ಕಾಪೆಲ್-ತುಳು ಭಾವಗೀತೆ

                            ತುಳು ಭಾವಗೀತೆ    

                                    *ಕಾಪೆಲ್* 

ಯಾನ್ ಇತ್ತೆ ಬರ್ ಪೆ ಪಂಡ್ದ್ ,

ಬೆರಿನ್  ಪಾಡ್ದ್ ಪೋಯಿನಾರ್,

ಏತೊ ಕಾಲ ಕರಿದ್ ಪೋಂಡು,

ದಾಯೆ ತೋಜ್ಜರ್.

ಪಿದಯಿ ಮಾತ ಕೇನ್ವೆರ್ಂದ್,

ಜೋಕುಲೆನಡ ಕೆನ್ವೆರಿರೆನ್,

ದಾದ ಪನೊಡು ಅಕ್ ಲೆಗ್ಯಾನ್,

ಎನ್ನ ದೇವೆರೆ,

ಕಣ್ಣ್ ಎಕ್ಕುನಾತ್ ತೂಯೆ,

ನನಲ ತೋಜ್ಜರೇ.

ಎನ್ನ ಅಪ್ಪೆ ಅಮ್ಮೆ ಎನನ್,

ನಂಬುದಿರೆನ ಕೈಕ್ ಪಾಡ್ದ್,

ನಿಚ್ಚಯೊದ ದಿನೊಟು ಸುರುಕು,

ಮೋನೆ ತೂಯಿನ.

ಇಲ್ಲ ಜಾಲ ದೊಂಪದಡಿಟ್,

ದೇಸೆ ಮದಿಪು ಕುಟುಮ ನಡುಟು,

ಧಾರೆಯೇರ್ದ್ ಕರಿಯಣಿನ್,

ಈರ್ ಕಟ್ಟಿನ,

ಎಡ್ಡೆ ಏಳ್ಯೊ ಗಳಿಗೆನ್ಯಾನ್,

ಎಂಚ ಮದಪೆನ.

ಪೊರ್ಲು ಎಂಕ್ ಬಯಕೆ ಪಾಡಿ,

ದಿನೊನು ಎಂಚ ಮದಪಡ್ಯಾನ್,

ಯಾನ್ ಅಮ್ಮೆ ಆವೊಂದುಲ್ಲೆ,

ಕೊಸಿಟ್ ತೆಲಿತರ್.

ಎನ್ನ ಅಪ್ಪೆ ಇಲ್ಲಗ್ಂದ್,

ಪಿದಡ್ ನಗ ಇರೆನ ಮೋನೆ,

ಕಂತ ಪಾಡ್ದ್ ಉಂತಿನಿರೆನ್,

ತೂಯೆ ಬೇಜರ್,

ಕಣ್ಣ್ ಆಂಜುನೇಟ ಈರ್,

ಎನನ್ ತೂಯರ್.

ತೊಟಿಲ್ ಪಾಡ್ದ್ ಬಾಲೆನವೆಟ್,

ಜೆಪುಡದೀರ್ ಎನ್ನ ಮೋನೆ,

ಪೊರ್ಲು ಪೊಲಿಕೆ ಪೊಲಿ ಪೊಲ್ಸು,

ತೊಟಿಲ್ ನೊಚ್ಚಿನ.

ಏತ್ ಮೋಕೆ ಬಾಲೆಲೆಡ,

ಏತ್ ಮೋಕೆ ಕುಟುಮ ಮಿತ್ತ್,

ಸಂಸಾರ ಸರ್ ಕೆಗೀರ್,

ಬೆಂದ್ ಸೊಂದರ್,

ಕಾತ್ ಕುಲ್ದು ಸೋತು ಪೋಯ,

ದಾನೆ ತೋಜ್ಜರ್.

ಈರೆ ಎನ್ನ ಸರ್ವ ಪಂಡ್ದ್,

ನಂಬುದಿರೆನ ಪಿರವು ಬತ್ತೆ,

ಎನ್ನ ಉಸುಲು ಕಡಿಯುನೇಟ,

ಈರ್ ಬೋಡುಯೇ.

ಪಾಪ ಜೋಕುಲಿರ್ ಲ್ ಪಗೆಲ್,

ಕನೊಟು ಇರೆನ್ ಕಲಂಬರುವ,

ಏರೆ ಬರಡ್ ಈರೆ ಪಂಡ್ದ್,

ಸಾದಿ ತೂಪಯೇ,

ಈರ್ ದಾಂತೆ ನಮ್ಮ ಬದ್ ಕ್ ಗರ್ಥ ಇಜ್ಜಿಯೇ,

ಎಕ್ಕಂದೆಲ್ ಡ್ ಸೋತ್ ಪೋಯ,

ಬರ್ಪರೆಪಯೇ.

ಕವಿ-

ಕೆ.ಮಹೇಂದ್ರ ನಾಥ್ ಸಾಲೆತ್ತೂರು.

-ಕಾವ್ಯಸುತ-

ಕೃಪೆ-ಪೂವರಿ ತುಳು ಪತ್ರಿಕೆ