ಪೊಸಪ್ಪೆ- ಸತ್ಯಜಾವದೆ

                            ಪೊಸಪ್ಪೆ / ಸತ್ಯಜಾವದೆ

        ( ಮಂತ್ರಜಾವದೆ ಪೊಸಬೂತ,ಪೊಸಪ್ಪೆ,ಸತ್ಯಜಾವದೆಯಾನಗ )
    

    ಪೊಸಪ್ಪೆನ ಮೋನೆದಲಂಕಾರ,ಚಕಪ್ಪರ ಕುಲ್ಲುದು ಮಲ್ಲ ವಸಾಯ

         ತುಳುನಾಡ ದೈವಾಅದನೆಡ್ ಪರವೆರೇ ಕಟ್ಟುನ ಒಂಜಿ ದೈವ ಉಂಡು ಪಂಡ ಅವು ಪೊಸಪ್ಪೆ.ಪೊಸಪ್ಪೆನ್ ಸತ್ಯ ಜಾವದೆಂದ್ ಪನ್ಪೆರ್.ಪೊಸಪ್ಪೆನ್ ಕೊಂಗನಾಡ್ ದ ಸತ್ಯಂದ್ ಪಂಡೆರ್ಡಲ ಬೊಂಡೊನು ಪೊರ್ಲು ಕೆತ್ತ್ ದ್ ದೈವದ ಒರು ಮಂತ್ ದ್ ಬಂಡಾರ ದೀಪೆರ್.ಜಾವದೆ ಪಂಡ ಪೊಣ್ಣ ಸಗ್ತಿ.ಜಾವದೆಡ್ ಮಂತ್ರಜಾವದೆ,ಸತ್ಯ ಜಾವದೆ,ಬಂಟ ಜಾವದೆ ಇಂಚ ಪೂರ ಬರ್ಪುಂಡು.ಆಂಡ ಕರಿಯ ಕಾಂತು ಬೈದ್ಯೆರೆ  ಸೂಂತ್ಲಾಡಿ ಮಂತ್ರಜಾವದೆನೇ ಪುರಲ್ ರ್ದ್ ಬೊಕ್ಕ ಪೊಸಪ್ಪೆಯಾದ್ / ಪೊಸಬೂತ ಆದ್ ತುಳುನಾಡ್ ಡ್ ಆರಾದನೆ ಪಡೆಯೊಂದಿಪ್ಪುನ ಸತ್ಯ.ಪ್ರಳಯ ಆನಗ ದೇವೆರೆಗ್ ಗತಿ ದಾಂತೆ ಪೋನಗ ದಾದ ಮಲ್ಪಡ್ ದೇವೆರೆಗ್ಂದ್ ಸಂಕಲ್ಪ ಮಲ್ತ್ ದ್ ದೈವ ತುಳುನಾಡ್ ಗ್ ಬರ್ಪುನಿಗೆ.ದೈವ ಬತ್ತ್ ದ್ ಉಂತುನಿ ಸಿಂಗಣಿಮಾರ್ ಡ್." ಸಿಂಗಣಿಮಾರ್ ಡ್ ಉಂತ್ಯೆ , ಒರ್ತ್ಯಪ್ಪೆ ಉಲ್ಲಾಲ್ದಿನ್ ವಂದಾನೆ ಮಲ್ತೊಂಡೆ " ಪಂಡ್ ದ್ ದೈವ ಪನೆರೆ ಉಂಡು.ಇತ್ತೆ ಉಲ್ಲಾಲ್ದಿ ಪೋದು ರಾಜರಾಜೇಶ್ವರಿನ್ ವಂದಾನೆ ಮಲ್ತೊಂಡೆಂದಾತ್ಂಡ್.

   

                          ಮಂತ್ರಜಾವದೆನ ಮೋನೆದಲಂಕಾರ

   

   ಪುರಲ್ದ ಜಾತ್ರೆಗ್ ಒರ ಕಾಂತು ಬೈದ್ಯೆರ್ ಪೋನಗ ಮಂತ್ರಜಾವದೆ ಅರೆನ ಪಿರವುಡೇ ಪೋಪುನಿಗೆ.ಹಿರಿಯಾಕುಲು ಪನ್ಪಿಲೆಕ ಬಾರಿ ನಂಜಿದ ಬೂತ  ಪಂಡ ಮಂತ್ರ ಜಾವದೆಗೆ.

" ದೇವೆರೆ ಬಲಿ ಬನ್ನಗ ಅಡ್ಡ ನೀಟ ಪೋಯೆರಪ್ಪೆರೆ , 

ಅಡ್ಡ ಪೋಯೆರಪ್ಪೆರೆ , 

ನೀಟ ಪೋಯೆರಪ್ಪೆರೆ

ಯಾನೊಂಜಡೆ ಜಪ್ಪೆರೆ

ದೇವೆರ್ ಎನ್ನ ಸೊಂಟೊಗು

ಒಂಜಿ ಪೆಟ್ಟ್ ತೊರ್ತೆರೇ...."

   ಪಂಡ್ ದ್ ಬೀರ ಪನ್ರೆ ಉಂಡು.ಮಂತ್ರಜಾವದೆ ಉಂದೆನ್ ರಾಗೊಡು ಪನೆರುಂಡುಗೆ.ದೇವೆರ್ ಉಲಯಿ ಪೋನಗ ದೇವೆರೆನ್ ಉಲಯಿ ಪೋಯೆರೆ ಬುಡಂದೆ ಮಂತ್ರ ಜಾವದೆ ಅಡ್ಡ ಉಂತ್ಯಲ್ ಗೆ.ದೇವೆರ್ ಒಂಜಿ ಪೆಟ್ಟ್ ತೊರ್ತೆರ್ ಗೆ.ತೊರ್ತ್ ದಾನಗ ಮಂತ್ರಜಾವದೆ ಪೊರೆಲೊಂದು ಪೋಪಲ್.ಅಪಗ ಕಟ್ಟೆಮಾರ್ ರ್ದ್ ಮುರ್ತೆಗ್ ಪುಲ್ಯಕಲೊಗು ಪೋಯಿನ ತುಮ್ಮ ಪೂಜಾರಿ(ಇತ್ತೆ ದೂಮ ಪೂಜಾರಿಂದಾತ್ಂಡ್) ಪನ್ಪುನಾರ್ ಮಂತ್ರಜಾವದೆಗ್ ಎದುರು ತಿಕ್ವೆರ್ ಗೆ.ಅರೆನ್ ತೂಯಿ ಮಂತ್ರಜಾವದೆ ಯಾನ್ ಇರೆನೊಟ್ಟುಗು ಬರ್ಪೆಂದ್ ಪೊರೆಲೊಂದು ಬೊಬ್ಬೆ ಪಾಡ್ವಲ್.ನಿನನ್ ಲೆತೊಂದು ಪೋಪುನ ಎನ್ನ ದನಿಕುಲೆಗ್ ಮಿನಿ ಗೊತ್ತಾಂಡ ಎನನ್ ದೀವಯೆರ್ಂದ್ ತುಮ್ಮ ಪೂಜಾರ್ಲು ಪಂಡಲ ಅಟಚ್ಛಲ ಪತ್ತ್ ದ್ ಅರೆನೊಟ್ಟುಗು ಪೋಪಲ್.ಬತ್ತ್ ನಾಲೆನ್ ಕಟ್ಟೆಮಾರ್ ಡ್ ನಂಬೆರೆ ಗೊತ್ತುಂಡಾ,ಗೊತ್ತಾವಂದಿಲೆಕ್ಕ ನಂಬೊಡು.ಅಂಚಾದ್ ತುಮ್ಮ / ದೂಮ ಪೂಜಾರ್ಲು ಒಂಜಿ ಕೆಲಪಾನ ಪೂಂಜನ್ ಕಜಿಪು ಮಲ್ತ್ ದ್ ಉನ್ಪುನು ಪತೊಂದು ತಾರಿದ ಕುಬೆಟ್ ಅಗೆಲ್ ಪಾಡ್ವೆರ್.ಆರ್ ನಂಬಿನ ಬೂತದ ಪುದರ್ ಪೊಸಪ್ಪೆ,ಪೊಸಬೂತ,ಸತ್ಯದೇವತೆಯಾದ್ ತುಳುನಾಡ್ ಡ್ ಆರಾದನೆ ಪಡೆಯೊಂದುಲ್ಲಲ್.

                                     ಪೊಸಪ್ಪೆನ ಕದಿರೆ ಮುಡಿ

. ಕಾಂತುಬೈದ್ಯನೊಟ್ಟುಗು ಬೈದ್ ನ ಮಂತ್ರಜಾವದೆನ್ ಪುರಲ್ದ ದೇವೆರ್ ತೊರ್ತುದು ಸೊಂಟ ಪೊಳಿಪುನಗ ಮುರ್ತೆ ಮೂರುನ  ತುಮ್ಮ/ದೂಮ ಪೂಜಾರಿ ಅಲೆನ್ ಕನತ್ ದ್  ಪೊಸಪ್ಪೆಯಾದ್ ಆರಾದನೆ ಮಲ್ಪುವೆ.ತುಮ್ಮ ಪೂಜಾರಿ ನಂಬಿನ ಈ ದೈವನೇ ಪೊಸಬೂತ.ಉಂದೆಕ್ ಸಾಗ್ಸಿಯಾದ್ ಪೊಸಪ್ಪೆನ ಕೋಲ/ನೇಮೊಡು ದೈವ ಚಕಪ್ಪರ ಕುಲ್ಲುದು ಕಾರೊಯ್ತೊಂದು ನೇಮ ನಡಪುಂಡು..ಅಂಚಾದ್ ಮಂತ್ರಜಾವದೆಗ್ ಕಾಂತು ಬೈದ್ಯೆರೆ ಕಟ್ಟಾಂಡ ಪೊಸಪ್ಪೆಗ್ ತುಮ್ಮ/ದೂಮ ಪೂಜಾರ್ಲೆನ ಕಟ್ಟಾಂಡ್.ಕಾಲಾನುಬಾಗೊಡು ಕುಂಟದೂಮನ ಕಟ್ಟ್ಂದಾಂಡ್.ಅಂಚನೆ ಪೊಸಬೂತ/ಪೊಸಪ್ಪೆನ ಕಥೆ ಪನ್ನಗ ಪರವೆರ್ ಕುಂಟಾಲ ಜಂತ್ರಿನ ಕಥೆ ಪಂಡ್ ದೇ ಸುರು ಮಲ್ಪುವೆರ್.ಸುರುಕು ಪನ್ನಗ ಪೊಸಪ್ಪೆ/ಪೊಸ ಬೂತೊಗ್ಲ ಕುಂಟ ದೂಮನವೇ ಕಟ್ಟ್.

                              ಮಂತ್ರಜಾವದೆನ ಕದಿರೆಮುಡಿ

( ಈ ಸ್ಪಷ್ಟ ಮಾಯಿತಿನ್ 60 ವರ್ಸೊಗು ದುಂಬು ನಮಕ್ ಪೊಲಬು ಕೊರ್ನಾರೆಗ್ ಕೊರ್ತ್ ನಾರ್ ಹಿರಿಯ ಪರವ ಜನಾಂಗದ ನೇಮ ಕಟ್ಟುನಾರ್ )