ತುಳುವೆರೆ ಆರಾಧ್ಯ ದೈವ ವೈದ್ಯನಾಥೆ
ತುಳುನಾಡ ದೈವಾರಾದನೆಡ್ ವೈದ್ಯನಾಥ ದೈವೊಗು ಅವೆತನವೇ ಆಯಿನ ಮಣ್ಣ ಪುರಪುಂಡು.ಆಯಾ ಮಣ್ಣ್ ಗ್ ಬತ್ತ್ ನಿಲೆಯಾಯಿ ವೈದ್ಯನಾಥನ್ ಮೂಡದಾಯೆಂದ್,ತೋಡಕುಕ್ಕಿನಾರ್ಂದ್ ಲ ಲೆಪ್ಪುವೆರ್.ಮೂಡಾಯಿಡ್ದ್ ಜತ್ತ್ ಬೈದ್ ನ ದೈವೊನು ಇನಿ ಮೂಡದಾಯೆಂದ್ ಪನ್ಪೆರ್. ಇನಿ ಪೊಸ ಪುದರ್ ಡ್ ಮುಂಡತ್ತಾಯ,ಮುಂಡಿತ್ತಾಯಂದ್ ಲ ಪನೊಂದುಲ್ಲೆರ್.ದೈವಾರಾದನೆದ ಸಂದಿಲೆಡ್ ಬಡಕಾಯಿ ಗಂಗೆ,ಕೇಪಾಡಿ ಗಂಗೆ ಇಂಚಿ ಸುದೆಕ್ಲೆನ ಉಲ್ಲೇಖ ಬರ್ಪುಂಡು.ಕಾಶಿದ ಇಚಾರೊಲು ಪಾಡ್ದನೊಲೆಡ್ ಬರ್ಪ.ತುಳುನಾಡ್ ಗ್ ಸುರುಕು ಶಿವಲಿಂಗೊನು ಕನತ್ ನಾರ್ ನಾಥ ಪಂಥದ ಗುರು ಮತ್ಸ್ಯೇಂದ್ರನಾಥೆರ್ನ ಶಿಷ್ಯೆ ಗುರು ಗೋರಕ್ಷನಾಥೆರ್ . ಶೈವಾಂಶ ವೈದ್ಯನಾಥನ್ ಮುಂಡದಾಯೆಂದ್ ಲ ಪನ್ಪೆರ್.ವೈದ್ಯನಾಥನ್ ಕಣಂದೂರುಡು ಧರ್ಮದರಸು ತೋಡಕುಕ್ಕಿನಾರ್ಂದ್ ಪನ್ಪುನತ್ತಂದೆ ಚೆನ್ನಮಂಗಲ ಚೆಲುವರಾಯೆಂದ್ ಲ ಪನ್ಪೆರ್.ಅಡೆ ದೈವ ಚೆನ್ನಮಂಗಲೆ ಬಸವನ ಒರುಟು ಬೈದ್ ನಿ.ಕಣಂದೂರುದ ಬಾಗಂತಮೂಲೆ ಕೆದು ಕೈತಲ್ದ ಪಂಡ ತೋಡಬರಿತ ಕುಕ್ಕುದ ಮರತ ಮುದೆಲ್ಡ್ ಬಸವನ ಒರುಟು ಬತ್ತಿ ವೈದ್ಯನಾಥ ದೈವ ಅವ್ಲೆ ಕುಕ್ಕುದ ಮರತ ಮುದೆಲ್ಡೇ ಮಯಕಾಪುನಿ.ಇನಿಲಾ ಆ ಕುಕ್ಕುದ ಮರ ದೈವಾಲ್ಯದ ಪಾಗರದ ಬಲ ಮರ್ಗಿಲ್ ಡಿತ್ತ್ ದ್ ಅವೆತ ಒಂಜಿ ಗೆಲ್ಲ್ ದೆಪ್ಪೆರೆ ಪೋಂಡಲಾ ಮರಿ ಗಿಡೆರುಂಡು.ವೈದ್ಯನಾಥನ್ ಅವ್ಲು ಅಜ್ಜೆರ್ ದೈವಂದ್ ಲ ಲೆಪ್ಪುವೆರ್.ಅವ್ಲೆ ಕೈತಲ್ದ ವಲಕುಂಜೊಡು/ವಲಂಜೊಡು ಪೆತ್ತ ಪಿಲಿ ಒಟ್ಟಾದ್ ಇತ್ತ್ ನ ಜಾಗೆ ತೋಡಕುಕ್ಕಿನಾರೆನ ಮಾಯೆದ ಸಗ್ತಿನ್ ತೆರಿಪಾವುಂಡು. ವೈದ್ಯನಾಥೆ ಮೂಲೊಡು ಕಾಲ ಭೈರವೆ.ಈ ದೈವೊಲೆಗ್ಲ ಜೋಗಿ ಪುರುಸೆರೆಗ್ಲ ಬಾರೀ ಮುಟ್ಟದ ಸಮ್ಮಂದ ಉಪ್ಪುನತ್ತಂದೆ ವೈದ್ಯನಾಥನ ಕಣಂದೂರ ಸಾನ ಬರಿ ಸುತ್ತ ಜೋಗಿ ಪುರ್ಸೆರ್ ಎಚ್ಚಾದ್ ಬದ್ ಕೊಂದುಲ್ಲೆರ್.ಅಕ್ ಲೆಗ್ ಚಾಕಿರಿಗ್ಂದ್ ಬೂಮಿಲಾ ತಿಕ್ ದ್ಂಡ್ಇನಿಲಾ ಅಕುಲು ಅವ್ಲು ಅಜಲಾತಿಗೆದ ಚಾಕಿರಿ ಮಲ್ಪುವೆರ್.
"ಕಾಶಿಡ್ ಕಾಲಭೈರವೆ ಆದ್,ಬೆಮ್ಮೆರೆ ಮಣ್ಣ್ ತುಳುರಾಜ್ಯೊಡು ತಾನ್ ವೈದ್ಯನಾಥೆಂದ್" ದೈವದ ನುಡಿಕಟ್ಟ್ ಡ್ ಬರ್ಪುಂಡು.ವೈದ್ಯನಾಥ ದೈವ, " ನಾಲ್ ಜೋಗಿಪುರ್ಸೆರೆ ಜೋಳಿಗೆಡ್ ಕುಲ್ದು ಕಾಶಿರ್ದ್ ಬತ್ತೆ" ಪಂಡ್ ದ್ ತನ್ನ ನುಡಿಟ್ ಪನ್ಪುಂಡು . "ಉಚ್ಚು ತುಚ್ಚಿಂಡ ಮರ್ದಿಜ್ಜಿ ,
ಉತ್ತೊಲಿ ತುಚ್ಚಿಂಡ ಮರ್ದಿಜ್ಜಿ, ಸಾರೊಬೂತೊಲೆಗ್ ಒರಿ ವೈದ್ಯನಾಥೆಂದ್ ಪನ್ಪವೊಂಡೆ" ಪಂಡ್ ದ್ ದೈವ ಪನ್ಪುಂಡು. .ವೈದ್ಯನಾಥನ ಸಾನೊಲೆಡ್ ಕೊಡಿ ಏರ್ದೇ ನೇಮನೆರಿ ನಡಪುನಿ.ವೈದ್ಯನಾಥ ದೈವೊನು ತೋಡಕುಕ್ಕಿನಾರಾದ್ ಆರಾದನೆ ಮಲ್ಪುನೌಲು ಸಿರಿಮುಡಿ ಏರ್ದ್ ನೇಮ ಆಂಡ ವೈದ್ಯನಾಥಗ್ ಅಣಿತ ತಿರಿ ಸಿಂಗಾರೊಡ್ಲ ನೇಮ ನಡಪುಂಡು."ಕಾಶಿಡ್ ಕಾಲಭೈರವೆಂದ್ ಪನ್ಪವೊಂಡೆ, 
ಅಣಿತ ಮಿತ್ತ್ ಮುಗ ಏರ್ನ ವೈದ್ಯನಾಥ ದೈವ
ಸಿರಿಮುಡಿ ಏರ್ನ ವೈದ್ಯನಾಥೆ ತೋಡಕುಕ್ಕಿನಾರ್/ತೋಡಕ್ಕಿನಾರ್
ಮುಗತಟ್ಟೆಡ್ ವೈದ್ಯನಾಥ ಮುಗ
ಕಮಲಾಕ್ಷ ಪಡಂಗಡಿ
ನಾಲ್ವೆರ್ ಪುರ್ಸೆರೆ ಬೆರಿ ಪತ್ತೊಂಡೆ,
ಸಂಜೀವಿನಿ (ಸಂಜಾಂದ) ಕಡ್ಡಿನ್ ಪತ್ತೊಂದು ದುಗ್ಗು ದುಗ್ಗನಿಗೆ ದೆತ್ತೊಂದು ಊರೂರುಗ್ ಬರುವೆ" ಪಂಡ್ ದ್ ದೈವ ಪನ್ಪುಂಡು.
ನಾಲ್ವೆರ್ ಜೋಗಿ ಪುರ್ಸೆರ್ ನಕುಲು ಉತ್ತರಾದಿ ದೇಸೊಡು(ಕಾಶಿ) ವಾಮಜಾಲೆ( ಓಮ ಜ್ವಾಲೆಗ್ ಪಂಡ ಓಮದ ಸೂಕು ;ಹೋಮೊಗು ಬೋಡಾಯಿನ ಸಾಹಿತ್ಯೊಲೆನ್ ರೂಢಿ ಮಲ್ಪುನ ಪೊರ್ತು) ಕರಿಪುನ ಪೊರ್ತು,ಅಕ್ಲೆನ ಅಲವೊಲಿ ಪಂಚಾಂಗ( ತಾರಿದೊಲಿ), ಬುಗುತಿದ ವಾರಂಗಾಯಿ(ವಿಬೂತಿ/ಭಸ್ಮದ ಕರಡಿಗೆ),ಗಂದದ ಪರಡ್/ (ಕೊರಡು),ಐನೆಸಲ್ದ ಕೇಪುಲ್ದ ಪೂ,ಅಕ್ಲೆನ ಅಲವೊಲಿ ಗ್ರಂತೊಡು ಕುಲದೆವೆರಾದ್ ತೋಜಿನ ಕಾಲ ಭೈರವೆ ಯಾನ್ ನಿಕ್ಲೆನೊಟ್ಟುಗು ತುಳುವ ಮಣ್ಣ್ ಗ್ ಜಪ್ವೆಂದ್ ಪನ್ಪೆ.ಉತ್ತರಾದಿ ದೇಸೊರ್ದು ಜತ್ತಿನ ಅಕುಲು ಕದಿರೆದ ಜೋಗಿ ಮಠೊಕು ಬರ್ಪೆರ್.ಮೂಲು ಜೋಗಿ ಮಠೊಟು ದೇವಾಲ್ಯದ ಕಟ್ಟ್ ಡ್ ಕಾಶಿ ಕಾಳ ಭೈರವೆ ನಿಲೆಯಾಪೆ.ಕದ್ರಿನ್ ಪ್ರದಾನ ಸಾನಿದ್ಯ(ಕೇಂದ್ರ) ಮಲ್ತೊನುವೆ.ಅಲ್ತ್ ದುಂಬು ಅಕುಲು ಮೂಡಾಯಿ ಗಟ್ಟೊಗು ಪೋಪೆರ್. ಮೂಡಾಯಿಡ್ ತಿರುಪತಿಡ್ಲ ಪ್ರದಾನ ಕಾಲ ಬೈರವೆ ಆದುಲ್ಲೆ.ಮಂಡ್ಯಡ್ ಕಾಲಹಸ್ತೇಂದ್ರ ದೇಲ್ಯ ಇತ್ತ್ ದ್ ಅವ್ಲು ಕಾಲ ಭೈರವೆ ಪ್ರಧಾನ ಆದುಲ್ಲೆ.ಕಮಲಶಿಲೆಟ್ ಕಾಲ ಬೈರವೆ/ವೈದ್ಯನಾಥನ್ ಮುಂಡತ್ತಾಯ ದೇವೆರ್ಂದ್ ಆರಾದನೆ ಮಲ್ಪುವೆರ್.ಮಂತ್ರವಾದ ಮಲ್ಪೆರೆ ಬತ್ತ್ ನಕ್ಲೆನ್ ದೇವೆರ್( ದುರ್ಗಾಪರಮೇಶ್ವರಿ) ಮಯಕ ಮಲ್ತೆರ್ಂದ್ ಅಲ್ತ ವೈದಿಕೆರ್ ಪನ್ಪೆರ್.ನಿಜವಾದ್ ಅವ್ಲು ಮುಂಡತ್ತಾಯಂದ್ ಉಪ್ಪುನಿ ಕಾಲ ಭೈರವನೊರುತ ವೈದ್ಥನಾಥ ದೈವ.ವೈದ್ಯನಾಥೆ ಮೂಡಾಯಿ ಗಟ್ಟ ಜತ್ತ್ ದ್ ಬತ್ತ್ ನೆರ್ದಾದ್ ಮುಡದಾಯೆ/ಮೂಡದಾಯೆಂದ್ ಪುರಪು ಪಡೆಪೆ.ಗಟ್ಟದ ಮಿತ್ತ್ ದೇವತಾ ಸ್ವರೂಪೊಡು ಕಾಲ ಭೈರವನ ಆರಾದನೆ ನಡಪುಂಡು.ವೈಧ್ಯನಾಥ ದೈವ ಮೂಡಾಯಿಗಟ್ಟ ಜತ್ತ್ ದ್ ಸುರುಕು ಬರ್ಪುನ್ನೇ ಮೊಗರ್ನಾಡ್ ಸಾವಿರ ಸೀಮೆಗ್.ಅಲ್ತ್ ರ್ದ್ ಬೊಕ್ಕ ವೈದ್ಯನಾಥ ದೈವ ಶಂಬೂರುದ ಇರ್ಂದೊಟ್ಟು ಸಾನ ಜುಂಡಿಕೆರೆ/ಡಿಂಡಿಕೆರೆಕ್ ಬರ್ಪುನಿ "ಜುಂಡಿ ಕೆರಟ್(ಇನಿತ ಡಿಂಡಿಕೆರೆಅವ್ಲು ರಡ್ಡ್ ಕೆರೆ ಉಂಡು) ಸಾಸ್ರ ಲಿಂಗೊಡು ಯಾನ್ ಉದಿಪನೊಗು ಬತ್ತೆ" ಪಂಡ್ ದ್ ದೈವ ಪನ್ಪುಂಡು.ಅವ್ಲು ಒಂಟೆ ಮಯಕಾಯಿನ,ಕುದುರೆ ಮಯಕಾಯಿನ ಜಾಗೆ ಉಂಡು.ಇಸತ ಉಚ್ಚು ತುಚ್ಚಿಂಡಲಾ,ವಾ ಸಿರ್ಕ್ ಸಂಕಟ ಬತ್ತ್ಂಡಲಾ ಆ ಕೆದುತ ನೀರ್ ಇನಿಕ್ಲಾ ಮರ್ದಾದ್ ಪಲಿಪುಂಡು ಪನ್ಪಿ ನಂಬೊಳಿಗೆ ಉಂಡು.ದುಂಬುಗು ನಾಲ್ವೆರ್ ಪುರ್ಸೆರ್ನೊಟ್ಟುಗು ದೈವ ನಂದಾಂದ/ನಂದನ ಬಿತ್ತ್ ಲ್ ಗ್ ಬರ್ಪುಂಡು. ದೈವ ಇಡೆಗ್ ಕಬುಲ್ತಿ ಪೆತ್ತದ ಒರುಟು ಬರ್ಪುಂಡು. ಅವೆತ ಕೆರ್ಂದೆಲ್ ಗ್ ಕೈ ಪಾಡ್ದ್ ಬೊರಿನಗ ಒಂಜಿ ಮಿರೆಟ್ ಪೇರ್, ಒಂಜೆಟ್ ನೀರ್,ಒಂಜೆಟ್ ನೆತ್ತೆರ್,ಕುಡೊಂಜಿ ಮಿರೆ ಪೊಟ್ಟಾತ್ ನ ತೂನಗ ,ನಿಮಿತ್ತ ನೋಟೊಡು ಇಚಾರ ಅಕ್ಲೆಗ್ ತೆರಿನಗ ಉಂದು ಕಾಲ ಬೈರವನ ಮೈಮೆಂದ್ ಗೋಚಾರಾಪುಂಡು.ಅಲ್ತ್ ರ್ದ್ ಬೊಕ್ಕ ಪಾಡ್ದನ ಸಾಹಿತ್ಯದ ಪ್ರಕಾರ ನೇತ್ರಾವತಿ ಜಲಕದ ಕೆರೆ,ನಂದರಸುಲ್ನ ಕಟ್ಟ್ ತೋಜಿದ್ ಬರ್ಪುಂಡು.ದುಂಬುಗು ಕನಪಾಡಿದ ಉಲಗುಡ್ಡೆನ್ ದೈವ ಕಡಪುಂಡು. ಬೊಕ್ಕ ತುಂಬೆ ಉಲವೂರು, ಇರುವೊಡಿ ಬನ್ನಾಕುಲ್ನ ಚಾವಡಿ,ಅಲ್ತ್ ಬೊಕ್ಕ ಸುಜೇರ ಕಲ್ಲ ಪಟ್ಟಿ ಸಾನೊಗು ದೈವ ಬರ್ಪುಂಡು.
ಸುಜೇರ ಕಲ್ಲ ಪಟ್ಟಿ ಸಾನೊಡು(ಸುಜೀರ್) ಬೋನೊಗು ಪಾಡಿನ(ಬೋಜನೊಗು/ಅಟಿಲ್ ಮಲ್ಪೆರೆಪಡೆಯೊಂದುಪ್ಪುಲಂದ್ ಮೂಜಿ ಕಲ್ಲ್ ಡ್ ಅಡು (ಅಟಿಲ್ ಮಲ್ತ್)ಉಂಡಿ ಬೊಕ್ಕ ಒಂಜಿ ಕಲ್ಲ್ ನ್ ಸುಜೀರ್ ಡ್ ಪುದರ್ ದಾಂತಿನ ಮರತ ಮುದೆಲ್ಡ್ ಪುರ್ಸೆರ್ ಪಾಡ್ವೆರ್.ಇನಿಕ್ಲಾ ಆ ಮರ,ಆ ಕಲ್ಲ್ ಸಾಂಕೇತಿಕವಾದ್ ಗುರ್ತೊಗು ಅವ್ಲುಂಡು. ಪಾಡಿನ ಕಲ್ಲ್ ಡ್ ಮೂಲು ರಾಜಂದೈವ ಆದ್ ಈ ನಿಲೆಯಾದ್ ನಾಥ ಪಂಥಿಲೆನ್ ಪರಿಪಾಲನೆ ಮಲ್ತೊಂದು ಬಲಂದ್, ಕಾಲ ಕಾಲೊಗು ಬಲಿಬೋಗೊನು ಪಡೆಯೊಂದುಪ್ಪುಲಂದ್ ವೈದ್ಯನಾಥ ದೈವೊನು ಅವ್ಲು ನಿಲೆ ಮಲ್ತ್ ದ್ ಅಕುಲು ದುಂಬು ಪೋಪೆರ್.
ಅಯಿಡ್ದ್ ಬೊಕ್ಕ ದೇಯಿ ಬೈದ್ಯೆದಿನ ಕಥೆ ಪಾಡ್ದನೊಡು ಬರ್ಪುಂಡು. ಆಲ್ ಆ ಬಾಗೊಡು ಸಮರ್ಥವಾಯಿನ ಒರ್ತಿ ತಾಕತ್ತ್ ದ ಪೊಂಜೊವಾದಿತ್ತಲ್.ಆಂಡ ಮೂಲು ಬರ್ಪುನ ದೇಯಿ ಬೈದ್ಯೆದಿ ಕೋಟಿ ಚೆನ್ನಯೆರ್ನ ಅಪ್ಪೆ ದೇಯಿ ಬೈದ್ಯೆದಿ ಅತ್ತ್.ಸುಜೇರ್ದ ಈ ಪುದರ್ ದಾಂತಿ ಮರತ ಮುದೆಲ್ಡಿತ್ತಿ ಕಲ್ಲ್ ನ್ ತೂಯಿನ ದೇಯಿ ಬೈದ್ಯೆದಿ ಐನೆಸಲ್ ಕೇಪುಲ ದೀದ್ ಅವ್ಲಿಪ್ಪುನ ವೈದ್ಯನಾಥ ದೈವೊನು ಆರಾದನೆ ಮಲ್ತೊಂದು ಬರ್ಪಲ್.ಇಕ್ಕೇರಿದ ದಂಡ್ ಬನ್ನಗ ಪೊರ್ಂಬಾಟೊಡು ದಂಡ್ ನ್ ಜಯಿತ್ ಕೊರೊಡುಂದು ಸೈನ್ಯ ಕಡಪುಡ್ರೆ ದೇಯಿ ಬೈದ್ಯೆದಿಗ್ ಅರಸುಲೆಡ್ದ್ ಓಲೆ ಬರ್ಪುಂಡು.ಅಪಗ ಆಲ್ ಕಣ್ಣ್ ಡ್ ಕಣದುಃಖ ಪಾಡ್ನಗ ಮೋಲ್ನ ಪಿರವುಡೆ ವೈದ್ಯನಾಥೆನೆ ಪೋದು ನಾಣ್ಯ ಪನ್ಪಿ ಜಾಗೆಡ್ ಪೊರ್ಂಬಾಟೊಗು ಉಂತುನಿ.ಮಾಯೆದ ಮೈಂದ್ ನ್ ಪಾಡ್ದ್ ವೈದ್ಯನಾಥೆ ಎದುರುದಕ್ಲೆನ ದಂಡ್ ನ್ ತೌರ್ದು ನಾಣ್ಯೊಡು ನೆತ್ತೆರ್ ಕೆರೆನ್ ಉಂಡು ಮಲ್ಪುನಿ.ನೆತ್ತೆರ್ ಕೆರೆತ ಗಡುವಾಡಿ ಜಾಗೆ ಔಲು ಇನಿಲಾ ಉಂಡು..ನಟ್ಟಿಲ್ಲ್,ಸುಜೇರ್ದ ದೇಯಿ ಬೈದ್ಯೆದಿನ ಸಂಸಾರಂದೇ ಪಾಡ್ದನೊಡು ಬರ್ಪುನಿ.ಅಯಿರ್ದ್ ಬೊಕ್ಕ ಉತ್ತರುಂಬಳಿ ಕೊರ್ದು ಸುಜೇರ್ ಕಲ್ಲಪಟ್ಟಿ ಸಾನೊಡು ನಟ್ಟಿಲ್ಲ್ ದೇಯಿ ಬೈದ್ಯೆದಿ ಸಂಸಾರೊರ್ದು ಪೂ ನೀರ್,ಸುಜೇರ ಬನ್ನಾಕುಲ್ನ( ಜೈನೆರ್)ಮದುಂದು ಅಲ್ತ ಕಟ್ಟ್.ಇತ್ತೆ ಬಂಟೆರ್ ಅವ್ಲು ವೈದ್ಯನಾಥನ್ ಆರಾದನೆ ಮಲ್ತೊಂದುಲ್ಲೆರ್.ಅಲ್ತ್ ದುಂಬು ಪರಂಗಿಪೇಂಟೆ ಕೈತಲ್ ದ ವರದೇಶ್ವರ ದೇಲ್ಯೊಗು ಪುರ್ಸೆರ್ ಬರ್ಪೆರ್.ಮೂಲ ಪುದರ್ ಅವುಲಾ ವೈದ್ಯನಾಥೇಶ್ವರ ದೈವಾಲ್ಯಂದ್ ಇತ್ತ್ ನಿಂದ್ ಹಿರಿಯಾಕ್ಲು ಪನ್ಪೆರ್.ಅವ್ಲೊಂಜಿ ಗಡು ಪಾಡಿ ಜಾಗೆ ಉಂಡು..
ಬೊಕ್ಕ ಜೋಗಿ ಪುರ್ಸೆರ್ ಅರ್ಕುಲ ಕೈತಲ್ದ ಲಚ್ಚಿಲ ತಾರ್,ಲಚ್ಚಿಲ್ ಗ್ ಬತ್ತ್ ದ್ ಅಲ್ತ್ ದುಂಬುಗು ಸೋಮನಾಥ ಕಟ್ಟೆಗ್ ಬರ್ಪುನಿ.ಸೋಮನಾಥ ಕಟ್ಟೆರ್ದ್ ಎದುರು ತೂನಗ ಬೈದ್ಯಾವದ ಗಿರಿ ದೈವೊಗು ತೋಜುಂಡು.ಸೋಮನಾಥ ಕಟ್ಟೆ ಅಡ್ಯಾರ್ ಡ್ ಬರ್ಪುಂಡು.ದುಂಬು ಇನೋಳಿದ ಸೋಮನಾಥ ದೇವೆರ್ ಅಡ್ಯಾರ್ದ ಈ ಸೋಮನಾಥ ಕಟ್ಟೆಗ್ ಸವಾರಿ ಬರ್ಪುನ ಕೆರಮ ಇತ್ತ್ಂಡ್.ಸೋಮನಾಥನ ಬಂಟೆಯಾದ್ ಅಲ್ತ್ ದೈವ ಇಡೆಗ್ ದೇವೆರೊಟ್ಟುಗು ಕಟ್ಟೆ ಸವಾರಿ ಬರ್ಪುನ ಕೆರಮ ಇತ್ತ್ಂಡ್ ಗೆ.ಸೋಮನಾಥ ಕಟ್ಟೆರ್ದ್ ತೂನಗ ಮೂಡಾಯಿ ಅಡ್ಯಾರ್,ಪಡ್ಡೇಯಿ ಅಡ್ಯಾರ್ ಅಡ್ಯಾರ್ದ ದುಗ್ಗ ಬಂಡಾರಿಯಾಲು , ಅಲ್ಪರ್ದ್ ದುಂಬು ಅಕ್ಲೆಗ್ ಬೈದ್ಯಾವದ ಗಿರಿ ತೋಜುಂಡು..ಬೈದ್ಯಾವಡ್ ಸುರುತ ನೇಮ ನಡಪುಂಡು( ಅಡ್ಯಾರ್ ರ್ದ್ ಒಂತೆ ಎದುರು ಎತ್ತರದ ಜಾಗೆ ಬೈದ್ಯಾವು).ಬೈದ್ಯಾವುರ್ದು ಎದುರು ತೂನಗ ದೈವೊಗು ಬಡ್ಲದ ಬಾಕಿಮಾರ್( ಬಡಿಲ ಗುತ್ತು)ತೋಜುಂಡು,ಬಡ್ಲ ಗುತ್ತುದ ಬಾಕಿಮಾರ್ ಡ್ ಏಳ್ ಸಾರ ಗಣೊಕ್ಲೆನ್ ವೈದ್ಯನಾಥೆ ಸೇರ್ಸಾವೊನುವೆ.ಅಲ್ಪರ್ದ್ ನಾಥ ಪಂಥದ ಜೋಗಿ ಪುರ್ಸೆರ್ ಕಣ್ಣೂರುದ ಆದಿ ದೆಕ್ಕಾಡಿದ ಬಾಕಿಲ್ ಗ್ ಬತ್ಥ್ ದ್ ಅವ್ಲು ಕುಲ್ಲುವೆರ್.ಇನಿಕ್ಲ ಜೋಗಿಲು ಬತ್ತ್ ದ್ ಕುಲ್ಲುನ ವ್ಯವಸ್ಥೆ ಅವ್ಲುಂಡು.ದೆಕ್ಕಾಡಿ(ದೆಕ್ಕರುಲಯಿದಲೆಕ ಉಪ್ಪುನ ರಚನೆ )ಪಂಡ ಒಂಜಿ ಗುಹೆತುಲಯಿ ಪೊಗ್ಗ್ ಲೆಕ ಉಪ್ಪುನ ರಚನೆ.ಆದಿ ದೆಕ್ಕಾಡಿದ ಬಾಕಿಲ್ದ ಒಂಜಿ ವ್ಯಾಪ್ತಿ ತೂನಗ ಸುಬ್ರಾಯ ದೇವೆರ್ನ ಸ್ಥಳಂದ್ ತೋಜುಂಡು.ಕಣ್ಣೂರುರ್ದು ಮಾಣೂರುದ ಸುಬ್ರಾಯ ದೇವಾಲ್ಯ,ಕುಡುಪುದ ಸುಬ್ರಾಯ ದೇಲ್ಯಲ ಈ ವ್ಯಾಪ್ತಿಗ್ ಬರ್ಪುಂಡು.ಅವ್ಲು ಕನಕರಬ್ಬೆ ಪನ್ಪುನಾರಿಪ್ಪುವೆರ್.ಆರ್ ದಂಡಿಗೆನ್ ಪತೊಂದು ಸುಬ್ರಾಯ ದೇವೆರೆ ದೇವಸಾನೊಗು ಪೋನಗ ಬಂಗಾರ್ ಬಣ್ಣದ ಒಂಜಿ ಕೇದಗೆ ಸಾದಿಡ್ ಅರೆಗ್ ತೋಜಿದ್ ಅವು ನಾಗ ದೇವೆರೆಗಾವುಂದು ಅವೆನ್ ಕೊಯ್ದ್ ದಂಡಿಗೆಡ್ ದೀಪೆರ್. ಅಪಗ ವೈದ್ಯನಾಥೆ ಪನ್ಪೆ "ಆದಿ ದೆಕ್ಕಾಡಿದ ಬಾಕಿಲ್ಡ್ ಪೆರಿಯ ಕೊಡಕಾಲ ಆದಿ ದೆಕ್ಕಾಡಿ ಸಾನ,ಅಲ್ತ ಬಂಗಾರ್ ಕೇದಗೆದ ಮರತ ಪುಡೆತ್ತ ಅಡಿಟ್ ಯಾನ್ ಮರಿತ್ತ ಕುರ್ಲೆಯಾದ್ ನೆಗತ್ತ್ ಬತ್ತೆ" ಪಂಡ್ ದ್.ತಿರ್ತ್ ದೀನ ಅರೆನ ದಂಡಿಗೆ ಮಿತ್ತ್ ದೆರ್ಪೆರಾಪುಜಿ. ನಿಮಿತ್ತ ನೋಟೊಡು ಬಲ್ಯಾಯುಲ್ಲಾಯನ್ ಕೇನ್ನಗ ದೈವ ಇಂಚ ಬೈದ್ಂಡ್ಂದ್ ಆರ್ ತೆರಿಪಾವೆರ್.ಅಪಗ ದಾನೆ ಆವೊಡು ಕೇನ್ನಗ ದೈವೊಲೆಗ್ ದೈವಸಾನ ಆವೊಡುಂದು ಆರ್ ಪನ್ಪೆರ್.ಆಂಡ ಅದಿ ದೆಕ್ಕಾಡಿದುಲಯಿ ಪೊಣ್ಣು ಪೊಂಜೊವುಗುಂತುದು ದೈವಾರಾದನೆ ಮಲ್ಪೆರಾಪುಜಿಂದ್ ಅರೆನ ಪ್ರಾಯೊಗು ಬರಂದಿ ಅರೆವಾಲೆನ್ ಉಂತಾದ್ ದೈವಾಲ್ಯೊಗು ಮೂರ್ತಕಾಲೊಡು ಕೆಸರ್ ಕಲ್ಲ್ ಪಾಡ್ಪಾವೆರ್.ಕೊಟ್ಯ ಕಟ್ಟ್ ದ್ ಐನ್ ದಿನತ ಉಚ್ಚಯಾದಿಲೆನ್ ನಡಪಾವೊಂದು ಬರ್ಪೆರ್.
ಅವ್ಲು ಕಣ್ಣೂರು ವ್ಯಾಪ್ತಿಡ್ ಅಳಪೆದ ಏಳ್ ಗ್ರಾಮದ ಮದ್ಯೊಡ್ಲ
ವೈದ್ಯನಾಥೆನೆ ಪ್ರಧಾನ.ಸೂರ್ಯನಾರಾಯಣ ದೇವಸಾನ,ಕದ್ರದ ಮಂಜುನಾಥ ದೇವಸಾನ ,ಅಡ್ಯಾರ್,ಕಣ್ಣೂರುಡು,ಬಜಾಲ್,ಕಂರ್ಬಿಸಾನ(ಎಕ್ಕೂರು-ಕಂರ್ಬು ದ ಪೀಲಿದ ನಡುಟಿಪ್ಪಿ ಸಾನ),ಅತ್ತಾವರ,ಪಚ್ಚನಾಡಿ ಬೊಕ್ಕ ಪದವು ಇಂಚ ಏಳ್ ಗ್ರಾಮೊಡ್ಲ ವೈದ್ಯನಾಥೆನೇ ಪ್ರದಾನ.ನಾಥ ಪಂಥದನೇ ಪ್ರಸರಣೆ.ಬಜಾಲ್ಡ್ ಲ ಇಕ್ಕೇರಿದ ದಂಡ್ ಬತ್ತಿ ಕಥೆ ದೈವದ ಪಾಡ್ದನೊಡುಂಡು.ಬಜಾಲ್ ಉಮನ ಪೂಜಾರಿನ ಮೈಯಾರಿಗೆಡ್ ಬತ್ತ್ ದ್ ಐನೂದು ತಾರಾಯಿನ್ ಅಜಕಾಯಿ ಕಲ್ಲ್ ಗ್ ಹಾಕಾದ್ ದಂಡ್ ದೆರ್ತ್ ದ್ ಬತ್ತ್ ನ ಮಂದೆನ್ ಮಾಯೆದ ನಿಲೆಟ್ ಪಿರ ಗಿಡೆರ್ದ್ ನ ದೈವ ವೈದ್ಯನಾಥೆ.ಅಲ್ತ್ ಪೆರ್ಗಡೆಬೊಟ್ಟು ಸಾನ ಆದ್ ಬೊಕ್ಕ ಬಡಕಾಯಿ(ದಕ್ಷಿಣಾಬಿಮುಖ)ದಂಚಿ ನಾಥ ಪಂಥದಕುಲು ಪೋಯೆರ್ಂದ್ ಪನ್ಪೆರ್.ದುಂಬುಗು ನಾಥ ಪಂಥದ ಪುರ್ಸ ಜೋಗಿಲು ಕೊಂಡಾಣ ಕೊಟೆಕಾರ ತಂಕರ ಬೈದ್ಯನ ಮಗೆ ಸಿದ್ಧ ಮರ್ದ ಬೈದ್ಯನಡೆ ಪೋಯಿನ ಇಚಾರ ಬರ್ಪುಂಡು.ಕೊಂಡಾನೊರ್ದು ಬೊಕ್ಕ ಕುತ್ತಾರ್ ಪಂಜಂದಾಯನ ಸಾನದಂಚಿ ಜೋಗಿ ಪುರ್ಸೆರ್ನೊಟ್ಟುಗು ವೈದ್ಯನಾಥ ದೈವ ಬರ್ಪುನ ಇಚಾರ ಉಂಡು.ತಂಕರ ಬೈದ್ಯಡ ಸಾಧನೆದ ಲಕ್ಷಣದ ಈ ಬಾಲೆನ್ ಎಂಕ್ಲೆಗ್ ಕೊರೊಡುಂದು ಪುರ್ಣ ಎರ್ ಕೇನ್ವೆರ್.ಎಂಕ್ಲು ಬಡಕಾಯಿಗ್ ಪೋದು ಬನ್ನೇಟ ಈ ಬಾಲೆಗ್ ಮದಿಮೆ ಮಲ್ಪೆರೆ ಬಲ್ಲಿಂದ್ ಪನ್ಪೆರ್,ಬಾಸೆಲ ದೆತೊನುವೆರ್.ಮೊಕ್ಲು ಪಿರ ಬನ್ನಗ ಮೂಲು ಮದಿಮೆಗ್ ತಯಾರಾತ್ಂಡ್.ಕೊಂಡಾಣೊರ್ದು ಬೊಕ್ಕ ಉಲ್ಲಾಲ ರಂತೆ/ಉಲ್ಲಾಲ ಬೈಲ್ ಬೊಕ್ಕ ಉದ್ಯಾವರ ಮಂಜೇಸ್ವರದಂಚಿ ಬೊಕ್ಕ ಪೋಯಿನ ಕತೆ ತಿಕ್ಕುಂಡು. .ಅಲ್ತ್ ರ್ದ್ ಬೊಕ್ಕ ನಾಲ್ವೆರ್ ಪುರ್ಸೆರ್ ವೈದ್ಯನಾಥನ್ ತುಳುನಾಡ ಕೆಲ ಬಾಗೊಲೆಡ್ ಉಂಡು ಮಲ್ತೊಂದು ಪೋಪೆರ್.ದುಂಬುಗು ರಾಮೇಶ್ವರ,ಲಂಕೆದಂಚಿ ಮಾರೀಚನ ಮಾಯಾ ವಿದ್ಯೆನ್ ಕಲ್ಪೆರೆ ನಾಥ ಪಂಥದಕುಲು ಪೋಯೆರ್ ಪನ್ಪಿ ಇಚಾರ ತಿಕ್ಕುಂಡು.
ಇಂಚ ತುಳುನಾಡ ಬಾರ್ಯಾತ್ ಜಾಗೆಲೆಡ್ ವೈದ್ಯನಾಥ ದೈವ ನಿಲೆಯಾತ್ಂಡ್.
ಶಂಭೂರುದ ಕೈತಲ್ದ ಜುಂಡಿ ಕೆರೆ / ದಿಂಡಿಗೆರೆ ಇರಂದೊಟ್ಟು ಸಾನ, ಬಂಟ್ವಾಳ ನಂದಾಂದ/ ನಂದನಬಿತ್ತಿಲ್, ಸುಜೇರ್/ಸುಜೀರ್, ಕಣ್ಣೂರು, ಬೈದ್ಯಾವು, ಕಂರ್ಬಿಸಾನ ಅತ್ತಾವರ, ಪೆರ್ಗಡೆಬೊಟ್ಟು, ಗುರುಪುರ, ಪಚ್ಚನಾಡಿ, ಕೋಟೆಕಾರ್, ಪಾವೂರು, ಕೋಟ್ರಗುತ್ತು, ಮುಲಾರ, ಪಜೀರ್, ಕುದ್ಕೋಳಿ, ಉಳ್ಳಾಲಬೈಲ್, ಉದ್ದಾರ, ಮಲಯಾಳ ಕೋಡಿ, ಸಾರ್ಲಪಟ್ಟ( ಕುತ್ತಾರ್),ಮಡ್ಯಾರ್-ಕೊಂಡಾಣ,ಸಗ್ತಿನಗರ,ಜಪ್ಪು ಮುಗೇರ್,ಪುತ್ತೂರುದ ಪಾಂಗಳ( ಅರಸು ವೈದ್ಯನಾಥೆ), ಬಾಕಿಲ-ಮಾಣಿ,ಇಂಚ ಮಾತ ಜಾಗೆಡ್ಲ ಮೂಡದಾಯೆ, ಮುಂಡತ್ತಾಯೆ,ಮುಂಡದಾಯೆ, ವೈದ್ಯನಾಥೆ ದೈವ ಆದ್ ನಿಲೆಯಾದುಲ್ಲೆ.
ನಮ್ಮ ಬರವುಗು ಪೂರಕ ಮಾಯಿತಿ ಒದಗಾಯಿನಾರ್ ಬಾರ್ಯಾತ್ ವರ್ಸೊರ್ದಿಂಚಿ ವೈದ್ಯನಾಥ ದೈವೊಗು ಕಟ್ಟುನೆಟ್ ತುಳುನಾಡೊರ್ಮೆ ಪುಗಾರ್ತೆ ಪಡೆಯಿನ
ವೀಡಿಯೋ ಕೊಂಡಿ:-
ವೈದ್ಯನಾಥ ಧರ್ಮ ನೇಮ ಸುಜೇರ್
ತೋಡಕುಕ್ಕಿನಾರ್ / ವೈದ್ಯನಾಥ ನೇಮ ಕಣಂದೂರು
No comments:
Post a Comment