ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್ ಕಟ್ಲೆಲು-

ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್  ಕಟ್ಲೆಲು  
      

 ದೈವಾರಾದನೆದ ಕಟ್ಟ್ ಕಟ್ಲೆಡ್ ಪ್ರಾದೇಶಿಕ ಭಿನ್ನತೆ ಉಂಡು ಪಂಡಲ ಮೂಡಾಯಿ ಪಡ್ಡೇಯಿ ತೆನ್ಕಾಯಿ ಬಡಕಾಯಿದ ಒಟ್ಟು ವ್ಯಾಪ್ತಿಡುಪ್ಪುನ ತುಳುವೆರ್ ಬದುಕುನ ತುಳು ಧರ್ಮದ ತುಳ ಬಾಷೆದ ತುಳುನಾಡ್ ಒಂಜೆ.ಆಂಡ ಪ್ರರಾದೇಶಿಕವಾದ್ ಹಿರಿಯೆರ್ ಮಲ್ತಿ ಅಕ್ಲಕ್ಲೆ ಗ್ರಾಮ ಸೀಮೆದ ಮೂಲ ಸಾಂಪ್ರದಾಯಿಕ ಅನಾದಿದ ಕಟ್ಲೆನ್ ಒರಿತೊಂದು ಬರೊಡು.ನಮ್ಮ ಪೂರ್ವ ಹಿರಿಯಾಕುಲು ತೆರಿಪಾಯಿ ಮೂಲ ಸಾಂಪ್ರದಾಯಿಕ ಕಟ್ಲೆದ ಬಗೆಟ್ ಒಂಜಾತ್ ಇಚಾರೊಲೆನ್ ಮೂಲು ಪಟ್ಟೊನುನ ಪ್ರಾಮಾಣಿಕ ಬೇಲೆ ಮಲ್ಪುವೆ.

  

ದೈವದ ಸಿರಿಮುಡಿದೊರುತ ತಾರೆದ ಮಡಲ ತಿರಿ

೧.ಮಣ್ಣ್ ದಪ್ಪಣೆ:-

      ದೈವಾರಾದನೆದ ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ಸುರುತವು ಮಣ್ಣ್ ದಪ್ಪಣೆ ದೆತೊನುನವು .ಒಂಜಿ ಮಣ್ಣ್ ಡ್ ಒಂಜೇ ದೈವ ಉಂತುದುಪ್ಪುಜಿ.ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲಿಪ್ಪುವ.ನಮ ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲೆಗ್ ಬೇತೆ ಬೇತೆನೇ ಕೋಲನಾ ನೇಮನಾ ಕೊರ್ಪುಜ.ನಮ ನಂಬಿನ ದೈವೊಗು ಮಾತ್ರ ನೇಮ ಕೊರ್ಪ.ನಮ ಆ ಮಣ್ಣ್ ನ್ ನಮ್ಮ ಸರ್ವಸ್ವಂದ್ ಎನ್ನಿದಿಪ್ವ.ನಮ ಬದುಕುನೆಡ್ದಾದಿಪ್ಪು,ನಮ ನಂಬುನ ದೈವ ಉಂತುನೆಡ್ದಾದಿಪ್ಪು ,ನಮ ನಡಪಾವುನ ನೆಮ ನೆರಿ ಕೋಲ ತಂಬಿಲ ಆದಿಪ್ಪು  ಆ ಮಣ್ಣ್ ದ ಮಿತ್ತ್ ನಮ ನಡಪಾವೊಂದು ಬರ್ಪುನಿ.ಅಂಚಾದ್ ಎಂಕುಲು ಇಂಚಿತ್ತಿ ಕಾರ್ಯೊಗು ಇಂಚಿತ್ತಿನ ದೈವೊಗು ಇಂಚಿತ್ತ್ ನ ದಿನಮಾನೊಗು ನಡಪಾಯೆರೆ ಉಲ್ಲ.ಅಂಚಾದಿಪ್ಪುನಗ ತುಂಬಿ ಬೂಮಿ,ಮಣ್ಣ್ ಎಂಕ್ಲೆಗ್ ಅವೆನ್ ನಡಪಾಯೆರೆ ಅಪ್ಪಣೆ ಕೊರೊಡುಂದು ಮಣ್ಣ್ ದ ಅಪ್ಪಣೆ ಪಡೆಯುನಿ.ದೈವೊನು ನಂಬುನಂಚಿನ ನಂಬಿಕಸ್ತೆರ್, ಗ್ರಾಮೊಗಂಡ ಗ್ರಾಮೊಗು ಸಮ್ಮಂದ ಪಟ್ಟ್ ನಕುಲು‌ಬೋಡು.ಗ್ರಾಮ ಸಮ್ಮಂದಿ ದೈವ ಆಂಡ ಗುತ್ತು ಬರ್ಕೆ,ಬಾಳಿಕೆ,ನೇಮದ ಕಲೊಕು‌ ಸಮ್ಮಂದಪಟ್ಟ್ ನಕುಲು ಬೋಡು,ಕಟ್ಟುನಕುಲು ಬೋಡು.ಯಜಮಾನೆರ್,ಸಮ್ಮಂದ ಪಟ್ಟಿನ ಮಾತೆರಿತ್ತ್ ದ್ ಮಣ್ಣ್ ದಪ್ಪಣೆ ಪಡೆಯೊಡು. 

೨.ದಿನ ದೀಪುನಿ_ಬಲ್ಯಾಯಡ:-

     ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ರಡ್ಡನೆದಾದ್ ಬಲ್ಯಾಯಡ ದಿನಮಾನ ತೂಪುನಿ.ದುಂಬುದ ಕಾಲೊಡು ದೈವದ ನಿಮಿತ್ತ ನೋಟ ತೂವೊಂತ್ ನಿ.ಆಂಡ ಇನಿ ಅಕುಲು ಮದೆಕ್ ಸೇರ್ದ್ ಅಡೆಗ್ ವೈದಿಕ ಪ್ರಶನಾ ಚಿಂತನೆದಕುಲು ಬೈದೆರ್.ಬಲ್ಯಾಯನಕುಲು ಪಂಚಾಂಗ ತೂದು ದೋಷ ಇಜ್ಜಂದಿನ ದಿನಮಾನೊನು ನೇಮ ನೆರಿ ನಡಪಾಯೆರೆ ತೆರಿಪಾವೆರ್.ಅಂಚನೆ ಕಟ್ಟುನಾಯಗ್ ಬೂಲ್ಯಕೊರ್ರೆಲಾ ಬಲ್ಯಾಯಡನೆ ದಿನಮಾನ ಕೇನುನಿ.

೩.ವೀಳ್ಯ ಕೊರ್ಪುನಿ:-

     ಕಟ್ಟುನಾಯಗ್ ಬೂಲ್ಯ ಕೊರ್ಪುನವು ಮೂಜನೆ ಕಟ್ಟ್.ಕಟ್ಟುನಾಯನ್ ಲೆತ್ತ್ ದ್ ಇಲ್ಲದ ಜಾಲ್ಡಾಪುನ ನೇಮ ಆಂಡ ಇಲ್ಲದ ಜಾಲ್ಡೇ ವೀಳ್ಯ ಕೊರೊಡು.ಒಂಜಿ ವೇಳೆ ಸಾನ ಮಾಡೊಡು ಆಪುನ ನೇಮ ಆಂಡ ಸಾನದ ಮಾಡದ ಜಾಲ್ಡೇ ಕೊರೊಡು.ನಮ್ಮ ಅನುಕೂಲೊನು ಒಂದುದು ದಿನ ದೀನೆರ್ದ್ ಬೊಕ್ಕ ನೇಮ ಕಟ್ಟುನಾಯಗ್ ದೈವೊಗು ವೀಳ್ಯ ಕೊರ್ಯೆರೆಲಾ ಬಲ್ಯಾಯಡ ದಿನ ಕೇನೊಡು.ದಾಯೆ ಪಂಡ ಸುದ್ದ ಬಾವ ತಿಕ್ಕೊಡಾನಿ.ಬಾವಸುದ್ದ ತಿಕ್ಕುನ ದಿನ ತೂದು ಒಂಜಿ ವಾರದ ದುಂಬುಲ ವೀಲ್ಯ ಕೊರೊಲಿ.10 ದಿನ ದುಂಬುಲ ಕೊರೊಲಿ.ನಮಡ ಆತೊಂಜಿ ದಿನ ಇಜ್ಜಿಂದಾಂಡ ನಾಲೈನ್ ದಿನ ದುಂಬುಲ ಕೊರೊಲಿ.ಐಕ್ ದಾಲ ಈತೇ ದಿನಾಂದ್ ನಿಗಾಂಟ್ ದಾಲ ಇಜ್ಜಿ.ವೀಳ್ಯ ಕೊರ್ಪುನ ದಿನ ಬರಣಿ,ಕಿರ್ತಿಕೆ,ಸಿಂಗೊಡೆ,ಅಮಾಸೆ ಬರಂದೆ ಉಪ್ಪೊಡು.ಅಂಗಾರೆ,ಸುಕ್ರಾರ ಪೂರ ದೈವೊಗು ನಿಶಿದ್ದ ಇಜ್ಜಿ.ಅಂಗಾರೆ,ಸುಕ್ರಾರ,ಐತಾರ ಅಗೆಲ್ ಪಾಡೆರೆ ಎಡ್ಡೆ ದಿನಾಂದಾಂಡ ಕಟ್ಟುನಾಯಗ್ ವೀಳ್ಯ ಕೊರ್ರೆಲಾ ಆದಿನ ಕೊರೊಲಿ,ತಪ್ಪತ್ತ್.ಒಂಜೆನ್ ನಮ ಸರಿಂದ್ ಪನ್ಪಂದಂಡ ಬೊಕ್ಕೊಂಜೆನ್ ತಪ್ಪುಂದು ನಮಕ್ ಪನೆರಾಪುಜಿ.ವದ್ಯದಕುಲು ಬೊಕ್ಕ ಆ ದೈವೊಗು ಸಮ್ಮಂದಪಟ್ಟ್ ನಕುಲು ಅವ್ಲು ಬೋಡು.ಅಕ್ಲೆಗ್ ದಾಲ ವೀಳ್ಯ ಕೊರ್ರೆ ಇಜ್ಜಿ,  ಇಂಚಿನಾನಿ ನೇಮಂದ್ ನೇಮದ ದಿನತ ಲೆಪ್ಪು ಕೊರ್ಪುನಿ.ಅವ್ಲು ನೇಮ ಕಟ್ಟುನಾಯಗ್ ಮಾತ್ರ ಲೆಪ್ಪು ಕೊರ್ಪುನಿ.ವೀಳ್ಯೊಡು ಬಚ್ಚಿರೆ,ಬಜ್ಜೆಯಿ,ಎಲ್ಯ ಪಣವು ಕೊರ್ಪೆರ್.ಪೊರ್ತು ತಿರ್ಗುನ ದುಂಬು ಪಂಡ ಮದ್ದೆನದ ದುಂಬು ವೀಳ್ಯ ಕೊರೊಡು.ದಾಯೆ ಪಂಡ ಸೂರ್ಯ ದೇಬೆರ್ ಉದಿತ್ ದ್ ನೆಗತ್ ದ್ ಬರ್ಪುನ ಪೊರ್ತಾದಿಪ್ಪುಂಡು.

೪.ಕೋರಿ ಕುಂಟ,

-ಕೆಲವೊಂಜಿ ದೈವೊಲೆಗ್ ಕೋರಿ ಕುಂಟ ಪಾಡ್ಂಡ ನನ ಕೆಲವು ದೈವೊಲೆಗ್ ಕೈಲ್ ಕಡ್ಪುನ ಕೈಲ್ ಮೂರ್ತ ಉಪ್ಪುಂಡು

ಕೈಲ್ ಮೂರ್ತ,

ಪಾಳೆ ಮೂರ್ತ

ಮಣ್ಣ್ ಮೂರ್ತ

-ಸಾಂಪ್ರದಾಯಿಕ ಮೂಲ ಕಟ್ಟ್ ಕಟ್ಲೆದ ಸುರುತ ಕಟ್ಟ್.

ಮರ ಮೂರ್ತ

ಕೈಲ್ ಕಡ್ಪುನಿ / ಕೈಲ್ ಮೂರ್ತ:-

ಕೈಲ್ ಕಡ್ಪುನಿ ಪಂಡ ಅವೆಕ್ ಪೂಬಾರೆದನೇ ಕೈಲಾವೊಡು .ಇನಿ ಅವು ತಿಕ್ಕಂದಿನೆಡ್ದಾದ್ ಕದೊಳಿದ ಕೈಲ್ ಕಡ್ಪುವೆರ್.ಬೇತೆ ಕೈಲ್ ಆಪುಜಿ. ಕೈಲ್ ಕಡ್ಪುನೆಕ್ಲ ಅವೆತನವೇ ಆಯಿನ ಕೆರಮೊಲು ಉಲ್ಲ.ಕೈಲ್ ಕಡ್ಪುನಾರ್ ತರೆಕ್ ಮೈಕ್ ಚೌಞಲಿ ನೀರ್ ಡ್ ಮೀದ್ ಮುಂಡೊಗು ಬಸ್ಮದ ಅಡ್ಡ ನಾಮ ಪಾಡ್ದ್  ಸಂಬಂದ ಪಟ್ನ ದೈವದೌಲು ಅಡ್ಡ ಬೂರ್ದು  ನಿನ್ನ ನೇಮೊಗು ಬೋಡಾಯಿನ ಕೈಲ್ ಮೂರ್ತೊಗು ಪೋವೊಂದುಲ್ಲ.ಈ ಎಂಕ್ಲೆಗ್ ಬೆರಿಸಾಯ ಕೊರ್ಲಂದ್ ಕೈಲ್ ಮೂರ್ತೊಗು ಪಿದಡುನಿ. ಕೈಲ್ನೇ ಕಡ್ಮತ್ದ ನೆನ್ ನಮ ತೊಲಚಿ ಕಟ್ಟೆದ ಎದುರು ಕೊನತ್ ದೀದ್ ಅವೆಕೊಂಜಿ ಕುರ್ದಿ ,ದೂಪ,ದೀಪ ಆಯಿನೆರ್ದ್ ಬೊಕ್ಕ ದೈವಡ ನಮ ಅರಿಕೆ ಮಲ್ತೊಂದು ಕೈಲ್ ನ್ ನೆಲ ಬುಡ್ದು ಮಿತ್ತ್ ಕಟ್ಟುನಿ. ಐಡ್ದ್ ಬೊಕ್ಕ ಆ ಕೈಲ್ ನ್ ನೇಮದಾನಿಯೇ ಗಿಚ್ಚಾವುನಿ.ಅಡೆ ಮುಟ್ಟ ಕೈಲ್ ನ್ ಬೇತೆ ಏರ್ಲ ಪಿದಯಿದಕುಲು ಮುಟ್ಟುಲೆಕ ಇಜ್ಜಿ. ಏಳ್ ದಿನ ದುಂಬು ಕೈಲ್ ಕಡ್ತ್ ದ್ ನೇಮದಾನಿ ದೈವದ ಅವಾರದೊಟ್ಟುಗು ಆ ಕೈಲ್ದ ಪರ್ಂದ್ ನ್ ಗಲಸುವೆರ್.ಅಂಚಾದ್ ಆ ಕೈಲ್ ಮೂರ್ತೊಗು ಆತೊಂಜಿ ಮಹತ್ವ ಉಂಡು.ಕೈಲ್ ಕಡ್ತ್ಂಡ್ಂದ್ ಪಂಡ ಆ ನೇಮೊಗು ಸಮ್ಮಂದಪಟ್ನಕ್ಲೆಗ್ ಸೂಕೆ ಬತ್ತ್ಂಡ್ಂದ್ ಲೆಕ್ಕ.ಆ ಸೂಕೆ ಬತ್ತ್ ನಕುಲು ನೇಮ ಕರಿನೇಟ ಊರು ಬುಡ್ದು ಪರವೂರುಗು ಪೋಪುನ ನಿರ್ದಾರ ಮಲ್ಪೆರೆ ಬಲ್ಲಿ .ದಾಯೆ ಪಂಡ ಕೈಲ್ ಕಡ್ತ್ ದ್ ದಡೆಟ್ ದೀಂಡತ್ತೆ,ಅವೆಡ್ದ್ ಬೊಕ್ಕ ಮೊಕುಲು ಅವೆನ್ ಅರ್ದೊಡು ಬುಡ್ದು ಪೋಯೆರ್ಂದಾಂಡ ದೈವೊನು ನಮ ನಂಬಿಸಾದ್ ಬುಡ್ದು ಪೋಯಿಲೆಕ ಅಯಿಜಾ?.ಅಂಚ ಮಲ್ತ್ಂಡ ಬಾಸೆ ಕೊರ್ದು ತತ್ತ್ ನ ದೋಷ ಬರ್ಪುಂಡು.ಕೈಲ್ ಕಡ್ತ್ ನಕುಲು ದೈವೊಗು ಸಮ್ಮಂದ ಪಟ್ಟ್ ನ ಚಾಕಿರಿದಕುಲು ಪ್ರಾದೇಶಿಕತೆಗ್ ಸರಿಯಾದ್ ಕೆಲವು ಕೋಡಿಡ್ ಮೀನ್ ಕೋರಿದೊಣಸ್ ಮಲ್ಪೊಲಿ,ಕೆಲವು ಕಞೋಡಿಡ್ ಮೀನ್ ಕೋರಿ ಅಡ್ಯೆರೆನೆ ಬಲ್ಲಿ.ಗ್ರಾಮ,ಸೀಮೆ ದೈವದ ಕೈಲ್ ಕಡ್ತಿ ಬೊಕ್ಕ ಆ ಗ್ರಾಮ,ಸೀಮೆಡ್ ವಾ ಎಡ್ಡೆ  ಕೆಲಸ ಪಂಡ ಮದಿಮೆ,ಮಸ್ಕಿರಿ ಮಲ್ಪುಲೆಕಿಜ್ಜಿ.ಕೈಲ್ ಕಡ್ಪುನ ಪೊರ್ತುಡು ಊರುಡಿತ್ತ್ಂಡ ನೇಮ ನೆರಿ ಮುಗಿದ್ ಊರು ಬುಡ್ದು ಪಿದಯಿ ಪೋವೊಡು.ಅಂಚನೆ ಕೊಡಿ ಏರ್ನಗ ಊರುಡಿತ್ತ್ಂಡ ಕೊಡಿ ಜಾಯಿ ಬೊಕ್ಕ ಊರುಡ್ದು ಪಿದಯಿ ಪೋವೊಡು.ಕೋರಿ ಪೊಜೆಂಕೊಡಾಂಡಲ ಗ್ರಾಮ,ಸೀಮೆದ ಸುದೆ ಆಯೆರೆಗ್ ಪೋದು ಪೊಜೆಂಕ್ ದ್ ಬತ್ತ್ ದ್ ಕಜಿಪು ಮಲ್ಪೊಡು.ಕುಟುಮದ ದೈವೊಗು ಕೈಲ್ ಕಡ್ತಿ ಬೊಕ್ಕ ಕುಟುಮೊಗು ಸಮ್ಮಂದಪಟ್ನ ವಾ ಇಲ್ಲಲ್ ಲ ಎಡ್ಡೆ ಕೆಲಸ ನೇಮ ಮುಗಿನೇಟ ಮಲ್ಪೆರೆ ಬಲ್ಲಿ. 

ಕೋರಿ ಕುಂಟ:-

       ದೈವದ ಪ್ರತಿಯೊಂಜಿ ನೆತ್ತೆರಾವಾರದ ಬಲಿಕ್ ಕೋರಿ ಬೋಡು.ದೈವದ ಆರಾದನೆಡ್ ಕೋರಿ ಕುಂಟ ಅವೆತನವೇ ಅಯಿನ ಮಾನಾದಿಗೆನ್ ಒರಿತೊಂದ್ಂಡ್.ಕೋರಿ ಕುಂಟ ಬಯ್ಯದ ಪೊರ್ತುರ್ದು ಸೂರ್ಯೆ ಕಂತುನ ದುಂಬು ಪಾಡುನಿ.ಕೋರಿ ಕುಂಟ ಪಾಡ್ಂಡ್ ಪಂಡ ಇಂಚಿತ್ತ್ ನ ದೈವೊಗು ಇಂಚಿತ್ತ್ ನ ದಿನತಾನಿ ನೇಮಂದ್ ಗಡು ಪಾಡಿಲೆಕಾಂಡ್. ಕೋರಿ ಕುಂಟದ ಸಂಕಲ್ಪ  ದಾದ ಪಂಡ ಅವು ಒಂಜಿ ಮೂರ್ತ.ಆ ನೇಮೊಗೌಲು ಗಡಿ ಪಾಂಡ್ಡ್,ಮೂರ್ತ ಆಂಡ್,ದಿನ ನಿಘಂಟ್ ಆಂಡ್ಂದ್ ಲೆಕ್ಕ.ಅಯಿರ್ದ್ ಬೊಕ್ಕ ಕೈಲ್ ಕಡ್ಪುನಿ.ಗ್ರಾಮ ದೈವೊಗು ,ರಾಜಂದೈವೊಗು ಕೋರಿಕುಂಟ 8 ದಿನೊಕು ದುಂಬುಲ ಮಲ್ಪೊಲಿ,15ದಿನೊಕು ದುಂಬುಲ ಮಲ್ಪೊಲಿ,48 ದಿನೊಕು ದುಂಬುಲಾ ಮಲ್ಪೊಲಿ.ಅವು ಅಲ್ತ ಪ್ರದೇಶಾಚಾರೊಗು ಬುಡ್ತಿನ ಇಚಾರ.ಆಂಡ  ಅರಸು ದೈವೊಲೆಗಾಂಡ ಕೋರಿ ಕುಂಟದ ಒಂಜಿ ತಿಂಗೊಲ್ದ ಕುದಿ ಮೂರ್ತ,ಕುಟುಮ ದೈವೊಲೆಗ್ ಕೈಲ್ ಕಡ್ಪುನಿ.ನೇಮೊಗು 5,7ದಿನತ ಉಲಯಿ ಕೈಲ್ ಕಡ್ಪುನಿ.ಕೋರಿ ಕುಂಟ ಪಾಡ್ದ್ ನೇಮ‌ ಆಪುನ ದೈವೊಲೆಗ್ಲಾ ಕೈಲ್ ಕಡ್ಪುವೆರ್.ಕೋರಿ ಕುಂಟ ಆವಂದೆ ಕೈಲ್ ಕಡ್ಪುನ ಶಾಸ್ತ್ರ ದುಂಬು ಇಜ್ಜಾಂಡ್ .ಕೋರಿ ಕುಂಟ ಆವಂದೆ ಕಾಲಿ ಕೈಲ್ ಕಡ್ತ್ ದ್ ನೇಮ ಆಪುನ ಜಾಗೆಲ ತುಳು ನಾಡ್ ಡ್ ಉಂಡು. ಕೈಲ್ ಕಡ್ತ್ ನೆತ ಪಂರ್ದ್ ನ್ ದೈವದ ಆವಾರೊಗು ಗಲಸುವೆರ್.ಪೂರ್ವೊಡು ಪೂ ಬಾರೆದ ಕೈಲ್ ನೆ ಕಡ್ತೊಂತೆರ್.ಪೂಬಾರೆ ಅಪ್ರೂಪ ಆಯಿನೆರ್ದಾತ್ರ ಕದೊಳಿ ಬಾರೆದ ಕೈಲ್ ಕಡ್ಪುವೆರ್.ಕೋರಿ ಕುಂಟೊಗು ಜೋಗ ಉಂಡು.ಜೋಗದಪ್ಪಣೆಯಾದ್ ಕೋರಿ ಕುಂಟ ಆಂಡ ಕೈಲ್ ಕಡ್ಪುನೆಕ್ ಜೋಗದಪ್ಪಣೆ ಇಜ್ಜಿ.ಕೈಲ್ ಕಡ್ಪುನಗ ಗಡಿ ಪತ್ತ್ ನಕುಲು ಚಾಕಿರಿದಕುಲು,ಕೊಂಬುದಕುಲು ಬೊಲ್ಪುಗು ಪೋದು ದೈವೊನು ಪ್ರಾರ್ಥನೆ ಮಲ್ತ್ ದ್ ಕೈಲ್ ಕಡ್ಪುವೆರ್.ಕೈಲ್ ಕಡ್ಪುನಗ ಅವೆಕ್ ಸಂಬಂದಪಟ್ಟ್ ನಕುಲು ಇತ್ತ್ ದ್ ಕೊಂಬು ವಾದ್ಯೊಡೆ ಕೈಲ್ ಕಡ್ಪುವೆರ್.ಅಂಕ ಅಯನ ಪಂಡ ಕೋರಿ ಕುಂಟ ಬೋಡೆ. ಕುಂಟ ಪಂಡ ಒಂಜಿ ತಮೇರಾದ್ ಉಂತುನ‌ ಒಂಜಿ ಇಚಾರವು.ಕುಂಟ ಪನ್ಪುನವು ದೈವದ ಆ ಕಲೊಕು ತಮೆರ್ / ಆಧಾರ ಸ್ಥಂಭ.ಕುಂಟ ಪಾಡ್ಂಡ್ ಪಂಡ ದೈವದ ಕಟ್ಟ್ ನ್ ಮೀರ್ದ್ ಪೋಯೆರೆ ಆಪುಜಿಂದ್ ಅರ್ಥ.ಅವ್ವೆಂಚ ಪಂಡ ಕೋರಿ ಕುಂಟದಪಗ,ಕೊಡಿ ಏರ್ನಪಗ ಕಿರ್ವಾಲ್ ಬನ್ನಗ ಇತ್ತ್ ನಕುಲು ಕೊಎಇ ಜಾನೇಟ,ಕಿರ್ವಾಲ್ ಪೋನೇಟ ಊರು ಬುಡ್ದು ಪೋಪುಲೆಕ ಇಜ್ಜಿ,ಮದಿಮೆ ಮಸ್ಕಿರಿಂದ್ ಎಡ್ಡೆ ಕೆಲಸ ಮಲ್ಪುಲೆಕ ಇಜ್ಜಿ.ಕೋರಿ ಪೊಜೆಂಕುಂಡಲಾ ದೈವದ ಗಡು ಪಾಡಿ ಜಾಗೆದ ಗಡಿ ಕಡತ್ ದೆ ಪೊಜೆಂಕೊಡು.

ಕೋರಿದ ಕುಂಟ 5 ದಿನ,7ದಿನ, 9ದಿನ ಇಂಚ ಆಪುನಿ ಹೆಚ್ಚಿಗೆ.ಕೆಲವು ಕೋಡಿಡ್  ಕೋರಿದ ಕುಂಟ ಕೆಲವೊಂಜಿ ದಿನೊಕ್ಲೆ ದುಂಬೇ ಪಾಡ್ವೆರ್.ಕಲ್ಲಾಡಿಡ್ ಬಿಸುತಾನಿ ಬಯ್ಯಗ್ ಕೋರಿ ಕುಂಟ ಆದ್ ಬಿಸುತಾನಿ ನೇಮ ಆಪುನಿಪಂಡ 18 ದಿನತ  ಅಂತರ. ಕಣಂದೂರುಡು ಒಂಜಿ ತಿಂಗೊಲು‌ ದುಂಬೇ ಕೋರಿ ಕುಂಟ ಪಾಡುವೆರ್. ಕೋರಿ ಕುಂಟ ಮೂಜಂಜೊಡೇ(ಕತ್ತಲೆ ಬೂರುನ ಪೊರ್ತು) ಪಾಡುನ ಕೆರಮ.ಬೊಲ್ಬೇಪು,ಮದ್ತೆನ,ಬಯ್ಯಂದ್ ಬೇತೆ ವಾ ಏಳ್ಯೆಡ್ಲ ಕುಂಟ ಪಾಡುನ‌ ಕೆರಮ ಇಜ್ಜಿ.ಆಂಡ ಕೈಲ್ ಕಡ್ಪೆರೆಗ್ ಕಾಂಡೆದ ಮೂರ್ತನೇ ಆವೊಡು. .ಕೋರಿ ಕುಂಟೊಡು ಪ್ರದೇಶಾಚಾರೊಡು ಎತ್ತೇಸ ಉಂಡು.   ಕೋರಿ ಕುಂಟೊಡು ಕೆಲವು ಕೋಡಿಡ್ ಒಂಜಿ ಕುಂಟ ಪಾಡ್ವೆರ್.ಕೆಲವು ಕೋಡಿಡ್ ಐನ್ ಕುಂಟ ಪಾಡ್ವೆರ್.ಅಂಚ ಮುಗುಳಿ ಬರೊಡುಂದು ಮೂಜಿ ಕುಂಟ ಪಾಡುಜೆರ್.ರಡ್ಡ್,ನಾಲ್ ಇಂಚ ಸಮ ಸಂಕೆಡ್ಲ ಕೂಂಟ ಪಾಡ್ರೆ ಇಜ್ಜಿ.ಕೋರಿ ಕುಂಟ ಪಾಡ್ನಗ ದೈವ ಇತ್ತ್ ದ್ ಕೋರಿ ಕುಂಟ ಪಾಡ್ನ ಸಂಕಲ್ಪದ ಒರುವಾದ್ ಆ ಜಾಗೆಡ್ ದೈವ ಮಾನಿನ ವಸಾಯ ಉಪ್ಪುಂಡು.ಕೋರಿ ಕುಂಟ ರಡ್ಡ್ ಅರ್ಥ ಕೊರ್ಪುಂಡು.೧-ಆನಿರ್ದ್ ಬೊಕ್ಕ ಆದೈವದ ನೇಮ ಆಪುನಡೆಮುಟ್ಟಗ್ ಒಂಜಿ ಗಡು ಪಾಡ್ಂಡ್.ಕೋರಿ ಕುಂಟ ಪಾಡಿ ಬೊಕ್ಕ ಆ ಊರುಡು ಒವ್ವೇ ರೀತಿದ ರಕ್ತಪಾತ,ಕಲಹ,ಸಮಸ್ಯೆ ಆಯೆರೆ ಬಲ್ಲಿ,ಮನುಷ್ಯ ಸಮ್ಮಂದಿ ಒವ್ವೇ ಎಡ್ಡೆ ಕೆಲಸ ಆಯಿನ ನಿಚ್ಚಯ, ಮದಿಮೆ,ಸಮ್ಮಣ,ಬಯಕೆ,ಇಲ್ಲೊಕ್ಕೆಲ್  ನೇಮ ಕರಿನೇಟ ಒವ್ಲ ಮಲ್ಪೆರೆ ಬಲ್ಲಿ. ದಿನಮಾನ ಮಲ್ಪೆರೆ ಬಲ್ಲಿ.ಆಂಡ ಕೆಲವು ಕೋಡಿಡ್ ಪ್ರಾದೇಶಿಕವಾದ್ ಎತ್ತೇಸೊಲು ಉಂಡು ಕೆಲವೊಂಜಿ ಊರುಲೆಡ್ ಬಲ್ಲಿ ಪಂಡ ಬಲ್ಲಿ.ನನ ಕೆಲವೊಂಜಿ ಊರುಲೆಡ್ ಆ ಊರುಗು ಸಂಬಂದಪಟ್ಟ್ ನಕುಲು ಆ ಊರುದ ದೈವೊಲ್ನ ಅಪ್ಪಣೆ ಪಡೆದಿಪ್ಪುವೆರ್.ದೈವದ ಮಾನಿ ಜೋಗೊಡಿತ್ತ್ ದೆ ಅಕುಲೆಗ್ ಅಪ್ಪಣೆ ಕೊರ್ಪುನಿ.ಎಂಕ್ ಲ್ನ ಊರು ಮಲ್ಲ,ಮಾಗಣೆ ಮಲ್ಲ,ಸೀಮೆ ಮಲ್ಲ .ಅಂಚಾದಿಪ್ಪುನಗ ನಿಕ್ ಲ್ನ ಕಟ್ಟ್ ಗ್ ಸರಿಯಾದ್ ಇನಿತ ದಿನಮಾನೊಡು ನಡತೊನೆರೆ ಎಂಕ್ಲೆಗ್ ಕಷ್ಟ ಆಪುಂಡು.ಅಂಚಾದ್ ಎಂಕುಲು ನಿನ್ನ ಕೋರಿ ಕುಂಟದ ಪೊರ್ತುಡು ಇಡೆ ಬತ್ತ್ ದ್ ನಿನಡ  ಬಿನ್ನೈತೊಂಡ, ನಿಕುಲು  ಎಂಕ್ಲೆಗ್ ಒಪ್ಪಿಗೆ ಕೊರೊಡು(ಮದಿಮೆ ಮಸ್ಕಿರಿ ಪನ್ಪಿ ಒವ್ವಾಂಡಲ ಎಡ್ಡೆ ಕಜ್ಜೊಲಿತ್ತ್ಂಡ) ಪಂಡ್ ದ್ ಕೋರಿ ಕುಂಟದಾನಿ ಮೊಕ್ಲು ಕೈಕಾನಿಕೆ ಪತ್ತೆರೆ ಉಂಡು.ಬೊಂಡ ಪೂ,ಪಣವು ಪೂರ ಪತ್ತೆರೆ ಉಂಡು .ಅಕುಲು ದೈವೊಗು ಕೈಕಾನಿಕೆ ಪತ್ತ್ಂಡ ದೈವ ಅಕ್ಲೆಗ್ ಒಪ್ಪಿಗೆದ ಬೂಲ್ಯ ಕೊರ್ಪುಂಡು.ಕೋರಿ ಕುಂಟದ ಜೋಗದ ಮಾನಿನೌಲು ಕೈ ಕಾನಿಗೆ ಪತ್ತುನಕುಲು  ದುಂಬು ಗಡಿ ಪತ್ತ್ ನಾರೆಗ್ ಬೊಕ್ಕ ಆ ದೈವಸಾನದ ಆಡಲ್ತೆದಕ್ಲೆಗ್ ತೆರಿಪಾದಿಪ್ಪೊಡು. ಎಂಕ್ ಲೆಗ್ ಇಂಚಿ ಎಡ್ಡೆ ಇಚಾರದ ಬಗೆಟ್ ಪನೆರೆ ಬರ್ರೆ ಉಂಡು,ಎಂಕ್ಲೆಗ್ ನಿಕುಲು ದೈವದ ಒಪ್ಪಿಗೆ ದೆಪ್ಪಾದ್ ಕೊರೊಡುಂದು. ಆಂಡ ಕೆಲವು ಕೋಡಿಡ್ ಇಂಚಿನೆಕ್ ಅವಕಾಶನೇ ಇಜ್ಜಿ.೨.ಆನಿರ್ದ್ ಬೊಕ್ಕ ಆ ಗ್ರಾಮೊಡು ನಿಚ್ಚ ಕೋರಿದ ಕಟ್ಟ,ಜನೊಕ್ಲೆನ ಕೂಡು ಕಟ್ಟ್,ನೇಮ ನೆರಿಕ್ ಸಮ್ಮಂದಪಟ್ನ ಕೆಲಸೊಲು ನಡತೊಂದೆ ಬೋಡು.ಅವ್ಲ ಪ್ರದೇಶಾಚಾರವಾದ್ ಎತ್ತೇಸೊ ಉಂಡು.

       ಜಾತ್ರೆಗ್ ದುಂಬು ದೈವ ಸಾನದ ಕೈತಲ್ ಕೋರಿ ಕುಂಟ ಪಾಡ್ವೆರ್ ಅವೆಟ್  ಐನ್ ಕುಟ್ಟಿಲು ಉಪ್ವ .ರಾಜಂದೈವೊಲೆಗ್ ಅರಸು ದೈವೊಲೆಗ್ ಮಾತ್ರ ಕೋರಿ ಕುಂಟ. ಕೋರಿ ಕುಂಟ ಆಯಿ ಬೊಕ್ಕ ಆ ಊರ್ದ ದೈವದ ಗಡುವಾಡಿ ಜಾಗೆ ಮುಟ್ಟ ಕೋರಿ ಕೊಯ್ದ್   ಕಜಿಪು ಮಲ್ಪುಲೆಕ ಇಜ್ಜಿ .ಕೊಯ್ಯೊಡಾoಡಲಾ ಗಡುಕಡತ್ ದ್ ಸುಧೆ ಅಯೆರೆಗ್ ಪೋದು ಕೊಯ್ಯೊಡು .  ಕೋರಿ ಕುಂಟ ಪಾಡಿ ಬೊಕ್ಕ ಕೆಲವು ಕೋಡಿಡ್ ಅಪಗನೆ ಕೋರಿದ ಕಟ್ಟ ಸುರು ಆಪುಂಡು. ಕುಂಟ ಪಾಡಿ ಕೂಡ್ಲೆ  ಕಟ್ಟ ಆಪುನವ್ಲು ಶಾಸ್ತ್ರೊಗಾಂಡಲ ದೈವದ ಮಾನೆಚ್ಚಿದೆದುರು ಕೋರಿ ಕಟ್ಟೊಡು‌.ಕೋರಿ ಕುಂಟಾದ್ ಅಪಗನೆ ಕೋರಿ ಬುಡ್ಂಡ ಅಲ್ಪರ್ದ್ ಬೊಕ್ಕ ದಿನೋಲ ಕೋರಿದ ಕಟ್ಟ ನಡಪೊಲಿ.ಅಂಚಾಂದ್ ಅವ್ಲು ಬಾಲ್ ಕಟ್ಟ್ ದೇ ಸುರು ಕೋರಿ ಕಟ್ಟೊಡುಂದು ಇಜ್ಜಿ.ಬಾಲ್ ಕಟ್ಟಂದೆ ಕೋರಿ ಮುಟ್ಟವೊಲಿ ಪಂಡ ಕಟ್ಟ ಮಲ್ಪೊಲಿ. ಕುಂಟ ಪಾಡಿನಲ್ಪ  ಮಾನೆಚ್ಚಿಡ್ ಕೋರಿ ಕುಂಟೊಗು ದೈವದ  ಅಭಯ ಅದ್ ಕುಂಟ ಪಾಡಿ ಬೊಕ್ಕ ಗಡಿ ಪತ್ತ್ ನಕುಲು,ಚಾಕಿರಿ ಬಾಗದಕುಲು ಮಾತೆರ್ಲ ಕುಂಟೊಗು ಪುಡ್ಯೊನುವೆರ್.ಅಂಚಿನವ್ಲು ಕೋರಿದ ಕಟ್ಟೊಗು ದೈವದ ಅಪ್ಪಣೆ ಉಪ್ಪುಂಡು." ಕಲ ಸೇರೊಂಡರ್,ಎನನ್ ಅಂದ್ ಮಂತೊಂಡರ್,ಕುಂಟ ಪಾಡಾಯರ್,ಕಟ್ಟ ಸುರು ಮಲ್ತರ್,ಆಂಡ ಕುಂಟ ಪಾಡಿ ಬೊಕ್ಕ ಇನಿ ಮುಟ್ಟದ ನೇಮ ನೆರಿ ಬೊಕ್ಕ  ಕಟ್ಟೊನು ಮಲ್ಪವೊಂದು ಗಣೊಕ್ಲೆಗ್ ಬೋಡಿತ್ತ್ ನ ರಕ್ತಾಹಾರೊನು ಕೊರ್ದು ಎಂಕುಲು ಎಂಚ ಸಂಪಾಯನ ಅಂಚನೆ ನಿಕ್ಲೆನ್ ಸಂಪುಡು ದೀಪುನ ಆರ ಬಾರ ಎಂಕ್ಲೆಗ್ ಸಂದ್ ನ  " ಪಂಡ್ ದ್ ದೈವದ ಅಪ್ಪಣೆ ಆಪುಂಡು.ಪ್ರತಿಯೊಂಜಿ ದೈವಾರಾದನೆದ ಸಂದರ್ಬೊಡ್ಲ ಜೋಗದ ನುಡಿ ಬರೋಡೆ. ಅಭಯ ದೈವೊಲು ಕೊರ್ಪುಜೆರ್ಂದಾಂಡ ಜೋಗ ದಾಯೆ?.ಕೋರಿ ಕುಂಟೊಗು ಮಾತ್ರ ಅತ್ತ್ ದೈವದ ಒವ್ವೇ ಕೆಲಸ ಮಲ್ತ್ಂಡ್ ಲ ದೈವದ ನೇಮ ಪಿರಿಯುನ‌ ದುಂಬು ದೈವದ ಅಭಯದ ನುಡಿ ಬರೋಡೆ .ದೈವದ ನಡಾವಳಿಗ್ ಸರಿಯಾಯನ ಅಭಯೊನು ದೈವ ಕೊರೊಡು.ಸತ್ಯದ ನುಡಿ ಎಂಚ ಇತ್ತ್ಂಡ್ ಪಂಡ " ಕಲೊಕು ಬೋಡಾದ್ ಕಟ್ಟ,ಅಂಕೊಗು ಬೋಡಾದ್ ಕಟ್ಟ ' ಪಂಡ್ ದ್.ದುಬು ದೈವದ ಕಲತ ಕಟ್ಟೊಡು ದೂದು ಕಟ್ಟೆರೆ ಬಲ್ಲಿತ್ತ್ಂಡ್.ಇನಿಲಾ ಕೇಪುದ ಉಲ್ಲಾಲ್ದಿನ ಸಾನದ ಕಟ್ಟೊಡು ಈ ಕೆರಮ ಒರಿದ್ ಬೈದ್ಂಡ್.ಒರಿನಂಚ ಜೂಜು ಕಟ್ಟ್ ದೇ ದೈವದ ಕಲತ ಕಟ್ಟ ನಡತೊಂದುಂಡು.ಅವ್ಲೆ ನಮ ತತ್ತ್ ದ್ ನಿ.ಬೊಕ್ಕ ನಮ ಪಂಡಿನೆನ್ ದೈವ ಕೇನುಜಿ ಪನ್ಪ.ದೈವ ಪನ್ನೆನ್ ನಮ ಕೇನಂದೆ ದೈವ ನಮ ಪನ್ನೆನ್ ಕೇನುವಾ?.

   ಕೆಲವು ಕೋಡ್ಡ್ ಕಿರ್ವಾಲ್ ಪೋದು ಒಂಜಿ ದೈವದ ಕೊಡಿ ಏರುನ‌ ಇತ್ತ್ಂಡ ಕೊಡಿ ಏರ್ದ್ ಒಂಜಿ ದೈವೊಗು ಸುರುತ ನೇಮ ಆಯಿಬೊಕ್ಕ ,ಇಜ್ಜಿಂದಾಂಡ ಕಿರ್ವಾಲ್ ಪೋದು ಅವ್ಲು ವಾ ದೈವ ಉಂಡಾ ಅವೆಟ್ ಒಂಜಿ ದೈವೊಗು ಒಂಜಿ  ನೇಮ ಆದ್ ಅಯಿರ್ದ್ ಬೊಕ್ಕ ಕೋರಿ ಕಟ್ಟೆರೆ ಸುರು.ಅಂಚಾದ್ ಅವ್ಲು ರಡ್ಡ್ ಸಂಕಲ್ಪೊಲು ಉಂಡು.ಒಂಜಿ ಕುಂಟದಾನಿಯೆ ಕಟ್ಟ ಸುರಾಂಡ ಅವ್ಲು ಕಿರ್ವಾಲ್ ಪೊಪುನೆಕ್ ಲೆಕ್ಕಾಚಾರ ಇಜ್ಜಿ.ಕಟ್ಟ ನಡತೊಂದೆ ಉಪ್ಪುಂಡು.ಕುಂಟದಾನಿ ಕೋರಿ ಕುಂಟದ ಗಡುವಾದ್ ಉಂತ್ಂಡ ಬೊಕ್ಕ ಕಿರ್ವಾಲ್ ಪೋದು ಕಿರ್ವಾಲ್ ಕೆರ್ತ್ ನೆರ್ದ್ ಬೊಕ್ಕ ಒಂಜಿ ನೇಮ ಆಯಿನೆತ ಮನದಾನಿಡ್ದ್ ಬೊಕ್ಕ ಕಟ್ಟ ಸುರು.ಅಂಚ ಈ ರಡ್ಡ್ ಇಚಾರೊಲು ಕೋರಿಕುಂಟದ ಬಗೆಟುಂಡು

ಕೋರಿ ಕುಂಟದಾನಿಯೆ ಕೋರಿ ಬುಡ್ದು ಕೋರಿದ ಕಟ್ಟ ಸುರಾಂಡ ನೇಮ ಮುಗಿಯುನ ದಿನತಾನಿಮುಟ್ಟ ಕೋರಿ ಕಟ್ಟೊಂದೇ ಜಪ್ಪುವೆರ್.ಅಂಚಾದ್ ಅಂಕದೊಟ್ಟಿಗೆ ಆಯನ ನಡತೊಂದು ಇತ್ತ್ ದ್ "ಅಂಕ-ಅಯನ" ಪನ್ಪಿ ಪುದರ್ ಬೈದ್ಂಡ್.ಅಂಕ ಪಂಡ ಕೋರಿದ ಕಟ್ಟ.ಆಯನ ಪಂಡ ದೈವದ ನೇಮನೆರಿ,ನಡಾವಳಿ.ಅಂಚಾಂದ್ ಒಂಜಿ ನೇಮ ಆದ್ ಕೋರಿದ ಕಟ್ಟ ಆಂಡ ಅವು ಅಂಕ ಆಯನಂದಾಪುಜಿ.ದಾಯೆ ಪಂಡ ಅವ್ಲು ಕೋರಿದ ಕುಂಟ ಮಾತ್ರ ಪಾಡ್ದಿಪ್ಪುವೆರ್.ಕೋರಿ ಕಟ್ಟ್ ದುಪ್ಪುಜೆರ್.ಒಂಜಿ ನೇಮ ಆದ್ ಬೊಕ್ಕ ಕೋರಿ ಕಟ್ಟುವೆರ್.ಅವ್ಲು ಆಯನ ದುಂಬಾಂಡ್,ಅಂಕ ಬೊಕ್ಕ ಆಂಡ್.ತರ್ಕೊಗು ಅವ್ಲು ಕೋರಿದ ಕಟ್ಟ ಆಯಿಜಾ ಕೇಂಡ ಆಂಡ್ ಪನೊಲಿ ಶಾಸ್ತ್ರ ಪ್ರಕಾರ ಕುಂಟ ಪಾಡ್ ನಲ್ತ್  ಕಿರ್ವಾಲ್ ಜತ್ತ್ ಪೋನೇಟ ಕೋರಿದ ಕಟ್ಟ ನಡತ್ಂಡ ಅಯಿಕ್ "ಅಂಕ-ಆಯನ" ಪನ್ಪೆರ್.

 ಮರ ಮೂರ್ತ:-

      ಮರ ಮೂರ್ತಲ ದೈವದ ಕಟ್ಲೆಡ್ ತೋಜಿದ್ ಬರ್ಪುಂಡು.ದೈವದ ನೇಮದ ದೊಂಪೊಗು ಕಬೆ ಕಡ್ಪುನಗ ಮೂರ್ತ ತೂಯೆರೆ ಉಂಡು ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ ಉಂದಾದುಂಡು..ನೇಮದ ದೊಂಪೊಗ್ಲ ಆಯ ಉಂಡು.ದೈವದ ಕೊಡಿಯಡಿಕ್ಲ ಆಯ ಉಂಡು,ನೇಮ ನಡಪುನ ದೊಂಪೊಗ್ಲ ಆಯ ಉಂಡು.ಆಯಾ ದೈವೊಗು ಸಂಬಂದಪಟ್ಟ್ ದ್ ನೇಮದ ದೊಂಪ ಈತ್ ಕೋಲು ಉದ್ದ,ಈತ್ ಕೋಲು ಅಗೆಲ,ಈತ್ ಕೋಲು ಎತ್ತರಂದ್ ಉಂಡು.ದೈವದ ದೊಂಪದ ಲೆಕ್ಕಾಚಾರ ಕೋಲು ಲೆಕ್ಕೊಡೆ ಆವೊಡು.ಆಂಡ ಇತ್ತೆ ದೊಂಪ ಬುಡ್ದು ಸಾಮಿಯಾನ ಪಾಡ್ದ್ ನೇಮ ನಡಪಾವುನಡೆ ನಮ ಎತ್ತ್ ದ.ಪಾಳೆಡ್ ದೈವೊಗು ಕೊರ್ಪುನ ಆವಾರೊನು ಸ್ಟೀಲ್ದ ತೋಪುಡು ಕೊರ್ಪುನಡೆ ಎತ್ತ್ ದ.ದೈವದ ದಂಪದ ಕಬೆ ಮುಗುಳಿ ಬರ್ರೆ ಬಲ್ಲಿ,ಸರಿ ಬರೊಡು.ದೈವದ ದೊಂಪೊಗು ನಾಲೇ ಕಬೆ ಬರೊಡು.ದೊಂಪ ಪೊರ್ಲಾವಡ್ಂದ್ ಒಂಜಿ ಕಬೆ ಕೊರ್ಪುನ ಕಟ್ಟೇ ಇಜ್ಜಿ.ದೊಂಪದ ಮರ ಮೂರ್ತ ಮಲ್ಪೆರೆ ಪೋನಗಲ ಅಯಿಕ್ ಸಂಬಂದಪಟ್ಟ್ ನಕುಲು ದೈವ ಸಾನದ ಎದುರು ಪ್ರಾರ್ಥನೆ ಮಲ್ತ್ ದ್ ದೈವದಪ್ಪಣೆ ದೆತೊಂದೆ ದೊಂಪದ ಮರ ಮೂರ್ತೊಗು ಪೋವೊಡು.ದೈವದ ದೊಂಪ 5 ದಿನೊಕಾಂಡಲಾ ದುಂಬು ಪಾಡೊಡು.ಬೊಕ್ಕ ದೊಂಪದಡಿಕ್ ಅಂಬಿ ಅಡಿಪೊಡು.ಬೊಕ್ಕ ದೊಂಪೊಗು ಬೋಡಾಯಿನ ಐತ/ಅಲಂಕಾರ ಪೂರ ಮಲ್ಪೊಡು.ದೈವದ ದೊಂಪೊಗು ಮೊಡೆಯಿನ ಅರು ಕಟ್ಟ್ ನ ನುಂಗೆಲ್ ಮಡಲೇ ಪಾಡೊಡು.ದಾಯೆ ಪಂಡ ಅರು ಕಟ್ಟಂದಿನ ಮೊಡೆಯಿ ಪಜ್ಜಿ ಮಡಲ್ ನ್ ಬೆಲ್ಚಾಡ ಜಾತಿದಕುಲು ಪುಣ ಜೆಪುಡಾಯೆರೆ ಗಲಸುವೆರ್.ದೈವದ ಕಲೊಟು ಅಂಗಣ ಕೆತ್ತುನ ಚಾಕಿರಿನ್ ಅಕುಲು ಮಲ್ಪುವೆರ್.ನಮ್ಮ ಹಿರಿಯಾಕುಲು ಒವ್ವೊವು ಪೂರ ಮಲ್ತ್ ದೆರ,ಒವ್ವೊವು ಬಲ್ಲಿ ಪಂತೆರ ಮಾತೆಕ್ಲ ಬೇತೊಂಜಿ ಉದಾರ್ಮೆ ದೀತೆರ್.ಒವೆನ್ ಅರು ಕಟ್ಟಂದೆ ನರಮಾನ್ಯನ ಪುಣ ಜೆಪುಡಾಯೆರೆ ಗಲಸುವೆರಾ ಅವು ದೈವೊಗು ಆವಂದ್ಂದ್ ತೆರಿಪಾದೆರ್.

ಪಾಲೆ ಮೂರ್ತ:-

     ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ:- ದೈವದ ಮುಗೊಕ್ಲ,ಅಣಿಕ್ಲ ಪಾಳೆನ್ ಗಲಸುವೆರ್.ಇನಿ ಬೊಳ್ಳಿ,ಬಂಗಾರ್ದ ಅಣಿ ಮುಗಂದ್ ಏತ್ ಆಡಂಬರ ಮಲ್ತೆರ್ಡಲ ಪ್ರಕೃತಿಡ್ ತಿಕ್ಕೊಂತಿನ ಸೊತ್ತುಲೆಡೇ ಮೂಲ ದೈವಾರಾದನೆ ನಡತೊಂತ್ ನಿ.ಪಾಲೆದ ಮುಗೊಕು ಬೊಕ್ಕ ಪಾಲೆದ ಅಣಿಕೇ ದೈವಾರಾದನೆಡ್ ಮಾನಾದಿಗೆ ಇತ್ತ್ ನಿ.ಇನಿಲಾ ಆತೆ ಇಲ್ಲದೆಚ್ಚಿದ ಪೊಣ್ಣು ಬೂತೊಲ್ನ ನೇಮೊಡು ಸುರುಕು ಬೊಳ್ಳಿ ಬಂಗಾರ್ದ ತರೆ ಪಟ್ಟ ದೀದ್ ಕೋಲ ನಡತ್ಂಡಲ ಕಡೆಕ್ ತಾರೆದ ತಿರಿತ ಕದಿರೆ ಮುಡಿ ದೀದೇ ಕಡೆಕ್ ಕೋಲ ಪಿರಿಯುನಿ.ನಮ್ಮ ತುಲುವ ಮಣ್ಣ್ ದ ಮೂಲ ದೈವ ಪಂಜುರ್ಲಿಗ್ ತಾರೆದ ತಿರಿತನೆ ಅಣಿ ಪಾಡುನಿ,ಪಾಳೆದ ಮುಗನೇ ದೀಪುನಿ.ಮೂಲೊಡು ಮೊಡೆಯಿನ ಮಡಲ್ದ ಮಿತ್ತೇ ದೈವದ ಬಂಡಾರ ಕೇರ್ತೊಂತ್ ನಿ.ಪಜ್ಜಿ ಮಡಲ್ ಡ್ ,ಮುಳಿತ ಕಡ್ಡಿಡ್ ದೈವ ಸಾನಿದ್ಯ ಇತ್ತ್ಂಡ್.ನೇಮ ನಡಪುನ ಮೂಜಿ ದಿನ ದುಂಬು ಪಾಲೆ ಮೂರ್ತ. ನಡಪುಂಡು. ದಾಯೆ ಪಂಡ ಪಾಲೆನ್ ಬೊದ್ ಲ್ಪೊಡು,ಮೊಡೆಯೊಡು ಅಂಚ ಆ ಬೇಲೆಗ್ ರಡ್ಡ್ ಮೂಜಿದಿನ ಬೋಡು.ಅಂಚಾದ್ 3 ದಿನ ದುಂಬು ಪಾಲೆ ಮೂರ್ತ ಮಲ್ಪುವೆರ್.ಆಂಡ ದೈವ ಚಾಕಿರಿಗ್ ಗಲಸುನ ತಾರೆದ ತಿರಿ ದೆಪ್ಪುನೆಕ್ ಇಂಚಿನ ಕಟ್ಟ್ ದಾಲ ಇಜ್ಜಿ.ಪೊರ್ತುಗು ಆ ಸೊತ್ತು ಎತ್ತ್ಂಡ ಆಂಡ್ ಆತೆ

೫.ಸುದ್ದ ಮುದ್ರಿಕೆ ಓಮ,ಸುದ್ದ ಮುದ್ರಿಕೆ:-

   ನೇಮದಾನಿ ಕಾಂಡೆ ಸುದ್ದ ಮುದ್ರಿಕೆ ಓಮ ನಡಪುಂಡು.ಇತ್ತೆ ವೈದಿಕೆರ್ಡ ಗಣ ಓಮ ದೀಪಾವೆರ್.ಉಂದು ತಪ್ಪು.ನಿಜವಾದ್ ಮಡ್ಯೆಲೆರ್ ಪೆಲತ ಕಣಕ್,ಪೊರಿ,ಬೊಂಡ,ಪೆತ್ತದ ನೈ ಗಲಸ್ ದ್ ಸುದ್ದ ಮುದ್ರಿಕೆ ಓಮ ದೀಪೆರ್.ಕೊಡಿಯಡಿಟ್,ನೇಮ ಆಪುನ ಜಾಗೆಡೇ ಮೊಕುಲು ಸುದ್ದ ಮುದ್ರಿಕೆ ಓಮ ದೀಪುನಿ.ಸುದ್ದ ಮುದ್ರಿಕೆ ಓಮೊನು ಮಡಿವಾಳ ಜನಾಂಗದಕ್ ಲೆ ಮಲ್ಪೊಡು.ಇನಿ ನಮಕ್ ಅನುಕೂಲ ಆಂಡ್ಂದ್ ನಮ ದೈವದ ಕಲೊಕು ಏರೆನೋ ಕನತ್ ದ್ ದಾದನೋ ಮಲ್ತ್ಂಡ ದೈವ ಬೊಕ್ಕ ನಮಕ್ ಅನುಗ್ರಹ ಮಲ್ತ್ ಜಿ ಪಂಡ ತತ್ತ್ ನೆ ಅವ್ಲು ನಮನೆ.ದೈವ ಅತ್ತ್.ಮಡ್ಯೆಲೆರೆ ಮಡಿರ್ದ್ ಮಲ್ಲ ಸುದ್ದ ದೈವದ ಕಲೊಟು ನನೊಂಜಿಜ್ಜಿ.ಮಡಿತ ಅದಿಕಾರ ಅಕ್ಲೆಗೇ ಉಪ್ಪುನಿ.ಸುದ್ದ ಓಮೊನು ದೈವದ ಕಲೊಟು ಮಡಿವಾಳೆರೆನ್ ಬುಡ್ದು ಬೇತೆ ಏರೆಗ್ಲ ಮಲ್ಪುನ ಅದಿಕಾರ ಇಜ್ಜಿ.ಇನಿ ನಮ ಅಡೆ ವೈದಿಕೆರೆನ್ ಕನತ್ ದ್ ಅಕುಲು ಮುಗಲ ಪತ್ತುವೆರ್,ಕಿರ್ ವಾಲ್ ಲ ಪತ್ತುವೆರ್,ದೈವ ಇನಿ ಅಕ್ಲೆನ್ ಕೊಡಿಯಡಿಟ್ ತಂತಿರ್ದಾರೇ,ನೂಲು ಪಾಲ್ ಸಂಸಾರಂದ್ ಲ ಲೆಪ್ಪುಂಡು.ಆಂಡ ದೈವದ ಕಲೊಟು ನೂಲ್ ಪಾಲ್ ಸಂಸಾರ ಪಂಡ ಆಚಾರಿನಕುಲು.ನೂಲು ಪಾಲ್ ಸಂಸಾರದ ದೈವದ ಪುರಪು ಉಪ್ಪುನಿ ಆಚಾರಿಲೆಗ್ ಮಾತ್ರ.ದೈವದ ಸೊತ್ತುಲೆನ್ ಮಾತ ಮಲ್ಪುನಿ ಅಕುಲೆ.ಅಂಚಾದ್ ದೈವ ಅಕುಲೆನೆ ಲೆಪ್ಪುನಿ.ಇನಿ ಆಚಾರಿನಕುಲು ಮೂಲೆ ಸೇರ್ದ್ ಅಡೆ ಪೊಸತಾದ್ ಬತ್ತ್ ನಕುಲು ,ದೈವ ನೂಲ್ ಪಾಲ್ ಸಂಸಾರಂದ್ ಲೆಪ್ಪುನಗ "ಚಿತ್ತ "ಪನ್ಪೆರ್.ನೂಲ್ ಪಾಲ್ ಸಂಸಾರ ಪೋದು ನೂಲು ಪಾಡಿ ಸಂಸಾರ ಆಂಡ್.ಸುದ್ದ ಮುದ್ರಿಕೆ ಓಮ ಸಾಮಾನ್ಯ ಸೂರ್ಯೆ ಉದಿತ್ ನೆಡ್ದ್ ಬೊಕ್ಕನೆ ನಡಪುನಿ.ಆ ಮಣ್ಣ್ ಡ್ ದಾದಾಂಡಲ ಅಶುದ್ದಿ, ದೋಷ ಬಾದೆಲಿತ್ತ್ಂಡ ಅವೆನ್ ದೆತ್ತ್ ದ್ ಸುದ್ದ ಮಲ್ಪುನೆಕ್ ಸುದ್ದ ಮುದ್ರಿಕೆ ಓಮ ದೀಪುನಿ.ಅವು ಗಣ ಓಮಂದತ್ತ್.ಅವು ಸುದ್ದ ಮುದ್ರಿಕೆದ ಓಮನೆ.ಮುದ್ರಿಕೆ ಪಂಡ ಮೂಲು ಒಂಜಿ ಸಂಕೇತಂದ್ ಪನೊಲಿ.

೬.ಬಂಡಾರ ಜಪ್ಪುನಿ:-

      ಬಂಡಾರ ಜಪ್ಪುನಗ ಅಡೆಗ್ ಸಮ್ಮಂದ ಪಟ್ನ ಪೂರ ಪರಿವಾರ ಉಪ್ಪೊಡು.ಕೊಂಬು ವಾದ್ಯೊಡೇ ದೈವದ ಬಂಡಾರ ಜಪ್ಪೊಡು.ಆಂಡ ಇತ್ತೆ ಕೆಲವು ಕೋಡಿಡ್ ಬಂಡಾರ ಜಪ್ಪುನ ಕಟ್ಟ್ ಮಲ್ಪುಜೆರ್.ಲೆಕ್ಕ ಪ್ರಕಾರ ಬಂಡಾರ ಜಪ್ಪೊಡು.ಅವೆರ್ದ್ ಬೊಕ್ಕ ಬಂಡಾರ ಕೇರ್ಪೊಡು.ಸಾನೊರ್ದು ಬಂಡಾರ ಜಪ್ಪುನ ದುಂಬು ತಂಬಿಲಾವೊಡು,ದೂಪಾವೊಡು,ಅವೆಕ್ ಸಂಬಂದಪಟ್ನ ಪರ್ವಾದಿಲೆನ್ ಬಲಸೊಡು.ಬಲಸಿನೆಡ್ದ್ ಬೊಕ್ಕ ಅವ್ಲು ಕೈ ಮುಗಿದ್ ಕೇಂಡೊನೊಡು,"ನಿಕ್ಲೆ ನೇಮ ನೆರಿಕ್ ಎಂಕುಲು ಬಂಡಾರ ಜಪುಡಾವೊಂದುಲ್ಲ.ನಿಕುಲು ಮಾಯೆಲು ಮಣೆ ಮಂಚಾವುನು ಬುಡ್ದು ಕೊರ್ದು ಎಂಕುಲು ಜಪುಡಾಯಿ ಬಂಡಾರದೊಟ್ಟಿಗೆ ನಿಕ್ಲೆ ಕಲೆ ಕಾರ್ನಿಕೊನು ನೆಗತ್ ಬರ್ಪುಲೆಕ ಅನು ಮಲ್ತ್ ಕೊರೊಡು" ಪಂಡ್ ದ್ ಮದಿತ್ ದ್ ಬೊಕ್ಕ ಬಂಡಾರ ಜಪ್ಪೊಡು.ಅಡೆಮುಟ್ಟ ಮಾಯೆದೊರುತ ದೈವೊಲು ಮಣೆ ಮಂಚೊಡೆ ಉಪ್ಪುನಿ.ಮಣೆ ಮಂಚೊನು ಬುಡ್ದು ಕೊರ್ಲೆಂದ್ ನಮ ಕೇಂಡೊನೊಡು.

೭.ಬಂಡಾರ ಏರ್ಸಾವುನಿ/ಬಂಡಾರ ಕೇರ್ಪುನಿ:-

         ಬಂಡಾರ ಕೇರ್ತಿ ಬೊಕ್ಕನೆ ನೇಮ ನೆರಿ ಪೂರ ನಡಪುನಿ.ಬಂಡಾರ ಜಪ್ಪುನಗ ಸಾನದುಲಯಿ ದಾದ ಪೂರ ನಡತ್ಂಡ ಯಥಾ ಪ್ರಕಾರ ಬಂಡಾರ ಕೇರ್ತಿ ಕೊಡಿಯಡಿಟ್ಲಾ ಆವೊಡು.ಅವ್ಲು ತಂಬಿಲಾದಿಯಾದ್ ಜಪುಡಾಂಡ್,ಮೂಲು ತಂಬಿಲ ದೂಪದಿಯಾದ್ ಬಂಡಾರ ಏರಾವೊಡು.

೮.ಬಂಡಾರ ಏರಿ ಬೊಕ್ಕದ ಸುದ್ದ ಓಮ,ಜೋಗ,ಕೊಡಿಯಡಿ ಕಟ್ಟುನಿ-ಮಡ್ಯೆಲೆರೇ ದೀಪುನ ಸುದ್ದ ಓಮ..ಕೊಡಿಯಡಿ ಕಟ್ಟುನ್ಲಾ ಮಡಿವಾಳ ಜನಾಂಗದಕುಲೆ.ಸುದ್ದ ಮುದ್ರಿಕೆ ಓಮ ಆದ್ ,ತಂಬಿಲ ಪಾಡ್ದ್,ಜೋಗದಪ್ಪಣೆಯಾದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಕಟ್ಟುನಿ.ತಾರಾಯಿ,ಬಜ್ಜೆಯಿ,ಕುಕ್ಕುದ ಇರೆ,ಪೆಲತ ಇರೆಟ್ ಕೊಡಿಯಡಿ ಕಟ್ಟುನಿ.ಇನಿ ಪೂರ ಕೊಡಿಯಡಿ ಕಟ್ಟ್ ನಗ ತಾರೆದ ತಿರಿ,ಬಚ್ಚಿರೆ ಪೂರ ಕಟ್ಟೊಂದುಲ್ಲೆರ್,ಉಂದು ತಪ್ಪು.ಕೊಡಿಯಡಿ ಪಾಡುನೆಟ್ಲ ಪ್ರಾದೇಶಿಕವಾದ್ 2 ಎತ್ತೇಸೊಲುಂಡು.

1.ಕೊಡಿಯಡಿ ಪಾಡಿ ಬೊಕ್ಕ ಬಂಡಾರ ತರ್ಪವುನಿ.ಈ ಪ್ರಕಾರ ದೈವೊನು ಅಂದ್ ಮಲ್ಪಂದೆ ಏರೆಗ್ ಕೊಡಿಯಡಿ ಪಾಡುನಿ/ಕಟ್ಟುನಿಂದ್ ಅರ್ಥ ಆಪುಜಿ(ಇಲ್ಲಲ್ ಒಣಸ್ ಗ್ ಏರ್ಲ ಕುಲ್ಲಂದೆ ಬಲಸ್ ದೀಲೆಕಾಪುಂಡು)

2.ಬಂಡಾರ ಕೊಡಿಯಡಿಟ್ ಕೇರ್ತ್ ದ್ ದೈವೊನು ಜೋಗೊಡು ಅಂದ್ ಮಲ್ತ್ ದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಪಾಡುನಿ.ರಡ್ಡನೆ ಕೆರಮ ಉಂದು ಪೂರಹಿರಿಯಾಕ್ಲೆ ಕಟ್ಟಾದುಂಡು.

          ಬಂಡಾರ ಒಂಜಿ ಊರುರ್ದು ಕುಡೊಂಜಿ ಊರುಗು ಪೋಪುನ ಕಟ್ಟ್ ಲಾ ಉಂಡು.ಕೆಲವು ತಿಕ್ ಡ್ ಬಂಡಾರ/ಕಿರ್ವಾಲ್ ಬತ್ತ್ ದ್ ಕೊಡಿಯಡಿಟ್ ಸಿಂಗದನೊಟು ಬಂಡಾರ ಏರಾದ್ ನೇಮ ನಡಪುನಲಾ ಉಂಡು.ಮೈಲ್ಕಟ್ಲೆ ಬಂಡಾರ ಪೋಪುನಲಾ ಉಂಡು.ಅವ್ಲು ದೈವ ದರಿ ಕೈಕೊಂದು ಪೋಪುಂಡು.ಮೂಲು ಕಿರ್ವಾಲ್ ಪೋಪುನ ಸಾದಿ ದೂರಾದಿಪ್ಪು.ಆಂಡ ಬಂಡಾರ ಜಪ್ಪುನ,ಏರುನ ಕ್ರಮ ಪೂರಾ ಅಂಚನೆ ಉಂಡು.ಅಂಚ ಬಂಡಾರ ಪೋನಗ ಬಸವೆ ಬೋಡು,ಬಿರ್ದಾಳಿ ಬೋಡು,ಗಡಿ ಪತ್ತ್ ನಕುಲು ಮಾನ್ಯಾದಿಗೆದಕುಲು ಬೋಡು.ಸಾನದ ಆಡಳ್ತೆದಕುಲು ಬೋಡು ,ದೈವದ ಬಂಡಾರದ ಪ್ರತಿ ಸೊತ್ತುಲಾ ಬೋಡು,ದೈವದ ಕರ್ವಾಲ್ ನ್ ಪಲ್ಲೆಂಕಿಡ್ ತುಂಬೊಂದು ಪೋಪುನ ಕಟ್ಟ್..ದೈವೊಗು ಮಸ್ತ್ ಬೊಳ್ಳಿ ಬಂಗಾರಾದ್ ಅವೆನ್ ಕೊನೊಯೆರೆ ಪಲ್ಲೆಂಕಿ ಬತ್ತ್ಂಡ್.ದುಂಬು ದೈವದ ಕಿರ್ವಾಲ್ ನ್ ಕೈಟ್. ಪತೊಂದೇ ಪೋವೊಂತ್ ನಿ.(ದುಂಬು ಪೂರ ಅನುಕೂಲದಕುಲು ಮದಿಮಯನಾ,ಮದಿಮಾಲೆನಾ ನಾಲ್ ಕಾರ್ದ ಕುರ್ಸಿದಂಚಿ ಮಂಚಿ ಲ್ಡ್. ಬೋವಿ ಜನಾಂಗದಕುಲು ತುಂಬೊಂದು ಪೋವೊಂತೆರ್ ಗೆ.ಬೊಕ್ಕ ಬೊಕ್ಕ ಬೇತೆ ಜಾತಿದಕುಲ್ಲಾ ತುಂಬೆರೆ ಸುರು ಮಲ್ತೆರ್).

೯.ಸುತ್ತೆ ದೀದ್ ,ಪನಿವಾರ ಬಲಸ್ ದ್, ದೂಪ-ದೀಪಾದ್ ತಂಬಿಲ:-

ದೈವದ ಕಲೊಟು ಬೆಮ್ಮೆರೆಗೇ ಉರ್ಪೆಲರಿ,ಮುಗಟೆ ದಾಂತಿ ತಾರಾಯಿಡ್ ಸುತ್ತೆ ದೀಪುನ ಕೆರಮ.ನೇಮದೌಲು ಗಣಪತಿ ಸುತ್ತೆ ದೀಪುನ ಕೆರಮ ಇಜ್ಜಿ.ಅಂಚನೆ ಸುತ್ತೆದ ತಾರಾಯಿದ ಕಣ್ಣ್ ಗ್ ಕೊಡತ್ ದೇ ದೀವೊಡು.ದೈವೊಗು ನೇಮೊಡು ಕೊರ್ಪುನ ಬೊಂಡೊನು ಪಿರಾವುಡೇ ಕೆತ್ತ್ ದ್ ಒಟ್ಟೆ ಮಲ್ತ್ ಕೊರೊಡು,ಬೆಮ್ಮೆರೆ ಸುತ್ತೆಡ್ ಬಚ್ಚಿರೆ ಬಜ್ಜೆಯಿ ಉಪ್ಪೊಡು.ತಾರಾಯಿದ ಕಣ್ಣ್ ನ್ ಚೂರು ಕೊಡಪೊಡು,ಒಟ್ಟೆ ಮಲ್ಪುನತ್ತ್.ಕಣ್ಣ್ ಗ್ ಕೊಡಪುನಿ ಪಂಡ ದೃಷ್ಟಿ ದೆಪ್ಪುನಿಂದ್ ಅರ್ಥ.ಹಿರಿಯಾಕ್ಲೆ ಸೂತ್ರ ಪ್ರಕಾರ ಕಣ್ಣ್ ಕೊಡತ್ ದ್ ದೀಂಡ್ ಪಂಡ ಇಂಚಿನ ದೈವದ ದೃಷ್ಟಿ ದೆತ್ತ್ ದ್ ಬೆಮ್ಮೆರೆಗ್ ಸುತ್ತೆ ದೀಂಡ್ಂದ್ ಲೆಕ್ಕ.ಅವೆನ್ ಬೊಕೊಂಜಿ ಬತ್ತ್ ದ್ ಮುಟ್ಟುಲೆಕ ಇಜ್ಜಿ.

ದೈವದ ಆವಾರ,ಪನಿವಾರ:-

      ದೈವದ ಪನಿವಾರೊಡು ಪೊರಿ ,ಬಜಿಲ್ ,ಪಂರ್ದ್, ಬೆಲ್ಲ, ತಾರಾಯದ ಪೂ ಪಾಡ್ವೆರ್.ರಾಜಂದೈವೊಗು ಹೆಚ್ಚಾದ್ 5 ಇರೆತ ಪನಿವಾರಪಾಡುವೆರ್.ಅಂಚಾಂದ್ 3 ಇರೆಟ್ ಪನಿವಾರ ಪಾಡೆರೆ ಬಲ್ಲಿ.ಮೂಜಿ ಇರೆಟ್ ಬಲಸುನಿ ಕರಿದ್ ಪೋಯಿನಕ್ ಲೆಗ್/ಅಪರ ಕರ್ಮೊಗು.ದೈವದ ಪನಿವಾರೊಗು 5 ಇರೆನೇ ಪ್ರದಾನ.ಇನಿ ಕೆಲವೊಂಜಿ ಇಲ್ಲಗ್ ಪನಿವಾರ ಕೊರೊಡುಂದು ಜಾಸ್ತಿ ಇರೆತ ಪನಿವಾರ ಪಾಡುವೆರ್.ಅವು ಸರಿಯತ್ತ್.15 ಇಲ್ಲ್ ಲೆಪ್ಪುದಕ್ಲಿತ್ತ್ಂಡ 15 ಇರೆತ ಪನಿವಾರ ಪಾಡುವೆರ್.ಉಂದು ಸರಿಯತ್ತ್.ಪಂಚ ಬೂತೊಗು ಸಾಕ್ಷಿಯಾದ್ 5 ಕೊಇ ಇರೆತ ಪನಿವಾರ ಪಾಡುವೆರ್. ಮೊಕ್ಲು 5 ಇರೆಟ್ 50 ಇರೆಕ್ ಬೋಡಾಯಿನಾತ್ ಬಲಸಡ್,ಅವೆನ್ ಮಾತೆರೆಗ್ ಪಟ್ಟಡ್,ಆಂಡ ದೈವದ ಕಲೊಟು ಐನೆನ್ ಮೀರುನ (5 ಇರೆತ ಪನಿವಾರ) ಅಧಿಕಾರ ಏರೆಗ್ಲ  ಇಜ್ಜಿ.

ಕೊಡಿಯಡಿತ ಬಲಿ ಮುಕ್ಕರಿಗೆ:-

         ಬಲಿ ಮುಕ್ಕರಿಗೆದ ಅಡಿಟ್ ಸೇಡಿಡ್ ಬರೆದ್ ಅವೆತ ಮಿತ್ತ್  ಕೊಡಿ ಇರೆ ಪಾಡ್ದ್ ಬಾರ್ ಪಾಡ್ವೆರ್.ಬಾರ್ ಪ್ರಕೃತಿದ ಸಂಕೇತ ಆದುಂಡು.ದಾಯೆ ಪಂಡ ಪಜಿ ಬಾರ್ ಡ್ ಜೀವ ಉಂಡು.ಬಿತ್ತ್ಂಡ ಅವು ಕೊಡ್ಯುಂಡು.ಕೆಲವೆರ್ ಬಾರ್ ದ ಬದಲ್ ಉರ್ಪೆಲರಿ/ಕಜೆ ಅರಿ ಅರಿ ಪಾಡ್ವೆರ್.ಒರ ಬೆಯ್ತ್ ದ್ ಬಾರ್ ಡ್ ಅರಿಯಾಯಿನೆನ್ ದುಂಬು ಪಾಡೊಂದಿಜ್ಜಾಂಡ್.ಅವೆತ ಸುತ್ತ ಬೊಂಡೊನು ದೈವೊಗು ಇಡೀ ಕೆತ್ತ್ ದೀಯೊಡು.ಅವು ಪೊರ್ಲುಗು ಬೋಡಾದ್ ಲ ಅಂಚ ಕೆತ್ತ್ ದ್ ದೀಪೆರ್.ಬಲಿ ಮುಕ್ಕರಿಗೆದ ಮಿತ್ತ್ ಬಲಿ ದೀದ್ ಬಲಿತುಲಯಿ ಬಲಿ ಚರ್ವ ಪಾಡುವೆರ್.ಉರ್ಪೆಲರಿತ ಚರ್ವನೇ ಆವೊಡು.ಚರ್ವ ಪಾಡಿ ಬೊಕ್ಕ ಇತ್ತೆ ಪಿಂಅರ,ಮಲ್ಲಿಗೆ ಪೂ ಪೂರ ಪಾಡ್ವೆರ್.ನಿಜವಾದ್ ಬಲಿ ಚರ್ವದ ಮಿತ್ತ್ ಗುಡ್ಡೆ ಕೇಪುಲೊನೇ ಪಾಡೊಡು.ಇತ್ತೆ ಚರ್ವೊದ ಮಿತ್ತ್ ಪಂರ್ದ್,ಅರಿ ಬಲ್ಚಟ್(ದೋಸೆದಲೆಕ ಇತ್ತ್ ನ)ಲ ಪಾಡ್ವೆರ್.ಓಲು ಏರ್ ಕಟ್ಟ್ ತಪ್ಪಾಯೆರ್ಂದ್ ಗೊತ್ತಾವೊಂದಿಜ್ಜಿ.ಬಲಿಕುತ್ತುಡು ಮೂಜೆಸಲ್ದ ದೀಪೊನೇ ಕುತ್ತೊಡು.ಬಲಿ ಕುತ್ತಿ/ತ್ತು,ಸಿಂಗದನ/ನೆ ಅವು ಅಪರ ಕರ್ಮದ ಒರುವಾದುಂಡು.ಅಪರ ಕರ್ಮೊಡು ಮೂಜೆಕ್ ಪ್ರಾದಾನ್ಯತೆ.ಬಲಿ ಕುತ್ತಿಲ ದೂಪೆದಾಕಾರ.ಸಿಂಗದನಲ ದೂಪೆದ ಅಲಂಕಾರದಾಕಾರ.ದೂಪೆಡ್ ಬೇತೆ ಬೇತೆ ನಿಲೆ ಇತ್ತ್ ಲೆಕನೆ ಸಿಂಗದನೊಟ್ಲ ಅಂತರಂತರೊಲಿಪ್ಪುವ.ಉಂದು ಕರಿದ್ ಪೋಯಿನಕ್ಲೆನ ಸಂಕೇತವಾದುಂಡು.ಬಲಿ ಕುತ್ತು ಬೊಕ್ಕ ಅವೆತ ಮಿತ್ತುಪ್ಪುನ ಬಾಲೊಲಿದ ನಡುಟು ಅರ್ಲಾಯಿ ಬಲಿ ಕುತ್ತುಡು ಮಾಯೆದ ನಿಲೆಯುಂಡು.ನಮ್ಮ ಮದಿಪುಗು ಮಾಯೆ ಜೋಗದ ಮಾನಿನ ಮಿತ್ತ್ ವಸಾಯದ ಒರುಟು ಬರ್ಪುನಿ.ನಮ ನಂಬಿನ ದೈವೊಲು ಒಂಜತ್ತ್ ಒಂಜಿ ಕಾಲೊಡು ಈ ಬೂಮಿಡ್ ಒಂಜಿ ಜೀವಾದಿತ್ತ್ ದ್ ಅಕುಲು ನಂಬಿನ ಸತ್ಯೊಡ್ದಾವರ,ಅಕುಲು ನಡತಿನ ಸತ್ಯೊಡ್ದಾವರ ಅಕ್ಲೆ ಹಿನ್ನೆಲೆತ ಪ್ರಕಾರ ಅಕುಲು ಈ ಮಣ್ಣ್ ಡ್ ಸತ್ಯೊಲಾದ್ ನೆಗತ್ ಬತ್ತ್ ನಕುಲು.ಪುಟ್ಟ್ ನಗನೆ ದೈವಾದ್ ಪುಟ್ಟ್ ನ ಕತೆಕುಲಿಜ್ಜಿ.ಅಂಚಾದ್ ಈ ಸಂಕೇತೊಲೆನ್ ದೀದ್ ಅಕ್ಲೆನ್ ಲೆತ್ತ್ ಕೊಂಡಾಡುನ ಒರು/ರೂಪ ಬರ್ಪುಂಡು.ಅಂಚಾದ್ ಬಲಿ ಕುತ್ತಿದ ದೀಪಲ ಮೂಜೆತನೆ.ಸಿಂಗದನತ ಅಂತರಂತರಲ ಮೂಜೆತನೆ.ಸಿಂಗದನೊಟ್ಲ ದೂಪೆಡ್ ಬಲಸುನ ಕೆರಮೊಡೆ ಬಲಸುನಿ.,ತುಡರ್ಲ ಅಂಚನೆ ದೀಯೆರುಂಡು.ದೈವದ ಜೀಟಿಗೆಗ್ಲ ಪುಣೊಕು ಪಾಡ್ದ್ ದೆಕ್ಕ್ ದ್ ದೀನ ಕುಂಟುನೆ ಗಲಸುನಿ.ಸೈತಿ ಪುಣ ಪೊತ್ತಯಿ ಕಾಟದ ಕಡೆಟ್ ಒರಿನ ಒಂಜಿ ಕಿನ್ಯ  ಮರತ ತುಂಡಾಂಡಲ ಬಾಲೆಗ್ ಮರತ ತೊಟಿಲ್ ಮಲ್ಪುನಗ ಅವೆಕ್ ಗಲಸುವೆರ್.ಅಪಗ ದೈವಾರಾದನೆ ಕರಿದ್ ಪೋಯಿನ ಹಿರಿಯೆರ್ನ ಆರಾದನೆ ಪನ್ಪುನೆಕ್ ಉಂದು ಪೂರ ಸಾಗ್ಸಿಅಪುಂಡು.

೧೦.ಪಡಿಯರಿ ಪತ್ತುನಿ:-

      ಪಡಿಯರಿ ಕಟ್ಟುನಕುಲು ಪತ್ತುನ ಕೆರಮ.ಮಾತ ಬೇಲೆಡ್ಲ ಬೇಲೆ ಮುಗಿ ಬೊಕ್ಕ ದೈವಾರಾದನೆದ ಕಟ್ಟುನಕುಲೆಗ್ ಸುರುಕೇ ಪಡಿಯರಿ ಕೊರ್ಪುನ ಕೆರಮ.ದಾಯೆ ಪಂಡ ನೇಮ ನೆರಿ ಆನಗ ವಸಾಯೊನು ಉಂತಾಯೆರೆ ಆವಂದೆ ಕೈ ಮೀರ್ದ್ ಎಚ್ಚಿಕಮ್ಮಿಯಾದ್ ಪೋಂಡ ಪಂಡ್ ದ್ ದುಂಬೇ ಪಡಿಯರಿ ಕೊರ್ಪೆರ್.ಪಡಿಯರಿ ಕೊರ್ಪುನಿಂದಾಂಡ ಇಲ್ಲದ ದೈವ ಆಂಡ ಇಲ್ಲಗ್ ಸಂಬಂದಪಟ್ನ ಹಿರಿಯಾಕುಲು ಪಡಿಯರಿ ಕೊರ್ಪೆರ್.ದೈವದ ಚಾಕಿರಿನ್ ಇಲ್ಲದ ಹಿರಿಯಾಕುಲು ಏರ್ ಮಲ್ಪುವೆರಾ ಅಕುಲೇ ಪಡಿಯರಿ ಕೊರೊಡಾಯಿನಿ.ಬೇತೆಕ್ಲ್ ಕೊರ್ಪುಲೆಕ ಇಜ್ಜಿ.ಗ್ರಾಮದ,ಊರ್ದ ದೈವ ಆಂಡ ಗಡಿ ಪತ್ತ್ ನಕುಲು ಕಟ್ಟುನಾಯಗ್ ಪಡಿಯರಿ ಕೊರೊಡು.ಮಾನಿ,ಮೂಲ್ಯಾದಿಗೆದಕುಲು ಇತ್ತ್ ದ್ ಪಡಿಯರಿ ಕೊರ್ಪುನಿ.ಪಡಿಯರಿನ್ ಕಾಡ ಬೂರುಡೇ ಮೊಡಯಿ ತಡ್ಪೆಡೇ ಕೊರೊಡು.ಸ್ಟೀಲ್,ಸಿಲ್ವರ್ ತೋಪುಡು ಕೊರ್ರೆನೇ ಬಲ್ಲಿ‍.ತಡ್ಪೆಡ್ ಉರ್ಪೆಲರಿ,ಮುಗಟೆದಾಂತಿ ತಾರಯಿ,5 ಬಚ್ಚಿರೆ,1 ಬಜ್ಜೆಯಿ,ಕುಂಟು ಕೊರ್ಪೆರ್.ಪಡಿಯರಿ ಕೊರ್ನಗ ತುಡರ್/ದೀಪ ಬಾರೀ ಅಗತ್ಯ ಉಂಡು.ದೀಪ ಇಜ್ಜಂದೆ ಪಡಿಯರಿ ಕೊಂರ್ಡ ದೈವ ಇಜ್ಜಂದೆ ಪಡಿಯರಿ ಕೊರ್ಲೆಕ ಆಪುಂಡು.ತಡ್ಪೆಡ್ ದೀಪ ದೀಯೆರೆ ಆಯಿಜಿಂಡ ಮಣ್ಣ ತಿಪಿಲೆಡಾಂಡಲಾ ನಿನೆ ಪೊತ್ತಾದ್ ತಡ್ಪೆಡ್ ದೀಯೊಡು.ಈ ಪೊತ್ತಾಯಿ ನಿನೆತ ಬೊಲ್ಪು ದೈವ ಅವ್ಲು ಉಂಡು ಪನ್ಪುನೆತ ಸಂಕೇತ.ಪಡಿಯರಿ ಕೊರ್ನಗ ದಾಲ ಕಟ್ಟುನಾಯಗ್ ವಸಾಯ ಬರ್ಪುಜಿ.ಅಪಗ ಕಟ್ಟುನಾಯೆ ಕಟ್ಟುನಾಯೆ ಆದೇ ಪಡಿಯರಿ ಪತ್ತುನಿ ವಿನಃ ದೈವ ಆದ್ ಪಡಿಯರಿ ಪತ್ತುಜೆ,ಇಂಚಿತ್ತಿ ದೈವದ ನೇಮ ಕಟ್ಟೆರೆ ಪಡಿಯರಿ ಪತ್ತುವೆಂದ್ ಆ ಗ್ರಾಮದ ದೈವ ದೇವೆರೆನ್,ಊರು ಸರ್ವೆರೆನ್ ಕೊಂಡಾಡ್ ದ್ ಕೇನೊಂದು,ಅಯಿಡ್ದ್ ಬೊಕ್ಕ ಆಯೆ  ಕಟ್ಟುನ ಜಾಗೆದ ದೈವೊಗು ಕೈ ಮುಗಿದ್,ಬೂಮಿಗ್ ಅಡ್ಡ ಬೂರ್ದು ,ಅಯಿರ್ದ್ ಬೊಕ್ಕ ಪಡಿಯರಿತ ತಡ್ಪೆಗ್ ಕೈ ಕೊರ್ಪುನಿ.ಪಡಿಯರಿ ಪತ್ತ್ ನಗ ವಸಾಯ ಇಜ್ಜಂದಿನೆಡ್ದಾದ್ ಪಡಿಯರಿತ ತಡ್ಪೆಗ್ ಆಯೆ ಕೈ ಕೊರ್ನಗ  ದೀಪ ದಾಲ ರಟ್ಟುಜಿ. ಪಡಿಯರಿತ ತಡ್ಪೆಗ್ ಆಯೆ ಕೈ ಕೊರಿ ಬೊಕ್ಕ ನಾಲ್ ದಿಕ್ಕ್ ಗ್ಲ ಅಯೆ ತಡ್ಪೆದ ಅರಿಟ್ ಒಂತೆ ಅರಿನ್ ಪಾರಾವೆ.ಅಲ್ತ್ ಬೊಕ್ಕ ಅಲ್ತ್ ಒರ ಅಗಪುವೆ. ಇನಿ ಓಲ್ಲಾ ತಡ್ಪೆಡ್ ನಿನೆ ಪೊತ್ತಾದ್ ಪಡಿಯರಿ ಪತ್ತುನವು ತೂಯೆರೆ ತಿಕ್ಕೊಂದಿಜ್ಜಿ.ಆಂಡ ತುಡರ್ ದೀದ್ ಪಡಿಯರಿ ಪತ್ತುನ ಕೆರಮ ತುಳುನಾಡ್ ಡ್ದ್ ಮದೆಕ್ ಸೇರೊಂದಿಪ್ಪುನವು ದುರಂತ.

೧೧.ಎಣ್ಣೆ ವೀಳ್ಯ/ಬೂಲ್ಯ:-

       ಪಡಿಯರಿ ಪತ್ತಿ ಬೊಕ್ಕ  ಕಟ್ಟುನಾಯೆ ಎಣ್ಣೆ ಬೂಲ್ಯ ಪತ್ತುವೆ.ಕೆಲವೊರ ಎಣ್ಣೆ ಬೂಲ್ಯ ಪತ್ತ್ ನಗ ಒಂಜಿ ಚೂರು ವಸಯಾಪುನಲ ಉಂಡು.ಕಣ್ಣ್ ಮುಚ್ಚಿದ್ ಬುಲನೆಟ ಸೌಮ್ಯವಾದ್ ಜೋಗ ಉಪ್ಪುಂಡು.ಆಂಡ ಅಬತಾರ ಕಟ್ಟೊಂದು ಊರೂರು ಬಲಿಪುನ ವಸಾಯ ಬರ್ಪುಜಿ.ಇತ್ತೆದ. ಪೊಸ ಪೊಸತಾದ್ ಬತ್ತ್ ನ "ಉಗ್ರ"ದ ವಸಾಯ(ಉಗ್ರದ ಎಣ್ಣೆ ಬೂಲ್ಯ) ಬರ್ಪುಜಿ.ಅವೆನ್ ಜೋಗ,ವಸಾಯಂದ್ ಪನೆರಾಪುಜಿ.ಅವು ಪೆರ್ಚಿ ಕಟ್ಟುನಿಂದ್ ಪನೊಲಿ ಆತೆ.ದಂಬು ಮಾತ ದೈವೊಲು ಕಾರ್ ಗ್ ಗಗ್ಗರ ಕಟ್ಟ್ ದೇ ಲಕ್ಕೊಂತಡ ಉರುಂದಾರ(ಇತ್ತೆ ವರ್ಣಾರ ಪಂಜುರ್ಲಿಂದಾತ್ಂಡ್)ಪಂಜುರ್ಲಿಗ್ ಮಾತ್ರ ಗಗ್ಗರದೆಚ್ಚಿ ಇತ್ತ್ ನಿ.ಇನಿ ಗಗ್ಗರದೆಚ್ಚಿ ಇಜ್ಜಾಂದಿ ದೈವೊಲೇ ತಿಕ್ಕಯ.ನಿಜವಾದ್ ಕಟ್ಟುನಾಯೆ ಎಣ್ಣೆವೀಳ್ಯ ದೆತೊನ್ನಗ ಆಯನ ಮೇಲ್ ಗ್ ದೈವ ಮಿನಿ ಉಗ್ರೊಡು ಬತ್ತ್ಂಡ ಆಯೆ ಬದ್ ಕೆರ್ನೇ ಸಾದ್ಯ ಇಜ್ಜಿ.

೧೨.ಬೀರ ಲೆಪ್ಪುನಿ:-

      ತೆಂಬರೆ ಬೊಟ್ಟೊಂದು,ಪಾಡ್ದನ ಪಂಡೊಂದು ದೈವದ ಉಟ್ಟು ಕಟ್ಟ್ ದಡೆ ಎತ್ತ್ ನಗ ಕಟ್ಟುನಾಯಗ್ ಸಾದಾರ್ಣ ವಸಾಯ ಬರ್ಪುಂಡು.ಬೀರ ಪಂಡ ದೈವದ ಚಾತುರ್ಪುನು(ಹಿರಿಮೆ-ಗರಿಎ) ಕೊಂಡಾಡುನಿ.ಸಂದಿ ಪಂಡ ದೀವ ಇತ್ತಿ ಜಾಗೆ,ಬತ್ತಿ ಜಾಗೆದ ಬಗೆಟ್ ತೆರಿಪಾಂಡ ಬೀರೊಡು ದೈವದ ಪರಾಕ್ರಮೊನು ಕೊಂಡಾಡುನಿ.ದೈವೊನು ಪುಗಾರ್ ಪುಗರ್ದಾನಗ ಆಯನ ಮಿತ್ತ್ ದೈವ ವಸಾಯೊಡು ಬರ್ಪುಂಡು. ಮುಕ್ಕಾಲ್ ಮೂಜಿ ಗಳಿಗೆ ಅಯನ ಮೇಲ್ಡ್ ದೈವ ವಸಾಯೊಡಿತ್ತ್ ದ್ ಬೊಕ್ಕ ಬುಡ್ದು ಪೋಪುಂಡು.

೧೩.ಗಗ್ಗರದೆಚ್ಚಿ:-

    ರಾಜಂದೈವೊಲೆಗಾವಡ್,ಅರಸು ದೈವೊಲೆಗಾವಡ್ ಕಾರ್ ಗ್ ಗಗ್ಗರ ಕಟ್ಟ್ ದೇ ಕಟ್ಟುನಕುಲು ಲಕ್ಕ್ ದುಂತೊಂತ್ ನಿ.ಕಾಲ ಕರಿಲೆಕ. ಕಟ್ಟುನಕುಲು. ತಾನ್ ಕಟ್ಟುನ ಎಚ್ಚಿನ ದೈವೊಲೆಗ್ ಗಗ್ಗರದೆಚ್ಚಿ ಮಲ್ತೊಂದೆ ಬತ್ತೆರ್.ಆಟೊಡು ವೇಷದಾರಿ ಪನಿ ಬಿರ್ಸೆ ಆಂಡ ಬಾಗತೆರ್ ಆಯಗ್ ಬೋಡಾಯಿಲೆಕ್ಕ ಪದ ಕೊರ್ಪೆರ್.ಅವ್ವೆ ಲೆಕ್ಕ ಮೂಲ್ಲಾ ಕಟ್ಟುನಾಯೆ ಒಂತೆ. ಬಿರ್ಸೆ ಆಂಡ ಕಟ್ಟಾವುಕುಲು ಆಯೆ ಮಲ್ತ್ ನೆನ್ ಸರಿಂದೇ ಪನ್ಪುನಿ.ಉರುಂದಾರ ಪಂಜುರ್ಲಿ( ಇತ್ತೆ ವರ್ಣಾರ ಪಂಜುರ್ಲಿ ಆತ್ಂಡ್) ಉಗ್ರೊಡು ಉಪ್ಪುನ ದೈವ ಆಯಿನೆಡ್ದಾತ್ರ ದುಂಬುದ ಕಾಲೊಡು ಈ ದೈವೊಗು ಉಗ್ರದ ಗಗ್ಗರದೆಚ್ಚಿ ನಡತೊಂತ್ಂಡ್.ಇನಿ ಗಗ್ಗರದೆಚ್ಚಿ ಇಜ್ಜಂದಿ ದೈವೊಲು ಬಿರೆಲ್ದ ಲೆಕ್ಕಾಚಾರೊಡು ತಿಕ್ಕುವ ಆತೆ.ಕಾರ್ ಗ್ ಗಗ್ಗರ ದೀನಗಲ ಸಭೆ ಸರ್ವೆರ್ಡಲ ಗಗ್ಗರೊನು ತೋಜಾದ್  ಓ ಇಂಚಿನ ದೈವೊಗು ಗಗ್ಗರ ದೀಪೆಂದ್ ಪಂಡ್ ದೇ ಗಗ್ಗರ ದೀಪುನಿ.ಇನಿ ಗಗ್ಗರೊನು ಪತೊಂದು ಅವೆತ ಬಲ್ಲ್ ಪತ್ತ್ ದ್ ಗಗ್ಗರೊನು ಬೀಜಾವೊಂದು,ಅಕ್ಲೆನ ತಿಗಲೆಗ್ ಅಕ್ಲ ಗಗ್ಗರೊನು ಹಾಕೊನುನೆನ್ ತೂನಗ ದೈವಾರಾದನೆ ಇಡೆಗ್ ಲ ಎತ್ತ್ಂಡ ಪಂಡ್ ದ್ ಬೇಜರಾಪುಂಡು.ಗಗ್ಗರೊಗು ದೈವದ ಕಲೊಟು ಅವೆತನವೇ ಆಯಿನ ಮಾನಾದಿಗೆ ಉಂಡು.ಅವು ದೈವದ ಕಲೊಟು ದೈವದ ಅನನ್ಯತೆಗ್ ಒಂಜಿ ಸಂಕೇತ ಆದುಂಡು.ಅಂಚಾದ್ ಚಾಕಿರಿದಕುಲು ಅವೆತ ಪಾವಿತ್ರ್ಯತೆನ್ ಒರಿಪುನವು ಅಕ್ಲೆನ ಕರ್ತವ್ಯ ಆದುಂಡು.

 ೧೪.ನೇಮದೆಚ್ಚಿ-ಬಲಿ ಸುತ್ತುಲು:-

     ಇತ್ತೆದ ಪ್ರಕಾರ ತೂಪುಂಡ ಗಗ್ಗರದೆಚ್ಚಿ ಆಯಿ ಬೊಕ್ಕ ನೇಮದೆಚ್ಚಿ ನಡಪುಂಡು.ಸುರುಕಾದ್ ನಡಪುನಿ ಪರಂಪರೆರ್ದ್ ಬತ್ತಿನ ಸಾಂಫ್ರದಾಯಿಕ ನಡಕೆಲು.ಅಯಿರ್ದ್ ಬೊಕ್ಕ ಒಂಜಿ ಸುತ್ತಾ,ರಡ್ಡ್ ಸುತ್ತಾ,ಮೂಜಿ ಸುತ್ತಾಂದ್ ಸಾನ ಬಲಿ ಸುತ್ತು ಉಪ್ಪುಂಡು.ಅಂಚನೆ ಬೇತೆ ಬೇತೆ ಬಲಿಸುತ್ತುಲು ನಡಪುನ ಕೆರಮಲ ಉಂಡು.ಉದಾರ್ಮೆಗ್-ಮದ್ಮಾಲೆ ಸುತ್ತು ಬಲಿ,ಉಡ್ಕು ಬಲಿ,ಓಡ ಬಲಿ ಇಂಚ ಬೇತೆ ಬೇತೆ ಬಲಿ ಸುತ್ತುಲು ಉಪ್ಪುವ.ದಂಬುಗು ನೇಮದೆಚ್ಚಿ,ಬಲಿತೆಚ್ಚಿಯಾದ್ ದೈವ ದೊಂಪದ ಪಿದಯಿ ಬತ್ತ್ ದ್ ದೈವ ಗಡಿಕ್ ಗಡಿತ ಆವಾರ (ಗಡಿಯಾರ)ಕೊರ್ರೆ ಉಂಡು.ಕೆಲವು ದೈವದ ನೇಮೊಡು ಮುಗ ದೀದೇ ನೇಮ ಸುರಾಂಡ ನನ ಕೆಲವು ನೇಮೊಡು ನೇಮ ನಡತ್ ದ್ ಒಂತೆ ಪೊರ್ತುರ್ದು ಬೊಕ್ಕ ಮೋನೆಗ್  ಮುಗ ದೀಯೆರೆ ಉಂಡು.ನನ ಕೆಲವು ದೈವೊಲೆಗ್ ನೇಮದಿಡೆಟ್ ಮುಗ ಏರುನ ಕ್ರಮ.ನೇಮದೆಚ್ಚಿಡ್ ದೈವೊಲು ನಡಪುನ ನಡಕೆಡ್ ಎತ್ತೇಸೊಲು ಉಂಡು.ಕೆಲವು ಗಂಭೀರವಾದ್ ರಾಜ ನಡಕೆ ನಡತಂಡ ಕೆಲವು ದೈವೊಲು ಕಾರ್ ಮೋಂಟಾದ್ ನಡಪುವ.ಕೆಲವು ನಾಲಿ/ಕಂಟೆಲ್ ಬಗ್ಗಾದ್ ನಡಪುವ .ಇಂಚ ನೇಮದೆಚ್ಚಿಡ್ ಕೆಲವೊಂಜಿ ನಡಕೆಲುಪ್ಪುವ.ನೇಮ ನಡಪುನಿ,

೧೫.ಆವಾರ,ನುಡಿ,ಪೇರ್ ಪರ್ಪುನಿ: -

         ಕೆಲವು ತಿಕ್ ಡ್ ದುಂಬು ಆವಾರಾದ್ ಬೊಕ್ಕ ನುಡಿಯಾಂಡ,ಕೆಲವು ಕೋಡಿಡ್ ಸುರುಕು ನುಡಿಯಾದ್ ಬೊಕ್ಕ ಆವಾರ ಆಪುಂಡು.ತೆರಿನಕ್ಲೆ ಪ್ರಕಾರ ನುಡಿ ಆವಂದೆ ಆವಾರ ಸರಿಯತ್ತ್.ದೈವೊನು ಲೆತ್ತ್ ದ್ ಅಂದ್/ಬರಿ  ಮಲ್ತಿ ಬೊಕ್ಕ  ದೈವೊಗು ಬೋಡಾಯಿನ ಆಗ ಬೋಗೊನು ಕೊರಿಯ.ಅವು ಮಾಯೆಗ್ ಕೊರ್ಪಿಂಚಿ ಆಗ ಬೋಗೊಲು.ಆಗ ಬೋಗ ಕೊರಿ ಬೊಕ್ಕ ದೈವದ ಅಪ್ಪಣೆ ದಾದಂದ್ ಕೇಂಡಿ ಬೊಕ್ಕನೆ ಆವಾರ ಕೊರೊಂತ್ ನಿ.ಅಪ್ಪಣೆನೆ ಇಜ್ಜಂದೆ ಆವಾರ ಎಂಚ?.ಬಿನ್ನೆ ಇಲ್ಲಡೆ ಬತ್ತಿ ಬೊಕ್ಕ ಆಯಡ ದಾನೆ ಎಡ್ಡೆಂದ್ ಸುಕ ದುಕ್ಕ ಕೇಂಡ್ ದಾದ್ ತಿನೆರೆ ಕೊರ್ಪುನಿ.ದುಂಬೆ ತಿನೆರೆ ಕೊರ್ದು ಸುಕ ದುಕ್ಕ ಪಾತೆರುನತ್ತ್.ನಮ್ಮ ಹಿರಿಯಾಕುಲುನಮಕ್ ಸಂಸ್ಕಾರೊಗುಂದು ಇಂಚಿ ಸಾದಿಂದ್ ದೀದ್ ಪೋತೆರ್.ನಮ್ಮ ಜೀವನೊಗ್ಲ ಎಂಚ ಬದ್ ಕೊಡುಂದು ಪದಿನಾಜಿ ಕಟ್ಟ್ ಮಲ್ತ್ ಕೊರ್ತೆರ್.

೧೬.ಬೂಲ್ಯ-ಸೂತ್ರ ಬೂಲ್ಯ,ನೇಮೊರ್ದು ಇಡೆ ಬುಡ್ಪುನಿ:-

     ದೂಪಾದ್,ಸುದ್ದ ಮುದ್ರಿಕೆಯಾದ್,ಬಂಡಾರ ಯಥಾ ಸ್ಥಾನೊಗು ಪೋದು,ಅವ್ಲು ಬಂಡಾರ ಏರ್ಸಾದ್,ಕುಡ ಸುದ್ದ ಮುದ್ರಿಕೆಯಾದ್ ತಂಬಿಲ .ಸೂತ್ರ ಬೂಲ್ಯ ಪಂಡ ಸೂತ್ರೊಗು ಬೂಲ್ಯ ಕೊರ್ಪುನಿ.ಸುರು ಬೂಲ್ಯ ಕೊರ್ನಗ ದೈವದ ಚಾಕಿರಿದಕ್ಲೆನ ಲೆಪ್ಪುದ ಬೂಲ್ಯ ಉಪ್ಪುಂಡು.ಅಂಚ ಚಾಕಿರಿದಕ್ಲೆಗ್ ಒಟ್ಟು ಸೇರಾದ್ ಕಟ್ಟ್ ಮಲ್ತ್ ದ್ ಕೊರ್ಪುನ ಬೂಲ್ಯೊನು ಕಟ್ಟ್ ದ ಬೂಲ್ಯಂದ್ ಪನ್ಪೆರ್.ಉಂದೆನ್ ಸೂತ್ರ ಬೂಲ್ಯಂದ್ ಲ ಪನ್ಪೆರ್.ಸೇರಿಗೆದಕಗಲೆಗ್,ಊರುದಕ್ಲೆಗ್ ಪೂರ ಬೊಕ್ಕ ಬೂಲ್ಯ ಕೊರ್ಪುನಿ.

ಬದಿಕರ ಬೂಲ್ಯಂದ್ ಕೆಲವೊಂಜಿ ರಾಜಂದೈವೊಲೆಗ್ ಇತ್ತ್ ದ್ ದೈವ ಆವಾರ ಕೈಕೊನುನ ದುಂಬು ಬದಿಕರ ಬೂಲ್ಯ ಆಪುಂಡು.ಬದಿಕರ ಬೂಲ್ಯ ಗಡಿಕ್,ಮಾನಿಗ್ ಬೊಕ್ಕ ಆಡಲ್ತೆದಕ್ಲೆಗ್ ಮಾತ್ರ ದೈವ ಕೊರ್ಪುನಿ.ಒರಿನಕ್ಲೆಗ್ ಬದಿಕರ ಬೂಲ್ಯ ಕೊರ್ಪುನ ಕಟ್ಟಿಜ್ಜಿ.ದೈವದ ಬದಿಕರ ಬೂಲ್ಯಲ ತಪ್ಪಂಗಾಯಿಲ ತೂಯೆರೆ ಸರ್ವೇ ಸಾಮಾನ್ಯ ಒಂಜೇ ಅರ್ತ ಕೊರ್ಪುಂಡು.ಬದಿಕರ ಬೂಲ್ಯದ ನಾಟ್ಯ ದೈವದ ಕಲೊಕು ಪೊರ್ಲು ಬರೆರೆಂದ್ ಕನತ್ ದೆರಾತೆ.

  ನೇಮೊರ್ದು ದೈವ ಇಡೆ ಬುಡ್ಪುನ ದುಂಬು ಸಮ್ಮಂದಪಟ್ಟ್ ನಕ್ಲೆಡ ನನ ದಾಲ ಇಚಾರ ಉಂಡಾಂದ್ ಕೇನುನ ಕೆರಮ ಉಂಡು.ಅಪನ ಸಮ್ಮಂದ ಪಟ್ಟಿನಕುಲು  ದೈವೊಗು ಸಂಬಂದಪಟ್ನ ಪೂರ ಇಚಾರಲ ಕೇನುನ ಪತ್ತುನ,ಅರಿಕೆ ,ನನೊಂಜಿ,ಕುಡೊಂಜಿ ಮಾತಲ ಕೇನೆರೆ ಅವಕಾಶ ಉಂಡು.ದಾಲ ಇಚಾರ ಇಜ್ಜಿಂದಾಂಡ ಯಾನ್ ನನ ಮಣೆ ಮಂಚ ಸೇರೊನೊಲಿಯಂದ್ ಇಡೆ ಬುಡೆರೆ ದೈವ ಕೇನುಂಡು.ಅಂಚ ದೈವ ಪನ್ನಗ ನೇಮೊರ್ದು ಇಡೆ ಬುಡೆರೆ ಅರಿಕೆ ಉಂಡು.ಅರಿಕೆ ಆಯಿನಡೆಗ್ ನೇಮೊರ್ದು ಇಡೆ ಬುಡ್ಪುನ ಜೋಗ ನಡಪುಂಡು.ರಾಜಂದೈವೊಲೆಗಂಡ ಗಡಿ ಪತ್ತಿನರ್ ಅರಿಕೆ ಮಲ್ಪುವೆರ್.ಕುಟುಮೊಡಂಡ ಕುಟುಮದ ಹಿರಿಯಾರ್ ಅರಿಕೆ ಮಲ್ಪುವೆರ್.ಕೆಲವೊಂಜಿ ರಾಜಂದೈವೊಲೆಗ್ ಗಡಿಯಾಯಿನ ಇಂಚಿತ್ತ್ ನ ಇಲ್ಲದಕುಲೆ ಅರಿಕೆ ಮಲ್ಪುನಿಂದ್ ಕೆರಮ ಉಂಡು.ಅರಿಕೆ ಇಂಚ ಉಪ್ಪುಂಡು-"ಎಂಕುಲು ಬಕ್ತಿಡ್ ನಿಕ್ಲೆಗ್ ನೇಮೊನು ಕೊರ್ಯ,ಕೊರಿ ನೇಮೊಡು ಸುದ್ದನಾ ಅಸುದ್ದನಾ ಪನ್ಪುನ ಎಂಕ್ಲೆಗ್ ತೆರಿಯಂದ್.ಎಚ್ಚಿ ಕಡಿಮೆ,ಏರ್ ಏರ್ ತಪ್ಪು ದೋಸೊಲು ಆದಿಪ್ಪೆರ್ಲ ಯಾರು.ಆಂಡ ಸಾಂಕ್ಂಡ ಸಮ್ಮಲೆ,ಪೆದ್ದ್ಂಡ ಅಪ್ಪೆ ಪನ್ಪುನ ಸತ್ಯೊಲಾಯಿನ ನಿಕುಲು ಎಂಕ್ಲೆರ್ದ್ ತಪ್ಪು ಆದಿತ್ತ್ ದ್ಂಡಾಂಡ ಮಾಪು ಕೊರೊಡು.ಕೊರಿ ನೇಮೊನು ಸ್ವೀಕಾರ ಮಲ್ತಿನೊಟ್ಟಿಗೆ ಇಡೀ ಊರುನು ದಾಲ ಒಂಜಿ ದೋಷ ಮೋಸೊಲು ಬರಂದಿಲೆಕ್ಕ ಕಾತ್ ಸಂರಕ್ಷಣೆ ಮಲ್ತ್ ಕೊರ್ದು ನಾಲ್ ಕಾರ ನಡೆಕ್,ನರಮಾನ್ಯಗ್ ,ಬುಳೆಕ್,ಮಣ್ಣ್ ಗ್ ಕೊರತೆ ಬರಂದಿಲೆಕ ನಿಕ್ಲೆನ್ ನೆನವರಿಕೆ ಮಲ್ತ್ ನಲ್ಪ ನಿಕ್ಲೆ ಕಲೆ ಕಾರ್ನಿಕ ನೆಗತ್ ಬರ್ಪುಲೆಕ ಎದುರುಗು ತರೆ ಸಾಯಾದ್ ಬಲೆ,ಪಿರವುಗು ಬೆರಿಸಾಯ ಆದ್ ಬಲೆ .ಇನಿ ನೇಮೊರ್ದು ಇಡೆ ಬುಡಿಯರ್ಂದಾಂಡಲ ಎಂಕುಲು ನನೊರ ಲೆಪ್ಪುನಾನಿಗ್ ಎಂಕ್ಲೆ ಬೆರಿಯೆನಿಕ್ಲಿತ್ತ್ ದ್ ಎಂಕ್ಲೆನ್ ಕಾತ್ ರಕ್ಷಣೆ ಮಲ್ಪುಲೆ " ಪಂಡ್ ದಾನಗ ದೈವ  ನೇಮೊರ್ದು ಇಡೆ ಬುಡ್ಪುಂಡು..ಅಂಚ ದೈವ ನೇಮೊರ್ದು ಇಡೆ ಬುಡ್ಯೆರೆ ಮಡ್ಯೆಲೆರೇ ಮೂಜಿ ಸರ್ತಿ ದೈವದ ಮೇಲ್ ಗ್ ಗಿಂಡೆ ನೀರ್ ತಲಿಪುವೆರ್.ಅಪಗ ದೈವ ನೇಮೊಡ್ದು ಇಡೆ ಬುಡ್ಪುಂಡು.ತಲಿಪುದ ಕೂಚಿಡ್ ಗುವೆಲ್ದ ನೀರ್,ತಲಿಪೆರೆ ಕುಕ್ಕು ತಪ್ಪು ಉಪ್ಪುಂಡು.ಇನಿ ಕೇಪುಲ್ದಡೆ ಪಿಂಗಾರ ಪೊಡಿ ಮಲ್ತ್ ದ್ ಪಾಡುವೆರ್,ಗುವೆಲ್ದ ನೀರ್ದ ಬದಲ್ ಬೊಂಡದ ನೀರ್ ಪಾಡ್ವೆರ್.ಕುಕ್ಕು ಪೆಲತ ತಪ್ಪುಡು ಕೂಚಿ ನೀರ್ ತಲಿಪುವೆರ್.

ನಮ ಇನಿ ನಮ್ಮ ಹಿರಿಯಾಕುಲು ಪಾಡ್ದ್ ಕೊರ್ ಕಟ್ಲೆಲೆನ್ ಮದತ್ ದ್ ನಮಕ್ ಅನುಕೂಲ ಆಪುಲೆಕ ಮಲ್ತೊಂದುಲ್ಲ.ಅಂಚಾದ್ ನಮ ಆರಾದನೆಡ್ ತತ್ತ್ ದ್ ಪೋತ  ದೈವದ ನುಡಿ ಪ್ರಕಾರ ಊರುಗೊಂಜಿ ಬಾಸೆ,ದೇಸೊಗೊಂಜಿ ಕಟ್ಟ್.ಉಂದೆನ್ ತೂನಗಲ ಸಾಂಪ್ರದಾಯಿಕ ಕಟ್ಟ್ ಕಟ್ಲೆ ಒಂಜೇ ಆದಿಪ್ಪೊಡಾಂಡ್.ಆಂಡ ಪ್ರಾದೇಶಿಕವಾದ್ ಭಿನ್ನತೆ ಉಂಡು. ನಮ ಬಡುಟು ಬೇರ್ದ್ ಹಾಕುವ ಗಾಯ ಆವು,ಆಂಡ ಮಾಜಿದ್ ಪೋವು.ಆಂಡ ದೈವ ಹಾಕುನಿ‌ ಮಾಯೆದ ಬಡುಟು.ಹಾಕ್ ನ ತೋಜಂದ್.ಗಾಯಲ ಮಾಜಂದ್.ಅಂಚಾದ್ ಮಾಯೆದ ಬಡುತ ಪೆಟ್ಟ್ ತಪ್ಪಾವೊಡಾಂ ಹಿರಿಯ ಪೆರಿಯಾಕ್ಲು ಪಾಡ್ದ್ ಕೊರ್ನ ಕಟ್ಟ್ ಕಟ್ಲೆಲೆನ್ ಒರ್ತೊಂದು ಬರೊಡು.