ಕೊಟ್ಟ,ಮದಕರಿ,ಕಾಲೆ ಹಾಕುನಿ ಒಂಜಿ ನಂಬೊಳಿಗೆ

ಕೊಟ್ಟ,ಮದಕರಿ ,ಕಾಲೆ ಹಾಕುನಿ ಒಂಜಿ ನಂಬೊಳಿಗೆ

  

ನಮ ಏತೋ ಸರ್ತಿ ಆಯನ   ಕೊಟ್ಟ ಪತ್ತ್ ನ ನಾಲಾಯಿಡ್ ಎಂಚ ಕೊಡತೆನ ಅಂಚನೆ ಆಂಡ್ಂದ್ ಪನ್ಪ.ಅಂಚನೆ ಆಯನ ವಾ ಮದಕರಿ ಪತ್ತ್ ನ ಕೈಯಿಂದ್ ಲ ಪನ್ಪ.ಕೊಟ್ಟ ಪಂಡ ಪಾಂಡು ರೋಗ,ಸರ್ರೊಡು ಬೂರುನ ಬೊಲ್ದು ಮಚ್ಚೆ.ಮದಕರಿ ಪಂಡ ಕೋಷ್ಟ ಪಂಡ ಸರ್ರದ ಅಂಗೊಡು ಗಜ್ಜಿ ಬೂರ್ದು,ಅವೆಟ್ ನೀರ್ ಜತ್ತೊಂದು,ಕೆಲೆಂಜಿ ಕುಲ್ಲೊಂದು ಆ ಜಾಗೆ ಕರದ್ ಪೋಪುಂಡು .ಉಂದು ಮದಕರಿ. ಕೊಟ್ಟೊಡು ಕಲೆ ಇತ್ತ್ಂಡ ಮದಕರಿಡ್ ಕಜ್ಜಿ ಉಪ್ಪುಂಡು.ಸರ್ಪ ದೋಸೊರ್ದು ಕೊಟ್ಟ,ಮದಕರಿ ಬತ್ತ್ ಲೆಕನೆ ಉಬ್ಬೆಸ(ಸ್ವಾಸಕೋಶೊಗು ಸಮ್ಮಂದಪಟ್ಟ್ ದ್),ದೃಷ್ಠಿ ದೋಷಲಾ,ಸಂತಾನ ಇಜ್ಜಾಂದಿ ದೋಷ ಆಣಗ್ಲ,ಪೊಣ್ಣಗ್ಲ ಬರ್ಪುಂಡು.

ಕೊಟ್ಟ : - 

ಕೊಟ್ಟ ಪನ್ಪುನವು ನಮ್ಮ ನಂಬೊಳಿಗೆದಲೆಕ ಜನ್ಮಾಂತರದ ದೋಷೊರ್ದು,ಸರ್ಪೊನು ಕೆರ್ನ ದೋಸೊರ್ದು ಬರ್ಪುನಿ.ಕೆಲವೆರ್ ಪನ್ಪೆರ್ ಎಂಕುಲು ಓಲ್ಲಾ ಸರ್ಪೊನು‌ ಕೆರ್ತಿಜಾಂದ್.ಆಂಡ ಬೇತೆ ಜನ್ಮೊಡು ಕೆರ್ದಿತ್ತ್ಂಡಲಾ ಜನ್ಮಾಂತರೊಡು ಅವೆತ ದೋಷ ತಾಗುಂಡು.ಕೊಟ್ಟೊನು ಪಾಂಡು ರೋಗ ಪನ್ಪೆರ್..ಅವು ಬೊಲ್ದು ಕಲೆ ಮೇಲ್ ಡ್ ಬೂರೋಂದು ಬರ್ಪುನಿ.ಸರ್ಪಹತ್ಯೆದ ದೋಸೊರ್ದು ಈ ಕಾಯಿಲೆ ಬರ್ಪುಂಡು.ಪಾಂಡು ರೋಗ ಬತ್ತಿ ಪಾಂಡು ಚಕ್ರವರ್ತಿಯಾಂಡಲಾ ಆ ಸೀಕ್ ಇತ್ತ್ ನೆಡ್ದಾದ್ ಸಿಮ್ಮಾಸನೊನು ಏರುಜೆ.

ಏರಾಂಡಲಾ ಬೊಡ್ಚಾಂದಿನ ಪಂಡಿನ ಪಂಡಿಲೆಕ ಆಂಡ  ಕೊಟ್ಟ ಪತ್ತ್ ನಾಯನ ನಾಲಾಯಿಡ್ದಾದ್ ಇಂಚಾಂಡ್ ಪನ್ಪೆರ್. ಅಬ್ಬೇಸೊಡು ಅಂಚ ಕೊಟ್ಟ ಪತ್ತ್ ನಾಯನ ನಾಲಾಯಿಂದ್ ಬತ್ತ್ ದುಪ್ಪೊಡು.ಅಪಗ ಕೊಟ್ಟ ಪಂಡ ದಾದಂದ್ ತೆರಿಯೊನೊಡು.ಕೊಟ್ಟ ಪಂಡ ನರಮಾನ್ಯನ ಮೋನೆಡಾ,ಕೈ ಕಾರ್ ಡಾ ಅತ್ತ್ ಇಡೀ ಸರ್ರೊಡಾ ಬರ್ಪುನ ಬೊಲ್ದು ಮಚ್ಚೆಲು.ಕಡೆಕ್ ಇಡೀ ಸರ್ರೊಗು ಉಂದು ಪಗರುಂಡು.ನಮ ಪೋಯಿನ ಕೆಲಸೊಡು ಓಲಾಂಡಲಾ ಸೋಲಾಂಡ ವಾ ಕೊಟ್ಟ ಪತ್ತ್ ನಾಯನ್ ತೂಯೆನಾಂದ್ ಬೇಜಾರ್ ಮಲ್ಪುವೆರ್.ನಿಜವಾದ್ ನಮ್ಮ ಕೆಲಸೊಗ್ಲ ಕೊಟ್ಟ ಪತ್ತ್ ನಾಯಗ್ಲಾ ,ನಾಲಾಯಿಗ್ಲಾ ದಾದ ಸಮ್ಮಂದಲ ಇಜ್ಜಿ.ಅವ್ವೊಂಜಿ ಅಬ್ಬೆಸದ ಪಾತೆರ ಆತೆ.

ಕೊಟ್ಟ ಬರ್ರೆ,ಮದಕರಿ ಬರ್ರೆ ಅವು ನಾಗ ದೋಷೊರ್ದು ಬರ್ಪುಂಡುಂದು ಹಿರಿಯ ಪೆರಿಯಾಕುಲು‌ ನಂಬುದಿತ್ತೆರ್.ಕೊಟ್ಟ ಪತ್ತುನ್ಲಾ ನಾಗ ದೋಷೊರ್ದುಂದೆ ಪನ್ಪೆರ್.ನಾಗನ್ ಏರಾಂಡಲಾ ಹಾಕ್ ದ್ ಕೆರ್ಯೆರ್ಡ ಅವೆತ ಪೊಳೆಜಿದ ಉಲಯಿದ ಬೆಗರ್ ನೀರ್ ಗಾಳಿಗ್ ಬಾರ್ಯಾತ್ ದೂರ ರಾಪುಂಡುಗೆ.ಅವು ಏರ್ನ ಸರ್ರದ ಮಿತ್ತ್ ಬೂರ್ಂಡಲ ಅಕ್ಲೆಗ್ ಕೊಟ್ಟ ಪತ್ತುಂಡುಗೆ.

  ಕೊಟ್ಟ ಪತ್ತ್ ನಕ್ ಲೆನ ಪುಣೊನು  ಕೆಲವೆರ್ ಕೌಂತೆರ್ಡ  ಕೆಲವೆರ್ ಪೊತ್ತಾವೊಂತೆರ್.ಕೆಲವೆರ್ ದಾದ ಮಲ್ತೊಂತೆರ್ ಪಂಡ ಕೊಟ್ಟ ಪತ್ತ್ ನಕ್ಲೆನ್ ಕೌಂಪುನ ಗುಂಡಿಗ್ ಗುಂಡಿ ತೋಡಿ  ಬೊಕ್ಕ ಕಿದೆ ಗೊಬ್ಬರ ಪಾಡ್ದ್ ಕೊಟ್ಟ ಪತ್ತ್ ನಾಯನ ಪುಣೊನು ಅವೆತ ಮಿತ್ತ್ ಕಂಕನೆ ಜೆಪುಡ್ದು ಪಿರ ಪುಣತ ಮೇಲ್ ಗ್ ಕಿದೆ ಗೊಬ್ಬರ ಪಾಡ್ದ್ ಬೊಕ್ಕ ಮಣ್ಣ್ ಮುಚ್ಚಿದ್ ಕೌಂತೊಂತೆರ್.  ಮಣ್ಣ್ ಮಲ್ತಿ ಬೊಕ್ಕ ಬೈತ ಒರುಟು ನರಮಾನಿ ಒರು ಮಲ್ತ್ ದ್ ಪೊತ್ತಾದ್ ಬೊಕ್ಕ  ಸಾವು ಕರಿತೊಂತೆರ್.ಆಯನ ಬಟ್ಟಲ್,ಲೋಟೆ,ಚೆಂಬು ಚೆರಿಗೆ ಕುಂಟು ಪೂರಲ ದೂರನೆ.ದುಂಬುದ ಕಾಲೊಡು ಆ ಸೀಕ್ ಬತ್ತ್ ನಾಯಗ್ ಪಾಪ ಒಂಜಿ ಸಿಕ್ಸೆನೇ ಆದಿತ್ತ್ಂಡ್.ಆಯೆ ಸಮಾಜೊಗು,ಕುಟುಮೊಗು,ಇಲ್ಲಗ್ ಬೊಡ್ಚಾಂದಿನಾಯೆ ಆದ್ ಪೋದಿತ್ತೆ.ಓಲ್ಲಾ ಸ್ಥಾನ ಮಾನ ಇಜ್ಜಂದೆ ಜೀವೊಡಿತ್ತ್ ನ ಪುಣ ಆದ್ ಪೋದಿತ್ತೆ.

ನನ ಕೆಲವೊರ ಏರಾಂಡಲ ಗೊತ್ತಿಜ್ಜಂದಿ ಜಾಗೆಡ್ ತೀರ್ಯೆರ್ಡ,ಬೊಳ್ಳೊಡು ಪೋದು,ಕಡಲ್ ಗ್ ಬೂರ್ದು ತೀರ್ಯೆರ್ಡ,ತೀರ್ದ್ ನ ನಿಗಾಂಟ್ ಇತ್ತ್ಂಡ (ಕೊಟ್ಟ ಪತ್ತ್ ನಕುಲತ್ತ್,ಬೇತೆ ಏರಾಂಡಲ) ಅಕ್ಲೆನ ಪುಣ ತಿಕ್ಕ್ ಜಿಂಡ ಬೈಟ್ ಅಕ್ಲೆನ ಒರು ಮಲ್ತ್ ದ್ ಬೊಕ್ಕ ಸಾವು ಕರಿಪುನ ಕೆರಮ ಇತ್ತ್ಂಡ್.ಅಂಚನೆ ಪಿದಯಿ ಪೋಯಿನಾಯೆ 12 ವರ್ಸ ಬತ್ತ್ ಜೆಂಡ ಊರುದ ಎತ್ತರದ ಜೇರದ ತರೇಕ್ ಪೋದು 3 ಸರ್ತಿ ಆಯನ ಪುದರ್ ನ್ ಲೆತ್ತೊಂತೆರ್.ಲೆಪ್ಪುಗು ಆಯೆ ಬತ್ತ್ ಜೆಡ ಆಯನ ಅಡೆಗ್ ಮಗಿಂಡ್ಂದ್ ಎನ್ನಿದ್ ಆಯಗ್ ಊರುಡು ಸಾವು ಕರಿತೊಂತೆರ್.

   ಬೊಲ್ದು ಕೊಟ್ಟ ಪತ್ತ್ ನಕ್ಲೆನ ಪುಣೊನು ಕೆಲವೆರ್ ಕೌಂತೊಂದಿಜ್ಜಾಂಡ್, ಪೊತ್ತವೊಂತೆರ್.ದಾಯೆ ಪಂಡ ಕೊಟ್ಟ ಪತ್ತಿನಕ್ಲೆನ ಪೊಣೊನು ಮಾಂತ್ರಿಕೆರ್ ಮಣ್ಣ್ ರ್ದ್ ಪಿದಯಿ ದೆತ್ತ್ ದ್ ಪುಣತ ಮೈಡ್ದ್ ಎಣ್ಣೆ ದೆತ್ತೊಂತೆರ್ ಗೆ.ಅವು ಸಿದ್ದಿದ ಎಣ್ಣೆಗೆ.ಅವೆಟ್ ದೀಪ ಪೊತ್ತಾದ್ ದೀದ್ ಸಿದ್ದಿ ಮಲ್ತೊಂತೆರ್ ಗೆ.ನನ ಕೆಲವೆರ್ ಕೊಟ್ಟ ಪತ್ತ್ ನಕ್ಲೆನ್ ಪೊತ್ತಾಂಡ ಅಗ್ನಿಗ್ ಕುಂದೆಲ್/ದೋಸ ಬರ್ಪುಂಡುಂದು ಆ ಪುಣೊನು ಕೌಂತೊಂತೆರ್ ಅಂಚನೆ ಕೊಟ್ಟ ಪತ್ತ್ ನಕ್ಲೆನ್ ಪೊತ್ತಾಂಡ ಅಕ್ಲೆ ಬೊಣ್ಯ ಗಾಳಿಗ್ ರಾದ್ ಏರ್ನಾಂಡಲ ಮೇಲ್ ಗ್ ಬೂರ್ಂಡ ಅಕ್ಲೆಗ್ ಲ ಸೀಕ್ ಪಗರುಂದು ಪೋಡಿದ್ ಕೌಂತೊಂತೆರ್ ಗೆ.ಅಗ್ನಿಗ್ ದೋಸ ಬರ್ಪುಂಡುಂದು ಏರೋ ವೈದಿಕೆರ್ ತುಳುವೆರೆಗ್ ಪೋಡಿ ಕಟ್ಟಾದಿಪ್ಪೆರ್.ಪೊತ್ತಾಂಡ ಸೈತ್ ನಕ್ಲೆ ಮೇಲ್ದ ಸಿರ್ಕ್ ಒವುಲ ಒರಿಯೆರೆ ಸಾದ್ಯ ಇಜ್ಜಿ.ಪೂರ ಪೊತ್ತುದು ಬಸ್ಮಾದ್ ಪೋವು.ಅಂಚನೆ ದುಂಬುದ ಕಾಲೊಡು ಕೊಟ್ಟ ಪತ್ತ್ ನಕುಲು ಸೈತೆರ್ಡ ನನ ದುಂಬುದ ವಂಶ ಅವ್ವೇ ಸೀಕ್ ಡ್ ಬರೆಲೆರೆ ಬಲ್ಲಿಂದ್ ,ಸೀಕ್ ಕುಟುಮೊಡು,ವಂಶೊಡು ದುಂಬೊತ್ತೊಂದು ಪೋಯೆರೆ ಬಲ್ಲಿಂದ್ ಸೈತ್ ನಾರೆನ್ ಕೌಂತುದು 48 ದಿನತ ಸೂತಕ ಆಚರಣೆ ಮಲ್ಪೆರಾಪುಜಿಂದ್  ಬೈತ ಒರುಟು ನರಮಾನಿ ಒರು ಮಲ್ತ್ ದ್ ಪೊತ್ತದ್ ಸಾವು ಕರಿತೊಂತೆರ್.ಅಂಚನೆ ಕೆಲವೆರ್ ಕೊಟ್ಟ ಪತ್ತ್ ನಾರೆನ್ ಕೌಂತಿ ಬೊಕ್ಕ ಅರೆನ ಉಪದ್ರ ಉಂಡುಂದು ತೋಜಿಂಡ ದೋಸೊಲು ಕುಟುಮ ಸಂಸಾರೊಗು ಬರ್ರೆ ಬಲ್ಲಿಂದ್,ಸೈತ್ ನಾರೆಗ್ ಸದ್ಗತಿ ತಿಕ್ಕಡ್ಂದ್ ಅಂಚನೆ ಕುಡ ಸುರೂರ್ದು ಕಿರಿಯೆ ಮಲ್ಪೆರೆ ಬೈಟ್ ನರಮಾನಿ ಒರು ಪೊತ್ತಾವುನ ಮುಕಾಂತ್ರ ಮಲ್ತೊಂತೆರ್.ಮಾತೆಕ್ಲ ಅಂಚ ಮಲ್ಪೊಡುಂದಿಜ್ಜಿ.ಅಂಚಿನ‌ ದೋಷ ತೋಜಿಂಡ ಮಾತ್ರ ಮಲ್ತೊಂತೆರ್. ಕೊಟ್ಟ ಪತ್ತ್ ನಾಯರ್ದ್ ಕುಟುಮೊಗು ದೋಷ ತೋಜಿಂಡ ಇಂಚ ಮಲ್ತೊಂತೆರ್.ಅಂಚನೆ ಕೆಲವೊರ ಕೊಟ್ಟ ಪತ್ತ್ ನಕ್ಲೆ ದೋಷ ಏರೆಗ್ಲ ಬರ್ರೆ ಬಲ್ಲಿಂದ್ ಅಕ್ಲೆ ಪುಣೊನು ಕೌಂಪುನಗ ಜೂವದ ಬೊಳ್ಳೆ ಕೋರಿನ್ಲಾ ಕೌಂತೊಂತೆರ್ ಗೆ.

   

ಮದಕರಿ:-

ಮದಕರಿ ಪಂಡ ಅಂಗೊಲು‌ ಕರವೊಂದು ಪೋಪಿನ ಸೀಕ್.ಉಂದೆನ್ ಕುಷ್ಠ ರೋಗಂದ್ ಲ ಪನೊಂತೆರ್.ಕಣ್ಣ್ ದ ಅರುಟು,ಮೂಂಕುದಲ್ಪರ್ದ್,ಕೆಬಿತಲ್ಪರ್ದ್,ಕೈತ ಬಿರೆಲ್ ಡ್,ಕಾರ್ದ ಬಿರೆಲ್ ಡ್ ಈ ಸಿರ್ಕ್ ಬತ್ತ್ ದ್ ಬಿರೆಲ್  ಕರದ್ ಬಿರೆಲ್ ತುಂಡಾಪುನಲಾ ಉಂಡು .ಈ ಸೀಕ್ ಹಿರಿಯಾಕ್ಲೆ ವಾಕ್ ದೋಸೊರ್ದುಲಾ ಬರ್ಪುಂಡು,ಸರ್ಪ ದೋಷೊರ್ದುಲಾ ಬರ್ಪುಂಡು.ಕೊಟ್ಟೊಡಾಂಡಲಾ ಗಜ್ಜಿ ಬೂರುಜಿ,ರೇಸಿ ಬರ್ಪುಜಿ,ಕೆಲೆಂಜಿ ಕುಲ್ಲುಜಿ.ಮದಕರಿಡ್ ಗಜ್ಜಿ ಗಾಯ ಉಪ್ಪುಂಡು,ಪುಡಿ ಉಪ್ಪುಂಡು,ರೇಸಿ ಬರ್ಪುಂಡು,ನೀರ್ ಬರ್ಪುಂಡು,ಕೆಲೆಂಜಿ ಕುಲ್ಲುಂಡು,ಪುರಿಯಾಪುಂಡು.ತೂಯೆರೆ ವಿಕಾರ ತೋಜುಂಡು.ಕೊಟ್ಟ,ಮದಕರಿ ಉಂದೆಕ್ ಇಂಚಿನ ಪ್ರಾಯದಕ್ಲೆಗ್ ಬರ್ಪುನ ಪನ್ಪಿನ ಕಟ್ಟಿಜ್ಜಿ.

ಪಕ್ಷವಾತ , ಕಾಲೆ:-

ಕಾಲೆ ಹಾಕುನಿ ಪಂಡ ಮಾಯಾ ದೃಷ್ಠಿದ ದೋಷೊಲು.ದಾದಾಂಡಲ ವಾಕ್ ದೋಷ,ಶಾಪ  ಇತ್ತ್ಂಡ ಅಂಚಿನಕ್ಲೆನ ಕಾಲೆ ದಿಂಜ ದಿನ ಒರಿಯುಂಡು.ಆ ಕಾಲೆ ಬೇತೆಕ್ಲೆಗ್ ಹಾಕುಂಡು.ದುಂಬು ತೆರಿನಕುಲು ಈತ್ ದಿನತಾನಿ ಕಾಲೆ ಪೋವು,ನಿಕುಲು ಇಲ್ಲದ ಮಾಡ್ ದ ಮಡಲ್,ಮುಳಿ ತೆಲಪಾಲೆ,ಓಡು ದೆತ್ತ್ ದ್ ನಿಕುಲು ಅವೆಕ್ ಪೋಯೆರೆ ಸಾದಿ ಮಲ್ತ್ ಕೊರ್ಲೆ,ಅವು ಪೋಪುನ ದಿಕ್ಕ್ ಡ್ ನಿಕುಲು ಉಂತೊರ್ಚಿ,ಕುಲ್ಲೊರ್ಚಿ,ಜೆಪ್ಪೊರ್ಚಿ,ವ್ಯವಹಾರ ಮಲ್ಪೊಡ್ಚಿಂದ್  ಈತ್ ದಿನಮುಟ್ಟ ಕೆರಮ ಪಾಲಿಪುಲೆಂದ್ ಪನೊಂತೆರ್ಜಜನೊಕುಲು

 ನಾಗೆ 7ಕಂದೊಡಿಲೆನ್ ತಿಂದ್ ದ್ ಕರದ್ ಪಕ್ಕಿದಲೆಕ ಬಾನೊಡು ಕುತ್ತಡಿಯಾದ್ ರಾದ್ ಅವೆತ ನಿರೆಲ್ ನರಮಾನ್ಯನ,ಕಂಜಿ ಕೈಕಂಜಿಲೆ ಮಿತ್ತ್ ಬೂರುಂಡ ಅವೆಕ್ ಸರ್ರದ ಒಂಜಿ ಬರಿ ಸ್ವಾದೀನ ತಪ್ಪುಂಡು ಪಂಡ ಸರ್ರದ ಒಂಜಿ ಬರಿ/ಪುಡೆ ಬಲ ಇಜ್ಜಂದಿಲೆಕಾಪುಂಡು.ಉಂದೆನ್ ಪಕ್ಷವಾತಂದ್ ಲ ಪನ್ಪೆರ್. ಅವೆಟ್ ಮಿತ್ತ್ ಬೂರುನಕುಲು ಕಮ್ಮಿ.ಅಕ್ ಲ್ ಎಚ್ಚಾದ್ ಜೆತ್ತ್ ನೌಲೆ ನರಕ ಬತ್ತ್ ದ್ ಕರಿದ್ ಪೋಪೆರ್.ಇಂಚ ಕರಿದ್ ಪೋಯಿನಕ್ ಲೆ ನೆಲ ಕಾಲೆಂದ್ ಉಪ್ಪುಂಡು.ಈ ನೆಲ ಕಾಲೆ ಪಂಡ ಕಾಲೆ ಪೋನಗ ಮರತ ಪಜ್ಜಿ ಗೆಲ್ಲ್ ತುಂಡಾದ್ ಬೂರುಂಡು.ಕಾಲೆಗ್ ನರಮಾನಿ ಅಡ್ಡ ತಿಕ್ಕ್ಂಡ ಆಯಗ್ಲ ಲಕ್ವ ಹಾಕುಂಡು.ಉಂದೆನ್ ಕಾಲೆ ಹಾಕುನಿಂದ್ ಲ ಪನ್ಪೆರ್.ಅಂಚಾದ್  ಕಾಲೆ ಹಾಕ್ ದ್ ನೆಲ ಪತ್ತ್ ದ್ ಬಾರ್ಯಾತ್ ಕಾಲ ಜೆತ್ತ್ ದ್ ಇತ್ತ್ ದ್ ಕರಿದ್ ಪೋಯೆರ್ಡ ಅಕ್ಲೆ ಕಾಲೆ ಪೋನೇಟ ಇಲ್ಲದ ಜನ ಪಿದಯಿ ಓಲಾಂಡಲಾ ಉಪ್ಪುವೆರ್.ಇಂಚಿ ನೆಲ ಪತ್ತ್ ದ್ ತೀರ್ನ ಇಲ್ಲಲ್ ಅತ್ತಾಂದಿ ಪೊರ್ತುಗು ಜೋಕ್ಲೆನ್,ಜವನೆರೆನ್ ಇಲ್ಲದ ಕೈತಲ್ ಪೋಯೆರೆ ಬುಡ್ರೆ ಬಲ್ಲಿ.ಅಂಗಾರೆ ಸುಕ್ರಾರ ನೆಲ ಪತ್ತ್ ನಕುಲು ತೀರ್ದ್ ಪೋಯೆರ್ಡ ಅಕ್ಲೆನ ನೆಲಕಾಲೆದ ಉಪದ್ರ ಹೆಚ್ಚಾದ್ ಅಜನೆದಲೆಕ ಕೇನುಂಡು.ಅಂಚಾದ್ ಕಾಲೆ ಕರಿನೇಟ ಇಲ್ಲ್ ಬುಡ್ದು ಒರಿನಕುಲು ಪಿದಯಿ ಕುಟುಮದ ಒವ್ವಾಂಡಲ ಇಲ್ಲಲ್ ಉಂತೊಂತೆರ್.ನೆಗರ್ ನೆಗರ್ ದ್ ಕರಿದ್ ಪೋಯಿನಕ್ಲೆ ಕಾಲೆ ಸುಮಾರ್ 48 ದಿನ ಮುಟ್ಟ ಉಪ್ಪುಂಡುಗೆ.ಅಂಚನೆ ಕಾಲೆ ಇತ್ತ್ ನ ಇಲ್ಲಲ್ ಜೂವದ ಕಪ್ಪು ಕೋರಿನ್ ಕೆರ್ ದ್ ಮಾಡ್ ಡ್ದ್ ಕಡಪ ದಕ್ಕೊಂತೆರ್ ಗೆ.ಇಂಚ ಕಾಲೆ ಹಾಕುನ,ಕೊಟ್ಟ,ಮದಕರಿದ ದ ಬಗೆಟ್ ತುಳುವೆರೆನ ಕೆಲವೊಂಜಿ ನಂಬೊಳಿಗೆ ಇತ್ತ್ಂಡ್.