ರಾಜ ದಂಡ,ನ್ಯಾಯ ದಂಡ,ಧರ್ಮ ದಂಡ,
ನ್ಯಾಯ,ಆಡಳ್ತೆ,ಅಧಿಕಾರೊನು ತೆರಿಪಾವುನವು ರಾಜದಂಡ.ಚೋಳ ಅರಸುಲೆ ಕಾಲೊಡು ಒರಿ ಅರಸು ಕುಡೊರಿ ಅರಸುಗು ರಾಜ್ಯದ ಅಧಿಕಾರೊನು ಬುಡು ಕೊರ್ನಗ ಈ ರಾಜದಂಡದೊಟ್ಟುಗು ಬುಡು ಕೊರೊಂತೆರ್.ಬೆನ್ನಿ ಸಾಗೊಳಿದ ಸಂಸ್ಕೃತಿದ ನಮ್ಮ ದೇಸೊಡು ಬೋರ್ಲೆಗ್ ಅವೆತನೇ ಆಯಿನ ಮಾನಾದಿಗೆ ಉಂಡು.ನಂದಿ ಬುಳೆಚಿಲ್ ದ ಒರುಲಾ ಅಂದ್.12ನೇ ಶತಮಾನೊಡು ತಮಿಳ್ನಾಡ್ ನ್ ಅರಸೊಳಿಗೆ ಮಲ್ತ್ ನ ಚೋಳ ಅರಸರೆ ಕೈಟ್ ನಂದಿ ಇತ್ತ್ ನ ರಾಜದಂಡ ಇತ್ತ್ ನ ದುಂಬೇ 7ನೇ ಶತಮಾನೊಡು ಕನ್ನಡ ನಾಡ್ ನ್ ಆಳಿನ ಚಾಲುಕ್ಯೆರೆ ಅರಸುಲ್ನ ಕೈಟ್ ನಂದಿ ಇತ್ತ್ ನ ರಾಜದಂಡ ಇತ್ತ್ಂಡ್.
ರಾಜ ದಂಡದ ಮಿತ್ತ್ ಉಪ್ಪುನ ನಂದಿ ನ್ಯಾಯದ ಸಂಕೇತ.
ಅರಸುಲೆನ್ ಪ್ರತ್ಯಕ್ಷ ದೇವೆರ್ಂದ್ ಪ್ರಜೆಕುಲು ಎನ್ನಿದಿತ್ತೆರ್.ಅರಸುಲೆಗ್ ಇಸರ ದೇವೆರೆ ಒರುವಾದ್ ಮಾನಾದಿಗೆ ಕೊರೊಂತೆರ್.ಇಸರ ದೇವೆರ್ ಜ್ಙಾನದ ಸಂಕೇತ.ಇಡೀ ಜಗತ್ತ್ ದ ಜ್ಙಾನದ ಗುರು ಇಸರ ದೇವೆರ್.ನಂದಿ ಶಿವನ ವಾಹನ ಅದಿತ್ತ್ ದ್ ಜ್ಙಾನೊನು ದುಂಬೊತ್ತೊಂದು ಪೋಪುನಾಯೆ.ಅಂಚ ರಾಜನ ಕೈಟ್ ಉಪ್ಪುನ ರಾಜ ದಂಡದ ಕಡೆಟ್ ನಂದಿ ಉಪ್ಪುನಿ.ರಾಜದಂಡದ ಕಡೆಟ್ ನಂದಿ ಇತ್ತ್ ನೆರ್ದಾದ್ ನಂದಿಕೋಲುಂದುಲ ಪನ್ಪೆರ್.ಅರ್ಥ ಈತೆ,ಎಡ್ಡೆ ಅರಸೊಳಿಗೆ ಮಲ್ಪೊಡಂಡ ಅರಸುಗು ಎಡ್ಡೆ ಜ್ಙಾನ ಬೋಡುಂದು.
ತುಳು ನಾಡ್ ಡ್ ಅರಸೊಳಿಗೆದ ಕಾಲೊಡು ಅರಂತಡೆದ ದೇವೆರೆ ಕೋಣೆದುಲಯಿ,ರಾಜಂದೈವದ ಕೋಣೆದುಲಯಿ ದೀವೊಂತ್ ನ ಮಾನಾದಿಗೆದ ನ್ಯಾಯ ದಂಡೊನು ರಾಜ ದಂಡ ಪನೊಂತೆರ್.ಚೋಳ ಅರಸೆರೆ ಕಾಲೊಡು ಒರಿ ಅರಸೆ ಕುಡೊರಿ ಅರಸಗ್ ರಾಜ್ಯದ ಅಧಿಕಾರ ಬುಡು ಕೊರ್ನಗ, ರಾಜೆರೆಗ್ ರಾಜ್ಯಾಭಿಷೆಕ/ಪಟ್ಟಾಭಿಷೇಕ ಆನಗ ವೈದಿಕೆರ್ ರಾಜ ದಂಡೊಗು ಕಲಸ ನೀರ್ ಮೈತ್ ದ್ ಅರಸುಲ್ನ ಕೈಟ್ ರಾಜದಂಡ ಕೊರೊಂತೆರ್.ಮೂಜಿ ಮೂಜರೆ ಅಡಿ ಎತ್ತರ ಉಪ್ಪುನ ಈ ರಾಜದಂಡದ ತರೆಟ್ ನಂದಿದ ಕೆತ್ತನೆ ಉಪ್ಪುಂಡು.ಉಂದೆನ್ ನ್ಯಾಯ ದಂಡಂದ್ ಲ ಪನ್ಪೆರ್.ದೈವ ದೇವೆರೆ ಸಾಕ್ಷಿಯಾದ್ ಅರಸುಲು ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡೊನು ಪತೊಂದಿಪ್ಪುವೆರ್.ದೈವ ನ್ಯಾಯ ತೀರ್ಮಾನ ಮಲ್ಪುನಗ , ನುಡಿ ಕೊರ್ನಗ ಜೀಟಿಗೆದ ಅಗ್ಗಿ ಅವೆಕ್ ಸಾಕ್ಷಿಯಾಯಿಲೆಕ ಒರಿ ಅರಸು ಕುಡೊಂಜಿ ಅರಸುಗು ಅಧಿಕಾರ ಬುಡು ಕೊರ್ನಗ , ನ್ಯಾಯ ತೀರ್ಮಾನ ಮಲ್ಪುನಗ ರಾಜದಂಡ ಅವೆಕ್ ಸಾಕ್ಷಿಯಾದಿಪ್ಪುಂಡು. ಒರಿ ಅರಸು ಬೊಕ್ಕೊಂಜಿ ಅರಸುಗು ಅಧಿಕಾರೊನು ಬುಡು ಕೊರ್ನಗ ರಾಜ ದಂಡದೊಟ್ಟುಗು ಅಧಿಕಾರ ಬುಡು ಕೊರೊಂತೆರ್.ಜನ ಸಾಮಾನ್ಯೆರ್,ಪೊಂಜನಕುಲು ರಾಜ ದಂಡೊನು ಮುಟ್ಟುಲೆಕಿಜ್ಜಾಂಡ್. ಒರಿ ಅರಸು ಅಧಿಕಾರ ಬದಲ್ಪುನಗ, ನ್ಯಾಯ ತೀರ್ಮಾನ ಮಲ್ಪುನಗ,ವಿಶೇಷ ಧಾರ್ಮಿಕ ಉಚ್ಚಯದಪಗ ಅರಸುಲು ರಾಜ ದಂಡೊನು ಪತೊಂತೆರ್.ಕಾಲಾನು ಭಾಗೊಡು ಅರಸೊಳಿಗೆ ಉಂತಿ ಬೊಕ್ಕಲ ಅರಸುಲೆ ಒರುವಾದ್ ಕೆಲವು ತಿಕ್ ಡ್ ಇನಿಕ್ಲ ರಾಜದಂಡೊಗು ಅರಸುಲೆ ಮಾನಾದಿಗೆ ತಿಕ್ಕೊಂದುಂಡು.ರಾಜದಂಡೊನು ತಮಿಳ್ಡ್ ಸೆಂಗೋಲ್ ಪನ್ಪೆರ್.ತುಳು,ಕನ್ನಡೊಡು ರಾಜ/ನ್ಯಾಯ ದಂಡ ಪನ್ಪೆರ್.ಧರ್ಮದ ಸಂಕೇತ ಆಯಿನ ,ನ್ಯಾಯದ ಸಂಕೇತ ಆಯಿನ ನ್ಯಾಯ,ಧರ್ಮ ದಂಡೊನು ರಾಜ ದಂಡಂದ್ ಪನ್ಪೆರ್.ರಾಜ ದಂಡೊನು ತೂನಗ,ಅವೆನ್ ಗಲಸೊಂತ್ ನ ಅರಸುಲೆನ್ ತೂನಗ ಮೂಲ ದ್ರಾವಿಡ ಜನಾಂಗ ಮುಲ್ತ ಮೂಲ ಜನಾಂಗಂದ್ ಲ ಅರ್ಥ ಮಲ್ತೊನೊಲಿ.
ಚಿತ್ರ ಬೊಕ್ಕ ಪೊಲಬು-ವಿ.ಕೆ.ವಾಲ್ಪಾಡಿ.ಹಿರಿಯ ಪತ್ರಕರ್ತೆರ್
ಇಸರ ದೇವರೆ ನಾಲ್ ಕೈತ ನಟರಾಜನ ಭಂಗಿಡ್ ಕೈಟ್ ರಾಜದಂಡ.
ಚಾಲುಕ್ಯೆರೆ ಲೋಕ ಮಹಾದೇವಿ ಕಟ್ಟಯಿನ ಬಾದಾಮಿ ತಾಲೂಕು ಪಟ್ಟದಕಲ್ಲು ವಿರೂಪಾಕ್ಷ ದೇಲ್ಯದ ಬಲಗೋಡೆದ ಮಿತ್ತ್ ಕೆತ್ತ್ ನ ಕಲಾಕೃತಿಡ್ ಎಡ ಕೈಟ್ ರಾಜದಂಡದ ಕೆತ್ತನೆ ಉಂಡು.ದುಷ್ಟ ಸಗ್ತಿಲೆನ್ ಕಾರ್ ಡ್ ದೊಂಕುದು ನಾಶ ಮಲ್ಪುನ ಇಸರ ದೇವೆರೆ ಕಲಾಕೃತಿ ಉಂದಾದುಂಡು.ರಾಜಮುದ್ರೆದ ಒರುವಾಯಿನ ರಾಜ ದಂಡ ಏಳನೇ ಶತಮಾನದ ಕಾಲೊಡೇ ಇತ್ತ್ಂಡ್ ಪನ್ಪುನೆಕ್ ಉಂದು ಸಾಕ್ಷಿ.ಚಾಲುಕ್ಯೆರೆ ಅರಸು ರಡ್ಡನೆ ವಿಕ್ರಮಾದಿತ್ಯೆ ಕಂಚಿ ಪಲ್ಲವೆರ್ಡ ಜಯಿತ್ ನ ನೆಂಪುಗಾದ್ ಕಟ್ಟಾಯಿನ ವಿರೂಪಾಕ್ಷ ದೇಲ್ಯದ ಗೋಡೆಡ್ ಈ ಕೆತ್ತನೆ ಉಂಡು.
ಕೆಲವೊಂಜಿ ಮಾಯಿತಿ ಬೊಕ್ಕ ಚಿತ್ರ-ಹಿರಿಯ ಪತ್ರಕರ್ತೆರಾಯಿನ ವಿ.ಕೆ.ವಾಲ್ಪಾಡಿ
No comments:
Post a Comment