ಜೀಟಿಗೆ /ದೀವಟಿಗೆ /ತೂಟೆ /ಸೂಟೆ- jeetige/deevatige/soote/thoote

             ಜೀಟಿಗೆ /ದೀವಟಿಗೆ /ತೂಟೆ /ಸೂಟೆ  

 
          ಜೀಟಿಗೆ ಮಾನಾದಿಗೆ ಪಡೆವೊನುನಿ  ರಾಜನ್ ದೈವೊಲೆ ಕಲೊಟು .ಕೆಲವೊಂಜಿ ಭೂತೊಲೆಗ್ಲ ಜೀಟಿಗೆ  ಉಂಡು . ಆಂಡ ಉಳ್ಳಾಲ್ದಿನ ಜೀಟಿಗೆ ಒಂತೆ ಬೇತೆ ರೀತಿದವು ಬೊಳ್ಳಿದ ಕೈಕೋಲು ಜೀಟಿಗೆಡ್ ನುಂಗೆಲ್ ಮಡಲ್  ತುರಿದುಪ್ವೆರ್. ಅಂಚನೆ ಜುಮಾದಿ ,ಬಂಟೆ ,ಮಲರಾಯೆ ,ಕೊಡಮಂದಾಯೆ ,ಕುರಿಯಾಡಿದಾಯೆ ಇಂಚ ಮಾತಾ ದೈವೊಲುಲಾ ಜೀಟಿಗೆ ಪತ್ತ್ ದ್ ಅಭಯ ಕೊರ್ಪ.

ಆ ದೈವದ ಗುತ್ತು ಬರ್ಕೆ ಬೊಕ್ಕ ಆ ಸಾನೊಗು ಸಮ್ಮಂದ ಪಟ್ಟ್ ನಕ್ಲೆಗ್ ಮಾತ್ರ ದೈವ ಪಂಚ ಜೀಟಿಗೆ ದೆರ್ಪುನಿ.ಒರಿನಂಚ ಏತ್ ಮಲ್ಲ ಜನ ಬತ್ತ್ಂಡಲ ಪಂಚ ಜೀಟಿಗೆ ದೆರ್ಪುನ ಕ್ರಮ ಇಜ್ಜಿ.ಜೀಟಿಗೆಗ್ ಸುತ್ತುನ ಕುಂಟು ಕರಿದ್ ಪೋಯ್ನಕ್ಲೆನ ಮೇಲ್ ಗ್ ಪಾಡುನ ಕುಂಟು ಆದಿಪ್ಪುಂಡು.ದಲ್ಯದ ಪಂಡ ಬೊಲ್ದು ಕುಂಟು ಮಣೆ ಮಂಚ,ಉಜ್ಜಾಲ್,ಮುಂಡ್ಯೆಗ್ ಪಾಡುನ ಅದಿಕಾರ ಮಡ್ಯೆಲೆರೆಗ್.ಅಂಚನೆ ಜೀಟಿಗೆದ ಅಧಿಕಾರಲ ಅಕ್ಲೆಗೆ.ದೈವ ಅಕ್ಲೆ ಕೈತ ಜೀಟಿಗೆನ್ ಪತ್ತ್ ದ್ ಒಯ್ಪುನ ಕ್ರಮ ಇಜ್ಜಿ.ವಾ ಬೆರಣೆರ್ ಬರ್ಪುನೆರ್ದ್ ದುಂಬು ಮಡ್ಯೆಲೆರೆ ಉಜೆ ಭಸ್ಮದ ಸುದ್ದನೇ ಪ್ರದಾನ.ಅಳಿಯ ಕಟ್ಟ್ ದ ಚಾಕಿರಿದ ಪರೋಯಿತೆರ್ಲ ಮೊಕುಲೆ.ಅಂಚನೇ ದೈವೊದ ಚಾಕಿರಿ ಸುರಾದ್ ಪಿರಿಯುನೆಟ ಜೀಟಿಗೆದಕುಲು ಮೆಯ್ ನೀರ್ ಮೈಪೆರೆಲ ಪೋಪುಜೆರ್.ಜೀಟಿಗೆಗ್ ಮೈಪುನ ಗುಜ್ಜನೆಡ್ ತಾರಾಯಿದ ಎಣ್ಣೆನ್ ದಿಂಜಾದ್ ದೀದುಪ್ಪುವೆರ್.

ಪಂಜುರ್ಲಿ,ಗುಳಿಗಗ್  ಮಾತ್ರ ಮಡಲ್ದ ತೂಟೆ ಉಪ್ಪುಂಡು. ಮಂತ್ರಜಾವದೆಗ್ ಬಾರೆದ ಬಂಬೆಡ್ ಕಟ್ಟಿನ ಜೀಟಿಗೆ ಉಪ್ಪುಂಡು.ಇನಿ ಅಡೆ ಪಂಚ ಜೀಟಿಗೆಲ ಬೈದ್ಂಡ್.ವಾ ವಾ ದೈವೊಲೆಗ್ ವಾ ವಾ ಜೀಟಿಗೆ ಪತ್ತೊಡುಂದು ಹಿರಿಯಾಕ್ಲ್ ಮಲ್ತ್ ಕೊರ್ನ ಕಟ್ಟ್ ಲೆನ್ ನಮ ಪೊಳಿತೊಂದುಲ್ಲ.ಅಂಚ ತಪ್ಪು ಮಲ್ತೊಂದು ಪೋಂಡ ನಮಕ್ ದೋಷ.

 ಕಣಂದೂರು ಕೂಟಾಜೆದ ಉಲ್ಲಾಲ್ದಿನ ಕೈಟ್ ರಡ್ಡ್ ಜೀಟಿಗೆಲಿತ್ತ್ ದ್ ಪ್ರತಿ ವರ್ಸದ ಜೀಟಿಗೆದ ಮಡಲ್ದ ಕಟ್ಟ್ ನ್ ಅಟ್ಟೊಡು ದೀಪೆರ್.ಪದ್ರಾಡ್ ವರ್ಸ ಆನಗ 24 ಮಡಲ್ದ ಕಟ್ಟ್ ಆಪುಂಡು .ಅವೆನ್ ದೈವದ ಕೈಟ್ ಕೊರ್ದು ಧರ್ಮ ನೇಮ ನಡಪಾವೆರ್. ಜೀಟಿಗೆ ಪತ್ತುನೆಟ್ಲ ದುಂಬು ಅಜಲಾತಿಗೆ ಇತ್ತ್ಂಡ್.ಇತ್ತೆ ಅವು ಮಯಕಾತ್ಂಡ್.ಕಾಸ್ ಕೊರ್ಂಡ ಅಂಗಡಿಲೆಡ್ ಪೊಸ ಜೀಟಿಗೆ ತಿಕ್ಕುಂಡು..ಜೀಟಿಗೆ ಪತ್ತುನಕುಲು ಕಲಸ ನೀರ್ ಮೀದೇ ಜೀಟಿಕೆಗ್ ಕೈ ಕೊರೊಂತೆರ್.

ಜೀಟಿಗೆದ್  ಮುಖ್ಯವಾದ್  ೩ ನಮುನೆದ ಜೀಟಿಗೆಲುಲ್ಲ .
೧. ಅಂಗೈ ಜೀಟಿಗೆ
೨. ಕೋಲು ಜೀಟಿಗೆ
೩.ಪಂಚ ಜೀಟಿಗೆ

       ಪಂಚ ಜೀಟಿಗೆ ಪಂಚ ಬೂತೊಲೆಗ್ ಸಾಕ್ಸಿಯಾದ್,ಕಟ್ಟುನಕುಲೆ ಪಂಚೇಂದ್ರಿಯೊಗು ಸಾಕ್ಸಿಯಾದ್ ಇತ್ತ್ಂಡ್.ಜೀಟಿಗೆ ಪತ್ತುನಕುಲೆಗ್ ನಿರ್ದಿಷ್ಟ ಗಡುಂದು ಇತ್ತ್ ದ್ ಅಕ್ಲ್ ಪೋಯಿನಾತ್ ದೂರ ಮಾತ್ರ ಅಕ್ಲೆನ ಒಟ್ಟುಗು ದೈವ ಪೋವೊಂತ್ಂಡ್.ಇನಿ ದೈವೊಲೆಗ್ ಕಟ್ಟುನಕುಲು ಜೀಟಿಗೆದಕ್ಲೆನ್ ಒಯ್ತೊಂದು ಪೋವೊಂದುಲ್ಲೆರ್.ಪಂಚ ಜೀಟಿಗೆನ್ ಪೊಂಜನಕ್ಲೆಗ್ ದೆರ್ಪುನ ಕೆರಮ ಇಜ್ಜಾಂಡ್.

                         

                   ಅಂಗೈ ಜೀಟಿಗೆ -ಉಂದೆನ್ ಹೆಚ್ಚಿಗೆ ಉಲ್ಲಾಕ್ಳೆಗ್ ,ದಯ್ಯೊಂಗುಳೆಗ್  ಉಪಯೋಗ ಮಲ್ಪುವೆರ್.

  ಇನಿ ಕೆಲವೊಂಜಿ ಮುಕ್ಕಾಲ್ದಿನಕುಲು ಜೀಟಿಗೆ ( ಒಂಟಿ ಜೀಟಿಗೆ) ಇಜ್ಜಂದೆ ಪಂಜುರ್ಲಿಗ್ ದರ್ಶನ ಮಲ್ತೊಂದುಲ್ಲೆರ್.ಸಂಪ್ರದಾಯವಾದಿಲು ಪಂಡ ಮೂಲ ಸಾಂಪ್ರದಾಯಿಕ ಕಟ್ಟ್ ಕಟ್ಲೆ ತೆರಿನ ಮುಕ್ಕಾಲ್ದಿನಕುಲು ಇನಿಕ್ಲಾ ಪಂಜುರ್ಲಿಗ್ ದರಿಪುನಗ ಜೀಟಿಗೆ ಪತ್ತ್ ದೇ ದರಿಪುನಿ.ದೈವದ ಕಲೊಟು ಅಮುರ್ತ ದೀಪಿ ಪೂಜಾರ್ಲೆಕ,ಚರ್ವ ದೀಪಿ ಮೂಲ್ಯೆರ್ಲೆಕ ಜೀಟಿಗೆ ಪತ್ತುನ ಮಡ್ಯೆಲೆರ್ನ ಚಾಕಿರಿಲ ಅಗತ್ಯ ಆದುಂಡು.ಆಂಡ ಕೆಲವು ಮುಕ್ಕಾಲ್ದಿನಕುಲು ಇತ್ತೆ ಜೀಟಿಗೆ ಪತ್ತಂದೆ ವಸಾಯೊಗುಂತ್ವೆರ್.ಆಂಡ ವಾಕ್ ದೋಸ ಪಿರಿಪೆರೆ ಉಪ್ಪುನಗ ಜೀಟಿಗೆ ಪತ್ವೆರ್.ಅಪಗ ಪಂಜುರ್ಲಿ ಬೇತೆ,ವಾಕ್ ಪಿರಿಪುನ ಪಂಜುರ್ಲಿ ಬೇತೆಗನಾ?.ಪಂಜುರ್ಲಿ ಪಂಜುರ್ಲಿಯೇ ಅತ್ತೇ.ಇಂಚ ಜೀಟಿಗೆ ಪತ್ತಂದೆ ವಸಾಯೊಗುಂತುನವು ಸರಿಯತ್ತ್.ಪುಟ್ಟುನೆಕ್ ಸೈಪುನೆಕ್ ಪೂರ ಮಡ್ಯೆಲೆರ್ ಬೋಡು,ದೈವದ ಪ್ರದಾನ ಚಾಕಿರಿದ ಬಾಗ ಆದಿತ್ತ್ ನ ಜೀಟಿಗೆ ಪತ್ತುನ ಮಡ್ಯೆಲೆರೆನ್ ಮುಕ್ಕಾಲ್ದಿನಕುಲು ದೈವದ ಕಲೊಕು ಲೆತೊಂದು ಬರಂದಿನವು ಸರಿಯತ್ತ್.ದೈವದ ಕಲೊಟು ದಲ್ಯಂತ ಮಾನ್ಯೆರ್ ಪಂಡ ಕಲ ಸುದ್ದ ಮಲ್ಪುನ ಮಡ್ಯೆಲೆರಿಜ್ಜಂದೆ ದೈವ ಚಾಕಿರಿ ಪರಿಪೂರ್ಣ ಆಪುಜಿ.ನಿಜವಾದ್ ಅಗ್ಗಿದಾವಾರ ದೈವಾರಾದನೆಡ್ ಪ್ರಧಾನ ಆದುಂಡು.ಅಗ್ಗಿ ಪತ್ತಂದೆ ದೈವದ ಸತ್ಯ ಮಾತ್ಮೆದ ಪದಿನಾಜಿ ಕಲೆ ಪರಿಪೂರ್ಣ ಆಪುಜಿ.

    

      ಪಂಚ ಜೀಟಿಗೆ -ರಾಜನ್ದೈವೊಲೆಗ್ ,ಭೂತೊಲೆಗ್.

         ಮಡ್ಯೆಲೆರೆಗೆಂದೇ ಇತ್ತ್ ನ ಜೀಟಿಗೆನ್ ಇನಿ ಬೇತೆ ಜಾತಿದಕುಲ್ಲಾ ಪತ್ತೊಂದುಲ್ಲೆರ್.ಪದಿನಾಜಿ ಚಾಕಿರಿ ವರ್ಗದಕ್ಲೆಗ್ ಇತ್ತ್ ನ ಪದಿನಾಜಿ ಚಾಕಿರಿ ಇನಿ ಬೇತೆ ಬೇತೆಕ್ಲೆನ ಪಾಲಾವೊಂದುಂಡು.ಪರತ್ ನ್ ನಿಗಿಪಡ ಪೊಸತ್ ನ್ ತೋಡಡ ಪನ್ಪಿ ದೈವದ ಪಾತೆರೊನೆ ದಂಟ್ ಲೆಕಾಂಡಗ. ಜೀಟಿಗೆನ್ ದೈವದ ಅಗ್ನಿ ಬಲಂದೇ ಪನ್ಪುನಿ.ಅಂಚಾದ್ ಮುಕ್ಕಾಲ್ದಿನಕ್ಲ್ ವಸಾಯದ ಪೊರ್ತುಗು ಜೀಟಿಗೆನ್ ಪತ್ವೆರ್.ಜೀಟಿಗೆನ್ ಪತ್ತಂದೆ ಮೈಲೆ ಮಾನೆಚ್ಚಿ,ಮಾನೆಚ್ಚಿ ಪರಿಪೂರ್ಣ ಆಪುಜಿ.ಜೀಟಿಗೆ ಪತ್ತುನೆಟ್ ದೈವದ ನಿಲೆ,ಕಲೆ ಕಾರ್ನಿಕ ನೆಗತ್ ತೋಜುಂಡು.ಓಲಾ ಜೀಟಿಗೆ ಪತ್ತೆರೆ ಬಚ್ಚೆಲಿಪ್ಪುನ ಮುಕ್ಕಾಲ್ದಿಲು,ಜೀಟಿಗೆದ ಬಿಲೆ ತೆರಿಯಂದಿನ ಮುಕ್ಕಾಲ್ದಿಲು,ಜೀಟಿಗೆದಕ್ಲೆಗ್ ಪಣವು ಕೊರ್ಪುನೆನ್ ತನ್ನ ಕಿಸೆಕ್ ಪಾಡೊನೊಲಿ ಪನ್ಪುನ ಮುಕ್ಕಾಲ್ದಿಲು ಜೀಟಿಗೆದಕ್ಲೆನ್ ಲೆಪ್ಪುಜೆರ ದಾನ್ನ.ಆಂಡ ದೈವದ ಪದಿನಾಜಿ ಕಲೆ,ಪದಿನಾಜಿ ಅಬತಾರ,ಪದಿನಾಜಿ ವಸಾಯದ ಬಗೆಟ್ ತೆರಿನ ಮುಕ್ಕಾಲ್ದಿಲು ಜೀಟಿಗೆ ಪತ್ತಂದೆ ಪಂಜುರ್ಲಿನ ಮಾನೆಚ್ಚಿಗುಂತಾಯೆರ್.ಅಂಚನೆ ವಾ ವಾ ಜಿಟಿಗೆನ್ ವಾ ವಾ ಸಂದರ್ಬೊಡು ವಾ ದೈವೊಗು ಎಂಚ ಪತ್ತೊಡು,ಏರ್ ಮಾತ್ರ ಪತ್ತೊಡು ಪನ್ಪುನೆನ್ ಇನಿ ಮದತ್ ದೆರ್.
                                                     

                              ಕೋಲು ಜೀಟಿಗೆ .

    ಕೆಲವು ದೈವೊಲೆಗ್ ರಡ್ ರಡ್ ಕೋಲು ಜೀಟಿಗೆ ಪತೊನುನಕ್ಳು ಉಪ್ವೆರ್ .ಉದಾರ್ಮೆ-ಪಂಜುರ್ಲಿ ,ಕಲ್ಲುರ್ಟಿ  ಇನ್ಚಿಪ್ಪಿ ಭೂತೊಲು. ಜೀಟಿಗೆಲೆಗ್ ಎಣ್ಣೆ ಪಾಡುನ ಸಾಧನದ ಪುದರ್ ಗುಜ್ಜನೆ /ಗುಜ್ಜಣಿ
ತೂಟೆ :-
ಗುಳಿಗ,ಪಂಜುರ್ಲಿ ದೈವೊಗು ತೂಟೆ ಇಷ್ಟ
                                             

               ಗುಳಿಗನ ಕೈಟ್ ನುಂಗೆಲ್ ಮಡಲ್ದ ತೂಟೆ
                                           

                             ಉಳ್ಳಾಲ್ದಿ ನ ಕೈತ ಜೀಟಿಗೆ

      ಬೊಳ್ಳಿದಣಿತ ಮಲಾರ್ ಮಲರಾಯ ದೈವದೆದುರು ಕೋಲು ಜೀಟಿಗೆ ಬೊಕ್ಕ ಪಂಚ ಜೀಟಿಗೆ
                                       

      ಕಲ್ಲುರ್ಟಿನ ಕೈಟ್ ಕೋಲು ಜೀಟಿಗೆ ,ಪಂಜುರ್ಲಿನ ಕೈಟ್ ಮಡಲ್ದ ತೂಟೆ 

 ದೈವದ ಜೀಟಿಗೆದ ಮಹತ್ವ ದಾದ ಪಂಡ ದೈವ ಅಗ್ನಿ ಸಾಕ್ಷಿಯಾದ್  ಪಾತೆರುನಿ,ಅಪ್ಪಣೆ,ನುಡಿ ಕೊರ್ಪುನಿ.ದುಂಬುದ ಕಾಲೊಡು ಬೊಲ್ಪುದ ವ್ಯವಸ್ಥೆ ಇಜ್ಜಂದಿ ಕಾಲೊಡ್ಲ ದೈವ ಜೀಡಿಗೆದ ಬೊಲ್ಪುಡು ನುಡಿ ಕೊರೊಂತ್ಂಡ್.ಕೆಲವೊಂಜಿ ತಿಕ್ ಡ್ ದೈವದ ಜೀಟಿಗೆದ ಬಿಲೆ ತೆರಿಯಂದಿ ಇಲ್ಲದಕುಲ್ಲ,ಕಟ್ಟುನಕುಲ್ಲ ಜೀಟಿಗೆ ದಾಂತೆ ದರ್ಸನೊಗುಂತುನಲ ಉಂಡು.ಅಣ್ಣಪ್ಪ ಪಂಜುರ್ಲಿಗ್ ಜೀಟಿಗೆ ಕೊರಂದೆ ದರ್ಸನ ಮಲ್ಪುನ ಪುಣ್ಯಾತ್ಮೆರ್ಲ ಉಲ್ಲೆರ್.ಓಡೆಮುಟ್ಟ ಪಂಡ ಪಂಜುರ್ಲಿಗ್ ದರ್ಸನೊಗು ಜೀಟಿಗೆ ಬೊಡ್ಚಿಗೆ,ವಾಕ್ ಇತ್ತ್ಂಡ ಮಾತ್ರ ಜೀಟಿಗೆ ಬೋಡುಗೆ,ತೀರ್ಮಾನೊಗು ಜೀಟಿಗೆ ಬೊಡ್ಚಿಗೆ.ದಾದ ಮಲ್ತೊಂದುಲ್ಲೆರ್ಂದೇ ಅರ್ಥ ಆಪುಜಿ.

  

                              ಪಂಚ ಜೀಟಿಗೆ

 ಮದಿಮೆ ಆವಂದಿನಕುಲು ಪಂಚ ಜೀಟಿಗೆ ಪತ್ತೆರೆ ಬಲ್ಲಿ. ಕುಟುಂಬದ ಕಲ್ಲುರ್ಟಿ ಪಂಜುರ್ಲಿ ನ್ ಇಲ್ಲ್ ದ ಉಲಯಿ ಮದನ ಕೈ ಪಲಯಿ,ಮಣೆಟ್ ನಂಬುನವು ದುಂಬುದ ಕ್ರಮ.ಅಂಚ ಇಲ್ಲ್ ದ ಸಂಕಲ್ಪ ಇತ್ತ್ಂಡನೇ ಅಲ್ಪ ಮುಡಿಪು ಕಟ್ಟೆರೆ ಸಾದ್ಯ, ಪದಿನಾಜೆಕ್ ಬಲಸುನೆಕ್ ಪೂರ ಅರ್ಥ ಬರ್ಪುಂಡು. ಕಲ್ಲ್ ಪಾಡ್ದ್ ನಂಬುನಗ ಅವು ಇಲ್ಲ ಪಿದಯಿದ ಸ್ಥಾನ ಸಂಕಲ್ಪನೇ ಆಪುಂಡು. ಪಂಜುರ್ಲಿ ನ ಬಲತ ಮರ್ಗಿಲ್ ಡ್ ಕಲ್ಲುರ್ಟಿ ನ್ ಕುಲ್ಲಾವುನವು ಕ್ರಮ.ಕುಟುಂಬದ ರಾವುಗು ಸ್ಥಿರವಾದ್ ಕಲ್ಲ್ ಪಾಡುನ ಕ್ರಮಲಾ ದುಂಬು ಇಜ್ಜಾಂಡ್.ಪ್ರತೀ ಆರಾಧನೆನ್ ಲಾ ದುಂಬುದ ಕ್ರಮಪ್ರಕಾರ ಮಲ್ತೊಂದು ಪೋಪುನವು ಇತ್ತೆದಕ್ಲೆಗ್  ಮಲ್ಲ ಸವಾಲಾದುಂಡು.ಅಂಚನೆ ಇನಿ ಕೆಲವೆರ್ ಎಂಕ್ ಅ ದೈವೊಗು ಎಣ್ಣೆಯಾತ್ಂಡ್,ಈ ದೈವೊಗು ಎಣ್ಣೆ ಆತ್ಂಡ್ಂದ್ ಮಾನೆಚ್ಚಿಗ್ ಉಂತುವೆರ್.ಆತಾಂಡಲ ಬೇಜಾರಿಜ್ಜಾಂಡ್.ಒಂಜಿ ದೈವೊಗು ಎಣ್ಣೆ ಪತ್ತ್ ದ್ ಮೂಜಿ ನಾಲ್ ದೈವದ ಮಾನೆಚ್ಚಿಲ್ ಗ್ ಉಂತುನವು ದೈವೊಲೆನ ಕಟ್ಲೆಗ್ ಮಲ್ಪುನ ಅಪಚಾರ.ದೈವದ ಕೊಡಿಯಡಿತ ಎಣ್ಣೆ ವೀಳ್ಯಲ ಎಣ್ಣೆ ಬೂಲ್ಯ ಆತ್ಂಡ್.