ದೈವಾರಾದನೆನ್ ಎಂಚ ಒರಿಪೊಲಿ?

ದೈವಾರಾದನೆನ್ ಎಂಚ ಒರಿಪೊಲಿ?

           

         ಅನಾದಿಡ್ದ್ ನಡತೊಂದು ಬತ್ತಿನ ದೈವಾರಾದನೆನ್ ತುಳುವ ಮಣ್ಣ್ ದ ತುಳುವ ಬದ್ ಕ್ ದ ಇಚಾರೊಲೆನ್ ನಮ್ಮ ದುಂಬುದ ಕಿನ್ನಿ ಕಿರ್ತಾಲೆಗ್ ಒರಿತ್ ಕೊರ್ಪುನ ಅನಿವಾರ್ಯತೆ ಇನಿ ನಮಕ್ ಮಾತೆರೆಗ್ಲ ಉಂಡು.ಬಹುಸಂಸ್ಕೃತಿ ಬಾಸೆದ ದೇಸ ನಮ್ಮ ಭಾರತ.ಮಾತೆನ್ಲಾ ಒಂಜೇ ಬಾಸೆದ ಅಡಿಟ್ ಕನಪುನ ಬೇಲೆ ಮಲ್ಪೆರೆ ಬಲ್ಲಿ.ದಾಯೆ ಪಂಡ ಅಂಚ ಮಲ್ತ್ಂಡ ಮೂಲು ಪರೆಂಗಿಲು ಮಲ್ತ್ ನೆಕ್ಲಾ ನಮಕ್ಲಾ ದಾದ ಎತ್ತೇಸೊ?.ಬೇತೆ ಬೇತೆ ಭಾಷೆದ ಬೇತೆ ಬೇತೆ ಸಂಸ್ಕೃತಿದ ದೇಶ ನಮ್ಮ ಭಾರತ.ಅವೆಟ್ ತುಳು ಬಾಸೆಲಾ ಒಂಜಿ.ತುಳು ಧರ್ಮೊನು ,ತುಳು ಸಂಸ್ಕೃತಿನ್ ಒರಿಪುನ ತುಳುವಪ್ಪೆನ ಮಿತ್ತ ರುಣ ನಮಕುಂಡು.ತುಳು ಧರ್ಮ ಪಂಡ ಅವೆಕ್ ಅವೆತನೇ ಆಗಿನ ಸಂಸ್ಕೃತಿದ ಚೌಕಟ್ಟುಂಡು. ಅವೆನ್ ಹಿಂದೂ ಧರ್ಮದ ಕೈಯಡಿಕ್ ಕನಪುನತ್ತ್.ಅಂಚ ಮಲ್ತ್ಂಡ ಹಿಂದೂ ಧರ್ಮದ ಆಚರಣೆ ಆರಾದನೆಲೆನ ಪೆಟ್ಟ್ ಡ್ ತುಳು‌ಧರ್ಮ ತನ್ನಾತೆಗೇ ನಾಶ ಆವೊಂದು ಪೋಪುಂಡು.ತುಳು ಧರ್ಮೊನು ಭಾರತೀಯ ಸಂಸ್ಕೃತಿದ ಒಂಜಿ ಭಾಗ ಆದ್ ತೂವೊಡು ವಿನಃ ಅವೆನ್ ಹಿಂದೂ ಧರ್ಮದ ಅಡಿಟ್ ಕನತ್ಂಡ ಮೂಲ ತುಳು ಧರ್ಮದ ಆರಾದನೆ,ಆಚರಣೆಲ್ನ ಕೆರಮೊಲು ತತ್ತ್ ದ್ ಕಾಲಾನು ಭಾಗೊಡು ತುಳುವ ಧರ್ಮ ನಾಶ ಆದ್ ಪೋಪುಂಡು.ಹಿಂದೂ ಧರ್ಮದ ಕೆಲವೊಂಜಿ ಆಚರಣೆಲು ತುಳು ಧರ್ಮದ ಆರಾದನೆ,ಆಚರಣೆದಡೆ ಬತ್ತ್ ದ್ ಏತೋ ಎತ್ತೇಸೊಲಾತ.ಬದಲಾವಣೆ ಜಗತ್ತ್ ದ ನಿಯಮ.ಅಂಚಂದ್ ಮೂಲೊನೇ ನಾಶ ಮಲ್ತ್ ದ್ ಪೊಸತೊಂಜಿ ಆಚರಣೆನ್ ಕನಪುನ ಸರಿಯತ್ತ್.ಪರತ್ ನ್ ನಿಗಿಪಡ,ಪೊಸತ್ ನ್ ತೋಡಡಂದ್ ದೈವನೇ ಪನ್ಪುಂಡು.

   

   ತುಳು ಧರ್ಮದ ನ್ಯಾಯಾಂಗ ವ್ಯವಸ್ಥೆ  ಬಾರೀ ಪಿರಾಕ್ ರ್ದೇ ಬಾರೀ ಮಾನಾದಿಗೆ ಪಡೆದಿತ್ತ್ಂಡ್.ತುಳುವ ನ್ಯಾಯಾಂಗ ವ್ಯವಸ್ಥೆಡ್ ದರ್ಮ ಚಾವಡಿಲೆಡ್ ಗುತ್ತುಲೆನ ನಿರೆಲ್ ಡ್ ದೈವ ಸಾಗ್ಸಿಯಾದ್ ನ್ಯಾಯ ತೀರ್ಮಾನ ನಡತೊಂದಿತ್ತ್ಂಡ ದೈವದ ಕಲೊಟು ದೈವದ ತೀರ್ಮಾನ ಅಂತಿಮ ಆದಿತ್ತ್ಂಡ್.ಅಂಚಾದ್ ತುಳು ಧರ್ಮದ ನ್ಯಾಯಾಂಗ ವ್ಯವಸ್ಥೆಡ್ ನಂಬೊಳಿಗೆ ಪ್ರಧಾನ ಆದಿತ್ತ್ಂಡ್. ದೇವೆರೆ ಆರಾದನೆ ಹಿಂದೂ ಸನಾತನ ಸಂಸ್ಕೃತಿದ ಆರಾದನೆ. ದೈವಾರಾದನೆ ತುಳುಧರ್ಮದ ಆರಾದನೆ.ಅಡೆಗ್ ದೇವೆರೆ ಆರಾದನೆದ ಇಚಾರೊಲೆನ್ ಕನತ್ಂಡ ಅವ್ಲು ಏತೋ ಎತ್ತೇಸೊಲಾಪುಂಡು.ಇನಿಕಾನಗ ದೈವಾರಾದನೆ ಮುದೆಲ್ ರ್ದೇ ಮೂಲೊನು ಕಳೆಯೊಂದ್ಂಡ್.ಒಂಜಿ ಕಾಲೊಡು ದೈವೊಲೆನ್ ಕಾಟ್ ಕಲ್ಲ್ ಡ್,ತೋಡ ನೀರ್ ಡ್,ತೋಟ ಪಾಳಡ್,ತಾರೆ ತಿರಿಟ್,ಕಾಡ ಪುರ್ಪೊಡು ಆರಾದನೆ ಮಲ್ತೊಂತೆರ್.ಕಾಲಾನುಬಾಗೊಡು ಸಾನ ಮುಂಡ್ಯೆಲು ಲಕ್ಕ್ ದ್,ಪೊಸ ಸಾನದೊಕ್ಕೆಲಾದ್ ಅವ್ಲು ಕಲ್ಲ್ ದ ಬದಲ್ ಮುಗ ಮೂರ್ತಿಲೆನ್ ಉಜ್ಜಾಲಾ,ಮಣೆ ಮಂಚವುಡಾ,ಮುಂಡ್ಯೆಡಾ ದೀದ್ ಆರಾದನೆ ಮಲ್ತೊಂದು ಬತ್ತೆರ್.ಸಾನ ಕಟ್ಟನಗಲ ಆಚಾರಿಡ ಪೇರ್ ಕುಟ್ಟಿ ಪಾಡ್ಪಾವೊಂತೆರ್.ಅಂಚಾದ್ ಮೂಲ ಚಾಕಿರಿದ ಆಚಾರಿಲೆನ್ ದೈವ ಸುರುಕಾದ್ ನೂಲು ಪಾಡಿ ಸಂಸಾರ ಕೈ ಸೇರ್ದೆರಾಂದ್ ಕೇನೊಂತ್ಂಡ್.ಕಾಲ ಕರಿಲೆಕ ಆಚಾರಿಲೆನ್ ಬುಡ್ದು ದೈವಾಲ್ಯೊಗು ವೈದಿಕೆರ್ಡ ಕೆಸರ್ ಕಲ್ಲ್ ಪಾಡ್ಪಾಯೆರ್.ಆನಿರ್ದ್ ಬೊಕ್ಕ ಕೋರಿ ಮೀನ್ ದ ಅಗೆಲ್ ಕೈಕೊನುನ ದೈವೊಲೆ ಕಲೊಕು ಮಡಿ ಮೈಲೆ ಬರ್ರೆ  ಸುರಾಂಡ್.ಅವೆಕ್ ದುಂಬು ಕೋರಿ ಮೀನ್ ತಿನೊಂತ್ ನವು ನಮಕ್ ಮೈಲಿಗೆ ಆದಿಜ್ಜಾಂಡ್.ಅವೆನೇ ನಮ ನಂಬಿ ದೈವೊಲೆಗ್ ಸುದ್ದಾಚಾರದೊರುಟು ಅಗೆಲ್ ಸನ್ನಯ ಮಲ್ತೊಂತ.ವೈದಿಕ ಪ್ರಭಾವೊಡ್ದಾದ್ ಅವ್ವೇತೋ ಆಸುರೀ ಕಿರಿಯೆದ ಆರಾದನೆಲು ಉಂತುದು ಪೋತ.ಉಂದೆಡ್ದಾದ್ ನಮ್ಮ ದೈವೊಲೆನ ಬಾಯಿನ್ ನಮನೇ ಕಟ್ಟಾಯಿಲೆಕಾತ್ಂಡ್.ಬೊಕ್ಕ ನಮಕೊಲ್ತು ದೈವದ ಕಾರ್ನಿಕ‌ ತಿಕ್ಕೆರೆ ಸಾದ್ಯ?.

  

  ದೈವದ ಮೋನೆದ ಅರ್ದಾಲದ ಬದಲ್ ಯಕ್ಷರಂಗದ ಬಣ್ಣಗಾರಿಕೆ ತುತ್ತೈತ ಮಲ್ಪಡೆ.

   ದೈವಾರಾದನೆದ ಕಲೊಕು ವೈದಿಕಾಚರಣೆ ಬತ್ತಿ ಬೊಕ್ಕ ಅಡೆಗ್ ವೈದಿಕ ಅಷ್ಟಮಂಗಲ ಪ್ರಶ್ನಾ ಚಿಂತನೆಲು,ಸ್ವರ್ಣ ಪ್ರಶ್ನೆ,ತಾಂಬೂಲ ಪ್ರಶ್ನೆಲು ಬತ್ತ್ ದ್ ದೈವದ ನಾಲ್ ಪೀಠೊಲ್ನ ಬಗ್ಗೆ ತೆರಿಯಂದಿ ಮೊಕ್ಲು ದೈವೊಲೆನ್ ದೇವ,ದೇವಿ ಮಲ್ತ್ ಬುಡ್ಯೆರ್.ಮೊಕ್ಲು ಪಂಡಿಲೆಕ ತುಳುವೆರ್ ದೈವೊಗು ಬಾಲಾಲಯ ಕಟ್ಟಯೆರ್,ನಿಧಿಕುಂಭ ಮಲ್ತೆರ್,ಪ್ರಾಣ ಪ್ರತಿಷ್ಠೆ ಮಲ್ತೆರ್,ಬ್ರಹ್ಮ ಕಲಶ ಮಲ್ತೆರ್,ದೃಢ ಕಲಶ ಮಲ್ತೆರ್.ಈತ್ ಪೂರ ಆಯಿ ಬೊಕ್ಕ ಸಾನದುಲಯಿದ ಸಂಕ್ರಾಂತಿಗ್ ಅಣ್ಣೆರೆನ್ ನೇಮಕ ಮಲ್ತೆರ್.ಪಾಗರದ ಉಲಯಿ ನೇಮ ನೆರಿ ಪಡೆಯೊಂತಿ ದೈವೊಲೆನ್ ಮೊಕ್ಲು ಸಾನದ ಪಿದಯಿ ನೇಮ ಆಪುಲೆಕ ಮಲ್ಪಾಯೆರ್.ಏಪ ದೈವದ ಕಲಕ್  ಸಾನ ಕಟ್ಟಾಯೆರೆ ಕೆಸರ್ ಕಲ್ಲ್ ಪಾಡ್ಪಾಯೆರಾ ದೈವದ ಕಲೊಕು‌ ಒಂಜೊಂಜಿ‌ ಸುದ್ದಾಚಾರದ ಕೆರಮೊಲು‌ ಬರೆರೆ ಸುರಾಯ.ಸುದ್ದಾಚಾರದ ಮಡ್ಯೆಲೆರೆ ಉಜೆ ಬಸ್ಮದ ತಲಿಪುದ ಬದಲ್ ದೇವೆರೆ ನೀರ್ ದ ಕಲಶ ಮೈತೊನ್ನಡೆ ಚಾಕಿರಿದಕ್ಲೆಗ್ ಸುದ್ದಾಚಾರಂದ್ ಪನ್ಪಿ ಕಲ್ಪನೆ ಬತ್ತ್ಂಡ್.ಸಾನ ಗಿದ್ ಪುನಗ ದೈವದ ಬಂಡಾರೊನು ಬಾರ್ ಕುರುವೆಡ್ ಪಾಡ್ ದ್ ದೈವದ ಬಂಡಾರೊಲೆನ್ ಅವೆಟ್ ದೀದ್ ಮರತ ಮಿತ್ತ್ ದೀವೊಂತ್ ನಡೆ ಬಾಲಾಲಯ ಬತ್ತ್ಂಡ್.ಸಾನ ಮುಂಡ್ಯೆ ಕಟ್ಟ್ ದ್ ಹಿರಿಯಾಕ್ಲಿತ್ತ್ ದ್ ದೈವೊನು ಮಣೆ ಮಂಚವುದ ಮಿತ್ತ್ ಅಂದ್ ಮಲ್ಪವುನಡೆಗ್ ದೈವೊಗು ಪ್ರಾಣ ಪ್ರತಿಷ್ಠೆ ಬತ್ತ್ಂಡ್.ಅಕುಲು ಅಭಯ ಕೊರ್ಪುನ ದೈವೊಲೆನ್ ,ತುಳುನಾಡ ಸ್ವತಂತ್ರ ಸಗ್ತಿಲೆನ್ ದೇವೆರೆ ಕ್ಷೇತ್ರೊಲೆನ್ ಕಾಪುನ ಕ್ಷೇತ್ರಪಾಲೆ ಆದ್,ದೇವೆರೆನ ಪರಿವಾರ ಸಗ್ತಿಲಾದ್ ಮಲ್ತೆರ್.ನಮ್ಮ ತುಳುನಾಡ್ ಡ್ ಮೂಲೊಡು ಇತ್ತ್ ನಿ ದೈವಾರಾದನೆನೇ ,ಅವು ಬುಡ್ದು ದೇವೆರೆ ಆರಾದನೆ ಇಜ್ಜಾಂಡ್.ಅಪಗ ಅನಾದಿಡ್ದೇ ಇತ್ತಿ ದೈವೊಲು ಎಂಚ ದೇವೆರೆ ಚಾಕಿರಿದಕ್ಲಾದಿಪ್ಪೆರೆ ಸಾದ್ಯ?.

ಒಂಜಿ ಕಾಲೊಡು ಕೇರಳದ ಕಾಲಟಿರ್ದ್ ತುಳುನಾಡ್ ಗ್ ಬತ್ತಿನ ಶಂಕರಾಚಾರ್ಯೆರ್ ಉಲ್ಲಾಲ್ದಿನ ದೈವಸಾನೊಲೆಡ್ ಶ್ರೀಚಕ್ರ ದೀದ್ ಉಲ್ಲಾಲ್ದಿ,ಲೆಕ್ಕೆಸಿರಿ ಪೂರಾ ದುರ್ಗಾಪರಮೇಶ್ವರಿ ರಕ್ತೇಶ್ವರಿ ಆಂಡ್.ಶ್ರೀರಾಮಾನುಜಾಚಾರ್ಯೆರ್ ವಿಷ್ಣು ಮೂರ್ತಿನ್ ತುಳುನಾಡ್ ಗ್ ಕನತೆರ್.ಅರಸು ಬಿಟ್ಟಿದೇವನ್ ಆರ್ ಸುರು ವಿಷ್ಣುವರ್ದನಂದ್ ಪುದರ್ ಬದಲ್ತೆರ್.ಕಾಲನುಬಾಗೊಡು ವಿಷ್ಣುಮೂರ್ತಿ ದೈವಲಾ ವಿಷ್ಣುನ,ಗೀತೆದ ಸಂಸ್ಕೃತದ ಸಾಲ್ ಲೆನ್ ಪನೆರೆ ದುರು ಮಲ್ತೆರ್.ವಾದಿರಾಜೆರ್ ಶಿವ ಸನ್ನಿದಿಡ್ ಶಿವಲಿಂಗದ ಮಿತ್ತ್ ವಿಷ್ಣುನ ಸಾಲಿಗ್ರಾಮ ದೀವೊಂದು ಬತ್ತೆರ್.ಇನಿ ಕೇರಳದ ಪ್ರಶ್ನೆ ಚಿಂತನೆದಕುಲು ಅವ್ವೇ ಬೇಲೆನ್ ಮಲ್ತೊಂದುಲ್ಲೆರ್.ಶಿವ ದೇಲ್ಯೊಲೆಗ್,ಜೋಗಿ ಮಠೊಕ್ಲೆಗ್,ದೈವಾಲ್ಯೊಲೆಗ್ ಇಜ್ಜಾಂದಿ ಬ್ರಹ್ಮಕಲಶೊನು ಅಷ್ಡ ಮಂಗಲ ಪ್ರಶ್ನೆ ದೀದ್  ಮಲ್ಪಾಯೆರೆ ಪಂಡೆರ್.ಉಂದು ನಮಕ್ ಗೊತ್ತಾವಂದಿಲೆಕ್ಕ ನಡಪುನ ಧಾರ್ಮಿಕ ಆಕ್ರಮಣನಾ ಅತ್ತ್ ಮತಾಂತರನಾ ತೆರಿಯೊಂದಿಜ್ಜಿ

ಒವ್ವೇ ದೈವ ಕಲ ಮೀರ್ದ್ ಅಬತಾರ ಕಟ್ಟುನ ಸರಿಯತ್ತ್

 ದೈವೊಲೆಗ್ ಪೂ ನೀರ್ ದೀವೊಂತಿ ಕೂಡು ಕುಟುಮೊಲು ಅರಿಗಿರಿದ್ ಪೋನಗ ದೈವೊನು ಪಾಲಿಪೆರೆ ನಮ ವೈದಿಕ ವಿಧಿವಿದಾನೊಲೆನ್ ಮಲ್ಪುನಕ್ಲೆನ್  ಸಾನದ ಚಾಕಿರಿಗಿಂದ್ ಕನತ.ಅಕುಲು ದೈವೊಲೆಗ್ ದೇವೆರೆ ಮಂತ್ರ ಪನೊಂದು ಪೂಜೆ ಮಲ್ಪೆರೆ ಸುರು ಮಲ್ತೆರ್.ಉಂದುವೇ ಚಾಕಿರಿದಕುಲು ದೈವಸಾನೊಗು ಬತ್ತಿ ಬೊಕ್ಕ ಅಗೆಲ್,ತಂಬಿಲ,ಪನಿವಾರ ನಡತೊಂತಿ‌ ದೈವೊಲೆ ಸಾನೊಗು ಕುಂಕುಮಾರ್ಚನೆ,ಕರ್ಪೂರಾರತಿ,ಪೂತ ಪೂಜೆ ಪೂರ ಕನತೆರ್.ಒಂಜೊಂಜೇ ರೀತಿಡ್ ದೈವಸಾನೊಲು‌ ದೇವಸಾನೊಲಾಯಿಲೆಕ ತೋಜೊಂದು ಪೋಯ.ನಮಕ್ ನಮ್ಮ ಹಿರಿಯಾಕ್ಲ್ ದೀನ ಪುದರ್ ಡ್ ದೈವೊಲೆನ್ ಲೆಪ್ಪೆರೆ ನಾಚಿಕೆ ಆಂಡ್.ಅಪಗ ದೈವದ ಗಂದ ಗಾಳಿ ತೆರಿಯಂದಿ,ವಾ ವಾ ದೈವೊಲೆಗ್ ವಾ ವಾ ಪೀಠಂದ್ ತೆರಿಯಂದಿ ವೈದಿಕ ಪ್ರಶ್ನೆ ಚಿಂತನೆದಕುಲು ಪಂಡಿ ಪುದರ್ ನ್ ದೈವೊಲೆಗ್ ದೀವೊಂದು ಪೋಯ.ಅಕ್ಲ್ ಪೊಸತಾದ್ ದೀನ ಪುದರ್ ಡ್ ದೈವೊಲೆನ್ ಲೆತ್ತ್ಂಡ ದೈವ ವಾ ಕಾರಣೊಗ್ಲಾ ಓ ಕೊನಂದ್.ಆಣ್ ದೈವೊಲೆನ್ ಪೂರ ಪೊಣ್ಣು ಮಲ್ತೊಂದು ಪೋಯೆರ್.ಪೆದ್ದ್ಂಡ ಅಪ್ಪೆ,ತಂಕ್ಂಡ ತಮ್ಮಲೆ ಆಯಿಂಚಿ ದೈವೊನು ಸೊಂಟೊರ್ದು ತಿರ್ತ್ ಆಣವತಾರ,ಸೊಂಟೊರ್ದು ಮಿತ್ತ್ ಪೊಣ್ಣವತಾರ ಪಂಡೆರ್.ಕೆಲವೊಂಜಿ ಕಟ್ಟುನಕ್ಲೆಗ್ ತಾನ್ ಸಂಸ್ಜೃತೊಡು ಪಾತೆರ್ಂಡ ಮಲ್ಲ ಜನಂದ್ ದೈವದ ಕಲೊಟು ಉಂತುದು ಸಂಸ್ಕೃತದ ಮಂತ್ರೊನು ಪನೆರೆ ಸುರು ಮಲ್ತೆರ್.ಉನ್ರೆ ತಿನ್ರೆ ಬುಡಿ,ತುತ್ತೆರೆ ಕೋಮನೊಗ್ಲಾ ಗತಿ ದಾಂತಿ ಕಾಲೊಡು ದೈವಾರಾದನೆ ಇತ್ತ್ ದ್ ಅನಿರ್ದ್ ಇನಿಮುಟ್ಟ ನಮನ್ ಕಾತೊಂದು ಬೈದ್ ನ ದೈವೊಲೆನ್ ಬೊಕ್ಕ ದೈವೊದ ಕಲೊಕು ಬತ್ತ್ ನಕುಲು ಪಂಡಿ ದೇವೆರೆ ಪುದರ್ಡ್ ಇತ್ತ್ ನಕುಲು ಲೆಪ್ಪೆರೆ ಸುರು ಮಲ್ತ.ಕಟ್ಟುನಕುಲ್ಲಾ ಇನಿ ತನ್ಕ್ ಬಂಜಿಗ್ ನುಪ್ಪು ಕೊರ್ನ ದೈವೊಲೆನ್ ಮದತ್ ದ್ ಯಾನ್ ಆ ದೇವೆರ್ ಈ ದೇವಿಂದ್ ಪಂಡ್ ದ್ ದೈವೊಲೆನ್ ದಂಟೊಂದುಲ್ಲೆರ್‌.ಇನಿ ತನ್ನ ದೈವ ಚಾಕಿರಿ ಮದತಿ ಜವನೆರ್ ದೈವದ ಕಲೊಟುಂತೊಂದು " ಎನ್ನ ಮಾಯೆಗ್ ಗೋಚಾರಾಂದಿನೆನ್ ಪ್ರಸ್ನೆ ಚಿಂತನೆಡ್ ಕೇಂದ್ ತೆರಿಲೆ"ಪನ್ಪೆರ್ಂದಾಂಡ ದೈವೊನು ಮೊಕ್ಲು ದಾದ ಏಸಂದ್ ಎನ್ನಿದೆರಾ?.ನಿಜವಾದ್ ದೈವದ ಕಲೊಕು ಪ್ರಶ್ನೆ ಚಿಂತನೆದಕುಲು ಪನ್ಪುನವಿಜ್ಜಾಂಡ್.ಬಲಿಮೆ ತೂಪುನ ಬಲ್ಯಾಯನಕುಲು ಇತ್ತ್ ನಿ.ಇನಿ ಅಕ್ಲೆನಡೆ ಪೋಪುನಕ್ಲೇ ಇಜ್ಜಿ.ತಪ್ಪು ಮಲ್ತೆರ್ಡ ದೈವ ಏರೆನ್ಲ ಸಿಗ್ಸೆ ಕೊರಂದೆ ಬುಡಂದ್.ಇನಿ ದೈವೊಲೆಗ್ ಕಟ್ಟುನಕ್ಲೆಗ್ ವಾ ದೈವೊಗು ವಾ ಜೀಟಿಗೆಂದ್ ತೆರಿಯಂದೆ ರಡ್ರಡ್ಡ್ ಕೈಟ್ ಲ ಜೀಟಿಗೆ ಪತ್ತೊಂದುಲ್ಲೆರ್.ವಾ ದೈವೊಗು ತೆಂಬರೆ,ಒವೆಕ್ ಇಡೆದೋಲು,ಒವೆಕ್ ತಾಸೆ ದೋಲು ನಾಗಸರಂದ್ ತೆರಿಯಂದೆ ದೈವೊಲಿನಿ ಪುರಲ್ ಗ್ಲ ನಲಿಪುನ,ಚೆಂಡೆಗ್ಲ ನಲಿಪುನ ಪರಿಸ್ಥಿತಿ ಬೈದ್ಂಡ್.ಏರ್ ದೈವ ಸಾನೊದ ಉಲಯಿದ ಚಾಕಿರಿದಕುಲು ಇತ್ತೆರಾ ಅಕುಲಿನಿ ಪಿದಯಿ ಬೂರ್ದು ಪಿದಯಿರ್ದ್ ಬತ್ತ್ ನಕುಲು ಉಲಯಿದ ಚಾಕಿರಿ ಸುರು ಮಲ್ತೆರ್.ಅಕುಲು ಪಂಡಿನವೇ ನಮ್ಮ ಹಿರಿಯಾಕ್ಲೆಗ್ ವೇದವಾಕ್ಯ ಆದ್ ದೇವೆರೆ ಕಲತ ಪೂ ಪೂಜನೆಲು,ಬಜನೆಲು ದೈವದ ಕಲೊಕು‌ ಬತ್ತ.

ದೈವೊಲೆನ ಅರ್ದಾಲ ಬುಡ್ದು ಕೈಕ್ ತಿಕ್ ನ ಬಣ್ಣೊನು ಮೋನೆಗ್ ಪಾಡಡೆ

      ದೇವೆರೆಗ್ ಒಂಜಿ ಜಾತಿವರ್ಗದ ಚಾಕಿರಿಯಾಂಡ ದೈವೊಲೆಗ್ ಪದಿನಾಜಿ ವರ್ಗದ ಚಾಕಿರಿ.ಪದಿನಾಜಿ ವರ್ಗ ಕೂಡಿ ಕಲೊಟು ಪರಿಪೂರ್ಣ ಕಲೆಟ್ ದೈವ ನೆಗತ್ ಬರ್ಪುಂಡು.ಇನಿ ದೈವದ ಮೋನೆದ ಅರ್ದಾಲ ಪೋದು ಮೋನೆದ ರಂಗಾದ್ ಪೋತ್ಂಡ್.ದೈವದ ಕೇಪುಲು ರಂಗ್ ದ ತುತ್ತೈತೊಲು ಮಯಕಾದ್ ಪುಗೆಲ್ ಗ್ ಮೈಕ್ ಪೂರ ಆಟದ ತುತ್ತೈತೊಲು ಬೈದ.ಮೂಲು ದೈವನಾ,ದೇವಿಯಾ ಒಂಜಿಲಾ ಗೊತ್ತಾವಂದಿ ಪರಿಸ್ಥಿತಿ..ಕೊಡಿಯಡಿತ,ಕಲ ಮೀರ್ದ್ ಪೋವಂದಿ ದೈವೊಲಿನಿ ಗಟ್ಟ ಏರ್ದ್ ಪೋತ,ಟಿ.ವಿ.ಮಾದ್ಯಮ,ಸಿನೆಮಾ,ನಾಟಕ ಮಾದ್ಯಮೊಲೆಡ್ ಏಸ ಆದ್ ಪೋತ.ಒಂಜಿ ಕಾಲೊಡು ನೂಲು ಪಾಡಿ ಸಂಸಾರ ಪನೊಂತಿ ಕಟ್ಟ್ ನಕುಲು ಇನಿ ನೂಲು ಪಾಡಿ ಬ್ರಹ್ಮ ಕುಲ ಕೈ ಸೇರ್ದೆರಾಂದ್ ಕೇನೊಂದುಲ್ಲೆರ್.ಇನಿ ಅವರ್ದ್ ಲ ದುಂಬು ಬತ್ತ್ ದ್ ತಂತಿರ್ದಾರ್ ಕೈ ಸೇರ್ದೆರಾಂದ್ ಕೇನೊಂದುಲ್ಲೆರ್.ವೈದಿಕದ ಗಂದಗಾಳಿಯೇ ದಾಂತಿ ಮೂಲ ದೈವಾರಾದನೆದ ಕಲ ಇನಿ ವೈದಿಕೆರಿಜ್ಜಂದೆ ಇಜ್ಜಿ ಪನ್ಪುನಡೆ ಎತ್ತ್ ದ್ಂಡ್.ಸೇರೊನಡ್.ಆಂಡ ದೈವದ ಮೂಲ ಆರಾದನೆಗ್ ಅಕುಲು ಸಕಾಯ ಆದಿಪ್ಪೊಡು ವಿನಃ ಮೂಲ ಆರಾದನೆನ್ ಬದಲ್ಪುನ ಬೇಲೆನ್ ಅಕುಲು ಮಲ್ಪೆರೆ ಬಲ್ಲಿ.

          ದೈವೊಲೆ ತುತ್ತೈತದ ರಂಗ್ ನ್ ಬದಲ್ಪಡೆ

     ದೇವಾಲ್ಯದ ಆರಾದನೆಡ್ ದೇವೆರ್ ಬೊಕ್ಕ ನಮ್ಮ ನಡುಟು ಪೂಜೆಗ್ಂದ್ ಒರಿ ಅಣ್ಣೆರ್ ಉಪ್ಪುವೆರ್.ಅಂಚಾಂದ್ ದೈವದ ಕಲೊಟು ಆ ಕೆರಮ ಇಜ್ಜಿ.ದೈವ ಬೊಕ್ಕ ಕುಟುಮದ ನಡುಟು ಮೂಜನೆ ವ್ಯಕ್ತಿಯೊರಿ ಬರ್ಪುನ ಕೆರಮನೇ ದುಂಬು ದೈವಾರಾದನೆಡ್ ಇಜ್ಜಾಂಡ್.ವರ್ಸ ಇಡೀ ಪೂ ನೀರ್ ದೀದ್ ಆರಾದನೆ ಮಲ್ತೊಂತಿ ಕುಟುಮ ಬೊಕ್ಕ ದೈವದ ನಡುಟು ಅಪ್ಪೆ ಜೋಕ್ಲೆ ನಡುತ ಸಮ್ಮಂದ ಇತ್ತ್ಂಡ್.ದೈವ ಬೊಕ್ಕ ಕುಟುಮದ ಮದ್ಯೊಗೊರಿ ಮದ್ಯಸ್ಥೆ ಬತ್ತ್ ದ್ ದೈವದ ಕಾರ್ನಿಕ ಕಮ್ಮಿಯಾವೊಂದು ಪೋಂಡು.ದೈವ ಪಾತ್ರಿ ಬೊಕ್ಕ ಮದ್ಯಸ್ಥನ ನಡುತ ಪಾತೆರಕತೆ ಎಚ್ಚೊಂದು ಪೋಂಡು.ಆಂಡ ರಾಜಂದೈವದ ಕಲೊಟು ಗಡಿ ಪತ್ತ್ ನಾರ್ ಕೇಂಡಿನಕುಲೆಗ್ ಗಂದಬೂಲ್ಯ ಕೊರ್ಪೆರ್.ಇನಿ ಅವುಲ್ಲಾ ಸಾನದ ಬರಿಟಾ,ದೈವದ ಎದುರ್ಡು ಒಂಜಿ ಬರಿಟ್ ಪಜೆ ಪಾಡ್ದ್ ಕುಲ್ಲುದು ವೈದಿಕೆರ್ ಬೇತೆನೇ ಬೂಲ್ಯ ಕೊರೊಂದುಲ್ಲೆರ್.ಉಂದು ಸರಿಯತ್ತ್.ದುಂಬು ದೈವಾರಾದನಡ್ ಸಾನ ಗುಂಡದ ಭಂಡಾರ ಮಾನೆಚ್ಚಿಡ್ ಸಾನದುಲಯಿರ್ದ್ ಕನತ್ ಕೊರ್ಪುನತ್ತ್ಂದೆ ದೈವೊಲೆಗ್ ವಸಾಯೊಡೇ ಭಂಡಾರ ಒಪ್ಪಿತ್ ದ್ ಮಾನೆಚ್ಚಿಲ್ ಪಿರಿಯೊಂತ್ಂಡ್.ಇನಿ ತಿಕ್ ನೆಕ್ ಪೂರ ಮಾನೆಚ್ಚಿ ನಡತೊಂದುಂಡು.ಕುಟುಮದ ಇಲ್ಲದ ದೈವಾರಾದನೆ ಪುಡದ್ ಇಲ್ಲಿಲ್ಲಲ್ ಮಾನೆಚ್ಚಿ ನಡತೊಂದುಂಡು. ಪೊಣ್ಣು ದೈವೊಲೆನ ಅರ್ದಾಲ ಪೋದು ಮದಿಮಾಲೆ ಐತದ ರಂಗ್ ಬೈದ್ಂಡ್.

  

 ದೈವದ ಅರ್ದಾಲೊನು ಬುಡ್ದು ವೇಷದ ಬಣ್ಣ ಮಲ್ಪಡೆ

    

ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ತದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ಎಡತ ಮರ್ಗಿಲ್ಡೇ ಉಪ್ಪೊಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.

     

        ‌‌ದೈವದ ತುತ್ತೈತದ ಕೇಪುಲು ರಂಗ್ ಮಯಕ(ಓಡಮರಾಯ ದೈವ.ತಿಂಗಳೆ ಗರಡಿ ಹೆಬ್ರಿ)

   

 ದೈವದದೈವೊಲೆಗ್ ಪಾರಿ/ಮದಿಪು ಪನ್ಪುನವು ಇಜ್ಜಿ.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಸ್ಪರ್ದೆ  ಮಲ್ತೊಂದುಲ್ಲೆರ್,ಮೈಕ್ ಬೇತೆ,ಪಾರಿದ ಪ್ರಚಾರೊಗು.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್  ಗಂಟೆಕಟ್ಲೆ  ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್  ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಪ್ಪುನವು ನಿಜವಾದ್ ಲ ತಪ್ಪು.

ದೈವ ತುತ್ತೈತದ ಕೇಪುಲು ರಂಗ್,ಸೂರ್ಯ ಚಂದ್ರೆ ಮಯಕ

   ಕಲೊಟು ಕೇಪುಲು ರಂಗ್/ಕೆಂಪು ಬೊಕ್ಕ ಸಪೇದ್/ಬೊಲ್ದು ರಂಗ್ ಗ್ ಪ್ರಧಾನ ಬಿಲೆ ಇತ್ತ್ಂಡ್ಇನಿ ದೈವಾರಾದನೆದ ಕೊಡಿಯಡಿತ ಸುತ್ತಮುತಲಿಗೆಡ್ ಪೂರ ಕೇಸರಿ ರಂಗೇ ತೋಜೊಂದುಂಡು.ದೈವದ ಕಲತ ಉಜ್ಜಾಲ್,ಮುಂಡ್ಯೆ,ಕೊಡಿಯಡಿ,ಗರುಡೆ,ಮಕರಚೋರ್ನದ ಬೊಲ್ದು ಕುಂಟು ಬುಡ್ಂಡ,ಕೆಲವೊಂಜಿ ಚಾಕಿರಿದಕುಲು ಬೊಲ್ದು ತರೆತ್ರ,ಬೊಲ್ದು ತುತ್ತೈತ ತುತ್ತುನ ಬುಡ್ಂಡ ಒರಿನ ಚಾಕಿರಿದಕುಲು ಪೂರ ಕೇಸರಿ ಕುಂಟುನೇ ತರೆತ್ರ ಆದ್,ತುತ್ತೈತ ಆದ್ ಗಲಸೊಂದುಲ್ಲೆರ್.ಪುಣ್ಯೊಗು ಗಡಿ ಪತ್ತ್ ನಕುಲು,ಗುತ್ತುದಕುಲು ಪೂರ ಬೊಲ್ದು ತರೆತ್ರ ಬೊಲ್ದು ತುತ್ತೈತ ಪಾಡೊಂದುಲ್ಲೆರ್,ದೈವದ ಕಲೊಟು ಬೊಲ್ದು ಕುಂಟುಗೇ ಮಾನಾದಿಗೆ ಪನ್ಪುನೆನ್ ಮದತೊಂದುಲ್ಲೆರ್.ಏರ್ ದೈವದ ಕಲತ ಬಿಲೆನ್ ಒರಿಪೊಡಾ ಅಕ್ಲೇ ಕಲತ ಮಾನಾದಿಗೆನ್ ಕಳೆಯೊಂದುಲ್ಲೆರ್.ದೈವಾರಾದನೆ ತುಳುನಾಡ ಒಂಜಿ ಚೌಕಟ್ಟ್ ಡ್ ನಡಪುನ ಪದಿನಾಜಿ ಕಟ್ಲೆಡ್ ನಡಪುನ ಪರಿಪೂರ್ಣ ಆರಾದನೆ. ಅವೆನ್ ಕೇಸರಿ,ಹಿಂದುತ್ವೊಗು ಕನವಂದೆ ,ಬಾರತೀಯ ಸಂಸ್ಕೃತಿದ ಒಂಜಿ ಭಾಗವಾದೇ ತೂವೊಡು ವಿನಃ ಭಾರತೀಯ ಸಂಸ್ಕೃತಿದ ರಾಸಿದ ಪೊಲಿ(ಸಾಮೂಹಿಕ ಸಂಸ್ಕೃತಿ) ಮಲ್ಪೆರೆ ಬಲ್ಲಿ.ತುಳುನಾಡ ಸಂಸ್ಕೃತಿಗ್ ಅವೆತನೇ ಆಯಿನ ಒಂಜಿ ತುಳು ಧರ್ಮ ಉಂಡು.ಸಂಸ್ಕೃತಿ ಉಂಡು,ಆರಾದನೆ,ಆಚರಣೆ,ನಂಬೊಳಿಗೆದ ಪಾಗರ ಉಂಡು.ಆತೇ ಅತ್ತ್ ತುಳುವ ಮಣ್ಣ್ ಡ್ ಪುಟ್ಟ್ ನ ನಮಕ್ ತುಳುನಾಡ ಮಣ್ಣ ಸಂಸ್ಕೃತಿನ್ ಒರಿಪುನ ರುಣೊತ ಜವಾಬ್ದಾರಿ ಉಂಡು.ಈತ್ ಪೂರ ಎತ್ತೇಸೊಲು ದೈವದ ಕಲೊನು ಅಲೆಂಚಾದಿಪ್ಪುನಗ ಅವೆನ್ ದುಂಬುಗು ಎಂಚ ಒರಿಪೊಲಿಂದ್ ಪ್ರತಿಯೊರಿ ತುಳುವೆಲ ಅಲಚನೆ ಮಲ್ಪುಗ.