ಗುಳಿಗ ದೈವದ ಮೂಲದ ಆರಾದನಾ ಕೆರಮ

ಗುಳಿಗ ದೈವದ ಮೂಲದ ಆರಾದನಾ ಕೆರಮ

   ಗುಳಿಗಗ್ ಮೋನೆಡ್ ಉಚ್ಚುದ ಒರು ಬುಡ್ಪಯೆರೆ ಬಲ್ಲಿ

            ತುಳುನಾಡ್ ಡ್ ಬಾರ್ಯಾತ್ ವರ್ಸೊರ್ದು ದುಂಬೇ ಗುಳಿಗನ ಆರಾದನೆ ನಡತೊಂದಿತ್ತ್ ದ್ ಗುಳಿಗನ ಬನತ ಬರಿಟೇ ಗಡುವಾಡಿ ಜಾಗೆಡೇ ಗುಳಿಗಗ್ ಕೋಲ ನಡತೊಂತ್ಂಡ್.ಕೋಲ ಮಾತ್ರ ಬಾರೀ ಅಪ್ರೂಪ ಆದಿತ್ತ್ಂಡ್.ಇನಿತಲೆಕ ಮೋನೆಗ್ ಬಣ್ಣ ಪಾಡುನಾವಡ್,ಕೋರಿ ಅಗ್ಯುನಾವಡ್,ಪಲ್ಟಿ ಹಾಕುನ,ಅಬತಾರ ಕಟ್ಟ್ ದ್ ಇಲ್ಲದಕ್ಲೆಗ್ ನಿಲೆನೇ ಇಜ್ಜಂದಿಲೆಕ ಮಲ್ಪುನ ಕೆರಮನೇ ಇಜ್ಜಾಂಡ್.ಗುಡಿ ಗುಂಡ ಸಾನ ಕಟ್ಟ್ ದ್ ಗುಳಿಗನ್ ನಂಬುನ ಕಟ್ಟೇ ಇಜ್ಜಾಂಡ್.ಗುಳಿಗಗ್ ಬನನೇ ಇತ್ತ್ ನಿ.ಗಡುಪಾಡಿ ಜಾಗೆದ ಬನತ ಬರಿತ ಜಾಗೆನ್ ಒತ್ತರೆ ಮಲ್ತ್ ದ್,ಜಾಗೆನ್ ಕೆರೆತ್ ದ್ ಅಂಬಿ ಅಡಿತ್ ದ್ ಗುಳಿಗಗ್ ಕೋಲ ಕೊರ್ದು ಊರುದ ಮಾರಿ ಗಿಡೆತೊಂತೆರ್.ಇನಿತಲೆಕ ತಿಕ್ ನೌಲು ಪೂರ ಗುಳಿಗೆ ಊರು ಬುಡ್ದು ಬಲಿಪುನ ಕೆರಮ ಇಜ್ಜಾಂಡ್.ಇನಿ ತಿಕ್ ನೌಲು ಪೂರ ಗುಳಿಗನ್ ಕೊನೊದು ನಿಜವಾಯಿನ ಗುಳಿಗಗ್ ಪೂ ನೀರ್ ಇಜ್ಜಂದಿಲೆಕಾಂಡ್.ಇನಿ ಗುಳಿಗನ್ ಪತ್ತ್ ದ್ ದೀಯೆರೆಂದ್ ತುಳುವೆರೆ ಸೈನ್ಯ ಬೋಡಾಪುಂಡು.ಮೋನೆಗ್ ಮಜಿ ಪೂಜಿದ್ ಸುಣ್ಣದ ಬೊಟ್ಟು ಪಾಡ್ದ್ ತಿರಿ ಕಟ್ಟ್ ದ್ ಗುಳಿಗಗ್ ಕೋಲ ನಡತೊಂತ್ಂಡ್.ಒಂಜಿ ಊರುಡು ಗಡುಪಾಡಿ ಜಾಗೆಡ್ ಒಂಜೇ ತಿಕ್ ಡ್ ಎಚ್ಚಾದ್ ಕೋಲ ನಡತೊಂತ್ಂಡ ಕೆಲವೊರ ರಡ್ಡ್ ತಿಕ್ ಡ್ ಕೋಲ ನಡತೊಂತ್ಂಡ್.ಇನಿತಲೆಕ ಕುಟುಮದಿಲ್ಲಲ್,ಇಲ್ಲಿಲ್ಲಲ್ ಪೂರ ಗುಳಿಗನ ಕೋಲ ನಡತೊಂದಿಜ್ಜಾಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿಗ್ ನೇಮ ನಡತೊಂತ್ಂಡ್ ವಿನಃ ಗುಳಿಗನ್ ನಂಬುನ ಕೆರಮ ಇಜ್ಜಾಂಡ್.ಏಪ ಅಷ್ಟಮಂಗಲ ಪ್ರಶ್ನೆ,ತಾಂಬೂಲ ಪ್ರಶ್ನೆಲು ಬತ್ತನ ಇಲ್ಲಲ್ ನಾಲ್ ಜನ ಇತ್ತ್ಂಡ ಪದಿನಾಲ್ ದೈವೊಲೆನ್ ನಂಬುಲೆಕಾಂಡ್.ಕಟ್ಟೆರೆ ಬತ್ತ್ ನಕುಲ್ಲ ನೇಮೊಡು ಪೊಸ ಪೊಸ ದೈವೊಲುಂಡುಂದು ಕುಟುಮೊಡ  ನಂಬಾಯೆರೆ ಸುರು ಮಲ್ಪಾಯೆರ್. ಗುಳಿಗೆ ಇಡಿಡಿ ಕೋರಿ ಅಗ್ಯುನ ಬುಡ್ಲೇ ನೆತ್ತೆರ್ ಬಿಂದುನು ಸಮೇತ ಬಾಯಿಗ್ ಪಾಡ್ರೆ ಇಜ್ಜಾಂಡ್.ಗುಳಿಗಗ್ಂದ್ ಕಟ್ಟ್ ಕಟ್ಟಲೆದಂದ್ ಒಂಜಿ ಕೋರಿ ಮಾತ್ರ ಗಲಸೊಂತೆರ್.ಗುಳಿಗಗ್ ಕೋಲ ರಾತ್ರೆ ಪದ್ರಾಡ್ ಗಂಟೆರ್ದ್ ಬೊಕ್ಕನೇ ನಡತೊಂತ್ ನಿ.ಗಡಿ ಪಾಡ್ನ ಜಾಗೆಡ್ ಗುಳಿಗೆ ಲಕ್ಕ್ಂಡ್ ಪಂಡ ಊರ್ದ ಮಾರಿನ್ ದೇರ್ದ್ ಬರೊಡುಂದು ಲೆಕ್ಕ.ಆಯೆ ಗಡು ಪಾಡಿ ಜಾಗೆಡ್ ಉಪ್ಪುನಾಯೆ.ಬೈಲ ಮಾರಿಡ್ಲ ಊರ್ದ ಮಾರಿನ್ ಗಿಡೆಪುನ ಕೆರಮ ಉಂಡು .ಗುಳಿಗನ ಬನೊಟು ಗುಳಿಗನ ಕಲ್ಲ್ ಗ್ ಕುರ್ದಿ ನೀರ್ ಪಾಡ್ದ್ ,ತುಡರ್ ದೀದ್ ಗುಳಿಗನ ಕೊಡಿಯಡಿಟ್ ಬಲಿಕ್ ಕೋರಿನ್ ಕೊಯ್ದ್ ನೆತ್ತೆರ್ ನ್ ಬಲಿಕ್ ಜಪುಡಾವೊಂತೆರ್.ಪತ್ತ್ ಪದಿನೈನ್ ವರ್ಸೊರ್ದಿಂಚ ಕೋರಿನ್ ಅಗ್ಯುನ‌ ಗುಳಿಗನಕುಲು‌ ತೂಯೆರೆ ತಿಕ್ಕೊಂದುಲ್ಲೆರ್.ಇನಿ ಪೂರಾ ಕಟ್ಲೆಲೆನ್ ನಮ ಪುಡತೊಂದುಲ್ಲ .ಇನಿತಲೆಕ ಅಜ್ಜೊಗೊಂಜಿ ತಿಕ್ ಡ್ ಗುಳಿಗ ಕೋಲ ನಡತೊಂದಿಜ್ಜಾಂಡ್.ಪತ್ತಿರ್ವತ್ತೈನ್ ವರ್ಸೊರ್ದಿಂಚಿ ಗುಳಿಗನ್ ಇಲ್ಲಿಲ್ಲಲ್ ನಂಬೆರೆ ಸುರು ಮಲ್ತೆರ್..ಇನಿ ಕೇನುನಕುಲ್ಲಾ ಇಜ್ಜಿ,ಪನ್ಪುನಕುಲ್ಲಾ ಇಜ್ಜಿಂದಾದ್ ತಾನ್ ಬೀಜುನ ತಂದೇಲೇ ಸರಿಂದ್(ತಂದೆಲ್ ಪಂಡ ಸುತಾಲ ಗೀಸ್ ನ ಸೋಂಟೆ,ಉರುಂಟುದ ದಪ್ಪದ ಕೋಲು,ದಂಟೆ,ತೋರದ ಬೆತ್ತ.ಕಲಸೆದ ಕೋಲುರ್ದು ತಂದೆಲ್ ಒಂತೆ ಉದ್ದ)ಬೀಜೊಂದುಲ್ಲೆರ್.ಇನಿ ಗುಳಿಗನ ಕೋಲ ಮಿತಿ ಮೀರ್ನ ಅಬ್ಬರ ಆದ್ ಪೋಂಡ್.ಗುಳಿಗೆ ತುಳುನಾಡೊರ್ಮೆ ನೆಗತ್ ತೋಜಿದ್ ನಿ ವಿನಃ ಗುಳಿಗನ್ ಪತ್ತ್ ದ್ ದೀನಕುಲಿಜ್ಜೆರ್."ಸ್ವಾಮೀ ಗುಳಿಗ ದೈವ ಕಾತ್ ರಕ್ಷಣೆ ಮಲ್ಪುಲ "ಪನ್ನೌಲು ಆಯೆ ನೆಗತ್ ತೋಜಿದೆ                        

                           ರಾವು ಗುಳಿಗೆ
                                         

                    ಗುಳಿಗನ ಬೊಳ್ಳಿ ದಿಟ್ಟಿದ ಪರಕೆ
                                                     

                           ಜಾಗೆದ ಗುಳಿಗೆ

  
                                           ಗುಳಿಗಗ್ ಬನೊಟು ಕಟ್ಟುಂಡು.ಗುಳಿಗನ ಬನಂದ್ ಉಂಡು.ರಡ್ಡೆಕ್ ಒಂಜೇ ಕಟ್ಟೆ ಕಟ್ಟ್ ದ್  ಮಲ್ಪುನ ಕಟ್ಟಿಜ್ಜಿ.ರಾವು ಬೇತೆನೆ,ಗುಳಿಗೆ ಬೇತೆನೆ.ಅನುಕೂಲ ಶಾಸ್ತ್ರ,ನಮಡ ದುಡ್ಡಿತ್ತ್ ನೆನ್ ಹಾಳ್  ಮಲ್ಪೆರೆ ಒಂಜಿ ಸಾದಿ ಇಂಚ ಪೂರ ಕಟ್ಟೆ ಕಟ್ಟುನವು.ಚರ ಸಗ್ತಿನ್ ಚರ  ಕಲ್ಲ್ ಡ್ ನಂಬಿ ಬೊಕ್ಕ ಆ ಕಲ್ಲ್ ನ್ ದೆತ್ತ್ ದ್ ಬೇತೆ ಕೋಡಿಡ್ ದೀವೊಲಿ.ಬೋಡಾನಗ ಕುಡ ಸುದ್ದ ಮಲ್ತ್ ದ್ ದೈವೊನು ಆ ಕಲ್ಲ್ ಡ್ ಉಂಡು ಮಲ್ಪೊಲಿ.ಒಂಜಿ‌ ವೇಳೆ ಗುಳಿಗಗ್ ಬನಂದ್ ಇತ್ತ್ಂಡ ಮಾತ್ರ ಸ್ಥಿರ.ಕಲ್ಲ್ ಪಾಡ್ದ್ ನಂಬುಂಡ ಚರ.ಬನ ಇಜ್ಜಿಂದಾಂಡ ಚರನೆ.ಹಿರಿಯಾಕ್ಲ್ ಚರ ಕಲ್ಲ್ ಡ್ ಅವೆನ್ ಆರಾದನೆ ಮಲ್ತ್ ದ್ ಅವೆತ ಸಾದಿನ್ ತೊಜಪಾದೆರ್.ಕೋಲೊಡು ಗುಳಿಗೆ ನಿಜವಾದ್ ಬಲಿಪೆರೆ ಇಜ್ಜಿ.ಕಲ ಬುಡ್ದು ಪೋಯೆರೆ ಇಜ್ಜಿ,ಕಲ ಬುಡ್ದು ಬಂಡಿ ಪೋಯೆರೆ ಇಜ್ಜಿ. ಪತ್ತುನಕುಲು ಉಲ್ಲೆರ್ಂದ್ ಗುಳಿಗೆ ಬಲಿಪುನಿ.ಚೋರ್ನ ಒಯ್ಪುನಿ,ಶಾಮಿಯಾನ ಕುಂಟು ಪರಿಪುನಿ ಇಂಚ ಪೂರ ಇಜ್ಜಿ.ಅಂಚ ಬಲಿಪುನಗ ಸಾನಾದಿಗೆ ಬೂರ್ದು ಪೊತ್ತ್ಂಡ ಏರ್ ಜಬದಾರಿ?.ಮರಕ್ ಬಡ್ತೆರೆ ಇಜ್ಜಿ.ಆಯೆ ಬಲಿಪುನಗ ಜೋಕ್ಲು ಬಾಲೆಲು,ಪಿರಯದಕುಲು ಅಡಿಕ್ ಬೂರ್ದು ಗಾಯ ಆಂಡ ಜಬದಾರಿ ಏರ್?.ಕೋರಿನ್ ಬಿಚ್ಚಾದ್ ತಿನ್ರೆ ಇಜ್ಜಿ.ಪ್ರಾಣಿ ದಯಾ ಸಂಘದಕ್ಲ್ ದೂರು ಕೊರ್ಂಡ ತೊಂದರೆ ಆವು.ಗುಳಿಗೆ ಬಲಿಪುನಗ ಪತೊನ್ರೆಂದ್ 25 ಜನೊಕುಲೆಬ್ ಕಾಸ್ ಕೊರ್ದು ದೀಪುನ ಪರಿಸ್ಥಿತಿ ಬೈದ್ಂಡ್.ಗುಳಿಗಗ್ ಕಟ್ಟುನಾಯೆ ಕಲೊಟು ಪಂರ್ದ್ ನ್ ಪೊರಿಕ್ ಪುರ್ಂಚಿದ್,ಕುರಿ ನೀರ್ಡ್,ಬೊಂಡ ನೀರ್ಡ್ ಮೊರೆತ್ದ್  ತಿಂದೊಂದು ಪೊರಿತ ಉಂಡೆ ಮಲ್ತ್ ದ್ ದಕ್ಕುನವು ತಪ್ಪು.ಕಟ್ಟುನಕುಲು ದೈವ ಕಣ್ಣಾರೆ ತೂದು ಗಾಳ್ಯಾರ ಪೋಪುನೆನ್ ಮದತ್ ದೆರ್ ತೋಜುಂಡು   

                  ಕೊರತಿನೊಟ್ಟುಗು ಗುಳಿಗೆ

                             

                            ಚಾವುಂಡಿ ಗುಳಿಗೆ
          

                     ಗುಳಿಗ ದೈವದ ಗಗ್ಗರದೆಚ್ವಿ

  ನಿಜವಾದ್ ಗುಳಿಗೆ ದೈವ ಕಾರ್ ಗ್ ಗಗ್ರ ದೀಪುನ ದುಂಬು ನಂಬಿ ಸಂಸಾರಡ ಅನು ದೆತೊನುನಿ.ಅವೆನ್ ಬುಡ್ದು ಇನಿ ಗುಳಿಗಗ್ ಕಟ್ಟುನಕುಲು ಗಗ್ಗರೊನು ಸುತಾಲ ಬೀಜುನ,ಗಗ್ಗರೊಡು ತಿಗಲೆಗ್ ಹಾಕೊನುನ,ತರೆಕ್ ಹಾಕೊನುನ ಅಬತಾರ ಮಲ್ತೊಂದುಲ್ಲೆರ್.
                                           

            ಸೊಂಟೊಗು ತಿರಿ ತುತ್ತಿ ಗುಳಿಗ ದೈವ

ದುಂಬುದ ಕಾಲೊಡು ಗುಳಿಗನ ಮೋನೆಡ್ ಉಚ್ಚುದ ಜಿಡೆ ಬುಡ್ಪಾವೊಂದಿಜ್ಜಾಂಡ್.ಮೋನೆಗ್ ಇತ್ತಗ ನ ಬಣ್ಣ ಪಾಡುನ,ಇತ್ತ್ ನ ಗೀಟ್ ಒಯ್ಪುನ,ಇತ್ತ್ ನ ಚಿತ್ರ ಬುಡ್ಪಾವುನ ಕ್ರಮ ದುಂಬಿಜ್ಜಾಂಡ್.ಇನಿ ಅವೆನ್ ಪೂರ ಮಲ್ಪುನವು ತಪ್ಪು.ಮೋನೆಗ್ ಕಪ್ಪು ಪೂಜಿದ್ ಸುಣ್ಣದ ಬೊಟ್ಟ ಪಾಡ್ಂಡ ಅವೆನ್ ಗುಳಿಗೆಂದ್ ನಂಬೊಂತೆರ್.ಮಂತ್ರ ಜಾವದೆಗ್ಲ,ಕಲ್ಲುರ್ಟಿಗ್ಲಾ ಇಂಚನೆ ಮೋನೆಗ್ ಕಪ್ಪು ಬಣ್ಣ ಪೂಜಿದ್ ಬೊಲ್ದು ಸುಣ್ಣದ ಬೊಟ್ಟು ದೀವೊಂತೆರ್.ಕಾಲ ಬದಲಾಯಿಲೆಕ ಕಟ್ಟುಲು ಬದಲಾಯ.ಮೂಲ ನಂಬೊಳಿಗೆ ಪೊಳಿಂಡ್
                                              

                         ಗುಳಿಗನ ತೂಟೆ.

ಮೂಲದ ಆರಾದನೆ ಪ್ರಕಾರ ಊರುಗು ಬರ್ಪುನ ಮಾರಿ ದೇರೆರೆ ಗಡುಪಾಡಿ ಜಾಗೆಗ್ ದಕ್ಜುನ ಮಡಲ್ದ ತೂಟೆ

                                           

       ಗುಳಿಗೆ ಕೋರಿದ ಕೋಂಕ ನಾಲಿದ ನೆತ್ತೆರೊಯ್ಪುನಿ
                                                       

                     ಗುಳಿಗನ ಬಾರ್ನೆ

     ಗುಳಿಗನ ಬಾರ್ನೆ:-

ಒಂಜಿ ತೋಪುಡು ಕುರ್ದಿ ನೀರ್ ದೀದಿತ್ತ್ ದ್ ಗುಳಿಗನ ಕಲೊಟು ಕಟ್ಟುನಾರ್ ಅವೆನ್ ಪರೆರೆ ಬಟ್ಟಲ್ ನ್ ಗಲಸುವೆರ್.ಗುಳಿಗಗ್ ಬೊಳಂತರಿತ ಬಲ್ಚಟ್/ರೊಟ್ಟಿ ಮಲ್ತ್ ದ್ ತಿನೆರೆ ಕೊರ್ಪುನ ಕೆರಮ ಉಂಡು.ತಿನ್ಪುನ ತೆನಸಗ ನ್ ಕೆಲವು ಕಟ್ಟುನಕುಲು ತರೆಟ್ ದೀದ್ ಅಬತಾರ ಕಟ್ಟುನಲ ಉಂಡು.ಪಜ್ಜಿ ಕೋರಿ ಅಗಿನಗ ಅವೆತ ಪುರಲ್ ಗಾದ್ ಅಪಗಪಗ ತಡ್ಪೆಡ್ ಪಾಡ್ದ್ ದೀನ ಪೆರೆದ್ ದೀನ ಬೆಲ್ಲ,ತಾರಾಯಿದ ಪೂ ಪೊರಿ,ಪಂರ್ದ್ ನ್ ಕುರ್ದಿದೊಟ್ಟುಗು ಪುರ್ಂಚಿದ್ ಮುಕ್ಕುವೆರ್,ಕುರ್ದಿ ನೀರ್ ಪರ್ಪೆರ್.ಕೆಲವೆರ್ ಪಂರ್ದ್ ಪೊರಿ ಪುರ್ಂಚಿದ್ ಉಂಡೆ ಮಲ್ತ್ ದ್ ದಕ್ಕುನಲ ಉಂಡು.ಕಲಿ ಗಂಗರ ಬಿರಾದ್ ಪೊರಿ ಪಂರ್ಂದ್ ದ ಉಂಡೆ ಮಲ್ತ್ ದ್ ಲ ಮುಕ್ವೆರ್.ಕೆತ್ತ್ ದ್ ದೀನ ಬೊಂಡೊನ್ಲ ಅಪಗಪಗ ಪರ್ಪೆರ್..ಕೋರಿನ್ ಕೋಂಕನಾಲಿಡ್ ಪತ್ ದ್ ತುಚ್ಚಿದ್ ನೆತ್ತೆರೊಯ್ತೆರ್ಡ ಕೆಲವೆರ್ ನೆತ್ತೆರೊಯ್ಪುನ ದುಂಬು ಅವೆತ ಕೈ ಕಾರ್ ನ್ ಪಗಿಪುವೆರ್.ಉಂದು ಮಾಪು ಕೊರಂದಿನಂಚಿ ತಪ್ಪು.

                                           

                        ಗುಳಿಗೆ ಬಾರ್ನೆ ಪೋಪುನಿ
                                                 

                      ಗುಳಿಗನ ಕೈಟ್ ತಿರ್ಸೂಲ

                                 ದುಂಬುದ ಕಾಲೊಡು ಗುಳಿಗನ ಕೋಲೊಡು ಕೈಟ್ ಕೊರೊಂತುನ ಆಯುಧ ಅರಿತ ಮುಡಿ ಕಟ್ಟ್ ನಗ ಗಲಸುನ ಕೊದಂಟಿ.ಕೊರಗ ತನಿಯನ ಕೈಟ್ ಇತ್ತ್ ನಿ ರಾಜ ದಂಡದ ಒರುತ  ನೆಕ್ಕಿದ ಬೆತ್ತ.ದುಂಬು ಗುಳಿಗನ್ ಗುಡ್ಡೆಡ್ ತಾತ್ಕಾಲಿಕವಾದ್ ಕಲ್ಲ್ ಪಾಡ್ದ್ ನಂಬೊಂದು ಅವ್ಲು ದಾಲ ದೀವೊಂದಿಜ್ಜಾಂಡ್.ಅಂಚಾದ್ ತಾತ್ಕಾಲಿಕವಾದ್ ಮುಡಿ ಕಟ್ಟುನ ಕೊದಂಟಿನ್ ಗುಳಿಗನ ಕೈಟ್ ಕೊರೊಂತೆರ್.ಮಾಡ್ ಮಿನಿ ಇತ್ತ್ಂಡ ಕರ್ಬದ ಆಯುಧ/ತಿರ್ಸೂಲ ,ತಾರಿದ ತಂದೆಲ್ ದೀವೊಂತೆರ್.ತಾರಿದ ತಂದೆಲ್ದ ಕಡೆ ಕೊಡಿಕ್ ರಡ್ಡ್ ಜಾಗೆಗ್ ಬೊಳ್ಳಿದ ಕಟ್ಟ ಪಾಡ್ದ್ ದೀವೊಂತೆರ್.ತಂದೆಲ್ದ ನನೊಂಜಿ ಪುದರ್ ದಂಟೆ.ರಡ್ಡ್ ಕೈ ಬುಡ್ಪನಗಾಪುನಾತ್ ಉದ್ದದ ಪಂಡ ಒಂಜಿ ಮಾರ್ ಉದ್ದದ ದಂಟೆ.ಒಂಜಿ ಕೈಟ್ ಒರಿಯಗ್ ಆಯುಧ ಪತೊನ್ನಾತ್ ಉದ್ದದ ದಂಟೆನೆ ತಂದೆಲ್.ಇನಿ ತಿರ್ಸೂಲ ಕೊರ್ದು ಗುಳಿಗೇಶ್ವರೆ ಮಲ್ದೆರ್.ಗುಳಿಗಾಖ್ಯೆಂದ್ ಆಟೊಡು ರಕ್ಕಸೆ ಮಲ್ತೆರ್.ಗುಳಿಗಜ್ಜಂದ್ ನಡು ಬಲ ಇಜ್ಜಂದಿಲೆಕ ಮಲ್ತೆರ್. ಶನಿ ಬೊಕ್ಕ ನೀಲನ ಮಗೆ ಗುಳಿಗೆಂದ್ ಪುರಾಣ ಸೇರೊಂಡ್.ರಾವು ಕೇತುನು ರಾವು ಗುಳಿಗ ಪನೊಂದುಲ್ಲೆರ್.ಕೊದಂಟಿ ಆಟೊಡು ಬರ್ಪಿ ರಕ್ಕಸ ಏಸದ  ಆಯುಧ ಪಂಡೆರ್.ಗುಳಿಗಗಾವಡ್,ಕೊರಗ ತನಿಯಗಾವಡ್ ಕಾಯೆರ್ದ ದಂಟೆ ಮಲ್ಪೆರೆ ಬಲ್ಲಿ.ಕಾಯೆರ್ದ ಮರ ಬೂತೊಲೆಗೊಂತೆ ದೂರ.ಆಯುಧ ದಿಪುನ ವ್ಯವಸ್ಥೆ ಇತ್ತ್ಂಡ ದೈವ ಕೈಟ್ ಪತ್ತುನಂಚಿನ ಕರ್ಬದ ಗುದಿಗೆ ಮಲ್ತ್ ದ್ ದೀವೊಲಿ.ಇನಿ ಅನುಮಂತನ ಗದೆತಲೆಕ ಬೊಳ್ಳಿದ ಗದೆ ಗುಳಿಗಗ್ ಮಲ್ತೊಂದುಲ್ಲೆರ್.ಅವು ತಪ್ಪು.ಬಬ್ಬರ್ಯನ ಕೈಟ್ ಬೊಳ್ಳಿದ ಕೊದಂಟಿ ಉಪ್ಪುಂಡು.ತೂನಗ ಗದೆತಲೆಕ ಉಪ್ಪುನ ಅವೆನ್ ಮದಿಪುನಕುಲು ವಜ್ರಾಯುಧೊನು ಧಾರಣೆ ಮಲ್ತೊಂಡ ಪನ್ಪೆರ್.ಇತ್ತ್ನ ದೈವೊಲೆನ್ ದೇವೆರೆಗ್ ಓಲ್ಪಡಿ ಮಲ್ತಿ ಮದಿಪುದಕುಲು ಕಡೆಕ್ ಕೋರಿದ ಕಜಿಪುಲಬಲಸಿ ಅಗೆಲ್ ನ್ಲಾ ಗಟ್ಟಿಡೆ ಉಂಡುದು ಪೋಪೆರ್ .ಇಲ್ಲಲ್ ಕೋಲ ಮಲ್ಪವುನಕ್ಲೆಡ ಚಾಕಿರಿಗ್ ಜನ ಇಜ್ಜಿ.ಎಚ್ಚಾದ್ ಸಂಸಾರದಕ್ಲ್ ಪಿದಯೂರುಡು ಇತ್ತ್ ದ್ ವರ್ಸದ ಕೋಲದಪಗ ಬರ್ಪೆರ್.ಇಲ್ಲಲಿತ್ತಿ ಪ್ರಾಯದಕ್ಲೆಗ್ ಇಜ್ಜಾಂದಿ ಸಿರ್ಕ್ ಸಂಕಡೊರ್ದಾದ್ ದುಂಪೋಯೆರೆ ತೀರುಜಿ.ಅಂಚಾದ್ ಒರಿ ಕಟ್ಟುನಾಯಗ್ ಈತ್ ಕಾಸ್ ಗ್ಂದ್ ದೈವ ಚಾಕಿರಿ ಬುಡು ಕೊರ್ಪ.ಆಯೆ ದಾದ ಮಲ್ತ್ಂಡಲ ಅವ್ವೇ ಸರಿ.ನಮಲ ಕೋಲ ರೈಸ್ಂಡ್ ಪನ್ಪ.ಉಂಡಿ ದೆತೊನ್ನಾಯೆಲ ಸೋಕಾಂಡ್ ಪನ್ನಗ ನಂಕ್ ಕೊಸಿಯಾಂಡ್.   

       .       

    

   ಗುಳಿಗಗ್ ಬೊಳ್ಳಿದ ದಿಟ್ಟಿ

                                                          

        ಗುಳಿಗನ ಕೈಟ್ ರಾಸಿಗ್ ಗಂದ ಬೂಲ್ಯ ಪತ್ತುನಿ

      ಕಟ್ಟ್ ಲೆಡ್ ಪ್ರಾದೇಶಿಕವಾದ್ ಬಿನ್ನತೆಯುಂಡು.ಕೆಲವು ತಿಕ್ ಡ್ ಪತ್ತನಾಜೆಗ್,ಕೆಲವು ತಿಕ್ ಡ್ ಆಟಿ ಪುಟ್ಟುನ ಸಂಕ್ರಾಂದಿಗ್ ,ಕೆಲವು ತಿಕ್ ಡ್ ಒವ್ವಾಂಡಲ ಒಂಜಿ ಸಂಕ್ರಾಂದಿ ನಿಗಂಟ್ ಮಲ್ತ್ ದ್ ಮೂಜಂಜದ ಪೊರ್ತುಗು ಗುಳಿಗಗ್ ಕೋರಿ ಕೊಯ್ಪೆರ್.ಹೆಚ್ಚಾದ್ ಗುಳಿಗನ ಬನೊಟೇ ಕೊಯ್ಪೆರ್.ಪತ್ತನಾಜೆ,ಸಂಕ್ರಾಂದಿ ಗುಳಿಗಗ್ ಕೋರಿ ಕೊಯ್ಯೆರೆ ಗಡುವಾಡಿ ದಿನೊಕುಲು.ರಾವುಗು ಪತ್ತನಾಜೆರ್ದ್ ದುಂಬು ಕರಿಪುನ ಕಟ್ಟ್.ಪತ್ತನಾಜೆ ಕರಿಂಡ ದುಂಬಗಾವೊಡುಂದು ಲೆಕ್ಕ.ರಾವುನ ಒಂಜಿ ಆರಾದನೆ ಇತ್ತ್ಂಡಲ ಅವು ಆರಾದನೆಡ್ ಪ್ರಬಲವಾಯಿನ ಸ್ಥಾಮಾನ ಇತ್ತ್ ನ ಸಗ್ತಿ ಅತ್ತ್.ಅವು ದೈವತ್ವದ,/ಬೂತದ ಒಂಜಿ ಸಗ್ತಿ.ಇನಿ ರಾವು ಪಂಡ ಸರ್ಪೊನು‌ ಕಲ್ಪಿಸಾವೆರ್.ರಾವು ಸರ್ಪೆ ಅತ್ತೇ ಅತ್ತ್.ಬೂತೊಗು ಸಮ್ಮಂದಪಟ್ನ ಒಂಜಿ ಸಗ್ತಿ.ರಾವು ಪಂಡ ಆಕಾರ,ರೂಪ ಇಜ್ಜಂದಿನ  ಒಂಜಿ ಇಸೇಸ ಸಗ್ತಿ.

        

ಗುಳಿಗನ ಕೋಲೊಡು ಕಟ್ಟುನಾಯೆ ಪಜೆ ಮಡಿತ್ ದ್ದಕ್ಕುನ ಕೆರಮ ಇಜ್ಜಿ

ಇನಿ ಗುಳಿಗನ ಕಟ್ಟೆಡ್ ಕಡ್ಸಲೆನ್ ಸಿಮೆಂಟ್ ಡ್ ಚೂರು ಕೌಂತುದು ದೀದುಪ್ಪುವೆರ್.ನಿಜವಾದ್ ಉಂದು ತಪ್ಪು.

ಗುಳಿಗನ ಕೋಲೊಡು ಗುಳಿಗಡ ನಿನ್ನ ಅಮ್ಮೆ ಏರ್,ನಿನ್ನ ಅಪ್ಪೆ ಏರ್ಂದ್ ಕೇನೆರೆ ಸುರು ಮಲ್ದೆರ್.ಉಂದು ತಪ್ಪು.

ಕಲ್ಲುರ್ಟಿ ಪಂಜುರ್ಲಿ ಸಾನೊದ ಬಲತ ಬಾಗೊಡಿಪ್ಪೊಡಾಯಿನ ಗುಳಿಗನ್ ಸಾನದ ಎದುರು ಪಾಡ್ಯ.

ಇನಿ ಐನ್ ವರ್ಸೊಗೊರ ನಡಪುನ ನೇಮ ಪಂಚವಾರ್ಷಿಕ ನೇಮ ಆಂಡ್.

ಗುಳಿಗನ ಕೋಲೊಡು ಗುಳಿಗಗ್ ಕೋರಿ ಕೊರ್ನಗ ದೈವೊನು ಅಲೆಪಾವುನವು ತಪ್ಪು

ಗುಳಿಗೆ ಇಂಚ ಗಣೆಗಟ್ಟ ಏರ್ದ್ ಅಬತಾರ ಕಟ್ಟುನ ಕೆರಮ ಇಜ್ಜಿ.

ಗುಳಿಗಗ್ ಅಗೆಲ್ ಪಾಡುನ ಕೆರಮ(ಆಯಾ ಜಾಗೆದ ಕಟ್ಟ್ ಬೇತೆ ಬೇತೆ ಉಪ್ಪು):-

ಕುರ್ದಿ ಮಲ್ತ್ ದ್ ಸುರುಕು ಜಾಗೆಗ್ ತಲಿತ್ ದ್ ಜಾಗೆ ಸುದ್ದ ಮಲ್ತ್ ದ್ ಒಂಜಿ ಕೊಡಿರೆಟ್ ಉರ್ಪೆಲರಿ ಪಾಡ್ದ್ ಬೆಮ್ಮೆರೆ ಸುತ್ತೆ ದೀಪುನಿ.ಒಂಜಿ ಜುಟ್ಟು ದಾಂತಿ ತಾರಾಯಿ,ಐನ್ ಬಚ್ಚಿರೆ,ಒಂಜಿ ಬಜ್ಜೆಯಿ,ಚಿಲ್ಲರೆ ಪಣವು ಪಾಡೊಡು.ತುಡರ್  ದೀವೊಡು,ದೂಪ ಪತ್ತೊಡು,ಅಗೆಲ್ ಬಲಸುನ ದುಂಬುಲ ದೂಪ ಪತ್ತೊಡು,ಬಲಸಿ ಬೊಕ್ಕಲ ದೂಪ ಪತ್ತೊಡು.ಐನಿರೆಟ್ ಅಗೆಲ್ ಪಾಡ್ದ್ ದೂಪ ಪತ್ತ್ ದ್ ಕೈಟ್ ಕಾಡ ಕೇಪುಳ ಪತ್ತ್ ದೇ ಅರಿಕೆ ಮಲ್ಪೊಡು.ಐನಿರೆ ಪಾಡ್ಂಡ ಮಾತೆಕ್ಲ ಸಂದ್ಂಡ್ಂದ್ ಲೆಕ್ಕ.ಮೂಜಿರೆ ಬಲಸ್ಂಡ ರಾವುನ ದೋಸ ತೋಜಿದ್ ಬರು.ಅಂಚಾದ್ ಐನ್ ಕೊಡಿರೆ ಪಾಡ್ದೇ ಅಗೆಲ್ ಬಲಸೊಡು.