ದೈವದ ಮೋನೆದ ಬಣ್ಣಗಾರಿಕೆ

ಇನಿ ತುಳುನಾಡ ದೈವೊಲೆನ ಅರ್ದಾಲ ಮಯಕಾದ್ ಅಡೆ ಬೇತೆ ಬೇತೆ ರಂಗ್ ಲು ಮೋನೆಗ್ ಬರೊಂದುಲ್ಲ.ತರೆತ ತರೆಪಟ್ಟದ ಬದಲ್ ಕಿರೀಟ ಬರೊಂದುಂಡು ಅರ್ದಾಲದ ಮೋನೆದ ಜುಮಾದಿ,ಲೆಕ್ಕೆಸಿರಿನ್ ಮರ್ಲ್ ಜುಮಾದಿ,ಮರ್ಲ್ ರಕ್ತೇಶ್ವರಿ ಮಲ್ತ್ ದ್ ಮೋನೆಗ್ ಕಪ್ಪು ರಂಗ್ ಪಾಡೊಂದುಲ್ಲೆರ್.ನಿಜವಾದ್ ದೈವೊನು ನಮ ಗುರ್ತ ಪತ್ತುನಿ ಮೋನೆದ ಅರ್ದಾಲದ ಒರುಟು ಪನ್ಪುನೆನ್ ಮದತ್ ದ.ಎಂಚಿನ ರಮ ರಮ ಇರ್ಲ್ ಡ್ಲ ಮೆನ್ಕೆಲ್ ಬೊಲ್ಪುಗು ಲಕ್ಜ್ ದ್ ತೋಜುನಿ‌ಮಂಜಲ್ ಬಣ್ಣ.ಅಂಚ ಅರ್ದಾಲದ ಮಂಜಲ್ ಮೋನೆಗ್ ಪಾಡೊಂತೆರ್.ಅಂಚನೆ ಅವೆಡ್ದ್ ಮೋನೆದ  ಆರೋಗ್ಯಲಾ ಒರಿಯೊಂತ್ಂಡ್.ಪೆಲತ ಮಂಜಲ್ ಪಂಡ ಪೆಲತ ಲಾಂಬುಡು ಅರ್ದಾಲ ಮಲ್ತೊಂತೆರ್.ಇತ್ತೆ ಪೇಂಟೆದ ರಂಗ್ ಡ್ ಮೋನೆಗ್ ಮಂಜಲ್ ರಂಗ್ ಪಾಡೊಂದುಲ್ಲೆರ್.

   ಬೇತೆ ಬೇತೆ ಕಲಾ ರಂಗದ ಮೋನೆದ ಬಣ್ಣಗಾರಿಕೆ ಇಂಚಿನವೆಂದೇ ನಿರ್ದಾರ ಆದಿತ್ತ್ ದ್ ಬೇತೆ ಬೇತೆನೇ ಅದಿಪ್ಪುಂಡು.ಯಕ್ಷ ಕಲಾ ರಂಗದ ದೇವೆರೆ ಮೋನೆದ ಬಣ್ಣಗಾರಿಕೆನೇ ಬೇತೆ.ದೈವಾರಾದನೆದ ದೈವೊಲೆ ಮೋನೆದ ಅರ್ದಾಲನೇ ಬೇತೆ.ಇನಿ ಯಕ್ಷರಂಗದ ದೇವಿನ ಮೋನೆದ ಬಣ್ಣಗಾರಿಕೆ ಕುಟುಮದ ಕಲ್ಲುರ್ಟಿನ ಮೋನೆಗ್ ಬೈದ್ಂಡ್.ಆಂಡ ಪಣೊಲಿ ಬೈಲ್,ಕಡಂಬುದ ಮೂಲ ಸಾನದ ಕಲ್ಲುರ್ಟಿನ ಮೋನೆದ ರಂಗ್ ಮೂಲ ಆರಾದನೆದಲೆಕನೆ ಇತ್ತ್ ದ್ ಕಪ್ಪುದ ಬಣ್ಣೊಗು ಸುಣ್ಣದ ಪುಳ್ಳಿನ್ ಮೋನೆಗ್ ಬರೆಪೆರ್.

ಗುಳಿಗನ ಮೋನೆಗ್,ಕಲ್ಕುಟ ಕಲ್ಲುರ್ಟಿನ ಮೋನೆಗ್,ಮಂತ್ರಜಾವದೆನ ಮೋನೆಗ್,ಕೊರಗತನಿಯನ ಮೋನೆಗ್ ಕಪ್ಪು ರಂಗ್ ಸುಣ್ಣದ ಪುಳ್ಳಿ ಪಾಡೊಂತೆರ್.ಆಂಡ ಇನಿ ಅರ್ದಾಲ ಪಾಡೊಡಾಯಿನ ಜುಮಾದಿಲೆಕ್ಕೆಸಿರಿಗ್ಲಾ ಕಪ್ಪು ರಂಗ್ ಪಾಡೊಂದುಲ್ಲೆರ್.

ನಿಜವಾದ್ ದೈವೊಲೆನ ಪುಗೆಲ್ ಗ್ ಯಕ್ಷಗಾನದ ಪುಗೆಲ್ ಗುಚ್ಚಿ ಕುಂಟು ಪಾಡುನ ಕೆರಮ ಇಜ್ಜಾಂಡ್.ಇನಿ ದೈವೊದ ಕಲೊಕು ಅವುಲಾ ಬತ್ತ್ ದ್ ಪೋಂಡು.ಗುಳಿಗಗಂಡ ಕೈಪುಂಡಯಿಂದ್ ತಾರೆದ ತಿರಿಟ್ ಮಲ್ಪುನ ಕೆರಮ ಇತ್ತ್ಂಡ್.ಒರಿನಂಚ ದೈವೊಲೆಗ್ ಪುಗೆಲ್ ಗುಚ್ಚಿ ಕುಂಟು ಕಟ್ಟುನ ಕೆರಮ ಇಜ್ಜಾಂಡ್.

  ಇನಿ ಕಲ್ಲುರ್ಟಿಗ್ ಕಟ್ಟುನಕುಲು ತಾನ್ ದೇವಿ ಮಹಾತ್ಮೆದ ದೇವಿಂದ್ ಎನ್ನಿದೆರ್.ಅಂಚನೆ ನುಡಿ ಕೊರ್ನಗ ಯಾನ್ ಆ ದೇವಿ ಈ ದೇವಿಂದ್ ದೇವಿನ ಪುದರ್ ಪನೊಂದುಲ್ಲೆರ್.ಕೆಲವೆರ್ ಸಂದಿ ಪಾಡ್ದನ ಮದತ್ ದ್ ಮಂತ್ರ ಪನೊಂದುಲ್ಲೆರ್.

ಚಾಮುಂಡಿನ ಕಿರೀಟ.

 ಇನಿ ಕೆಲವು ಕಟ್ಟುನಕುಲು ದೈವಾರಾದನೆ ದಾದಂದೆ ತೆರಿಯಂದೆ ಪೊಣ್ಣು ದೈವೊಗು ಕಟ್ಟ್ ನಗ ತಾನ್ ದೈವೊಗು ಕಟ್ಟೊಂದುಲ್ಲೆ ಪಂಡ್ ದ್ ಎನ್ಯಂದೆ ತಾನ್ ದೇವಿಂದ್ ಎನ್ನಿದ್ ತರೆಕ್ ತರೆಚೆಂಡ್,ತರೆ ಪೂ,ತರೆಮಣಿ,ತರೆಪಟ್ಟ ದೀವಂದೆ ತರೆಕ್ ಯಕ್ಷಗಾನೊಡು ದೇವಿಗ್ ದೀಪುನ ಕಿರೀಟ ದೀಯೊಂದುಲ್ಲೆರ್.ಮೊಕ್ಲು ದೈವಾರಾದನೆನ್ ಜೋಕ್ಲೆ ಗೊಬ್ಬುಂದು ಎನ್ನಿದುಪ್ಪೊಡು. 

ತನಿಮಾನಿಗ

ದೈವೊನು ನಮ ದೈವ ಆದೇ ಆರಾದನೆ ಮಲ್ಪೊಡು.ದೈವದ ತುತ್ತೈತ,ಬಣ್ಣಗಾರಿಕೆ ದೈವದನೇ ಆದಿಪ್ಪೊಡು.ಅಂಚನೆ ಮೂಲ ಮೈದಂದಾಯಗ್ ಎಚ್ಚಾದ್ ಅರ್ದಾಲ ಪಾಡಂದೆ ಮೋನೆಗ್ ಗಂದ ಪೂಜಿದುಪ್ಪುವೆರ್.ಅಂಚನೆ ಜಠಾಧಾರಿನ ಮೋನೆದ ರಂಗ್ ಮಾತ ಅರ್ದಾಲೊರ್ದು ಎತ್ತೇಸ ಆದಿಪ್ಪುಂಡು.

    

ಚಾಮುಂಡೇಸ್ವರಿ ದೈವ ಅಮ್ಮುಂಜೆ

  

ಜಠಾಧಾರಿ ದೈವ

ಕೆಲವು ತಿಕ್ ಡ್ ಗುಳಿಗಗ್ ಕಟ್ಟುನಕುಲು ತಾನ್ ಕುಲ್ದ್ ನ ಪಜೆನ್ ದಕ್ಕೊಂದುಲ್ಲೆರ್.ಉಂದು ತಪ್ಪು.ದಾಯೆ ಪಂಡ ಗುಳಿಗೆ ಸಾತ್ವಿಕ ದೈವ.ದುಂಬು ಗುಳಿಗಗ್ ಕೋಲ ಕಟ್ಟೆರೆ ಇಜ್ಜಾಂಡ್.ಗುಳಿಗನ‌ ಬನೊಟು ಕೋರಿ ಕೊಯ್ದ್ ನೆತ್ತೆರ್ ಬಿಂದು ಕೊರೊಂತೆರ್.ಇನಿ ಅಬತಾರ ಕಟ್ಟುನತ್ತಂದೆ ಜೂವ ಜೂವದ ಕೋರಿನ ಪಗಿತ್ ತಿನ್ಪುನೊಟ್ಟುಗು ದೈವಾರಾದನೆನ್ ಕ್ರೂರವಾದ್ ತೂಪಾವೆರ್.ಅಂಚನೆ ತಾನ್ ಕುಲ್ದಿ ಅಡಿತ ಪಜೆನ್ ಸಬೆಕ್ ದಕ್ಕ್ಂಡ ಅವತೊಟ್ಟುಗು ಪೊಯ್ಯೆ ಏರ್ನಾಂಡಲ ಕಣ್ಣ್ ಗ್ ಬೂರ್ಂಡ ಏರ್ ಜಬದಾರಿ?.ಅಂಚನೆ ಮದಿಪುನ ದುಂಬೇ ದೈವದ ಬಂಡಾರದ ಬೆರ್ತೆಕ್ ಬಣ್ಣ ಪಾಡೆರೆ ಕುಲ್ನಕಗಲೆಗ್ ವಾದ್ಯ ಉರಿಪುನಗನೆ ವಸಾಯ ಬರ್ಪುಂಡು ಪಂಡ ಮಾಯೆ ದುಂಬಾ ಮದಿಪು ದುಂಬಾ ಅರ್ಥ ಅವೊಂದಿಜ್ಜಿ.

ಮಂತ್ರ ಜಾವದೆಗ್,ಕಲ್ಲುರ್ಟಿಗ್ ಕಟ್ಟುನಕುಲು ಪೂರಾ ಕೋಲ ಕಟ್ಟ್ ನಗ ಕರಿಯಣಿ ಪಾಡೊಂದುಲ್ಲೆರ್.ನಿಜವಾದ್ ಪೊಣ್ಣು ದೈವೊಗು ಕಟ್ಟುನ ಆಣುಲು‌ ಕರಿಯಣಿ ಪಾಡುನವು ಸರಿಯತ್ತ್.ದಾಯೆ ಪಂಡ ಕರಿಯಣಿಗ್  ಅವೆತನವೇ ಆಯಿನ ಪಾವಿತ್ರ್ಯತೆ ಉಂಡು.

 ಪೊಸಪ್ಪೆನ ಆರಾದನೆಡ್ ಮೋನೆಗ್ ಕಪ್ಪುದ ರಂಗ್ ಇತ್ರ್ ದ್ ,ಕುಂಕುಮದ ಗೆರೆಕುಲಿತ್ತ್ ದ್ ಬೊಲ್ದುದ ಪುಳ್ಳಿಲಿತ್ತ.ಇನಿ ಅಡೆಗ್ ಪಚ್ಚೆ ರಂಗ್ ಬೈದ್ಂಡ್.ದೈವಾರಾದನೆ ಓಡೆ ಎತ್ತೊಂದುಂಡುಂದು ಅರ್ಥ ಆವೊಂದಿಜ್ಜಿ.

ಇನಿ ತುಳುನಾಡ ಲೆಕ್ಕೆಸಿರಿ,ಉಲ್ಲಾಲ್ದಿನಕ್ಲೆನ್ ಅಷ್ಟಮಂಹಲ ಪ್ರಶ್ನಾ ಚಿಂತನೆ,ಬ್ರಹ್ಮ ಕಲಶ ಆಯಿಬೊಕ್ಕ ದುರ್ಗಾ ಪರಮೇಶ್ವರಿ ಮಲ್ತೊಂದುಲ್ಲೆರ್.ಅಡೆಗ್ ವೈದಿಕ ಪೂಜೆಲೆನ್ ಕನತ್ ದ್ ದೈವೊನು ತುಳುವೆರ್ ಕೈ ಬುಡ್ದು ದೈವೊನು ದುರ್ಗಾ ಪರಮೇಶ್ವರಿಯಾದ್ ನಂಬುದು ಮೂಲ‌ದೈವದ ಪುದರೇ ತುಳುವೆರೆಗ್ ತೆರಿಯಂದಿನಾತ್ ಮದೆಕ್ ಸೇರ್ದ್ಂಡ್.ಆತೆನಾ ದೈವದ ಬಲಿ ಸುತ್ತುಗು ಒಂಜಿ ಸುತ್ತು ಬಜನೆದ ಸುತ್ತು ಬೈದ್ಂಡ್.ಬೇತೆ ಬೇತೆ ಪೂಜೆಲು,ಅರ್ಚನೆಲು ಅಡೆ ಬತ್ತ್ ದ್ ದೈವೊಲು ಮಯಕಾದ್ ದೇವಿಯಾದ್ ಮೂಲ ಪದಿನಾಜಿ ಚಾಕಿರಿದಕ್ಲೆನ್ ಪಿದಯಿ ಪಾಡ್ದ್ ಒಂಜಿ ವರ್ಗ ದೈವೊನು  ದೇವಿಯಾದ್ ಪೂಜೆ ಮಲ್ತ್ ದ್ ಬಂಜಿ  ದಿಂಜಾವೊಂದುಲ್ಲೆರ್.

     

ಪಿಲ್ಚಂಡಿ ದೈವದ ಮೋನೆದ ಅರ್ದಾಲ ಪೋದು ಪಿಲಿತ ಏಸದ ಮೋನೆದ ಬಣ್ಣಗಾರಿಕೆ ಬೈದ್ಂಡ್.

  ದೈವೊದ ಗಂದೊನು ಮುಂಡೊಗು ಒರಂಕಂದಿನ,ದೈವೊದ ಬೂಲ್ಯ ಪತ್ತಂದಿನ,ದೈವದ ಆವಾರೊಗು ಒಂಜಿ ಪಂರ್ದ್ ದ ಚೋಳಿ ದೆತ್ತ್ ಕೊರಂದಿನ,ದೈವದ ಅಸರ್ ಗಾದ್ ಒಂಜಿ ಬೊಂಡ ಕೆತ್ತ್ ಕೊರಂದಿನಕುಲು ದೈವದ ಚಾಕಿರಿ ಮಲ್ಪಂದೆ ದೈವೊನು ದೇವಿ ಮಲ್ತ್ ದ್ ಮುಗ್ದ ತುಳುವೆರೆ ಬದ್ ಕ್ ಡ್ದ್ ದೈವೊನು ಮಾಜಾವೊಂದುಲ್ಲೆರ್.ಆಂಡಲಾ ನನಲಾ ತುಳುವೆರೆಗ್ ಗೇನ ಬೈಜಿ.

  

ದೈವದ ತುತ್ತೈತದ ಕೇಪುಲು ರಂಗ್ ಮಯಕ(ಓಡಮರಾಯ ದೈವ.ತಿಂಗಳೆ ಗರಡಿ ಹೆಬ್ರಿ