ತುಳು ಭಾವಗೀತೆ "ಕರಿದ್ ಪೋನಗ"

                        ತುಳು ಭಾವಗೀತೆ

                       *ಕರಿದ್ ಪೋನಗ*

 ತೊಟಿಲ್ ಡ್ ತೂಂಕಿನ ಬಾಲೆನ್ ಜೆಪುಡಯಿ,

ಚಟ್ಟೊಗು ಪುಗೆಲ್ ಕೊರಡೆಂಚ,

ಒರ್ಂಬ ತಿಂಗೊಲು ಬಂಜಿಡ್ ತುಂಬಿನ,

ಕರ್ಲ್ ದ ಕೊಡಿನ್ ಬುಡಡೆಂಚ,

ಪೇರ್ ನುಪ್ಪು ಕೊರಿನ ಬಾಯಿಗ್,

ಕಡೆಯರಿ ಪಾಡ್ ದ್ ಬರಡೆಂಚ,

ಪುದರ್ ಡ್ ಮೋಕೆಡ್ ಲೆತ್ತಿನ ಬಾಲೆನ್,

ಪುಣ ಪಂಡ್ ದ್ ಲೆಪ್ಪೊಡು ಎಂಚ.

ಉಂದು ಸರಿಯೇ ನಿಕ್ಕ್ ಓ ವಿಧಿಯೇ.

ಮಟೆಲ್ ಡ್ ಮಾನದ್ ತೊಟಿಲ್ ಡ್ ಜೆಪುಡದ್,

ಒಚ್ಚಿ ಸೊರೋ ಮದಪಡ್ ಎಂಚ,

ಕೈನ್ ಪತ್ ದ್ ನಡಪಯಿ ಬಾಲೆದ,

ಕೈನ್ ಬುಡುದು ಬರಡೆಂಚ,

ನುಪ್ಪುನು ಕೊರುದು ತಾಂಕಿನ ಬಾಲೆದ,

ಬಾಯಿಗ್ ನೀರ್ ಬುಡಡೆಂಚ.

ತುಡರ್ ನ್ ದೀದ್ ಸುಗಿತ್ ನ ಬಾಲೆದ,

ತರೆ ಕಾರ್ ದಡೆ ತುಡರಾಂಡೇ,

ಕಣ್ಣ್ ಬುಲಾದ್ ಲೋಕೊನು ತೂಯಿನ,

ಕಣ್ಣ್ ಡೆ ಜೂವ ಪೋತ್ಂಡೇ,

ತೊಟ್ಟಿಲ ಬೆದ್ ರ್ ದ ಒಚ್ಚಿದ ತೆಲಿಕೆ,

ಚಟ್ಟದ ಬೆದ್ ರ್ ಡ್ ಬುಲಿಪಾಂಡೇ.

ಪಟ್ಟ ಪರಕೆಡ್ ಕೊಡಿತ್ ನ ಜೀವ,

ಕರ್ಲ್ ನ್ ಕಡಿತ್ ದ್ ಬೈದ್ಂಡ್,

ಕೈಕೆಕ್ಕ್ ನವು ಬಾಯಿಗ್ ಬನ್ನಗ,

ಇಲ್ಲಗ್ ತೆಡಿಲೇ ಹಾಕ್ಂಡ್,

ಎಂಕ್ಲೆನ್ ತುಂಬುದು ಕೊನೊಡಯಿ ಬಾಲೆನ್,

ಎಂಕುಲು ತುಂಬುನ ಗತಿಯಾಂಡೆ,

ಕಾಪುಲೆ ದೇವೆರೆ ಪಗೆಮನಿಯಾಂಡಲ,

ಇಂಚಿನ ಸಿಗ್ ಸೆ ಕೊರಂದೆ.

ಕವಿ-ಕೆ.ಮಹೇಂದ್ರ ನಾಥ್ ಸಾಲೆತ್ತೂರು.

-ಕಾವ್ಯಸುತ-