ತುಳುನಾಡ ಬೆಮ್ಮೆರ್ ಬ್ರಹ್ಮಲಿಂಗೇಶ್ವರೆ ಆಯೆರ್.ಮಹಾಲಿಂಗೇಶ್ವರೆ ಆಯೆರ್

ತುಳುನಾಡ ಬೆಮ್ಮೆರ್ ಬ್ರಹ್ಮಲಿಂಗೇಶ್ವರೆ ಆಯೆರ್.ಮಹಾಲಿಂಗೇಶ್ವರೆ ಆಯೆರ್.

  

ತುಳುನಾಡ ಮಾರ್ನಿ ಕಟ್ಟೆ ಇನಿ ಮಾರಣಕಟ್ಟೆ ಆತ್ಂಡ್.ಬೆಮ್ಮೆರ್ ಬ್ರಹ್ಮಲಿಂಗೇಶ್ವರೆ,ಮಹಾಲಿಂಗೇಶ್ವರೆ,ಅನಂತೇಶ್ವರೆ,ಬೂತನಾಥೇಶ್ವರೆ ಆತೆರ್

 ಮಾರ್ನಿಕಟ್ಟೆಗ್ ಈಡ್ ದೀನ ಪಣವುನು ಮಕರ ಸಂಕ್ರಾಂತಿಗ್ ಒಪ್ಪಿತ್ ದ್ ಇಲ್ಲಗ್ ಪುರ್ಸಾದ ಕನತ್ ದ್ ನೀರ ಪರಿಪುದ ತೋಡ ಬರಿಕ್ ಪೋದ್ ಕೋರಿ ಕೊಯ್ದ್ ಇಲ್ಲಲ್ ಅಗೆಲ್ ಪಾಡ್ದ್ ಪುರ್ಸಾದ ಪಾಡುನ ಕೆರಮ ಉಂಡು

ಕೆಮ್ಮಲೆತ ಬೆಮ್ಮೆರ್

ತುಳುವೆರ್ ಬೆಮ್ಮೆರೆನ್ ಮೂರ್ತಿ ಬರ್ಪುನ ದುಂಬು ಕಲ್ಲ್ ಡ್ ಆರಾದನೆ ಮಲ್ತೊಂತೆರ್.ಕಾಲಾನುಬಾಗೊಡು ಬೆಮ್ಮೆರೆನ್ ಲಿಂಗದ ಒರುಟು ಆರಾದನೆ ಮಲ್ತ್ ದಿಪ್ಪೊಡು.ಲಿಂಗೊಡು ಈಸರ ದೇವೆರೆ ಆರಾದನೆ ಉಪ್ಪುನಿ.ಬೆಮ್ಮೆರ್+ಲಿಂಗ+ಈಸ್ವರ ದೇವೆರ್=ಬೆರ್ಮಲಿಂಗೇಸರ ಆದಿಪ್ಪೆರೆ ಯಾವು.ಆಂಡ ಇತ್ತೆ ಪನ್ಪುನ ಬ್ರಹ್ಮ ಬೊಕ್ಕ ಈಸ್ವರೆ ಸೇರ್ದ್ ಬ್ರಹ್ಮಲಿಂಗೇಶ್ವರರ ಪನ್ಪುನ  ದಾದಂದ್ ಅರ್ಥ ಆವೊಂದಿಜ್ಜಿ.

ವೈದಿಕ ಆರಾದನೆ ತುಳುನಾಡ್ ಗ್ ಬತ್ತಿ ಬೊಕ್ಕ ತುಳುನಾಡ ಬೆಮ್ಮೆರ್ ಪೂರ ತಿಕ್ ಡ್ ಬ್ರಹ್ಮ ಆದ್ ಪೋತೆರ್.

ಪಿಂಗಾರ ಪಾಳೆ ಕುರುವೆ ಸೇಮಂತಿಗೆದ ಸೇವೆ ಬೆಮ್ಮೆರೆಗ್

    ಮಾರಣ ಕಟ್ಟೆದ ಸುತ್ತ ಮುತಲಿಗೆದ ಜನೊಕುಲು ಇನಿಕ್ಲಾ ಮಾರಣ ಕಟ್ಟೆದ ಬೆಮ್ಮೆರೆನ್ "ತುಳುವರ ದೇವರು"ಂಂದು ಪನ್ಪೆರ್.ತುಳುವೆರ್ಲ ಮಾರಣ ಕಟ್ಟೆದ ಬೆಮ್ಮೆರೆನ ಪುದರ್ ಪನಂದೆ" ಬಡಕಾಯಿದ ದೇವೆರ್"ಪಂಡ್ ದೇ ಲೆಪ್ಪುನಿ.ಅಂಚಾದ್ ಮೂಲಿಪ್ಪುನ ಮರತ ಮೂರ್ತಿ ಅವೈದಿಕ ತೌಳವ ಆರಾದನೆದ ಬೆಮ್ಮೆರ್ ಪನ್ಪುನೆಕ್ ಸಂಶಯ ಇಜ್ಜಿ.ಬೆಮ್ಮೆರೆ ಅಂಚಿ ಇಂಚಿ ಅಬ್ಬಗ ದಾರಗ ಉಪ್ಪುನಿಂದ್ ಪನ್ಪೆರ್.ಅವೆಕ್ ತೆರಣ ದಿಂಜವುಲೆಕ ಅಲ್ತ ಬೆಮ್ಮೆರೆಗ್ ಪಿಂಗಾರ ಪರಕೆ.ತುಳುನಾಡ್ ಡ್ ಸಕನ ತೂಯೆರೆ ದೈವಾರಾದನೆ,ಸಿರಿನ ಆರಾದನೆ,ನಾಗಾರಾದನೆ,ಬೆಮ್ಮೆರೆ ಆರಾದನೆಡ್ ಮಾತ್ರ ಪಿಂಗಾರ ಗಲಸುನಿ.ದೇವೆರೆ ಆರಾದನೆಗ್ ಪಿಂಗಾರ ಓಲ್ಲಾ ತುಳುನಾಡ್ ಡ್ ಗಲಸುಜೆರ್.ತುಳುವೆರೆ ಮೂಲ ತಾನ ಆದಿ ಆಲಡೆಲೆಡ್ ಬೆಮ್ಮೆರೆನ್ ಆರಾದನೆ ಮಲ್ಪುವೆರ್ ವಿನಃ ಬ್ರಹ್ಮ ಲಿಂಗೇಶ್ವರನತ್ತ್.ತುಳುವೆರೆ ಆರಾದನೆಡ್ ಲಿಂಗದ ಆರಾದನೆ ಇಜ್ಜಿ.ಅಂಚಾದ್ ಮಾರಣಕಟ್ಟೆ ಮೂಲ ನಾಗಬ್ರಹ್ಮಲಿಂಗೇಶ್ವರ ಕ್ಷೇತ್ರ ಆದಿಪ್ಪೆರೆ ಸಾದ್ಯ ಇಜ್ಜಿ.ಅಲ್ಪದ ಬೆಮ್ಮೆರೆ ದತ್ತ್ ಬಲತ್ ಗ್ ಸಿರಿಕುಲು ಉಪ್ಪುನಿಂದ್ ಹಿರಿಯಾಕ್ಲು ಪನೊಂತೆರ್.ಮಾರಣಕಟ್ಟೆ ಮೂಲ ಲೋಕನಾಡ್ ದ  ಬೆಮ್ಮೆರೆ ಸಾಬಬ ಆದುಂಡು.ಉಂದು ಬಸ್ರೂರ್ದ ಕೈತಲುಂಡು.ಅಂಚನೆ ತುಳುವೆರೆ ಬೆಮ್ಮೆರ್ ವೈದಿಕ ಈಶ್ವರ ಕಲ್ಪನೆದೊಟ್ಟುಗು  (ಶೈವ ವೈದಿಕಾರಾದನೆಡ್) ಸೇರ್ದ್ ಬ್ರಹ್ಮಲಿಂಗೇಸ್ವರ ದೇವೆರಾದ್ ವೈದಿಕ ವಿಧಿ ವಿಧಾನೊಲೆಡ್ ಆರಾದನೆ ಪಡೆಯೊಂದು ಬತ್ತೆರ್.ದುಂಬುಗು ವಿಜಯ ನಗರದ ಅರಸೊಳಿಗೆದಡಿತ ವೀರಶೈವೆರ್ ಬೆಮ್ಮೆರೆನ್ ಈಶ್ವರನೊಟ್ಟುಗು ಗೋಡ್ಯಾದ್ ಬೆಮ್ಮೆರೆ ನ್ ಮಹಾಲಿಂಗೇಸರೆ ಆದ್ ಆರಾದನೆ ಮಲ್ತೊಂದು ಬತ್ತೆರ್.ದುಂಬುಗು ಬೂತ ಬೆಮ್ಮೆರ್ ಬದಲಾದ್ ಬೂತನಾಥೇಶ್ವರೆ ಅಂಡ ನಾಗೆ ಬೊಕ್ಕ ಬೆಮ್ಮೆರೆ ಸಮೀಕರಣದ ನಾಗಬೆಮ್ಮೆರ್ ಬದಲಾದ್ ಅನಂತೇಶ್ವರೆ ಆಯೆರ್.ಬ್ರಹ್ಮ ಲಿಂಗೇಶ್ವರೆ ಆವಡ್,ಭೂತನಾಥೇಶ್ವರೆ ಆವಡ್,ನಾಗ ಬೆಮ್ಮೆರಾವಡ್,ಮಹಾಲಿಂಗೇಶ್ವರೆ ಆವಡ್,ಅನಂತೇಶ್ವರೆ ಆವಡ್ ಮೂಲೊಡು ಅವೈದಿಕ ತೌಳವ ಆರಾದನೆದ ಬೆಮ್ಮೆರೆ ವಿನಃ ಬೇತೆ ದೇವೆರತ್ತ್.ಕ್ರಿ.ಶ. 1111ತ  ಸಿದ್ಧಾಪುರ ಶಾಸನೊಡು ಬೆಮ್ಮೆರೆನ್ ಬ್ರಹ್ಮಲಿಂಗ ಭಟಾರಕ ದೇವ ಪಂಡ್ ದ್ ಲೆಯ್ದೆರ್.

ಕೊಕ್ಕರ್ಣೆ. ಮಾಲಾಡಿ ಬೊಕ್ಕ ಎಡಬೆಟ್ಟ ಸಾಸ್ತಾನದಲ್ಪ ಲಿಂಗದೊರುಟು ಬೆಮ್ಮೆರೆ ಆರಾಧನೆ ಉಂಡು.ದುಂಬು ಪೂರ ಪೆರಾರ್ದೆ ಸಂಕ್ರಾಂತಿದಪಗ ಒಂಜಿ ಪೂಂಜನ್ ಮಾರಣ ಕಟ್ಟೆದ ಬೆಮ್ಮೆರೆಗ್ ಬುಡ್ದು ಮಕರ ಸಂಕ್ರಾಂತಿದಾನಿ ಮಾರಣಕಟ್ಟೆರ್ದ್ ಪುರ್ಸಾದ ಇಲ್ಲಗ್ ಕನತ್ ದ್ ಮೂಜಂಜದಪಗ ನೀರ್ ಪರಪುನ ತೋಡುದ ಬರಿಕ್ ಪೋದು ಆ ಕೋರಿನ್ ಕೊಯ್ದ್ ಅಟಿಲ್ ಮಲ್ತ್ ದ್ ಹಿರಿಯಾಕ್ಲೆಗ್ ಬಲಸೊಂತೆರ್ ಗೆ.ಈ ಇಡೆ ಮಿಸೆಲ್/ಅಗೆಲ್ ನ್ ತುಳುವೆರ್ ಗಡಿಹಾರ,ಗಡಿಯಾರಂದ್ ಪನೊಂತೆರ್.ತುಳುನಾಡ ಎಚ್ಚಿನ ಇಲ್ಲಲ್ ಈ ಕೆರಮ ನಡತೊಂತ್ಂಡ್.ಕೆಲವೆರ್ ಪನ್ಪಿ ಪ್ರಕಾರ ಇಂಚಿಪ್ಪ ಐವ ವರ್ಸದ ಪಿರವು ಮುಟ್ಟ ಈ ಕೆರಮ ನಡತೊಂತ್ಂಡ್ಂದ್ ಹಿರಿಯೆರ್ ನೇರ್ಪು ಮಲ್ಪುವೆರ್.ಮಾರಣ ಕಟ್ಟೆಗ್ ಈಡ್ ಕಟ್ಟ್ ದ್ ದೀಪುನ ಕೆರಮ ಇನಿಕ್ಲಾ ಕೆಲವು ಕಡೆಟ್ ಇತ್ತ್ ದ್ಮಕರ ಸಂಕ್ರಾಂತಿದಾನಿ ಈ ಈಡ್ ದ ಪಣವುನು ಅಡೆ ಪಾಡ್ದ್ ಅಲ್ತ್ ಪುರ್ಸಾದ ಕನತ್ ದ್ ಇಲ್ಲ ಬಾಕಿಲ್ದ ಕೈತಲ್ದ ನೀರ್ ಪರತ್ ಪೋಪುನ ತೋಡ ಬರಿಟ್ ಕೋರಿ ಕೊಯ್ಪುನ ಕೆರಮ ಉಂಡು.ಗಡಿಹಾರ ಕೊರ್ಪುನೇಟ(ಕೋರಿ ಕೊಯ್ದ್ ಅಗೆಲ್ ಪಾಡುನೇಟ) ಮಾರಣ ಕಟ್ಟೆರ್ದ್ ಕನತ್ ನ ಪುರ್ಸಾದೊನು ಇಲ್ಲದ ಉಲಯಿ ಕೊನಯೆರೆ ಇಜ್ಜಿ,ಮುಂಡೊಗು ಪಾಡೆರೆ ಇಜ್ಜಿ.

        ತುಳುನಾಡ್ ಗ್ ವೈದಿಕ ಆರಾದನೆ ಬನ್ನಗ ಮುಲ್ತ ಪ್ರಕೃತಿ ಸಗ್ತಿ ಬೆಮ್ಮೆರ್ ಏರ್ಂದ್ ಅಕುಲೆಗ್ ತೆರಿಯಂದೆ ಬೆಮ್ಮೆರೆನ್ ಬ್ರಹ್ಮಂದ್ ಮಲ್ತೆರ್.ಬೆಮ್ಮೆರೆ ದತ್ತ್ ಬಲತ್ ಗಿತ್ತಿ ಮೈಸಂದಾಯೆ ಲೆಕ್ಕೆ ಸಿರಿನ್ ದಾದಂದ್ ತೆರಿಯಂದೆ ನಂದಿ/ನಂದಿಗೋಣ(ನಂದಿ ಬೇತೆ,ಗೋಣೆ ಬೇತೆ.ರಡ್ಡ್ ಲ ಒಂಜತ್ತ್) ಬೊಕ್ಕ ರಕ್ತೇಶ್ವರಿಂದ್ ಮಲ್ತೆರ್.ಗುಳಿಗನ್ ಕ್ಷೇತ್ರಪಾಲ ಮಲ್ತೆರ್.ಲೆಕ್ಕೆಸಿರಿನ್ ಖಡ್ಗೇಶ್ವರಿ(ಕೈಟ್ ಕಡ್ಸಲೆ ಇತ್ತ್ ನೆಕ್)ಮಲ್ತೆರ್.ಬೆಮ್ಮೆರೆ ಸಾನ ಬೆಮ್ಮೆರೆ ಆಲಡೆದ ಮೂಲ ತೆರಿಯಂದಿ ಮೊಕುಲು ಅವೆನ್ ಬ್ರಹ್ಮಸ್ಥಾನಂದ್ ಪನ್ನಗಲ ಮುಗ್ದ ತುಳುವೆರ್ ಮನಿ ಮಂಬಿಜ್ಜಂದೆ ಒತ್ತೊಂಡೆರ್.

  

ಸಿರಿ ಆಲಡೆಲೆನ ಬೆಮ್ಮೆರ್  ಮಹಾಲಿಂಗೇಸರೆ ಆಯಿ ಆಲಡೆಲು:-

1.ಕಬತ್ತಾರ್ ಸಿರಿ ಆಲಡೆ-ಮಹಾಲಿಂಗೇಸರ ದೇವಸಾನ

2.ನಂದೊಲಿಗೆ ಸಿರಿ ಆಲಡೆ-ಮಹಾಲಿಂಗೇಸರ ದೇವಸಾನ

3.ದೇಂದೊಟ್ಟು ಅಬ್ಬಗ ದಾರಗ ಆಲಡೆ-ಮಹಾಲಿಂಗೇಸರ ದೇವಸಾನ

4.ದರೆಗುಡ್ಡೆ ಸಿರಿ ಆಲಡೆ-ಮಹಾಲಿಂಗೇಸರ ದೇವಸಾನ

5.ಉಚ್ಲಿಲ ಸಿರಿ ಆಲಡೆ-ಮಹಾಲಿಂಗೇಸ್ವರ ದೇವಸಾನ

6.ಶಿರ್ವ ಮಾಣಿಬೆಟ್ಟು ಸಿರಿ   ಆಲಡೆ-ಮಹಾಲಿಂಗೇಶ್ವರ ದೇವಸಾನ

7.ಎರ್ಮಾಲ್ ಆಲಡೆ-ಮಹಾಲಿಂಗೇಸರ ದೇವಸಾನ

8.ಬೋಲದ ಆಲಡೆ-ಸೋಮನಾಥ ದೇವಸಾನ

9.ಹಿರಿಯಡ್ಕ ವೀರ‌‍ ಬದ್ರ ಸಿರಿ ಆಲಡೆ-

10.ಮಧ್ಯ,ತೊರತ್ತಲ್-ಬೆಮ್ಮೆರ್,ಸಿರಿ ಆಲಡೆ(ಮದ್ಯದ ಜಾತ್ರೆ ದುಂಬುನಾನಿ,ಕಬತ್ತಾರ್ ದ ಜಾತ್ರೆ ಮನದಾನಿ.ಪೂವೆ ಪುಣ್ಣಮೆದಾನಿ ರಡ್ಡ್ ಕೋಡಿಡ್ ಆಯನ.ಇನಿ ಲೆಕ್ಕೆಸಿರಿ ಖಡ್ಗೇಶ್ವರಿ ಆತೆರ್.)

11.ದೈಲಾಬೆಟ್ಟು ಕಲ್ಲಮುಂಡ್ಕೂರು ಅಬ್ಬಗಬೊಕ್ಕ ದಾರಗ ಆಲಡೆ-ಮಹಾಲಿಂಗೇಶ್ವರ.

12.ಕಟೀಲ್ ದೇಲ್ಯ ತುದೆ ಬರಿ ಅನ್ನ ಛತ್ರದ ಬರಿತ ಬೆಮ್ಮೆರ್-ಬ್ರಹ್ಮ ಆತೆರ್.