದಾನ ಸಂಸ್ಕೃತಿಡ್ ಬುಳೆ ಬಾಗ್ಯೊನು ಕನಪುನ ಪಲವಂತಿಗೆದ ಸಗ್ತಿಯಾದ್,ಬೂಮಿಗ್ ಸಮೃದ್ದಿನ್ ಕನಪುನಾಲ್ಂದ್ ಸ್ತ್ರೀತ್ವದ ಸಗ್ತಿಯಾದ್ ಮಾರಿಯಮ್ಮನ್ ಆರಾದನೆ ಮಲ್ತೆರ್.ದ್ರಾವಿಡ ಅವೈದಿಕ ಸಂಸ್ಕೃತಿಡ್ ಅಪ್ಪೆಗ್ ಮಾನಾದಿಗೆ.

  

ಮಾರಿ ದರ್ಶನ ಪಾತ್ರಿ ಪೂವ

  

       ಪ್ರತಿಮಾ ಶಾಸ್ತ್ರದ ಒರುಟು ಮಾರಿಯಪ್ಪೆನ ತುತ್ತೈತ ಕೇಪುಲು ರಂಗ್ ದ..ಮಾರಿಯಮ್ಮನ ಪ್ರತಿಮೆಲು ಮಣ್ಣ್ ದವಾದಿತ್ತ್ ದ್ ಮೋನೆಲಾ ಕೇಪುಲು ರಂಗ್ ದವಾದಿತ್ತ್ಂಡ್.ಪೊರ್ಲುದ ಜಕ್ಕಡ ಜವಂದಿನೊರುಟು ಮಾರಿನ ಪ್ರತಿಮೆಲುಲ್ಲ.ಎಚ್ಚಾದ್ ರಡ್ಡಾ,ನಾಲಾ ಕೈಕುಲುಪ್ಪುನ ಮಾರಿನ ಮಣ್ಣ್ ದ ಪ್ರತಿಮೆಲುಪ್ಪುವ.ಮಾರಿನ ಕೆಲವೊಂಜಿ ಪ್ರತಿಮೆಲೆಡ್ ಮಸ್ತ್ ಕೈಕುಲಿತ್ತ್ ದ್ ಅಲೆನ ಸಗ್ತಿಗ್ ಅವು ಸಂಕೇತಾದುಂಡು.ಮಾರಿನ ಉಂತ್ ನ,ಕುಲ್ದಿನ ಪ್ರತಿಮೆಲುಲ ಉಪ್ಪುವ.ಇತ್ತೆ ಬೊಳ್ಳಿ ಬಂಗಾರ್ದ ಮಾರಿಯಮ್ಮನ ಪ್ರತಿಮೆಲು ಬೈದ..ಅವೆತೊಟ್ಟುಗು ಅವೈದಿಕ ನೆತ್ತೆರಾವಾರದ ಮಾರಿ ಮಮ್ಮಾಯಿನ್  ವೈದಿಕ ಮಾರಿಯಮ್ಮ ದೇವಿ ಮಲ್ತ್ ದ್ ಇನಿಕಾನಗ ಮಾರಿಗುಡಿಕುಲು ಮಾರಿಯಮ್ಮ ದೇವಲ್ಯೊಲಾವೊಂದುಲ್ಲ.ಒಂಜಿ ಕೈಟ್ ತಿರ್ಸೂಲ,ಕುಡೊಂಜಿ ಕೈಟ್ ಬಟ್ಟಲ್/ಕಪಾಲ ಉಪ್ಪುಂಡು.ಕೆಲವೊಂಜಿ ಪ್ರತಿಮೆಲೆಡ್ ಒಂಜಿ ಕೈಟ್ ಅಭಯದ ಮುದ್ರೆ ಉಪ್ಪುಂಡು.ಕೊಕ್ಕೆ ಕೂಲಿ/ಕೋರೆದಾಡೆ, ಬಿರ್ಕ್ ದ್ ಪಾಡ್ನ ಕುಜಲ್ದಮಾರಿಯಮ್ಮನ ಪ್ರತಿಮೆಲುಲ ಉಲ್ಲ.ಮಾರಿಯಮ್ಮನ ಉಗ್ರ ಸೊಬಾವೊ ಬೊಕ್ಕ ಶಾಂತ ಸೊಬಾವೊನು ತೊಜಪಾಯೆರೆ ಇಂಚ ವಿಗ್ರಹೊಲೆನ್/ಪ್ರತಿಮೆಲೆನ್ ಕೆತ್ತ್.ದುಪ್ಪುವೆರ್.

ಮಾರಿ ದೈವೊನು ಉಷ್ಣೊಗು ಸಮ್ಮಂದಪಟ್ನ ದೇವತೆಂದ್ ಲ ಪನ್ಪೆರ್.ಆ ಉಷ್ಣ ಕಾಲೊದ ಮೇಲ್ಡ್ ಬೂರುನ ನಂಜಿ ಸಿರ್ಕ್ ಲೆನ್ ನಿಮುರ್ತಿ ಮಲ್ಪುನ ಸಗ್ತಿಲ ಅಲೆಗೆ ಉಪ್ಪುನಿಂದ್ ಅಲೆನ್ ಬಗ್ತೆರ್ ಮನಬಗ್ ತಿಡ್ ಆರಾದನೆ ಮಲ್ಪುವೆರ್.ಮಾಯಿರ್ದ್ ಕಾರ್ತೆಲ್ ಮುಟ್ಟ(ಮಾರ್ಚಿರ್ದ್ ಜೂನ್ ಮುಟ್ಟ) ಇಜ್ಜಾಂದಿ ಸಿರ್ಜ್ ಸಂಕಡೊಲು ನರಮಾನ್ಯಗ್ ಬರೊಂತ.ಆ ಕಾಲೊಡು ಅಂಚಿ ಸಿರ್ಕುಲು ಬರ್ರೆ ಬಲ್ಲಿಂದ್ ಜವನಾದಿಗೆದ ಆಣ್ ಪೊಣ್ಣುಲು ಮಂಜಲ್ ಕೈ ಬೇವು ಬಿರಾಯಿನ ನೀರ್ ನ್ ಮಣ್ಣ್ ದ ಕುದುಪೆಡ್  ಪಾಡ್ದ್ ಆ ಕುದುಪೆನ್ ತರೆಟ್ ತುಂಬೊಂದು ಮೈಲ್ ಕಟ್ಲೆ ನಡತೊಂತೆರ್.ಮಾರಿನ್ ಫಲವಂತಿಗೆದ ಸಗ್ತಿಯಾದ್,ಬುಳೆ ಬಾಗ್ಯದ ಪೊಲಿ ಪೊಲ್ಸು ಒದಗಾವುನ ಸಗ್ತಿಯಾದ್ ನಮ್ಮ ಆರೋಗ್ಯೊನು ಒರ್ಪೆರೆಗಾದ್,ನಮಕ್ ಎಡ್ಡೆ ಸಂತಾನ ಒದಗಾಯೆರೆಗಾದ್,ಎಡ್ಡೆ ಈಡ್ ಜೋಡಿನ್ ಒದಗಾಯೆರೆಗಾದ್(ಆಣ್ ಪೊಣ್ಣು),ಕುಟುಮದ ಎಡ್ಡೆಗಾದ್ ಮಾರಿನ್ ಒಂಜಿ ದೈವೀ ಸಗ್ತಿಯಾದ್ ಆರಾದನೆ ಮಲ್ತೊಂತೆರ್.ತಮಿಳ್ನಾಡ್ ದ ತಂಜಾವೂರುಡು ಮಾರಿಯಮ್ಮ ಕೆಲವೆರೆಗ್ ಕುಲದೇವತೆಯಾದಿತ್ತ್ ದ್ ಅಕ್ಲೆನವ್ಲು ಮದಿಮೆ ಮಸ್ಕಿರಿದಪಗ. ಕುಲದೈವವಾದ್ ಮಾರಿನ್ ಆರಾದನೆ ಮಲ್ಪುವೆರ್.ತರೆ ತರವಾಡ್ ಡ್ದ್ ಮಾರಿ ದೇವತೆನ ಆರಾದನೆ ನಡತೊಂತ್ ನೆಡ್ದಾದ್ ಮೊಕುಲು ಕುಟುಮದ ಮೂಲೊನು ಮೂಲೆ ನಾಡುವೆರ್.ಅಪಗ ಮಾರಿ ದೈವ ಕುಟುಮದ ಮೂಲ ನಾಡುನ ದೈವ ಆದ್ ಮೂಲು ನೆಗತ್ ತೋಜುಂಡು.ಕುಟುಮ ದೈವೊಲು ಸಾಮಾನ್ಯವಾದ್ ಕುಟುಮೊಲು ಬದ್ ಕ್ ಕಟ್ಟೊಂದಿಪ್ಪುನ ಗ್ರಾಮ ಹಳ್ಳಿಲೆಡ್ ಉಪ್ಪುಂಡು.

                          ಸಿರ್ಸಿ ಮಾರಿಕಾಂಬ ದೇಲ್ಯ ಕರ್ನಾಟಕೊಡಿತ್ತ್ ದ್ ಕ್ರಿ.ಶ1688ಡು ದೇವಾಲ್ಯೊನು  ಕಟ್ಟಾದೆರ್.ನಮ್ಮ ನಾಡ್ ದ ಮಾತಾ ಮಾರಿ ಸಗ್ತಿಲೆಗ್ ಮುಲ್ತ ಮಾರಿಯಮ್ಮ ಅಕ್ಕಂದ್ ನಂಬೊಂದು ಬೈದೆರ್.ವಿಜಯನಗರ ಅರಸುಲೆ ಅರಸೊಳಿಗೆ ಮುಗಿದ್ಕೆಳದಿ ನಾಯಕೆರೆ ಅರಸೊಳಿಗೆ ಸುರಾಯಿ ಬೊಕ್ಕ ಪಂಡ ಸುಮಾರ್ 17ನೇ ಶತಮಾನದ ಪೊರ್ತುಗು ತುಳುನಾಡ್ ಗ್ ಮಾರಿ ಮಮ್ಮಾಯಿನ ಆರಾದನೆ ಬತ್ತ್ಂಡ್ಂದ್ ವಿದ್ವಾಂಸೆರೆ ಅಭಿಪ್ರಾಯ.ಕವಿ ಲಿಂಗಣ್ಣನ "ಕೆಳದಿನೃಪವಿಜಯ ಮಹಾಕಾವ್ಯ"ದ ಪ್ರಕಾರ ಕ್ರಿ.ಶ 1743ಟ್ ಬಸಪ್ಪ ನಾಯಕೆ ಕಾಪುಡು(ಒಡಿಪುದ ಕೈತಲ್ದ) "ಮನೋಹರಗಡ" ಪನ್ಪಿ ಎಲ್ಯ ಕೋಟೆನ್,ಮಲ್ಲಾರ್ ಡ್ ಮಲ್ಲ ಕೋಟೆ ಕಟ್ಟ್ ನೆತ ಉಲ್ಲೇಖದ ಆಧಾರೊಡು ಮಾರಿನ ಆರಾದನೆ ಸುರಾಯಿನ ಕಾಲಘಟ್ಟದ ಲೆಕ್ಕಾಚಾರೊಗು ಗೆತೊಂದೆರ್.ಅಲ್ತ್ ಬೊಕ್ಕ "ದಂಡ್ ದ ಮಾರಿ"(ದಂಡಿನ ಮಾರಿ)ಪನ್ಪಿ ಪುದರ್ ಜನೊಕ್ಲೆ (ಚಾಲ್ತಿ) ಬಾಯಿಡ್ ಬೈದ್ಂಡ್.ಕೋಟೆದ ಇಲ್ಲ್,ಕೋಟೆದ ಸೇವಕೆರ್(ಯೋಧೆರ್),ಕೋಟೆದ ಮಾರಿಯಮ್ಮ. ಉಂದೆನ್ ಪೂರ ತೂನಗ ದಂಡ್ ದ ಮಾರಿ ಪನ್ಪುನೆತ ಅರ್ಥ ನಂಕ್ ತೆರಿಯುಂಡು.ಮೂಲು ಮಾರಿ ಆರಾದನೆದ ಚಾಕಿರಿದಕುಲು ಕನ್ನಡ ಪಾತೆರುನಕುಲು ಪನ್ಪುನವು ಇಸೇಸ.ಕೋಟೆದಿಲ್ಲಡ್ ಮಾರಿನ್ ಇಲ್ಲದ ದೇವತೆಯಾದ್ ಆರಾದನೆ ಮಲ್ಪುವೆರ್.ಕೋಟೆದ ಮಾರಿಯಮ್ಮ ಉಂದೆಕ್ ಸಾಗ್ಸಿಯಾದುಲ್ಲೆರ್.ತಮಿಳ್ನಾಡ್ ಡ್ ಮಾರಿಯಮ್ಮನ್ "ಕೋಟ್ಟೈ ಮಾರಿಯಮ್ಮನ್" ಪಂಡ್ ದ್ ಆರಾದನೆ ಮಲ್ಪುವೆರ್.ದಂಬು ನಾಲ್ ಜಾತಿದಕ್ಲೆಗ್ ಸೀಮಿತ ಆದಿತ್ತ್ ನ ಮಾರಿನ ಆರಾದನೆ ಕಾಲಾನುಬಾಗೊಡು ಸಾರ್ವತ್ರಿಕ ಆರಾದನೆಯಾದ್ ಪೋಂಡು.ಮಾರಿ ಪೂಜೆ ಅರೆಗಾಲ/ಕಾಚೆಲ್ದ ಪೊರ್ತುಡು ನಡತೊಂದಿತ್ತ್ ದ್ ಅಂಗಾರೆ ಕಡ್ಪುದ ದಿನನೇ ಮಾರಿ ಪೂಜೆ ನಡಪುಂಡು.ಇನಿ ವೈದಿಕ ಆರಾದನೆ ಮಾರಿಗುಡಿಕ್ಲಾ ಪೊಗ್ಗ್ ದ್ ನೆತ್ತೆರಾವಾರ ಕೊರ್ಪುನಡೆ ಕುಂಬುಡ ಮೂರುನ ಪರಿಸ್ಥಿತಿ ಬೈದ್ಂಡ್.ಮಾರಿಗ್ ನೆತ್ತೆರಾವಾರನೇ ಪ್ರದಾನ.ಮಾತಾ ದೈವೊಲೆನಾಂಡಲ ನೆತ್ತೆರಾವಾರ ಕೊರಂದೆ ಒರೊಕು ಸಲ್ಮಂತ ಮಲ್ಪೊಲಿ.ಮಾರಿನ್ ಸಾದ್ಯನೇ ಇಜ್ಜಿ.ಮಾರಿಗ್ ನೆತ್ತೆರಾವಾರ ಕೊರ್ಜಿಂಡ ಬೇತೆ ರೀತಿಡವು ನೆತ್ತೆರಾವಾರ ಗೆತೊನುಂಡು.ಅಂಚಾದ್ ಮಾರಿನ ಆರಾದನೆಡ್ ಬಾರೀ ಜಾಗ್ ರ್ತೆ ಉಪ್ಪೊಡು.

                            ತುಳುನಾಡ 7 ಪರ್ಬೊಲೆಡ್ ಮಾರಿ ಪೂಜೆಲಾ ಒಂಜಿ.ಅವು ಒವು ಪೂರ ಪಂಡ 1.ಒಡಿಪುದ ಪರ್ಯಾಯ,2.ಬಪ್ಪನಾಡು ಡೋಲು ಜಾತ್ರೆ,3.ಮೂಲಿಕೆ ಅರಸೆರೆ ಕಂಬುಲ,4.ಕಬತ್ತರಾಯನ,5.ತಲೊತ ಲಚ್ಚ ತುಡರ್(ಧರ್ಮಸ್ಥಳತ ಲಕ್ಷದೀಪ),6.ಪಡ್ಡೆದ್ರದ ಡಕ್ಕೆ ಬಲಿ , 7.ಕಾಪುದ ಮಾರಿಪೂಜೆ.ಕಾಪುದ ಮಾರಿಯಮ್ಮ ಸಗ್ತಿ ದೇವತೆಯಾದಿತ್ತ್ ದ್ ಅಲೆನ್ "ಕಾಪುದಪ್ಪೆ","ಸತ್ಯದಪ್ಪೆ"ಪಂಡ್ ದ್ ಲೆಪ್ಪುವೆರ್.ಸತ್ಯ ಧರ್ಮ ನ್ಯಾಯದ ಸಾದಿಡ್ ನಡಪುನಕ್ಲೆನ್. ಕೈ ಬುಡಂದೆ ತರೆಕ್ ತರೆ ಕಾಪಾದ್,ಬೆರಿಕ್ ಬೆರಿ ಸಾಯ ಆದ್ ಕಾಪುದಪ್ಪೆ ಮಾರಿಯಮ್ಮ ನಂಬಿನಕ್ಲೆನ್ ಕಾತ್ ರಕ್ಷಣೆ ಮಲ್ಪುವಲ್.ಕಾಪುಡು 3 ಮಾರಿಪೂಜೆ ನಡಪುಂಡು.ಆಟಿಡ್ ಆಟಿದ ಮಾರಿ ಪೂಜೆ, ಜಾರ್ದೆಡ್ ಜಾರ್ದೆದ ಮಾರಿಪೂಜೆ  ಸುಗ್ಗಿಡ್ ಸುಗ್ಗಿದ ಮಾರಿಪೂಜೆ ನಡಪುಂಡು.ಪರ ಮಾರಿ ಗುಡಿಟ್. ನಡತ್ ಲೆಕನೆ ಪೊಸ ಮಾರಿ ಗುಡಿಟ್ಲಾ  ಆಟಿದ,ಜಾರ್ದೆದ,ಸುಗ್ಗಿದ. ಮಾರಿ ಪೂಜೆ ನಡಪುಂಡು.ದುಂಬುದ ಕಾಲೊಡು ಮಾರಿಗ್ಂದ್,ಮಾರಿ ಬೋಂಟೆಗ್ಂದ್ ಕುರಿ ಬುಡೊಂತೆರ್ಡ ಇತ್ತೆ ಅಡೆ ಕುಂಬುಡ ಕೊಯ್ದ್ ಸುದಾರ್ಪುವೆರ್.ಕುರಿ ಕೊಯ್ನಗ ಬುಲಿಪಿತ್ತ್ಂಡ ಕಂಬುಡ ಕೊಯ್ನಗ ಅವೆಕ್ಲಾ ಜೂವ ಉಪ್ಪುಂಡು,ಬುಕಾಪುನು ತುಳುಟು. " ಪೂ ಬಿತ್ತ್ ಲ್ " ಪನ್ಪಿ ಪುದರ್ ಡ್ ಲೆತ್ತೊಂತೆರ್.ದಂಡ್ ದ ಮಾರಿ ದೇವತೆ ಕೆಳದಿ ಅರಸೆರೆ ಧಂಡ್ ದೊಟ್ಟುಗು(ಸೈನ್ಯ) ಪೂಬಿತ್ತ ಲ್ ಡ್/ಕಾಪುಡು ನಿಲೆ ಆಪಲ್.ಇನಿತ ದಿನಮಾನೊಡು ಮಾರಿಯಪ್ಪೆ ಮಹಾಮಾಯೆ ಆದ್ ಮಮ್ಮಾಯಿ ಪುದರ್ ಮಯಕಾತ್ಂಡ್.ಇನಿ ಮಾರಿ ಪಞೂಜೆಗ್ ಬೋಡಾಯಿನ ನೆತ್ತೆರಾವಾರ ಮಯಕಾದ್ ಅಡೆ ಚಂಡಿಕಾ ಯಾಗ,ತುಲಾಭಾರ ಸೇವೆ,ಗದ್ದಿಗೆ ಪೂಜೆ ಪೂರಾ ಬೈದ್ಂಡ್.ದೈವೊಲ್ನ ಪುದರ್,ಆರಾದನೆ ಬದಲ್ಲೆಕ ಮಾರಿಯಮ್ಮನ ಪುದರ್ ಆರಾದನೆದ ಕೆರಮಲ ಬದಲಾತ್ಂಡ್.ಮಾರಿನ್ ಇನಿ ತ್ರಯಂಬಕೇಶ್ವರಿ,ಮಂಗಳಾಂಬಿಕೆ,ಕಾಳಿ,ದುರ್ಗೆಂದ್ ಬೇತೆ ಬೇತೆ ಪುದರ್ ಡ್ ಆರಾದನೆ ಮಲ್ಪೆರೆ ಸುರು ಮಲ್ತೆರ್.

                ಮಮ್ಮಾಯಿನ ಮೂಲ ಪುದರ್ ಮಾರಿಯಾದಿತ್ತ್ ದ್ ಮಾರಿ ಮಮ್ಮಾಯಿಂದ್ ಲೆಪ್ಪುವೆರ್ ವಿನಃ ಮಮ್ಮಾಯಿ ಮಾರಿಂದ್ ಲೆಪ್ಪುಜೆರ್.ಮಾರಿಯಮ್ಮನ್ ದೇವ ದೇವಿನ ಸಾಲ್ ಗ್ ಸೇರಾಯೆರೆ ಬಲ್ಲಿ.ಮಾರಿ ಮಾರಿಯೆ,ಮಮ್ಮಾಯಿ ಮಮ್ಮಾಯಿಯೆ.

ಮಮ್ಮಾಯಿ ಮಹಾಮಾಯೆಯತ್ತ್.ದುಂಬುದ ಕಾಲೊಡು ಮಾರಿಗ್ ಎರು ಕಡ್ತ್ ದ್ ನೆತ್ತೆರ್ ಬಲಿ ಕೊರೊಂತೆರ್ಡ ಕೆಲವು ತಿಕ್ ಡ್ ಪಂಜಿದ ತರೆ ಕಡ್ತ್ ದ್ ಕೆಲವು ತಿಕ್ ಡ್ ಏಡ್/ಕುರಿತ ತರೆ ಕಡ್ತ್ ದ್ ನೆತ್ತೆರ್ ಬಲಿ ಕೊರೊಂತೆರ್.ಕಾಲಾನುಬಾಗೊಡು ಊರುದಕುಲು ಮಾರಿಗ್ ಕೋರಿ ಕೊರ್ಯೆರ್ಡ ಪರಕೆದ ರೂಪೊಡು ಮಾರಿಗ್ ಅವ್ಲೊಂಜಿ ಮೂಲೊಂಜಿಂದ್ ಪಂಜಿ ಕಡ್ತ್ ದ್ ನೆತ್ತೆರ್ ಬಲಿ ಕೊರ್ಪೆರ್.ಮುಲ್ತ ಮಾರಿ ದೈವದ ಚಾಕಿರಿನ್ ಬಡಕಾಯಿ ಕರ್ನಾಟಕದ ಕನ್ನಡ ಪಾತೆರುನ ಒಂಜಿ ಜಾತಿ ಜನಾಂಗದಕುಲು ತುಳುನಾಡ ಹೆಚ್ಚಿನ ಜಾಗೆಲೆಡ್  ಮಾರಿನ ಚಾಕಿರಿ ಮಲ್ಪುವೆರ್.ದೈವಾರಾದನೆದ ನೇಮದ ಅಂಕದ ಪಂಡ ಕೋರಿದ ಕಟ್ಟದ ನೆತ್ತೆರ ಬಲಿ,ದೈವದ ಕೊಡಿಯಡಿತ ಬಲಿಕ್ ಕೊಯ್ಪುನ ಕೋರಿದ ಬಲಿ,ಬನೊಟು ಊರ್ದಕುಲು ಸೇರ್ದ್ ಮುದ್ರೆಗ್ ಕೋಲ್ತಿರಿ ಕುತ್ತುದು ಕೊಯ್ಪುನ ಕೋರಿದ ಬಲಿ ಒಂಜಿ ರೀತಿಯಾಂಡ ಮಾರಿಗ್ ನುಪ್ಪುದರಾಸಿ,ಪುಂಡಿದ ರಾಸಿದೆದುರು ಕೊಯ್ಪುನ ಕೋರಿದ ಬಲಿಕ್ ಇಡೀ ಗ್ರಾಮ ಸೇರುಂಡು.

  

ಊರುದ ಮಾರಿ ಗಿಡೆರುನೆಕ್ಲ ಒಂಜಿ ಕೆರಮ ಇತ್ತ್ಂಡ್.ಊರುಲೆಡ್ ಏರ ಜೇರದ ಮಿತ್ತ್ ರ್ದ್ ಎತ್ತರೊರ್ದು ನೀರ್ ಬೂರುನ ಗಂಡಿಲಿತ್ರ್ ದ್ಗಂಡಿದ ಬಾಕಿಲ್ ಡ್/ಬಾಗೊಲೆಡ್  ನೀರ್ ಪರಿತ್/ಪರತ್ ಪಫುನಲ್ಪ "ಮಾರಿ ತೂಟೆ"ನ್ ದಕ್ಕ್ ದ್ ಮಾರಿ ಗಿಡೆರುನ ಕೆರಮ ಇತ್ತ್ಂಡ್.ಗಂಡಿದ ಇಂಚಿಗ್ ಒಂಜಿ ಊರು,ಗಂಡಿದ ಅಂಚಿಗ್ ಕುಡೊಂಜಿ ಊರುಂದು ಮಾರಿ ಗಿಡೆರುನೆತ ಲೆಕ್ಕಾಚಾರ ಇತ್ತ್ಂಡ್.ಊರ್ದ ಮಾರಿ ಗಿಡೆರುನವೆ ಮಾರಿ ದೇರುನ ಕಲ್ಪನೆಯಾದಿತ್ತ್ಂಡ್.ಮಾರಿ ಗಿಡೆರುನ ದುಂಬು ಮಾರಿನೊಟ್ಟುಗುಪ್ಪುನ ಸರ್ವ ಪರಿವಾರ ಗಂಡ ಗಣೊಕ್ಲೆಗ್ ನೆತ್ತೆರ್ ಬಲಿ ಕೊರ್ದು ಪರಿವಾರ ಗಂಡ ಗಣೊಕ್ಲೆಗ್ ತೃಪ್ತಿ ಆಯಿ ಬೊಕ್ಕ ಮಾರಿ ಗಿಡೆರುನ ಕೆರಮ ಇತ್ತ್ಂಡ್.ಮಾರಿಗ್ ದುಂಬು ಸಾಸಿತವಾಯಿನ ಮೂರ್ತಿ,ವಿಗ್ರಹೊಲಿಜ್ಜಾಂಡ್.ಮಾರಿಗ್ ಮಣ್ಣ್ ದ ವಿಗ್ರಹ/ಪ್ರತಿಮೆಲು ಮಾತ್ರ ಇತ್ತ್ ನಿಮೂಲೊಡು ಗುಡಿ ಗುಂಡಾರೊಲುಂದು ಇಜ್ಜಾಂಡ್.ಗೋಳಿದ ಮರತಡಿಟ್ ಮಾರಿಗ್ ಕಲ್ಲ್ ಪಾಡ್ ದ್ ವರ್ಸೊಗೊರ ಮಾರಿಗ್ ಮಾರಿ ಬಲಸ್ ದ್ ಮಾರಿ ದರ್ಸನ ಆದ್ ಊರ್ದಕುಲು ಸೇರ್ದ್ ಕೋರಿ ಕೊಯ್ಪಾವೊಂತೆರ್.ಇಂಚಿಪ್ಪದ ಕೆಲವು ವರ್ಸೊರ್ದಿಂಚಿ ಮಾರಿಗ್ ಮಾರಿಗುಡಿಕುಲು ಬೈದ.ಈ ಮಾರಿ ಗುಡಿತ ಎದುರು ತುತ್ತೈತ ಆಯಿನ ಮಾರಿ ದರ್ಸನ ಪಾತ್ರಿನೆದುರು ಆ ಗ್ರಾಮೊಗು ಸಮ್ಮಂದಪಟ್ನ ಹಿರಿಯಾರ್ ಮದಿತಿ ಬೊಕ್ಕ ಮಾರಿನ ದರ್ಶನ ನಡಪುಂಡು.ಆ ಗುಡಿಕ್ ಮಾರಿದರ್ಶನ ಪಾತ್ರಿ ಮೂಜಿ ಸುತ್ತು ಬತ್ತ್ ದ್ ಅಲ್ತ್ ಬೊಕ್ಕ ಮಾರಿಗ್ ಬಲಿ ಕೊರ್ಪುನ ಜಾಗೆಗ್ ದರ್ಸನೊಡೆ ಪೋದು ವಸಾಯ ಉಂತುಂಡು.ಅವೆರ್ದ್ ಬೊಕ್ಕ ಬಾರೀ ಮಲ್ಲ ನುಪ್ಪು,ಪುಂಡಿದ ರಾಸಿ ಮಾರಿ ಬಲಸ್ ದ್ ಅಮುರ್ತ ದೀದ್ ಕುಡೊರ ಮದಿತ್ ದ್ ಮಾರಿ ದರ್ಸನ ನಡಪುಂಡು.ಬೆತ್ತೊಡು ರಡ್ಡ್ ಮೂಜಿ ಸರ್ತಿ ಪೆಟ್ಟ್ ಪಾಡೊನ್ನ   ಮಾರಿ ದರ್ಸನ ಪಾತ್ರಿ ಮೂಡಾಯಿಗ್ ಮೋನೆ ಪಾಡ್ದ್ ಉಂತುದು ಸೇವೆದ ಇಚಾರ ಗ್ರಾಮದ ಪೆರಿಯಾರ್ಡ ಪಿಂದೊಂದು ಬೆತ್ತೊನು ಮೂಜಿ ಸರ್ತಿ ಮೂಡಾಯಿಗ್ ದಂಗಾದ್/ಕೆಲವು ತಿಕ್ ಡ್ ಬಲಿ ಕೊರ್ಪುನ ಜಾಗೆಗ್ ಮೂಜಿ ಸರ್ತಿ ಪೊರಿ ಪಾರಾದ್ ಬಲಿಕ್ ಅಪ್ಪಣೆ ಕೊರ್ದು  ಬೊಕ್ಕ ದರ್ಸನ ಪಾತ್ರಿ  ಬೆರಿ ಪಾಡ್ದ್ ಪಡ್ಡೆಯಿಗ್ ಮೋನೆ ಪಾಡ್ದ್ ಉಂತುದಿಪ್ಪುವೆ.ಬಲಿ ಪೂರ ಕೊರಿ ಬೊಕ್ಕ ಕುಡೊರ ವಸಯಾದ್ ಮಾರಿಪೂಜೆ ಮುಗಿಯುಂಡು.ಮಾರಿಗ್ ಗೋಳಿ ಮರತಡಿಟ್ ಸಾಸಿತವಾಯಿನ ಕಲ್ಲ್ ಪಾಡ್ದಿಪ್ಪುವೆರ್.ಕಲ್ಲ್ ದ ಮಿತ್ತ್ ಅಜ್ಜಬಿರುತೊರುತ(ಕಮಾನು ರೀತಿದ) ರಚನೆ ಮಲ್ತ್ ದಿಪ್ಪುವೆರ್.

       ಮಮ್ಮಾಯಿ,ಮಾಕಾಲ್ದಿ/ಕಾಳಿಗ್ ಒರುಟು(ರೂಪ),ಆಚರಣೆಡ್ ಸಾಮ್ಯತೆ ಇತ್ತ್ಂಡಲ ಮೂಲ ತತ್ವೊಡು ಓಲ್ಪಡಿ ಇಜ್ಜಿ.ಕಾಳಿನ್ ದೇವಿನ ಒರುಟು ಆರಾದನೆ ಮಲ್ಪುನೆಡ್ದಾದ್ ಅಲೆಗ್ ನೆತ್ತೆರ ಬಲಿ ಇಜ್ಜಿ.ಅಲೆನ ಪರಿವಾರೊಗು ನೆತ್ತೆರ ಬಲಿ ಉಂಡು."ಕಾಳಿಕಾಳಿ ಮಹಾಕಾಳಿ ಭದ್ರಕಾಳಿ ನಮೋಸ್ತುತೇ,ಕುಲಂಚ ಕುಲ ಧರ್ಮಂಚ ಮಾಂಚ ಪಾಲಯ ಪಾಲಯ"( ದುರ್ಗಾದೇವಿನ ಉಗ್ರರೂಪ- ಕಾಳಿ-ಕಪ್ಪು,ರಾತ್ರೆ,ಕಾಲ ನಿಯಂತ್ರಕಿ,ಕರುಣಾಮಯಿ).ಕಾಳಿ ರೂಪೊಡು ಕಪ್ಪು ಕಾಳಿಯಾಂಡಲ ತುತ್ತೈತೊಡು(ಅಲಂಕಾರ)ಬಾರಿ ಪೊರ್ಲಗಂಟ್ ದ ಪೊಣ್ಣು.ಕಾಳಿನ ಶಾಂತ ರೂಪ ಅವ್ವಾಂಡ ಅಲೆನ ಉಗ್ರೊನು ತೋಜಾವುನಿ ಅಲೆನ ಕಂಟೆಲ್ ಗ್ ಪಾಡ್ದಿಪ್ಪುನ ನೆತ್ತೆರರಿವುನ ನರಮಾನ್ಯನ ತರೆ ಮಂಡೆಲು.ಆತ್ ತರೆ ಮಂಡೆಲೆನ್ ನಾಲಿಡ್ ಪಾಡ್ದ್ ನಲ್ತಲ್ಡಲ ಅಲೆಗ್ ತೃಪ್ತಿ ಇಜ್ಜಿ.ಮಾರಿ ಮಮ್ಮಾಯಿನ್ ನಂಬುಂಡ ಸರಿ.ನಂಬುಜಿಂಡ 7 ಜೀವ ಪೋನೇಟಲ ಗೊತ್ತು ಮಲ್ಪಂದಿ ಸಗ್ತಿ ಆಲ್.7 ಜೀವ ಕರಿ ಬೊಕ್ಕ ಗೊತ್ತು ಮಲ್ಪುವಲ್.ಚಾಮುಂಡಿಲ ಅಂಚನೆ.7 ಜೀವ ಕರಿನೇಟ ಚಾಮುಂಡಿಲ ಗೊತ್ತು ಮಲ್ಪುಜಲ್.ನಂಕಾವಡ್,ರಾಶಿ ಪ್ರಶ್ನೆ ಚಿಂತನೆದಕ್ಲೆಗಾವಡ್ ಏರೆಗ್ಲ ಅಡೆಮುಟ್ಟ ತೆರಿಯುಜಿ.ಸರ್ರೊಗು ತಾಂಗೆರೆ ತೀರಂದ್ ನಾತ್ ಹಿಂಸೆ ಕೊರ್ಪುನ ಸಿರ್ಕ್ ಲೆಡ್ ನಮ್ಮ ಜೀವ ಕಡಿಪುವಲ್.ಕೋರ ಕೊಟ್ಲೆ,ತಡೆಯೆರೆ ತೀರಂದಿ ಬಂಜಿ ಬೇನೆ,ದಮು್ಮು ಸೀಕ್,ಚರ್ಮ ಸಿರ್ಕ್ ಲೆಡ್ ಗೊತ್ತು ಮಲ್ಪುವಲ್.ಊರ ಮಾರಿಗ್ ವರ್ಸಲ ನೆತ್ತೆರ ಬಲಿ ಕೊರ್ಪುನಕುಲು ಒಂಜಿ ವರ್ಸ ಪರಕೆ ಬಾಕಿ ದೀಯೆರ್ಡ ಕಾರಣದಾಂತೆ ಅಕ್ಲೆ ಮೇಲ್ಡ್ ಬೂರುನ ಚರ್ಮ ಸಿರ್ಕ್ ಬರ್ಪುಂಡು.ಮಾರಿ ಪೂಜೆದಂಚನೆ ಊರುಗು ಬತ್ತಿ ಮಾರಿ ದೇರೆರೆ ಪೊಂಗಾರೆ ದೈಟ್ ಮಾರಿನ ಬೊಂಬೆ ಮಲ್ತ್ ದ್ಮಾರಿಗುಡಿಕ್ ಕನತ್ ದ್ ಸಿರಿಸಿಂಗಾರ(ಅಲಂಕಾರ) ಮಲ್ತ್ ದ್ ಪೂಜೆ ಮಲ್ತ್ ದ್ ಆ ಬೊಂಬೆನ್ ನೀರ್ಗ್ ಬುಡ್ಪುನ(ವಿಸರ್ಜನೆ)ಕ್ರಮಲ ಕೆಲವು ಕೋಡಿಡುಂಡು.

         ಮಾರಿ ದೈವ ಗುಡಿ ಗುಂಡಾರೊನು ಕೇಂದ್ ಆರಾದನೆ ಪಡೆಯಿನ ಸಗ್ತಿ ಅತ್ತ್.ಗೋಳಿದ ಮರತಡಿಟ್ ಪಾಡ್ನ ಕಲ್ಲೇ ಮಾರಿನ ಜಿಡ್ಡೆಯಾದುಂಡು.ಮಾರಿ ಮಮ್ಮಾಯಿಗ್ " ಮಂತ್ರ ಸೂಕ್ತ" ಪನ್ಪುನ ಇಚಾರನೇ ಇಜ್ಜಿ.ಮಾರಿ ದರ್ಸನ 100-150ವರ್ಸದ ಬುಳೆಚಿಲಾತೆ.ನೇಮೊಲೆಡ್ ಚಾಕ್ರಿದ ಮೂಲ್ಯಣ್ಣೆ,ದೈವ ಮಾನಿ,ಕಟ್ಟುನಕುಲು,ಚಾಕಿರಿ ವರ್ಗ ಇತ್ತ್ ಲೆಕನೆ ಮಾರಿನ ಚಾಕಿರಿಗ್ ಒಂಜಿ ಜಾತಿ ಜನಾಂಗದ ಚಾಕಿರಿ ಮಾತ್ರ ಉಂಡು.ಉಂದು ಮೂಲೊಡು ಇತ್ತ್ ನ ಕಟ್ಟತ್ತ್.ಮೂಲೊಡು ಬೈರವಗ್ ಮನ್ಪುನ ಕಟ್ಟ್ ಎಂಚ ಇತ್ತ್ಂಡ ಅವ್ವೇ ರೀತಿಡ್ ಮಾರಿನ ಆರಾದನೆದ ಕಟ್ಟಿತ್ತ್ಂಡ್.ಮಮ್ಮಾಯಿನ  ಚಾಕಿರಿನ್ ಒಂಜಿ ಜಾತಿ ಜನಾಂಗ ಆಚರಣೆ ಮಲ್ತೆರ್ಡ ಮಾರಿನ ಚಾಕಿರಿನ್ ಬೇತೆ ಜಾತಿ ಜನಾಂಗ ಆಚರಣೆ ಮಲ್ತೊಂದುಲ್ಲೆರ್.ಮಮ್ಮಾಯಿನ ದರ್ಶನ ಪಾತ್ರಿಯಾವಡ್,ಮಾರಿನ ದರ್ಶನ ಪಾತ್ರಿಯಾವಡ್ ನೆತ್ತೆರ್ ಬಲಿ ಕೊರ್ನಗ ಬಲಿ ಕೊರ್ಪುನ ಜಾಗೆಗ್ ಬೆರಿ ಪಾಡ್ದೇ ಉಂತುನಿ. ಮಾರಿ ದೈವ ದರ್ಶನ ಪಾತ್ರಿ ಮಾರಿ ಬಲಸ್ ನೆತ ಪಡ್ಡೆಯಿಗ್ ಮೋನೆ ಪಾಡ್ದ್ ಮೂಡಾಯಿಗ್ ಬೆರಿ ಪಾಡ್ದ್ ಉಂತುದು ಕಲ್ಲ್ ಪಾಡ್ನಡೆ ಪಂಡ ಸಾನಿದ್ಯೊಗು ಮೋನೆ ಪಾಡ್ದ್  ಉಂತ್ ದುಪ್ಪುವೆರ್.ಗೋಂದೋಲು ನಲಿಕೆಡ್ ಕೈಟ್ ಕೋಲ್ತಿರಿ ಇತ್ತ್ಂಡ ಮಾರಿನ ಕೈಟ್ ಬೆತ್ತ,ತೂಟೆ ಇತ್ತ್ಂಡ್.ಇನಿ ಸೂಟೆದ ಬದಲ್ ಮಾರಿನ ಕೈಕ್ ಜೀಟಿಗೆ ಬೈದ್ಂಡ್.ಮಾರಿನ ಕೈಟ್ ಉಪ್ಪುನ ತೂಟೆನ್ ಮಾರಿ ತೂಟೆಂದೆ ಪನ್ಪುನಿ.ಮಾರಿ ಪೂಜೆಡ್ ಮಾರಿಗ್ ಕೋರಿನ್ ಚಾಕಿರಿದಕುಲು ಮೂಡಾಯಿಗ್ ಮೋನೆ ಪಾಡ್ದೆ ಕೊಯ್ಪೆರ್.ಮಾರಿ,ಮಮ್ಮಾಯಿನ ಆರಾದನೆನ್ ಬೇತೆ ಬೇತೆ ರಡ್ಡ್  ಜಾತಿಜನಾಂಗದಕುಲು ನಡಪಾಯೆರ್ಡಲ ಆರಾದನೆಡ್ ಒಂತೆ ಎತ್ತೇಸ ಇತ್ತ್ಂಡಲ ಮೂಲ ಆಶಯ ಊರುಕೇರಿಗ್ ಎಡ್ಡೆನ್ ಮಲ್ಪುನವೇ ಆದಿಪ್ಪುಂಡು.

                 ವೈದಿಕ ಆರಾದನೆ ಮಾರಿನ ಆರಾದನೆಗ್ ಬರ್ಪುನ ದುಂಬು ಮಮ್ಮಾಯಿನ ಆರಾದನೆಡ್ ಕುಡು ಬಲ್ಯಾರ್ ಆಡ್ದ್ ಬಲಸುನ ಕೆರಮ ಇತ್ತ್ಂಡ್.ಇನಿತ ದಿನಮಾನೊಲೆಡ್ ಆ ಕೆರಮದ ಆರಾದನೆ ತೂಯೆರೆ ತಿಕ್ಕೊಂದಿಜ್ಜಿ.ಅಂಚನೆ ಮಾರಿ ಬಲಸೊಂತಿ. ನುಪ್ಪುದ ರಾಸಿಪುಂಡಿದ ರಾಸಿ,ಪೊರಿ ಪೊದ್ದೊಲು ಪೂರ ಮಾರಿನ ಆರಾದನೆಡ್ದ್ ದೂರ ಪೋವೊಂದುಂಡು.ದುಂಬು ಮಮ್ಮಾಯಿಗ್ ಗುಂಡದುಲಯೇ ಬಲಸೊಂತ್ ನಿ.ಆನಿದ ಕಾಲೊಡು ಬಾಕಿಲಿಜ್ಜಂದಿ ಗುಂಡೊಲಿತ್ತ್ ದ್ ಇನಿಕಾನಗ ಮಮ್ಮಾಯಿಗ್ ಬಾಕಿಲಿತ್ತಿ ಗುಂಡೊಲು ಬೈದ.ನಿಜವಾದ್ ಮಾರಿ ದೈವೊಗು ಗುಂಡದ ಪ್ರಶ್ನೆನೇ ಇಜ್ಜಿ.ಮಾರಿ ಊರು ಸುತ್ತುನ,ಊರು ಕಾಪುನ ಪ್ರದಾನ ದೈವ ಆದಿತ್ತ್ ದ್ ಸಾರತ್ತೊಂಜಿ ಪರಿವಾರ ಸಗ್ತಿಲು ಮಾರಿಗಿತ್ತ್ ದ್ ನೆತ್ತೆರ್ ಬಲಿ ಪೂರ ಪರಿವಾರ ಸಗ್ತಿಲೆಗ್ ತಿಕ್ಕೊಂತ್ಂಡ್.ಬಾರ್ಯಾತ್ ಮಲ್ಲ ಜಾಗೆಡ್,ಮಲ್ಲ ಗೋಳಿದ ಮರತಡಿಟ್,ಮಾರಿನ ಕಲ್ಲ್ ದೆದುರು ಬಾರ್ಯಾತ್ ಕೊಡಿರೆನ್ ಬುಡ್ಪಾದ್ ಬಲಸುನ ರಾಸಿ ನುಪ್ಪು,ರಾಸಿ ಚಟ್ಟೆ ಪುಂಡಿ,ರಾಸಿ ಪೊರಿಪೊದ್ದೊಲು,ಕಲಿಗಂಗರ ಪೂರ ಒಂಜಿ ಮಾಮಲ್ಲ ಮಾರಿನ ಪರಿವಾರೊನು ಸಲ್ಮಂತ(ಸಂತೃಪ್ತಿ) ಮಲ್ಪೆರೆಗಾದ್ ಬಲಸುನ ಒಂಜಿ ಆಚರಣೆಯಾದುಂಡು.ಮೂಲು ಮಾರಿ ದೈವ ದಂಡ್ ದ ಮಾರಿ,ದಂಡ್ ದ ಸಗ್ತಿ,ಒರಿನ ಅಲೆನ ಪರಿವಾರ ಸಗ್ತಿಲು ಸೈನಿಕೆರಿತ್ತ್ ಲೆಕ.ಮಾರಿ ದೈವ ಉಂಡು ಪನ್ಪುನವು ಸತ್ಯ,ಅವೆಕ್ ಕೊರ್ಪುನ ನೆತ್ತೆರಾವಾರ ಕೊರಂದೆ ಬಾಕಿ ಮಲ್ತ್ಂಡ ವಾ ಒರು(ರೂಪ)ಟಾಂಡಲಾ ಅವು ನೆತ್ತೆರ್ ಬಲಿ ದೆತೊನಂದೆ ಕುಲ್ಲಂದ್.

  ತುಳುನಾಡ್ ಗ್ ಮಮ್ಮಾಯಿನ ಆರಾದನೆ ಬರ್ಪುನ ದಂಬೇ ಮಾರಿಗ್,ಬೈರವಗ್ ಪೂರ ಅಡ್ದ್ ಬಲಸುನ ಕೆರಮ ಇತ್ತ್ಂಡ್.ದಂಬು ತುಳುನಾಡ್ ಡ್ ಬೈರವಗ್ ಬಲಸುನ ಪ್ರದಾನ ಆದಿತ್ತ್ಂಡ್.ಬೈರವಗ್ ಮಾರಿಗ್ ಪೂರ ತುಳುನಾಡ್ ಡ್ ನೆತ್ತೆರಾವಾರ ದುಂಬುರ್ದೇ ಕೊರೊಂತ.ಮಮ್ನಾಯಿನ ಆರಾದನೆ ತುಳುನಾಡ್ ಗ್ ಬೊಕ್ಕ ಬೈದ್ ನವು.ಬೈರವನ ಮೂಲ ಆದಿನಾಥೆ ಶಿವೆ.ಮಮ್ಮಾಯಿನ ಮೂರ ರೂಪ ಪುರಾಣದೊರುಟು ಶಕ್ತಿ ಪಂಡ ಪಾರೊತಿ.ಮಾರಿ ಮಮ್ಮಾಯಿನ ಆರಾದನೆ ಶೈವಾರಾದನೆನೆ ಹೊರತು ವೈಷ್ಣವಾರಾದನೆಯತ್ತ್.ವೈಷ್ಣವ ಆರಾದನೆ ದೈವದ ಕಲೊಕು ಬತ್ತಿ ಬೊಕ್ಕ ದೈವೊಲು ಪೂರ ದೇವ ದೇವಿಯಾಯೆರ್,ದೈವದ ಪುದರ್ ನ್ಲ ಮೊಕ್ಲು ಬದಲ್ತ್  ಬುಡಿಯೆರ್.ಚೌಳಿ ನೀರ್ ದ ಲೋಟೆಗ್ ಬೆಚ್ಚ ನೀರ್ ಕನತ್ ಪಾಡ್ಲೆಕಾಂಡ್.ಉಂದೆಟ್ ಬೆಚ್ಚ ನೀರ್ದ ಸತ್ವ ಕಮ್ಮಿಯಾಪುನತ್ತಂದೆ ಬೆರಕೆ ಆಯಿನೆಟ್ ಪಲಲಾ ತಿಕ್ಕುಜಿ.ಬೆಚ್ಚ ನೀರ್ ಚೌಳಿ ಆಂಡ್.ಆಂಡ.ಮೂಲು ಚೌಳಿ ನೀರ್ದ ಪಲಲಾ ಇಜ್ಜಿ,ಬೆಚ್ಚ ನೀರ್ದ ಪಲಲಾ ಇಜ್ಜಿ.ಶೈವಾಂಶದ ದೈವಾರಾದನೆದ ಜಾಗೆಗ್ ವೈಷ್ಣವಾಂಶ ಸೇರೊಂದು ದೈವೊಲೆ ಕಾರ್ನಿಕ ದಂಗ್ ದ್ ಅಡೆಗ್ ದೇವೆರೆ ಆರಾದನೆ ಸೇರೊನ್ಲೆಕಾಂಡ್.ತುಳುನಾಡ ಕೆಲವೊಂಜಿ ದೈವದ ಜಾಗೆಲೆಡ್ ಮಮ್ಮಾಯಿನ ಆರಾದನೆ ಇತ್ತ್ಂಡಲ ಅವು ಮಾತಾ ಆ ಮಣ್ಣ್ ಡ್ ಲಕ್ಕ್ ದ್ ಬತ್ತಿ ಸಗ್ತಿಲಾಂಡಲ ಒಂಜೆಕೊಂಜೆಕ್ ಸಮ್ಮಂದ ಉಪ್ಪುಜಿ.ಆಂಡ ಆ ಣ್ಣ್ ಡ್ ಉದಿತಿ ದೈವೊಲ್ನ ಗಂಡ ಗಣೊಕ್ಲೆಗ್ಲ ಮಾರಿ ಮಮ್ಮಾಯಿನ ಗಂಡ ಗಣೊಕ್ಲೆಗ್ಲ ಸಮ್ಮಂದ ಉಪ್ಪುಂಡು.ದೈವದ ಬಲಿಮುಕ್ಕರಿಗೆದ ಮಿತ್ತ ಬಲಿಕ್ ಕೊರ್ಪುನ ನೆತ್ತೆರಾವಾರಲ ಗಂಡ ಗಣೊಕ್ಲೆಗೆ.ಮಾರಿ ಮಮ್ಮಾಯಿನ ನೆತ್ತೆರ ಬಲಿಲ ಗಂಡ ಗಣೊಕ್ಲೆಗೆ.ಅಂಚ ಗಂಡಗಣೊಕ್ಲೆನ ಸಮ್ಮಂದ ತೆರಿಯುಂಡು.ಕಲ್ಕುಡ ಕಲ್ಲುರ್ಟಿ ತಗೆ ತಂಗಡಿ,ನರಮಾನ್ಯನ ಬಂಜಿಡ್ ಜತ್ತ್ ಬತ್ತ್ ನಕುಲು.ಆಂಡ ಕಲ್ಲುರ್ಟಿ ಪಂಜುರ್ಲಿನ್ ತಗೆ ತಂಗಡಿಯಾದ್ ಆರಾದನೆ ಮಲ್ತ್ಂಡಲ ಕಲ್ಲುರ್ಟಿ ನರಮಾನಿ  ಅಪ್ಪೆ ಬಂಜಿಡ್ ಬೈದ್ ನಾಲ್.ಪಂಜುರ್ಲಿ ಪ್ರಾಣಿ ಮೂಲದ ಅಪ್ಪೆ ಬಂಜಿರ್ದ್ ಉದಿತ್ ಬತ್ತ್ ನ ಪಿರಾಕ್ ದ ದೈವೀ ಸಗ್ತಿ.ಆಂಡ ಕಲ್ಲುರ್ಟಿ ಇತ್ತ್ ನೆಕ್ ಚಾರಿತ್ರಿಕ ಕಾಲಘಟ್ಟದ ಉಲ್ಲೇಖ ಉಂಡು.ಅಂಚಾದ್ ಒಂಜೇ ಮಣ್ಣ್ ಡ್ ಮಾರಿ ಮಮ್ಮಾಯಿ ಉದಿತ್ ಬತ್ತ್ಂಡಲ ಅವೆಕ್ ಒಂಜೆಕೊಂಜೆಕ್ ಸಂಬಂದ ಉಪ್ಪುಜಿ.ಕಲ್ಲುರ್ಟಿ ಪಂಜುರ್ಲಿಗ್ ಮಾಯೆದ ಸಮ್ಮಂದ ಇತ್ತ್ಂಡ ದೈವೊಲೆನ ಬೊಕ್ಕ ಮಮ್ಮಾಯಿನ ಗಂಡ ಗಣೊಕ್ಲೆಗ್ ಮಾಯೆದ ದಮ್ಮಂದ ಉಪ್ಪುಂಡು.ಗುಳಿಗಗ್ ಮಾರಿ ದೇರುನ ಅಧಿಕಾರ ಉಂಡು.ಆಟಿಡ್ ಗುಳಿಗೆ ಬೈಲ ಮಾರಿನ್ ಗಿಡೆರುನ  ಆಚರಣೆ ತುಳುನಾಡ ಒಂಜಾತ್ ಜಾಗೆಲೆಡುಂಡು.ಗುಳಿಗಗ್ ಬೊಕ್ಕ ಮಾರಿ ಮಮ್ಮಾಯಿಗ್ ಅಪ್ಪೆ ಮಗನ ಸಮ್ಮಂದ ಉಂಡು.ಗುಳಿಗೆ ಶೈವಾಂಶ, ಶಿವ ಶಕ್ತಿನ ಮಗೆ.ತೂಟೆದಾವಾರ,ತೂಟೆ ಬೀಜಾದ್ ದಕ್ಕ್ ದ್ ಮಾರಿ ದೇರುನ ಅದಿಕಾರಲ ಗುಳಿಗಗುಂಡು.ದೇವೆರಾವಡ್,ದೇವಿಯಾವಡ್ ಓಲ್ಲಾ ಮಾರಿ ಗಿಡೆರುನ ಕೆರಮ ಇಜ್ಜಿ.ದೇವೆರ್ ಸಾನಿದ್ಯೊಡಿತ್ತೊಂದು ನಮಕ್ ಕಾಪಾದಿಪ್ಪುವೆರ್(ರಕ್ಷಣೆ).ಮಾರಿ ದೈವೊಗು ದಂಡ್ ದ ಅದಿಕಾರ ಇತ್ತ್ ಲೆಕನೆ ದಂಡಿಸವುನ/ಸಿಗ್ಸೆ ಕೊರ್ಪುನ ಅದಿಕಾರಲಾ ಉಂಡು.

                       ಬಡಕಾಯಿ ಕರ್ನಾಟಕೊರ್ದು ಬತ್ತ್ ನರೇಣುಕಾ,ಎಲ್ಲವ್ವ,ಎಲ್ಲಮ್ಮ ಸಗ್ತಿಲೆನ್ ಆರಾದನೆ ಮಲ್ತೊಂತಿ ಒಂಜಿ ಜಾತಿ ಜನಾಂಗ ತುಳುನಾಡ್ ಗ್ ಬತ್ತ್ ದ್ಅಕುಲು ನಂಬೊಂದು ಬತ್ತಿನ ಸಗ್ತಿನ್ ಮೂಲು ಮಾರಿ ಮಮ್ಮಾಯಿಯಾದ್ ಆರಾದನೆ ಮಲ್ತೊಂದು ಬತ್ತೆರ್.ನರಮಾನಿ ಒರು/ರೂಪೊಡಿತ್ತ್ ನ ರೇಣುಕೆರ್ದ್ ಈ ಮಮ್ಮಾಯಿನ ರೂಪ/ಒರು ಬತ್ತ್ಂಡ್ಂದ್ ಲ ಪನ್ಪೆರ್.ಇತ್ತಿತ್ತೆ ಮಾರಿ ಪಾತ್ರಿಲು ಯಾನ್ ದುರ್ಗೆ,ಕಾಳಿ,ಮಾಕಾಳಿ,ಭದ್ರಕಾಳಿಂದ್  ಪನೊಂದುಲ್ಲೆರ್.ಅವು ಸುದ್ದ ತಪ್ಪು.ದೇವಿಗ್ಲ ದೈವೊಗ್ಲ ವಾ ಸಮ್ಮಂದಲ ಇಜ್ಜಿ.ಮೂಲು ರೇಣುಕೆರ್ದ್ ಬೊಕ್ಕದ ಇಚಾರೊಲು ಉಪ್ಪುನಿ.ಕೊರಗತನಿಯನ ಕಥೆಟ್ ಮಾರಿಬೀರಿ ಸೀಕ್ ಡ್ ಇಡೀ ಕೊಪ್ಪನೇ ನಾಶ ಆದ್ ತನಿಯೆ ಒರಿಯೆ ಒರಿನ ಕಥೆ ಬರ್ಪುಂಡು.ಮಾರಿ ಏರೆನ್ಲ ಬುಡ್ನ ಪಿರಾಕಿಜ್ಜಿ.ಗಟ್ಟದ ಮಿತ್ತ್ ರ್ದ್ ಬತ್ತಿನಕ್ಲೆ ಒಟ್ಟುಗು ತುಳುನಾಡ್ ಗ್ ಬತ್ತ್ನ ಮಾರಿ ಮಮ್ಮಾಯಿನ ಆರಾದನೆ ನಮ್ಮ ತುಳುನಾಡ ಆರಾದನೆ ಪನ್ಪುನಡೆಮುಟ್ಟ ತುಳುವ ಬದ್ ಕ್ ಡ್ ಗೋಡಿದುಂಡು.ಗಟ್ಟದ ಮಿತ್ತ್ ಪೊಂಜನಕುಲು ನಾಗನ ಕಲ್ಲ್ ಗ್ ಪೇರ್ ಮೈತೆರ್ಡ ತುಳುನಾಡ್ ಡ್ ವೈದಿಕ ಪುರೋಯಿತೆರ್ ನಾಗನ ಕಲ್ಲ್ ಗ್ ಪೇರ್ ಮೈಪುವೆರ್.ಗಟ್ಟದ ಮಿತ್ತ್ ಪೊಂಜನಕುಲು ಮಮ್ಮಾಯಿನ ದರ್ಶನೊಗುಂತ್ಯೆರ್ಡ ತುಳುನಾಡ್ ಡ್  ಆಂಜನಕುಲು ದರ್ಶನೊಗುಂತುವೆರ್.ಗಟ್ಟದ ಮಿತ್ತ್ ದರ್ಶನೊಡು ಅಕ್ಲೆ ಅಕ್ಲೆನ ಮೇಲ್ ಗ್ ಬೆತ್ತೊಡು ಹಾಕೊಂದು ನೆತ್ತೆರ್ ಬರ್ಪಾಯೆರ್ಡ ತುಳುನಾಡ್ ಡ್ ಕೋರಿನ್ ಕೊಯ್ದ್. ಮಾರಿಗ್ ನೆತ್ತೆರ್ದ ಬಲಿ ಕೊರ್ಪೆರ್.ದ್ರಾವಿಡ ತುಳುವೆರೆ ಆಹಾರ ಸಂಸ್ಕೃತಿದ ಒಂಜಿ ಬಾಗವಾದ್ ಮಾರಿನ ಆರಾದನೆ/ಮಾರಿಪೂಜೆ ತುಳುನಾಡ್ ಡ್ ಉಂಡು.