ತುಳುನಾಡ ಬೀರ ಪರಂಪರೆದ ಪೊಣ್ಣುಲೆ ಸಿರಿಕುಲು , ಉಲ್ಲಾಲ್ದಿಳು , ಮಾಸ್ತಿಲು . ಒಂಜಿ ವ್ಯವಸ್ಥೆನ್ ಪ್ರಶ್ನೆ ಮಲ್ತಿ ಮೊಕ್ಲು ಗೆಂದ್ ದಾ ಸೋತದಾ ಕಾಯ ಬುಡುದು ಮಾಯ ಸೇರ್ನಕುಲು . ಇನಿ ಮೊಕ್ಲೆಡ್ ಸಿರಿ ಪೊಂಜನಕ್ಲೆಗ್ ವಸಾಯೊಡು ಮೆಯ್ಟ್ ಬರ್ಪಲ್ . ಪಿಂಗಾರ ಪುರ್ಪ ಅಗತ್ಯ . ಉಲ್ಲಾಲ್ದಿ ಬೊಕ್ಕ ಮಾಸ್ತಿನಕ್ಳು ಆಂಜನಕ್ಲೆಗ್ ವಸಾಯೊಡು ಬರ್ಪುನಿ . ಸಿರಿ ಆರಾಧನೆಡ್ ಕುಮಾರೆ ಆಂಜನಕ್ಲೆ ಮೇಲ್ಡ್ ವಸಾಯಾಪುನಿ .
ವೈಷ್ಣವ ಧರ್ಮ ತುಳುನಾಡ್ಗ್ ಬರ್ಪುನ ದುಂಬು ತುಳು ನಾಡ್ ಡ್ ಶೈವ ಧರ್ಮ ಪ್ರಭಲ ಆದ್ ಇತ್ತಂಡ್ . ಅಂಚಾದ್ ಸಿರಿ ಆರಾಧನೆ ಬಾರೀ ಪಿರಾಕ್ದವುಂಡು ಪನೊಲಿ . ವೈದಿಕ ಆಚರಣೆ ತುಳುನಾಡನ್ ಪ್ರವೇಶ ಮಲ್ಪುನ ದುಂಬು ಮೂಲು ಸತಿ ಸಹಗಮನ ಪದ್ಧತಿ ಇತ್ತಂಡ್ . ಅಂಚಾದ್ ಅವ್ಲವ್ಲು ಮಾಸ್ತಿ ಕಲ್ಲುಲು ಉದಿತ . ಪುರುಷ ಪ್ರಧಾನ ವ್ಯವಸ್ಥೆನ್ ಪ್ರಶ್ನೆ ಮಲ್ತಿನ ಮುಕಾಂಬಿ , ಉಲ್ಲಾಲ್ದಿ , ಸಿರಿ ಪೂರಾ ಆರಾಧನೆ ಗೆತೊನೊಂದುಲ್ಲೆರ್ . ಉಲ್ಲಾಲ್ದಿನ್ ಕೆಲವು ತಿಕ್ಡ್ ಪೊಂಜನಕ್ಲೆಗ್ ತೂವೆರೆ ಅವಕಾಶ ಇಜ್ಜಂದಿಲೆಕ ಪುರುಷ ಪ್ರಧಾನ ವ್ಯವಸ್ಥೆ ಮಲ್ತ್ ದಂಡ್ . ಆಂಡ ಸಿರಿ ಮಾತ್ರ ಕಂಡನಿಯರ್ದ್ ಹಿಂಸೆ ಅನುಬವಿಪುನ ಬಡಪೊತ್ತುಡು ಉಪ್ಪುನ ಪೊಂಜನಕ್ಲೆ ಮಿತ್ತ್ ಬರ್ಪಲ್ . ಈ ರೀತಿಡ್ ಪೊಂಜನಕ್ಲೆನ್ ಗೇಲಿ ಮಲ್ಪುನ ಚಿಂತನೆಲ ಇತ್ತದುಪ್ಪೆರೆ ಯಾವು . ಆಂಡಲಾ ಆರಾಧನೆ ತುಳುನಾಡ್ಡ್ ನಡತೊಂದೆ ಉಂಡು .
ಸಿರಿ ಆರಾಧನೆರ್ದ್ ಪಿರಾಕ್ದವು ದೈವಾರಾಧನೆ .ಶಕ್ತಿ ಆರಾಧನೆದ ಶಾಕ್ತೇಯೆರ್ ದೈವೊಲೆನ್ ದೇವಿನ ಅವತಾರ ಪಂಡೆರ್ . ಶೈವೆರ್ ಶಿವನ ಗಣ ಪಂಡೆರ್ . ಅವೆರ್ದ್ ಬೊಕ್ಕ ಬತ್ತಿನ ವೈಷ್ಣವೆರ್ ವಿಷ್ಣುನ ಅವತಾರ ಪಂಡೆರ್ . ಆಂಡ ದೇವೆರೆಗ್ ವಿರುದ್ದವಾದ್ ಉಪ್ಪುನವು ದೈವಾರಾಧನೆ . ದೇವೆರೆರ್ದ್ ದುಂಬು ತುಳುನಾಡ್ ಡ್ ದೈವಾರಾಧನೆ ಇತ್ತಂಡ್ . ಆಂಡ ಮಾಸ್ತಿಲೆಗ್ ಸಿರಿಕುಲೆಗ್ ವಾ ಪಂಗಡದಕುಲ್ಲಾ ದೇವೆರೆ ಕಥೆ ಸೇರ್ಸಾದ್ಜೆರ್ .
ಮೂಲು ತೋಜುನ ಅಜಕಾಯಿ ಕಲ್ಲದ ತಿರ್ತ್ ಕೈಮುಗಿದ್ ಕುಲ್ಲುದುನ ಪೊಣ್ಣನ ಕೆತ್ತನೆ ಸಿರಿನ ಕ್ಷೇತ್ರದ ಪೆರ್ಮೆನ್ ದೆರ್ತ್ ತೋಜಾವುಂಡು . ಮಿತ್ತ ಸೂರ್ಯ ಚಂದ್ರೆರೆ ಕೆತ್ತನೆ ನಿನ್ನ ಕೀರ್ತಿ ಸೂರ್ಯ ಚಂದ್ರೆರ್ ಉಪ್ಪುನಡೆಮುಟ್ಟ ಉಪ್ಪಡ್ ಪನ್ಪಿನೆನ್ ತೇರಿಪಾವುಂಡು . ಅಜಕಾಯಿ ಕಲ್ಲ್ನ್ ಅಯ್ಯಂಗಾಯಿ ಕಲ್ಲ್ನ್ಡ್ ಪನ್ಪೆರ್ . ಶಕುನ ಕಲ್ಲಂದ್ ಲ ಪನ್ಪರ್ . ಈ ಕಲ್ಲ್ದ ಮಿತ್ತ್ ದುಂಬು ಬರವಿತ್ತುದುಪ್ಪು .ಆವು ದೊಂಬು ಬರ್ಸೊಗು ತರೆದ್ ಪೋದಿಪ್ಪು .
ತುಳುನಾಡ್ಡ್ ಸಂಸಾರೊಡು ಆಂಜನಕ್ಲ್ ಪೊಂಜನಕ್ಲೆಗ್ ಸಿಕ್ಕಾಪಟ್ಟೆ ಹಾಕ್ನಗ ಆಲ್ ಮಿನಿ ಮೈಪು ಸೂಡಿ ದೆರ್ತ್ ಪತ್ ಯಲ್ಡ ಮೋಲೆಗ್ ದಾನೆ ಸಿರಿ ಬತ್ತ್ನಿ ಪಂಡ್ ದ್ ಮನಿಪಂದೆ ಕುಲ್ವೆರ್ . ಮೂಲು ಸಿರಿನ ಆತ್ಮ ಸ್ಥೈರ್ಯ ಪೊಂಜನಕ್ಲೆಗ್ ಒಂಜಿ ತಾದಿ ತುಡರಾತುಂಡು .
ಸಿರಿ ಆರಾಧನೆಡ್ ಬರ್ಪಿನ ಪಾತ್ರೊಲು ಇಸೇಸವಾದುಂಡು .ಮೂಲು ಬರ್ಪಿನ ಬಾಲೆ ಕುಮಾರೆ ವ್ಯವಸ್ಥೆನ್ ಆರ್ಥ ಮಲ್ತೊನ್ನೆಟ್ ಬಾಲಿಶ ಬುದ್ಧಿದ ಬಾಲೆಯಾದ್ ತೋಜಿಬೆ .
ಅಜ್ಜೆರೆ ನಿರೇಲ್ಡ್ ಬುಳೆವುನ ಸಿರಿ ಬೆಮ್ಮೆರೆ ಪುರ್ಸಾದ ಆದಿಪ್ಪುವಲ್ . ಆಂಡ ಮದಿಮೆಡ್ ಆನನ ಕುರ್ತೇಲ್ ಬುದ್ದಿ ಅಲೆಗ್ ತೆರಿದ್ ಪೋಪುಂಡು . ಇಂಚಿನ ಕಂಡನಿಯೇ ಬೋಡ್ಚಿನ್ಡ್ ಸಿರಿ ನಿಚ್ಚಯ ಮಲ್ತೊನ್ವಲ್ .
ಸಾದಿಡೆ ಪೋನಗ ಆಲ್ ಬೋಡಾಯ್ನಾತ್ ಹಿಂಸೆ ಅನುಭವಿಸುವಲ್ . ಆಂಡ ಬೆಮ್ಮೆರೆ ದಯೆ ಅಲೆಗುಪ್ಪುಂಡು . ಅಂಚ ಪೋಪಿನ ಸಿರಿ ಕಾಡ ತೋಡ ಬರಿಟ್ ಅಮರ್ ಜೋಕ್ಲೆಗ್ ಜನ್ಮ ಕೊರ್ಪಲ್. ಅವೆರ್ದ್ ಬೊಕ್ಕ ಮಾಯಕಾಪಾಲ್ .
ಸಿರಿನವು ಒಂಜಿ ದುರಂತ ಕತೆ ಪಂಡಲ ತಪ್ಪಾವಂದ್ . ದಾಯೆ ಪಂಡ ಅಲೆ ಸಂತಾನದ ಸೊನ್ನೆ ಗಿಂಡೆ ಆದಿಪ್ಪು , ಅಬ್ಬಗ ದಾರಗ ಆದಿಪ್ಪು ಮೊಕ್ಲೆನ ಕತೆಟ್ಲ ಮಾಯಕದ ಕತೆನೇ ತೋಜುಂಡು . ಅಪ್ಪೆ ದಾಂತಿ ಜೋಕ್ಲೆ ಬೇನೆ ತೆರಿಯುಂಡು .
ಚೆನ್ನೆ ಮಣೆ ತ ಗೊಬ್ಬುಡು ಮೆಗ್ ದಿ ಪಲಿನ ದುರಂತ ತೂನಗ ಪುರುಷ ಪ್ರಧಾನ ವ್ಯವಸ್ಥೆನ್ ಎದುರ್ಸಾಯಿನ ಇಡೀ ಕುಟುಮ ದುರಂತದ ತಾದಿಗ್ ಸನ್ದನೆನ್ ತೂವೊಲಿ .
ಅಳಿಯ ಕಟ್ಟ್ದ ಸಿರಿ ಒಂಜಿ ಪೊಣ್ಣು ಅತ್ತ್ .ಆಲೊಂಜಿ ಶಕ್ತಿ ಪಂಡ ತಪ್ಪಾವಂದ್ . ಅಲೆನ ಇಡೀ ಪಾರ್ದನೊನು ವಿವೇಕ ರೈಕುಲ್ನ ಮುತಾಲಿಕೆಡ್ ಉಜಿರೆದ ಗೋಪಾಲ ನಾಯ್ಕೆರ್ ಪಂಡ್ದ್ ಜರ್ಮನಿದ ಲಾರಿ ಹಾಂಕೊ ಸಂಶೋದನೆಗಾದ್ ಪುಗಾರ್ತೆ ಪಡೆತೆರ್
ಸಿರಿ ಆರಾಧನೆಡ್ ಸಿರಿ ಬೊಕ್ಕ ಕುಮಾರಗ್ ಕೊಡಿಮರತಡಿಟ್ ವಸಾಯ . ಒರಿನ ಸಿರಿಕುಮಾರಗ್ ಕೊಡಿಯಡಿ ಇಜ್ಜಿನ್ದ ಜನಮಾನಿ ಸಭೆತ ನಡುಟೆ ವಸಾಯ ನಡಪುಂಡು . ಎಳ್ವೆರ್ ಸಿರಿಕುಲೆಗ್ ಒಂಜೊಂಜಿ ತುಂಡು ಮಲ್ಲಿಗೆಯಾಂಡಲ ದೀವೊಡು .
ಸಿರಿ ದರಿಪುನ ಹೆಚ್ಚಿನ ಪೊಂಜನಕ್ಲ್ ಒವ್ವಾಣ್ದಲ ಬೇನೆ ಬೇಸರ್ಡ್ ಉಪ್ಪುವೆರ್ . ಅಕ್ಲೆಗ್ ಈ ಜಾಗೆ ಮನಸ್ಗ್ ಒಂತೆ ಉಲ್ಲಾಸ ಕೊರ್ಪುನ್ದುಗೆ .
ಸಪ್ತ ಮಾತೃಕೆನಕುಲು-
ಬ್ರಾಹ್ಮೀ,
ವೈಷ್ಣವಿ,
ಮಾಹೇಶ್ವರೀ,
ಇಂದ್ರಾಣಿ,
ವಾರಾಹಿ,
ಕೌಮಾರಿ
ಚಾಮುಂಡಿ.
ಸಿರಿಕುಲ್ನ ಆರಾದನೆಡ್ ಎಳ್ವೆರ್ ಸಿರಿಕುಲ್ನ ಇಚಾರ ಬರ್ಪುಂಡು.ಸತ್ಯನಾ ಪುರೊನು ಸತ್ಯಮಾ ಲೋಕಂದ್ ಪನ್ಪೆರ್.
ಬೆರ್ಮೆರ್ ಉಂಡು ಮಲ್ತಿ ಸಿರಿಕುಲು.
ಬೆಮ್ಮೆರ್ ಸುರುಕಾದ್ ದಾರುನು ಉಂಡು ಮಲ್ತೆರ್.ಮೋಲು ಬೊಕ್ಕ ಪುಟ್ಟಿನ ಸಿರಿಕ್ ಚಾಕಿರಿಗ್ ಉಂತುವಲ್.ಬೆಮ್ಮೆರ್ ಉಂಡು ಮಲ್ತಿ ಎಳ್ವೆರ್ ಸಿರಿಕುಲು ತುಲುವರ್.ತುಳುನಾಡ ಸಿರಿಕುಲುಂದೇ ಪನ್ಪುನಿ.
1.ದಾರು
2.ಸಿರಿ-ಸಿರಿಕುಲೆಗ್ ಜಾತಿಲೆದ ಬಂದನ ಇಜ್ಜಿ.ದಾಯೆ ಪಂಡ ಆಲ್ ಅಪ್ಪೆ ಬಂಜಿಡ್ ಪುಟ್ಟಿನಾಲತ್ತ್.
3.ಸೊನ್ನೆ-ಪ್ರಾಯ ಪೋಂಡಲ ಪೊಂಜೊವಾಪುಜಲ್
4.ಗಿಂಡೆ,-ಸೊನ್ನೆ ಸುಂದರಿ ಪನ್ಪುನಾರ್ನ ಮಗಲ್
5.ಅಬ್ಬಗ.6.ದಾರಗ
7.ಸಾಮು-ಸಾಮುನ ಕಂಡನಿಯಗ್ ರಡ್ಡನೆ ಬೊಡೆದಿಯಾದ್ ಸಿರಿ.
ದಾರುನು ಸಿರಿ ಮಾಯ ಮಲ್ತ್ ದ್ ದೈವ ಮಲ್ಪುವಲ್.ದಾರುನು ತೆನ್ಕಾಯಿಡ್ ಜಾಲ ಕೊರತಿಯಾದ್,ಬಡಕಾಯಿಡ್ ಜಾಲ ಬೈಕಾಡ್ತಿಯಾದ್ ಆರಾದನೆ ಮಲ್ಪುವೆರ್..
ಬೆಮ್ಮೆರ್ನ ಒಟ್ಟುಗು ಉದಿತಿ ಎಳ್ವೆರ್ ಸಿರಿಕುಲು.ಆದಿ ಸತ್ಯಮಾನಂದ ಲೋಕದ ಸಿರಿಕುಲು
1.ಮೈಯಗ
2.ಮೈಸಗ
3.ದಾರಗ
4.ಗಣಪಗ
5.ಉಮ್ಮಗ
6.ಜಾನಗ
7.ಜನಪಗ
ತುಳುನಾಡ ಅರಾದನೆಲು ಮೂಲ ಜನಾಂಗೊಲೆರ್ದ್ ಉದಿತ್ ನೆರ್ದಾವರ ಪುದರ್ದ ಕಡೆಕ್ ಗ ಸವ್ದ ಮೂಲು ಸೇರೊಂದುಂಡು.ಉದಾರ್ಮೆಗ್ ಮೈಸಲೆನ್ ಮೈಸಗಂದ್ ಪನ್ಪುನಿ.ಪೋಪುನಿ-ಪೋಪುನಗ,ಬರ್ಪುನಿ-ಬರ್ಪುನಗ ಇಂಚ.ಮೂಲು ಬರ್ಪಿ ಗಣಪ,ವೀರಬದ್ರ(ಕೆಲವೆರ್ ಬೈರವಂದ್ ಲ ಪನ್ಪೆರ್),ಸ್ಕಂದ ಮೊಕ್ಲು ಕುಮಾರನ ಒರುವಾ ತೆರಿಯೊಂದಿಜ್ಜಿ.ತುಳುನಾಡ ದೇಲ್ಯೊಲೆನ ಅಂಗಣೊಡಿಪ್ಪಿ ಸಪ್ತ ಮಾತೃಕೆನಕುಲು ದುಂಬು ದೇವೆರಾದಿಜ್ಜಾಂಡ್.ಸರಿಯಾಯಿನ ರುಪಲ ಇಜ್ಜಾಂಡ್.ಮರತ ಮುದೆಲ್ಡ್ ಕಲ್ಲ್ ಪಾಡ್ದ್ ಗಣೊಕುಲುಂದು ನಂಬೊಂತೆರ್.ನಮ್ಮ ದೇಸೊಡು ಈ ಏಳ್ ಜನ ಅಪ್ಪೆಡಿಕುಲುಂದು ಆರಾದನೆ ಇತ್ತ್ಂಡ್.ಸಿರಿಕುಲ್ನೆಟ್ಲ ಎಳುವೆರ್ ಸಿರಿಕುಲು ಬರ್ಪೆರ್.ಸಪ್ತ ಮಾತೃಕೆನಕ್ಲೆಡ್ ಏಳ್ ಜನ ಅಪ್ಪೆಲ್ಲು ಬರ್ಪೆರ್
https://www.youtube.com/watch?v=gclpyJcpxsk
ಮಾಯಿತಿ , ಚಿತ್ರ :-
ಕೆ.ಮಹೇಂದ್ರನಾಥ್. ಸಾಲೆತ್ತೂರ್ .
No comments:
Post a Comment