ಸಾದಗ ಸಾದ್ಯೆರ್

                   ‌     ಸಾದಗ ಸಾದ್ಯೆರ್

ಆಯಿನಾತ್ ಬೇಗ ಬರವು ಪ್ರಕಟ ಮಲ್ಪುವ.ಕಡೆಸ್  ನೆಕ್  ಮಾಪಿಪ್ಪಡ್

ಬೋಂಟ್ರ-ದೈವಾರಾದನೆದ ಒಂಜಿ ಚಾಕಿರಿ ವರ್ಗ

      ಬೋಂಟ್ರ-ದೈವಾರಾದನೆದ ಒಂಜಿ ಚಾಕಿರಿ ವರ್ಗ

           

 ಬಂಡಿದ ಬಲ್ಲ್ ಗ್ ಕೈ ಕೊರ್ದು ಬೋಂಟ್ರ ಬೈದ್ಯೆ ಕೋಳಗ ಕೊರ್ಪುನಿ. ಬೊಕ್ಕ ಬಲ್ಲ್ ಪತ್ತಿನ ಮಾತ ಬೈದ್ಯನಕುಲ್ ಕೋಳಗ ಕೊರ್ಪುನಿ. ಉಲ್ಲಾಕ್ಲೆನ ಸವಾರಿದ ಕುದುರೆದ ವಲಸಾರಿ ಬಂಡಿ.

ನಿಜವಾದ್ ದೈವದ ಬಂಡಿ ಕಲ ಮೀರಂದಿಲೆಕ ಪೋನಗ, ದೈವ ಬಂಡಿದ ಮಿತ್ತ್ ಕುಲ್ಲ್ ದಿತ್ತ್ಂಡ, ದೈವದ ಕಾರ ಗಗ್ಗರದ ಪರೆಲ ಸೊರೊ ಬೊಕ್ಕ ಸತ್ತಿಗೆದ ಅರ್ಲೋಲುದ ಸೊರೊ ಬೊಕ್ಕ ಬಂಡಿದ ಮರತ ಚಕ್ರದ ಸೊರೊ ಮಾತ್ರ ಕೇನೊಡು.ಅವು ಬುಡ್ದು ನರಮಾನಿ ಗೋವಿಂದ ಪಾಡುನ ಕಟ್ಟ್ ದುಂಬಿಜ್ಜಾಂಡ್.ಆ ಗೋವಿಂದ ದೇವೆರೆಗ್ ಸರಿ,ದೈವೊಲೆಗತ್ತ್.

                                      ಸತ್ತಿಗೆ

     ಬೋಂಟೆ ಸಂಸ್ಕೃತಿ ತುಳುನಾಡ ದೈವಾರಾದನೆಡ್ ನೆಗತ್ ತೋಜುಂಡು.ಕೆಲವೊಂಜಿ ರಾಜಂದೈವೊಲು,ಕೆಲವೊಂಜಿ ಅರಸು ದೈವೊಲು ಬಿರು ಪಗರಿ ಪತ್ತೊಂದು ವಲಸಾರಿ ಪೋಪುನವೇ ಉಂದೆಕ್ ಸಾಗ್ಸಿ.ಅಂಚನೆ ಸಾದಗ(ಸಾದಗ ಸಾದ್ಯೆರ್ ಪಂಡ ದಂಡ್ ಜಯಿತೆರ್)ವಲಸಾರಿ,ಕಲರಿ,ಗರಡಿ ಸಾಧನೆ,ಬಂಟೆ(ಭಟ,ಯೋಧ)ಒಂಜೆಕೊಂಜಿ ಸಮ್ಮಂದ ಉಂಡು.ವಲಸಾರಿಡ್ ಎಚ್ಚಾದ್ ದರಿ  ಉಪ್ಪುಂಡು.ಅರಸು ದೈವೊಲ್ನ ವಲಸಾರಿಡ್ ಒಂಜಿ ಕೈಟ್ ಕಡ್ಸಲೆ,ಕುಡೊಂಜಿ ಕೈಟ್ ಬಿರು ಪಗರಿ ಉಪ್ಪುಂಡು.ಆಂಡ ಸಾದಗೊಡು ದೈವೊಲು ಕಟ್ಟಿ ನೇಮೊಡು ಇಜ್ಜಾಂದೆ ಮಾನಿನಕ್ಲೆ ವಸಾಯ ಉಪ್ಪುಂಡು.ಕಡ್ಸಲೆ ನಾಲ್ ತಿಕ್ ಗ್ ಬೀಜಾವೊಂದು ಪೊರ್ಂಬಾಟದ ಕಲ್ಪನೆನ್ ತೋಜಾವೆರ್,ದಂಡ್ ಜಯಿತ್ ನೆನ್ ತೋಜಾವೆರ್.ಒಂಜಿ ಕಾಲೊಡು ಬೋಂಟೆ ದೇರ್ರೆ ತಾಕತ್ತ್ ದಕ್ ಲಾದಿತ್ತ್ ನ ಬಿರುವೆರ್ ಗಲಸೊಂತಿನ ಬಿರು ಪಗರಿ ಕಾಲ ಬದಲಾಯಿಲೆಕ ಕಾಪುದ(ರಕ್ಷಣೆದ) ಸೊತ್ತಾದ್ ಬುಳೆದ್ ಬತ್ತ್ಂಡ್.ದುಂಬುಗು ಕಲೊಟು ಪೊರ್ಂಬೆರೆ ಬಿರು ಪಗರಿ ಗಳಸೆರೆ ಸುರು ಮಲ್ತೆರ್.ಕಾಡ ಮುರ್ಗೊಲೆರ್ದ್ ಆವೊಂತಿ ಬಾದಗೊನು ಉಂತಾಯಿನ ಬೋಂಟೆ ದೇರಿ ಬಿರುವೆರೆನ್ ಬೋಂಟ್ರ ಪಂಡ್ ದ್ ಲೆತ್ತೆರ್.ಕಾರ್ಲ ಬೋಲ್ತೇರ್ ಡ್ ಬೋಂಟ್ರ ತರವಾಡ್ ಲಿತ್ತ್ ದ್(ಮನೆತನ) ಅವು ಪಟ್ಟದ ಪುದರಾದ್,ಜಾತಿದ ಪುದರಾದ್ ಒರಿದ್ಂಡ್.ಈ ಬೋಂಟ್ರ  ಸವ್ದ ಪೂಜಾರಿ ಜಾತಿಡ್ ಮಾತ್ರ ತೂಯೆರೆ ತಿಕ್ಕುನಿ.ಕಾಲ ಕರಿಲೆಕ ಬಿರುವೆರ್ ಬೆನ್ನಿ ಸಾಗೊಳಿನ್ ಒರಿಪೆರೆ ಬಿರು ಪಗರಿನ್ ಒರಿತೊಂಡೆರ್.ಬಿರುವೆರ್ ಬೆನ್ನಿ ಸಾಗೊಳಿಡ್ ಬಿರ್ಸೆರಾದಿತ್ತ್ ದ್ ಮಲ್ಲ ಮಲ್ಲ ಬೆನ್ನಿ ಸಾಗೊಳಿ ಮಲ್ತೊಂತಿ ಬಿರುವೆರೆ ಇಲ್ಲಗ್ ನಟ್ಟಿಲ್ಲ್ ಪನ್ಪಿ ಪುದರ್ ಇತ್ತ್ಂಡ್.ಈ ಇಲ್ಲದ ಪುದರ್ ಬಿರುವೆರೆ ಇಲ್ಲಗ್ ಮಾತ್ರ ಉಪ್ಪುನಿ.ತುಳುನಾಡ್ ಡ್ ಅರಸೊಳಿಗೆ ಬತ್ತಿ ಬೊಕ್ಕ ಅರಂತಡೆ,ಬೂಡು,ಮಾಗಂದಡಿ/ಮಾಗಣೆ,ಗುತ್ತು,ಬರ್ಕೆ,ಬಾವ,ಪರಾರಿ ತ್ತಿ ಬೊಕ್ಕ ನಟ್ಟಿಲ್ಲ್ ದ ತೆರಣ ಕಮ್ಮಿಯಾವೊಂದು ಪೋಂಡು.ಆಂಡಲ ಗುತ್ತು ಬರ್ಕೆದ ಮಾನಾದಿಗೆ ಮೊಕ್ಲೆಗ್ಲ ತಿಕ್ಕ್ಂಡ್.ಈ ಆಡಳ್ತೆ ವ್ಯವಸ್ಥೆ ಬತ್ತಿ ಬೊಕ್ಕ ಮೊಕ್ಲೆಗ್ ಗುತ್ತು ಬರ್ಕೆದ ಮಾನಾದಿಗೆದ ನಾಯ್ಗ/ನಾಯಕ ಸ್ಥಾನಲ ತಿಕ್ಕ್ಂಡ್.ಅಂಚನೆ ಗುತ್ತುಲು ಬೇತೆ ಬೇತೆ ಜಾತಿಲೆಗ್ ಪದ್ ರ್ದ್ ಪೋಂಡು.ಬೆನ್ನಿ ಸಾಗೊಳಿದ ನಟ್ಟಿಲ್ಲ ತೆರಣ ಕಮ್ಮಿಯಾವೊಂದು ಬನ್ನಗ ಪುಲ ಮರ್ದ ದ ವೈದ್ಯ ವೃತ್ತಿ ಮಲ್ತೊಂತಿ ಮೊಕ್ಲೆಗ್ ಬೈದ್ಯೆರ್ ಪನ್ಪಿ ಪುದರಾಂಡ್.ಅಮುರ್ತ ಗುಣತ ಕಲಿನ್ ತಾರಿಡ್ದ್ ಮೂರ್ತೆ ಮಲ್ತ್ ದೆತ್ತ್ ದ್ ಅವೆನ್ ಮರ್ದ್ ಗ್ ಗಲಸೊಂತೆರ್. ತುಳುನಾಡ ಜನಮಂದೆ ಗಲಸೊಂತಿ ಕಲಿನ್ ಕಾಲ ಕರಿಲೆಕ ಅಮಲಾದ್ ಪರ್ಪುಲೆಕಾಂಡ್.ಅಪಗ ಮೊಕ್ಲು ಎಚ್ಚ ಎಚ್ಚ ಮೂರ್ತೆ ಮಲ್ಪೆರೆ ಸುರು ಮಲ್ತೆರ್.ಸುರು ಸುರುಕು ಪರ್ಪುನವು ಏಸಿಗೆಂದಾಯಿಜಿ.ದಾಯೆ ಪಂಡ ಕಲಿ ಮರ್ದ್ ದ ಸೊತ್ತಾದಿತ್ತ್ಂಡ್.ಏಪ ಪುಲಮರ್ದ್ ದ  ಅಮುರ್ತಸಮವಾಯಿನ ಕಲಿ ಅಮಲ್ ದ ಸೊತ್ತಾಂಡ ಆನಿರ್ದ್ ಬೊಕ್ಕ ಅಮುರ್ತ ಅಮಲ್ ದ ಸೊತ್ತಾಂಡ್.ಉಂದೆಡ್ದಾದ್ ಈ ಜನಾಂಗೊಗು ಬಾರೀ ಒಡಕಾಂಡ್.ತುಳುನಾಡ್ ಡ್ ಮಾತ ಇದ್ಯೆಡ್ಲ ಬಿರ್ಸೆರಾಯಿ ಬಿರುವೆರೆನ್ ಒವೆಟ್ಲ ಸೋಪಾಯೆರೆ ಆಯಿಜಿಂದಾನಗ ಕಲಿಮಾರುನ ವೃತ್ತಿನ್,ಮೂರ್ತೆನ್ ಮೊಕ್ಲೆ ಕುಲ ಕಸುಬು ಪಂಡ್ ದ್ ಮಾನಸಿಕವಾದ್ ಮೊಕುಲು ನರ್ಗುಲೆಕಾಂಡ್. ಮೂರ್ತೆ ಒಂಜಿ ವೃತ್ತಿಯೇ ವಿನಃ ಅವು ಜಾತಿವಾಚಕ ಸವ್ದ ಅತ್ತ್ . ದೈವದ ಪೂಜಾರ್ಮೆದ ಪೂಜಾರಿ ವೃತ್ತಿಡ್ದಾದ್  ದುಂಬುಗು ಅವು ಜಾತಿವಾಚಕ ಪದ ಆದ್ ಪೂಜಾರಿ ಜಾತಿಂದಾಂಡ್.ಆಂಡ ಅನಾದಿಡೇ ಸ್ವತಂತ್ರವಾದ್ ದೈವಾರಾದನೆ ಮಲ್ತೊಂತಿ ಮೊಕ್ಲೆನ ಇಚಾರ ದೈವೊಲೆ ಸಂದಿಲೆಡ್ಲ ತೂಯೆರೆ ತಿಕ್ಕುವ. ದೈವಾರಾದನೆಗ್ ಮೂಲ ಪೂಜಾರ್ಮೆ ಚಾಕಿರಿದ ಪೂಜಾರಿಲಾದ್,ಬೆನ್ನಿ ಸಾಗೊಳಿದ ನಟ್ಟಿಲ್ಲ ಪೂಜಾರಿಲಾದ್ ಬಿರುವೆರ್ ತುಳುನಾಡ್ ಡ್ ಪುಗಾರ್ತೆನ್ ಪಡೆತೆರ್.ದೈವೊಲೆಡ್ ಪೂಜಾರ್ಲೆಗ್ ಒಲಿಯಂದಿ ತುಳುನಾಡ ದೈವೊಲಿಜ್ಜ.ದಾಯೆ ಪಂಡ ಅಮುರ್ತ ತುಳುನಾಡ ದೈವೊಲೆಗ್ ಬೋಡೇ ಬೋಡು‌.ಅಂಚನೆ ದೈವೊಲೆನ ಜಾಸ್ತಿ ಪಟ್ಟಿಯಾಯಿನಕುಲುಲ ಅಕುಲೆ ಆದುಲ್ಲೆರ್.

ಕೆಲವೆರ್ ಪ್ರಾಣಿ ಮೂಲದ ದೈವೊಲಿಜ್ಜಿ ಪನ್ಪೆರ್.ಆನಿದ ಕಾಲೊಡು ಬೆನ್ನಿ ಸಾಗೊಳಿ ಸುರು ಮಲ್ಪುನಗ ಗಳಸ್ ನ ಎರ್ಲೆನ್ ಇನಿ ನಮ ದೈವದ ಕಲೊಟು ಮೈಸಂದಾಯೆ ದೈವವಾದ್ ಮಾನಿತೊಂದ.ಕುಡುನು ಅವೆಕ್ ಆವಾರಾದ್ ಕೊರ್ಪ ಪನ್ಬಗ ಅವು ಪ್ರಾಣಿ ಸಮ್ಮಂದಿ ದೈವಂದ್ ಪನೊಡಾಪುಂಡು.ಪಂಜುರ್ಲಿನ ಆರಾದನೆಡ್ ತಡ್ಪೆಡ್ ರಡ್ಡ್ ತಾರಾಯಿದ ಗಡಿ ದೀದ್ ದೈವೊಗು ಪೊರಿ ಪಾರಾವುನವು ಪಂಜುರ್ಲಿ ದೈವ ಪ್ರಾಣಿ ಮೂಲದ ದೈವಂದ್ ತೆರಿಪಾವುಂಡು.ಲೆಕ್ಕೆಸಿರಿನ ಆರಾದನೆಡ್ ಮಾಸದೊರುಂದು ಎನ್ನಿದ್ ಐರೋಲು ನೇರೋಲುಂದು,ಬಾರೆದ ಬಂಬೆ ಗಲಸ್ ದ್ ಪಾರಾವುನ ಇಂಡಿ ಲೆಕ್ಕೆಸಿರಿ ಪ್ರಾಣಿ ಮೂಲದ ದೈವಂದ್ ತೆರಿಪಾವುಂಡು.ಪಂಜುರ್ಲಿ,ಮೈಸಂದಾಯೆ,ಪಿಲ್ಚಂಡಿ,ಲೆಕ್ಕೆಸಿರಿ,ಗುಳಿಗೆ ಮೊಕ್ಲು ಪ್ರಾಣಿ ಮೂಲದ ದೈವೊಲು.ಅವೆತ ಮುಗತ ರಚನೆಲ ಪ್ರಾಣಿದ ಒರುಟೇ ಉಪ್ಪುಂಡು.ಪಂಜುರ್ಲಿನ ನೇಮದ ಸುರುತ ಬಾಗ ಪಂಜಿದಲೆಕನೆ ಮುರ್ಲುನ,ಉರ್ಡುನ,ಪುಡೆರುನ ಪೂರ ತೋಜುಂಡು.ಅಣಿ ಕಟ್ಟಿ ಬೊಕ್ಕ ಪ್ರಾಣಿದ ಒರು ಪೋದು ನರಮಾನಿಯೊರುತ ದೈವ ಆದ್ ಅಭಯ ಕೊರ್ಪುಂಡು.ಬೆನ್ನಿ ಸಾಗೊಳಿನ್ ಒರಿಪೆರೆಗಾದ್ ತುಳುವೆರ್ ಬೋಂಟೆ ದೇರ್ಯೆರ್.ಈ ಬೋಂಟೆದ ಬಿರ್ಸೆರೆನ್ ಬೋಂಟ್ರೆಂದ್ ಲೆತ್ತೆರ್.ಅಂಚನೆ ತುಳುನಾಡ ಒವ್ವೇ ದೈವೊಗು ಅಮುರ್ತ ಕೊರೊಡಂಡ ಪೂಜಾರಿಲೆ ಆವೊಡು.ಬೈದ್ಯೆರೆ ಗರೊಡಿಲೆಗ್,ಬೆಮ್ಮೆರೆ ಗುಂಡದುಲಯಿ ಅಕ್ಲೆನ ಚಾಕಿರಿಯೆ ನಡತೊಂತ್ ನಿ.ಪೂಜಾರಿಲ್ನ ಹಿರಿಯಾಕ್ಲೆಡ ನಿಕ್ಲೆನ ಕುಲ ಕಸುಬು ದಾದ ಕೇಂಡ ಮೂರ್ತೆ ಮೂರುನಂದೇ ಪನ್ಪೆರ್.ನಿಜವಾದ್ ಅವೊಂಜಿ ಅಕ್ಲೆನ ಉಪಕಸುಬಾತೆ.ಕರ  ಮೂಲ್ಯೆರೆಗ್ ಕರ ಬಿಸಲೆ ಮಲ್ಪುನ ಒಂಜಿ ವೃತ್ತಿಯಾಂಡ, ಸಪಲ್ಯೆರೆಗ್ ಗಾಣದ ಕೊಟ್ಯದ ಒಂಜಿ ವೃತ್ತಿಯಾಂಡ ಪೂಜಾರಿಲೆಗ್ ಒಂಜಿ ವೃತ್ತಿ ಪನ್ಪುನವಿಜ್ಜಿ.ಆಂಡ ಪೂಜಾರಿನಕ್ಲೆಗ್ ಇಂಚಿತ್ತ ನವೇ ನಿರ್ದಿಷ್ಟ ಕಸುಬುಂದು ಇಜ್ಜಿ.ಅಕ್ಲೆನ್ ಬಾರ್ಯಾತ್ ಕಸುಬುಲೆಡ್ ಸಮಾಜ ಗುರ್ತ ಪತ್ತ್ ದ್ಂಡ್. ಬೆನ್ನಿ ಸಾಗೊಳಿದ ನಟ್ಟಿದ ಕಸುಬು,ಪುಲ ಮರ್ದ್ ದ ಬೈದ್ಯ ಕಸುಬು,ದೈವಾರಾದನೆದ ಪೂಜಾರ್ಮೆ/ಪೂಜಾರಿನ ಕಸುಬು,ಬೋಂಟೆದ ಬೋಂಟ್ರ ಕಸುಬು,ಬಿರು ಪಗರಿ ಪತ್ತ್ ದ್ ಪೊರ್ಂಬಾಟ ಮಲ್ತಿ ವೀರ ಯೋದೆರೆ ಕಸುಬು,ಅಡಳ್ತೆದ ನಾಯ್ಗೆರೆ/ನಾಯಕೆರೆ ಕಸುಬು ಉಂದೆನ್ ಪೂರ ತೂನಗ ಅಕ್ಲೆನ್ ಒಂಜಿ ನಿರ್ದಿಷ್ಟ ಚಾಕಿರಿಡ್ ಗುರ್ತ ಪತ್ತೆರೆ ಸಾದ್ಯ ಇಜ್ಜಿ.

           ಬೋಂಟ್ರ ಪನ್ಪಿ ಪೂಜಾರಿ ಮನೆತನದ ಒಂಜಿ ಚಾಕಿರಿ ವರ್ಗ ತುಳುನಾಡ ಕೆಲವು ಊರುಲೆಡ್ ತೂಯೆರೆ ತಿಕ್ಕುಂಡು.ದೈವ ಲೆಪ್ಪುನಗ ಬೋಂಟ್ರನಕ್ಲೆನ್ಲ ಲೆಪ್ಪುಂಡು.ಬರ್ಕೆದಲೆಕನೆ ದೈವದ ಕಲೊಟು ಮೊಕ್ಲೆಗ್ ಮಾನಾದಿಗೆ ಉಂಡು.ಬಂಟ್ವಾಳ ತಾಲೂಕುದ ಗಡಿಯಾರದ ಕೈತಲ್ದ ಕೆದಿಲದ ರಾಜಂದೈವದ ಸನ್ನಿದಿಡ್ ಬೋಂಟ್ರನಕ್ಲೆನ್ ದೈವ ಲೆಪ್ಪುನತ್ತಂದೆ ಮೊಕ್ಲು ಮೂಲು ದೈವದ ಚಾಕಿರಿಗ್ ಕೈ ಸೇರ್ವೆರ್.ಕಾರ್ಲದ ಕೆಲವು ಕೋಡಿಲೆಡ್ ಬೋಂಟ್ರನಕ್ಲೆ ಚಾಕಿರಿ ದೈವದ ಕೊಡಿಯಡಿಟ್ ತೂಯೆರೆ ತಿಕ್ಕುಂಡು.ಮೂರ್ತೆದ ಅಮುರ್ತೊಗು/ಕಲಿಕ್ ದಯವದ ಕಲೊಟು ಪಲ್ಲೆಂಕಿದ ಮಾನಾದಿಗೆ ಉಂಡು.ಉಜಿರೆದ ಕೈತಲ್ದ ಮುಂಡಾಜೆದ ಮೂರ್ತಿಲ್ಲಾಯ ದೈವ(ಲೆಕ್ಕೆಸಿರಿ)ದ ನೇಮೊಗು ಆ ದೈವೊಗು ಸಮ್ಮಂದಪಟ್ನ ಬೋಂಟ್ರ ಮನೆತನದ ಇಲ್ಲಲ್ ರ್ದ್ ಅಮುರ್ತೊನು/ಕಲಿನ್ ಪಲ್ಲೆಂಕಿಡ್ ಕನಪುನಿ.ಅಪಗ ಅಕ್ಲೆನ ಮಾನಾದಿಗೆ ಏತ್ಂದ್ ತೆರಿಯೊನೊಲಿ.

  ದುಂಬುದ ಕಾಲೊಡು ಬೋಂಟೆಗ್ ಪೋಯಿನಕುಲು ಬಿರ್ಸೆರ್.ಉಂದೆಟ್ ಪೂಜಾರಿ ವರ್ಗದ ಮೊಕ್ಲು ಇತ್ತ್ ನೆಡ್ದಾದ್ ಬೋಂಟೆ ದೇರುನ ಮೊಕ್ಲೆನ್ ಬೋಂಟ್ರೆರ್ಂದ್ ಲೆತ್ತೆರ್.ಮೊಕ್ಲೆಗ್ ದೈವದ ಕಲೊಟು ಸ್ಥಾನ ಮಾನ,ಕೊರ್ಯೆರ್‌ ಅಕ್ಲೆನ ಇಲ್ಲ್ ಗ್ ಮರ್ಯಾದಿದ ಇಲ್ಲ್ ದ ಸ್ಥಾನ ಮಾನ ಕೊರ್ಯೆರ್.

     ಪಂಜುರ್ಲಿನ ಪಾಡ್ದನೊಡು ಇಂಚ ಬರ್ಪುಂಡು,ವರ್ಸೊಗೊರ ಪೋಯೆರ್ ಮಾಲಕರಿಯದ(ಮಾಲಯ ಅಮಾಸೆ,ಮಾಲಯ ಕಾರ್ಯ/ಮಹಾಲಯ ಕಾರ್ಯ.ಮಾಲರಿಯದ ಚಾಕಿರಿ ಕೆಲವೊಂಜಿ ರಾಜಂದೈವದ ಬಂಡಾರದಿಲ್ಲಲ್ ನಡಪುಂಡು)ಬೋಂಟೆ,ಈಸರೆ ದೇರೊಂದು ಪೋಪುನಿ.ಮಾಲ ಕರಿಯ ಕರಿಪುನೆನ್ ಕೆಲವೊಂಜಿ ಜೈನ ಮಡತ್ತಾನೊಲು ಇನಿಕ್ಲಾ ಒರಿತೊಂದು ಬೈದೆರ್. ಮೊಕ್ಲು ಬೋಂಟೆಗ್ ಪೋಯಿ ಪನ್ನಗ ಬೋಂಟೆಗ್ ಏರ್ ಕೂಡೊಡು,ಏರ್ ಮದಿಪೊಡು ಪನ್ನಗ, ಏರಿತ್ತ್ಂಡ ದಾನೆ ನಾಯಿ ದಾಂತಿ ಬೋಂಟೆ ಅತ್ತ್ಂದ್ ಪನ್ಪೆರ್.ನಾಯಿನ್ ಕನಯೆರೆ ನಾಯಿದ ಮಲ್ಲೋಡಿಗ್ ಗಟ್ಟದ ಮಿತ್ತ್ ಓಲೆ ಕಡಪುಡುವೆರ್.ಆಯೆ ಸಾವಿರ ನಾಯಿಲೆನ್ ಕನಪೆಗೆ.ಕಪ್ಪುದ ಕಾಲು ನಾಯಿಲೆಗ್ ಕಜೆರಿತ ನುಪ್ಪು,ಬೊಲ್ಲು ನಾಯಿಲೆಗ್ ಬೊಲಿಯರಿತ ನುಪ್ಪು ಪಾಡುವೆರ್.ಕರಿಯಂದ ಕಾಜೆ,ಬೋಂಟೆಂದ ಬೊಲ್ಲುಂದು ನಾಯಿಲೆಗ್ ಪುದರ್ ದೀಪೆರ್.ಬೆಡಿ ಪತ್ತಿ ಬೆಡಿಕರೆ/ಬೇಡವೆ ಬೋಡು,ಬಿರು ಪತ್ತಿ ಮುಗೇರೆ ಬೋಡು,ಒಂಜಿ ತಿಕ್ ಡ್ ದೈವ ಬಲ್ಲವೆರ್ಂದ್ ತೆರಿನಾಯನ್ ಲೆಪ್ಪುಂಡು.ಜೈನಾಡಳ್ತೆ ಕಾಲೊಡೆ ಬಲ್ಲವೆರೆ ವಂಶ ದುಂಬೊತ್ತೊಂದು ಪೋಂಡು.ಬಿರು ಪತ್ತ್ ನಾಯೆ ಬಿರುವೆಂದಾಂಡ್.ಬಿರು ಪಂಡ ಅಕ್ಲೆನ ಸೊಂಟೊಡಿಪ್ಪುನ ಕತ್ತಿದಂಚಿನ ರಚನೆಂದ್ ಲ ಪನ್ಪೆರ್.ಅವೆನ್ ತೊಡಂಕ್ಂದ್ ಲ ಪನ್ಪೆರ್.ಸಪಲ ಪತ್ತ್ ನಾಯೆ ಸಪಲಿಗೆಂದಾಂಡ್.ಪಗರಿದಲೆಕ ಕೊಡಿ ದೂಂಚಿ ಇತ್ತ್ ನ ಬರ್ಚಿನ್ ಸಪಲ/ಸಬಲ ಪನ್ಪೆರ್.ಕೋಟಿ ಚೆನ್ನಯೆರ್ ಸುರಿಯ ಕುತ್ತೊನುನೆನ್ ಸೇಟ್ಂದ್ ಪನ್ಪೆರ್. ಅವೆತ ಇಚಾರ ದಾದಂದ್ ಗೊತ್ತಾವೊಂದಿಜ್ಜಿ.ಈಶ್ವರನ ಶಾಪ,ಪಾರ್ವತಿನ ಫಲಂದ್ ಪಂಜುರ್ಲಿನ ಸಂದಿಡ್ ಬರ್ಪುಂಡು.ಪಂಜುರ್ಲಿನ ಸಂದಿಡ್ ಬರ್ಪುನ ಬೋಂಟೆದ ಮಾನಿಲೆ ಬಗೆಟ್ ತೆರಿಲೆಕನೆ ಬೋಂಟೆದ ಬಿರ್ಸೆ ಬೋಂಟ್ರನ ಬಗೆಟ್ಲ ತೆರಿಲೆಕಾಂಡ್.

ದೇವೆರೆ ಬ್ರಹ್ಮ ಕಲಶ ತುಳುನಾಡ ದೈವಾರಾದನೆಗಿಜ್ಜಿ

 ದೇವೆರೆ ಬ್ರಹ್ಮಕಲಶ ಚರವಾಯಿನ ದೈವಾರಾದನೆಗಿಜ್ಜಿ 

 ಸುತ್ತಲ ಕಲಶೊಲು,ನಡುಟು ಮಲ್ಲ ಕಲಶ ಬ್ರಹ್ಮ ಕಲಶ

  ದೇವೆರೆ ಆರಾದನಾ ಕೆರಮನೇ ಬೇತೆ.ದೈವೊಲೆ ಆರಾದನಾ ಕೆರಮೊನೇ ಬೇತೆ.ಮಂತ್ರ ಮುಖೆನ ಪೂಜೆ,ಷೋಡಷೋಪಚಾರ ದೇವೆರೆ ಆರಾದನೆಯಾಂಡ,ಪದಿನಾಜಿ ಕಟ್ಲೆ ಸಂದಿ ಪಾಡ್ದನದ ಒರುಟು ನಡಪುನವು ದೈವಾರಾದನೆ.ದೇವೆರೆ ಆರಾದನೆನ್ ದೇವೆರೆ ಆರಾದನೆಯಾದೇ ಮಲ್ಪುಗ,ದೈವದ ಆರಾದನೆನ್ ದೈವದ ಆರಾದನೆದ ಕೆರಮೊಡೆ ಮಲ್ಪುಗ.ದೇವೆರೆ ಆರಾದನಾ ಕೆರಮೊನು,ಅಷ್ಟಮಂಗಲ ಪ್ರಶ್ನೆ ಚಿಂತನೆನ್,ಬ್ರಹ್ಮ ಕಲಶೊನು ದೈವಾರಾದನೆಗ್ ಕನಪುನ ಬೊಡ್ಚಿ.ದೈವದ ಅಣಿತ ಒರು,ಜೀಟಿಗೆ,ದಂಡಮಾಲೆಲೆನ್ ದೇವೆರೆ ಆರಾದನಾ ಕೆರಮೊಲೆಗ್ ಕನಪುನ ಬೊಡ್ಚಿ.

   ದುಂಬು ನಾಗ ಮಂಡಲ ಸುರಾನಗ ಅವ್ಲು ಪಂತೊಲು ನಡತೊಂತ್ ಲೆಕ ತೋಜೊಂತ.ಪಂಡ ಅಲ್ತ್ ರ್ದ್ ನಮ್ಮ ಜಾಸ್ತಿ ಉಪ್ಪೊಡುಂದು ಪಂತೊಡು ಮಲ್ತೊಂತೆರ್.ಇನಿ ಅಷ್ಟಮಂಗಲ ಪ್ರಸ್ನೆ ಚಿಂತನೆಲು ಅವ್ವೇ ಸಾದಿಡ್ ಪೋವೊಂದುಲ್ಲ.ಅವ್ಲು ಆತ್ ದಿನತ ಪ್ರಶ್ನೆಗೆ,ಮೂಲು ಅಲ್ತ್ ಜಾಸ್ತಿ ಆವೊಡು,ಅವ್ಲು ಆತ್ ದಿನತ ಬ್ರಹ್ಮ ಕಲಶಗೆ,ಮೂಲು ಅಲ್ತ್ ಜಾಸ್ತಿ ದಿನ ಆವೊಡುಂದು ಪಂತ ನಡತೊಂದುಂಡು.ದೈವದ ಕಲೊಕು ಅಗತ್ಯ ಇಜ್ಜಿಂಡಲ ಬಿರ್ಸಾದಿಗೆ ತೋಜಾಯೆರೆ ಪೋದು ಇನಿ ದೈವದ ಮೂಲ ಪುದರುಲು ಮಯಕಾದ್ ಕೇರಳದ ಪ್ರಶ್ನೆ ಚಿಂತನೆದಕುಲು ಪಂಡಿ ಪುರಾಣದ ಪುದರ್ ಲೆನ್ ದೈವೊಗು‌ ದೀದ್ ಹಿರಿಯಾಕ್ಲ್ ದೀನ ಪುದರ್ ಮದತ್ ದ್ ಪೊಸತ್ ನ್ ತೋಡುನ ಮರ್ಲ್ ಡ್ ಪರತ್ ನ್ ನಿಗಿತ್ ಬುಡ್ಯ.ನಮ್ಮ ಊರ್ದ ಬಲ್ಯಾಯೆರ್,ಜೋಯಿಸೆರ್ ನಂಕ್ ಬೊಡ್ಚಿ,ದೂರದ ಕೇರಳದ ಪ್ರಶ್ನೆ ಚಿಂತನೆದಕ್ಲೆ ನಂಕ್ ಬೋಡು.ಅಕ್ಲೆ ಕ್ರಮೊನು ನಮ್ಮ ದೈವಾರಾದನೆಗ್ ಅಕ್ಲ್ ಕನನಗಲ ಮನಿಪಂದೆ ಕುಲ್ಯ.ನಮ್ಮ ಅರಸುದೈವೊಲ್ನ,ರಾಜಂದೈವೊಲ್ನ ಒರಿನ ದೈವೊಲ್ನ ಕೆರಮ ಬೇತೆ ಬೇತೆ ಇತ್ತ್ಂಡಲ ಅಕುಲು ಅವೆನ್ ಅಕ್ಲೆ ಅಲಚನೆದಲೆಕ ಒಂಜೇ ಮಲ್ಪೆರೆ ಪಿದಡೊಂದುಲ್ಲೆರ್.ತಗೆ ತಂಗಡಿನ ಒರುತ ಕಲ್ಲುರ್ಟಿ ಪಂಜುರ್ಲಿನ್ ಬೇತೆ ಬೇತೆ ಕೋಣೆಡ್ ಕುಲ್ಲಾವೊಂದುಲ್ಲೆರ್. ಪಂಜುರ್ಲಿನ ಬಲತ ಬಾಗೊಡು ಕುಲ್ಲೊಡಾಯಿನ ಕಲ್ಲುರ್ಟಿನ್ ಎಡತ ಬಾಗೊಡು ಕುಲ್ಲಾಯೆರೆ ಪನ್ಪೆರ್.ಎಡತ ಬಾಗೊಡು ಕುಲ್ಲವುನೆತ ಅರ್ಥ ಬೇತೆನೇ ಆಪುಂಡು.

         ಬ್ರಹ್ಮ ಪಂಡ ಮಲ್ಲ ಪನ್ಪಿನ ಅರ್ಥ ಉಂಡು.ಕಣ್ಣ್ ಗ್ ತೋಜಂದಿನ,ಗೇನೊಗು ಎಕ್ಕಂದಿನ ,ಕೈಕ್ ತಿಕ್ಕಂದಿನ ಒಂಜಿ ಸಗ್ತಿ ಉಂಡು.ಉಂದೆನ್ ಬ್ರಹ್ಮ ಪನ್ಪೆರ್.ಮೂಲು ಬ್ರಹ್ಮಕಲಶದ ಕಲ್ಪನೆಲ ಅಂಚನೆ.ಮಸ್ತ್ ಎಲ್ಯೆಲ್ಯ ಕಲಶೊಲಿತ್ತ್ ದ್ ಒಂಜಿ ಕೊಡಪಾನ ಗಾತ್ರದ ಕಲಶ ಉಪ್ಪುಂಡು.ಮಾತ ಕಲಶದ ನೀರ್ ದೇವೆರೆ ಮೂರ್ತಿಗ್ ಪಾಡಿ ಬೊಕ್ಕ ಕಲಶೊಲೆಡ್ ಮಲ್ಲ ಕಲಶ ಆಯಿನ ಬ್ರಹ್ಮ ಕಲಶದ ನೀರ್ ನ್ ಮೈಪುವೆರ್.ದೇವೆರೆಡ್ ತ್ರಿಮೂರ್ತಿಲೆಡ್ ಒರಿ ಆಯಿನ ಬ್ರಹ್ಮಗ್ ಆರಾಧನೆ ಇಜ್ಜಿ.ಆಂಡ ಮೂಲು ಮಾತ್ರ ಬ್ರಹ್ಮನ ಪುದರ್ ತೂಯೆರೆ ತಿಕ್ಕುಂಡು.ಬೊಕ್ಕ ಒರಿನಂಚ ತುಳುನಾಡ ಅಮರ್ ಬೊಳ್ಳಿಲಾಯಿನ ಕೋಟಿ ಚೆನ್ನಯೆರೆ ನಡುಟಿತ್ತ್ ನ ಬೆಮ್ಮೆರೆನ್ ಇನಿ ಬ್ರಹ್ಮ ಪನೊಂದುಲ್ಲೆರ್.ನಿಜವಾದ್ ಬೆಮ್ಮೆರ್ ಬೈದೆರ್ಲುಂದು ಪನೊಡು ವಿನಃ ಬ್ರಹ್ಮ ಬೈದೆರ್ಂದತ್ತ್.ದೇವೆರೆಗ್ ಮಾತ್ರ ಬ್ರಹ್ಮ ಕಲಶ.ದಾಯೆ ಪಂಡ ದೇವೆರೆ ಗುಂಡದುಲಯಿ ಉಪ್ಪುನಿ ಹೆಚ್ಚಾದ್ ಕಲ್ಲ್ ದ ಮೂರ್ತಿಲು.ದಿನೋಲ ಪಂಚಾಮೃತ ಅಭಿಷೇಕ ಮಲ್ತ್ ದ್ ಮೂರ್ತಿಲು ತರೆದ್ ಪೋನಗಬಿಂಬ,ಪೀಠ ಜೀರ್ಣಾವಸ್ಥೆಗ್ ಪೋನಗ,ಮಂಟಮೆ,ಗರ್ಬಗುಡಿ,ಪಾಣಿ ಪೀಠೊಲೆಡ್ ಒಡಕ್ ತೋಜಿದ್ ಬನ್ನಗ, ಸ್ಥಿರ ಬಿಂಬೊಲೆಡ್ ಅಷ್ಟ ಬಂದ ನಾಶ ಆದ್ ಪೋನಗ,ದೇವೆರೆ ಬಿಂಬ ಪಾಣಿಪೀಠೊನು ಗೋಡ್ಯಾವುನ ನಾಳ(ಬಂಗಾರ್ದ ಒಂಜಿ ಸರಿಗೆ.ಬುಮಿದಡಿಟ್ ಪಾಡಿ ನಿದಿ ಕುಂಬೊರ್ದು ಪಾಣಿ ಪೀಠ,ಬಿಂಬದಡೆಮುಟ್ಟ ಆ ನಾಳ ಉಪ್ಪುಂಡು.)ಡ್  ಒಡಕ್ ಬನ್ನಗ ದೇವತಾ ಸಾನಿದ್ಯೊನು ಸಂಕೋಚ ಮಲ್ತ್ ದ್,ಬಾಲಾಲಯೊಡು ಮೂರ್ತಿನ್ ದೀದ್ ನಾಳ/ಸರಿಗೆದ ಮುದೆಲ್ ನಾಡ್ ಪತ್ತ್ ದ್ ಅವ್ಲಿಪ್ಪಿ ನಿಧಿಕುಂಬೊಡು ಮುತ್ತು ರತ್ನೊಲೆನ್ ದಿಂಜಾದ್ ಜೀರ್ಣಾಷ್ಟ ಬಂದೊನು ದೆತ್ತ್ ದ್ ಪೊಸತಾದ್ ಅಷ್ಟ ಬಂದೊಡು ಆಣ್ ಪೊಣ್ಣನ ಸಂಕಲ್ಪ ಮಲ್ತ್ ದ್ ಪೀಠ ಬಿಂಬೊಲೆಗ್ ಐಕ್ಯ ಮಲ್ತ್ ದ್ ಬ್ರಹ್ಮ ಕಲಶದ ನೀರ್ ಮೈತ್ ದ್ ತೆರಣ ದಿಂಜವೆರ್.       ಪದ್ರಾಡ್ ವರ್ಸೊಗೊರ ದೇವೆರೆ ಮೂರ್ತಿದ ಸಗ್ತಿ ಕಮ್ಮಿಯಾನಗ ಪಿರ ಆ ಮೂರ್ತಿಗ್ ತೆರಣ ದಿಂಜಯೆರೆ ಬ್ರಹ್ಮ ಕಲಶ ಮಲ್ಪುವೆರ್.ಬ್ರಹ್ಮ ಕಲಶೊಡು ಮಂತ್ರ ಬಿಂಬೊನು ಪೀಠದ ಮಿತ್ತ್ ತಾಪನೆ ಮಲ್ಪೆರೆ ಅಷ್ಟಬಂದೊಗು ಪ್ರಾಕೃತಿಕವಾಯಿನ 8 ಸೊತ್ತುಲೆನ್ ಗಲಸುವೆರ್‌. ಶಂಖದ ಪೊಡಿ,ದೂಪದ ಪೊಡಿ,ಅಣಿಲೆ ಕಾಯಿ,ಅರಗು,ಪರ್ತಿ,ಬೊಲ್ಕಲ್ಲ್,ಕಡಲ್ದ ಪೊಯ್ಯೆ ನೆಲ್ಲಿ ಕಾಯಿ-ಉಂದೇ ಅಷ್ಟ ಬಂದದ ಎಣ್ಮ ಸೊತ್ತುಲು.ಉಂದೆನ್ ಪೂರ ತಂತ್ರ ಸಮುಚಛಯ ಗ್ರಂತೊಡು ಪಂಡಿ ಅಳತೆಡ್ ಚೂರ್ಣ ಮಲ್ತ್ ದ್ ,ಎಣ್ಮೆದೆಣ್ಣೆಡ್ ಕಲತ್ ದ್ ಅಂಟ್ ಮಲ್ಪುವೆರ್.ಅಂಟ್ ಬಮದಿಸಯೆರೆ,ಗೋಡ್ಯಾಯೆರೆ ಬೋಡು. ಬೊಕ್ಕ ಶಾಸ್ತ್ರೀಯ ವಿದಾನೊಡು ಓಮ ಮಲ್ತ್ ದ್ ಅವೆಕ್ ಸಂಪಾತ ಸ್ಪರ್ಷದ(ಬಿಂಬ ಬೊಕ್ಕ ಪೀಠೊನು ಗೋಡ್ಯಾವುನ ಅಂಟ್) ಒರುಟು ದೈವಿಕ ಸಗ್ತಿ ಕೊರ್ಪೆರ್.ಉಂದುವೆ ಅಷ್ಟ ಬಂಧ. 

ದೈವೊಲೆಡ್ ಪ್ರದಾನ ಬೆಮ್ಮೆರ್.ಸಿರಿಕುಲ್ನ ಆರಾದನೆಡ್ ಬೆಮ್ಮೆರೆಗ್ ಕಲ್ಸೆ ಕಟ್ಟುನ ಕೆರಮ ಉಂಡು.ಅವ್ಲು ಪೂಟು ಕಲ್ಸೆನ್ ಅಲಂಕಾರ ಮಲ್ತೆರ್ಡ ಬ್ರಹ್ಮ ಕಲಶೊಡು ಕೊಡಪಾನದ ಒರುತ ಮಲ್ಲ ಕಲಶೊಗು ಜರಿ ಪೇಟದ ಅಲಂಕಾರ ಮಲ್ಪುವೆರ್.ದೇವೆರೆ ಮೂರ್ತಿಲು ಕಲ್ಲ್ ದ ಪೀಠದ ಮಿತ್ತ್ ಇತ್ತ್ ನೆರ್ದಾದ್ ಕಲಶದ ನೀರ್ ಏತ್ ಮೈತ್ಂಡಲ ದಾಲ ಆಪುಜಿ.ಆಂಡ ದೈವೊಲೆಗುಪ್ಪುನಿ ಮಣೆ ಮಂಚ,ಉಜ್ಜಾಲ್,ಮುಂಡ್ಯೆಲು.ಪೂರಲ ಮರೊಟು ಕೆತ್ತ್ ನ ಸೊತ್ತುಲು.ಅವೆತ ಮಿತ್ತ್ ಬ್ರಹ್ಮ ಕಲಶಂದ್ ಕೊಡಪಾನಗಟ್ಲೆ ನೀರ್ ಮೈತ್ಂಡ ಮರತ ಉಜ್ಜಾಲ್,ಮುಂಡ್ಯೆ,ಮಣೆಮಂಚ ಪದ್ರಾಡ್ ವರ್ಸ ಬುಡ್ಲೆ ಒಂಜಿ ವರ್ಸದುಲಯಿ ಕುಂಬಾಪುಂಡು.ಅಡೆಗ್ ಬೋಡಾಯಿನಿ ಮರತ ಮಣೆಮಂಚೊಲು ಬಾಲ್ತರ ಬರೆರೆ ದೂಪದ ಪುಗೆ.ಅಂಚನೆ ದೇವೆರೆ ಮೂರ್ತಿಲು ಸ್ಥಿರ.ದೈವದ ಅಂಚತ್ತ್.ದೈವೊಲು ಚರ.ದೇವೆರೆ ಮೂರ್ತಿ ಇತ್ತ್ ನೌಲೇ ಇತ್ತ್ಂಡ ದೈವದ ಭಂಡಾರ ಬತ್ತ್ ದ್, ಭಂಡಾರ ಕೇರ್ತ್ ದ್ ದೈವದ ಕಲೊಟು ಹಿರಿಯಾಕ್ಲೆ ಮದಿಪುಗು ಜೋಗದ ಮಾನಿನ ಮಿತ್ತ್ ಮಾಯೆ ವಸಾಯೊಗು ಬರ್ಪುನಿ.ಅಂಚಿನ ದೈವೊಲೆನ ಮಣೆ ಮಂಚೊಲೆಗ್ ವಾ ಕಾರಣೊಗ್ಲಾ ದೇವೆರೆ ಆರಾದನೆದ ಬ್ರಹ್ಮ ಕಲಶ ಖಂಡಿತಾ ಮಲ್ಪೆರೆ ಇಜ್ಜಿ. ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ.

 ಬ್ರಹ್ಮ ಕಲಶೊಡು ಸುತ್ತಲ ಎಲ್ಯೆಲ್ಯ ಕಲಶೊಲೆನ್ ದೀದ್ ಅವೆಟ್ ನೀರ್ ಪಾಡ್ದ್ ದೀದುಪ್ಪುವೆರ್.ಪ್ರಧಾನ ದೇವೆರೆನ್ ಆವಾಹನೆ ಮಲ್ತ್ ದ್ ಪೂಜೆ ಮಲ್ಪುನ ಕೊಡಪಾನ ಗಾತ್ರದ ಕಲಶನೆ ಬ್ರಹ್ಮ ಕಲಶ.ಉಂದೆಟ್ ಬ್ರಹ್ಮೆನೆ ಸೈಷ್ಠಿಕರ್ತೆ.ಪೂಜೆದ ಅಧಿಪತಿ ಅವ್ಲು ಬ್ರಹ್ಮೆ.ಮಾತ ಪೂಜೆದ ಕಡೆಕ್ಲ ಬ್ರಹ್ಮಾರ್ಪಣೆ ಉಪ್ಪುಂಡು.ಬ್ರಹ್ಮ ತತ್ವನೇ ಮೂಲು ಪ್ರದಾನ.ಕಲಶ ಎಚ್ಚಿನ ಪೂಜೆಲೆಡ್ ಉಪ್ಪುಂಡು.ಕಲಶ ದೀಪುನೆತ ಅರ್ಥ ದಾದ ಪಂಡ ಕಲಶದ ನೀರ್ ಪವಿತ್ರ.ಕಲಶದ ಅಡಿ ಭಾಗ ಬೂಮಿ,ನಡು ಭಾಗ ಉಲಯಿಡ್ ನೀರ್,ಕಲಶದ ಕೆಕ್ಕ್ ಲ್ ಭಾಗ ಸೂ,ಕಲಶದ ಬಾಯಿ ವಾಯು,ಕಲಶದ ಮಿತ್ತ್ ಕುಕ್ಕುದಿರೆ ದೀದ್ ತಾರಾಯಿ ದೀದುಪ್ಪುನ ತರೆತ ಭಾಗ ಆಕಾಶ.ಅಂಚನೆ ದೇವೆರೆ ಆರಾದನೆದ ಪಂಚ ಭೋತೊಲೆಡ್ ಪುಡೆಮಿದ ಒರುವಾದ್ ಗಂಧ,ನೀರ್ ದ ಒರುವಾದ್ ಸೀರ್ತ,ಗಾಳಿದ ಒರುವಾದ್ ಧೂಪ,ಸೂತ ಒರುವಾದ್ ಭಸ್ಮ,ಅಕ್ಕಸದ ಒರುವಾದ್ ಪುರ್ಪೊಲೆನ್ ನಮ ಗಲಸುವ .ಇಂಚ ದೇವೆರೆ ವೈದಿಕ ವಿಧಾನದ ಬ್ರಹ್ಮ ಕಲಶೊಡು ಪಂಚ ಭೂತೊಲ್ನ ಸಗ್ತಿ ಉಂಡು.ಋಗ್ವೇದ ಕಾಲೊಡ್ದೇ ಕಲಶದ ಕಲ್ಪನೆ ಇತ್ತ್ಂಡ್.ಲೋಕೊದ ಎಡ್ಡೆಪ್ಪುಗಾಧ್ ಕಲಶ ದೀವೊಂತೆರ್.ಬ್ರಹ್ಮ ಕಲಶದ ಎಲ್ಯೆಲ್ಯ ಕಲಶೋಡು  ಮಂತ್ರಮುಖೇನ ಪಾಡ್ನ ಪವಿತ್ರ ನೀರ್ ಡ್ ಬೇತೆ ಬೇತೆ ದೇವತೆಲೆನ್ ಆವಾಹನೆ ಮಲ್ತ್ ದ್ ಅಕ್ಲೆಗ್ ಕೈ ದೆಕ್ಕೆರೆ ನೀರ್,ಕಾರ್ ದೆಕ್ಕೆರೆ ನೀರ್,ಪರಿಯೆರೆ ನೀರ್,ಮೀಯೆರೆ ನೀರ್,ಅಭಿಷೇಕೊಗು ನೀರ್ಂದ್ ದೇವೆರೆ ಐನ್ ನಿತ್ಯ ಕರ್ಮೊಗು ನೀರ್ ಪಾಡ್ದಿಪ್ಪುವೆರ್.ಪವಿತ್ರವಾಯಿನ ರತ್ನೊಲು,ದರ್ಬೆ,ಅಕ್ಷತೆ,ತೊಲಸಿ,ಫಲವಸ್ತುಲೆನ್ ದೀದುಪ್ಪುವೆರ್.ಉಂದು ಪೂರ ದೇವೆರೆ ಆರಾದೆನೆಗೇ ವಿನಃ ದೈವೊಲೆ ಆರಾದನೆಗ್ ಅತ್ತ್.ವೇದೊಡು ಪಂಡಿಲೆಕ ಸೂಕು ರಡ್ಡ್ ಮೋನೆಲು,ಒಂಜಿ ವೈದಿಕ ಪಂಡ ಮಂತ್ರ ಕುಡೊಂಜಿ ತಂತ್ರ.ಉಂದು ರಡ್ಡ್ ಲ ದೇವೆರೆ ಆರಾದನೆಡುಪ್ಪುನಿ ವಿನಃ ದೈವದ ಆರಾನೆಡತ್ತ್.ದೇವೆರೆಗ್ ವೈದಿಕೆರ್ ವೈದಿಕ ಮಂತ್ರ,ತಾಂತ್ರಿಕ ಮಂತ್ರೊಲೆಡ್ ಸಮಾನವಾದ್ ದೇವೆರೆನ್ ಆರಾದನೆ ಮಲ್ತೆರ್ಡ ದೈವಾಲ್ಯದ ದೈವೊಲೆಗ್ ಇಂಚಿನ ವಾ ತಂತ್ರ ಮಂತ್ರೊಲು ಇಜ್ಜ.ದೇವೆರ್ ಪುರ್ಸಾದ ರೂಪೊಡು ಅರೆನ್ ಆರಾದನೆ ಮಲ್ಪೆರೆ ಕೊರ್ನ ತಂತ್ರ ಮಂತ್ರೊಲೆನ್ ನನಲಾತ್ ಕಾಸ್ ಮಲ್ಪೊಡುಂದು ದೈವದ ಕಲೊಕು ಕನತ್ ನವು ತಪ್ಪು.ಮೊಕ್ಲು ಉಂದೆರ್ದ್ ದೇವೆರೆಗ್ಲ ಅಪಚಾರ ಮಲ್ತಿಲೆಕಾಂಡ್,ತುಳುನಾಡ ಸಾಂಪ್ರದಾಯಿಕ ದೈವೊದ ಕಟ್ಲೆಲೆಗ್ಲ ಅನ್ಯಾಯ ಮಲ್ತ್ ಲೆಕಾಂಡ್.ಭಗವಂತೆ ಸರ್ವಂತರ್ಯಾಮಿ ಆಂಡಲಾ ಮಾತೆರೆಗ್ ಅಕ್ಲಕ್ಲೆ ರೀತಿ ನೀತಿಡ್ ಪೂಜೆ ಮಲ್ಪೊಲಿಂದ್ ವೇದೊಲು ಪಂಡಲಾ ಮಾತೆರೆಗವೆನ್ ಮಲ್ಪೆರೆ ಸಾಧ್ಯ ಆವಂದಿನೆಡ್ದಾತ್ರ ಅಕುಲು ದೇಲ್ಯೊಲೆಡ್ ದೇವೆರೆಗ್ ಕೈ ಮುಗಿಯೊಂದು ಬತ್ತೆರ್.ಅಣ್ಣ್ ಕಾಯಿ,ಪೂಜೆ ಕೊರೊಂದು ಬತ್ತೆರ್.ಆಂಡ ವೇದೊಲೆನ ಸಾರದ ಭಗವಂತನ ಆರಾದನೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುವೆರ್ ದೈವಾರಾದಕೆರಾದಿತ್ತ್ ದ್ ಪದಿನಾಜಿ ಕಟ್ಲೆಡೇ ದೈವೊಲೆನ್ ಆರಾಧನೆ ಮಲ್ತೊಂದು ಬೈದೆರ್.ಅಂಚಾದೇ ದೇವೆರೆನ್ ದೇವೆರೆ ಆರಾಧನೆದ ಒರುಟೇ ಮಾನಿತೊನ್ಗ,ದೈವೊಲೆನ್ ದೈವಾರಾಧನೆದ ಕಟ್ಲೆಡೇ ಮಾನಿತೊನ್ಗ.ಅಂಚಾದ್  ತುಳುನಾಡ ದೈವಾರಾಧನೆದ ದೈವೊಲೆನ್ ನನಾಂಡಲಾ ಅಷ್ಟಮಂಗಲಾದಿ ಪ್ರಶ್ನೆ ಚಿಂತನೆಲೆಡ್ದ್ ದೂರ ದೀಕ,ಬ್ರಹ್ಮ ಕಲಶೊರ್ದು ದೂರ ದೀದ್ ಹಿರಿಯಾಕ್ಲ್ ಪಾಡ್ದ್ ಕೊರ್ನ ಸಾದಿಡೇ ದೈವಾರಾದನೆ ಮಲ್ತೊಂದು ಬರ್ಕ.

  ಕೆಲವೊಂಜಿ ತಂತ್ರಿನಕುಲು ಮಲ್ಪುನ ತೂನಗ ಬೇಜರಾಪುಂಡು.ಇಂಚಿಪ ಒರಿ ತಂತ್ರಿದಾರ್ ಇಲ್ಲ್ ಕಟ್ಟಾಯೆರ್.ಇಲ್ಲ್ ಕಟ್ಟ್ ನಗ ಮಾತ ಜಾತಿ ಜನಾಂಗದಕ್ಲೆನ್ ಬೇಲೆಗ್ ದೆತೊಂಡೆರ್.ಆಂಡ ಇಲ್ಲೊಕ್ಕೆಲ್ದಾನಿ ಅಕ್ಲೆ ಜಾತಿದಕ್ಲೆಗ್ ಮಾತ್ರ ಇಲ್ಲೊಕ್ಕೆಲಾಯಿ ಇಲ್ಲಲ್ ಒಣಸ್ ಕೊರ್ದು ಒರಿನ ಬೇಲೆದಕ್ಲೆಗ್ ಪೂರ ದೇವಸಾನೊಡು ಒನಸ್ ಕೊರ್ಯೆರ್.ಬೇಜಾರ್ಡ್ ಎಚ್ಚಿನಕುಲು ಪೋಯ್ಜೆರ್.ಇಂಚ ಸಮಾಜೊನು ತಿದ್ದುನಕುಲೆ ತಪ್ಪು ಮಲ್ತೆರ್ಡ ಓಡೆ ನಮ್ಮ ಸಮಾಜ ಉದ್ದಾರ ಆಪುನಿ?.ಈ ವ್ಯವಸ್ಥೆನ್ ಒಪ್ಪುನಕುಲು ಓಡೆಮುಟ್ಟ ಉಪ್ವೆರ ಮಲ್ಪುನಕುಲು ಅಡೆಮುಟ್ಟ ಉಪ್ವೆರ್.

    ನಿಜವಾದ್ ದೇವೆರೆ ತೇರ್ ಡ್ ಒರಿ ಪೂಜೆದಾರ್ ಉಪ್ಪುನ ಕೆರಮ.ಕೆಲವೊರ ದೇವೆರ್ ತುಂಬುನಾರ್ ತೇರ್ ದ ಉಲಯಿ ಪೋದು ಕುಲ್ಲುನಲಾ ಉಂಡು.ನಿಜವಾದ್ ದೇವೆರೆನ್ ತೇರ್ ಡ್ ಕುಲ್ಲಯಿ ಬೊಕ್ಕ ಆರ್ ಲ ತೇರ್ ದ ಬಲ್ಲ್ ಗ್ ಕೈ ಕೊರೊಡು.ಆಂಡ ಕೈ ಕೊರ್ಪುಜೆರ್.ತೇರ್ದ ಮಿತ್ತೆ ಕುಲ್ವೆರ್.ಆತೇ ಅತ್ತ್ ನಾಲೈನ್ ಜನ ತೇರ್ ದ ಮಿತ್ತ್ ಕುಲ್ಲುನಲಾ ಸುರಾತ್ಂಡ್.ನಮ ಏರ್ ಕುಲ್ಲ್ಂಡಲಾ ಒಯ್ಪುನ್ನೆ.ತೇರ್ದ ಮಿತ್ತ್ ರ್ದ್ ಪೂ,ಪಂರ್ದ್,ಫಲವಸ್ತ್ ಲೆನ್ ಪೂರ ದಕ್ಕ್ ನಗ ಉಂದೆನ್ ಪೆಜ್ಜೆರೆಂದೇ ಜನೊಕುಲು ಲಾಯ್ಪುವೆರ್.ಇಂಚಿ ಕೆರಮ ಪೂರಾ ಏರ್ ಮಲ್ತ್ ನ?.ನಿಜವಾದ್ ತೇರೊಯ್ತಿ ಬೊಕ್ಕ ತೇರ್ ರ್ದ್ ಜತ್ತ್ ದ್ ಜನೊಕ್ಲೆನ್ ಸಾಲಾದ್ ಉಂತಾದ್ ಫಲ ಪುರ್ಪ ಕೊರೊಲಿ.ದೈವದ ಕಲೊಟು ಇಂಚ ಇಜ್ಜಿ.ದೈವ ಬತ್ತ್ ನಕ್ ಲೆಗ್ ಸಮದಾರಿಕೆ ಆತ್ಂಡ ಪಂಡ್ ದ್ ಬೊಕ್ಕ ಆವಾರ ದೆತೊನುನಿ. 

ಕೆಲವು ತಿಕ್ ಡ್  ಜಾತ್ರೆದಪಗ ದೇವಿನ ಪೇಟೆ ಸವಾರಿಂದ್ ಉಪ್ಪುಂಡು.ದುಂಬು ದೇವಿನ ಮೂರ್ತಿನ್ ತೃಟ್ ತುಂಬೊಂದೇ ವೈದಿಕೆರ್ ಪೇಟೆ ಸವಾರಿ ಮಲ್ತೊಂತೆರ್.ಇನಿ‌ ಅಡೆಗ್ ಮರತ ಬಂಡಿ ಬೈದ್ಂಡ್.ಅವೆಟ್ ದೇವೆರೆನ್ಲಾ ದೀಪುನಿ,ಬಟ್ರೆನ್ಲಾ ಕುಲ್ಲದ್ ನಮ ಬಂಡಿ ಒಯ್ಪುನಿ.ಆಂಡ ಬಟ್ರ್ ನಕ್ಲ್ ಬಂಡಿದ ಬಲ್ಲ್ ಗ್ ಕೈ ಕೊರ್ಪುಜೆರ್.ಮಾರ್ಗೊಡು ಬಂಡಿ ಒಯ್ತ್ ದ್ ಕಡೆಕ್ ಆ ಬಂಡಿನ್ ದೇವಸಾನದ ಉಲಯಿ ಕೊನತ್ ದೀಪೆರ್.ಅಪಗ ಆ ಮಾರ್ಗ ಏತ್ ಅಸುದ್ದ ಉಪ್ಪುಂಡುಂದು ಮೊಕ್ಲೆಗ್ ದಾಯೆ ಗೋಚರಾಪುಜಿ?.

      

ಮುಕ್ಕಾಲ್ ಮೂಜಿ ಗಳಿಗೆದ ವಸಾಯ

               ಮುಕ್ಕಾಲ್ ಮೂಜಿ ಗಳಿಗೆದ ವಸಾಯ

       ತುಳುನಾಡ ದೈವಾರಾದನೆಡ್ ಅವ್ವೇತೋ ನುಡಿಕಟ್ಟ್ ದ ಸವ್ದೊಲುಲ್ಲ.ನಮ ಅವೆನ್ ಸಂಕೆದ ಆಧಾರೊಡು ಲಪ್ಪುನ ಬದಲ್ ಅಕುಲು ಗಲಸ್ ನ ಬಾಸೆದ ಸವ್ದ ಕಟ್ಟ್ ನ ಪೊರ್ಲುಡು ತೂವೊಡು.ಅಕ್ಲೆಡ ಇದ್ಯೆ ಇಜ್ಜಂದೆ ಉಪ್ಪು.ಆಂಡ ಅಕ್ಲೆಡ ಇತ್ತಿ ಎಡ್ಡೆ ಸಂಪ್ರದಾಯದ ಮೂಲೊನು ದುಂಬುದಕ್ಲೆಗ್ ಕಟ್ಟ್ ದ್ ಕೊರ್ಪುನ ಗುಣ,ಎಡ್ಡೆ ಭಾವನೆಲು,ದೈವದ ಮಿತ್ತ್ ಮನ ಬಗ್ ತಿ ಇತ್ತ್ಂಡ್.ಅಂಚಾದ್ ಅಕುಲು ನಮಕ್ ಒಂಜಿ ನಿರ್ದಿಷ್ಟ ಚೌಕಟ್ಟ್ ಡ್ ದೈವಾರಾದನೆನ್ ಕಟ್ಟ್ ದ್ ಕೊರ್ತೆರ್.ನಮ ಕಾಸ್,ಅಧಿಕಾರದ ಅಮಲ್ಡ್ ನಮ ಇನಿ ಮೂಲ ಕಟ್ಲೆನ್ ಪೊಲಿತೊಂದುಲ್ಲ.ಸಾರತ್ತೊಂಜಿ ಬೂತೊಲು,ನೂತ್ರೊಂಜಿ ಪೊಣ್ಣು ಬೂತೊಲು,ಕೂಡಿ ರಾಜ್ಯ,ಗಟ್ಟ ಇಂಚಿ ಸವ್ದೊಲೆನ್ ಸಂಖ್ಯೆದ ಆಧಾರೊಡು ಪನ್ಪುನೆರ್ದ್ ದೈವದ ಮಿತ್ತ ಮನ ಬಗ್ ತಿಡ್ ತೆರಿಯೊನೊಡು.ಅಂಚಿನ ಒಂಜಿ ಪಾರಿಬಾಷಿಕ ಸವ್ದ ಮುಕ್ಕಾಲ್ ಮೂಜಿ ಗಳಿಗೆ‌.ತುಳುವೆರ್ ಗಳಿಗೆ ಪಂಡ ಸಂಸ್ಕೃತದ ಘಳಿಗೆ/ಗಂಟೆನ್ ಪಂಡ್ ದುಪ್ಪುನ ಅವಕಾಶ ಬಾರೀ ಕಮ್ಮಿ.ವೈದಿಕ ಆರಾದನೆದೊಟ್ಟುಗು ಬತ್ತಿನ ಸಂಸ್ಕೃತೊರ್ದು ದುಂಬೇ ತುಳುನಾಡ್ ಡ್ ದೈವಾರಾದನೆ ಇತ್ತ್ಂಡ್.ಇಂಚನೆ ಒಂಜಿ ಪಾತೆರ ಉಂಡು,ಒಂಜಿ ಗಳಿಗೆ ಬತ್ತ್ ಪೋಲ ಮಾರಾಯಂದ್.ಉಂದೆನ್ ಗಂಟೆ ನಿಮಿಷೊಡು ಲಪ್ಪಂದೆ ಒಂಜಾತ್ ಪೊರ್ತುಂದು ಅರ್ಥ ಮಲ್ತೊಂಡ ಎಡ್ಡೆ.

  

ಮೂಲ ಸಾಂಪ್ರದಾಯಿಕ ಕಟ್ಲೆದ ಕಲ್ಕುಡನ ಮೋನೆದೈತ.ಕಪ್ಪುದ ಬಣ್ಣೊಗು ಸುಣ್ಣದ ಬುಟ್ಟ

                       ಮುಕ್ಕಾಲ್ ಮೂಜಿ ಗಳಿಗೆ ಉಂದೆನ್ ತೂಪುಂಡ ಒಂಜಿ ಗಳಿಗೆ ಪಂಡ 24 ನಿಮಿಷ(ಒಂಜಿ ಗಳಿಗೆಗ್ 60 ವಿಗಳಿಗೆಲುಪ್ಪುವ)ಒಂಜಿ ದಿನ,24 ಗಂಟೆಗ್ 60 ಗಳಿಗೆಲುಪ್ಪುವ.ತುಳುವೆರೆ ದಿನಮಾನದ ಲೆಕ್ಕ-ಈ ಸೂರ್ಯೋದಯೊರ್ದು ಮನದಾನಿದ ಸೂರ್ಯೋದಯಮುಟ್ಟದ.ನಮಕ್ ತುಳುವೆರೆಗ್ ರಾತ್ರೆ ಪದ್ರಾಡ್ ಗಂಟೆರ್ದ್ ಪೊಸದಿನ ಸುರಾಪುನತ್ತ್.ಅವು ಪರೆಂಗಿಲೆ ಕೆರಮ..ಮೂಲು ಮುಕ್ಕಾಲ್ ಬೇತೆ,ಮೂಜಿ ಗಳಿಗೆ ಬೇತೆಂದ್ ತೂಪುನೆಡ್ದ್ ಒಂಜಿ ಗಳಿಗೆ ಪಂಡ 24 ನಿಮಿಷ.ಮೂಜಿ ಗಳಿಗೆ ಪಂಡ 72 ನಿಮಿಷ.ಮೂಜಿ ಗಳಿಗೆನ್ ಮುಕ್ಕಾಲ್ ಮಲ್ತ್ಂಡ18 ನಿಮಿಷ ಬರ್ಪುಂಡು. ಉಂದೆನ್ ನಮ ಸಂಖ್ಯೆದ ಒರುಟು ತೂವಂದೆ ಒಂಜಿ ಸೆನ ದೈವ ಕಟ್ಟಿಮಾನಿನ ಮಿತ್ತ್ ಮೂಜಿ ಸರ್ತಿ ಬತ್ತ್ ಪೋಪುಂಡು ಪನ್ಪುನೆನ್ ಅರ್ಥ ಮಲ್ಪೊಡಾತೆ. ದುಂಬುದ ತುಳುವೆರ್ಡ ಬಾಸೆದ ಮೋಡಿ ಇತ್ತ್ಂಡ್,ಉಲಾರ್ಥ ಇತ್ತ್ಂಡ್,ಬಾಗಿಸವುನ,ವಿಂಗಡಿಸವುನ ಇಜ್ಜಾಂಡ್.ಅಕ್ಲೆಡ ದೈವದ ಮಿತ್ತ್ ಭಕ್ತಿದ ಭಾವನೆ ಇತ್ತ್ಂಡ್.ಅಂಚಾದ್ ಒಂಜಿ ಸೆನೊಟು ಬತ್ತ್ ಪೋವೊಂತ್ ನ,ಒರ ಕಣ್ಣ್ ಮುಚ್ಚಿದ್ ಬುಲಾವುನೆಕ್ ದುಂಬು ವಸಾಯಾವೊಂತ್ ನ,ಒರ ಮೆಂಚಿ ದಕ್ಕ್ ಲೆಕ,ಕಣ್ಣ್ ದ ಮೆನ್ಪುರಿ ರಟ್ಟ್ ನಾತ್ ಸೆನೊಟು ಬತ್ತ್ ಪೋವೊಂತ್ ನ,ಉಸುಲು ದೆತೊಂದು ಬುಡ್ಪುನಾತ್ ಪೊರ್ತುದ ವಸಾಯೊನು ಪೊರ್ಲ ತಿರ್ಲ ದೈವಾರಾದನೆದ ತುಳು ಬಾಸೆಡ್ ಮುಕ್ಕಾಲ್ ಮೂಜಿ ಗಳಿಗೆಂದ್ ಪಂಡೆರ್.ಉಂದೆನ್ ಮೂಜಿ ಸರ್ತಿ,ಮೂಜಿ ಪೊರ್ತುದ ವಸಾಯಂದ್ ಲ ಪನೊಲಿ.ಒಂಜಿ ಸೆನ ಬತ್ತಿನ ವಸಾಯದ ಪ್ರಭಾವ ಕಟಿ ಮಾನಿನ ಮಿತ್ತ್ ಇತ್ತ್ ದ್ ಏರಿ ಬಂಡಾರದ ಕಲೆ,ಸತ್ಯ ಮಾತ್ಮೆದ ಕಲೆ,ಪತ್ತಿ ಅಯುದದ ಕಲೆ,ಇತ್ತಿ ಮಣ್ಣ್ ದ ಕಲೆ ಸೇರ್ದ್ ದೈವದ ನಾಲಾಯಿದ ಕೊಡಿತ ಪಾತೆರ ಪಲಿತೊಗು ಬರೊಂತ್ಂಡ್.ಪೂರಹಿರಿಯಾಕ್ಲ್ ಮುಕ್ಕಾಲ್ ಮೂಜಿ ಗಳಿಗೆದ ಉಳ ತಿರ್ಲ್ ನ್ ಬುಡ್ಪಾಯೆರೆ ನಮ್ಮ ಗೇನೊಗೆ ಬುಡ್ದು ಬುಡಿಯೆರ್.

  

       ಪೂವರಿ ಪತ್ತ್ ದ್ ಮದಿತ್ ದ್ ವಸಾಯ/ಜೋಗ ಸುಮಾರ್  ನಿಮಿಷದಾತ್ ಇತ್ತ್ಂಡಲ ದೈವ ಕಟಿ ಮಾನಿನ ಮಿತ್ತ್ ಪೂವರಿ ಪಾಡ್ದ್ ಮದಿಪುನಗ ದೈವ ಒಂಜಿ ಸೆನ ಬತ್ತ್ ದ್ ಪೋಪುಂಡು. ಪದಿನಾಜೆನ್ ಮೂಜಿ ಬಾಗ ಮಲ್ಪುಂಡ ಒಂಜನೆದಾದ್ ಪೂವರಿ ಪತ್ತ್ ದ್ ಮದಿಪುನಗ,ರಡ್ಡನೆ ಸರ್ತಿ ಗಗ್ಗರದೆಚ್ಚಿಗ್ ಮದಿಪುನಗ,ಮೂಜನೆ ಸರ್ತಿ ಪಿರಿ ಬೂಲ್ಯ ಪತ್ತ್ ದ್ ವಸಾಯ ಪಿರಿನಗ ಇಂಚ ಮೂಜಿ ಸರ್ತಿ ಮಲ್ಲ ವಸಾಯ ಬರ್ಪುಂಡು.ದುಂಬು ಉಗ್ರದ ವರ್ಣಾರ ಪಂಜುರ್ಲಿಗ್ ಬುಡ್ಂಡ ಬೇತೆ ದೈವೊಲೆಗ್ ಗಗ್ಗರದೆಚ್ಚಿ ಇಜ್ಜಾಂಡ್.ಇನಿಕ್ ಒಂಜಾತ್ ವರ್ಸದ ಪಿರಾವುರ್ದು ಮಾತಾ ದೈವೊಲೆಗ್ಲ ,ರಾಜಂದೈವೊಲೆಗ್ಲ ಗಗ್ಗರೆದೆಚ್ಚಿ ಸುರಾತ್ಂಡ್.ಆತೆನಾ ಪೂವರಿ ಪತ್ತಂದೆ,ಮದಿಪಂದೆನೇ ಎಣ್ಣೆ ಕೊರ್ನಗನೇ ದೈವೊಗು ವಸಾಯ ಬತ್ತ್ ದ್ ತರೆಕ್ ಬಟ್ಟಲ್ ನ್ ಹಾಕೊನುವೆರ್(ದಾಲ ಗಟ್ಟಿದ ಕರ್ಬದ ಪಾತ್ರೆ ಕೊರ್ಂಡ ಹಾಕೊನುವೆರಾ ದಾನ್ನ) ಪಂಡ್ದಾಂಡ,ಗಗ್ಗರದೆಚ್ಚಿಡ್ ಗಗ್ಗರೊನು ತಿಗಲೆಗ್,ತರೆಕ್ ಹಾಕೊನುವೆರ್ ಪಂಡ್ದಾಂಡ ಪೂರಹಿರಿಯಾಕ್ಲ್ ಮಲ್ತ್ ನ ಪದಿನಾಜಿ ಕಟ್ಲೆಗ್ ಅಪಚಾರ ಮಲ್ತಿಲೆಕ. ರಾಜಂದೈವೊಲೆಗ್ ಬಣ್ಣ ಪಾಡ್ದ್ ಕಾರ್ ಗ್ ಗಗ್ಗರ ಪಾಡಿ ಬೊಕ್ಕನೆ ವಸಾಯೊಗುಂತೊಂತ್ ನಿ ನಿ.ರಾಜಂದೈವೊಲೆದ ಮೂಜಿ ಮಲ್ಲ ವಸಾಯ ಪಂಡ ಒಂಜನೆದಾದ್ ಕಟಿ ಮಾನಿ ಕಾರ್ ಗ್ ಗಗ್ಗರ ಕಟ್ಟ್ ದ್ ಪೊಡಿ ನಲಿಕೆಗ್(ಅಣಿದಾಂತೆ) ಉಂತ್ ನಗ ಗಡಿ ಪತ್ತ್ ನಾರ್ ಮದಿಪುನಗ,ರಡ್ಡನೆದಾದ್ ಅಣಿ ಎರ್ದ್,ಮುಗ ದೀದಾ,ಮುಗ ಏರ್ದಾ ಮದಿಪುನಗ,ಮೂಜನೆದಾದ್ ದೈವ ಬಾರ್ನೆ ಪೋದು ಪಿರಿನಗ ಇಂಚ ಮೂಜಿ ಸರ್ತಿ ಮಲ್ಲ ವಸಾಯ ಬತ್ತ್ ದ್ ಪೋಪುಂಡು.ಇಂಚ ನಮ ಮುಕ್ಕಾಲ್ ಮೂಜಿ ಗಳಿಗೆದ ವಸಾಯೊನು ಅರ್ಥ ಮಂತೊನೊಲಿ.

     ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ನಮ್ಮ ಎಡತ ಮರ್ಗಿಲ್ಡೇ ಉಪ್ಪೊಡು,ಕಲ್ಲುರ್ಟಿ ಬಲಬಾಗೊಡೆ ಉಪ್ಪೊಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.

ಅಷ್ಟಮಂಗಲ ದೇವ ಪ್ರಶ್ನೆನೇ ಹೊರತು ದೈವಾರಾದನೆಗ್ ಅವು ಅಗತ್ಯ ಇಜ್ಜಿ

   ಅಷ್ಟಮಂಗಲ ದೇವ ಪ್ರಶ್ನೆನೇ ಹೊರತು   

    ದೈವಾರಾದನೆಗ್ ಅವು ಅಗತ್ಯ ಇಜ್ಜಿ

   "ನಮ್ಮ ಪೂರ್ವ ಹಿರಿಯಾಕುಲು ನಂಬೊಂದು ಬತ್ತಿನ ನಾಗೆ ಆವಡ್,ದೈವೊಲಾವಡ್ ತುಳುವೆರೆಗ್ ವಾ ದೋಷಲ ಮಲ್ದ್ ಜೆರ್.ತುಳುವೆರ್ ಒವೆಟ್ಲ ಸೋಪುಜೆರ್ಂದಾನಗ ಪ್ರಶ್ನೆ ಚಿಂತನೆದಕುಲು ತುಳುವೆರೆಗ್ ಇಜ್ಜಂದಿ ದೋಷೊಲೆನ್ ಪೂರ ಕನತ್ ಪಾಡ್ಯೆರ್"

-ಕಾವ್ಯಸುತ

        

"ಸಕನಲೇ ಫೂರ ಸತ್ಯಂದ್ ಪನೆರಾಪುಜಿ.ತುಡರ್ ನ್ ಕಣ್ಣ್ ಗ್ ತೋಜುನ ದೇವೆರ್ಂದ್ ಪನ್ಪ.ಕಡ್ಡಿ ಗೀರ್ನಗ ಬೊಲ್ಪು ಬರ್ಪುಂಡು.ಒಲ್ತು ಬತ್ತ್ಂಡ್ ತೆರಿಯಂದ್.ತೆಕ್ಕ್ ನಗ ಓಡೆ ಪೋಪುಂಡು ತೆರಿಯಂದ್.ಅವು ಪ್ರಕೃತಿ.ಅವು ಭಗವಂತೆ.ಒರೊರ ದಾದನೋ ಕಾರಣೊಗು ಪೊತ್ತಯಿ ನಂದಲ ತೆಕ್ಕುಂಡು.ನಿನೆ ತೆಕ್ಕ್ಂಡ್,ಶಾಂತ ಆಂಡ್ಂದ್ ಅವು ಅಪ ಶಕುನಂದ್ ಗೆರೆಪೆರೆ ಬಲ್ಲಿ,ನಂಬೊಳಿಗೆ ಕಳೆಯೊನೆರೆ ಬಲ್ಲಿ.ಅವೆನ್ಲ ಮೀರ್ ನ‌ ದೇವೆರುಪ್ಪುನಗ ದೇವೆರೆ ಮಿತ್ತ್ ನಂಬಿಕೆ ದೀಕ".

             

          ದೇವೆರೆ ಆರಾದನಾ ಕೆರಮನೇ ಬೇತೆ.ದೈವೊಲೆ ಆರಾದನಾ ಕೆರಮೊನೇ ಬೇತೆ.ಮಂತ್ರ ಮುಖೆನ ಪೂಜೆ,ಷೋಡಷೋಪಚಾರ ದೇವೆರೆ ಆರಾದನೆಯಾಂಡ,ಪದಿನಾಜಿ ಕಟ್ಲೆ ಸಂದಿ ಪಾಡ್ದನದ ಒರುಟು ನಡಪುನವು ದೈವಾರಾದನೆ.ದೇವೆರೆ ಆರಾದನೆನ್ ದೇವೆರೆ ಆರಾದನೆಯಾದೇ ಮಲ್ಪುಗ,ದೈವದ ಆರಾದನೆನ್ ದೈವದ ಆರಾದನೆದ ಕೆರಮೊಡೆ ಮಲ್ಪುಗ.ದೇವೆರೆ ಆರಾದನಾ ಕೆರಮೊನು,ಅಷ್ಟಮಂಗಲ ಪ್ರಶ್ನೆ ಚಿಂತನೆನ್,ಬ್ರಹ್ಮ ಕಲಶೊನು ದೈವಾರಾದನೆಗ್ ಕನಪುನ ಬೊಡ್ಚಿ.ದೈವದ ಅಣಿತ ಒರು,ಜೀಟಿಗೆ,ದಂಡಮಾಲೆಲೆನ್ ದೇವೆರೆ ಆರಾದನಾ ಕೆರಮೊಲೆಗ್ ಕನಪುನ ಬೊಡ್ಚಿ

      

      ಅಷ್ಟ ಮಂಗಲ ಪನ್ಪುನವು ಕೇರಳ ಜ್ಯೋತಿಷ್ಯ ವಿಧಾನ.ಕೇರಳ ಜ್ಯೋತಿಷ್ಯ ವಿಧಾನದ ಅಷ್ಟಮಂಗಲ ಪ್ರಶ್ನೆ ಚಿಂತನೆದ ಅಧಿಕೃತ ಮಾಹಿತಿದ ಬೂಕುನು1649 ಟು ತಲ್ಶೇರಿ ಎಡಕಾಡ್ ದ ಜ್ಯೋತಿಷಿ ನಾರಾಯಣನ್ ನಂಬೂದರಿ ಪನ್ಪುನಾರ್ ಬರೆತೆರ್.ಅಷ್ಟಮಂಗಲದ ದ್ರವ್ಯೊಲು-ಪೇರ್,ಕೊಜಪು,ಪೆತ್ತದ ನೆಯ್ ಪಾಡ್ದ್ ಪೊತ್ತಾಯಿನ ಕಂಚಿದ ತುಡರ್,ಕನ್ನಡಿ,ಪುಸ್ತಕ,ಬಂಗಾರ್,ಪಲವಸ್ತು,ಬೊಲ್ದು ಕುಂಟು.ಅಷ್ಟ ಮಂಗಲೊಡು ಪ್ರಶ್ನೆ ದೀನಗ 108ಕವಡೆಲೆನ್ ಗಲಸುವೆರ್.ಅಷ್ಟ ಮಂಗಲೊಡ್ಲ ಸರಿ ಸಂಖ್ಯೆ ಬತ್ತ್ಂಡ ಹಾಳ್,ಮುಗುಳಿ ಸಂಖ್ಯೆ ಬತ್ತ್ಂಡ ಎಡ್ಡೆ.ದೈವದ ಕಲೊಟ್ಲ ಕಟ್ಟ್ ದ್ ಬತ್ತ್ಂಡಾ,ಸಿರ್ದ್ ದ್ ಬತ್ತ್ಂಡಾಂದ್ ಸಕನ ತೂಪ.ಆಂಡ ದೈವಾರಾದನೆಗ್ ಅಷ್ಟಮಂಗಲದ ಸಂಖ್ಯಾಶಾಸ್ತ್ರದ ಅಗತ್ಯ ಇಜ್ಜಿ. 

ಅಷ್ಟ ಮಂಗಲೊಡು ಅಷ್ಟ ದಿಕ್ಪಾಲೆರೆನ್ ನೇರ್ಪು ಮಲ್ಪುವೆರ್.ಎಣ್ಮ ದಿಕ್ಕ್ ಡ್ದ್ ಲ ಎಡ್ಡೆ ಆಪುಲೆಕ ತೂಪೆರ್.

ಮೂಡಾಯಿ/ಪೂರ್ವ,

ಪಡ್ಡೇಯಿ/ಪಶ್ಚಿಮ,

ತೆನ್ಕಾಯಿ/ದಕ್ಷಿಣ

ಬಡಕಾಯಿ/ಉತ್ತರ

ಬಲಕರೆ/ಮೂಡ್ತೆನ್ಕ/ಆಗ್ನೇಯ,

ಪಡ್ತೆನ್ಕ/ಬಲ್ಯ,ನೈರುತ್ಯ,

ಮೂಡ್ಬಡ/ದತ್ತಕರೆ/ಈಶಾನ್ಯ,

ಪಡ್ಬಡ/ಯಾರ/ವಾಯುವ್ಯ 

_ಉಂದು ಆ ಎಣ್ಮ ದಿಕ್ಕ್ ಲು.

ಮೂಡ್ಬಡ ಪಂಡ ಮೂಡಾಯಿ ಬಡಕಾಯಿದ ನಡುತ ದಿಕ್ಕ್.ದತ್ತಕರೆಂದ್ ಲ ಪನ್ಪೆರ್. ಪಡ್ಬಡ ಪಂಡ ಪಡ್ಡೇಯಿ ಬಡಕಾಯಿದ ನಡುತ ದಿಕ್ಕ್.ಯಾರ ಪಂಡ್ ದ್ ಲ‌ ಪನ್ಪೆರ್. ಮೂಡ್ತೆನ್ಕ ಪಂಡ ಮೂಡಾಯಿ ತೆನ್ಕಾಯಿದ ನಡುತ ದಿಕ್ಕ್.ಬಲಕರೆಂದ್ ಲ ಪನ್ಪೆರ್,ಪಡ್ತೆನ್ಕ ಪಂಡ ಪಡ್ಡೇಯಿ ತೆನ್ಕಾಯಿದ ನಡುತ ದಿಕ್ಕ್. ಬಲ್ಯ ಪಂಡ್ ದ್ ಲ ಪನ್ಪೆರ್.

ಅಷ್ಟ ಮಂಗಲೊಡು ದಕ್ಷಿಣಾ ಮೂರ್ತಿ ಮುಖೇನ ಪೂಜೆ ಸುರು.ದಕ್ಷಿಣಾ ಮೂರ್ತಿ ಪಂಡ ಇಸರ ದೇವೆರೆ ಗುರು ರೂಪ. ವೈದಿಕೆರ್ ರಾಶಿ  ಚಕ್ರದ ಪೂಜೆ ಮಲ್ತಿ ಬೊಕ್ಕ ಜೋಯಿಸೆರ್ ಒಂಜಿ ಆಣ್ ಬಾಲೆನ ಇಜ್ಜಾ ಪೊಣ್ಣು ಬಾಲೆದ ಕೈಟ್  ಬಂಗಾರ್ದ ಪಾವೊಲಿ ಕೊರ್ದು ಅಷ್ಟ ಮಂಗಲದ ಪದ್ರಾಡ್ ಕೋಣೆದುಲಯಿ ಅವೆನ್ ಪಾಡೆರೆ ನಿಕ್ಲೆಗ್ ಇಷ್ಟ ಆಯಿ ಜಾಗೆಡ್ ಪಾಡ್ಲೆಂದ್ ಪನ್ಪೆರ್.ಪಣವು ದೀನ ಕೋಣೆದ ಆದಾರೊಡು,ಸಕನದ ಆದಾರೊಡು ಪ್ರಶ್ನೆ ಚಿಂತನೆ ಮಲ್ಪುವೆರ್.

ಅಷ್ಟ ಮಂಗಲ ಪ್ರಶ್ನೆ ಚಿಂತನೆನ್ ದೇವತಾರಾಧನೆದ ಬಗೆಟ್ ಪಿಂದೊನೆರೆ ಪ್ರಶ್ನೆ ಚಿಂತನೆ ಮಲ್ಪುವೆರ್.ಇನಿ ಅವು ದೈವಾರಾಧನೆಗ್ಲ ತನ್ನ ಕೈ ನೀರ್ನವು ದೈವಾರಾದನೆದ ದುರಂತಂದೇ ಪನೊಲಿ.ದೇವೆರೆ ಇಚಾರ ,ದೇಲ್ಯದ ಜಾಗೆದ ಇಚಾರ ತೆರಿಯೆರೆ ಗಳಸುನ ಈ ಪ್ರಶ್ನಾ ಚಿಂತನೆನ್ "ಅಷ್ಟಮಂಗಲ ದೇವ ಪ್ರಶ್ನೆಂದೇ ಪನ್ಪೆರ್".ದೇವಾಲ್ಯೊಡು ನಡಪುನ ಪೂಜೆ ಪುನಸ್ಕಾರ,ಉಚ್ಚಯೊಲು ಸರಿಯಾದ್ ನಡಪುಂಡಾ,ಅತ್ತ್ ನಡಪಾವುನಕುಲು ತತ್ತ್ ದೆರಾ ,ಒವೆನ್ ಮಲ್ತೆರ್ಡ ದೇವೆರೆಗ್ ತೃಪ್ತಿಯಾವು,ದೇಲ್ಯದ ಆದ್ಯಾತ್ಮಿಕ ವಾತಾವರಣದ ಸ್ಥಿತಿ ಗತಿ ಎಂಚ ಉಂಡು ಈ ಇಚಾರೊಲೆನ್ ತುಲಿಪೆರೆ ಅಷ್ಟ ಮಂಗಲ ಪ್ರಶ್ನೆ ದೀವೊಡು ವಿನಃ ಮಾಯೆರ್ದ್ ಜೋಗೊಗು ಬರ್ಪುನ ದೈವದ ಬಗೆಟ್ ತೆರಿಯೆರೆ ಅಷ್ಟಮಂಗಲ ಪ್ರಶ್ನೆ ದೀಪುನತ್ತ್.

ದೈವೊಲೆಗ್ ವೈದಿಕ ವಿಧಿ ವಿಧಾನದ ರಾಶಿ ಪೂಜೆ ಮಂತ್ರ ಅರ್ಪಣ,ತರ್ಪಣ ಒವುಲಾ ಇಜ್ಜಿ.ಅವುಲು ಬೋಡಾಯಿನಿ ಸಂದಿ ಪಾಡ್ದನ,ಪೆರಿಯಾಕ್ಲೆ ಪೂವರಿ ಮದಿಪು,ಪದಿನಾಜಿ ಕಟ್ಲೆಲು.ಸಂಕೋಚ ಇಜ್ಜಂದಿ ದೈವೊಲೆಗ್ ಬಾಲಾಲಯ ಇಜ್ಜಿ.ದೈವೊಲು ನೆನೆತಿ ಜಾಗೆಗ್ ಬರ್ಪುನೆಡ್ದಾದ್ ದೈವೊಲೆಗ್ ಪ್ರಾಣ ಪ್ರತಿಷ್ಠೆ,ಬಿಂಬ ಪ್ರತಿಷ್ಠೆ,ಪುನಃಪ್ರತಿಷ್ಠೆ ಪೂರಾ ಇಜ್ಜಿ.ದೈವಾರಾದನೆದ ಮೂಲ ಚಾಕಿರಿ ಮದತ್ ಪೋಯಿನೆರ್ದಾದ್ ಅಕುಲು ಮಂತಿನ ಪೂಜಾ ವಿಧಿ ವಿದಾನದ ಪಿರವು ದೈವಾರಾದನೆನ್ ಕೊನೊವೊಂದುಲ್ಲೆರ್.ಪಾರಿ ಪಾಡ್ದನದ ದೈವೊಲೆಗ್ ಸಂಸ್ಕೃತದ ಮಂತ್ರ ತಂತ್ರ ಅಗತ್ಯ ಇಜ್ಜಿ.

   ತುಳುನಾಡ  ಕೇರಳದ ಕಾಸರಗೋಡು ಜಿಲ್ಲೆದ ಒಂಜಾತ್ ಜಾಗೆಲೆಡ್,ತುಳುನಾಡ ಕುಡ್ಲ,ಒಡಿಪುದ ಒಂಜಾತ್ ಜಾಗೆಲೆನ್ ಬುಡ್ಂಡ ಒರಿನಂಚ ಅಷ್ಟ ಮಂಗಲ ಪ್ರಶ್ನೆ ,ತಾಂಬೂಲ ಪ್ರಶ್ನೆ,ಸ್ವರ್ಣ ಪ್ರಶ್ನೆ ಆವಡ್,ಬ್ರಹ್ಮ ಕಲಶ ಆವಡ್ ಭಾರತದ ವಾ ರಾಜ್ಯೊಡ್ಲ ತೂಯೆರೆ ತಿಕ್ಕುಜಿ.ಕೆಲವೊರ ಅಷ್ಟ ಮಂಗಲೊಡು ತಿಕ್ಕಂದಿನವು ಊರ್ದ ಜೋಯಿಸೆರೆ ಪ್ರಶ್ನೆಡ್ ತಿಕ್ಕು.ಅಷ್ಟ ಮಂಗಲ ಪ್ರಶ್ನೆ ಆದ್ ರಡ್ಡ್ ವರ್ಸೊಡು ಸಾನ ಲಕ್ಕುಂಡು ಪಂಡ್ ದ್ ನಾಲ್ ವರ್ಸಾಂಡಲಾ ಸಾನ ಲಕ್ಕಂದೆ ಇತ್ತಿ ಜಾಗೆಲ ಉಂಡು. ಕಲೊಟು ದೈವ ಉಂಡಾಪುನಿ ಪಂಡ ಮಾಯೆದ ದೈವೊಲು ಜೋಗದ ಮಾನಿನ ಮಿತ್ತ್ ಬರ್ಪುನಿ.ಅಡೆಗ್ ಬಿಂಬ ಪ್ರತಿಷ್ಠೆ, ಅಷ್ಟ ಮಂಗಲ ಪ್ರಶ್ನೆದ ಅಗತ್ಯ ಇಜ್ಜಿ.ದೇವೆರೆ ಸಾನೊಡು ದೇವೆರೆ ಮೂರ್ತಿ ಅವ್ಲೇ ಇತ್ತ್ಂಡ ದೈವದ ಭಂಡಾರದಿಲ್ಲಲ್ ರ್ದ್ ದೈವ ಸಾನೊಗು ಕಿರ್ವಾಲ್ ಬತ್ತ್ ದ್ ಭಂಡಾರ ಏರ್ಂಡಲ ದೈವ ಕಲೊಟು ಉಂಡಾಪುನಿ,ನಮ್ಮ ಬೇನೆ ಬೆಸರ್ ನ್ ಮಾಜಾವುನಿ.ದೈವೊಲೆ ಮಾಯಾ ಗೋಚರೊಗು ತೆರಿಯಂದಿನ ವಾ ಪ್ರಶ್ನೆದಕ್ಲೆಗ್ಲಾ ತಿಕ್ಕಂದ್.ದೈವಾರಾದನೆಡ್ ಪಿಂಗಾರ ಪುರ್ಪ,ಬಚ್ಚಿರೆ,ತಾರಾಯಿಡ್ ಸಕನ ತೂಂಡ ಅಷ್ಟ ಮಂಗಲ ಪ್ರಶ್ನೆಡ್ಲ ಸಕನ ತೂದೇ ಫಲ ಪನ್ಪುನಿ.ಅಕುಲು‌ ಸಾದಿಡೆ ಬನ್ನಗ ತಿಕ್ ನ ಪೂರ ಸಕನೊನ್ಲ ಲೆಕ್ಕಾಚಾರ ಪತೊಂದು ಪ್ರಶ್ನೆ ಚಿಂತನೆ ಮಲ್ಪುವೆರ್.ತಿನೆರೆ,ಪರೆರೆ ಕೊರ್ನೆನ್ಲ,ಸಾದಿಡೆ ವಾನೊಡು ಬನ್ನಗ ತೋಜಿ ಸೊತ್ತುನೆನ್ಲಾ ಸಕನದ ಲೆಕ್ಕೊಗು ಪತ್ತುವೆರ್.ಅಕ್ಲೆನ ಎದುರು ಕಿನ್ಯ ಪ್ರಾಯದ ಒಂಜಿ ಬಾಲೆನ್ ಕುಲ್ಲದಿತ್ತ್ ದ್ ಆ ಬಾಲೆಡ ಅಪಗಪಗ ದಾದಾಂಡಲ ಕೇನೊಂದಿಪ್ಪುವೆರ್.ಬಾಲೆ ತರೆ ಆಡಾವೊಂದಿಪ್ಪುಂಡು.ಅಕ್ಲೆಗ್ ಕವಡೆಡ್ ದುಂಬುದ,ಪಿರವುದ ತೋಜುಂಡು ಪಂಡ ಅಕುಲೆಗ್ ದೇಶೊಡು ಆಪುನ ಏತೋ ಅವಗಡೊನು ಉಂತಾವೊಲಿಯತ್ತೆ.ದಾಯೆ ಕೊರೋನ ಪನ್ಪಿ ಮಾರಿ ಬೀರಿ ಸೀಕ್ ಬನ್ನಗ ಬರ್ಪುನ ದುಂಬೇ ಮೊಕ್ಲೆಗ್ ಗೊತ್ತಾಯಿಜಿ.ಅವೆಕ್ ಓಲಕುಲು ಪರಿಹಾರ ಪಂತೆರ್?.ಅವ್ವೇತೋ ಪೊಪುನ ಜೀವೊಲೆನ್ ಒರ್ತುದೊಲಿಯತ್ತ?.ದಾಯೆ ಕವಡೆಲೆನ್ ಪೂರ ಪೆಟ್ಯೆದುಲಯಿ ಪಾಡ್ದ್ ಮನಿಪಂದೆ ಕುಲ್ಲುದಿತ್ತೆರ್?.ಉಂದು ಪೂರ ನಮ ಅಲಚನೆ ಮಲ್ಪೊಡಾಯಿನ ಇಚಾರ.

  

  ಈ ದುಂಬಾಯಿನೆನ್ ಏರ್ಲಾ ತೂಯಿನಕ್ಲಿಜ್ಜೆರ್.ನನ ದುಂಬಾಪುನೆನ್ಲಾ ತೂಪುನಕ್ಲಿಜ್ಜೆರ್.ನಮ ನಮ್ಮ ದೈವದ ನುಡಿನ್ ಮದತ್ ದ್,ನಮ್ಮ ದೈವದ ನುಡಿತ ಮಿತ್ತ್ ಇಸ್ವಾಸ ದಾಂತೆ,ಕಟ್ಟುನಾಯೆ ಕೊರ್ನ ನುಡಿಂದ್ ಎನ್ನಿದ್ ನಮ ನಮ್ಮ ದೈವದ ಕಲೆ ಕಾರ್ನಿಕದ ಕಲ,ಮಣ್ಣ್ ನ್ ಮದತ್ ದ್, ತುಳುನಾಡ ದೈವೊಲ್ನ ಗಂದ ಗಾಳಿ ಗೊತ್ತಿಜ್ಜಂದಿನ ಕೇರಳ ಜ್ಯೋತಿಷ್ಯ ವಿದಾನದಕ್ಲೆಡ ನಮ್ಮ ದೈವದ ಬಗೆಟ್ ದೈವದ ಕಲೊಕಿಜ್ಜಾಂದಿ ಪ್ರಶ್ನೆಲೆನ್ ಕೇನೊಂದುಲ್ಲ‌.ನಮಡನೇ ಪ್ರಶ್ನೆ ಕೇಂದ್ ನಮಡನೆ ಉತ್ತರ ಬಾಯಿ ಬುಡ್ಪಾವುನ ಅಕ್ಲ್ ಬಿರ್ಸೆರ್ಲೆಕ ತೋಜುವೆರ್.ನಮ ನಂಬಿ ಸತ್ಯೊಲು ಮಾಯೆದ ಸತ್ಯೊಲು.ಅವೆತ ಚಿತ್ತೊಗು ಗೋಚರಾವಂದಿ ಪಿರಾಕ್ ದ ಇಚಾರೊಲು ಬಂಜಿಡ್ ಜನನ ಬೆರಿಟ್ ಮರಣ ಉಪ್ಪುನ ಜನಮಾನಿಗ್ ತೆರಿಯೆರೆ ಸಾಧ್ಯನೇ ಇಜ್ಜಿ.ನಮನ್ ನಂಬಿಸಾಯೆರೆ,ಅಕ್ಲೆ ಬಂಜಿ ದಿಂಜಾಯೆರೆ ಕುಸೇಲ್ ಡ್ ಇಂಚ ಪ್ರಶ್ನೆ ಚಿಂತನೆ ಮಲ್ಪೊಲಿ.ಆಂಡ ದೈವ ಚಿತ್ತ ಬೇತೆನೇ ಉಪ್ಪುಂಡು.ಅಷ್ಟ ಮಂಗಲ ಪ್ರಶ್ನೆನ್ ರಡ್ಡೆರ್ದ್ ನಾಲೈನ್ ದಿನ ಮುಟ್ಟ ಮೊಕ್ಲು ಒಯ್ಪುನಲ ಉಂಡು.ನಿಜವಾದ್ ಆತ್ ಉದ್ದೊಗೊಯ್ಪುನ ಅಗತ್ಯ ಇಜ್ಜಿ.ದಾಯೆ ಪಂಡ ಅಕ್ಲೆಗ್ ಕವಡೆ ತಿರ್ಗನಗ ಪೂರ ಗೊತ್ತಾಪುಂಡ ಆತ್ ಉದ್ದೊಗು ದಾಯೆ ಒಯ್ಪೊಡು?.ಕವಡೆ ಎದುರು ಪಿರ ದತ್ತ್ ಬಲತ್ ಗ್ ಒಯ್ಪೆರ್ನೇ ಅರ್ದ ದಿನ ದೆತೊನ್ನಲ ಉಂಡು.ಒರಿ ಪಂಡಿ ಪ್ರಶ್ನಾ ಚಿಂತನೆನ್ ಬೊಕೊರಿ ಒಪ್ಪುಜೆ.ಬೊಕ್ಕೊರಿ ಪನ್ನೆನ್ ಕುಡೊರಿ ಒಪ್ಪುಜೆ.ಅಕ್ಲೆ ನಡುಟೇ ಸ್ಪಷ್ಟತೆ ಇಜ್ಜಿ.ಬೊಕ ದಾದೆ ಮೊಕ್ಲು ಪರಿಹಾರ ಕೊರ್ಪುನಿ?.ಒರಿಯಗ್ ಪ್ರಶ್ನೆಡ್ ದೇವೆರ್ ತೊಜಿಂಡ ಅವ್ವೇ ಜಾಗೆಡ್ ಕುಡೊರಿ ಪ್ರಶ್ನೆ ದೀಂಡ ಆಯಗ್ ದೇವಿ ತೋಜುನಿ.ದೈವದ ಕಲೊಟು ಪ್ರಶ್ನೆ  ದೀನಗ ಪೊಣ್ಣ ರೂಪ ತೋಜುಂಡುಂದು ಒರಿ ಪಂಡೆಂಡ ಕುಡೊರಿ ಬತ್ತ್ ನಾಯೆ ಪ್ರಶ್ನೆ ದೀದ್ ಆಣ ರೂಪ ತೋಜೊಂದುಂಡು ಪನ್ಪೆ‌.ಉಂದು ಅಂದಾಜಿಗ್ ಕಲ್ಲ್ ದಕ್ಕುನಿ.ಫಲ ಬೂರ್ಂಡ ಬೂಂರ್ಡ್.ಆತೆನಾ ಅಕುಲು ದೈವೊನು ದೇವ,ದೇವಿ ಮಲ್ತ್ ದ್ ದೈವದ ಪುದರ್ ನ್ ಬದಲ್ತ್ ಬುಡ್ಪೆರ್.ಅಂಚ ಮಲ್ಪೆರೆ‌ ಮೊಕ್ಲೆಗ್ ಅವಕಾಶ ಕೊರ್ತ್ ನ್ನೇ ನಮ.ನಮ್ಮ ಅಮ್ಮನ್ ಅಮ್ಮೆಂದ್ ಪನಂದೆ ಏರೋ ಪಂಡಿ ಪುದರ್ಡ್ಅಮ್ಮನ್ ಲೆತ್ತೊಂದುಲ್ಲ.ಉಂದು ಪೂರ ದಾದ?.ಮೊಕ್ಲು ಪ್ರಶ್ನೆ ದಿನಗ ಕವಡೆಲೆನ್ ಪುರೆಲ್ತೊಂದು,ಒರಿಯನ ಮೇನೆನ್ ಒರಿ ಆಚಿರೊಡು ತೂವೊಂದು ದಶಮಾ,ಪಂಚಮ,ಗುರು,ಶನಿಂದ್ ಕೆಲವು ಮಂತ್ರೊಲೆನ್ ಪನೊಂದು ಅಕ್ಲಕ್ಲು ಪಾತೆರ್ನಗ ನಮಕ್ ಅಕ್ಲೆಡ ಮಲ್ಲ ವಿದ್ವತ್ತ್ ಉಂಡು ಪನ್ಪುಲೆಕ ಭಾವನೆ ಪುಟ್ಟವೆರ್.ಎಲ್ಯೆಲ್ಯ ಇಚಾರೊನು ಪತೊಂದು ಅವೆನ್ ಮಲ್ಲ ಮಲ್ತ್ ದ್ ಸೂಕ್ಷ್ಮ,ಅತಿ ಸೂಕ್ಷ್ಮಂದ್ ಪ್ರಶ್ನೆದ ಉಲಯಿ ಪೋಪ ಪನ್ಪೆರ್.ದಾದ ಉಲಯಿ ಪೊಪೆರಾ.ನಮ್ಮ ಇಲ್ಲದ ಕಬಟ್ ದ ಉಲಯಿಇತ್ತ್ ನ  ಪೂರ ಪಿದಯಿ ಪೋದು ಕಾಲಿಯಾನೇಟ ಮೊಕ್ಲೆನ ಉಲಯಿ ಪೋದು ಪಿದಯಿ ಬರ್ಪುನ ಮುಗಿಯುಜಿ. ನಿಕುಲು ದುಂಬು ಎಡ್ಡೆ ಆತರ್ಂದ್,ನಿಕ್ಲೆ ಜೋಕ್ಲೆರ್ದ್ ನಿಕುಲು ನನಲಾ ಎಡ್ಡೆ ಆಪರ್ಂದ್ ಪನ್ಪುನ ಪ್ರಶ್ನೆ ಚಿಂತಕೆರ್ ಓಲ್ಲಾ ತೂಯೆರೆ ತಿಕ್ಕುಜೆರ್.ಇಂಚ ಪನ್ಪುನ ಕೆರಮನೇ ಮೊಕ್ಲೆಗ್ ಗೊತ್ತಿಜ್ಜಿ.ಪ್ರತಿಯೊಂಜಿಲ ತಪ್ಪು ಮೊಕ್ಲೆಗ್.ದೀಪೊಗು ರಡ್ಡ್ ಬತ್ತಿ ಪಾಡ್ಂಡಲ ತಪ್ಪು,ನಾಲ್ ನಿನೆ ದೀಂಡಲ ತಪ್ಪು.ಕಡ್ಡಿ ಗಿರ್ನಗ ಒಂಜಿ ಕಡ್ಡಿಡ್ ತುಡರ್ ಅರ್ಲಾಯೆರೆ ಅಯಿಜಿಂಡಲ ತಪ್ಪು,ತುಡರ್ ಗ್ ಪಾಂತೆ ಬೂರ್ದು ಸೈತ್ಂಡಲಾ ತಪ್ಪು ,ಪ್ರತಿಯೊಂಜಿಲಾ ಮೊಕ್ಲೆಗ್ ತಪ್ಪಾದೇ ತೋಜುನಿ.

ಪ್ರಶ್ನೆ ದೀನ ಜೋಯಿಸೆರ್ ಇಂಚಿನನೇ ದೋಷಂದ್ ಪನ್ಪೆರ್ಂದ್ ನಮ ಒರೊರ ಲೆಕ್ಕಾಚಾರ ಪಾಡುವ.ಅಪಗ ಅಕುಲು ಅಂಚನೆ ದೋಷೊನು ಪನೊಡಾಪುಂಡು.ಪ್ರೇತ ಬಾದೆ,ಮಾಟ ಮಂತ್ರ,ಮರ್ದ್ ಪಾಡ್ನ,ನೀಚ ಸಗ್ತಿದ ಪ್ರಯೋಗ ದೋಷೊನು ಅಕುಲು ಪನೋಡೆ.ಅಂಚ ಪಂಡೆರ್ಡ ನಮಕ್ ಬಾರೀ ಕೊಸಿಯಾಪುಂಡು.ನಮಕ್ ತೊಂದರೆ ಬನ್ನಗ ಪ್ರಶ್ನೆ ದೀನ ಜೋಯಿಸೆರ್ ನಿಕ್ಲೆಗ್ ಏರಾ ಮಾಟ ಮಲ್ತ್ ದೆರ್ ಪಂಡ ನೆಮ್ಮದಿ.ನಿಜವಾದ್ ಬೆನೆರೆ ಪೋವಂದೆ ನಿಕ್ಕ್ ಇಂಚ ಬಂಙಾತ್ ನಿಂದ್ ಜೋಯಿಸೆರ್ ಪಂಡ ನಮಕಾಪುಜಿ.ನಮ್ಮ ಕೊರತೆನ್ ಆರ್ ಪ್ರಶ್ನೆಡ್ ದೆರ್ತ್ ಪತ್ಯೆರ್ಡ ನೆಮ್ಮದಿ. .ದೈವ ದೇವೆರೆಗ್ ನಿಕುಲು ಸರಿಯಾದ್ ನಡಪಂದೆ ಇತ್ತ್ ನೆಡ್ದಾದ್ ನಿಕ್ಲೆಗ್ ದೋಷ ಬತ್ತ್ಂಡ್ಂದ್ ಆರ್ ಪನೆರೆ ಸುರು ಮಲ್ಪುನಗ ಸೇರ್ನ ನಮ ಮೋನೆ ಮೋನೆ ತೂವೊಂದು ಅಂದ್ ಅಂದ್ಂದ್ ಪನ್ಪ.ಒರ ನಮ್ಮ ಪುಡಿ ಅಕ್ಲೆ ಕೈಕ್ ತಿಕ್ಂಡ ಮುಗಿಂಡ್ ಕತೆ.ಬೊಕ್ಕ ಅಕ್ಲೆ ತಾಳೊಗು ನಮ ನಲಿಪೊಡಾಪುಂಡು.ನಮ ಸರಿಯಾದ್ ದೈವದ ನುಡಿಕ್ ಬಿಲೆ ಕೊರ್ತುವಂಡ ನಮಕ್ ಇಂಚಾಯೆರೆ ಅವಕಾಶನೇ ಇಜ್ಜಾಂಡ್.ದೈವದ ನುಡಿ ಮದತ್ ದ್ ಮೊಕ್ಲೆನ ಪ್ರಶ್ನೆ ಚಿಂತನೆಗ್ ಪೊಯಿನೆಡ್ದಾತ್ರ ಅಕುಲು ಪನ್ನೆಕ್ ನಮ ತರೆ ಕೊರೋಡೆ.ಮೊಕ್ಲು ಕೊರ್ನ ದೈವದ ಆಯನೇ ತತ್ತ್ ದಿತ್ತ್ ದ್ ದೈವಾರಾದನೆ ಅಜ ತತ್ತ್ಂಡ್.

        ಮೊಕ್ಲೆ ಪ್ರಶ್ನೆ ಚಿಂತನೆಡ್ ನಮ ಇತ್ತ್ ನೆನ್ ಕಳೆಯೊಂದು ಪೋಪ,ಕೆಲವೊರ ಸಮ್ಮಂದೊನ್ಲ ಕಡಿತೊನುನ ಪರಿಸ್ಥಿತಿ ನಮಕ್ ಬರ್ಪುಂಡು..ಅಷ್ಟ ಮಂಗಲ ಪೂರ ಪ್ರಶ್ನೆಯಾದೇ ಒರಿಂಡತ್ತಂದೆ ನಮ ಅವೆಡ್ದಾದ್ ಇತ್ತ್ ನೆನ್ ಪೂರ ಕಳೆಯೊಂದು,ದಿಕ್ಕ್ ದೆಸೆ ತೋಜಂದೆ ಆನಗ ತರೆತಗ್ಗಾದ್,ಬೆರಿ ಬಗ್ಗಾದ್ ಪೋದು ಉಂತುನಿ ನಮ ನಂಬಿ ದೈವದ ಎದುರು.ಅವು ಕೊರ್ನ ಮೂಜಿರೆ ಗಂದೊಗು ನಮ್ಮ ಮಾತ ಕಷ್ಟೊನು ಮಾಜಾವುನ ಸಗ್ತಿ ಉಂಡತ್ತಂದೆ ದೈವ ಏಪಲಾ ನಮ್ಮ ಕೈ ಬುಡಂದ್‌.ಏಳ್ ಪೆರಯದ ಬಾಲೆರ್ದ್ ಎಳ್ಪ ಪೆರಯದವರೆಮುಟ್ಡ ದೈವದ ಕಲೊಕು ಪೋದು ದೈವೊಗು ಸಂಪೂರ್ಣ ಶರಣಾಗತಿಯಾಂಡ ದೈವ ಕೊರ್ಪುನ ಮೂಜಿರೆ ಗಂದ ನಮ್ಮ ಪಾಲ್ ದ ಮಲ್ಲ ಕಾಪಾದಿಪ್ಪುಂಡು.ದೈವದ ಕಲೆ ಕಾರ್ನಿಕ ತೆರಿಯಂದಿ ಕೆಲವು ಕಟ್ಟುನಕುಲು ಎನ್ನ ಮಾಯೆಗ್ ಗೋಚರಾವಂದಿನೆನ್ ಪ್ರಶ್ನೆ ಚಿಂತನೆಡ್ ಕೇಂದ್ ತೆರಿಲೆ ಪನ್ಪೆರ್.ನಿಜವಾಯಿನ ದೈವ ವಸಾಯೊಡಿತ್ತ್ಂಡ ಖಂಡಿತಾ ಜೋಗದ ಮಾನಿ ಅಂಚ ಪನೆರೆ ಸಾಧ್ಯನೇ ಇಜ್ಜಿ.ದೈವೊಗು ಗೋಚರಾವಂದಿನವು ಒವ್ಲಾ ಇಜ್ಜಿ.ಪ್ರಶ್ನೆ ಚಿಂತನೆದಕ್ಲೆಗ್ ನಮ್ಮ ದೈವೊಲು ದೇವ,ದೇವಿ ಸ್ವರೂಪಲಾದ್ ತೋಜಿದ್ ಅಕುಲು ನಮ್ಮ ದೈವೊಲೆನ್ ದೇವೆರ್ ಮಲ್ಪುನಗ  ನಮ ಅವೆನ್ಲಾ ಒತ್ತೊಂಡ,ಅಕುಲು ದೈವೊಲ್ನ ಮೂಲ ಪುದರ್ ಬದಲ್ಪುನಗಲ ಅಕುಲು ಪಂಡಿ  ದೈವದ ಪೊಸ ಪುದರ್ನ್ ಒತ್ತೊಂದು ಪೊಸ ಪುದರ್ಡೇ ದೈವೊಲೆನ್ ಲೆತ್ತೊಂದುಲ್ಲ.ಉಂದೊಂಜಿ ರೀತಿದ ಧಾರ್ಮಿಕ ಅಕ್ರಮಣ.ಕುಜಲ್ಡ್ ಕಟ್ಟ್ ದ್ ತುಂಡಾಯಿನಡೆಮುಟ್ಟ ಗೋಚರಾವಂದಿ ನಮ್ಮಕುಲೆ ಮನ್ಪುನ ಮತಾಂತರ ಪರಿಸ್ಥಿತಿ.

ಅಷ್ಟಮಂಗಲ ಆವಡ್,ಪ್ರಶ್ನೆ ಚಿಂತನೆಲಾವಡ್ ಮದ್ದೆನ 12 ಗಂಟೆದ ಉಲಯಿ ಮಲ್ತ್ ಮುಗಿಪೊಡು ಪನ್ಪಿ ಕೆರಮ ಉಂಡು.ಆಂಡ ಇನಿ ಕೆಲವು ಪ್ರಸ್ನೆ ಚಿಂತಕೆರ್ ಇಡೀ ದಿನ ಅಷ್ಟಮಂಗಲ ಪ್ರಶ್ನೆ ದೀಪುನಲಾ ಉಂಡು.ರಾಹುಕಾಲ, ಗುಳಿಗ ಕಾಲ, ಯಮಗಂಡ ಕಾಲೊಲಿತ್ತ್ ದ್ ಮದ್ದೆನ ರಡ್ಡರೆ ಗಂಟೆರ್ದ್ ದುಂಬು ಮುಗಿಪೊಡು.ಇನಿ ಈ ಪ್ರಶ್ನೆ ಚಿಂತನೆದಕುಲು ರಾತ್ರೆ ಪತ್ತರೆ ಗಂಟೆ ಮುಟ್ಟ ಪ್ರಶ್ನೆನ್ ಉದೋಗು ಒಯ್ಪುವೆರ್.
          ಒವ್ವಾಂಡಲಾ ಮಿತಿ ತತ್ತ್ ದ್ ಅತಿಯಾದ್ ಪೋಂಡ ಒಂಜಾ ಅವ್ಲು ಒಡಕ್ ಬರ್ಪುಂಡು ಇಜ್ಜಾ ನಂಬೊಳಿಗೆ ಕಮ್ಮಿ ಅವೊಂದು ಪೋಪುಂಡು,ಇಜ್ಜಾ ಉಂತುದೇ ಪೋಪುಂಡು.ಒಂಜಿ ಕಾಲೊಡು ಅವ್ಲೊಂಜಿ ಮೂಲೊಂಜಿಂದ್ ಆಶ್ಲೇಶ ಬಲಿ,ನಾಗಮಂಡಲಂದ್ ನಡತೊಂತ್ಂಡ್.ಅವೆರ್ದ್ ಬೊಕ್ಕ ಬ್ರಹ್ಮ ಮಂಡಲ ಸುರಾಂಡ್.ತಿಕ್ ನೌಲು ಪೂರ ನಾಗ ಮಂಡಲ ಸುರಾದ್,ಕಡೆಕ್ ವಿಚಾರವಾದಿಲು ಬರವು,ಬಾಷಣೊಲೆಡ್ ಅವೆತ ಸಾದಕ ಬಾದಕ ತೆರಿಪಾಯಿ ಬೊಕ್ಕ ಇತ್ತೆ ನಾಗಮಂಡಲ ಬಾರೀ ಕಡಿಮೆಯಾತ್ಂಡ್.ಆಂಡಲ ಆಲಡೆಲೆಡ್ ನಡತೊಂತಿ ಡಕ್ಕೆ ಬಲಿ ಇನಿಲಾ ಕಟ್ಟ್ ಪ್ರಕಾರವಾದೆ ನಡತೊಂದುಂಡು.ತುಳುವೆರ್ ನಾಗಗ್ ತನು ಮೈತೊಂತೆರ್,ಅವುಲಾ ಕಾಚೆಲ್ ದ ಬೇಸ ಸಂಕ್ರಾಂತಿಗ್ ತನು ಮೈತೊಂತೆರ್.ಬೇಸ ಸಂಕ್ರಾಂತಿದಾನಿ ರಾತ್ರೆ ಅಗೆಲ್ ಪಾಡೊಂತೆರ್‌.ದಾಯೆ ಪಂಡ ಬೊಕ್ಕ ಬೆನ್ನಿ ಸಾಗೊಳಿ ಸುರಾಪುಂಡು. ಆಶ್ಲೇಶ ಬಲಿ ಮಲ್ಪುನಗ ಅಡೆ ಬತ್ತಿನಾರ್ ಒಂಜಿ ನಾಗದರ್ಶನ ಮಲ್ಪಲೆ ಪಂಡೆರ್.ತುಳುವೆರ್ ಮಲ್ಪಾಯೆರ್.ಅವುಲು ನಾಗದರ್ಶನದಾರ್ ಪಂಡೆರ್,ನಾಗೆ ಪ್ರಸನ್ನೆ ಆತೆ ನಿಕುಲು ನಾಗಮಂಡಲ ಮಲ್ಪಲೆಂದ್.ಕೆಲವೆರ್ ಮಲ್ಪಯೆರ್.ಆಂಡ ಮೊಕ್ಲೆನ ಅಬತಾರ ಜಾಸ್ತಿಯಾನಗ ತಡೆಯೆರೆ ತೀರುಜಿಂದಾನಗ ತುಳುವೆರ್ ನಾಗಮಂಡಲ ಮಲ್ಪಾವುನೆನ್ ಕೈ ಬುಡಿಯೆರ್.ತಿಕ್ ನೌಲು ಪೂರ ಆವೊಂತಿ ನಾಗ ಮಂಡಲ ಇನಿ ತೂಯೆರ್ನೇ ತಿಕ್ಕೊಂದಿಜ್ಜಿ.ಅತಿಯಾಂಡ ಅಮುರ್ತಲ ಇಸ ಆಪುಂಡುಗೆ.ದೈವಾರಾದನೆಲ ಅಂಚನೆ ಆವೊಂದುಂಡು.ಒಂಜಿ ಕಾಲೊಡು ಪದಿನಾಜಿ ಕಟ್ಟ್ ಕಟ್ಲೆಡ್,ಪದಿನಾಜಿ ಚಾಕಿರಿ ವರ್ಗೊಡು,ಪದಿನಾಜಿ ವರ್ಸಾದಿ ಕಟ್ಟ್ ಡ್ ನಡತೊಂತಿ ನೇಮ ನೆರಿ ಕೆಲವೊಂಜಿ ತಿಕ್ ಡ್ ಮೂಲ ಸ್ವರೂಪೊಡೇ ಒರಿದ್ಂಡ್.ಕೆಲವೆರ್ ದೈವದ ಕಲೊಕು ಅಷ್ಟಮಂಗಲ ಪ್ರಶ್ನೆ ದೀಪಾದ್,ದೈವೊಲೆಗ್ ಬ್ರಹ್ಮ ಕಲಶ ಮಲ್ಪಾದ್ ದೈವೊಲೆ ಕಟ್ಲೆಲೆನ್ ಪೊಲಿತ್ ದ್ ಪರತ್ ನ್ ನಿಗಿತ್ ದ್ ಪೊಸತ್ ನ್ ತೋಡೆರೆ ಪೋದು ಪದಿನಾಜಿ ಚಾಕಿರಿ ವರ್ಗ ದೈವದ ಕಲೊರ್ದು ದೂರಾಪುನ ಪರಿಸ್ಥಿತಿ ಬೈದ್ಂಡ್.ಅಂಚಾದ್ ದೈವೊಲಿನಿ ಮೆರವಣಿಗೆಡ್,ನಾಟಕ,ಆಟ,ದಾರಾವಾಹಿ,ಸಿನೆಮೊಲೆಡ್ ಬರ್ಪುಲೆಕಾಂಡ್.ಧರ್ಮೆತ್ತಿ ತುಳುನಾಡ ಮಣ್ಣ್ ಗ್ ಗಟ್ಟ ಜತ್ತ್ ಬೈದ್ ನ ದೈವೊಲೆನ ಗಡಿಪುಡೆತ ವ್ಯಾಪ್ತಿನ್ ತೆರಿಯಂದಿನ ಕಟ್ಟುನಕುಲು ಗಟ್ಟದ ಮಿತ್ತ್ ದೈವೊಲೆನ್ ಕೊನೊದು ಕುಂಬರ್ದ್ ಅಣ್ ಪೊಣ್ಣು ಪೂರ ಕುಂಬರ್ರೆ ಸುರು ಮಲ್ತ್ ದ್ ದೈವಾರಾದನೆಗ್ ಪೆಟ್ಟ್ ಬೂರೊಂದುಂಡು.ಇಂಚನೇ ಅವೊಂದು ಪೋಂಡ ದೈವಾರಾದನೆಲ ಒಂಜಾತ್ ಕಾಲೊರ್ದು ಬೊಕ್ಕ ಉಂತುದು ಪೋವು.ಕೊರೊನ ಸೀಕ್ ಬತ್ತಿಪ್ಪುನಗ ನಡತೊಂತಿನ ಸಂಕ್ರಾಂತಿ ಕರಿಪುನ,ಅಗೆಲ್ ಪಾಡುನ ಕೆರಮ ಮಾತ್ರ ಒರಿದ್ ಬರು.

  

         ದೇವೆರೆ ಜಾಗೆಡ್ ಅಷ್ಟ ಮಂಗಲನಾ,ತಾಂಬೂಲ ಪ್ರಶ್ನೆನಾ, ,ಸ್ವರ್ಣ ಪ್ರಶ್ನೆನಾ ದೀವಡ್,ಬ್ರಹ್ಮಕಲಶನಾ ಮಲ್ಪಡ್.ಆಂಡ ದೈವದ  ಕಲೊಕು ಅಷ್ಟಮಂಗಲ ಪ್ರಶ್ನೆಲಾವಡ್,ಬ್ರಹ್ಮ ಕಲಶ ಆವಡ್ ಇಜ್ಜಿ.ದೈವೊಲೆಗ್ ಬಲ್ಯಾಯನ ನಿಮಿತ್ತ ನೋಟ ಉಪ್ಪುನಿ‌.ತುಳುವೆರ್ ಬುದ್ಯಂತೆರ್.ಒರೊರ ಅತಿ ಬುದ್ದಿವಂತಿಗೆ ತೋಜಾಯೆರೆ ಪೋದು ಕೆಲವೊಂಜಿ ನಂಬಿಕೆದ ಪ್ರಶ್ನೆ ಬನ್ನಗ ಬೇತೆಕ್ಲೆನ ಸುಳ್ಳು ಪ್ರಶ್ನೆಗ್ ಸೋಪುನೆಲ ಬೇಗ.ತುಳುವೆರ್ ತಾಕತ್ತ್ ಡ್ ಗಟ್ಟಿಗೆರ್.ಆಂಡ ದೈವದ,ನಾಗನ ಇಚಾರ ಬನ್ನಗ ಒಂತೆ ಪೋಡಿವೆರ್ .ಏರಾಂಡಲಾ ಮೊಕ್ಲೆನ ಪೋಡಿಗೆನ್ ಮೊಕ್ಲೆನ ಮೋನೆದ ಸೊಬಾವೊಡು ತೆರಿದ್ ಪ್ರಶ್ನೆಡ್ ಪನ್ನಗ ಮೊಕ್ಲೆಗ್ ಅಕುಲು ಅಂದಾಜಿಗ್ ಗುಂಡು ಹಾಕಿನ ಒರೊರ ಸತ್ಯಂದ್ ತೋಜಿನಗ ಪೋಡಿವೆರ್.ಅಪಗ ಈ ಪ್ರಶ್ನೆ ಚಿಂತನೆದಕುಲು ಮೊಕ್ಲೆನ ಜುಟ್ಟುನು ಪತೊಂದು ನನಲಾತ್ ಪೋಡಿಕಟ್ಟಾದ್ ಬಗ್ಗವೆರ್.

  ಅಷ್ಟಮಂಗಲಾದಿ ಪ್ರಶ್ನೆ ಚಿಂತನೆಡ್ ತೋಜುನ್ನೇ ಶಾಪೊಲು ದೋಷೊಲು.ಬ್ರಹ್ಮ ಶಾಪ,ಬ್ರಹ್ಮ ರಾಕ್ಷಸ ದೋಷ, ನಾಗ ದೋಷಂದ್.ನಾಗ ದೋಸೊಡು ನಿಕ್ಲೆ ಕುಟುಮದ ಒಂಜಿ ವ್ಯಕ್ತಿನ ಕಣ್ಣ್ ಪೋತ್ಂಡತ್ತೆ,ನಾಗ ದೋಸೊಡು ನಿಕ್ಲೆ ಇಲ್ಲಲ್ ಒರಿಯಗ್ ಮದಿಮೆ ಆತ್ ಜತ್ತೆ, ನಾಗ  ದೋಷೊಡು ನಿಕ್ಲೆ ಕುಟುಮದ ಒರ್ತಿಗ್ ಜೊಕ್ಲಾತ್ ಜತ್ತೆ,ನಿಕ್ಲೆ ಕುಟುಮೊಡು ಒರಿ ಬೇತೆ ಜಾತಿದ ಪೊಣ್ಣನ್ ಮದಿಮೆ ಅತೆತ್ತೆ,ನಿಕ್ಲೆನ ಕುಟುಮೊಡು ಒರ್ತಿ ನೀರ್ ಗ್ ಬೂರ್ದು ಸೈತಲತ್ತೆ,ನಿಕ್ಲೆ ಕುಟುಮೊಡು ಒರಿಯಗ್ ಇಸ ತಾಗ್ ದ್ಂಡತ್ತೆ,ನಿಕ್ಲೆ ಕುಟುಮೊಡು ಒರ್ತಿಗ್ ಸೂ ತಾಗ್ ದ್ಂಡತ್ತೆ ,ಇಂಚ ಪೂರ ಪ್ರಶ್ನೆದ ಮಿತ್ತ್ ಪ್ರಶ್ನೆನ್ ಪಾಡುವೆರ್.ಅಪಗ ನಮ ನಮನೆ ಒರಿಯೊರಿಯನ್ ಲೆಕ್ಕಾಚಾರ ಪಾಡ್ನಗ ಅಂದ್ಂದಾಪುಂಡು.ಅವೆನೇ ಅಕ್ಲ್ ಗಟ್ಟಿ ಪತೊನ್ವೆರ್.ಪ್ರತಿಯೊಂಜಿ ಕುಟುಮಲ ಮಲ್ಲ ಇತ್ತ್ ದ್ ಆತ್ ಮಲ್ಲ ಕುಟುಮೊಡು ಇಂಚಿನ ಎಲ್ಯೆಲ್ಯ ಇಚಾರ ಉಪ್ಪುನೆನ್ ಮೊಕ್ಲು ಮಲ್ಲ ದೋಸಂದ್ ತೋಜಾವೆರ್.ನಾಲ್ನೂದು ಐನೂದು ಜನ ಉಪ್ಪುನ ಕುಟುಮೊಡು ಇಂಚಿನ ಒಂಜೊಂಜಿ ಒಡಕಿಪ್ಪುನ ಸಾಮಾನ್ಯ.ಸರಿಯಾದ್ ತೂಂಡ ನಮಕ್ ಈ ಸೂಕ್ಷ್ಮೊಲು ತೆರಿದುಪ್ಪುಂಡು.ನಮ ಅಕ್ಲೆನ ಬಾಯಿಗ್ ಬೂರ್ದು ಬರೆಲುವ ಆತೆ.

   

 ಎಚ್ಚಾದ್ ಈ ಪ್ರಶ್ನೆ ಚಿಂತನೆದಕುಲು ನಾಗನ ಬೊಕ್ಕ ದೈವದ ಇಚಾರೊಡೇ ನಮನ್ ಪೋಡಿ ಕಟ್ಟಾವುನಿ.ಮಲ್ಲ ಬುದ್ಯಂತೆರ್ ಎಲ್ಯ ಬುದ್ಯಂತೆರೆನ್ ಸೋಪಾವುನ ವ್ಯವಸ್ಥೆ ಈ ಅಷ್ಟಮಂಗಲ.ನಮ್ಮ ಪಾಲ್ ಗ್ ನಷ್ಟ ಮಂಗಲಲ ಅಂದ್. ದೈವದ ಸಾನ ಪೊಳಿತ್ ದ್ ದೈವಸಾನದ ಮಣೆ ಮಂಚ,ಉಜ್ಜಾಲ್,ಮರಮಟ್ಟ್ ಪೊತ್ತಾಯಿನ,ದೈವದ ಪಿರಾಕ್ದ ಮುಗ,ಸೊತ್ತುಲೆನ್ ಸುದೆತ ನೀರ್ ಗ್ ದಕ್ಕಾಯಿನ  ,ನಾಗನ ಬನೊಕ್ಶಲೆನ್ ಕಡ್ಪಾದ್ ಸಿಮೆಂಟ್ ದ ಕಟ್ಟೆ ಕಟ್ಟಾಯಿನ,ದೈವ ಸಾನೊರ್ದು ಮೂಲ ಚಾಕಿರಿದಕ್ಲೆನ್ ದಕ್ಕಾದ್ ವೈದಿಕೆರ್ ಸಂಕ್ರಾಂತಿ ಕರಿಪುನ ವಾ ಇಚಾರಲಾ ಅಷ್ಟ ಮಂಗಲ ಪ್ರಶ್ನೆಡ್ ತೋಜಿದ್ ಬರ್ಪುಜಿ.ದಾಯೆ ಪಂಡ ಅವು ಅಕ್ಲೆ ಸಂತಾನದಕುಲು ಮಲ್ತಿ ತಪ್ಪು.ಅವೆನಕುಲು ದೆಂಗದ್ ದೀವೊಡತ್ತೆ‌.ಅಂಚನೆ ಆನಿ ಸುದೆಟ್ ಬುಡ್ನ ನಾಗನ ಕಲ್ಲಾ,ದೈವದ ಮುಗನ ಕುಡೊಂಜಿ ಊರುಡು ಅವ್ವೇ ತುದೆ ಪರತೊಂದು ಪೋನಗ ಅವ್ಲವು ಏರೆನಾಂಡಲ ಕಣ್ಣ್ ಗ್ ಬೂರುಂಡ ಅವುಲ್ಲಾ ಒಂಜಿ ಪ್ರಶ್ನೆ ದೀದ್ ಸಾನ ಲಕ್ಕಾವೆರ್.ಅನಿ ನೀರ್ಡ್ ಬುಡ್ಪಾನಗಲ ಮೊಕ್ಲೆಗ್ ಲಾಭ,ಮೂಲು ಪೊಸತಾದ್ ನೀರ್ ಡ್ ಪೋಯಿನ ಮುಗ ಮೂರ್ತಿ ತಿಕ್ಕ್ ದ್ ಅವೆಕ್ ಪೊಸ ಸಾನ ಕಟ್ಟನಗಲ ಮೊಕ್ಲೆಗ್ ಲಾಭ.ಅತ್ತಂದೆ ಅಕ್ಲೆ ದೂರಾಲೋಚನೆ ಅಕ್ಲೆ ವಂಶದಕ್ಲೆಗ್ ಬದ್ ಕ್ ಕಟ್ಟ್ ದ್ ಕೊರ್ಪುನ ಆತೆ.ಅಂಚನೆ ಸಾನ ಗಿರಿತ್ ನಲ್ಪಲ ಬ್ರಹ್ಮ ಕಲಶ,ಅವ್ವೆ ಸಾನದ ಸೊತ್ತು ತುದೆಟ್ ಪೋದು ಏರೆಗಾ ತಿಕ್ಕ್ ದ್ ಪೊಸತ್ ಸಾನ ಆದ್ ಅವುಲ್ಲಾ ಬ್ರಹ್ಮ ಕಲಶ.ತುಳುವೆರೆ ನಂಬೊಳಿಗೆನ್ ಅಕುಲು ಅಕ್ಲೆಗ್ ಬೋಡಾಯಿಲೆಕ ಉಪಯೋಗ ಮಲ್ತೆರ್ಡಲಾ ತುಳುವೆರೆಗ್ ನನಲಾ ಅವು ಅರ್ಥ ಆತ್ ಜಿ,ಬೆಮ್ಮೆರೆನ್ ನಂಬಿನ ನಾಗರವಂಶದ, ನಾಗರಖಂಡದ ತುಳುವೆರೆಗ್ ಬ್ರಹ್ಮ ಶಾಪಲಾ ಇಜ್ಜಿ,ನಾಗ ದೋಷಲಾ ಇಜ್ಜಿ. 

    ಪ್ರಶ್ನೆ ಚಿಂತನೆದಕ್ಲೆಡ ಪ್ರಶ್ನೆಲೇ ಉಪ್ಪುನಿ ವಿನಃ.ಅಕ್ಲೆಡ ಉತ್ತರ ಉಪ್ಪುಜಿ.ನಮಡನೆ ಕುಸೇಲ್ಡ್ ಪ್ರಶ್ನೆ ಪಾಡ್ದ್ ನಮಡನೇ ಉತ್ತರ ದೆತೊಂದು ನಮನೇ ಅಕುಲು ಪನ್ಲೆಕ ಕೇನ್ಪಾವೆರತ್ತಂದೆ ಪ್ರಶ್ನೆಗ್ ಉತ್ತರ ತಿಕ್ಕ್ ನಗ ಪ್ರಶ್ನೆ ದೀಪಾಯಿನಾಯನ ಉತ್ತರ ಕ್ರಿಯೆಗ್ಲ ಒರೊರ ಪಣವು ದಾಂತಿಲೆಕಾವು.ಪ್ರಶ್ನೆ ದೀನಾಯನ ಇಲ್ಲ್ ಮಾಳಿಗೆ ಆವೊಂದು ಪೋಂಡ ಪ್ರಶ್ನೆ ಚಿಂತನೆದ  ಪರಿಹಾರ ಮುಗಿನಗ ದೀಪಾಯಿನಾಯನ ಇಲ್ಲ್ ಮಾರುನ ಪರಿಸ್ಥಿತಿ. ಏರಾಂಡಲಾ ಜೋಕ್ಲೆರ್ದ್ ಅಪ್ಪೆ ಅಮ್ಮೆ ಎಡ್ಡೆ ಆಯಿನ ಇಚಾರ ಮೊಕ್ಲೆನ ಪ್ರಶ್ನೆ ಚಿಂತನೆಡ್ ಬರ್ಪುಜಿ.ಅವುಲು ದೋಸೊಲೇ ತೋಜಿದ್ ಬರ್ಪುನಿ.ಬಲಿಮೆಡ್ ದೈವದ ಇಚಾರ ನೇರ ತೆರಿಯೊಂತ್ಂಡ ತುಳುನಾಡ ದೈವದ ಗಂದಗಾಳಿ ಗೊತ್ತಿಜ್ಕಂದಿ ಅಷ್ಟಮಂಗಲ ಪ್ರಶ್ನೆದಕುಲು‌ ದೈವದ ಬಗೆಟ್ ದಾದ ಪನೆರೆ ಸಾದ್ಯ?.ಮಾಯೆರ್ದ್ ಜೋಗದ ಮಾನಿನ ಮಿತ್ತ್ ಬರ್ಪುನ ದೈವೊನು ವಾ ಪ್ರಶ್ನೆ ಚಿಂತನೆದಾರೆಗ್ ಲ ಚಿಂತನೆ ಮಲ್ಪೆರೆ,ವಾ ತಂತ್ರಿಗ್ಲ ಪತ್ತೆರೆ, ತಾರಾಯಿಡ್ ಮಂತಿರ್ತ್ ದ್ ದೀಯೆರೆ ಸಾದ್ಯನೇ ಇಜ್ಜಿ.ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ.

  

ದೈವಸಾನೊಗು ಬೆರಿ ಪಾಡ್ದ್ ಕುಲ್ಲುದು ಪ್ರಶ್ನೆ ಚಿಂತನೆ ಮಲ್ಪುನಡೆ ಮುಟ್ಟ ಈ ಪ್ರಶ್ನೆ ಚಿಂತನೆದಕುಲು ಎತ್ಯೆರ್

         ಮಲ್ಲ ಮಲ್ಲ ಕುಟುಮದಕುಲು ದೀಪಾಯಿನ ಪ್ರಶ್ನೆ ಚಿಂತನೆಲೆಡ್ ನೀರ್ಡ್ ಬೂರ್ದು ಸೈತ್ ನ,ಸೂಟು ಪೊತ್ತ್ ದ್ ಸೈತ್ ನ , ಬಲ್ಲ್ ದೆತೊಂದ್ ಸೈತ್ ನ ಇಚಾರದ  ಬಗೆಟ್ ಮೊಕ್ಲು ಪನ್ಪೆರ್.ಆತೇ ಅತ್ತಂದೆ ಪ್ರಶ್ನೆದಕುಲು ಅಯಿಕ್ ಸಾರ ಪರಿಹಾರ ಬರೆಪಾದ್,ಮಲ್ಪಾದ್ ಬುಡ್ಪೆರ್.ಮಲ್ಲ ಅನುಕೂಲದಕ್ಲೆಗಾಂಡ ಮಲ್ಲೆತ್ತ್.ಬೋಡಾಯಿನಾತ್ ಅಕ್ಲೆಡ ಕಾಸಿಪ್ಪುಂಡು.ಲಕ್ಷ ಲಕ್ಷ ಕರ್ಚಿ ಮಲ್ಪೊಲಿ.ಪಾಪದಾಯೆ ಓಡೆ ಸೈಪುನಿ?.ಇನಿ ಮಲ್ಲ ಮಲ್ಲ ಪರಿಹಾರ ಪಂಡಿನ ಜೊಯಿಸೆರೆಗ್ ಮಲ್ಲ ಮಾನಾದಿಗೆ.ಕಡಿಮೆ ಪರಿಹಾರ ಪನ್ನ ಜೊಯಿಸೆರೆನ್ ಅರೆಗ್ ದಾಲ ತೆರಿಯಂದ್ಂದ್ ಏರ್ಲ ಲೆಪ್ಪುಜೆರ್.ದೈವದ ಕಲೊಟ್ಲ ಅಬತಾರ ಕಟ್ಟ್ ನಾಯಗ್ ಮಾನಾದಿಗೆ,ಸಾಂಪ್ರದಾಯಿಕವಾದ್ ಕಟ್ಟುನಾಯನ್ ಏರ್ಲ ಲೆಪ್ಪುಜೆರ್.ದುಂಬು ಪ್ರಶ್ನೆ ಚಿಂತನೆ ಮಲ್ತೊಂತಿ ಜೊಯಿಸೆರ್ ನಾಗಗ್ ಒಂಜಿ ತಂಬಿಲ ಕಟ್ಟಾಲೆ,ದೇವೆರೆಗೊಂಜಿ ಅಣ್ಣ್ ಕಾಯಿ ಕೊರ್ಲೆಂದ್ ಸರಳವಾದ್ ಪರಿಹಾರ ಪನೊಂತೆರ್.ಇನಿತ ಜೋಯಿಸೆರ್ ಚಂಡಿಕಾ ಓಮ ,ನಾಗಮಂಡಲ,ಅಶ್ಲೇಷ ಬಲಿ ಇಂಚಿನ ಮಲ್ಲ ಮಲ್ಲ ಪರಿಹಾರ ಪನ್ಪೆರ್.ಮಲ್ಲ ಮಲ್ಲ ಪರಿಹಾರ ಪನ್ಪೆರ್ಂದ್ ಪೊಡಿದ್ ಕೆಲವೆರ್ ಜಾತಕ ಜೋಯಿಸೆರೆಗ್ ತೋಜಾಯೆರ್ನೇ ಪೋಡಿವೆರ್.ಕೆಲವೊರ ತಿಕ್ ನ ಜೋಯಿಸೆರ್ನಡೆ ಪೂರ ಜಾತಕ ತುಂಬೊಂದು ಪೋದು ಅವು ಪೊಡಿಯಾದುಪ್ಪುಂಡು.ಅಯಿನ್ ತೂಯಿನ ಜೋಯಿಸೆರ್ ಈ ಜಾತಕ ಬಾರೀ ತಿಕ್ ಗ್ ಪೋದಿಪ್ಪೊಡು.ಉಂದೆಕ್ ಎಲ್ಯ ಪರಿಹಾರ ಪಂಡ್ ದ್ ಸುಖ ಇಜ್ಜಿ, ಮಲ್ಲ ಪರಿಹಾರ ಪಂಡ ಬೊಕ್ಕ ಓಲ್ಲ ಮೊಕ್ಲು ನನ ಜಾತಕ ಕೊನೊಯೆರೆ ಇಜ್ಜಿಂದ್ ಮಲ್ಲ ದೋಷ ಪಟ್ಟಿ ಮಲ್ತ್ ದ್ ಮಲ್ಲ ಪರಿಹಾರ ಪನ್ಪುನಲ ಉಂಡು.ಕೆಲವು ತಿಕ್ ಡ್ ಜೋಯಿಸೆರ್ನವ್ಲು ಪಿದಯಿ ಮಸ್ತ್ ಜನ ಪ್ರಶ್ನೆ ಕೇನೆರೆಂದ್ ಕುಲ್ಲುದಿಪ್ಪುವೆರ್.ಅಂಚಾದ್ ಒರ್ಯೊರಿಯಗ್ ಒಂಜೊಂಜಿ ಪರಿಹಾರ ಪನ್ಪೆರ್.ಒಂಜೇ ಪರಿಹಾರ ಮಾತೆರೆಗ್ ಪಂಡ ಈ ಜೊಯಿಸೆರೆಗ್ ದಾಲ ಗೊತ್ತ್ ಜ್ಜಿಂದ್ ಪನ್ಪಂದ್ ಇಂಚ ಬೇತೆ ಬೇತೆ ಪರಿಹಾರ ಪನ್ಪೆರ್.ಪ್ರೆತ ಬಾದೆ ಇತ್ತ್ ನಾಯಗ್ ಒರಿಯಗ್ ಪಂಡಿ ಪರಿಹಾರೊನು ಕುಡೊರ್ಯಗ್ ಪ್ರೇತ ಬಾದೆ ಇತ್ತ್ಂಡಲ ಬೇತೆನೇ ಪರಿಹಾರ ಮೂಡುಂಡು. ನರಮಾನಿ ನರಮಾನಿ ಪ್ರೀತಿ ವಾತ್ಸಲ್ಯೊಡು ಬದ್ ಕೊಂದು,ಕಷ್ಟ ಕಾಲೊಡು ಒರಿಯಗೊರಿ ಸಾಯ ಮಲ್ತೊಂದು ಬದ್ ಕೊಂದಿತ್ತೆರ್ಡ  ಅಷ್ಟಮಂಗಲದ ಪರಿಹಾರಲ ಬೊಡ್ಚಿ,ಬ್ರಹ್ಮಕಲಶದ ಗೌಜಿ ಗದ್ದಲಲ ಬೊಡ್ಚಿ.ಹೋಮ ಪೂಜೆ,ಬಲಿಕುಲ್ಲಾ ಬೊಡ್ಚಿ.

     ಅಷ್ಟಮಂಗಲ ದೀಯೆರೆಂದ್ ಒಂಜಿ ರಡ್ಡ್ ಲಕ್ಷ ಕರ್ಚಿ.ಅವೆತ ಪರಿಹಾರೊಗುಂದು ಏಲೆಣ್ಮ ಲಕ್ಷ ಕರ್ಚಿ,ಅತ್ ಕರ್ಚಿ ಮಲ್ತ್ ದ್ ಲ ಸರಿಯಾದ್ ನಿಮುರ್ತಿ ಆಯಿಜಿಂಡ ನಮ ಕುಡೊರ್ಯಡ ಅಷ್ಟಮಂಗಲ ಪ್ರಶ್ನೆ ದೀಪುನಿ.ಬೆಂದ್ ನ ಪೂರ ಮುಗಿದ್ ಸಾಲೊಡು ಮುರ್ಕುದು ಸೈಪುನ ಪರಿಸ್ಥಿತಿ.ಒಂಜಿ ಸಮಾದಾನ ಪಂಡ ಕುಟುಮದ ಓಲೋಲು ಇತ್ತ್ ನಕುಲ್ಲ ಪ್ರಶ್ನೆ ಚಿಂತನೆದಪಗ ಬತ್ತ್ ದ್ ಒಟ್ಟು ಸೇರ್ವೆರ್ ,ಅತ್ತಂದೆ ಪಗೆ ಪೂರ ಇತ್ತ್ಂಡ ಒರೊಕು ಮದತ್ ಸೇರೊನ್ವೆರ್.ಇಡೀ ಕುಟುಮ ಸೆರ್ದ್ ಮೋಕೆ ತೂಕೆಡ್ ಪಾತೆರ್ನಗ ಒರೊರ ದುಂಬುದ ಪಗೆ ಪೂರ ಮಾಜಿದ್ ಪ್ರೀತಿ ವಾತ್ಸಲ್ಯ ಮೂಡುಂಡು,ಕುಟುಮೊಡು ನೆಮ್ಮದಿ ಮೂಡುಂಡು.ಅಂಡ ಉಂದು ತಾತ್ಕಾಲಿಕ ಆದಿಪ್ಪುಂಡು,ಸಾಸಿತಾದಿಪ್ಪುಜಿ. ಉಂದೆನ್ ದುಂಬು ವರ್ಸಾದಿದ ನೇಮನಾ, ವರ್ಸದ ಅಗೆಲಾ,ನಾಗಗ್ ಪೇರ್  ಮೈಪುನಗನಾ ಕುಟುಮ ಸೇರುನ ತೂಯೆರೆ ತಿಕ್ಕೊಂತ್ಂಡ್.

  

 ನಮ ಜ್ಯೋತಿಷ್ಯ ಶಾಸ್ತ್ರೊಗು ಖಂಡಿತಾ ಬಿಲೆ ಕೊರೊಡು.ಕೆಲವೆರ್ ಎಡ್ಡೆ ಪ್ರಶ್ನೆ ಚಿಂತನೆದಕುಲು ಕಡಿಮೆ ಕರ್ಚಿಡ್ ಎಡ್ಡೆ ಚಿಂತನೆ ಮಲ್ಪುನತ್ತಂದೆ ನಮ್ಮ ಪ್ರಾದೇಶಿಕ ದೈವಾರಾದನೆದ ಕಟ್ಲೆಗ್ ಬಿಲೆ ಕೊರ್ಪೆರ್.ಅಕುಲು ಬತ್ತ್ ದ್ ಕೆಲವೊಂಜಿ ಕುಟುಮ,ಸಾನೊಲು ಎಡ್ಡೆ ಆತಿನಲಾ ಉಂಡು.ಆಂಡ ಇನಿ ಕೆಲವು ಪ್ರಶ್ನೆ ಚಿಂತನೆದಕುಲು ಪಂಡ್ ದ್ ಕುಟುಮದಿಲ್ಲಲ್ ಪಂಜುರ್ಲಿನ ಎಡತ ಮರ್ಗಿಲ್ಡ್ ಕಲ್ಲುರ್ಟಿನ್ ಕುಲ್ಲವೊಂದುಲ್ಲೆರ್.ನನ ಕೆಲವೆರ್ ಪ್ರಶ್ನೆ ಚಿಂತಕೆರ್ ಬೇತೆ ಬೇತೆ ಅದೆಟ್/ಕೋಣೆಡ್ ಕಲ್ಲುರ್ಟಿ ಪಂಜುರ್ಲಿನ್ ಕುಲ್ಲವೊಂದುಲ್ಲೆರ್.ಉಂದು ಅಪರಾಧ.ನಮ ಪ್ರಶ್ನೆ ಪಾಡ್ಂಡ ನಮ್ಮ ಪ್ರಾದೇಶಿಕ ಕುಲಾಚಾರ ಇಂಚಂದ್ ಪಂಡ ಅಕುಲು ಅಕ್ಲೆನ ತಪ್ಪು‌ನು ಒತ್ತೊನುಜೆರ್.ಅಕ್ಲ್ ಪನ್ನನೆ ಸರಿಂದ್ ಸಾಧಿಸವೆರ್.ಆತೇ ಅತ್ತ್ ಅವ್ಲು ಪ್ರಶ್ನೆ ದೀತೆ,ಮೂಲು ಪ್ರಶ್ನೆ ದೀತೆಂದ್ ಮಲ್ಲ ಮಲ್ಲ ಜಾಗೆದ ಪಟ ತೋಜಾದ್,ನಿಕ್ಲೆನ ದಾದ,ದೈವದ ಪೂರ ಎಂಕ್ ಕಲ್ತ್ ದಾತ್ಂಡ್,ನಿಕ್ಲೆಡ ನನ ಕಲ್ಪೆರಿಜ್ಜಿಂದ್ ಮಲ್ಲ ಕಣ್ಣ್ ಮಲ್ತೊಂದು ಕುಲ್ನಲ್ತ್ ರಡ್ಡ್ ಮೂಜಿ ಸರ್ತಿ ಲಕ್ಕುವೆರ್,ನಿಕ್ಲೆನ ಪ್ರಾಯ ದಾದ,ಎನ್ನ ಪ್ರಾಯ ದಾದಂದ್ ಪೋಡಿ ಕಟ್ಟಾವುನತ್ತಂದೆ ಲಕ್ಷಕಟ್ಲೆದ ಪರಿಹಾರ ಪನ್ಪೆರ್.ಎಲ್ಯ ಪಾಪದ ಕುಟುಮದ ಪ್ರಶ್ನೆ ದೀಯೆರೆ ಒಂರ್ಬ ದಿನ,ಮೂಜಿಲಕ್ಷ ಕರ್ಚಿ,ಪಿರ ಪರಿಹಾರೊಗು ಮೂಜಿ ಲಕ್ಷ ಕರ್ಚಿ,ಬೊಕ್ಕ ಓಡೆ ಕುಟುಮದಿಲ್ಲ್ ಲಕ್ಕ್ ದುಂತುನಿ?.ಮೊಕ್ಲು ಪಂಡಿ ಆತ್ ಪರಿಹಾರ ಮಲ್ತ್ ದ್ ಲ ಇಡೀ ಕುಟುಂಬ ನೆಮ್ಮದಿಡುಪ್ಪುನ ಒಂಜೇ ಒಂಜಿ ಕುಟುಂಬ ನಾಡೆರೆ ತಿಕ್ಕಂದ್..ಅಂಚನೆ ಸಾನ ಕಟ್ಟುನ,ಸಾನೊದ ಅಡಿಪಾಯ ಪಾಡುನ ಶಿಲ್ಪಿಲುಲ ಪ್ರಶ್ನೆ ಚಿಂತನೆದಕ್ಲ್ ಪನ್ಲೆಕನೆ ನಕ್ಷೆ ಮಲ್ತ್ ಕೊರ್ಪೆರ್.ತಪ್ಪು ಇತ್ತ್ಂಡಲ ತಪ್ಪುಂದು ಪನ್ಪುಜೆರ್.ಉಂದೆರ್ದ್ ಪ್ರಶ್ನೆ ದೀನಾಯಗಾವಡ್,ನಕ್ಷೆ ಮಲ್ತ್ ಕೊರ್ನಾಯಗಾವಡ್ ದೋಷ ಬರಂದ್.ನಮ್ಮ ಕುಟುಮದಕುಲು ಅನುಭವಿಸೊಡಾತೆ.ನಿಜವಾದ್ ಅಂಚಿನಕ್ಲೆನ್ ಲೆಪ್ಪುನ ನಮಕ್ ಸ್ವಯ ಇಜ್ಜಿಂದ್ ಪನೊಡಾತೆ.ನನಾಂಡಲ  ದೂರದ ಬಾಸೆ ಬರಂದಿನ,ನಮ್ಮ ತುಳುನಾಡ ದೈವದ ಗಂದ ಗಾಳಿ ಗೊತ್ತಿಜ್ಜಂದಿನ,ದೈವೊಲೆನ್ ದೇವೆರ್ ಮಲ್ಪುನ ಕೇರಳದ ಜೋಯಿಸೆರೆನ್ ಅಷ್ಟವಮಂಗಲ ಪ್ರಶ್ನೆಗ್ಂದ್ ಲೆಪ್ಪಂದೆ ನಮ್ಮ ಸುತ್ತಮುತಲಿಗೆಡುಪ್ಪುನ ಬಲ್ಯಾಯೆರೆನ್ ದೈವದ ನಿಮಿತ್ತ ನೋಟೊಗು ಲೆಪ್ಪುಗ.ಆಮೂಲಕ ಇಡೆ ಮುಟ್ಟ ಒರಿನ ದೈವಾರಾದನೆನಾಂಡಲ ನಮ್ಮ ದುಂಬುದ ಪೀಳಿಗೆಗ್ ಒರಿಪುಗ.

    

ದೈವ ಸಾನೊಗು ಬೆರಿ ಪಾಡ್ದ್ ಕುಲ್ದು ಪ್ರಶ್ನೆ ಚಿಂತನೆ ಮಲ್ಪುನಕ್ಲೆಗ್ ದೈವಜ್ಞೆರ್ ಪನ್ಪಿ ಪುದರ್ ಬೇತೆ.ಅಕ್ಲೆ ದೈವೊರ್ದು ಮಲ್ಲ ದೇವೆರ್ ತಾನ್ಂದ್ ಎನ್ನಿದುಪ್ಪೊಡು

 

        ದುಂಬು ನಾಗ ಮಂಡಲ ಸುರಾನಗ ಅವ್ಲು ಪಂತೊಲು ನಡತೊಂತ್ ಲೆಕ ತೋಜೊಂತ.ಪಂಡ ಅಲ್ತ್ ರ್ದ್ ನಮ್ಮ ಜಾಸ್ತಿ ಉಪ್ಪೊಡುಂದು ಪಂತೊಡು ಮಲ್ತೊಂತೆರ್.ಇನಿ ಅಷ್ಟಮಂಗಲ ಪ್ರಸ್ನೆ ಚಿಂತನೆಲು ಅವ್ವೇ ಸಾದಿಡ್ ಪೋವೊಂದುಲ್ಲ.ಅವ್ಲು ಆತ್ ದಿನತ ಪ್ರಶ್ನೆಗೆ,ಮೂಲು ಅಲ್ತ್ ಜಾಸ್ತಿ ಆವೊಡು,ಅವ್ಲು ಆತ್ ದಿನತ ಬ್ರಹ್ಮ ಕಲಶಗೆ,ಮೂಲು ಅಲ್ತ್ ಜಾಸ್ತಿ ದಿನ ಆವೊಡುಂದು ಪಂತ ನಡತೊಂದುಂಡು.ದೈವದ ಕಲೊಕು ಅಗತ್ಯ ಇಜ್ಜಿಂಡಲ ಬಿರ್ಸಾದಿಗೆ ತೋಜಾಯೆರೆ ಪೋದು ಇನಿ ದೈವದ ಮೂಲ ಪುದರುಲು ಮಯಕಾದ್ ಕೇರಳದ ಪ್ರಶ್ನೆ ಚಿಂತನೆದಕುಲು ಪಂಡಿ ಪುರಾಣದ ಪುದರ್ ಲೆನ್ ದೈವೊಗು‌ ದೀದ್ ಹಿರಿಯಾಕ್ಲ್ ದೀನ ಪುದರ್ ಮದತ್ ದ್ ಪೊಸತ್ ನ್ ತೋಡುನ ಮರ್ಲ್ ಡ್ ಪರತ್ ನ್ ನಿಗಿತ್ ಬುಡ್ಯ.ನಮ್ಮ ಊರ್ದ ಬಲ್ಯಾಯೆರ್,ಜೋಯಿಸೆರ್ ನಂಕ್ ಬೊಡ್ಚಿ,ದೂರದ ಕೇರಳದ ಪ್ರಶ್ನೆ ಚಿಂತನೆದಕ್ಲೆ ನಂಕ್ ಬೋಡು.ಅಕ್ಲೆ ಕ್ರಮೊನು ನಮ್ಮ ದೈವಾರಾದನೆಗ್ ಅಕ್ಲ್ ಕನನಗಲ ಮನಿಪಂದೆ ಕುಲ್ಯ.ನಮ್ಮ ಅರಸುದೈವೊಲ್ನ,ರಾಜಂದೈವೊಲ್ನ ಒರಿನ ದೈವೊಲ್ನ ಕೆರಮ ಬೇತೆ ಬೇತೆ ಇತ್ತ್ಂಡಲ ಅಕುಲು ಅವೆನ್ ಅಕ್ಲೆ ಅಲಚನೆದಲೆಕ ಒಂಜೇ ಮಲ್ಪೆರೆ ಪಿದಡೊಂದುಲ್ಲೆರ್.ತಗೆ ತಂಗಡಿನ ಒರುತ ಕಲ್ಲುರ್ಟಿ ಪಂಜುರ್ಲಿನ್ ಬೇತೆ ಬೇತೆ ಕೋಣೆಡ್ ಕುಲ್ಲಾವೊಂದುಲ್ಲೆರ್. ಪಂಜುರ್ಲಿನ ಬಲತ ಬಾಗೊಡು ಕುಲ್ಲೊಡಾಯಿನ ಕಲ್ಲುರ್ಟಿನ್ ಎಡತ ಬಾಗೊಡು ಕುಲ್ಲಾಯೆರೆ ಪನ್ಪೆರ್.ಎಡತ ಬಾಗೊಡು ಕುಲ್ಲವುನೆತ ಅರ್ಥ ಬೇತೆನೇ ಆಪುಂಡು

 ನನೊಂಜಿ ಇಚಾರ ದಾದ ಪಂಡ  ನಮ ಮಾತೆರ್ಲ ಇಲ್ಲದುಲಯಿ ಅರ್ತಿ ಪಿರ್ತಿಡ್ ತೆಲಿತ್ ನಲಿತೊಂದಿತ್ತ್ಂಡ ಅವ್ಲು ಸಾತ್ವಿಕ ಸಗ್ತಿ ,ಸಕಾರಾತ್ಮಕ ಸಗ್ತಿ ತನ್ನಾತೆಗೆ ಬರ್ಪುಂಡು ಪಂಡ ಶಾಂತಿ ನೆಮ್ಮದಿ ಬರ್ಪುಂಡು.ಅಡೆ ತಾಮಸ ಗುಣ ಬರ್ಪುಜಿ ಪಂಡ ಏರ್ ದಾದ ಕಿರ್ ತ್ರಿಮ ಮಲ್ತೆರ್ಡಲಾ ಇಲ್ಲದಕ್ಲೆಗ್ ದಾಲ ತಾಗುಜಿ.ಇಲ್ಲದುಲಯಿ ಶಾಂತಿ ನೆಮ್ಮದಿಡ್ ಬದ್ ಕೊಂದಿತ್ತ್ಂಡ ಅವ್ವೆ ಮಲ್ಲ ಪರಿಹಾರ. ಅವು ಬುಡ್ದು ಇಲ್ಲದುಲಯಿ ಬಾಯಿಗ್ ಬತ್ತ್ ನ ನೆರೊಂದು, ಒರ್ಯೊರಿ ಕಂಟ್ಯೊಂದು,ಪಗೆ ಸಾದಿಸವೊಂದು, ಸಾಪ ದೀವೊಂದು ಇತ್ತ್ಂಡ ಅಡೆ ತಾಮಸ ಗುಣ ಬರ್ಪುಂಡು.ಅಂಚಿ ಇಲ್ಲಲ್ ನೆಮ್ಮದಿ ಉಪ್ಪುಜಿ.ಇಲ್ಲ್ ಪಂಡ ಮನಸ್ಸ್ ದ ಕೈ ಕನ್ನಡಿ.ಇಲ್ಲದಿಲಯಿ ಗಾಳಿ ಬೊಲ್ಪು,ಶಾಂತಿ ನೆಮ್ಮದಿ ಇತ್ತ್ಂಡ ಅವೆರ್ದ್ ಮಲ್ಲ ಮಹಾ ವಾಸ್ತುಲ ಒವುಲ ಇಜ್ಜಿ.ಇಲ್ಲಲ್ ಟಿ.ವಿ ಲೆಡ್ ಬರ್ಪುನ ಕೆರ್ಪುನ,ಪ್ರೇತದ ಚಿತ್ರ,ಪುಣೊಕ್ಲೆನ್ ತೂಂಡ ದಾದನೋ ಒಂಜಿ ನಕಾರಾತ್ಮಕ ಶಕ್ತಿದ ಕಂಪನ ಇಲ್ಲದುಲಯಿ  ಗೋಚರಾದ್ ಮನಸ್ ಹಾಳಾಪುಂಡು.ಮನಸ್ ಹಾಳಾಂಡ ಇಲ್ಲದುಲಯಿದ ಶಾಂತಿ ನೆಮ್ಮದಿ ಹಾಳಾಪುಂಡು .ಅಪಗ ನಮ ಪರಿಹಾರೊಗಾದ್ ಪ್ರಶ್ನೆ ಚಿಂತನೆದಕ್ಲೆನಡೆ ಪೋಪ.ಅಕ್ಲೆನಡೆ ಪೋನಗ ಇಂಚಿನ ಸಮಸ್ಯೆಡೆ ಇಡೆ ಮೊಕ್ಲು ಬರ್ಪುನಿಂದ್ ಅಕ್ಲೆಗ್ ಗೊತ್ತಿಪ್ಪುಂಡು.ಅಕುಲು ಮೊಕ್ಲೆನ್ ಪೊರ್ಲೂಡೆ ಬೊರಿಪೆರ್.ಇಲ್ಲದುಲಯಿ ನಿಕುಲು ಪೂರ ಒತ್ತಟ್ಟಾದ್ ಮೋಕೆ ಮೋವಡ್ ಶಾಂತಿಡ್ ಬದ್ ಕ್ಲೆಂದ್ ವಾ ಜೋಯಿಸೆರ್ಲಾ ಪನ್ಪುಜೆರ್.ಅಂಚ ಪಂಡ ಈ ಜೋಯಿಸೆರೆಗ್ ದಾಲ ಗೊತ್ತ್ ಜ್ಜಿಂದ್ ಬೇತೆ ಜೋಯಿಸೆರ್ನಡೆ ಪೋಪಂದ್ ಅನಿವಾರ್ಯವಾದ್ ಮೊಕ್ಲೆಡ ದೋಷೊಲೆನ್ ಪಂಡ್ ದ್ ಒಪ್ಪಿಸವೊಡಾಪುಂಡು,ಪರಿಹಾರ ಮಲ್ಲ ಮಲ್ಲ ಪನೊಡಾಪುಂಡು.ನರಮಾನಿ ನರಮಾನಿ ಪ್ರೀತಿ ವಾತ್ಸಲ್ಯೊಡು ಬದ್ಕೊಂದಿತ್ತ್ಂಡ ಒರಿಯಗೊರಿ ಕಷ್ಟಕಾಲೊಗು ಬೆರಿಬಲ ಆದಿತ್ತ್ಂಡ ಅಕ್ಲೆಗ್ ವಾ ಪ್ರಶ್ನೆ ಚಿಂತನೆಲ ಅಗತ್ಯ ಇಜ್ಜಿ. ಈ ಪ್ರಶ್ನೆದಕ್ಲೆನ ಅವಸ್ಥೆ ತೂಲೆ.ಒಂಜಿ ತಿಕ್ ಡ್ ಒರಿ ತಂತಿರ್ದಾರ್ ದೈವೊಲೆನ್ ತಾರಾಯಿಡ್ ಮಂತಿರ್ತ್ ದ್ ಪತ್ರ್ ಪಾಡ್ಯೆರ್ಗೆ.ಪತ್ರ್ ಪಾಡ್ಯೆಂದ್ ನಮನ್ ಭ್ರಮೆ ಪುಟ್ಟವೊಲಿ ಆತೆ.ಒಂಜಿ ವರ್ಸ ಆನಗ ಮಂತಿರ್ತ್ ದ್ ದೀನ ತಾರಾಯಿ ಮುಂಗೆ ಬತ್ತ್ಂಡ್ ಗೆ.ಪ್ರಶ್ನೆ ಚಿಂತನೆದಾರ್ಡ ಕೇಂಡ ಕಡಲ್ ಗ್ ಬುಡ್ಲೆ ಪಂಡರ್ಗೆ.ತಾರಾಯಿನ್ ಕಡಲ್ ಗ್ ಬುಡೊಲಿಯಾತೆ.ದೈವ ತಾರಾಯಿಡ್ ಇತ್ತ್ಂಡತ್ತ ನಮಕ್ ಚಿಂತೆ?.ಮಾಯೆರ್ದ್ ಜೋಗದ ಮಾನಿನ ಸರ್ರೊಗು ಕಲೊಟು ಬರ್ಪುನ ದೈವೊನು ವಾ ತಂತ್ರ ಮಂತ್ರೊಡು ಪತ್ರ್ ಪಾಡ್ರೆ ಅವು ಪ್ರೇತ ಅತ್ತ್,ತುಳುವೆರ್ ನಂಬಿನ ದೈವ.

ಅಂಚನೆ ನನೊಂಜಿ ತಿಕ್ ಡ್ ಒರಿ ಪ್ರಶ್ನೆ ಚಿಂತನೆ ಮಲ್ಪುನಾರ್ ನಿಕ್ಲೆನ ಕುಟುಮೊಗು ಮದಿಮೆಯಾದ್ ಬತ್ತ್ ನ ಒರ್ತಿನ ಕಂಡನಿಯನ ಪ್ರೇತ ಪೊಣ್ಣನ ಕುಟುಮದಕ್ಲೆನ ದೈವದ ಕೈಟುಂಡುಂದು ಪಂಡೆರ್ ಗೆ.ಆತೆಟೆ ಉಂತ್ ಜಿ,ಅವ್ಲು ದೈವೊಗು ಕೋಲ ಕೊರ್ದು ಕುಲೆ ಬುಡ್ಪವೊಡು ಪಂಡೆರ್ ಗೆ.ಇಂಚಿನ ಕ್ರಮ ಓಲಾಂಡಲಾ ತುಳುನಾಡ್ ಡ್ ಉಂಡಾ.ಇಂಚ ಪಿದಯಿರ್ದ್ ಪ್ರಶ್ನೆ ಚಿಂತನೆದಕ್ಲೆನ್ ಲೆಪುಡುಂಡ ಇಂಚನೆ ಆಪುನಿ.ದಾಯೆ ಪಂಡ ಮುಲ್ತ ಪ್ರದೇಶಾಚಾರ ಅಕ್ಲೆಗ್ ಗೊತ್ತಿಪ್ಪುಜಿ.

  ಇಂಚಿಪ್ಪ ಒರಿ ಒಂಜಿ ಇಲ್ಲಲ್ ವೈದಿಕ ಅಷ್ಟಮಂಗಲ ಪ್ರಶ್ನೆ ದೀದ್ ನಿಕ್ಲೆಗ್ ರಾವು ಗುಳಿಗನ ಕಡಪುಂಡು ಪಂಡೆರ್.ಇಲ್ಲದಾರ್ ಅವ್ವೆಂಚ ಗೊತ್ತಾಪುನಿಂದ್ ಕೇನ್ನಗ ಅರೆಗ್ ಇಲ್ಲದಾರ್ನ ಅಮ್ಮ ಉಸಾರಿಜ್ಜಂದಿನ ಗೊತ್ತಿತ್ತ್ ನೆರ್ದಾತ್ರ ಇಲ್ಲಲ್ ಏರೆಗಾಂಡಲ ಉಸಾರಿಜ್ಜಿಂದಾಪುಂಡುಂದು ಪಂಡೆರ್.ಅಪಗ ಇಲ್ಲದಾರ್ ಅಂಚಾಯೆರೆ ಸಾಧ್ಯ ಇಜ್ಜಿ.ರಾವು ಗುಳಿಗನ ಕಡಪು ಉಂಡುಂದು ಸುರುಕು ಗೊತ್ತಾಪುನಿ ಬೂತೊಗು ಬುಡ್ನ ಕೋರ್ಲೆಗ್.ಅವು ರಾವು ಗುಳಿಗನ ಕಡಪಾನಗ ಬಾನ ತೂದು ಕೊಟ ಕೊಟ ಸವ್ದ ಮಲ್ಪುವ.ಅಂಚನೇ ಮರಿ,ಕೇರಿ ಬನ್ನಗ ಅವು ಒಂಜಿ ಸೊರೊ ಲಕ್ಕವ.ದಾಯೆ ಪಂಡ ಪ್ರಕೃತಿ ಅವೆಕ್ ಕೊರ್ನ ಗೇನ.ಅವೆತ ಕೆಬಿ ಬಾರೀ ಸೂಕ್ಷ್ಮ ಪನ್ನಗ ಪ್ರಶ್ನೆದಾರೆಗ್ ದಾದ ಪನೊಡುಂದೇ ಗೊತ್ತಾವಂದೆ ಕವಡೆ ಮಡಿತ್ ನಲ ಉಂಡು.ಅಂಚಾದ್ ನಮಲ ಸರಿಯಾಯಿನ ಪ್ರಶ್ನೆ ಪಾಡ್ಂಡ ಅಕ್ಲೆನ ಉತ್ತರ ಉಪ್ಪುಜಿ.

     ಒಂಜಿ ಕಡೆಟ್ ಒರಿ ಬಟ್ರ್ ಪ್ರಶ್ನೆ ದೀದ್ ಬೂತದ ಸೊತ್ತುಲೆನ್ ಪೂರ ನೀರ್ ಗ್ ಬುಡ್ಪಾದ್ ಬೂತ ಪೋಂಡ್,ಪೊಸ ಬೂತ ಪ್ರತಿಷ್ಠೆ ಆಂಡ್ ಪಂಡ್ ದ್ ಆರ್ ಪೋಯೆರ್.ಆರ್ ಪೋಯಿ ಬೊಕ್ಕಲ ಕುಟುಮ ಸಂಸಾರೊಡು ದೋಷೊಲು ಬರೊಂದೇ ಇತ್ತ.ಇಂಚ ಬೇಜಾರ್ಡ್ ಉಪ್ಪುನಗ ಊರ್ದ ಒರಿ ಸಾಮಾನ್ಯ ಪ್ರಶ್ನೆ ಪನ್ಪುನಾರೆನ್ ಲೆತ್ತ್ ದ್ ಪ್ರಶ್ನೆ ದೀನಗ ಪರ ಬೂತ ಪೋತ್ ಜಿ,ಪೊಸತ್ ಪ್ರತಿಷ್ಠೆ ಆತ್ ಜಿ ಪಂಡೆರ್.ದುಂಬು ಪ್ರಶ್ನೆ ದೀನಾರೆನ್ ಲೆಪುಡ್ಲೆ ಪಂಡೆರ್.ಇಲ್ಲದಕುಲು ದುಂಬುದಾರೆನ್ ಕುಡೊರ ಲೆಪ್ಪುನಗ ಆರ್ ಕುಡೊರ ಕಾಸಾಪುಂಡುಂದು ಬತ್ತೆರ್.ಆನಿ ಪನ್ಲೆಕನೆ ಪ್ರಶ್ನೆಡ್ ನಿಕ್ಲೆನ ಪರ  ಬೂತ ಪೋತ್ಂಡ್,ಪೊಸ ಬೂತ ಪ್ರತಿಷ್ಠೆ ಆತ್ಂಡ್ ಪಂಡೆರ್.ಅಪಗ ಊರ್ದ ಪ್ರಶ್ನೆದಾರ್ ಬೂತ ಪೋತ್ ಜಿ ಪಂಡೆರ್. ಎಂಚ ಪೋತ್ ಜಿಂದ್ ಕೇನ್ನಗ ದೈವದ ಸೊತ್ತುಲೆನ್ ಏರ್ ನೀರ್ ಗ್ ಪಾಡ್ದ್ ನಿ ಕೇನ್ನಗ ಎಂಕುಲು ಪಾಡ್ ದ್ ಜ.ಬಟ್ರೆಡ ಪಾಡ್ಯೆರೆ ಕೊರ್ತಂದ್ ಪಂಡೆರ್. ಬೂತೊಗು ಪೂ ನೀರ್ ದೀವೊಂತಿ  ಮಣೆ ಮಂಚವು ಬಟ್ರೆನ ಇಲ್ಲಲುಂಡತ್ತ.ಬೊಕ್ಕ ಓಡೆ ಬೂತ ಪೋಪುನಿ.ಬೂತ ಆ ಮಣೆಟೆ ನಿಲೆಯಾದುಂಡು,ಆ ಮಣೆನ್ ಬಟ್ರ್ ನೀರ್ ಗ್ ಪಾಡ್ದ್ ಜೆರ್ಂದ್ ಪಂಡೆರ್.ಅಂದಾ ಅತ್ತಾಂದ್ ಬಟ್ರೆಡ ಕೇನ್ನಗ ಅಂದ್ ದೈವದ ಮಣೆ ಪೊರ್ಲಿತ್ತ್ಂಡ್ .ದಕ್ಕೆರೆ ಮನಸಾವಂದೆ ಇಲ್ಲಲ್ ದೀತೆ.ತಪ್ಪಾಂಡ್ಂದ್ ತಪ್ಪುನು ಒತ್ತೊಂಡೆರ್.ನಮ ಪ್ರಶ್ನೆ ಪಾಡ್ ಜಿಂಡ ಅಕ್ ಲ್ ಪನ್ನನೆ ಸತ್ಯಂದ್ ಒತ್ತೊನೊಡಾತೆ.

ತುಳುನಾಡ ಸಿರಿ

                     ತುಳುನಾಡ ಸಿರಿ

ಗುತ್ತು ಬರ್ಕೆ ಬಾಳಿಕೆ ಬಾವ ಬೂಡು

             ಗುತ್ತು ಬರ್ಕೆ ಬಾಳಿಕೆ ಬಾವ ಬೂಡು

                               ನೆಲ್ಲಿದಡಿ ಗುತ್ತು ಬಜಪೆ

 ೧.ಬಾಳಿಕೆ:-

   ಆಡಳ್ತೆ ವ್ಯವಸ್ಥೆಡ್ ಸುರೂತ ಎಲ್ಯ ವ್ಯವಸ್ಥೆ ಬಾಳಿಕೆ .ಒಂಜಿ ಬೈಲ್ ದ ಆಯ ನ್ಯಾಯೊನು ತುಲಿಪು/ವಿಮರ್ಶೆ ಮಲ್ತ್ ದ್ ನ್ಯಾ ಯಾನ್ಯಾಯದ ವರದಿನ್ ಗುತ್ತುಗು ತೆರಿಪಾಯೆರೆ ಉಪ್ಪುನ ಇಲ್ಲೇ ಬಾಳಿಕೆ.ಬಾಳಿಕೆಗ್ ನಿರ್ದಿಷ್ಟವಾಯಿನ ವ್ಯಾಪ್ತಿ ಉಂಡು.ಅವೆನ್ ಮೀರ್ದ್ ಬಾಳಿಕೆ ಪೋಯೆರೆ ಇಜ್ಜಿ.ಒಂಜಿ ಬಾಳಿಕೆದ ಯಜಮಾನಿ ಪಂಡ ಇಲ್ಲದ ಹಿರಿಯ ಸದಸ್ಯೆ ಪ್ರದಾನ.ಜಾತಿ ಜನಾಂಗ,ಇಲ್ಲದ ಸದಸ್ಯೆರೆ ಸಂಖ್ಯೆನ್ ಮೀರ್ನ ವ್ಯವಸ್ಥೆ.ಬಾಳಿಕೆ ಬಾರ್ಯಾತ್ ಕಾಲ ಬಾಳ್ವಿಕೆ ಬರ್ಪುನ ಗೌರವದ ಇಲ್ಲ್.

೨.ಗುತ್ತು:-

     ಬಾಳಿಕೆರ್ದ್ ಮಲ್ಲ ಗುತ್ತು.ಬಾಳಿಕೆರ್ದ್ ಬತ್ತಿ ಆಯನ್ಯಾಯೊನು ಗುತ್ತುದಕುಲು ಪಂಚಾತಿಕೆಡ್ ತೀರ್ಮಾನ ಮಲ್ಪೊಡು.ಗುತ್ತು ಡು ರಡ್ಡ್ ವಿಬಾಗದ ಗುತ್ತುಲುಂಡು.ಒಂಜಿ ಗುತ್ತು ಮನೆತನೊಡ್ದು ಬತ್ತಿ ಇಲ್ಲಾಂಡ ಗುತ್ತುಗು ಚಾವಡಿ ಉಪ್ಪುಂಡು.ಗುತ್ತು ದಳವಾಯಿ ಪಟ್ಟೊಡ್ದು ಬತ್ತ್ ನವಾಂಡ ಅವೆಕ್ ಚಾವಡಿ ಉಪ್ಪುಂಡುಂದು ಸ್ಪಷ್ಟವಾದ್ ಪನೆರೆ ಆಪುಜಿ.ಆಂಡ ಗುತ್ತುಡು ಯಜಮಾನಿ ಉಪ್ಪುಂಡು.ಆಯನ್ಯಾಯೊನು ಪಂಚಾತಿಗೆಡ್ ಸರಿ ಮಲ್ತ್ ಕೊರ್ಪುನ ಆರಬಾರ ಗುತ್ತುಗುಂಡು.ಗುತ್ತುದ  ನನೊಂಜಿ ಮಲ್ಲ ಜಬದಾರಿಕೆ ಪಂಡ ಆ ಬೈಲ್ ದ ಇಡೀ ರಕ್ಷಣೆ ಆ ಗುತ್ತುದ ಜವಾಬ್ದಾರಿ ಆದುಂಡು.ಮದಿಮೆ ಮಸ್ಕಿರಿ ಕ್ರಿಯಾ ಕರ್ಮೊರ್ದು ಸಾವು ಕ್ರಿಯಾ ಕರ್ಮ ಮುಟ್ಲ ಗುತ್ತುದ ಜಬದಾರಿ ಉಂಡು.ಒಂಜಿ ಮದಿಮೆ ಆಪುನಿಯಾಂಡ ಗುತ್ತುಗು ಏಳಿಕೆ ಆವೊಡು,ಗುತ್ತುರ್ದು ಒಪ್ಪಿಗೆ ಆವೊಡು,ಗುತ್ತುದಕ್ಲು ಅವ್ಲು ಇತ್ತ್ ದ್ ಮಾತೆನ್ಲಾ ನಡಪಾದ್ ಕೊರೊಡು.ಆಯಾ ಜಾತಿ ಜನಾಂಗೊಗು ಗುರಿಕಾರನಕುಲು ಬೇತೆ ಬೇತೆ ಇತ್ತೆರ್ಡಲಾ ಗುತ್ತು ಬೇತೆನೆ.ಗುತ್ತುದಕುಲು‌ ಕೇವಲ ದೈವದೆದುರು ಉಂತುದು ಎಂಕ್ ಮರ್ಯಾದಿಂದ್ ಕೆನೆರೆ ಇತ್ತ್ ನಕ್ಲ್ ಮಾತ್ರ ಅತ್ತ್.ಈತ್ ಜಬದಾರಿಲಾ ಅಕ್ಲೆಗುಂಡು.ಅಕ್ಲೆನ ಕರ್ತವ್ಯ ಮಲ್ತೆರ್ಡ ಮಾತ್ರ ಅಕ್ಲೆಗ್ ಗುತ್ತುದ ಮರ್ಯಾದಿ,ಇಜ್ಜಿಂಡ ಇಜ್ಜಿ.ಗುತ್ತುದ ಕೆಲಸೊನು ಸಮರ್ಪಕವಾದ್ ಮಲ್ತೆಡ ಆಯೆ ಸರ್ಪೆ/ಮರಿ,ಮಲ್ತ್ ಜೆಡ ನಕ್ಕುರು.ಆಯೆ ಗುತ್ತುಂದು ಪುದರ್ ಪಾಡ್ಂಡ ಯಾರಂದ್,ಗುತ್ತುಗು ಸರಿಯಾದ್ ಆಯೆ ಬದ್ ಕೊಡು..ಆಯನ ಬೈಲ್,ಅಯನ ವ್ಯಾಪ್ತಿಡ್ ಆಪುನ ಪ್ರತಿಯೊಂಜಿ ಕೆಲಸೊಗ್ಲ ಆಯೆ ಹೊಣೆಗಾರೆ.ಆ ಬೈಲ್ಡಾಪುನ ನೇಮ ನೆರಿ,ಕೋಲ,ತಂಬಿಲೊನು ಗುತ್ತುದಕುಲು ದುಂಬುಂತುದು ನಡಪಾವೊಡು.

    ಬೂಡುಡ್ದು ಉಂಬಳಿಯಾದ್ ಗುತ್ತುಗು ಬೂಮಿ ತಿಕ್ ದ್ ನಿ.ಗುತ್ತು ಏರ್ನಲ ಕ್ರಾಯೊಗು ದೆತ್ತ್ ನ ಬೂಮಿಂದ್ ಓಲ್ಲ ಉಲ್ಲೇಖ ಇಜ್ಜಿಗೆ.ಗುತ್ತು ಉಪ್ಪುನ ಬೈಲ್ ಡ್ ಎಚ್ಚಿ ಕಡಿಮೆ ಆವಂದಿಲೆಕ ಆಡಳಿತ ನಡಪಾವೊಡುಂದು ಗುತ್ತುಗು ಬೂಡುದಕುಲು ಬೂಮಿನ್ ಉಂಬಳಿ ಕೊರೊಂತೆರ್.ದುಂಬು ಅರಸುಲೆ ಕಾಲೊಡು ಸುಂಕ ಚಸೂಲಿ ಮಲ್ಪುನ ಅಧಿಕಾರ ಗುತ್ತುಲೆಗಿತ್ತ್ ದ್ ಕಾಲಾನುಬಾಗೊಡು ಅವು ಪಟ್ಲೆರೆಗ್ ವರ್ಗಾವಣೆ ಆಂಡ್.ಪಟ್ಲೆರ್ಂದಾನಗ ಗ್ರಾಮೊಗೊರಿ ಪಟೇಲೆಂದಾಂಡ್.

    ದುಂಬು ಬೈಲ್ ಗೊಂಜಿ ಗುತ್ತು ಇತ್ತ್ಂಡ್.ಒಂಜಿ ಗ್ರಾಮೊಡು ಮೂಜಿ ನಾಲ್ ಗುತ್ತು ಉಪ್ಪೆರ್ಲಾ ಯಾರು.ಅರಸು ಎಂಚ ಆಯನ ಅಡಳಿತ ವ್ಯವಸ್ಥೆನ್ ವಿಂಗಡಿಸದೆನಾ ಆರೀತಿ ಬತ್ತ್ ದುಪ್ಪು.ಅರಸುನ ದಂಡ್ ದ ದಳವಾಯಿಲಾ ಗುತ್ತುದಾಯೆ ಆದಿಪ್ಪುವೆ.ದಂಡ್ ಗ್ ಬೋಡಾಯಿನ ಜವನೆರೆನ್ ಸೇರ್ಸಾವುನ ಅಧಿಕಾರಲಾ ಗುತ್ತುದಾಯಗಿತ್ತ್ಂಡ್.ಆಯನ ನಂಬೊಳಿಗೆದ ಜವನೆರೆನ್ ದಂಡ್ ದ ಕುಟೊಡು ಸೇರ್ಸಾವೊಂದು ದಂಡ್ ಗ್ ಪೋಪುನ‌ ಅಧಿಕಾರ ಗುತ್ತುದಾಯಗ್ ಇತ್ತ್ಂಡ್.ಗುತ್ತುದಾಯಡ ಕೈ ಮೀರ್ದ್  ಪೋಂಡ ಮಾತ್ರ ಅವು ಬೂಡುಗೆತ್ತೊಡತ್ತಂದೆ ,ಇಜ್ಜಿಂಡ ಆಯೆನೆ ಅವೆನ್ ಪೂರ ನಡಪಾವೊಡಿತ್ತ್ಂಡ್ಂದ್ ಲೆಕ್ಕಾಚಾರ.ಆ ಬೈಲ್ ದ ದೈವ ದೇವಸಾನೊಲೆಡ್ ಎಡ್ಡೆ ಕೆಲಸ ಮಲ್ಪಾವುನ ಅಧಿಕಾರಲಾ ಗುತ್ತುದಾಯಗಿತ್ತ್ಂಡ್‌.

ಉಲಗುತ್ತು:-

  ಗುತ್ತುಡು ಅದಿಕಾರೊಡು ಇತ್ತ್ ನಕುಲು ಪಾಲಾದ್ ಪೋನಗ ,  ಗುತ್ತುದ ಕುಟುಮ ಪಾಲಾದ್ ಪೋನಗ ಅವ್ಲು ಬತ್ತ್ ನಂಚಿನ ಪುದರ್ ಉಲಗುತ್ತಾದ್ ಸೇರ್ದ್ ಪೋಂಡು.ಗುತ್ತು ಒಂಜೆ ಉಪ್ಪುನಿ.ಆಂಡ ಅ ಗುತ್ತುದಕುಲೆಡ್ ಪಾಲಾದ್ ಪೋಯಿನಕುಲು ಪತ್ತ್ ಇಲ್ಲ್ ಕಟ್ಯೆರ್ಡ ಪತ್ತ್ ಉಲಗುತ್ತಾದ್ ಮೂಲ ಗುತ್ತುಗು ಸೇರೊಂಡು.

ಬರ್ಕೆ:-

   ಬೂಡುರ್ದು ಅದಿಕಾರ ಪಡೆದ್ ಆಡಳಿತೊಗು ಸಂಬಂದಪಟ್ಟಿನ ಪ್ರತಿಯೊಂಜಿ ಕಾರ್ಯೊನ್ಲ ಮಲ್ತೊಮತ್ ನಕುಲು ಬರಿಕೆಡಿತ್ತ್ ನಕುಲು.ಬೂಡುದಕುಲು ದೀನ ಜನೊಕುಲು,ಮಂತ್ರಿಂದ್ ಲ ದೆತೊನೊಲಿ.ಬರ್ಕೆ ದುಂಬುದ ಕಾಲೊಡು ಒಂಜಿ ಊರುಡು ಒಂಜಿ ಉಪ್ಪುನಲಾ ಕಮ್ಮಿ.ಬರ್ಕೆ,ಗುತ್ತು ಪೂರ ದುಂಬುದ ಕಾಲೊಡು ಜಾತಿದ ನಿಲೆಟ್ ಇಜ್ಜಾಂಡ್.ಅದಿಕಾರ ವ್ಯಾಪ್ತಿದ ಆಡಳಿತದ ಭಾಗೊಲಾದಿತ್ತ್ಂಡ್.ಆ ಅರಸುನ ಆಡಳಿತ ವ್ಯಾಪ್ತಿಡ್ ವಾ ಮನೆತನದಕ್ಲಿತ್ತೆರಾ ಅಕುಲು ಬರ್ಕೆದಕುಲೆ.ಇಮಚಿನವೇ ಜಾತಿದಾಯೆ ಅವ್ಲು ಬೋಡುಂದು ರೂಢಿ ಇಜ್ಜಾಂಡ್.ದಾಯೆ ಪಂಡ ದುಂಬುಡು ಜಯನರಸೆರೆ ಲೆಕ್ಕಾಚಾರ ತೂನಗಲ ದಳವಾಯಿ,ಮಂತ್ರಿ,ಅರಸುನ ವಿಶ್ವಾಸದ ವ್ಯಕ್ತಿ ಕೇವಲ ಒಂಜಿ ಜಾತಿದಾಯೆ ಅದಿಜ್ಜಾಂಡ್.ಮಾತ ಜಾತಿ ಜನಾಂಗದಕುಲ್ಲ ಇತ್ತೆರ್.ಅಂಚಾದ್ ಒಂಜಿ ಜಾತಿಗ್ ಉಂದು ಸೀಮಿತಂದ್ ಪಂಡ ತಪ್ಪಾಪುಂಡು .ಒಂಜಿ ಅರಸುಗು ಒರಿ ಮಂತ್ರಿ ಏತ್ ವ್ಯಾಪ್ತಿಗುಲ್ಲೆನಾ ಆ ವ್ಯವಸ್ತೆಡ್ ಬೈದ್ ನವು ಬರ್ಕೆ/ಬರಿಕೆ.ಬರ್ಕೆದಕುಲು ರಾಜಾಳಿತೊಡು ಗುತ್ತುರ್ದು ದುಂಬು ಪಂಡ ಮಿತ್ತ ಸ್ತಾನೊಡಿತ್ತೆರ್.

   

೩.ಬಾವ:-

      ಅರಸುಲ್ನಕ್ಲೆ ಇಲ್ಲ್ ಡ್ ಪಾಲಾದಿತ್ತ್ಂಡ ಅವು ಬಾವ‌.ಅರಸೊಳಿಗೆದ ಪಾಲ್ಡೇ ಪಾಲಾಯಿನ ಬೊಕ್ಕೊಂಜಿಬಾಗ ಬಾವ..ಬಾವ ಮಾತಾ ಊರ್ಲೆಡ್ಲ ತೂಯೆರೆ ತಿಕ್ಕಂದ್,ಅಂಚಾಂದ್ ಒಂಜೊಂಜಿ ಊರುಡು ಉಂಡು.

೪.ಬೂಡು:-

ಬಲ್ಲಾಲೆರ್ ಅರಸೆರೆ ಬೂಡು.ಬೂಡುಂದು ಬರ್ಪುನಿ ಜೈನೆರೆಗ್ ಮಾತ್ರ.ಗುತ್ತುಡು ನ್ಯಾಯ ತೀರ್ಮಾನ ಆಯಿಜಿಂಡ ನ್ಯಾಯ ಬೂಡುಗು ಪೋವೊಡು.ಬೂಡು ಪಂಡ ಆಡಳಿತ ವ್ಯಾಪ್ತಿದ ಅರಸು ಇತ್ತ್ ನ ಇಲ್ಲ್..ಅಕ್ಲೆನ ಅಧಿಕಾರ ವ್ಯಾಪ್ತಿನ್ ತೂದು ಅರ್ಥ ಮಲ್ತೊನೊಡಾತೆ.ದಾಯೆ ಪಂಡ ತುಂಡರಸೆರ್ ಇತ್ತಿ ಕಾಲ ಅವು.ತುಮಡರಸೆರೆಗ್ ವಿಜಯನಗರದ ಅರಸು ಮಲ್ಲ ಅರಸು.ಬಾರ್ಕೂರುದ ಅರಸು ತುಳುನಾಡ್ದ ತುಂಡರಸೆರೆಗ್ ಪಟ್ಟದ ಮುದ್ರೆನ್ ಒಪ್ಪಿಸವುನ ಅಧಿಕಾರ ಇತ್ತ್ ನಾಯೆ.ಅಂಚಾದ್ ಬಾರ್ಕೂರ ಅರಸುಗು ತುಳುನಾಡ್ ಡ್ ಮಲ್ಲ ಸ್ಥಾನ ಇತ್ತ್ಂಡ್.ದಾಯೆ ಪಂಡ ತುಳುನಾಡ ತುಂಡರಸುಲು ಪಟ್ಟೊಗು ಏರೊಡು ಪಂಡ ಬಾರ್ಕೂರುಗು ಪೋದು ಕೇನೊಡು.ಬಾರ್ಕೂರುದ ಅರಸು ವಿಜಯನಗರದ ಅರಸುಡ ಒಪ್ಪಿಗೆ ದೆತೊಂದು ಬರೊಡು.ಪಟ್ಟದ ಉಂಗಿಲ,ಪಟ್ಟದ ಕತ್ತಿನ್ ವಿಜಯನಗರದರಸು ಕೊರ್ಪುನಿಯಾಂಡಲಾ ಅವೆನ್ ಮುಲ್ತ ಅರಸುಲೆಗ್ ಪಟ್ಟಾಭಿಷೇಕ ಅನಗ ಕೊರ್ಪುನಾಯೆ ಬಾರ್ಕೂರ್ದರಸು.ಅರಸುಗು ಮೂಲು ಪಟ್ಟದ ಗಡಿಯಾಪುಂಡು ಪಂಡ ಅಕ್ಲೆನ್ ಮೂಲು‌ ಅರಸುವಾದ್ ನೇಮಕ ಆಪುಂಡು.ಅಪಗ ಅರಸುಗು ಪಟ್ಟದ ಮುಂಡಾಸ್ ದೀಯೆರೆ,ಪಟ್ಟದ ಉಂಗಿಲ ದೀಯೆರೆ,ಪಟ್ಟದ ಕತ್ತಿ ಕೊರ್ಯೆರೆ ಆನಗ ಇಂಚಿತ್ತಿನ ಗುತ್ತು,ಇಂಚಿತ್ತಿನ ಮಾಗಣೆ,ಇಂಚಿತ್ತಿನ ಬಾವ,ಇಂಚಿತ್ತ್ ನ ಬಾಳಿಕೆ ಅವ್ಲು ಉಪ್ಪೊಡುಂದು ಕೆಲವು ಕೋಡಿಡ್ ನಿಗಂಟ್ ಉಂಡು.ಅರಸು ಪಟ್ಟ ಎರುನ ಪೊರ್ತುಗು ಅವು ಅಕ್ಲೆಗ್  ತಿಕ್ಕುನ ವಿಶೇಷ ಸ್ಥಾನ ಮಾನ.ಸೀಮೆ ಬೊಕ್ಕ ಮಾಗಣೆ ಅರ್ಥ ಒಂಜೆ.ಕನ್ನಡೊಡು ಸೀಮೆ,ಮಾಗಣೆ ತುಳು ಶಬ್ದ

    ಬೂಡುಡ್ಲಾ ಆಯನ್ಯಾಯ ಸರಿಯಾದ್ ಆಯಿಜಿಂಡ ದೈವದ ನಡೆಕ್ ಬರೊಡು.ದೈವದ ನಡೆಟ್ಲಾ ಆಯ ನ್ಯಾಯ ನಿಮುರ್ತಿ ಆವಂದೆ ಉರುಂದಾರ ಬಿರ್ಮು ಬೊಕ್ಕ ನರಸಿಂಗ ಪಕ್ಕಳ(ಮೇರ್ ಜೈನೆರ್)ಗ್ ಕುಕ್ಕಲ ಚಾವಡಿಡ್ ನ್ಯಾಯ ಬೂರ್ದು ಮುಟ್ಟ ಮುಟ್ಟ ಸಾರ ವರ್ಸ ಆಂಡಲಾ ನಿಮುರ್ತಿ ಆವಂದಿ  ಉರುಂದಾರ ಪಂಜುರ್ಲಿನ  ಆರಾದನೆ ತುಳುನಾಡ್ ಡ್ ಉಂಡು.ಉರುಂದಾರ ಪಂಜುರ್ಲಿ ತುಳುವೇಎ ಬಾಯಿಡ್ ಇತ್ತೆ ವರ್ಣಾರ ಪಂಜುರ್ಲಿಯಾದ್ ಪೋತ್ಂಡ್.ಬೂಡುಡು ಇತ್ತೆ ಜೈನೆರುಪ್ಪೆರ್,ಬಂಟೆರುಪ್ಪೆರ್,ಬಿರುವೆರುಪ್ಪೆರ್,ಬೆರಣೆರುಪ್ಪೆರ್.ಮೂಲೊಡ್ದೇ ಬೂಡು ಪನ್ಪುನವು ಜೈನೆರ್ನ.

    ಅಂಚನೆ ಬಲ್ಲಾಕುಲು,ಬಲ್ಲಾಲ್ದಿ ಬೈದ್ ನವು ಜೈನ ಅರಸೆರೆರ್ದ್.ಅಂಚನೆ ಉಲ್ಲಾಕ್ಲು,ಉಲ್ಲಾಲ್ದಿ ಪನ್ಪುನವ್ಲು ಉಲ್ಲಾಯ ಪನ್ಪುನವು ಯಜಮಾನ ಬಾಗೊನು ಸೂಚಿಸಾವುಂಡು.ಉಲ್ಲಾಲ್ದಿ ಯಜಮಾನ್ದಿನ ಬಾಗೊನು ಸೂಚಿಸಾವುಂಡು.ಆದಿವಾಸಿಲು ಇನಿಲಾ ಉಲ್ಲಾಯಂದೆ ಲೆಪ್ಪುನಿ.ಅಂಚಾದ್ ಉಲ್ಲಾಕ್ಲು,ಉಲ್ಲಾಯ ಜಾತಿವಾಚಕ ಸವ್ದ ಅದಿಪ್ಪಂದೆ ಯಜಮಾನಿಕೆದ ಮೂಲೊನು ಸೂಚಿಸವುಂಡು.ತುಳುನಾಡ ಜೈನ ಬಲ್ಲಾಕುಲು ಜಿನೇಶ್ವರನ್,ಆದಿನಾಥನ್ ಅಂಚನೆ ದೈವೊನ್ಲಾ ಆರಾದನೆ ಮಲ್ಪುನಕುಲು.ಜೈನ ಬಲ್ಲಾಕುಲು ದೈವೊನು ನಂಬೆರೆ ,ಆಡಳ್ತೆ ಮಲ್ಪೆರೆ ಗುತ್ತು,ಬರ್ಕೆ,ಬಾಳಿಕೆ,ಬಾವ ಇಂಚಿಪ್ಪಿ ವ್ಯವಸ್ಥೆನ್ ಮಲ್ತಿನಕುಲು.ಉಂದು ಪೂರ ಬಲ್ಲಾಕ್ಲೆ ಕಾಲೊಡು ಆತ್ ನ ವ್ಯವಸ್ಥೆಲು.

೫.ಅರಂತಡೆ-ಅರಮನೆ

ಬಾಳಿಕೆ,ಗುತ್ತು,ಬರ್ಕೆ,ಬಾವ,ಬೂಡು ಉಂದೆಕ್ ಮಾತೆಕ್ಲ ಆಡಲ್ತೆದ ಸೂತ್ರ ಕಟ್ಟ್ ಉಂಡು.ಆಂಡ ಬರ್ಕೆ ಬೊಕ್ಕ ಬಾಳಿಕೆ ಬೇತೆ ಬೇತೆನೆ.ಆಂಡ ಕೆಲವೆರ್ ಉಂದು ರಡ್ಡ್ ಲ ಒಂಜೆಂದ್ ತಪ್ಪು ಅರ್ಥ ಮಲ್ತೊಂದೆರ್.

   ಮೂಲ ಮಾಯಿತಿ:-

ಯಂ.ಡಿ.ಶೆಟ್ಟಿ.ಇರಾ ಹಿರಿಯ ಜನಪದ ತಜ್ಞೆರ್

ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್ ಕಟ್ಲೆಲು-

ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್  ಕಟ್ಲೆಲು  
      

 ದೈವಾರಾದನೆದ ಕಟ್ಟ್ ಕಟ್ಲೆಡ್ ಪ್ರಾದೇಶಿಕ ಭಿನ್ನತೆ ಉಂಡು ಪಂಡಲ ಮೂಡಾಯಿ ಪಡ್ಡೇಯಿ ತೆನ್ಕಾಯಿ ಬಡಕಾಯಿದ ಒಟ್ಟು ವ್ಯಾಪ್ತಿಡುಪ್ಪುನ ತುಳುವೆರ್ ಬದುಕುನ ತುಳು ಧರ್ಮದ ತುಳ ಬಾಷೆದ ತುಳುನಾಡ್ ಒಂಜೆ.ಆಂಡ ಪ್ರರಾದೇಶಿಕವಾದ್ ಹಿರಿಯೆರ್ ಮಲ್ತಿ ಅಕ್ಲಕ್ಲೆ ಗ್ರಾಮ ಸೀಮೆದ ಮೂಲ ಸಾಂಪ್ರದಾಯಿಕ ಅನಾದಿದ ಕಟ್ಲೆನ್ ಒರಿತೊಂದು ಬರೊಡು.ನಮ್ಮ ಪೂರ್ವ ಹಿರಿಯಾಕುಲು ತೆರಿಪಾಯಿ ಮೂಲ ಸಾಂಪ್ರದಾಯಿಕ ಕಟ್ಲೆದ ಬಗೆಟ್ ಒಂಜಾತ್ ಇಚಾರೊಲೆನ್ ಮೂಲು ಪಟ್ಟೊನುನ ಪ್ರಾಮಾಣಿಕ ಬೇಲೆ ಮಲ್ಪುವೆ.

  

ದೈವದ ಸಿರಿಮುಡಿದೊರುತ ತಾರೆದ ಮಡಲ ತಿರಿ

೧.ಮಣ್ಣ್ ದಪ್ಪಣೆ:-

      ದೈವಾರಾದನೆದ ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ಸುರುತವು ಮಣ್ಣ್ ದಪ್ಪಣೆ ದೆತೊನುನವು .ಒಂಜಿ ಮಣ್ಣ್ ಡ್ ಒಂಜೇ ದೈವ ಉಂತುದುಪ್ಪುಜಿ.ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲಿಪ್ಪುವ.ನಮ ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲೆಗ್ ಬೇತೆ ಬೇತೆನೇ ಕೋಲನಾ ನೇಮನಾ ಕೊರ್ಪುಜ.ನಮ ನಂಬಿನ ದೈವೊಗು ಮಾತ್ರ ನೇಮ ಕೊರ್ಪ.ನಮ ಆ ಮಣ್ಣ್ ನ್ ನಮ್ಮ ಸರ್ವಸ್ವಂದ್ ಎನ್ನಿದಿಪ್ವ.ನಮ ಬದುಕುನೆಡ್ದಾದಿಪ್ಪು,ನಮ ನಂಬುನ ದೈವ ಉಂತುನೆಡ್ದಾದಿಪ್ಪು ,ನಮ ನಡಪಾವುನ ನೆಮ ನೆರಿ ಕೋಲ ತಂಬಿಲ ಆದಿಪ್ಪು  ಆ ಮಣ್ಣ್ ದ ಮಿತ್ತ್ ನಮ ನಡಪಾವೊಂದು ಬರ್ಪುನಿ.ಅಂಚಾದ್ ಎಂಕುಲು ಇಂಚಿತ್ತಿ ಕಾರ್ಯೊಗು ಇಂಚಿತ್ತಿನ ದೈವೊಗು ಇಂಚಿತ್ತ್ ನ ದಿನಮಾನೊಗು ನಡಪಾಯೆರೆ ಉಲ್ಲ.ಅಂಚಾದಿಪ್ಪುನಗ ತುಂಬಿ ಬೂಮಿ,ಮಣ್ಣ್ ಎಂಕ್ಲೆಗ್ ಅವೆನ್ ನಡಪಾಯೆರೆ ಅಪ್ಪಣೆ ಕೊರೊಡುಂದು ಮಣ್ಣ್ ದ ಅಪ್ಪಣೆ ಪಡೆಯುನಿ.ದೈವೊನು ನಂಬುನಂಚಿನ ನಂಬಿಕಸ್ತೆರ್, ಗ್ರಾಮೊಗಂಡ ಗ್ರಾಮೊಗು ಸಮ್ಮಂದ ಪಟ್ಟ್ ನಕುಲು‌ಬೋಡು.ಗ್ರಾಮ ಸಮ್ಮಂದಿ ದೈವ ಆಂಡ ಗುತ್ತು ಬರ್ಕೆ,ಬಾಳಿಕೆ,ನೇಮದ ಕಲೊಕು‌ ಸಮ್ಮಂದಪಟ್ಟ್ ನಕುಲು ಬೋಡು,ಕಟ್ಟುನಕುಲು ಬೋಡು.ಯಜಮಾನೆರ್,ಸಮ್ಮಂದ ಪಟ್ಟಿನ ಮಾತೆರಿತ್ತ್ ದ್ ಮಣ್ಣ್ ದಪ್ಪಣೆ ಪಡೆಯೊಡು. 

೨.ದಿನ ದೀಪುನಿ_ಬಲ್ಯಾಯಡ:-

     ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ರಡ್ಡನೆದಾದ್ ಬಲ್ಯಾಯಡ ದಿನಮಾನ ತೂಪುನಿ.ದುಂಬುದ ಕಾಲೊಡು ದೈವದ ನಿಮಿತ್ತ ನೋಟ ತೂವೊಂತ್ ನಿ.ಆಂಡ ಇನಿ ಅಕುಲು ಮದೆಕ್ ಸೇರ್ದ್ ಅಡೆಗ್ ವೈದಿಕ ಪ್ರಶನಾ ಚಿಂತನೆದಕುಲು ಬೈದೆರ್.ಬಲ್ಯಾಯನಕುಲು ಪಂಚಾಂಗ ತೂದು ದೋಷ ಇಜ್ಜಂದಿನ ದಿನಮಾನೊನು ನೇಮ ನೆರಿ ನಡಪಾಯೆರೆ ತೆರಿಪಾವೆರ್.ಅಂಚನೆ ಕಟ್ಟುನಾಯಗ್ ಬೂಲ್ಯಕೊರ್ರೆಲಾ ಬಲ್ಯಾಯಡನೆ ದಿನಮಾನ ಕೇನುನಿ.

೩.ವೀಳ್ಯ ಕೊರ್ಪುನಿ:-

     ಕಟ್ಟುನಾಯಗ್ ಬೂಲ್ಯ ಕೊರ್ಪುನವು ಮೂಜನೆ ಕಟ್ಟ್.ಕಟ್ಟುನಾಯನ್ ಲೆತ್ತ್ ದ್ ಇಲ್ಲದ ಜಾಲ್ಡಾಪುನ ನೇಮ ಆಂಡ ಇಲ್ಲದ ಜಾಲ್ಡೇ ವೀಳ್ಯ ಕೊರೊಡು.ಒಂಜಿ ವೇಳೆ ಸಾನ ಮಾಡೊಡು ಆಪುನ ನೇಮ ಆಂಡ ಸಾನದ ಮಾಡದ ಜಾಲ್ಡೇ ಕೊರೊಡು.ನಮ್ಮ ಅನುಕೂಲೊನು ಒಂದುದು ದಿನ ದೀನೆರ್ದ್ ಬೊಕ್ಕ ನೇಮ ಕಟ್ಟುನಾಯಗ್ ದೈವೊಗು ವೀಳ್ಯ ಕೊರ್ಯೆರೆಲಾ ಬಲ್ಯಾಯಡ ದಿನ ಕೇನೊಡು.ದಾಯೆ ಪಂಡ ಸುದ್ದ ಬಾವ ತಿಕ್ಕೊಡಾನಿ.ಬಾವಸುದ್ದ ತಿಕ್ಕುನ ದಿನ ತೂದು ಒಂಜಿ ವಾರದ ದುಂಬುಲ ವೀಲ್ಯ ಕೊರೊಲಿ.10 ದಿನ ದುಂಬುಲ ಕೊರೊಲಿ.ನಮಡ ಆತೊಂಜಿ ದಿನ ಇಜ್ಜಿಂದಾಂಡ ನಾಲೈನ್ ದಿನ ದುಂಬುಲ ಕೊರೊಲಿ.ಐಕ್ ದಾಲ ಈತೇ ದಿನಾಂದ್ ನಿಗಾಂಟ್ ದಾಲ ಇಜ್ಜಿ.ವೀಳ್ಯ ಕೊರ್ಪುನ ದಿನ ಬರಣಿ,ಕಿರ್ತಿಕೆ,ಸಿಂಗೊಡೆ,ಅಮಾಸೆ ಬರಂದೆ ಉಪ್ಪೊಡು.ಅಂಗಾರೆ,ಸುಕ್ರಾರ ಪೂರ ದೈವೊಗು ನಿಶಿದ್ದ ಇಜ್ಜಿ.ಅಂಗಾರೆ,ಸುಕ್ರಾರ,ಐತಾರ ಅಗೆಲ್ ಪಾಡೆರೆ ಎಡ್ಡೆ ದಿನಾಂದಾಂಡ ಕಟ್ಟುನಾಯಗ್ ವೀಳ್ಯ ಕೊರ್ರೆಲಾ ಆದಿನ ಕೊರೊಲಿ,ತಪ್ಪತ್ತ್.ಒಂಜೆನ್ ನಮ ಸರಿಂದ್ ಪನ್ಪಂದಂಡ ಬೊಕ್ಕೊಂಜೆನ್ ತಪ್ಪುಂದು ನಮಕ್ ಪನೆರಾಪುಜಿ.ವದ್ಯದಕುಲು ಬೊಕ್ಕ ಆ ದೈವೊಗು ಸಮ್ಮಂದಪಟ್ಟ್ ನಕುಲು ಅವ್ಲು ಬೋಡು.ಅಕ್ಲೆಗ್ ದಾಲ ವೀಳ್ಯ ಕೊರ್ರೆ ಇಜ್ಜಿ,  ಇಂಚಿನಾನಿ ನೇಮಂದ್ ನೇಮದ ದಿನತ ಲೆಪ್ಪು ಕೊರ್ಪುನಿ.ಅವ್ಲು ನೇಮ ಕಟ್ಟುನಾಯಗ್ ಮಾತ್ರ ಲೆಪ್ಪು ಕೊರ್ಪುನಿ.ವೀಳ್ಯೊಡು ಬಚ್ಚಿರೆ,ಬಜ್ಜೆಯಿ,ಎಲ್ಯ ಪಣವು ಕೊರ್ಪೆರ್.ಪೊರ್ತು ತಿರ್ಗುನ ದುಂಬು ಪಂಡ ಮದ್ದೆನದ ದುಂಬು ವೀಳ್ಯ ಕೊರೊಡು.ದಾಯೆ ಪಂಡ ಸೂರ್ಯ ದೇಬೆರ್ ಉದಿತ್ ದ್ ನೆಗತ್ ದ್ ಬರ್ಪುನ ಪೊರ್ತಾದಿಪ್ಪುಂಡು.

೪.ಕೋರಿ ಕುಂಟ,

-ಕೆಲವೊಂಜಿ ದೈವೊಲೆಗ್ ಕೋರಿ ಕುಂಟ ಪಾಡ್ಂಡ ನನ ಕೆಲವು ದೈವೊಲೆಗ್ ಕೈಲ್ ಕಡ್ಪುನ ಕೈಲ್ ಮೂರ್ತ ಉಪ್ಪುಂಡು

ಕೈಲ್ ಮೂರ್ತ,

ಪಾಳೆ ಮೂರ್ತ

ಮಣ್ಣ್ ಮೂರ್ತ

-ಸಾಂಪ್ರದಾಯಿಕ ಮೂಲ ಕಟ್ಟ್ ಕಟ್ಲೆದ ಸುರುತ ಕಟ್ಟ್.

ಮರ ಮೂರ್ತ

ಕೈಲ್ ಕಡ್ಪುನಿ / ಕೈಲ್ ಮೂರ್ತ:-

ಕೈಲ್ ಕಡ್ಪುನಿ ಪಂಡ ಅವೆಕ್ ಪೂಬಾರೆದನೇ ಕೈಲಾವೊಡು .ಇನಿ ಅವು ತಿಕ್ಕಂದಿನೆಡ್ದಾದ್ ಕದೊಳಿದ ಕೈಲ್ ಕಡ್ಪುವೆರ್.ಬೇತೆ ಕೈಲ್ ಆಪುಜಿ. ಕೈಲ್ ಕಡ್ಪುನೆಕ್ಲ ಅವೆತನವೇ ಆಯಿನ ಕೆರಮೊಲು ಉಲ್ಲ.ಕೈಲ್ ಕಡ್ಪುನಾರ್ ತರೆಕ್ ಮೈಕ್ ಚೌಞಲಿ ನೀರ್ ಡ್ ಮೀದ್ ಮುಂಡೊಗು ಬಸ್ಮದ ಅಡ್ಡ ನಾಮ ಪಾಡ್ದ್  ಸಂಬಂದ ಪಟ್ನ ದೈವದೌಲು ಅಡ್ಡ ಬೂರ್ದು  ನಿನ್ನ ನೇಮೊಗು ಬೋಡಾಯಿನ ಕೈಲ್ ಮೂರ್ತೊಗು ಪೋವೊಂದುಲ್ಲ.ಈ ಎಂಕ್ಲೆಗ್ ಬೆರಿಸಾಯ ಕೊರ್ಲಂದ್ ಕೈಲ್ ಮೂರ್ತೊಗು ಪಿದಡುನಿ. ಕೈಲ್ನೇ ಕಡ್ಮತ್ದ ನೆನ್ ನಮ ತೊಲಚಿ ಕಟ್ಟೆದ ಎದುರು ಕೊನತ್ ದೀದ್ ಅವೆಕೊಂಜಿ ಕುರ್ದಿ ,ದೂಪ,ದೀಪ ಆಯಿನೆರ್ದ್ ಬೊಕ್ಕ ದೈವಡ ನಮ ಅರಿಕೆ ಮಲ್ತೊಂದು ಕೈಲ್ ನ್ ನೆಲ ಬುಡ್ದು ಮಿತ್ತ್ ಕಟ್ಟುನಿ. ಐಡ್ದ್ ಬೊಕ್ಕ ಆ ಕೈಲ್ ನ್ ನೇಮದಾನಿಯೇ ಗಿಚ್ಚಾವುನಿ.ಅಡೆ ಮುಟ್ಟ ಕೈಲ್ ನ್ ಬೇತೆ ಏರ್ಲ ಪಿದಯಿದಕುಲು ಮುಟ್ಟುಲೆಕ ಇಜ್ಜಿ. ಏಳ್ ದಿನ ದುಂಬು ಕೈಲ್ ಕಡ್ತ್ ದ್ ನೇಮದಾನಿ ದೈವದ ಅವಾರದೊಟ್ಟುಗು ಆ ಕೈಲ್ದ ಪರ್ಂದ್ ನ್ ಗಲಸುವೆರ್.ಅಂಚಾದ್ ಆ ಕೈಲ್ ಮೂರ್ತೊಗು ಆತೊಂಜಿ ಮಹತ್ವ ಉಂಡು.ಕೈಲ್ ಕಡ್ತ್ಂಡ್ಂದ್ ಪಂಡ ಆ ನೇಮೊಗು ಸಮ್ಮಂದಪಟ್ನಕ್ಲೆಗ್ ಸೂಕೆ ಬತ್ತ್ಂಡ್ಂದ್ ಲೆಕ್ಕ.ಆ ಸೂಕೆ ಬತ್ತ್ ನಕುಲು ನೇಮ ಕರಿನೇಟ ಊರು ಬುಡ್ದು ಪರವೂರುಗು ಪೋಪುನ ನಿರ್ದಾರ ಮಲ್ಪೆರೆ ಬಲ್ಲಿ .ದಾಯೆ ಪಂಡ ಕೈಲ್ ಕಡ್ತ್ ದ್ ದಡೆಟ್ ದೀಂಡತ್ತೆ,ಅವೆಡ್ದ್ ಬೊಕ್ಕ ಮೊಕುಲು ಅವೆನ್ ಅರ್ದೊಡು ಬುಡ್ದು ಪೋಯೆರ್ಂದಾಂಡ ದೈವೊನು ನಮ ನಂಬಿಸಾದ್ ಬುಡ್ದು ಪೋಯಿಲೆಕ ಅಯಿಜಾ?.ಅಂಚ ಮಲ್ತ್ಂಡ ಬಾಸೆ ಕೊರ್ದು ತತ್ತ್ ನ ದೋಷ ಬರ್ಪುಂಡು.ಕೈಲ್ ಕಡ್ತ್ ನಕುಲು ದೈವೊಗು ಸಮ್ಮಂದ ಪಟ್ಟ್ ನ ಚಾಕಿರಿದಕುಲು ಪ್ರಾದೇಶಿಕತೆಗ್ ಸರಿಯಾದ್ ಕೆಲವು ಕೋಡಿಡ್ ಮೀನ್ ಕೋರಿದೊಣಸ್ ಮಲ್ಪೊಲಿ,ಕೆಲವು ಕಞೋಡಿಡ್ ಮೀನ್ ಕೋರಿ ಅಡ್ಯೆರೆನೆ ಬಲ್ಲಿ.ಗ್ರಾಮ,ಸೀಮೆ ದೈವದ ಕೈಲ್ ಕಡ್ತಿ ಬೊಕ್ಕ ಆ ಗ್ರಾಮ,ಸೀಮೆಡ್ ವಾ ಎಡ್ಡೆ  ಕೆಲಸ ಪಂಡ ಮದಿಮೆ,ಮಸ್ಕಿರಿ ಮಲ್ಪುಲೆಕಿಜ್ಜಿ.ಕೈಲ್ ಕಡ್ಪುನ ಪೊರ್ತುಡು ಊರುಡಿತ್ತ್ಂಡ ನೇಮ ನೆರಿ ಮುಗಿದ್ ಊರು ಬುಡ್ದು ಪಿದಯಿ ಪೋವೊಡು.ಅಂಚನೆ ಕೊಡಿ ಏರ್ನಗ ಊರುಡಿತ್ತ್ಂಡ ಕೊಡಿ ಜಾಯಿ ಬೊಕ್ಕ ಊರುಡ್ದು ಪಿದಯಿ ಪೋವೊಡು.ಕೋರಿ ಪೊಜೆಂಕೊಡಾಂಡಲ ಗ್ರಾಮ,ಸೀಮೆದ ಸುದೆ ಆಯೆರೆಗ್ ಪೋದು ಪೊಜೆಂಕ್ ದ್ ಬತ್ತ್ ದ್ ಕಜಿಪು ಮಲ್ಪೊಡು.ಕುಟುಮದ ದೈವೊಗು ಕೈಲ್ ಕಡ್ತಿ ಬೊಕ್ಕ ಕುಟುಮೊಗು ಸಮ್ಮಂದಪಟ್ನ ವಾ ಇಲ್ಲಲ್ ಲ ಎಡ್ಡೆ ಕೆಲಸ ನೇಮ ಮುಗಿನೇಟ ಮಲ್ಪೆರೆ ಬಲ್ಲಿ. 

ಕೋರಿ ಕುಂಟ:-

       ದೈವದ ಪ್ರತಿಯೊಂಜಿ ನೆತ್ತೆರಾವಾರದ ಬಲಿಕ್ ಕೋರಿ ಬೋಡು.ದೈವದ ಆರಾದನೆಡ್ ಕೋರಿ ಕುಂಟ ಅವೆತನವೇ ಅಯಿನ ಮಾನಾದಿಗೆನ್ ಒರಿತೊಂದ್ಂಡ್.ಕೋರಿ ಕುಂಟ ಬಯ್ಯದ ಪೊರ್ತುರ್ದು ಸೂರ್ಯೆ ಕಂತುನ ದುಂಬು ಪಾಡುನಿ.ಕೋರಿ ಕುಂಟ ಪಾಡ್ಂಡ್ ಪಂಡ ಇಂಚಿತ್ತ್ ನ ದೈವೊಗು ಇಂಚಿತ್ತ್ ನ ದಿನತಾನಿ ನೇಮಂದ್ ಗಡು ಪಾಡಿಲೆಕಾಂಡ್. ಕೋರಿ ಕುಂಟದ ಸಂಕಲ್ಪ  ದಾದ ಪಂಡ ಅವು ಒಂಜಿ ಮೂರ್ತ.ಆ ನೇಮೊಗೌಲು ಗಡಿ ಪಾಂಡ್ಡ್,ಮೂರ್ತ ಆಂಡ್,ದಿನ ನಿಘಂಟ್ ಆಂಡ್ಂದ್ ಲೆಕ್ಕ.ಅಯಿರ್ದ್ ಬೊಕ್ಕ ಕೈಲ್ ಕಡ್ಪುನಿ.ಗ್ರಾಮ ದೈವೊಗು ,ರಾಜಂದೈವೊಗು ಕೋರಿಕುಂಟ 8 ದಿನೊಕು ದುಂಬುಲ ಮಲ್ಪೊಲಿ,15ದಿನೊಕು ದುಂಬುಲ ಮಲ್ಪೊಲಿ,48 ದಿನೊಕು ದುಂಬುಲಾ ಮಲ್ಪೊಲಿ.ಅವು ಅಲ್ತ ಪ್ರದೇಶಾಚಾರೊಗು ಬುಡ್ತಿನ ಇಚಾರ.ಆಂಡ  ಅರಸು ದೈವೊಲೆಗಾಂಡ ಕೋರಿ ಕುಂಟದ ಒಂಜಿ ತಿಂಗೊಲ್ದ ಕುದಿ ಮೂರ್ತ,ಕುಟುಮ ದೈವೊಲೆಗ್ ಕೈಲ್ ಕಡ್ಪುನಿ.ನೇಮೊಗು 5,7ದಿನತ ಉಲಯಿ ಕೈಲ್ ಕಡ್ಪುನಿ.ಕೋರಿ ಕುಂಟ ಪಾಡ್ದ್ ನೇಮ‌ ಆಪುನ ದೈವೊಲೆಗ್ಲಾ ಕೈಲ್ ಕಡ್ಪುವೆರ್.ಕೋರಿ ಕುಂಟ ಆವಂದೆ ಕೈಲ್ ಕಡ್ಪುನ ಶಾಸ್ತ್ರ ದುಂಬು ಇಜ್ಜಾಂಡ್ .ಕೋರಿ ಕುಂಟ ಆವಂದೆ ಕಾಲಿ ಕೈಲ್ ಕಡ್ತ್ ದ್ ನೇಮ ಆಪುನ ಜಾಗೆಲ ತುಳು ನಾಡ್ ಡ್ ಉಂಡು. ಕೈಲ್ ಕಡ್ತ್ ನೆತ ಪಂರ್ದ್ ನ್ ದೈವದ ಆವಾರೊಗು ಗಲಸುವೆರ್.ಪೂರ್ವೊಡು ಪೂ ಬಾರೆದ ಕೈಲ್ ನೆ ಕಡ್ತೊಂತೆರ್.ಪೂಬಾರೆ ಅಪ್ರೂಪ ಆಯಿನೆರ್ದಾತ್ರ ಕದೊಳಿ ಬಾರೆದ ಕೈಲ್ ಕಡ್ಪುವೆರ್.ಕೋರಿ ಕುಂಟೊಗು ಜೋಗ ಉಂಡು.ಜೋಗದಪ್ಪಣೆಯಾದ್ ಕೋರಿ ಕುಂಟ ಆಂಡ ಕೈಲ್ ಕಡ್ಪುನೆಕ್ ಜೋಗದಪ್ಪಣೆ ಇಜ್ಜಿ.ಕೈಲ್ ಕಡ್ಪುನಗ ಗಡಿ ಪತ್ತ್ ನಕುಲು ಚಾಕಿರಿದಕುಲು,ಕೊಂಬುದಕುಲು ಬೊಲ್ಪುಗು ಪೋದು ದೈವೊನು ಪ್ರಾರ್ಥನೆ ಮಲ್ತ್ ದ್ ಕೈಲ್ ಕಡ್ಪುವೆರ್.ಕೈಲ್ ಕಡ್ಪುನಗ ಅವೆಕ್ ಸಂಬಂದಪಟ್ಟ್ ನಕುಲು ಇತ್ತ್ ದ್ ಕೊಂಬು ವಾದ್ಯೊಡೆ ಕೈಲ್ ಕಡ್ಪುವೆರ್.ಅಂಕ ಅಯನ ಪಂಡ ಕೋರಿ ಕುಂಟ ಬೋಡೆ. ಕುಂಟ ಪಂಡ ಒಂಜಿ ತಮೇರಾದ್ ಉಂತುನ‌ ಒಂಜಿ ಇಚಾರವು.ಕುಂಟ ಪನ್ಪುನವು ದೈವದ ಆ ಕಲೊಕು ತಮೆರ್ / ಆಧಾರ ಸ್ಥಂಭ.ಕುಂಟ ಪಾಡ್ಂಡ್ ಪಂಡ ದೈವದ ಕಟ್ಟ್ ನ್ ಮೀರ್ದ್ ಪೋಯೆರೆ ಆಪುಜಿಂದ್ ಅರ್ಥ.ಅವ್ವೆಂಚ ಪಂಡ ಕೋರಿ ಕುಂಟದಪಗ,ಕೊಡಿ ಏರ್ನಪಗ ಕಿರ್ವಾಲ್ ಬನ್ನಗ ಇತ್ತ್ ನಕುಲು ಕೊಎಇ ಜಾನೇಟ,ಕಿರ್ವಾಲ್ ಪೋನೇಟ ಊರು ಬುಡ್ದು ಪೋಪುಲೆಕ ಇಜ್ಜಿ,ಮದಿಮೆ ಮಸ್ಕಿರಿಂದ್ ಎಡ್ಡೆ ಕೆಲಸ ಮಲ್ಪುಲೆಕ ಇಜ್ಜಿ.ಕೋರಿ ಪೊಜೆಂಕುಂಡಲಾ ದೈವದ ಗಡು ಪಾಡಿ ಜಾಗೆದ ಗಡಿ ಕಡತ್ ದೆ ಪೊಜೆಂಕೊಡು.

ಕೋರಿದ ಕುಂಟ 5 ದಿನ,7ದಿನ, 9ದಿನ ಇಂಚ ಆಪುನಿ ಹೆಚ್ಚಿಗೆ.ಕೆಲವು ಕೋಡಿಡ್  ಕೋರಿದ ಕುಂಟ ಕೆಲವೊಂಜಿ ದಿನೊಕ್ಲೆ ದುಂಬೇ ಪಾಡ್ವೆರ್.ಕಲ್ಲಾಡಿಡ್ ಬಿಸುತಾನಿ ಬಯ್ಯಗ್ ಕೋರಿ ಕುಂಟ ಆದ್ ಬಿಸುತಾನಿ ನೇಮ ಆಪುನಿಪಂಡ 18 ದಿನತ  ಅಂತರ. ಕಣಂದೂರುಡು ಒಂಜಿ ತಿಂಗೊಲು‌ ದುಂಬೇ ಕೋರಿ ಕುಂಟ ಪಾಡುವೆರ್. ಕೋರಿ ಕುಂಟ ಮೂಜಂಜೊಡೇ(ಕತ್ತಲೆ ಬೂರುನ ಪೊರ್ತು) ಪಾಡುನ ಕೆರಮ.ಬೊಲ್ಬೇಪು,ಮದ್ತೆನ,ಬಯ್ಯಂದ್ ಬೇತೆ ವಾ ಏಳ್ಯೆಡ್ಲ ಕುಂಟ ಪಾಡುನ‌ ಕೆರಮ ಇಜ್ಜಿ.ಆಂಡ ಕೈಲ್ ಕಡ್ಪೆರೆಗ್ ಕಾಂಡೆದ ಮೂರ್ತನೇ ಆವೊಡು. .ಕೋರಿ ಕುಂಟೊಡು ಪ್ರದೇಶಾಚಾರೊಡು ಎತ್ತೇಸ ಉಂಡು.   ಕೋರಿ ಕುಂಟೊಡು ಕೆಲವು ಕೋಡಿಡ್ ಒಂಜಿ ಕುಂಟ ಪಾಡ್ವೆರ್.ಕೆಲವು ಕೋಡಿಡ್ ಐನ್ ಕುಂಟ ಪಾಡ್ವೆರ್.ಅಂಚ ಮುಗುಳಿ ಬರೊಡುಂದು ಮೂಜಿ ಕುಂಟ ಪಾಡುಜೆರ್.ರಡ್ಡ್,ನಾಲ್ ಇಂಚ ಸಮ ಸಂಕೆಡ್ಲ ಕೂಂಟ ಪಾಡ್ರೆ ಇಜ್ಜಿ.ಕೋರಿ ಕುಂಟ ಪಾಡ್ನಗ ದೈವ ಇತ್ತ್ ದ್ ಕೋರಿ ಕುಂಟ ಪಾಡ್ನ ಸಂಕಲ್ಪದ ಒರುವಾದ್ ಆ ಜಾಗೆಡ್ ದೈವ ಮಾನಿನ ವಸಾಯ ಉಪ್ಪುಂಡು.ಕೋರಿ ಕುಂಟ ರಡ್ಡ್ ಅರ್ಥ ಕೊರ್ಪುಂಡು.೧-ಆನಿರ್ದ್ ಬೊಕ್ಕ ಆದೈವದ ನೇಮ ಆಪುನಡೆಮುಟ್ಟಗ್ ಒಂಜಿ ಗಡು ಪಾಡ್ಂಡ್.ಕೋರಿ ಕುಂಟ ಪಾಡಿ ಬೊಕ್ಕ ಆ ಊರುಡು ಒವ್ವೇ ರೀತಿದ ರಕ್ತಪಾತ,ಕಲಹ,ಸಮಸ್ಯೆ ಆಯೆರೆ ಬಲ್ಲಿ,ಮನುಷ್ಯ ಸಮ್ಮಂದಿ ಒವ್ವೇ ಎಡ್ಡೆ ಕೆಲಸ ಆಯಿನ ನಿಚ್ಚಯ, ಮದಿಮೆ,ಸಮ್ಮಣ,ಬಯಕೆ,ಇಲ್ಲೊಕ್ಕೆಲ್  ನೇಮ ಕರಿನೇಟ ಒವ್ಲ ಮಲ್ಪೆರೆ ಬಲ್ಲಿ. ದಿನಮಾನ ಮಲ್ಪೆರೆ ಬಲ್ಲಿ.ಆಂಡ ಕೆಲವು ಕೋಡಿಡ್ ಪ್ರಾದೇಶಿಕವಾದ್ ಎತ್ತೇಸೊಲು ಉಂಡು ಕೆಲವೊಂಜಿ ಊರುಲೆಡ್ ಬಲ್ಲಿ ಪಂಡ ಬಲ್ಲಿ.ನನ ಕೆಲವೊಂಜಿ ಊರುಲೆಡ್ ಆ ಊರುಗು ಸಂಬಂದಪಟ್ಟ್ ನಕುಲು ಆ ಊರುದ ದೈವೊಲ್ನ ಅಪ್ಪಣೆ ಪಡೆದಿಪ್ಪುವೆರ್.ದೈವದ ಮಾನಿ ಜೋಗೊಡಿತ್ತ್ ದೆ ಅಕುಲೆಗ್ ಅಪ್ಪಣೆ ಕೊರ್ಪುನಿ.ಎಂಕ್ ಲ್ನ ಊರು ಮಲ್ಲ,ಮಾಗಣೆ ಮಲ್ಲ,ಸೀಮೆ ಮಲ್ಲ .ಅಂಚಾದಿಪ್ಪುನಗ ನಿಕ್ ಲ್ನ ಕಟ್ಟ್ ಗ್ ಸರಿಯಾದ್ ಇನಿತ ದಿನಮಾನೊಡು ನಡತೊನೆರೆ ಎಂಕ್ಲೆಗ್ ಕಷ್ಟ ಆಪುಂಡು.ಅಂಚಾದ್ ಎಂಕುಲು ನಿನ್ನ ಕೋರಿ ಕುಂಟದ ಪೊರ್ತುಡು ಇಡೆ ಬತ್ತ್ ದ್ ನಿನಡ  ಬಿನ್ನೈತೊಂಡ, ನಿಕುಲು  ಎಂಕ್ಲೆಗ್ ಒಪ್ಪಿಗೆ ಕೊರೊಡು(ಮದಿಮೆ ಮಸ್ಕಿರಿ ಪನ್ಪಿ ಒವ್ವಾಂಡಲ ಎಡ್ಡೆ ಕಜ್ಜೊಲಿತ್ತ್ಂಡ) ಪಂಡ್ ದ್ ಕೋರಿ ಕುಂಟದಾನಿ ಮೊಕ್ಲು ಕೈಕಾನಿಕೆ ಪತ್ತೆರೆ ಉಂಡು.ಬೊಂಡ ಪೂ,ಪಣವು ಪೂರ ಪತ್ತೆರೆ ಉಂಡು .ಅಕುಲು ದೈವೊಗು ಕೈಕಾನಿಕೆ ಪತ್ತ್ಂಡ ದೈವ ಅಕ್ಲೆಗ್ ಒಪ್ಪಿಗೆದ ಬೂಲ್ಯ ಕೊರ್ಪುಂಡು.ಕೋರಿ ಕುಂಟದ ಜೋಗದ ಮಾನಿನೌಲು ಕೈ ಕಾನಿಗೆ ಪತ್ತುನಕುಲು  ದುಂಬು ಗಡಿ ಪತ್ತ್ ನಾರೆಗ್ ಬೊಕ್ಕ ಆ ದೈವಸಾನದ ಆಡಲ್ತೆದಕ್ಲೆಗ್ ತೆರಿಪಾದಿಪ್ಪೊಡು. ಎಂಕ್ ಲೆಗ್ ಇಂಚಿ ಎಡ್ಡೆ ಇಚಾರದ ಬಗೆಟ್ ಪನೆರೆ ಬರ್ರೆ ಉಂಡು,ಎಂಕ್ಲೆಗ್ ನಿಕುಲು ದೈವದ ಒಪ್ಪಿಗೆ ದೆಪ್ಪಾದ್ ಕೊರೊಡುಂದು. ಆಂಡ ಕೆಲವು ಕೋಡಿಡ್ ಇಂಚಿನೆಕ್ ಅವಕಾಶನೇ ಇಜ್ಜಿ.೨.ಆನಿರ್ದ್ ಬೊಕ್ಕ ಆ ಗ್ರಾಮೊಡು ನಿಚ್ಚ ಕೋರಿದ ಕಟ್ಟ,ಜನೊಕ್ಲೆನ ಕೂಡು ಕಟ್ಟ್,ನೇಮ ನೆರಿಕ್ ಸಮ್ಮಂದಪಟ್ನ ಕೆಲಸೊಲು ನಡತೊಂದೆ ಬೋಡು.ಅವ್ಲ ಪ್ರದೇಶಾಚಾರವಾದ್ ಎತ್ತೇಸೊ ಉಂಡು.

       ಜಾತ್ರೆಗ್ ದುಂಬು ದೈವ ಸಾನದ ಕೈತಲ್ ಕೋರಿ ಕುಂಟ ಪಾಡ್ವೆರ್ ಅವೆಟ್  ಐನ್ ಕುಟ್ಟಿಲು ಉಪ್ವ .ರಾಜಂದೈವೊಲೆಗ್ ಅರಸು ದೈವೊಲೆಗ್ ಮಾತ್ರ ಕೋರಿ ಕುಂಟ. ಕೋರಿ ಕುಂಟ ಆಯಿ ಬೊಕ್ಕ ಆ ಊರ್ದ ದೈವದ ಗಡುವಾಡಿ ಜಾಗೆ ಮುಟ್ಟ ಕೋರಿ ಕೊಯ್ದ್   ಕಜಿಪು ಮಲ್ಪುಲೆಕ ಇಜ್ಜಿ .ಕೊಯ್ಯೊಡಾoಡಲಾ ಗಡುಕಡತ್ ದ್ ಸುಧೆ ಅಯೆರೆಗ್ ಪೋದು ಕೊಯ್ಯೊಡು .  ಕೋರಿ ಕುಂಟ ಪಾಡಿ ಬೊಕ್ಕ ಕೆಲವು ಕೋಡಿಡ್ ಅಪಗನೆ ಕೋರಿದ ಕಟ್ಟ ಸುರು ಆಪುಂಡು. ಕುಂಟ ಪಾಡಿ ಕೂಡ್ಲೆ  ಕಟ್ಟ ಆಪುನವ್ಲು ಶಾಸ್ತ್ರೊಗಾಂಡಲ ದೈವದ ಮಾನೆಚ್ಚಿದೆದುರು ಕೋರಿ ಕಟ್ಟೊಡು‌.ಕೋರಿ ಕುಂಟಾದ್ ಅಪಗನೆ ಕೋರಿ ಬುಡ್ಂಡ ಅಲ್ಪರ್ದ್ ಬೊಕ್ಕ ದಿನೋಲ ಕೋರಿದ ಕಟ್ಟ ನಡಪೊಲಿ.ಅಂಚಾಂದ್ ಅವ್ಲು ಬಾಲ್ ಕಟ್ಟ್ ದೇ ಸುರು ಕೋರಿ ಕಟ್ಟೊಡುಂದು ಇಜ್ಜಿ.ಬಾಲ್ ಕಟ್ಟಂದೆ ಕೋರಿ ಮುಟ್ಟವೊಲಿ ಪಂಡ ಕಟ್ಟ ಮಲ್ಪೊಲಿ. ಕುಂಟ ಪಾಡಿನಲ್ಪ  ಮಾನೆಚ್ಚಿಡ್ ಕೋರಿ ಕುಂಟೊಗು ದೈವದ  ಅಭಯ ಅದ್ ಕುಂಟ ಪಾಡಿ ಬೊಕ್ಕ ಗಡಿ ಪತ್ತ್ ನಕುಲು,ಚಾಕಿರಿ ಬಾಗದಕುಲು ಮಾತೆರ್ಲ ಕುಂಟೊಗು ಪುಡ್ಯೊನುವೆರ್.ಅಂಚಿನವ್ಲು ಕೋರಿದ ಕಟ್ಟೊಗು ದೈವದ ಅಪ್ಪಣೆ ಉಪ್ಪುಂಡು." ಕಲ ಸೇರೊಂಡರ್,ಎನನ್ ಅಂದ್ ಮಂತೊಂಡರ್,ಕುಂಟ ಪಾಡಾಯರ್,ಕಟ್ಟ ಸುರು ಮಲ್ತರ್,ಆಂಡ ಕುಂಟ ಪಾಡಿ ಬೊಕ್ಕ ಇನಿ ಮುಟ್ಟದ ನೇಮ ನೆರಿ ಬೊಕ್ಕ  ಕಟ್ಟೊನು ಮಲ್ಪವೊಂದು ಗಣೊಕ್ಲೆಗ್ ಬೋಡಿತ್ತ್ ನ ರಕ್ತಾಹಾರೊನು ಕೊರ್ದು ಎಂಕುಲು ಎಂಚ ಸಂಪಾಯನ ಅಂಚನೆ ನಿಕ್ಲೆನ್ ಸಂಪುಡು ದೀಪುನ ಆರ ಬಾರ ಎಂಕ್ಲೆಗ್ ಸಂದ್ ನ  " ಪಂಡ್ ದ್ ದೈವದ ಅಪ್ಪಣೆ ಆಪುಂಡು.ಪ್ರತಿಯೊಂಜಿ ದೈವಾರಾದನೆದ ಸಂದರ್ಬೊಡ್ಲ ಜೋಗದ ನುಡಿ ಬರೋಡೆ. ಅಭಯ ದೈವೊಲು ಕೊರ್ಪುಜೆರ್ಂದಾಂಡ ಜೋಗ ದಾಯೆ?.ಕೋರಿ ಕುಂಟೊಗು ಮಾತ್ರ ಅತ್ತ್ ದೈವದ ಒವ್ವೇ ಕೆಲಸ ಮಲ್ತ್ಂಡ್ ಲ ದೈವದ ನೇಮ ಪಿರಿಯುನ‌ ದುಂಬು ದೈವದ ಅಭಯದ ನುಡಿ ಬರೋಡೆ .ದೈವದ ನಡಾವಳಿಗ್ ಸರಿಯಾಯನ ಅಭಯೊನು ದೈವ ಕೊರೊಡು.ಸತ್ಯದ ನುಡಿ ಎಂಚ ಇತ್ತ್ಂಡ್ ಪಂಡ " ಕಲೊಕು ಬೋಡಾದ್ ಕಟ್ಟ,ಅಂಕೊಗು ಬೋಡಾದ್ ಕಟ್ಟ ' ಪಂಡ್ ದ್.ದುಬು ದೈವದ ಕಲತ ಕಟ್ಟೊಡು ದೂದು ಕಟ್ಟೆರೆ ಬಲ್ಲಿತ್ತ್ಂಡ್.ಇನಿಲಾ ಕೇಪುದ ಉಲ್ಲಾಲ್ದಿನ ಸಾನದ ಕಟ್ಟೊಡು ಈ ಕೆರಮ ಒರಿದ್ ಬೈದ್ಂಡ್.ಒರಿನಂಚ ಜೂಜು ಕಟ್ಟ್ ದೇ ದೈವದ ಕಲತ ಕಟ್ಟ ನಡತೊಂದುಂಡು.ಅವ್ಲೆ ನಮ ತತ್ತ್ ದ್ ನಿ.ಬೊಕ್ಕ ನಮ ಪಂಡಿನೆನ್ ದೈವ ಕೇನುಜಿ ಪನ್ಪ.ದೈವ ಪನ್ನೆನ್ ನಮ ಕೇನಂದೆ ದೈವ ನಮ ಪನ್ನೆನ್ ಕೇನುವಾ?.

   ಕೆಲವು ಕೋಡ್ಡ್ ಕಿರ್ವಾಲ್ ಪೋದು ಒಂಜಿ ದೈವದ ಕೊಡಿ ಏರುನ‌ ಇತ್ತ್ಂಡ ಕೊಡಿ ಏರ್ದ್ ಒಂಜಿ ದೈವೊಗು ಸುರುತ ನೇಮ ಆಯಿಬೊಕ್ಕ ,ಇಜ್ಜಿಂದಾಂಡ ಕಿರ್ವಾಲ್ ಪೋದು ಅವ್ಲು ವಾ ದೈವ ಉಂಡಾ ಅವೆಟ್ ಒಂಜಿ ದೈವೊಗು ಒಂಜಿ  ನೇಮ ಆದ್ ಅಯಿರ್ದ್ ಬೊಕ್ಕ ಕೋರಿ ಕಟ್ಟೆರೆ ಸುರು.ಅಂಚಾದ್ ಅವ್ಲು ರಡ್ಡ್ ಸಂಕಲ್ಪೊಲು ಉಂಡು.ಒಂಜಿ ಕುಂಟದಾನಿಯೆ ಕಟ್ಟ ಸುರಾಂಡ ಅವ್ಲು ಕಿರ್ವಾಲ್ ಪೊಪುನೆಕ್ ಲೆಕ್ಕಾಚಾರ ಇಜ್ಜಿ.ಕಟ್ಟ ನಡತೊಂದೆ ಉಪ್ಪುಂಡು.ಕುಂಟದಾನಿ ಕೋರಿ ಕುಂಟದ ಗಡುವಾದ್ ಉಂತ್ಂಡ ಬೊಕ್ಕ ಕಿರ್ವಾಲ್ ಪೋದು ಕಿರ್ವಾಲ್ ಕೆರ್ತ್ ನೆರ್ದ್ ಬೊಕ್ಕ ಒಂಜಿ ನೇಮ ಆಯಿನೆತ ಮನದಾನಿಡ್ದ್ ಬೊಕ್ಕ ಕಟ್ಟ ಸುರು.ಅಂಚ ಈ ರಡ್ಡ್ ಇಚಾರೊಲು ಕೋರಿಕುಂಟದ ಬಗೆಟುಂಡು

ಕೋರಿ ಕುಂಟದಾನಿಯೆ ಕೋರಿ ಬುಡ್ದು ಕೋರಿದ ಕಟ್ಟ ಸುರಾಂಡ ನೇಮ ಮುಗಿಯುನ ದಿನತಾನಿಮುಟ್ಟ ಕೋರಿ ಕಟ್ಟೊಂದೇ ಜಪ್ಪುವೆರ್.ಅಂಚಾದ್ ಅಂಕದೊಟ್ಟಿಗೆ ಆಯನ ನಡತೊಂದು ಇತ್ತ್ ದ್ "ಅಂಕ-ಅಯನ" ಪನ್ಪಿ ಪುದರ್ ಬೈದ್ಂಡ್.ಅಂಕ ಪಂಡ ಕೋರಿದ ಕಟ್ಟ.ಆಯನ ಪಂಡ ದೈವದ ನೇಮನೆರಿ,ನಡಾವಳಿ.ಅಂಚಾಂದ್ ಒಂಜಿ ನೇಮ ಆದ್ ಕೋರಿದ ಕಟ್ಟ ಆಂಡ ಅವು ಅಂಕ ಆಯನಂದಾಪುಜಿ.ದಾಯೆ ಪಂಡ ಅವ್ಲು ಕೋರಿದ ಕುಂಟ ಮಾತ್ರ ಪಾಡ್ದಿಪ್ಪುವೆರ್.ಕೋರಿ ಕಟ್ಟ್ ದುಪ್ಪುಜೆರ್.ಒಂಜಿ ನೇಮ ಆದ್ ಬೊಕ್ಕ ಕೋರಿ ಕಟ್ಟುವೆರ್.ಅವ್ಲು ಆಯನ ದುಂಬಾಂಡ್,ಅಂಕ ಬೊಕ್ಕ ಆಂಡ್.ತರ್ಕೊಗು ಅವ್ಲು ಕೋರಿದ ಕಟ್ಟ ಆಯಿಜಾ ಕೇಂಡ ಆಂಡ್ ಪನೊಲಿ ಶಾಸ್ತ್ರ ಪ್ರಕಾರ ಕುಂಟ ಪಾಡ್ ನಲ್ತ್  ಕಿರ್ವಾಲ್ ಜತ್ತ್ ಪೋನೇಟ ಕೋರಿದ ಕಟ್ಟ ನಡತ್ಂಡ ಅಯಿಕ್ "ಅಂಕ-ಆಯನ" ಪನ್ಪೆರ್.

 ಮರ ಮೂರ್ತ:-

      ಮರ ಮೂರ್ತಲ ದೈವದ ಕಟ್ಲೆಡ್ ತೋಜಿದ್ ಬರ್ಪುಂಡು.ದೈವದ ನೇಮದ ದೊಂಪೊಗು ಕಬೆ ಕಡ್ಪುನಗ ಮೂರ್ತ ತೂಯೆರೆ ಉಂಡು ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ ಉಂದಾದುಂಡು..ನೇಮದ ದೊಂಪೊಗ್ಲ ಆಯ ಉಂಡು.ದೈವದ ಕೊಡಿಯಡಿಕ್ಲ ಆಯ ಉಂಡು,ನೇಮ ನಡಪುನ ದೊಂಪೊಗ್ಲ ಆಯ ಉಂಡು.ಆಯಾ ದೈವೊಗು ಸಂಬಂದಪಟ್ಟ್ ದ್ ನೇಮದ ದೊಂಪ ಈತ್ ಕೋಲು ಉದ್ದ,ಈತ್ ಕೋಲು ಅಗೆಲ,ಈತ್ ಕೋಲು ಎತ್ತರಂದ್ ಉಂಡು.ದೈವದ ದೊಂಪದ ಲೆಕ್ಕಾಚಾರ ಕೋಲು ಲೆಕ್ಕೊಡೆ ಆವೊಡು.ಆಂಡ ಇತ್ತೆ ದೊಂಪ ಬುಡ್ದು ಸಾಮಿಯಾನ ಪಾಡ್ದ್ ನೇಮ ನಡಪಾವುನಡೆ ನಮ ಎತ್ತ್ ದ.ಪಾಳೆಡ್ ದೈವೊಗು ಕೊರ್ಪುನ ಆವಾರೊನು ಸ್ಟೀಲ್ದ ತೋಪುಡು ಕೊರ್ಪುನಡೆ ಎತ್ತ್ ದ.ದೈವದ ದಂಪದ ಕಬೆ ಮುಗುಳಿ ಬರ್ರೆ ಬಲ್ಲಿ,ಸರಿ ಬರೊಡು.ದೈವದ ದೊಂಪೊಗು ನಾಲೇ ಕಬೆ ಬರೊಡು.ದೊಂಪ ಪೊರ್ಲಾವಡ್ಂದ್ ಒಂಜಿ ಕಬೆ ಕೊರ್ಪುನ ಕಟ್ಟೇ ಇಜ್ಜಿ.ದೊಂಪದ ಮರ ಮೂರ್ತ ಮಲ್ಪೆರೆ ಪೋನಗಲ ಅಯಿಕ್ ಸಂಬಂದಪಟ್ಟ್ ನಕುಲು ದೈವ ಸಾನದ ಎದುರು ಪ್ರಾರ್ಥನೆ ಮಲ್ತ್ ದ್ ದೈವದಪ್ಪಣೆ ದೆತೊಂದೆ ದೊಂಪದ ಮರ ಮೂರ್ತೊಗು ಪೋವೊಡು.ದೈವದ ದೊಂಪ 5 ದಿನೊಕಾಂಡಲಾ ದುಂಬು ಪಾಡೊಡು.ಬೊಕ್ಕ ದೊಂಪದಡಿಕ್ ಅಂಬಿ ಅಡಿಪೊಡು.ಬೊಕ್ಕ ದೊಂಪೊಗು ಬೋಡಾಯಿನ ಐತ/ಅಲಂಕಾರ ಪೂರ ಮಲ್ಪೊಡು.ದೈವದ ದೊಂಪೊಗು ಮೊಡೆಯಿನ ಅರು ಕಟ್ಟ್ ನ ನುಂಗೆಲ್ ಮಡಲೇ ಪಾಡೊಡು.ದಾಯೆ ಪಂಡ ಅರು ಕಟ್ಟಂದಿನ ಮೊಡೆಯಿ ಪಜ್ಜಿ ಮಡಲ್ ನ್ ಬೆಲ್ಚಾಡ ಜಾತಿದಕುಲು ಪುಣ ಜೆಪುಡಾಯೆರೆ ಗಲಸುವೆರ್.ದೈವದ ಕಲೊಟು ಅಂಗಣ ಕೆತ್ತುನ ಚಾಕಿರಿನ್ ಅಕುಲು ಮಲ್ಪುವೆರ್.ನಮ್ಮ ಹಿರಿಯಾಕುಲು ಒವ್ವೊವು ಪೂರ ಮಲ್ತ್ ದೆರ,ಒವ್ವೊವು ಬಲ್ಲಿ ಪಂತೆರ ಮಾತೆಕ್ಲ ಬೇತೊಂಜಿ ಉದಾರ್ಮೆ ದೀತೆರ್.ಒವೆನ್ ಅರು ಕಟ್ಟಂದೆ ನರಮಾನ್ಯನ ಪುಣ ಜೆಪುಡಾಯೆರೆ ಗಲಸುವೆರಾ ಅವು ದೈವೊಗು ಆವಂದ್ಂದ್ ತೆರಿಪಾದೆರ್.

ಪಾಲೆ ಮೂರ್ತ:-

     ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ:- ದೈವದ ಮುಗೊಕ್ಲ,ಅಣಿಕ್ಲ ಪಾಳೆನ್ ಗಲಸುವೆರ್.ಇನಿ ಬೊಳ್ಳಿ,ಬಂಗಾರ್ದ ಅಣಿ ಮುಗಂದ್ ಏತ್ ಆಡಂಬರ ಮಲ್ತೆರ್ಡಲ ಪ್ರಕೃತಿಡ್ ತಿಕ್ಕೊಂತಿನ ಸೊತ್ತುಲೆಡೇ ಮೂಲ ದೈವಾರಾದನೆ ನಡತೊಂತ್ ನಿ.ಪಾಲೆದ ಮುಗೊಕು ಬೊಕ್ಕ ಪಾಲೆದ ಅಣಿಕೇ ದೈವಾರಾದನೆಡ್ ಮಾನಾದಿಗೆ ಇತ್ತ್ ನಿ.ಇನಿಲಾ ಆತೆ ಇಲ್ಲದೆಚ್ಚಿದ ಪೊಣ್ಣು ಬೂತೊಲ್ನ ನೇಮೊಡು ಸುರುಕು ಬೊಳ್ಳಿ ಬಂಗಾರ್ದ ತರೆ ಪಟ್ಟ ದೀದ್ ಕೋಲ ನಡತ್ಂಡಲ ಕಡೆಕ್ ತಾರೆದ ತಿರಿತ ಕದಿರೆ ಮುಡಿ ದೀದೇ ಕಡೆಕ್ ಕೋಲ ಪಿರಿಯುನಿ.ನಮ್ಮ ತುಲುವ ಮಣ್ಣ್ ದ ಮೂಲ ದೈವ ಪಂಜುರ್ಲಿಗ್ ತಾರೆದ ತಿರಿತನೆ ಅಣಿ ಪಾಡುನಿ,ಪಾಳೆದ ಮುಗನೇ ದೀಪುನಿ.ಮೂಲೊಡು ಮೊಡೆಯಿನ ಮಡಲ್ದ ಮಿತ್ತೇ ದೈವದ ಬಂಡಾರ ಕೇರ್ತೊಂತ್ ನಿ.ಪಜ್ಜಿ ಮಡಲ್ ಡ್ ,ಮುಳಿತ ಕಡ್ಡಿಡ್ ದೈವ ಸಾನಿದ್ಯ ಇತ್ತ್ಂಡ್.ನೇಮ ನಡಪುನ ಮೂಜಿ ದಿನ ದುಂಬು ಪಾಲೆ ಮೂರ್ತ. ನಡಪುಂಡು. ದಾಯೆ ಪಂಡ ಪಾಲೆನ್ ಬೊದ್ ಲ್ಪೊಡು,ಮೊಡೆಯೊಡು ಅಂಚ ಆ ಬೇಲೆಗ್ ರಡ್ಡ್ ಮೂಜಿದಿನ ಬೋಡು.ಅಂಚಾದ್ 3 ದಿನ ದುಂಬು ಪಾಲೆ ಮೂರ್ತ ಮಲ್ಪುವೆರ್.ಆಂಡ ದೈವ ಚಾಕಿರಿಗ್ ಗಲಸುನ ತಾರೆದ ತಿರಿ ದೆಪ್ಪುನೆಕ್ ಇಂಚಿನ ಕಟ್ಟ್ ದಾಲ ಇಜ್ಜಿ.ಪೊರ್ತುಗು ಆ ಸೊತ್ತು ಎತ್ತ್ಂಡ ಆಂಡ್ ಆತೆ

೫.ಸುದ್ದ ಮುದ್ರಿಕೆ ಓಮ,ಸುದ್ದ ಮುದ್ರಿಕೆ:-

   ನೇಮದಾನಿ ಕಾಂಡೆ ಸುದ್ದ ಮುದ್ರಿಕೆ ಓಮ ನಡಪುಂಡು.ಇತ್ತೆ ವೈದಿಕೆರ್ಡ ಗಣ ಓಮ ದೀಪಾವೆರ್.ಉಂದು ತಪ್ಪು.ನಿಜವಾದ್ ಮಡ್ಯೆಲೆರ್ ಪೆಲತ ಕಣಕ್,ಪೊರಿ,ಬೊಂಡ,ಪೆತ್ತದ ನೈ ಗಲಸ್ ದ್ ಸುದ್ದ ಮುದ್ರಿಕೆ ಓಮ ದೀಪೆರ್.ಕೊಡಿಯಡಿಟ್,ನೇಮ ಆಪುನ ಜಾಗೆಡೇ ಮೊಕುಲು ಸುದ್ದ ಮುದ್ರಿಕೆ ಓಮ ದೀಪುನಿ.ಸುದ್ದ ಮುದ್ರಿಕೆ ಓಮೊನು ಮಡಿವಾಳ ಜನಾಂಗದಕ್ ಲೆ ಮಲ್ಪೊಡು.ಇನಿ ನಮಕ್ ಅನುಕೂಲ ಆಂಡ್ಂದ್ ನಮ ದೈವದ ಕಲೊಕು ಏರೆನೋ ಕನತ್ ದ್ ದಾದನೋ ಮಲ್ತ್ಂಡ ದೈವ ಬೊಕ್ಕ ನಮಕ್ ಅನುಗ್ರಹ ಮಲ್ತ್ ಜಿ ಪಂಡ ತತ್ತ್ ನೆ ಅವ್ಲು ನಮನೆ.ದೈವ ಅತ್ತ್.ಮಡ್ಯೆಲೆರೆ ಮಡಿರ್ದ್ ಮಲ್ಲ ಸುದ್ದ ದೈವದ ಕಲೊಟು ನನೊಂಜಿಜ್ಜಿ.ಮಡಿತ ಅದಿಕಾರ ಅಕ್ಲೆಗೇ ಉಪ್ಪುನಿ.ಸುದ್ದ ಓಮೊನು ದೈವದ ಕಲೊಟು ಮಡಿವಾಳೆರೆನ್ ಬುಡ್ದು ಬೇತೆ ಏರೆಗ್ಲ ಮಲ್ಪುನ ಅದಿಕಾರ ಇಜ್ಜಿ.ಇನಿ ನಮ ಅಡೆ ವೈದಿಕೆರೆನ್ ಕನತ್ ದ್ ಅಕುಲು ಮುಗಲ ಪತ್ತುವೆರ್,ಕಿರ್ ವಾಲ್ ಲ ಪತ್ತುವೆರ್,ದೈವ ಇನಿ ಅಕ್ಲೆನ್ ಕೊಡಿಯಡಿಟ್ ತಂತಿರ್ದಾರೇ,ನೂಲು ಪಾಲ್ ಸಂಸಾರಂದ್ ಲ ಲೆಪ್ಪುಂಡು.ಆಂಡ ದೈವದ ಕಲೊಟು ನೂಲ್ ಪಾಲ್ ಸಂಸಾರ ಪಂಡ ಆಚಾರಿನಕುಲು.ನೂಲು ಪಾಲ್ ಸಂಸಾರದ ದೈವದ ಪುರಪು ಉಪ್ಪುನಿ ಆಚಾರಿಲೆಗ್ ಮಾತ್ರ.ದೈವದ ಸೊತ್ತುಲೆನ್ ಮಾತ ಮಲ್ಪುನಿ ಅಕುಲೆ.ಅಂಚಾದ್ ದೈವ ಅಕುಲೆನೆ ಲೆಪ್ಪುನಿ.ಇನಿ ಆಚಾರಿನಕುಲು ಮೂಲೆ ಸೇರ್ದ್ ಅಡೆ ಪೊಸತಾದ್ ಬತ್ತ್ ನಕುಲು ,ದೈವ ನೂಲ್ ಪಾಲ್ ಸಂಸಾರಂದ್ ಲೆಪ್ಪುನಗ "ಚಿತ್ತ "ಪನ್ಪೆರ್.ನೂಲ್ ಪಾಲ್ ಸಂಸಾರ ಪೋದು ನೂಲು ಪಾಡಿ ಸಂಸಾರ ಆಂಡ್.ಸುದ್ದ ಮುದ್ರಿಕೆ ಓಮ ಸಾಮಾನ್ಯ ಸೂರ್ಯೆ ಉದಿತ್ ನೆಡ್ದ್ ಬೊಕ್ಕನೆ ನಡಪುನಿ.ಆ ಮಣ್ಣ್ ಡ್ ದಾದಾಂಡಲ ಅಶುದ್ದಿ, ದೋಷ ಬಾದೆಲಿತ್ತ್ಂಡ ಅವೆನ್ ದೆತ್ತ್ ದ್ ಸುದ್ದ ಮಲ್ಪುನೆಕ್ ಸುದ್ದ ಮುದ್ರಿಕೆ ಓಮ ದೀಪುನಿ.ಅವು ಗಣ ಓಮಂದತ್ತ್.ಅವು ಸುದ್ದ ಮುದ್ರಿಕೆದ ಓಮನೆ.ಮುದ್ರಿಕೆ ಪಂಡ ಮೂಲು ಒಂಜಿ ಸಂಕೇತಂದ್ ಪನೊಲಿ.

೬.ಬಂಡಾರ ಜಪ್ಪುನಿ:-

      ಬಂಡಾರ ಜಪ್ಪುನಗ ಅಡೆಗ್ ಸಮ್ಮಂದ ಪಟ್ನ ಪೂರ ಪರಿವಾರ ಉಪ್ಪೊಡು.ಕೊಂಬು ವಾದ್ಯೊಡೇ ದೈವದ ಬಂಡಾರ ಜಪ್ಪೊಡು.ಆಂಡ ಇತ್ತೆ ಕೆಲವು ಕೋಡಿಡ್ ಬಂಡಾರ ಜಪ್ಪುನ ಕಟ್ಟ್ ಮಲ್ಪುಜೆರ್.ಲೆಕ್ಕ ಪ್ರಕಾರ ಬಂಡಾರ ಜಪ್ಪೊಡು.ಅವೆರ್ದ್ ಬೊಕ್ಕ ಬಂಡಾರ ಕೇರ್ಪೊಡು.ಸಾನೊರ್ದು ಬಂಡಾರ ಜಪ್ಪುನ ದುಂಬು ತಂಬಿಲಾವೊಡು,ದೂಪಾವೊಡು,ಅವೆಕ್ ಸಂಬಂದಪಟ್ನ ಪರ್ವಾದಿಲೆನ್ ಬಲಸೊಡು.ಬಲಸಿನೆಡ್ದ್ ಬೊಕ್ಕ ಅವ್ಲು ಕೈ ಮುಗಿದ್ ಕೇಂಡೊನೊಡು,"ನಿಕ್ಲೆ ನೇಮ ನೆರಿಕ್ ಎಂಕುಲು ಬಂಡಾರ ಜಪುಡಾವೊಂದುಲ್ಲ.ನಿಕುಲು ಮಾಯೆಲು ಮಣೆ ಮಂಚಾವುನು ಬುಡ್ದು ಕೊರ್ದು ಎಂಕುಲು ಜಪುಡಾಯಿ ಬಂಡಾರದೊಟ್ಟಿಗೆ ನಿಕ್ಲೆ ಕಲೆ ಕಾರ್ನಿಕೊನು ನೆಗತ್ ಬರ್ಪುಲೆಕ ಅನು ಮಲ್ತ್ ಕೊರೊಡು" ಪಂಡ್ ದ್ ಮದಿತ್ ದ್ ಬೊಕ್ಕ ಬಂಡಾರ ಜಪ್ಪೊಡು.ಅಡೆಮುಟ್ಟ ಮಾಯೆದೊರುತ ದೈವೊಲು ಮಣೆ ಮಂಚೊಡೆ ಉಪ್ಪುನಿ.ಮಣೆ ಮಂಚೊನು ಬುಡ್ದು ಕೊರ್ಲೆಂದ್ ನಮ ಕೇಂಡೊನೊಡು.

೭.ಬಂಡಾರ ಏರ್ಸಾವುನಿ/ಬಂಡಾರ ಕೇರ್ಪುನಿ:-

         ಬಂಡಾರ ಕೇರ್ತಿ ಬೊಕ್ಕನೆ ನೇಮ ನೆರಿ ಪೂರ ನಡಪುನಿ.ಬಂಡಾರ ಜಪ್ಪುನಗ ಸಾನದುಲಯಿ ದಾದ ಪೂರ ನಡತ್ಂಡ ಯಥಾ ಪ್ರಕಾರ ಬಂಡಾರ ಕೇರ್ತಿ ಕೊಡಿಯಡಿಟ್ಲಾ ಆವೊಡು.ಅವ್ಲು ತಂಬಿಲಾದಿಯಾದ್ ಜಪುಡಾಂಡ್,ಮೂಲು ತಂಬಿಲ ದೂಪದಿಯಾದ್ ಬಂಡಾರ ಏರಾವೊಡು.

೮.ಬಂಡಾರ ಏರಿ ಬೊಕ್ಕದ ಸುದ್ದ ಓಮ,ಜೋಗ,ಕೊಡಿಯಡಿ ಕಟ್ಟುನಿ-ಮಡ್ಯೆಲೆರೇ ದೀಪುನ ಸುದ್ದ ಓಮ..ಕೊಡಿಯಡಿ ಕಟ್ಟುನ್ಲಾ ಮಡಿವಾಳ ಜನಾಂಗದಕುಲೆ.ಸುದ್ದ ಮುದ್ರಿಕೆ ಓಮ ಆದ್ ,ತಂಬಿಲ ಪಾಡ್ದ್,ಜೋಗದಪ್ಪಣೆಯಾದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಕಟ್ಟುನಿ.ತಾರಾಯಿ,ಬಜ್ಜೆಯಿ,ಕುಕ್ಕುದ ಇರೆ,ಪೆಲತ ಇರೆಟ್ ಕೊಡಿಯಡಿ ಕಟ್ಟುನಿ.ಇನಿ ಪೂರ ಕೊಡಿಯಡಿ ಕಟ್ಟ್ ನಗ ತಾರೆದ ತಿರಿ,ಬಚ್ಚಿರೆ ಪೂರ ಕಟ್ಟೊಂದುಲ್ಲೆರ್,ಉಂದು ತಪ್ಪು.ಕೊಡಿಯಡಿ ಪಾಡುನೆಟ್ಲ ಪ್ರಾದೇಶಿಕವಾದ್ 2 ಎತ್ತೇಸೊಲುಂಡು.

1.ಕೊಡಿಯಡಿ ಪಾಡಿ ಬೊಕ್ಕ ಬಂಡಾರ ತರ್ಪವುನಿ.ಈ ಪ್ರಕಾರ ದೈವೊನು ಅಂದ್ ಮಲ್ಪಂದೆ ಏರೆಗ್ ಕೊಡಿಯಡಿ ಪಾಡುನಿ/ಕಟ್ಟುನಿಂದ್ ಅರ್ಥ ಆಪುಜಿ(ಇಲ್ಲಲ್ ಒಣಸ್ ಗ್ ಏರ್ಲ ಕುಲ್ಲಂದೆ ಬಲಸ್ ದೀಲೆಕಾಪುಂಡು)

2.ಬಂಡಾರ ಕೊಡಿಯಡಿಟ್ ಕೇರ್ತ್ ದ್ ದೈವೊನು ಜೋಗೊಡು ಅಂದ್ ಮಲ್ತ್ ದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಪಾಡುನಿ.ರಡ್ಡನೆ ಕೆರಮ ಉಂದು ಪೂರಹಿರಿಯಾಕ್ಲೆ ಕಟ್ಟಾದುಂಡು.

          ಬಂಡಾರ ಒಂಜಿ ಊರುರ್ದು ಕುಡೊಂಜಿ ಊರುಗು ಪೋಪುನ ಕಟ್ಟ್ ಲಾ ಉಂಡು.ಕೆಲವು ತಿಕ್ ಡ್ ಬಂಡಾರ/ಕಿರ್ವಾಲ್ ಬತ್ತ್ ದ್ ಕೊಡಿಯಡಿಟ್ ಸಿಂಗದನೊಟು ಬಂಡಾರ ಏರಾದ್ ನೇಮ ನಡಪುನಲಾ ಉಂಡು.ಮೈಲ್ಕಟ್ಲೆ ಬಂಡಾರ ಪೋಪುನಲಾ ಉಂಡು.ಅವ್ಲು ದೈವ ದರಿ ಕೈಕೊಂದು ಪೋಪುಂಡು.ಮೂಲು ಕಿರ್ವಾಲ್ ಪೋಪುನ ಸಾದಿ ದೂರಾದಿಪ್ಪು.ಆಂಡ ಬಂಡಾರ ಜಪ್ಪುನ,ಏರುನ ಕ್ರಮ ಪೂರಾ ಅಂಚನೆ ಉಂಡು.ಅಂಚ ಬಂಡಾರ ಪೋನಗ ಬಸವೆ ಬೋಡು,ಬಿರ್ದಾಳಿ ಬೋಡು,ಗಡಿ ಪತ್ತ್ ನಕುಲು ಮಾನ್ಯಾದಿಗೆದಕುಲು ಬೋಡು.ಸಾನದ ಆಡಳ್ತೆದಕುಲು ಬೋಡು ,ದೈವದ ಬಂಡಾರದ ಪ್ರತಿ ಸೊತ್ತುಲಾ ಬೋಡು,ದೈವದ ಕರ್ವಾಲ್ ನ್ ಪಲ್ಲೆಂಕಿಡ್ ತುಂಬೊಂದು ಪೋಪುನ ಕಟ್ಟ್..ದೈವೊಗು ಮಸ್ತ್ ಬೊಳ್ಳಿ ಬಂಗಾರಾದ್ ಅವೆನ್ ಕೊನೊಯೆರೆ ಪಲ್ಲೆಂಕಿ ಬತ್ತ್ಂಡ್.ದುಂಬು ದೈವದ ಕಿರ್ವಾಲ್ ನ್ ಕೈಟ್. ಪತೊಂದೇ ಪೋವೊಂತ್ ನಿ.(ದುಂಬು ಪೂರ ಅನುಕೂಲದಕುಲು ಮದಿಮಯನಾ,ಮದಿಮಾಲೆನಾ ನಾಲ್ ಕಾರ್ದ ಕುರ್ಸಿದಂಚಿ ಮಂಚಿ ಲ್ಡ್. ಬೋವಿ ಜನಾಂಗದಕುಲು ತುಂಬೊಂದು ಪೋವೊಂತೆರ್ ಗೆ.ಬೊಕ್ಕ ಬೊಕ್ಕ ಬೇತೆ ಜಾತಿದಕುಲ್ಲಾ ತುಂಬೆರೆ ಸುರು ಮಲ್ತೆರ್).

೯.ಸುತ್ತೆ ದೀದ್ ,ಪನಿವಾರ ಬಲಸ್ ದ್, ದೂಪ-ದೀಪಾದ್ ತಂಬಿಲ:-

ದೈವದ ಕಲೊಟು ಬೆಮ್ಮೆರೆಗೇ ಉರ್ಪೆಲರಿ,ಮುಗಟೆ ದಾಂತಿ ತಾರಾಯಿಡ್ ಸುತ್ತೆ ದೀಪುನ ಕೆರಮ.ನೇಮದೌಲು ಗಣಪತಿ ಸುತ್ತೆ ದೀಪುನ ಕೆರಮ ಇಜ್ಜಿ.ಅಂಚನೆ ಸುತ್ತೆದ ತಾರಾಯಿದ ಕಣ್ಣ್ ಗ್ ಕೊಡತ್ ದೇ ದೀವೊಡು.ದೈವೊಗು ನೇಮೊಡು ಕೊರ್ಪುನ ಬೊಂಡೊನು ಪಿರಾವುಡೇ ಕೆತ್ತ್ ದ್ ಒಟ್ಟೆ ಮಲ್ತ್ ಕೊರೊಡು,ಬೆಮ್ಮೆರೆ ಸುತ್ತೆಡ್ ಬಚ್ಚಿರೆ ಬಜ್ಜೆಯಿ ಉಪ್ಪೊಡು.ತಾರಾಯಿದ ಕಣ್ಣ್ ನ್ ಚೂರು ಕೊಡಪೊಡು,ಒಟ್ಟೆ ಮಲ್ಪುನತ್ತ್.ಕಣ್ಣ್ ಗ್ ಕೊಡಪುನಿ ಪಂಡ ದೃಷ್ಟಿ ದೆಪ್ಪುನಿಂದ್ ಅರ್ಥ.ಹಿರಿಯಾಕ್ಲೆ ಸೂತ್ರ ಪ್ರಕಾರ ಕಣ್ಣ್ ಕೊಡತ್ ದ್ ದೀಂಡ್ ಪಂಡ ಇಂಚಿನ ದೈವದ ದೃಷ್ಟಿ ದೆತ್ತ್ ದ್ ಬೆಮ್ಮೆರೆಗ್ ಸುತ್ತೆ ದೀಂಡ್ಂದ್ ಲೆಕ್ಕ.ಅವೆನ್ ಬೊಕೊಂಜಿ ಬತ್ತ್ ದ್ ಮುಟ್ಟುಲೆಕ ಇಜ್ಜಿ.

ದೈವದ ಆವಾರ,ಪನಿವಾರ:-

      ದೈವದ ಪನಿವಾರೊಡು ಪೊರಿ ,ಬಜಿಲ್ ,ಪಂರ್ದ್, ಬೆಲ್ಲ, ತಾರಾಯದ ಪೂ ಪಾಡ್ವೆರ್.ರಾಜಂದೈವೊಗು ಹೆಚ್ಚಾದ್ 5 ಇರೆತ ಪನಿವಾರಪಾಡುವೆರ್.ಅಂಚಾಂದ್ 3 ಇರೆಟ್ ಪನಿವಾರ ಪಾಡೆರೆ ಬಲ್ಲಿ.ಮೂಜಿ ಇರೆಟ್ ಬಲಸುನಿ ಕರಿದ್ ಪೋಯಿನಕ್ ಲೆಗ್/ಅಪರ ಕರ್ಮೊಗು.ದೈವದ ಪನಿವಾರೊಗು 5 ಇರೆನೇ ಪ್ರದಾನ.ಇನಿ ಕೆಲವೊಂಜಿ ಇಲ್ಲಗ್ ಪನಿವಾರ ಕೊರೊಡುಂದು ಜಾಸ್ತಿ ಇರೆತ ಪನಿವಾರ ಪಾಡುವೆರ್.ಅವು ಸರಿಯತ್ತ್.15 ಇಲ್ಲ್ ಲೆಪ್ಪುದಕ್ಲಿತ್ತ್ಂಡ 15 ಇರೆತ ಪನಿವಾರ ಪಾಡುವೆರ್.ಉಂದು ಸರಿಯತ್ತ್.ಪಂಚ ಬೂತೊಗು ಸಾಕ್ಷಿಯಾದ್ 5 ಕೊಇ ಇರೆತ ಪನಿವಾರ ಪಾಡುವೆರ್. ಮೊಕ್ಲು 5 ಇರೆಟ್ 50 ಇರೆಕ್ ಬೋಡಾಯಿನಾತ್ ಬಲಸಡ್,ಅವೆನ್ ಮಾತೆರೆಗ್ ಪಟ್ಟಡ್,ಆಂಡ ದೈವದ ಕಲೊಟು ಐನೆನ್ ಮೀರುನ (5 ಇರೆತ ಪನಿವಾರ) ಅಧಿಕಾರ ಏರೆಗ್ಲ  ಇಜ್ಜಿ.

ಕೊಡಿಯಡಿತ ಬಲಿ ಮುಕ್ಕರಿಗೆ:-

         ಬಲಿ ಮುಕ್ಕರಿಗೆದ ಅಡಿಟ್ ಸೇಡಿಡ್ ಬರೆದ್ ಅವೆತ ಮಿತ್ತ್  ಕೊಡಿ ಇರೆ ಪಾಡ್ದ್ ಬಾರ್ ಪಾಡ್ವೆರ್.ಬಾರ್ ಪ್ರಕೃತಿದ ಸಂಕೇತ ಆದುಂಡು.ದಾಯೆ ಪಂಡ ಪಜಿ ಬಾರ್ ಡ್ ಜೀವ ಉಂಡು.ಬಿತ್ತ್ಂಡ ಅವು ಕೊಡ್ಯುಂಡು.ಕೆಲವೆರ್ ಬಾರ್ ದ ಬದಲ್ ಉರ್ಪೆಲರಿ/ಕಜೆ ಅರಿ ಅರಿ ಪಾಡ್ವೆರ್.ಒರ ಬೆಯ್ತ್ ದ್ ಬಾರ್ ಡ್ ಅರಿಯಾಯಿನೆನ್ ದುಂಬು ಪಾಡೊಂದಿಜ್ಜಾಂಡ್.ಅವೆತ ಸುತ್ತ ಬೊಂಡೊನು ದೈವೊಗು ಇಡೀ ಕೆತ್ತ್ ದೀಯೊಡು.ಅವು ಪೊರ್ಲುಗು ಬೋಡಾದ್ ಲ ಅಂಚ ಕೆತ್ತ್ ದ್ ದೀಪೆರ್.ಬಲಿ ಮುಕ್ಕರಿಗೆದ ಮಿತ್ತ್ ಬಲಿ ದೀದ್ ಬಲಿತುಲಯಿ ಬಲಿ ಚರ್ವ ಪಾಡುವೆರ್.ಉರ್ಪೆಲರಿತ ಚರ್ವನೇ ಆವೊಡು.ಚರ್ವ ಪಾಡಿ ಬೊಕ್ಕ ಇತ್ತೆ ಪಿಂಅರ,ಮಲ್ಲಿಗೆ ಪೂ ಪೂರ ಪಾಡ್ವೆರ್.ನಿಜವಾದ್ ಬಲಿ ಚರ್ವದ ಮಿತ್ತ್ ಗುಡ್ಡೆ ಕೇಪುಲೊನೇ ಪಾಡೊಡು.ಇತ್ತೆ ಚರ್ವೊದ ಮಿತ್ತ್ ಪಂರ್ದ್,ಅರಿ ಬಲ್ಚಟ್(ದೋಸೆದಲೆಕ ಇತ್ತ್ ನ)ಲ ಪಾಡ್ವೆರ್.ಓಲು ಏರ್ ಕಟ್ಟ್ ತಪ್ಪಾಯೆರ್ಂದ್ ಗೊತ್ತಾವೊಂದಿಜ್ಜಿ.ಬಲಿಕುತ್ತುಡು ಮೂಜೆಸಲ್ದ ದೀಪೊನೇ ಕುತ್ತೊಡು.ಬಲಿ ಕುತ್ತಿ/ತ್ತು,ಸಿಂಗದನ/ನೆ ಅವು ಅಪರ ಕರ್ಮದ ಒರುವಾದುಂಡು.ಅಪರ ಕರ್ಮೊಡು ಮೂಜೆಕ್ ಪ್ರಾದಾನ್ಯತೆ.ಬಲಿ ಕುತ್ತಿಲ ದೂಪೆದಾಕಾರ.ಸಿಂಗದನಲ ದೂಪೆದ ಅಲಂಕಾರದಾಕಾರ.ದೂಪೆಡ್ ಬೇತೆ ಬೇತೆ ನಿಲೆ ಇತ್ತ್ ಲೆಕನೆ ಸಿಂಗದನೊಟ್ಲ ಅಂತರಂತರೊಲಿಪ್ಪುವ.ಉಂದು ಕರಿದ್ ಪೋಯಿನಕ್ಲೆನ ಸಂಕೇತವಾದುಂಡು.ಬಲಿ ಕುತ್ತು ಬೊಕ್ಕ ಅವೆತ ಮಿತ್ತುಪ್ಪುನ ಬಾಲೊಲಿದ ನಡುಟು ಅರ್ಲಾಯಿ ಬಲಿ ಕುತ್ತುಡು ಮಾಯೆದ ನಿಲೆಯುಂಡು.ನಮ್ಮ ಮದಿಪುಗು ಮಾಯೆ ಜೋಗದ ಮಾನಿನ ಮಿತ್ತ್ ವಸಾಯದ ಒರುಟು ಬರ್ಪುನಿ.ನಮ ನಂಬಿನ ದೈವೊಲು ಒಂಜತ್ತ್ ಒಂಜಿ ಕಾಲೊಡು ಈ ಬೂಮಿಡ್ ಒಂಜಿ ಜೀವಾದಿತ್ತ್ ದ್ ಅಕುಲು ನಂಬಿನ ಸತ್ಯೊಡ್ದಾವರ,ಅಕುಲು ನಡತಿನ ಸತ್ಯೊಡ್ದಾವರ ಅಕ್ಲೆ ಹಿನ್ನೆಲೆತ ಪ್ರಕಾರ ಅಕುಲು ಈ ಮಣ್ಣ್ ಡ್ ಸತ್ಯೊಲಾದ್ ನೆಗತ್ ಬತ್ತ್ ನಕುಲು.ಪುಟ್ಟ್ ನಗನೆ ದೈವಾದ್ ಪುಟ್ಟ್ ನ ಕತೆಕುಲಿಜ್ಜಿ.ಅಂಚಾದ್ ಈ ಸಂಕೇತೊಲೆನ್ ದೀದ್ ಅಕ್ಲೆನ್ ಲೆತ್ತ್ ಕೊಂಡಾಡುನ ಒರು/ರೂಪ ಬರ್ಪುಂಡು.ಅಂಚಾದ್ ಬಲಿ ಕುತ್ತಿದ ದೀಪಲ ಮೂಜೆತನೆ.ಸಿಂಗದನತ ಅಂತರಂತರಲ ಮೂಜೆತನೆ.ಸಿಂಗದನೊಟ್ಲ ದೂಪೆಡ್ ಬಲಸುನ ಕೆರಮೊಡೆ ಬಲಸುನಿ.,ತುಡರ್ಲ ಅಂಚನೆ ದೀಯೆರುಂಡು.ದೈವದ ಜೀಟಿಗೆಗ್ಲ ಪುಣೊಕು ಪಾಡ್ದ್ ದೆಕ್ಕ್ ದ್ ದೀನ ಕುಂಟುನೆ ಗಲಸುನಿ.ಸೈತಿ ಪುಣ ಪೊತ್ತಯಿ ಕಾಟದ ಕಡೆಟ್ ಒರಿನ ಒಂಜಿ ಕಿನ್ಯ  ಮರತ ತುಂಡಾಂಡಲ ಬಾಲೆಗ್ ಮರತ ತೊಟಿಲ್ ಮಲ್ಪುನಗ ಅವೆಕ್ ಗಲಸುವೆರ್.ಅಪಗ ದೈವಾರಾದನೆ ಕರಿದ್ ಪೋಯಿನ ಹಿರಿಯೆರ್ನ ಆರಾದನೆ ಪನ್ಪುನೆಕ್ ಉಂದು ಪೂರ ಸಾಗ್ಸಿಅಪುಂಡು.

೧೦.ಪಡಿಯರಿ ಪತ್ತುನಿ:-

      ಪಡಿಯರಿ ಕಟ್ಟುನಕುಲು ಪತ್ತುನ ಕೆರಮ.ಮಾತ ಬೇಲೆಡ್ಲ ಬೇಲೆ ಮುಗಿ ಬೊಕ್ಕ ದೈವಾರಾದನೆದ ಕಟ್ಟುನಕುಲೆಗ್ ಸುರುಕೇ ಪಡಿಯರಿ ಕೊರ್ಪುನ ಕೆರಮ.ದಾಯೆ ಪಂಡ ನೇಮ ನೆರಿ ಆನಗ ವಸಾಯೊನು ಉಂತಾಯೆರೆ ಆವಂದೆ ಕೈ ಮೀರ್ದ್ ಎಚ್ಚಿಕಮ್ಮಿಯಾದ್ ಪೋಂಡ ಪಂಡ್ ದ್ ದುಂಬೇ ಪಡಿಯರಿ ಕೊರ್ಪೆರ್.ಪಡಿಯರಿ ಕೊರ್ಪುನಿಂದಾಂಡ ಇಲ್ಲದ ದೈವ ಆಂಡ ಇಲ್ಲಗ್ ಸಂಬಂದಪಟ್ನ ಹಿರಿಯಾಕುಲು ಪಡಿಯರಿ ಕೊರ್ಪೆರ್.ದೈವದ ಚಾಕಿರಿನ್ ಇಲ್ಲದ ಹಿರಿಯಾಕುಲು ಏರ್ ಮಲ್ಪುವೆರಾ ಅಕುಲೇ ಪಡಿಯರಿ ಕೊರೊಡಾಯಿನಿ.ಬೇತೆಕ್ಲ್ ಕೊರ್ಪುಲೆಕ ಇಜ್ಜಿ.ಗ್ರಾಮದ,ಊರ್ದ ದೈವ ಆಂಡ ಗಡಿ ಪತ್ತ್ ನಕುಲು ಕಟ್ಟುನಾಯಗ್ ಪಡಿಯರಿ ಕೊರೊಡು.ಮಾನಿ,ಮೂಲ್ಯಾದಿಗೆದಕುಲು ಇತ್ತ್ ದ್ ಪಡಿಯರಿ ಕೊರ್ಪುನಿ.ಪಡಿಯರಿನ್ ಕಾಡ ಬೂರುಡೇ ಮೊಡಯಿ ತಡ್ಪೆಡೇ ಕೊರೊಡು.ಸ್ಟೀಲ್,ಸಿಲ್ವರ್ ತೋಪುಡು ಕೊರ್ರೆನೇ ಬಲ್ಲಿ‍.ತಡ್ಪೆಡ್ ಉರ್ಪೆಲರಿ,ಮುಗಟೆದಾಂತಿ ತಾರಯಿ,5 ಬಚ್ಚಿರೆ,1 ಬಜ್ಜೆಯಿ,ಕುಂಟು ಕೊರ್ಪೆರ್.ಪಡಿಯರಿ ಕೊರ್ನಗ ತುಡರ್/ದೀಪ ಬಾರೀ ಅಗತ್ಯ ಉಂಡು.ದೀಪ ಇಜ್ಜಂದೆ ಪಡಿಯರಿ ಕೊಂರ್ಡ ದೈವ ಇಜ್ಜಂದೆ ಪಡಿಯರಿ ಕೊರ್ಲೆಕ ಆಪುಂಡು.ತಡ್ಪೆಡ್ ದೀಪ ದೀಯೆರೆ ಆಯಿಜಿಂಡ ಮಣ್ಣ ತಿಪಿಲೆಡಾಂಡಲಾ ನಿನೆ ಪೊತ್ತಾದ್ ತಡ್ಪೆಡ್ ದೀಯೊಡು.ಈ ಪೊತ್ತಾಯಿ ನಿನೆತ ಬೊಲ್ಪು ದೈವ ಅವ್ಲು ಉಂಡು ಪನ್ಪುನೆತ ಸಂಕೇತ.ಪಡಿಯರಿ ಕೊರ್ನಗ ದಾಲ ಕಟ್ಟುನಾಯಗ್ ವಸಾಯ ಬರ್ಪುಜಿ.ಅಪಗ ಕಟ್ಟುನಾಯೆ ಕಟ್ಟುನಾಯೆ ಆದೇ ಪಡಿಯರಿ ಪತ್ತುನಿ ವಿನಃ ದೈವ ಆದ್ ಪಡಿಯರಿ ಪತ್ತುಜೆ,ಇಂಚಿತ್ತಿ ದೈವದ ನೇಮ ಕಟ್ಟೆರೆ ಪಡಿಯರಿ ಪತ್ತುವೆಂದ್ ಆ ಗ್ರಾಮದ ದೈವ ದೇವೆರೆನ್,ಊರು ಸರ್ವೆರೆನ್ ಕೊಂಡಾಡ್ ದ್ ಕೇನೊಂದು,ಅಯಿಡ್ದ್ ಬೊಕ್ಕ ಆಯೆ  ಕಟ್ಟುನ ಜಾಗೆದ ದೈವೊಗು ಕೈ ಮುಗಿದ್,ಬೂಮಿಗ್ ಅಡ್ಡ ಬೂರ್ದು ,ಅಯಿರ್ದ್ ಬೊಕ್ಕ ಪಡಿಯರಿತ ತಡ್ಪೆಗ್ ಕೈ ಕೊರ್ಪುನಿ.ಪಡಿಯರಿ ಪತ್ತ್ ನಗ ವಸಾಯ ಇಜ್ಜಂದಿನೆಡ್ದಾದ್ ಪಡಿಯರಿತ ತಡ್ಪೆಗ್ ಆಯೆ ಕೈ ಕೊರ್ನಗ  ದೀಪ ದಾಲ ರಟ್ಟುಜಿ. ಪಡಿಯರಿತ ತಡ್ಪೆಗ್ ಆಯೆ ಕೈ ಕೊರಿ ಬೊಕ್ಕ ನಾಲ್ ದಿಕ್ಕ್ ಗ್ಲ ಅಯೆ ತಡ್ಪೆದ ಅರಿಟ್ ಒಂತೆ ಅರಿನ್ ಪಾರಾವೆ.ಅಲ್ತ್ ಬೊಕ್ಕ ಅಲ್ತ್ ಒರ ಅಗಪುವೆ. ಇನಿ ಓಲ್ಲಾ ತಡ್ಪೆಡ್ ನಿನೆ ಪೊತ್ತಾದ್ ಪಡಿಯರಿ ಪತ್ತುನವು ತೂಯೆರೆ ತಿಕ್ಕೊಂದಿಜ್ಜಿ.ಆಂಡ ತುಡರ್ ದೀದ್ ಪಡಿಯರಿ ಪತ್ತುನ ಕೆರಮ ತುಳುನಾಡ್ ಡ್ದ್ ಮದೆಕ್ ಸೇರೊಂದಿಪ್ಪುನವು ದುರಂತ.

೧೧.ಎಣ್ಣೆ ವೀಳ್ಯ/ಬೂಲ್ಯ:-

       ಪಡಿಯರಿ ಪತ್ತಿ ಬೊಕ್ಕ  ಕಟ್ಟುನಾಯೆ ಎಣ್ಣೆ ಬೂಲ್ಯ ಪತ್ತುವೆ.ಕೆಲವೊರ ಎಣ್ಣೆ ಬೂಲ್ಯ ಪತ್ತ್ ನಗ ಒಂಜಿ ಚೂರು ವಸಯಾಪುನಲ ಉಂಡು.ಕಣ್ಣ್ ಮುಚ್ಚಿದ್ ಬುಲನೆಟ ಸೌಮ್ಯವಾದ್ ಜೋಗ ಉಪ್ಪುಂಡು.ಆಂಡ ಅಬತಾರ ಕಟ್ಟೊಂದು ಊರೂರು ಬಲಿಪುನ ವಸಾಯ ಬರ್ಪುಜಿ.ಇತ್ತೆದ. ಪೊಸ ಪೊಸತಾದ್ ಬತ್ತ್ ನ "ಉಗ್ರ"ದ ವಸಾಯ(ಉಗ್ರದ ಎಣ್ಣೆ ಬೂಲ್ಯ) ಬರ್ಪುಜಿ.ಅವೆನ್ ಜೋಗ,ವಸಾಯಂದ್ ಪನೆರಾಪುಜಿ.ಅವು ಪೆರ್ಚಿ ಕಟ್ಟುನಿಂದ್ ಪನೊಲಿ ಆತೆ.ದಂಬು ಮಾತ ದೈವೊಲು ಕಾರ್ ಗ್ ಗಗ್ಗರ ಕಟ್ಟ್ ದೇ ಲಕ್ಕೊಂತಡ ಉರುಂದಾರ(ಇತ್ತೆ ವರ್ಣಾರ ಪಂಜುರ್ಲಿಂದಾತ್ಂಡ್)ಪಂಜುರ್ಲಿಗ್ ಮಾತ್ರ ಗಗ್ಗರದೆಚ್ಚಿ ಇತ್ತ್ ನಿ.ಇನಿ ಗಗ್ಗರದೆಚ್ಚಿ ಇಜ್ಜಾಂದಿ ದೈವೊಲೇ ತಿಕ್ಕಯ.ನಿಜವಾದ್ ಕಟ್ಟುನಾಯೆ ಎಣ್ಣೆವೀಳ್ಯ ದೆತೊನ್ನಗ ಆಯನ ಮೇಲ್ ಗ್ ದೈವ ಮಿನಿ ಉಗ್ರೊಡು ಬತ್ತ್ಂಡ ಆಯೆ ಬದ್ ಕೆರ್ನೇ ಸಾದ್ಯ ಇಜ್ಜಿ.

೧೨.ಬೀರ ಲೆಪ್ಪುನಿ:-

      ತೆಂಬರೆ ಬೊಟ್ಟೊಂದು,ಪಾಡ್ದನ ಪಂಡೊಂದು ದೈವದ ಉಟ್ಟು ಕಟ್ಟ್ ದಡೆ ಎತ್ತ್ ನಗ ಕಟ್ಟುನಾಯಗ್ ಸಾದಾರ್ಣ ವಸಾಯ ಬರ್ಪುಂಡು.ಬೀರ ಪಂಡ ದೈವದ ಚಾತುರ್ಪುನು(ಹಿರಿಮೆ-ಗರಿಎ) ಕೊಂಡಾಡುನಿ.ಸಂದಿ ಪಂಡ ದೀವ ಇತ್ತಿ ಜಾಗೆ,ಬತ್ತಿ ಜಾಗೆದ ಬಗೆಟ್ ತೆರಿಪಾಂಡ ಬೀರೊಡು ದೈವದ ಪರಾಕ್ರಮೊನು ಕೊಂಡಾಡುನಿ.ದೈವೊನು ಪುಗಾರ್ ಪುಗರ್ದಾನಗ ಆಯನ ಮಿತ್ತ್ ದೈವ ವಸಾಯೊಡು ಬರ್ಪುಂಡು. ಮುಕ್ಕಾಲ್ ಮೂಜಿ ಗಳಿಗೆ ಅಯನ ಮೇಲ್ಡ್ ದೈವ ವಸಾಯೊಡಿತ್ತ್ ದ್ ಬೊಕ್ಕ ಬುಡ್ದು ಪೋಪುಂಡು.

೧೩.ಗಗ್ಗರದೆಚ್ಚಿ:-

    ರಾಜಂದೈವೊಲೆಗಾವಡ್,ಅರಸು ದೈವೊಲೆಗಾವಡ್ ಕಾರ್ ಗ್ ಗಗ್ಗರ ಕಟ್ಟ್ ದೇ ಕಟ್ಟುನಕುಲು ಲಕ್ಕ್ ದುಂತೊಂತ್ ನಿ.ಕಾಲ ಕರಿಲೆಕ. ಕಟ್ಟುನಕುಲು. ತಾನ್ ಕಟ್ಟುನ ಎಚ್ಚಿನ ದೈವೊಲೆಗ್ ಗಗ್ಗರದೆಚ್ಚಿ ಮಲ್ತೊಂದೆ ಬತ್ತೆರ್.ಆಟೊಡು ವೇಷದಾರಿ ಪನಿ ಬಿರ್ಸೆ ಆಂಡ ಬಾಗತೆರ್ ಆಯಗ್ ಬೋಡಾಯಿಲೆಕ್ಕ ಪದ ಕೊರ್ಪೆರ್.ಅವ್ವೆ ಲೆಕ್ಕ ಮೂಲ್ಲಾ ಕಟ್ಟುನಾಯೆ ಒಂತೆ. ಬಿರ್ಸೆ ಆಂಡ ಕಟ್ಟಾವುಕುಲು ಆಯೆ ಮಲ್ತ್ ನೆನ್ ಸರಿಂದೇ ಪನ್ಪುನಿ.ಉರುಂದಾರ ಪಂಜುರ್ಲಿ( ಇತ್ತೆ ವರ್ಣಾರ ಪಂಜುರ್ಲಿ ಆತ್ಂಡ್) ಉಗ್ರೊಡು ಉಪ್ಪುನ ದೈವ ಆಯಿನೆಡ್ದಾತ್ರ ದುಂಬುದ ಕಾಲೊಡು ಈ ದೈವೊಗು ಉಗ್ರದ ಗಗ್ಗರದೆಚ್ಚಿ ನಡತೊಂತ್ಂಡ್.ಇನಿ ಗಗ್ಗರದೆಚ್ಚಿ ಇಜ್ಜಂದಿ ದೈವೊಲು ಬಿರೆಲ್ದ ಲೆಕ್ಕಾಚಾರೊಡು ತಿಕ್ಕುವ ಆತೆ.ಕಾರ್ ಗ್ ಗಗ್ಗರ ದೀನಗಲ ಸಭೆ ಸರ್ವೆರ್ಡಲ ಗಗ್ಗರೊನು ತೋಜಾದ್  ಓ ಇಂಚಿನ ದೈವೊಗು ಗಗ್ಗರ ದೀಪೆಂದ್ ಪಂಡ್ ದೇ ಗಗ್ಗರ ದೀಪುನಿ.ಇನಿ ಗಗ್ಗರೊನು ಪತೊಂದು ಅವೆತ ಬಲ್ಲ್ ಪತ್ತ್ ದ್ ಗಗ್ಗರೊನು ಬೀಜಾವೊಂದು,ಅಕ್ಲೆನ ತಿಗಲೆಗ್ ಅಕ್ಲ ಗಗ್ಗರೊನು ಹಾಕೊನುನೆನ್ ತೂನಗ ದೈವಾರಾದನೆ ಇಡೆಗ್ ಲ ಎತ್ತ್ಂಡ ಪಂಡ್ ದ್ ಬೇಜರಾಪುಂಡು.ಗಗ್ಗರೊಗು ದೈವದ ಕಲೊಟು ಅವೆತನವೇ ಆಯಿನ ಮಾನಾದಿಗೆ ಉಂಡು.ಅವು ದೈವದ ಕಲೊಟು ದೈವದ ಅನನ್ಯತೆಗ್ ಒಂಜಿ ಸಂಕೇತ ಆದುಂಡು.ಅಂಚಾದ್ ಚಾಕಿರಿದಕುಲು ಅವೆತ ಪಾವಿತ್ರ್ಯತೆನ್ ಒರಿಪುನವು ಅಕ್ಲೆನ ಕರ್ತವ್ಯ ಆದುಂಡು.

 ೧೪.ನೇಮದೆಚ್ಚಿ-ಬಲಿ ಸುತ್ತುಲು:-

     ಇತ್ತೆದ ಪ್ರಕಾರ ತೂಪುಂಡ ಗಗ್ಗರದೆಚ್ಚಿ ಆಯಿ ಬೊಕ್ಕ ನೇಮದೆಚ್ಚಿ ನಡಪುಂಡು.ಸುರುಕಾದ್ ನಡಪುನಿ ಪರಂಪರೆರ್ದ್ ಬತ್ತಿನ ಸಾಂಫ್ರದಾಯಿಕ ನಡಕೆಲು.ಅಯಿರ್ದ್ ಬೊಕ್ಕ ಒಂಜಿ ಸುತ್ತಾ,ರಡ್ಡ್ ಸುತ್ತಾ,ಮೂಜಿ ಸುತ್ತಾಂದ್ ಸಾನ ಬಲಿ ಸುತ್ತು ಉಪ್ಪುಂಡು.ಅಂಚನೆ ಬೇತೆ ಬೇತೆ ಬಲಿಸುತ್ತುಲು ನಡಪುನ ಕೆರಮಲ ಉಂಡು.ಉದಾರ್ಮೆಗ್-ಮದ್ಮಾಲೆ ಸುತ್ತು ಬಲಿ,ಉಡ್ಕು ಬಲಿ,ಓಡ ಬಲಿ ಇಂಚ ಬೇತೆ ಬೇತೆ ಬಲಿ ಸುತ್ತುಲು ಉಪ್ಪುವ.ದಂಬುಗು ನೇಮದೆಚ್ಚಿ,ಬಲಿತೆಚ್ಚಿಯಾದ್ ದೈವ ದೊಂಪದ ಪಿದಯಿ ಬತ್ತ್ ದ್ ದೈವ ಗಡಿಕ್ ಗಡಿತ ಆವಾರ (ಗಡಿಯಾರ)ಕೊರ್ರೆ ಉಂಡು.ಕೆಲವು ದೈವದ ನೇಮೊಡು ಮುಗ ದೀದೇ ನೇಮ ಸುರಾಂಡ ನನ ಕೆಲವು ನೇಮೊಡು ನೇಮ ನಡತ್ ದ್ ಒಂತೆ ಪೊರ್ತುರ್ದು ಬೊಕ್ಕ ಮೋನೆಗ್  ಮುಗ ದೀಯೆರೆ ಉಂಡು.ನನ ಕೆಲವು ದೈವೊಲೆಗ್ ನೇಮದಿಡೆಟ್ ಮುಗ ಏರುನ ಕ್ರಮ.ನೇಮದೆಚ್ಚಿಡ್ ದೈವೊಲು ನಡಪುನ ನಡಕೆಡ್ ಎತ್ತೇಸೊಲು ಉಂಡು.ಕೆಲವು ಗಂಭೀರವಾದ್ ರಾಜ ನಡಕೆ ನಡತಂಡ ಕೆಲವು ದೈವೊಲು ಕಾರ್ ಮೋಂಟಾದ್ ನಡಪುವ.ಕೆಲವು ನಾಲಿ/ಕಂಟೆಲ್ ಬಗ್ಗಾದ್ ನಡಪುವ .ಇಂಚ ನೇಮದೆಚ್ಚಿಡ್ ಕೆಲವೊಂಜಿ ನಡಕೆಲುಪ್ಪುವ.ನೇಮ ನಡಪುನಿ,

೧೫.ಆವಾರ,ನುಡಿ,ಪೇರ್ ಪರ್ಪುನಿ: -

         ಕೆಲವು ತಿಕ್ ಡ್ ದುಂಬು ಆವಾರಾದ್ ಬೊಕ್ಕ ನುಡಿಯಾಂಡ,ಕೆಲವು ಕೋಡಿಡ್ ಸುರುಕು ನುಡಿಯಾದ್ ಬೊಕ್ಕ ಆವಾರ ಆಪುಂಡು.ತೆರಿನಕ್ಲೆ ಪ್ರಕಾರ ನುಡಿ ಆವಂದೆ ಆವಾರ ಸರಿಯತ್ತ್.ದೈವೊನು ಲೆತ್ತ್ ದ್ ಅಂದ್/ಬರಿ  ಮಲ್ತಿ ಬೊಕ್ಕ  ದೈವೊಗು ಬೋಡಾಯಿನ ಆಗ ಬೋಗೊನು ಕೊರಿಯ.ಅವು ಮಾಯೆಗ್ ಕೊರ್ಪಿಂಚಿ ಆಗ ಬೋಗೊಲು.ಆಗ ಬೋಗ ಕೊರಿ ಬೊಕ್ಕ ದೈವದ ಅಪ್ಪಣೆ ದಾದಂದ್ ಕೇಂಡಿ ಬೊಕ್ಕನೆ ಆವಾರ ಕೊರೊಂತ್ ನಿ.ಅಪ್ಪಣೆನೆ ಇಜ್ಜಂದೆ ಆವಾರ ಎಂಚ?.ಬಿನ್ನೆ ಇಲ್ಲಡೆ ಬತ್ತಿ ಬೊಕ್ಕ ಆಯಡ ದಾನೆ ಎಡ್ಡೆಂದ್ ಸುಕ ದುಕ್ಕ ಕೇಂಡ್ ದಾದ್ ತಿನೆರೆ ಕೊರ್ಪುನಿ.ದುಂಬೆ ತಿನೆರೆ ಕೊರ್ದು ಸುಕ ದುಕ್ಕ ಪಾತೆರುನತ್ತ್.ನಮ್ಮ ಹಿರಿಯಾಕುಲುನಮಕ್ ಸಂಸ್ಕಾರೊಗುಂದು ಇಂಚಿ ಸಾದಿಂದ್ ದೀದ್ ಪೋತೆರ್.ನಮ್ಮ ಜೀವನೊಗ್ಲ ಎಂಚ ಬದ್ ಕೊಡುಂದು ಪದಿನಾಜಿ ಕಟ್ಟ್ ಮಲ್ತ್ ಕೊರ್ತೆರ್.

೧೬.ಬೂಲ್ಯ-ಸೂತ್ರ ಬೂಲ್ಯ,ನೇಮೊರ್ದು ಇಡೆ ಬುಡ್ಪುನಿ:-

     ದೂಪಾದ್,ಸುದ್ದ ಮುದ್ರಿಕೆಯಾದ್,ಬಂಡಾರ ಯಥಾ ಸ್ಥಾನೊಗು ಪೋದು,ಅವ್ಲು ಬಂಡಾರ ಏರ್ಸಾದ್,ಕುಡ ಸುದ್ದ ಮುದ್ರಿಕೆಯಾದ್ ತಂಬಿಲ .ಸೂತ್ರ ಬೂಲ್ಯ ಪಂಡ ಸೂತ್ರೊಗು ಬೂಲ್ಯ ಕೊರ್ಪುನಿ.ಸುರು ಬೂಲ್ಯ ಕೊರ್ನಗ ದೈವದ ಚಾಕಿರಿದಕ್ಲೆನ ಲೆಪ್ಪುದ ಬೂಲ್ಯ ಉಪ್ಪುಂಡು.ಅಂಚ ಚಾಕಿರಿದಕ್ಲೆಗ್ ಒಟ್ಟು ಸೇರಾದ್ ಕಟ್ಟ್ ಮಲ್ತ್ ದ್ ಕೊರ್ಪುನ ಬೂಲ್ಯೊನು ಕಟ್ಟ್ ದ ಬೂಲ್ಯಂದ್ ಪನ್ಪೆರ್.ಉಂದೆನ್ ಸೂತ್ರ ಬೂಲ್ಯಂದ್ ಲ ಪನ್ಪೆರ್.ಸೇರಿಗೆದಕಗಲೆಗ್,ಊರುದಕ್ಲೆಗ್ ಪೂರ ಬೊಕ್ಕ ಬೂಲ್ಯ ಕೊರ್ಪುನಿ.

ಬದಿಕರ ಬೂಲ್ಯಂದ್ ಕೆಲವೊಂಜಿ ರಾಜಂದೈವೊಲೆಗ್ ಇತ್ತ್ ದ್ ದೈವ ಆವಾರ ಕೈಕೊನುನ ದುಂಬು ಬದಿಕರ ಬೂಲ್ಯ ಆಪುಂಡು.ಬದಿಕರ ಬೂಲ್ಯ ಗಡಿಕ್,ಮಾನಿಗ್ ಬೊಕ್ಕ ಆಡಲ್ತೆದಕ್ಲೆಗ್ ಮಾತ್ರ ದೈವ ಕೊರ್ಪುನಿ.ಒರಿನಕ್ಲೆಗ್ ಬದಿಕರ ಬೂಲ್ಯ ಕೊರ್ಪುನ ಕಟ್ಟಿಜ್ಜಿ.ದೈವದ ಬದಿಕರ ಬೂಲ್ಯಲ ತಪ್ಪಂಗಾಯಿಲ ತೂಯೆರೆ ಸರ್ವೇ ಸಾಮಾನ್ಯ ಒಂಜೇ ಅರ್ತ ಕೊರ್ಪುಂಡು.ಬದಿಕರ ಬೂಲ್ಯದ ನಾಟ್ಯ ದೈವದ ಕಲೊಕು ಪೊರ್ಲು ಬರೆರೆಂದ್ ಕನತ್ ದೆರಾತೆ.

  ನೇಮೊರ್ದು ದೈವ ಇಡೆ ಬುಡ್ಪುನ ದುಂಬು ಸಮ್ಮಂದಪಟ್ಟ್ ನಕ್ಲೆಡ ನನ ದಾಲ ಇಚಾರ ಉಂಡಾಂದ್ ಕೇನುನ ಕೆರಮ ಉಂಡು.ಅಪನ ಸಮ್ಮಂದ ಪಟ್ಟಿನಕುಲು  ದೈವೊಗು ಸಂಬಂದಪಟ್ನ ಪೂರ ಇಚಾರಲ ಕೇನುನ ಪತ್ತುನ,ಅರಿಕೆ ,ನನೊಂಜಿ,ಕುಡೊಂಜಿ ಮಾತಲ ಕೇನೆರೆ ಅವಕಾಶ ಉಂಡು.ದಾಲ ಇಚಾರ ಇಜ್ಜಿಂದಾಂಡ ಯಾನ್ ನನ ಮಣೆ ಮಂಚ ಸೇರೊನೊಲಿಯಂದ್ ಇಡೆ ಬುಡೆರೆ ದೈವ ಕೇನುಂಡು.ಅಂಚ ದೈವ ಪನ್ನಗ ನೇಮೊರ್ದು ಇಡೆ ಬುಡೆರೆ ಅರಿಕೆ ಉಂಡು.ಅರಿಕೆ ಆಯಿನಡೆಗ್ ನೇಮೊರ್ದು ಇಡೆ ಬುಡ್ಪುನ ಜೋಗ ನಡಪುಂಡು.ರಾಜಂದೈವೊಲೆಗಂಡ ಗಡಿ ಪತ್ತಿನರ್ ಅರಿಕೆ ಮಲ್ಪುವೆರ್.ಕುಟುಮೊಡಂಡ ಕುಟುಮದ ಹಿರಿಯಾರ್ ಅರಿಕೆ ಮಲ್ಪುವೆರ್.ಕೆಲವೊಂಜಿ ರಾಜಂದೈವೊಲೆಗ್ ಗಡಿಯಾಯಿನ ಇಂಚಿತ್ತ್ ನ ಇಲ್ಲದಕುಲೆ ಅರಿಕೆ ಮಲ್ಪುನಿಂದ್ ಕೆರಮ ಉಂಡು.ಅರಿಕೆ ಇಂಚ ಉಪ್ಪುಂಡು-"ಎಂಕುಲು ಬಕ್ತಿಡ್ ನಿಕ್ಲೆಗ್ ನೇಮೊನು ಕೊರ್ಯ,ಕೊರಿ ನೇಮೊಡು ಸುದ್ದನಾ ಅಸುದ್ದನಾ ಪನ್ಪುನ ಎಂಕ್ಲೆಗ್ ತೆರಿಯಂದ್.ಎಚ್ಚಿ ಕಡಿಮೆ,ಏರ್ ಏರ್ ತಪ್ಪು ದೋಸೊಲು ಆದಿಪ್ಪೆರ್ಲ ಯಾರು.ಆಂಡ ಸಾಂಕ್ಂಡ ಸಮ್ಮಲೆ,ಪೆದ್ದ್ಂಡ ಅಪ್ಪೆ ಪನ್ಪುನ ಸತ್ಯೊಲಾಯಿನ ನಿಕುಲು ಎಂಕ್ಲೆರ್ದ್ ತಪ್ಪು ಆದಿತ್ತ್ ದ್ಂಡಾಂಡ ಮಾಪು ಕೊರೊಡು.ಕೊರಿ ನೇಮೊನು ಸ್ವೀಕಾರ ಮಲ್ತಿನೊಟ್ಟಿಗೆ ಇಡೀ ಊರುನು ದಾಲ ಒಂಜಿ ದೋಷ ಮೋಸೊಲು ಬರಂದಿಲೆಕ್ಕ ಕಾತ್ ಸಂರಕ್ಷಣೆ ಮಲ್ತ್ ಕೊರ್ದು ನಾಲ್ ಕಾರ ನಡೆಕ್,ನರಮಾನ್ಯಗ್ ,ಬುಳೆಕ್,ಮಣ್ಣ್ ಗ್ ಕೊರತೆ ಬರಂದಿಲೆಕ ನಿಕ್ಲೆನ್ ನೆನವರಿಕೆ ಮಲ್ತ್ ನಲ್ಪ ನಿಕ್ಲೆ ಕಲೆ ಕಾರ್ನಿಕ ನೆಗತ್ ಬರ್ಪುಲೆಕ ಎದುರುಗು ತರೆ ಸಾಯಾದ್ ಬಲೆ,ಪಿರವುಗು ಬೆರಿಸಾಯ ಆದ್ ಬಲೆ .ಇನಿ ನೇಮೊರ್ದು ಇಡೆ ಬುಡಿಯರ್ಂದಾಂಡಲ ಎಂಕುಲು ನನೊರ ಲೆಪ್ಪುನಾನಿಗ್ ಎಂಕ್ಲೆ ಬೆರಿಯೆನಿಕ್ಲಿತ್ತ್ ದ್ ಎಂಕ್ಲೆನ್ ಕಾತ್ ರಕ್ಷಣೆ ಮಲ್ಪುಲೆ " ಪಂಡ್ ದಾನಗ ದೈವ  ನೇಮೊರ್ದು ಇಡೆ ಬುಡ್ಪುಂಡು..ಅಂಚ ದೈವ ನೇಮೊರ್ದು ಇಡೆ ಬುಡ್ಯೆರೆ ಮಡ್ಯೆಲೆರೇ ಮೂಜಿ ಸರ್ತಿ ದೈವದ ಮೇಲ್ ಗ್ ಗಿಂಡೆ ನೀರ್ ತಲಿಪುವೆರ್.ಅಪಗ ದೈವ ನೇಮೊಡ್ದು ಇಡೆ ಬುಡ್ಪುಂಡು.ತಲಿಪುದ ಕೂಚಿಡ್ ಗುವೆಲ್ದ ನೀರ್,ತಲಿಪೆರೆ ಕುಕ್ಕು ತಪ್ಪು ಉಪ್ಪುಂಡು.ಇನಿ ಕೇಪುಲ್ದಡೆ ಪಿಂಗಾರ ಪೊಡಿ ಮಲ್ತ್ ದ್ ಪಾಡುವೆರ್,ಗುವೆಲ್ದ ನೀರ್ದ ಬದಲ್ ಬೊಂಡದ ನೀರ್ ಪಾಡ್ವೆರ್.ಕುಕ್ಕು ಪೆಲತ ತಪ್ಪುಡು ಕೂಚಿ ನೀರ್ ತಲಿಪುವೆರ್.

ನಮ ಇನಿ ನಮ್ಮ ಹಿರಿಯಾಕುಲು ಪಾಡ್ದ್ ಕೊರ್ ಕಟ್ಲೆಲೆನ್ ಮದತ್ ದ್ ನಮಕ್ ಅನುಕೂಲ ಆಪುಲೆಕ ಮಲ್ತೊಂದುಲ್ಲ.ಅಂಚಾದ್ ನಮ ಆರಾದನೆಡ್ ತತ್ತ್ ದ್ ಪೋತ  ದೈವದ ನುಡಿ ಪ್ರಕಾರ ಊರುಗೊಂಜಿ ಬಾಸೆ,ದೇಸೊಗೊಂಜಿ ಕಟ್ಟ್.ಉಂದೆನ್ ತೂನಗಲ ಸಾಂಪ್ರದಾಯಿಕ ಕಟ್ಟ್ ಕಟ್ಲೆ ಒಂಜೇ ಆದಿಪ್ಪೊಡಾಂಡ್.ಆಂಡ ಪ್ರಾದೇಶಿಕವಾದ್ ಭಿನ್ನತೆ ಉಂಡು. ನಮ ಬಡುಟು ಬೇರ್ದ್ ಹಾಕುವ ಗಾಯ ಆವು,ಆಂಡ ಮಾಜಿದ್ ಪೋವು.ಆಂಡ ದೈವ ಹಾಕುನಿ‌ ಮಾಯೆದ ಬಡುಟು.ಹಾಕ್ ನ ತೋಜಂದ್.ಗಾಯಲ ಮಾಜಂದ್.ಅಂಚಾದ್ ಮಾಯೆದ ಬಡುತ ಪೆಟ್ಟ್ ತಪ್ಪಾವೊಡಾಂ ಹಿರಿಯ ಪೆರಿಯಾಕ್ಲು ಪಾಡ್ದ್ ಕೊರ್ನ ಕಟ್ಟ್ ಕಟ್ಲೆಲೆನ್ ಒರ್ತೊಂದು ಬರೊಡು.

       

    

ಪ್ರೊಫೆಸರ್ ಡಾ ಅಮೃತ ಸೋಮೇಶ್ವರೆರ್

         ಪ್ರೊಫೆಸರ್ ಡಾ ಅಮೃತ ಸೋಮೇಶ್ವರೆರ್

          ಪ್ರೊಫೆಸರ್ ಡಾ ಅಮೃತ ಸೋಮೇಶ್ವರೆರ್

ನಮ್ಮ ಮೋಕೆದ ಸರಳ ಸಜ್ಜಜನಿಕೆದ ಗುರುಕುಲಾಯಿನ ಡಾ ಅಮೃತ ಸೋಮೇಶ್ವರೆರ್ ಇನಿ ಕಾಂಡೆ ನಮನ್ ಮಾತ ಬುಡ್ದು ಕರಿದ್ ಪೋಯೆರ್ ಪನ್ಪಿ ಇಚಾರ ತೆರಿದ್ ಉಡಲ್ ಗ್ ಬಾರೀ ಬೇನೆ ಆಂಡ್(6-1-2024 ಸನಿವಾರ).ಅರೆನ ಸಾಹಿತ್ಯ ಲೋಕದ ನಿರೆಲಡಿ ಬುಳೆಯಿನ ಎಂಕ್ಲೆನ ಉಡಲ್ ರ್ದ್ ಅರೆನ ನೆಂಪು ಮಾಜಿದ್ ಪೋವಂದ್.ಸತ್ಯ ಇಚಾರೊನು ಉಡಲ್ ಗ್ ಮುಟ್ಟುಲೆಕ,ಏರೆಗ್ಲ ಬೇನೆ ಆವಂದಿಲೆಕ ಸೌಮ್ಯವಾದ್ ತೆರಿಪಾವೊಂತ್ ನ ಗುರುಕುಲು ಎಂಕ್ಲೆ ಒಟ್ಟುಗು ಇನಿ ಇಜ್ಜೆರ್ ಪನ್ನಗ ನಂಬೆರೆನೇ ಆವೊಂದಿಜ್ಜಿ.ತುಳು ಕನ್ನಡ ಜನಪದ ಲೋಕದ ಬರವು ಸರವುದಕ್ ಲೆಗ್ ಅರೆನ ಗೇನ ದಿಂಜಿ ಬರವು ಅವು ಅಮೃತಸಮಾನ.ಆರ್ ಬರೆವಂದಿ ಸಾಹಿತ್ಯೊಲು ಉಪ್ಪಯ.ಯಕ್ಷಗಾನ,ನಾಟಕ,ದೈವಾರಾದನೆ,ಕಾವ್ಯ,ಕಬಿತೆಲು,ಸಿನೆಮಾ ಪದೊಕುಲು,ಭಕ್ತಿ ಗೀತೆಲು,ಅರೆನ ಬರವುದ ಕೋಪೆಲೆಡ್ ಒವುಂಡು ಒವಿಜ್ಜಿಂದ್ ನಾಡೆರೆನೆ ಬಂಙ.ಆತ್ ಜನಪದ ಸಾಹಿತ್ಯೊಗು ಬೆನ್ಕೆ ಬೆಂದಿನಾರ್.ಅವ್ವೇತೋ ಶಿಷ್ಯ ವರ್ಗೊನು ಬರವುಸರವುದ ಲೋಕೊಗು ಕೊರಿನಾರ್.ಆತೊಂಜಿ ತಾಳ್ಮೆದ ಸಾತ್ವಿಕ ವ್ಯಕ್ತಿನ್ ಎಂಕ್ಲೆ ಜೀವನೊಡು ಇಡೆ ಮುಟ್ಟ ನಮ ತೂತ್ ನ್ಲ ಇಜ್ಜಿ,ನನ ತೂಯೆರ್ಲಾ ತಿಕ್ಕಯೆರ್.ಅಂಚಿನ ಪರಮ ಪೂಜ್ಯ ಗುರುಕುಲೆನ್ ಕಳೆಯೊಂದು ಎಂಕುಲು‌ ಮಾತ ಅನಾಥೆರ್ಲೆಕಾತ.ಅರೆನ ಬರವು ಸರವೇ ಎಂಕ್ಲೆಗ್ ನನ ದುಂಬುಗು ಅರೆನ ನೇರ್ಪುದ ತುಡರ್ .ಅರೆನ ಕರಿದ್ ಪೋಯಿನ ದಿವ್ಯಾತ್ಮೊಗು ಸದ್ಗತಿನ್ ನಮ ನಂಬಿ ದೈವ ದೇವೆರೆಡ ನಟ್ಟೊನುವ.

  -ಅರೆನ ಶಿಷ್ಯ ವೃಂದ